_I Khawthlir Dan Thlak_
By Rick Warren
— August 31, 2025
_"Fimkhur ula, awhna reng reng lakah chuan inveng rawh u; sum ngah hi mihring dam chhan a ni lo ve."_ (Luka 12:15)
Duhamna leh huamhapna khawvelah hian Isuan a hnung zuitute chu amah anga awm turin min duh - nun hautak lo leh awlsam te a nung turin.
Isua khan nun khawsak awlsam tak min hmuhtir. A nundan leh nung ve tura min duh dan kha.
Thudik chu hei hi a ni, neih i ngah poh leh i ngaihsak, enkawl, tihfai, venhim, lukhawng nei tura ruahman leh siamṭhat tur i ngah tihna a ni. Bungrua i ngah poh leh i nun a awpbet tihna a ni.
I thilneih te khan an nei let thei che tih i hria em? Heti hian ngaihtuah teh: Pathianin midang hnena pe tura a tih che i la kawl tlat angin han ngaihtuah teh. Mahse i tan pek chhuah kha a harsa em em thung si a - i ṭhen phal thlawt lo a. Chumi hunah tak chuan kha thil kha i neih ni tawh lovin; amahin a nei let tawh che a ni. I thil neih khan a nei let tawh che anih chu.
Luka 12:15-ah chuan heti hian kan hmu, _"Fimkhur ula, awhna reng reng lakah chuan inveng rawh u; sum ngah hi mihring dam chhan a ni lo ve."_
Mi hausa an thihin miin heti hian an zawt fo: "Eng ang taka tam nge a thihsan ang aw?" tiin. Ka hrilh ang che u. Engkim a kalsan vek! Heti hian inzawt ve teh, "I chhawm ve zel theih loh chuan engvangin nge i khawl ṭeuh ang?"
Miin an hun, tha, theihna leh talent-te hi thil neih belh nan an hmang fo ṭhin. An neih theih aia ṭha leh lian in leh lirthei an lei a, a man pe tlak turin hah em ema an thawh a lo ṭul ṭhin a ni.
Bible chuan chutiang anga ti lo turin min ti. Chung thil atan chuan hun hmang ral lo turin min ti. I sum aiin i hun kha a hlu em em zawk. Sum tam zawk i siam thei, mahse hun erawh i siam belh thei lo. He leiah hian hun rei lote chauh i nei asin.
Isua kha awlsam taka a nun rualin theihna nen a nung bawk.
Matthaia 19:36-ah chuan heti hian Isuan a ti, _"Pathian nen chuan engkim tih theih a ni."_ Marka 9:23-ah heti hian a ti bawk, _"Ringtu tan chuan engkim tih theih a ni."_
Pathianin heti hian a sawi ang a ni, "Min rin chuan thil nih theih dan tur kawng tam takin a inhawng."_
Isua hnung zuitute hi he leiah hian thil siam chhuak thiam ber leh tihdanglam thiam ber an ni tur a ni tih hi ka rin dan a ni. Engvangin? "Engkim" tih theih a ni titu Pathian rawngbawl kan ni tlat a. Engkim hi tih theih a ni titu chunga rinna kan nghah chuan i theihna a pawt fan ang.
Hei hi mak i ti mai thei - mahse kan nuna min daltu lian ber chu hlawhchhamna emaw tihsual emaw a ni lo, kan rin lohna zawk hi a ni. Nangmah siamtu leh hmangaihtu Pathian rin lohna kha.
Rin lohna i neih khan i theihna a titlem a ni. Pathian i rina amaha i innghah ngam poh leh - harsatna nasa tak karah pawh - i nun, chhungkua leh eizawnna kawngah hna a thawk nasa leh zual ang. Pathian puihna i tawn nasat poh leh amaha i rinna a zual zel ang.
Isua nun ṭawmpuia khawsak hautak lo taka awm leh theihnaa innghah chuan thil pawimawh ber hre turin min pui - i nunkawng engkimah Pathian chunga rinna nghat turin a sawm che.
Ngaihtuah zui atan.
I thil neihte an nei let che em? Pathianin midang hnena le tura a tih che pek phal loh i nei em? Pathianin i nuna thil ni theite a tak a chantir i hmuh khan eng laiin nge i rinna a ṭhan len?
I nunkawng engah te nge i rin lohna hmanga Pathian i dah pawimawh loh?
[Lettu: Mapuia Fanai]