Sunday, November 22, 2026

INREM LOH LAIA ZAHNA HLAWH DAN

_Hma Hun Eng Zawk Nei Turin_

- Rick Warren
- November 22, 2026
_"Tangkarua leh rangkachak aiin hmingṭhatna leh zahna hi an hlu hle zawk."_ (Thufingte 22:1, CEV)

Mihringten kan mamawh zinga lian ber pakhat chu midangte zah nih hi a ni. Thufingte 22:1-ah chuan heti hian kan hmu, _"Tangkarua leh rangkachak aiin hmingṭhatna leh zahna hi an hlu hle zawk."_ (CEV)

Mahse zahna hi dawn/hmuh mai theih pawh a ni lo; thawh chhuah ve a ngai. Hlawhchhuah theih dan kawng khat chu indona i hmachhawn dan hi a ni. Engvangin? A chhan chu inhnialna kara i awm ve reng rengin miten engtinnge i chhan let tih an ngaichang ṭhin.

Nehemia kha indona a hmachhawn dan avanga zahna dawngte zinga mi entirna ṭha tak a ni. Hetiang hian Nehemia khan a ti a, nang pawhin i ti thei:

*A ṭawng chhuah hmain Nehemia khan ngawi rengin hun a hmang.* Israel miten ṭam laia anmhani chhawrtute an sawiselna thu a ngaihthlaksak a. A chhan hmain, a "rilruin ngun takin a ngaihtuah . . ." (Nehemia 5:7). A awmzia chu thil awmdan ngun takin a ngaihtuah hmasa a ni. A ṭawng chhuah hmain ngun takin a ngaihtuah a, a rilruin fimkhur takin a ngaihtuah hmasa a ni.

Tunlai khawvelah chuan mite hian ngaihtuah hmasa lovin dikna chungchangah pawh nise an ngaihdan an aupui pawp pawp mai ṭhin. Hetianga kan tih zawk fo hi a ṭha, _"Mi tinin ngaihthlâk chuh sela, thusawi chuh lo sela, thin tinel rawh se; mihring thinurnain Pathian felna chu a siam si lo"_  (Jakoba 1:19-20).

*Nehemia khan tlang hriat lohin harsatna sutkian a tum.* Dik lohna tam tak a hmuh khan tlang hriatin a dodal lo. Mi retheihna remchanga laa hlawkna umtute a kawm tlangnel hmasa tih kan hmu. Bible-ah heti hian kan hmu, _"An chungchâng ngaihtuah tûrin mi ka khâwm chiam a."_ (Nehemia 5:7).

Hei hi Isuan a zuitute hnena kohhrana indona hmachhawn dan tur a zirtir dan pawh a ni. Matthaia 18:15-ah chuan heti hian a ti, _"Tin, i unauvin i chungah thil tisual sela, kal la, amah leh nangmah chauhva hriatah a sualnaah chuan zilh ang che; a ngaihthlâk che chuan i unau chu i hneh a ni tawh ang."_ Tlang hmaa puan hi chu duhthlan tur hnuhnung ber a ni. Zah kai i duh chuan Pathian duhzawng angin ti rawh.

*Nehemia mipuite a ngenngawl.* Hruaitu an mite ngaihsak loho hnenah heti hian a sawi: _“In thiltih hi a ṭha tawp lo mai. Kan hmêlma, hnam dangte mi sawichhiatna avângte hian kan Pathian ṭiha in awm a ṭûl a ni lâwm ni? A pung ûma pûktîr hi i bân teh daih ang u khai. Vawiinah ngei hian an lote, an grêp huante, an olive huante, an inte leh an sum leh an buh leh an uain leh hriak hmun zaa hmun khat in lâk ṭhin pawh chu pe leh vek rawh u khai"_ (Nehemia 5:9-11). Nehemia an zah avangin a sawi ang chuan an ti ta a.

Mite zah kai nih i duh chuan an nuna a ṭha ber pho chhuahsak rawh. An hlauhna, ngaih ruatna leh rilru puthmang lakah thlemin awm suh. Thufingte 11:27-ah heti hian kan hmu, _"I thiltum te a ṭhat chuan mite zah kai i ni ang."_ (GNT)

Zahna leh midangte hneh theihna hi a kalkawp tlat. Indona a thlen hunin Nehemia tih dan hi zawm ve rawh.

Ngaihtuah zui atan.

Kar thar lo awm tur hi ngaihtuah teh. "Ngaihthlakna kawnga chak, sawi kawnga ngawi thei" ni turin engtin nge ke i pen ang?

Mi tuin emaw mimal thilah mi hriat loha a lo pan che kha han ngaihtuah let teh. Chumi i zahna chu eng chenin nge a pun? Engvangin?
M
Engtik khan nge mi tuin emaw i theihna sang ber a pho chhuahsak che? Midangtea a ṭha ber pho chhuahsak turin eng hun remchang nge i neih?

[Lettu: Mapuia Fanai]

Saturday, November 21, 2026

ENGVANGIN NGE INREM LOHNA IN NEIH ṬHIN?

_Hma Hun Eng Zawk Nei Turin_

-  Rick Warren 
- November 21, 2026
_"Tu pawhin tu chungah pawh thupawi nei ang ula, indawh tawnin inngaidam tawn ula; Lalpan a ngaidam che u ang tak khân ngaidam ve rawh u."_ (Kolossa 3:13)

Indona hi i duh miah lo ang. Mi tam tak chuan pumpelh hram an tum ṭhin! Mahse indona hi mihringte hian kan pumpelh thei lo, tumah mifel kan awm loh avangin.

Mahse hma hun ṭha zawk nei a i damchhan i tihhlawhtlin theihna turin Pathianin "tu chungah pawh thupawi nei ang ula, indawh tawnin inngaidam tawn ula; Lalpan a ngaidam che u ang tak khân ngaidam ve rawh u" a ti (Kolossa 3:13).

Inrem lohna hmachhawn dan ṭha i zir hmain a chhan i hriat hmasak a ngai. Nehemia bung 5-naah a chhan pali i hmu thei ang:

*1. Mamawh zualpui neih lohna.* Mamawh zualpui kan tih hian taksa, rilru, inlaichinna emaw sum lamah emaw a ni.

Nehemia hun lai khan taksa mamawh a ni: Mipuite kha an ril a ṭam hle. Jerusalem kulh tungding leh tura hna an thawh laiin ṭam an hmachhawn tlat. Miin, _"Chhunhkaw lian tak kan ni a. Dam khaw chhuak turin chaw tam zawk kan mamawh a ni"_ an ti (Nehemia 5:2). 

*2. Hnung tawlh.* Hmasawn tawh miah lo anga i inhriat khan thinrim mai a awl ṭhin. Chu chuan inrem loha awlsam takin a thlen thei.

Ṭam a tlak lai khan Jerusalem-a mite khan ba an ngah tulh tulh, a chhan chu bungrua lei tur a tlem telh telh a, thil man a sang telh telh bawk. _“Kan tam si a, ei tûr kan nei lo. Kan lote kan dahkham si a"_ an ti hial a ni (Nehemia 5:3).

*3. Hruaitu ngawi reng.* Thuneituten harsatna hmu reng si a engmah an tih loh hian inrem lohna hi a awm thuai ṭhin.

Ṭam a tlak bakah hruaitu engmah tih tum lo an neih avangin Israel mite kha an nung ve chang chang a ni: _"Lal hnêna chhiah chawi atân sum kan pûk a, chumi atân chuan kan lote leh kan grêp huante kan dahkham a"_ (Nehemia 5:4). Ṭam a tlak lai pawhin engmah an thunun thei lo, thuneitute khan tumah chhiah an awl lo tlat.

*4. Thil tidanglam tura thuneihna nei lo anga inhriatna.* Miin i dinhmun chau tak remchanga an lak laia thuneihna nei lo anga inhriatna hian mi a tichau ṭhin. Mi zawng zawng rilru puthmang a ni.

Nehemia hun lai khan ram neitu mi hausate khan mi retheite kha an chhawr nasa hle. Chhungkaw ṭhenkhatte phei chu an fate sala hralh tura nawr an ni hial! _"Kan fanute leh kan fapate hi chhiahhlawh atâna bawihah kan luhtîr takngial dâwn hi; kan fanu ṭhenkhat phei chu bawihah an lût tawh nghe nghe a. Chhan ngaihna hre hek lo i, miin kan lote leh kan grêp huante lah chu an nei ta si a"_ an ti hial (Nehemia 5:5).

Tunah chuan inrem indona/inrem lohna lo awm chhan i hre ta a, Pathian Thu hmanga a chhan dan tur i hriat a ngai ta a ni. Naktukah chuan chung indona kara midangte zahna dawn dan kan zir dawn a ni.

Ngaihtuah zui atan.

I chheh velah khan in mamawh in neih lo engnge i hmuh? Tunkar chhung hian chung chu in hmuh theih nan engnge i tih ang?

Engtik khan nge i tihtur ti zo lo riaua i inhriat? Chutiang hmasawn lova inngaihna chuan engtin nge midangte nena inrem lohna a thlen?

Hruaitu, midangte ngaihsak miah lo ni lo, midangte ngaihsak ṭhin mi i hriat kha han ngaihtuah teh. Chumi nungchanga thil ṭha i hmuh kha i nunah engtinnge i seng luh ang?

[Lettu: Mapuia Fanai]

Friday, November 20, 2026

BEIDAWNNA HNEH DAN

_Hma Hun Eng Zawk Nei Turin_

By Rick Warren
November 20, 2026
“ _Anniho hi hlau suh u; LALPA ropuizia leh a hlauhawmzia hre reng rawh u_ .” Nehemia 4:14

Beidawnna chu engtin nge i hneh ang? Nehemiah tihdan entawnin. 

Nehemiah 4 ah chuan beidawnna hneh dan kawng thum i hmu thei ang. Huaisen takin thlarauva i chak lohna lai chu han chhut teh. Thinrimna, châkna, chapona emaw thil dang emaw berah chuan i lo chak lo em? Engnge i chak lohna lai chu? 

Nehemia khan an hmelmaten Juda mi kulh siamṭha duhtute beih an duh tih a hriat chuan, “ _mipuite chu khandaih te, fei te, thal te ka pe a; a chi chiin, bang la rem zawh loh bulah vêngtu atân ka sem darh a,_ ” tiin a sawi [Nehemia 4: 13]. Nehemiah khan a tih tur chu a ti mai. Khawpui kulh ṭhat lohna lai tak chu hriain siamṭha turin ruahmanna a siam a ni. 

*I nun kha siamṭha rawh* . Beidawnna pumpelh tur chuan thil remfelin i remṭhat a ngai ang. Leiba i nei em? I sum hman dan ruahman fel rawh. I thau mah mah em? I ei in relfel rawh. Chak lo takin khawsa mai mai suh. Intichak zawk ang che. 

*Pathian thlir nawn rawh.* Beidawnna chu i duh lo zawng thlir lovin Pathian thutiam i thlir chiah chuan i hneh thei ang. Nangmah tibeidawngtu che chu i thunun thei kher lovang, mahse i en tur thil chu i herrem thei ang. 

Nehemia khan mite manganna a hriat thiam khan, ding chhuakin, “ _Anniho hi hlau suh u; LALPA ropuizia leh a hlauhawmzia hre reng rawh u_ ,” tiin a sawi [Nehemiah 4: 14]. Pathian ṭhatna leh thiltihtheihna chu a hrilh nawn a ni. 

I ngaihtuahna nangmah tibeidawng theitu chu ngaihtuah nawn suh. Pathian chu ngaihtuah zawk ang che. Living Bible Paraphrase chuan hetiang hian a sawi, “ _Beiseina zawng zawng ka bo hnu chuan Lalpa lam chu ka hawi leh ta a_ ,” tiin [Jonah 2: 7]. 

*Bei let rawh.* Thlarau indonaah chuan i tel ve a ni tih i hre chiah em? Bible chuan, “ _In khingpui Diabola chu sakeibaknei rûm ṭhîn angin, a ei theih tûr zawngin a phi ruai ṭhîn; in unau khawvêla awmhote chungah chuan chutiang tuarna chu a thleng ve a ni tih hriain, ring nghet taka awmin amah chu do rawh u_ ,” tiin a sawi [I Peter 5: 8-9]. 

Nehemia 4: 14 chuan hetiang hian a chhunzawm, “ _Anniho hi hlau suh u; LALPA ropuizia leh a hlauhawmzia hre reng rawh u. In unaute hi vêng ula, in nupui fanau leh in in leh lo tân ṭang rawh u_ ” tiin. “ _Kan hmêlmate chuan an thil tih tum chu kan lo hria tih an hriat chuan Pathianin an thiltum chu a tibahlah a ni tih an hria a; keini chuan kan za-in kulh bang siam chu kan chhunzawm leh ta sauh sauh va_ ,” a ti bawk. [Nehemia 4: 15]. Pathian chuan chu hna thawk tur chuan a tichak ta a. 

A chak lo i thuam ṭha mek a nih chuan, Pathian lam en la, hmelmate bei let turin inbuatsaihin beidawnna chu chutiang chuan hneh ang che. 

Ngaihtuah zui atan. 

• Vawiin hian englaiah nge i chak loh ber? I nuna chak lohna lai awm chu siamṭha turin rahbi hmasa ber chu engtin nge i rah theih ang? 
• I beidawnna thlentu ni fo chu engnge ni? Pathian nihna i en zawk tur chu engnge ni ang? 
• Hmelma “nangmahni tichhe theitu” an awm a ni tih hriatna chuan beidawnna do tlat thei tur chuan engtin nge i hneh theih ang? 

[ *Lettu:* Peka]

Thursday, November 19, 2026

BEIDAWNNA CHHAN KAWNG 4 [Part 2]

_Hma Hun Eng Zawk Nei Turin_

By Rick Warren
November 19, 2026
“ _Ka beidawn êm êm lai pawhin Nang chuan ka awm dân tûr i hria_ .” [Sam 142:3]

Pathian chuan i nun kawng chanveah chuan tlawm a, tawpsan mai lo turin a duh che a. A tawp thleng ngei turin a duh che. Chunglam en turin a duh che a, tlawm mai lo turin a ko che. 

Sam 142: 3 chuan, “ _Ka beidawn êm êm lai pawhin Nang chuan ka awm dân tûr i hria_ ” tiin a sawi. 

Nimin lam khan kan beidawn chhan pahnih ka sawi tawh a: chungte chu chauhna leh lungawi lohna te an ni. Nehemia 4 kan chhiar chhunzawm zel chuan, a chhan dang pahnih kan hmuh belh leh. 

Beidawn chhan dang pathumna chu hlawhchhamna a ni. Hnathawktuten Jerusalem kulh an sak ṭhat laia a lai laklawha an tan lai chuan an hlawhtlin dawn leh dawn loh kha an chhut buai hle, “Kan zo tak tak thei ang em aw?” tiin [Nehemia 4: 10]. An beisei aiin an bei rei a, sawt lo an tiin an hnual hman hle a nih kha. 

Thudik chu hei hi a ni, tute mahin vawilehkhatah eng hna mah an zo duak ngai lo. Hlawhtlinna chu hlawhchhamna leh thil dik lo hmu chhuak chung zelin an hre chawp ṭhîn. Hlawhchhamna chu hlawhtlinna rahbi a ni zawk. Mi hlawhtling leh hlawhchhamte danglamna chu hei hi a ni: Mi hlawhtlingte chuan an hlawhchhamna chu rei lote atana anmahni tikhaihlaktu satliah angin an hmu a. Mi hlawhchhamte thung chuan an hlawhchhamna chu an indelhtir ṭhin. Thufingte 24: 16 chuan, “ _Mi fel chu vawi sarih tlu mah sela, A tho leh zêl ṭhîn_ ,” tiin a sawi. 

Beidawnna chhan palina chu hlauhna a ni. Israel hmelmate khan an hnathawh kha an lo hmusit satliah a ni mai lova, vaukhanna nen an bei a ni: “ _Kan hmêlmate lah chuan min zuam hle a, “Kan han beiha kan thaha, an hna kan tihtâwpsak hma chu eng mah an hre lo vang, hmuh pawh min hmu lo vang,” an ti a_ ” tiin an lo sawi [Nehemia 4: 11]. Chutianga in hmelmate ṭawng chu beidawnna tham a tling tawh hrim hrim a ni!

A dawt leh chang chuan hetiang hian a sawi, “ _Nimahsela, an zînga Juda awm vete chuan an thil tum chu a rûkin min rawn hrilh zêl a_ ” tiin [Nehemia 4: 12]. An hmelmate hnaiah chengte phei chuan an hlau hle reng a ni. Eng vangin? A chhan chu anmahni hual veltute kha thil ṭha lo hlir an nih vang a ni. 

Hlauhna chuan a tihnual mek che a nih chuan thutak leh fuihna thu chuan inthuam ang che. Tlangkam thu chu ngaihven lutuk duh suh. Hmet mit la, a nih loh chuan mi hlauthawng, buai leh lungkham ngah tak mihring i lo ni ang. 

Vawiin hian engin nge tihnual che? Chauhna, beidawnna, hlawhchhamna leh hlauhna te an ni em? Eng pawh ni se, Pathian hnenah hlan la, “ _kan hmaa intlânsiaknaah hian chhel takin i tlân zêl ang u_ ,” tiin intihdarh tlat rawh [Hebrai 12: 1]. 

Ngaihtuah zui atan. 

• Pathian hnenah chuan eng ang beidawnna nge i pek ve ngai vawiin hian? 
• Thil eng emaw i tihsual a hun laia i hriat thiam chiah loh, mahse a hnua hmasawnna rahbi rahtirtu che ni si chu han ngaihtuah teh. I rilru puthmang chuan engtin nge i hmasawnna a hruai? 
• Tun kar hman mekah hian eng ang ngaihtuahna nge i lo hawisan? 

*[Lettu:* Peka]

Wednesday, November 18, 2026

BEIDAWNNA CHHAN KAWNG 4 (Bung 1-na)

_Hma Hun Eng Zawk Nei Turin_

- Rick Warren
- November 18, 2026
"Ka lamah hian lo hawi la, mi khawngaih ang che, khawhar leh hrehawm takin ka awm si a," Sam 25:16.

Thil eng pawh i tih laiin, a laihawl vela beidawnna lo thleng ṭhin i hre tawh em? Nu leh pa nihnaah te, inneihnaah te, zirnaah te, hnathawhnaah te pawh a dik vek mai. Mahse Pathian chuan i tlansiakna tur a ruatsak che chu i zawh fela, ṭha taka i tâwp a duh a ni.

Israelte saltanna aṭanga an kir leh hnua Jerusalem kulh sa ṭha leh tura Nehemia thinlunga Pathianin a dah khan kulh sak hna an ṭan a. Mahse, "khawpui huala kulh chu a sân zâwng chanve a lo nih khan," (Nehemia 4:6 NLT) mipui chu an beidawng ta a.

Nehemia chanchin hian mite beidawn chhan tlanglawn tak pali a sawi a. Vawiinah hian a hmasa pahnih te kan en dawn a ni.

*Beidawnna chhan hmasa ber chu chauhna a ni.* 
Nehemia 4:10-ah chuan, "Chumi hnu chuan Juda mipuite chuan, "Hna thawkte chu an chau zo ta...' tiin an phun ṭan a." Siamṭhat hna eng pawh mai hi a hahthlak a ni. Hna chanve hmasa an thawk zo a, mahse reiloteah an chau thuai a. An chauhna chuan taksa leh thlarau lamah a tichak lo zo ta a ni.

Nehemia hnathawkte hian vawiin atan zirlai pawimawh tak min pe. A chang chuan thlarau lam thil i tih theih ṭha ber chu mut a ni. Engvangin? Beidawnna hi a tam zawk chu chauhna avanga lo awm a ni. Zana ṭha taka i mut chuan thil awm dan zawng zawng chu ṭha zawk angin a lang ṭhin. I hahdam ṭhat hnu chuan mahni inkhawngaihna te, thlemna te, mi dangte beihna pawh i tuar thei zawk a ni.

*Beidawnna chhan pahnihna chu lungawilohna a ni.*
Israelte chu an chauh mai bakah an lungawi lo bawk a. "Lâk sawn tur lungrem chim tam tak a awm a. Keimahni chauh chuan kulh hi kan sa thei ngai lovang," (Nehemia 4:10) an ti a. Hna chu an rin aiin a lo har zawk a. An khawpui chhe tawh lungrem chimte chu an tan chuan a tam lutuk deuh a ni.

I nunah lungrem chim chu eng nge ni? I pal buai fo ṭhin  thil kha a ni. Lungrem tak tak chauh a ni lo. Rilru lam, inlaichinna lam emaw, sum leh pai lam lungrem chim pawh a ni thei. A nih loh leh thutlukna dik lo avanga lo awm lungrem chim pawh a ni thei.

Lungrem chungchanga thil pawimawh chu, i nunah hian a awm reng dawn tih hi a ni. Khawvel chhe tawh takah i chêng a. Chuvangin pumpelh theih a ni lo. Mahse lungawilohna titlem turin lungrem i enkawl dâna zir a ni thei. Engtin nge i tih ang? I nun aṭangin chatlak awm lova i paihchhuah reng khan i ti thei a ni. Sam 25:16 ṭawngṭaina hmangin i ṭan thei.The Living Bible chuan heti hian a sawi: "Aw Lalpa, lo kal la, i khawngaihna min hmuhtir rawh, kei zawng ka mangang a, ka chauva, lungngaihna nasa takah ka awm si a," tiin. 

I ruahmanna chungchangah beidawngin i inhria em? Tlâwm mai suh! Naktukah beidawnna i hneh theihna tur kawng dang pahnih kan en leh dawn nia.

Ngaihtuah zui atan

Hna i thawh lai taka tlawm mai i duh lai hun kha han sawi teh. Engin nge titlawm che?

Mi dangin chawlh an mamawh huna zahngaihna i pek ang kha i inpe ve em? Eng vangin nge i inpek emaw, engvangin nge i inpek loh?

I nuna lungremte -  i hmasawnna tibuaia, tibeidawngtu che chu a takin engtin nge i thenfai ang?

[ *Lettu: Marova Punte* ]

Tuesday, November 17, 2026

TU LAWMNA NGE I ZAWN?

_Hma Hun Eng Zawk Nei Turin_

* By Rick Warren
* November 17, 2026
“Keimah avânga miin an hau che u a, an tihduhdah che u a, dik lo taka sual tinrêng tia an puh hun che u chuan in chan a va ṭha dâwn êm! Lâwm ula, hlim takin awm rawh u, vânah in lâwmman a awm hnem si a; chutiang bawkin in hmaa zâwlneite pawh kha an tiduhdah ṭhîn asin.” [Matthaia 5:11-12]

In nun danin Pathian a tihlawm avanga miten an sawisel chang che u chuan hei hi hre reng ang che u: Vanramah lawmman ropui takin a nghak che u tih hre rawh u. 

Bible chuan hetiang hian min chah, “Keimah avânga miin an hau che u a, an tihduhdah che u a, dik lo taka sual tinrêng tia an puh hun che u chuan in chan a va ṭha dâwn êm! Lâwm ula, hlim takin awm rawh u, vânah in lâwmman a awm hnem si a; chutiang bawkin in hmaa zâwlneite pawh kha an tiduhdah ṭhîn asin,” tiin. [Matthaia 5:11-12]

Chatuan hun thlir chu mite sawisel leh cheksawlh do theihna a ni. Eng vangin? Mi dang ngaihdan chu a awm reng dawn lo. An pawmlohna che u chu a la liam ang. Nia, an ngaihdan chu i ngaithla satliah mai thei a, mahse an ngaihdan chu pawm lutuk suh ang che u. 

Thil awm reng tur chu Pathian Kohhran chauh chu a ni. Pathian chhungte chu vanramah an awm reng ang. Chuvang chuan midang thusawi satliah chu ngai thutak duh suh ang che. Chu aiah chuan, Pathian chuan i hunte chu ama duh dan tih nana hmang turin a duh che – i theihna, thiamna leh thilpekte a pek che chu amah chibai bukna atan leh i chatuan dinhmun siam nan hmang turin a duh che.  

I thil tih lai kha Pathian duh zawng a nih chuan thil dik i ti tih inhriatna i nei ang. I nun khua chu mi Pakhat chauh tihlawm a ngaih hnu chuan engtiang takin danglam nasa ang maw!

Mahse a chang chuan mite ngaihdan chu i vengthawng mah mah a, an thuneihna hnuaiah i intulut nasa ta mah mah ṭhin a ni. Miten tlawm anga an ngai che a nih chuan i tlawm tihna a ni thei. Miten mak nia an hriat che chuan i mak tihna a ni thei. Kei chu chutianga nun hman chu ka duh ve lo – i duh em? 

Thudik chu hei hi a ni, mitkhapkar lek pawh vanramah chuan he thu hi i sawi chuan i awm lovang, “Eng vangin nge miten min ngaihdan chu ka dah pawimawh lovang” i tih chhung chu? 

Tirhkoh Paula chuan hetiang hian a sawi, “Tûnah hian mihring nge tihlâwm ka tum Pathian? Mihring lâwm zâwng sawi tum angin ka lo lang ṭhîn em ni? Mihring tihlâwm tum ni ila Krista bawih ka ni lo vang,” tiin. [Galatia 1: 10] 

Vawiin hian, mite tihlawm tum lovin vanrama i lawmna tur chu nunpui ang che. He leiah hian tihlawm i tum ber chu Pathian a nih chauh hunah chuan vanrama i lawmman chu a ropui thei ang. 

Ngaihtuah zui atan. 

* Mite ngaihdan chuan engtiang takin nge i nun an hruai? An lawm zawng anga awm loh hlauhna chuan engtianga nasain nge a thunun che? 

* Pathian duh dan chauh nun hman chuan engtiang takin nge i nun a tih awlsam? 

* Eng thil chin ṭha [habit] pakhatin nge nilenga Pathian duhzawng thlir ngar ngar turin a ṭanpui che? 

*[Lettu : Sangpuia]*

Monday, November 16, 2026

SAWISELNA HMACHHAWN DAN KAWNG HNIH

_Hma Hun Eng Zawk Nei Turin_

— Rick Warren 
— November 16, 2026
“Tupawh Krista Isuaa Pathian ngaihsaka awm tum apiang chuan tihduhdahnate an tuar bawk ang.” 2 Timothea 3:12

Hringnun hi Pathianin hun remchang min siamsakna hlir a ni. Amaherawhchu remchanna awmna apiangah dodaltu an awm zel ṭhin, a bikin tunlai hnam hrang hrang khawsakhona karah hian a nasa zual a ni. Bible pawhin a sawi a: “Tupawh Krista Isuaa Pathian ngaihsaka awm tum apiang chuan tihduhdahnate an tuar bawk ang.” (2 Timothea 3:12).

Nimin lamah khan ruahmanna Pathianin a pek che i bawhzuina kawngah nuihzat chunga dodaltu kawng thuma i neih tur thu kan zir a. Vawiinah chuan chung sawiselnate chu engtin nge i hmachhawn ang tih kan zir dawn a ni.

*Pathian hnenah i rilru dik tak hrilh rawh.* Thil ropui i tih avanga miin an sawisel che pawhin, chhang let ve suh. Chu ai chuan Pathian nen sawi dun ula — tlang takin hrilh vek ang che. I rilru natna pawh zep suh. I rilru dik tak chu Pathian hrilh rawh. Ṭawngṭaina hi miin min beih lai leh min nuihzat laia thawpikna tihkianna ṭha leh ropui tak a ni.  

Nehemia thil chinṭhan ṭha deuh chu a ṭawngṭai hmasa ziah ṭhin. Pathian hnena Nehemia ṭawngṭaina hi han ngaihtuah ve teh: “Aw kan Pathian ngai teh, hmuhsitin kan awm hi: an mi sawichhiatna chu anmahni lu chungah lentir la, anni pawh khawii ramah emaw mualpho takin tantir reng ang che; an bawhchhiatna chu khuh suh la, an sualnate chu i hma ata thaibovin awmtir suh ang che; kulh siamtute hmaah an tihthinur che hi.’” (Nehemia 4:4-5).

Pathian chuan hria se tia i duh hi a ngaithla duh lova. Sawiselnate, hmuhsitnate leh puhchhiatna tinreng i tawh pawhin chung zawng zawng chu Pathian a hre vek duh a, i rilru hahna zawng zawng pawh a hre duh a ni.

*Pathian chu i innghahna a ni tih inringtawk takin hrilh rawh.* Pathian duhzawng i tih avanga dodalna i tawh apiangin Pathianin ti tura a tih che kha nemnghet leh la, amah chu zui turin inhlan thar ang che. Pathian thupek i zawm chuan, nangmahah innghat lovin, Pathian engkimtithei hnenah chuan i innghat tihna a ni. I nunah dodaltu an tam poh leh Pathiana i innghah a ngai nasa zual tihna a ni.

Engtin nge Nehemian amah nuihzattute a hmachhawn? Pathianah a inghat a ni tih chiang takin a sawi a  ni: "Van Pathian chuan mi tihmuingil ang a; chutichuan keini a chhiahhlawhte chu kan tho vang a, kan din ang a: nangni erawh chuan Jerusalem-ah hian chanvo emaw, thuneihna emaw, hnuhma emaw in nei lo rêng rêng," a ti a. Nehemia 2:20

Dodaltu te hian engti kawng zawng mahin Pathian hnathawh an ti tawp theilo nangman i thawhtir a nih ngawt loh chuan. Sawiseltuten an sawisel che pawhin, anmahni ang chiahin chhanglet lo la. Thungrul ve kher suh.

Chu ai chuan, Nehemia angin, Pathian hnenah i rilru dik tak hrilh la, inring tawk takin, "Van Pathian chuan mi hlawhtlin tir ngei ang" tih sawi ang che.

Ngaihtuah zui atan

* Pathianin engkim a hre reng sia eng vangin nge Pathianin i rilru chu hrilh turin a duh che nia i hriat?

* I rilru nat changin i rilru a awm Pathian i hrilh ngam em? Eng nge a chhan, eng vang nge?

* I tun dinhmuna dodalna i tawh mek han ngaihtuah teh. Hetianga i rin leh i ṭawngṭai chuan i hlawhtlinna chu engang nge ni ang, “Van Pathian chuan min hlawhtlintir ngei ang.”

*[Lettu: Sangpuia]*

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...