Saturday, February 28, 2026

ṬAWNGKAM PHENA HLIAM AWM THEI NGAITHLA RAWH

_Thil Pawimawh Sawihona_

- Rick Warren
- February 28, 2026
_". . . Inlainat tawn ula, unau angin inhmangaih ula, khawngaihna nei ula, thuhnuairawlhin awm rawh u."_ (1 Petera 3:8)

Miin titinaa a sawite hi chhungrila an dinhmun tak aiin a pawimawh lo fo. Miin thil a sawi hi a chhungril nun nen a inperhsan fo mai.

Midangte thusawi ngaihthlaksaktu ni tur chuan miten i pawi an sawi pawhin zawldawh i zir a ṭul ang. Rilru hliama awmte hian midang an hliam fo a, ṭawngkam hi indona hmanraw thiltithei tak a ni bawk. Midang tihel ching mi emaw thiamchan tum reng ang chi chu an hlauh vang emaw, an him loh vang emaw, an beidawn vang emaw a ni chawk.

Chutiang chu i hriat chian hun chuan miin engnge sawi an tum tak tih hriata ngaihthlak thiam a awl ta ṭhin. Mi, an rilru a chhiat avang emaw mi an hmuuhsit vang emaw a zawldawh lova i hriat chuan an dinhmun hriatthiam a har ṭhin.

Thu mai hian thil nihna chiang takin a hrilh lo fo che. A chang chuan kawng inhawng lai i zawn a ngai. Miin thil a paltlangte i zir chian a ṭul fo. Engvangin kha thilthleng kha an tan a len viau tih i zir a ngai. An natna i ngaithlak a ṭul, an natna khan i nunah engmah nghawng a nei lo tih hre mahla. Natna ṭhenkhat chu a thuk lutuk a midang nena titihona hun pawh a hliah zo ṭhin. Thusawi ṭhenkhatte chu an na hliahkhuhna mai a ni.

Midangte ngaihthlak kan tih hian an thusawi ni lovin an rilru lam thlir thiam hi a ni.

_". . . Inlainat tawn ula, unau angin inhmangaih ula, khawngaihna nei ula, thuhnuairawlhin awm rawh u."_ (1 Petera 3:8)

Inngaihtlawmna nun i neih chuan ngaihdan thar dawng thei turin i inhawng tihna a ni. Hmangaihna leh khawngaihna i neih chuan mi i seh let ve lo. I chungah mi an thinrim chuan an thinrimna en kânin heti hian zawt rawh, "Engnge an hlauh? Engin nge an rilru tibuaia an phili? Engin nge tina?

Engvangin nge mi an buai a an mangan tih hi hre turin anmahni i hrechiang thei reng lovang. An rilruah engnge in sual tih i hre thei lovang. Chutiang a thlen hun chuan an rinhlelhna rah i pek a ngai. Thutawp siam mai lovin tlawmna leh zawldawhna nen i en a ngai. Eng emaw lo sawi ve mai lovin khawngaihna lantir rawh.

Ṭawngkam khirh tak an dawn pawhin ngaithlatu chuan hmangaihna an lantir ṭhin.

Ngaihtuah zui atan.

Khawngaihna leh mi dinhmun hriatthiamna hi engnge a inan lohna? Midangte khawngaih nge harsa an dinhmun anga inchan?

Midangte thusawi aia an dinhmun hrethiam tura anmahni ngaithla turin eng zia nge i nunah i tuh ṭul?

Mi, an rinhlelhna rah hmuhtir tih hi engnge a awmzia? 

[Lettu: Mapuia Fanai]

Friday, February 27, 2026

I CHHAN HMAIN NGAITHLA RAWH

_Thil Pawimawh Sawihona_

By Rick Warren
February 27, 2026
“Ngaihthlak ahmaa chhan chu, a tan atthlak nihna leh mualphona a ni." [Thufingte 18:13] 

Mi tam tak chetsual fona chu an ngaihthlak hmaa an chhang mai ṭhin chu a ni. Buaina eng emaw kan hmachhawn chang chuan engtin nge kan chinfel ang a, hmalam kan pan zel ang tih kan ngaihtuah zung zung fo. Pathian chuan thil hre thiam hmasa phawt turin a duh che. Midang harsatna chinfelpui tuma i chet chhuah hmain an natna hre thiam hmasa zet turin a duh che. 

“Ngaihthlak ahmaa chhan chu, a tan atthlak nihna leh mualphona a ni." [Thufingte 18:13] 

Thil awmzia hre chiang hmasa hauh lovin “Hei hi a chinfel dan ka hria” tiin i lo ngaihtuah tawh mai thei. Mahse chu chu a ṭha ber lo fo. Mite chuan anmahni i ngaihsak a ni tih i lantir hma chuan eng atan mah an ti tak tak lo che. An thusawi ngaithlatuah an duh che. Hmangaih nih an duh a. Anmahni hre thiamtu an duh bawk.  

Mite nena inṭawm/inchhawk nunah chuan damna a awm fo. Mite harsatna ngaihthlakna atan i beng kha Pathian chuan hmangin mite tana damna hmanrua i ni thei.  

Johana 11-ah chuan Isua chuan a ṭhian Lazara a dam loh lai khan ni khata thlen theih turah ni thum lai a tawi khawmuang a nih kha. Isua a lo thlen meuh chuan Lazara chu a lo thi tawh a. A farnute chu ṭapin Isua hnenah chuan lo thleng hma deuh sela chuan an unaupa chu thi lo tura an ngaih thu an hrilh hial. 

Khatiang hun harsaa Isua a lo thleng tlai kha lainatna nei lo angin a lang thei, mahse ruahmanna mumal tak a nei a ni. Lazara tihdam kha ṭul a ti lo. Thihna ata Lazara kha kaihthoha amah, Isua kha Pathian Fapa a nihzia tarlan a duh a ni. Lazara a dam loh hma daih tawh khan a chinfelna/tihdan a lo nei vek tawh a ni. 

Tin, Isuan Mari ṭap leh a rawn zuitu Juda-te ṭap chu a hmu a, a rilruin a rûm a, a lungngai a. “Ani chu khawiah nge in zalh?” a ti a. Anni chuan a hnênah, “Lalpa, lo kal la, en teh,” an ti a. Isua chu a ṭap ta a. [Johana 11: 33-35] 

Isua chuan an natna kha a hre thiam lo a ni lo. A kiang vela mi zawng zawng lusuna an rum lai khan, na ti takin a lo rum ve tho. An zingah a tel ve zel a. A chinfelna chu a hre ngei a, mahse chu chuan anmahni a tuarpui lo tihna a ni chuang lo. A tuarpui a, mahse a hmalak dan tur erawh a hriattir vek kher lo a ni mai. 

Tute emawin na an neih chinfel dan chu i lo hria a nih pawhin i insum a ngaih chang a awm ang. Midang thusawi ṭha taka ngaithla ṭhintu i nih dawn chuan an natna leh phurnate/lungngaihna/thinrimnate chu i hriat thiampui hmasak a ngai ang. 

Ngaihtuah zui atan. 

• Tute emaw lusun tuarpuina chuan engtin nge anmahni a chhawk ve ṭhin? 
• Tu emaw natna nei emaw lusun emaw chu an buaina chhawkna tur thu hriat i neih chu engtik hunah nge hriattir ṭha ber ang? 
• I nunah khan engtin nge dawhtheihna i lantir ang? 

[ *Lettu:* Peka]

Thursday, February 26, 2026

ṬHIAN NATNA NEI ṬANPUI DAN

_Thil Pawimawh Sawihona_

By Rick Warren
February 26, 2026
“Chutichuan, ni sarih leh zan sarih leiah an ṭhutpui a, tu mahin a hnênah thu kam khat mah an sawi lo; a natna chu na êmin an hria a ni.” [Job 2:13]

Mi hmanhmawh tak i nih reng chuan midang thusawi ngunthluk takin i ngaithlatu thei ngai lo vang. 

Mumal taka thil sawiho tur chuan hun sen a ngai a, insan mar ve a ngai hmasa thin. Eng vangin? A chhan chu i hmanhmawh ruai a nih chuan ngunthluk takin mite thusawi i ngaithla thei ngai lo vang. Mumal taka mite thusawi ngaithla tur chuan hun a duh ṭhin. 

Joba kha pa hausa tak a ni chungin engkim deuh thaw a hloh thut a, a sum, hriselna leh a fate chu a hloh thut a ni. “Tin, Joba ṭhian pathumte chuan hêng thil ṭha lo a chunga lo thleng zawng zawng hi an hriat chuan, anmahni hmun ṭheuh aṭangin an lo kal a; Elifaza, Temani mi leh Bildada, Suhi mi leh Zofara, Naamathi mite chu. Amah tuarpui tûr leh thlamuan tûra a hnêna lo kal hun an ruat tlâng a. Chutichuan, ni sarih leh zan sarih leiah an ṭhutpui a, tu mahin a hnênah thu kam khat mah an sawi lo; a natna chu na êmin an hria a ni.” [Job 2:11, 13] 

Chu chu tel ve rawngbawlna a ni. Tute emaw natna nei zinga rawng i bawl a nih chuan hei hi i hriat reng a ṭha ang: Natna chu a nasat poh leh ṭawng tlem deuh deuh ang che. Tu emaw sam dik lo chungchang in sawi a nih chuan minute 30 vel laite pawh chumi chungchang chu in sawi thei ang. Mahse tute emaw chuan buaina khirh tak a tawk a nih chuan thu sei tak sawi chuan thil a tibuai mai mai ang. 

Mi tam berte chuan buaina neitute ṭanpui chu an thiam lo. Eng nge sawi tur pawh an hre lo. 

Chu mite tho chu an ṭhiante lakah an inla hrang ang, a chhan chu thil dik lo sawi an hlau a ni. 

Thudik tak chu hei hi a ni – engmah i sawi a ngai lo. Anmahni chu tlawh la, ṭawng chiam erawh a ngai lo. An natnate chu i sawi bosak thei lo vang. Natna ṭhenkhat chu thusawi piah lam a ni. An hun a chhuah hun chuan i ṭhiante chuan eng emaw chu an sawi mai ang. I hun a chhuak a nih chuan nangmah ngei pawhin thil eng emaw chu i sawi ve thei ang. 

Chutiang thil chuan hun a duh fo. Joba kha a thiante khan ni eng zat nge leiah khan an ṭhutpui: Ni sarih. I ṭhiante zingah ni sarih lai engmah sawi lova lei chara ṭhu ve tur ang chu an awm ang em? Chutiang tur chuan mi puitling tak leh ṭhian tak tak an nih a ngai ang. 

Chutiang ṭhian chu i ni ve duh a nih chuan nangmah leh nangmah kha i inpek a ngai ang a, tichuan anmahni chu hmangaihin, anmahni ngeihvenin an kianga awmin – an mamawh ang ang te chu i pe ve thei ang. 

Ngaihtuah zui atan. 

• I ṭhiante tu emaw ṭanpui tura i inhawn zau zawk theih nan eng nge i tih ngai ang? 
• Engmah sawi lova tute emaw thusawi ngaihthlak chu thil ninawm niin i ngai em? Engvangin nge?
• Tel ve/awmpui rawngbawlna chu hun pekna tlak rawngbawlna eng vangin nge a nih?  

*[Lettu:* Peka]

Wednesday, February 25, 2026

I HLAWHTLIN THEIH DAN TUR

_Thil Pawimawh Sawi Hona_

• Rick Warren
• February 25, 2026
"Amahah chuan Pathian famkimna tinreng chu taksa neiin a awm reng si a. Amahah chuan in famkim ta bawk a, ani chu lalna leh thuneihna zawng zawng lû a ni," Kolossa 2:9-10.

Mi tam tak chuan eng nge hlawhtlinna chu tih hi an ngaihtuah ngai lo mai thei. Ṭhenkhat chuan pawisa tam tak neih hi emaw an ti a. Pawisa tam tak neiiin i hlawhchham thei tho a ni. Ṭhenkhat ve thung chuan hmingthan hi emaw an ti a. Mahse hmingthang tak chung siin nun awmzia i man ṭhelh thei tlat si a ni. Chuvangin hlawhtlinna tak tak hi eng nge ni ta ang le?

Bible chuan hlawhtlinna tak tak chu Pathianin a siam dan ang tak che a awm hi a ni a ti. A awmzia chu mi tu emaw an i tum loh emaw, i chhungten ni tura an duh dan che a awm tum loh hi a ni. Pathianin a siam dan ang tak che a i awm hian hlawhtlinna tak tak chu i hmu ang.

Tu emaw an i tum a nih chuan i hlawhchham chiang hle ang, a chhan chu nangmah bak chu mi dang i ni thei lo. Pathianin ni tura a siam dan ang chein awm la. Kristaa i nihna ang khan awm mai rawh.

"Amahah chuan Pathian famkimna tinreng chu taksa neiin a awm reng si a. Amahah chuan in famkim ta bawk a, ani chu lalna leh thuneihna zawng zawng lû a ni," Kolossa 2:9-10.

Kum sang hnih liam ta khan Pathian chu mihring angin, Kristaa siam famkim i nih theihna turin a lo kal a. A awmzia chu Isua  thu neihna leh thiltihtheihna avangin i mamawh engkim i nei a ni.

I han hawi vel khan, mi dangte angin thilpek emaw, chem kalna emaw, hun remchang emaw i nei lo pawh a ni mai thei. Hlawhtling tur chuan mi tu emaw nih a ngai ni a hriatna hi thil beidawnthlak a ni ang.

Hlawhtlinna hi Pathianin a siam dan ang che a awm hi a ni tih i hriatthiam hun chuan nangmah kaltlanga Pathian thil tum chu mak i la ti ngei ang!

Hlawhtling turin engmah i tlachham lo, a chhan chu hlawhtlinna chu nangmah nih kha a ni. Ṭawngkam danga sawi chuan nuna hlawhtlinna hi Pathianin a siam dan ang tak che a nangmah i nih kha a ni mai. Miin an ngaih dan tur cheah buai suh. Chu ai chuan, ngaithlatu che Pathian kha ngaihtuah zawk rawh.

Pathian chuan a duangin a thuam che a, Kristaah chuan hlawhtlinna tura i mamawh zawng zawng chu a pe vek che a ni. "Ama ropina leh thatna zara min kotu, a chanchin hriat avangin a Pathian thiltihtheihnain nunna leh Pathian ngaihsakna lam kawngah chuan thil zawng zawng min pe si a," (2 Peter 1:3).

Ngaihtuah zui atan.

I nun aṭang khan engtin nge hlawhtlinna hi i han hrilh fiah ang?

Khawvelin hlawhtlinna ni a a ngaih dan i liamtir a, Biblein a sawi dan zawk i pawm hian eng nge lo thlenga i rin?

Hlawhtling turin Pathianin eng kawngin nge a thuam che?

[ *Lettu: Marova Punte]*

Tuesday, February 24, 2026

PATHIAN HMANGAIHNA CHU I TAWP TIR THEI LO VANG

_Thil Pawimawh Sawihona_

By Rick Warren 
— February 24,  2026
“Thihna te, nunna te, vantirhkoh te, lalna te, thil awm sa te, thil lo la awm tur te, thiltihtheihna te, sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lovang tih dik takin ka hre si a.” Rom 8:38-39

Bible chuan Ephesi bung 1 ah, khawvel a din hma daihin, Pathianin a thlang che. A thlang che a ni satliah lo va. A hmangaihna a lantir che a ni. A hmangaih che avangin khawvel a siam a, a chhungte tan hmun a duh a ni.

Thlan i ngawt lo. Hmangaih i ni.

Pathianin leilung a siam hma khan, Pathian chuan a hmangaih che avangin a rilru i luah tawh a. Pathian i ngaihtuah ngailo maithei a. Pathian chuan a ngaihtuah reng che a. Diktak chuan, Pathianin mi tamtak vawi khatah a ngaihtuah thei a. Engvangin? Pathian a nih avangin.

Engtiklai pawhin Pathian chuan a ngaihtuah che a. I dinhmun san lai te, hniam lai te, i chet ṭhatna te, i chetchhiatna te, i hlim lai leh i lungngaih lai te, i nuih leh i ṭah zawhg zawngte a hmu vek a ni. Pathian chuan a hmangaih atan a siam che a, chuvang chuan a hmangaih tawp lo vang che. 

“Thihna te, nunna te, vantirhkoh te, lalna te, thil awm sa te, thil lo la awm tur te, thiltihtheihna te,
sanna te, thukna te, thil siam dang reng rengte pawhin, kan Lalpa Krista Isuaa awm Pathian hmangaihna ata chu mi then thei lovang tih dik takin ka hre si a.” (Rom 8:38-39).     

Kawng hnih avangin Pathian hmangaihna chuan a ṭhen thei lo che. A hmangaihna chu chatuan atan leh phutlet neilo hmangaihna a nih avangin. Pathian chuan, chumi khami avang chuan ka hmngaih che a ti lo va, fel taka i awm chuan ka hmangaih che a ti lo va. Chumi khami hun chhung atan ka hmangaih che a ti bawk hek lo. Pathian chuan kumkhua atan, phut let nei lo vin a hmangaih che, Pathian chu hmangaihna anih avangin. 

I thiltih avang ni lo vin, a nihna avang zawkin Pathianin a hmangaih a che. I nihna avang ni lo vin amah anih avang zawkin a hmangaih che. Pathian hmangaihna chu tawp tir i tum chuan, kumkhuain i hlawhchham ang.

Pathianin a hmangaihna che a tlakhniam theihna turin engmah tih theih i nei lo. Pathianin a hmangaih lehzual theihna turin engmah tih theih i nei lo bawk. Nangmah a siamna leh a ngaihtuahna che avang hian a hmangaih tawk che a ni. I sualna zawng zawng pawh theihnghilha a hnena kumkhuaa cheng tura a thlanna che avang hian a hmangaih tawk che a ni. I sualna chhandam tura a fapa a rawn tirh avang ringawt pawh hian a hmangaih tawk che a ni.

Hei aia hmangaihna nasa zawk i hmu ngai lo vang.

Ngaihtuahzui atan

* Pathianin a ngaihtuah reng che tih i hriat hian i rilruah engnge awm? 

* Pathianin a hmangaih theihna turin thil i ti ṭha tawklo i inti em? Pathianin a hmangaih reng che tih chu engtinnge i chian theih ang?

* Pathianin a hmangaih che tih i rintawkna hi engnge a chhan?

*[Lettu: Sangpuia]*

Monday, February 23, 2026

A KOHHRAN HOTE TANA PATHIAN THIL TUM

_Inlaichinna Mak_

By Rick Warren
— Feb 23, 2026
"Hmangaihnaa thianghlim leh sawiselbovin ama hmaah kan awm theihna turin leilung pianhmain Kristaa min thlan ang kha; a khawngaihna ropuizia fak turin ama lungduha lawmzawng angin Isua Krista zarah ama tan faa siam tura min lo ruat lawk tawh avangin."Ephesi 1:4-5 

Pathianin lei leh van a siam chhan chu, chhungkua neih a duh vang a ni – chu chhungkua chu kohhran a ni. Chu kohhran chu lei leh van awm chhan ber a ni. 

Pathianin lei leh van a ngaihtuah hmain nangmah kha a ngaihtuah che tih i lo hre tawh ngai em? Chutiang taka hlu chu i ni e; Chutiang tak chuan Pathian hmaah i pawimawh a ni. 

Engtin nge thil eng emaw chu tu emaw tan chuan a hlu tih i hriat theih ang? Eng anga thil hluin nge an thleng phal tih aṭangin a hriat theih ṭhin. Krista chu kohhran tan a thi a. Mi tuten emaw thil eng emaw tana thih an ngam a nih phawt chuan, chu thil chuan hlutna lian tak a nei tihna a ni. 

Bible chuan hetiang hian a sawi, 

"Hmangaihnaa thianghlim leh sawiselbovin ama hmaah kan awm theihna turin leilung pianhmain Kristaa min thlan ang kha; a khawngaihna ropuizia fak turin ama lungduha lawmzawng angin Isua Krista zarah ama tan faa siam tura min lo ruat lawk tawh avangin."Ephesi 1:4-5 

Pathianin khawvel a din hma daih tawh khan a thil tih tum ngar ngar chu a kohhran hmanga hnathawh a ni – hnam hmangin a ni lo va, sawrkar leh pawl hmangin a ni hek lo. Lei thuneihnate chu rei lote atan mai an ni a, khawvel buaina hmachhawn tur pawhin an lian tawk lo. Kohhran chauh chu a lian tawk a ni. Kohhran chauh chu chatuan hawlhtlang tur a ni. 

Hetiang hian in ngaihtuah chhin teh ang. Khawvel pumpuiah vawiin hian ringtu maktaduai 250 vel an awm. Chu chu China rama mihring aiin an tam, anni hi khawvela mihring bit berna ram an ni.  

Tichuan, khawvelah hian kohhran chu mihring ngah ber a ni satliah mai lo va, thil ropui ber neitu a ni bawk: Pathian hmangaihna chu. I Johana 4: 19 chuan hetiang hian a sawi, “Amahin min hmangaih hmasak avangin kan hmangaih a ni” tiin. 

Pathianin khawvel a siam chhan bulpui ber, kohhran a siam chhan ber chu Pathian hmangaihna vang a ni tih chu mak i ti em? Chuvang tak chuan Pathian chhungte zinga tel tluka hamṭhatna ropui chu khawiah mah a awm lo.  

Ngaihtuah zui atan. 

* Eng thilin nge Pathian chuan a ngaihtuah hmasa ṭhin che tih hriattir che, leilung a din hma hauh pawh khan? 

* Kohhrana a hnathawh tlingtla turin eng tin nge Pathian chuan a hman ve che? 

* Engtinnge Pathian hmangaihna chuan midang rawngbawlsak turin a ṭanpui che?

*Pathian chhungte - kohhran hote zinga tel turin i inpeih em?*

Krista chu i nuna atan i lo la sawm ngai lo a nih chuan he ṭawngṭaina mawl mangte hian lo ṭawngṭai ang che: “Lalpa, nangmah ka mamawh che tih ka hria e. Ka nun kil tinah hian dah hmasak ber che ka duh. I Thlarau chu ka nunah rawn chhung ang che. I lakah thil ka tisual tih ka pawm a, ka sual zawng zawng min ngaidam a, nangmah zui che ka duh e. Nangmah rin dan leh hmangaih dan che zir ka duh a che. I duhdan, hmatlir leh ruahmanna te hriat leh tihhlawhtlin ka duh bawk. Khawngaih takin I chhungte zingah min pawm rawh. Isua hmingin ka dil a che. Amen.”  

Chu ṭawngṭaina chu i hlan tawh a nih chuan he thu hian chhunzawm ang che, “ _Ka Pa, ka hlauhna mit hi rinna mita thlak ka duh e. I chungah rinna nghah ka duh, nangmah aṭanga beiseina nei tur leh i tana thil ropui tak thawh thei turin. Hmathlir mumal tak neih ka duh a, I thiltum hriat ve ka duh. Isua hmingin ka dil a che. Amen_ .”  

He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni.

*[Lettu: Sangpuia]*

Sunday, February 22, 2026

PATHIANIN TIHTUR A PEK CHE

_Inlaichinna Mak_

- Rick Warren
- February 22, 2026
_"Nangin khawvela kei mi tir ang khan, kei pawhin anni chu khawvelah ka tirh hi."_ (Johana 17:18)

Isua Krista zuitu i nih chuan Pathianin he khawvelah hian hna a pe che. He leiah hian hmun luah khat ve mai tura siam i ni lova; mahni tum ram thleng tura bei tur maia siam i ni lo.

Pathian hnen aṭangin hna i nei. Pathian chhungkuaa i tel rual khan i nun tihdanglamin a awm. Dam chhan i nei nghal a. Mahni tan chauha nung i ni tawh lova; Pathian siam chhan hna thawk tura duan i ni nghal a ni.

Pathianin tihtur a pek che kha khawvela tihtur a lo pek tawh zawng zawng nen thuhmun vek a ni. Chhungkua a duh avangin he khawvel leh van thengreng zawng zawnga engkim mai hi a siam a ni. He lei hi a mamawh a ni lo. Ni heltu dang a mamawh tawh lo bawk. Arsi dang a mamawh lo. A siam chhan chu a mi siam zinga mi ṭhenkhatten a chhungkuaa an tel ve a duh tih a hriat vang a ni.

Pathianin Isua hnena hna a pek hmasak ber kha tunah hian Krista taksa - Kohhran hnenah a pe a ni. Isua i hriat tawh chuan i chhungte leh ṭhiante hnenah Isua chanchin i hrilh a ngai a ni! Mahse chutah chuan i duh tawk mai lovang. Pathianin chhandam a duh loh mi tumah a siam lo. Mi zawng zawng a hmangaih - khawvel zawng zawnga mi.

Pathianin a hna hi khawi hmunah pawh i nun chhuah a duh: in chhungkuaah, in khawtlangah leh khawvelah. Hna a pek che kha i chenna khawtlang leh khawvel huap a ni. Bible chuan heti hian a ti, _"Lalpa chuan ka hnenah heti hian a sawi a, 'Ka chhiahhlawh i nih mai hi a tawk lo. Israel hnam dam chhuakte hruai let aia nasa i thawk tur a ni. Hetah hian hnam dangte tiêng turin ka dah che a; khawvel zawng zawngah ka chhandamna thiltihtheihna i puang tur a ni.'"_ (Isaia 49:6, CEV)

Hei hi Pathianin khawvel tana a ruahmanna chu a ni. Chu chu i hna atana a dah a ni. Khawvel mi zawng zawng hian amah hi hria sela a duh a ni. Chu chu a thlen theihna turin hman che a duh a ni.

Isaia lehkhabua Pathian thute hi missionary leh pastor-te tan chauh a ni lo. A chhungkuaah i tel ve chuan i hnenah pawh he thu hi a pe che a ni! 

(Lettu: Mapuia Fanai)

Saturday, February 21, 2026

PATHIAN THUAWIHNA PHENA PHURNA PETU

_Inlaichinna Mak_

- Rick Warren
- February 21, 2026
_"Thu ka pek apiang che u in tih chuan ka thiante in ni ang."_ (Johana 15:14)

Johana 15:14-ah chuan Isuan heti hian a ti, _"Thu ka pek apiang che u in tih chuan ka thiante in ni ang."_ 

Thlarau sual ang mai a khawsa chungin Isua ka hmangaih i ti thei lo. Mahni hmasial tak chung siin ringtu ka ni i ti thiang hauh lo. Isua ka hmangaih a ni ti chungin Bible chang i duh lai thlangin i duh loh lai i hnawl ngawt thiang lo bawk. Isuan amah leh a thupek i zawm chuan a ṭhian i ni tih a sawi.

Engvangin nge kristiante hian Pathian thu an awih? Ring lo miten hei hi an hresual reng ṭhin. "Kristian nih ka duh lo, a chhan chu Pathian thuawih ka duh lo. Nangni ringtute hian in hlauh avang leh thiam loh nih i hlauh avang te, tih ngei ngei tur ni a in ngaih avangtein in awih ṭhin, chutianga awm ka duh lo" an ti ṭhin.

Mahse engvangin nge Pathian thuawih kan nih? A chhan chu min hmangaih vang a ni! Kan tan a ṭha ber a duh. Midang tumahin an hmangaihna ve theih loh tur che a nasain a hmangaih che a ni.

Bible chuan khawvelah hmangaihna a awmna chhan chu Pathian hi hmangaihna anih vang chauh hi a ni a ti. Pathian thu hi hlauh avang te, ngei ngei tur anih avangte a awih kan ni hauh lo. Pathian thu hi hmangaihna avanga awih kan ni - a chhan chu min hmangaih a min chhandam avangin.

High sikul ka kal laiin ṭum khat chu naupang pakhat hian heti hian ka hnenah a sawi a, "Khuahkhirh i ni" tiin. "Engnge i sawi awmzia?" tiin ka zawt a. "Kristian i ni a, chuvang chuan keimahni angin hlimna tur thil engmah i ti ve thei lo a ni" tiin min chhang a.

A mitah tak chuan enin heti hian ka chhang a, "Ruihhlo engpawh duh chuan ka ti thei. Lungin ka vawm duh apiang ka vawm thei. Ka in duh apiang ka in thei. Intihhlimna hmunah ka duh chuan ka kal thei. Inlaichinna pawh ka duh zat ka siam thei. Mahse a danglamna chu hei hi a ni: Isuan ka duhzawng a tidanglam hi a ni" tiin.

Chu'ng thil chu ka ti duh ta lo a. Tunah pawh hian ka la ti duh miah lo. Thil ho te te, rei lo te atan chauha nawmna petu mai an ni a, tin, min ei let ṭhin bawk. Zalenna nawm hmel tak an ni, mahse an daih rei lo. Zahawmna ni lovin beidawnna an thlen ṭhin; hlimna ni lovin lungngaihnaah an tawp ṭhin.

Isuan heti hian a ti, _“Pain mi hmangaih ang bawkin kei pawhin ka hmangaih che u hi . . . Nangnin ka thupekte in zawm chuan ka hmangaihin in awm reng ang; keiin ka Pa thupekte ka zawm a, a hmangaihin ka awm reng ang bawk hian. Ka lawm nangmahnia a awm reng nan leh, in lawm a kim nan, heng thu hi in hnenah ka sawi hi."_ (Johana 15:9-11)


Pathianin amah i hlauh avang maia a thu i awih a duh lo. A hremna i hlauh avang chauha a thu i zawm a duh lo. Pathianin hmangaihna avanga a thu i zawm a duh a. A hmangaihna chu hlimna tluantling thlentu a ni.

Ngaihtuah zui atan.

Engtik khan nge tu emaw (i nu leh pa emaw, zirtirtu emaw hna lama pu te emaw) thu i hlauh avanga i awih? Engtik khan nge hmangaihna avanga i awih? Chungah te chuan eng danglamna nge i hmuh?

Pathian i hmangaihna kawnga i ṭhan zelnaah khan engtinnge i duhzawngte a thlak danglam?

Pathian thu i awih avangin engtinnge hlimna i tawn ṭhin?

*Tunah hian Isua chu i Chhandamtuah pawmin vanram i lut dawn a ni tih chiang takin i hre thei.*
Heti hian ṭawngṭai rawh le:
"Lalpa, Isua hi i Fapa a ni tih ka ring e. I hmaah ka sual ka puang a, i ngaihdam ka rawn dil e. Ka sual lak bo anih theih nan Isua chu ka ai a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Min hruai la, i duhzawnga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, February 20, 2026

PATHIANIN A HMANGAIH ZAWNG CHU I HMANGAIH VE EM?

_Inlaichinna Mak_

By Rick Warren
- February 20, 2026
“Chu chu ṭhenkhatten nei emaw intiin rinna kawng chu an kal kawisan ta a.” [I Timothea 6: 21] 

Pathian nena inṭhianṭhatna kawnga thil pawimawh tak chu engnge i ngaih pawimawh ber tih chu a ni. 

Mi zawng zawng tan an ṭhian ṭha ber chu i ni vek thei lo vang. I ṭhian ṭha ber tur chu tu emaw thlauhthlaa i thlan a ngai fo. 

Bible chuan hetiang hian a sawi, “Chu chu ṭhenkhatten nei emaw intiin rinna kawng chu an kal kawisan ta a,” tiin [I Timothea 6: 21] 

Mite chuan baseball khelh dan chu an hre thiam mai a. Sum che vel awm dan pawh an hre fu. Tun lai hla te pawh an hre bawk. Tun lai Tv-a mi lar leh lar thar deuhte pawh an lo hre zel bawk. Mahse Pathian an hre lo. Chutiang a nih si chuan khawvela thil pawimawh ber chu an hre lo tihna a ni!

Pathian ṭhian chu i ni lo tihna a nih chuan Pathian aia kawmngeih zawk i nei tihna a ni ang. Jakoba 4:4 chuan hetiang hian a sawi, “Nangni uirete u, khawvel ṭhian nihna hi Pathian ṭhian nihna a ni tih in hre lo em ni? Chutichuan, tu pawh khawvel ṭhian nih duh apiang chu Pathian hmelmaah a insiam ṭhin a ni.” 

Jakoban “khawvel ṭhian” tih thu a sawi awmzia chu khawvel thil ngai hlu tihna a ni. Pathian chuan i mihringpuite hmangaih tur chuan a duh che a, mahse chuvang chuan khawvel kalphung i ngaina tur tihna a ni chuang lo. 

Khawvel thilte hian min tibuai ve zung zung ṭhin a. Khawvel thil i hmangaih avanga buaina i neih chang chuan i mihring puite hmangaih turin hun i nei tawk lo vang. Khawvel rosum hmangaihna [materialism] a ni zawk. Nawmsakna i ngaina a. Lar te i duh bawk a. Ropuina i ngaina a. Chutiang a nih chuan nawmna, ropuina leh duhamnain i nun a tibuai tihna a ni.  

Mahse Pathian chuan mihringte a hmangaih a. Nangmah ngei pawhin hmangaihna ve la a duh bawk. Midang hmangaih dan kawng pawimawh tak pakhat chu thil tui zawng lo tuipui chu a ni. I tana thil pawimawh chu kan tan pawh a pawimawh ve a ni tihna a ni a [Chu chu Bible zirtirna nen pawh an kalkawp fo ṭhin.] 

Chu tho chu Pathian i hmangaihna i lantir dan tur chu a ni ang. Pathian ṭhian i nih dawn chuan Pathianin a thil ngainat zawng leh ngaih pawimawh zawngte chu i ngaih pawimawh a ngai ang a, a ngaih pawimawh loh zawngte chu i ngaih pawimawh loh a ngai thung ang. Pathian chuan i pawn lam dan chu a ngai pawimawh ber lo. I nihna pawh a ngai pawimawh lem lo. I nungchang zawk chu a thil ngaih pawimawh ber chu a ni – i lan dan aiin i nihna tak tak zawk chu a ni.

Pathian nena in inṭhianṭhatna thuah chuan rahbi thar rah i duh tawh em? A ngaih hlut zawng ngaih hlut tum rawh. 

• I ṭhian ṭha nena in inlaichinna awm dan chu han sawifiah teh. Chu chu Pathian nena in inlaichinna nen engtin nge i khaikhin ang? 
• Pathian hriatna aia thil pawimawh zawk chu i nei em? Eng vangin nge i ngaih pawimawh zawk? 
• Pathianin a thil ngaih hlut zawng eng nge i hriat? Chung chu i tan engtiang taka pawimawh nge an nih ve? 

[ *Lettu:* Peka]

Thursday, February 19, 2026

PATHIAN NENA INLAICHINNA KAWNGA ṬHAN LEN

_Inlaichinna Mak_

By Rick Warren
— February 19, 2026
“Lalpa thurûk chu amah ṭihtute hnênah a awm a,
A thuthlun chu anmahni a hriattîr ang.” [Sam 25:14]

Pathian nena inlaichinna thuk zawk neih i duh chuan i khawmuan hlek a, ṭawng lova i ngawih zauh zauh ṭhin a ngai ang. 

Pathian nena inṭhianṭhatna chu midang zawng zawng nena inṭhianṭhatna ang tho a ni – hun pek a ngai. I ṭhiante tana hun i pe thei lo a nih chuan an tan ṭhian tak tak in ni thei ngai lo vang. I ṭhiante tan chuan hun i pe ṭhin. Pathian chu i ṭhian ṭha ber a nih dawn chuan i hun ṭha ber i pek ve a ngai ang. 

Bible chuan, “Ngawi ula, Pathian ka ni tih hi hre rawh u,” tiin a sawi [Sam 46: 10] 

Pathian nihna hre chiang tur chuan ngawih i chuh ṭul. Pathian nena len dun dan duhawm tak chu amah nena fianrial hun hman a ni. 

Bible chuan hetiang hian a sawi, “Lalpa thurûk chu amah ṭihtute hnênah a awm a, A thuthlun chu anmahni a hriattîr ang.” [Sam 25:14]

Mi tam tak chuan Pathian an hre lo. A hmangaihnate chu an la tem lova. A thiltihte chu eng vangin nge a tih pawh an hre lo. Chuti chung chuan Bible chuan Pathian nena inṭhianṭhatna dik tak chu amah ṭih/zahtuten an nei ṭhin tiin a sawi thung – chumi awmzia chu, muangchanga kal a, amah nena hun hmangtute chu Pathian ṭhian ṭhate an ni ṭhin. 

Mite nena in inṭhianṭhatnaah chuan hun pe ngai miah lo la engtin nge a awm ang? Inṭhianṭhatna nghet awm tur chuan hun pek a ngai. Pathian nena in inlaichinna thuah pawh biak ina inkhawm chin maia i duh tawk a nih chuan inzawmna thuk tak i nei ngai lo vang. 

Pathian thute chhiarin he zawhna hi i inzawh a ṭul bawk ang, “Lalpa, ka bula sawi duh i nei em?” tiin. Thu thluaithlum chiam emaw ṭawngkam thiam tehchiam pawh a ngai lo. Thu dik sawi mai rawh. Tichuan ngaithla zui ang che!

Bible-ah chuan hetiang hian kan hmu, “Tin, in ṭawngṭaiin, mi vervêkte angin in ti tûr a ni lo; miin an hmuh theihna tûrin inkhâwmna inah te, kawtthlêr pêng takah te, ding chunga ṭawngṭai an ngaina si ṭhîn a. Tihtak meuhvin ka hrilh a che u, an lâwmman chu an hmu zo tawh.  Nang erawh chu i ṭawngṭaiin, i pindan chhûngrilah lût la, i kawng khâr la, i Pa a rûka awm hnênah chuan ṭawngṭai rawh; tichuan, i Pa a rûka hmu ṭhîntu chuan a rûl ang che,” tiin. [Matthaia 6: 5-6] 

Vawiin hian han kal muang hlek la, Pathian lam hawiin, khawngaihna chungchang a sawi tur chu ngaithla ang che. 

Ngaihtuah zui atan. 

• Pathian nena fianrial hun in hman tur chu engin nge tibuai ṭhin che? Chung tibuaitu chu engtin nge i hnawl bo theih ang? 
• Eng vangin nge a chang chuan ṭhiante nena inkawm chu Pathian nena hun hman ai chuan a nawm zawk? Chutianga nuam i tih zawng lama i kal chang chuan eng nge i chan ṭhin? 
• Mi ṭhenkhatte chuan Pathian nena an fianrial hun tur chu thil dangin an tibuai fo. Engtin nge thil dang aṭang chuan i inthiarfihlim ang a, ngawi renga hun hmangin, Pathian nen rinawm tak leh tluangtlam takin hun i hman theih ang? 

I nunna atan Isua chu i lo ring ve tawh em? 
Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

*[Lettu:* Peka]

Wednesday, February 18, 2026

PATHIAN DAH PAWIMAWH HMASAK

_Inlaichinna Mak_

- Rick Warren
- February 18, 2026
"Ka Lalpa Isua Krista hriatna hlu tak avangin thil engkim hi hlohnaah ka ngai a, Krista chu ka neih theihna nan leh amah nen pumkhat kan nih theih nan, amah avangin engkim ka chân ta vek a, chung chu bawlhhlawh ang lekah ka ngai a ni," Philippi 3:8.

I hun awl chauh Pathianin a chang a nih chuan amah nen ṭhian ṭha in ni ngai lo vang. A ṭhian  ni tur chuan amah i dah pawimawh hmasak ber a ngai a ni.

Paula chuan heti hian a sawi, "Ka Lalpa Isua Krista hriatna hlu tak avangin thil engkim hi hlohnaah ka ngai a, Krista chu ka neih theihna nan leh amah nen pumkhat kan nih theih nan, amah avangin engkim ka chân ta vek a, chung chu bawlhhlawh ang lekah ka ngai a ni," Philippi 3:8.

Heti hian ka zawt ang che: Chutiang chuan i ti ve em? I thinlung zawng zawngin ni tin Pathian i zawng ṭhin em?

Hei hi hre reng la: I duhthlan dan azirin Pathian i hnaihin i hnaih lo vang. Pathian ṭhian nih inṭanna chu i thil duh i thlan fel hunah a ni ang.

Pathian hnen aṭangin hla taka awmah i inngai a nih chuan, tu nge che hmasa zawk ti kha ngaihtuah rawh. Pathian chu a ni lo phawt. Tumah i dem thei lo vang, i kawppui, i nu leh pa leh i fate pawh ni se. A awmzia ber chu a hmasa bera i dah loh vang a ni.

Pathian hriat leh hmangaih hi mihringte vanneihna ropui tak a ni a. Pathianin a hriat leh a hmangaih nih hi kan hlimna leh lawmna ber a ni.

An thil uanpui aṭangin mi tana pawimawh eng nge tih i sawi thei ang. An fate an pawimawh viau a nih chuan an fate an chapopui ang. An hnathawh chu an nuna thil pawimawh ber a nih chuan an hna chu an chapopui ang. Zin veivah leh tawnhriat neih chu thil pawimawh ber a nih chuan an sawi tam ber a ni ang. Intihhlimna a kal leh thawmhnaw thar lei chu i sawi ber a nih chuan i thil ngaih hlut ber chu eng nge ni ang? I thil ngaih hlut apiang chu i chapopui zel ang.

Jeremia 9:23-24 ah chuan Pathianin heti hian a ti, "Mi fingin a finna chhuang suh se, mi chakin a chakna chhuang hek suh se. Mi hausa pawhin a sum leh pai chhuang suh se. Kei Lalpa hi, leia mite khawngaiha, an chunga dik tak leh fel taka rorel ṭhintu ka ni tih hriat chianna chu a chhuang duh chuan chhuang zawk rawh se, chu chu ka lawmzawng tak a ni si a," tih hi Lalpa thuchhuak a ni.

Pathian hriat hi a pawimawh ber - chu chu nun chungchang chu a ni mai. Lei leh van siamtu Pathian chuan a hmangaih che a inlaichinna neihpui che a duh. Amah hnaihna chuan thlamuanna leh thil thlir dan thiamna a pe dawn che a ni. Chu chu chanchin lawmawm tak a ni.

Ngaihtuah zui atan

Pathian hriat chian lehzual chu i dah pawimawh hmasak ber a nih theih nan engtin nge i nun chu i her rem ang?

I thil sawi tam ber aṭanga chhutin miin i tana pawimawh ber an sawi chu eng nge ni ang? 

I thil uanpui kha i tana thil pawimawh ber chu a ni. Engtin nge ni tina in inbiaknaah Pathian nena inzawmna chu i han chhuan ang?

[ *Lettu: Marova Punte* ]

Tuesday, February 17, 2026

INLAICHINNAAH HLAUHNAIN ENGNGE NGHAWNG A NEIH

_Inlaichinna Mak_

By Rick Warren
February 17, 2026
“Hmangaihnaah hian hlauhna rêng a awm lo va, hmangaihna famkim chuan hlauhna zawng zawng a hnawt bo zâwk ṭhîn.” 1 Johana 4:18

Inlaichinna hi hlauhnain nge zalennain i inphuar tir?

Mi zawng zawng tihlawm vek i tum chuan, awmngaihna hrelo vin i buai ang: mi nena inlaichinna ṭha tak neih i duh rual khan inpawh leh lutuk i hlau leh bawk si. Mi nena inpawh chu i duha, nimahsela thih i hlau bawk si tihna a ni.

Inlaichinnaah hian hlauhnain min thunun chang a awm fo ṭhin. Hlauh rukna i neih chuan, i him lo tihna a ni. I himlo tih i inhriat chuan midang thunun i tum ang, tichuan thunun nih i hlau thung ang! Chu chuan a hrinchhuah chu, midang i pawh tak tak thei lo vang, an thununna hnuaia kun i hlauh avang a ni. Chuvang chuan himlo nia inhriatna chuan inkungkaihna leh inlaichinna nghet a awmtir thei lo a ni.

Hlauhnain inlaichinna a tihchhiat chuan, enginnge inlaichinna siamṭha thei ang? Hmangaihna! Hmangaihnain inlaichinna a siamṭha thei a ni.

Bible in 1 Johana 4:18 ah chuan, “Hmangaihnaah hian hlauhna rêng a awm lo va, hmangaihna famkim chuan hlauhna zawng zawng a hnawt bo zâwk ṭhîn,” tiin.

Hmangaihna chuan hlauhna a hnawt bo va. Miin min zawt ṭhin a, "Mi i dawr tam sia, i zam ve ṭhin em?" tiin. Ni e. Ka zam ve ṭhin a lawm.

Nimahsela thil danglam deuh mai lo thleng ṭhin chu: Keimah inngaihtuah lo vin, ka hmaa ṭhute chu ka ngaihtuah a ka rilru ka pe zawk ṭhin. Chutiang ni lo va, ka ṭawngkam leh ka sam awmdan te ka lungkham zawk chuan, ka zam ngei ang. Nimahsela ka hma a mite ka hmangaihzia ka ngaihtuah poh leh hlauhna ka neih chu a bo ṭhin a ni. 

Chutiang chiah chu inlaichinnaah pawh a ni. Midang i ngaihtuah tam poh leh i nuna hlauhna awmte chu a bo vang.

Midang ngaihtuah zawk theihdan chu engtinnge ni ang? Pathianin a hmangaihzia che i hriatchhuah hunah i hrethiam ang. Pathianin a hmangaihzia che i hriatthiam hunah chuan, nangman i va finfiah kher a ṭul tawh lo ang. Achhan chu Pathian hmangaihnaah chuan i him tawk tawh a, mi rilru hneh tuma i hun i khawhral a ngai tawh dawn lo a ni. 

Chutianga zalen leh nuam taka khawsak chu a nawm i ring em? Isua nena in inlaichinna a ṭhat phawt chuan midang beiseina avanga phurrit a kiang tawh ang. I nihna leh i hlutna chu midang beiseinaah mai mai ni lo vin Kristaah a ni tawh zawk a ni. 

Pathian hmangaihna chuan midang hlau lo va i hmangaih theihnan a pui che a ni.

Ngaihtuahzui atan

* Eng hlauhna leh inrintawklohnain nge i thinlung chu midang, i ṭhiante a ni emaw i chhungte a ni emaw lamah a hawntir theih loh che?

* Inlaichinnaah engtiklai khan nge zalen taka i awm theih? Nangma nungchangah leh midang nungchangah pawh ni se engin nge hlauhna aiin zalenna neih tir che?

* Pathianin enganginnge a ngaihtuah che i rin? Chu chuan in inlaichinna engtinnge a tihdanglam theih ang?

*[Lettu: Sangpuia]*

Monday, February 16, 2026

PATHIAN HMAN THEIHIN I AWM EM?

Inlaichinna Mak

By Rick Warren 
— February 16, 2026
“A lama rilru dik tak pûtute chunga a chakzia tilang tûrin khawvel zawng zawngah Lalpa mit chu a leng ruai ruai thin a ni.” 2 Chronicles 16:9

Mi tam zawk chuan hun an thlir let a. Mi tlemtein an tun hun chu ṭangkai taka hman an tum thung.

Nakina chhinchhiahtlak tak tur thil i thlen tir theih ka ring a ni.

Kum sang engemawzat liamtaah khan, Pathian chuan helai hmunah hian i awm dawn tih a hretawh a. He thu ngei pawh hi i chhiar dawn tih a hretawh a ni. Pathianin nangmahah thil danglam tak a dah hi ka ring a ni.

Tuna i awm kha tihpalh thilthu avang a ni lo va. I tawnhriat zawng zawngte pawh engemaw avang mai mai anni lo. He khawvelah hian danglamna thlen turin a ko che a ni. 

Khawiah pawh lo awm tawhin, hlauh nei ṭhinin, Pathian hmaah chuan lo ti sual tawh mah la. Pathian chuan khawvelah danglamna thlen turin ala hmang thei che a ni. A duh ber chu a hnena inpumpek hi a ni. Pathian chuan a ruahmannaah intulut turin a duh che a ni.

Pathian chuan i theihna a en kan a, i inhuamna a hmu lian zawk a ni.

Kum naupangte ka la nih lai khan Pathian hnenah heti hian ka sawi a, “Engpawh ti turin min ko rawh,eng hunah pawh, khawi hmunah pawh ni se, ka kal zel ang,” ka ti a. Chutaṭang chuan, Pathianin ti tura min tih te chuan danglam leh mak tak takte pawh anni hlawm a ni.

Chutiang tak chuan thutlukna i siam ve thei a ni. Pathian chuan khawvel ti danglam khawpa hman theih tur a zawng a ni.

Bible chuan, “A lama rilru dik tak pûtute chunga a chakzia tilang tûrin khawvel zawng zawngah LALPA mit chu a leng ruai ruai thin a ni.” 2 Chronicles 16:9. Pathianin a en reng che a. Chuvang chuan awmzenei zawk leh ṭangkai zawk i nih theihnan a hmang thei che a, a tichak thei che a ni.

Chung chu inpekna leh inhuamna aṭangin a inṭan vek a. Vawiin aṭang hian i ṭan thei a ni. I nunah Pathian ropuina tur chuan engpawh i inhuam tih Pathian hriattir la. A hman atan i inpe a ni tih hrilh la, tichuan i ṭawngṭai a chhan dan chu thlir tawp mai rawh. 

Ngaihtuahzui atan

* Pathianin hman theih tur a zawn lai hian hman theih atana inpe an awm hi engvangin nge a pawwmawh em em? Nangman ngaihdan i neih hran avanga hman theiha i awmlohna a awm em?

* Engvangin nge mi an inpek theihlohna chhan leh hman theiha an awmna tur daltu engnge awma i hriat?

* Engkim Pathian hnena i hlan theihlohna chhan daltu engnge i neih?

*[Lettu: Sangpuia]*

Sunday, February 15, 2026

INNGAIHTLAWMNA: CHAPONA HNEHNA

_Inlaichinna Mak_

By Rick Warren 
— February 14, 2026
_"Inngaitlawm ula, mahni aiin midangte chawimawi nasa zawk rawh u."_ (Philippi 2:3, NCV)

Chapona chuan inlaichinna a tichhe ṭhin. Kawng hrang hrangin a inlar ṭhin, sawiselna te, inelna te, luhlulna leh takna nei lo ang tein.

Chapona ṭhat lohna chu mahni inbumna a nihna hi a ni. Chapona nasa tak i neih khan mahni i inhmu miah lo - mahse mi zawng zawngin an hmu thung si!

Thufingte 16:18-ah chuan heti hian kan hmu, _" Chapona chuan chhiatna a thlen a; mi chaltlai tak chu tlat chhiatnain a zui"_ (NCV). The Message-in hemi chang tho a lehlin dan hi ka duh viau bawk: _"Chapona a awm hmasa a, chhiatna a thlen - chapona a nasat poh leh tlakna a sang ṭhin."_

Chaponain inlaichinna a tihchhiat mek laiin inngaihtlawmnain a rawn siamṭha ve thung ṭhin. Philippi 2:3-ah chuan tlawmna nena chapona hneh dan min kawhhmuh: _"Inngaitlawm ula, mahni aiin midangte chawimawi nasa zawk rawh u"_ (NCV). 1 Petera 3:8-ah chuan chipchiar zawkin heti hian min kawhhmuh: _"A tawp berah chuan in zain rilru hmunkhatin awm ula, inlainat tawn ula, unau angin inhmangaih ula, khawngaihna nei ula, thuhnuairawlhin awm rawh u."_

Engtinnge tlawmna kawngah i ṭhan len ang? I ngaihtuahna, thinlung, nungchang leh chet dan Isua i thununtirin. Ephesi 4:23-24 ah heti hian kan hmu, _"I ngaihtuah dan te chu Thlarau chuan thlaksak chein mi tharah siam che rawh se"_ (CEV).

Inlaichinna dan bulpui ber chu hei hi a ni: An zinga i chet tlat tamna apiangte nun dan i la ṭhin. Mi tihtauh ching bula i khawsak tam chuan tihtauh i zir ve ang. Mi hlim thei takte bula i awm tam chuan hlimna tur i hmu tam ve ang. 

Mi thar, inngaitlawm zawk nih i duh chuan Isua nena hun i hman tam a ngai, mi inngaitlawm tak anih avangin. Ṭawngṭai leh a thu chhiar hmanga inlaichinna thuk zawk i siam chuan i hrechiang leh zual anga amah i lo ang zel ang.

Philippi 2:5-6 ah heti hian kan hmu, _"He rilru, Krista Isua pawha awm bawk kha, nangmahniah awm rawh se; ani zawngin Pathian anga awma Pathian tluka awm chu thil thlakhlelh hleih theihah a ruat lo va."_

Isua hi tlawmna nun entirna ṭha ber a ni. Van aṭanga rawn chhukin mihringah a lo chang a, nangmah anga awmin i tan a nun a pe a, i tan a tho leh a ni. Amah nena hun i hman chuan tlawmna nun i zir chhuak ang. Chu tlawmna chuan inlaichinna a siamṭha ṭhin.

Ngaihtuah zui atan.

Tlawmna nun neiten eng nun zia nge an lantir?

Mahni aia midangte chawimawi tih hi engnge a awmzia? (Philippi 2:3-in min zirtir ang hian)

Isua ang leh zual turin engtinnge Pathian Thlarauin i ngaihtuah dan a thlak a ṭul ni a i hriat?

*Inngaitlawma Pathian ngaihdamna chang turin i inpeih em?*

Pathian chuan Isua ringtute tan chuan thiam loh channa a awm loh thu min tiam a. I sual ata chhandam tur chein Isua a rawn tir. Krawsa a thihna khan i sual tih tawh leh tihtur man a tlak a. I sual avanga a inpekna leh a felna a pekna che kal tlangin Isuan Pa Pathian nen inlaichinna nei thei turin kawng a rawn hawng a ni.

Chu chanchin ṭha chu hetah hian a la tawp mai lo. Pathianin sualna leh thihna hnehna lantir nan Isua a kai tho leh a. Chu chuan chatuana vanrama a kianga awm theihna kawng a rawn hawng a ni.

Tlawmna nena Isua pan tura i inpeih chuan heti hian ṭawngṭai rawh le:
"Lalpa, misual ka ni tih hriain i ngaihdamna ka rawn dil e. Isua hi i Fapa a ni tih ka ring a. Ka sual avanga thiin i kai tho leh a ni tih ka ring. Vawiin aṭang hian ka Lal leh Chhandamtu a pawm ka duh e. Min hruai la, i duh anga nung turin min pui ang che. Isua hmingin, Amen." 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, February 14, 2026

MAHNI HMASIAL LOHNA HIAN INLAICHINNA DUHAWM BER A THLEN ṬHIN

_Inlaichinna Mak_
 
- Rick Warren 
- February 14, 2026
_"Midangte mamawh ngaihsak miah lova, Pathian hai der a, mahni hmasialna rah tuhtu chuan hnim rah mai a seng ṭhin. A nuna lang chhuak tur zawng chu hnim mai a ni! Mahse Pathian ngaihsak chung leh a ṭhan lenna kawnga Pathian Thlarau hmun petu chuan nunna rah tak a seng ang, chatuan nunna chu."_ (Galatia 6:7-8, MSG)

Mahni hmasialna hian inlaichinna a tichhe ṭhin. Inrem lohna, inhnialna, inṭhenna leh indona hial thlentu ber a ni. 

_"In zinga indona leh inhnialnate hi khawi aṭanga lo chhuak nge ni? In taksa pengahte indona siam thintu, in duhzawng aṭangte chuan lo chhuak a ni lo vem ni?"_ (Jakoba 4:1)

Hmasialna hi awlsam takin inlaichinna karah a rawn tla zep ṭhin. Inlaichinna i siam tirh chuan mahni hmasial lo turin nasa takin i bei ṭhin. Mahse hun a lokal zel a, hmasialna a rawn lut ta ṭhin a ni. Mi tam zawk chuan inlaichinna vawnhim leh thuam ṭhat aiin inlaichinna bulṭannaah tha an seng nasa zawk.

Hmasialna hi inlaichinna tichhetu anih chuan mahni hmasial lohna hi inlaichinna tiṭhang liantu a ni tihna a ni. Mahni hmasial lohna tih chu engnge ni? A awmzia chu "keima tan" ni lovin "nangma tan" zawk tihna a ni. Mahni aia midangte ngaihsak zawkna leh mahni mamawh aia midangte mamawh ngaihsak zawkna hi a ni. Philippi 2:4-ah chuan heti hian kan hmu, _"Mahni ta ta mai en lovin, mi dang ta pawh en theuh zawk rawh u."_

Midang ngaihsakna zawkna hian mite nun aṭangin a ṭha ber a lan chhuahtir ṭhin. Inlaichinnaah inrintawnna a siam a. Midangte chungah hmasial lova i awm chuan chutiang chiah chuan i chungah an ti ve ang; mahni hma i sial erawh chuan a hmaa mi ang kha i ni tawh lova, chuvang chuan i chunga an rilru put hmang a danglam tawh ang.

Chutiang chu vawi tam tak ka hmu tawh. Mi hmangaihna nei mang miah lo, an bulah pawh tuma'n awm an chak miah loh mite pawh an chunga miin zahngaihna leh ngaihsakna an lantir chuan an nun tihdanglamin a awm ṭhin. Miin an phu tawk ni lo, an mamawh zawk an hmuhin an nun mawi taka tihdanglam a ni ṭhin.

Bible-in a sawi heti hian The Message chuan a letling, _"Midangte mamawh ngaihsak miah lova, Pathian hai der a, mahni hmasialna rah tuhtu chuan hnim rah mai a seng ṭhin. A nuna lang chhuak tur zawng chu hnim mai a ni! Mahse Pathian ngaihsak chung leh a ṭhan lenna kawnga Pathian Thlarau hmun petu chuan nunna rah tak a seng ang, chatuan nunna chu."_ (Galatia 6:7-8)

Hei hi Bible-in tuhrah seng min zirtir dan chu a ni. I tuh apiang i at ang. Hmasial lohna chi i tuh chuan Pathian malsawmna i seng ang. Hei hi khawvel a ruahman dan a ni: hma i sial loh poh leh malsawmna i dawng tam ang. Amah anga i awm a duh a, mahni hma a sial lo bawk. I neih zawng zawng kha Pathian thilpek che a ni, i chunga a hmasial lohna lantirna chu.

Chuvang chuan he khawvela i awm lai hian mahni chauh inngaihtuah lo a i awm khan i nun chhun khah a ni ang. Isuan heti hian a ti, _"Tupawh a nun humhim duh apiangin a chan ang a; tupawh keimah avang leh Chanchin Ṭha avanga nun chan apiangin a humhim ang."_ (Marka 8:35)

(Lettu: Mapuia Fanai)

Friday, February 13, 2026

INLAICHINNA TINGHET THEI THIAMNA

_Inlaichinna Mak_

By Rick Warren
— February 13, 2026
“Mahni vêngte tihsâwt nân an ṭhatna tûrin tihlâwm i tum ṭheuh vang u.” Romans 15:2 (TLB)

Midang thusawi ngaihthlak chu inṭhianṭhatna leh inlaichinna nghawng nunphung pawimawh ber a ni. Midang thu leh hla ngaichang lovin tu mah i hmangaih thei lo vang. 

Mahse, a chang chuan mi ṭhenkhatte chuan mite nena an inlaichinna thuah buaina neiin, benga hriatna leh ngaithla tih chu thil pakhat ni maia ngaih chang an nei ṭhin. Mite thusawi benga lo hriatna satliah leh ngaihthla tih chu thil dang daih a ni. 

Tute thusawi emaw chu satliah deuhin i lo hre mai thei ang. Ka fate leh ka nupui nen chuan an thusawi ngun taka ka ngaihthlak loh avanga kan inhau zat chu a tam fu mai a, a zat pawh ka sawi thei tawh lo hial ang. A chang chuan an thu chuan keimahah awmzia a nei lo. Mi tute emaw chuan, “Ka ṭha alawm” an ti a, mahse a thusawi danah chuan an ṭha tak tak hauh lo tih i hre thei ang. Thusawi ngaithla tih awmzia dik tak chuan an thil sawi bak lo hriat chu a keng tel a ni. 

Ngun taka i ngaithla a nih chuan a sawitute hriat thiamna nen an dinhmunah i dinpui ang. Dinhmuna dinpui [empathy] tih awmzia chu mite pheikhawk bun lai va thawlh ve ang chu a ni. “An dinhmunah hian ding ta ila engtin nge ka ngaih ang?” tihna a keng tel. 

Mite dinhmuna dinpui chunga an thusawi i ngaithla a nih chuan ngun takin i ngaithlain an sawi hreh te pawh i lo hriatthiampui ang a – an thusawi piah lama an natna leh hlauhte chu i lo ṭawmpui ang. An buaina chu i lo chinfel pui pawh a ṭul vek lo. Dik tak chuan damna chu an thusawi ngaihthlaksak aṭanga chuan a intan zawk fo. 

Rom 15: 2 chuan hetiang hian a sawi, “Mahni vêngte tihsâwt nân an ṭhatna tûrin tihlâwm i tum ṭheuh vang u.”  

Mite buaina lo hriatthiampui emaw an phurrit lo phurhpui tih awmzia chu engnge ni ang? A awmzia chu, miten natna an nei a, an thil rin thlenga sawinghin a nih chang chuan ṭhian rinawm tak an mamawh em em zel a ni. Thian, an kianga awm a, an thusawi ngaithlatu chu an mamawh em em zel a ni. 

Chutiang thian chu i ni ve thei ang em? 

Ngaihtuah zui atan. 

• I chetzia leh mitmei aṭangin mite chu an thusawi ngun takin i ngaihthlaksak a ni tih engtin nge i lantir theih ang? 
• “A dinhmunah ding ta ila, engtin nge ka awm ang?” tih zawhna inzawh chu eng vangin nge a hlawk em em? 
• Midang thusawi i ngaihthlak chang chuan eng ang thilin nge tibuaiin tikhaihlak thei che? 

[ *Lettu:* Peka]

Thursday, February 12, 2026

INLAICHINNA ATANA HUAISENNA AWMNA HMUN

_Inlaichinna Mak_

By Rick Warren
— February 12, 2026
“Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si a.” [2 Timothy 1:7]

Hlauhna leh lungngaihnaa i khah chang chuan midang bula awm nuam i ti lo ṭhin. I inthlahrung ṭhin bawk ang. Miin an duh loh che emaw, an tihnawmnah che emaw, an hnuaichhiah che emaw, an tihnat che emaw, hmanruaa an hman mai che emaw chu i hlauva, chu chuan midang lak aṭangin a dah hrang ṭhin che. 

Chu hlauhna chu mihring awm tirh aṭanga thil awm a ni. Adama leh Evi te suala an tluk lai khan Pathian chu anmahni enin a lo kal a. Tichuan Adama chuan, “Ka hlauva … ka biru a ni” a ti a nih kha [Genesis 3: 10]. Chu mi hnu aṭang chuan mihring hi kan biru ta fo mai. 

A tak tak chuan biru lo mah la, i nihna tak tak chu i thukru a ni thei. Mite hnenah chuan i nihna tak tak i thup fo. I chhungril nun chu i hmuhtir duh lo. Eng vangin nge? A chhan chu mite hnena i nihna dik tak i tarlan chuan an duh lo che i hlauva, buaina chinfel theih loh i neih palh i hlau a ni. Chuvang chuan i nihna lo tawp anga nun chu a lo ṭul ta a ni. 

Hlauhna chuan mite nena in inlaichinna a tihchhiat theih dan kawng thumin i lo zir dawn teh ang. 

*Hlauhna chuan mi a tikharkhip* . I nihna anga lan chhuah chu i hlau a, mahse mite chuan chu chak lohna chu an lo hmu palh tlat thei. Chung chak lohna thilte chu an sawi chhuah rual rualin i biru zui ang. 

*Hlauhna chuan a dah hrang che* . Inhawng tak leh tlang taka awm chu i hlau ṭhin – miten nangmah an hnaih che i hlau bawk. Indah hrangin i inkharkhip a, i lungngaihna te chu thukruin, mahni inveng ranin i inla hrang ṭhin.  

*Hlauhna chuan mamawh ngah takin a siam che.* Hlauh i ngah poh leh midang thunun chakna leh chungtlak chakna i nei ang. I tan chuan dik ber anga lan reng mai chu thil pawimawh ber angin a lang mai thei. Mamawh ngah viau chu hlauhna leh mahni him lo anga inngaihna a ni ber. 

Chiang taka lang chu hlauhna chuan inlaichinna a tichhia. Mahse engtin nge midangte nena inlaichinna thuk zawk nei thei tura rahbi thar rap tur chuan huaisenna i neih theih ang? 

I nuna Pathian Thlarau hmang chuan i chang thei ang. Paula chuan Bible-ah hetiang hian an hmu, “Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si a,” tiin [2 Timothy 1:7].

Pathian Thlarauva khat tih awmzia chu engnge ni? In inlaichinna thua huaisen zawka i pen chhuak a nih chuan Pathian Thlarauvin i lo khat deuh deuh thei ang. Mite hlauhna tel lovin, zalen takin anmahni chu i hmangaih theiin nuam ti takin an kiangah i khawsa thei ang. 

Bible chuan “Pathian chu hmangaihna a ni” tiin a sawi [I Johana 4: 8] a, tichuan, “Hmangaihna dik chuan hlauhna a umbo ṭhin [I Johana 4: 18]. I nuna Pathian i hmangaih zel chuan i nuna hlauhna chu a lo kiam ve zel ang. 

Midangte nena inlaichinna siam dan chu ṭawngṭaina hmanga, “Lalpa, vawiin hian rahbi thar rap turin huaisenna min pe rawh,” tih a ni thei ang. Vawiin hian midangte nena inlaichinna thu chu ṭawngṭainaa thlen i inpeih tawh em?

Ngaihtuah zui atan. 

• Engtin nge hlauhna chuan mite nen in inlaichinna a nghawng? 
• Engtin nge Pathian Thlarauvin mite nena in inlaichinnaah chuan huaisenna a lo pek ve tawh che? 
• Mite nena inlaichinna thuk zawk nei tur chuan Pathian ṭanpuina engtin nge i dil ang? 

*Pathian chuan nangmah nena inzawmna neih a duh.* 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu* : Peka]

Wednesday, February 11, 2026

CHHUNGKAW MAK CHU CHHUNGKAW HLIM AN NI

_Inlaichinna Mak_

- Rick Warren
- February 11, 2026
"An dam rei emaw, rei lo emaw, miin hlim taka ni tin hun a hman hi a tih tur chu a ni," Thuhriltu 11:8.

Hei hi chhungkaw ropui tak ze pakhat chu a ni: Chhungkaw mak chu an infiam ṭhin. Fiamthu thawh dan an hria a. Hlim taka nun ho an thiam. Ṭawngkam danga sawi chuan, infiam dan an thiam.

Hei hi vawiina chhungkaw tam takin kan tlakchham a ni.  Tunlai hunah chhungkaw tam tak chu an buai, an chau, an lungngai, thil an ngai tak leh lutuk. Tu nge school aṭangin chutah chuan haw duh ang? Chhungkua chu an hlim tur a ni.

Bible chuan hemi chungchang hi thupek lamin a sawi, "Rei tak an dam emaw, dam lo emaw ni tin hlim taka awm hi mi tin tih tur a ni," Thuhriltu 11:8.

Engvangin nge nun hi ni tin hlim taka i hman a pawimawh? A chhan chu engtia rei nge i dam dawn tih i hriat loh vang a ni. Karlehah nge thlalehah tih i hre lo va. Naktukah zawk a ni dawn nge tih pawh i hre chuang lo. I thil tih tur apiang chu, tuna tih a ṭha ber.

I chhungte nangmah hringtu an ni emaw ni lo pawh kha ngaihtuah la. I chhungte bula i awm lo a nih chuan kohhrana i rawngbawlpuite hnen aṭangin zir ang che. Sunday School-ah emaw, i ṭhiante hnen aṭangin emaw hetiang mi kawm tur hi i hmu thei ang.

Ka fate an lo len chhohin thil pakhat kan chhungkaw chungchanga hriattir  ka duh chu kan ṭha emaw, kan fel emaw lam ni lo vin - hmangaih an ni a, kan infiam ṭhin tih hria se ka duh. Chutiang a nih theihna tur chuan thil ka ruahman ṭhin.

Chung zinga thil pakhat chu Daddy's Magical Mystery Tour tih a ni. Hei hi naupangten an lawm hle. Hetiang hi chhungkuain kan tih dan ṭhin a ni. Tunah chuan ka tute nen kan ti ve ta a. Ka fate pawl hniam lam deuha an awm lai chuan, "Khum aṭang khan tho rawh u! Intihhlim hun a ni e," ka ti a. School an kal dawn lo tih an hriat avang leh thil hlimawm tak an ti dawn a, hotel lam pana inkhalhin emaw, vur lei turin an tlan chhuak dawn tih an hriat vang a ni.

Hei hi i hriat reng a ngai: I thil sawi kha miin an hre reng lo vang, Mahse nangmah an hriat chhuah dan che khan awmzia a nei a ni. Hei hi pute, ṭhianpa, ṭhiannu, chhungte emaw, kawppuite tan thurawn pawimawh tak a ni.

 Ka fate hian ka thusawi tam tak hi an hre reng lo. Mahse an hriat reng chu an pain an thinlung a khawih dan kha a ni. Hlim takin kan infiam ṭhin a ni tih an hria.

Chhungkaw mak chuan fiamthu an duh a, an infiam ṭhin. 

"Mihring tan ei leh in leh ina mahni intihhlim lo liam hi thil dang ṭha a awm lo; khawvela a dam chhung hun atan Pathianin a ruatah rim taka thawh paha a tih theih chhun a ni," Thuhriltu 8:15.

Ngaihtuah zui atan

In chhungkaw hlimna tibuai thei thil eng nge awm?

I fate bula i thil sawi kha nge, anmahni i lo dawnsawn dam zawk kha i thlurbing? Engti kawngin ng?/

I chhungte emaw i rawngbawlpuite bula hlim taka fiamthu i thawh theih nan vawiinah hian eng nge i tih ang?  I chhungte nen hlim taka hun in hman theih nan eng ang ruahmanna nge i siam ang?

[ *Lettu: Marova Punte* ]

Tuesday, February 10, 2026

HMANGAIHNA RAWNGBAWLNA LEH THIL ṬHA HNUTCHHIAH RAWH

_Inlaichinna Mak_

By Rick Warren 
— February 10, 2026
“Hmangaih leh thil ṭha tiha inchawk tho turin inngaihtuah tawn ang u.” Hebrai 10:24

Chhungkaw inzirtirna ṭha nei chuan an chhungkua chu mi aiin an pawimawh bik tih an inzirtir lo va. Pathian siam an ni a, tihtur neia siam annih thu an inzirtir a ni. Inhlanna, rawngbawlna, thilphalna leh ṭawngṭai te an inzirtir a ni. Chhungkaw naran chuan an inzirtir lo. Chhungkaw danglam bik chauhin an zirtir a ni.

Tuna ka dinhmun ka thlen theihna chhan chu ka nu leh pate vang a ni. Midang ngaihsak hlutzia min ka thinIung an tuh bawk.

Ka nu leh pate kha an hausa lem lo, nimahsela midang khawngaih theihna leh thilphalna an nei tlat a ni. Pek tur an neih lem loh pawhin thilpek kha nuam an ti a. Ka pa khan huan zau tak a nei a, thlai chi hrang hrang a ching a. Keini tan chuan ei zawhsen rual a ni lo, midang pek tur nen lam a ching a. Sum faia midang ṭanpuina tur a nei bik si lo va. Kan mamawh aia tam kan ching a, chungte chu midang ṭanpuinan kan pe ṭhin a ni. 

Inleng kan nei deuh reng ṭhin a. Rilru hahna an neih chuan kan inah an lo kal a. Kalkawnga an kal pahin an lo peng a. Buaina an neihin an lo kal a. Kristian chhungkua lo zin an awmin kan inah aj lo kal a. Nikhat chu ka pa-in kumkhat chhunga ka nu-in mikhual chaw a chhum sak zawng zawng a chhutchhuak a. Mi sangkhat chuanglai an ni. "I nun midang tan hlan rawh" tih thinlunga tuh chungin ka ṭhanglian a ni. Ka nu leh pate chuan hringnun chu keima chungchang a ni lo, midang ṭanpuina thu zawk hi a ni tiin min zirtir a ni.

Chu chu chungkaw danglam te tihdan a ni. Hmangaihna lantir leh thil ṭha tih an inzirtir a ni.
Kornelia te chhungkua khan entirna ṭha tak an nei a: “Pathian ngaihsak mi a ni a, a chhungte zawng zawng nen Pathian an ṭih ṭhin a, mite hnenah thil tam tak a pe ṭhin a, Pathian hnenah pawh a ṭawngṭai fo va.” (Tirhkohte 10:2).

Thil ropui tak an hnutchhiah a ni! Chutianga nang leh i chhungte chungchang an ziah chu i duh ve dawn lo vem ni?

Fa i nei emaw nei lo emaw, Pathianin sulhnu ṭha tak hnutchhiah turin a duh che a ni. Rinnaa naupang zawkte an lo la chhuak zel dawn. Midang ṭanpui duhna thinlung an neih theihna turin hun i insiam dawn lo vem ni?

Ngaihtuah zui atan

* Engang sulhnu nge hnutchhiah i chak le? Chutiang sulhnu chu i hnutchhiah theihnan engtin nge ṭan i lak le?

* Fa i nei lo anih phei chuan, engtinnge tunlai ṭhangtharte hian nun awmzia an hriat theihnan leh midang ṭanpui duhna thinlung an put theihnan i chawhphur ang?

* I in chu khawpuiah emaw thingtlangah emaw pawh awm se - midang rawng i bawlsak theihnan engtin nge i hman ṭangkai ang?

*[Lettu: Sangpuia]*

Monday, February 9, 2026

HMANGAIHNA DAI THEI NGAI LO VA HMANGAIH DAN

_Inlaichinna Mak_

By Rick Warren 
— February 9, 2026
“Nangmahni zawng zawng lamah chutiang rilru put chu kei atan chuan a awm reng a ni, ka thinlungah ka vawn che u avangin.” Philippi 1:7

Mi thinlungah kan awm tawh loh chinah chuan kan duhloh zawngin an awm ṭhin tih ka hrechhuak ta. I kawppui emaw, i ṭhian emaw, i hnathawhpui emaw thinlungah i awm tawh loh chinah chuan i huat zawngin emaw an awm tawh tihna a ni ang.

Nupa inkarah innghirnghona a awm fo na chhan chu an thinlung ni lo vin, an rilrua an inbiak ṭhin vang a ni. I nupuiin, “Ka rilu a hah,” a tih chuan ngaithla ang che. I pasalin, “Hetiang a kan ti hi a dik lo, hetilo zawng hian i ti ang,” a tih chuan ngaithla ang che.

Thinlung aṭanga hmangaihna chuan mi rilru natna a hrethiam ṭhin a ni. Zawhna zawt la ngaithla ang che. An natna ngaihthla la, an harsatnate chu an dinhmun aṭangin thlirsak la, an tana ṭha turin thawhsak ang che. An rilru sukthlek en la, an thiltih leh an tihna chhan te en bawk la. I ngaihtuah tak tak anih chuan, i hrethiam vek ang.

Achang chuan kan hnaih ber bera awmte hi hmangaih an har a, hriatthiam tuma beih pawh hian a harsa hle ṭhin a ni. Engtin nge mi'n an tih bik? “Krista Isua lainatna chuan in zavaiin ka ngaihzia mai che u chu Pathian mi hriatpuitu a ni asin le.” (Philippi 1:8). Greek ṭawngin lainatna tih awmzia chu a ril tihna a ni. Greek-ho chuan pumchhung, kawchhung leh thin emaw te aṭang hian ngaihtuahna hi a lo insiam an ti a ni.

Paula chuan, “Ka hmangaihna che u chu thinlung aṭangin a insiam,” a ti a ni. Chu hmangaihna lo chhuahdan pangngai lo hi a ni. A chungnung deuh a ni. Chuvang chuan Paula chuan, amah aṭanga chhuak ni lo vin, Krista lainatna zawk a ti a ni.

Mihring hmangaihna hi chu a tlo lo va. Reilote atan chauh a ni. Harsatna kara inhmangaihna hi chu thinlung aṭanga chhuak Pathian hmangaihna - Isua lainatna avang zawk a ni.

Chu hmangaihna chu engtin nge i neih theih ang? “Thlarau Thianghlim kan hnena min pek khan Pathian hmangaihna chu kan thinlunga a leih tawh avangin beiseina chuan a timualpho lo va.” (Rom 5:5). Pathian hmangaihna chu a thawha thawhchhuah tur a ni lo va, nitina Thlarau Thianglim kan nunah kan sawmna aṭanga keimahnia a leih a ni zawk a ni.

Ngaihtuah zui atan

* I rilrua awm baka i hmangaih theihna chu eng nge ni? Chutiang hmangaihna chu engtikah nge i hmuh?

* Mi natna leh an harsatnate chu engtinnge i ngaihthlak sak ang a, hriatthiam i tum ang?

* Pathian hmangaihna dai ve thei ngai lo nei turin engtinnge ṭan i lak zel ang?

*[Lettu: Sangpuia]*

Sunday, February 8, 2026

INLAICHINNA HI RUAHPUI VANAWN SUR KARA HULHLIAP ANG A NI

_Inlaichinna Mak_

- Rick Warren 
- February 08, 2026
_"Pahnih chu pakhat ai chuan an ṭha zawk . . . An tluk pawhin pakhat chuan a ṭhian chu a khaiding dawn si a; mahni chauva awm kha erawh chu a chung a pik e, a tluk chuan khaidingtu tûr a nei si lo."_ (Thuhriltu 4:9-10)

Inlaichinna hi ruahpui sur hnuaia nihliap ang hi a ni. Ṭhiante emaw chhungte emaw ruah sur hnuaia an kal laiin, in inṭanpuitawn ṭhin. Ruahpui sur karah pawh an invengtawn ṭhin.

Thuhriltu 4:9-10ah chuan heti hian kan hmu, _"Pahnih chu pakhat ai chuan an ṭha zawk . . . An tluk pawhin pakhat chuan a ṭhian chu a khaiding dawn si a; mahni chauva awm kha erawh chu a chung a pik e, a tluk chuan khaidingtu tûr a nei si lo."_

Hringnunah hian thlipui hrang hrang a tleh ṭhin a, chung hunah chuan kan hmangaihte kan venhim a ṭul ṭhin. Chung thlipui chu a chang chuan hun tidanglamtu mai a ni a; a chang chuan nghawng hlauhawm tak a nei ṭhin bawk.

Mahse thlipui na ber chu hnawl nihna hi a ni. I ṭhianten emaw, i faten emaw, i kawppuiten emaw hnawl ni a an inhriat chuan, nang leh anmahni hnaihtute nen ruah sur laia hulhliap ṭha ang maia in din hual a ṭul ang.

Kum tam tak kal taah khan ka fa u ber, Amy khan high sikul a kal mek a. Boruak siamtu zinga hotu nih a tum a. Chumi tur chuan an zirnaah a kal tluk tluk mai a. A tawpah chuan a ṭhiante an tlin laiin hnawl a ni a- a rilru a na kher mai. A lo haw ve leh a room-ah tlan lutin, a thawmhnaw dahna bawmah a lut a, a ṭawp ta hawm hawm a.

Kan chhungkua chuan Amy ṭap chu ka hre vek mai a. Pakhat te tein a room lam chu kan pan a, a thawmhnaw dahna bawmah chuan lutin kan ṭahpui ve ta vek mai a.

Tuma'n kan fuih lo; tihdan tur hrilh a ngai miah lo. "Lungngai suh, engmah a ni hleinem" tiin tuma'n kan sawi lo. Thil ho tak a ni lo! "Ṭap suh" kan ti hek lo. Chutiang chu mi lungngai mekte hnena sawi loh atana ṭha a ni. Kan zavai chuan darkar chanve lai ṭhuin kan ṭahpui zawk a ni.

Kan chhungkuain kha thil kha kan theihnghilh tawh ngai lovang. Engvangin? A chhan chu khami hunah khan Amy tan khan hulhliap ṭha tak kan ni. Ruahpui taka himna kan ni a. Venghimtu kan ni. Kan chhungkaw zinga miin hliam a tuar a, a belhchhahtu kan ni lo. Titipui kan tum hek lo a, tihhlim pawh kan tum lo. Kan ṭahpui mai a ni.

Chhungkaw duhawm - thisena inzawm, inzawm lova chhungkuaa inpawm te leh, thlarauva inzawmte chu harsatna karah an invengtawn ṭhin.

Ngaihtuah zui atan.

Engvangin nge miin a chhungkua aṭanga puihna a beisei ber?

I fate hnawl an nih khan engnge i sawi? Engnge ni Bible-in tihmasa tura min duh ni a i rin?

Hnawl ni a inhriate engtinnge biak i tum ṭhin? Engnge thil ṭha lo a thlen theih? 

[Lettu: Mapuia Fanai]

Saturday, February 7, 2026

ṬHAN LENNA KAWNGA CHHUNGKUAA KAN INPUIH DAN

_Inlaichinna Mak_

- Rick Warren 
- February 07, 2026
_"Kei Lalpa leh Zirtirtu mahin in ke ka sil chuan nangni pawhin in ke in insilsak tur a ni. In chunga ka tih ang hian nangni pawhin in tih vena turin ka tihhmuh che u a ni si a."_ (Johana 13:14-15)

Chhungkaw duhawm tak hriat theihna kawng khat chu - chhungkua chu thisena inzawm kan ni emaw, chhungkua ni tura inla kan ni emaw, kohhran chhungkua emaw pawh ni ila - ṭhang lian tura kan inpuihtawn hi a ni. Mahse engtinnge chu chu a thlen ang?

Mite an ṭhan len theihna tura puitu kawng hnih leh an ṭhan lenna daltu kawng hnih ka sawi ang. Hei hi chhungkuaah chauh ni lovin, kawng engkimah a dik a ni.

Ṭhang lian tur hian kan lo inpuitawn a lo ni:

*1. Entirna hmangin.* Isuan hei hi a zirtirte a zirtirnaah kan hmu. Johana 13:14-15 ah heti hian kan hmu, _"Kei Lalpa leh Zirtirtu mahin in ke ka sil chuan nangni pawhin in ke in insilsak tur a ni. In chunga ka tih ang hian nangni pawhin in tih vena turin ka tihhmuh che u a ni si a."_ I fate khan thuchah an ngaithla duh lo. I nunah Isua entirna an hmu duh zawk. 

*Titihona aṭangin.* I fate nen thil tunlai khawvela thil thleng mekte chungchang in titiho ngaih loh chuan an ṭhan lenna tura hun ṭha i bawh pelh tihna a ni. Vanduaithlak takin nu leh pa tam zawkin kan fate kan titipui chu hun ruahman dan te, ei leh in te, home work-te a ni, kan nuna thil pawimawh tak takte an ni hauh lo.

Deut. 6:7-ah chuan heti hian kan hmu, _"In fate thahnemngai takin in zirtir ang a, in ina in ṭhut lai te, kawnga in kal lai te, in mut lai te, in thawh hun tein in sawi ṭhin tur a ni."_

Kawng leh lamah, ṭhang lian tura kan inpuih lohna te:

*1. Insawiselna hmangin. Phunchiarna hi a sawt lo.* Thiam loh inchantirna hian awmzia a nei lo. Sawiselna leh dik loh lai insawisakna ngawr ngawr hian mi nunah danglamna a thlen lo. Engvangin? A chhan chu, i sawisel khan i duhzawng ni lovin i duh lohzawngah i rilru i dah lian zawk tlat.

The Living Bible chuan heti hian a letling, _"I fate hau leh sawisel reng rengin, an thin tirim leh inthiam lohna neihtir turin hun hmang suh. Pathianin hmangaihna nena a thunun angin, kawng kawhhmuhin Pathian duhzawngin zilhhau zawk rawh."_ (Ephesi 6:4)


*2. Khaikhinna hmangin.* Mi zawng zawng hian theihna bik kan nei ṭheuh. Khawvelah hian nangmah ang kha tumah an awm lo! Chuvang chuan inkhaikhin hi a fuh ngai lo. Inlaichinna tichhetu a ni zawk thei. Bible chuan heti hian a ti, _"Miin midangte nen inkhaikhin lovin ama thiltih kha a teh zawk tur a ni. Ama tih ngei chu a chhuang thei zawk ang"_ (Gal. 6:4, NCV)

Bible hi mite kan inen dan leh inthlir dan tur zirtirna leh inkawhhmuhnain a khat a. Bible-ah hian ". . . tawh rawh u" tih hi vawi 58  lang - inhmangaihtawn, inngaihsaktawn, inṭawngṭaisaktawn, infuihtawn, inpuitawn, inzilhtawn, ang chi hi.

Chu chu Pathian duhdan a ni. Thuthlung Tharah chuan, _"Chuvangin, infuih tawnin, intisawt tawn theuh rawh u, in tih reng ṭhin ang hian"_ tih kan hmu (1 Thess. 5:11).

Ngaihtuah zui atan.

I chhungte emaw i ṭhiante emaw nena nimin emaw vawiin emaw a i inbiak dan kha han thlir let teh. Thil pawimawh tak tak in sawi em? In sawi loh chuan in ṭhanlenna turin eng thil nge i sawiho ang?

Nu/pa i nih chuan i faten eng kawngah nge kawng dik i kawhhmuh hnuhun ber? I fate tan thil dik leh dik lo hrilh ringawt lovin engtinnge zuitlaka  entawn tura i nun?

Khaikhin leh tehkhin mai lovin engtinnge i chhungte ṭhanlenna turin i puih theih ang? 

[Lettu: Mapuia Fanai]

Friday, February 6, 2026

CHHUNGKUA AṬANGA ZIR TUR THIL PANGA

_Inlaichinna Mak_

- By Rick Warren
February 06, 2026
“Tin, Isua chu a lo ṭhang lian telh telh a, a fing deuh deuh va, Pathian khawngaihna leh mite duhsakna a dawng zêl a.” [Luka 2:52]

Inlaichinna mak/duhawm chuan ṭhang lian turin a fuih. 

Engtin? Dam chhung daih zirna boruak a siam a ni. Intisawt tawn turin a ṭanpui a. Thlarau thilpek leh theihna te chawm lian turin a fuih bawk. Thil thar zir turin mi a fuih a, hmasawnna kawng a kawhhmuh ṭhin a ni. 

Mahse chutianga ṭhang lian tur chuan chhungkaw naran i mamawh lo. I khawsakna chhungkua chuan a thei a, a ti bawk tur a ni – i nuna hmasawna zelna tur chu dap rawh.  

Midangte nena in inlaichinna thuhla chu midang nena i zir a nih loh chuan i zir thiam ngai lo vang. School-ah i zir lo vang. I hnathawhnaah pawh i zir thiam kher lo vang. Midang nena in inlaichinnaah chauh i zir chhuak thei ang. 

Midang i mamawh. 

Dik tak chuan, i puitlin hnua buaina i neih tam berte chu i naupan lai khan i lo zir thiam mumal loh vang an ni thei. I chhungkua aṭang chuan heng thil pangate hi zir tum ang che – taksa thuhla emaw thil dang pawh an ni thei: 

1. I duhzawng [feelings] hmachhawn dan i thiam a ngai. Chhungkua inlaichinna hrisel awmna hmunah chuan i nihna i pawm a, thil sawiin i duhzawng [feelings] hmachhawn dan i thiam. Chhungkaw ṭha chuan chhungkaw mi leh sate chu rinawm taka awm an inzirtirin an rilru puthmang sawichhuah/ tih lan theihna boruak an siamsak ṭhin. 
2. Buaina hmachhawn dan i thiam a ngai. Naupangte pawh hian an nu leh paten buaina an hmachhawn dan hmu sela, chhungkaw inlaichinna boruakah chuan ngaihdan inang chiah lo tluang taka chinfel dan hmu rawh se. 
3. Thil hloh thiam dan zir. I fate chu infiamna eng emawa an chak reng i duh pui kher lo vang. Chutiang a nih chuan, an puitlin hunah an chak lohin an nun a nghawng chhe vek palh ang. Vawi khat an tihsual emaw chak loh emaw avang chuan an chhe vek dawn lo tih chu zir sela, chu chak lohna chu an nun tawpna a ni lo tih hre rawh se. 
4. Eng thil nge hlu ber tih I zir. I fate chu khawvela thlemna langsar pathum hma chhawn dan chu zirtir la, chung thil aṭang chuan an in veng thei ang. Chung thlemna te chuan engtin nge i awm [feel] a, engnge i tih a, eng nge hringnun aṭang chuan i neih tih a sawifiah ang. Chung thilte chu mipat hmeichhiatna, hlawh leh nihna/dinhmun te an ni. 
5. Thil chin ṭhan (habit) zir. Thil chin ṭhan [habit] chuan nungchang a siam a. Chhungkua chuan intihsawtna lam hawiin Krista anna kawngah mi a hruai ṭhin. 

I chhungkua chu vawiin aṭang hian siamṭhain – i thisena i zawm te an ni emaw, i ṭhian te emaw, thlarauva i chhungte pawh lo ni se – thlarauva ṭhan lenna hmun a ni thei ang. 
Ngaihtuah zui atan. 

• I chhungkuaah chuan zirna boruak hrisel engtin nge i siam theih ang? 
• Tun lai khawvelah hian naupangte chu eng vangin nge chak loh dan thiam tura zirtir an harsat em em? 
• Eng nge i tan hlu ber? Bible-in thil hlu a sawi zingah chuan i fate hnena zirtir tur atan eng nge i duh ber? 

[ *Lettu:* Peka]

Thursday, February 5, 2026

INNEIHNA NGHET CHUAN MITE A TISAWT

Inlaichinna Mak

By Rick Warren
February 05, 2026
“Hmangaihna chu vervêkna tel lovin ni rawh se. Sual lam chu hua ula, ṭha lam chu pawm tlat rawh u. Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula.” [Rom 12: 9-10] 

Inneihna nghet chuan mitin a tisawt thin. A inneite chu a tisawt a, an khawsakpui zawng zawngte chu a tisawt bawk. 

Mihring hun liam tawh zawng zawngah, nupa inneihna chu hnam nun leh khawtlang innghahna a lo ni tawh thin. Inneihna thutiam chu nghet taka vawn a nih chuan hnam a nghet a. Inneihna leh chhungkaw inlaichinna a dul chuan hnam nun a buai ṭhin.

Inneihna hrisel chuan an kiang vela mite a tisawt bawk. Pathian chuan chu inlaichinna chu midangte tihsawt nan a hmang a, mahni hmasialna tibovin midang hmangaih dan a zirtir che. Nupui pasal i nei a nih chuan inlaichinna dang zawng zawng aiin chu chuan i nun a nghawng zawk ang.  

Nupui pasal i nei chiah lo a nih pawhin Pathian chuan midang i nun siamṭha tur leh ṭanpui tur chein a hmang thei tho. Vanlaia tla an sawi ang ngawt chu i ni chuang lo! Mahnia khawsa Pathian duh dana nung, midangte ngaihsak mi chuan hnam nun siamṭhatna kawngah lian takin tha an thawh thei. Dik tak chuan, a chang chuan nupui pasal neiten an tih theih loh an lo ti ve thei tho. 

Hringnun hi midang hmangaih kan zirna hun [laboratory] a ni. Midang hmangaih hi hringnuna zirlai pawimawh ber a ni, a chhan chu Pathian chu hmangaihna a ni a, amah ang turin a duh bawk che. Isua Krista ang tur pawhin a duh che. I nungchang siamṭhat zel a duh – chu chu nupui pasal i nei emaw nei lo emaw chutiang chuan a thawk duh a ni. 

Nupui/pasal nei i nih chuan, Pathianin Krista anna nei mizia kawhhmuh tura a duh che chu i nupui/pasal kha a ni ang. Nitin vawi za tam i kawppui mamawh, nangma mamawh ni lovin, ngaihtuah nawn fo turin a ti che a ni. 

Bible chuan, “Hmangaihna chu vervêkna tel lovin ni rawh se. Sual lam chu hua ula, ṭha lam chu pawm tlat rawh u. Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula,” tiin a sawi [Rom 12: 9-10]. 

Chutiang chuan i nupui/pasal neia in inlaichinnaah i ti ve em? Nupui ka neih hma kum eng emaw zat liam taah khan hmeichhe hmangaih dan hi thiam ve tawk niin ka inngai. Mahse hmangaihna awmzia hi ka lo hre lo! Tunah kum 50 chuang, nupui ka lo neih tak hnu hian hmangaihna chuan thleng a sil tih ka hre tel a. Hmangaihna chuan bawlhhlawh a paih a. Hmangaihna chuan midang a dah hmasa tih ka hre ta a ni. 

Chuvangin, “rinawm takin midang hmangaih la … midang in hmangaih tawn kawngah che chhuak rawh u” tichuan Krista anna kawngah in lo ṭhang lian zel ang a. In inlaichinna kawngah a tinghet che ang a, i chenpui leh khawsakpuite tan a tinghet lehzual ang che. 

Ngaihtuah zui atan. 

• Inneihna tha leh nghetin khawthlang nun a phuarkhawm dan – i ṭhenawmte zingah emaw in ramah emaw chu i lo hmu ve tawh em?  
• Nupui/pasal i nei emaw nei lo emaw i nungchang siamṭhat nan Pathian eng ang inlaichinna nge a hman? Midangte hmangaih dan leh zah dan chu engtiangin nge i lo zin chhuah ve tawh? 
• Vawiin hian i nupui/pasal chu hmangaihna kawngah kal khalh han tum chhin teh. A rahchhuak chu ngaihtuah zui ang che. Hmangaihna leh zah taka i chetna chuan eng ang rah nge a chhuah? [Nupui/pasal nei lo i nih chuan chu tho chu i chhung te, chenpui, leh hna thawhpuite kiangah lantir ang che].  

[ *Lettu* : Peka]

Tuesday, February 3, 2026

PATHIANIN I SAWI TUR A HRILH ZEL ANG CHE

_Kohhranin I Mamawh Ber A Phuhruk Dan_

By Rick Warren 
— February 03, 2026
“Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a. Chutichuan, kan Lalpa thu hriattirna chu zahpui suh la, kei, ama mi tang pawh hi mi zahpui hek suh ang che. Chanchin Tha avanga hrehawm hi Pathian thiltihtheihna angzia ziain mi tuarpui zawk ang che.” 2 Timothea 1:7-8

I rinna puanchhuahnaah chuan zawhna chhanna zawng zawng i chhang vek thei dawn lo va, nimahsela inringtawk tho vang che. Engvangin nge? Isuan chhanna a nei vek a ni!

Thildang i hriat belh tur a awm a: Kristaa i beiseina chu midang nena in lantir chuan nangmah chauhin i awm lo tihna a ni ang. Pathianin a awmpui che a! Tichuan Pathian Thlarau chu mi thinlungah a cheng ve zel ṭhin a ni.

Bible chuan, “Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a. Chutichuan, kan Lalpa thu hriattirna chu zahpui suh la, kei, ama mi tang pawh hi mi zahpui hek suh ang che. Chanchin Tha avanga hrehawm hi Pathian thiltihtheihna angzia ziain mi tuarpui zawk ang che.” 2 Timothea 1:7-8.

Pathian Thlarau leh Pathian thutak chu nangmahah a awm tih i hriat chuan, Isua chanchin midang i hriattirnaah hlauh tur engmah a awm lo. Inrintawkna tamtak a pe zawk ang che.

Luka 21:14-15 ah pawh rinna i puanchhuahnaah inrintawkna tur a pe che a: “Chutichuan chhanna tur ngaihtuah lawk lo turin in rilruah intinghet rawh u; in hmelma zawng zawngin an dodala an hnial theih lohna tur ka leh finna ka pe dawn si che u a.”

Mi hnena i rinna i puanchhuah dawna hlauhna i nei hi a awm hle mai. Hetiang hian i ngaihtuah maithei, "Office ah te, inkhelhna hmunah te leh kan ṭhenawmah kha chuan sawi tur reng reng ka hre lo a ni." Nimahsela Pathian chuan i hnenah hetiang hian a sawi a, "I mamawh hun apianga i sawi tur chu ka hrilh zel ang che."

Thutiam duhawm tak a ni! Pathian chanchin ṭha sawi turin i inringtawklo maithei a, nimahsela hei hi thudik chu a ni, Pathian awmpuina leh thiltihtheihna i neih avangin i mamawh apiang chu i nei a ni.

Ngaihtuah zui atan

* Mi hnena Pathian hmangaihna i sawi laia Pathian thiltihtheihna i chan a awm anih chuan han sawi teh.

* I nunah tu nge a rinna chu huaisen taka hril ngam awm le?

* Pathian Thlarau chu nangmahah a cheng anih chuan karleh lamah chuan nangmahah danglamna engnge awm ang?

*[Lettu: Sangpuia]*

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...