Saturday, August 31, 2024

I SUM BAWMAH NI LOVIN PATHIANAH BEISEINA NEI RAWH

_Nun Hunbi Hrang Hranga Ṭhan Dan_

- Rick Warren 
- August 31, 2024
_"He mi khawvela hausate hi chapo lo tur leh sum rinawm lovah hian an beiseina nghat lova, thil zawng zawng lawmna tura tam taka min petu Pathian chungah chuan nghat zawk turin zilh rawh."_ (1 Tim. 6:17)

Thil siam zawng zawng zinga lungngai ṭhin awm chhun chu mihring hi kan ni. Thlaite hi an lungngai ngai lova. Ramsa pawh an lungngai hek lo. Mihringte chauh hi vana Pa nei lo ang maia khawsa fo ṭhin kan ni. Sum lama i lungngaih viau chuan, "Pathian hi a daw thei anih ka ring. Ka mamawh min pek pawh hi ka ring chiah lo" i tihna a ni. Mahse a duh anga i awm phawt chuan a pe ang che.

Naupang ka nih lai khan ka pa bulah, "Pa, pawisa ka mamawh a nia" tiin ka dil ṭhin. "Khawi aṭangin nge pawisa chu a hmuh ang aw?" tiin vawi khat pawh ka ngaihtuah ngai lo. Ka lungngai ngai miah lo.

Lungngaihna hi Pathian awm rin lohna tluk a ni. I lungngaih apiang khan, "Min ngaihsaktu Pathian a awm hi ka ring lo a ni" i tihna tluk a ni. Ringtu ni chunga i lungngai ṭhin anih chuan nu leh pa nei lo ringtu ang mai i ni. Vana Pa, a thu kan awih chuan kan mamawh apiang pek min tiam a ni tih Bible hmun tam taka kan hmuh Pathian kha nei lo ang maiin i khawsa tihna a ni.

Lungngaihna hi zilh hauna a ni. Sum chungchanga kan mangan apiangin Pathian hmangaihna leh min enkawl a tiam thu kan rinhlelhna lantirna a ni. Pathian hmangaihna kan rinhlelh apiangin buaina kan tawk ṭhin. Kan tawk ziah ṭhin.

Matthai 6:33-ah chuan heti hian kan hmu, _"A ram leh a felna zawng hmasa rawh u, tichuan chung zawng zawng chu a pek belhchhah dawn che u nia"_ tiin.

Pathian aia hmangaih dang i neih chhung chuan chu i hmangaih zawka i tan buaina thlentu a ni ang a, chu thil chu engtik lai pawha chân thei i ni ang.

I sum bawm (bank account) kha eng anga lian pawh nise i inhumhimna a ni lo. 1 Timothea 6:17-ah chuan heti hian kan hmu, _"He mi khawvela hausate hi chapo lo tur leh sum rinawm lovah hian an beiseina nghat lova, thil zawng zawng lawmna tura tam taka min petu Pathian chungah chuan nghat zawk turin zilh rawh."_

Pathianah beiseina nei rawh, a chhan chu amah i rin phawt chuan i mamawh pe tur chein mawhphurhna a lak zel dawn avangin.

Ngaihtuah zui atan.

Pathian aia hmangaih i nei em? I chhanna kha i nun dan aṭangin mi zawng zawngin a dikzia an hmu ang em?

Ei leh barah emaw sum leh paiah emaw mamawh i neihin tu/eng chungah nge beiseina i neih?

I lungngaih hunin kawng danga ti turin engtinnge duh i thlan ang?

[Lettu: Mapuia Fanai]

Friday, August 30, 2024

RINAWM TAKA RETHEIH A ṬHA ZAWK

_Hunbi Hrang Hranga Ṭhan Dan_

By Rick Warren
— August 30, 2024
“Mi, a hmuia tihmawh,
â bawk si ai chuan
Mi rethei, rilru ṭha tak
pua awm chu a ṭha zâwk.” [Thufingte 19:1]

Pathianin mi rinawm lo mal a sawm ngai lo. Thufingte 16: 11-ah chuan hetiang hian kan hmu “Bûkna leh tehna dik hi Lalpa ta a ni a, ip rih zâwngte chu a ngaihtuah ṭhîn,” tiin. Chu chuan hlawh, hlawkna leh chhiah a huam ang. I sum neiha Pathian malsawmna dawn i duh a nih chuan sum chungah i rinawm ve a ngai. 

Bible chuan hetiang hian a sawi, “Mi, a hmuia tihmawh, â bawk si ai chuan mi rethei, rilru ṭha tak pua awm chu a ṭha zâwk.” [Thufingte 19:1]

Chu chu eng vangin nge tehkhawng pawimawh a nih? Sum harsatna i tawk mek a nih chuan rinawm chiah lova thil ti mai tura thlemna leh i mamawh phuhrukna atana hma lak mai a chakawm thei ang. Thil i hralh ṭumin thudik i zep hlek thei a, thil eng emaw man chu i chhiar to uchuak thei bawk. I chhiah chu dik tluantluang chian lovin i pe ve thei. I lawmman dawnah chuan puanhnuai thil a tel thei bawk ang. 

Chutiang thutlukna i siam apiang chuan i hloh zar zar ang a. Khuarei thlir chunga chung thutlukna kan teh a nih phei chuan i zel ang a, i zahawmna [integrity] chuan a tuar zel ang. Chung chu vanram i kaipui tur chu an ni: I nungchang chu, i pawisa ni lovin.  

Hlawkna ṭhenkhat chu rinawm lohna vang niin buaina a paipawn ṭhin. Eng vangin? Mite chu i bum a nih chuan, an la bum ve ang che. Mi i tihderh a nih chuan an la tihderh ve ang che. Bible chuan hetiang hian a sawi, “Bumin awm suh u, Pathian chu ngaihnêp rual a ni lo ve. Miin a tuh chu a seng leh ngei dâwn a ni,” tiin [Galatia 6:7]

Sum chungchanga rinawm tura thutlukna chu rei tak daih thutlukna a ni. Nitina thutlukna siam tur a ni bawk a. Mi tuten emaw dawt an la hrilh che ang a. A chang chuan i rinawmna chuan a la tuartir ang che. Chu chu i lo zir tawh em? A chang chuan i lehkha pawimawha thudik kher i ziah avang chuan harsatna i nei ang a. Mi tute mahin an hmu chuang lo a nih chuan a pawi vak dawn em ni tih mai erawh a awl fo. 

Mahse, Pathian chuan sum i hman danah i rinawm a nih chuan i sum leh pai mamawhnaah buaina i nei ngai lovang tiin a tiam che. 

Ngaihtuah zui atan

I sum thuah chuan vawiin hian engtin nge Pathian i chawimawi theih ang? 

Pathian chuan sum chungchanga thutlukna harsa tak i siam avang chuan engtin nge mal a lo sawm tawh che? 

Eng vangin nge sum chungchanga dik taka thil tih chu thil harsa zawk a nih? Bumin awm suh u, Pathian chu ngaihnêp rual a ni lo ve. Miin a tuh chu a seng leh ngei dâwn a ni si? 

[ *Lettu:* Peka]

Thursday, August 29, 2024

A MAN I PEK HMAIN ṬAWNGṬAIIN DIL RAWH

_Hunbi Hrang Hranga Ṭhan Dan

By Rick Warren
— August 29, 2024
“'Tûn thleng hian ka hmingin eng mah in la dîl lo; dîl rawh u; tichuan, in hmu ang, in lâwm a kimna tûrin.” [John 16:24]

Sum mamawhin Pathian ṭanpuina i nghak mek em? 

Pathian chuan i sum mamawh pek che a intiam e. I dil hun chu a nghak mai chauh che a ni!

Kan nuna thilmak [miracle] kan hmuh tam tawk loh chhan nia lang chu kan dil loh vang a ni. Kan nun hi Kristaa innghat lovin, leibaa innghat zawkin kan lo khawsa fo thin. Thil eng emaw kan mamawh changin, Pathian hmaa kun leh dil mai lovin, Pathian hnen aṭanga dil kan ngaihtuah hrim hrim hma chuan, kan lo ba mai fo. Krista aiin kan bat theihna lehkha [credit card] chu kan ring zawk fo. 

I nunah Pathian chu hna thawk tura i duh takzet a nih chuan ṭawngṭainain dil hmasa rawh a man i pek hma chuan i nei lo vang. 

Thil lian tham i lei hma chuan i ṭawngṭainaah i lo hlan tawh ṭhin em? I leibatna lehkha [credit card] chu i lo hmang mai zawk em? I leibatna lehkha chu i ṭawngṭai hmaa i hmang zel a nih chuan Pathian thiltih mak [miracle] awm theihna chu i tibuai zel tihna a ni. Thil eng emaw i lei hma chuan Pathian hnenah engtin nge i dil hmasak ang? 

Pathian chuan a hnenah ṭawngṭaina hmanga i dil zawng zawngte chu a pe nghal dawn lo che, mahse thil tam takah chuan i nunah thilmak a thlentir duh a ni. Mi ṭhenkhat chuan sum chungchanga ṭawngṭai ngaihna a hre thiam lo hle, a chhan chu an mumal taka an la dil ngai loh vang a ni. 

“'Tûn thleng hian ka hmingin eng mah in la dîl lo; dîl rawh u; tichuan, in hmu ang, in lâwm a kimna tûrin.” [John 16:24] Pathianin ṭawngṭaina hmanga thil eng emaw dil tura a tih chhan che chu i hre tawh em? A pek theihna tur, lawmnaa i khah theih nan a ni. Pathian chu min hmangaihtu Pa a ni a. Anmahni i mamawh a pek theih nan che, lawmnaa i khah theihnan a ni. Mi uikawm van lam hawi satliah i ni tawh lovang

Pathian chuan nun thara malsawm che a duh. I dil a ngai thung. 

Ngaihtuah zui atan. 

I sum hman dan leh i ṭawngṭai nun chu an thawk ṭha dunin i hria em? 

Thil lian tham in lei dawnin in chhungkua chuan engtin nge in buk ṭhin?

I nun chuan thil pawimawhah i sum nena Pathian i rinzia chu engtin nge a lan chhuantir? 

[*Lettu:* Peka]

Wednesday, August 28, 2024

I FATEN PHURNA AN NEIH THEIHNAN HRUAITU ATAN AN MAMAWH CHE

_Hunbi Hrang Hranga Than Dan

-  Rick Warren 
-  Aug 28, 2024
“Engkim a tuar hram hram a, engkim a ring a, engkim a beisei a, engkim a tuar chhuak thin.” (1 Korinth 13:7)

Khawvelah hian thil hi a chhe zawng hlir hian a kal tawh a, naupang an lo haw pawhin a thimin zawnga thil ngaihtuahin an lo haw tlat zel. Kolossa 3:21 ah chuan, “Pate u, in fate tinuar suh u; chuti lo chuan, an bei a dawng dah a ng e,” a ti a ni. 

Nu leh pa lungawina hmu lo zingah in tel ve em? Grade C an hmuh pawhin, B tal hmu se, B an hmuh pawhin A tal hmu se i ti em? Bible-in a sawi angin an beidawn mai i hlau lo em ni? Nu leh pa lungawi ngai lo chuan naupang him lo an chherchhuak duh chawk a nia. 

A nih chuan engtin nge mahni inringtawk naupang chu i chherchhuah theih ang? Bible-in 1 Korinth 13:7 ah hmangaihna chuan, “Engkim a tuar hram hram a, engkim a ring a, engkim a beisei a, engkim a tuar chhuak thin.” Naupang inringtawk tak chherchhuah i duh chuan, ṭahna an thlen che emaw, hlimna an thlen che pawhin chu aia nasa zawk chuan i hrual an ngai a ni.

Nu leh pa tam tak chuan, “Rualkhai taka ka enkawl chuan a tha mai” an ti a. Nimahsela chu chu a tha hauh lo. Sawiselna i pek apiangin fakna vawi 10 zel chhakchhuak thin ang che.  Engvangin? Sawiselna chu hriat reng a awl bik vang a  ni. Fakna 10 leh sawiselna 1 dawng dawn ta la, ina i haw hunah eng zawk khi nge i hriatrenga i rin? I sermon chungchangah, “I sermon ka hlawkpui lutuk” tih inziak 10 dawng la, 1 ve thungah, “I sawi tum i ṭhelh hlauh!” tih dawng ve thung la, khawi zawkin nge i rilru luah tam ang? 

A chhe lam i hneh theihna tur chuan a tha lam kha i uarpui a ngai a ni.

Naupang tute pawh hian an kianga tawiawmtu an mamawh a, lo fuih phurtu leh hetianga fuihna tawngkam te hi an mamawh a, “I ti thei tih ka hria. Ka ring che a lawm. I thiam lutuk. I tha ber. Kal zel rawh! I hnungah ka awm. I zo thei ngei dawn tih ka hria.” Naupang chuan inrintawkna anmahni enkawltu emaw an nu leh pa chauhin an pek theih an mamawh a ni.
Ngaihtuah zui atan

* Engtin nge naupang i enkawl tlangpui? Tawngkain nge? Thiltihin?

* Naupang hnena i tawngkam hman tlanglawn ber engnge ni? A eng zawng engtia tam nge? A chhe zawng engtia tam nge?

* I faten  anmahni fuihphurtu tha berah tu nge an thlan? Engvangin nge? 

*[Lettu : Sangpuia]*

Tuesday, August 27, 2024

I FATE MAWHPHURHNA PE LA RING NGAM RAWH

_Hunbi Hrang Hranga Than Dan_

-  Rick Warren 
-  Aug 27, 2024
“Tu pawh tlemte chunga rinawm chu tam tak chungah pawh a rinawm thin … Mi dang ta chungah mah in lo rinawm tawh loh chuan nangmahni ta chu tuin nge pe ang che u.” (Luka 16:10, 12)

Naupang pawhin tawnhriat an neih ve a tul, an talent haichhuahna tur te, rawngbawl tura an nun chher chhoh a tul a ni. Mawhphurhna laa chona an hmachhawn a ngai ve a. Hringnuna zir tur pawimawh kan neih vek chu mawhphurhna hlenchhuah dan zir hi a ni.

Engtin nge i fate chu mawhphurhna lak dan i zirtir? Kawng khat chiah a awm: Hun remchang siamsak rawh. Mawhphurhna pe la ring ngam rawh. An tisual ang em? Tisual khawp ang. Nangmah ngei pawh khan i thanlennaah i tisual a ni. Mawhphurhna hlen lo va an awm chang a awm ang em? Awm dawn e. Nimahse, mawhphurhna chu i laksak chuan, i fate rilru i tina ang. Fate enkawlna kawnga nu leh pa mawhphurhna chu an tetlai chuan nu leh pa thuhnuaia awmtir a ni a, an thatlai hunah chuan mahni inthunun thei tura zirtir a ni a, an puitlin hnu leh an damchhunga an zirtir tur chu Pathian thuhnuaia awmtir a ni.

Inthunun reng ngai chu i ning tihna em ni! Mawhphurhna kan lak pawhin mi dang hnen atangin kan la thin a ni lawm ni. I fate chu naute anga i enkawl reng chuan an thang thei lo vang, damchhungin diaper i thlaksak an ngai dawn a. Mi dang tel lo va awm thei loin i siam tihna a ni.     

Nu leh pa tam tak chuan hetiang hian min hrilh a, “Bul ka tan tha leh thei ngat a nih chuan, kan fate tan thil ka tihsak tlem ang a, anmahnin an tih tam theihna turin ka zirtir thung ang,” a ti. Kan lo thanlenna chhan pawh hi chona kan hmachhawn a, kan lo paukhauh zel a, mawhphurhna hlen dan te pawh kan lo zir chho zel zawk a ni.

Bible chuan, “Tu pawh tlemte chunga rinawm chu tam tak chungah pawh a rinawm thin … Mi dang ta chungah mah in lo rinawm tawh loh chuan nangmahni ta chu tuin nge pe ang che u,” a ti. (Luka 16:10, 12)

Naupang chuan an mawhphurhna an hlen mai zel. Vawi tam nu leh pa bula ka sawi, kan in ngei pawha ka hmuh chu fate rin loh tawp ai chuan kan rin avanga an lo tihsual pawh a la lawmawm zawk a ni.  Engti kawng zawng pawhin thil chu an tisual dawn! I tih tur chu mahni inthunun tura ke pen mek chherchhuah leh, a pawimawh berah chuan, Pathian thuhnuaia awm tura inchherchhuah hi a ni.

Ngaihtuah zui atan

* I fate chunga rinna i nghah ngamna leh an kum mila rinna i nghahna hi engnge a danglamna?

* Naupang mawhphurhna pe chunga rinna i nghahnaah hian khawtlangah harsatna a awm em?

* I fate eng kawngah nge mawhphurhna lak dan i zirtir ang? 

*[Lettu : Sangpuia]*

Monday, August 26, 2024

I FATE NEN LAWM THIN RAWH!

_Hunbi Hrang Hranga Ṭhan Dân_

Rick Warren
Aug 26, 2024
“A ni, mi kum tam tak a dam chuanin, hêng zawngah hian lâwm rawh se; Amaherawhchu, hre reng sela thimna nite, An tam hle mai dâwn si a. Thil lo thleng zawng zawng hi eng mah lo mai a lo ni.”
‭‭Thuhriltu ‭11‬:‭8‬ ‭

Naupang chuan thil han lawm an mamawh ṭhin.

Chu chu hlimna tih ṭawngkam dang a tih theih ang. Chhungkuaah chuan hlimna han siam a ṭul ṭhin a. Chhungkua chu infiamna hmun a ni tur a ni a. Hei hi chhungkaw tam tak tihsualna a ni. Nu leh pate chuan an fate an enkawl uluk em em a, mahse han infiampuina hun erawh an nei leh si lo. An buai em em ṭhin a. Hna aṭanga an ban pawhin tih tur ruahhmansa tam tak nen inah an haw a. Chung chu tih vek ṭul an ti a, infiamna atan hun an nei ngai lo a ni.

I fate chu i dawh hram hram nge, i hlimpui ṭhin em? Naupang hian hlim an mamawh a nia.

“A ni, mi kum tam tak a dam chuanin, Hêng zawngah hian lâwm rawh se; Amaherawhchu, hre reng sela thimna nite, An tam hle mai dâwn si a. Thil lo thleng zawng zawng hi eng mah lo mai a lo ni.”
‭‭Thuhriltu ‭11‬:‭8‬ ‭

Kan fate an ṭhanlen mek lai khan, thil pakhat tih ṭhin kan nei a. Hunbi nei tak hian, kan remruatsa zawng zawng ka ti danglam vek a, "Tih tur kha chu theihnghilh rawh u, kan intihlim dawn a ni" ka ti ṭhin. Zanlaiahte hian ka kai tho thuta, motorah chuanpuiin thil ho tak tak ka tihpui ṭhin a. A tukah school kal tur mah ni se ka tihpui tho ṭhin. Ni khat school han ṭhulh phah ta se? Kha hun kha erawh chu an hre reng thung dawn a ni. Zing taka ka kaihthawh a French chhang a rawng pawh hring veka ka siam ka eitir ṭhin te kha an hre reng ngei ang.

Bible chuan, "Naupangte hi Lalpa laka kan rochan an ni a" tih leh "thinlung hlim hi damdawi ṭha tak a ni a" tiin a sawi a. (Sam 127:3, Thufingte 17:22). I fate nen khan hun hlimawm tak hmang ula. Chen thin ang che.

Nunphung pangngai ang lova nikhat hun hmanpui khan an nun a tichhe dawn hauh lova. Mahse hun bik tak mai, atthlak taka kan hmanpui khan an hriat reng tawh tur thil ṭha a hnutchhiah ve thung dawn a ni.

Ngaihtuah zui atan...

Eng zawk nge i tan pawimawh zawk: i hun ruahman sa nge i fate nen a hlimna? Engvangin?

Engvangin nge kan fate hi kan tih tur aia kan dah pawimawh a ṭul chang a awm ṭhin?

Tun karah hian i fate nen hun hlimawm tak engtin nge i hman theih ang? Chutiang ti tur chuan engnge i kalsan ngam le?

(Lettu: Msa)

Sunday, August 25, 2024

I FATEN I KHAWNGAIHNA AN MAMAWH

_Nun Hunbi Hrang Hranga Ṭhan Dan_

- Rick Warren 
 August 25, 2024
_"Duh takte u, i inhmangaih tawn ṭheuh ang u; hmangaihna hi Pathian laka chhuak a ni si a."_ (1 Johana 4:7)

Nu leh pa ṭha tak ni a chhungkaw duhawm tak din i duh chuan lehkhabu dawra kala zawn emaw internet-a zawn emaw a ngai lo. Fate enkawlna kawnga lehkhabu ṭha ber hi en mai rawh: Pathian thu, Bible hi.

1 Johana 4:7-ah chuan heti hian Bible-in heti hian a sawi, _"Duh takte u, i inhmangaih tawn ṭheuh ang u; hmangaihna hi Pathian laka chhuak a ni si a."_ 

Thil dang zawng aiin naupangte hian englai pawhin hmangaihna, delhkilh nei lo hmangaihna an mamawh a ni. An nihna anga pawm an nihna, an thiam loh ang anga pawm an nih thlapna hmun an mamawh a ni.

Khawngaihna/lainatna chu engnge ni? Lainatna chu hmangaihna leh hriatthiamna infin a ni. Lainatnaah chuan mi, chiang taka i hriat hnu pawhin amah duhna i la nei tlat a ni.

Hmangaihna hi amaha lo awm ngawt a ni lo. Hmangaih tura i zir a ngai. I hmangaih theih nan i tihchhin a ngai ṭhin. I damchhunga i chenpui turte aia ṭha hmangaihna zirna a awm dawn em ni? I chhungte hmangaih i zir phawt chuan midang zawng zawng i hmangaih thei ang. Engvangin maw? A chhan chu kan hlata awmte hi hmangaih an awlsam lutuk, mahse inhnaih taka in awm reng chuan a awlsam miah lo. Chhungkuaa inhmangaih in zir chuan inhmangaih tak tak in zir tihna a ni.

Hei hi thil awm dan fo a ni: kan fate kan hmangaih, mahse an hriatthiam dan turin kan tilang lo fo. Naupangte hian kawng thumin hmangaihna hi an hrethiam ṭhin: ngainatna, pawmna leh ngaihsaknain.

*1. Ngainatna.* Naupangte hian kuah, fawh, hnunga chûl, bana kaih, pawm, leh thil dang tam tak an mamawh. I hmangaihna kha hmu lo mahse an hriat theih tura ngainatna hmanga i lantir an mamawh a ni.

*2. Pawmna.* I fate kha nitin- ni khatah vawi khat aia tam i hmangaih thu hrilh ṭhin rawh. I hmangaih a ni tih an pawm thlap theih nan hrilh ṭhin la, hmangaihna nen chawm lian rawh.

*3. Ngaihsak.* Midangte thilpek i pek theih hlu ber zinga mi chuan an thu ngaihthlak hi a ni. Naupangte an kum mila i kawm hian, "Ka tan i hlu a ni. I pawimawh lutuk. Engnge i sawi duh ka ngaithla duh a ni." i tihna a ni. Hetianga i tih chuan i lainatna i lantir tihna a ni. 

Ngaihtuah zui atan. 

Eng kawng hrang hrangin nge i faten hmangaihna  dawnga an lantir ni a i hriat? 

I fate chungah ngainatna, pawmna leh ngaihsakna nitin i lantir theih nan vawiin hian eng tihdan emaw chin dan emaw nge i tih ṭan theih le?

Fa i neih loh chuan i laina hnai fate emaw, i ṭhenawmte fate emaw lakah engnge i mawhphurhna?

*Pathianin Isua kaltlangin a lainatna che a lantir a ni.*

Pathianin a Fapa Isua Krista kaltlangin a lainatna che a lantir a. Bible chuan heti hian a ti, _"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan. Khawvel thiam loh chantir turin Pathianin a Fa khawvelah a tir lo, khawvel amah avanga an dam theihna turin a tir a ni zawk e. Tupawh amah ring chu thiam lohvin an awm lo vang, tupawh ring lo chu tun apangin thiam lohvin an awm, Pathian Fapa mal neih hming an rin loh avangin."_ (Johana 3:16-18)

Pathianin chatuan nun pek min tiam ring turin i inpeih em? I inpeih chuan heti hian ṭawngṭai rawh le: "Lalpa, Isua hi i Fapa a ni tih ka ring a. I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Min hruai la, i duhzawnga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, August 24, 2024

CHÂNNA HUN I TAWNIN I NGAIH PAWIMAWH HMASAK TUR TICHIANG RAWH

_Nun Hunbi Hrang Hranga Ṭhan Dan_

- Rick Warren 
- August 24, 2024
_"Hringnun hi miin thil a neih tam aṭanga teh a ni lo"_ (Luka 12:15, NCV)

Chânna leh chhiatnate hian thil thlir dan min neihtir ṭhin. I ngaihhlut thilte tarlangin engnge i dah pawimawh hmasak tur an hrilh ṭhin che. A hma zawnga i lo tih ṭhin aia nasain engnge pawimawh ber an hriat chhuahtir ṭhin che.

Mite leh kan nunphung hian i thil neihte hian tunge i nih tih leh hringnunah hian eng hian nge awmzia nei ber tih an hril a ni tiin i rilruah tuh an tum a. Mahse Luka 12:15-ah chuan Isuan heti hian a ti, _"Hringnun hi miin thil a neih tam aṭanga teh a ni lo"_ (NCV). I neih hlutzawng kha i hlutna nen hriat pawlh suh. Inzawmna reng an nei lo. I neih thilte kha Isuaa i dinhmun leh a siam chhan che nen hriat pawlh suh. I nun innghahna leh i nun i chênna kha hriat pawlh suh.

I dam chhan hrechiang turin chânna nun i hmachhawn thleng i nghak thei. Anih loh pawhin i ngaih pawimawh thilte thliar hrangin engnge pawimawh i hre thei ang: inlaichinna leh midangte. Midangte hi an pawimawh, thil dang ni lovin.

Thil pawimawh lohah te i hlimna hloh suh.

Mitthi kuang zawntuten mitthi bungraw neihte kuang hnunga an hnuh i hre ngai em? 1 Timothy 6:7-ah chuan heti hian kan hmu, _"Khawvelah hian engmah kan luhpui si lo va, engmah kan chhuahpui thei bawk hek lo."_ Texas khuaa oil zuar ṭhin pa pakhat a car man to tak nen an phum thu ka hre ṭhin. A car man to tak chawpa an phum lai chuan a bula ding pakhat chuan, "Ṭhianpa, hei hi a nung anih hi!" tiin.

Ni lo- he pa hi a thi tawh!

Himna dik tak nei tur chuan i hnen ata tumahin an laksak theih loh tur cheah nun nghah chhan i neih a ngai. I hna an laksak thei che em? Thei e. Hna him an tih ang tak hi a awm thei lo. I hriselna i hloh thei em? Thei e. I kawppui i chân thei em? Thei e. I tleirawl hmelṭhatnna i hloh thei em? Thei e.

I hnen ata tumahin an laksak theih loh tur che: Isua Krista kaltlanga Pathian nen inzawmna nunah i nun kha nghat rawh.

Isua nun innghahna ṭobulah i neih chuan hun harsa leh khirh lai ber i tawn hun pawhin beiseina leh thlamuanna i nei ang. Chânna hun kha ṭha takin i paltlang thei ang.

Ngaihtuah zui atan.

I nunah engnge pawimawh ber ni a  i nunin a tarlan?

Eng kawng dangin nge i ngaihhlutzawng tihlanin a puih che?

I nunah ngaih pawimawh zawng i neih theih nan in inlaichinna tichak turin engnge i tih ang?

[Lettu: Mapuia Fanai]

Friday, August 23, 2024

I LUSUN LAI CHUAN I LUNGNGAIHNA CHU LANTIR RAWH

_Hunbi Hrang Hranga Ṭhan Dan_ 

By Rick Warren
— August 22, 2024

“A mite u, eng lai pawhin ani chu ring ula,
Engkim hrilh ṭhîn rawh u,
Kan belh Pathian a ni si a.” [Sam 62:8]

Bible chuan eng emaw i hloh lai chuan i thiltih hmasak ber tur chu i lungngaihna inbunruah chu a ni tiin a sawi.  

Chhiatna reng rengin rilru a nghawr dawt zel a – thinrimna, hlauhna, beidawnna, a chang chuan zahna min thlen fo. Chu thiltawn chuan min tihlau fova, engtianga lo tih tur nge kan hre lo thin. Thil lian deuh eng emaw kan hloh chang chuan, chutiang phurrit chu kan chhungrilah a inthuah tup tup zel. Tun ngeia kan chingfel lo a nih chuan, chinfel a harsa tulh tulh dawn tihna a ni.  

Thenkhat chuan lusunna an la tuar chiah lo a ni thei a. Chung mite chuan lusunna chu an ngai thutak lo thei. Thenkhat chuan an ngaihthah hrim hrim a ni thei ang. Lusunna chu thil awm ve lo ang maiin an ngai holam thei bawk. A chang chuan a awm ngai miah lo anga lantir pawh an tum bawk. Chuvang chuan kum 20 emaw 30 liam taa an buai tawhna rilru natna nen chuan an la inbuan zui ta zel a ni thei. 

Pathian chuan nui ver ver chunga khawi hmunah pawh kal kual reng a, “Lalpa chu fakin awm rawh se,” ti reng turin a duh che a ni tih chu an sawi ve leh tlat zel. Chu chu Bible khawi laiah mah hmuh tur a awm lo.  

Dik tak chuan, Isua chuan chumi letling chiah chu a zirtir zawk. Matthaia 5:4 ah chuan hetiang hian a sawi, “Lungngaite chu an eng a thâwl e;
thlamuanin an la awm dâwn si a,” tiin. Lungngaih chu a pawi lo. Ringtu tha tak pawh nise an hmangaihte chu an thi a nih chuan, vanram an kai dawn tih chu kan hria, mahse khawvel mite anga kan lungngaih chu a dik lo vang. Kan lungngaih dan chu a danglam tur a ni. Kan sun chhan chu kan la ngai dawn a ni, mahse hahdam takin kan awm thei thung, a chhan chu Pathian hnenah an awm a ni tih kan hriat avangin. 

Thil dang tam takah pawh kan lungngai thin: nupa inthennaah, mi a hna atanga ban a nih te, leh tum anga a hlawhtlin theih loh te chuan. 

I lungngaihna chu engtin nge i tih tak ang? I chhungrilah up beh tum reng reng tawh suh. Inbun ruak rawh – Pathian hnenah hlan la. “Lalpa, ka na a ni! Ka lungngai a ni! Hei hi chu a harsa a ni” i ti ang. 

A entirna tha tak i duh a nih chuan, Sam bu chu chhiar ang che, chu changah chuan Davida khan a paukhauhna dahthain hetiang hian a sawi thin, “Lalpa, Tunah hian hun harsa ka hmachhawn mek a. Ka na hle mai.” Davida ang chiah khan Pathian chu tih tak zetin au ve mai rawh. 

Sam 62:8 chuan hetiang hian a sawi, “A mite u, eng lai pawhin ani chu ring ula,
Engkim hrilh ṭhîn rawh u,” tiin. Chiang taka i hriat ka duh che i lungngaihnate chu i phawrh lo a nih pawhin amahin a lo la chhuak tho tho dawn tih chu a ni. Lungngaihna emaw lusunna emaw chu up beh  tum viau pawh ni ila engtik niah emaw chuan a lo chhuak leh tho tho ang. A puak kehin a aia nasa zawk leh hlauhawm zawkah a insiam thei bawk.  

I lungngaihna chu bun ruak phawt rawh tichuan Pathian chuan i thinlung na chu a tidam thei ang. 

Ngaihtuah zui atan. 

In khawtlang inkaihhruainaah chuan eng ang ngaihdan dik loin nge i lungngaihna chu phawrh hrehtir che? 

Eng ang lusunna leh chakna nge i nunah khan i buan mek? Eng ang chiahin nge a nghawng che? 

Mi lusun tu emaw chu kohhran chuan engtiin nge a tanpui theih ang? Engtin nge i lawina kohhran chu langtlang zawka kalpui a nih theih ang? 

[ *Lettu* : Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...