_Sum Enkawl Dan_
By Rick Warren
— July 21, 2022
“I leiba chu rei rial suh.” [Thufingte 3:27]
Pathian chuan leiba neih chungchanga a ngaihdan chiang takin a tarlang. Thufingte buah chuan hetiang hian kan hmu, “I leiba chu rial rei suh,” tiin [Thufingte 3: 27]. Tin, Rom lehkhabuah chuan hetiang hian kan hmu bawk, “ Inhmangaih tawnna ngawt lo chu tu ma engmah ba suh u,” tiin [Rom 13:8]
He thu hi chawplehchihin i lo hre tawh hial ang, mahse Pathian chuan Bible-ah chiang takin a tarlang: Leiba neih chu thil ṭha a ni lo.
Chuti chung chuan mi tam takte chu leibaah an pil mek thung. Hmalam an pan a, an leiba chu tlak thei ngat sela chuan a tahtawl te te pawhin pek tlak mai chu an duh ang.
Chu chu Pathianin a duh dan che pawh a ni. I leibatte chu tlak turin a duh che a, tichuan Amahin malsawmna a vur ang che. Mahse leina aṭanga tal chhuah chu thil awlsam a ni lo. Pakhatnaah chuan leiba aṭanga tal chhuah chu a tuma i tum a ngai, ruahmanna fel tak i neih a ngai bawk. Chung rahbi pahnihte chu i lo en chhin dawn teh ang.
Leiba aṭanga tal chhuah tum rawh. Leiba neih thur mai chu thil awlsam tak a ni tih i lo hre tawh hial ang. Ngaihtuahna sen chiam pawh a ṭul lo vang. I hawi zawng i thlak thut a ngai a, kawng chho tak i zawh hial a ngai ang. Chutianga leiba aṭanga tal chhuak tur chuan thutlukna harsa tak leh thutlukna mumal tak - hun pek leh mahni inthunna - a phut hial.
Kawng chho zawh lai chuan khawhar a awl khawp mai a. Mahse Pathian chuan i awmna chiah kha a hre chiang. Chutiang kawng chu i la zawh dawn a ni tih hmanah khan a hre tawh. I harsat buaina karah chuan, a ṭanpui duh che a, a tichak duh chein i ṭhan len a duh. I buainaah chuan a awmpui tlat che. Malin i awm lo.
Leiba kalsan turin ruahmanna siam rawh. Leiba kalsan chu ni tin tih tur a ni a, rahbi khat te tea rah ngai a ni bawk. Chubakah chuan mi tam berin an thil ngainat loh a keng tel: mahni inthununna. Thil eng emaw lei insumte, thil eng emaw ti tura thulukna siam te, ti lo tura inbuatsaihte a keng tel bawk ṭhin.
Bible chuan Thufingte 21: 5 ah chuan hetiang hian a sawi, “Mi taima ngaihtuahna chuan neihnunna lam a pan a, mi thatchhia erawh chuan tlakchhiatna lam chauh a pan a ni,” tiin.
Leiba i nei a nih chuan he Bible-a vaukhanna thu kan hmuh hi ngaihthah suh: A chinfel dan kawng dap rawh. Leiba i neih chuan, natna i nei a – na eng emaw i neih chuan a rang thei ang bera chhuah i duh ṭhin. Chutiang hunah chuan kawng awlsam zawh a chakawm viau zel.
Mahse kawng awlsam zawh mai lovin Pathian ruahmanna mumal tak chu thlir ang che. Chu ruahmanna chu zawh tum la, tichuan i thil tum tihlawhtling turin theih tawp chhuah ang che.
Kum khat chhung chutianga leiba tlak tuma i beih fan fan chuan eng chen nge i thlen ang tih han ngaihtuah chhin teh. Chu kawng chu nitin zawh turin inbuatsaih la, Pathian finna leh zahngaihna hmachhuanin kawng harsa chu zawh ang che.
Ngaihtuah zui atan.
Eng vangin nge mi tam takte chuan an sum hman danah bithliah an insiam duh loh?
Tunah khan leiba i lo nei lo a nih pawhin i nei lo reng dawn tihna a ni thei ang em?
Kum khat chhungin eng ang dinhmunah nge sum thuhlaah chuan i awm i rin. Nitin chu thil tihlawhtling tur chuan eng nge i tih ang?
[ *Lettu* : Peka]

No comments:
Post a Comment