Wednesday, August 20, 2025

KHAWVEL KEH SAWM KARA HLIMNA THURUK

_I Khawthlir Dan Thlak_

- Rick Warren
- August 20, 2025
"Lalpa chu amah nghaktute tan a ṭha a, amah zawngtute tan chuan," Ṭah Hla 3:25.

Keh sawmna, vanduaina te, chhiatna te, thihna awmna hmunah te kan awm a. Chu hmunah chuan rilru natna leh beidawnna te, inlaichinna kawnga inhlatna leh inrem lohna te, thlarau lama lungawi lohna leh thimna  te a awm a. Khawvelah hri ang maia beisei tur reng awm lo va, beiseina a han bote hi thilmak a ni hran lo. He keh sawmna hmun hi kan tâwpna tur ni se a beidawnthlak hle ang-mahse a ni si lo. Chanchin lawmawm tak a awm e!

Engtin nge hrehawm, natna leh lungngaihna khawvelah hian i hlim theih ang? Eng tin nge taksa chhe tawh, inlaichinna keh chhia leh beisei tur reng awm lohna hmunah hian i hlim theih ang?

Jeremia tih ang hian han ti ve teh. Jeremia chu zawlnei, tuarna leh beidawnna nasa tak lo pal tlang tawh a ni a. Ṭah Hlaah chuan heti hian a sawi," Nangin muanna ata ka nunna i sawn daih a, thawvenna chu eng a nih pawh ka hre ta lo. Ka tuarna leh ka vahvaihna, sai leh mît khâte chu hre reng ang che. Ka nunna hian chungte chuan a hre reng zel a, ka chhungah hian a kun reng a ni. Hei hi ka han hre chhuak leh ta a. Chuvang chuan beiseina ka nei ta. Tihborala ka awm lo hi Lalpa zahngaihna a lo ni, a lainatnate chu a kang ngai loh avangin. A thar zel ṭhin tûk tinin, i rinawmna a ropui e. Lalpa chu ka chanpual a ni, ka nunnain a ti a, chuvangin, amah chu ka beisei ang! Lalpa chu amah nghâktute tan a ṭha a, amah zawngtute tan chuan," Ṭah Hla 3:17, 19-25.

Keh sawm, buai nuai leh tihchhiat tawh hnu khawvela hlimna kawng ber chu: Lalpa chiah hi i mamawh chu a ni tih hi.

Mi dangah i rinna nghat suh. An tihnual ang che. Thil awm danah i rinna nghat suh, chu chuan a tibeidawng ang che. Khawvel thilah innghat suh, a daih rei dawn si lo.

Pathianah i rinna nghat rawh. A Thu aṭanga i tana a thutiam leh hun liam tawha i laka a rinawmna kha hre reng rawh. Tichuan a ngilneihna chuai ngai lo chu nakin hun atan i rinchhan thei ang a. Lawm taka a thu awihin, "Lalpa hi ka mamawh chu a ni a. Amah chu ka rinchhan ang," i ti dawn nia.

Ngaihtuah chhunzawm atan.

Jeremia ṭawngṭaina hian i tuar laia Pathian hnena ṭawngṭai dan engtin nge a zirtir che?

Eng vangin nge hun harsa tak i pal tlang loh lai pawha Pathian chiah hi i mamawh a ni tih rin i zir a ngaih?

Hun kal tawhah Pathian hi i lakah engtin nge a lo rinawm tawh ṭhin?

[ *Lettu: Marova Punte* ]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...