Inlaichinna tha
Rick Warren
30 July, 2022
"Pahnih chu pakhat ai chuan an tha zawk, an thawh chhuah that avângin. An tluk pawhin pakhat chuan a thian chu a khaiding dawn si a; mahni chauhva awm kha erawh chu a chung a pik e, a tluk chuan khaidingtu tûr a nei si lo." Thuhrilru 4:9-10.
Inlaichinnate hi kan nunah thlipui ang maia harsatna a lo thlen hian siksil (raincoat) an chang thin. Kan thian emaw, chhungkhat emawin chutiang thlipui an tawh chuan, kan inpuitawn thin a ni. Mi dang tana kan inpek thinna hi harsatna thlipui lakah kan inchhantawn thin a ni.
Thuhriltu 4:9-10 ah chuan, "Pahnih chu pakhat ai chuan an tha zawk, an thawh chhuah that avângin.
An tluk pawhin pakhat chuan a thian chu a khaiding dawn si a; mahni chauva awm kha erawh chu a chung a pik e, a tluk chuan khaidingtu tûr a nei si lo" a ti.
I hmangaihte i chhan a ngaihna tur hun, thlipui hrâng hrang hrangte hringnunah hian a lo thleng thin a. A chang chuan, nun hian danglamna thlipuite, a chang leh chuan ngaihdan hrisel lo thlipuite a rawn tleh thin.
Amaherawhchu, heng zawng zawng zinga tawrhhlehawm ber chu inhnawlna hi a ni. I thian emaw, i fate emaw, i kawppuiin emaw hnawlna a tawn chuan, nang leh i chhungkhat lainate khan in pan khawm a, chu thlipui lakah phen turin a tan siksilah in ṭan a ngai a ni.
Kum tam tak liam tawhah khan kan upa ber Amy khan high school a kal ve a. Mi dang lo fuihphurtu pawl (cheer leader) nih kha a tum ve a. An enchhinna atan vawi tam tak a inzir a. A hnuah chuan a thiante chu thlan an ni a, ani erawh an hnawl a. Chu chuan a thinlung a tikeh vek a ni. A lo haw chuan a pindanah a tlan lut nghal a, a thawmhnaw dahna bawm chhungah lutin, chhuatah thu chungin a tap chiam a ni.
Kan chhungkaw zinga mi tupawh khan Amy tap kha kan hre thei vek a. Tichuan, pakhat te tein, mahni thu theuh khan, a pindanah chuan kan han kal a. A thawmhnaw dahna bawm chhuatah chuan thutpuiin kan tahpui ta a ni.
Thurawn kan pe miah lova. Thurawn kha a mamawh hek lo. "Lungngai suh. Engmah a ni tak tak hleinem" kan ti miah lova. Engmah tak tak kha a ni zawk a ni! "Tap tawh suh" pawh kan ti hek lo. Mi lungngaihna tawk mek laka thil awmze nei lo ber a ni chu thil chu. Chumi ai chuan, kan vaiin minute 30 vel kan thu a, kan tahpui zawk a ni.
Kan chhungkua chuan kha thil thleng kha kan theihnghilh tawh ngai lovang. Eng vangin? A chhan chu, kha hunah khan atan siksilah kan tan vang a ni. Thlipui dalah kan tansak a. A venghim tuah kan tang a. Kan chhungkaw zinga mi khan natna a tawk a, kan palzamsak hauh lova, sawi nepsak lah kan tum hek lo. Tihhlim pawh kan tum lova. Kan tahpui mai zawk a ni.
Chhungkaw duhawm - inthlah emaw, fa lak emaw, thlarau lamah pawh nise- thlipui lakah an inchhan vek thin a ni.
Ngaihtuah zui atan...
Engvangin nge kan chhungte lak atang hian intawiawm that kan mamawh bik em em?
Naupangin hnawlna lo tawng se, engtin nge i lo sawipui thin ber? Hmangaih takin emaw Pathian thu mil takin engtin nge i sawipui ang?
Hnawl nia an inhriatna chungchang mi dangte engtin nge sawipui i tum thin? Chu chu eng nge a that lohna?
(Lettu: Msa)





















