Friday, July 31, 2026

RUAM DILA ṬAWNGṬAINA

Pathian Ṭhatna Hnuaia Len

By Rick Warren
July 31, 2026
“A ni, thihna hlim kawrruam zawh mah ila, Ka hlau lo vang, Nangin min awmpui si a, I talhtum leh i vêntiangin min thlamuan ṭhîn.” [Sam 23:4]

Vawiin hian engin nge i rilru tibuai? Sum leh pai a ni em? I hriselna? I leiba? I fate? I hmalam hun ngaihtuahin i buai em? Dik tak chuan tun lai khawvelah hian hlauh tur a tam hle. Tun hma zawng ai khan, nitina hmachhawn tur buaina chuan min delh rit hlawm a, tawpin tai nei lo ang mai an ni, a lehlamah chuan khawvel nihphung dik tak zawk a nihna chin pawh a awm. Hringnun hi a harsa a ni. 

Pathian thutiam chu hei hi a ni - thihna hlimkawr thim ber laiah pawh i kiangah a kal ve. 

Thil chhinchhiah tlak tak pakhat chu Bible-ah hian “hlau suh” tih thumal hi vawi 365 lai kan hmu. Chumi awmzia chu Pathian thlamuanna thuchah “hlau suh” tih chu kum khat daih nitin a awm tihna a ni! “Hlau suh!” tih thuchah chu kan hriat nawn fo a duh. 

Eng vangin nge Pathian chuan kan hlauhna leh lungkham karah chuan chu thu chu a sawi nawn fo? A chang chuan kan natna leh buaina te avang hian Pathian chuan mi hrem leh tihnatte hi a tum ngar ngar em aw tih a awl. Mahse chu chu thil dik a ni thei lo. A finfiahna chu Isua a ni. 

Pathian khawngaihna leh zahngaihna i hriat thiam chiah chuan i hmalam hun thlira i hlauh a ngai tawh lo vang. Isua chuan i thil tihsual tawh zawng zawng leh i la tihsual zel tur man zawng zawng chu a pe tlak vek tawh a ni. Kraws-ah a chingfel vek tawh zawk a. Thil ṭha lo a thlen chang chuan, “Pathian chuan hun kal tawh avang chuan min hrem a ni ang” lo ti ngawt suh. He Bible thu hi ngaihtuahin ṭawngṭai zawk ang che: “A ni, thihna hlim kawrruam zawh mah ila, Ka hlau lo vang, Nangin min awmpui si a, I talhtum leh i vêntiangin min thlamuan ṭhîn,” tiin [Sam 23:4].
 
Bible thu eng emaw chu sawiin i buaina zawng zawngte chu bo duak nghal tur erawh chuan beisei ngawt suh. I ngaihtuahnaa lungngaihna i lai veng veng laite chuan i rilru chu thununin ṭawngṭaina hmangin bei zawk rawh. Ṭawngṭai hram hram rawh. Pathian thutiam chu nangmah leh nangmah inhrilh nawn fo vang che. 

A thlawn ngai lo!

Ngaihtuah zui atan. 

• I nuna buaina avanga i lungngaih mai dawn chang chuan Pathian Thutak chu i nun atan hauh nawn ṭhin ang che? 
• I nuna buaina avanga thlemna i hmachhawn dawn laite chuan Pathian thua thutiam awm chu engtin nge i lo hauh theih ang? 
• Engtiangin nge Pathian chuan a humhim ṭhin che? 

[ *Lettu:* Peka]

Thursday, July 30, 2026

ENG PAWH THLENG SE, A TAWPAH I HNEH DAWN

_Pathian Ṭhatna Hnuaia Len_

By Rick Warren
July 30, 2026

“Kawng tinrêngah nêk chêpin kan awm a, nêk beh zawng kan ni si lo; tihmanganin kan awm a, kan bei a dawng hek lo; tihduhdahin kan awm a; mahse, kalsan kan ni si lo; vuak thlûkin kan awm a; mahse, tihhlum zawng kan ni lo… Lalpa Isua kaithotu chuan keini pawh Isua nên min kaitho ve ang a, nangniho nên a hmaah min dintîr dâwn tih kan hria.” [II Korinth 4:8-9, 14]

I hma lam hun a chian lohva, hlauh tur tam takin a hual vel chang che chuan i nun chu tawp mai tur anga a lan chang a awm ang. 

Bible chuan, “Kawng tinrêngah nêk chêpin kan awm a, nêk beh zawng kan ni si lo; tihmanganin kan awm a, kan bei a dawng hek lo; tihduhdahin kan awm a; mahse, kalsan kan ni si lo; vuak thlûkin kan awm a; mahse, tihhlum zawng kan ni lo… Lalpa Isua kaithotu chuan keini pawh Isua nên min kaitho ve ang a, nangniho nên a hmaah min dintîr dâwn tih kan hria,” tiin a sawi [II Korinth 4:8-9, 14]

Hringnun a inleh buk buk lai pawh chuan hei hi vawng reng ang che: I tlawm thiang lo! A tawpah chuan i la hneh dawn, eng thil pawhin hual vel che mahse. I nunna ngei pawh hloh ang la, Isua Krista chu i Chhandamtua i pawm a nih chuan a kiangah i kal thuai zawk ang. 

Vanram i thlen hun chuan i nun awmzia tak tak zawk chu a la inṭan chauh zawk dawn a ni . 

TV ah lemchan [episode] eng emaw a tawpah a changtute dinhmun buai laklawh deuha a tawpna, a changtute an damkhawchhuak ang em tia thinphu dep depa i inngaihtuahna chu i en tawh em? Thawnthu mai ni mahse buai ru taka an tawpna chu i lo tawng tawh ang. 

Mahse, a chang chuan chung lemchan chhunzawmna chu en vek theih pawh ni se buai miah lova en loh chang i nei, a chhan chu a changtute chu lemchan ṭhen hrang [episode] 6 laite pawh nise an la dam dawn tih i hre chiang. Lemchan chu chhunzawm zel a la nih dawn chuan a laklawhah chuan an tawp mai dawn lo tih i hria ang. A changtupa chuan dinhmun khirh tak pawh chu tal chhuahsanin a lehpekah a la inlan leh dawn tih i hria ang.  

Chu chu hringnun chu a ni. Hun khirh tak hmachhawn chang awm mahse chu hun bumboh chu a tawpna a ni dawn lo tih i hre thiam ang. Chanchin ṭha neitu i nih avangin buaina lai taka i awm chang pawhin beisei tur i nei tih i hria ang. 

Engtik niah emaw vana Isua i hmuh hun chuan, i natna zawng zawng, i bawrhsawmna tinreng, i lungngaihna, hrehawmna, rilru buaina leh lusunna eng pawh mai chu a la tawp ang. Hei hi vanrama i thlir tur chu a ni: “An mit ata mittui zawng zawng a hru hul ang a, Thih a awm leh tawh lo vang. Lu sûn te, ṭah te, nat te pawh a awm tawh hek lo vang. Thil hluite chu a liam ta a.” [Revelation 21: 4] 

He hringnun hi kan chanchin tawpna tur a ni lo. Kan hmalam hun chuan engnge a ken kan hre lawk lo, mahse chu chu tuin nge chelh/thunun tih erawh chu kan hre chiang thung. 

Ngaihtuah zui atan. 

• I nuna khawi lai kha nge hlauhna nen ni lova beiseina nena i thlir zawk ngai? 
• I beidawn chang leh hlauh chang chuan eng hmangin nge Kristaa i beiseina chu i inhrilhhriat nawn ang? 
• Khawvel hmaah chuan Kristiante chuan beiseina leh mahni inrintawkna chu engtin nge an vawn zel ang, buaina kar pawh ni se? 

*I thih huna i kalna tur i hre chiang em?* 

Engtik niah emaw chuan he khawvela i nun hi a la tawp ang a – i chanchin erawh a tawp mai lo vang. Isua chu i chhandamtu a nih chuan i chantuan hun chu vanramah i la hmang ang. I thih hunah i chanchin chu ziah chhunzawm a la ni dawn tih chu i hre chiang ngam em? 

Bible chuan sual man chu thihna a ni tiin a sawi. Pathian chuan min hmangaih em avangin a Fapa min pe a, kan sual man min tlaksak tur leh a chhungte zinga kan tel ve theihna tur a ni, hlauhna atanga chhandam kan nih theihna tur nen. Chutiang nun chu I duh a nih chuan hetiang hian tawngtai ang che: 

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Wednesday, July 29, 2026

ENGTIK NIHAH EMAW CHUAN FIAH TAKIN I LA HMU VEK ANG

_Pathian Ṭhatna Hnuaia Len_

- Rick Warren
- July 29, 2026
"Kan hrehawm nep tak, tun mit khap kar chhung chauhva awm tur hian, ropuina nasa tak chatuan atan min siamsak nasa tulh tulh a ni. Thil hmuh theihte hi en lovin, thil hmuh theih lohte chu kan en zawk si a, thil hmuh theihte hi rei lote atan a ni a, thil hmuh theih lohte erawh chu chatuan atan a ni si a," (II Korinth 4:17-18).

Harsatna i tawh hunah chumi paltlang tur chuan fel takin i ti tur a ni. Pathian thu leh mi thurawn ngaithlain, thutlukna ṭha tak i siam a, hetah hian a tawp dawn lo tih pawh i hre reng chungin hma lam i pan zel a. Kumkhua a awh dawn lo a ni.

Living Bible chuan I Petera 4:12-ah heti hian a ti, "Duh takte u, fiahna na tak in zinga lo thleng hi thil mak tak lo thleng taah ngai suh u," a ti.

He khawvelah hian fiahna leh enchhinna hun a awm fo vang. Thil chiang sa a ni! Sualin khawvel a luhchilh aṭang khan engmah hi a ṭha famkim tawh lo. He leia engkim hi a chhe vek tawh a ni - sik leh sa, sum leh pai dinhmun, i taksa leh i ruahmanna ṭha berte pawh. He khawvela engmah hi a ṭha famkim lo, a chhan chu sualin engkim hi a tichhe vek tawh a ni.

Bible chuan, "Lei hi a awmnate hnuaiah chuan a bawlhhlawh zo ta, dante chu an bawhchhiata, thuruat chu an tihdanglama, kumkhaw thuthlung chu an bawhchhiat avangin...Lei hi a keh chhe vek a," a ti, Isaia 24:5,19.

He leiah hian engkim a bo a, kalsan a ni a, a buai vek. Thilsiam te ngei pawh an rûm a ni. Eng vangin nge Pathianin sual leh thil ṭha lo khawvela luhtir a phal tih kan ngaihtuah a ni mai thei, a chhan chu Pathianin duhthlanna min pek a duh vang a ni.

Thil ṭha lo titu chu keimahni ngei hi kan ti. Mahni hma sialin, mahni chauh kan inngaihtuah a, khawtlang leh kan chhehvelah harsatna kan thlen phah a ni.

He lei hi vanram a ni lo. Chuvangin isuan Lalpa Ṭawngṭaina, "I duh zawng vana an tih angin leia mi'n ti rawh se," (Matthaia 6:10) tiin min zirtir. Vanram chu lungngaihna te, natna te, ṭahna te leh hahna reng reng awm lohna hmun famkim a ni a, mahse leiah hian vanram beisei tur a ni lo. Engtik niah emaw chuan kan la thleng ang, mahse tunah chuan a la ni rih lo.

Harsatna i tawh mek hi i la paltlang em em ang. Reiloteah chuan i harsatna kara Pathianin a thiltih zawng zawng chu lehlam aṭanga thlirin mak i la ti hle ang.

Hmachhawn tur harsatna leh tuar tur thil dang a la awm zel dawn. Nimahsela he thutakah hian beiseina i nei thei a ni, "Kan hrehawm nep tak, tun mit khap kar chhung chauhva awm tur hian, ropuina nasa tak chatuan atan min siamsak nasa tulh tulh a ni. Thil hmuh theihte hi en lovin, thil hmuh theih lohte chu kan en zawk si a, thil hmuh theihte hi hi rei lote atan a ni a, thil hmuh theih lohte rawh chu chatuan atan a ni si a," (II Korinth 4:17-18).

Ngaihtuah zui atan

Harsatna i tawh mek kaltlang hian thlarau lam, taksa lam leh rilru lamah engtin nge ṭhanlen i beisei?

Pathianin thil ṭha lo a thlentir lo, mahse chu chu thil ṭha atan a chantir thei. I nunah emaw, mi dang nunah emaw harsatna aṭanga thil ṭha a hman dan i hmu tawh em?

Harsatna i tawh laiin eng thilah nge beiseina i nghah? Tung ding tur chein a tawk em?

[ *Lettu : Marova Punte* ]

Tuesday, July 28, 2026

RUAM ZAWH TURIN TUNAH INBUATSAIH RAWH

_Pathian Ṭhatna Hnuaia Len_

- Rick Warren 
- July 28, 2026
"A ni, thihna hlim kawr ruam zawh mah ila, thil ṭha lo rêng rêng ka hlau lo vang; nang ka hnênah i awm si a; I talhtum leh i tiangin mi thlamuan ṭhin a ni." (Sam 23:4)

Israel ramah khuan Jerusalem aṭanga Jeriko panna kawngah ruam thûk tak mai, Thihna Hlimkawr Ruam an tih chu a awm a. Lal Davida khan a dam laiin chu ruam chu a paltlang fo a ni tih a lang. Jeriko kawnga ruam ṭhenkhatte chu a mawng lamah a zuih thla a, feet 800 laia sang te an ni hlawm bawk. Chung ruam mawng aṭanga ni i hmuh theih hun chu chhun lai, kan lu chung zawna ni a awm lai chauh hian a ni. Bible-ah hian ruam tih hi hun thim, beidawnna, hneh nihna leh lungngaihna lam entir nan hman a ni fo ṭhin.

Sam 23:4-ah chuan heti hian kan hmu, _"A ni, thihna hlim kawr ruam zawh mah ila, thil ṭha lo rêng rêng ka hlau lo vang; nang ka hnênah i awm si a; I talhtum leh i tiangin mi thlamuan ṭhin a ni"_. Bible hian Pathian hi hun hlimawm kan tawh lai, tlang chhipa kan lawn chhuah tawh hnu chauha kan hlimpui a ni lo tih min zirtir a. Ruamah hrehawm tam tak i paltlan lai pawhin i hnenah a awm a ni. Ruam chungchangah hian i hriat reng tur thil pathum a awm:

Ruam hi kan nunkawnga tel ve tlat a ni a. Bible-in Deut. 11:11-ah heti hian a sawi, _"In va luah tur ram chu, tlâng te leh ruam leh van ruahtui dawng ram a ni zawk a."_

*Ruam chu a pumpelh theih loh.* Tunah khan ruam aṭangin i lo chhuak chiah a ni thei a, ruam lai takah i awm mek a ni thei bawk, i hmaah paltlang tur a awm a ni thei bawk. He leiah i awm chhung chuan ruam pumpelhna tur a awm lo. Ruam engzat nge i paltlang tih erawh i chhiar thei ang.

*Mi zawng zawng hmaah ruam a awm.* Tumah a hmaih lo. Mi ṭha lote chungah thil ṭha a thleng a, mi ṭhate chungah thil ṭha lo a thleng ve bawk. Khawvel kehchhia leh suala tlu tawha chêng kan ni a, chuvangin harsatna kan tawk ṭhin. Tuman harsatna an pumpelh thei lo. Tumahin natna an pumpelh thei hek lo. Tumahin harsatna tawk lovin nun an hmachhawn lo.

Bible chuan, _"Mi fel hreawmnate chu a tam a, nimahsela LALPAN chung zawng zawngah chuan a chhan chhuak ṭhin a"_ tiin min hrilh. 

*Ruam hi sawi lawk theih a ni lo:* I ruahman thei lo. A hun tur i hre thei lo.  Harsatna hian khel lovin min deng ṭhin. A nihna takah chuan, i ruamte leh i harsatnate chu hun chhe ber i tawh laiin a rawn thleng ṭhin —hun i neih loh lai te, i inrin  loh lai te, leh i remchan loh lai taktein a lo thleng ṭhin.  I mut laiten, i hriselna a ṭhat lai ten, tu mahin an tihbuai loh lai che te in ruam chu thlen tir thei zawk ta la a awlsam viau zawk ang em? Mahse nun hi chutiang chuan a kal lo.  Thufingte 27:1 chuan, _“A tûk lama thil lo awm tûr chhuang suh, chumi ni chuan eng nge a rawn chhuahpui dâwn i hre si lo"_ tiin min hriat nawntir a ni.

Hringnuna ruamah te beisei tur i hriat chuan, chu hun atana inbuatsaih dan tur ṭha i hriain Pathian awmpuina leh ruahmanna rinchhan zel i thiam ang.

Ngaihtuah zui atan.

* Tunah khan khawiah nge i awm: ruamah nge, ruam i lawn chhuak chiah nge, tlang leh ruam inkarah i awm mek nge, tlangchhip i thleng tawh zawk?

* Ruam te hmachhawn turin engtin nge rilru, taksa leh thlarauvah i lo inbuatsaih ve?

* Engvangin nge Pathian hian tlangchhip a awm ringawt lova ruamte kan paltlang a phal?

*[Lettu: Sangpuia]*

Monday, July 27, 2026

ṬAHNA RUAM I KAL LAIIN, I HRIATRENG TUR THUDIK PATHUM CHU

_Pathian Ṭhatna Hnuaia Len_

- Rick Warren 
- July 27, 2026
" _Thihna kawr ruam zawh mah ila, Thil ṭha lo reng reng ka hlau lo vang, Nang ka hnenah i awm si a_" (Sam 23:4 NIV).

Tun maiah ṭahna ruam, thihna hlim kawr ruam chu i zawh lo mai thei e. Mahse, kawng dangah  awmin, kawng harsa leh hrehawmah i awm mek mai thei. I hringnun zin kawngah, chung ṭahna ruama i awm laiin kawng harsa leh bumboh tak niin, i chunga Pathian ṭhatna chu hre lovin, i lo hmuh hmaih palh thei a ni. Mahse, chung hun khirh tak karah pawh chuan englai pawhin Pathian chu i ring thei a, aman a awmpui reng che  a ni. Ani chuan kawng dang ṭha zawk kawh hmuh a, hruai a tiam che a ni.

Sam ziaktu chuan, " _Thihna hlim kawr ruam zawh mah ila, Thil ṭha lo reng reng ka hlau lo vang, Nang ka hnenah i awm si a_" (Sam 23:4) a ti a ni.

Heng thudik pathumte hi chung "thihna hlim kawr ruam" i zawh lai pawhin, i hrereng tur a ni :

*Malin i awm lo, Pathian chu i hnenah a awm reng a ni*.

I nuna hlimthla lo lang chuan, eng in a awmpui reng che tih a ti lang fiah a ni. Engtin nge hlimthla chu i han hmachhawn ang? I hnunga hlimthla lo lang chu en lovin, eng chu en zawk rawh. Isua chuan, "Kei khawvel entu ka ni. Min zui la, tichuan thimah i leng tawp lo vang. Eng ka pek che nunna chu i nei ang" (Johana 8:12, CEV) a ti.

Bible chuan Pathian chu eng a nih thu sawiin, amahah chuan thim reng reng a awm lo, a ti. I nun tibuai a, tichiai leh tihlautu i ngaihtuah ṭhinna chu i titawp tur a ni: chung thil - bill chi hrang hrang, hrisel lohna, fate hun lo kal tur dawna buaina leh lungngaihna te emaw, nu leh pate kum lo tam zel vanga tar chak loh hun tur ngaihtuah chiamna te chu i chawlhsan tur a ni. I hlauhthawnna ringawt ngaihtuah chiamna i tihtawp veleh Pa Pathian chu i ngaihtuah thei ang.

*Pathianin thil ṭha leh tum mumal zawk a neih vangin, ṭahna ruama i kal a phal a ni*.

Pathian chuan thilsual a tithei lo. Harsatna chi hrang hrang, buaina leh lungngaihna emaw hlawhchhamna i hmachhawn mek lai pawhin, Pathian chuan hna a thawk reng a, tahna ruama i awmna chu thiltha tihna turin a siam mek a ni.

Rom 5:3-5 ah chuan, "Kan hrehawmna leh tuarnaah kan lawm a, chung thilte chuan chhelna min siam sak tih kan hria, tuarchhelna chuan nungchang tha leh hriatfiahna a siam a, nungchang ṭha chuan beiseina a siam a, beiseina chuan zahna min pe dawn lo, a chhan chu Thlarau Thianghlimin kan thinlungah Pathian hmangaihna chu a chhunluh tawh vang a ni" ( ESV).

*A tawpah lawmman chu a awm ang*.

Hlawhchhamna, hlauhna, lungngaihna, buaina, harsatna leh thihna hlim kawr ruam zawh laia Krista tana i rinawm tlatna chuan lawmman a pe dawn che a ni. Hetiang hian vanram i thlen hmain i la ngaihtuah ngei ang, "Engvangin nge maw ka lo sawisela phunchiar viau le? Chung tahna leh thihna kawr ruam zawh lai te chuan engah nge ka lo lungngaih em em le? Pathian chu englaipawhin, a hun tak zelah ka bulah a lo awm reng si a! Ani chu ka tan englaipawhin a tha em em a ni," tiin.

Bible-in a lo sawi angin, "Tuna kan hrehawmna te chu a te thamin, mit khar kar chhung ang lek a ni, a rei dawn lo. Chung thilte chuan ropuina nasa tak min siam sak zawk a ni" (2 Kor. 4:17, NLT), a ti.

*Ngaihtuah zui atan*

Tun maiah khan enge i hlauh ber? Eng dawt thuin nge tihlau zual che?

Tuna tahna leh thihna hlim kawr ruam i kal kai zawhah khan, engtinnge i hun lo kal leh zel turah Pathian thatna i lo tawn hriat tawhte chu i han hman tangkai ang le?

Harsatna leh buaina i tawh laiin, i chunga Pathian thatna leh hna thawh dan i lo tawn hriat tawhte chu engvangin nge, kawng dang i zawh leh hun tur atan a pawimawh ang?

*Vawiinah hian Isua i zui ang em?*

Pathian chuan a thatna chu a Fapa Isua Krista hmanga lan tirin, a tifiah a. Bible chuan, "Pathian chuan khawvel a hmangaih em em a: A fapa mal neih chhun, pakhat chauh chu a pe a, chutichuan tu pawh amah ringtu tawh phawt chu an boral lohva chatuan nunna an neihna turin" (Johana 3:16).

Pathianin chatuan nunna a tiam che chu nei turin, amah chu ring turin i inpeih em? I inpeih a nih chuan tihian tawngtai ta che: "Aw Pathian, i Fapa Isua Krista chu ka ring a. Misual leh thil tisual ngaihdam ngai ka ni tih pawmin, ka sualna ka puang a, i ngaihdamna ka dil che a ni. Isua thihna chuan ka sual a la bo tih ringin, amahah chuan nunna neiin thihna ata min kaitho tih ka ring a ni. Isua Krista chu vawiin atangin Chhandamtuah leh Lalah pawmin, amah zui turin ka inpe e. Ka nun min kaihruaiin i duhzawng titurin min tanpui ang che. Isua hmingin ka dil e. Amen".

Hetianga Isua hnenah ṭawngṭaiin i inhlan a nih chuan, khawngaih takin email: Rick@PastorRick.com-ah mi han hriattir dawn nia. Isua nen hun leh ni te i hman leh chhiar zel theih nan, i mamawh thilte thawn che ka duh a ni. 

*[Lettu: Sangpuia]*

Sunday, July 26, 2026

PATHIAN HRUAINA HNUAIAH CHUAN I CHIAI NGAI LOVANG

_Pathian Ṭhatna Hnuaia Len_

- Rick Warren
- July 26, 2026
_"I kawng chuan tuipuiah a hruai lut, i kalkawngte chu tui zau takah chuan a awm a - kalkawng a awm a ni tih tuma'n an lo hre ngai hauh lo."_ (Sam 77:19, NLT)

Bible chuan i thil tawnah Pathianin hna a thawk reng a ni tih min hrilh. Mahse Pathian finna lo chuan i tihdan kha i lo buk ve ngawt thei lo. Heti hian kan sawi thei ang, i hun tawnte hrilhfiahna hna chu Pathian kutah i dah tur a ni.

Pathian chauhin engkim a hrethiam a, thil te ber ṭangkaina pawh a hria a ni. Chuvang chuan engnge i paltlang mek tih fiah nan a Thu i hman a pawimawh a ni.

Thutlukna siam mai thei lova i chiai emaw tih ngaihna i hre lo emaw anih chuan mahni ngaihdan chauha i kal avangin Pathian aw i hre thei lo a ni mai thei. Bible chuan heti hian a ti, _"Pathian chu buaina Pathian a ni lo va, remna Pathian a ni zawk si a."_ (1 Kor. 14:33). Chiaina bul a ni lo. Chuvang chuan i chiai khan engnge ni le? I aw hriat kha Pathian aw a ni lo tihna a ni.2

Sum lamah te, thlarau lamah te, leh tisa taka harsatna lian tak i tawh hun a la awm ang. Chu'ng hunah chuan "Lalpa, ka sir tawn tawnah hian tlang sang tak a awm a, ka hmaah hian paltlang theih loh harstna lian tak a awm a ni" ti a i puan a la ṭul ang. Pathian chhanna nghak la, awmna tura a duh hmunah tak i awm a ni tih a hriattir che ang a. Kawng awm tawh lo ni a a lan hunah kawng a rawn hawng ang.

Sam 77:19-ah chuan heti hian kan hmu, _"I kawng chuan tuipuiah a hruai lut, i kalkawngte chu tui zau takah chuan a awm a - kalkawng a awm a ni tih tuma'n an lo hre ngai hauh lo."_

Kal ngaihna i hriat tawh loh hunah Pathianin a hruai ang che. Mahni hriatna leh theihna maia hringnun hmachhawn turin a siam lo che. Thil i siamṭhat leh mai theih i beisei a ngai lo.

Pathianin kawng dika hruai che a duh, a hnena i inpumpek a a kaihhruaina i dil hunah a hruai ang che.

Ngaihtuah zui atan.

Pathian hruaina dila i ṭawngṭaina chhanin a awm lo ni a i hriat avanga i lungngaih laiin engnge ti tura a duh che ni a i rin? Chu'ng thil i lo tawn tawh aṭangin engnge i zir le?

Chu'ng natna hmang chuan engtinnge i nuna a thiltum a lantir?

Engvangin nge Pathianin harsatna, tal chhuahna reng reng awm lo ni a langah a hruai che ni a i rin?

[Lettu: Mapuia Fanai]

Saturday, July 25, 2026

KHAWVELIN A NGAIHHLUT THILTE HMANGAIH LOVIN MIDANGTE HMANGAIH RAWH

_Pathian Ṭhatna Hnuaia Len_
   
- Rick Warren
- July 25, 2026
_"He khawvel nundan leh thiltihte la chhawng mai lo la, Pathianin i ngaihtuah dan thlak danglamin mi tharah siam che se rawh se. Tichuan Pathian duhzawng, a ṭha leh lawmtlak chu i zir thei dawn nia."_ (Rom 12:2, NLT)

Bible-ah hian chang hnih, ziaktu ngaiin a ziah, mahse a thuchah inkalh ang deuh ni a hmuh tur a awm:
1 Johana 2:15-ah chuan heti hian kan hmu, _"Khawvêl hi hmangaih suh ula, khawvêla thil awmte pawh hi hmangaih hek suh u. Mi tu pawhin khawvêl hi a hmangaih chuan, Paa hmangaihna amahah a awm lo."_ A sawi chiang hle mai!

Mahse Johana 3:16-ah chuan heti hian kan hmu thung, _"Pathianin khawvel a hmangaih em em a . . . "_ A chung zawk thu nen khian a inkalh hle niin a lang.

"Khawvel" tih hi heng chang hmun hnihahte hian kawng hniha hman a ni. Chang hmasa zawkah chuan khawvelin a ngaihhlut thilte sawi nan hman a ni a, a hnuhnung zawk hian khawvel chhunga cheng mihringte a entir thung. Isua hnung zuitute chu en hranna nei lova mi zawng zawng hmangaih tur an ni. Kawng leh lamah chuan khawvel ngaihhlut thil, nihna te, mahni hmasialna te leh hur sualna ang chite thlenga haw tur kan ni thung.

Harsatna lo awm ta chu heng khawvel awmzia pahnihte khi a letling thawka kan hmang ṭhin hi a ni. Khawvel ngaihhlut thilte kan ngaisang a, kan mihringpuite kan hawh leh thung si ṭhin. Kristiante hi hetiang hian kan nung fo. Danglamna nun nei si lovin khawvel thil kan ngaisang a, nawmsakna umin kan tlan ruai mai a ni. Mahse chu chu Pathianin min koh chhan a ni hauh si lo.

He khawvel dan anga awm tura nawrna nasa tak i la tawng dawn. Hei hi kum sang tam tak chhunga Israel fate harsatna lian ber a ni. Ram dang ang nih an duh ṭhin. Mahse hnam danglam bik an nih theihna turin Pathianin inkaihhruaina dan fel tak a siamsak vek a ni.

Chutiang chiah chuan Pathianin i tan leh ka tan a siam. Thuthlung Hlui dan hnuaiah kan cheng tawh lo, mahse Pathianin kan nun dan tur leh khawvela ding chhuak turin finna leh theihna neih dan min zirtir. _"He khawvel nundan leh thiltihte la chhawng mai lo la, Pathianin i ngaihtuah dan thlak danglamin mi tharah siam che se rawh se. Tichuan Pathian duhzawng, a ṭha leh lawmtlak chu i zir thei dawn nia."_ (Rom 12:2, NLT)

Pathianin ti tura a duh che i hriat theih lohna chhan ni thei pakhat chu tunlai khaw in khawsak phungin a ei ral lutuk tawh vang che a ni. Hei hi kan hriat miah loha thleng mek a ni. Mahse a rualin khawvel rilru leh Pathian rilru put hmang i la kawp thei lo. Duh i thlan a ngai.


Khawvel dan anga awm buaithlakna chu engmah hi nghet a awm lo hi a ni. Chatuan daih thil i zui a ngai: chu chu Pathian Thu hi a ni.

Pathian thutakin i rilru chhung khat la, khawvel thil ni lovin midangte hmangaihna kaltlangin i nun tidanglam rawh se.

Ngaihtuah zui atan.

I nuna thil pawimawh tak tak ziak la (chhungkua, eizawnna, kohhrana tel dan, ldt.), chungah chuan engin nge nawr kal che ziak bawk rawh. Chung nawr kaltute chu eng ang chiahin nge tunlai khawvelin a ngaihhlutah an innghah? Eng chen nge Pathian Thuah an innghah?

Engvangin nge rei lote daih thilte hi rei lote atana lungawina thlentu an nih i rin?

Eng kawngin Pathianin a hmangaih anga midangte i hmangaih?

*Vawiin hian Isua i zui dawn em?*
Khawvel hian i nun zawng kha chatuan daih lo thilah te innghat turin a thlem che a. Mahse thil ropui zawk, chatuan thil zawkah te innghat tura tih i ni. Pathian duhzawnga awm tur chuan a chhandamnaa kan innghah hmasak a ngai. Bible chuan heti hian a ti, _"Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân."_ (Johana 3:16)

Ngaihdamna leh chatuan nun atan Pathianah rinna i ngat dawn em? He ṭawngṭaina tawi hmang hian han ṭawngṭai teh le: "Lalpa, Isua Krista hi i Fapa a ni tih ka ring a. Ka sual lak bo anih theih nan Isua a thi a, nangin i kai tho leh a ni tih ka ring. Vawiin aṭang hian Isua hi Lal leh Chhandamtu atana pawm ka duh e. Min hruai la i duhzawnga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, July 24, 2026

MAHNI INDEMNA TIHBO DAN AWM CHHUN


_Pathian Ṭhatna Hnuaia Len_

By Rick Warren
July 24, 2026
“Mahse, ani chuan kan bawhchhiatna avângin hliam a tuar a,
Kan sual avânga sawisak a ni;
Muanna kan neih theih nân hrem a tuar a,
A vuak tuar chu kan tân damna tûr a lo ni. 
Berâm angin kan vâk bo vek tawh a,
Mahni duh lam lam kan pan ṭheuh va;
Lalpan kan zaa khawlohna chu
A chungah chuan a nghat ta a ni.” [Isaia 53:5-6]

Mitinte hian mahni indemna tur chhan ṭha tak eng emaw chu kan nei ṭheuh awm e. Tu mah hian thil tidik vek kan awm lo! Midang tihnat kan nei palh thei a. Mahni hma kan sial a. Ṭawngkam dengkhawng kan sawikhumte chu kan hmangaih takte an nih chang a awm. 

Pathian aṭang chuan i sualna i thup thei lo ang chiah chuan nangmah i indemna pawh i thup thei kher lo vang. Chu mai bakah chuan mahni leh mahni indemna chu thupbo i tum a nih chuan, chu chuan chhungril aṭang chuan a ei chhia ang che. 

Mahni indemna tihbo theih dan kawng khat chauh a awm: I sualnaah chuan thupha chawi la, Pathian ngaihdamna dil ang che. Bible-a “Thupha chawina” tih ṭawngkam chu Greek ṭawnga homologeo tih a ni a, a awmzia chu “thil inang sawi” a ni. Thupha chawi tih awmzia chu Pathian ngaihdan ang lo sawi ve tihna ang a ni: “Lalpa i sawi dik e. Ka dik lo a ni,” i tihna a ni. 

I thil tihsual tur zawng zawng – naktuk lama mi tur te, karleha mi te, kum 10 hnua mi turte chu a man pek tlak a ni tawh. Chu chu Pathian ṭhatna chu a ni. 

Isua chuan i indemna tur zawng zawngte chu a phur tawh a. Ani chuan ṭhatna – thiamchanna chu a pe tawh che. Chu chu thil pawimawh ber, Bible thu laimu pawh a ni: I thlarau chhe tawh chu siam thar a lo ni leh ta a ni. 

Bible chuan Isaia 53: 5-6 ah chuan hetiang hian a sawi, “Mahse, ani chuan kan bawhchhiatna avângin hliam a tuar a, Kan sual avânga sawisak a ni; Muanna kan neih theih nân hrem a tuar a, A vuak tuar chu kan tân damna tûr a lo ni. Berâm angin kan vâk bo vek tawh a, Mahni duh lam lam kan pan ṭheuh va; Lalpan kan zaa khawlohna chu A chungah chuan a nghat ta a ni,” tiin. 

Ngaihdamna chu i la tem lo a nih chuan Pathian thatna chu i la tem fiah tak tak dawn lo tihna a ni. Isua a thih khan kan sual zawng zawng chu a chingfel nghal vek. Tuifinriat thuk lai berah kan sualna chu thlak thlain chu hmunah chuan “Tumah kal phal loh” tih chhinchhiahna tar ta se chutiang vel chu a ni e. 

Pathian hmaah i sualte thupha chawi rawh. I sualte a ngaihdam a, a theihnghilh tawh chu i lo thar thawh ve fo a ṭul lo vang. 

Ngaihtuah zui atan. 

• Mite zingah mahni indemna an hmachhawn dan tlanglawn mahse hrisel hauh si lo chu engnge ni? 
• Mahni indemna vawiin hian i kalsan ngai si engnge i neih? Pathian ngaihdamna chang tur chuan a hmaa thupha chawi turin engnge nangma lamah i tih ngai? 
• Pathian khawngaihna hriat thiamna chu eng vangin nge lawmna hnar pawimawh tak a nih? 

Mahni indemna avanga i buaina pai reng ai chuan Pathian hmaa puan law law a fuh zawk. 

Bible chuan, “Kan sualte thupha kan chawi chuan, kan sualte ngaidam tûr leh kan fel lohna zawng zawng tlêng fai tûrin, amah chu a rinawmin a fel a ni,” tiin a sawi [I Johana 1: 9]. Vanram chu nangma chakna mai chuan i thleng thei lo tih a sawi bawk: “Rinna avânga khawngaihnaa chhandam in ni; nangmahni thawh chhuah a ni lo va, Pathian thilpêk a ni; thiltih avâng a ni lo ve; chuti lo chuan, miin an chhuang dah ang e,” tiin min finchhuah bawk [Ephesi 2: 8-9]. 

I sualte thupha chawia Isua nena a thara bul ṭan leh i duh a nih chuan he ṭawngṭaina thu hian ṭawngṭai ang che: 

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Thursday, July 23, 2026

BIBLE NIHNA LAIMU BER

_Pathian Ṭhatna Hnuaia Len_

By Rick Warren
July 23, 2026
“Muanna kan neih theih nân hrem a tuar a, A vuak tuar chu kan tân damna tûr a lo ni.” [Isaia 53:5]

Bible nihna laimu ber chu eng nge ni ang tia ngaihtuah chang i lo nei tawh ṭhin em? Hetiang deuh hi a ni: 

“Mahse, ani chuan kan bawhchhiatna avângin hliam a tuar a,
Kan sual avânga sawisak a ni;
Muanna kan neih theih nân hrem a tuar a,
A vuak tuar chu kan tân damna tûr a lo ni. 
Berâm angin kan vâk bo vek tawh a,
Mahni duh lam lam kan pan ṭheuh va;
Lalpan kan zaa khawlohna chu
A chungah chuan a nghat ta a ni.” [Isaiah 53:5-6].

Chu chu Bible pumpui nihna laimu ber chu a ni. I thil lo tihsual tawh zawng zawng – i la tihsual fo tur – man zawng zawng chu a pe tlak tawh. Nangma lama i lo tih ve tur zawng chu Pathian khawngaihna leh ṭhatna lo pawm mai chu a ni e. 

Ni khat chu pa pakhat hi inkhawm banah ka bulah a lo kal hlawk hlawk mai a, ka hnenah chuan, “Ka hriat a ngai – vanram kai tur chuan engnge ka tih ngai?” a lo ti thawr a. 

Kei lah chuan, “Aaaa… i tlai lutuk tawh” ka lo ti ngawt a. 

Ani chuan, “Engnge sawi awmzia chu? Ka tih ve tur chu a awm tur a ni,” a la ti fan a. 

Kei chuan, “Engmah a awm tawh lo. Isua Krista chuan kum 2000 liam ta khan a ti zo vek tawh,” ka lo ti a. 

Chu chu Kristianna sakhaw dang zawng zawng aia a danglamna chu a ni. Sakhaw dang chuan vanram kai tura kan tih tur eng emaw zat a sawi ṭhin. Sakhaw dang zirtirna khaikhawm theih dan chu “ti rawh” tih a ni thung. Kristianna khaikhawmna erawh “tih zawh a ni tawh” tih chu a ni. 

Isua krawsa an khenbeh khan, “A kin ta” tiin a au a nih kha [Johana 19: 30]. Chu mi awmzia chu Isuan a thawh zawhsak tawh che chu i tih ve tur eng mah a awm tawh lo. Tlawmna nena lo pawm mai chu i tih theih chu a ni, “Mi sual ka ni a, Chhandamtu chu ka mamawh e,” tiin. 

Vawiin hian pawm turin i inpeih tawh em? Isua chu i thinlunga lo awm tura i la sawm ngai lo a nih chuan chu hun ṭha chu i neih ngei theih ka duh hle mai. Pathian hnenah chuan a chhandamna thutiam Isua kaltlanga hlenchhuah chu dil ang che: 

“Ka pa duh tak, ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Ngaihtuah zui atan. 

• Isua chuan i chhandamna atan engkim a thawk zo tawh tih chu pawm harsa i ti em? Chhandamna chu i lo chang tawh chung chuan i chhandamna chu i thil tih hmanga chan i lo tum ve tawh em? 
• Pathian thlamuanna leh tihdamna chu i nunah chuan engtiangin nge i lo tem ve tawh? 
• I hun kal tawh, tun hun leh hmalam huna sualna te chu a man pek tlaksak i ni tawh tih hriatna chuan engtin nge a khawih danglam che? 

[ *Lettu:* Peka]

Wednesday, July 22, 2026

ISUAN I THLARAU A TIHTHAR LEH DAN

_Pathian Ṭhatna Hnuaia Len_

- Rick Warren
- July 22, 2026
"_Lalpa chu min vengtu a ni a, ka tlachham lovang. Ani chuan hlobet hring dup hmunahte min chawlhtir a, chawlhna tui kamahte chuan min hruai ṭhin. Ka nun a tiharh thar leh a, a hming avangin kawng dikah min kalpui ṭhin," Sam 23:1-3 ESV."_

Sam 23-naah chuan Pathianin i thlarau a siam thar leh dawn a ni tih Bible-in a sawi a. Mahse engati nge i thlarau chu siam ṭhat a ngaih a, Pathianin engtin nge a siam ṭhat theih ang?

Thlarau tihchhiatna kawng hi hrang hrang a awm a, mahse a tam ber chu huatna, thiam lohna leh lungngaihna te mahni a hmachhawn kan tum hian a ni. Thudik tak chu, chung phurritte chu nangmah chauha phurhtir che Pathianin a tum ngai lo. Chutiang a nih chuan Isuan engtin nge chawlhna a pek che a, i thlarau a tihthar leh ṭhin le?

*Isuan i natnate chu thianghlimnaah a chantir.*
A chang chuan kan natnate chu kan vuan tlat a, chumi awmzia chu mi dang chungah kan thin a rim reng tihna a ni. Tichuan miin an tihnat che avanga phuba lak emaw, thungrulh dan i ngaihtuah ṭan chuan i thinlung a kha ta a ni.

Mahse i natna chungchangah chuan Pathian i ring thei a ni. Thil ṭha lo aṭangin thil ṭha chhuahtir dan a hria a ni. Rom 8:28 chuan, "Pathian hmangaihtu, ama ruat anga a kohte tan chuan, an ṭhatna turin engkim a thawhsak ṭhin tih kan hria," (NIV) a ti.

*Isuan i sualte chu amah a inbel.*
Thiam lohna hi second nga chhung bak i vuan tur a ni lo va - i tihsual i hriat chhuaha, Pathian hnena thupha chawi nan leh i thlah zalen theih nan chauh a tawk a ni. Mahse mi tam tak chuan inpuanna tel lo sual phurrit chu an phur reng zawk a ni. 

Bible chuan, "Thi khawp hialin a inpe a, mi sualte zingah chhiar a ni a, ani zawngin mi tam tak bawhchhiatna phurin mi sualte tan a ngensak ṭhin," (Isaia 53:12 NIV). a ti. Pathianin a lo ngaihdam tawh che avanga inthiam lohna nena i nun reng a ngai tawh lo a ni.

*Isuan i lungngaihna a hriatpui che a, i thinlung a tidam.*

Lungngaih hi a ṭha a, nun inthlak dnglamna kan paltlang theihna a ni. Mahse a chang chuan lungngaihnaah kan tâng tlat ṭhin. Lungngaihna sawngbawl loh chuan a tina ang che. Mahse hei hi chanchin ṭha chu a ni: Isuan i lungngaihna a hrethiam a, amah ngei pawhin a lo tawk tawh a ni.

Isaia 53:3-4 chuan, "Ani chu mihirngte duh loh leh hmuhsitin a awm a. Lungngai thei mi leh na thei mi a ni a. Ani chuan kan natnate min tuarsak a, kan lungngaihnate a phur a lo ni zawk (NCV) a ti. Mahse i lungngaihna chu a hriatpui ringawt che a ni lova, a tidam leh a ni: "Lungchhiate chu a thlamuan a, an hliamte pawh a tuamsak bawk, " (Sam 147:3 NIV).

Pathianin i thinrimna, i thiam lohna leh i lungngaihna zawng zawng mahni a phur chunga nun hmang turin a ti lo che. Isuan siam thar leh tur che a a hnena lo kal turin a duh che a ni. "Nangni thawk rim leh phurrit phur zawng zawng te u, ka hnenah lo kal ula, keiman ka chawlhtir ang che u," Matthaia 11:28 NLT) tiin a tiam che a ni.

Ngaihtuah zui atan

Eng natnate nge i la chelh reng a, thinrimna a i chantir tawh? Chung natnate chu la a, i tana ṭhatna a chantir turin Pathian hnenah dil rawh.

Eng sual hluiah nge tun thlenga inthiam lohna neia i la tan reng? Minute tlem tal inpuang la, Pathian ngaihdamna pawm la, ngaihdam i nihna zalenna a nung turin Pathian puihna dil rawh.

Eng lungngaihna nge i la sawngbawl loh? Chumi hmanga damna a pek theihna tur chein Pathian hnenah dil rawh.

[ *Lettu: Marova Punte* ]

Tuesday, July 21, 2026

PATHIANIN LUSUNNA HMANGA A ṬHANTIR DAN CHE

_Pathian Ṭhatna Hnuaia Len_

By Rick Warren
— July 21, 2026
“Pathian hmangaihtu, ama ruat anga a kohte tân chuan, an ṭhatna tûrin engkimin a thawhsak ṭhîn tih kan hria.” [Rom 8:28]

Lusunna, channa leh natna te chu mihring nuna bet ve tlat an ni. Mahse chutiang thil chu Pathian chuan i ṭhanlenna atan a hmang tih i hria em? Kawng thumin a hmang a ni: 

*Pakhatna, Pathianin natna chu i ngaihtuahna laknan a hmang.* C.S. Lewin-a chuan “Pathian chuan kan nawmna hmunah chuan hmuiphunin min bia a, nun pangngaiah chuan min be satliah a, kan nat hunah erawh awrawl tawpin min bia,” tiin a sawi. Natna chu Pathian aurinna tawtawrawt a ni. Eng satliah kan hmuh chang chuan kan inthlak mai lo. A sat hunah chiah chuan kan inthlak danglam ṭhin. 

Thufingte 20: 30 chuan hetiangin a sawi, “Na taka vuakna hian sual simna a thlen a, Vuak nek hian chhûng lam a tithianghlim thei” tiin. 

*Pahnihna, Pathian chuan thil ṭha lo aṭangin thil ṭha a thlentir.* Bible-a thu lar ber pakhat chu Rom 8: 28 kha a ni awm e: “Pathian hmangaihtu, ama ruat anga a kohte tân chuan, an ṭhatna tûrin engkimin a thawhsak ṭhîn tih kan hria,” tih kha.  

I nunah channa i kaltlang changin i tana ṭhanna hun remchang a ni tih hria ang che. I kawng zawh mek chu i thlak danglam mai thei lo, mahse i kawng zawh lai chuan a tikha thei chein a siamṭha thei thung che. Hmasawnna rahbiah i chantir thei a, tlukna lung a ni hlauh thei thung. Hei hi hre tlat ang che, i natna hmunah pawh Pathian chu i ṭhatna turin hna a thawk a ni tih hi.  

*Pathumna, Pathian chuan chatuan hun atan a buatsaih che.* Bible chuan II Korinth 4: 17-18 ah hetiang hian a sawi, “Rei lo te chhûnga kan hrehawm tuar nêp tak hian chatuan ropuina, khaikhin rual loh khawpa nasa chu min siamsak a ni. Thil hmuh theihte chu kan thlîr lo va, thil hmuh theih lohte chu kan thlîr zâwk si a. Thil hmuh theihte chu a ral mai dâwn a, thil hmuh theih lohte erawh chu chatuanin a awm ang,” tiin. 

I lirthei kha vanramah i chhawm dawn lo tih an sawi kha i lo hre ve tawh awm e; i rangkachak emaw i thawmhnawm te emaw pawh kha vanram i kaipui dawn lo; i hnathawh pawh i chhawm hek lo vang. Mahse i nungchang erawh i chhawm dawn. Nangmah leh nangmah kha i inkaipui dawn a ni.  

Pathian chuan i nawmna hrim hrim aiin i nungchang siamṭhat zel chu a ngai pawimawh. Eng vangin? A chhan chu vanram i kai hunah chuan hahdam hun tam tak i nei dawn. He leia kan nun erawh inbuatsaih hun lai a ni a; a zir hun lai emaw inbuatsaih hun lai chauh a ni e. Pathian chuan he leia i harsatna chu i chatuan ropuina atana a buatsaihna che a ni. Chu chu nawmna chu a ni.  

Na eng emaw i neih lai chuan he zawhna hi inzawt ang che, “Pathianin eng nge a thawh?” I rilru lak a tum em ni? Thil ṭha lo ata thil ṭha din a tum em? Vanram atan i mizia chu a buatsaih em? 

Chung zawng zawngah chuan amahah i rinna i nghat thei ang. 

Ngaihtuah zui atan. 

I ṭhatna tur vekin Pathian chu hna a thawk tih awmzia chu eng nge ni? Pathian chuan amah ringtute tan thil ṭha chauh a thlentir tihna a ni mai em? 

Eng vangin nge vanrama kan tana thutiam thlir aiin nitin mamawh thlir hmasak chu a awlsam fo? 

Natna i hmachhawn huna Pathian aw i lo hriat theih nan tunah khan engtin nge i lo inbuatsaih ang? 

*I chatuan hmun khawiah nge i hman dawn?* 

Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi. Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

Isua kuta i nun hlan tura i inpeih a nih chuan hetiang hian ṭawngṭai ang che: “Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

*[Lettu: Sangpuia]*

Monday, July 20, 2026

PATHIAN KHAWNGAIHNA MAKAH CHUAN I HAHDAM THEI ANG

_Pathian Ṭhatna Hnuaia Len_
  
— Rick Warren 
— July 20, 2026
“[Pathianin] Kan taksa siam dan hi a hriat a, vaivut mai kan ni tih a hriat reng avangin” Sam 103:14
I hlawhchham hian Pathianin mak a ti lem lo. Dik tak chuan a beisei zawk a ni!

Biblein, “[Pathianin] Kan taksa siam dan hi a hriat a, vaivut mai kan ni tih a hriat reng avangin.” Sam 103:14. Eng atanga siam nge i nih a hria che a, nangmah siamtu che a nih avangin. I talbuai deuh pawhin Pathianin a hmangaih bang chuang lo che. I nihna avang emaw i thiltih avangin a hmangaih lo che a, a nihna leh a thiltih te avangin a hmangaih zawk che a ni.

Pathianin a siam che a. A hmangaih che a. Engkim a rel fel a ni. Pathian chu hmangaih zual deuh tur chein i ti thei lo va. Pathian hmangaihna chu tlahniam deuh tur pawhin i ti thei chuang lo. I thatni leh i chhiatniah pawh a hmangaihna che a pangngai reng a ni. A hmangaihna chu i thiltih that leh chhiatah a innghat lo.

Bible chuan hmangaihna ang hi tawngkam a nei a: khawngaihna a ni. Hei hi mak danglam tak a ni! Thil thalo tawpkhawk pawh ti mah la, Pathian chuan a hmangaih bang lo vang che. Chu chu khawngaihna mak tak a ni. A khawngaihna hi i pawm thei a nih chuan, i hlawhchhamna lakah pawh i hahdam thei ang a, nung zel tur pawhin inrintawkna i nei thei ang.

Pathian hnenah i thiltih sual ngai bawk avangin vawi tam ngaihdam dilin i kal maithei e. A hmangaihna leh khawngaihna chu phu tawh lo pawhin i inhre maithei e. (Phulo nih inhriain i rilru chu a awm tawh mai thei). Pathian chuan i rilru i thlak zin em avangin a ning tawh viau turah che pawh i ngai mai thei. (Chutiang mi chu a ni lo)    

Pathian hian titipui che hi a kham ngai lo va. Buai takin a awm ngai hek lo. Vawi engzat pawh ngaihdam dil turin kal tawh mah la, lo kuangkuah tur chein a lo nghak reng che a ni.

I seilenna chhungkua chu phutlet neia hmangaihna lantirna pawh a ni thei. I nu leh paten an hmangaihna che chu lehkha i thiam theihnaah te, infiamna i theihzawngah leh khawtlangah hlawhtlinna i chanah te pawh a innghat maithei a ni. Chutiang kawngah te i hlawhchham hlauh chuan chhungkaw hmangaihna chu i chan nghal dawn tihna a ni ang.

Hahdam takin i awm thei e. Pathian chuan chutiang chuan a thlir ve lo tlat mai che.

Bibleah Pathianin, “Batna lehkha thupeka ziak, kan chunga awm, min dodal thina chu a thai bo tawh si a: chu ngei chu kraws-a khengbetin a la kiang ta a.” Kolossa 2:14 

Kristian nun chu thilsual tih tawh miah lohna nun hi a ni lo va, amaherawhchu suala awmreng nia inhriatna laka fihlimna nun a ni thei a ni. Pathianin i hlawhchhamnate kha a hria a – eng vang pawhin a hmangaih che a ni.

Chu chu Pathian hmangaihna mak chu a ni! A thatna i chunga a lantir dan a ni a, chutah chuan i hahchawl thei ang.

Ngaihtuah zui atan

* Suala awm reng nia inhriatna laka fihlimna chuan i nunah eng nge nghawng a neih?

* Pathian chuan i tihsual leh i hlawhchhamnate chu khawngaihna, hmangaihna leh ngaihdamnatein a chhang let che a. Mi dang thil tisual leh hlawhchham ve te i hmachhawn danah eng nge nangmahah nghawng a neih?

* Tunkar chhung hian Pathian khawngaihna mak Chanchin Thar duhawm tak chu tu hnenah nge i sawi chhawn ve ang? 

*Pathian khawngaihna avanga chhandam i ni*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chuti lo chuan miin an chhuang dah ang e.” Ephesi 2:8-9

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtik niah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

*[Lettu: Sangpuia]*

Sunday, July 19, 2026

RIM TAWNG MAI LOVA LUANGCHHUAK NUN

_Pathian Ṭhatna Hnuaia Len_

By Rick Warren
July 19, 2026
“Kei grêp hrui chu ka ni, nangni a pêngte chu in ni; tu pawh keimaha awm renga, kei pawh amaha ka awm rengna chu, chu mi chu tam takin a rah ṭhîn; keimah lovin eng mah in ti thei si lo.” [Johana 15:5]

Hnathawh ṭul phurrit leh dam chhung lungkham indelhtir ai chuan Pathian ṭhatna hnuaia chawlh chu nuam zawk tak a ni. Mahse sawi ang maia awlsam erawh a ni lo. Chawlhna nun leh nun tam Pathian buatsaih nei tura rahbi awm rah ngai chu thil awlsam lem lo tak a ni ṭhin. 

Phurrit phur lova nitina luang chhuak nun neih dan kawng li kan sawiho dawn a ni. 

*Nitin Isua bel tlat rawh.* “Kei grêp hrui chu ka ni, nangni a pêngte chu in ni; tu pawh keimaha awm renga, kei pawh amaha ka awm rengna chu, chu mi chu tam takin a rah ṭhîn; keimah lovin eng mah in ti thei si lo.” [Johana 15:5]

I chakna mai rinchhana hringnun hi i hmang a nih chuan i rim tawng hun a thleng ang. I mawhphurhna hlen chhuak tur leh Pathian ṭhatna chu a thiltihtheihna kaltlang lo chuan i chen thei ngai lo vang. 

*I phunchiarna chu lawmnain thlak rawh.* “Phunnawi lo leh hnial lovin engkim ti rawh u.” [Philipi 2: 14] 

Mite an phun chang chuan lawmna chang an hriat loh vang a ni thei, chu chu an rilru chhungrila ngaihtuahna hrisel lo an neih vang a ni. A leh lamah chuan, lawmna thinlung thung chu rilru put hmang hrisel ber a ni thung. I thluakah chuan serotonin, dopamine leh Oxytocin a siam a, chu chu mite tihlim a, rilru hahna tikiamtu a ni. 

*Uikawm bansan la, thil phal zir rawh.* “Sâwma pakhat dik tak thawhlâwm bâwmah rawn dah ula, Tichuan, ka inah ei tûr a awm dâwn nia. He thilah hian mi han fiah teh rêng u, Vân tukverhte chu ka hawnsak ang che u a, Malsâwmna dawn sên loh ka vûr ang che u,” Engkim Lalpa chuan a ti.” [Malakia 3: 10] 

Pathian chuan khawvel pumpuiah dan zam a nei a: I pek chhuah tam ang zelin a let neih belh tur chu i nei tam ve zel ang. Pathianin chutianga a tih chhan chu amah ang turin a duh che – amah pawh petu a ni si a. 

*Khaikhin lovin i neih chinah lawm rawh.* “A dik thei e, hahdama vei khat neih pawh hi buai phîlîa thawka vei hnih neih ai chuan a ṭha.” [Thuhriltu 4: 6]. 

Lungawina nei tih awmzia chu tum emaw, duhthusam emaw, ruahmanna emaw i nei lo tihna a ni lo. A awmzia zawk chu hlim turin thil dang i dap hmasa kher lo tihna a ni. 

A tlanglawn chuan mi tam berte chu an lungawi lo ṭhin. Mahse Pathian khawngaihna avang chuan a ṭhatna hnuaiah chuan i chawl hahdam thei ang tihna a ni. I nuna thil tam berte khan Pathian khawngaihna thil thlawnpek a ni tih i hriat hun chuan i nun chu phurrit phur nun aṭang chuan Pathian tan i luang chhuak thei ang. 

Ngaihtuah zui atan. 

• Isua zawm reng theih dang kawng pakhat chu a Thu aṭangin a ni. Nitina Bible study neih chu a hahthlak a nih chuan thil te takte aṭangin bul ṭan ang che – minute rei lo te talin. Chu chu engnge a an ang? 
• Social media chuan i lungawina a chhuhsak chein i hria em? 
• Tun aṭanga ni thum chhung hi phunnawi lova lawm zawk turin thutlukna siam ang che. Chung ni thum chhung chuan lawmna thinlung nei tih awmzia chu nangmah leh nangmah inzawt ang che? 

[ *Lettu:* Peka]

Saturday, July 18, 2026

HRINGNUN HI INLAICHINNAA KHAT A NI

_Pathian Ṭhatna Hnuaia Len_

- Rick Warren 
- July 18, 2026
_"Tlâwm taka awm dân ka thiam a, hausaa awm dân pawh ka thiam bawk a; thil tinrêngah leh thil zawng zawngah tlai leh rilṭâma awm dân, hausa leh tlachhama awm dân thurûk chu ka hre chhuak tawh. Mi tichaktuah chuan engkim ka ti thei a ni."_ (Philippi 4:12-13)

Mi tam takte nunah chuan lungawina hi amahin a rawn thleng mai lo. Ka nihphungah hian hahchawlhna hmu mai lo mi kan ni a. Mahse lungawina hi kan zir theih thil a ni. Lungawina hmu tur chuan neih belh tum reng nun hi kan kalsan a ngai 

Philippi 4:12-13 ah chuan heti hian kan hmu, _"Tlâwm taka awm dân ka thiam a, hausaa awm dân pawh ka thiam bawk a; thil tinrêngah leh thil zawng zawngah tlai leh rilṭâma awm dân, hausa leh tlachhama awm dân thurûk chu ka hre chhuak tawh. Mi tichaktuah chuan engkim ka ti thei a ni."_

Californi chhim lam tuipui kama i kal chuan inchung lamah thil mawi tak tak i hmu ṭeuh ang, mahse  a mawina chen turin a neitute an awm hnai ngai lo. Chung in ropui leh mawi tak an lei rulhna tur chuan hna an thawk reng mai a ni.

Midang tam tak ang thoin neih belh tum reng rengin an hun an hmang ṭhin. He neih belh duhna hian i neih zawh loh tur, hetiang in ropui tak tak ang hi nei turin a nawr ta ṭhin che a. Sum thawk chhuak turin nasa takin i bei a, chawl hman lek lovin i beih a lo ngai ta ṭhin a ni. Rei lote hnuah taksa leh rilru lamah i lo hah ta em em a, chu chuan midangte nena in inlaichinna a tichhe ta ṭhin a. A tawpah chuan i in ropui taka chenna tur chhan i hloh ta ṭhin a ni.

Bible-in Thuhriltu 4:6-ah chuan heti hian min hrilh, _"Kut khing hnihah thli man tuma beih reng ai chuan rilru thlamuang tak chunga thil tlemte neih pawh a ṭha zawk"_ (GNT)

Hringnuna thil ropui berte hi kan thil neihte an ni lo.

Mi ṭhenkhat chuan "sum nei loa" thih hi chhiatna lian tak angah an ngai. Mahse thih hun ṭha zawk a awm chuang lo! I sum neih i hman zawh rual chiaha i thi anih chuan atthlak ni lovin finthlak ka ti ang.

Tumahin an thih dawn darkarah thil an dil ngai lo. Mi hmuh duh an neihte an ko zawk ṭhin, a chhan chu an hun tawpah hringnun hi inlaichinna a ni tih an zir chhuah vang a ni. Engvangin nge hei hi i zir thuai loh? Zir thuai la rilru hahna tam tak i pumpelh tur.

Hringnun hi engnge kan hlawh chhuah, thawh chhuah emaw eng thil nge kan neih belh emaw a ni lo.

Hringnun hi inlaichinnain a khat vel a ni.

Ngaihtuah zui atan.

Eng hi nge i ngaih pawimawh zawk - thil neih belh nge inlaichinna siam? Mahni i intehna hi i chhungte leh ṭhianten an pawmpui che ang em?

Thuhriltu 4:6-ah chuan heti hian kan hmu, thil neih belh tuma phili buai reng ai chuan _"rilru thlamuang tak chunga thil tlemte neih pawh a ṭha zawk."_ Engtik khan nge "rilru thlamuang tak chunga thil tlemte i neih"? Engtinnge chu chu neih belh ṭeuh tuma thawhrim aia a ṭhat?

Thil ropui tak hnutchhiah hi engnge ni a rin? Eng thil nge hnutchhiah i duh?

[Lettu: Mapuia Fanai]

Friday, July 17, 2026

I HLUTNA TARLAN I TUM NGAI EM?

_Pathian Ṭhatna Hnuaia Len_

By Rick Warren
July 17, 2026
“Nuin a fa hnute hne lai a theihnghilh thei em ni?
A rîla rah a lainat lo thei dâwn em ni?
Nuten an fate chu an theihnghilh mai thei e,
Kei chuan ka theihnghilh tawp lo vang che u.
Ngai teh, ka kutphahah i hming ka ziak tawh a,
I kulh bangte ka vêng reng ṭhîn a ni.” Isaiah 49:15-16 (TLB)

Buaina hnawk em em eng emawa i tang a nih chuan Pathiana i hlutna chu ngaihtuah nawn leh ang che. 

Chu chu i hna, eizawnna leh nitin hnaa i mimal hlutna i chhut ṭhin nen chuan thil hrang hlauh an ni. Khawvel nunphung pangngai nena inkalh an ni a, i thil ngaihtuah dan chu thlak hlawk a ngai hial thei, i ngaihtuahnaa “Hlutna i nei a ni tih mite hmaa i tarlan a ngai a nia” titu aw chu  i hmachhawn a ngai hial ang. 

Mi ṭhenkhat an hahdam theih loh chhan pakhat chu an hnathawh aṭanga an mimal hlutna an teh ṭhin vang a ni. An sum neih zat chu an mimal hlutna emaw an ti tlat. Hetiang hian an ngaihtuah, “Rim taka hna ka thawh a, ka hlawhtling ta a nih chuan ka hlu ang. Thawh chhuah ka neih mumal loh chuan hlutna ka nei lo vang,” tiin. Chu chu dawt mai a ni! European-ho nunah chuan, kan nihna hlimthla identity chu kan hnathawhah a innghat niin kan ngai a, kan hlutna finfiah tumin rim em emin hna kan thawk ṭhin. Thil tam tak kan ti thei a nih chuan hlutna tam tak nei angah kan inngai fo. 

Mahse hlutna leh eizawnna, hna thawh leh thil tih ṭhatte chuan inlaichinna an nei lo. 

I hlutna chu i tarlan kher a ngai lo. Pathian chuan khati mai khan a ngaihlu em em sa che. Tuna i hlut ai khan Pathian tan chuan i hlut belh leh thei tawh chuang lo; tun ai khan i hlu lo sawt thei tawh chuang hek lo.  

Eng ang taka hlu nge i nih? I Pa vana mi siam i ni; Isua i aiah a thi. Isua zuitu i nih chuan Thlarau thianghlim chu nangmahah khan a nung tawh a ni. 

Pathian chuan chhan mumal tak leh tum mumal tak nei lovin engmah a siam ngai lo. Tun dinhmuna i nun chhan pawh kha Pathianin a hmangaih vang chea nung i ni. I hlu em em a. Pathian kut chhuak ropui tak i ni e. 

I hlut leh hlut loh chu i thil tiha innghat ni lovin tu ta nge i nih tihah chuan a innghat zawk. 

Pathianin a chhinchhiahna che i taksaah khan a awm tih i inhria em? Bible chuan, “Nuin a fa hnute hne lai a theihnghilh thei em ni? A rîla rah a lainat lo thei dâwn em ni? Nuten an fate chu an theihnghilh mai thei e, Kei chuan ka theihnghilh tawp lo vang che u. Ngai teh, ka kutphahah i hming ka ziak tawh a, I kulh bangte ka vêng reng ṭhîn a ni” tiin a sawi [Isaia 49: 15-16] 

I famkim em? Famkim miah lo vang? I kehchhe mek em? Misual i ni em? Aw. Hlutna ropui tak nei i ni em? Aw! Pathian chuan tih tak zetin a hmangaih che. 

I hlutna chu kraws-ah finfiah a ni tawh. 

Ngaihtuah zui atan. 

• Tute hmaah nge mahni leh mahni intarlan chakna chu i lo neih? Eng vangin nge? 
• Pathianin a ngaihlu takzet che a ni tih hriatna chuan engtin nge a chawlh hahdamtir che?
• I thil tih hmanga Pathian chauh tihlâwm i tum a nih chuan i nunin tawnhriat a neihte tihdanglam a ni ang? 

[Lettu: Peka]

Thursday, July 16, 2026

CHAWLH MAMAWH TURIN PATHIANIN A SIAM CHE

_Pathian Ṭhatna Hnuaia Len_

Rick Warren
July 16, 2026
“Ei tûr zawnga zîng tak taka thawha, Tlai tak taka mut hi a hahthlâk thlâwn a ni. Lalpan a hmangaihte chu Malsâwmna a pe mai ṭhîn a ni.” [Sam 127: 2] 

Kan kohhran Saddleback Church kan din hlim khan ni khatah darkar 18 te hna ka thawk ṭhin. Kar khatah vawi hnih kan inah inhmuhkhawmna kan buatsaih ziah bawk. A kum khatna chawlhni hnuhnung berah chuan thusawi tura ka ding chu ka chau thut ringawt mai a ni. Taksa, thlarau leh inlaichinna thuah khan ka chau tawngkhawng a ni ber. 

A kum leha Pathianin zirlai pawimawh tak min zirtir chu a awm tawk/inbuktawka chet thiam zir chu a ni – chuta ṭang chuan vawi tam tak ka zir nawn fo a ngai ta hial. Ka thil zir chhuah pawimawh tak chu hei hi a ni: Chawlh huna chawlh duh loh tlat hi puitlin lohna a ni. Hei hi hre bawk ila, Rom chu ni khata sak thut a ni lo, kohhran leh thil ropui dang hrim hrimte chu an lo ni vek zawk. 

Bible chuan Sam 127: 2 ah hetiang hian min hrilh, “Ei tûr zawnga zîng tak taka thawha, Tlai tak taka mut hi a hahthlâk thlâwn a ni. Lalpan a hmangaihte chu Malsâwmna a pe mai ṭhîn a ni,” tiin. 

Pathian chuan thil engkim vawi leh khata thawk zo duak turin a phut kher lo che. Rahbi khat te tea i puitlinna tur kawng a zawhpui lai che chuan a tahtawl te tea inzir fing turin a duh zawk che. Pathian chu hmanraw hrang hrang hmanga i nuna hna a thawh lai chuan i nun pumpui chu ṭhang lian ve zel a ni. Pathianin i fate a ṭhanlentir mek lai chuan nangmah pawh a dawm kang zel che. Pathianin i hnaah hmuingilna a chantir mek lai chuan nangmah ber pawh kha a thantir zel che. Awmze neia i ṭhanlen theihna tur chuan Pathian ṭhatna chhunga i chawlh hahdam veng veng chang a awm ang. 

Thenkhat chuan hna an thawh lai te, an ṭawngṭai lai te, “thlarau thil” eng emaw an buaipui lai chauh chuan an chungah Pathian lawmin an ring a, mahse i chawlh hahdam veng veng lai pawh chuan Pathian chu i chungah a lawm em em tho. 

Fa nei nu emaw pa emaw i nih chuan i fate mut pindanah chuan zan laiah pawh lutin an muhil lai en vang vang chang i nei awm e, chu thil nuam tak a ni tih i hria ang. I Pa Vana mi chuan i muhil lai leh hahchawl lai thlir chu nuam a ti ve em em tho tih hria ang che. Chawlh mamawh turin a siam che. Pathian pawh kha a chawl a ni! Pathian aiin i buai zawk em? 

Bible-ah chuan hetiang hian kan hmu, “Kei leh Israel fate, kan inkâra thuthlung chhinchhiahna a ni ang; kei Lalpa hian ni ruk chhûngin lei leh vân ka siam zo va, a ni sarih ni chuan hna ka bânsan a, ka châwl a ni,” tiin [Exodus 31: 17] 

Eng vangin nge Pathian chu ni sarih niah a chawlh hahdam? A chau chu a nih a rinawm loh, a chhan chu Pathian chu a chau lo vang. Khawsak phung zirtir che a duh a ni ang: a hnathawh  chawlhsanin a chawl hahdam a nih kha. Chawlhni chu serh la, Pathian ṭhatnaah chuan chawlh hahdam ang che. 

Ngaihtuah zui atan. 

• I inah emaw, i school kalnaah emaw, i hna thawhnaah emaw chuan eng vangin nge chawl mang lova hna i thawh? 
• Bithliah neia nun hman chuan engtiangin nge thlarauvah chuan a ṭhanlentir che? 
• I nitin nun hman danah chuan hma chhawp i neihte tlingtlak hrim hrim duhna chuan a hruai che nge thlarauva puitlin tumin i nung zawk? Eng tiangin nge i khawsak? 

[ *Lettu:* Peka]

Wednesday, July 15, 2026

PATHIAN ṬHATNAAH CHUAN I CHAWL THEI

_Pathian Ṭhatna Hnuaia Len_

 •  Rick Warren
-  July 15, 2026
"_Ani chuan hlobet hring dup hmunah te mi bawhtir ṭhin a, chawlhna tui kamahte mi hruai ṭhin," Sam 23:2._

I hmanhmawh reng ṭhin em? I tih tur i ziah chhuahsa chu a sei lutuk em? Muangchang deuh turin mi pakhat aia tamin an hrilh tawh che em? I chawlh laiin inthiam lohna i nei em? I damloh lai chauhin i chawl ṭhin em?

Tunlai khawvel kalphung hian min nawr kal reng a, châwl lova thawk zel turin min ti a ni. Mi tam tak chuan chawlhniah  pawh hna an thawk a. Biak ina kal te pawhin, in an thlen veleh hna dang - in lam hna, zirna lam leh eizawnna thil an khawih leh nghal char char a, kar tluana an thawh zawh hman loh zawng zawng tihfel tumin an thawk leh nghal ṭhin.

Chau lo kan awm lo! Kan chau zo vek a ni. Mahse Berampu ṭha tak kawng chu chutiang a ni lo.

Sam 23:2 chuan, "Ani chuan hlobet hring dup hmunah te mi bawhtir ṭhin a, chawlhna tui kamahte mi hruai ṭhin," a ti.

Pathian chuan hlobet hring dup hmunah te a bawhtir che a - chu chu chawlhna a ni. Chawlhna tui kamah te a hruai ṭhin bawk che a _ chu chu tihtharna a ni.

Pathian chuan a ṭhatna avangin chawlhna a siam a, hnathawh tluka pawimawhah a ngai a ni. Berampu ṭha tak chuan a beramte an hrisel theih nan châwl hahdam turin a enkawl ṭhin. Pathian, nangmah enkawltu Beram Vengtu Ṭha pawh chutiang ve tho chu a ni. I mut duh loh chuan Pathianin a muttir ang che. A châng chuan chunglam i en theih nan Pathianin hnung lam delhin a muttir ang che. I taksa, rilru leh thlarau lam hriselna a ngaihtuah avangin chutiang chuan a ti ṭhin a ni.

Zan khat i mut ṭhat hnu a engkim a lo danglamzia te hi mak i ti ve ṭhin em? Rilru hahna leh malsawmna inkar hi a tam zawk chu chawlhnaah a innghat ṭhin.

I mangan a, i hmanhmawh a, i buai a, i hahdam theih lohna chhan tam tak hi i nuna Pathianin ṭhatna i hriatthiam loh vang a ni fo. Pathanin i tan a thiltih tawh leh nakin zela i tana a tih duh tur chu i hriatthiam chuan i châwl ang a, i hahdam thei dawn a ni. 

Pathian ṭhatnaah chuan nungin i khawsa thei a ni.

Ngaihtuah zui atan

Chawlhna leh tihtharna hi mi tinah a inang lo. Engin nge chawlhna pe che a, tiharh thar che?

Eng vangin nge thawhrim lutuk hi hmun tam takah ngaihhlut a nih?

I chawlh hahdam theih nan in lam leh i hna lama i hun hman dan tur chu engtin nge i thlak danglam theih ang?

[ *Lettu: Marova Punte* ]

Tuesday, July 14, 2026

LUNGNGAIHNA TIHKIAN DAN KAWNG LI

_Pathian Ṭhatna Hnuaia Len_

— Rick Warren 
— July 14, 2026

“Anin a ngaihsak ṭhin che u avangin in manganna zawng zawng ama chungah nghat vek rawh u.” 1 Petera 5:7

Lungngaihna hi tharum hmanga tihkian mai theih a ni lo — i hriatsa vek a nih kha, a chhan chu vawi tam i lo bei ve tawh a ni. Ti hian i ngaihtuaha, “He mi chungchangah hian ka lungngai tur a ni lo,” chu chu i rilrua awm dan a ni.

Hengte hi lungngaihna tihkian dan kawng li te chu a ni:

*Pathian hriat.*

Isuan Matthaia 6:32 ah, “Mi Pathian hre lo te chu an phili ruai ṭhin.” Pathian nena inlaichinna i neih loh chuan, lungngaihna tur tam tak i nei ang. Chuvang tak chuan Pathian i hriat a ngai a ni!  

Ringtu i ni a, van Pathian nangmah enkawl tiamtu che i nei a ni. Pathian fa i ni a, fate chuan duhsakna tam tak an dawng ṭhin. I lungngaih chuan, hmangaihtu Pa i hnena awm leh i tana awm nei lo ang maiin i khawsa tihna a ni ang.

*I nun kawng engkimah Pathian a hmasaberah dah rawh.*

Matthaia 6:31-33 ah chuan, “Ei leh in leh silh leh fen chungchangah lungkham suh ula. . ..chung zawng zawng chu in mamawh tih in Pa vana mi’n a hre reng a ni. A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia.” Pathian chu a laipui berah i dah zel loh chuan - eng ang pawhin i chungah ṭha mah se i lungngai zel tho vang.

*Ni khat atan zel nung rawh.*

Bible chuan, “Chutichuan, a tuk atan lungkham suh u, a tuk chuan ama tan a lungkham chawp dawn si a. Ni khat atan ni khat hrehawm chu a tawk a ni.” (Matthaia 6:34). Naktuk lo thleng tur avanga i lungngaih chuan, vawiinah i hlim thei lo vang. Naktuk ngaihtuaha i lungngaih zel chuan, i hmalam hun chu a buai tulh tulh ang. Pathian chuan i mamawh hun atan khawngaihna leh chakna pek a tiam che a ni. Tun dinhmunah chuan, vawiin atana chakna i neih hi a tawk a ni. 

*Ngaihsakna dawng turin Pathian ring rawh*

 “Anin a ngaihsak ṭhin che u avangin in manganna zawng zawng ama chungah nghat vek rawh u.” 1 Petera 5:7. Engtin nge i tih tak ang? Bible a Pathian thutiamte vawn hi kawng khat ah chuan a ni. Ringtu tan chuan insurance policy ṭha tak ang a ni. Thil engemaw khawihtu ṭha tak a awm chuan, i lungngai tawh lo vang. Kawng dang leha Pathian rin dan chu ṭawngṭaina hi a ni. I lungngaihna nasat ang zela i ṭawngṭai nasat chuan, i lungngaihna chu a tlem zel ang.

Heng kawng li kan sawite hi eng nge a rahchhuah? “Tichuan, Pathian thlamuanna, rilru reng renga hriat sen loh khan, in thinlung leh in ngaihtuahnate chu Krista Isuaah chuan a vensak ang che u.” (Philippi 4:7).

Ngaihtuah zui atan

* Mi dang anmahni chanchin pawh i hriatchian lem loh nen inlaichinna i nei tawh em? Eng nge a chhan? Eng vang nge?

* Pathian chu i nunah a hmasa berah a awm hun chuan engtin nge i hriat ang?

* Lungngaih ai chuan ṭawngṭai zel a ngai a ni tih i hriat zel theih nan, nangmah hriattir tu che, eng thil nge i tan ṭangkai ang?

*[Lettu: Sangpuia]*

Monday, July 13, 2026

PATHIAN THU THLUMNA TEM RAWH

_Pathian Ṭhatna Hnuaia Len_

— Rick Warren 
— July 13, 2026

“I thute hi ka tan a va thlum em! A ni ka kâ atan chuan khawizu aiin a thlum zawk.” Sam 119:103

Ka nupui, Kay-i nena kan inhual hnu khan, thil mak deuh mai kan ti a.  Khawvel chhim leh hmarah kan inthen tlat mai a nih chu. Birmingham, Alabama-ah ani chu a insawna, khawpui chhung kohhranah a thawk a ni. Kei ve thung erawh chu Nagasaki, Japan-ah kohhran din turin ka kal ve thung. Kan inhual chhung zawng khan kan awm hrang deuh reng a ni. 

Khatih hunlai khan Cell phone te a awm ve lova. Japan biak nan minute khatah Dollar 15 a kal zel a, kan rethei bawk si a. Chuvang chuan tih dan kan ngaihtuah a, lehkha kan inthawn ta thin zawk a ni. Nitin lehkha kan inthawn ta thin a. A lehkhathawn dawn chu nitin ka hna a ni ringawt. Lehkhathawn a lo thlen rual rualin ka hawng a ka chhiar thin. Ka chhiar nawn leh thin a, tlar tin mai hi ka bih nawn thin. Tlar thenkhat phei chu ka thai a, ka vawng bawk thin. Ka tana hmangaihna thu a lo dah zawng zawng chu lo khawlkhawm vek ka tum a ni.

Bible-a Pathian hmangaihna thu i chhiarin eng angin nge i dawnsawn ve, lehkha ka dawnsawn ang chiahin i ni ve em le? 

Bible thu i pai zawp loha, finna hrang hrang awmte i lakkhawm thiam loh chuan, Pathianin i tana ruai a siam chu i la ei ve lo tihna a ni ang. Sam 119:103 chuan, “I thute hi ka tan a va thlum em! A ni ka kâ atan chuan khawizu aiin a thlum zawk” a ti. 

Bible-ah hian ei tur tam tak a awm a. Hriselna tur atana thlarau lam chaw a awm a ni.

Pathian Thu hi i ei thin nge i nghei thin zawk? Kar khata vawi khat inkhawma, sermon ngaihthlak hi Pathian Thu eina a ni ngawt lo tih hi i rilruah awm se. Karkhatah vawi khat chauh chaw i ei chuan i thang thei lo emaw i hrisel thei lo ang.

Isuan, “Mihring hi chhang chauhvin an nung lo vang a, Pathian kaa thu tin chhuakin an nung zawk ang” a ti. Matthaia 4:4.

Nitin Pathian Thu i chhiara, i zir a, i ngaihtuah chuan, Pathian Thu thlumzia chu i ei thei ang a, i rilru leh thinlung chu a chawm thei ang. 

Ngaihtuah zui atan

* Sam 119 atang hian i duh lai thlang chhuak la, vawi tam chhiar la. Pathian Thu Chhandamtu thu i chhiarin, chu lai atang chuan ei tur leh thatna i tan Pathianin eng nge i neih tih i hre thei em?

* Pathian Thu chhiarna leh zirna hun zingah emaw tlaiah emaw insiamin danglamna i thlen thei ang em? 

* Bible hi Pathian hmangaihna lehkhathawn a ni tih i hriatin Pathian Thu i chhiar chakna engtin nge a tih danglam?

*[Lettu: Sangpuia]*

Sunday, July 12, 2026

ṬAWNGṬAINA KALTLANGIN PATHIANA RINNA NGHAH I ZIR

_Pathian Ṭhatna Hnuaia Len_
   
- Rick Warren
- July 12, 2026
_"Dîl rawh u, tichuan, an pe ang che u; zawng rawh u, tichuan, in hmu ang; kik rawh u, tichuan, an hawnsak ang che u"_ (Mat. 7:7)

Pathianin i mamawh zawng zawng a pe thei che a ni mai lo, pek che a chak em em a ni! Mahse pui tur che a Pathian a inpekzia i theihnghilh khan a ṭanpui dil lova mahnia innghah tum hi thil awlsam tak a ni.

A nihna takah chuan Pathian hnenah "thil lian thamah" chauh i dil ṭhin "thil te thamah" dil lovin. Engnge i ngaihdan? Pathian lakah chuan engkim hi te takte a ni. I dilna engmah kha Pathian hmuhah lian tham a awm lo. I samzai pakhatmah hmaih lovin a chhiar vek a, tukin zingah i tuichhe paihnaah i samzai engzat nge tla pawh a hre vek!

Pathian hnenah dilna i thlen khan i tibuai pha miah lo; ṭawngṭaina ruahman feltu hi amah a ni. Chuvang chuan Thuthlung Thar hian i mamawh apiang Pathian hnena thlen turin vawi 20 aia tam a hrilh che. Matthaia 7:7-ah chuan heti hian kan hmu, _"Dîl rawh u, tichuan, an pe ang che u; zawng rawh u, tichuan, in hmu ang; kik rawh u, tichuan, an hawnsak ang che u."_

A chang chuan Pathian hnena thlen lo hian kan lungkham ta em em ṭhin a. Mahse lungngaih tham khawpa lian anih chuan ṭawngṭaipui tham a lian tihna a ni. Lungngaihna hian engmah a chingfel lo, mahse ṭawngṭaina chuan a tifel ang.

Nu leh paten an fate an chunga rinna nghah dan an zirtir ang hian Pathianin i rinna a ṭhantur ṭhin. Bible chun heti hian a ti, _"Chutichuan, nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu Thlarau Thianghlim a va pe dâwn êm!"_ (Luka 11:13)

Heti hian nu leh pa leh fate inkarah a thleng ṭhin. Naupangin a mamawh a hria a. Chu a mamawh chu a lantir a. Nu leh paten a mamawh chu an pe ṭhin.

Pathianin chutiang chiah chuan amaha rinna nghah dan a zirtir che: mamawh i nei a. Chu i mamawh chu Pathian hnenah i thlen a. Anin i mamawh chu pe chein amahah rinna nghah i zir ta a ni.

Pathian hnenah i mamawh i thlen loh chuan engtinnge rinnaah i ṭhan len theih ang?

Pathian hnenah i dil chuan a ṭhatna a lantir ṭhin ang. Mahse a chang chuan Pathian hun tiam dawh thei taka i nghah a ṭul chang a awm ang. I rinna fiah a duh avangin a chhanna a pe thuai lo fo ang che.

Vawiin hian han ti ve chhin teh. Pathian hnenah ṭawngṭaiin i mamawh thlen la. I ṭawngṭaina chhanga i mamawh a pek dan che thlir rawh. Pathian hi a rintlak a, engpawh thleng se amahah i innghat thei a ni tih i zir chhuak ang.

Ngaihtuah zui atan.

Nangmah emaw Pathian chungchang emaw eng i hriatna dik tawk lo khan nge a ṭanpuina i dilna kawng dal ṭhin?

Pathianin amah i rinna a fiahna kawng lian ber pakhat chu sumah a ni. Engvangin nge ni a i rin?

Vawiin hian eng kawngah nge puih i mamawh? Pathianin i tana a tih tawhteah lawmthu sawiin bul ṭan la, a puihna dil rawh.

[Lettu: Mapuia Fanai]

Saturday, July 11, 2026

VAWIIN ATAN ISUAAH RINNA NGHAT RAWH

_Pathian Ṭhatna Hnuaia Len_

- Rick Warren
- July 11, 2026
_"Chutichuan, a tûk atân lungkham suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni."_ (Mat. 6:30)

I lungkham miah loh tur ni pahnih a awm: nimin leh naktuk.

Isuan heti hian a ti, _"Chutichuan, a tûk atân lungkham suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni."_ (Mat. 6:30)

Hun kal tawhah i cheng reng thei lo va. Hun lo la awm turah i cheng thei bawk hek lo. Vawiin zel hi a ni i hman theih chu.

Engvangin nge ṭum khatah ni khat zel i nun ang? Pakhatnaah chuan, naktuka harsatna lo thleng tur i lungkham tlat chuan vawiinin malsawmna a rawn kente i chan ang. Pahnihnaah chuan, naktuka harsatna lo thleng turte vawiin chakna hmangin i hneh thei lo. Naktuk a lo thlen hunah i mamawh ang thiltihtheihna, thlir dan dik, khawngaihna leh finna Pathianin a pe ang che.

Naupang ka nih lai khan ka mamawh engmah lungkham ka nei ngai lo. Ka nu leh pate hnenah kalin ka mamawh ka dil mai. Kan mamawhte kha engtinnge kan neih ang tih ka ngaihtuah ngai lo, a chhan chu mawhphurhna an la tlat a.

Pathian pawhin chutianga i tih chu a duh a ni.

Matthaia 6:30-ah chuan heti hian kan hmu, _"Chutichuan, ram hnim, vawiin anga nung, a tûka thuka tuah leh mai tûr mah Pathianin chuti kauva a chei chuan, aw nangni rin tlêmte u, silhfên a pe zâwk êm êm dâwn lo che u em ni?"_ 

I lungngaih khan Pathianin mawhphurhna a pek che ni miah loah mawhphurhna lak i tum ṭhin a. Vawiin hian Pathian mawhphurhna ni reng si kha i kut emaw tiin i lo lungkham vak thei a ni. I lungngaih khan Pathiana rinna nghat lovin i kovah engkim a awm emaw i tih ṭhin vang a ni. Van Pathian, i mamawh apiang petu che nei ta lo ang maiin i awm tihna a ni.

Bible-in, _"Kartluana kan ei tur chaw min pe ang che"_ a ti lova, heti hian a ti, _"Vawiinah hian kan ei khawpin chaw min pe ang che."_ (Mat. 6:11)

Pathianin ni khat atan zel amaha innghat turin a duh che. Vawiina i mamawh zawng zawng a pe ang che. Pathian ṭha tak anih avangin engmah i tlachham lovang tih ring rawh.

Naktuk atan ruahmanna siam chu a ṭha e. Mahse naktuk atan lungkham lutuk suh! Ni khat atan zel Pathianah rinna nghat rawh.

Ngaihtuah zui atan.

Vawiin hian Sam 23 hi chhiarin lo zir la. I lungngaih dawnin Pathian thu dang engnge ṭangkai thei ang?

I hun kal taa eng i lungngaihna kha nge Pathian hnenah i hlan ngai le?

I hma hun engin nge tilungngai che a, Pathiana rinna i nghah a ngaih le? 

*I hun kal tawh, tun hun leh inl hma hun atan Pathianah rinna i la nghat lo anih chuan engah nge i nghah khawtlai reng ang?*

Heti hian ṭawngṭai rawh le:
"Isu, ka rin phawt che chuan ka thil sual tih zawng zawngte ngaihdam niin engtik niah emaw i chatuan inah min hruai ang tih min tiam a. Kanl chhandamna ka thawh chhuah a ngaih loh avangin ka lawm e. Krawsa Isua tuarna zara Pathian thilpek a ni. 

"Ka sual ka puang a, i ngaihdamna ka dil e. Pathian, min Chhandamtu i ni tih ka ring. Vawiin hian ka nun zawng i lam ka rawn hawi e. Zahnaa nun aiin i chhandam hlimnaa nun ka duh a. Ka nunzawng hi mahni tan ni lovin i tana nun ka duh e. Ka hun kal tawh leh hma hun avanga lungngai mai lovin nangmaha innghah ka duh e. Ka nun i tan ka hlan a, min chhandam a, i chhungkuaa min pawm turin ka dil a che. Isua hmingin, Amen." 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, July 10, 2026

I NGAIHTUAHNA CHU PATHIAN THUIN CHHUNG KHAT RAWH, LUNGNGAIHNA NI LOVIN

_Pathian Ṭhatna Hnuaia Len_

By Rick Warren
July 10, 2026
“Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan, Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u.” [Philippi 4:6-7]

Lungkham eng emaw i neih chang chuan pai daih mai emaw, ngaihthah emaw, en kan emaw chu tum ting duh suh. Sawi chhuak mai zawk rawh. I dinhmun dik tak chu Pathian hnenah chuan hrilh ang che. 

I lungkham buaina chu nawr kian i tum ngawt chuan a ti na mai mai ang che. Soda bur eng emaw chu i thin vak hnuah freezer-ah i dah a nih chuan a puak vak mai ang!

Bible chuan i lungkham buaina te Pathian hnena thlen chu engtiang tak nge a ni tih hetiang hian a sawi: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan, Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u.” [Philippi 4:6-7]

Thlamuanna mihring hriatna khum daih chu engnge ni? Thlamuana eng emaw i neih changa a chhan sawifiah tur awm hauh lo ang chu a ni thei. I hna i chan a, mahse eng emaw takin i muang siai siai tlat. Eng vangin? Lalpa chu nangmah vengtu chu a ni. A chang chuan natna tihbaiawm tak “cancer” i vei tih i lo hre chhuak ta a, a chhan eng emaw tak avang chuan thlamuanna i nei tlat si. Eng vangin? Lalpa chu nangmah vengtu a ni. 

Mihring hriat thiam loh thlamuanna tih awmzia chu i lungngai lo emaw, i hnual lo emaw, i buai lo tihna emaw a ni lo. A awmzia ber zawk chu Pathian chu nangmah enkawl tur chein i ring tawk tihna a ni. Amah chu engkim chunga thuneitu niin engkim mai chu i ṭhatna turin a thawk dawn tih i hria a ni. I khawvel a thim chang pawh chuan a hruai dawn che a. I lungngaihna te chu ama hnena thlen turin a duh che, a chhan chu amahin a chingfel thei a ni. 

I lungkhamte Pathian hnena i thlen chinah chuan i ngaihtuahna chu thil eng emawa i chhun khah a ngai ang – Pathian thutak chuan. A tih theih dan kawng pakhat chu ngun taka ngaihtuah [meditation] a ni. 

Lungkham i thiam a nih chuan thil ding taka ngaihtuah [meditate] pawh i thiam ang. Thil ding taka ngaihtuahna [meditation] chu thil ngai ngaihtuah tluk tluk chu a ni ber. Dik tak chuan, eng emaw lungkham i neih changa i awm dan ang chiah khan i ti thei ang – thil eng emaw buaina i ngaihtuah ngut ngut ang khan Pathian thu chu ngun takin ngaihtuah ang che.  

Pathian thu thui vak lo chu ngaihtuah ang che. A tirah chuan Bible chang thlan chu muang changin chhiar la, a ri tein chhiar leh a, thumal eng emaw lai chu ngun thluk lehzualin ngaihtuahin/chhut ang che. A hnu chuan Pathian nihna chu chhutin a thu pumpui chu ngaihtuah rawh. Tichuan, Pathianin i thinlung a tihen thu chu sawi chhuak ang che, hmui phun satliah a ni thei a, a ri ngei pawhin a ni thei bawk. Pathian thuah chuan chawl ang che, Pathianin a thu hmanga thu a sawi duh chu chhutin ngaihthla ṭhin rawh. 

I ngaihtuahnaah chuan Pathian Thu nge i thil lungkham zawk chu i chamtir chhunzawm ang? Vawiin hian eng emaw tak chuan che chhuak ang che: I lungkham chu sawi chhuak la – A Thua Pathian Thutak awm chuan i ngaihtuahna chu chhungkhat ang che. 

Ngaihtuah zui atan. 

• Pathian hmaah chuan i buaina dik tak i sawi chhuah chuan awmzia a awm lehzualin i hria em? Eng vangin nge? 
• Sam 23 hi chhiar la, Pathian thu zir dan leh ngaihtuah dan kan zir kha han ti chhin teh. Eng ang pawlna thar nge i dawn?  
• Philipi 4: 7 chuan Pathian thlamuanna chuan i thinlung leh ngaihtuahna a vensak ang che tiin a sawi a. Chu chu engnge a awmzia nia i hriat? 

[ *Lettu:* Peka]

Thursday, July 9, 2026

PATHIAN RING DEUH DEUH LA, LUNGKHAM LUTUK DUH SUH

_Pathian Ṭhatna Hnuaia Len_

By Rick Warren
July 09, 2026
‘“In thinlung mangang suh se, Pathian ring ula, kei pawh hi mi ring rawh u.’” [John 14:1]

Mangang reng renga hun hman awmzia chu i lo la hre tawh mai thei a, nge i lo hre tawh zawk em? Ṭang deuh ṭovin hun i hmang ang a, i pum chu a let buk chang a awm hial ang a, i taksa pumpui chu a hah em em hial ang. Mahse chutianga i khawsak chu a ngai lo. Engkim hi zir thiam theih leh kalsan vek theih an ni. Tun hi chu lungkham nun chu kalsan hun tak a ni thei ang. 

Pathian chuan enkawl che a intiam a; chu chu a hna niin i hna a ni lo. Lungkham kan neihte tibo tura bul ṭan dan awlsam tak pakhat chu hetiang rilru pu chunga hun hman hi a ni: “Pathian chu a ṭha a, kei erawh ka ṭha lo” tih hi. Chu thutak ropui tak chu kan hriat thiam chiah chuan i nun aṭang chuan lungkham i neihte chu a lo bo ṭan hlek hlek ang. 

Bible chuan, ‘“In thinlung mangang suh se, Pathian ring ula, kei pawh hi mi ring rawh u,’” tiin min muan a ni [John 14:1].

Eng emaw avanga i lungngaih apiang chuan i nuna eng lai emaw Pathian kuta hlan hmasak loh chu i lo nei tihna a ni thei. Chuvang chuan i nuna eng emaw lai Pathianin a thunun loh avang chuan hlauhthawnna leh manganna i lo nei a ni. 

Chu chu engtianga tih chi nge ni ang? I nun chhungrilah chuan Isua chu i lo lawm thei ang. I nun khawi lai mai pawh chu a luh tlang phalsak ang che – sitting room, mut pindan, choka, ei relna leh thawmhnaw dahna zawng zawngte chu. A chhunga awm chu a hre sa vek a. Dik tak chuan Pathian chuan i mamawh chu i hriat aiin a hre chiang zawk. Mamawh nangmah pawhin i hriat lohte pawh chu an awm a – a enga mah chu Pathian tan an mak ngai lo vang. 

Isua chuan, “Chûng zawng zawng chu in mamawh tih in Pa vâna mi’n a hre reng a ni. A ram leh a felna chu zawng hmasa zâwk rawh u; tichuan, chûng zawng zawng chu a pêk belhchhah dâwn che u nia” tiin min chah [Matthaia 6: 32-33]  

Isua Krista chu i nuna hmun pawimawh ber i chantir chiah chuan i nuna ngaih pawimawh zawng te chu a zial fel ang a, i lungkham tur thil tam tak chu a tiawlsam dawn a ni. 

Isua chuan hetiang hian min zirtir, “Kei zawng berâm vêngtu ṭha ka ni; Pain mi hriat leh keiin Pa ka hriat ang hian ka ta ka hria a, ka ta pawhin mi hria a ni; tin, beramte tân chuan ka nun ka pe” tiin [John 10:14-15].

Pathian chuan thihsak ngam hial khawpa a hmangaih che avang chuan i ei tur pek che emaw, hruai che emaw, i mamawh pek che emaw chu a hreh hauh lo vang tih hre reng ang che. 

Heng hi han tum chhin teh: Tukin hian Pathian ṭhatna chu in hriatnawntir ang che. I thawh rual chuan i khum tlangah chuan ṭhuin, “Lalpa chu min vengtu a ni. Isu, vawiin hian ei tur min pe la, min hruai la, ka mamawhte min pe ang che. Ka nuna a hmun pawimawh lai ber chang vek ang che. Ka ring tlat ang che,” ti ang che. 

Tuk tin Pathian rinchhan chunga bul i ṭan a nih chuan i lungngaihna te chu a lo kiam deuh deuh ang. 

Ngaihtuah zui atan. 

• I nuna khawi lai “pindan” nge nangmah ngeiin i la thunun a, chu chuan lungngaihna pe che? 
• I lungkham tibo tur chuan eng vangin nge tlawm a ngaih? 
• Lungngaihna nei lo tur chuan tukin engnge tih hmasak ngai ṭhin? Zana i mut hma chuan engnge i tih ngai ṭhin? 

*Vawiin hian Isua i zui dawn em?* 
 
Bible chuan hetiang hian a sawi, “Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.” [Johana 3: 16]
 
Pathian chuan a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”
 
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 
 
[ *Lettu:* Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...