Thursday, April 30, 2026

ṬAWNGṬAINA DIK THILTIHTHEIHNA

_Hlim Reng Theihna Dan_

By Rick Warren
April 30, 2026
“Tin, in hmangaihnain hriat famkimna leh bengvârna tinrêng a ngah lehzual nân ka tawngtai thin; chutichuan, Pathian ropuina leh fakna tûra Isua Kristá zára felna rah awm chuan lo khatin, Krista ni atân chuan a tak tak leh sawisêl bo in nih theihna tûrin, thil tha bîkte chu tha in ti thei ang.” [Philippi 1:9-11]

Paula kha midangte tan a ṭawngṭai satliah ngai lo. Hlim takin a ṭawngṭai ṭhin!

Midang nunah thil thlak danglam duh i nei a ni thei. Nangmahin i tihdanglam ringawt duh lovin anmahni ngei an inthlak chu i duh bawk ang. Mahse nangmah chuan i thlak thei lo vang – mahse anmahni i thlak danglam theih dan chu, i ṭawngṭainain Pathian chuan an nunah hna a thawk thei.  

Ngaihtuah dik aiin ṭawngṭaina dik chuan thil a ti thei zawk. Khawvel pumpuia ngaihtuahna dik infawkkhawm pawh chuan i nupui/pasal, fate, ṭhian leh dinhmun chu an thlak danglam dawn lo. Ngaihtuahna dik chuan nangmah chu a thlak danglam mai thei che, mahse midang chu a thlak danglam lo vang. Mahse ṭawngṭaina dik thung chuan i nun leh mite nun ngei pawh chu a thlak danglam thei ang. 

Inlaichinna ṭha lo siam ṭhat dan rang ber chu eng nge ni ang? I hmelma tana ṭawngṭai chu a ni! Chu chuan a tidanglam ang che a, anmahni pawh a tidanglam bawk ang. 

Paula chuan midang tana ṭawngṭai dan pawh min hrilh nghe nghe: “Tin, in hmangaihnain hriat famkimna leh bengvârna tinrêng a ngah lehzual nân ka ṭawngṭai ṭhin; chutichuan, Pathian ropuina leh fakna tûra Isua Kristá zára felna rah awm chuan lo khatin, Krista ni atân chuan a tak tak leh sawisêl bo in nih theihna tûrin, thil tha bîkte chu tha in ti thei ang” [Philipi 1: 9 – 11] 

Heng Bible thu aṭang hian midangte tana ṭawngṭai dan kawng li lai kan zir thei ang: 

Hmangaihnaa i ṭhan len theih nan ṭawngṭai ang che: “hmangaihnain hriat famkimna leh bengvârna tinrêng a ngah lehzual nân  . . .”

Thutlukna fing an siam theih nan ṭawngṭai ang che: “. . . ṭha tak in lo nih theih nan . . .”

Dik taka an nun theih nan ṭawngṭaisak ang che: “. . . sawisêl bo in nih theihna tûrin . . .”

Isua an an theih nan ṭawngṭaisak ang che: “. . . Krista kaltlanga a felna an lo chan theih an leh Pathian chawimawia a awm theihna turin.”

Heng thu hmang hian i tan leh midang tan ṭawngṭai ang che. I dinhmun duhawm lo tak chu Pathian chuan engtin nge a thlak danglam tih lo thlir ang che. 

Ngaihtuah zui atan. 

• Inlaichinna chhe mek eng emaw ngaihtuah la. Mi tuten emaw hmangaihnaa an ṭhan len theih nan, thutlukna dik an siam theih nan, dik taka an nun theih nan leh Isua an an deuh deuh theih nan i ṭawngṭaisak dawn nia. 
• Midang tana i tawngtaisaka tan mai ni lovin ṭawngṭaina dik chuan engtin nge a thlak danglam ang che? 

Galatia 5: 22- 23 chhiarin han ngaihtuah vang vang teh. Isua i zuina kawngah chuan chutiang “rah” chhuah tam zawk chu i lo hmuh zel theih ang?  

Chu thutiam chu chang tura i inpeih a, Pathian rorelna hlau lo tur leh atana i nun hlan tura i inpeih a nih chuan he ṭawngṭai thu hmang hian ṭawngṭai ang che: 

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Wednesday, April 29, 2026

I HRIAT RENG TUR CHU THLANG FEL RAWH

_Hlim Reng Theihna Dan_

- Rick Warren
- April 29, 2026
"Min puih avangin Pathian hnenah lawmthu ka sawi e," (Philippi 1:5 NCV).

Puala chuan Philippi a kohhran a din hnenah lehkha a thawn a. Chutah chuan, Lidia-i hming pu hmeichhia chu a inhawngin, mi dangte nen Paula chu khawpuiah an lo lo lâwm a. Philippi kohhran chuan Paula rawngbawl zelna tur chu sumin an ṭanpui ṭhin. Philippi-ah chuan Paula'n, "Min puih ṭhin avangin Pathian hnenah lawmthu ka sawi e," a ti.

Paula hian Philippi-ah hian nuam takin hun a hmang lo. A tira kohhran din a han tum kha a tana harsa ber pawl a ni. Paula'n he khawpui hi kohhran din tura a kal khan vuak a ni a, hruia hlap a ni bawk a, tihmualphoin a awm a, dâwta hêk a man a ni a, lung inah khung a ni bawk a. Lirnghing nasa tak a paltlang a. Chumi hnuah khawpui chhunga hruaituten khua chhuahsan turin an ti bawk a.

Paula chuan ringtute hnenah, "Nangmahni ka ngaihtuah apiang che uin, Pathian hnenah lawmthu ka sawi ṭhin," a ti (Philippi 1:3 NLT). Paula hian helaiah hian eng nge a tih? A ngaihtuahna a thlang fel a ni. Philippi kha Paula tan chuan hmun nuam a ni lo. Chutah chuan tihduhdahna leh tuarna nasa tak a tawk a. Mahse chûng hrehawmna a tuar zawng zawngah chuan a chêng reng duh lova. Chu ai chuan a tana thil ṭha an tihsakte leh amah kaltlanga thil ṭha lo thlengte avangin lawmthu a sawi zawk a ni.

Mi tu emaw chu i hriat rei zawh poh leh i ngaipawimawh lo tawlh tawlh a, a thiam lohna lai i zawng a, a thil ṭha tih aiin, a thil tihsual i hre reng zawk ṭhin.

Miin an tihnat tawhna che kha i la vuan bet tlat reng em? Kum tam liam taa i laka an tihsual kha i la ngaidam thei lo a ni mai thei. Tunah hian khâng mite nena in inzawmna kha i chên nuam thei lo, a chhan chu thil hlui kha i la thlah duh tlat loh vang a ni.

Hriat reng theihna hi duhthlanna a ni tih i hriat a ngai. Clara Barton, American Red Cross dintu chanchin hi ka sawi tawh. A ṭhian pakhatin kum tam liam taa miin a chunga thil sual leh râwng taka an tihsak tawh kha a hrilh nawn a. A ṭhian chuan, "I la hre reng lo'm ni?" a ti a. Clara-i chhânna ropui tak chu, "Aih, ka theihnghilh tawh tih kha chiang takin ka la hre reng," tih hi a ni. 

I ngaihtuahna a hriat reng tur thil hi i thlan theih a ni. I natna hriatreng i duh chuan vuan  bet tlat rawh. Mahse i hlim ngai chuang lovang. Paula khan Philippi khua a hrehawm a tawrh kha ngaihtuah zui tur chhan tam tak a nei. Mahse chu ai chuan a nuna mite avangin lawmthu a sawi a, amah leh chung mite kaltlanga Pathian hnathawh avanga lâwm a thlang zawk a ni.

Paula anga i tih ve hunah chuan Pathianin in inlaichinna chu i beisei phâk bakin mal a sawm ngei ang.

Ngaihtuah zui atan

Eng vangin nge hrehawm tawrh hriat rengna chu thil ṭha lam  hriatrenga aiin vawnbeh a awlsam zawk ṭhin?

Thil ṭha hriat reng tur ngaihtuahna hian nakin huna i beiseina chu engtin nge a tihdanglam?

Vawiinah hian Pathianin i nuna a dah mite chungah engtin nge lawmthu i sawi ang?

[ *Lettu: Marova Punte* ]

Tuesday, April 28, 2026

I NUNHLUI AVANGIN I RILRU TINA SUH

_Khawngaihna Kara Thilmak_

By Rick Warren 
April 28,  2026
“Hmangaihnain a dawh thei a, ngil a nei bawk ṭhîn; hmangaihnain a îtsîk lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va.” 1 Korinth 13:4-5

I chhungte leh i ṭhiante tana i tih theih ṭha tak pakhat chu khawngaihna lantir hi a ni. Khawngaihna chu thiltiha lantir anih chuan hmangaihna hi a ni.  I chhungte leh i ṭhiante an ṭha lo chung leh an phu lo chung pawha zahngaihna i lantir chuan khawngaihna an chungah i lantir tihna a ni. 

Khawngaihna i lantir lehna tur pakhatah chuan hun kal tawha i natnate liamtir hi a ni. 

I chhungten thil an tihsualin ilo chhinchhiah zel ṭhin em ni?

I ṭhianten i rilru an tihnat tawhte kha i hrechhuak leh zung zung ṭhin em? Bible chuan hmangaihna diktak chuan huatna a pai reng lo va,  phuba lak duhna pawh a nei hek lo a ti a ni. Huatna thinlung ila put reng chuan hmangaihna i nei lo tihna a ni.  

Bible chuan, “Hmangaihnain a dawh thei a, ngil a nei bawk ṭhîn; hmangaihnain a îtsîk lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va. ” (1 Korinth 13:4-5).

He changah hian “a che mawi lo va” tih leh “sual lam a ngaihtuah lo va” tih kan hmu a ni. Hmangaihna an neih loh avangin an nunhlui avangin an che mawi lo ṭhin a. Hmangaihna an neih loh avangin sual lam an ngaihtuah fo ṭhin a ni.

Leviticus 19:18 chuan, “Phuba i la tûr a ni lo va, i chipui thlahte huatna i pai tûr a ni hek lo; nangmah i inhmangaih angin i ṭhenawm i hmangaih tûr a ni zâwk. Kei hi Lalpa chu ka ni.”

I nunhlui hliam avangin tunah hian i na em? I chhungte phei chu hrilh duh suh.  Hun kal tawh chu hun kal tawh anih angin liam tir mai rawh.  

A chang chuan kan chhungte chunga khawngaihna lantir a harsa ṭhin. Nimahsela nunhlui chu i liamtira khawngaihna i lantir chuan Isua ang turin ke i pen tihna a ni. 

Ngaihtuah zui atan

* I nunhlui avangin eng rilru hahna nge i neih mek? Engvangnge? Engtinnge liamtir turin ke i pen theih ang?

* Ke pan dan tur tam tak a awm a,  counselling te,  ṭawngṭai te,  Thlarau Thianghlim hruaia awm te an ni a,  vawiinah hian damna i chan theih nan eng ber hmang hian nge ke i pen ang?

* Engvangin nge a chang chuan midang aiin mahni chhungte ngei chunga khawngaihna lantir hi a harsat ṭhin le?

*Pathian nen engtinnge in inrem theih ang?*
Pathian chuan midang nen inrem turin min duh a. Chumi tur chuan amah nen kan inrem phawt a ngai a ni.  Chumi awmzia chu Isua i sual man zawng zawng a tlak a,  a khawngaihna thilpek i pawm tihna a ni.  

Bible chuan Ephesi 2:8, “Rinna avânga khawngaihnaa chhandam in ni; nangmahni thawh chhuah a ni lo va, Pathian thilpêk a ni. ”

Thutiam chu i pawm a,  Pathian nena inrem i duh bawk chuan hetiang hian ṭawngṭai ang che: “Aw Lalpa,  i thu min tiam angin Isua Pathian Fapa inpekna leh a thihna leh thawhlehna kan rin chuan kan sual man bat zawng zawng pawh min tlaksak dawn a ni i ti a,  vawiinah hian i chhungteah min pawm ve thei angem?

“Ka sualnate ka puang a,  i ngaihdamna ka dil e. Isu,  min chhandamtu i ni tih ka pawm e. Ka Lalpa atan ka pawm ta a che. Ka nun ka engkim hi i tan ka hlan e. Damchhunga i rawngbawl turin ka inpe e.  Isua hmingin ka dil a che.  Amen.”

Tunah khan i ṭawngṭai zo chiah anih chuan email ah min lo bia la Rick@PastorRick.com. Isua nena zinkanng i zawh na turah leh i ringtu nun atana ṭha tur pawimawh tak tak ka lo thawn dawn che a ni.

*[Lettu: Sangpuia]*

Monday, April 27, 2026

PATHIAN NENA LENDUN AWMZIA CHU

_Khawngaihna Kara Thilmak_

By Rick Warren 
April 27,  2026
“Nova chu mi fel tak a ni a, a dam rualpuite zîngah chuan sawisêl bo a ni. Nova chu Pathian nên an lêng dûn ṭhîn a.” Genesis 6:9

Pathian hnen aṭanga tihtur lian tak a dawn hnu aṭang chuan Nova khan kal zelna tur kawng khat chiah a nei a. Chu chu Pathian hnaiha awm a ni.  

Hebrai 11:7 ah chuan, “Rinnain Nova chu thil lo la lang lote kawng thûah Pathian hrilhin a awm a.”

Nova chuan Pathian aw  a hria a. Pathian aw i hriat theih lohna chhan hi engvang nge nia i hriat? A hnaiha i awm hian Pathian aw i hre thei ang.  A hlata i awm chuan Pathian aw i hre thei lo vang.  Pathian hnaiha i awm a ngai a ni. 

Chuvang chuan nitin Pathian nen inpawl ṭhin rawh - Bible chhiar in zir la,  ṭawngṭaiin amah bia la, fianrial hun hmang la, Pathian aw ngaithla ṭhin rawh.

Bible chuan Nova chu,  “Pathian nen an lengdun ṭhin, ” a ti (Genesis 6:9). Lehlin dangah phei chuan Nova chu “Pathian nen inpawlin an lengdun ṭhin.” Mi tu emaw nen in lendun chuan, an kiang hnaiah i awm tihna a ni. 

Mi nena lendun hian awmzia a nei a. Pakhatnaah chuan, inzawmna in nei tihna a ni. An kianga awm pawh i zak lo va. Isua zuitu i nih thu pawh i sawi ngamna te an ni.

Pahnihna, Amosa 3:3 ah chuan an inrem chauh loh chuan mi pahnih an kal dûn ang em ni? Pathian nena in lendun chuan,  a kalna apiangah i kal duh a,  a tih apiang i ti duh tihna a ni. A thuawih turin i inpe tihna a ni.

Pathumna, Pathian nena in lendun chuan Pathian lam i hawi tihna a ni. Khawvel ata kalchhuakin Pathian nen in lengdun tihna a ni a. Pathian duhdana i awm tawh avangin i thiltih dan pawh a danglam tawh ang.

Pathian nena lendun chu amah nena inzawmna,  inremna leh a thu nena inmilna a ni. Nova chu Pathian nen an lengdun a,  hnawl emaw kalsan emaw sawisel emaw tui let emaw pawh a hlau lo a ni.  Pathian nena lendun chuan,  Pathian hnaiha kan awm avangin engmah hlauh tur a awm lo tih a hria a ni.

Ngaihtuah zui atan

* Pathian i hriatchian theihna tura hun tam zawk i neih theihnan i thiltih ṭhin eng hi nge siam rem ngai?

* Isua i zui avangin khawvel ata i chhuak tawh tih engtin nge i tihchian theih ang?

* Hlauhna thinlung i neih rual rualin engnge i tih ang?

*[Lettu: Sangpuia]*

Sunday, April 26, 2026

RING TURIN I HMUH KHER A NGAI LO

_Khawngaihna Kara Thilmak_

- Rick Warren 
- April 26,  2026
_"A hmuh theih loh thil, lo la thleng tur Pathianin a hrilh chu rinnain aa ni Nova khan a lo hriat ni."_ (Heb. 11:7, GNT)

Pathianin hmathlir a neihtir tawh che em? Naupang tè i la nih laiin i thinlungah a lo awm daih tawh mai thei, anih loh pawhin Pathianin i nunah emaw i nun kaltlangin emaw tihpuitlin a duh i la zir mek a ni thei.

Pathianin hmathlir a pek rual chiah che khan rinhlelhna a rawn kal nghal dawn. I thinlung zawng zawnga Pathian ruahmanna i tihpuitlin dawn chuan Pathian aw ngaithlaa rinhlelhna i hnawl a ngai ang.

Rinhlelhna âw hi kiltin atanga rawn kal thei a ni- sawiseltu te, eltu te, Setana leh thiante leh chhungte ngei atang pawhin, "I nun zawng zawng kan hria a. Tunge maw ni a i inhriat le?" titute kha.

Nova nun kha en la, Pathian thupek- tui lian tur laka himna tura lawng tuk tura a tih kha rinhlelhtir turin mi tam takin a hnenah thu tam tak an sawi anih kha. Nova fate ngei pawh khan an kawt maia an pain lawng lian tak a tu kha an phurpui thei bik hauh lovang. An rilru put hmang Novan a hriat pawh kha an pawi ti lem lo. 

A thenawmte, mi â ang hiala ngaitute nuihzatna karah Nova khan kum a chhiar a ngai fo bawk. Khang zawng zawng karah khan Nova khan Pathian aw hriaah inngaiin tuma'n ruah sur an hmuh hma hauhin tui lian laka himna tur lawng a tuk a ni.

Mi beiseina tichhetute chuan i hmathlir tihchhiatsak che an tum ang. Sawiseltu leh mi kherkhiapten Pathian tana thil ropui tak tih i tumah khan zawhna tam tak an nei ang.

Mahse rinhlelhna lian ber chu nangmah atanga rawn chhuak a ni. Mahniin i inbe reng a- i rilruah rinhlelhna chi i tuh anih loh pawhin Pathianin i chungchang a sawi dan i inhrilh nawn fo thin.

Pathianin theihna a pek che ni lo leh hmanrua leh khawngaihna a pek tel che ni lo ti turin a ko ngai lovang che. 

Hei hi i rin a ngai a, a dik a ni tih i inhrilh nawn fo a ngai bawk. Rinna hi hlauhna leh rinhlelhna hnehna a ni. Hebrai 11:7-ah chuan heti hian kan hmu, 
_"A hmuh theih loh thil, lo la thleng tur Pathianin a hrilh chu rinnain aa ni Nova khan a lo hriat ni."_ (GNT)

Nova khan tui lian tur kha a hmu lawk miah lo, mahse Pathianin a hrilh kha a ring mai. Pathianin i nuna ruahmanna a neih te i hmu lawk thei bik hauh lo. Mahse i hma hun Pathianah i nghah ngam chuan - i beiseina engnge ni tih i chian a, i hmuh loh engnge ni tih i chian chuan - rinhlelhna âw a bo ang a, hmalama i tum hlen turin inrintawkna nen ke i pen thei ang.

Ngaihtuah zui atan.

Pathianin hmathlir lian tak a neihtir che tih rin hi thil âtthlak a ni lo. Pathianin eng thil lian nge i tihpuitlin a duh ni a i rin?

Pathianin a thutiamte i hriat nawn fo theih nan eng hmanrua nge a pek che?

Kan tihrawl kan sawizawia a lo lian tual tual thin ang hian i rinna kha a lo len zel theih nan engtinnge i sawizawi ang?

[Lettu: Mapuia Fanai]

Saturday, April 25, 2026

DANGLAM NGAM RAWH

_Khawngaihna Kara Thilmak_

- Rick Warren 
- April 25,  2026
_"Heng hi Nova thlahte chu an ni. Nova chu mi fel tak a ni a, a dam rualpuite zingah chuan sawiselbo a ni: Nova chu Pathian nen an leng dun thin a."_ (Genesis 6:)

Pathian remruat anga nung chungin tunlai khawvel nunphung milin i kalkawp thei lo.

Genesis 6:9-ah chuan heti hian kan hmu, _"Heng hi Nova thlahte chu an ni. Nova chu mi fel tak a ni a, a dam rualpuite zingah chuan sawiselbo a ni: Nova chu Pathian nen an leng dun thin a."_

Nova khan a hun lai nunphung mil ni miah lovin thil pawimawh tak a ti. A hun lai khawvel nunphung khan a nuna Pathian ruahman kha a a rawn tibuai dawn tih chiang takin a hre reng.

Kan khawvel hian hlimna, muanna leh nawmna a zawng reng. Chungte chu um chungin Pathian tan i nung pah thei lo. I thil neih te, nawmna te, leh hlawkna te hmangin i hlawhtlinna i teh thei lo. Midangte tihlawm tum reng pahin Pathian kohna che angin i nung pah thei hek lo.

Nova hun ai khan mihringte khan sualna tawp khawk an thleng a ni. Genesis 6:11-12 ah chuan heti hian a sawi, _"Tin, lei hi Pathian mithmuhin a chhe zo tawh a, lei hi inpawngneknain a khat zo ta bawk a . . . tisa zawng zawngin leiah hian an awm dan an tichhe zo tawh si a."_ 

Pathianin khawvel chhiat tawhzia kha a hmu a, mihringte khan sual lam hlir an awn tawh a ni. Chu chuan Pathian rilru a tina em em a. Mahse chung karah chuan Nova erawh a rawn ding chang tlat.

Pathian khawvel a siam khan tha a ti em em a, mahse chutiang chuan a awm reng lo. A inanna i hria em? Kan tunlai khawvel pawh hi Nova hun lai ang mai khan inzah lohna leh chaponain a khat mek.

Genesis bung 6-ah thil danglam tak kan hmuh chu Nova kha a ni. Chang 8-naah chuan Nova chungah Pathian a lawm tih kan hmu, a awmzia chu Nova kha a danglam bik tihna a ni. Mihring zawng zawng nunphung kha kawng dik lo lamah a kal mek laiin Nova erawh chuan Pathian zuiin kawng dik a zawh mek. Midang nunphung ep zawngin a nung tihna a ni.

A dik lam zawka awm hi a pawimawh ber a ni lo. Thil dik tih hi a pawimawh chu a ni. Pathianin a siam dan che leh a siam chhan che i tihpuitlin dawn chuan i danglam ngam a ngai.

Khawvelah hian danglamna thlen i duh em? In chhungkua, khawtlang, sikul, hnathawhna hmunah danglamna thlen i duh em? Nova khan Pathianin a siam chhan tipuitling turin mi nawlpui kalna kawng zawh ve lovin huai takin a kal hrang ngam.

Danglam i ngam chauhin danglamna i thlen thei ang.

Ngaihtuah zui atan.

I hnathawhna emaw sikul emaw chhungkuaah emaw Pathian i zui avanga i danglamna bikna tur engnge?

Engtinnge Pathian lawmzawng emaw khawvel duhzawng emaw i hriat hran theih ang?

Kan nunphungin Pathian Thu a kalh huna i hnawl theih nan tunge fuih thei ang che? Tunge i fuih ve theih ang? Isua rinawm taka zui turin engvangin nge kan inmamawhtawn?

[Lettu: Mapuia Fanai]

Friday, April 24, 2026

KHAWVEL RAWNG TAKA ZAHNGAIHNA LANCHHUAH DAN

_Khawngaihna Kara Thilmak_

By Rick Warren
April 24, 2026
“Mi tin engtia chhân theuh tûr nge ni tih in hriat theih nân in ṭawngka chhuak chu chia al, khawngaihna tel ni fo rawh se.” [Kolossa 4:6]

He khawvel midang dik lohna hre thei tak, hmasial tak leh ngaihdam harsat takah hian Isua tana thuhretu nih dan ṭha ber pakhat chu midangte chunga zahngaihna lantir a ni. 

Nimin lamah khan zahngaihna nunpui dan kawng hnih kan zir tawh a: chungte chu midangte mamawh ngaihvena en leh mite sualna avang lo intihnat loh tihte an ni. 

Heng thil pahnihte hi zahngaihna lantir dan chu an ni ang: 

I ṭawngkam fimkhur takin hmang rawh. Zahngaihna i lantir dawn a nih chuan thil ṭhenkhat chu sawi satliah rem lo deuh an awm thei ang. Ngeiawm tak leh dengkhawng takin i ṭawng thiang lo. Zahngaihna chuan i thusawite chu thlifim sela, thusawi tur midangte siam ṭha thei, mite tina tur ni lo, i thlan a ngai ang. 

Kolossa 4: 6 chuan, “Mi tin engtia chhân theuh tûr nge ni tih in hriat theih nân in ṭawngka chhuak chu chia al, khawngaihna tel ni fo rawh se,” tiin a sawi. 

Midang chung tlak taka inbiakna chhungkuaah i lo ṭhang lian a, chutiang ṭawngkam chu i lo hmang ṭhang viau tawh a ni thei. Chu chu engtin nge i siamṭhat theih ang? Pathian hnen aṭangin finna dil ang che, a chhan chu Pathian Thu chuan, “Chung lam ațanga finna lo chhuak erawh chu a tîrin a thianghlim phawt a, chumi hnuah chuan inrem a duh a, a nunnêm a, a tih nuam a, zahngaihna leh rah thain a khat a, thlei bîk a nei lo va, a vervêk lo a ni.” tiin a tiam si a [Jakoba 3: 17].   

I fin deuh deuh ang zelin i kiang vela mite lakah chuan zahngaihna lantir dan i thiam deuh deuh ang – eng ang pawhin duh lo che mahsela. A chhan chu midangte natna chu i hriatpui vang a ni a, an harsatna chu i hre thiam ve deuh deuh ang a, an chungah zahngaihna pawh i lantir thei ang. 

Midang chhandamna chu dan leh hrai ai chuan ngaihlu fan fan rawh. Chu nun chu Isua khan a nunpui ngar ngar ṭhin. A entirna ṭha tak chu Chanchin ṭha Matthaia ziakah khan kan hmu. Dan ngaisang tak Pharisai hote hnenah khan Isua chuan, “Nangni lehkhaziaktu leh Pharisai vervêkte u, in chung a pik e! Pudina te, mohuri te, zira te chu sâwmah pakhat in pe ṭhîn a, dân thu pawimawh zawk felna te, khawngaihna te, rinawmna te chu - in ngaihthah si ṭhin; nimahsela, chúng chu asin in tih tûr ni, a dangte chu tih ṭhulh chuang lovin.” tiin a sawi [Matthaia 23: 23] 

Isua khan Pharisaiten sawma pakhat chu mite chunga dik taka tih ai te, zahngaihna lantir leh rinna nun chhuahpui aia an dah sang kha a ngai thei lo hle ṭhin. Ani chuan “a aia pawimawh zawk ngaihthah lo turin min chah” a ni. Kan lainatna midang hnena lantir turin min beisei a, chutianga kan tih chuan a hnenah an nun an la hlan thei ang. Isua chuan lalram din chuan dan leh hrai zawm aiin a ngai pawimawh zawk fe. 

Zahngaihna mite hnena i lan chhuahtir apiangin, khawvel hmaah thuhretu ropui tak i nihna chu i puang chhuak a ni.  

Ngaihtuah zui atan. 

• Naupang i nih lai chuan engtin nge i chhungte chuan i chungah zahngaihna an thusawi hmangin an lantir? An thusawi hmang chuan engtin nge zahngaihna an lantir loh? 
• Tun karah hian engtiang dinhmunah nge zahngaihna lantir a ṭul dawn nia i hriat? 
• Midangte hnena zahngaihna lantir chu harsa i lo ti ve tawh em, an hun kal tawh i hriat hnua zahngaihna lantir awlsam ta sawt an awm em? Eng vangin nge? 

*[Lettu: Peka]*

Thursday, April 23, 2026

I TANA THUHRETU ROPUI BER CHU ZAHNGAIHNA

_Khawngaihna Kara Thilmak_

By Rick Warren
April 23, 2026
“In Pain mi a khawngaih angin mi khawngaih ve rawh u,” [Luka 6:36]

He khawvel nunrawng zelah hian Krista zuitu i nihna zawna thuhretu i nih theih dan chu mite chunga zahngaihna lantir a ni.  

He khawvel hi engtiang takin nge a rawn tih leh ngaihdamna a tlachham tih chu i lo chhut ngai em? indeusawhna kan lawm viau changte pawh a awm asin. Fiamthu thiamte chenin mite an deusawhna leh an elselna chu an sum hmuhna a ni thei hial.  

Mahse miten zahngaihna an lantir lai i hmuh chang chuan, a bik takin kan khawtlang nun a rawn tawhzia chhut phei chuan, mite chuan, chutiang chu “Ringtu awm dan tur – Krista anna nei ka beisei chiah a ni,” an ti hial thei.  

Isua chuan Luka 6: 36-ah chuan, “In Pain mi a khawngaih angin mi khawngaih ve rawh u” tiin a sawi. 

Zahngaihna i lantir theih dan nungchang kawng li a awm thei ang. Vawiin hian pahnih ka zir ang a, naktuk lamah a dang kawng lo kan enho leh ang. 

Mite mamawh chu ngaichang ang che. Tuin nge mamawh? In veng mite, i hnathawhna leh i chhungkaw mamawh chu ngaihven rawh. Zahngaihna chu thil hriat chianna aṭanga chhuak a ni fo. I hre lo a nih chuan, i ngaihsak tak tak thei ngai lo vang. 

Bible chuan, “mahni ta ta mai en lovin, midang ta pawh en theuh zawk rawh u,” tiin a sawi [Philipi 2: 4] 

Zahngaihna i lantir loh chhan chu i sual vang a ni ber lo thei. I buai vang a lo ni zawk fo. Mite chunga zahngaihna kan lantir loh chhan langsar ber chu kan hmanhlel lutuk chu a ni. Tih tur pakhat aṭanga a danga i pakai lai leh hna pakhat aṭanga hna danga i pakai chang chuan mite i kiang vela awmte ngaihven chu a harsa fo. Ngaihven lo taka i awm lai chuan mite thil mamawh chu i thlir kan a, zahngaihna lantir chu thil theih loh tluk a ni. 

Mite sualna chuan tina che suh se. “I nun kha siamṭha phawt la, ka lo pawm dawn che nia” ti ngai suh. Ni lo – zahngaihna chu tiamkam awm lo a ni! Mite chungah zahngaihna i lantir a nih chuan tisual i inti ngai lovang. Mite i hmusit a nih thung chuan an rawng i bawlsak thei lo vang. 

Mite sualna chuan Isua chu a tihnual viau lo. Dik tak chuan, mi sual ber berte kha a kawm zawk a. A ṭhiante kha mi hlemhle, misual leh thil dik lo ti ṭhinte an nih avangin miten an dem zawk a nih kha. 

Chuvang chuan Isua khan an thil tihsual zawng zawng a pawmpui tihna a ni lo. Pathian chuan i thiltih zawng zawng a pawmpui kher lo che, mahse i nihna pumpui kha a pawm thung. Zahngaihna lantir tih chuan mite thil sawi zawng zawng pawmpui tihna a ni kher lo. Entirnan, ruihhlo hman sual leh uirena chu an dik chuang lo. 

Mahse zahngaihna chu i lantir tho a ngai. Kristan i tana a tih chu midangte chungah pawh ti ve rawh. 

“Eng dang zawng aiin in hmangaih tawn uar rawh u, hmangaihnain sual tam tak a khuh si thin a” [I Petera 4: 8] 

Ngaihtuah zui atan. 

• Tun lai khawvelah hian zahngaihna hmuh chu eng vangin nge a harsat em em? 
• A harsat chang leh i phu lo chung chung pawhin tuin nge i chungah zahngaihna lantir? Eng ang dinhmunah nge chu chu a thlen? 
• Mi tute emaw an nun dan i pawmpui loh avangin an chungah zahngaihna i lantir duh lo tawh em? Chutiang a nih chuan, vawiin hian engtin nge i insiamṭhat ang?  

[ *Lettu:* Peka]

Wednesday, April 22, 2026

CHHANDAM I NIH HNUAH ENG NGE LO THLENG?

_Khawngaihna Kara Thilmak_

- Rick Warren
- April 22, 2026
"Chumi avang chuan tu pawh Kristaa a awm chuan thilsiam thar a lo ni a, thil hluite chu a ral ta a, ngai teh u, a lo thar ta. Nimahsela, engkim hi Pathian hnen ata chhuak a ni a, a ni chuan Krista avangin amah nen inremin min siam a, inremna rawngbawl hna min pe a," 2 Korinth 5:17-18.

Pathian khawngaihna ropui tak avangin Isua chu, "boralte zawnga chhandam turin a lo kal a ni" (Luka 19:10). A tan i pawimawhzia lantir nan i sual avanga krawsa thi turin a Fapa a lo tir a. Chutiang tak chuan Pathianin a hmangaih che a ni.

Tuten emaw, "Chhandam ka ni tawh," tih an sawi i lo hre tawh mai thei. Nangmah ngei pawhin Isua nena ininlaichinna chungchang i lo sawi tawh mai thei. Chhandam tih awmzia chu eng nge ni? Pathian chhandamna thilthlawnpek i pawm hnuah eng nge lo thleng?

*Chhandamna chuan nangma lakah ngei a chhanhim che.* Mi tam tak chuan chhandam emaw, chhanchhuah ngai an nih loh thu an sawi ṭhin. Kei chuan, "Tak tak maw? I nunah natna i nei lo maw? Thinrimna te, rilru hahna te, inchhîrna te, ngaihṭhat lohna te i nei ve lo maw?" ka ti a. Mi tinin mahni a chinfel theih loh harsatna an nei vek a. Mi tin hi chhanchhuah ngai vek kan ni. Tu pawhin Isua kan mamawh vek a ni.

Bible chuan, "Mangan nîah chuan mi ko la ka chhan him ang che, tichuan, nangin mi chawimawi dawn ni," a ti (Sam 50:15).

*Chhandamna chuan i hloh tawh chu a pe kîr leh thei che.* Eng nge lak kîr leh i duh? Mahni inrintawkna emaw, i hlimna emaw, i hming ṭhatna emaw, i duhthusam emaw, mi pawi i sawi lohna emaw pawh a ni mai thei. I hloh tawh chu Isuan a pe kîr leh thei che a ni.

Lo neih dan i hrechiang a nih chuan, khaukhuap rualin vaimim hmun an tihchhiat theihzia chu i hria ang. Vaimim hmun hi darkar hnih chhûng lekin an ei chhe zo vek thei a ni.

Eng thilin nge i nun chu ei chhiatsak che? Engin nge i hlawkna tur te, i ruahmanna te, in inlaichinna te chu tihchhiatsak che? Pathian chauhin engkim a siam ṭha leh thei a ni. Joela 2:25 chuan, "In zinga ka sipai rual tam tak ka tirh, khaukhuap te, thingngêt te, pangang te, thingngêt pangangten an ei zawh kumte kha ka rûl leh ang che u," a ti.

*Chhandamna chuan Pathian nen a thlun zawm leh che.* I nun Pathian hnena i hlan hunah, Isuan Pathian nena in inkar a siam ṭha ang. Siamtu che laka lo dang ṭhintu bang zawng zawng a ṭhiahsak vek che a. Chumi sawina ṭawngkam chu: inremlehna tih a ni.

Bible chuan, " Chumi avang chuan tu pawh Kristaa a awm chuan thilsiam thar a lo ni a, thil hluite chu a ral ta a, ngai teh u, a lo thar ta. Nimahsela, engkim hi Pathian hnen ata chhuak a ni a, a ni chuan Krista avangin amah nen inremin min siam a, inremna rawngbawl hna min pe a," 2 Korinth 5:17-18 a ti. 

Pathian nena inrem leh tih awmzia chu Amah nen chatuanin in chêng dûn ang a. Meidilah, Pathian laka hla takah chatuanin i awm dawn lo. Chutiang ni lovin, vânah in nghet, him tak i nei zawk dawn a ni! Chuvang chuan, he khawvela i damchhunga i tih tur pawimawh ber chu lei piah lam nun atana inbuatsaih hi a ni. 

Ngaihtuah zui atan

Pathianin a chhanchhuah che i mamawh tih pawm harsa i ti em? Eng kawngah te nge mahni leh mahni inchhanchhuah i tum ṭhin?

I nunah eng nge i hloh tawh? Siam ṭhat lehna Pathian a nih avangin lawmthu sawi nan hmang la, khaukhuap rualin i thlai an ei chhiat kum chhunga i hloh zawng zawng chu siam ṭhatsak leh tur chein dil rawh.

Kristian i lo ni tawh a nih chuan, i chhandamna khan eng kawngahte nge Pathian nen a thlun zawm leh che?

[ *Lettu: Marova Punte* ]

Tuesday, April 21, 2026

NANGMAH CHAUHIN I PALTLANG LO

_Thilmak Kara Khawngaihna_

By Rick Warren 
April 21, 2026
“Chi thlahtute khân Josefa an îtsîk a, Aigupta ram lamah an hralh a; nimahsela, Pathian a hnênah a awm a, a hrehawm tuar zawng zawngah a chhan chhuak zêl a.” Tirhkohte 7:9-10

Harsatna leh hrehawmna nasa tak a tawrh pawhin, Josefa kha a ngawi reng a, khawi hmunah pawh awm se Pathian a ring tlat a ni.

Josefa chanchin ziaknaa vawi nga lo lang nawn a awm a. Bible meuha vawi nga lang nawn chu a pawimawh hle a ni ang. Chu thu chu, “Pathian a hnenah a awm,” tih hi a ni.

Tirhkohte 7:9-10, “Chi thlahtute khân Josefa an îtsîk a, Aigupta ram lamah an hralh a; nimahsela, Pathian a hnênah a awm a, a hrehawm tuar zawng zawngah a chhan chhuak zêl a.” 

Josefa khan enganga hrehawm pawh tuar se, Pathian a hnenah a awm tih a hrechiang a ni. Tui chhunchhuah a an paih lai leh sumdawngho hnena an hralh lai pawhin Josefa hnenah Pathian a awm a, Pathianin a hruai zel a ni.

Hei hi lo chhinchhiah la, Pathianin Josefa chu harsatna a pumpelh tir tih a awm lo. Pathianin a veng him zel zawk a ni.

Pathian i hnenah a awm kan tih hian, thil ṭha lo leh harsatna a lak kian sak che tihna a ni lo. Harsatna chu a paltlang pui che a ni zawk. Pathian Josefa kha harsatna pumpelh tir ta sela, Aigupta pawh a thleng lo vang a. Hruaitu ropui tak, a mipui ṭam tuar te chhanchhuak thei tu a ni lo vang a. Harsatna aṭangin tho leh tur a awm lo vang.

Pathianin i chungah harsatna a siam a ni lo va, amaherawh chu harsatna chu a ropuina atan a hmang thei thung a ni.

Vawiinah hian eng pawh hmachhawn la, Pathian chuan a lak kian sak che emaw harsatnaah chuan a la cham tir reng emaw thei che a ni. Nimahsela i tana ṭhatna tur leh a ropuina turin a kalpui zawk che a ni.

Pathian chuan i hriat loh lai pawhin a awmpui reng che a ni. Josefa pawh tui chhunchhuah ah te, Aigupta kal kawngah te, Potiphara hnenah te, taninah te, Pharoa inah te Pathianin a awmpui zel a ni. A tel lo va i kal theihna hmun khawi mah a awm lo a ni.

Harsatna aṭang hian tu te pawhin zirtur kan nei vek a ni. Harsatna hmuna i zirchhuah chu Pathian awmpuina leh a thiltihtheihna a ni a - chumi chu rinna thuk zawk, chak zawk i neih theihna anih chuan i tan chakna thar lakna a ni ang. 

Ngaihtuah zui atan

* Harsatna i tawh lai hian tu in nge emaw engin nge emaw Pathian chenchilhna hriattir thei ang che?

* Pathian awmpuina chang lo va i inhriat chuan Pathianin engtiturin nge a duh che i rin?

* Harsatna hmun aṭanga i zirchhuah ṭha ber eng nge ni?  Pathian rinawm zia chu engtinnge a chenchilhna i chang a ni tih i hriat aṭangin engtinnge i hmuh theih ang?

*[Lettu: Sangpuia]*

Monday, April 20, 2026

HNA CHUNGCHANGA NGAIHDAN ṬHA ZAWK

_Khawngaihna Kara Thilmak

By Rick Warren 
April 20,  2026
“Mihring rawng bâwl ang mai ni lovin, Lalpa rawng bâwl ang zâwka duh tak chunga rawng bâwlin, bâwih ni sela, bâwih ni suh sela, mi tinin thil ṭha an tih apiang chu Lalpa hnên ata a ngai vêk an hmu leh ang tih hriain.” Ephesi 6:7-8 

I hna thawh hrem em em thawk turin an ti lui tawh che em? I hna duhthusam chu i hmu lo emaw ala remchang lo emaw pawh a ni thei e. I tana ṭha ber tur erawh i ngaihtuah a ngai a ni.

Mi tam tak harsatna tawh pawh a ni thei awm e. Bible-a Josefa khan kan tawrh aia nasa zawk mahin a lo tawng tawh a ni. Genesis 37:36 chuan, “Midian-ho chuan Josefa chu Aigupta ramah an luhpui a, Pharaoa hnuaia hotu pakhat, vêngtu pâwl hotu, Potiphara hnênah chuan an hralh a.” 

Khang hun lai khan, Josefa kha fapa duat a ni a, ramdangah sal ni turin an hralh daih mai a nih chu. A la thawh ngai reng reng loh hna te an thawh tir a, engmah a sawi ngai lo a ni.

I beisei loh leh thawh pawh i tum ngai loh hna tunah khan i thawk mek a ni maithei e. Hna dang hmun danga thawh daih pawh i chak maithei a ni. A chang chuan hna in thawh luih tirah pawh i inngai maithei a ni. Chaklohna vangah i inngaia hrehawm pawh i ti hle maithei e. 

Chutianga i awm anih chuan, Josefa kha han ngaihtuah la, a rilru hrehawm tur zia pawh dawn pui teh le.

Nimahsela Josefa chuan thutlukna fing tak a siam a  ni. Khawiah pawh awm se, engpawh thawk se, Pathian tan a ṭha ber tih tum tlat mi a ni. Ramdang daiha mi sala a awm lai pawh khan a hna chu a rilru zawng zawngin Pathian ropuina turin nungchang mawi takin a thawk a  ni.

Josefa khan sal hna a thawk a, awmze nei takin a thawk thung a ni. A chhan chu mihring tana thawk ni lo vin Pathian tana a thawh vang a ni. Pathian chu a thawhna neitu ah ngaiin, theihtawp chhuahin a thawk ṭhin a ni.

Chu chu miin an hmuh hmaih lo. A hnathawh ṭhat avang chuan a kaisang a, lal in hungchhungah hial a thawk phak ta a ni. 

Ephesi 6:7-8 ah chuan, “Mihring rawng bâwl ang mai ni lovin, Lalpa rawng bâwl ang zâwka duh tak chunga rawng bâwlin, bâwih ni sela, bâwih ni suh sela, mi tinin thil ṭha an tih apiang chu Lalpa hnên ata a ngai vêk an hmu leh ang tih hriain.”

Mi tumahin i thawhrimna an hmu lo maithei. Vanram i thlen hma chu lawmman pawh i dawng lo maithei e. Pawimawh em ema chu Pathian duhdan i ngaih pawimawh loh chuan theihtawp chhuahin thawk mah la, i thawhrimna te pawh chu mi hriat hlawh a ni phak tak tak lo vang.

Ngaihtuah zui atan

* I thawhrimna chu miin hria se tih i duh em? Engvang nge?

* Taima taka i hna i thawh theihnan engtia zingin nge thutlukna i siam ṭhin?

* Pathiana inzawmna nghet leh Bible study i neih ṭhin chuan engtinnge i hna rinawm taka i thawh theihnan a puih che?

*[Lettu: Sangpuia]*

Sunday, April 19, 2026

MI HLATE CHUAN AN THEIHNA AN HLOH THIN

_Khawngaihna Kara Thilmak_

- Rick Warren 
- April 19,  2026
_"Pathianin amah hmangaihtute tana a buatsaih chu tu mit mahin a la hmu lo va, tu beng mahin a la hre hek lo, tu rilru mahin a la ngaihtuah lo bawk." (1 Kor. 2:9, NLT)

Pathianin i tan ruahmanna ropui tak a nei asin! Mahse amah nen inzawmna nun i neih loh chuan i nuna tihtur a duh zawng zawng kha i chan vek dawn tihna a ni.

Nimin khan miin thlarau lama nuna an bo avanga an thil hloh pahnih kan zirho a: an kawng leh an himna an hloh thu kan zir. Vawiin chuan an hloh dang pakhat kan zir belh ang: an theihna.

Pathian nen in inzawmna a chah rual chiah khan he khawvela thil tha i tih theihna kha sawr zimin a awm duai a ni.

Pawisa thir ang mai hi a ni. Tam tak i dah khawl chuan thil tha tih nan theihna tam tak an nei. Chhungkaw chawm nan an hman theih a, sumdawnna bul tan nan theihna an nei, nunna hial an chhanchhuak thei. Mahse pawisa thir chu an bo vek chuan khing thil khi engmah i ti thei lovang.

Luka 15:8-10 a duli bo chungchang kan hmuh kha entirna tha tak a ni. Hmeichhe pakhat duli 10 hlu tak neitu chanchin a ni. Duli pakhat chu engtin emaw a tibo palh tlat mai a. "Duli pakua ka la nei alawm, a bo pakhat te mai hi chu ka zawng tawh dawn lo" a ti miah lo. Chumi a hnehin a inchhung zawng zawng duli bo zawngin a lipse a, a hmuh ve lh lawmna hun a siam nghe nghe.

I ngaihtuah phak aia nasaa ropui thil ti tura Pathhianin a duan che i ni. Pathian kuta i intuk luh a, nangmah kaltlanga a tihtur a hmuhtir che anih chuan mak i ti em em ang!

Bible chuan heti hian a ti, _"Pathianin amah hmangaihtute tana a buatsaih chu tu mit mahin a la hmu lo va, tu beng mahin a la hre hek lo, tu rilru mahin a la ngaihtuah lo bawk." (1 Kor. 2:9, NLT)

Kum tam tak chhung Pathian nen inzawmna i neih tawh loh avangin a hnen pan turin a tlai tawh hle niin i ngai a ni mai thei. A tlai lo a nia! Nangmah Siamtu che a ni a. Hlutna sang tak neiin a hmu che a, i theihna a hria a ni.

I nun zawng zawng a hnena i pek chuan i tana a lo ruahman zawng a takin i chang chho zel ang.

Ngaihtuah zui atan.

I nuna thil hlu tak engtik khan nge i tihbo le? Hmu let leh tumin engtia rei nge i beih?

Miin a theihna a khawh ral mai mai hian engtinnge midangteah nghawng a neih?

Pathianin "amah hmangaihtute tan" thil ropui tak a buatsaih. He thu i hriat hian engtin nge a tana i nun zawng hlan tura a nghawng che?

[Lettu: Mapuia Fanai]

Saturday, April 18, 2026

PATHIANIN I KAWNG A RUAT LEH A VENHIM DAN CHE

_Khawngaihna Kara Thilmak_

- Rick Warren 
- April 18,  2026
_"Kan za hian beram angin kan vak bo va. Pathian kawng pensanin mahni kawng kawngah kan peng theuh va."_ (Isaia 53:6, NLT)

Tute pawh hi Pathian mit hmuhah chuan hlutna nei, zawntlak, hmuhtlak leh chhandamtlak vek kan ni. Bible chuan heti hian a sawi, _"[Pathianin] mi zawng zawng chhandam ni tur leh thutak hre turin a duh"_ (1 Tim. 3:4, ESV).

Mahse mi tam tak chu thlarau lam nunah an bo hle. A awmzia chu Pathian ruahman anga nung lovin mahni duh dan ang angin an nung tihna a ni.

Mahse thlarau lama bo kan tihte hian engnge an bo/hloh chiah le? Eng emaw zat an hloh, mahse vawiinah chuan pahnih chauh kan thlir ang: An kawng leh himna an chan.

Hei hi beram bo thawnthu Luka 25:3-6 ah khan hmuh turin a awm. Berampu khan beram dang 99 zawng kalsanin beram bo pakhat kha a zawng turin a chhuak anih kha. "Beram 99 him reng ka nei a, pakhat lo bo mai mai chu engmah a ni pha hleinem" a ti miah lo. An vai khan a tan an hlu em em vek a ni. Beram bo a hmuh rual rual khan, _"Hlim taka a dara puin a hawpui ta a"_ (Luka 1:5, NIV) tih kan hmu.

Beram ang khian thlarau lama bote chuan kawng an bo a. Mihring zawng zawng hi hetiang hi kan ni mah zawk. Bo tum sa reng i ni bik lo. "Saw laia hnim saw a hrin that hmel zawk riau mai" tiin i ngaihtuah a. Tichuan mahni duh dana kalin kawng dik i pen bosan ta thin a ni.

Bible chuan heti hian a ti, _"Kan za hian beram angin kan vak bo va. Pathian kawng pensanin mahni kawng kawngah kan peng theuh va."_ (Isaia 53:6, NLT)

Thlarau lama boten an hloh thin dang leh chu Pathian venhimna hi a ni. Beram a pu lak ata vak bo ang khan nangmah vengtu che awm lohna hmunah chuan hlauhawm tam tak a awm thin. Chuvang chuan Berampu Tha, Isua i zui a ngai a ni. Chutiang anih loh chuan i mala, i inveng zo lo va, Pathian venhimna i hloh thin. 

Bible chuan heti hian a sawi, _"Chuvângin berâm rual angin mahni kawng kawng an hawi a. berâmpu a awm loh avângin hreawm an tuar a"_ (Zakaria 10:2).

Mahse Berampu tha enkawlna hnuaia i intuk luh chuan kalna tur kawhhmuh chein a veng ang che. Hei vang hian buaina i tawk dawn lo tihna erawh a ni lo. Mahse Pathianin "Pathian hmangaihtu . . . tan chuan, an thatna turin engkim a thawhsak hlawm thin tih kan hria" a tihna a ni (Rom 8:28).

Nangmah emaw i mi hriatzawng tu emaw kha Pathian hruaina leh venhimna hnuaiah in kal lo a ni mai thei. Hei hi hre reng rawh: Isua hi Berampu tha, mi zawng zawng hlutna thuk tak neia hmutu leh mi zawng zawng chhandam duh a ni tih hi.

Ngaihtuah zui atan.

Engtik khan nge Pathian lakah i hlu a ni tih i hriat hmasak ber? Eng dinhmun emaw tu emawin nge hriat chhuahtir che?

Isua, Berampu tha hnaih turin engin nge hnuk hnai che? Eng i chin than khan nge hlattir thin che?

I mi hriatzawngte zinga tuin nge Pathian hruaina leh venhimna la chang lo ni a i hriat? An hlut zia hrilh turin ruahmanna siam rawh.

*Isua Krista lam i hawi tawh em?*
Naktuka thil thleng tur i hriat a ngai lo. Hmalam hunah engnge lo thleng dawn tih paawh i hriat a ngai hek lo; hmahun vawngtu i hriat mai kha a tawk a ni. I siamtu nen inlaichinna i neih tawh chuan a hmangaihna nghing ngai lo leh a thutiam danglam ve ngai lo chu i chang ang.

Isua nena inlaichinna thuk tak neih i duh chuan tiang hian tawngtai rawh: "Lalpa duhtak, ka himna chu engtik lai maha chhuhsak theih loh a nih ka duh a. Ka himna chu nangmah nena kan inlaichinnaah awmse ka duh a, i thutiamte chuan min kalsan ngai dawn lo a ni tih ka rin avangin. Chu thutiam chu vawiinah hian neih ka duh a. Ka hriat chian rualin Isu i hnen ka rawn pan e. Mahni duh dan anga nungin i lakah thil ka tisual tih ka puang a, khawngaihin min ngaidam ang che. Ka nunah lo cheng la, ka ngaih pawimawhzawng te, ka hlutzawng te, ka dam chhan te leh ka kawng zawh mekte hi min rawn thlaksak rawh. I duh ang miah min siamthar rawh. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

Friday, April 17, 2026

PATHIANA I HLUTNA

_Khawngaihna Kara Thilmak_

By Rick Warren
April 17, 2026
“Boralte zawnga chhandam turin Mihring Fapa hi a lo kal a ni reng a ni.” [Luke 19:10]

Pathian mitah chuan mi chi hnih chiah kan awm – chhandam leh boral mek te chu. Mi zawng zawngte hi he nihna eng emaw zawk zawkah hian kan tel vek. Tichuan, a tawpkhawkah chuan nihna dang em em a awm tawh lo. 

Pathianin mi tin a hmangaih, mipa an ni emaw hmeichhia an ni emaw, an hnam leh hnam zia a thliar tak tak lo. Dik tak chuan, chung nihnate chu ama siam an ni zawk. Chubakah chuan  thiamna, hmel lan dan, rosum, emaw theihna [talent] emaw chu a thlir lo. 

Thumal pahnih “chhandam” tih leh “bo/boral” tih chuan hlutna chungchang an sawi ve ve a – chumi awmzia chu Pathian chuan zawn tlak, chhan tlak leh hmuh tlaka hlu-ah a ngai che tihna a ni. “Chhandam” tih leh “bo/boral” tih chu hmangaihna tarlanna tawngkam an ni. 

Bible chuan “Boralte zawnga chhandam turin Mihring Fapa hi a lo kal a ni reng a ni” (Luke 19:10] tiin a sawi. Chutiang tak chuan i hlu a ni. Isua Krista chu khawvelah nangmah zawng tur leh chhandam turin a lo kal a ni.  

Thil hlu chauh an bo ṭhin; thil hlu lo chu kan dahna kan hai te kan ti mai mai. Chu mi awmzia chu, tute mah hian ha kherna [toothpick] satliah ka tibo an ti ngai lo. Ha kherna chu i dahna i lo hai palh thei a, mahse ka tibo i ti ngai lovang, a chhan chu ha kherna [toothpick] chuan hlutna a nei tak tak lo. 

Kan inneih zungbun ka tibo a nih chuan thil lian tak ka hloh a ni, a chhan chu kum sawm eng emaw zat thuthlunna chu a bo a ni. Chu mai chu a ni lo, Kay-i min pek a ni a, amah chu ka hmangaih bawk. Ka zungbun chu ka dahna ka hai satliah thei lo; ka lo tibo palh mai thei. 

Tichuan, mi tu emaw thlarauva chhandam an nih leh nih loh kan sawi hian an hlutna kan sawi a ni satliah lo. Mi tin- chhandam leh chhandam loh – chu Pathian hmaah hlutna lian tak an nei vek a ni. 

Mahse Pathian chuan thlarauva an bo tumah a duh lo. Eng vangin? A chhan chu amah aṭangin lak hran an ni a, amah nen inlaichinna an nei tawh lo. 

Tun aṭanga ni eng emaw zat chhung chu he zawhna hi kan inzawt nawn fo dawn a ni, “Thlarauva i bo chuan engnge i hloh?” He zawhna i chhan dan hian Pathian tan engtiang taka hlu nge i nih a, midangte hnenah chu thuchah chu i hrilh ang tih a lantir. 

Ngaihtuah zui atan. 

• I ngaihtuahna peng pakhatah chuan – mi bote chu an hlutna hniam deuh tawh angin i lo thlir tawh ṭhin em? Pathian hmaah chuan mitinte hi kan intluk tlang a ni tih hriatna chu engtiangin nge i lo ngaih ve? 
• I thil lo hloh tawhte chu engnge ni? Eng thilte nge i lo dah sual ve tawh? Chung thilte chuan nangmahah chuan eng nge an hlutna ṭheuh?
• I ṭhiante zingah khan tuten nge Pathian hmaa an hlutna hriat mamawh? Vawiin hian engtin nge anmahni chu i fuih theih ang?  

Krista Isuaa awmte tan chuan thiam loh chantîrna reng a awm lo. 

Bible chuan Johana 3:18, chuan “Thu pawh amah ring chu thiam lohvin an awm lovang” tiin a sawi. 

Chu thutiam chu chang tura i inpeih a, Pathian rorelna hlau lo tur leh atana i nun hlan tura i inpeih a nih chuan he ṭawngṭai thu hmang hian ṭawngṭai ang che: 

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Thursday, April 16, 2026

I HLAWHCHHAMNA LIAN BERIN I HLAWHTLINNA ROPUI BER A THLEN THEI

_Khawngaihna Kara Thilmak_

By Rick Warren
April 16, 2026
“I hawi kîr leh hunah nangin i unaute tinghet ang che.” [Luka 22:32] 

Hlawhchhamna kawng zawhin, i thil tih mekah chuan thil țha reng awm lo va inhriat chang I nei ang. Mahse Pathian chuan i hlawhchhamna hmunah chuan thil țha a thlentir thei. Dik tak chuan, i hlawhchhamna lian ber chu i hlawhtlinna ropui ber a ni thei tlat! 

Isua chuan Petera hnenah Luka 22: 32-ah chuan, “I hawi kîr leh hunah nangin i unaute tinghet ang che,” a ti a nih kha. Petera kha a chetsual hma hauh khan Isua chuan Pathianin a hlawhchhamna chu a țha zawnga a hman theih dan a hriattir tawh. 

Petera a chetsual hnu [Isua vawi thum a phat hnu] khan Isua chu a thi a, a ni thum hnuah a lo tho leh ta a. Tichuan Petera nena lui kama an inhmuh khan Isua chuan a hlawhchhamna chu a țha zawnga a hman theih dan tur a lo kawhhmuh a ni. Hetiang hian an inbia: 

Isuan Simon Petera hnênah chuan, - "Simon, Johana fapa, hêngte ai hian nangin kei mi hmangaih zawk em?" a ti a. Ani chuan a hnênah, "Aw, Lalpa; ka ngaina che tih i hria e," a ti a. Ani chuan a hnênah, "Ka berâmnote châwm rawh," a ti a. Tin, a vawi hnihnaah a hnênah, "Simon, Johana fapa, nangin kei mi hmangaih em?" a ti leh a. Ani chuan a hnênah, "Aw, Lalpa; ka ngaina che tih i hria e,” a ti leh a. Ani chuan a hnênah, “Ka berâmte enkawl rawh," a ti a. Tin, a vawi thumnaah chuan a hnênah, "Simon, Johana fapa, nangin kei mi ngaina em?" a ti a. Tin, a vawi thumnaah, "Nangin mi ngaina em?" a hnêna a tih avâng chuan Petera chu a lungngai a, a hnênah, "Lalpa, - engkim i hria a, ka ngaina che tih i hria e," a ti a. Isuan a hnênah, "Ka berâmte châwm rawh," a ti a. 

Isua khan vawi thum lai Petera hnenah “Min hmangaih em?” a ti a. Eng vangin nge vawi thum a zawh? Peteran vawi thum lai a lo phatsan tawhna kha siamțhatna remchang a siamsak a ni. 

Zawhna a chhan apiang chuan Isua chuan Peteran a hlawhchhamna chu a țha zawnga herrem dan a siamsak zel: “Ka beram note chawm rawh … ka beramte enkawl rawh … Ka berâmte châwm rawh a ti a nih kha. 

Peteran Isua a phat zan chiah khan, zirtir dang, Juda chuan Isua a phatsan ve chiah a. Mahse, a tawpah chuan, Juda chu Isua phatsantu a ni a, Petera erawh zirtirtu leh hruaitu a ni ta daih thung. 

Matthaia 16: 18 ah Isua chuan, “Nang Petera i ni tih ka hrilh bawk a che; he lungpui chungah hian ka kohhranho ka rem chho vang a, Mitthi Khaw kulh kawngkhârte chuan chu chu an ngam lo vang.” tiin a sawi hial. 

Pathian chuan mi hlawhchhamte hmangin kohhran a din chhunzawm zel a. Dik tak chuan Pathian chuan mi hlawhchham chauh a hmang zawk – a chhan chu fel famkim an awm tak tak lo!

I hlawhchhamna hmunah khan engnge i lo nih ve tak ang? I duhthlanna a ni e. 

Ngaihtuah zui atan. 

• Engtin nge Pathianin i hlawhchhamna chu hlawhtlinnaah a changtir ang? I ngaihtuah phak bak leh dil aia țha fe chuan a thawk theiin i ring em? 
• I ringtu pui i ngaihsan zawng tak chu han ngaihtuah teh. Engtin nge Pathian chuan mi hlawhchham chu rawngbawltu ropui takah a lo chantir tawh? 
• Eng ang hlawhchhamna lian nge i lo paltlang ve tawh? Vawiin hian chu hlawhchhamna chu Pathian kutah hlanin chu hmun ațanga thil țha dawn chu i inpeih em? 

[ *Lettu:* Peka]

Wednesday, April 15, 2026

I TIHSUAL CHANGA ISUA THIL TIH PATHUMTE

_Khawngaihna Kara Thilmak_ 

- Rick Warren
- April 15, 2026
"Tihborala ka awm lo hi Lalpa zahngaihna a lo ni, a lainatnate chu a kang ngai loh avangin. A thar zel ṭhin tûk tinin, i rinawmna a ropui e," (Ṭah Hla 3:22-23).

Hlawhchham hi a khawharthlak. I tihsual mek lai khan zak takin i awm a, mahni chauha awm i duh ṭhin. Isua chu engtiklai pawhin, i hlawhchham nasat ber lai pawhin i hnenah a awm reng a ni.

I hlawhchhamna a ṭanpui tur chein, Isuan thil mak danglam tak pathum a ti ṭhin:

*Isuan a ṭawngṭaisak ṭhin che.* Petera hlawhchham hmain Isuan, "I rin a bo loh nan ka ṭawngṭaisak che," a ti (Luka 22:32).

Tun hun tawiteah pawh hian, Isuan a dilsakin, a ṭawngṭaisak che a ni. Bible chuan, "Chutichuan, amaha Pathian hnena lo kalte chu a tawpkhawk thlengin a chhandam thei bawk a ni, anmahni ṭawngṭaisak tura chatuana a nun reng avangin," (Hebrai 7:25).

*Isuan a ring tâwk che.* A nihna takah chuan, damchhuak  a, i ṭhat chhuah leh a beisei che a ni. Chuvangin a hlawhchham hma khan Petera hnenah, "I hawi kir leh hunah ... (Luka 22:32) a ti. Isuan Peteran thil a tisualin, a tlu sual ang a, mahse a tãwpah a hnenah a lo kir leh ang tih a hria. 

Thudik tak chu,  kan hlawhchham a, kan hlawhchham nawn leh ṭhin. I chak lohna lian ber berte hi i thil chîn ṭhante a ni. Vawi khat tihsual vang ringawtin engkim a chhe vek tihna a ni lo. Pathian hi hlawhchhamna lian tak vawi khat thleng atan chauh a awm lo va. I thil tihsual nawn fo ṭhinna atan pawh a awm reng a ni. Vawi tam tak hlawhchham ṭhin mah ila, Pathian chuan a ring tlat reng dawn che a ni.

*Isuan khawngaihna a hmuhtir che.* Isua hian ngaihdamna leh khawngaihna pek a duhna che hi i dil leh i duhna aiin a lian zawk. I beidawn lai khan Isuan a hauvin a dem lo che a. I inthiam lohna tur a belhchhahsak lo che a. A chhan zâwk che a ni.

Johana 21-ah chuan Peteran Isua a phatsan hnu reiloteah, Petera leh zirtir dangte chu lên dêng turin an kal a. Zankhua a an dêng chung pawhin engmah an man lo. Khua a lo vâr chuan Isuan vaukam aṭangin lên denna tur a hrilh a. "An dêng a, sangha tam avangin an hnuk chhuak zo ta lo va," (Johana 21:6) tih kan hmu. 

Peteran Isua thu anga a han tih chuan a buaipui sên loh khawpa tam sangha a man ta a ni. Isuan mi dang tân a tihsak ang chiahin i tân pawh a inpeih reng a ni. Nangin kum 50 chhunga i buaipuia i zawh loh chu, a ni chuan minute 5 chhûng lekin a ti thei a ni.

Hei hi chanchin lawmawm dang leh chu a ni. Isuan a khawngaihna che hi i tih ṭhat leh ṭhat lohah a innghat lo. Bible chuan Ṭah Hla 3:22-23-ah..."Tihborala ka awm lo hi Lalpa zahngaihna a lo ni, a lainatnate chu a kang ngai loh avangin. A thar zel ṭhin tûk tinin, i rinawmna a ropui e," tiin.  

Ṭhian duh tak, Pathian lakah i lo beidawng tawh a ni mai thei e, mahse ani chuan a beidawnsan dawn  lo che a ni. I tan a ṭawngṭai a, a ring che a, khawngaihna a hmuhtir reng che a ni. Eng pawh ti la, Pathian chu a rinawm reng a ni.

Ngaihtuah zui atan.

Isuan a ṭawngṭaisak che tih hriat hian i nunah eng nge danglamna a neih?

Eng thil nge i tihsual nawn leh fo ṭhin? I tlûka i thawh leh theih nan engtin nge Pathianin a ṭanpui ang che?

I hawhchham lai khan engtiklaiin nge Isuan khawngaihna a lantir che?

[ *Lettu: Marova Punte* ]

Tuesday, April 14, 2026

I HLAWHCHHAMNA AVANG CHUAN HREHAWM TI LA, TICHUAN I THINLUNG A DAM THEI ANG

_Khawngaihna Kara Thilmak_

By Rick Warren 
April 14, 2026
“Petera chuan Isuan, "Ar a khuan hmain nangin vawi thum mi phat ang," a tih thu kha a lo hre leh ta a. Tin, a chhuak a, a ṭap ta zawih zawih a.” Matthaia 26:75

Hlawhchhamna i tawh laia rilrua awm ṭhin chu ngai i awh leh thei tawh lo vang tih hi a ni. Mahse ngai i awh leh ang. Hlawhchhamna chu sum leh paiah emaw, inneihna ah emaw, eizawnnaah emaw thildangah emaw a ni thei, ngai i awh leh thei a ni.

Ngaiawhlehna chu i hlawhchhamna pawi i tihna aṭang chiah khan a inṭan ang. Hre lo ang mai emaw pawi ti miah lo angin lang miah suh. Ngai awh leh tur pawhin hmanhmawh suh. Chu ai chuan hrehawm i tihnaah chuan awm phawt rawh.

Hei hian hringnuna thil pawimawh tak min zirtir a. Engemaw tal puitlin tur chuan, paltlang tur kan nei tih hi a ni. Hei hi kan nun kawng hrang hrangah a dik a. Hlawhchhamnaah hian a dik bik a ni.

Lungngaihna chu hlawhchhamna kalkawng a ni. I hlawhchham hian, i rilru hrehawmna te pawh theihnghilh a, thildang ngaihtuah san daih i duh ṭhin. Chutiang tur chu a ni lo. Hrehawmna chu hlawhchhamna aṭanga inzirna hmun pawimawh tak a ni.

I rilru hrehawmna chu dawlh nghal mai lo va, i ṭhial chuan i pum tan pawh a ṭha ang. Soda thin vak vak a, freezer-a dah leh tawp ang hi a ni. Vawi lehkhatah a puak pawp thei a ni. Isua zirtir Petera pawh khan hlawhchhamna avanga lungngaihna chu a hmachhawn chiang hle a ni. A harsat lai takin Isua a phat a, chumi avang chuan hrehawm ti takin amah pawh a awm phah a ni. 


Bible chuan, “Petera chuan Isuan, "Ar a khuan hmain nangin vawi thum mi phat ang," a tih thu kha a lo hre leh ta a. Tin, a chhuak a, a ṭap ta zawih zawih a.” (Matthaia 26:75).

Peteran pawi a tihdan tur zia han ngaihtuah teh. Isua kianga khawsa chawt a ni a, a zirtir lai te, thilmak a tih te, natna a tihdam te, mitthi a kaihthawh te, mi a khawngaih leh a ngaihdam zawng zawngte a hmu vek a ni.

A hlawhchhamna chu hre lo angin a awm lo va. A tihtur diktak a ti a. Pawi ti takin hrehawm ti takin a awm a ni. A hlawhchhamna avang chuan hrehawm a ti  hle a - chu chu damna bul ṭanna a ni.

Mi tam tak chu an hlawhchham hian pumpelh kawng zawh an duh ṭhin a. Hlawhchham lo ang maiin awm an tum a, lem an chang ṭhin a. An hlawhchhamna chhanah midang an puh daih ṭhin a ni. Zirlai zir an tum ṭhin lo a  ni.

Nimahsela hlawhchhamna aṭanga ngaiawh leh turin pumpelh kawng a awmlo a ni. Hlawhchhamna  a len poh leh tihdam leh chhung pawh a rei a ni. I thinlungah Pathian thu sawi tir la. Damna chu barluih theih a ni lo. Ngaiawh leh tur chuan Pathian khawngaihna a ngai a, a hun takah a lo thleng ang. 

Ngaihtuah zui atan

* Lungngaia awmdan chu thiam i inti nge ti lo? A chhan engnge?

* Hlawhchhamna avanga lungngaihna chu pumpelh i tumin engnge lo thleng?

* I tluk chuan tu nge i pan ang, chu chu engvangin nge a pawimawh?

*[Lettu: Sangpuia]*

Monday, April 13, 2026

TU NGAIHDAN NGE PAWIMAWH BER?

_Khawngaihna Kara Thilmak_

By Rick Warren 
April 13,  2026
“Mi dang ngaih dan pawisak luat a hlauhawm a, Lalpaa innghah erawh chu a him." Thufingte 29:25.

Mi ngaihdan ngaichang chunga thutlukna i siam chuan i hriat miah lo vin hlawhchhamna chi i tuh tihna a ni.

Hei hi ila hre lo maithei, midang pawmpui loh hlauhna hian thildang zawng aiin harsatna min siam bik a ni. Midang ngaihdan i ngaihpawimawh zawk chuan, thil diklo deuh pawh i dah pawimawh zawk hial ang. Mi zawng zawng tih lawm i tum avangin i tihhlawhtlin theih loh tur te i intiam ṭhin a ni. Hei hi hlawhchhamna hmahruai chu a ni reng tawh.

Peteran Isua vawi thum lai a phatna chhan pawh a ni. Isua laka rinawm ai chuan miin engtinnge an ngaih ang tih kha a ngaihtuah zawk a ni.

Bible chuan, “Nimahsela Peteran hla tak atangin amah chu a zui a, Puithiam Lalber in hual chhung kawtlai thlengin; tin, a va lut a, a tawpna hmu turin chhiahhlawhte zingah a ṭhu ve a. Tin, Petera chu pawnah, in hual chhung kawtlaiah chuan a ṭhu a; tin, nula pakhat hnenah a lo kal a, "Nang pawh Isua Galili rama mi hnena awm kha i nih hi," a ti a. Ani erawh chuan, "I thu sawi chu ka hre hauh lo mai," tiin an zaa hmaah a pha a.” (Matthaia 26:58, 69-70).

Petera kha Isua, Pathian fapa kiangah kum thum hun a hmang a. Isua hming chawisanna hun remchang a neih hunah tak a phatsan leh si a ni. Isua nihna lantir ai chuan miin engtinnge an ngaih ang tih a ngai pawimawh zawk a ni.

Midang ngaihdan i hlauh avangin vawi engzat nge Krista chanchin puanna hun remchang i neihah engmah sawi lo vin i awm.

Pathian ngaihdan aia kan ngaih pawimawh zawk tur tu nge? Pathian aia ngaih pawimawh zawk i neih chuan chu chu i pathian tihna a ni. Chu chu milem biakna a ni a - hlawhchhamna hmanrua a ni.

Midang pawmpui loh hlauhna hi hliam inthup aṭangin a inṭan ṭhin. Tunhmaa hnawl tawh nih vang pawh a ni thei. Mamawh tak hmuh loh vang emaw harsatna lian tak tawh vang emaw a ni thei bawk. Hei hi chhungrila natna a ni a. Thlarau natna pawh a ni.

Thlarau natna chu kan nihna tarlanna nen pawh a inkungkaih a ni. Tu nge i nih i inhriat loh chuan i damchhungin miin an pawm thei lo vang che. I rinna leh thudik pawh i dinpui ngam lo vang. 

Bible in Thufingte 29:25, “Mi dang ngaih dan pawisak luat a hlauhawm a, Lalpaa innghah erawh chu a him."

I nuna hliam awm te i hriatchhuah chuan Pathianin a tidam thei che a. Pathian ngaihdan a pawimawh zawk tih hriain zalen takin i awm thei ang.

Ngaihtuah zui atan

* I nihna diktak Pathian thuin a sawi angin Krista ah a awm a ni. Pathian thuah i inchiah theihna tur leh i nihnaah i him zel theihnan vawiinah hian engnge i tih theih ang?

* Pathian i rin avangin engtikah khan nge inringtawk takin thutlukna i siam theih?

* Midang pawmpui loh i hlauhna hi hliam thup i neih vang nge? I chiang chiah lo anih chuan, Pathian hnenah hriatthiamna leh damna vawiinah hian dil ang che.

*[Lettu: Sangpuia]*

Sunday, April 12, 2026

I CHAKNA KHA TLUK PHAH NAN HMANG SUH

_Khawngaihna Kara Thilmak_

- Rick Warren 
- April 12,  2026
_"Ding nghet ni a i inhriat chuan i tluk loh nan fimkhur ang che."_ (1 Kor. 10:12, NLT)

Hlawhchhamna hi hringnuna bet tlat a ni a. Tupawh niin i chanchin chu engpawhnise, hlawhchhamna hi i tawn hun a awm ang. Famkim lohna khawvela mi famkim lo kan nihnain a ken tel a ni tlat.

Isua khenbeh a nih hma, man a nih zan khan a thian Petera kha Isua lakah a hlawhchham ve tlat. Petera khan vawi khat mai ni lovin vawi thum lai a phatsan anih kha.

Zanriah hnuhnung an kil lai khan Isuan a zirtirte hnenah man a ni ang a, a thi ang a, ni thum niah  tho leh ang tiin a sawi. A zirtirte hnenah, _"Zanin hian in vaiin min phatsan ang"_ (Mat. 26:31, NLT) a ti a. Mahse Petera khan a phatsan hauh loh tur thu a sawi a. Petera khan "Ka phatsan lovang che" tih vawi thum lai a sawi!

Petera khan a chakna kha a chhut sual a - hlawhchhamna a thlen hial a ni.

Chakna chhut sual hi tun thleng hian hlawhchhamna thlentu a la ni, i chakna aia chaka i inngaihin - thlemna i hmachhawn thei ni a i inhriatte khan.

Miin an chakna an chhut sual hian nghawng pawi tak a nei thin: sumdawnna tlak chhiatna, indonaa tlawmna, leh kawppuiten an uiresanna a thlen bawk.

"Ka chungah a thleng ve ngai lovang" i ti a ni mai thei. Mahse 1 Kor. 10:12-ah chuan heti hian kan hmu, _"Ding nghet ni a i inhriat chuan i tluk loh nan fimkhur ang che."_ (NLT)

Tumah kan bang thei lo. Hun remchang a awm vaih chuan eng sualah pawh i tlu thei, kei pawh ka bang bik lo.

I chakna kha i ngaihsak loh chuan i chak lohnaah a chang thei. Heti hian kan sawi thei ang, chakna ven that loh chu kan chapopui thin avangin chak lohna thuah hnihah a chang thei.

Petera hlawhchhamna lian ber, Isua a phatsanna kha thil hlu leh theihna sang tak kengtu zanriah hnuhnung an kil zawh chiaha thleng a ni. Hlawhtlinna sang tak i channa hmun chiah kha i tlukna thlenna hmun a ni thei.

I chakna aia sanga i chet loh nan thlemna dodal rawh. Misual, Pathian khawngaihna leh zahngaihna mamawh i nihna kha hre reng la. I chakna kha i hlawhchhamna a nih loh nan inveng reng rawh.

Ngaihtuah zui atan.

Engtikah khan nge i chakna i chhut sual avanga i hlawhchham?

I chakna khawi lai ber kha nge i ven uluk loh chuan i chak lohnaah a chang thei tih i hriat?

Engtinnge Pathian thuin i chakna a tihngheh thin?

[Lettu: Mapuia Fanai]

Saturday, April 11, 2026

PATHIANIN I NATNA KHA A THLAWNIN A LIAMTIR MAI LO

_Khawngaihna Kara Thilmak_

- Rick Warren 
- April 11,  2026
_"Kan tawrhnate in tan hlawkna tur a ni. Krista hnena hruaite in tam poh leh Pathian thatna fakna tur a tam ang a, Lalpa chu chawimawiin a awm leh zual ang."_ (2 Kor. 4:15, TLB)

I natna kha midangte tanpui nana i hman chuan i ngaihtuah phak aia nasain Pathianin mal a sawm ang che.

Tirhkoh Paula natna tam tak a paltlang a, chuvang chuan Pathianin kawng tam takin a hmang a ni. Tui chungah an lawng a keh chhia a, vuak leh rawk a tawk. Chaw leh tui nei lovin riltamin a awm bawk. Mahse Pathianin Rom lalrama Chanchin Tha puang turin a hmang tho. Paula hnenah, "Khang na zawng zawng tuar chung khan engtin nge i awm theih?" tiin zawt ta la Isua Krista hnenah midangte hruai a duh vang a ni tiin chhang ngei ang che. Midangte tanpui kha a duh tlat a ni.

The Living Bible chuan Paula thusawi heti hian a letling, _"Kan tawrhnate in tan hlawkna tur a ni. Krista hnena hruaite in tam poh leh Pathian thatna fakna tur a tam ang a, Lalpa chu chawimawiin a awm leh zual ang."_ (TLB)

Paula tawrh ang tak kha chuan i tuar ve lo a ni mai thei, mahse natna tam tak i pal tlang ang. Chuvang chuan i tawrhnate chu engmah lova chan lovin thil tha atan i hmang thei ang.

Midangte tanpuina atana Pathianin a hman tawrhna chi thum a awm: mahni inbarh lut tawrhna, pawisawi lo tawrhna, leh tlanna avanga tawrhna.

Tawrhna thenkhatte hi chu keimahni'n kan cho chhuah a ni. Thutlukna dik tawk lo kan siam avangin kan tawrh phah fo thin. Chaw tha kan ei reng lo a, thutlukna dik kan siam reng lo a midangte dik takin kan chhang lo fo thin bawk.

Mahni thiam lohn ni miah loah midangin an tihnat che chuan chu chu pawisawi lo tawrhna a ni. Kalsan i ni emaw, bum i tawk emaw, mi zawng zawng hian midangte sualna avangin kan tuar vek.

Mahse tawrhna sang ber chu midangte tlanna tura tawrhna hi a ni. Hei hi midangte thatna tur atana i tawrhna hi a ni.

Hei hi Isuan a rawn hlen chhuah chiah kha a ni. Isua khan thih kha a phu miah lo, mahse krawsah a thi tlat. Chhandam i nih a vanram i luh theihna turkin Isuan tawrhna a paltlang a ni. Chutiang chiah chuan i natnate kha midangte hnena beiseina leh damna pekna hmanrua atan Pathianin a hmang ang.

Sum leh paia tla chhe mekte tanpui turin sum leh paia tlakchhiatna lo tawk tawh aia tha tunge awm ang? Ruihhlo ngawlveina lo paltlang tawh tluka tha tunge ruihhlo ngawlveite puitu tur awm? Fa enkawl ngai lo enkawl puitling tawh tluka chumi kawnga mite zirtirtu tur tunge awm? Fa chan mekte tan fa chan tawhte tluka puitu tha tunge awm?

Tawrhnate hi Lalpan a tithawn ngai lo. Midangte fuih nan Lalpan i nun kaltlangin hna a thawk ang.

Lalpa chu fak la, hun harsa i tawh laiin lawm rawh, i tawrhnate chuan chhelna a siam ang che a midangten natna an tawh hunah i tanpui thei ang. Pathian chuan khing tawrhna pathumte khi i that nan a hmang hlauh thei a. Hetiang hian i natna zawng zawng Lalpa hnenah thlen la, "Lalpa, ka natnate hi midangte hlawk nan hman ka duh" tiin.

Ngaihtuah zui atan.

I nun kal tawha i natnate eng angin nge Pathianin midangte tanpui nan a hman tawh? Nangma insiam chawp nge i hriatloh vanga tawrhna?

I eng natna nge Lalpa hnenah i la thlen loh? "Lalpa, ka natnate hi midangte hlawk nan hman ka duh" ti turin i inpeih tawh em?

An natnate midang tanpui nana hmang thin entir nana hman tur tha tak hriat i nei em?

[Lettu: Mapuia Fanai]

Friday, April 10, 2026

I THILTUM A PAWIMAWH CHHAN

_Khawngaihna Kara Thilmak_

By Rick Warren
April 10, 2026
“Mahni thu kan hril si lo va, Krista Isua chu Lalpa a nih kan hril zâwk țhîn a, keini pawh Isua avânga in bâwih kan nih kan hril bawk țhîn.” [II2 Korinth 4:5]

Pathian mi hman nih i duh chuan, hei hi i hriat reng a ngai: Nangma thuhla a ni lo, Isua vek zawk a ni. 

“Nangma chungchang a ni lo” tih thu chu khawvel kalphunga zirtirna i dawn letling vek chu a ni. I khawvel zawng zawng chu mahni hmasialna lam hawia kalpui a ni a. Fakna [advertisement] thuhla zawng zawng chuan “Pakhatna i ni e! I tana țha ber chu ti rawh! Nangmah inngaihtuah hmasa ber ang che!” an ti țhin. 

Leilung lailum luahtu chu nangmah i ni lo – Pathian a ni. Chuvang tak chuan i hmaa chhuak buaina, remchang leh sawiselna te chu nangma chungchang emaw i tih zel chuan i hnualin lungawi lohna tur i hmu chamchi ang. Khawvel inher dan chu ninawm i ti bawk ang, a chhan chu nun awmzia chu mahni tana nun satliah mai chu a ni lo tlat. 

Bible chuan, “Mahni thu kan hril si lo va, Krista Isua chu Lalpa a nih kan hril zâwk țhîn a, keini pawh Isua avânga in bâwih kan nih kan hril bawk țhîn,” tiin a sawi [II Korinth 4:5]

He Bible thuah hian Paula chuan Isua vek a ni e tiin a sawi. “Isua Krista chungchang a ni e” a ti a, “ama tan a ni e,” tiin a sawi. Ṭawngkam danga kan sawi dawn chuan, Isua zui tih awmzia chu kan thil tih chhan [motivation] ber chu Isua a ni e tihna a ni. 

I nun tan khan thil za tam duhthlan tur chu i lo nei a ni mai thei, mahse Pathian chuan, “Ka siam chein ka din che a, chutianga i awm chu kei chuan a țha ka ti a ni,” tiin a sawi. 

Mahse, Pathian chuan i tihdan aiin i thil tih chhan chu a ngai pawimawh fe zawk a ni. Tih dan dik taka tiin hringnunah chuan i lo hlawhtling viau a ni thei. Mahse tih chhan dik lo – duhamna, elrelna leh rilru dik lo - nena i lo ti a nih chuan Pathian chuan a chhinchhiah hlauh lo vang. 

A lehlamah chuan, thil chu i tisual nuaiin kawng eng emaw zatah chuan i hlawhchham a ni thei. Tih chhan dik tak – Isua - nena i ti a nih chuan – Pathian chuan, “Chu chu a tawk e” tiin a sawi. Pathian chuan i tih chhan chu i thil tih ai chuan a ngai pawimawh zawk. 

Bible chuan, “Tin, in tih apiang chu thusawiah emaw, thiltihah emaw, ama zârah Pa Pathian hnêna lâwmthu hril chungin, Lalpa Isua hmingin ti vek rawh u,” tiin a sawi [Kolossa 3: 17]. 

Ngaihtuah zui atan. 

• “Nangma hlawkna turin” tih thurawn chuan i nun khawi lai kha nge a nghawng ve?
• Duhamna, elrelna, thikna leh khakna te chu i nun hruaitu an nih chang a awm ve tawh em? Chu chuan engtin nge hna a thawh?  
• “Isua tan” tih chu i thupui ni ta se tun kara in thil tihte – chhungkua angin, țhian zaho angin, zirlai angin, hnathawk angin - engtin nge a danglam ang? 

*[Lettu:* Peka]

Thursday, April 9, 2026

I NIHNA ANGA NUN HLAU SUH

_Khawngaihna Kara Thilmak_

By Rick Warren
April 09, 2026
“Thil țha ti atân Krista Isuaah chuan siama awmin, ama kutchhuak kan ni si a; chu thil țha tih chu kan awmna tûrin Pathianin a buatsaih lâwk a ni.” [Ephesi 2:10]

Pathian chuan midang daih ni turin a siam lo che. Vanram i thlen hun chuan i laizawnnu ang emaw, i pa ang emaw, i țhenawmte ang emaw i nih leh nih loh a zawt dawn lo che. Pathian chuan danglam takin a siam che a, mi tak tak ni turin a duh thung che. 

I nihna ang anga hmuh che a duh bawk. 

Bible chuan, “Thil țha ti atân Krista Isuaah chuan siama awmin, ama kutchhuak kan ni si a; chu thil țha tih chu kan awmna tûrin Pathianin a buatsaih lâwk a ni,” tiin a sawi [Ephesi 2: 10] 

Thil pawi tak chu mi tam takte chuan an nihna ang lo daiha awm an tum chu a ni. Mite fakna beiseiin an khawsa a. Thil eng emaw an tih chuan Pathian chuan anmahni hmangaih zual turahte an inngai. Mahse Pathian hmangaihna chu i thiltih eng emaw beh chhan a ni lo. I thil tih chu eng pawh ni se a hmangaih tho tho che. 

Mi țhenkhat Pathianin a hman theih loh chhan chu a tak taka an nun ngam loh vang a ni. Mite chuan i nihna tak tak an hmuh chuan an ngaina lo palh ang che tih an hlauh avangin an thla a muang lo fo. Mahse Bible chuan, “Hlauva awm leh tûrin bâwih nihna thlarau in hmu a ni si lo va; fa nihna thlarau in hmu a ni zâwk e, chu thlarau avâng chuan 'Abba' (Ka pa) tiin kan au țhin hi,” tiin a sawi [Rom 8: 15] 

Hlauhthawnna kan neihte a tihdamna țha ber chu nangmaha Pathian Thlarau thawk mek kha a ni. Pathian fa i nihna angin i nung a nih chuan, i fel lohna leh chak lohna zawng zawng nen khan, Pathianin a siam dan chein zalen takin i nung thei ang. 

Fel lohna lai i nei kha dik tak chuan i tan thil țha tak a ni tih i hre thiam em? Mite chu chakna hmunah an țhang ngai lo; chak lohna hmunah an țhang zawk țhin. Midang hmaah i chakna i tarlan chuan i kiang hnaia mite chuan an hnaih thei ngai lo vang che; an thikin emaw an hlat daih emaw che ang. I fel lohna lai i tarlang ngam a nih a – dik taka i nung bawk a nih chuan – mite chuan an hnaih thei ang che. 

Thutlukna chu i siam a ngai e. A tak taka nun chu i ngam em? Hlauhna chuan a bei chein salah a siam che a ni thei. A nih loh pawhin nangmah tak tak anga nungin Pathianin rei tak ata tawh a thil ruahmansak che thilțha chu i lo chen thei ang. 

Ngaihtuah zui atan. 

• Eng ang dinhmunah nge i nihna ang ni lo tura thlem i lo nih ve tawh? 
• Eng ang taka hlauthawngin nge i lo khawsak mek? Pathian fa i ni tih inhriatna chuan a tak taka nung turin engtin nge a lo buatsaih ve tawh che? 
• Engtikah nge midangten an chak lohna i kiangah an puan ve tawh? Chu chuan engtin nge anmahni i hmuh dan a khawih danglam? I chak lohnate midang bula i sawi chang chuan miten engtin nge an lo dawnsawn ve țhin? 

[ *Lettu:* Peka]

Wednesday, April 8, 2026

RAWNGBAWLNA CHU ENGTIN NGE A LAN?

_Khawngaihnaa Thilmak_

- Rick Warren
- April 08, 2026
"Chumi avang chuan khawngaihna kan hmuh ang zela he rawngbawlna hi kan neih avangin kan dawl lo va," ( 2 Korinth 4:1).

He khawvelah hian mi dangte tana malsawmna ni a, ṭangkaina nei tura siam i ni, awma nung ve satlaih tawp turin a siam lo che. Pathian chuan a rawng bawl turin a buatsaih che a, a vai hian Pathian khawngaihna vang chauh a ni.

Paula chuan, "Chumi avang chuan khawngaihna kan hmuh ang zela he rawngbawlna hi kan neih avangin kan dawl lo va," ( 2 Korinth 4:1) a ti.

Ṭhenkhat chuan 'rawngbawlna' tih hi kohhran ṭawngkam niin an ngai a. Thil eng emaw minister te chauhin an tih theih niin an ngai. Mahse engtiklai pawha i chem kalna, thilpek leh thiamna, Pathianin a pek che kha mi dangte ṭanpui nan i hman chuan rawng i bawl tihna a ni. Pawisa vawngtu, zirtirtu emaw, truck khalhtu emaw pawh ni la, i hnathawh kha rawngbawlna a ni thei.

Thil engkim Pathianin nangmah kaltlanga a tih kha a zahngaihna vang a ni tih i hriatthiam chuan thil pahnih a lo awm ang:

*I hlutna i finfiah a ngai lo.* I hnathawh hmanga i hlutna finfiah i tum tawh ngai em? I hlawhtlin poh leh i hlu niin i inngai em? I hlutna kha i hnathawhah a innghat lo va. I hlutna zawk chu Pathianin a siam che a, a hmangaih che a, i tana thi turin Isua a lo tir tih zawkah hian a ni. Pathian khawngaihna i hriatthiam chuan thiltih ṭhat hmanga amah tihlawm tumna aṭangin i chhuak ang. 

*I thil tihsualah chêng reng suh.* Kan vaiin tihsual kan nei vek tawh a. Kan vaiin kan sual vek tawh. Mahse Pathian khawngaihna avangin hun kal tawhah i chên reng a ngai lo. I sim thei a, i sual i kalsan thei. I hun kal tawh khan Pathianin ti tura a tih che a dâl kher tur a ni lo.

Pathian hian mi famkim a hmang ngai lo, a chhan chu Isua tih loh chu tumah famkim an awm loh vang a ni. Bible i en chuan Pathianin a hman mi chi hrang hrangte hian  tihsual an nei vek tawh tih i hmu ang. Jakoba chu dâwt sawi hmang a ni a, Rahabi chu nawhchizuar a ni a, Jona chu mi thlabâr leh thil ti hreh tak a ni a, Marthi chu a buai em em a, Samari hmeichhia chu inneih hlawhchham nual tawh a ni a, Petera chu thil ti phut phut ṭhin a ni a, Mosia te, Davida te leh Paula te chu tualthah vanga thiamloh chang an ni. Chuti chung chuan Pathianin awihawm loh khawpin kawng hrang hrangin a hmang tho a ni.

Chuvangin Pathianin a hman theih lohna tura dâltu che engmah a awm lo. Pathian zahngaihna ropui tak avangin i nun atana a thil ruahman chu i ti hlawhtling thei a ni.

Ngaihtuah zui atan

I hna chu rawngbawlna anga i ngaih chuan eng ang takin nge a lan ang?

I hlutna leh i hlutzia chu engin nge siam?

Hun kal tawha i sualna emaw, i thil tihsualin Pathianin i nuna a thil tum a dâl em? Chu mi chungchang chu Pathian hnenah thlen rawh.

[ *Lettu: Marova Punte* ]

Tuesday, April 7, 2026

PATHIAN RAWNGBAWL TURIN I TLING

_Khawngaihna Thilmak_

By Rick Warren 
April 7, 2026
“In taksa pengte pawh fel lohna hriamhrei atan sualna hnenah pe phal hek suh u; amaherawhchu mitthi zing ata nung leh angin Pathian hnenah inpe ula, in taksa pengte pawh chu felna hriamhrei atan Pathian hnenah pe phal zawk rawh u.” Rom 6:13

Pathian mi hman nih aliama hlimna tur dang a awm chuang lo. Chu hlimna chu eng nen mah teh theih a ni lo. "Hei hi a ni! Hei vang hian a lawm ka nun. Ka man fuh ta." 

Chu thinlung chu ila nei ngai lo anih chuan, i bo hle tihna a ni. Kan damchhan hi zirna ṭha te, hna neih te, sum thawhchhuah te leh pension te a ni ber lo. I hna aiin i nunna kha a pawimawh zawk a ni. Chatuana nung tura duan i ni.

Bible chuan, “In taksa pengte pawh fel lohna hriamhrei atan sualna hnenah pe phal hek suh u; amaherawhchu mitthi zing ata nung leh angin Pathian hnenah inpe ula, in taksa pengte pawh chu felna hriamhrei atan Pathian hnenah pe phal zawk rawh u.” (Rom 6:13).

Ṭhenkhat chuan Pathianin a hmang thei lo vang tih a ruk takin an hlau a ni. A ṭhen chuan an nun hlui avangin hman tlak loh niin an inngai bawk. Ṭhenkhat ve thung chuan lehkha an thiam loh avang te, talent emaw dinhmun ṭha emaw an neih loh avang tein an inringhlel ve bawk. 

Tling lo emaw tlaklo ah emaw i inruat maithei e. Nimahsela Pathianin i suangtuah baka a hman theihna tur chein Tirhkoh Paula nun kha thlir teh.

Paula aia Pathianin a hman tumah an awm lo. A kut khingkhat chauhin Rom lal ram pumpuiah kha Kristianna a thehdarh a tih theih a ni. A kalna apiangah kohhran a din zel a ni. Thuthlung Thar zatve hi ama ziah a ni a. Pathian tan awmze nei takin a nung a ni.

Paula kha, thuhriltu, pastor leh kohhran dintu anih hma kha engnge a tih i hria em le? Kristiante tiduhdahtu a ni. Khaw tinah kalin Kristiante a sawisa a taninah a khung ṭhin. Paula chu Pathian mi hman ni tura i rinloh dan hlirin a khawsa a ni.

Paulan, “Judate sakhaw biak danah chuan hman laia ka awm dan chu in hre tawh si a, khatia Pathian Kohhranho nasa taka tiduhdahin ka tihbuai thin kha...Pathian chuan ka nu pum chhung atangin mi tihranga, a khawngaihna avanga mi ko a ni.” (Galatia 1:13, 15).

I nunhlui chuan i hmalam hun a hril lawk kher lo. I hun liam tawh chu liam tawh a ni. Pathian mi hman i nihna tur a dal lo che. Chutiang chiah chu remchanna i hmuh leh hmuh lih tur pawh chu a ni. Pathian rawng i bawlna turah an dal lo che. Pathianin a thlang che a, a koh che a, a khawngaihna mak tak avang chuan vawiinah hian a hmang duh che a ni.

Ngaihtuah zui atan

* Pathian hman i nihna turah hian i nun hlui sualna emaw i tihsual emaw eng hian nge hman tlak lovah ruat che? I nun engvang khan nge tling lo va i inruat?

* Paula anga nun hlui sual em em, nimahsela Pathianin kawng tam taka a hman ni si sawi tur i nei em? Chu chuan i nun engtinnge a chawh phur?

* Pathianin a hman nasat deuh lai che kha han sawi teh. Chung lai chuan i nun engtin nge a awm? Vawiinah hian Pathian hman theih ni turin engtinnge i inbuatsaih ang?

*Eng pawh lo ti tawhin khawi hmunah pawh lo awm tawh mah la, Pathian chatuan chhungkuaah hmun i nei.*
Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

*[Lettu: Sangpuia]*

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...