Friday, February 28, 2025

NATNA CHUAN A TIKHA CHEIN EMAW A TITHA ZAWK THEI CHE – I DUHTHLANNA A NI

_Hringnun Damna Rahbi_

By Rick Warren
— February 28, 2025
“Chutichuan, Pathian remtih anga tuarte chuan thil ṭha ti zêlin an thlarau chu Siamtu rinawm tak hnênah kawltîr rawh se.” [1 Peter 4:19]

Miten lungngaihna leh buaina leh natna an hmachhawn chang chuan, mi ṭhenkhat chuan Pathian lam an hawi a. Midang thung chuan Pathian an hawisan thung – an harsatna hmachhawn thei tura hahchawlhna leh thiltihtheihna a pe a nih pawhin. 

Natnain a nghawng dan che chu engtianga lo dawnsawn nge i duh tihah chuan a innghat a ni. Chu i thiltawn chu nangmah tikhatu cheah i hmang dawn em, nge mi ṭha zawk ni turin Pathian lam a hawitir zawk dawn che?  

Isua chuan i natna chu a sawi bo satliah ngawt dawn lo. I natna chu a phurhpui ang che. 

Chu chu a dik – i natna hmunah chuan a tel ve a ni. Amah chu Pathian i natna hriat thiampuitu che chu a ni a, i hmachhawp zawng zawngte hre thiam taka hmachhawn puitu che chu a ni, rilru lam thil, taksa, mite nena inlaichinna emaw thlarau lam thilte chu a ni thei. 

Ringtu ṭhenkhatte chuan Pathian chuan i nat a phal lovin, natna i lo nei palh a nih pawhin i rinna chak loh vang a ni e an ti daih thei. 

Chung mite chuan thudik an hrilh lo che. A chang chuan i nat ve hrim hrim a ngai. A chang chuan natna chu Pathian ruahmanna huang chhungah chuan a tel. Bible chuan, “Chutichuan, Pathian remtih anga tuarte chuan thil ṭha ti zêlin an thlarau chu Siamtu rinawm tak hnênah kawltîr rawh se,” tiin min hrilh. [1 Peter 4:19]

Natna chu pumpelh theih a ni lo. Mihring nuna awm ve reng a ni, ringtu te tan pawh. Duhthlanna i hmaa awm chu engtiangin nge i hman ang tih a ni ta ber zawk. Mihring ngaihtuahna kha deuh nei mi nih chu i thlang thei a, mi ṭha zawk nih i thlang daih thei bawk. 

Tunah khan natna i hmachhawn mek a ni thei. A nih chuan hei hi Pathian hnenah thlen rawh: “He natna hi kawng thar ka zawh theihna tura min hruaina a ni em? Chak zawka ka chet chhuahna tura min nawrna a ni em? He natna hi ka hnathawh tura ka mamawh min petu tur a ni em? Min tiṭhanglian tur leh nangmah anna kawnga ṭhang lian tura hmanrua a ni em? Ka natna hi a lo thlawn maia i liamtir dawn loh avangin ka lawm e. Rinnaa nangmah ka zui zel lai che hian khawngaih takin min pui ang che.” 

Tuna natna i hmachhawn mek khan Isua Krista lainatna ang chhungah ngei chuan hruai zel che rawh se. 

Ngaihtuah zui atan. 

Eng vangin nge ringtu ṭhenkhatte chuan an natna te chu Pathian rin lehzualna atana hmang lova khakna chu an thlan ṭhin zawk? 

Natna tuar mekte chu an phurrit tihnepsak chuang miah lova anmahni chu engtin nge i fuih chak theih ang? 

Pathianin ringtute tuar a phal thu chu a hre thiam lotute hnenah chuan engtin nge i sawi fiah theih ang? 

[Lettu: Peka]

Thursday, February 27, 2025

I INGAIHTUAHNA THLAK LA, I NUN THLAK DANGLAM RAWH

_Hringnun Damna Rahbi_

By Rick Warren
— February 27, 2025
“Thil dang ber aiin, i thinlung veng ṭha rawh; Nunna lo chhuahna a ni si a.” [Thufingte 4: 23]

Pathian chuan i harsatna chin fel ai chuan i thinlung thlak chu a ngai pawimawh fe zawk. 

Pathianin i buaina, natna, lungngaihna, natna leh nguina te chu i nun aṭanga la kiang tur chuan i duh a. Mahse Pathian chuan nangmah siamthat hmasak che chu a dah hmasa zawk – a chhan chu i thinlung i thlak zet loh chuan i ngaihtuahna leh rilrute chu i thlak danglam thei ngawt lo vang. 

I rilru put hmang thlak danglam chu eng vangin nge a pawimawh em em? A chhan pathum ka han sawi ang e …

I rilru kha thlak danglam rawh, a chhan chu i ngaihtuahna chuan i nun a thunun tlat a ni. 
Thufingte 4: 23 chuan hetiang hian a sawi, “Thil dang ber aiin, i thinlung veng ṭha rawh; Nunna lo chhuahna a ni si a” tiin. I ngaihtuahnate khan a ṭha zawngin emaw a ṭha lo zawngin emaw i nun thlak danglam hlawk theihna a nei a ni. Entirnan, mi tuten emaw i chungchang an sawina chu i lo pawm mai thei a, chu chu: “Mi tlaktlai lo tak i ni. Engtihna mah i ni lo” tihte a ni thei ang. Chu chu i lo pawm a nih chuan, a dik lo chung chung chuan, i nun a hruai tho tho ang.   

I thinlung veng tha rawh, I thinlung chu sual indona hmun a ni si a. 
Thlemna zawng zawngte chu thinlunga thleng an ni. Paula chuan Rom 7: 22-23 ah chuan hetiang hian a sawi, “Ka rilru tak takin Pathian dan chungah chuan ka lawm si thin a; nimahsela ka taksa pengah te hian dan danglam a awm tih ka hria, chu chuan ka rilru dan a dova, ka taksa pengtea sualna dan awm hnenah chuan salah mi hruai thin a,” tiin. 

I thunlung a chauh ngawih ngawih chang a awm fo chhan chu i thinlungah khan chhum lo chat lova indona a awm vang a ni. Mi tichhe thei khawp a ni a, a chhan chu a nasat em vang a ni a, a nasat em chhan chu rilru chu mihring tana thil hlu ber a nih vang a ni. Setana chuan i thil neih hlu ber chu a duh ve!

I thinlung chu hlimna leh thlamuanna neih theihna rahbi a nih vangin thunun rawh
Thinlung thunun loh chuan buaina a hring a, thinlung thunun thung chuan muanna a hring ṭhin. Thinlung thunun loh chuan buaina a chawk chhuak a, thinlung thunun chuan mahni inrintawkna dik a hring bawk. Thinlung thunun loh chuan manganna a thlen a. Thinlung thunun erawh chuan chakna, himna leh muanna a thlentir ṭhin. I thinlung chu i thunun lohva i ngaihtuahnate chu i khalh ngil lo a nih chuan i nunah manganna tam tak i insiam ṭhin ang. 

Bible chuan, “Tisa lam thilte duh chu thihna a ni si a, Thlarau lam thil duh erawh chu nunna leh thlamuanna a ni,” tiin min zirtir [Rom 8:6]. Nunna leh thlamuanna chu thlangin i ngaihtuahnate chu vawiin hian veng ṭha ang che. 
 
Ngaihtuah zui ang che. 

I nuna manganna siamtu chu engtin nge i luahlantir ang? I nuna muanna i neih theih nan chuan i thinlung chu engin nge i chhun khah ang? 

I thinlung thunun dan chu engtin nge i zir theih ang? 

Pathian Thu chuan i thinlung thununna kawngah engtin nge a puih che? 

[ *Lettu:* Peka]

Wednesday, February 26, 2025

DANGLAMNA TLO NEIH DAN

_Hringnuna Damna Rahbi_

- Rick Warren
- February 26, 2025
“He khawvel dan ang hian awm suh ula; Pathian duhzawng, a tha leh lawm tlak leh, that famkim chu in hriatfiah theih nan, in rilru athara awmin lo danglam zawk tawh rawh u.” Rom 12:2

Danglamna tlo neih i duh anih chuan, i ngaihtuahna i sen thar leh a ngai a ni.

A biktakin i ngaihtuahnaah chuan i ngaihtuah duh loh thilte chu kalsana i ngaihtuah duh thilte chauh i ngaihtuah a tul a ni. A chhan chu i ngaihtuahna thilah zel i che chhuak thin a ni.

Rom 12:2 ah chuan, “He khawvel dan ang hian awm suh ula; Pathian duhzawng, a tha leh lawm tlak leh, that famkim chu in hriatfiah theih nan, in rilru athara awmin lo danglam zawk tawh rawh u.” I ngaihtuahna i thlak theihna tur chuan he chang hi i vawn reng a ngai dawn a ni.

*  *“Midang entawn suh”*  - Engchen nge mi nun entawnin i lo khawsak tawh? Pathian chuan mi tuemaw ang turin a duh lo che a; a siam ang tak che a awm turin a duh che a ni. Chuvangin midang entawn lo la, midang anga khawsak tum bawk hek suh.   

*  *“Khawvel dan nena inthen”*  - I nuna i thil zirte hi khawvel dante chu an ni. I thlak danglam duh anih chuan, i nuna i entawn ber chu i thlak danglam a ngai a ni. I mihring hlui hrisello tak chu paih la, mihring thar pu la Krista nun chu entawn ang che. 

*  *“Rilru thar puin danglam ang che”*  - danglam tih awmzia chu buhchium atanga phengphehlep lo thlawk chhuak angin kan sawi thei ang. Chutiang chiah chuan, Pathianin i rilru thlak danglamin mi thar hlauhah siam che a duh a ni.

Chu chu engtin nge a thlen theih ang? Bible chuan Ephesi 4:22-24 ah chuan, “In hman lai awm dan kawnga mihring hlui, bumna chakna anga chhe deuh deuh kha hlip thla ula, in rilru thlarauvah chuan atharin lo awm ula, mihring thar, thutak felna leh thianghlimna Pathian anga siam khan inthuam bawk ula.”

Chumi awmzia chu a hlui hlip tur i nei a, a thar hak tur i nei tihna a ni. A thar hak hma chuan a hlui chu hlih phawt a ngai tih a tilang bawk. Dawra thawmhnaw thar kan hak chhin dawna a hlui kan phelh hmasak ang hi a ni.

Chuvangin vawiin atang hian i mihring hlui chindan tha lo tak chu i hlih theihna turin Pathian hnenah dil ang che. Tichuan Pathianin i tana a pek che thawmhnaw thar chu i hak theih nan inring ang che. 
   
Ngaihtuah zui atan.

* Rilru thara awm tih chu engtinnge a takin kan nunpui theih ang?

* I nun hmasaa i lo nunpui tawh he khawvel dan chu engtin nge i hrilhfiah ang?  

* Pathianin rilru thar a pek theihna tur che a mihring hlui i hlih thlak tur chu engnge ni ang le?

*[Lettu: Sangpuia]*

Tuesday, February 25, 2025

PATHIAN CHU I NUN KHALHTUAH HMANG RAWH

_Hringnuna Damna Rahbi_

- Rick Warren
- February 25, 2025
“Tu pawhin mi zui a duh chuan mahni hrehawm pawisa lovin, a kraws puin mi zui rawh se.” Matthaia 16:24

I nuna thawpikna kiantir dan chu liamtira Pathian chettir a ni. Engtin nge i tih ang? Isua chu enkawltuah ṭantir rawh. 

Kan harsatna chu, kan nun buaipuituah ṭan kan tum vek thin hi a ni, kan inhnial buaia,  Pathian nen kan inrem thei lo thin a ni. Kan tana ṭha ber tur hria kan inti a. Rilru hah deuhva i awm ṭhinna chhan chu Pathian nen in rilru a inhmu thin lo hi a ni: “Pathian chuan heti hian tirawh min ti a, heti hian tih ka duh zawk tlat thin a ni!”

Tuktin i harhchhuah apiangin, thutlukna siam ngaiin i awm a: chu chu tuin nge i nun kaihruai ang tih hi a ni. Pathian nge, nangman thuneihna chang se i tih? Tuin nge thutlukna siam ang? Ni tin, darkar tinin thutlukna siam i ngai a ni. Nangma nun thunun i tum tlat chuan, buaina te, inhnialna te leh rilru hahna te a lo thleng ang.

Matthaia 16:24 ah Isuan, “Tu pawhin mi zui a duh chuan mahni hrehawm pawisa lovin, a kraws puin mi zui rawh se.” Kristiante tih tur a rawn sawi a: Krista zuitu kan nih chiah hian, kan chuanna lirthei khalhtuah Isua kan hmang a. Reiloteah a hnungah kan chuang a, a hnung aṭangin kan la khalh ṭalh a. A hnung aṭangin thurawn kan pe a, “He lamah kal rawh. Ding rawh. Nghak rawh. Kal chak rawh! He lamah ka kal duh. Saw lam saw en ka duh.”  

Kum eng emaw zat liamtaah khan, Kay-i nen lâm zirnaah kan tel a. Min zirtirtu chuan nupaa lâm zirte harsatna ber chu hmahruaitu nih an tum ṭheuh hi a ni a ti. Hmahruaitu nih an tum ve ve chuan, an ke an inrahsak thin a, chu chu a lang nalh lo thin a ni.  

Pathianin hmahruai a tumnaah ṭanpui i tum ve zel chuan i lang nalh vak thei lo vang. Chu ai chuan, Pathian chu chettir zawk la, Isua chu i nun khalhtuah hmang ang che.

Ngaihtuah zui atan.

* I nunah eng te nge Pathian hnena hlan harsa i tih?

* Tawngkam chhakchhuak miah lo vin engtin nge Pathian nen in inhnialbuai thin? I thiltih chuan tu nge i nun kaihhruaia i hriat?  

* Vawiina buaina leh harsatna i neihah Pathian hnenah thlen la. Pathianin a thunun theihna turin i engnge thlak danglam ngai? I nunah eng danglamna a thlen ang?

*I chhandamna turin Isua i ring tawh em?*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chuti lo chuan miin an chhuang dah ang e.” Ephesi 2:8-9

I sualna te i puang duh a niha, i nunah Isua i thlang duh a nih chuan, heti hian tawngtai ang che.
“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i âng chhunga min pawma min chhandam ve turin ka dil a che. Amen”

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Sangpuia]

Monday, February 24, 2025

INPHAHHNIAMNA HI CHAKLOHNA TIH NEN A IN ANG LO

_Hringnuna Damna Rahbi_

Rick Warren
24 Feb 2025
“Thuhnuairawlhte chu an eng a thâwl e; Lei hi an la rochung dâwn si a.”
‭‭Matthaia‬ ‭5‬:‭5‬ 

Duhthlanna hrisel, i thatpui a i famkimna tur i siam duh chuan i inngaihtlawm a ngai a ni. Inngaitlawm emaw inphahhniam/thuhnuairawlh tih hian, nih duh hmel viau mahse i chak lo ta e tihna a ni hauh lo. 

A nihnaah chuan inngaihtlawmna leh chaklohna tih hi thil in letling chiah zawk a ni. Thuhnuairawlh tih leh chaklo tih hian inhnaihna engmah a nei lo. Greek tawngkama thuhnuairawlh tihin a tum tak phei chu "chakna thunun" tihna a ni. 

Sakawr pa chak tak thunun sawina atan hman thin a ni a. Chu sakawr pa chuan amahah chakna a hmaa a neih zawng zawng kha ala nei reng a, mahse chu a chakna erawh thunun a ni ta a ni. A pu hman theih turin thununin a awm a ni. 

I chakloh hi Pathian hian a duh lo. Mahse nun tlawmte a i nun erawh a duh a ni. Bible chuan thuhnuairawlh taka nun hi kan nuna kan hahna tam tak tihbo na tha tak a nih zia a sawi a ni.

“Thuhnuairawlhte chu an eng a thâwl e; Lei hi an la rochung dâwn si a.”
‭‭Matthaia‬ ‭5‬:‭5‬ ‭

A hlawkna tam tak Biblein a sawi a awm. Thuhnuairawlhte chu - an ei anga, an tlai ang (Sam 22:25), Pathianin a hruai ang (Sam 25:9), an lo fing ang (Thuf 11:2), hlimna tharin an khat ang (Isaia 29:19). 

Thuhnuairawlh tih sawifiahna awlsam te chu - thlah la, Pathian tih tir zawk rawh. Chu chu a awmzia a ni deuh ber mai. I tlawm anga, i inhlan anga, Pathianin i nuna a duh thlentir turin i remti dawn a ni. Pathian chu i nunah Pathian nihna i neih tir tihna a ni.

Thlah la, Pathian chelh tir rawh. I taksa leh rilru hriselna atan hei aia inhmeh thudang a awmin ka hre lo. I nunah i hman chuan, i chauhna a chhawk anga, i mangan a tireh anga, i thinrim a timit anga, i nat leh lungawilohna a titawp fovang.

Tichuan Pathianah inhlan deuh deuhin, i chak deuh deuh dawn a ni.

Vawiin hian i nunah inbuan viauin i inhriat chuan he thuhnuairawlhna, inphahhniamna nun hi lo zir la. Nang chuan i thlah tur te thlah la, Lalpa zawk tih tir ang che.

Ngaihtuah zui ata...

Pathianin a thunun atan i nun engnge i pek tul nia i hriat?

Tlawmna leh Pathiana inpekna tak tak tling zo lo tura i nuna dal thintu awm kha engnge ni?

Pathian thuneih tir hian thinrim leh lungnihlohna a tihreh dan chu engtin nge ni ang?

(Lettu: Msa)

Sunday, February 23, 2025

DANGLAMNA THLENTIR I DUH CHUAN I NGAIHTUAHNA AṬANGIN BUL ṬAN RAWH

_Hringnuna Damna Rahbi_

- Rick Warren 
- Feb 23, 2025
_"Thlarauvin in ngaihtuahna leh rilru put hmang tidanglam rawh se."_ (Ephesi 4:23, NLT)

Danglamna thlen tur chuan ngaihtuahna thar neih a ngai. Danglam tur chuan thudik i zir a duhthlanna ṭha i siam a ngai, mahse thil i thlir/suangtuah dan pawh i thlak a ngai.

I thil thlir dan khan i thil dawnsawn dan a hril a, i thil dawnsawn dan chuan i chet chhuah dan a hril. Chuvang chuan i chet dan leh i dawnsawn dan i thlak duh chuan i ngaihtuah dan i thlak hmasak a ngai.

Entir nan, "Ka nupui/pasal hi ka hmangaih leh zual a ngai a ni" i ti a ni thei. Mahse khatiang i sawi ringawt khan engmah a tidanglam dawn lo. Duhna avang ringawtin i rilru sukthlek i thlak thei lo. I kawppui laka i rilru put dan i thlak hmasak a ngai. Chu chuan i rilru sukthlek a tidanglam ang a, chu chuan a taka i chet dan a tidanglam ang. Bible chuan heti hian a ti, _"Thlarauvin in ngaihtuahna leh rilru put hmang tidanglam rawh se."_ (Ephesi 4:23, NLT)

Sual beihna - leh sualin i nuna nghawng a neih i duh miah loh te beih letna hi i rilruah a inṭan. I nungchang emaw i rilru sukthlek emaw i thlak danglam duh chuan i ngaihtuahna leh rilru put hmang thlak hmasa rawh.
 
Rilru siamtharna hi "simna" nen a inkungkaih tlat. Simna hi mi tam tak tan chuan ṭawngkam duhawm loh tak a ni tih ka hria. Thil ṭha lo, an tih duh loh, natna thlentu niah an ngai. Kawtthler lun lai taka mi pakhat dingin, "Sim rawh u! Khawvel tawp a hnai e" tih inziak lek kang vah lai hi an mitthla fo ṭhin!

Mahse "simna" kan tih hian rilru inthlak thleng tihna mai a ni. Simna chu nungchang thlak danglamna a ni mah zawk. I rilru thlak danglam a ngaihtuahna thar neih kha a ni

Thiam loh channa aṭangin ngaihdamna, hlawhchhamna aṭangin zalenna, thim aṭangin engah, huatna leh khakna aṭangin engah in insawn a ni.

Pathian i lo ngaihdan ṭhin pawh i thlak a ngai mai thei. A atchilh loh che a, a ngaihsak che a ni! Famkim lohna tam tak i nei, mahse nasa taka hmangaih i ni.

Chuvang chuan danglam i duh chuan i rilru aṭangin ṭan rawh. I ngaihtuah dan zawng zawng i thlak thei - inlaichinna chungchangah, ei baw zawnnaah, khawvel i ngaihtuah danah, i hun kal tawh te, tun hun te leh hun lo la awm tur i thlir danah te. I ngaihtuah dan i thlak chuan i rilru sukthlek leh nungchangah danglamna a thleng ang.

Ngaihtuah zui atan.

Mahni maia thil i tihdanglam theih loh ni a i hriatte tidanglam turin khawi aṭangin nge thiltihtheihna i hmuh ang?

Rilru siamthar nan engvangin nge simna a ṭul ni a i hriat?

Inlaichinna pawimawh ber chungchangah engvangin nge i rilru puthmang i thlak a ṭul ni a i hriat?

[Lettu: Mapuia Fanai]

Saturday, February 22, 2025

ṬHANG LIAN TURIN DANGLAM THLANG RAWH

_Hringnuna Damna Rahbi_

- Rick Warren 
- Feb 22, 2025
_"In mihring hlui sualna leh nunkawng  dik lo, tisa châkna leh bumnaa khat kha hlip thla ula."_ (Ephesi 4:22, NLT)

Danglamna thleng tur chuan duhthlan a ngai. Danglamna hi suangtuahnaa mitthla chauh a tawk lo. Danglamna duhna neih ringawt pawh a tawk hek lo. Danglam tur chuan thutlukna i siam a ngai. Danglam i thlan a ngai.

Danglamna hi duh vanga thleng a ni. Thla ruk chhungin danglam eng emaw i nei dawn em? Nakumah hian tun aia ṭhain i nung dawn em? Mi hrisel zawk, chak zawk, leh puitling zawk i ni dawn em? Mi hlim thei zawk i ni dawn em? Ba tlem zawk i nei dawn em? Pathianin ni tura a duh che kawngah hma i sawn dawn em?

Chhanna dik tak ka hrilh ang che. Heng danglamna te hi danglam i thlan chauhin a thleng ang - a chhan chu danglamna hi tihpalh thila lo thleng a ni lo.

Danglamna thleng tur chuan duhthlanna a ngai.

Pathianin min tihdanglam hun hi kan nghak veng veng fo ṭhin. A ni lo! Pathianin a nghak zawk che. "Lalpa, ka nunah danglamna a thlen ka duh e" i tih hun a nghak a ni.

Ṭhang lian tur chuan mahni duhthlanna ngei a danglam i thlan a ngai. Danglamna tel lo chuan ṭhan lenna a awm lo. Chânna tel lo chuan danglamna a awm lo, tuarna tel lo chuan chânna a awm hek lo. Ṭhang lian tur chuan i danglam a ngai. Danglamna awmzia chu thil thar i chelh theihna tura thil hlui i vawn lai te i thlah kha a ni.

Intihhlimna hmuna sang tak aṭanga hruia inkhaia uai ṭhin te ang hi a ni. Heng hrui hruala inthen ṭhin te hian sang taka an inthen laiin hrui dang va vuan tur khan an hrui vawn lai an thlah a ngai ṭhin. An vawn lai an thlah zet loh chuan lehlama mi an va vuan thei lo. A hrui pahniha vawn a tum chuan engnge lo thleng ang? A laia buaiin a tla nghal ang.

A ṭhen chu a laiah in tang mek, thil hlui in vawn lai, chin ṭhan ṭha lo te, ngaihtuahna hlui te in thlah loh avangin in tla ṭhin. I nun hlui i thlah a ngai a ni.

Bible chuan heti hian a ti, _"In mihring hlui sualna leh nunkawng  dik lo, tisa châkna leh bumnaa khat kha hlip thla ula."_ (Ephesi 4:22, NLT). Kaltir mai rawh. Khang chin ṭhan ṭha lo te, i natna te, tihdan hlui te, i nuna sual te, kaltir vek rawh. Paih bo vek la Pathianin "a siam chhan che a hlawhtlin theih nan" hna a thawk ang tih ring rawh (Philippi 2:13).

Ngaihtuah zui atan.

Pathianin i nunah eng danglam a thlen nge i nghah? Chu danglamna chu a thlen theih nan engnge i mawhphurhna ni a i hriat?

Danglam tura duhthlanna leh a um zuina kawngah ringtupui te chunga rinawmna hi eng anga ṭangkai nge a nih?

Danglamna tura duh i thlanin engnge i tih hmasak ang? Engin nge hmalam pan turin pui ang che?

*Chhandam i nih theih nan Isua i ring tawh em?*

Pathianin a kianga chatuana i awm a duh a chuvang chuan kawng awlsam tak a siam. I rin chuan i dawng ang. I sual avangin Krista i tan a thi tih i rin a i nuna i lo pawmin. I tana thi turin Pathianin a Fapa khawvelah a tir tih i rinin.

*Engpawh tiin khawiah pawh i lokal tawh a ni thei,* Pathian chhungte zingah i tan hmun a awm, an nghak reng che. Sawmna zau taka hawn a ni. Ring la, pawm mai rawh.

I inpeih em? He ṭawngṭaina hian bul i ṭan thei e:
"Lalpa, ka thih hunah ka chanchin i hmaah ka sawi dawn a ni tih ka hria a. I lakah thil sual tiin i remruat ang ni lovin ka duh danin ka nung a ni tih ka hrua. Tun aṭang hian ka nun dan thlak ka duh. Sual lak ata i hnen lam rawn pan ka duh.

"Ka sual sual man ka tawrh loh nan ka sual zawng zawng ai thi tura Isua i rawn tirh a avangin ka lawm e. I ngaihdam ka phu lo tih ka inhria. Lalpa, i khawngaihna chauhin min chhandam thei tih ka hria. Famkimna hmunah lut turin ka felnain a tlin ngai dawn lo tih pawh ka hria.

"Isu, min hmangaih em avanga ka sual zawng zawng i phurh avangin ka lawm e. Vanram luttlakah min siam a, min chhandam turin ka ngen a che. Ka nun min tibuaitu sualna leh chin ṭha lote laka min chhandam turin ka ngen a che. Isu ka ring a che. Tunah hian min tiam ang ngeiin ka pumin, chatuan atana min chhandam turin ka ring a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, February 21, 2025

I INTHLAK DUH CHUAN THUTAK HMACHHAWN RAWH

Hringnun Damna Rahbi

By Rick Warren
— February 21, 2025

“A aw ngaithlaa amahah zirtîra awm in nih tawh phawt chuan, Isuaa thutak awm ang hi.” [Ephesi 4:21] (NLT)

Mahni inthlak danglam theihna thuruk chu tumruhna a ni satliah lo. A tih dan thuruk chu hriat fiah leh thutak hmachhawn chu a ni. Chuvangin, i inthlak danglam duh a nih chuan i nihna dik tak leh awmzia kha i hmachhawn a ngai ang. I chak lohna, mite nena inlaichinna, i hlawhtlinna, i hlawhchamna, hun kal tawh leh hmabak chungchangte kha i hriat a ngai ang. Chu thutak chu Isua Kristaah chuan a awm. 

I nuna khawi lai mah kha thutak i hmachhawn hma chuan i thlak danglam thei ngai lo vang. Eng vangin? Thil chin ṭha lo i nuna awm zawng zawng phenah khan dawt eng emaw mahse i rin tlat si eng emaw a inphum vek a ni.   

Leiba eng emaw i nei a nih chuan dawt thuleng eng emaw i lo rin ve tlat a awm, “Ka hmang ang a, ka nei leh em em ang” tiin emaw “Ka la rul leh em em ang” ti te pawhin i sawi  a ni thei. I hlawh zat tur chu engtianga tam nge tih i chhut sual thei, thudik lo entirnan in lian zawk ka mamawh a ni tih thute chu i lo ring nghet tlat thei. 

Mahse in lian zawk chu i mamawh tak tak em? Chu chu thudik a ni chiah em? Chu chu thudik a ni tih chu i finfiah thei em? I sum leh pai dinhmun nia i lo hriat dan chu a dik ngeiin i hria em? 

Mite nena in inlaichinna chu eng dinhmunah nge a awm? I nihna nangmah leh nangmah i lo inhrilh thinte chu engnge? I hun kal tawh i hmuh dan chu i hre dik em? 

Heng thil i hriatte hi Pathian sawi dan chu a ni chiah em? 

Bible zirtir dan chuan mimal hmasawnna chu thutak aṭanga inṭan a ni. Thutak chuan a chhuah zalen ang che. Tirhkoh Paula chuan, “A aw ngaithlaa amahah zirtîra awm in nih tawh phawt chuan, Isuaa thutak awm ang hi,” tiin a sawi [Ephesi 4:21]

Thutak chu tu nge ni? Isua a ni. Isua chu thutak a nih avangin thutak chauh chu a hriattir ang che. Thutak a hrilh dan che kawng langsar tak awm thei chu a Thu chu a ni. Bible chu a Thu a ni a, Bible chu thutaka ni. [II Timothea 3: 16-17 ah chu mi chungchang chu i hmu thei ang]

Television-a i thil en emaw lehkhabua i thil chhiar emaw chuan ṭangkaina em em a nei lo vang – a chhan chu thudik vek an ni kher lo tlat. Dik tak chuan, i kiang vela thusawite chu i lo ngaithla fo a nih chuan i nun chu dawt thu, thil dik lo, inbumna leh thudik chanveah i awm tih i hria ang a. Chu chu i thlak danglam ngai lo vang. 

Mahse Pathianin thu a hrilh thung che chu thudik hlang a ni. Pathian Thu chuan siam i nih chhanah chuan let leh turin kawng a kawhhmuh che a, Pathian kawng ruatah chuan kal turin a kawhhmuh bawk che. Chuvang chuan nitina Pathian Thu hmanga fianrial hun hman chu a ṭangkai ta em em a ni. I thinlungah thutak i vawn hma chuan engtikah mah i inthlak danglam ngai lo vang. 

Thutak thlang tur chuan vawiin hian inbuatsaih rawh. Tichuan i nunah chuan a dik zawnga thil inthlak danglam chu i hmu thei ang. 

Ngaihtuah zui atan. 

Pathian Thu bakah chuan, khawi laiah nge i nun awmzia chu i hmuh theih ang? Chu chuan engtin nge a tihbuai che? 

Pathian Thutak chuan engtin nge nangma nihna dik tak pawm tur chuan a buatsaih che? 

I hun hman danah chuan a englai chu nge nitina Pathian Thu zir tur chuan thlak danglam ngai ang? 

Isua chu i lo la ring ngai lo a, amah zui tura thutlukna i la siam ngai lo a nih chuan engah nge i la nghah cheu? 

Engtiangin nge i chatuan hun i hman dawn? 

Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...