_Tumruhna Danglam_
- Rick Warren
- July 30, 2025
"A kim lovin kan hria a, a kim lovin thu kan hril bawk ṭhin a ni...Tunah zawng darthlalangah kan hmu riai ruai a ni, chutih hunah erawh chuan inhmatawnin a ni tawh ang. Tunah zawng a kim lovin kan hria a, chutih hunah erawh chuan mi hriat kim ṭhin ang hian ka hre kim tawh ang," I Korinth 13:9,12.
A natna leh beidawnna karah Joba chuan he thu hi a zawt a, "Engati nge hrehawm tuarten hrehawm an hmuh renga, mi lungngaite an dam reng le?" tiin.
He thu "eng vangin nge" tih hi mihring dan a ni a, kan vaiin kan zawt ṭhin. Ngaihdan dik lo deuh kan neih chu kan nat chhan kan hriat chuan, nâ chu a dam leh mai ang tih hi a ni.
Hei hi thudik chu a ni: Hrilhfiahna i mamawh lova, chakna i mamawh zawk a ni. Hrilhfiahna i mamawh lova, chhandamtu i mamawh zawk. Hrilhfiahna i mamawh lova, hnem leh thlawp i mamawh zawk a ni.
Mahse hrilhfiahna kan duh ṭhin a. Thil chi hrang hrang kan zawt bawk ṭhin. Khami kha eng vangin nge ka lak aṭanga a inlâk hran daih? Eng vangin nge thu min tiama a bawhchhiat leh si? Eng vangin nge min tihnat? Eng vangin nge kha nu kha a thih? Eng vangin nge ka dam loh?
Ṭhiante u, "Eng vangin nge" tih thu hi kum eng emaw zat chu ka lo zir ve tawh a, hei hi ka zir chhuah chu a ni: Ka hre lo. Engtikah mah ka hre ngai lovang, a chhan chu Pathian ka nih loh vang a ni. Nang pawh i ni chuang lo! Vanram kan thlen hma chuan engmah hi kan hrethiam tak tak ngai lovang.
Pathian chauhin "eng vangin nge" tih i zawhna hi a hria a. A chang chuan a chhang nghal mai lo ṭhin. Thil zawh hi a ṭha e - mahse chhânna nghahhlelh lutuk hian nâ a ti rei mai mai zawk ṭhin a ni.
Thufingte 25:2 chuan, "Thil inthup hi Pathian ropuin a ni," a ti. Pathian chu inpuang chhuak ṭhin Pathian a ni a. Thil siam hmang te, thil awm dang aṭangte leh Bible hmang tein a inpuang chhuak ṭhin. Pathian chungchang i hriat theihna chhan chu inpuanchhuah a thlan vang a ni.
Mahse Bible chuan Pathian chu a inpuang chhuak ringawt lova, a inthup bawk ṭhin a ti. A chang chuan Pathian hian chhan neiin a hmai a huhsan ṭhin ang che. Eng vangin? Amah rin i zira, rinna a i nun theih nan a ni.
Pathian hian i lak aṭanga thil engkim hrilhfiah hi a ba lova. Thil a tih dawn apianga hrilh kher che hi a ngai hran lo. Nuna thil a thlentir dawn hian i phalna a lak hmasak kher a ngai hek lo. Pathian chu Pathian a ni a, thil lo thlen chhan hi engtikah mah i hrethiam pha ngai dawn lo a ni.
Bible chuan, "A kim lovin kan hria a, a kim lovin thu kan hril bawk thin a ni...Tunah zawng darthlalangah kan hmu riai ruai a ni, chutih hunah erawh chuan inhmatawnin a ni tawh ang. Tunah zawng a kim lovin kan hria a, chutih hunah erawh chuan mi hriat kim ṭhin ang hian ka hre kim tawh ang," I Korinth 13:9,12 a ti.
Engtikah emaw chuan, engkim hi a chiang vek tawh ang a, awmzia a nei tawh ang. Chutih hunah chuan, "Hei vang hi a nih hi Pathianin ka chunga thlentir a phal," i la ti ang. Chumi hun a thlen hma chuan Pathianin amah ring tlat turin a duh che a ni.
Ngaihtuah zui atan.
Eng zawhnate nge, "Vanram ka thlen huna ka zawh turte," tih file a i dah ang?
"Eng vangin nge" tih zawhna i liamtir hian engtin nge i rinna a tihpun?
Mi ṭhenkhat an chunga thil thleng hrethiam lova Pathian hnena thil tam tak zawt ṭhinte chu engtin nge i fuih ang?
[ *Lettu: Marova Punte* ]