Tuesday, November 30, 2021

ENGVANGIN NGE I THILPHAL ANG?

 — Rick Warren 

— 30 November, 2021



“He rawngbawlna hian a fiahna che u avangin, Krista Chanchin Tha lama in thurin in zawmzia avang leh, anmahni tan leh mi zawng zawng tan thawhlawmnaa in thilphalzia avang hian Pathian an tiropui thin asin" 2 Korinth 9:13

Krista zuitu kan nihnaah hian engnge thilphal chu a pawimawhna? Heng kawng thumte hi i nuna awmzia a neih theihna turte an ni.

A ti lawm ang che.

"Engkim ka tih apiangah ka tihhmuh ṭhin che u kha, chutianga thawk rim chung leh, Lalpa Isua thu hre reng chungin mi chak lote in tanpui tur a ni; amah ngeiin, ‘Englo lak aiin pekin lukhawng a nei zawk,’ a tih kha,” a ti a." (Tirhkohte 20:35).

Khawvel chuan thilpek i dawn hian i hlim ber ang a ti che a. Mahse Isuan chutiang lo zawng chuan ngaihdan a neia, thilpek i dawn ai chuan i pekchhuah hian i hlim zawk ang a ti a ni.

Awmzia a nei ṭhin.

Bible chuan, “Amaherawhchu chutiang kawngah chuan theh tlem chuan a at tlem bawk ang a, theh tam chuan a at tam bawk ang" a ti. (2 Korinth 9:6). Midangte chu i chungah thilphal turin i duh ṭhin a. Mahse mahni hmasial ran chung chuan, midang leh Pathian hnen aṭangin thilphalna rah i seng thei dawn em ni? Pathianin chutiang chu nun dan phung a ni lo a ti. Chi tuh rah seng dan a awm a, thilphalna rah i seng duh a nih chuan, thilphalna bawk kha i tuh a ngai a ni.

Pathian chu eng ang mi nge a nih a entir. 

Bible chuan, “He rawngbawlna hian a fiahna che u avangin, Krista Chanchin Ṭha lama in thurin in zawmzia avang leh, anmahni tan leh mi zawng zawng tan thawhlawma in thilphalzia avang hian Pathian an tiropui thin asin" (2 Korinth 9:13).

Thilphal dan ṭha ber nia ka zirchhuah chu Pathian thilphalzia hriatchhuah zel hi a ni. Hun harsaah pawh, Pathian thilpek i zawn chuan i hmu zel ang. Chenna tur khawvel a pek che hi thlir la. Nunna a pek che hi ngaihtuah la. I mamawh tinreng a pek che hi ngaihtuah bawk rawh.

Thilphalna kawngah chuan Pathian chu kan entawn ber tur a ni. Pathian thilphalna i chungah a lan avanga midang chunga thilphalna i lantir hian, Pathian lam an hawi phah ṭhin a ni.

Ngaihtuah zui atan

Thilpek i dawn aia i pekchhuah avanga i hlimni kha engtik nge ni? A nih loh pawhin, midang thilphalna avangin engtik khan nge malsawmna i dawn?

Eng kawngah te nge thilphalna chi chu i tuh theih ang?

Eng kawngah te nge Pathian chu i lakah a thilphal? Engtin nge lawmthu i hrilh ang le?

Isuaah i la innghat lo va, zui turin i rilru pawh a la insiam fel lo a ni tiraw, engvangin nge i la nghah kher ang?

Pathian thilphalna ropui tak chu chhandamna thilpek Isua Krista kaltlanga kan neih hi a ni. I sualna chuan Pathian nen a tihrang che a. Pathian khawngaihna avang chauhin, Isua kaltlangin, inlaichinna ṭha zawk chu kan lo nei thei ta a ni.

Bible chuan heti hian min hrilh, "Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e." Ephesi 2:8-9

Nangmah Siamtu nena inremna i neih theih dawn chuan hetiang hian ṭawngṭai la:

"Lalpa, ka sualna avanga nang nena inṭhen hi ka duh tawh lo. Ka rin che chuan, ka sualna zawng zawng pawh min ngaidam dawn tih min tiam chu ka ring e, ka nun awmzia hi ka zir zel anga, engtikniah emaw chuan i van in nuamah min la seng lut ngei ang.

“Ka sualnate ka puanga, ka chhandamtu i nih hi ka ring e. Ka sualnate ka puana, ka rin che chuan chhandamin ka awm tih min tiam a. Chhandamna chu thiltih vang ni loin, khawngaihna avanga, rinna kaltlanga neih tur a ni tih i sawi avangin ka ring che a ni. Ka Lalpa atan vawiinah ka thlang che a.  Ka nunna zawng zawng hi vawiinah hian ka hlan a che.

“Mahni tana nun ai chuan i rawngbawla, damchunga min siam chhan anga nun hi ka duh tawh a ni. Ka nunna hi i hnenah ka hlan a, i angchhung nuama cheng ve turin min pawmin min chhandam ang che. Isua hmingin ka dil e. Amen."

A chunga mi anga i ṭawngṭai thei a nih chuan hetah hian min lo be ta che Rick@PastorRick.com. Tichuan, Isua i zui theihna tur atana pawimawhte ka lo thawn dawn che nia.

[Lettu: Sangpuia]

Wednesday, November 24, 2021

NANGMAHA A ṬHA BER I NIH THEIH NAN, PATHIAN CHU A ṬHA BER PE RAWH

 - Rick Warren

- 24 November, 2021



“Ka kut nghah avanga Pathian thilpek nangmaha awm kha chhemalh turin ka hriatpui che a ni. Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a.” 2 Timothea 1:6-7.

Timothea’n Paula missionary zinkawnga a zui khan, Timothea chu a la naupang hle a. Paulan Ephesi khawpuia kohhran dinnaa pui tur leh kaihhruai turin a tir a ni. Timothea chu hlauhna tinrengin khat mah se, Pathianin a hmang a ni.

Timothea nun aṭanga Pathian kohna tihhlawhtlin dan tur kawng thum zir tur lo en ila.

Pathian thilpek i dawn chu tipung zel rawh

Bible chuan, “I naupanna tu mahin ngainep suh se; thusawi kawngah te, chetze kawngah te, hmangaihna kawngah te, rinna kawngah te, thianghlimna kawngah te ringtute tihhmuhtu ni zawk ang che … Nangmaha awm thilpek, hrilh lawk anga upahote kut nghata Pathianin a neihtir che kha thlahthlam suh. Mi zawng zawng hnena i sawtna a lan theih nan chung thilah te chuan taima la, chungah chuan inhmang zo rawh” (1 Timothea 4:12, 14-15).

Paulan Timothea hnenah he thu hi a sawi bawka, “Ka kut nghah avanga Pathian thilpek nangmaha awm kha chhem alh turin ka hriatpui che a ni. Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a.” 2 Timothea 1:6-7.

Ringtu i nihna angin i talent leh Pathian thilpek i dawn chu damchhunga ti pung zel tura mawhphurhna pek i ni tawh a ni.

Thil dang intihbuai tir suh

Paulan 1 Timothea 4:16-ah Timothea chu a hrilha, “Nangmah leh i zirtirnaah chuan fimkhur la; chung thil tiin awm reng rawh; chutiang tiin nangmah leh i thu ngaithlatute a chhandam dawn zuk nia.”

Sumdawn duhna te, chhungkaw ngaihpawimawhna te, hna ngaipawimawhna te leh pawisa khawl duhna te avanga kawng zawh sual hi a hlauhawm hle a ni. Mi tam takin an hun tam zawk chu Internet-ah leh phone-ah an khawhral hial a ni. Isua zuitu i nihna angin, thil pawimawh tak tak zawk chu i ngaihtuah a ngaia, chutichuan Pathian kohna che chu i ti hlawhtling thei ang.  

Pathian chu i theihna sang ber pe rawh

Kan Bible chuan, “Rinna intihsiakna ṭha chu bei la, chatuan nunna chu vuan rawh; chumi chang turin koh i ni a; hretu tam tak mit hmuhah ṭanna ṭha chu i ṭan tawh kha” (1 Timothea 6:12). Pathianin thawh tur bik neiin a ko che a, mahse chu chu i hun ṭha ber te, i theihna sang ber te, thilpek ṭha ber te leh a lama i hawi tlatna aṭang chauhin i ti hlawhtling thei ang. 

Paulan Timothea chungchang hetiang hian a sawia, “Timothea ang reng hi tumah ka nei si lo” Philippi 2:20. Thlan lunga thuziak atan nise chu thu aia mawi zawk chu a awm thei dawn em ni? Timothea ang reng reng hi khawvel hmun dangah an awm lo. Thil dang a ngaihtuah ve lo. Pathianin a kohnaah chuan a inpe em em mai a ni. Tuman an tibuai lo va, an tihnual bawk hek lo. Pathian chu a theihna sang ber a pe a ni.

Pathian chu i theihna sang ber i peka, a kohna che i chhan bawk chuan, Pathian pawhin nangmaha a ṭha ber a rawn tarchhuak dawn a ni.

Ngaihtuah zui atan

* Pathian thilpek i dawnte chu engtin nge i tihpun zel le?

* Pathianin a kohna che i chhanna lama daltu awm thei apiang te chu engtin nge i lo tihkian zel le?

* Nitina i thiltih ṭhinah engah te nge i theihna sang ber i pek ṭhin? I rawngbawlnaah leh kohna i dawnah te chutiang chuan i ti ve tho em?

[Lettu: Sangpuia]

Tuesday, November 23, 2021

PATHIAN KOHNA CHHANG TURIN TLAI LUA A AWMLO

 — Rick Warren 

— 23 November, 2021



“Tunah hian kum sawmriat leh kum nga ka lo ni ta a, Chuti chung pawhin tun thleng pawh hian Mosia mi tirh lai ang mai bawk khan ka la chak reng, chhuahvah nan thahrui ka nei ang bawk khan tunah pawh hian ka la nei reng asin. Chutichuan he tlang, Lalpan kha mi nia a lo sawi tawh kha mi pe ta che" Josua 14:12

Pathian kohna chhang turin tlai a awm theih loh.

Josuan enthlatu mi 12 a tirhchhuah khan, an thu rawn hawn chu, chu ram chu Pathian mite tan luah a harsa ang tih thu hi a ni. Chu an rinlohna avang chuan Israel fate chu kum 40 lai mai thlalerah an vakvai ta a. Pathian thutiam chu an rin loh avangin chutih hunlaia mite chu an boral vek a. Mahse, Josua leh Kaleba chuan an ringa, an nung ta zel a ni.

Israel fate chu kum 40 hnuah Ram tiam an luh hnu chuan, Kaleba chuan, “Tunah hian kum sawmriat leh kum nga ka lo ni ta a, Chuti chung pawhin tun thleng pawh hian Mosia mi tirh lai ang mai bawk khan ka la chak reng, chhuahvah nan thahrui ka nei ang bawk khan tunah pawh hian ka la nei reng asin. Chutichuan he tlang, Lalpan kha mi nia a lo sawi tawh kha mi pe ta che," a ti a Josua 14:12.

“Chu tlang chu mi pe ta che”— ka duhzawng tak a ni! Kaleba ram duhzawng chu mi lian ho leh kulh ropui tak inhung khup awmna a ni. Pathian hnenah he thu hi a la sawi theia, “Tih tur harsa ber chu min pe rawh. Khawpui hneh harsa ber turah chuan min tir la. Mi lian pui pui awmna ramah chuan mi tir la. Tlang ramah chuan mi kaltir la. Hmun awlai leh hneh awlsamnaah mi tir suh. Tunah hian kum 85 ka ni tawh tih chu ka inhria. Mahse i tana thil ropui tak tih zel hi ka la duh" a ti a ni.

Ka tunu ta tur birthday card ka lei laiin, ka la hmuh ngai reng reng loh inlawmpuina card ka hmu a. Tunah chuan birthday inlawmpuina pawh kum 80, 85, 90, 95 leh kum 100 tlin lawmpuina tur siamsa vek ka hmu ta mai a! A chhan chu, mihring te hi kan dam rei loh em avangin a mak ka ti deuh a ni. Mahse tunah chuan mihring dam chen tura kan ngaih pawh hi a sang ve ta zel a ni.

Kum upa lam deuh i nih chuan, i hna te chawlhsan a hun ta i ti a ni maithei e. Mahse ka hrilh a che, chu rilru chu i thehthlaka, i paih bo a ngai a ni! Pathianin kum 30 dang chu golf khel tur ringawtin a damtir che a nih i ring em ni?

He thu hi a ni Bible-a awm miah lo chu:  chawlhna. I hna chu i thawk tawh lo a ni maithei e, mahse Lalpa rawng erawh chu bawl zel rawh. Tun hma zawng aiin finna leh tawnhriat i ngah tawh zawka, chu chu Pathianin a thlawna luanral tir a duh lo a ni.

Kum 85 mi a nihin Kaleba chuan a nuna mission ropui tak a thawk ṭan a. Mosia chu kum 80 a nihin Pathianin a mite chhuah zalen turin a ko a ni. Pathian kohna a dawn khan Abrahama pawh kum 79 a ni tawh a ni.

Kaleba hun laia mi i nih chuan, Pathian kohna chhang turin i la tlai lo a ni tih hi lo hre hram teh. Hun ṭha ber chu a lo la thleng dawn a ni!

Ngaihtuah zui atan

* Kaleba te hun laia mi i nih chuan, engtin nge i hna i thawh tawp hunah, i hun lo la awm tur chu Pathian tan engtin nge hman zel i duh? Kum 10, 20 emaw 30 hnuah engtin nge Pathian kohna chu i chhan dawn le?

* I hna i thawh zawh huna i awm dan chuan Pathian tana i thil tih zawh tum chu eng chen nge a hril?

* Kum engzat nge i nih tawh tih hi a pawimawh ber lo, Pathian a ko che a nih chuan eng chu nge i bawhzui dawn tih hi a pawimawh zawk chu a ni?

[Lettu: Sangpuia]

Wednesday, November 17, 2021

HARSATNA I TAWH LAIIN I ṬHIANTEN AN PUI ANG CHE

- Rick Warren

- Nov 17, 2021



“In ritphurhte chu inchhawk tawn rawh u, chutichuan Krista dan thu chu in zawm a ni ang.” Galatia  6:2

I nunah thil duhawmlo tak i tawh laia i awmdan chu, chu thil chu neih let i tum emaw mahnia awma thawk lak i duh a nih pawhin thil tihawm tak a ni. Nangmah ngeiin chu thil chu chinfel i tum a. I thil chan te, i hlawhchhamna te, i tihsual te leh i harsatna te chu a ruka vawn i tum a. Inhnuhkir i tum a ni. Mahse chu chu ngaihdan ṭhalo tak a ni!

Harsatna i tawh hun hi a ni, ṭhian i mamawh hun tak chu ni. Nangmah chauha rilru thawpikna leh natnate tawrh tir che hi Pathian thil tum a ni lo. Midang hnena ṭanpuina lak thiam hi a hrisel em em zawk a ni.

Tu te pawh hian inzawmna kan nei vek a. Kan inmamawh tawn vek a ni. Inlaichinna nei tura duan mihring kan nih vang a ni. Eden huana Pathian ṭawngkam chhuak hmasa ber te zinga mi chu, “Mihring amah chauhva awm hi a ṭha lo ve” a ti a (Genesis 2:18). Inlaichinna nei tura siam kan ni. 

Joba 6:14 chuan, “Chau ṭep tawh chungah chuan a ṭhian a ngilnei tur a ni a. Engkimtitheia ṭihna hawisantu chungah pawh.”

Na tuara hrehawm ti taka hun i hman chang a awm ang, chutih hunah chuan, “Tunah tak chuan rinna ka tlachham, rinhlelhna hlirin ka khat” i ti hial ang. Chutih hunah tak chuan nangmah ṭanpui tur ṭhian i mamawha, i ṭhian chuan, “A pawi ti suh. I tan rinna kan nei alawm. He i hun atan hian Pathianah kan innghat tlat dawn” tiin. 

Bible chuan, “In ritphurhte chu inchhawk tawn rawh u, chutichuan Krista dan thu chu in zawm a ni ang” tiin Galatia 6:2. Engnge Krista dan chu? Hei hi a ni: Nangmah i in hmangaih angin i vengte hmangaih rawh. Bible chuan inṭanpui tawn turin thupek min pe a. Harsatna tawkte i ṭanpui apiangin, Krista dan i zawm tihna a ni.

Nangmah maia harsatna chinfel i tum a nih chuan i thawpik leh i chauh a zual ang. I ṭhianten ṭanpui an duhna che chu pawm la, Pathianin kawng engkimah a hruai zel ang che tih hre chungin i ṭhiante chuan khaichhuak che rawh se. Tun dinhmunah chuan la hmuthiam rihlo mah la, Pathianin i tana ṭha turin hna a thawk mek a ni. 

Ngaihtuah zui atan

* ThiI duhawmlo leh channa i tawrh lai khan tunge thlawp tlat che? Harsatna i tawh laiin tunge i thlawp le?

* Harsatna i tawh laiin engtiangin nge rinnaa ṭhianho/pawlho ten an puih theih ang che?  

* Rinnaa ṭhianho/pawlho ten an puihna aṭang chein Pathian chungchang engnge zirchhuah i neih theih ang le?

[Lettu: Sangpuia]

I HARSATNA CHU PAI RENG SUH, PATHIAN HRILH RAWH

- Rick Warren

- 16 November, 2021



“I thinlung chu tui angin leih chhuak ang che Lalpa hmaan; Ama lamah i kut phar la, i fanau kawtthler tawntirh tina rilṭama chaute nunna atan” (Ṭahhla 2:19.)

Thil lungchhiatthlak tak i tawrh ve tawh ka ring? Joba chuan a hrethiam asin; a takin a tuara - tawrhna leh channaah phei chuan PhD degree a hmu hial a ni.

Joba bu bung hmasa berah khan, a nunna nena inzawm zawng zawng a chhe veka. A chhanna engnge a pek? “Joba chu a tho va, a puan a pawt thler a, a lu a ziat kawlh a, leiah a tlu a, Pathian a bia a” (Joba 1:20.)

Joba'n Pathian hnenah a harsatna chu rilru inhawng takin a hrilh a ni tih i hre thei ang. Tawrhna i hmachhawnin, i rilru dik tak Pathian i hrilh ṭhin em? Chu chu i thiltih hmasak ber tur a ni.


Mak i ti mai thei, mahse Pathianin i harsatna leh i beidawnna te a chinfelsak thei che a ni. I rilru thlengin a thlak danglam thei. Engvangin maw? Chung theihna zawng zawng chu a pe ve che asin. A anpuia siam i nih avangin, Pathian pawh chutiang rilru pu Pathian a ni si a.

Kum 2 mi naupang thin thawkin i ke a rawn pawt a, i lo dangin, i lo chingfel thei tiraw? Chutiang chiah chuan, Pathian pawh rilru na ve thei tho a ni a, i rilru dik tak chu hrilh mai rawh.

I hnaah kaisanna i dila mahse i hmu lo a, i hmangaih em emin a kalsan che emaw thu thin ṭhawng tak hriain i cancer thu an hrilh che emaw lo ni sela, i rilru thawpikna te chu Pathian hrilh tawp mai rawh. Hetiang hian sawi mai la, “Ka a mai dawn, Ka rilru a buai, Ka beidawng takzet.”  Pathian chuan i thu thlen i harsatna te, i zawhna te, i hlauhna te leh i lusunna te a chingfel vek thei a ni. I rilru hahna te zawng zawng aiin Pathianin a hmangaihna che hi a nasa zawk a ni.

Ka fate chuan ka hmangaih a ni tih an hriaa. An ai chuan he leilungah hian ka chen rei tawh zawk avangin tawn hriat pawh ka nei tam zawk a ni tih an hria. Ka faten thutlukna ka siamte pawh a chang chuan an sawisel ve ṭhin. Chuti chung chuan ka harsatna tawh te, hrehawm ka tihna te chu an tawrh ai chuan a la nasa zawk a ni. 

Chutiang chiah chu Pathian chu a ni! I harsatna tawh mekah te chuan hnuchhawna kalsan mai lo chein a buanpui zawk dawn che a ni.

Lungngaihnain a tlakbuak chein tawngpawng tuar ngawt suh. Chutianga tuar ngawt ai chuan, i Pa Vana mi hnenah chuan i harsatnate chu thlen la. “I thinlung chu tui angin leih chhuak ang che. Lalpa hmaan; Ama lamah i kut phar la, i fanau kawtthler tawntirh tina rilṭama chaute nunna atan” (Ṭahhla 2:19)

Ngaihtuah zui atan

*  Harsatna i tawhin tunge i biak hmasak ber ṭhin le? Chumi chu engvanga ring nge i nih? Pathian hnena i kal hmasak ber chuan engnge danglamna a thlen i rin le?

* Engtik nge thinrimna pai reng chunga i awm kha? Chu chuan i rilru leh taksa lamah nghawng engnge a neih?

* Ṭawngṭaia Pathian i dawr tam theihna turin engnge i tih ngai le?

[Lettu: Sangpuia]

Wednesday, November 10, 2021

RINNA RAHBI DAWTCHIAH CHU RAP RAWH LE

 - Rick Warren 

- 10 November, 2021



“Isuan a hnenah, 'Kal tawh rawh, i rinna hi i dampui a ni e,' a ti a. Tichuan a hmu thei ta nghal a, kalkawngah chuan Isua a zui ta a" Marka 10:52

Eng ang rahbi nge i rah leh tur chu ka hre lo, i rah ngei chu a ngai thung si a ni.

I rahbi rah leh tur chu i nuna Isua pawm emaw baptisma chan emaw a ni maithei a. Kohhran  zawma, ṭhalai pawl emawa tel te, thilpek te, rawngbawlna dang va zawm emaw, mission rawngbawlnaa tel emaw, kohhrana tel tura midang sawm pawh a ni thei ang.

I rahbi dawt leh chu ka hre lo, mahse hei hi ka hria: Thil pakhat tih tur i nei. Pathian chuan rinna thuk zawka hruai tawp ni a nei lo ang che. Rahbi thar rah tur a pe zel ang che.

Rahbi dawt chiah chu i rah loh chuan, khuarah i tang dawn a ni. Khuar leh thlan inan lohna chu a sei zawng chiah hi a ni. Hmalam pana i chet chhuah loh chuan i thi dawn a ni. I rilruin a vei nep tial tial anga, Pathian aṭanga hla ta riauah i inngai dawn a ni. Rahbi pakhatna  i rah hma loh chuan, rahbi pahnihna, pathumna, palina emaw panganaah emaw pawh a pui dawn lo che a ni.

Pathian ṭanpuina i dil a nih chuan, ti hian zawhna a zawt ang che, “Engvangin nge ti tura ka tih che i tih loh?” Thil tih tum ruahman lawksa i nei maithei. I thil ruahman chu chawlhsan la, tunah khan  ti nghal mai rawh.

Nimin lamah te pawh Bartimaia, Isua rinnaa ko chhuaka, damna beiseitu aṭangin kan zir tawh a. Bartimaian Isua a tawh hma khan, kawng sirah a ṭhu ṭhin a. Isua hnen aṭanga mitvarna a chan tak hnu chuan, “Kalkawngah chuan Isua a zui ta nghala” (Marka 10:52).

Eng zawk hian nge i nun sawifiah zawk le: Kawngsira lo ṭhu nge i niha, kalkawnga Isua zuitu zawk? Eng nun zawk hi nge nun hlenchhuak ni zawka i hriat? Eng zawk hi nge nun awmze nei zawk, hlimna tam zawk, lungawithlak zawk nia i hriat le? Eng zawk chu nge nunchhuahpui tura i duh le?

Isua zuina tur kalkawng pakhat chiah a awm a: Rahbi dawt chiah chu rap rawh le. 

Rinna chu awih satliah hi a ni lo a. Rinna chu ngaihtuah te, ṭawngkaa sawi te, Isua duhna satliah aiin a nasa zawka. Rinna chu thiltih a ni. A taka chetchhuahna; hmuh theiha lantir a ni. Rinna chu thil engemaw i va tih kha a ni a. Bible phei chuan, “Miin rinna ka nei tiin, engmah tilo sela, an rinna chuan hlutna a nei lo ang” a ti.(Jakoba 2:12 NCV).

Bul ṭan ṭha leh turin khawi aṭangin nge rinna i neih ang? Kawng khat chiah a awm: Isua Krista.

"Nangni erawh chu ama zarah Krista Isuaah chuan in awm a ni; ani chu Pathian hnen ata kan tan finnaah siam a ni, felnaah te, thianghlimnaah te, tlannaah te nen" (1 Korinth 1:30).

Bartimaian Isua Krista kha khami ni khan a kaltlang ang tih reng a hre lo. A tan chuan ni dang ang tho a ni. Mahse beisei loh takin Pathianin bulṭan lehna hun remchang a siamsak a ni.

Pathianin hun remchang  a siam ve mek che a ni. Nghak khawtlai lo la. Hun ṭha chu a liam hmain rahbi thar chu rap rawh le.

Ngaihtuah zui atan

* Vawiinah hian kawngsirah i ṭhu nge, kalkawngah Isua i zui zawk?

* I nuna rahbi thar chu rap turin engnge i nghah le? Ti khawtlai turin eng chhuanlam nge i siam ṭhin le?

* Rinna kawnga ke pen tur leh Isua zui turin eng rahbi thar nge i rah dawn le?

Chhandamna rahbi chu rap rawh le

I nuna Isua rin chu i rahbi thar tur a ni em le ? Engpawh lo tisualin khawiah pawh lo awm tawh mah la. Pathian chhungkuaah chuan chatuan atan hmun i neia, a nghak reng che a ni.  Chu sawmna chu a huapzau a. Pawm la awih tawp mai rawh.

I inpeih em? Hetiang hian ṭawngṭai ta che, "Aw Pathian,  Ka thih hunah chuan, ka chanchin zawng zawng ka la sawi vek dawn tih ka hria a. I lakah ka sual a ni tih ka hria a. I duhzawng ni loin keima duhdanin ka nung ṭhin a. Nun danglama bul ṭan thar tunah hian ka duh a ni. Ka sualnate hawisana i lam lo hawi ka duh a ni.

“Isua, mi zawng zawng aiawha thi tura i lo tirh avangin ka sual man te ka pek a ngai lo a ni tih ka hriat avangin ka lawm a ni. I ngaihdamna hi ka phu lova. Lalpa, i khawngaihna chauh chuan min chhandam a ni tih ka hria. Famkimna rama lut tur hian ka tling ngai dawn lo a ni tih ka hria a ni.

“Isua, min hmangaih em avanga ka sualna zawng zawngte min tlaksak avangin lawmthu ka sawi a ni. Vanrama lut ve thei dinhmunah min siama, chuvangin khawngaihin min chhandam ang che. Ka ring che a ni, Isu. Min tiam ang ngeiin chawplehchilhin, phat rual lohin, a famkimin, chatuanin min chhandam ang tih ka ring e. Isua hmingin, Amen.”

A chunga mi ṭawngṭaina ang khian i ṭawngṭai a nih chuan, hetah hian min lo hrilh ang che Rick@PastorRick.com. Isua nena bul i ṭan thar leh theihna turin i tana ṭangkai tur thil ka rawn thawn dawn che a ni.

[Lettu: Sangpuia]

Tuesday, November 9, 2021

RINNA THUHRUK CHU RINNA PAWNLANG AN TIH HI A NI

 - Rick Warren 

- 9 November, 2021



“Isuan amah chu a lo bia a, 'I chungah engtia ka tih nge i duh?,' a ti a. Tin, mitdel chuan a hnenah, 'Rabboni, hmuh theih ka duh,' a ti a.'" Marka 10:51

Pathianin tih tur a pek che chuan vantlang hriatah i tih a ngai ṭhin. I thiltum chu puangchhuak la. I nuna danglam i duh dan chu sawichhuak ang che. I thil tih tum chu sawifiah la. Midang hnenah i sawi a ngai a ni. A chhan chu rinna thuhruk chu rinna pawnlang an tih hi a nih avangin.

Nimin lamah khan mitdel Bartimaia'n beisei loh taka Isua a tawn dan kan zira. Isua chu a kiang hnaiah a awm a ni tih a hriat khan, Isuan a hriat theih nan ring taka auin, a rinna kha vantlang hriatah a puang chhuak a nih kha.

Marka 10:51 ah khan, "Isuan amah chu a lo bia a, 'I chungah engtia ka tih nge i duh?,' a ti a. Tin, mitdel chuan a hnenah, 'Rabboni, hmuh theih ka duh,' a ti a.

Engvangin nge kha zawhna kha he khawvela a awm lai khan a zawh kher? Mitdel mamawh kha Isuan a hriatchian em vang zawk a ni. Kha tih hun laia mitdelte dinhmun kha a ṭhalo em em a, mite hnuaichhiahin an awm a, an tih theih chhun chu an dam khawchhuah nana kutdawh mai kha a ni.

Chuti chung chung pawh chuan, Isuan a va pan hnaia, "I chungah engtia ka tih nge i duh?" tiin a zawt a ni. Bartimaia mamawh chu a hre daih tawh lo em ni? A rilru aṭangin emaw a hmel en aṭang ringawt pawhin a duh chu a hrethiam mai lo em ni? Hre tehreng mai.

Mahse Isuan, Bartimaian a hlawkpuina turin zawhna a zawt a ni. Chu zawhna a zawh avang chuan Bartimaia chuan vantlang zingah a rinna a puanchhuah theih phah a ni. Bartimaia chuan, "Hmuh theih ka duh," a ti a (Marka 10:51). Ṭawngkam dangin sawi ila, Bartimaian Isua tihdamna chan a duh a ni.

Isuan a tidam thei ang tih i rin loh chuan tidam turin i dil lo ang. Bartimaia erawh chuan Isua chu a sawi anga awmah leh danglamna thlen thei turah a ngai a ni. Chu taka chu rinna puanchhuahna chu a ni.

Hei hi thil danglam tak chu a ni. Kha zawhna tho kha Isuan a zawt a che: "I chungah engtia ka tih nge i duh?" tiin nitin min zawt a ni.

Pathianin hman che a duh a. Pathianin malsawm che a duh a. I nunah thil ropui tak tih a duh a ni. Amaherawhchu Isuan engnge tihsak theih che ka neih tia a zawh che khan, rinnaa i chhan a ngai thung a ni.

Engtin nge rinnain i chhan theih ang? Pakhatnaah chuan ruahmanna siam chungin i chhang thei ang. Ruahmanna i siam fo ṭhina, a nihna takah chuan hei hi rinna puanchhuahna a ni.

Vantlang zingah i thil tum puangchhuak pawhin i chhang thei ang. Hretu an tam poh leh, thlawpna, fuihna, ṭawngṭaina, rinna i dawng tam ang. Vantlang zinga i puanna chuan i rinna thukzia a ti lang a; i nunah danglamna lian tham tak lo thleng se tih i duha, mahse chu chu nangmah chauhin i vawn chuan, i rinna chu a pawnlang tihna a ni.

Chutih lai chuan i rinna chu i puangchhuak a nih chuan, Pathian chauhin hmalam hun a hria tih hi hrereng ang che. Chuvangin, "Chumi khami chu ka ti dawn," i ti a nih pawhin "Pathianin rem a tih chuan," tih hi telh zel ang che.

Isuan, "I chungah engtia ka tih nge i duh?" a ti a nih pawhin i chhanna tur inring sa la. Tichuan vantlang zingah pawh rinnaa sawichhuak turin inring bawk ang che.

Ngaihtuah zui atan

* Isua Krista chu tunah i kiang hnaiah lo kalin hmaichhanah, “I chungah engtia ka tih nge i duh” lo ti ta che sela. Engtin nge i chhan ang le?

* Kawng hmasa berah chuan Baptisma changa puanchhuahna a ni ang. Baptisma chu vantlang zinga rinna puanchhuahna leh nunthar neihna lantirna a ni bawk. Baptisma changa Kristaa thuawihna entirna turin eng rahbi nge i rah ngai le?

* Vawiinah hian rinna rahbi tuk turin eng ruahmanna te nge i siam dawn le? Engtin nge vantlang zingah chungte chu i puanchhuah ang?

[Lettu: Sangpuia]

Wednesday, November 3, 2021

PATHIAN MALSAWMNA I DAWN THEIHNAN, PATHIAN A HMASABERAH DAH ANG CHE

 - Rick Warren

- 3 November, 2021



"Ama ram leh ropuinaa ko luttu che u Pathian mi ni tlaka in awm theihna turin nung ang che u." 1 Thessalonika 2:12

Hetianga ṭawngkam chhakchhuak ṭhinte ka titipui ṭhina, "Thil tam tak ka nei a, mahse thil hlenchhuah loh la neia inhriatna ka nei fo. Chhungkaw ṭha tak ka nei a, hna ṭha tak leh ṭhian ṭha tak tak ka nei a. Kohhran lian takah ka lawi bawk a. Chutichung chuan engvangin nge hlenchhuah loh neia ka inhriat fo?" A chhan chu tun aia hmasawn tura siam i ni. Dam khaw chhuah baka ke pen zel tura duan i ni.

Pathian ram, Pathian thuneihna leh Pathian ropuinaa i chen ṭan phawt loh chuan i nunah lungawina i hmu lo ang.

Nun hlenchhuak chu engtin nge i neih theih ang - chu chu Pathianin a  duan dan che a ni si a.

Bible-in heti hian a  sawi a, "Ama ram leh ropuinaa ko luttu che u Pathian mi ni tlaka in awm theihna turin nung ang che u." 1 Thessalonika 2:12

Pathian rama chen chu eng nge a awm zia? A awmzia chu Pathian thupui chu i thupuia i dah hi a ni. Pathian duhzawng chu i duhzawnga i dah hi a ni. Pathian ngaihsak zawng chu i ngaihsak zawng a nih a ngai bawk. Pathian malsawmna dawn i duhna apianga amah dah hmasak hi a ni.

I nuna Pathian dah hmasak ber chu engnge a awmzia? Heng kawng ngaah te hian Pathian a HMASABERah dah ang che.

Sum leh pai. I sum leh paiah Pathian malsawmna dawn i duh chuan, harsatna i tawh lai pawhin, thilpek pe ṭan ang che.

Tuina zawng. I tui zawng, eizawnna leh nuam i tih zawngah te a hmasa berah dah ang che.

Inlaichinna. In chhungkua, in nupa karah leh i ṭhiante nena inkara a hmasa berah dah ang che.

I hun. Nitina i hun hmasa ber Pathian pe ang che. I thawh veleh, i khum bula ṭhuin hei hi sawi la, "Lalpa, vawiinah hian engmah tih theih ka nei lo a nih chuan, hmangaih zual che ka duh a, hriat chian leh zual che ka duh a ni."

Buaina. Harsatna i tawh reng rengin Pathian lam hawi hmasa ber ang che. Ṭawngṭaina chu i chawlhna hnuhnung ber tur a ni lo. I duhthlanna hmasa ber tur a ni.

Engkimah Pathian a hmasa berah dah la. Tichuan engzata nasain nge mal a sawm che en rawh le.

Ngaihtuah zui atan.

* Sum leh pai, tuina zawng, inlaichinna leh i hun hmanah te Pathian a hmasa bera i dah theih nan i engnge thlak danglam ngai le?

* I nuna harsatna i tawhin, engtin nge hma i lak hmasak ber ṭhin?

* I nunah ṭawngṭaina nun engtin nge i neih chhoh zel theih ang?

[Lettu: Sangpuia]

Tuesday, November 2, 2021

DANGLAMNA THLEN TURIN KAN INMAMAWH TAWN

  - Rick Warren

- 2 November, 2021



“Pahnih chu pakhat ai chuan an ṭha zawk, an thawhchhuah ṭhat avangin. An tluk pawhin pakhat chuan a ṭhian chu a khai ding dawn si a; mahni chauhva awm kha erawh chu a chung a pik e, a tluk chuan khaidingtu tur a nei si lo.” (Thuhriltu 4:9-10)

Pathianin mawhphurhna neia inmamawh tawn turin min siam a. Kan rilru natnate, thawpiknate, chindawklak ṭhalo aṭangtea talchhuak turin kan inmamawh tawn a ni. Thlemna aṭanga talchhuah tak tak i duh a nih chuan, midang ṭanpuina pawh i mamawh ang.

A dika dik chuan, nangmah mai chuan danglam turin ke i pen thei lo a ni tih i hriat hunah chuan, Pathianin nangmaha danglamna thlen turin hna a thawk daih tawh a ni tih i hmu ve thei tawh ang. Tichuan, danglamna i neih theih nana midang a hman dan te pawh i hmu ang. 

Thudik chu hei hi a ni, ṭhang lian turin kan inmamawh tawn tih hi. I mamawh loh ber nia i hriatte chu a chang chuan i mamawh berte an ni zawk. Chuvang chuan nangmah hrechiangtu leh ṭanpui theitu che ṭhian i mamawh a ni. 

Bible-a Thuhriltu 4:9-10 chuan, “Pahnih chu pakhat ai chuan an ṭha zawk, an thawhchhuah ṭhat avangin. An tluk pawhin pakhat chuan a ṭhian chu a khai ding dawn si a; mahni chauhva awm kha erawh chu a chung a pik e, a tluk chuan khaidingtu tur a nei si lo,” a ti.  

Tu te pawhin thlemna kan tawk a. Thlemna i tawh loh chuan thlarau lamah i ṭhanglian thei lo vang. A dika dik chuan, i puitlin poh leh Setanan thlem a tum zual sauh ang che. Mahse hei hi ngaihtuah teh: Thlemna i tawh chanchin i ṭhiante hnena i puan ṭhin chuan, sual puan tur i nei tam lo thuai ang. 

Kan Bible chuan, “Unaute u, mi, sual eng pawh a tih lai phawkin awm sela, nangni thlarau mite u, ‘Thlemna ka tawk ve dah ange,’ tia inveng ṭha chungin chutiang mi chu thuhnuairawlh takin tungding leh rawh u. In ritphurhte chu inchhawk tawn rawh u; chutichuan, Krista dan thu chu in zawm a ni ang,” a ti (Galatia 6:1-2.)

Eng nge Krista dan chu? Nangmah i inhmangaih angin i vengte hmangaih rawh. Nangmah i inhmangaih angin i vengte chu engtin nge i hmangaih ang? Thlemna an tawh laia ṭanpui te, an rinnaa an dinngheh zel nana ṭanpui te,  chin dan ṭhalo an neih bantir te leh a ṭha zawk zawmtir te. Chungte chu i vengte i hmangaih dan tur leh Krista dan zawm dan tur ṭha ber an ni.

 Ngaihtuah zui atan.

* Thlemna i tawh dan i puan khan ringtu dangte nunah engtiangin nge hlawkna a thlen?

* I ringtupui hnena thlemna i tawh chanchin i puan khan eng rah ṭha nge i beisei le? I nunah chung nun ṭha te chu engtin nge i seng luh ve ang?

* Vawiinah hian i vengte i hmangaih dan tur leh Krista dan i zawm dan tur kawng khat eng nge ni ang le?

[Lettu: Sangpuia]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...