Wednesday, April 27, 2022

HUN REMCHANG SIAMSAK LEHNA MAMAWHTU TE TAN

  By Rick Warren 

— 04/27/2022



 "Tun hma thilte chu hre reng suh ula, hmasâng thilte chu ngaihtuah hek suh u. Ngai teh u, thil thar ka ti dawn e; tun apang hian a ṭiak ang; chu chu in hre dawn lawm ni? Thlalêrah meuh pawh kawng ka siam ang a, ram rovah chuan luite ka siam bawk ang." Isaia 43:18-19


Kan Bible hi hun remchang siam sak lehna dawngtute chanchin in a khat a. Pathian chu khawngaih leh chhawna petu - vawi za leh sang chuang hun remchang min pe nawn tu Pathian a ni!


Abrahama chu rinna pa tia koh a ni a, amaherawh chu a nupui meuh pawh a farnu angin lem a chantir duh hial a, a chhan chu Pathianin a chhanhim ang tih rinna a neih loh vang a ni. Mosian mi a that a. Jona kha a tihtur ti lovin a tlanbo bawka. Rahabi pawh nawhchizuar a ni. Davidan mi nu a uirea, a pasal a thahsak zui leh nghal. Mahse heng mite zawng zawng hi rinnaa fakhlawhte Hebrai 11-a tarlan zingah an tel anih chu.


Pathian chuan hun remchang min siamsak leh hi a duh em em a. Pathian khawngaihna dawng turin mi famkim nih ngai sela, tumah a hmaa ding thei an awm lovang!


Joba hnen aṭangin thurawn pawimawh tak kan nun ata kan vahbona avanga Pathian thil ruahmannaa kirleh dan kan hmu a ni: “Nang chuan i thinlung i dah dik a, a lama kut i phar chuan; i kuta khawlohna a awm chuan dah bo daih la, i puan inah fel lohna cheng suh sela; Tichuan, hmêlhem lovin i dak chhuak ngei ang: a ni, i nghet ang a, i hlau lo vang; i hreawm i theihnghilh ang a, tui luang bo tawh angin i hre reng ang: i nun chhun chang aiin a en ang. Thim pawh awm se, zing ang a ni ang. Tin, muanawm takin i awm ang, beisei a awm vangin; a ni, i en vêl ang a, muang takin i chawl ang.” Joba 11:13-18.


Chu thutiam chu a va ropui tak em! I sualnate i sim anih chuan, Pathianin hun remchang dang siam sak che a inhuam reng a ni. Amah chu  rawn pan tawp mai la, khawvel hi huaisenna leh beiseina neiin i hmachhawn leh thei ang.


Pathian thil ruahmanna in tah luh ve i duh chuan, i nunhlui hlui chu i thlahliam angai a. Hma lam pana ke pen tur chuan i lusunna te, i inchhirnate leh i thil veite erawh chu i theihnghilh angai ve thung a ni.


“Tun hma thilte chu hre reng suh ula, hmasâng thilte chu ngaihtuah hek suh u. Ngai teh u, thil thar ka ti dawn e; tun apang hian a ṭiak ang; chu chu in hre dawn lawm ni? Thlalêrah meuh pawh kawng ka siam ang a, ram rovah chuan luite ka siam bawk ang." Isaia 43:18-19.


I hun thim lai ber chu zing ni chhuak angin a eng anga. I tawrhna thlaler ramruak aṭang chuan luite tui a lo chik chhuak ang.


Halleluiah! Vawiin hian Isua hnena i inpek chuan hei hi a thutiam leh i nunna atana a thil tum chu a ni.


Ngaihtuah zui atan


* Eng kawngah te khan nge tunhmain ilo awm?


* Lusunna, inchhirna leh thil vei neihna - eng ber hian nge hmalam huna beiseina i neih theihna dal tu che?


* Bible-a Pathian thutiam te hi i tan anih ve i ring em? Engtin nge a thutiamte chu i tan a ruat ve nia i hriat?

Wednesday, April 20, 2022

PATHIAN THIL RUAHMAN CHU I TANA ṬHA TUR ANIH BAKAH AMA ROPUINA TUR A NI

 -- Rick Warren 

— 04/20/2022



“Keimahnia thawk ṭhin thiltihtheihna ang zelin, kan dil leh kan ngaihtuah zawng zawng aia nasa zawk pawh a ti thei" Ephesi 3:20


Pathian thil tum chu nangma thil tum ai chuan a lian zawk fo ang.


Chu chu engtin nge ka hriat? Pathian thutiam anih avangin: “Keimahnia thawk ṭhin thiltihtheihna ang zelin, kan dil leh kan ngaihtuah zawng zawng aia nasa zawk pawh a ti thei" Ephesi 3:20


I nuna i thil tum lian ber kha han ngaihtuah teh, chu ai pawh chuan Pathian chu a la sang zawk. I thil tum leh ngaihtuahna phak bakin ani chuan a hneh daih che a ni! Nangmah nawrkal mai mai tur chuan thil tum a neihsaklo che a. Chu ai mah chuan, amah i hnaih theih nan leh thuhnuairawlh leh zaidam tak chungsiin hna a thawk zawk a ni.


Pathian chuan thil tum lian tak pek a tum satliah lo che a. I tana thil tum a neih hnuah chuan, thil dang lo thleng tur chu a ruahman sak mai zawk che a ni.


I nunah hetiang hian i ngaihtuah tawh maithei a, “Pathian puihna tello chuan engmah hi a thleng theilo.” Engti zawng mahin i mamawh hun takah mi i hmu thei ngawt biklo, emaw pawisa pawh i mamawh lai takin a lokal ngawt biklo, emaw chu vanneihna chu i mamawh lai taka lo thleng thut thei pawh a ni chuang lo.


Pathian ruahmannaah i luh tawh chuan, i hlah tawh ngai lo vang, a chhan chu Pathianin hlawhchhamna a siam hranlo. Hlawhtlinna chu loh theih loh a ni tawh! I ngaihtuah ang pawhin thil a kal lo vang, a chhan chu Pathian chuan nang aiin thil a hre zawk daih, amaherawh chu i tana ṭha tur leh Pathian ropuina tur hlirin a thawk zawk ang.


Pathian chuan Thupuan 3:8 ah, “I thiltihte ka hria, chakna tlemte chauh i nei a, chutichung pawhin ka thu i pawm a, ka hming pawh i phat lo va, tuma khar theih loh i hmaah kawngka ka hawng e" a ti. Pathianin thil tum nangmahah a neih tawh chuan, chu a thil tum chu a lo hlawhtlin theih nan nangmahah kawng a rawn ruahman mai tawh zawk a ni.


Chu kawngka hawnsaah chuan huaisenna nena i kal a ngai ta a ni. Chutah chuan rinna a pawimawh ta chiah a. Mi tam takin an nuna Pathian thil tum an hriaa amaherawh chu chu kawngka zawha va thih palh an hlau ṭhin a ni.


I thil tum leh ruahmanna te Pathian hnena i hlan theih chuan a ni chuan chu i thil tum chu a thlen dik tir thei a ni. Kawngka hawn a nih chuan zawh thei tura i inbuatsaih a ngai a. Chuvang chuan vawiinah hian chu kawngka chu zawh turin inpeih rawh le.


Chu kawngka chu i zawh anih ngat chuan i thil duhzawng takah chuan a hruai thei che a ni. Hlah phal reng reng suh ang che!


Ngaihtuah zui atan


* I nuna i duhthusam lian ber engnge ni?


* Pathianin i tana a kawng ruahman chu a tihhlawhtlin theih nan Thlarau Thianghlim chuan engtin nge nangmahah hna a thawh?


* Pathianin i tana kawng a lo hawn diam tawh, zawh tura a duh che chu engtin nge i hriat theih ang?


*[Lettu: Sangpuia]*

Tuesday, April 19, 2022

I TANA NUN DUHAWM ZAWK CHU

- Rick Warren

- April 19, 2022



“Nangni lama ka rilru putzia chu ka inhre si a, in hun hnuhnung tawpah chuan beseina pe tur che uin thil ṭha ni lovin ṭhatna ka ngaihtuah asin.” Jeremia 29:11


I pianhma aṭang daih tawhin, i nun zelna turin Pathianin a ngaihtuah lawk diam tawha. Mahse kan keimahni zawk hian Pathian duhdan ni lovin kan duhzawng lam ngawt ngaihtuahin kan hmanhlel ṭhin. Pathianin min siamna leh enkawlna ai chuan thil hrezawkah kan inruat tlat a ni.


Ephesi 2:10 ah chuan, “Thil ṭha ti atan Krista Isuaah chuan siama awmin ama kutchhuak kan ni si a; chu thil ṭha tih chu kan awmna turin Pathianin a buatsaih lawk a ni” a ti.


I nunna atan hian nangma ngaihtuahna ai chuan Pathian ngaihtuahna chu i mamawh zawk a ni. Engvang nge? Mahni i inhriat chian aiin Pathianin a hriatchian vang zawk che a ni. He khawvela i kawngzawh tur awm leh i tana a thil ruahman chu a hrechiang hle a ni. Engtiklai mahin engmah hi i hre vek thei lova, thil thlir dan dik pawh i nei reng theilo – Pathian erawh chuan a thei a ni.


Pathianin i tana a thil ruahman ah chuan ruahmanna hrang hrang leh i tihhlawhtlin tur thilte a siamsak che a – a ruahmanna chu i ruahmanna ai chuan a ṭha zawk a ni.


Pathian chuan i thil ngaihtuah apiangte tihlawhtling turin a tiamlo che a. Nangma kutzalah pawh thil tamtak a dah ve thova, “thil ṭha ti atana siam” tih phei chu ruahmanna atana i thlan lemloh pawh a ni thei e. Ka naupan laia ka nih chak ‘rock star’ nih ve pawh i chak hial maithei zawk a ni. Vanneih thlak takin chu chu Pathianin ka tana a thil ruahman a ni lova, chu aia ṭha zawk chu ruahmanna min neihsak a ni.


“Nangni lama ka rilru putzia chu ka inhre si a, in hun hnuhnung tawpah chuan beseina pe tur che uin thil ṭha ni lovin ṭhatna ka ngaihtuah asin.” Jeremia 29:11


I ruahmanna te chu duhthlan fuh tawk loh emaw buai deuh pawh a awm mai thei e. Mi tuemaw chu kawppui atana i lo huallawk tawh, remchang lehlo pawh an awm thei a.  Mahse, han thlirlet chuan, lo nei ta chiah la i tan chhiatna te pawh anni ve thei tho a ni. I ruahmanna thil dangte pawh chu tawpsan i duha, chu chu i tawpna turah te pawh i ngai maithei e. Mahse tun hnua han thlir let hian, chu chu i tana Pathianin ruahmanna ṭha zawk a siam bulṭanna tur lek chauh a ni.


Pathian thil ruahman leh nangma duhdana ruahmanna i siam ve te ah duhthlan theih  anih chhung chu Pathian ruahmanna chu thlang zar zar ang che. I tana Pathian thil ruahman chu a ṭha zawk fo. A ti chhe miah lo vang che. Beiseina lian tak leh hmalam hun duhawm tak a pe dawn che a ni!

    

 

Ngaihtuah zui atan


* Nangma puala ruahmanna i siam tihhlawhtlin theih ni ta lo te kha ngaihtuah teh. Chu chuan Pathiana innghah dan engtin nge a zirtir che? 


* Pathianin i tana thil a ruahmannate chu engte nge nia i hriat? Engtin nge chung ruahmanna te chu nangmah a hriattir che?


* I ruahmanna te Pathiana hlan tawp awmzia hi engnge ni?


*Pathianah ila innghat lo anih chuan, engah nge ila nghah cheu?*


Pathian chuan midangte nena inrema awmturin min duha, amaherawh chu amah nena inrem phawt turin min duh a ni. Chuvang chuan a khawngaih thilpek chu pawmla, tichuan Isuan i sualna man zawng zawng a tlak tawh a ni tih i hria ang.


“Aw Lalpa, misual ka nih ka inhria e, chuvang chuan i mi ngaihdamna ka dil a che. Isua Krista hi i fapa a ni tih ka ring e. Ka sualnate avangin a thi a, nang erawh chuan i thihna hnehin i kaitho tih ka hria e.  Vawiin aṭang hian ka chhandamtu atan ka ring che a, ka Lalpa tiin ka zui duh a che. Ka nunkawng kaihruai la, i duhzawng ka tih theihnan min pui ang che.


Isua pawm tura i ṭawngṭai thei anih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawh a thlawnin ka pe dawn che nia.   


*[Lettu: Sangpuia]*

Wednesday, April 13, 2022

HLAUHNA TIKIANGTU THAWHLEHNAA THUDIK CHU

- Rick Warren

- April 13, 2022



“… mi zawng zawng thih aiin mi pakhat a thi a; chuvangin, mi zawng zawng chu an thi a ni; tin, a nungte chu anmahni tan an nun tawh loh va, an thih aia thia tho leha tan chuan an nun tawh zawkna turin a ni mi zawng zawng thih aiin a thih ni.” 2 Korinth 5:14-15


Kan Bible hi thupekin a khata. Amaherawh chu engber hi nge tlanglawn ber i hria em?


Hlau suh


Bible-ah vawi 365 i hmu ang, Thawhlehna chanchinah pawh a tel a ni. “Hlau suh” tih chu Thawhlehni tuka thlana kalte hnena vantirhkoh ṭawngkam hmasa ber a ni. Isua a Thawhleh hnua a ṭawngkam chhuak hmasa a ni lehzel a ni.


Bible leh Thawhlehna chungchanga a lo lang fo mai hi thil mak a ni lo ve. Hlauhna hi mihringte harsatna tlanglawn tak pakhat a nih vang a ni.


Mi dawihzep tak niin i inngailo maithei e. Amaherawh chu i thutlukna hrang hrang te kha hlauhna i neih vang a ni tih i inhrelo maithei, chungte chu miin an sawidan tur che hlauhna vang emaw hlawhchham hlauhna avang emaw te hi anni.


Mahse Thawhlehna chuan chanchin lawmawm a rawn thlen! Isua Krista Thawhlehna avang chuan tunah chuan hlau lovin i awm thei ta. Bible-a 2 Korinth 5:14-15 ah chuan, “… mi zawng zawng thih aiin mi pakhat a thi a; chuvangin, mi zawng zawng chu an thi a ni; tin, a nungte chu anmahni tan an nun tawh loh va, an thih aia thia tho leha tan chuan an nun tawh zawkna turin a ni mi zawng zawng thih aiin a thih ni.”


Krista thawhlehna duhdana i nun i hman chuan, Bible sawi angin nun duhawm zawkin i nunga, hlauhna aṭangin i fihlim ta a ni.   


A dika dik chuan, i hrethiam anih chuan thawhlehna chuan a tih zalen dan che  kawng nga a awm a. Ni hnih chhungin tarlan kan tum dawn a ni.


*Pakhatnaah chuan, Isuan thudik a hrilh che tih hi.* Mi tam tak Pathian emaw Messia emaw a inchhal an awm – mahse mi pakhat chauhin a  nemnghet a ni. Bible chuan, “[Isua] chu mitthi zinga ata a thawhlehnaah chuan Pathian Fapa a nih nasa takin a hriattir a” Rom 1:4


Isuan, thawhlehna tello chuan engmah awih tur a awmlo a ti. Mahse Isuan heng thu a sawi, Pathian, vanram, leh thildang hrim hrim pawh nise i awih thei ang, achhan chu a sawi ang ngeiin a tho leh ngei a ni.


*Pahnihnaah chuan, thihna hi a tawpna a ni lo tih hi*

Isua thlan ata a thawhleh hma chu, thihhnu piah lamah nunna a awm a ni tih pawh i hrelo ang, a finfiahna a la awmloh vang a ni. Bible chuan, “Lalpa Isua kaithotu chuan keini pawh Isua hnenah min kaitho ve dawn a, nangmahni nen min dintir dawn tih kan hre si a” 2 Korinth 4:14


Thihna chu i hlauh angai tawh lo, a chhan chu Isua thawhlehna khan thihna hi thawnthu tawpna a ni lo tih min hrilhfiah a ni. Pathian ang chhunga chatuana nun kan neih theihna tur bul ṭanna a ni.


Hlauhna tellova nun zirna chuan i nun a tidanglam dawrh ang! Naktuk lamah Thawhlehna avanga thudik kan chan kawng thum ka lo tarlang leh ang.


Ngaihtuah zui atan


* Hlauhna avanga Pathianin nangmaha thiltum a neih tihtir theilo tu che eng nge ni? 


* Engvangin nge kan nunna hi hlauhnaa khat vek nia i hriat?


* Hlauhna tello nun chu engang nge ni ang le? Chu chuan nitina midangte nena i nundanah engtin nge  a nghawng?


*Hlauhna in salbeh tir reng hi i ning ve tawh em?*


Tunge i nih tih leh khawi aṭanga lokal nge i nih tih a pawimawh lo. I nun chu Isua Krista hnenah i hlan duh chuan, kawng chu zau taka hawnin a awm a ni.


He ṭawngṭaina mawlte hmang hian i ṭawngṭai thei ang: “Aw Lalpa, a dera nun reng leh lemchan nun hmana mite tlawn reng leh ka nih theih loh tur mi famkim nih tuma hun hman reng hi ka ning ve tawh a. Ka nun hlui avanga hrehawmna insiam reng hi ka peih tawhlo a ni. Hnawl nih hlauhnate leh chiang zawka inhriat hlauhnate  hi ka ning tawh a. Liam tir vek ka duh tawh a ni.


“Lalpa, zahna, pawi tihna, inchhirna leh lungngaihna min thlentu zawng zawngte i hnenah ka hlan fel ta che a. Chutianga hun hman chu ka duh tawhlo a ni!  Zalen taka nun hman ka duha, chu chu I Fapa Isua Krista aṭang chauhin a neih theih tih ka hria a ni.


“Vawiinah hian ka sualnate ka puanga, min ngaidam turin ka dil a che. Kross a i thihna leh thawhlehna avanga min ngaihdamna leh min pawmnaah hian lawmthu ka hrilh a che. Ka Lalpa ni turin ka pawm ta che a, damchhunga i hnung zui hi ka duh a ni. I hmangaihna, beiseina in min chhungkhat la, hlauhna ni lo vin, rinnaa ke pen thei turin min pui ang che. Isua hmingin ka dil e. Amen


Tunah khan i ṭawngṭai thei a nih chuan, hetah hian minlo bia la Rick@PastorRick.com min han hriattir ang che. Isua nena zinkawng i zawh theihna tura thi pawimawh ka lo thawn dawn che a ni.  


*[Lettu: Sangpuia]*

Tuesday, April 12, 2022

FING TAKA THUTLUKNA SIAMDAN KAWNG NGA

 - Rick Warren

- April 12, 2022



“Thil tinreng hian ningkhawng a nei si ṭhin a, mihring buaina chu a tan nasa hle mah se. Thil lo awm tur chu a hre si lo va, a lo awm dan tur chu tunge hrilh thei ang le?.” Thuhriltu 8:6-7


I dam chhungin a hun taka thutlukna dik siam tumin i buai ṭhin ang. Zirna lam emaw, eizawnna lam emaw, inlaichinna chungchanga danglamna pawh a ni thei ang. 


Bible chuan, “Thil tinreng hian ningkhawng a nei si ṭhin a, mihring buaina chu a tan nasa hle mah se. Thil lo awm tur chu a hre si lo va, a lo awm dan tur chu tunge hrilh thei ang le?” a ti a. Thuhriltu 8:6-7


A chhan chu, thutlukna siam dawn reng rengin a hun hi a pawimawh si a, thutlukna i siam dawn reng rengin heng kawng anga hi lo vawng tlat ang che. 


*Thutlukna siam turin ngaihtuahna hun inpe rawh*

“Thlarauva nung kan nih chuan Thlarauvah vek i awm leh bawk ang u” Galatia 5:25


Hmanhmawhna hi thutlukna dik siamna kawnga hmelma chu a ni! Pathianin thutlukna dik chu siamsak che rawh se. A hun chu keini tan a ṭha bera, chuvangin a hnenah in pe ve tawp mai rawh.


*Ngawi rengin Pathian Thu ngaithla rawh*

“Ka thinlung zawng zawngin i khawngaihna ka ngen a: I thu ang zelin mi khawngaih ang che” Sam 119:59


I nunah ri bengchheng tam tak i hriat chuan Pathian phun ri chu i hre thei lo vang. Chuvang chuan Pathian nena hun in hman hi a pawimawh hle a ni. Pathian duhzawng chu Pathian Thuah hian a awm si a.


*Midang ṭawngṭaipuina dil rawh*

“Unaute, ka hnathawhnaa min puih theih nan min ṭawngṭaipui hram turin ka ngen che u. Hei hi Lalpa Isua Krista leh Thlarau Thianghlim hmangaihnain ka ngen chiam a che u” Rom 15:30 (NCV).


I thutlukna turah midang ṭawngṭaipuina i dil chuan, annin fuihna leh thlawpna an lantir thei a ni. Pathian hnenah insawrbingna leh chiang taka hriatfiahna an dilsak thei che a ni.


*Thi ṭha ber tur ngaihtuah rawh*

“Mi tinin thilpek in hmuh ang zelin Pathian khawngaihna tinreng enkawltu ṭhate angin, chung chuan rawng in bawl tawn ṭheuh rawh u” 1 Petera 4:10.


Pathianin thilpek a pe che a chu chu midang ṭanpuina tur a ni. Thutlukna i siam kaltlang chuan midangin i thiamna leh thilpek chu an hlawkpui dawn a ni tih theihnghilh suh.


*Ṭhian fing zawkte thurawn la ang che*

“Inhruaina fing awm lohna hmunah chuan mite an tlu ṭhina, remruat thiam tamnaah himna a awm” Thufingte 11:14.


Thutlukna dik tak siam thei tur chuan i ngaihdan piah lamah midang ngaihdan lak pawh i duh ṭhin. Pathian mite emaw nangmah kaihruai theitu emaw Pastor hnenah thurawn la ang che. Mi fing zawk te nia i hriat kawm la, an thurawn pawh ngai pawimawh ang che.


I thutlukna tur i ngaihtuah lai chuan, hei hi hria la: Pathian hi hun siamtu a ni a, engkim a thunun a ni. Chu chuan a hun chu a tlai lua ngai lo va, a hma lua ngai hek lo a ni.


A hun taka chet ringin amah chu ring tawp mai rawh – a ma hunteah ngei chuan!


Ngaihtuah zui atan


* Thutlukna pawimawh tak i siam laiin Pathian hun ruat ni lova i daisual palh emawin engnge nghawng a neih le? 


* A chunga kawng nga kan hmuhah hian eng ber khi nge zawm harsa i tih?


* Khing kawng nga te khian thutlukna siam i tum meknaah engtin nge an puih theih ang che? Thutlukna i siam kawngah Pathian thua thurawn i lak theihna turin tute nge i sawm ang?

*[Lettu: Sangpuia]*

Saturday, April 2, 2022

KIRLEH TURIN I INPEIH EM?

 *KIRLEH TURIN I INPEIH EM?*


- Rick Warren

- April 2, 2022



“Lalpa Pathian nei mite chu lawm takin an awm ṭhin.” Sam 144:15


Thlarauva mi an boin engnge an hloh chiah kan hnung liamtaah khan kan lo zirho tawha, an hawilam, venhimna leh theihna lam ringawt niloin an hlimna thlengin an hloh a ni.


Pathian nena in inrem chuan, midangte nena in inremna tura i mamawh chu a pe nghal che a, hlimna sang zawk a pe che a ni. Mahse Pathian nena in inkar a chhiat chuan, midangte nena in inkar pawh a chhe fova, i nun pawh a hlimlo a ni.


Luka 15-a fapa tlanbo chungchangah khan kan hrethei a. Tlangval la naupang tak, a rochanai zawng zawng a pa dilchhuaka, ramhla taka kal bova, chen hiau hiau chungchang kha a ni. Luka 15:14 ah khan kan hmu, “Tin, a dehral zawh veleh, chu khaw lamah chuan ṭam nasa tak a tla a, ei tur a lo tlachham ta a.” A pawisak neihlohna chuan inchhirna leh khawharna a thlen tir a ni.  


Inlaichinna reng rengah hian innghirnghona aia boruak tichhe chak thei thildang a awmlo.  Chutiang bawkin fapa tlanbo pawh a pa nen karah buaina an neia, an inlaichinna pawhin a tuar  a ni. Chu chuan lungawilohna, inchhirna leh pawi tihna a thlen a ni.


He tehkhin thu hian vana kan Pa nena kan inkar a chhiat chuan kan hlim theihlohzia min hrilh a ni. Pathian nena inkar nei tura siam kan ni lova. Chuvang chuan Pathian duhdan ni lova, mahni duhdan ngawta kal chuan awmzia a neilo ṭhin a ni.


“Lalpa, mahni duhdana nun hi ka kham tawha” kan tih chiah hian Pathian chu min hmu turin a lo tlanchhuak nghala. Bul a rawn ṭan a ni. Fapa tlanbo lo kir leh a lo lawm ang chiah khan a lawm a ni: “Puan ṭha ber kha han la thuai ula, sin tir rawh u … sebawngno thau tak kha han la ula, talh rawh u, hlim takin i ei ang u; he ka fapa hi a thi a, a lo nung leh ta anih hi; a bova kan hmu leh ta a nih hi a ti a” Luka 15:22-24.


Hetiang hian ilo sawi maithei e, “Pastor Rick, Pathian hnaihin ka inhre ṭhina, tunah chuan hlat riauvin ka inhria, ka hlimna zawng zawng pawh a bo vek” tiin. Hei hi hrereng la, Pathian chu a awmsawn lova, nangmah zawk hi ni awmsawn chu, Pathian chu awmsawn awmsawn chi a ni ve lo.


Pathian chuan hlutakin a hmu che a, kirleh turin a duh che a ni. I kir leh anih chuan, ani chu fapa tlanbo a pain a lo kuangkuah ang maiin “hmangaihna leh lainatnain a lo khat” dawn a ni. Luka 15:20.


Hlimna leh lawmna tluantling tak tak chu van Pathian hnena kir leha, inlaichinna ṭha siam hi  a ni.



Ngaihtuah zui atan


* Pathian chu tun dinhmunah engtiangin nge i hnaih le? Engtiangin nge i hlimnaah nghawng a neih?


* Engkawngah te nge inlaichinna ṭhaloin i hlimnaah nghawng a neih?


* He khawvela inlaichinna ṭha nei turin enganga ruahmanna nge i siam theih ang? Engnge Pathian nena in inkar dinhmun chiah?


*Pathian hnenah kir leh rawh*

Pathian hlata awm chu hrehawm i ti a nih chuan, hetiang hian ṭawngṭai la, anin achhang ang che, “Lalpa, i duhloh zawngin ka lo khawsa ṭhin tih ka hria e, kawngdik chu hre mah ila, i rilru natna tur hlirin ka khawsa ṭhin a ni. Minla hawisan duh loh avangin ka lawm e. Ka chungchanga i rilru puthmang pawh tun thlengin ila thlak lo va, minla hmangaih avangin ka lawm e.”


“Ka Pa, vawiinah hian i kawng zawh turin thutlukna ka siam a, i ram leh a felna chu ka rawn zawng ve ta a ni. i mi hmangaihna chu hre turin leh i kawng min kawhhmuh chu hrethiam turin leh damchhunga nangma tana rinawm turin min pui ang che. Isua hmingin ka dil e. Amen”

 

*[Lettu: Sangpuia]*

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...