Wednesday, March 30, 2022

DANGLAMNA PAWIMAWH TAK CHU

- Rick Warren

- March 30, 2022



“Boralte zawnga chhandam turin Mihring Fapa hi a lo kal a ni reng a ni.” Luka 19:10


Pathian mithmuhah chuan mi chi hnih chiah an awm – chhandam tawhte leh mi bote. Tute pawh hi engemaw zawk zawkah hian kan lut ngei ngei a ni. Chuvang chuan, midang chuan pawimawhna an nei pha lo a ni.


Pathian chuan mi zawng zawng min hmangaiha, mipa-hmeichhia, chi, vunrawng leh khawsak phung a thliar ve lo. Chutiang bawkin an zirna, an hmel, hausakna emaw thiam thil emaw a thliar lo bawk. A pawimawh zawka chu thlarau chhandam tawh nge kan niha mibo kan la ni zawk tih hi a ni.


“Chhandam tawh” leh “mibo” hian hlutna a nei a. He thumal pahnih aṭang hian Pathian chuan zawn tlak, chhandam tlak, hmuh tlakah a ngai che tihna a ni.


Bible chuan, “Boralte zawnga chhandam turin Mihring Fapa hi a lo kal a ni reng a ni” a ti Luka 19:10. Hei hian i hlutzia a ti lang. Isua Krista chu he leiah nangmah zawng tur leh chhandam turin a lo kal a ni.


Thil hlu chauh hi a bo ṭhina; thil hlu lo chu dah hai palh chang a awm ṭhin. Kawng dangin sawi ila, tuman ha kherna an tibo ngail lo. A awmna tur ni loah ha kherna chu i lo dah palh maitheia, amaherawhchu i tibo lova – a chhan chu chuti em ema hlu a nih loh vang a ni.


Kan inneih zungbun hi tibo ta ila, ka tan chuan channa nasa tak a ni ang, a chhan chu kum 40 lai mai ka nupui tan ka rinawm a ni tih ka lantirna a nih vang a ni. Chu chauh a ni lo, Kay-i min pek a ni a, ka hmangaih a ni. Chuvang chuan kan inneih zungbun hi ka dahhai palh ngai lovang, a awm lo a nih chuan a bo a ni zawk ang.


Mi thlarauva chhandam an nih tawh leh tawh loh kan sawi hian, chumi hlutna chu kan sawi a ni lova. Chhandam tawh a ni emaw mibo a la ni emaw, engti kawng zawng pawhin an hlu a ni.


Mahse Pathianin mi tumah hi thlarauva kan bo a phal lo. Enga ti nge? A chhan chu Pathian ata hla taka an awm avang leh inlaichinna an neih loh avang a ni.


Ni dangah, “Thlarauva i bo hian eng chiah nge i hloh?” tih kan ngaihtuahho ṭhin dawn a ni. Chu zawhna chhanna chuan Pathian tana i hlutzia i hrethiam anga, chu chanchin chu midangte hnenah pawh i sawichhawn theihna turin a pui ang che.


Ngaihtuah zui atan


* Ngaihtuah chiang lem loin, thlaraubo mekte hi, chhandam tawhte ang lovin hlutna dang an neiin i hria em? Pathian hmaah chuan mi tute pawh hi intluktlang kan ni tih i hriat hian engtin nge i ngaih?


* I thil tih bo tawh sawi tur i nei em? Thil dah hai palh i nei em? Chung ho hlutna chu eng ang chiah nge ni?


* I nunah tute nge Pathian hmaah an hlu a ni tih hriattir ngai? Vawiinah hian engtin nge chungho chu fuih turin hun i insiam theih ang?


*Krista Isuaa awmte tan chuan thiam loh chantirna reng a awm tawh lo*


 Bible chuan Johana 3:18 ah “Tupawh amah ring chu thiam lohvin a awm lo vang” a ti a. Rom 8:1 ah chuan, “Krista Isuaa awmte tan chuan thiam loh chantirna reng a awm tawh lo” a ti bawk.


Isua i pawm thei dawn a nih chuan, thiam loh chan hlau tawh lovin, ama hnenah i nun hlan la, hetiang hian ṭawngṭai rawh le:


“Duh tak Isu, ka sualna avanga nang nena kan inṭhenhrana hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chuti chuan i vanram in nuamah engtikniah emaw chuan min la pawm ve ang. 


“Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thil dang vang a ni lo i tih avangin ka ring che a ni. Ka nunah hian Lal ni turin ka pawm ta che a. Vawiinah hian i hnung zui ka duh a, ti tura min tih apiang chu ti turin ka inpeih e.


“Nung tura min siam ang ngeia nun ka duha. Hlimna dik chhar ka duha, mahni tana nun ai chuan damchhunga i rawngbawl ka duh a ni. Ka nunna i hnenah ka hlana, min chhandam tur leh i angchhunga min pawm ve turin ka ngen a che. Isua hmingin ka dil e. Amen.”    


Isua pawm tura i ṭawngṭai thei a nih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawh a thlawnin ka pe dawn che nia.  


*[Lettu: Sangpuia]*

Tuesday, March 29, 2022

HLAWHCHHAMNA HIAN HLAWHTLINNA ROPUI TAKAH A HRUAI THEI CHE

 


— Rick Warren 

— March 29, 2022



“I rin a bo loh nan ka ṭawngṭaisak che a ni; i hawi kir leh hunah nangin i unaute tinghet ang che." Luka 22:32.


Hlawhchhamna i hmachhawn lai chuan, thil ṭha engmah lo thleng lo tur angin a lang maithei. Mahse Pathian chuan hlawhchhamna aṭangin thil a rawn thlentir fo a ni. A dika dik chuan, i hlawhchham dêrna chu i hlawhtlinna ropui takah a lo chang thei a ni. Rem i ti a nih phawt chuan, Pathianin i hlawhchhamna chu a  kohhran din nan a hmang dawn a ni!


Isuan Petera hnenah, Luka 22:32, “I rin a bo loh nan ka ṭawngṭaisak che a ni; i hawi kir leh hunah nangin i unaute tinghet ang che" a ti.


Petera chu a hlawhchham hma pawhin, Isuan hlawhchhamna pawh thil ṭhaah a chantir theih thu a hrilh a ni.


Petera a hlawhchham hnu khan (vawi thum lai mai Isua a phat hnu khan), Isua chu a thi a, a tho leh a ni. Dil kamah Isua leh Petera an inhmuh leh khan, Isuan Petera hnenah hlawhchhamna aṭang pawhin thil ṭha a chhuak thei a ni tih a hrilh a. Hei hi an inbiak dan chu a ni:


“Tin, tukṭhuan an ei zawhin, Isuan Simon Petera hnenah chuan, “Simon, Johana fapa, hengte ai hian nangin kei mi hmangaih zawk em?” a ti a. Ani chuan a hnenah, “Aw, Lalpa; ka ngaina che tih i hria e,” a ti a. Ani chuan a hnenah, “Ka beram note chawm rawh,” a ti a. Tin, a vawi hnihnaah a hnenah, “Simon, Johana fapa, nangin kei mi hmangaih em?” a ti leh a. Ani chuan a hnenah, “Aw, Lalpa, ka ngaina che tih i hria e,” a ti leh a. Ani chuan a hnenah, “Ka beramte enkawl rawh,” a ti a. Tin, a vawi thumnaah chuan a hnenah, “Simon, Johana fapa, nangin kei mi ngaina em? a ti a. Tin, a vawi thumnaah, “Nangin mi ngaina em?” a hnena a tih avang chuan Petera a lungngai a, a hnenah, “Lalpa, engkim i hria a, ka ngaina che tih i hria e,” a ti a. Isuan a hnenah, “Ka beramte chawm rawh." Johana 21:15-17.


Isuan Petera hnenah vawi thum lai mai, “Mi ngaina em?” a ti a. Engvangin nge vawi thum lai a zawh le? Peteran vawi thum lai mai Isua a lo phatsan tawh avangin chu chu Isuan hriain vawi thum lai mai hun remchang a siamsak leh a ni.


Isuan zawhna a zawh a piangin, Peteran a hlawhchhamna chu a ṭha zawnga a hman theihna turin thu a chah tel zel a ni. “Ka beram note chawm rawh.” Ka beramte enkawl rawh.” “Ka beramte chawm rawh."


Peteran Isua a phat zan khan, zirtir dang, Juda, pawhin Isua a phatsan a ni. Mahse Juda chu Isua phatsantuah a ṭang hlen ta  a, nimahsela Petera chuan kohhran zirtirtu leh hruaituah a ṭang ta zawk a ni.


Matthaia16:18 ah Isuan heti hian a ti, "Nang Petera i ni tih ka hrilh bawk a che; he lungpui chungah hian ka kohhranho ka rem chho ang a, Mitthi Khaw kulh kawngkharte chuan chu chu an ngam lo vang” a ti a.


Pathianin hlawhchham tawhte hmangin kohhran a din ṭhin. Dik tak chuan, Hlawhchham tawh chauhte Pathianin a hmang — a chhan chu mi famkim an nih loh vang a ni!


I hlawhchhamna aṭangin engnge i rawn nih chhoh dawn le? I duhthlanna a  ni tawh e.


Ngaihtuah zui atan


Pathianin i hlawhchhamna a hman theih dan tur kawng khat engnge ni? 

I ngaihtuah phak bakin thil a ti thei ang tih i ring em?


I Kristianpui i ngaihsan deuh kha han mitthla teh. An nuna hlawhchhamna aṭanga rawngbawlna ropui tak lo lang chu engtin nge i hmuh le?


Hlawhchhamna lian tak i hmachhawn tawh engnge? Vawiinah hian i hlan chuan Pathianin hlawhchhamna chu thil ṭhaah a chantir thei tih i ring em?


*Krista Isuaa awmte tan chuan thiam loh chantirna reng a awm tawh lo.* Isua hnenah i nun i hlan duh chuan, hetiang hian

ṭawngṭai rawh le:


“Duh tak Isu, ka sualna avanga nang nena kan inṭhenhran hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chuti chuan i vanram in nuamah engtikniah emaw chuan min la pawm ve ang. 


“Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avanga rinna kaltlanga kan neih a ni a thildang vang a ni lo i tih avangin ka ring che a ni. Ka nunah hian Lal ni turin ka pawm ta che a. Vawiinah hian i hnung zui ka duh a, ti tura min tih apiang chu ti turin ka inpeih e.


“Nung tura min siam ang ngeia nun ka duha. Hlimna dik chhar ka duha, mahni tana nuna ai chuan damchhunga i rawngbawl ka duh a ni. Ka nunna i hnenah ka hlana, min chhandam tur leh i angchhunga min pawm ve turin ka ngen a che. Isua hmingin ka dil e. Amen.”    


Isua pawm tura i ṭawngṭai thei a nih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawh a thlawnin ka pe dawn che nia.  


*[Lettu: Sangpuia]*

Wednesday, March 16, 2022

NGAIHTHLAK PEIHNA HIAN NUN A TI DANGLAM

  — Rick Warren 

— March 16, 2022



“Remruatna chu mihring thinlungah tui thuk tak ang a ni a; Nimahsela hriat thiamna nei chuan a phawrh chhuak ang." Thufingte 20:5

Isuaah beiseina a awm a ni tih kan puanchhuah ngamna tura tih theih kan neihte kan zirho ṭhina. Vawiina inrintawkna min petu chu: thinlung taka midang i ngaihthlak theih chuan midangte Isua hnena hruaina kawngah i pui thei ang.

Mite thinlung hawnna chu khawiah nge a awm A ruka an rilru natna emaw an thil mamawh an phuhruk si lohah te a ni.

Tu te mai pawh hian thuruk, midang hriattir kan duh si loh hi kan nei veka. "Mi zawng zawngin thil an tisual tawh vek a, Pathian ropuina an chang zo ta lo a ni." Rom 3:23. Mi an harsatna i ngaihthlaka i hriatthiampui phei chuan, Isua hnena hruai dan i hmuchhuak tihna a ni.

Bible chuan, “Remruatna chu mihring thinlungah tui thuk tak ang a ni a; Nimahsela hriat thiamna nei chuan a phawrh chhuak ang." Thufingte 20:5.

Hei hi hria la, Pathian hnen thlen theihna kawng khat chiah a awm, chu chu Isua Krista kaltlangin a ni. Isuan, “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo" a ti. (Johana 14:6). Amaherawhchu Isua hnena an kalna chhan chu kawng hrang hrang a awm thung a ni.

Mi ṭhenkhat chuan thilmak hmu tur leh an zawhnate chhanna hmuh inbeiseiin Isua an pana. Ṭhenkhatten an khawharna, an sualna emaw an hlauhna emaw avangin Isua an pana. Midangin nun awmzia hre turin an pan thung. Ṭhenkhatte erawh chu inlaichinna ṭhatloh vang emaw sum leh paia harsatna vang emaw te a ni.

Mi sang tam tak chuan chhan hrang hrang avangin Pathian an hnaiha. Thawpikna, natna leh tawrhna nei te chu i rilru pek turte an ni ang.

An tawrhna chu engpawh nise, an chhanna leh an damna chu Isuaah chauh a ni tih hrilh theihnghilh ngai suh.

Mi tuemaw chu Pathian hnenah hruai tum la, an thinlung inhawnna turin inkawmna hun, nun hial thlakthleng tur khawpin neihpui ang che.

Ngaihtuah zui atan

* Midang ngaihthlak hi— ngaihthlakna tak tak — awlsam tak a ni em ? Vawiinah hian ngaihthlak dan i thiam zel theih nan engtin nge hma i lak ang?

* Eng natna thurukin nge emaw, eng i mamawhnain nge Pathian hnaihtir che?

* Isua nei lotu dinhmun han ngaihtuah teh. Pathian hnenah a rilru i hneh theih nan dil ang che.

[Lettu: Sangpuia]

Tuesday, March 15, 2022

THUTAK CHUAN MI A CHHUAH ZALEN TIH IN HRIA

 — Rick Warren 

— March 15, 2022



“Pathian chu buaina Pathian a ni lo va, remna Pathian a ni zawk si a." 1 Korinth 14:33

Pathian chuan khawiah pawh kal la, a aiawh zel turin a duh che a. Chutiang bawk chuan ram hrang hrang pawhin aiawh an tirchhuak ṭhina, Pathianin a hmangaihna leh a ngaihdamna thu tlangaupui turin a tirchhuak ve che a ni.

Mahse rinnaa puangchhuak turin inrintawkna i tlachham maithei a. Sumdawng rilru pu tan lo chuan a harsa maithei e. Mahse chu chu a dik lo a ni! Pathian chhungkuaa midangte tel tura sawm turin ṭawngkam thiam kher a ngai lo.

Tute pawhin chhungrilah zawn kan nei vek tih ka sawi tawh a. Chuvangin, Isua chanchin midang i hriattir hian, an thil zawn chu nangman i pe tihna a ni ang. Chu chu chakna kan neih phahna a ni!

Rinna puanchhuah nana inrintawkna nasa zawk neih theihna chu : Mi tam zawkin an rin pawh an hrechiang lo. Pathian awm ring lo emaw, Kristian emaw, Muslim emaw an in ti maithei e. Amaherawhchu i zirchian hnuah chuan chung ho chuan eng rinna ber nge an zawm tih pawh i hre lo hial ang.

Mi tam tak chuan ngaihdan mumal neiin an inhriaa, amaherawhchu anmahni ngei pawh chiang loin an tawp fo ṭhin. Entirnan, "engmah hi thil dik ber a awm lo" an ti. Mahse chu thil chu engmah lo mai a ni a, thu inkalh tlat a ni. A dika dik chuan, chung ho chuan thil dik ber chu a awm ngei a ni tih rinchhanin an nung zawk a ni. Chu chuan an rinna chu a mumal lo va, an chiang lo a ni tih a hriat theih bawk.

Mahse Kristaa beiseina chuan ringtute nunah chiang takin thu a sawi ṭhin. An mamawhna ang zelin hriatthiamna a pe bawk. Bible chuan 1 Korinth 14:33 ah, “Pathian chu buaina Pathian a ni lo va, remna Pathian a ni zawk si" tih min hrilh. Pathian Thu thutak chuan thu inkalh, chiang lo leh thil dang buaina hrang hrang lakah a chhuah zalen a ni.

“Tin thutak in hria ang a, thutak chuan a chhuah zalen ang che u,” a ti a.(Johana 8:32 NIV).

Hetah hian mihring chungchang ngaihnawm deuh a awm: mite chuan an rilrua a lan ang zelin thutlukna an siam mai ṭhin a. An rilrua lang chu finna hmanga ṭanchhan an tum ṭhin. Chuvangin, i rinna i hmanchhuah dawn hian, finna thuril hmangtea inhnialte hlau suh, a chhan chu mi fingte pawhin an rilrua thu awmte hmangin thutlukna an siam ve tho mai!

A lehpekah chuan rinna puanchhuahna kawngah inrintawkna i tlachham a nih pawhin, hahdam takin awm la, Isua rinna thuchah chuan ringtute nunah mamawh chhanna a pe ṭhin a ni.

Ngaihtuah zui atan

Rinna hriatthiam harsa emaw inkalh deuh emaw i neih tawh kha eng nge? Pathian Thuin engtin nge hriatchiannah a hruai luh che?

Pathian Thu thutak rilrua behchhan aiin rilrua landan maiin miten eng thutlukna nge an siam ṭhin le?

Tuin nge rinna dik taka ṭawmpui thei che?

[Lettu: Sangpuia]

Wednesday, March 9, 2022

MAHNIIN TUMAH ṬAP SUHSE

 - Rick Warren

- March 9, 2022



“Lawmte chu lawmpui ula, ṭapte chu ṭahpui rawh u.” Rom 12:15

Hun harsa tak i paltlang tawh a nih chuan, tuemaw nangmah awmpuia ṭahpui ṭhintu neih hlutzia i hrethiam ang. Chuvang chuan Pathianin nangmah ṭanpui tur che kohhran chhungkua a ruatsak che a – chuvangin hunkhirh tak i tawrhlai pawhin malin i awm lo vang.

Mi tumah hi damdawiina zaipui khirhkhan tak a tawh laiin mahniin an awmtir tur a ni lo vang. Mi tumah inentirna result huphurhawm tak nei amahin nghahtir tur a ni lo vang. Mi tumah hi indona hmuna awm mek aṭangin chanchin ṭha lo – an fanu emaw fapa emaw, an kawppui aṭanga an hriatin amahin an awmtir tur a ni lo vang. Mi tumah hi thlanah an chhungte an thahliam laiin amahin an awmtir tur a ni lo vang. Nangmah maiin he harsatna khirkhan tak hi i tuar mek a ni tih han ngaihtuah teh.

Hun duhawm lo tak tak i hma lam hunah ila hmachhawn dawn a, chutah chuan himna len zar a pawimawh hle dawn a ni. 

I tana Pathian himna len chu engnge ni? Ringtu intelkhawm nangmah duhsaktu leh anmahni ngei pawh in hrethiamte hi an ni.

I tana inpe tunah tunge awm? Harsatna i tawh rual ruala lo lang    nghal thei leh i lungngaihna hnem thei che tunge ni ang? A nih loh vek pawhin harsatna i tawk a ni tih an hriat rual ruala lo lang nghal thei tunge ni?

Bible chuan, “In zain rilru hmunkhatin awm ula, inlainat tawn ula, unau angin in hmangaih ula, khawngaihna nei ula, thuhnuairawlhin awm rawh u” a ti. 1 Petera 3:8

Ka rawngbawlpuite hian harsatna ka tawh laiin min pui nasa em em a, harsatna pawh kan tuar tlang a ni. Thih hlauhawma ka awmin min ṭawngtaisaka, min nghaka, min ṭahpui a ni.   

Rom 12:15-na, “Lawmte chu lawmpui ula, ṭapte chu ṭahpui rawh u” tih hi an nunpui a ni.

Rawngbawl tura intelkhawm, inpe em em, nangmah nghak tlata, ṭahpui thei zingah i tel em? Nangmah maiin hringnun hi paltlang tum suh, i ringtupuite hi                                                                                                      harsatna i tawh laia nangmah ṭanpui tur che a Pathian ruat an ni si a.   

Ngaihtuah zui atan

* Mi tuemaw nangmah nghak tlat chea ṭahpuitu che hnuhnung ber kha engtik nge ni le? Chu an rawngbawlna chuan nangma rinnaah engnge nghawng a neih le?

* Tute nge i himna len zar rawn siamsak che le?

* Miin harsatna an tawh laiin engtin nge chet i lak ve le?

*PATHIAN CHHUNGKUA CHU I ZAWM VE TAWH EM?*

Isua hnenah i nun i hlan duh chuan, hetiang hian ṭawngṭai rawh le:

“Duh tak Isu, ka sualna avanga nang nena kan inṭhenhrana hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chuti chuan i vanram in nuamah engtikniah emaw chuan min la pawm ve ang. 

“Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thildang vang a ni lo i tih avangin ka ring che a ni. Ka nunah hian Lal ni turin ka pawm ta che. Vawiinah hian i hnung zui ka duh a, ti tura min tih apiang chu ti turin ka inpeih e.

“Nung tura min siam ang ngeia nun ka duha. Hlimna dik chhar ka duha, mahni tana nun ai chuan damchhunga i rawngbawl ka duh a ni. Ka nunna i hnenah ka hlana, min chhandam tur leh i angchhunga min pawm ve turin ka ngen a che. Isua hmingin ka dil e. Amen.”    

Isua pawm tura i ṭawngṭai thei a nih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawh a thlawnin ka pe dawn che nia.   

[Lettu: Sangpuia]

Tuesday, March 8, 2022

TUIN NGE VENG CHE?

  - Rick Warren

- March 8, 2022



“Amah maia awm kha chu miin hneh thei mah sela, pahnih chuan an lo dodal zo dawn a ni; hrui thum hrual chu a chat lawk ngai lo ve.” Thuhriltu 4:12

Chawlh hmang tura i zinchhuahin, i in chu i ṭhenawmte kutah i dah mai thei a ni. Veng ṭhenkhatah phei chuan vengtu ṭangrual pawl te pawh an in din hial a ni. I ina i thil neihte chu i ṭhenawm ten an enkawlsak che a ni maithei, tu in nge i thlarau chu enkawlsak thung che?

I nun chu kawng dika a kal theih nan tuin nge vengin, awmpuiin, tanpui che? 

Eng ang mi pawh ni mah la, nangmah enkawltu che leh thlarau lama i kal dik lohna hrilh tur che mi i mamawh a ni. Chung mi chu in kohhran chhungkuaah i hmu ang. A nihna takah chuan, chu chu Pathian chhungte awm dan tur a ni.

Philippi 2:4 ah chuan, “Mahni ta ta mai en lovin, mi dang ta pawh en ṭheuh zawk rawh u” a ti.

Tute pawh hian arkhawthim dai tawp - kan hmuh theih si loh harsatna leh thlemna kan tawhnaah kan nei vek a ni. Chutah tak chuan kohhran chhungkua an lo lang a. Hmelma lakah chuan, inralring rengin an awm thin a ni.

I nun tihchhiat tumtu hmelma i nei. A dika dik chuan, zing i thawh hma aṭang tawhin nitinin Setanan hneh dan tur che a ngaihtuaha, thlemna hrang hrang leh harsatna, kawng tihtawp emaw, kawng kual tak hmang tein a bei ṭhin che a. Rilru tih natna, chin dawklak leh rilru lama chi-aina hmangtein a bei ṭhin a ni. Nangmah maia lo beihlet i tum chuan, i hmelma chuan a hneh thei che a. Chutah tak chuan i ringtupui nangmah ṭanpui tur che i mamawh a ni.  

Thuhriltu 4:12  ah chuan, “Amah maia awm kha chu miin hneh thei mah sela, pahnih chuan an lo dodal zo dawn a ni; hrui thum hrual chu a chat lawk ngai lo ve” tih kan hmu a ni.

I vengte – kohhran chhungkua – chu thlarauva hnehna chang tura Pathian chhanna a ni. Kan awm khawm hian kan chak lehzual ṭhin a ni.

Ngaihtuah zui atan

* I nunah tute nge veng che a, i tlukna turah tuin nge hriattir che? Midang te tan chutiang mi chu i ni ve em?

* Ringtute inpawlhona chuan i chak lohna i hriat theihna kawngah engtin nge an puih che?

* Hmelma ina a beihna cheah engtin nge vawiinah hian rahbi pakhatin hma i sawn theih ang?


*[Lettu: Sangpuia]*

Wednesday, March 2, 2022

PATHIAN RAWNG I BAWLNA CHHAN TUR KAWNGNGA

 - Rick Warren

- March 2, 2022



“Heng ka unau te berte zinga mi pakhat chunga in tih chu ka chunga ti in ni.” Matthaia 25:40

Engtin nge Pathian rawng i bawl ang? Midangte rawngbawlsak chungin.

Beram leh kel tehkhin thuah khan Isuan, “Heng ka unau te berte zinga mi pakhat chunga in tih chu ka chunga ti in ni” a ti a ni. I puihna avanga miin engti kawng zawng emaw tala ṭangkaina a neih chuan Pathian rawng i bawl a ni. Matthaia 25:40 

Ṭhenkhat chuan sual nia inhre chung te, mawhphurhnaa an ngaih avang te leh nawrna avang tein rawng an bawla. Mahse Pathian chuan i chunga a thiltih te avangin lawm chunga rawngbawl turin a duh che a ni. A siam che a, a chhandam che a, vanah a hruai dawn che a ni. Lawmna hi Pathian rawng bawl tura min tiphurtu ṭha ber a ni.

Pathian rawngbawl dan Bible-a kan hmuhte kawng nga lo thlirho ila:

*Rawngbawl hi i damchhan tur kawng khat a ni*

Marka 8:35 chuan, “Tu pawh a nun humhim duh apiangin a chan ang a; tu pawh keimah avang leh Chanchin Ṭha avanga a nun chan apiangin a humhim ang” a ti. Rawngbawl dan i hriat hma chuan, i la nung lova – i awm ve satliah tihna a ni. I thil dawnte avangin i khawsa theia, amaherawhchu i pekchhuah chiah hian nunna i nei ṭan a ni.

*Rawngbawlna chuan Isua a antir che* 

Matthaia 20:28 chuan, “Mihring Fapa hi rawngbawlsaka awm turin a lo kal lo va, rawngbawl tur leh mi tam tak tlan nana a nun pe tur zawka a lo kal ang khan” a ti a. Midang rawngbawlsak dan i zir loh chuan, thlarau lamah i puitling thei lovang. Chutiang a nih chuan i damchhungin thlarau lama naute i ni dawn tihna a ni.

*Rawngbawl hi i hun hman dan tur ṭha ber a ni*

1 Korinth 15:58 ah chuan, “Lalpa hna ṭhahnemngai taka thawk fovin awm rawh u” min ti a. Thil engemaw rahchhuah leh hnutchhiah duh i neih chuan, hun hman dan ṭha ber chu midang rawngbawlsak chunga Pathian rawngbawl hi a ni. Pathian rawng i bawlna chu a thlawn ngai lovang.

*Rawngbawl hi ropuina thuruk a ni*

Matthaia 20:26 ah chuan, “Tu pawh in zinga mi lian nih duh apiang chu in rawngbawltuah a awm zawk tur a ni.” Ropuina tak tak chu mahni tana nunna aṭang ni lovin, chhiahhlawh hna aṭangin a ni. Hruaitu ropui takte chu midangte rawngbawlsak tam apiangte hi an ni.

*Rawngbawl man chu vanah lawmman an dawng ang*

Isuan Marka 10:29-30 ah, “Tu pawh keimah avang leh  Chanchin Ṭha avanga in emaw, unaupate emaw, farnute emaw, nu emaw, pa emaw, fate emaw, ramte emaw kalsan tawh phawt chu, tun damchhung la la hian inte, unaupate, farnute, nute, fate, ramte a leh zain, tihduhdahnate nen hmu lo tur tumah an awm lo, hun lo la thleng tura chatuana nunna nen” a ti. Dik taka sawi chuan, Isua hi i hruaitu a ni a. I thiltihsak zawng zawngte avang chuan engtik niah emaw chuan lawmman a pe dawn che a ni. Hei hi a rintlak a ni.

Pathian rawngbawl  hi i chak em? I phurnate chu tihpun zel a ni thei em? Pathian chuan rawngbawlna i thlirdan hi tidanglam tur leh, “taihmak kawngah chuan thatchhe lo turin leh thlarau kawngah chuan ṭhahnem ngaia, Lalpa rawngbawl turin” a duh che a ni. Rom 12:11 

Ngaihtuah zui atan

* Tuna i rawngbawl dan engnge ni? Engin nge tun anga rawngbawl thei tur hian tiphur che?

* Mi tuin emaw rawng a bawlsak che hian nangmahah engtin nge a thawh?

* Mi tuemaw i puih hian, a nihna takah chuan Isua tan i ti a ni. Chutiang chu a rahchhuah a ni tih i hriat chuan engtin nge midang rawng i bawlsak danah nghawng a neih?

 [Lettu: Sangpuia]

Tuesday, March 1, 2022

TIHTHEIHLOH TI TURIN PATHIAN EN RAWH

 - Rick Warren

- March 1, 2022



“Pathian tan tihtheih loh engmah a awm lo.” Luka 1:37 (GNT)

Thiltihtheih loh hlauhna dinhmunah indintir ngai suh. Eng vang nge? Pathian nen chuan engkim a tih theih vang a ni.

Bible chuan, “Pathian tan tihtheih loh engmah a awm lo” a ti a ni. Luka 1:37 (GNT)

Thiltithei dawn lo anga hlaua awm ai chuan, mahni inti phurin – ṭawngṭaina tam zawk, rinna nasa zawk, innghahna sang zawk, nghaktu ni zelin, beisei ngamna Pathianah nei ang che.

Thiltihtheihtawh loh hulhual angin lang ṭhin mahse; “Nangmaha thil ṭha ti ṭantu khan Isua Krista ni thlengin a ti famkim zel dawn” Philippi 1:6. Nangmaha Pathianin bul a ṭan tawh chu, a thawkzo dawn a ni.

Ka dictionary aṭangin “theih loh” tih hi han zawng mah teh. Ka paih bo daih avangin i zawng hmu lo vang. Pathian dictionary ah pawh a awm loh chuan ka dictionary ah pawh a awm tur a ni bik lo ka ti a ni.

Kum 1800 lai vela missionary Hudson Taylor-a’n kan nuna thiltihtheih loh chungchanga Pathian inrawlh dan a sawia. “Pathian hnathawh ropui hmuh dan chhawng thum a awm a; pakhatnaah chuan a theih lohva, pahnihnaah chuan a harsaa, pathumnaah chuan a zo ta thung a ni.”

Mahse Setana’n engmah hi Pathian nen chuan tih theih loh a awm lo tih hi awih lo turin a duh che a. “Tunge nia i inhriat? I ti thei lo. Engin nge Pathian mi nihna neihtir che?” tih zawhna a zawt nawn tluk tluk ang che. I thiltihtheih lohnaah Pathian i rina, i innghah tlat chuan Setana i ti hrilhhai hle dawn a ni. 

Tuna i dinhmun kha thiltithei lo anga inngaihnna dinhmun a ni maithei. Pathian en la a thutiam chu ring tlat la, i dinhmun chu thlir la, theih lohna aṭangin theihnaah lut la, tichuan i thawk zo thei ang.

Ngaihtuah zui atan

* Tun dinhmuna i nuna thil tihtheih loh Pathianin tihsak che sela i duh engnge ni?

* Pathian nen chuan engmah hi tihtheih loh a awm lo a ni tih i rin tlat chuan, tunkar hi i tan engtiang takin nge a danglam ang?

* I nunah emaw mi nunah emaw tihtheih loh nia kan hriat Pathianina a tih theih si engtikah nge i tawn le?

*Pathian thutiam chhandamna hi i chang tawh em?*

Pathian chuan theih loh nia kan ngaihte hi a ti leh mai ṭhin, chuvangin chhandamna changin bul ṭan rawh le. A angchhunga cheng tur leh i sualnate ngaidam turin amah chu i ring em? Isua hnenah i nun i hlan duh chuan, hetiang hian ṭawngṭai rawh le

“Duhtak Isu, ka sualna avanga nang nena kan inṭhenhrana hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chuti chuan i vanram in nuamah engtikniah emaw chuan min la pawm ve ang. 

“Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thil dang vang a ni lo i tih avangin ka ring che a ni. Ka nunah hian Lal ni turin ka pawm ta che. Vawiinah hian i hnung zui ka duh a, ti tura min tih apiang chu ti turin ka inpeih e.

“Nung tura min siam ang ngeia nun ka duha. Hlimna dik chhar ka duha, mahnia tana nuna ai chuan damchhunga i rawngbawl ka duh a ni. Ka nunna i hnenah ka hlana, min chhandam tur leh i angchhunga min pawm ve turin ka ngen a che. Isua hmingin ka dil e. Amen.”    

Isua pawm tura i ṭawngṭai thei a nih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawh a thlawnin ka pe dawn che nia.  

[Lettu: Sangpuia]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...