Monday, October 31, 2022

THIHNA I HLAUH HUNIN

 _Danglam duhna: Thlarau zungkaihna hmasawntir_ 

- Rick Warren 

- October 31, 2022 


_"Hmangaihnaah chuan hlauhna reng a awm lo: hmangaihna famkimin hlauhna a hnawt chhuak zawk ṭhin a ni."_ (1 Johana 4:28) 

Pathian hi zalenna danglam ngainatu a ni. _"Bawih ni lo turin Krista chuan min chhuahtir kha, chutichuan ding nghet ula, bawih nghawngkawlah chuan tang leh tawh suh u."_ (Galatia 5:2) 

Pathian aṭanga zalenna i neih khan engnge a pek che? Ni liam  taah khan chhia leh ṭha hriatna min pek thu te, ding taka Pathian kan hmuh theihna a nih thute leh thil ṭha ti tura thiltihtheihna min petu a nih thute an zir tawh a. Thih hlauhna lak aṭangin zalenna a pe bawk che a ni. 

Thihna hi mi zawng zawng hlauh, mahse mi tlemte chauhvin hmachhawn an huam a ni. Thi thei lo ang maia nun han hman vel a chakawm viau mai thei. Mahse, mi â chauhvin he kan pumpelh theih loh thil hi inbuatsaih lovin a hmachhawn ang. 

Hei hi chanchinṭha chu a ni : Thih hlauhna lak aṭanga i zalen theih nan Lal Isua a lokal hi. 

Hebrai 2:14-16 ah chuan, _"Mihring ang anih chauhin a thi thei a, tin, thihna hmang chuan thihna neitu sual thiltihtheihna chu a hneh ta a. Chutiang chauh chuan thih hlauhna avanga sal ang maia nungte chu a chhanchhuak thei a ni"_ (TLB) 

Dik takin ka hrilh ang che u, thih hlauhna lak aṭang hian ka zalen a ni. Engvangin? A chhan chu Pathian ka hria a, Amah chu ka hlau lo a ni. Kum 60 aia tam mah amah nen ṭhian kan lo ni tawh. Pathian hlautute chauh chu Amah hre lotute an ni. Amah i hriatchian zual leh i hlauhna a nep ang, Pathian chu hmangaihna a ni si a. 

_"Hmangaihnaah chuan hlauhna reng a awm lo: hmangaihna famkimin hlauhna a hnawt chhuak zawk ṭhin a ni."_ (1 Johana 4:28) 

Tiamkam engmah nei lova hmangaihtu che chu engtinnge i hlauh theih ang? Nangin i ngaihtuah aia nasa daiha ngaihtuahtu che chu engtinnge i hlauh theih ang? I chanchin chipchiar zawng zawng lamin Pathianin a hre vek. I lua sam ṭo zat pawh a hre vek! Chuvang chuan engahnge chatuana a hnena chên i duh loh ang? 

I thih huna Pathian i hriat chuan i in i chhuahsan a ni lo- i haw a ni zawk! Chatuan atana i awmna turah i kal dawn a ni a, _"Khawvel siam ṭantirh ata in tana ram buatsaih . . ."_ ah chuan (Mat. 25:34) 

Lalpa chu fakin awm rawh se, zalen takin i nung thei si a! Inthiam lohna nei lovin i awm thei anga, thil ṭha ti tura zalenna neiin, thihna hlauh a ṭulna a awm lo tih hriain- a chhan chu Isua ta i nih avangin. 

Ngaihtuah zui atan. 

Engtinnge kan zirlai hian thihna thlir dan thar a pek che? 

Eng kawngah te nge he leiah hian engkim a awm vek ti ni awm taka i nun ṭhin? 

Pumpelh theih loh thihna hmachhawn turin vawiin hian eng kawngin nge i inbuatsaih theih le? 

*Thihna hlauhna ata zalenna* 

Mi tam tak chuan thihna hi an hlau ṭhin - mahse chu hlauhna ata chu Pathianin a zalentir thei che. 

Chu zalenna chu i duh a, i thih huna vairam kai ngei i duh bawk chuan heti hian i ṭawngṭai thei ang, "Lalpa, ka thih hunah i hmaah ka chanchin ka sawi dawn tih ka hria e. Ka phatsan ṭhin che tih ka hria a. I chungah thil ka tisual tih ka hria a, i duhdan ni lovin ka duhdanin ka nung tih ka hria e. Chu chu vawiin hian thlak ka duh a ni. Sual kawng zawh tawh lova i hnung zui ka duh e. 

"Ka tan thi tura Isua i lo tirh avang leh chumi zara chatuan nunnq ka neih theih avangin ka lawm e. Min ngaihdam ka phu lo tih chu mahila, i khawngaihna chauhin min chhandam thei tih ka hria e. 

"Isu, min hmangaih nasat em avanga ka sual zawng zawng i phurh avangin ka lawm e. Ka sual te leh rorekna lak ata min chhanchhuak turin ka ngen a che. Ka ring che a, nangmah avangin thihna ka hlau tawh lo ve. Chatuan atan vanrama min hruai turin i thutiam i hlen ang tih ka ring. Isua hmingin, Amen. 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia, 

[Lettu: Mapuia Fanai]

Sunday, October 30, 2022

KAWNG DIK THLANG TURA ZALENNA

 Danglam duhna: Thlarau zungkaihna hmasawntir 

- Rick Warren 

- October 30, 2022 


"Heng hi hria ila: kan mihring hlui chu a hnenah khenbehin a awm ve ta, sual pu taksa chu tihborala a awm theih nan, tun achinah sual bawiha kan awm lohna turin. Tupawh thi tawh chu sual lakah a chhuak tawh si a." (Rom 6:6-7) 

Amaha rinna nghat apiangte hnenah Pathianin zalenna ropui tak pali a pe. A hmasa pahnihte chu kan zir tawh a: chhia leh ṭha hriatna thiang tak leh mimala Pathian pawhna nun. Zalenna pathumna chu thil dik ti tura chakna hi a ni. 

Mi tam tak chuan zalenna kan tih hian dan awm lo, chin tawk awm lo leh inkhuahkhirhna awm lo emaw an ti ṭhin, mahse chu chu zalenna thlir dan zim tak a ni. Chutiang ni lovin zalenna chu Pathianin i tana ṭha tur thilte chunga "Awle" i tih ngamna tur leh i tana ṭha lo tur thilte chunga "Aih" ti ngam tura chakna a pek che kha a ni. 

"Aih" ti tura chakna i neih loh chuan a sawifiahna ṭawngkam a awm: ngawlveina. Chu chuan rilrua vei ngut ngutna leh tur luihna a thlen ṭhin. Bible chuan heti hian min zirtir, "Mi ngamtu apiangin chu mi ngei chuan bawihah a siam ṭhin a ni." (2 Pet. 2:19) 

Nu leh pain an fanu leh fapa hnena an "vanram" zawng tura an fuih thu ka chhiar fuh nawlh tawh. An ni chuan ri kham chin a nei lova, ruihtheihthil leh mipat-hmeichhiatna pawh hman an phalsak. Kum 25 bawr vel an nih chuan an nunna chu thunun zawh rual a ni tawh lo. 

A mipa zawk chu a harhchhuak thuai a, "Ka zalenna hi zalenna a ni hauh lo mai. Pawn lama a lan danah chuan hlim taka nun chên angin ka lang a. Mahse chhungrilah chuan hlauhna, him lo nia inngaihna leh tihluihnaten min phuar vel tlat. Mahni lak ata min hruai chhuaktu tur ka mamawh ta hle mai. 

Chu chu mi zawng zawng mamawh a ni: keimahni nun saltanna ata min hruai chhuak turin. 

"Engvangin nge ka hmangaih berte chungah ka thinrim thut? Engatinge englai pawhin chiaina leh hlauhna ka neih? Engtinnge ka tihtawp ang? Hengte hi i nuna i thlak danglam duh, mahse i theih si loh kha a ni mai. Heng ti tura chakna chu Pathian hnen aṭang chauhin a lokal ang. 

Rom 7:24-25 ah chuan Paulan heti hian a sawi, _"Mi rethei ka va ni tehlul em! He thihna taksa lakah hian tuin nge mi chhan chhuak ang? Isua Krista kan Lalpa avangin Pathian hnenah lawmthu ka sawi a ni." 

Engvangin nge Isua hi a chhanna a nih? Isuan heti hian min tiam, "Chutichuan Fapain bawih a ban che u chuan in chhuak tak meuh ang." (Johana 8:36) 

Zalenna hi chintawk awm lo tihna ngawt a ni lo. Zalenna hriatthiam dan tharah chuan kan hriselna tana ṭha turah te, hlimna tipung theite leh kan nunna pawimawhnaa khat tur atana "Aw" tih ngam hi a ni. Zalenna hriatthiam dan tharah chuan thil dik ti tura huaisenna a keng tel. 

Ngaihtuah zui atan. 

2 Petera 2:18, "Mi ngamtu apiangin chu mi ngei chuan bawihah a siam ṭhin a ni."(2 Pet. 2:19). Engvangin nge Pathianin sual a huat em em ni a i hriat? 

Mahni theihna hmachhuana nun thlak danglam i tum hun kha  han ngaihtuah teh. Engtinnge hna a thawh? 

Kan zirlai aṭang hian, ruihhlo ngawlvei, ruihhlo thlah duh tlat lote hi engtinnge i kawm ang,? 

*Vawiin hian i tan Pathian hnen ata zalenna kha a awm e* 

Isua ringtute tan chuan thiam loh chan a awm tawh lovang tiin Pathianin min tiam a. Kan sual tlan nan Isua a lo tir a. Krawsa Isua thawhna chuan kan sual man zawng zawng a le tlak vek a ni. 

Chanchinṭha chu hetah hian a la tawp mai lo. Sualna leh thihna chunga a thuneihna lantir nan Pathianin Isua chu thihna a kai tho leh a. Chu chuan chatuana a hnena cheng turin a pui ta che a ni. 

Isua Krista hnena i nun hlan tura i inpeih chuan he ṭawngṭaina tawi hmang hian bul ṭan teh le: "Lalpa, misual ka ni tih ka hria a, i ngaihdamna ka rawn dil e. Isua Krista hi i Fapa a ni tih ka hria. Ka sual tana thiin thihna ata i kai tho leh tih ka ring e. Vawiin aṭang hian a chhandamtuah pawmin a hnung zui ka duh e. Isu min hruai la i duh dan anga nung turin min pui ang che. Isua hming, Amen." 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia, 

[Lettu: Mapuia Fanai]

Saturday, October 29, 2022

PATHIAN BIAK THEIHNA ZALENNA

 _Danglam duhna: Thlarau zungkaihna hmasawntir_

- Rick Warren

October 29, 2022

"Chu Krista Isua kan rin avang chuan amah vekah chuan nelna leh ngam taka luh theihna kan nei." Ephesi 3:12

Isua chhandamtu a pawma rinna i nghah khan, zalenna ropui tak tak pali a pe che a. Pakhatna chu chhia leh tha hriatna thiang a ni a. I sualna silfaiin, i thiamlohna zawng zawng a la bo a ni.

Pahnihna chu, Pathian mimal taka pan theihna i nei a. A fa i ni a, a chhungkaw zinga mi i ni a, engtik lai pawhin - nitin, darkar tin, chawlhkar tinin Pathian i be thei a ni.

Khawvel pum hian tlang taka Pathian hnen thlen theihna an nei tih thurin hi dawt a ni a. A dik lo a ni. Pathian tlang taka thlen theihna Pathianin min pek awmchhun chu a fapa Isua Krista kaltlang chauhin a ni.

Bible chuan, "Krista Isua kan rin avang chuan amah vekah chuan nelna leh ngam taka luh theihna kan nei" (Ephesi 3:12) a ti a. 

Concert-ah englai pawh luh tlang phalna ticket min pek tum a awm nual tawh a. Dawhsan hnunglamah pawh lut theiin, tupawh ka kawm thiang a. Tumahin an dang thei lo a ni.

Chutiang zalenna chu Pathian chhungkua i nih khan i nei a. Pathian chuan a hnena luh tlang vek theihna ticket chu a pe che a. Sawmna hran emaw, a bika tunge i nih puanzar pawh a ngai chuang lo. Ngaihdan ropui tak pawh i neih a tul chuang lo. A chhan chu, a fa i ni a, tlang takin a hnen i kal thei a ni, nitin mai hian.

Mite hian a chang chuan, "Ricka, min tawngtaisak rawh" an ti thin a, an tawngtaina aia ka tawngtaina tha zawk ang mai hian. Mahse a ni miah lo. Ka neih angin Pathian pawh theihna an nei ve thova. Engtik lai pawhin, eng vang pawhin Pathian chu an be ve thei reng a ni.

Tawngkam mawi tak hman emaw, maimit chhin emaw, 'Isua hmingin' tih kher pawh a tul hran lo. Nileng mai khan tawngtaina inchhunzawm kha nei mai la, i tawpsannaah khan chhunzawm leh thin la. Pathian nen chutiang chuan ka ti fo a ni.

"Chutichuan, zahngaihna kan hmuh theihna tur leh, puih kan ngaih huna tanpuina khawngaihna kan hmuh theihna turin, khawngaihna lalthutphah chu huai takin i hnaih ang u" (Hebrai 4:16) tih nun neih hi zalenna famkim a va ni tehlul em!

Pathian chhungkuaah i tel chuan, chhia leh tha hriatna thiang neihna leh amah biakpawh theihna i lo nei ta a. Naktukah zalenna pathumna: thil dik tih theihna tura zalenna kan en leh dawn a ni.

Ngaihtuah zui atan...

Englai pawha Pathian tlang taka pan theihna hi mitin tan eng nge a pawimawhna?

Tawngtaina hmanga mahnia Pathian i biak theihna kha eng thilin nge laksak thei che?

I tawngtaina chu engin nge ti harsa? Eng dinhmunah pawh Pathian  biak pawh lama harsatna neia i inhriatnate engte nge?

(Lettu: Msa)

Friday, October 28, 2022

ZALEN NIH AWMZIA

 Danglam Duhna: Thlarau Zungkaihna Hmasawntir 

By Rick Warren

— October 28, 2022 

“Chutichuan, Fapain a zalêntîr che u chuan in zalên tak tak tawh ang.” [Johana 8:36] 

Mi ṭhenkhatten, zalenna chungchang an ngaihtuah chang chuan sakhuana leh ram rorelna huanga zalenna an mitthla ber a. Mahse, chutiang zalenna aia ril daih zawk chu a awm a: chu chu thlarauva zalenna a ni. 

Mi tam berte chuan thlarauva zalenna nun chu an nei lo. An chhungrilah phuar an ni a. Rilru hahna, buaina, ipikna, ninna, khakna. Inthiamlohna, inchhirna, hlauh leh enghelh an nei. Ram zalen takah khawsa mahse, thlarauvah chuan an zalen lo a ni. 

Isua chuan Johana 8: 36-ah chuan hetiang hian a sawi “Chutichuan, Fapain a zalêntîr che u chuan in zalên tak tak tawh ang,” tiin. He thuah hian Isua chuan ama chungchang a sawi a ni. “Ka chhuah zalen che u a nih chuan, in zalen takzet ang” tiin a sawi. 

Hei hi zalenna tak tak ka tih chu a ni. Tun aṭanga ni rei lote chhung chu Isua lal leh chhandamtua i pawm tak hnua zalenna ropui tak tak pali i lo chan takte chu kan en ho dawn a ni. 

Ringtu nuna zalenna ropui tak hmasa ber chu, chhia leh ṭha hriatna thiang tak i neih chu a ni. Chu chu Pathianin i sualte a ngaihdam a, i tihsual zawng zawng a thai bo khan i chang a ni. A nawhrehna lianpui chu la chhuakin i tihsual zawng zawng leh i la tihsual zawng zawngte chu a nawtreh ta a. 

Tum khat chu lirthei tui thunna hmuna an thuziak tar “Khawl fai chu a chak zual sawt” tih hi ka chhiar a. Chu chu chhia leh ṭha hriatna chungchangah pawh a dik ang. Mahni inthiamlohna chu kan tana thil ṭha lo ber pakhat a ni. A delh che ang a, chu chuan a tihniam ang che. Mi tam tak chau taka an tluk chhan chu an koah chuan mahni inthiamlohna ip chu rit ti em ema an phurh ṭhin vang a ni tlat. 

Mahse, Bible chuan hetiang hian a sawi, “Amahah chuan kan tlanna kan hmu a ni - kan sualte ngaihdamna chu.” [Kolossa 1: 14]. Isua chuan i zalenna chu ama thisen ngeiin a lei tawh a. A thihna chu i lo sakhaw-mi theihna tur a ni mai lova, i lo zalenna tur a ni. 

Krista Ringtu mahni inthiamlohna nena nung tur a ni em? Aw – mahse rei lote chhung atan chauh a ni. A awmzia chu, thil eng emaw i tihsual chang chuan ngaihdam dil la, in pawm mai la, tichuan mahni inthiam lohna nei lovin i nung zui ang. 

Chu inthiam lohna chu i vuan tlat a nih chuan, Isua zawk chu i tithangtlawm a ni. “Isu, krawsa i hnathawh zawh kha ka tan chuan a la tawk lo. Keimah leh keimahni intihnat ka ngai a ni” i tihna a ni. 

Tuktin “Chung thilte avang chuan ka intihlungngaih a ṭul tawh love. Engtik tlak a ni tawh. Min pek tlak sak tawh” tiin sawi ang che. Isua chuan chu chu a theih dan a siam a ni! 

I nun tana Pathian ruahmanna chu inthiamlohna phurrit phurh chu a ni tawh lo. Zalen turin a duh che. 

Zalenna tak tak chu chhia leh ṭha hriatna thiang tak a ni a. I famkim tihna a ni lova. Mahse ngaihdam i ni tihna a ni. Chu chu chanchin ṭha a ni! 

Ngaihtuah zui atan. 

Eng vangin nge thlarauva zalenna chu zalenna thuk ber a nih? 

Engtin nge mahni inthiam lo reng renga hun hman chu Isua hnenah krawsa a thihna chu i tan a la tawk lo tihna ang mai a nih chhan? 

Heng thutak ngaihtuah chung hian, vawiin hian engtin nge hmalam i pan ang a, zalenna lam chu zawhin mahni inthiamlohna chu i kalsan theih ang? 

[ *Lettu* : Peka]

Thursday, October 27, 2022

MIDANG TAN MALSAWMNA I NIH THEIH NAN. PATHIANIN MALSAWMNA A VUR CHE

 _Danglam Duhna: Thlarau Zungkaihna Hmasawntir_ 

By Rick Warren

— October 27, 2022 

“Ringtu zawng zawngte chu an awm khâwmna inah an awm ho ṭhîn a, engkim an inṭâwm vek a.  A neite chuan an in leh lo te leh an thil neih te an hralh a, an châkkhai daih tâwk ṭheuhvin an zaa hnênah chuan an sem ṭhîn.” [Tirhkohte 2:44-45] 

Kohhran ṭiaktir ang khan vawiin ringtute chu an tuar tawh lo. Bible chuan Tirhkohte 2: 44-45 ah chuan, “Ringtu zawng zawngte chu an awm khâwmna inah an awm ho ṭhîn a, engkim an inṭâwm vek a.  A neite chuan an in leh lo te leh an thil neih te an hralh a, an châkkhai daih tâwk ṭheuhvin an zaa hnênah chuan an sem ṭhîn” tiin a sawi. Ringtu hmasate khan an sum leh pai ringawt an pe lo. An thil neih ang ang kha ui an nei lo zawk a ni. Engkim an phal hial a ni. 

Pathian chuan eng thil mah i nawmchenna turin a pe ngai lo che a, i venga mite tana thil ṭha ti turin a duh che a ni. Pathian chuan ṭhu thluang a, a malsawmna chu dawng mai turin a ti lo che. Mite mal i sawmsak theihnan malsawmnain a vur che a ni zawk. 

Pathian duh dana a malsawmna te i hman theih nan heng thil palite hi i hriat a ngai. 

*Malsawmna i dawn chu midangte hnenah a luangchhuak tur a ni.* 

“Mahni ṭhatna tûr chauh zawng lovin, mi dang ṭhatna tûr pawh zawng rawh u” [Philipi 2: 4]. Hei hi malsawmna dawhthleng hmasa ber a ni. A luangchhuak tur a ni.  

Engtin nge midangte mal i sawmsak ang? An mamawhna phuhruksakin, rilru lam mamawhna a ni thei a, tisa thil mamawhna a ni thei bawk ang a, sum leh pai pawh a ni thei a, thurawn pawh a ni zawk thei. 

*Midang tana malsawmna i nih chuan Pathianin i mamawhte a ngaihtuahsak che.* 

Luka 18: 29-30 ah chuan hetiang hian kan hmu, “Thu dik ka hrilh a che u, Pathian ram avânga in emaw, nupui emaw, unaute emaw, nu leh pa emaw, fate emaw kalsan tawh phawt chuan tûnah ngei pawh hian, a aia tam daih an hmu ngei ang, hun lo la thleng tûra chatuan nunna nên,” tiin. 

Midang tanpuina lam i hawi chuan Pathian chuan i buaina chu a lo buaipui ve thung ṭhin. Chu chu malsawmna tak tak chu a ni a, a chhan chu i buaina hmachhawn turin nangmah ai chuan Pathian chu a ṭha zawk fe a ni. 

*Midangte i malsawmna chu nangmahah a lo let leh ang.* 

Midangte malsawmna i vur nasat poh leh Pathianin a vur let ve zel ang che. Luka 6: 38 chuan hetiang hian a sawi, “Pe rawh u; tichuan, pêk in ni ang; ṭhahnemngai taka teh chhuaka, beng mukin, sâwi liam zawih zawih khawpin in ângchhûngah pêk in ni ang. Tehna in hman ngei khân tehsak in ni ang,” tiin. 

Pathian chu thilpekah i hneh ban thei lo vang. A chang chuan Pathian chuan hetiang deuh hian a sawiin ka ngaihtuah ṭhin: “I han inel hlek teh ang. Tuin nge pe tam thei zawk en ang aw. Mahse, a tawpah chuan ka chak zawk ngei ngei ang! A chhan chu midangte malsawmna i vur tam poh leh kei pawhin ka vur let tam ve ang che,” tiin. 

*Pathianin malsawmna a vur tam poh che leh, midangte tana luangchhuak ve zel turin a duh che.* 

Isuan Luka 12: 48-ah chuan hetiang hian a sawi: “Amaherawhchu, hriat loh avânga hremna khawp thil ti chu nêp deuhva vuak an ni ang. Tam tak an pêk apiangte lakah chuan tam tak an phût ang, tam tak an kawltîr apiangte lakah tam tak an beisei ang,” tiin. 

Midang tana malsawmna ni tura malsawmna vur i ni. Chu chu beiseina nung, thutak thlamuanpuiawm tak chu a ni. He khawvel mahni thatna chauh ngaihtuahna khawvelah hian, Pathianin i chenpui tura a pekte kiangah khan ui nei lovin lo khawsa ve ang che. 

Ngaihtuah zui atan. 

Thil phal taka i nun i hman chuan engtia nasain nge i nun chu a danglam ang? Chu chu engtiang angin nge a lan chhuah ang? 

Thil phal taka i luanchhuah chang chuan engtin nge Pathian chuan i mamawhte a phuhruksak ve ṭhin che? 

Tichuan, tunah chuan Pathianin mal a sawm chhan che chu midang tana i luanchhuah theihna tur tih i lo hre ta a, a tak taka thilphalna kawngah chuan i chet chhuah theihna rahbi pakhat chu ni ang? 

[ *Lettu* : Peka]

Wednesday, October 26, 2022

ISUA I AN DEUH DEUH HUN CHUAN

 Danglam duhna: Thlarau zungkaihna hmasawntir

— Rick Warren 

— October 26, 2022


“Chutichuan, a fa duh takte angin Pathian awm dan latute ni rawh u. Tin, Kristan a hmangaih che u a, rimtui atan Pathian hnena thilhlanah leh inthawinaa kan aia a inpek ang bawk khan hmangaihnaah awm rawh u.” Ephesi 5:1-2.

I nun kawng engkimah thilphal taka i hun i hman chuan danglamna nun i nei ang. Sum leh pai ngah tumna i kalsan anga, i rilru a hlim zual ang.

Chu aia ropui zawk a lo thleng ang: Isua i ang zual ang.

Isua an chu engtin nge? A nungchang pakhatah chuan mi thilphal, inren lo leh mi dangte tana insengso duh a ni. I neih engkim hi — boruak leh tui, i thluak leh i lungphu chenin - Pathian thilphalna avanga i neih an ni. Dik tak chuan, Pathian hi thilphal viau lo se, engmah i nei lo vang.

Isua hi thilphalna kawngah chuan kan pu kan entawn ber a ni. Bible chuan, “Kan Lalpa Isua Krista khawngaihna chu, a retheihna avanga in lo hausak theihna turin hausa mah sela nangmahni avang ngeiin a lo retheih tak kha in hre si a” (2 Korinth 8:9).

He lai thu hi eng nge awmzia ni le? Isua Krista chu Pathian a ni a. Van ropuina zawng zawng a nei a, chung chu kalsanin he Leiah ranina lo piang turin a lo kal a ni. Chu chu mi a tlawm theih dan hniam tak a ni. Eng vangin nge chu chu a tih? Ama tana ti a ni lo tlat.

Isuan i tan a ti a ni.

Chu chu inphalna sang ber a ni: “Pathianin khawvel a hmangaih em em a, chutichuan, a Fapa mal neihchhun a pe a” (Johana 3:16).

A nih chuan eng vangin nge inphal taka nung turin Pathianin a duh che? A chhan chu amah ang turin a duh che a, chumi awmzia chu inphal ve turin a duh che a ni!

Kan Bible chuan, “a fa duh takte angin Pathian awm dan latute ni rawh u. Tin, Kristan a hmangaih che u a, rimtui atan Pathian hnena thilhlanah leh inthawinaa kan aia a inpek ang bawk khan hmangaihnaah awm rawh u” a ti. (Ephesi 5:1-2).

He Leiah hian Pathianin nangma tana nung turin a dah lo che a. Chu ai chuan, mahni hmasial lo tur leh midangte tana nung turin a dah che a ni. Amah ang turin a duh che a ni.

Isua inphalna chu vawiinah hian engtin nge i entawn ang? Engtik hunah pawh i hun, sum, theihna emaw hmangaihnaa i inphal chuan amah chu i ang zual zel a ni ang.

Ngaihtuah zui atan

* Engtik lai khan nge i thil phalna avangin bungrua leh thildang neih tamah i insumkar tak?

* Tuna i nun hian Isua inphalna chu engti zawngin nge nghawng a neih?

* Isua inphalna chu engtin nge kawng khat talin tun kar chhung hian i entawn theih ang?

*[Lettu: Sangpuia]*

Tuesday, October 25, 2022

HLIMNA HI THILPHALNA AṬANGIN A LO THLENG

 Danglam duhna: Thlarau zungkaihna hmasawntir

— Rick Warren 

— October 25, 2022


“Englo lak aiin pekin hlimna a thlen tam zawk” Tirhkohte 20:35 (GNT)

Thilphal zirna ṭha ber chu midang hnen aṭanga zir hi a ni.

Ka nu leh pa hnen aṭangin thilphal dan ka zir ve a. Thil tam tak an pe chhuak lai ka hmu a, ka ṭhan hnan ve a ni. Hawihhawmna te, sum leh pai leh chaw te an pechhuak ṭhin a ni. Hun te, tha leh theihna te an pe chhuak fo mai. A thlawnin an neih ang ang an pechhuak ṭhin a. Ka hriatah chuan mi hlim thei tak an ni.

Bible pawhin mi thilphal entawn tlak tak a sawi a: Makedonia kohhran te kha a ni. Hetiang hian Paulan an chungchang a sawi a ni: "Unaute u, Makedonia rama kohhranho pawlte zinga Pathian khawngaihna pek chu kan hriattir dawn a che u; khatia hrehawma fiahna nasa tak chunga an hlimna liam leh nasa taka an retheihna chu a liam a, an thilphalna nasa taka a chan takzia kha.” (2 Korinth 8:1-2).

Makedonia kohhran khan harsatna chinfel ngai an nei ngei mai. “Hrehawma fiahna nasa tak” an paltlang a, a chhan chu Roman Empire hnuaia an awm lai, Nero-a chu emperor a nih lai a ni. Kristiante chu thi tura an chungchang rel theih lai a ni. Makedonia kohhrante hi an rinna avang chauha tihduhdah an ni lo va, an rethei zual em em a, sum leh paia puih ngai hial an ni zawk.

Mahse  “an hlimna chu a nasat em avangin,” an retheihna leh harsatna chuan thilpek a ṭhulhtir thei chuang lo a ni. An tih tur leh mawhphurhna nia an hriat avanga thil pe an ni lo va. An lawm em avanga pe an ni zawk. 

Bible chuan, “Englo lak aiin pekin hlimna a thlen tam zawk” a ti. Tirhkohte 20:35 (GNT)

Naupang ka nih lai chuan, he chang hi ka awih lo va. Ka la puitlin loh em avangin, pek ai chuan lak hi a hlimawm zawkah ka ngai a ni. Krismas a lo thlen pawhin ti hian ka ngaihtuah: “Eng nge ka dawn ang?”  

Mahse ka nu leh pa ten thilphal hlutzia min zirtir angin, thil pek chhuah avanga hlimna hlutzia ka tem ve ṭan a. Zawi zawiin ka lo puitling a, lak aia pek hlimawmzia ka hrethiam pha ve ṭan a ni.

Nawrna avang emaw tihluihna avang emaw a thil pe i nih chuan mi khawngaihthlak tak i ni. Chu ai chuan: Lawmna aṭangin pe la, Pathianin i mamawh a piang chu a pe zel che tih hre chungin pe rawh. Chung zawng ai chuan, thilpek zawnga thilpek ropui ber, chhandamna thilpek chu Fapa Isua Krista kaltlangin a lo pe tawh che a ni.

Ngaihtuah zui atan

* Thilpek kawngah tunge i entawn? Chu chuan thil phal turin i nunah eng thu nge an sawi?

* Thil petu te hi khawvela mi hlim thei ber te an ni. Mi rel hmangte hi mi hlim lo berte an ni. Mi chi hrang hrangte entirna han pe teh le.

* Tunkar chhung hian i hlimna aṭangin eng nge i pekchhuah ang le?

*[Lettu: Sangpuia]*

Monday, October 24, 2022

THIL PHALNA HI A TAM LAMAH NI LOVIN RILRU PUTHMANG ZAWKAH TEH A NI

 Danglam duhna: Thlarau zungkaihna hmasawntir 

- Rick Warren 

- October 24, 2022 


"Pek duhna i neih phawt chuan pek tur engzata tam nge i neih tih kha a pawimawh ber lo. I neih loh thil ni lovin i neih ang ang kha a ni Pathianin pe tura a duh che ni." (1 Kor. 8:12, TLB) 


Thil phalna kan tih hi pawisa inpek aia thuk daih mai a ni a. Nunkawng tinrenga thil phal taka khawsak hi a ni. 


Bible chuan heti hian a sawi, "Hun lo thleng ang zela in thilphal theih nan kawng tinrengah malsawm in ni ang" (2 Kor. 9:11, NIV). 


"Hun lo thleng ang zela thil phal" tih hi engnge a awmzia? A awmzia chu i hun te, chawimawina te, khawngaih theihna te, ngaihdamna te, hmangaihna te, fakna te leh zaidamna te phal taka i pek kha a ni. Midangte i hriatthiam theih nana inphal taka midangte i ngaihthlak hi a ni bawk a. Tin, an mamawh i hriat theih nana midangte i ngaihsakna te hi a ni bawk. 


Mahse engzata tam nge i pek tih hi Pathianin a ngaih pawimawh ber a ni lo. Engvanga pe nge i ni tih leh engtinnge i pek tih hi a ngai pawimawh. I pekna thinlung kha a ngai pawimawh a. Chu chu thilphal satliah leh danglam duhna rilru pu chunga thilphal inan lohna chu a ni. 


Danglam duhna rilru pu chunga thilphal hi chu a tam leh tlem lam ni lovin thinlung lam zawk a ni. 


Bible chuan heti hian a sawi, "Pek duhna i neih phawt chuan pek tur engzata tam nge i neih tih kha a pawimawh ber lo. I neih loh thil ni lovin i neih ang ang kha a ni Pathianin pe tura a duh che ni." (1 Kor. 8:12, TLB) 


Pathianin i pawisa, thiamthil leh hun te kha a mamawh hauh lo. A nihna takah chuan i lak aṭangin engmah a mamawh lo. Mahse i lak aṭanga a duh chu i thinlung kha a ni. I hmangaihna kha a duh chu a ni. Bible chuan heti hian a sawi, "I ro awmna apiangah i rilru pawh a awm ang" (Mat. 6:21). Krista hnena i nun i hlan khan i thinlung kha a hnenah a awm nghal ang. 


I thiltih leh i thilpek chu engpawh nise, i rilru puthmang kha a pawimawh chu a ni. Engvangin? A chhan chu Pathianin "Lalpa Isua hmingin ti vek rawh u" a ti a ni (Kol. 3:17). Rilru danglam pu chunga i thilphal a duh a ni. 


Tunkar chhoah hian rilru danglam pu chunga thilphalnain i nuna nghawng a neih theihte kan zirho dawn a ni. Nangmah leh i kianga mite nun a tidanglam ngei ang! 


Ngaihtuah zui atan. 


Engtinnge vawiin kan thuzir hian thilphal chungchang i hriatthiam dan a belhchhah? 


Thilphal dan kawng tam tak a awm- i hun, sum, thiamthil, leh a dangte. Eng ang chiahin nge thilphalna hian hlimna a pek che? Eng kawngahte  nge thilphal a harsa ni a i hriat? 


Pawisa pek piah lamah eng kawngah te nge tunkar hian thilphal i zir theih? 


[Lettu: Mapuia Fanai]

Sunday, October 23, 2022

HARSATNATE HIAN CHATUAN ATAN AN BUATSAIH CHE

 Danglam duhna: Thlarau zungkaihna hmasawntir 

- Rick Warren 

- October 23, 2022 


"Chu miah chuan nasa takin in hlim a ni, tunah (a ṭul chuan) thlemna tinreng avangin lungngai rih mah ula; in rinna fiahna, rangkachak meia fiah hnu pawha boral ṭhin aia hlu zawk chu, Isua Krista inlar hunah chuan fakna leh chawimawina leh ropuina tur a lo nih theih nan" (1 Petera 1:6-7) 


He leia dam khawchhuak tur chuan rilru dik put mai bakah mamawh dang i nei. Beiseina i mamawh. 


Petera lehkhathawn pakhatna bung khatnaah hian Isua Krista kaltlanga beiseina i neih theih chhan tur kawng nga min kawhhmuh. Ni liam taah te khan kawng 4 kan sawiho tawh a: 


° *I thlan hmain Pathianin a thlang che* 


° *Pathian chuan khawngaihna leh zahngaihna nen a enkawl ṭhin che* 


° *Pathian chuan i hmalam a vawnhimsak ang che* 


° *Pathian thiltihtheihna chuan a venghim ang che* 


A tawp ber atan chuan, *Pathianin chatuan atana a buatsaih che* avangin beiseina i nei thei ang. 


Pathianin i nuna i tawn apiang- a ṭha te, ṭha lo te, leh a duhawm lo te lamin- a hmang ṭangkai vek ṭhin. Hei hi hriatthiam hunah chuanni nunin awmzia a nei ṭan ang. "Lalpa, engatinge hei hi ka chungah a thlen?" tiin i zawt tawh lovang, a chhan i hre tawh tlat: Chatuan atana a buatsaih che avangin. 


Bible chuan heti hian a sawi, "Chu miah chuan nasa takin in hlim a ni, tunah (a ṭul chuan) thlemna tinreng avangin lungngai rih mah ula; in rinna fiahna, rangkachak meia fiah hnu pawha boral ṭhin aia hlu zawk chu, Isua Krista inlar hunah chuan fakna leh chawimawina leh ropuina tur a lo nih theih nan" (1 Petera 1:6-7) 


Helai chang hian harsatna chungchanga thil dik tak mai paruk a tarlang: 


*Harsatnate hi rei tak daih an ni lo.* Harsatnate hian chatuan an daih miah lo. 


*Harsatnate hi thil pawimawh tak an ni.* Harsatnate hi vanram lut tura buatsaihtu che pawimawh tak an ni. 


*Harsatnate hi chi hrang hrang an ni.* Harsatna inang lo tak tak, a thawh dan inang lo tak leh a luh thuk dan pawh inang lo tak tak i tawng ṭhin ang. 


*Harsatnaten i rinna an fiah ṭhin.* I tihrawl siam turin i thununin i sawizawi ṭhin. Chutiang chiah chuan i rinna fiah a nihin i rinna chu a ṭhang lian ṭhin. 


*Harsatnaten i rilru puthmang an thlifim ṭhin.* I nawmna aiin i nungchang Pathianin a chik zawk. I nungchang siamṭha turin harsatna a hmang fo ang. 


*I lawmman dawng turin harsatnain a buatsaih che.* He leia harsatna i tawhte hi vanrama i lawmman tur nen tehkhin rual an ni lo. 


Tuna harsatna i tawhte khan i nun an tihlim hauh lo. I tan natna thlentu an ni hial zawk ang . Mahse Bible chuan i rinna tichaktu an ni dawn tih chiang takin min hrilh. Tichuan i rinna chuan chhelna a pe ang che. 


Chuvang chuan tunah khan eng pawh tawk mahla beiseina i nei thei a ni. 


Ngaihtuah zui atan. 


Engtinnge i nunah Pathianin harsatnate i rinna tichaktu atan a hmang ni a i hriat? 


Engtinnge vawiin kan zirlai aṭanga thutak hriatna hian beiseina nena nun hman a zirtir che? 


Vawiin kan zirlai hi i ṭhiante zinga tuten nge mamawh ve ni a i hriat? Engtinnge an hnenah i hrilh ve ang? 


[Lettu: Mapuia Fanai]

Saturday, October 22, 2022

PATHIAN THILTIHTHEIHNA CHUAN A VENGHIM RENG A CHE

 Danglam duhna: Thlarau zungkaihna hmasawntir

Rick Warren

October 22, 2022



"Chhandamna, hun hnuhnunga lang tura peih sa chu hmu turin, rinna avangin Pathian thiltihtheihnaa ven chu in ni" 1 Pet 1:5


Beiseina hi a pawimawh a ni.


He khawvel ngui ruai anga lang thinah hian, Pathian thatna ber ber hi a la lang dawn chauh tih i hriatthiam a ngai.


1 Petera 1-ah chuan, i nunah eng pawh thleng se beiseina i neih theih chhan a sawi a. Nitin beiseina chung changa Pathian pawlnaah, a chhan kawng thum ka hrilh tawh che u :


*•Pathian chuan i thlan hmain a thlang tawh che.*


*•Pathian chuan khawngaihna leh zahngaihna nen a enkawl thin che.*


*•Pathian chuan i hmalam a vawnhimsak che.*


Vawiinah chuan beiseina kan neih chhan tur palina kan zir dawn a ni: *Pathian thiltihtheihna chuan a venghim ang che.*


Bible chuan, "Chhandamna, hun hnuhnunga lang tura peih sa chu hmu turin, rinna avangin Pathian thiltihtheihnaa ven chu in ni" (1 Pet 1:5) a ti a. 


Dik takin sawi ila: kan vai hian beidawnna, puih theih nia inhriat lohna leh theih nei lova inhriatna dinhmunah kan awm theuh tawh a.


Mahse thudik tak chu, chu chu dawt a ni. I nunah Pathian Thlarau i neih phawt chuan beisei bo, puih theih loh leh theihna nei lo i ni ngai lova. Pathian chuan a theihnain a venghim dawn che a ti zawk a ni.


Tute in velah emaw kalin an bang velah "security system hmanga ven a ni" tih in tar i hmu tawh ngai em? Krista zuitu i nih angin, chutiang chu i ni ve tho a ni, "Pathian venhim" tih ve thungin.


"Venhim" tih 1 Pet 1:5 a mi hi a awmzia tak chu kulhvengtu sipai sawina a ni a. Pathian thiltihtheihna a ven reng i ni tihna a ni.


Nitin mai hian englai pawhin Pathian chuan a hmu reng che a, vengtu sipai ang mai hian. I nuna engkim mai hi Pa-kaltlang vek a ni. I sualna emaw mi dang sualna avanga harsatna thleng pawh hi a hmang tangkai thei.


Heng zawng zawngah hian i nunin eng nge tih tur a neih ve le? Awlsam te mawle: Pathian rin mai hi. Hmangaihna famkim, engkim tithei Pathian chuan a hual vel che a, chuvangin a theihnain a ven che ring chungin beiseina i nei zel thei a ni.


Ngaihtuah zui atan...


Vawiina harsatna i tawhte chungchangah Pathian chu vengtu sipai ang maia en a, venghimtu che a ni tih i hriatna khan engtin nge i nun a nghawng le?


I nun engkimah Pathian venhimna hi i ringngam em? Eng vang nge?


I nunah Pathian venhimna i tawng tawh em?


(Lettu: Msa)

Friday, October 21, 2022

PATHIAN CHUAN I NUNA A BUNG TAWPNA A ZIAK TAWH*

 Danglam Duhna: Thlarau Zungkaihna Hmasawntir


By Rick Warren

October 21, 2022



“Kan Lalpa Isua Krista Pathian leh Pa chu fakin awm rawh se. Isua Krista chu mitthi zîng ata kai thovin, beiseina nung nei tûrin a zahngaihna ropui tak chuan min tinung leh ta a. Ro chhe thei lo, hmêlhem lo leh chuai thei lo luah tûr kan ni ta, chu ro chu in tân vânah dah ṭhat diam a ni.” [1 Peter 1:3-4]


Khawvela thil thleng eng emaw kan en kual chang chuan beiseina nei miah lovin a awm ve theih. Mahse, Pathian Thuah erawh chiang taka kan hmuh chu hei hi a ni: Beiseina nei turin chhan mumal tak i nei. Petera lehkhathawn pakhatna bung khatnaah chuan chung chhan pangate chu tarlan a ni. He fianrial thuzirah hian chung thil pahnihte chu ka lo sawi tawh: 


• *Pathian chuan i thlan hmain a thlang tawh che* , 

• *Pathian chuan khawngaihna leh zahngaihnain a dawngsawng reng che* . 


A pathumna chu hei hi a ni: 

*Pathian chuan i hmalam hun a tifel tawh*. I dam chhung hun hmabakah chuan thil eng ang pawh lo thleng sela, Isua nena inlaichinna mumal tak i neih phawt chuan, Pathian chuan i hmalam hun a vensak tlat ang che. I chhandamna chu i hloh theih tawh ngai lo vang. 


Bible chuan hetiang hian a sawi, “Kan Lalpa Isua Krista Pathian leh Pa chu fakin awm rawh se. Isua Krista chu mitthi zîng ata kai thovin, beiseina nung nei tûrin a zahngaihna ropui tak chuan min tinung leh ta a. Ro chhe thei lo, hmêlhem lo leh chuai thei lo luah tûr kan ni ta, chu ro chu in tân vânah dah ṭhat diam a ni.” [1 Peter 1:3-4]


Chhungkuaa i tel ve chiah chuan ro luahtu chanvo chu pek i ni ṭhin. A tlangpuiin, tu emaw a thih hnuah pek i ni ang. Pianpui chanvo ang deuh a ni.  


Petera chuan ṭawngkam panga hmangin vanrama i chanvo tur chu a sawifiah: 


 *Teh-theih-loh:*(priceless) A hlutna chu a sang em avangin teh theih pawh a ni lo. 


 *Vawn-ṭhat:*(kept) Vanram kai tur chuan i awmna hauh hmasak a ngai a, chu chu Isua kal tlang chauha hauhsak theih a ni. Chu chanvo chu hauhsak i nih chiah khan, sut leh theih a ni tawh lo. 


 *Fim*(pure) : A lem a ni lova, a tak ngei a ni. 


 *Hmelhem-lo*(undefiled) : Tihbawrhban theih a ni lo. Tihbo theih pawh a ni lo – engtik lai mahin. 


 *Tihdanglama tihchhiat theih loh:*(Beyond the reach of change and decay) A chul dawn lova, a thiin a hlutna a hniam thei bawk lo. 


Pathian chuan i hun hnuhnung chungchang chu a ziakfel tawh a. Chanvo hauhsak che niin, chu chu chanvo chu i hloh thei ngai lovang!


Ngaihtuah zui atan. 


Pathian chhandamna chu engvangin nge a rintlak a ni tih pawm chu a pawimawh em em ni ang? 


I chhandamna him thu chu rin harsa tih chang i lo nei ve tawh em? Chu buai rukna chu engin nge hnehsak che? 


I hmalam hun a him a ni tih hriatna chuan engtin nge vawiina i khawsak dan a tih danglam? 


 *Isua chu i chhandamtu atan i lo pawm tawh em?* 


Bible sawi dan chuan vanram chu Pathian Fapa Isua Krista ring chung chauhin vanram i kai thei ang tiin a sawi. Pathian hmangaihna chu i thawk chhuak thei lova, vanram pawh i thawk chhuak thei hek lo. Bible chuan hetiangin a sawi, “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni. Thil ṭha tih avângin a ni lo, chuti ni se miin an chhuang dah ang e,” tiin. [Ephesi 2: 8-9]


Isua chu i la ring lova amah zui turin thutlukna i la siam lo a nih chuan engah nge i nghah khawtlai kher ang? Chu rahbi thar rap tura duhthlanna i siam a, Isua Krista ring tura thutlukna i siam tawh a nih chuan hetiang hian ṭawngṭai ang che: 


“Isu duhtak, i thutiamah chuan nangmah ka rin che chuan, ka thil lo tihsual tawh zawng zawng min ngaihdam tur thu min tiam a, ka dam chhan chu ka zir ang a, i chatuan in vanrama min buatsaih sakah chuan engtik niah emaw min lo la lawm ang. 


“Ka sualte thupha ka chawi a, min chhandamtu i ni tih ka pawm bawk e. I thutiamah chuan ka sualte thupha ka chawi a, ka rin che chuan chhandam ka ni ang. Chhandamna chu khawngaihna avangin, rinna kaltlangin, ka thiltih engmah vang ni lovin ka chang dawn a ni tih ka hria. Ka nunah hian ka Lal atan ka lo lawm a che. Vawiin hian ka nun pumpui hi i hman atan ka hlan e. Ka nunah hian i duh amg angin hna i thawk thei e.  


“Isu, i hmangaihnaah chuan chawlh ka duh a. Ka thawhchhuah emaw ka buaipui emaw a ngaih kher loh avangin lawmthu ka hrilh a che. Keima rawng bawl tawh lovin ka damchhung hun zawng i rawng bawlna atan hman ka duh e. Tlawm takin ka nun hi i tan ka hlan a, min tlan tur leh i chhungte zinga mi atana min pawm ve turin ka ngen a che. I hmingin ka dil e. Amen.” 


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 


[ *Lettu* : Peka]

Thursday, October 20, 2022

ENG ANG PAWHIN CHHE TAWH MAL LA, PATHIANIN ZAHNGAIHNA PEK CHE A DUH

 Danglam duhna: Thlarau Zungkaihna Hmasawntir

By Rick Warren

— October 20, 2022


“Amaherawhchu, min chhandamtu Pathian ngilneihzia leh mi a hmangaihzia a lo lan khân, keinin thil kan tih ṭhat vâng ni lovin, a khawngaihna avângin min chhandam ta a, siamtharnaa sil fai leh Thlarau Thianghlima siam thar kan ni ta a.” [Tita 3: 4-5]


Eng ang buaina pawh lo hmachhawn la, beiseina neiin i nung thei cheu ang. Chu chu Bible-a chanchin ṭha kan hmuh ngar ngar chu a ni a. 


1 Petera 1-ah chuan beiseina nena i nun dan tur chhan panga a tarlang. Nimin lam fianrial thuzirah khan a chhan hmasa berk kan zirho tawh a: *Pathian chuan i thlan hmain a thlang che* tiin. 


Vawiinah chuan a chhan pahnihna kan en ho thung ang: *“Pathian chuan khawngaihna leh zahngaihnain a thlir reng ṭhin che”* tih thu chu. 


Petera khan ringtu lo ni tawh sa te hnena a thusawi a ni, “Kan Lalpa Isua Krista Pathian leh Pa chu fakin awm rawh se. Isua Krista chu mitthi zîng ata kai thovin, beiseina nung nei tûrin a zahngaihna ropui tak chuan min tinung leh ta a” tiin [I Peter 1: 3]


Petera chuan Pathian zahngaih theihzia a sawi satliah mai lo. Petera chuan Pathian “tiamchin awm lo zahngaihna” thu chu a sawi zawk a ni. 


Pathian khawngaihna leh zahngaihna i hriat thuk loh leh – Petera ang khan – mak tihnain i lo khat hial ang. Kan phu loh hulhual a ni. Kan hnathawh rah a ni lo. Eng emaw thawh vanga kan chan theih emaw a ni lo. Thilthlawnpek mai a ni bawk. 


Pathian zahngaihna chu nangmah a hmangaihna chea innghat a ni a. Tuna a hmangaih che aia nasa chuan Pathianin chuan a hmangaih thei leh chuang tawh lo che. A hmangaih lo sawt thei tawh bawk lo che. Chumi awmzia chu i chunga a zahngaihna chu thlak danglam theih a ni tawh lo.  


Pathian Thu, Bible-in a sawi dan chuan, “Amaherawhchu, min chhandamtu Pathian ngilneihzia leh mi a hmangaihzia a lo lan khân, keinin thil kan tih ṭhat vâng ni lovin, a khawngaihna avângin min chhandam ta a, siamtharnaa sil fai leh Thlarau Thianghlima siam thar kan ni ta a,” tiin. [Tita 3: 4-5]


He thu hi hriatfiah a pawimawh e mem a ni. Ringtu anga thil i tihsual chang chuan Pathian chu a thinrim nghal chiam lem lo. Pathian chuan i tihsual ai rulhtir che a tum chuang kher lo. Pathian chuan i nun tihbuai nghal pawh a tum kher lo. 


Hei hi Pathianin a tih ṭhin chu a ni: Zahngaihna nen i tan a che fo ṭhin. Eng vangin? Isua Krista i Chhandamtua i pawm rual chuan Isua thisen chuan a khuh nghal che a ni. 


Isua avang chuan, Pathian chuan i dai sual apiangin zahngaihna nen a tuamdam ṭhin che. Chu chuan beiseina a pe thei ang che. 


Ngaihtuah zui atan. 


Mi tam tak tan chuan Pathian khawngaihna leh zahngaihna chu pawm mai a harsa ṭhin. Chu chu eng vang nge nia i hriat? 


Tiamchin nei lo Pathian hmangaihna chu i hre fo tawh ang. Pathian zahngaihna pawh chu tiamchin awm lo a ni tih hriatna chu engtin nge nangmahah a thawh ve? 


I ṭhian hnaivai zingah Pathian khawngaihna leh zahngaihna hriat ve mamawhtu an awm em? Tun karah hian chu thuchah chu engtin nge an hnenah i sawi theih ang? 


*Isua chu i chhandamtu atan i lo pawm tawh em?* 


Bible sawi dan chuan vanram chu Pathian Fapa Isua Krista ring chung chauhin vanram i kai thei ang tiin a sawi. Pathian hmangaihna chu i thawk chhuak thei lova, vanram pawh i thawk chhuak thei hek lo. Bible chuan hetiangin a sawi, “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni. Thil ṭha tih avângin a ni lo, chuti ni se miin an chhuang dah ang e,” tiin. [Ephesi 2: 8-9]


Isua chu i la ring lova amah zui turin thutlukna i la siam lo a nih chuan engah nge i nghah khawtlai kher ang? Chu rahbi thar rap tura duhthlanna i siam a, Isua Krista ring tura thutlukna i siam tawh a nih chuan hetiang hian ṭawngṭai ang che: 


“Isu duhtak, i thutiamah chuan nangmah ka rin che chuan, ka thil lo tihsual tawh zawng zawng min ngaihdam tur thu min tiam a, ka dam chhan chu ka zir ang a, i chatuan in vanrama min buatsaih sakah chuan engtik niah emaw min lo la lawm ang. 


“Ka sualte thupha ka chawi a, min chhandamtu i ni tih ka pawm bawk e. I thutiamah chuan ka sualte thupha ka chawi a, ka rin che chuan chhandam ka ni ang. Chhandamna chu khawngaihna avangin, rinna kaltlangin, ka thiltih engmah vang ni lovin ka chang dawn a ni tih ka hria. Ka nunah hian ka Lal atan ka lo lawm a che. Vawiin hian ka nun pumpui hi i hman atan ka hlan e. Ka nunah hian i duh amg angin hna i thawk thei e.  


“Isu, i hmangaihnaah chuan chawlh ka duh a. Ka thawhchhuah emaw ka buaipui emaw a ngaih kher loh avangin lawmthu ka hrilh a che. Keima rawng bawl tawh lovin ka damchhung hun zawng i rawng bawlna atan hman ka duh e. Tlawm takin ka nun hi i tan ka hlan a, min tlan tur leh i chhungte zinga mi atana min pawm ve turin ka ngen a che. I hmingin ka dil e. Amen.” 


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 


[*Lettu*: Peka]

Wednesday, October 19, 2022

PATHIAN I THLAN HMAIN, A THLANG TAWH CHE

 _Danglam duhna: Thlarau zungkaihna hm

— Rick Warren 

— October 19, 2022


“Pa Pathian chuan chhan neiin a thlang tawh che a, a Thlarau chuan a tithianghlim tawh che a ni” 1 Peter 1:2 (GNT)

He khawvel chhe tak karah hian mi tam takin eng vangin nge vawi tam thil a kal fuh thin loh tiin zawhna an siam fo va. “Beiseina a awm em?” tih hi hriat an duh a ni.

Beiseina chu awm ngei tur a ni.

Nang leh kei hian beiseina tak tak kan mamawh - phurna satliah ni lo vin. Phurna chu rilru lam thil a ni a; i thil ngaihtuah danah a innghat a. Beiseina chu Pathian thu a ni a; Pathian hi tu nge a nih tih leh amah nena in inlaichinnaah a innghat a ni. Phurna chu a eng zawnga ngaihtuahna a ni a. Beiseina chu innghat tlat chunga thathona a ni.  

1 Petera hi beiseina lehkhathawn a ni a. Rom sawrkar laia tihduhdahna tuar Kristiante tana a ziak a ni. 

1 Petera 1 chang 7-na thleng hian Pathianin beiseina thuk tak a pe a. Chungte chu tun hnaia kan zirho turte an ni a, a mal te te in kan en ho dawn a ni.

A hmasa berah chuan: *Pathianin i thlan hmain a thlang tawh che* tih hi. 

Bible chuan, “Pa Pathian chuan chhan neiin a thlang tawh che a, a Thlarau chuan a tithianghlim tawh che a ni” a ti. 1 Peter 1:2 (GNT)

Chhandam i nihna hi tihpalh thil thu a ni lo va. Pathian i thlan hma daih khan Pathianin a thlang tawh che a ni. A suangtuahnaah i awm tawh a. Leilung a din hma pawh khan, siam a lo rilruk daih tawh che a ni.

1 Petera 1:2 kha i en nawn leh teh ang, “Pathian chuan chhan neiin a thlang tawh che.” Chumi awmzia chu Pathian hian i nunnaah hian chhan a nei tihna a nih chu. Eng nge a chhan chu ni ang? Vanram i luh theih nan tihthianghlim che a duh a ni.

Kawng dangin lo sawi ila, Pathian chuan amah nen chatuana lengdun turin a duh che. Chu chu thil lawmawm tak a ni! Dik tak chuan, chu chu i dawn phakah chuan chawimawina sang ber a ni.

I nunah chuan eng thil pawh lo thleng se. Chu chu a ni beiseina i neihna chhan hmasa ber chu. He beiseina thuk tak hi i nunah lo thuk zual se: Pathian i thlan hma pawhin, ani chuan amah nena chatuana leng dun turin a thlang tawh che a ni. 

Ngaihtuah zui atan

* Eng vangin nge mi tam tak hi beiseina reng nei tawh lova i hriat?

* Engti zawngin nge Pathianin nagmahah thianghlimna a thantir?

* Pathianin a thlang tawh che tih thu dik chuan nangmahah engtin nge beiseina a pek che?

*[Lettu: Sangpuia]*

Tuesday, October 18, 2022

PATHIAN HMANGAIHNA HI CHATUAN ATAN A NI

 Danglam duhna: Thlarau zungkaihna hnasawntir

*PATHIAN HMANGAIHNA HI CHATUAN ATAN A NI*

—  Rick Warren 

— October 18, 2022


“Thihna te, nunna te, vantirhkoh te, lalna te, thil awm sa te, thil lo la awm tur te, thiltihtheihna te, sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lovang tih dik takin ka hre si a.” Rom 8:38-39.

I nunna chu eng ang pawhin lo ṭha lo tawh mahsela, thudikah hian lo hahdam ang che: Pathianin a hmangaih tawp lo vang che.

Thiltih ṭhat chang i nei ang a. Thiltih sual chang pawh i nei ang. Mahse Pathian hmangaihna chu a tawp lovang. Ngun takin i thlir thei ang.

A dika dik chuan, thudik hi i nuna i hlimna hnar ber tur a ni ang!

Biblein Rom 8:38-39 ah chuan, “Thihna te, nunna te, vantirhkoh te, lalna te, thil awm sa te, thil lo la awm tur te, thiltihtheihna te, sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lovang tih dik takin ka hre si a.”

Chu chu chanchin ṭha a ni.

Pathian kutah i innghah tawh chuan, a chelh tlat ang che, a thlah lovang che. Pathian chuan a neih zawng zawng nen a chelh ang che.

Ka fate an la tet deuh lai khan, kawr thuk deuhah kan kal a. A tlang tawp kan thlen hnu chuan, ka fate zinga naupang pahnih Josh leh Matthew chu an kutah ka chelh tlat a. Ni e, dik tak chusn kei aiin ka faten a tawp thlen chu an nghakhlel zawk a ni. Tal vak vaka ka kut ata talchhuah chu an duh a, mahse an talchhuah ka phal lo. An pa ka ni a, ka hmangaih a ni. 

I nunah pawh Pathian kuta talchhuaha hla taka awm duh chang pawh i nei ang. I nun a harsat deuh phei chuan Krista hnena i inpekna pawh tawpsan hial i duh ang.

Mahse Pathian chuan a kal liamtir mai lo vang che. Amahah vawi khat i rinna i nghah tawh chuan, i cham reng thei tawh ang.

Chhandamna hi i hlawhchhuah theih a nih chuan, i thawh peih loh rual rualin i chan nghal a ni ang. Mahse Pathian nena inlaichinna hi i hlawhchhuah a ni lova. Thilthlawnpek liau liau a ni. Vawi khat pek i nih tawh chuan, chhuhsak theih pawh a ni tawh lo.

Chu chu ringtute tan chuan hlimna hnar suangtuah phak bak a ni.. 

Ngaihtuah zui atan

* Pathian hmangaihna chu a tawp ngai lo vang. Eng ti zawngin nge he thudik hian hlimna a thlen che le?

* Engtikah khan nge Pathian kut ata awm bo i tum? Chutih lai pawh chuan a rinawmna engtin nge a hmuhtir che le?

* Pathian hmangaihna ropui takah chuan i eng ang lungngaihna leh hlauhna nge i innghah ngai le?

*Pathian kutah i inghat em le?*

Rom 8:39 chuan hei hi min tiam a, “Thihna te, nunna te, vantirhkoh te, lalna te, thil awm sa te, thil lo la awm tur te, thiltihtheihna te, sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lovang tih dik takin ka hre si a.” Isua chu i chhandamtuah pawmin Pathianah i innghat tawh em? Isua hnenah i nun pe tura i inpeih a nih chuan, heti hian ṭawngṭai ang che:

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Lalpa duh tak, misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che.”

“Keima rawng bawl ai chuan dam chhunga i rawng bawl ka duh tawh a ni. Ka nun hi i tan ka hlan a, min chhandam tur leh i angchhunga minl o pawm ve turin ka dil a che. Isua hmingin ka dil a che. Amen

Isua pawm tura i ṭawngṭai thei a nih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawn a thlawnin ka pe dawn che nia.  

*[Lettu: Sangpuia]*

Monday, October 17, 2022

I LO TIHSUAL TAWHTE KHA PATHIANIN A ṬHAT NAN A HMANG THEI

 Danglam duhna: Thlarau zungkaihna hmasawntir 

- Rick Warren 

- October 17, 2022 



"Tin, Pathian hmangaihtu, amaha ruat anga a kohvate tan chuan, an ṭhatna turin engkimin a thawhsak hlawm thin tih kan hria" (Rom 8:28) 


Tlang takin sawi ang aw. Nang leh kei hian a khat tawkin thil âtthlak tak kan ti fo. Thil kan tisual fo ṭhin. 


Mahse i thiltihah khan Pathian hman theih piah lam thil engmah a awm lo. Thil i tisual mai thei, mahse Pathian chuan a tisual ve ngai lo. 


Hetiang hian Rom 8:28-ah chuan kan hmu,  _"Tin, Pathian hmangaihtu, amaha ruat anga a kohvate tan chuan, an ṭhatna turin engkimin a thawhsak hlawm thin tih kan hria."_ 


Thil sual âtthlak tak mai i tih khan Pathian chuan thil ṭha atan a hman theih thu min tiam. 


Chiang takin ka'n sawi ange. Hei hi mi zawng zawng chunga thutiam a ni lo. He chang hian, Pathianin amah dodaltute emaw, a remruat anga awm lote chungah pawh engkim an ṭhatna turin a thawhsak zel a ti hauh lo. 


He thutiam hi, mi, Pathian hnenah "Min siam chhan anga nun ka duh e. Thil ka tidik reng thei lo a, mahse thil dik chauh tih ka duh a ni. Rin che ka duh a, i hnung zui ka duh a ni" ti a amah pan chauhte tan a ni. Hetiang hian ti la, Pathianin engkim a ṭhatna turin a ti mai ang. 


Chu chu lawmna tur chhan chu a ni. 


A kutah i nun i hlan khan thil i tisual tawh dawn lo tihna a nio. Thutlukna dik lo tak tak i la siam fo ang. I kawng a la hnawk viau mai thei. Mahse Pathianin a ruahmanna milin a siam rem zel dawn a ni. 


I nunah khan ruahmanna dang a awm thei lo. I pian hma aṭang tawhin i tihsual turte Pathianin a lo hre lawk vek tawh. Chung i tihsualte chu a remruatna dana lut turin a siamrem zel dawn tih pawh a hria. 


Chumi awmzia chu hahdam takin i awm thei tihna a ni. Rilru chiai reng renga i awm a ngai tawh lovang. Pathianin a pek che kha a ṭha thei ang berin hmang rawh. A remruat dan angin engkim a thawk zel ang. 


Ngaihtuah zui atan. 


Engtinnge i tihsualte Pathianin a ṭhatna atana a hman ni a i hriat? Engtinnge chutiang chuan mi  nunah a thawk ni a i hriat? 


Pathianin engpawh thil ṭha atan a hmang thei tih i hriatin chu chuan engtinnge i hun kal tawha i tihsualte lak ata a zalentir che? 


I nunah Pathianin a ṭhatna turin a thawk dawn tih i hriat chianin engtinnge rinna kawngah ke i pen ang? 


*Vawiin hian chhandam hlimna chu dawng ngei  ang che.* 


Bible-in Isua ringtute tan chuan thiam loh channa leh zahna a awm tawh lo a tih hi hre thar fo rawh: _"Chutichuan tunah zawng Krista Isuaa awmte tan chuan thiam loh chantirna reng a awm tawh lo."_ (Rom 8:1) 


Chu thutiam chu pawma ngaihdamna vanga hlimna chu chang tura i inpeih chuan heti hian ṭawngṭai rawh: 


"Isu, nang ka ring che a nih chuan ka thil tihsualte ngaihdam niin thiam loh ka chang tawh lo ang tiin min tiam a. Ka chungah rorelna  lek lovin i chatuan hmun vanramah min pawm dawn a ni. 


"I hmaah ka sualte ka puang a, i ngaihdamna ka rawn dil e. Pathian leh min chhandamtu i ni tih ka pawm e. Ka Lal atan ka thlang a che. I ngaihdamna chang tura ka thawh emaw, ka phu emaw, ka hlawhchhuah emaw a ngaih loh avangin ka lawm e. I khawngaih thilpek a ni e. 


"Vawiin hian ka nunna zawng zawng i tan ka hlan e. Zahnaa nun ai chuan i chhandam hlimnaa nun ka duh e. Ka nun zawng hi mahni tan ni tawh lovin i rawngbawl nana hman ka duh tawh e. Ka nun i tan ka hlan a, min chhandam a i chhungkuaa min pawm turin ka ngen a che. Isua hmingin, Amen." 


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia, 


[Lettu: Mapuia Fanai]

Sunday, October 16, 2022

HLAU SUH - I LAMAH LALPA A ṬANG

 Danglam duhna: Thlarau zungkaihna hmasawntir

- Rick Warren 

- October 16, 2022 



"Chung thuah chuan engnge kan sawi ang le? Pathian kan lama a tan chuan tuin nge min do thei ang?" (Rom 8:31) 


Rilru lam zir mite chuan miin hlauh a neih theih hrang hrang za chuang an hmu chhuak tlat. Hlauh neih hi mi zawng zawng chunga thleng vek a ni a- chu chuan i hlimna nasa tak a la bo thei bawk. 


Mahse hei hi chanchin tha chu a ni: Hlauh tur reng reng i nei lo ve, i lamah Lalpa a ṭang tlat alawm! 


Bible chuan heti hian min hrilh nawn fo ṭhin, _"Chung thuah chuan engnge kan sawi ang le? Pathian kan lama a tan chuan tuin nge min do thei ang?"_ (Rom 8:31) 


I lama Pathian a ṭan phawt chuan eng dang mah i mamawh tawh lo. Pathian nen chuan mi tam tak hen kan ni. 


Engnge i hlauh ber le? Hrilhhai taka awm a ni em? Hlawhchhamna em ni? Hnawlna a ni em? Midangte tihlawm loh nge? Inrem taka awm theih lohna em ni? 


Heng hlauhna zawng zawng hi Setanan i hlimna laksak nan che a hmang ṭhin. I hlimna thlentu a hria a, chuvang chuan chung i hlimnate dodal turin hlauhna a siam ta ṭhin a ni. 


Entir nan, Pathian thuawihna hian hlimna a thlen zel ṭhin che tih Setana hian a hrechiang em em a. Chuvang chuan thil dik i tiha miten i chunga an rilru puthmang turah hlauhthawnna a neihtir ta che a. Pathian tihlawm aiin i hmingṭhatna tur a ngaihtuahtir zawk ta ṭhin che a ni. 


Ring lo mite hnena, Krista hmangaihna thu i puan kha hlimna thlentu lian berte zinga mi a ni tih Setana hian a hre tlat bawk a. Chuvang chuan mite hnena Isua chanchin i sawi lohna turin hlauhna a neihtir ta che a ni. 


Thudik chu hei hi a ni, hlimna hmu tur chuan thil pakhat chauh i tih a ngai. Pathian thu ngaithlatu ni tura i nun a ngai. Chu chu Isuan hlimna leh lawmna tluantling nei tura kawng min kawhhmuh chu a ni. 


Heti hian a sawi, _"Ka lawm nangmahnia a awm reng nan leh, in lawm a kim nan, heng thu hi in hnenah ka sawi hi."_ (Johana 15:11) 


I tan Pathian a awm tih hre rengin hlimna i nei thei. Hlau hauh suh! 


Ngaihtuah zui atan. 


I hmangaihte nun khan hlauhnain eng angin nge nghawng a neih tih i hmuh dan? 


I nunah khan eng hlauhna nge chhiatna thlentu nasa ber le? 


I tan Lalpa a awm reng a ni tih hriatna hian engtinnge hlauhna i hmachhawn danah danglamna a thlen ang? 


[Lettu: Mapuia Fanai

Saturday, October 15, 2022

NGAIHDAM HLIMNA NUN NEIH

 Danglam duhna: Thlarau Zungkaihna Hmasawntir

Rick Warren

October 15, 2022



"Nimahsela kei zawngin i ngilneihna hi ka ring a ni: I mi chhandamnaah hian ka thinlung a lawm ang" Sam 13:5


Isua zuitu i nih chuan hlimna hi nunphung reng a ni tur a ni. Engvangin maw? Ngaihdam famkim i nih vangin mawle. Inthiamlohna leh zahna tur reng reng a awm tawh lo.


Ka tan chuan hlimna chhan tur dik tak a ni.


Bible chuan, "Chutichuan tunah zawng Krista Isuaa awmte tan chuan thiam loh chantirna reng a awm tawh lo" (Rom 8:1) a ti.


Rom 8-na hi Greek tawnga ziah a ni a. 'Lo' tih thumal hi greek tawnga thil ni lo sawina tawngkam khauh ber hmanga sawi a ni a. Pathian chuan, "Ni lo, ni lo, ni lul lovang i dam chhung chuan" a tihna ang vel a ni.


Chu chu thil pawimawh tak a ni, a chhan chu mi tam takin hlimna an hloh nachhan hi inthiamlohna nasa tak an neih thin vang a ni. Inthiam lohna leh zahna hian i hlimna an ruksak thei che a ni.


Mitin hian tihsual kan nei vek a. Mahse Pathian chuan mahni inthiam lo te, "ka la tha leh em em ang" tih inhrilh renga i awm kha a duh lo a ni.


Engtiangin nge inthiamlohna chu Pathianin ti tura a duh che? I sualna puangin, thianghlima awm turin a duh che a ni. Pathian pan la, "Ka tihpalh a ni, khawngaihin min ngaidam ang che" ti la. I sualna zawng zawng chu a lo tihfaisak ang che.


Isua kha ngaihdamna i chan theihna tur leh inthiamlohna nei lova i awm theihna turin Krawsah a thi a. Sual i tih tawhte tan chauha thi pawh a ni lo. I la tihsual tur thleng tan pawh a ni. Kraws chuan chung zawng zawng chu a khuh vek a ni.


Thiam loh i channa chu Isua chuan a phur a. Chuvang chuan a thi ta a. I sual man chu pek a ni ta a. A man i pek leh a ngai tawh lo a ni.


Chu chu chhandamna a ni a, hlimna chhan tur pawimawh ber pawh a ni. Chhia leh tha hriatna thiang tak neia hlimna a ni.


Lal Davidan Sam 13:5na a ziah tuma a tawn hlimna ang kha i tawng ve thei a ni, "I mi chhandamnaah hian ka thinlung a lawm ang" (Sam 13:5) a tih ang khan.


Ngaihtuah zui atan...


Sual puanna hian chhia leh tha hriatna thiang neia hlim taka awm thei turin a siam thei che a. Nitina sual puang thei turin engtin nge i tih ang?


Pathianin i sual zawng zawng a ngaidam vek tawh che tih thutak hi i pawm em? A nih chuan chu thutak avang chuan engtin nge i awm? A nih loh chuan, chu thutak chu pawm turin engin nge dang che?


Pathian ngaihdamna famkim chanchin hi tu hnenah nge i sawi ve ang?


(Lettu: Msa)

Friday, October 14, 2022

ENG PAWH I DIL CHANGIN, PATHIAN CHUAN A PE DAWN CHE TIH RING RAWH

 Danglam Duhna: Thlarau Zungkaihna Hmasawntir 

By Rick Warren

October, 14, 2022 



“Chuvângin, ka hrilh a che u, in ṭawngṭaia in thil dîl apiang hmu tawhah inngai ula, tihsak in ni ang.” [Mark 11:24] 


Vawiin hian dollar sangkhat lak chhuah theihna lehkha pe ta ang che ila, a lo lut ngei a ni tih finfiahna chu nghakin lawmthu min hrilh i ti khawtlai vel ang em? Keimah min hre chiangtu tawh phawt chuan hetiang hian an ngaihtuah ang, “Amah hi mi fel tak a ni a. A sum bawmah chutiang zat chu a nei a ni tih kan hre chiang e. Lawmthu kan sawi nghal mai teh ang” an ti ang. Lawmthu min hrilh phawt ang a – bank lamah pawisa lak chhuahna lehkha chu i va kalpui mai ang.  


Pathian thutiam chu keini ho thutiam aia ṭha zawk a ni. A thutiam i kuta a lo thlen hma ngei chuan, “Ka lawm e, Lalpa. I thutiam chu a thleng ngei dawn a ni tih ka hria e. Tih i tiam chu i ti ngei ngei ang.” 


Chutiang deuh chu Pathian tana “Rinnaa Fak Hlawhtute” Hebrai 11-a kan hmuhte ang kha an awm. Josuan Israel fate Jericho leh a chhehvel a helpui lai khan, khawiah nge kulh kha a chim? Engtin nge kulh kha a chim? Hebrai 11: 30-ah chuan hetiang hian kan hmu, “Rinnain Jeriko kulh chu ni sarih an hual a, a chim ta a.” tiin. 


Israel fate khan Ramtiam an pan a, chu kawng chuan khawpui tha taka thuam Jericho a paltlang a. Pathian chuan Israel fate chu, chu khawpuiah chuan a hruailut dawn tiin a ruahmanna chu a hrilh hlawm a. Hetiang deuh hian a ni: “Kal ta ula, Jericho khawpui kha ni sarih va hel rawh u. Tichuan, a ni sarih ni chuan, chu khawpui chu vawi sarih in kal hual ang, chu kulh ka pek dawn vang che u chuan lawmthu min hrilh dawn nia” tiin. Chutianga an tih hnu chuan, chu kulh chu a chim ta mai a. Pathian chu a thutiam ang chuan a che ta ngei a! 


Hetiang hian ka ngaihtuah fo ṭhin, “Khang mite rual khan ni sarih chhung kulh kha kal hual ve ta ila, engtin nge ka awm ang?” tiin. Thenkhat chuan kulh kha an han en vel ang a, an mangang tulh tulh ang a, engtin nge Pathian chuan a tih chim ang tia ngaihtuahin an buai viau ang. Mahse, mi tam berte chuan rinna nen an thlir a. Chu kulh an en apiang chuan Pathian thiltih theihzia an hre thar a, a hnenah a tharin lawmthu an hrilh ṭhin. 


Chutiang chiah chu Pathianin I nun dan atana a duh chu a ni, Pathian hnena lawmthu lo hrilh hmasak mai chu. Isuan Marka 11: 24-ah hetiang hian a sawi, “Chuvângin, ka hrilh a che u, in ṭawngṭaia in thil dîl apiang hmu tawhah inngai ula, tihsak in ni ang ” tiin. 


Pathian hnenah thil eng emaw i dil changin i ring chuang lo a nih chuan engah nge dil pawh i dil duh zawk? Chhuanlawm awmze nei lo a ni. 


Isua chuan i ṭawngṭai a, Pathian hnenah thil i dil a nih chuan Pathian chuan a ti ngei dawn a ni tih ring ang che. 


Ngaihtuah zui atan. 


I ṭawngṭai chang chuan eng ang thutiam nge Pathian atang chuan i beisei ṭhin? Pathian thutiam nasa zawk chu engtin nge i beisei theih ang? 


I ṭawngṭai thinna chuan engtin nge i thlarau nun a tarlan? 


Pathian chu eng nge i lo dil ve tawh ṭhin? A thutiam chu a hlen ngei dawnin i ring em? Eng vangin nge? 


[ *Lettu* : Peka]

Thursday, October 13, 2022

PATHIANIN I PEK DAN A NGAI PAWIMAWH, I THILPEK NI LOVIN

 _Danglam Duhna: Thlarau Zungkaihna Hmasawntir_ 

By Rick Warren

October 13, 2022



“ _Abela chuan rinnain Kaina inthawina hlan aia hlu Pathian hnênah a hlân a, a thilhlan chu a lo pawm a, Pathian hmuha mi dik nih a hlawh ta a. Thi tawh mah se rinna avângin thu a la sawi ta zêl a ni._ ” [Hebrai 11:4] 


Hebrai 11 “Rinnaa Fak Hlawh Huanga” tar chhuah hmasak ber Abela a ni tlat kha a chhinchhiah tlak khawp mai, Adama leh Evi te fapa hmasa ber a nih kha. 


Abela khan eng thil nge a tih a, Mosia leh Abrahama leh Bible-a mi ropui Hebrai 11-a tarlan zinga a lan ve phak chhan kha eng nge ni ang? Kan hriat theih mai chinah chuan, Abela khan thil ropui a tih sawi tur a nei lo. Thil hlauhawm lian tham engmah a ti lo. Mahse a thil tih chhun chu rinna hmanga halral thilhlan a hlan a, Pathian a tilawm kha a ni. Abelan a thil pek chhuah kha a ni chiah lova, engtin nge a tih tih kha a ni. Abela khan rinna nen a che chhuak a ni. 


Hebrai 11: 4 chuan hetiang hian a sawi, “ _Abela chuan rinnain Kaina inthawina hlan aia hlu Pathian hnênah a hlân a, a thilhlan chu a lo pawm a, Pathian hmuha mi dik nih a hlawh ta a. Thi tawh mah se rinna avângin thu a la sawi ta zêl a ni_ .”


Thilpek leh rinna chu an kal kawp ṭhin. Pathian chuan i pek zat chu a ngai pawimawh tak tak thei lo. Pathian chuan i sum a mamawh lo. I thinlung zawk kha a duh chu a ni. 


Dik tak chuan, rinnaa i pe lo a nih chuan pe lo law law rawh. Bible chuan hetiang hian a sawi, “Rinna lo chuan Pathian tihlâwm rual a ni lo,” tiin. 


Thilpek pek dan kawng hnih a awm: mimal hisap satliah hmangin i pe thei a, thlarau hriattirna avangin i pe thei bawk. 


Mimal hisap satliah hmanga pek tih awmzia chu thawhlawm thawh tawh zat chu i thlir vang a, pek ve ṭhain i hria a, i pe ve ta mai a. Mahse, chu chuan rinna eng laiah mah khan a mamawh ve lo. 


Rinna hmanga i pek dawn chuan, rinna hmanga pen chhuak tur leh Pathian chu i kawng kawhhmuh tur chein i kar tihna a ni. I thil dang tih chawlhsanin i ṭawngṭai a, “Lalpa, eng ang zata nangmah ring tur chein nge min duh?” tiin zawhna i zawt thei. Tichuan, a hrilh ang ang che ti turin i inbuatsaih ta a ni. Chung thilpek ang chu i rinna sawizawitu tak tak chu an ni, a chhan chu rinna chu hriatfiah vek theih a ni lo tlat. Pathian inpuanchhuahnaa innghat thilpek a ni.  


Bible-ah chuan ringtu hmasaten ṭha an tih dan ni lo va anmahnia Pathian inpuanchhuah dan mila thil pe an awm. Makedonia ramah an cheng a, Alexander Ropuia lo chhuahna Greece ram bial pakhat aṭanga lo kal an ni. Makedonia ram kohhrante chuan hun harsa an paltlang a, an rethei takzet. Chuti chung chuan, Jerusalem khaw kohhranten sum an mamawh a ni tih an hriat chuan anmahni chanai thilpek an pe chhuak mai a ni. Makedonia khaw kohhran khan sum tlemte nei mahse rinnaa thilpek pein mite tan an luangchhuak a ni.  

Paula chuan an chungchang hetiang hian a sawi: “ _Hrehawm nasa taka fiah an ni chungin an lâwm ta êm êm a, an pachhe hle chung pawhin an thilphal êm êm a ni_ ,” tiin. [II Korinth 8: 2]


Makedonia mite khan eng vangin nge an pek i hria em? Anmahni inthiam lohna an neih vanga pe an ni em? Ni lo, an pek chhan chu “an lawmna vang a ni.” 


Rinnaa i pek chhuah reng reng chuan lawmna a tel zel. Lawmna, rinawmna nena i pek chuan a tawpah Krista anna kawngah i ṭhang lian ṭhin.  


Ngaihtuah zui atan. 


Hun kal tawhah khan engin nge thilpek pe turin fuih ṭhin che? 


Rinnaa pek chhuah chu mi tam takten eng vangin nge an ngam loh? 


Engtiang kawngin nge i sum thlir dan chu thlak danglam ngai a, i thilpek pek dan pawh chu tihdanglam ngai ta? 


[ *Lettu* : Peka]

Wednesday, October 12, 2022

RINNA LEH TIH HRAM HRAMNA HI A KALKAWP TUR A NI

 Danglam duhna: Thlarau zungkaihna hmasawntir


*RINNA LEH TIH HRAM HRAMNA HI A KALKAWP TUR A NI*


— Rick Warren 

— October 12, 2022



"Rinnain lal thinurna chu hlau lovin Aigupta ram a kalsan a, hmuh theih lova chu a hmuh avangin a tuar tan tan a ni.” Hebrai 11:27


Kan hnam nunphunga thil awm lian tak pakhat chu, ṭha nia i hriat chu tirawh tih hi. Chuvang chuan kan duh emaw duhlo emaw tute pawh min nghawng ta vek a ni. Mahse i rilrua a thawh ang zela chet i duh chuan, i rilru chuan i nun a hruai hle tihna a ni.


Mahse Pathian chuan nundan danglama nung turin a duh che a—rilrua a thawhdan ang mai maia khawsa lovin, rinna nena nun hmang turin a duh che a ni. Diktak chuan, engtik lai pawhin kan rilru chuan thilṭha tih duhna thinlung kan pu si lova. Nang pawh i nih tho ka ring. Mahse Pathian chuan rilruin a peih loh deuh pawhin tih hram duhna rinna nun a pe thei che a ni.


Han hawi vel la, mi hlawhtlingte chuan an tihchak lem loh an tih fo avanga hlawhtling an ni tih i hmu ang. Mi tihdan ang ringawta tih chu duhtawk lovin, danglam deuha tih an duh ṭhin a. Midangin an tih duh loh te an ti ta ṭhin a ni.


Mi baka i thawhrim loh chuan Olympic ah pawh i tel phak lovang. Rimawi lamah pawh nise darkar tam tak inzirna i neih loh chuan rimawi tum thiam tak i ni lovang.


Chutiang chiah chu Kristian Pathian mi awmdan tur pawh a ni. Pathian nena inlaichinna thuk zawk neih i duh chuan i peih loh deuh pawhin Pathian nena inpawlna i neih angai a ni. Pathian nena hlim taka hun hmang ṭhin i hria em? A chhan chu an peih loh deuh pawhin Pathian nena hun an hman hram hram ṭhin vang a ni.


Rinna leh tih hram hramna chu a kalkawp a. Rinna awmzia chu i chauh deuh hnu pawha i bansan lohna hi a ni. Rinna awmzia chu tawp san loh hi a ni. Rinnaa nung i nih chuan i ti hram hram ṭhin ang.


Mosia chu rinawm taka ti hram hram nun nei entawntlak tak a ni. Hebrai 11:27 chuan, “Rinnain lal thinurna chu hlau lovin Aigupta ram a kalsan a, hmuh theih lova chu a hmuh avangin a tuar tan tan a ni”.


Mosian thudik pawimawh tak a hrechuak a: Hmuh theihlova chu i hmuhtlat chuan tih theih loh nia i ngaih pawh i ti thei ang.


Pathianin tih hram hramna nun nei turin a pui ang che. In nupa karah beiseina a awm tawh loh hnuah pawh beiseina a pe ang che. I tluk pawhin tho leh tura huaisenna a pe ang che. Sum leh paiah tlachhe mai dawna i inhriat pawhin kal zel thei tura chakna a pe ang che. I bul vela miten tawp san tura an tih che pawhin kal zel duhna leh theihna Pathianin a pe ang che.


Rinna chabi chu tih hram hram hi a ni. I harsatna en lovin Pathian chauh en rawh.


I kal zel theih nana Pathian chakna chu i hnenah a awm a ni. Amah chu dil ang che.


Ngaihtuah zui atan


*  I nunah eng lai nge tawp san mai tura duh i neih? Nangmah ngaihsaktute nen sawiho ṭhin rawh u.


* I tumruhna leh tih hram hram i duhna chu engin nge hliah ṭhin che le? Taksa lam chauhna em ni? Rilru lam thawpikna zawk nge? I nunhlui avang zawk em ni?


* Chung daltu hrang hrang chu hneh thei turin eng thil thar nge i mamawh le?


*I rinna chu Isuaah a ni em?*

Pathian nena inlaichinna ah chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam inni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi 2:8-9. 


I sualna te i puang duh aniha, i nunah Isua i thlang duh anih chuan, heti hian ṭawngṭai ang che.


“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtik niah emaw chuan i chatuan in nuamah min lo pawm ve ngei dawn a  ni.


“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”


Hetianga i ṭawngṭai a nih chuan, Rick@PastorRick.com ah hian emai min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.


*[Lettu: Sangpuia]*

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...