Thursday, August 31, 2023

I THUTLUKNA CHUAN ENGTIN NGE MIDANG A NGHAWNG ANG?

 Khawsakna Atana Thil Pawimawh

By Rick Warren

— Aug 31, 2023


“Tichuan, insawisêl chîng tawh suh u, tu pawhin mahni unau tlûkna tûr emaw, lungnihlohna tûr emaw siam loh tum zâwk rawh u.” [Rom 14:12-13]

Mihring nuna kan tih sual lian tak pakhat ni fo chu kan thutlukna siamin mite a nghawng theih dan kan chhut lo chu a ni. Thutlukna i tana ṭha, i kianga awm te tana ṭha lo ni si chu nitin tih theihna hun i nei. Thutlukna fing tak siam i duh chuan, he zawhna hi inzawt ang che, “Hei hian midangte a tina ang em?” tiin. 

Chu chu tunlaia kan tihdan nena inkalh tlat a ni. Kan khawtlang inzirtirna chuan keimahni chauh inngaihtuah turin min ti a. Mahse Pathian thung chuan midang ngaihtuah turin min ti a, keimahni chauh ni lovin. Dik tak chuan, Bible-in min zirtir dan chuan engtik niah emaw chuan kan thutlukna siamin midangte a nghawng dan thuah ro min la relsak dawn a ni tiin. 

Rom 14: 12-13 chuan, “Tichuan, insawisêl chîng tawh suh u, tu pawhin mahni unau tlûkna tûr emaw, lungnihlohna tûr emaw siam loh tum zâwk rawh u,” tiin. 

He thu hi i hre duh kher lo vang, en mektu i nei tih hi – eng lai pawhin. Fa i nei a nih chuan, i fate chuan an thlir reng che a ni tih hre tlat ang che. I thil sawi leh tihte chu ngun taka i chhut a ngai, a chhan chu i thiltih chuan i nun mai ni lovin chhuan lo la awm leh turah nghawng a nei dawn. 

I chenna khawtlang tana rawngbawltute chu zahna lantir ang che. Police officer-in ding tura a tih che a, pawisa chawi tura a tih che chuan, an dik lo zawk nia i hriat pawhin zah takin anmahni bia ang che. 

I chhungte tuipui kama i len thawven ni chuan dam lo angin i pute hnenah chhuanlam siam suh. 

I hnathawhna aṭanga in chhungkhur mamawh i rukte chu hmang suh. 

Chhiah chungchangah dawt sawi suh – I fate hmaah insawi theih nan hmang suh. 

TV-ah thil ṭha lo i fate hmuhpui tur chea i duh loh chu nang pawhin en suh. A en leh en loh thu hrim hrim pawh ngunthluk takin ngaihtuah ang che. 

Mi puitling chuan an mimal zalenna chu midang tan an khek ṭhin. A chhan chu midangten an hmuh dan chu ngaihtuah leh vei berah an nei, a chhan chu hmangaihnaah an awm a ni. Thil eng emaw a dik leh dik lo thliar a harsatnaah chuan he zawhna hi i inzawh a ngai, “He ka thutlukna hian engtin nge mite a nghawng ang?” tiin. 

Ngaihtuah zui atan. 

I thutluknain midang a nghawng dan chu ngaihtuah chiang thei lo turin nangmaha chapona chuan engtin nge a khawih danglam che? 

I thiltih lai chu miten a dik lo ti mahse nangmahin a dik tih i hriat chian chuan engvangin nge a pawimawh? Eng nge a chhan? 

A tak takah chuan, mite hlawkna tura mahni zalenna khuahkhirh tih awmzia chu eng nge ni? 

[ *Lettu* : Peka]

Wednesday, August 30, 2023

I THIL TIH CHU A DIKLO A NI TIH I HRIATIN ENGTIN NGE I AWM?

 _Khawsakna Atana Thil Pawimawh_

By Rick Warren 

— Aug 30, 2023


“Ngil taka kal chu, muanawm takin a kal thin a, a kawng tikhawlotu erawh chu hriat chhuahin a awm ang.” Thufingte 10:9

I rinawmna chu i vantlang nun leh mimal nun a inmil a nih chuan a hriat ang a – i rilrua awm leh a taka i nunpui kha inmil rawh se. Hei hi inzawt la, “Thutlukna ka siam hi mi zawng zawngin hria se tih ka duh ang em?”

Bible chuan, “Ngil taka kal chu, muanawm takin a kal thin a, a kawng tikhawlotu erawh chu hriat chhuahin a awm ang.” Thufingte 10:9

Rinawmna chungchangah chuan hei hi thudik a ni, mi dang chu i bum thei a ni mahna, nangmah i inbum thei lo va, Pathian pawh i bum thei lo vang. Bible thu mil lo va i khawsak chuan, thil duhawm lo leh inlaichinna thlengin thil tha lo in a hmuak ang che.

A chang chuan thil tha lo kan ti tih kan inhrechhuak thin a. He thil tih hi chu a tha lo tih kan hria, nimahsela ka rilruah hetiang hian ka ngaihtuah a: “Thi tha lo ka ti tih chu ka inhria a, mahse ka ti zel tho vang, a chhan chu Pathianin min la ngaidam tho vang tih ka in beisei a ni.” 

Pathianin diklo tia a sawi chu siam dik thei turah leh a nghawng lo thleng tur pawh chu dal thei ah i inngai em? Pathian chuan thil tih reng reng hian nghawng a nei tih a hria a – chuvang chuan thutlukna diklo siam turin a duh lo che a ni. Thutlukna fello chuan ser tha lo tak a siam thin avangin, a tha zawk Pathian a duhpui che a ni.

Chumi avang chuan Pathianin i thil tihsual ah chuan a ngaidam dawnlo che tihna em ni? Ni lo ve, a ngaihdam che a ni. Pathian chu ngaidam thei leh khawngaihna Pathian a ni. Nimahsela chu ngaihdamnaah chuan, a duhdana i awmloh avang chuan tawrhna leh a sawhkhawk chu i kal kan thei chuang lo a ni. Ngaihdam i nih hnuah pawh pawi tihna chu ila nei tho vang. Ngaihdam i nih hnuah pawh ila tuar tho vang. Ngaihdam i nih hnuah pawh inlaichinna chu a la tha lo tho vang.

Pathianin a siam che a, nun awmzenei leh tangkai taka i hman theihnan eng nge tangkai tih a hria a ni. Pathian Thu ring la, tichuan kawng a kawhhmuh ang che.

Ngaihtuah zui atan

* Thil dik tih tur hre si a, i tih si loh hian i rinawmna engtin nge a nghawng?

* Pathian duhzawnga i awmloh lai pawha Pathian ngaihdamna i chan lai kha engtik nge?

* Rinawmna chungchangah inelna a san viau chhan eng nge ni? Rom 14:14 chhiar la. Chu chang chuan engnge a sawi?

*[Lettu: Sangpuia]*

Tuesday, August 29, 2023

THUTLUKNA DIK CHU PATHIAN THU NEN A INMIL ṬHIN

  _Khawsakna Atana Thil Pawimawh_

By Rick Warren 

— Aug 29, 2023


“I thu hi ka ke atante hian khawnvar a ni a, ka kawng atan eng a ni.” Sam 119:105

Nitin hian thutlukna siam a ngai fo mai a, thutlukna siam chu thil harsa tak a ni fo thin. Nimahsela inkaihruaina awlsam tak a awm: thutlukna dik siam i duh chuan, Pathian aw ngaithla rawh.

Bible chuan, “Hriatna hi i auh va, hriat thiam theihna pawh i auh chuan … Lalpa ṭih nachang i lo hria ang a, Pathian hriatna chu i chhar chhuak ang … Tichuan felna leh rorelna chu i lo hre thiam ang a, hleih neih lohna nen, a ni, kawng tha tinreng pawh,” a ti. Thufingte 2:3,5,9.

A nih leh Pathian aw chu engtin nge i ngaihthlak ang? Pathianin kan hnena thu a sawi dan langsar ber pakhat chu a Thu hmangin a ni. Chuvangin thutlukna i siam dawn chuan, nangmah inzawt thin la: “Thutlukna ka siam tur hi Pathian Thu nen a inmil em?”

Thutlukna i siam hian, i nuna thuneitu tur i thlang ve nghal a ni tih hre bawk ang che. Chu duhthlanna chu chiang takin: Pathian nge khawvel tih a kawk tel bawk. Thutlukna chu Pathian duh danin nge khawvel mite duh danin i siam dawn?  

Mipui ngaihdan lak i duh chuan, i ngaihdan chu a ṭhing thuai ang, a chhan chu mipui ngaihdan chu nitinin a danglam si a. Nimina ‘thar’ kha vawiinah chuan a hlui tawh a, vawiin a ‘thar’ kha naktukah chuan a lo ‘hlui’ ve leh nghal ang. Mipui ngaihdan leh duh dan anga i kal chuan harsatna i tawk ang, a chhan chu i innghahna kha nitinin a danglam dawn si a!

Kawng dangin sawi ila, Pathian Thu anga i nun a kal chuan, thudik chu a danglam ngai lo a ni. Thudik chu a dik reng thin. Kum 10,000 liam taah khan Pathianin dik lo a tih chuan, kum 500 liam tawhah pawh khan a la dik lo reng a, vawiinah pawh a dik lo a, tun atanga kum 1,000 hnuah pawh a la dik chuang lo vang.  Mipui emaw mi tam zawk ngaihdanah emaw ka buai lo va. Pathianin a dik a tih chuan, a dik zel ang. Chu chu innghahna tlo a ni!

Pathianin he leilung leh boruakah hian taksa, rilru leh thlarau dan a siam a. Pathianin leilung dan a siam chu leilung faten a hlawkna kan tel theih nan a ni. Pathianin chung leilung dan a siamte chu i thawhpui thei a nih chuan, hlawhtlinnain a hmuak ang che. Amaherawhchu Pathian dante chu i hnial a, i awih lo va, i ngaihthaha, i hel chuan, i tawrh phah ang.

Chungte chu i vawng tlat a nih chuan, i thutlukna siamah pawh chuan inrintawkna i nei ang. Pathianin a tha a tih chuan i ti zel ang a. A tha lo a tih chuan i ti lo mai ang.

Pathian Thu mila thutlukna siam i zir meknaah chuan, he thudik hi i hmuchuak ang: “I thu hi ka ke atante hian khawnvar a ni a, ka kawng atan eng a ni.” Sam 119:105

Ngaihtuah zui atan

* Engtin nge khawtlangin Pathian Thu dik lo thei lo aiin thudik chu a danglam thei tiin hneh an tum che?

* I thutlukna chu Bible mila i siam theih nan engtin nge Bible i hriatbel zel theih ang?

* Pathian dan leh inkaihruaina i zawm hian engtin nge zalenna chu i lo tem theih?

*[Lettu: Sangpuia]*

Monday, August 28, 2023

INPEKNA TEL LO CHUAN INZAWMNA NUN I NEI THEI LO

_Khawsakna Atana Thil Pawimawh_

- Rick Warren 

- Aug 28, 2023


_"Ṭhian tam tak siam chuan mahni intihchhiatna a siam a ni a, amaherawhchu unau aia nghet zawk ṭhian an awm ṭhin."_ (Thufingte 18:24)

Inlaichinna ṭha hi tihpalh thila lo awm a ni lo. A chînna tur lei leh hmasak, hnathawh leh hun tam tak sên ngai a ni. Inpekna a ngai bawk!

Ka nupui Kay-i nen hian kan nupa nunah, a bikin kan inneih tirh lamah khan inlaichinna nghet nei turin nasa takin kan thawktlang a ni. "Hei hi awmzia a awm lo. Kan danglam tawh hle mai. He inneihna hi a hlawhtling ngai lovang" kan ti rilru fo ṭhin. 

Mahse kan thawk chhuak zo miah lo. Engvangin maw? Thu kan lo tiam tawh avangin. "Thihnain min ṭhen hma loh zawng" tiin kan lo tiam tawh a ni, kan pahnih inkarah chauh ni lovin Pathian nen pawh. Chuvangin, "He kan intiamna hian min a chhe ber pawh min thlen dawn mahse kan ding nghet tlat ang" kan ti a ni. Min thlen ṭep reng a ni!

Kan inneihnaah hian hmangaihna emaw inngainatna emaw ni lovin, Pathian hmaa kan thutiam chu min chelh hram hramtu a nih chang a tam mai. Kan beidawng lo kha ka lawm hle mai. Tunah chuan ka nupui hi ka ṭhian ṭha ber a ni a, a tel lova hringnun hman ka zuam tawh lo.

Thufingte 18:24-ah chuan heti hian kan hmu, _"Ṭhian tam tak siam chuan mahni intihchhiatna a siam a ni a, amaherawhchu unau aia nghet zawk ṭhian an awm ṭhin."_ 

Pawn lam mite nena kan inthlunzawm nasat lutuk hian inlaichinna nghet tak neih kawngah harsatna min siam ṭhin tih i hria em? Ṭhian satliah mai mai siam nana hun i hman tam lutuk chuan ṭhian ṭha emaw kawppui ṭha emaw nei turin chi tuha hnathawh hun i nei thei lovang. Ṭhian satliah siam ṭeuh kha a ṭha lo ve tihna a ni lo, mahse ṭhian ṭha leh nghet siam hman lovin a siam thei che a ni. 

Hringnun chhiar chho zel turin ṭhian tam tak i neih kher a ṭul lo, mahse ṭhian ṭha i mamawh a ni. Chuvang chuan a tam lam ni lovin a ṭhatna lam thlir rawh. _Social media_ lama i ṭhiante kha i mamawh hunah an awm kher dawn lo. Mahse i ṭhian ṭha, inzawmna thuk tak i neihpuite chu an lo lang thuai ang.

Inzawmna thuk leh pawimawh tak chu inpeknain a inṭan ṭhin. Inzawmna thuk tak leh nghet tak nei tur chuan duhna i neih a ngai.

Ngaihtuah zui atan.

Tute hnenah nge intuk luhna nun i neih? Engtinnge in intuk luh tawnna in lantir?

I ṭhiante, chhungte leh kawppuite nena in inlaichinna kha engtinnge _social media_ hmanga ṭhian i siamnain a tihbuai?

Inlaichinna nghet leh thuk zawk nei turin a taka ke i pen theih dan tur kawng khat le engnge ni le?

[Lettu: Mapuia Fanai]

Sunday, August 27, 2023

KAMTAM HIAN MIDANGTE NEN IN INLAICHINNA A TICHHIA EM?

 Khawsakna Atana Thil Pawimawh

- Rick Warren 

- Aug 27, 2023

"Mi kamtam tei ruai mi chuan thurûkte a tilang a, mi rilru rinawm nei mi chuan thil a thup ṭhin." (Thufingte 11:13)

Kamtam hi sual lian vak lo a ngaih mai hi thil awlai tak a ni. Mahse Pathianin kamtam chungchang a sawinaah chuan mipat-hmeichhiatna hman khawloh leh tualthahte nen huang khatah a dah. Engvangin? Midangte nena kan inlaichinna tichhetu thil lian tak anih avangin. Kamtamna chuan ṭhian ṭha karah te, chhungkuaah te, leh kohhran huang chhungah hem a thlak thei a ni.

I kamtam/ mi i rêl khan, harsatna thlentute zinga mi emaw harsatna sukiangtute zinga mi emaw ni miah lo chungchang kha i sawi ta vak ṭhin a. Dik takin sawi ta ila, kamtamna hian mite kan sawina phenah lang pawimawh ta viaua inhriatna min neihtir ṭhin. Anni aiin kan rilru puthmang a sang zawk ta emaw ti ni awm takin an natnate leh harsatnate sawi nuam kan ti ta ṭhin a ni. Chu chu kamtam/ mi rêl hlauhawmzia leh natna thlentu a nihzia lantirtu a ni.

Thuthlung Hluiah hian chhungkaw pakhat, mi rel hmang/ kamtam chungchang kan hmu. Mosia khan unuau kamtam, amah rêltu, Mirami leh Arona a nei a. Chuvangin Pathianin amah hmu turin an unau pathum chuan a ko a. Miriami leh Arona hnenah chuan Mosia chu a zawlnei a nih thu leh a chunga an tih dan a dik lohzia a hrilh a, chumi lai ngei ngei chuan Miriami chu a lo phâr thut, a chhan chu a unaupa Mosia chungchang a sawi nasat avangin.

Heti hian i lo ngaihtuah mai thei: "A va rapthlak ve, mahse min rêltu chungah chuan eng emaw thleng se ka ti hle mai. Mahse phâr ni lo se, pum natna emaw nise, tichuan eng ang chiahin nge ka lo nat tawh tih a hre mai ang."

A dawtah engnge thleng i hria em? Arona khan Mosia hmaah an sual tihte a puang a, Mosia hnenah a farnu Miriami tan damna dilsak turin a duh a. Tichuan, Mosian Pathian hnenah a natnate  tidam turin a ngen a. Amah rêltute tan a ṭawngṭaisak ṭhin. Amah sawi chhetute tan a ṭawngṭai a. Ni sarih hnuah Pathianin Miriami a tidam ta a ni.

Miin an rêl che avangin hliam na tak i tuar a ni thei- i hnathawhna hmuna an thil sawi emaw i ṭhiante emaw, chhungte emaw, rinna i tlakchham avang emaw a  ni thei. Pathianin heti hian a ti, "Mi kamtam tei ruai mi chuan thurûkte a tilang a, mi rilru rinawm nei mi chuan thil a thup ṭhin."

A nih loh pawhin nangmah zawk kha mi kamtam chu i lo ni reng zawk mai thei. Thuthlung Hlui lama Miriami, Arona leh Mosia chung chang khan tu lamah pawh ṭang ila kamtam pawizia leh midangte tana a nat theih zia min hriat nawn tir a ni.

Mahse, kawng leh lamah chuan, mahni inrintawkna hian midangte nen a inpawhna hlawk zawk, hrisel si leh dik si min neih tir thei a ni.

Thufingte 11:13 chuan, "Mi kamtam tei ruai mi chuan thurûkte a hâi lang a, rinawmna thinlung nei mi chuan thil a thup ṭhîn." a ti.

Engtin nge he chang kalh zawng hian i in teh ang le? Mi kamtam, mahni inrintawkna phatsantu i lo ni reng em? A nih loh pawhin, inrintawkna vawng tura mi rintlak i ni em?

Ngaihtuah zui atan.

I chungchang thua mi kamtam tak kha han ngaihtuah teh. Khami tan khan engtia ṭawngṭai turin nge Pathianin a duh ang che?

I bul vela mi kamtamte lakah engnge i tih ṭhin? Eng chenin nge Pathianin chhanglet tura a duh ang che in a inmil?

Mi rintlak nihna hian eng anga thukin nge i inlainchinna a puih?

[*Lettu*: Mapuia Fanai]

Saturday, August 26, 2023

MI DANGTE CHAWIKAN NAN I ṬAWNGKAM HMANG RAWH

 _Khawsakna Atana Thil Pawimawh_

- Rick Warren

Aug 26, 2023



"Thu ṭha lo reng in kaan chhuak suh se, a tlṭulzia ang zela siam ṭha turin thu ṭha apiang chhuak zawk rawh se, a ngaithlatute tan khawngaihna a lo nih theih nan." Ephesi 4:29


A chang chuan kan thusawite hi tuboh ang mai a ni a. Ngaihtuah lem lo hian kan thenkual a, kan hriatchhuah meuh chuan kan bula mite nen kan inkarah hnawk a lo awm thin a ni. Ngaihtuah lem lova thu i vaivir mai mai hian, inlaichinnain a tawrh phah thin.


Mahse Pathian chuan i thu leh hlate chu mi dangte chawikanna tura hmang turin min duh a. Ephesi 4:29-ah chuan, "Thu tha lo reng in kaan chhuak suh se, a tulzia ang zela siam tha turin thu tha apiang chhuak zawk rawh se, a ngaithlatute tan khawngaihna a lo nih theih nan" a ti. 


Kan thu leh hlate hian awmzia a neih loh fo nachhan pakhat chu Pathianin hmanraw min pek kan kâ leh kan thusawite hian thiltihtheihna a nei a ni tih kan hriat loh vang a ni.  Ngaihtuah hmasa lovin kan sawi zung zung a, mi dangte hian an lo hre reng thin a ni.


School i kal lai daih tawh pawh a ni ang, mi tuten emaw i hnenah chutiang tawngkam thlahdah taka an biakna che i la hre thei mai thei. Chutiang khawp chuan kan thusawi hian theihna a nei a. Chuvang chuan thil i sawi dawnin, hmanraw thiltithei takah ngai la, fimkhur viau thin ang che.


Tum khat chu ka motor dahnaah ka lut a, electric hmang thingzai inkaihhruaina bu ka la a. A hman dan ka chhiar lai chuan, hmanraw thiltithei tak leh kan thusawi hian inzawlna tak an nei a. A hman dan chuan heti hian a ti a:


1. I hmarua hrechiang la.


2. I dahna vawnghim la.


3. Naupang lakah fimkhur la.


4. Hmanloh lai chuan dahtha la.


5. A nihna tur bakah hmang suh la.


6. Boruak that lohna hmunah hmang suh.


I ka chu fimkhur zawkin engtin nge i hman anga, mi dangte pawt hniam lo zawngin engtin nge i hman ang?


*1. Chhuanlam siam suh.* "Ka sawi tum tak pawh a ni lova" emaw, "khatiang khan ka ti thin alawm" tih sim la. I chhehvela mite a nghawng dan tur hrethiam ang che.


*2. Ṭawng tlem la.* Ṭawng tawp chin kan hriatloh avang hian harsatna kan tawk fo thin. Hmanraw thiltithei tak a nih si chuan, kan hman dan te pawh a tam ve tial tial ang chu.


*3. Ngaithla tam la.* I ngaihthlak chuan mi dangte mamawh i hrethiam thei ang.


*4. Bulṭan la.* I ngaihtuah hmasak berah, "A ni hian engnge a mamawh ang le?" "Fuihna hian engtin nge a tanpui ang le? A nunah danglamna thlen turin eng thil nge kan sawi ang" tih te ngaihtuah thin ang che.


Hei hi i zing tawngtainaah lo hmang la, "Aw LALPA, ka lungpui leh mi tlantu, Ka kaa thu chhuakte leh ka thinlunga ngaihtuahnate hi i mithmuhah lawmtlak takin awm rawh se" (Sam 19:14) tiin.


Ngaihtuah zui atan...


Kan awmna boruakin a zir loh chuan engvangin nge kan thusawi kan fimkhur zual a tul?


I tawngtlem a, i ngaihthlak tam zawk theihna turin eng thil nge i tih theih le?


Thutak sawi tur leh mi dangte fuih thei turin eng Pathian thu nge i vawn ang?


(Lettu: Msa)

Friday, August 25, 2023

KHAWVEL HIAN A NGAIHSAK LO CHE

  _Khawsakna Atana Thil Pawimawh_

By Rick Warren 

— Aug 25, 2023

“Mahni ta ta mai en lovin, mi dang ta pawh en theuh zawk rawh u.” Philippi 2:4

Kan khawtlang nun engkimah hian mahni inngaihtuah hmasa zel turin min ti a. Nimahsela Bible chuan, “Mahni ta ta mai en lovin, mi dang ta pawh en theuh zawk rawh u,” min ti. Philippi 2:4

He lai thu hi inkalh angin a va lang ve. Mi dang thatna tur chu a tlangpui thuin kan ngaihtuah ngai si lo. Chu lai taka chu kan zir ngai ta chu a ni. Kan duh, mamawh, tum leh chakzawng te hi kan ngaihtuah tlangpui a ni si a. Chuvang chuan mi tam zawkte hi chu anmahni chauh an inngaihtuah avangin an inla hrang a, mi dang mamawh an ngaihtuah ve lemlo a ni.

Tunhnaia ka TV enna ah chuan, fakna pathum hetiang hian ka hmu a: “I phu a ni.” “He shampoo hi lei rawh! I phu a ni.” “He car man to tak hi lei rawh, achhan chu i phu a ni.”

Amaherawh chu hringnun a thudik deuh deuh pahnih ka hrilh ang che. Pakhatna, khawvel hian a ngaihsak lem lo che. Pathian hmaah chuan i mawi danglam a, chhan neia siam i ni a – nimahsela khawvel hi chuan a ngaihsak lem lo che.

Thudik pahnihna: Pathianin mi dang mamawh i ngaihtuahsak a nih chuan i mamawh ka pe ang che tih min tiam a ni. Engvangnge? Achhan chu mahni hmasialloh zirla a duh che a ni. Amah anga mi dangte hmangaih leh thilphal zirturin a duh che a ni.

Mi dang mamawh i ngaihtuahsaknaah chuan, an famkim ring kher suh. Bible chuan, “Indawh tawnin inngaidam tawn ula,” min ti a ni. Kolossa 3:13. I famkim bik lo va, chuvangin mi dang pawh famkim turin phut kher suh.

Thufingte 17:9 chuan, “Bawhchhiatna thuptu chuan inhmangaihna a zawng,” a ti. Mi dang nena inzawmna i neih dawn reng rengin, an tihsual hriatsak reng tum suh. An fellohna lai chu hmuh kan tum zawk ang che.  

Thian thate chu mi dang chaklohna theihnghilhsak tute an ni. An tihsual emaw fellohna emaw hriatsak reng ai chuan, thian tha chuan an mamawh a ngaihtuah sak zawk thin.

Ngaihtuah zui atan

* Eng harsatnain nge mi dang ni lo vin nangmah chauh a inngaihtuah tir che?

* I thlarau zinkawngah chuan engvangin nge Isua an chu a pawimawh em em?

* Mi dang fellohna hmuh kan leh mi dang thatna hmuhsak hi eng nge a inanlohna?

*[Lettu: Sangpuia]*

Thursday, August 24, 2023

HLAUHNAIN INLAICHINNA A NGHAWNG DAN KAWNG THUM

 Khawsakna Atana Thil Pawimawh

By Rick Warren

— Aug 24, 2023

“Pathian Thlarau kan chan hian min tidawih lo va, chakna te, hmangaihna te, mahni inthunun theihna te min pe zâwk a ni.” [2 Timothy 1:7]

Midang nena inzawmna neih i duh chuan, rahbi hmasa ber rap tura i inpeih a ngai ang. Chu chuan tumruhna a mamawh. Eng vangin? A chhan chu mihringte min pawt ṭhentu chu hlauhna a ni. 

Hlauhna leh mangannaa i khah changin, midangte nena inzawmna neih a harsa tlat zel. Dik tak chuan, kan inhlat tlat thin. Hnawl nih te, mite thunun nih te, chak lo leh tihnata awmte kan hlau a. Chutianga hlauhna hrang hrangte chuan kan khawsaknaah hian min pawt hrang fo. 

Eden huanah khan Adama leh Evi te chuan mihringten kan hlauh chhan entirna pawimawh tak min hmuhtir a. Suala an tluk hnu khan Pathian chuan Adama kha a la zawng zui zel a. Adama chuan Pathian hnenah hetiang hian a sawi, “Huana i thâwm ka hria a, saruak ka nih avângin ka hlau che a, ka biru a ni.” [Genesis 3: 10] Mipuite chuan a tir aṭang khan an lo thawk tawh hial. Kan hlau a, kan biru. Kan sual chu kan thukru fo. Kan nihna tak tak kan thukru bawk. Mipuite chu kan nihna tak tak kan hriattir lo – a chhan chu kan thil tih an duh loh chuan, miten min hnawl a. Tichuan lem kan chang ta a ni.   

Hlauhna chuan inlaichinna thuah thil ṭha lo tak pathum a thlen: 

Hlauhna chuan inven ngawt ngaihtuah turin min ti. Miten kan chak lohna an sawi changin kan khinglet a, mahni inven ngawt ngaihtuah turin min tibuai.  

Hlauhna chuan min ṭhen hrang. Mite chu anmahni hnaih turin kan ti thei lo. Kan inkharkhip a. Kan lawmna leh hlauhna kan thukru.  

Hlauhna chuan thil ngiat a ti tam. Thil kalphung thunun kan tum ang zelin, hlauhna kan ngah a. Inlaichinna thuah hre ber nih kan tum fova. Mite thunun kan tum ṭhin. 

Mi tute emaw nena inzawm tur leh rawngbawlna thuk zawk nei turin engtin nge rahbi hmasa chu kan rah ang? 

Pathian Thlarau aṭanga i dawn a ni. Bible-in a sawi dan chuan, “Pathian Thlarau kan chan hian min tidawih lo va, chakna te, hmangaihna te, mahni inthunun theihna te min pe zâwk a ni,” tiin a sawi. [2 Timothy 1:7]

Pathian Thlarauvin a chhung khat che a ni tih chu engtin nge i hriat ang? Mite nena in inlaichinnaah chuan i huaisen thei ang. Mite i hmangaih a. An bula awm nuam i ti. Anmahni hlauh loh chhan i nei – a chhan chu i nuna Pathian Thlarau a awm vang a ni.    

Bible chuan “Pathian chu hmangaihna a ni” tiin a sawi [I Johana 4: 8] a, “hmangaihna chuan hlauhna a tikiang” a ti bawk [I Johana 4: 18]. Hlauhna chuan inlaichinna a tichhia em? I nunah hmangaihna i neih tam ang zelin, i nuna hlauhna awm chu a kiang zel ang. 

Ngaihtuah zui atan. 

I nunah eng inlaichinna nge sawhngheh ngai? Rahbi hmasa ber rap turin Pathian ṭanpuina dil ang che. 

Mite nena in inlaichinnaah Thlarau Thianghlim hnathawh engnge i hmuh? 

Isua nena inhnaih lehzual turin eng thil nge i tih ngai? 

[ *Lettu* : Peka]

Wednesday, August 23, 2023

KRISTA TAKSAAH CHUAN ṬANGKAINA I NEI

  _Khawsakna atana Thil Pawimawh_

By Rick Warren 

— Aug 23, 2023

“Taksa pumkhatah peng tam tak kan nei a, peng zawng zawng thiltih erawh chu a inang lo va, chutiang bawkin keini tam tak ni mah ila, Kristaah chuan taksa pumkhat kan ni a: a mal malin inpeng tawn theuh kan ni.” Rom 12:4-5.

Biblein kohhran chu "Krista taksa" a ti a. Isua Krista, he leia taksaa a awm laia a thiltih te chu vawiina amah zuitute ti ve turin a duh a ni. He leiah hian Krista taksa kan ni si a.

Bible chuan, “Taksa pumkhatah peng tam tak kan nei a, peng zawng zawng thiltih erawh chu a inang lo va, chutiang bawkin keini tam tak ni mah ila, Kristaah chuan taksa pumkhat kan ni a: a mal malin inpeng tawn theuh kan ni.” (Rom 12:4-5).

Krista taksaah chuan tute pawh hi kan pawimawh a. Kan zavai hian a ti famkimtu kan ni.

Jigsaw puzzle hi i hmu ṭhin em? A vaiin a kim vek a ngai a. Pakhat te pawh kim lo se i hre thei nghal ang.

Chutiang chiah chu Krista taksa awmdan pawh a ni. Tu te mai pawh hi kan tel ve a ngai a. Pakhat pawh kim lo se i hre thei ang. Kan vai hian kan pawimawh ṭheuh a ni.

“Krista taksaah chuan kezungpui tin ang mai ka ni,” i ti maithei e. I kezungpui tin a thlawn tawh em? I hrethei ang! Pound 12-a ritin i kezungpui a tlak tawh em. Kan taksaah chuan a te ber lai a ni maithei e, thla ruk chhung teh meuh mai ka kezungpui tin tla chu ka hre thei a ni.

Langsar leh ṭangkai tih hi lo hriatpawlh lo la. Thil langsar tak ṭangkai si lo a awm thei a ni. Ka hnar hi a langsar hle a. Mahse a ṭangkai nep deuh a ni. Ka hnar tel lo pawh hian kum engemaw chen chu ka la dam thei ang. Nimahsela ka kawchhungah hian mi ina an hmuh lem loh ṭhenkhat: thin, lung leh chuap te a awm a. An langsar lem lova, mahse an ṭangkai thung a ni. Heng tel lo hi chuan ka thi mai dawn a ni.

Krista taksaah chuan i langsar lo maithei e, mahse i ṭangkai thung a ni. He leia Krista taksa chuan bung hrang hrang a nei a — an zavai chuan an pawimawh vek a ni. Tu pawh ni la, Krista taksaa i nihna chu engpawh ni sela, hna pawimawh tak thawh tur i nei a ni!

Ngaihtuah zui atan

* Krista taksa nena in inṭhen lai kha i ngaihtuah chhuak thei em? I nunah engtin nge nghawng a neih?

* Krista taksaah chuan langsar si lo, ṭangkai si, eng chanvo nge i thawh ve? Rawngbawlna chungchangah chuan eng nge i rilru puthmang le?

* Krista taksaah chuan thilpek an dawn ang ang te an hmanchhuah zel theihna turin engtin nge i tihphur ang?

*[Lettu: Sangpuia]*

Tuesday, August 22, 2023

KRISTIANNA: CHHUNGKUAA SENG LUH

  _Khawsakna atana Thil Pawimawh_

By Rick Warren 

— Aug 22, 2023


“Tupawh Lalpa hming lam apiangte chu chhandamin an awm ang.” Rom 10:13.

Mi tam tak chuan Kristianna hi rinna chungchang chauh emaw an ti a. Kristianna chuan rinna a tel a ni tih hi a dik a —mahse chumi piahlamah chuan tam tak a awm thung  a. Inzawmna leh neitu nihna a ni bawk. Kristian i nih chuan, Pathian chhungte i nih bakah, Krista taksa nen i inzawm tawh a ni.

Pathian chhungkuaa i tel theih dan kawng hnih chiah a awm a: Chutah chuan i pian emaw i luh emaw a ngai a ni. Heng ṭawngkam pahnih te hi Bible chuan Pathian chhungkuaa luhdan a sawifiah a. Pathian chhungte ni turin i pian thar a ngai a, fa anga i luh a ngai bawk a ni.

Vawi khat i pian thar tawh chuan, i nawt reh thei tawh lo a ni. I nu leh pa nena in inkar chu a chhe tawh maithei e, nimahsela an fa ila ni reng a ni. Chutiang chiah chuan, Pathian chhungkuaa i pianthar tawh chuan, i nawt reh thei tawh lo va. Pathian chhungte i ni reng tawh dawn a ni!

Pathian pawhin a fa atan a pawm che tih a sawi a ni. Thuthlung Thar hun laia Rom-ho danah kha chuan, mi in a ma fa ngei pawh a fa nihloh theihna dan a awm a ni. Amaherawh chu mi in fa a lak tawh chuan, fa a tan duh leh loh theihna dan a awm tawh lo a ni. Pathian chuan i pian thar avang chauhin Pathian chhungkuaah i lut tihna a ni lo, fa atan a la tawh che a - engti kawng zawng mahin a thlauhthla thei tawh lo che a. Chu chu chanchin ṭha a ni!

Tak tak a ni em i ti maithei. Eng thil pawh lo ti ila, Pathianin min hnar lo vang maw? Aw, a hnar lo che a ni!

Pathian chhungkuaah i tel chuan, a kohhran ah i tel nghal tihna a ni. Kohhran chu khawi hmun emaw i va kalna a ni lo va; i va telna kha a ni zawk. Bible chuan, “Pathian chhungte zinga mi engtia awm tur nge an nih i hriat theih nan ka ziak a ni; Pathian chhungte chu Pathian nung Kohhranho, thutak ban leh innghahna chu an ni.” (1 Timothea 3:15).

Rom 15:6-7 chuan kohhran awmzia - Pathian chhungkaw awmzia min hrilh a ni: “Chhelna leh thlamuanna Pathian chuan Krista Isua sawi angin rilru hmunkhat pu tawnin awmtir che u rawh se. Chuvangin Krista chuan Pathian tihropui nan a lawm che u ang bawk khan inlawm tawn rawh u.”

Pathian fa chatuanin i ni tawh ang hian, a chhungkaw zau zawk—kohhran ah chuan — chatuanin i awm ang. Chu chu Pathian thil tum a ni a— chatuana a chhungkuaa i awm theihna tur a ni!

Ngaihtuah zui atan

• Pathian chhungkuaa tel ve chu eng nge hlawkna ni le?

• Pathian chhungkuaah i tel a ni tih a chianna i nunah eng nge awm le?

• Krista taksa i ni tih leh Pathian chhungkuaah i tel a ni tih lantirnan i theihna leh thiamna te engtin nge i hman ang?

*Pathian chhungkuaa tel ve turin i inpeih em?*

Engpawh lo tisualin, khawi hmunah pawh lo awm tawh ṭhin mah la, Pathian chhungkuaah chuan chatuana chengturin an nghak reng che a ni. Chu sawmna chu a zauva. Ring la lo dawngsawng mai rawh.

I inpeih em? I i nunah Isua i thlang duh anih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Monday, August 21, 2023

ENGTINNGE PATHIAN KHAWNGAIHNA I CHAN ANG?

 Khawsakna atana Thil Pawimawh

- Rick Warren 

- Aug 21, 2023



_"Tupawh Lalpa hming lam apiangte chu chhandamin an awm ang."_ (Rom 10:13)


Rom 6:23-ah chuan heti hian kan hmu, _"Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan, chatuana nunna a ni."_ Khawngaihna hi thilpek tawp thei lo a ni i ti thei ang.


Pathian khawngaihna hi vanram kawng thleng - chatuan thlenga daih tur a ni. Vanram hi eng ang tak ni ang maw? Hmangaih kal ta, Pathian hretute nen kan la inhmu leh dawn a ni. I rinna avangin lawmman pek i ni ang a. I thawh chakzawng tak thawhtir i ni ang. Natna, lungngaihna, beidawnna, zahna leh inthiam lohna ata zalen i ni ang. Chatuan thlengin hlim takin i awm ang. A va ṭha dawn em!


Vanrama chatuan hun hman tur hi thilpek hlu tak a ni- i thawh chhuah a ngai hauh lo. Pathian khawngaihna avang chauhin vanram i lut thei ang. Miin a pek theih che thilpek hlu ber a ni ngei ang.


Mahse tihtur a awm: i pawm a  ngai. Bible chuan heti hian a sawi, _"Tupawh Lalpa hming lam apiangte chu chhandamin an awm ang."_ (Rom 10:13)


Pathian khawngaihna chang tur chuan amah i aug a ngai: a khawngaihna ropui tak i pawm a ngai.


Vawiin hian ina i haw ve leh i dawhkanah thilpekin a lo hmuak reng che angin han mitthla chhin teh, mahse kumtluana hawng miah lovin i dah ta a. A âtthlâk a ni ti r'u! Thilpek reng reng chu kan lo pawm loh chuan a hlu lo ṭhin!


Chutiang chiah chuan Pathian thil thlawn pek khawngaihna hian i nun a tihdanglamna tur chuan i pawm a ngai a ni.


A chang chuan hnawl nih an hlauh avangin mi ṭhenkhatin Pathian khawngaihna an pawm ngam lo ṭhin. Ṭhiante leh chhungte ngei pawhin min phatsan hun a awm mai thei. Mahse Pathian erawh chuan a hnawl ngai lovang che. A khawngaihna pek che a i tan vanrama hmun siam a duh a ni. Bible chuan, _"I hnena Pathian khawngaihna lantir a duh a ni"' tiin (Isaia 3:18)


Hnawl nih i hlauh avangin zahna emaw hlauhna emawin a tlak buak tawh che em? Vawiin hian kha rilru kha i hnawl thei ang. Pathian khawngaih thlawn pek i pawm a ngai a ni.


Ngaihtuah zui atan.


Pathian khawngaihna i chan theih loh nan eng zahna emaw hlauhna emawin nge tibuai che? Pathian hnenah an vaiin i hlan tawh em?


I hriat hnai vaite zingah tunge Pathian khawngaihna ngaihthlak mamawh le? Engin nge Pathian khawngaihna chang tur a dal ni a i rin?

"Pathian chu i chunga khawngaihna lantir turin a inpeih reng" (Isaia 30:18)


*Pathian khawngaihna chang turin i inpeih em?*


Bible chuan Pathian Fapa Isua Krista rinna avang chauha vanram kai thei kan nihzia min hrilh. Vanram hi thawh chhuah chi a ni lo. _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)


Isua hnenah i inhlan duh takzet anih chuan heti hian ṭawngṭai rawh le:

"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.


"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Min hruai la, i duhzawnga nung turin min pui ang che. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


(Lettu: Mapuia Fanai]

Sunday, August 20, 2023

ISUAN A MAN A PEK TAWH AVANGIN KHAWNGAIHNA HI A THLAWN A NI

 _Khawsakna atana Thil Pawimawh_

- Rick Warren 

- Aug 20, 2023

"_Mi tam takin Isua Krista khawngaihna avangin Pathian thilpek nunna ropui tak an chang a ni."_ (Rom 5:15, NCV)

Vawiina i _mail_ dawn i en a, thilthlawnpek i dawng hlauh mai a, mahse, chu chu a thlawn tak tak lo. Mi tu emawin a man a peksak che a ni zawk.

Chutiang chiah chu Pathian khawngaihna pawh hi a ni. I tan chuan a thlawn a ni, mahse, Isuan a man a peksak che a ni.

Isuan a nunna pe a a lei a ni.

Chuvang chu a ni chhandamna hi Isua kaltlangin, ama hnen aṭang chauhva kan neih theih ni. A chhan chu, khawngaihna ka chan theih nan a nun a hlan a ni. Bible chuan, _"An rin dân ang bawkin keini pawhin Lalpa Isua Krista khawngaihna avâng chauhva chhandam tûr niin kan inring ve tho si a,”_ (Tirhkohte 15:11) a ti.

Tudang ni lovin Lal Isua ngei kan sual man pe turin a rawn inpe a. Pathian malsawmna i dawn zawng zawngte pawh Lal Isuan a man a peksak che a ni.

Rom 5:15-ah chuan, _"Mi tam takin Isua Krista khawngaihna avangin Pathian thilpek nunna ropui tak an chang a ni."_ (NCV) tih kan hmu.

Lal Isua kaltlanga Pathian khawngaihna i chan khan "Kristaah" i awm a ni. He thu hi vawi 120 lai Bible-ah kan hmu a ni. Kristaa kan awm hian Pathianin min endan a lo dang ṭhin.

Pathianin a en che hian i sualnate, i hlawhchhamnate leh i kawng bumboh takte chauh a hmu emaw i ti mai thei. Mahse, Kristaa i awm chuan nangmahah Pathianin Krista a hmu a ni. I serte, i tihsualte leh i harsatnate zawng zawng i hmu a ni thei - mahse, Pathian chuan Kristaa famkimna a hmu a ni.

Chu chu khawngaihna a ni. Kristaah chauh a hmuh theih.

I thiltihteah Pathian hmangaihna a innghat lo. Kristaa i nihnaah a innghat zawk a ni. A nihna takah chuan, Pathianin a hmangaih zual sawtna tur che leh a hmangaihna che a hniam sawt theihna turin tih theih engmah i nei lo.

Isua Krista kaltlanga Pathian i pan chuan a lo hnar tawp lovang che. Rom 10:13 chuan, _"Tûpawh Lalpa hming lam apiang chu chhandam an ni ang"_ a ti.

Pathian chu khawngaihna i chan theih nan leh vanram i tan hmun buatsaihsak tur chein a inpeih reng a ni.

A khawngaihna i lo pawm mai kha a tawk a ni.

Ngaihtuah zui atan.

Kan sualna chu engpawh nisw Pathian hmangaihna chu a danglam ve ngai lo. A nih leh, engvangin nge mi tam takte hian Pathian hmangaih loh ni a inhriatna an neih le?

Tunge Pathian hmangaihna danglam ve ngai lo hi hriat ve mamawh ni a i hriat? Engtinnge i tih ang?

Isua nunna meuh a man atana pek anih avangin engtinnge khawngaihna hi i chhan dawn le?

*Isua kaltlangin Pathian khawngaihna hi i dawng tawh em?*

Engpawh tiin khawiah pawh awm mahla Pathian chhungte zingah i tan hmun a awm reng, a lo nghak reng che. Sawmna zau taka hawn mek a ni. Ring la, dawng mai rawh.

Pathian leh a khawngaihna chu ring mai rawh. U sualte puangin Pathian ngaihdamna dil la. Isua thutiam, tupawh an sualte hawisana Isua Lal leh Chhandamtu a pawmtute tan chuan chhandamna hi a thlawn a ni tih hi neih tum rawh. Pathian chhungkuaa tel turin Pathian hnenah dil rawh.

I inpeih em? Heti hian ṭawngṭai rawh le: 

"Lalpa, ka thih hunin i hmaah ka chanchin ka la sawi dawn tih ka hria. I lakah thil sual ka ti a, i duh dan ni lovin ka duh danin ka lo nung ṭhin. Tun aṭang hian danglam ka duh e. Sual kalsan a i lam lo hawi ka duh e.

"Ka sual man ka tawrh lohna tura ka tana thi tura Isua i lo tirh avangin ka lawm e. Ngaihdam ka phu hauh lo tih ka inhria. Lalpa, i khawngaihna chauhin min chhandam thei tih ka hria. I famkimna hmuna lut tur hian ka ṭhatna hian a tlin ngai lovang.

"Isu, min hmangaih nasat em avanga ka sual i phurh avangin ka lawm e. Vanrama luttlakah min siam avangin min chhandam turin ka ngen a che. Isu, ka ring che. Tunah ngei, kim takin, chatuan atan min chhandam turin i thutiamah i awm ang tih ka ring tlat. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, August 19, 2023

PATHIAN KHAWNGAIHNA CHUAN LAWMNA CHHAN TUR A PE CHE

 _Khawsakna atana thil pawimawh_

- Rick Warren

Aug 19, 2023



"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; 

thiltih avang a ni lo ve, chutilochuan miin an chhuang dah ang e" Ephesi 2:8-9


Pathian khawngaihna hi i hlawhchhuah theih a ni lova. Chumi turin i thawk thei chuang lo. I phu miah lo a ni. 


Bible chuan, "Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; 

thiltih avang a ni lo ve, chutilochuan miin an chhuang dah ang e" (Eph 2:8-9) a ti. 


Khawngaihna chu rinna hmang chauhin i dawng thei. 


Bible hi Pathian khawngaihna tilang thei thawnthu hrang hrangin a khat a. Chung zinga langsar ber pakhat chu fapa tlanbo chanchin Luka 15 a kan hmuh kha a ni. I la hriat reng chuan he thawnthuah hian a pa khan fapa pahnih a nei a nih kha.


Nikhat chu a fapa naupang zawk chuan, "Ka pa, ka chhuak dawn. Ka rochan tur ka duh, chuan ka kal bo ang" a ti a. Tichuan a pa chuan a rochan tur chu a pe a. Ram hla takah a fapa chu a kal bo ta a. Tichuan khawlo taka nungin a nun chu a va khawhral ta mai mai a. Tin, a hnu hun eng emawah chuan a neih zawng zawng a chen ral vek tih a inhre ta a.


Loh theih loha hna a thawh a lo ngaih takah chuan vawk inah, vawk chaw pein a awm ta a. A ril a tam hle a, vawk chaw te kha ei ve mai a chak rum rum a nih kha. Zangthal dera a mut lai chuan a inngaihtuah a, "Hetah hian engnge maw ka tih reng le? Ka tisual tih ka hria a. Ka thiam loh vek a ni. Mahse ka pa chhiahhlawhte pawh ka dinhmun ai chuan an nuamsa daih zawk si a" a ti a.


Tichuan in lam pan chuan a kal ta dawr dawr a, a pa hnenah chuan, "Ka tisual hle a ni. Ka inpawm thlap e. Ka rochan zawng zawng ka khawhral a. I fapa tia koh tlak pawh ka ni lo. I chhiahhlawh angin min chhawr ve la, ka damchhung i tan ka thawk ange, ka nun ai pawhin i chhiahhlawhte nun hi a nuam zawk a ni" a ti a.


Mahse Bible chuan a pa chu a fapa lakah chuan hmangaihna a ngahin, khawngaihna a ngah hle a. Hla tak atanga a fapa lo haw a hmuh khan, amah lo pawm turin hla tak atangin a tlan vang vang a. Tichuan a pa chuan a fapa tan lawmna nasa tak a buatsaih a ni.


Pathian khawngaihna i lo pawm hian, chutah chuan Pathianin a lo chhang thin che a ni. I nunhlui chu ngaihdam a ni a. Dam chhan i nei a, chatuan in vanah i nei bawk a ni.


Chu chu chanchin lawmawm a ni a. Lawmna tham a ni.


Ngaihtuah zui atan...


Pathian khawngaihna hlawhchhuah i tum dan kawngte engte nge?


Isua zuitu i nih chuan, chumi ni tura thutlukna i siam kha engtin nge i lawm?


A chang chuan kan nu leh pate nen kan inlaichinna ang zelin fapa tlan bo thawnthu hi kan lo dawngsawng thin a. Engtiangin nge hemi chungchangah hian i nu leh pa nen in inkungkaihna in a nghawng ve che? 


(Lettu: Msa)

Friday, August 18, 2023

NANGMAHIN VANRAM I KAI THEI LO

 Khawsakna atana thil pawimawh

By Rick Warren

— Aug 18, 2023



“A khawngaihna avânga thlan chhuah an nih chuan, an thiltih vâng a ni thei lo; chuti ni se khawngaihna chu khawngaihna a ni thei lo vang.” [Rom 11:6]


Mi tam ber chuan anmahnia vanram kai thei niin an inngai a. Mi tute emaw chu han zawt kual thuak la, he chhanna hi i dawng ang, “Bei hram hram rawh,” “Ṭhat lehzual tum rawh,” emaw, “Mi chungah ṭhat chhuah rawh,” tih thute chu an ni nawk ang. 


Chu chu mi tam berten an ngaihdan chu a ni a, chu chu a dik lo. 


Hei hi thudik chu a ni: Nangma chakna mai chuan vanram kai turin theihna i nei lo. I ṭha famkim ngai lo – chumi awmzia chu hmun famkima lut tur chuan i ṭha tawk ngai lo vang. 


Khawvel chuan vanram kai tur chuan thawkrim turin a ti che a – mahse Bible sawi dan nen chuan a letling hlauh a ni: “A khawngaihna avânga thlan chhuah an nih chuan, an thiltih vâng a ni thei lo; chuti ni se khawngaihna chu khawngaihna a ni thei lo vang.” [Rom 11:6]


Hei hi a laimu bera Kristianna leh sakhaw dangte an danglamna chu a ni. Sakhaw dang zawng zawng chu he ṭawngkam “thawk chhuak” tih hmang hian i khaikhawm thei ang. Sakhaw tinte chuan tih tur leh tih loh tur bik an bithliah diat diat a, chungte chu vanram kai tur chuan i awih kim thlap a ngai a. Vanram chu nangmah ngeiin a thawha i thawh chhuah a ngai a ni. 


Bible chuan a letling thawk chuan a zirtir thung. Bible zirtirna chuan i tana thawh zawh tawh ringa vanram kai turin a zirtir che a – Isua chu kum 2000 liam ta khan kraws-ah a lo thi tawh a ni. 


Vanram I kai theihna tura tih ngai zawng zawng chu thawh zawh vek a ni tawh. Isuan engkim a tlak tawh. Thil thlawnpek vek a ni. 


I tih tur chu i sualte thupha chawi a, Isua chu Lal leh Chhandamtua pawm mai leh, i tana a hnathawh zawh tawh avanga lawmthu sawi chu a ni. Pathian khawngaihna chu i dawng ang a. Chu chu Pathian thilthlawnpek chu a ni! 


Engtik niah emaw chuan lirthei man to tak i dawng thei a. Pawisa maktaduai tam tak pawh an la pe mai thei che. Mahse Pathianin khawngaihna pek che tluka thilpek hlu a awm thei tawh lo. 


Pathian khawngaihna thilthlawnpek chu dawng tura i inpeih a nih chuan he ṭawngṭaina hi hlan ang che: 


“Isu duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.


“Ka sual a ni tih ka pawm a, min Chhandamtu i ni tih ka pawm e. Khawngaih takin min ngaidam rawh! Chhandamna chu khawngaihna leh rinna hmanga chan tur a ni i tih khan ka ring nghal e. Ka Lalpa ni turin ka thlang che a, ka thuneihna leh ka chak zawng lamin i hnenah ka hlan e. Vawiin hian ka nun pumpui I kutah ka kawltir e. Ti tura min tih chu ka ti ang a, kal tura min duh naah ka kal bawk ang.”   


Ka dam chhung hun hi nangma rawng bawl lova i rawng bawlna atana hman ka duh e. I kianga kal zel turin thutlukna ka siam a, nangmah anna a thanglian a, vanrama ka hmuh hma che chu I thutiam te ring zel turin ka inbuatsaih e. Chu chu Isua hmingin kan dil e. Amen.” 


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zin kawng atana thuziak pawimawh tak tak lo thawn che ka duh e. 


Ngaihtuah zui atan


Nangma chakna mai chuan vanram i kai ngai dawn lo a ni tih hriat chu i tan chanchin ṭha nge a nih a, chanchin ṭha lo zawk? Eng vangin nge? 


Engin nge sakhua din, eng hunah nge miten an pawm zawk tur thil chu i tih ang? Eng vangin nge a chang chuan khawngaihna pawm mai chu a harsat tlat? 


An nuna thilpek an dawn tawh zawng zawnga thilpek hlu ber dawn mamawh tute chu tute nge? Engtin nge an dawng ngei a ni tih chu i nemngheh ang? 


[ *Lettu* : Peka]

Thursday, August 17, 2023

PATHIAN KHAWNGAIHNA CHU MITIN TAN A NI

 Midangte Nen a Ṭha Zawk


By Rick Warren

— Aug 17, 2023



“Abrahama thlah zawng zawng tân, Dân zâwmtute chauh ni lovin, ama rin anga ringtute tân Pathian thilthlâwnpêk a nihzia tilang tûrin rinna avângin a ni, Abrahama hnênah thu a tiam ni.” [Rom 4:16]


Tu pawh niin eng ang thil pawh lo ti tawh la, Pathian chuan a hmangaih che a, a kianga haw turin a duh che. A khawngaihnaa vur che a duh a. I haw hun chuan nangmah lawmna buatsaih a duh bawk. 


Bible chuan Rom 4: 16 ah, “Abrahama thlah zawng zawng tân, Dân zâwmtute chauh ni lovin, ama rin anga ringtute tân Pathian thilthlâwnpêk a nihzia tilang tûrin rinna avângin a ni, Abrahama hnênah thu a tiam ni,” tiin a sawi. 


Tirhkoh Paula chuan Thuthlung Hluiah Juda mi (Israel Hnamte chu) Mosia dana awmte hnenah chuan chu thu chu a sawi,. Mahse Abrahama chu Pathian khawngaihnaah chuan rinna pa anga hriat hlawh a ni – beisei tur a awm tawh loh hnuah pawh a beisei fan a – chu khawngaihna tho chu Isua Kristaa rinnaa nghat apiangte hnenah chuan pek an ni ang.  


Chu chu thu ropui a ni ṭhin a, tunah pawh a lo ropui zel! Kan vai hian a Fapa, Isua Krista kaltlangin Pathian hnen kan thleng thei ang. 


Mi “tin” hleitling leh tawi deuhte pawh an tel thei ang em? Aw. Mi hausa leh rethei pawh an tel thei ang maw? Yes. Politician leh mi hausa pawh maw? Awle. Hnam tina mite a huap ang maw? Awle. Khawvel ram tina mite an tel ang maw? Aw. Pathianni apianga biak ina inkhawmte chu an tel ang maw? Aw. Bible la hmu ngai reng reng lote pawh maw? Aw. 


Pathian khawngaihna chu eng ang dinhmun aṭang pawhin i chang thei a – a ruka i tih sual nen te, i tih dikloh nen te, i chak lohna nen lam khan. I nuna awm tura Isua i thlan chiah khan, a kiang hnaia kal tura thutlukna i siam chiah khan Pathian khawngaihna chu nangmahah khan hna a thawk nghal a, a hla emaw i tih lai ngei pawh khan. 


Bible-in Pathian khawngaihna chu mitin tan a awm a ni a tih chiah khan chhuanlam dang a awm tawh lo. Kristianna laimu chu – Pathian khawngaihna chu a ni – hei hi: Pathianin a Fapa kraws-a thi tura a tih chiah khan, mitin tan a tlingtla ta a ni. 


Chu thutak chu chhut ngun rawh: I nitin hun i hman lai mek khan Isuan a thihsak loh mihring chu i hmu tawh mai lo vang. Darthlalang hmaa nitin i hmuh ṭhin mihring ngei pawh chu tiamin!


Ngaihtuah zui atan. 


Eng vangin nge mi tam takte chuan Pathian khawngaihna chu rin harsa ang tih? 


Engtiangin nge Pathian khawngaihna chuan midang i hmuh dan a thlak sak che – khawngaihna phu lo nia i ngaih mihringte pawh tiamin? 


Khawngaihna chuan engtin nge Pathian i hmuh dan a thlak danglam? 


 *Isua chu i thlang tawh em?* 


Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]


“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.


“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 


[ *Lettu* : Peka]

Wednesday, August 16, 2023

SUM KHAWLKHAWM DAN ṬHA BER CHU

  _Mi dangte nen a ṭha zawk_

By Rick Warren 

— Aug 16, 2023


“Thil tha ti turin, thil tha tih ngah turin, thil phala thawhlawm peih turin, nunna, nunna tak tak chu an vawn theih nan, hun lo thleng tur atan chuan lungphum tha tak an tana khawl khawm turin fuih rawh.” 1 Timothea 6:18-19

Thilphalna hi sum khawlna a ni. Luka 16:9 chuan, “Sum lemin in tan thiante siam rawh u,” a ti. Vawi engemaw zat chu ka lo sawi tawh a, sum i chhawm dawn lo tih hi. Mortuary-ah mitthi kawr an zuar thin tih i hria em? Mitthi chu suit nena vuiliam an duh a, mahse pakhat mah an nei ve lo thung. Damlai kawr leh mitthi kawr inan lohna i hre duh em? Mitthi kawrah chuan ipte a awm ve lo. A dik a ni, a chhan chu i chhawm thei lo va, i mamawh lo a ni. Amaherawhchu i khawl lawk thei thung.  

Engtin nge i tih ang? Vanram kal turte hmangin i khawl thei.

Bible in Timothea 6:18-19 ah chuan, “Thil tha ti turin, thil tha tih ngah turin, thil phala thawhlawm peih turin, nunna, nunna tak tak chu an vawn theih nan, hun lo thleng tur atan chuan lungphum tha tak an tana khawl khawm turin fuih rawh.”

Miretheite, i thiante leh i thenawmte laka i thilphal hian, Pathian chuan vanram bank-ah i khawlkhawm a ni a ti. He leia i hun hman theih chhung chu kum 80 emaw a tam berah kum 100 emaw a ni. Chatuan hmunah chuan kum tam tak ila hmang dawn a ni. I account lian ber chu khawiah nge hawn i duh?

Pathian rama inkhawlna aia lian a awm chuang lo. I hun, pawisa leh thil dang i dawn apiang hmanga mi i tanpui hian – a nihna takah chuan vanah i khawlkhawm tihna a ni.  

I sumkhawl chu vanah vawnhim a ni. A pung a awm a. A him em em a. Rinhlelhna tur engmah a awm ve lo a ni.

Chutianga sum khawlna chu hmun dang khawiah mah i hmu lo vang!

Ngaihtuah zui atan

* Eng vangin nge vanlam bank-ah ni lo vin, leilam bank-ah sum khawlkhawm a awlsam zawk nia kan hriat le? Eng hi nge hlawhtling zawka i hriat le?

* Van lama sum khawlna aia lei lama sumkhawl chu eng nge a hlauhawmna?

* Chhandamna chu Pathian khawngaihna vang a nih chuan, eng vangin nge thil tha ti tur chuan a la beisei cheu che?

*[Lettu: Sangpuia]*

Tuesday, August 15, 2023

I THILPHALNAAH CHUAN ENGTIN NGE PATHIANIN A CHHANLET CHE I RIN?

 _Mi dangte nen a ṭha zawk_

By Rick Warren 

— Aug 15, 2023


“Pathianin khawngaihna tinreng in chungah a vur thei a ni; chutichuan nagnin engkimah a tawk zet nei fovin, hnathawh tha tinreng ata in ngah thei ang.” 2 Korinth 9:8.

Chanchin pakhat ka hriat chu, pa pakhat hian a fapa hi McDonald-ah a kalpui a French fry a leisak a ni. An haw kawngah chuan a pa chuan French fry pakhat chu a eisak zauh a. A fapa chuan mak ti deuhin, a pa chu heti hian a hrilh a, “Ka pa, hei chu, i ei thei lo vang. Ka ta a alawm!” A pa chuan thil pathum a ngaihtuaha:

“Pakhatna, ka fapa hian a thil leisaktu ka ni tih a theihnghilh a. McDonald-ah ka hruai a, thil ka leisak a, ka pe a, ka hawpui leh mek chu a ni si a. French fry a neih theihna chhan chu keimah vang liau liau a ni.   

“Pahnihna, ka fapa hian French fry chu ka duh chuan ka la bo thei a ni tih a hrechhuak lo emaw, ka duh phawt chuan truck load khat pawhin ka leisak thei, a chhan chu engemaw zawk zawk ti theitu ka nih avangin. 

“Pathumna, he fry hi ka mamawh lo. Ka duh chuan ka ta tur ka lei leh thei. Bawm engemawzat pawh ka lei thei. Mahse mahni hmasial loh zirtir ka duh a ni.”

Khing zir tur pathumte khi Pathianin mi dang chunga i thilphal ve theih nan zir ve se tih  a duh che a ni. Pakhatna, Pathianin i thil dawn zawng zawngte kha amah atanga chhuak a ni tih hria la a duh a ni. Pathian atangin a nih loh chuan – engmah i nei lo vang a, dam pawh i dam kher lo vang! Pahnihna, Pathianin i neih zawng zawng a laksak thei che a, a let hnih pawhin a vur thei che, titheitu a nih avangin. Pathumna, Pathianin i pawisa a mamawh lo. Mahni hmasial lo va, rinna kawnga ke pen zel zir turin a duh che a ni. 

Mi chunga i thilphal viau chuan i chungah eng nge thlenga i rin le? “Pathianin khawngaihna tinreng in chungah a vur thei a ni; chutichuan nangnin engkimah a tawk zet nei fovin, hnathawh tha tinreng ata in ngah thei ang.” 2 Korinth 9:8.

Mi chungah i thilphal chuan, Pathianin i mamawh chu a pek belhchhah che anga, mi dang pek tur pawh i nei zel ang. Pathian chuan hman theih tur a zawng a, hetiang ti thei a hmuh chuan, “Lalpa, mi dang tan malsawmna ni turin min hmang rawh” – malsawmna chu a surtir dawn a ni.

Thilphal i zir a nih chuan, Pathianin i ngaihtuah aia nasain a hmang ang che. 

Ngaihtuah zui atan

* Engtin nge i thil neih i enkawl leh i hman danah Pathian atanga i thil neih i hriatthiam dan a tarlan?

* Pathianin i thil neih zawng zawng laksak dawn ta che sela, engtin nge i chhan ang?

* Mi tu emaw hnenah tunkar chhung hian engthil nge i pek theih ang?

*[Lettu: Sangpuia]*

Monday, August 14, 2023

I PEKNA LAM APIANGAH I THINLUNG PAWH A AWM ANG

 Midang Nen a Ṭha Zawk

- Rick Warren 

- Aug 14, 2023



"Tin, a ringtu mipuite chu rilru hmun khat leh ngaihtuah hmun khatin an awm a . . . thil zawng zawng an intawm zawk ṭhin." (TT. 4:32)


Midangte nena phal tak thil kan inṭawmtlan chuan kan inhnaih ṭhin a, chu chu ṭhenawm khawveng nuam tak a siam ṭhin.


Ka kohhran enkawlte zing aṭanga mi pakhat chuan heti hian lehkha min lo thawn a: "Kan ṭhenawmpain ka leihlawn hawh min rawn dilin, 'I mamawh phawt chuan hmang ta che' tiin ka lo chhang a. A hnuah leihlawn a neih reng thu ka hre  leh ta a. Ka ta rawn hawh kha a ngai miah lo, mahse inlaichinna siam nan a lo hawh a lo ni a. Ka thil a hawh khan ka ṭhenawmpa khan min mamawh ni a inhriatna ka nei a, chu ngaihtuahna chu ṭha ka ti riau. Chutiang chiah chuan ka ṭhenawm dangte chungah tih ka zir chho ve ta a ni." 


Heti hian a ziak zel a, "Kan ṭhenawmpa pakhat ve thung hian thil tihfaina khawl a nei a, zirtawp zan apiangin ka hawhsak a, ka fapa nen ka lirthei kan tifai ṭhin. Tunah chuan Roger-a chuan ka hman atan liau liau a dah ta a. Roger-a hnenah chuan keima puala hman tur thil tihfaina khawl chu ka lei ve theih reng thu ka hrilh a, mahse amah nena inbiak fo ka duh avanga hawh mai ṭhin ka nih thu ka hrilh bawk a. Tichuan Roger-a chuan lei lo turin min ti ta a. Thil phalna leh inṭhenawm khawvenna inzawmna thûk tak a hmu thiam ta a ni." tiin.


Matthaia 6:21-ah chuan heti hian kan hmu, "I ro awmna apiangah i rilru pawh a awm ang." Heti hian kan sawi thei bawk ang, i hun, sum leh tha i sen tamna apiangin i rilru a luah tam ang. Chuvang chuan in kohhran emaw, ṭhenawm emaw, mi retheite emaw, chunga i thilphalna apiangah i thinlung a awm ang. Pathian hnena i pek apiangin a hnenah i thinlung a hnai sawt ṭhin ang.


Kristian hmasate khan an thilphal avangin an lar hle. Tirhkohte Thiltih 4:32-ah chuan heti hian kan hmu, "Tin, a ringtu mipuite chu rilru hmun khat leh ngaihtuah hmun khatin an awm a . . . thil zawng zawng an intawm zawk ṭhin."_Chhungkua an ni a, midangte nena inṭawm kha an duhthlanna  ngei a ni. Kristian thilphalna chuan, "Ka ta chu i ta a ni a, chuvangin i ka pe ve a che" a ti.


I faten an thil neih midangte an pe ve i hmuh khan i lawm em? I lawm ang tiraw. Hringnuna kan zir tur pawimawh tak pakhat chu midangte pek ve hi a ni. I fate thil phal tak i hmuh khan i lawm a ni.


Pathian pawh chutiang chiah chu a ni! Pathianin min rawn thlir a, midangte chungah kan thilphal tih a rawn hmuhin, "Hei chu ka fapa a ni! Ka fanu a ni! Ti tura ka duh ang takin an ti a ni" a ti, a chhan chu kan Pathian hi Pathian thilphal tak a ni a, amah ang turin min duh a ni. Thilphalna hian khawveng ṭha a siam a ni.


Ngaihtuah zui atan.


Khawiah nge i ro a awm ni a i hriat le? Khawiah nge miten i ro a awm ni a an hriat?


Puitlingte tan hian engvangin nge midangte pek ve a har, a bikin midangte tan hun pek?


Engin nge thilphal tura phurna pe che?


[*Lettu:* Mapuia Fanai]

Sunday, August 13, 2023

TU RAWNG NGE I BAWL ZAWK DAWN: PATHIAN NGE SUM?*

 _Midang Nen a Ṭha Zawk_

- Rick Warren

- August 13, 2023



_"Tuma’n hotu pahnih rawng an bâwl kawp thei lo; pakhat huain pakhat an duh ang a; a nih loh leh, pakhat lamah ṭangin pakhat zâwk an hmusit ang. Pathian leh sum rawng in bâwl kawp thei lo ve."_ (Matthaia 6:24)


Tisa khawvelah, ro thil neih tam duhna khawvelah kan cheng tih hi i pawm em? Neih tam zel kan duh ṭhin. Joneses te kan han umphak meuh chuan an sum dinhmun an lo siam rem leh tawh emaw an lo tlachhe leh tawh zawk ṭhin. Nei tam tawha i inngaih veleh, Black Friday fakna a lo lang a, a tel lova i awm theih loh thil hrang hrang an rawn hrilh ṭhin che a ni.


'Neih zel' duhna khawvelah hi chuan ngaih pawimawhzawng thil pawh vawn tlat a har ṭhin. Nei tam apiangin hnehna an chang ṭhin tiraw? Ni lo! Nei tamte pawh an thi ve tho, i nei emaw nei lo emaw.


Tisa khawvela duhnate hi tih rehna damdawi pakhat chauh a awm: thilphalna a ni. I thilphal apiangin i thinlung a lo ṭhang ang. I thilphal apiangin neih tam zel duhna i neih kha a lo tla hniam ang. Engvangin maw? A chhan chu, tisa khawvel hi chu neih belh zel duhna hmun a ni, neih belh, neih belh, neih belh. Neih belh zel a vawn ṭhat tlat kha i zia a ni.


Mahse, i thilphal apiangin i vawn fung i thlah a, tisa khawvela duh belh zelna i hneh a lo ni.


Engpawh nise, nu leh pa i lo nih chuan i pek lai kha i faten an hmu ngei tur a ni. I thilphal lai kha an hmu tur a ni a chhan chu, zirna tur dang an nei chuang lo. Thilphalna i nunpui lai kha hmuhtir ngei la, tichuan an lo zir ve thei ang.


Bible chuan Matthaia 6:24 ah chuan, _"Tuma’n hotu pahnih rawng an bâwl kawp thei lo; pakhat huain pakhat an duh ang a; a nih loh leh, pakhat lamah ṭangin pakhat zâwk an hmusit ang. Pathian leh sum rawng in bâwl kawp thei lo ve."_ tiin min hrilh. "I ti tur a ni lo" tih ni lovin "I ti thei lo" a tih khi i lo en chiang em? A theih loh a ni. I nunah  pawimawh ber pahnih i nei thei lo.


I thinlunga a hmasa ber tur i thlan thiam a ngai. Thilphalna thlang rawh. Midang nena in inlaichinna leh Pathian nena in inlaichinna a thlak danglam ngei ang. I laka Pathian a thilphal anga thilphal i zir chuan chhunglam leh pawnlamah a thlak danglam ang che.


Ngaihtuah zui atan


I sum enkawl dan englai khan nge thunun che? Sumin a thunun che a sum rawng i bawl a ni tih i inhriat khan engtinnge i thil thlir dan a thlak?


Engtin nge i fate zir atan  thilphalna leh inngaihtlawmna i nunpui theih ang?


Eng angin nge i lakah Pathian a thilphal? Chiang takin han sawi teh.


*Khawiah nge i chatuan hun i hman ang?*


I sualna khan Pathian lak aṭangin a la hrang che a. Pathian khawngaihna chauhvin in inlaichinna a siamṭha thei.


Bible chuan, _"Khawngaihna avânga rinnaa chhandam in ni a, chu chu nangmahni lama chhuak a ni lo, Pathian thilpêk a ni zâwk e; thiltih avâng pawh a ni hek lo; ni se mi tupawhin inchhuan phah nân an hmang mai dâwn asin."_ tiin min hrilh (Ephesi 2:8-9).


Nangmah siamtu che nena inrem i inpeih chuan hetiang hian ṭawngṭai rawh:


"Isu, ka sualnate hi nangma laka min la hrangtu atan ka duh tawh lo. Nangmah ka rin che chuan ka tihsual zawng zawng min ngaihdam i tiam a. Ka nun chhan ka zir anga, engtikah emaw i chatuan hmunah min lo lawm ve ang."



"Ka sualte ka rawn puang, min chhandamtu i nih ka ring e. Ka sual te ka puan a ka rin che chuan chhandam ka nih tur min tiam a. Ka thiltihte avang ni lovin, Khawngaihna avanga chhandam ka ni i tih hi ka pawm e. Ka Pathianah ka pawm che a. Vawiinah hian i remruatna hnuaia awm turin  ka nun zawng zawng ka hlan a che." 


"Nung tura min siam anga nun ka duh a, ka nun zawng zawng hi ka tan ni lovin i rawngbawl nan hman ka duh a. Ka nun i tan ka hlan a, min chhandam tur leh i chhungkua a min pawm ve turin ka ngen a che. Isua hmingin ka dil e. Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


[Lettu: Mapuia Fanai]

Saturday, August 12, 2023

ENG VANGIN NGE MI DANGTE DINHMUN HRIATTHIAMNA HI INLAICHINNA THA NEI TURIN A PAWIMAWH?

 _Mi dangte Nen A Tha Zawk_


- Rick Warren

Aug 12, 2023



"A tawp berah chuan in zain rilru hmunkhatin awm ula, inlainat tawn ula, unau angin inhmangaih ula, khawngaihna nei ula, thuhnuairawlhin awm rawh u." 1 Petera 3:8


Mi dangte dinhmun hriatthiamna tel lo chuan i kawppui emaw, i thian emaw, mi dang tupawh ni se, anni nen lungrual takin in khawsa thei hauh lovang. I thawhpuite dinhmun hre lovin thawhpui tha i nei thei lovang. Hemi vang hi a ni thawhpuite chanchin hriat loh chuan, office lama thawk ho pawh thawk ho ni reng mah se, team (pawl) tha tak an ni thei  hauh lo a ni.


Inhriatthiamna hi a pawimawh em em a, a chhan chu kan thil mamawh em em mai pahnih: hriatthiam ni tura bulthut leh, kan rilru kan inpawm tawnna atan te a ni.


Chutiang a nih chuan mi dangte hriatthiamna ngah tak engtin nge i nih ang?


*Muang changin aw.*

Kan hnam zia hian muang chang lo turin min zirtir tlangpui a, thil hi kan ti thuak thuak tlangpui thin. Chumi awmzia chu, thil nuam lai leh duhawm lai chauh i ngaihsak chuan, i kianga cheng, i ngaih pawimawh em em te nuna thilthlengte i hmaih teuh thei a ni. Jakoba 1:19 ah chuan, "Unau duh takte u, chung chu in hria e; nimahsela mi tinin ngaihthlak chuh sela, thusawi chuh lo sela, thin tinel rawh se" a ti.


*Zawhna zawt la.*

Thufingte 20:5 ah chuan, "Remruatna chu mihring thinlungah tui thuk tak ang a ni a; Nimahsela hriat thiamna nei chuan a phawrh chhuak ang" a ti. Mi thenkhat chuan thil reng rengin an thinlung a deh dan hi an ngaih pawimawh em em a, an dinhmun mi dang hriatah an lantir mai thin lova. "Ka tha e" tih hi an chhanna a ni thin, mahse chu chuan an rilru tak tak a pholang chuang lo.


"Engnge i an?" tia mi i zawh hian, "Ka tha e" tiin an chhang mai che ang a. Hetiang hian chhanna dang i hriatbelh thei dawn a ni: zawhna zawt nawn la, "Ni lo e, eng nge i an tak tak?" tiin.


Thil dang i tih theih chu, a hnufuala tan zir a ni. Chumi awmzia chu, ngawih reng hi hlau suh. A hun zelah cheng la, zawhna zawt la, i tumah lut tlang nghal mai lo la. Ngaihthlak chuhin, zir hmasa ang che.


*I thinlung lantir la.*

Bible chuan Rom 12:15ah, "Lawmte lawmpui ula, tap te tahpui rawh u" a ti. Mi dangte hriatthiamna chu, "I natna chu pawi ka ti hle mai" tih mai aiin a la thuk a. "I natnaah ka na ve a sin" i tihna kha a ni. I tahpui theih a, i hlimpui theihna kha a ni.


Chutianga mi dangte hriatthiamna tur chu kawng khat chiah a awm: Pathian nen inpawl tlat la. Chumi awmzia chu, zingah fianrial hunin tan la, nilengin tawngtaina nen Pathian bia la, mi dangte fuihin, mahni pawh i ringtu pui thiante hmangin intiphur thin rawh. 


"A tawp berah chuan in zain rilru hmunkhatin awm ula, inlainat tawn ula, unau angin inhmangaih ula, khawngaihna nei ula, thuhnuairawlhin awm rawh u" 1 Petera 3:8.


Ngaihtuah zui atan...


Mi dangte thusawi ngaithlatu tha nihna ze hrang hrang engte nge?


Miten "i tha maw?" an tih hian engtin nge i chhan thin?


Inlaichinnaah mite hian eng vangin nge inngawihsan daih hi an hreh thin?


(Lettu: Msa)

Friday, August 11, 2023

MI RINTLAK NIH DAN

 _Midangte Nen a Ṭha Zawk_ 

By Rick Warren

- August, 11, 2023



“Rinawm tak nia insawi an tam hle a, 

Rinawm tak tak tu nge hre chhuak thei ang?” [Thufingte 20: 6] 


Inrintawnna chu i ṭhiante, i chhungte, i kianga awmte nena phuar khawmtu che chu a ni. Inrintawnna tel lo chuan inpawhna tak tak Pathianin i tana a buatsaihsak che chu i nei thei ngai lo vang. Inrintawnna tel lo thawhhonain awmzia a nei thei hek lo.


Thufingte 20:6 chuan hetiang hian a sawi, “Rinawm tak nia insawi an tam hle a, Rinawm tak tak tu nge hre chhuak thei ang?” tiin. Chu thu chu kum sang emaw zatah khan ziah a lo ni tawh a, mahse chuti chung chuan chu buaina chuan min la hmachhawn zel tho: Eng vangin nge i rin? Engtin nge mi rintlak chu i hmuh theih ang? A pawimawh zawk chu, miten an rin theih nan che rintlak zawkin engtin nge i khawsak theih ang?


 *Nghet taka i din chuan mite rin i hlawh thei ang.* 

Bible chuan Luka 16:10 ah chuan hetiang hian a sawi, “Tlem te chunga rinawm chu tam tak chungah pawh a rinawm ṭhin; tlem te chunga rinawm lo chu tam tak chungah pawh a rinawm ṭhin lo,” tiin. Tun lai huna mi tam berte chuan a pangngai leh a langsar lai bera Pathian rawngbawl chu an thlang deuh vek. Mahse Pathian chuan thil te takte aṭanga rinawmin mite rinna i hlawh chhuak thei tiin a sawi. Mi ten an hmuh loh chang che pawh chuan Pathianin a hmu che. I thil tih a hmu che. Thil te thama i rinawm phawt chuan thil tih tur pawimawh zawk a pe zel dawn che tiin a sawi. 


 *Rin tlaka i nun chuan miten an ring ang che.* 

Mite thu leh hla zep tur i zepsak chuan miten rin tlakah an ngai ang che. Mi tlem zawk [small group] huanga dan pawimawh tak chu kan thu leh hlate chu pawn lamah a put ru tur a ni lo. I ṭhiante chuan an thu sawi ang angte chu zeppui turin an duh che. Thufingte 11: 13 chuan hetiang hian a nemnghet, “Mi kam tam chuan thuruk a zep thei lo va, rin tlakte erawh chuan thu an zep thei ṭhin” tiin.    


 *Mite kianga khawsain mite rin i hlawh thei.*  

Mite rin kai ni tur chuan an kianga khawsak tam a ngai. Bible chuan, “Ṭhian chuan eng lai pawhin a hmangaih reng a, Mangan ni atan unauva piang a ni” tiin a sawi [Thufingte 17: 17].  Inzawmna khi a awm fova. Inhlata khawsate chu an inring thei lo. I mi hriat loh chu i ring ngawt thei lo! Chuvangin, miten an rin che i duh chuan, an kianga hun i hman a ngai. Hun chuan inrintawnna a hring ṭhin a ni. 


Mite rinhlawh nih i duh em? A nih chuan Pathian hnen aṭangin nun nghet, rintlak leh mite hnaih dan zirtir tur chein ngen ang che.


Ngaihtuah zui atan. 


Thil te zawkah chuan i rinawm thei a ni tih Pathian hmaah engtin nge i lantir ang? 


Eng vangin nge thuruk vawn chu a harsat fo? Mi kan rel chhan hi eng nge ni ṭhin? 


Mite rin hlawh chhuak turin engtin nge mite bulah hun i hman ang a, eng thil nge i pek chhuah ngai ang? 


[ *Lettu* : Peka]

Thursday, August 10, 2023

THAWHHONA NEN RAWNG KAN BAWL ṬHA ZAWK

 _Midangte Nen a Ṭha Zawk_ 

By Rick Warren

— Aug 10, 2023



“Chuvângin, lungrual taka inhmangaih tawnin, inthuruala rilru hmun khat puin, ka lâwmna tikim rawh u.” [Philippi 2:2]


Midang rawng i bawlsak khan Pathian rawng i bawl a ni. I theihna, i hun, i chakna, leh i thil neihte Pathian tana i hman khan chu chu rawngbawlna a ni. 


Mahse Pathian chuan nangmah chauha rawngbawl turin a ti lo che! Philipi 2: 2 ah chuan “Chuvângin, lungrual taka inhmangaih tawnin, inthuruala rilru hmun khat puin, ka lâwmna tikim rawh u,” tiin a sawi. Engnge Pathian chuan a phut che? Nangmahin engah nge Pathian rawng chu i bawl mai theih loh? 


 *Chhungkua kan nih vangin* – Bible chuan I Korinth 3: 9 ah chuan, “Pathian tâna thawk dûn kan ni si a, nangni hi Pathian thlawhhma chu in ni e” tiin a sawi. Pathian chhungte zinga tel i nih chuan Pathian fate zawng zawng nena thawkho turin a duh che. Dik tak chuan, a rawng i bawl laia mite nena in thawhhona chu i rawngbawlna hrim hrim aiin a ngai pawimawh zawk. Pathian chhungte nena ṭha taka thawkho tur chuan a duh che a ni.  


 *Kan inmamawh tawn avangin* – Rawngbawl turin kan in mamawh tawn. Tute mahin thilpek an nei kim lo. Tu mahin an thiam vek hek lo. Pathian chuan tum reng vanga chutia a tih chhan chu nangmahin min mamawh ang a, kei pawhin ka mamawh bawk ang che, kan inmamawh tawn ang. 


Bible-in a sawi angin, “chutiang bawkin keini pawh tam tak ni mah ila, Kristaah chuan taksa pumkhat kan ni a, kan za hian taksa pêng anga inzawm tawn ṭheuh kan ni.” [Rom 12: 5] 


 *Kan thawh hlawk zawk avangin* – Thuhriltu 4: 9 chuan hetiangin a sawi, “Mahni maia thawh ai chuan thawhpui neih a ṭha, hlawhtlin a awl zâwk.” Thawhhona chu a sawt zawk.  


Pathian chuan i beisei aia tha zawk fein a hmang duh che. Hetiang hian i sawi mai thei, “Eng nge ka pek theih?” tiin. Thil eng emaw i nei a, mahse i neih chin chauh chu a tawk lo ang. Chuvang chuan i nunah midangte i mamawh a ni. Pathianin a hmang duh che, mahse Pathian chuan midangte nena inthawhhonaah chuan a huhovin a hmang duh zual che. 


Pathian chuan nunna neiin min thlun zawm a, chu inzawmna chu a Ram tana kan chet chhuahin a nghet zual sauh ṭhin. Pawlho chuan min pawt hnai ṭhin a, hlawk zawka chet min zirtir a, hun hlimawm min siamsak ṭhin. 


Chatuan thila in inpawlkhawmna chuan thawhhona nghet leh dan theih loh Pathian tan a dintir che u. 


Ngaihtuah zui atan. 


Krista taksa pawna mite mit hmuha a miten inlungrual leh hlim taka rawng inbawltawn chu eng vangin nge a pawimawh?  

Rawngbawlna huangah i mal tlat ngai em? A huhova rawngbawlna leh a mala rawngbawlna chuan nangmahah engnge a danglamna? 


Nangmah kaltlangin Pathian chu engnge thawk turin i duh? Chu hmachhawp chu midangte nena thawhhonain engtin nge ṭha zawkin i thawh theih ang? 


[ *Lettu* : Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...