Saturday, January 31, 2026

ENGVANGIN NGE MIDANGTE HNENAH ISUA CHANCHIN I HRILH?

_Kohhranin I Mamawh Ber a Phuhruk Dan_

- Rick Warren 
- January 31, 2026
_"Lokal ula, min zui rawh u, midangte tana sangha man dan ka zirtir ang che u."_ (Matthaia 4:19, NLT)

Pathianin khawvelah hian a thuhretu ni turin a ko che. Isuaa beiseina i neih kha midangte hnena i tlangaupui ve a duh a ni.

Mahse mi tam tak chu "artic lui Kristian" ka tih ang hi an ni. A hnar lamah vurin a hmet khawng a, engmah an sawi ngai lo. Isua chanchin engmah an sawi ngai lo. Mahse Isuan, "Sangha/Mihring man tuma in beih loh chuan min zui lo tihna a ni" a ti.

Bible chuan heti hian a ti, _"Lokal ula, min zui rawh u, midangte tana sangha man dan ka zirtir ang che u."_ (Matthaia 4:19, NLT)

Engvangin nge Pathianin beiseina i neih kha midangte hnena i hrilh ve a duh? Hengte hi a chhan ṭhenkhatte a  ni:

*Mi zawng zawngin Isuan an mamawh.* He khawvelin a pek theih zawng zawng aiin Isua Chanchin hi a ṭha zawk. Cancer tihdam emaw Alzheimer natna tihdam emaw natna dang engpawh tihdam ai khan a ṭha zawk. Mite Isua i kawhhmuh khan chatuan nunna i kawhhmuh tihna a ni. An hun kal tawh ngaihdam dan te, an damchhan te, leh vana in i kawhhmuh a ni. Chu chu mi zawng zawng mamawh a ni asin!

*Isua thupek a ni.* Isua thupek/tirh chhuahna ropui khan chiang takin a sawi: _"Kal ula zirtirahte siam ula"_ (Mat. 28:19). Mahse midangte ang tho i nih chuan, Pathianin engtinnge a ngaih ang tih aiin midangte ngaihdan i dah pawimawh zawk ang a. Midangte chhandamna aiin i hmingṭhatna i dah pawimawh zawk ang. Mahse i lungngaihna karah pawh Isuan i beiseina kha midangte hnena hrilh turin a ti che.

*Pathian leh mihring i hmangaih.* Bible chuan heti hian a ti, _"Krista hmangaihna chuan min tir lui a ni; heti hian kan ngaihtuah: Mi zawng zawng thih aiin mi pakhat a thi a, chuvangin mi zawng zawng chu an thi a ni."_ (2 Kor. 5:14). Miten heti hian min zawt fo, "Khawvel hmun hrang hranga Chanchin Ṭha tlangaupui tur hian engin nge tiphur ṭhin che?" tiin. Heti hian ka chhang ṭhin, "A chhan chu Isua hi ka thinlung zawng zawngin ka hmangaih a, midangte pawh ka hmangaih bawk" tiin ka chhang ṭhin. Krista hmangaihna chuan midangte hnenah amaha beiseina ka neih tlangaupui turin min nawr ṭhin.

*Vanramah lawmman pek i ni dawn.* Thufingte 11:30-ah chuan heti hian kan hmu, _"Felna rah chu nunna thing a ni a, thlarau mantu chu mifing a ni"_ (NKJV). Rah chhuaha mifing nih i duh em? Isua hnenah mite hruai rawh. Leiah rochhiah neih i duh em? Engtik niah emaw i mi hriatte nen vanramah in inhmuh theih nan ke pen rawh.

Tunah khan i mi hriatzawng, Isua la nei miah lotu kha han ngaihtuah teh. "Lalpa, he mi hi i chhungkuaa hruai luh ka duh e. Vanramah ka ruala a kal ve ka duh a. Hnung lam hawi tawh lo turin min pui ang che" tiin ṭawngṭai rawh.

Tunah chuan an hnenah Isua chanchin sawi rawh le.

Ngaihtuah zui atan.

Engtik lai khan nge "artic lui Kristian" anga midang, Isua la hre lote hnenah i ngawih reng?

Isua Chanchin Ṭha hi midangte hnenah i hrilh engin nge dal che?

Isua i hmangaihna leh midangte i hmangaihna khan eng kawngin nge Isuaa beiseina i neih kha midangte hnena tlangaupui turin phurna a pek che?

[Lettu: Mapuia Fanai]

Friday, January 30, 2026

PATHIAN CHHUNGTE ENKAWL DAN

_Kohhranin I Mamawh Ber A Phuhruk Dan_

By Rick Warren
- January 30, 2026
“Mi tam takin chûng chu
an hmu ang a, an hlau vang a,
Lalpa chu an ring tawh ang.” [Sam 40:3]

Isua avangin i ngaihdamna, dam chhan leh vanah chenna in i nei. Midangte hnena Isuaa beiseina i neih chanchin hrilh chu i tih theih zinga thil duhawm ber a ni. 

I nuna Isuan danglamna a thlen chu miin an hmuh chuan an nun a khawih ṭhin. Bible chuan, “Mi tam takin chûng chu an hmu ang a, an hlau vang a, Lalpa chu an ring tawh ang,” tiin a sawi [Sam 40:3].

I nuna Isua beiseina i neih chu midang hnena puang tur chuan heng thil holam te te anga lang pathum hmang hian i puang thei ang:

*Ngaithla hmasa rawh.* He khawvel pumpuiah hian mitinten an anmahni ngaithlatu, hre thiamtu leh an awm dan [feelings] hriat thiampuitu an mamawh. Thufingte 18: 13 chuan, “I chhan hmain ngaithla rawh,” tiin a rawn a. I beng hmang khan midangte chu engtiang takin nge i hmangaih tih i lantir thei. Midang thusawi i ngaithla a nih chuan an thinlung hawnna chabi chu i nei thei ang. 

*I chanchinte sawi rawh.* “Chanchin” ti mai lovin “chanchinte” ka ti tih lo chhinchhiah la. Eng vangin? A chhan chu chanchin tam tak emaw testimony tam tak emaw i nei tlat. Mi tam tak chuan testimony pakhat chauh nei angin an inngai fo – Krista an tawh dan testimony chauh chu. Mahse Pathian chuan sum thuah te, inlaichinna leh taksa dam leh dam loh thuah te a lo ṭanpui tawh che em? Testimony za tam Isua vangin i lo nei tawh hial ang.  

*Mite chu Pathian chibai buk turin hruai rawh.* Mite hnena Chanchin ṭha hril dan ṭha ber pakhat chu biak ina hruai a ni. Inkhawmna hmuna an lo kal chuan ringtu kalkhawmte chu an hmu ang a, Pathian Thu chu midangte nen an lo zir ve dawn a ni. Tirhkohte 2: 47 chuan, “Pathian an fak a, mi zawng zawng duhsak an hlawh a, Lalpa chuan a chhandam apiangte chu ni tin an zîngah a tel belhtîr zêl a,” tiin a sawi. 

Mi tam berte chu an thlarau nun a ruak fo, a chhan chu Isuan an tana beiseina tur chu an hre lo a ni. Vawiin hian midangte Pathian chhungte hnena hruai tur chuan engnge i tih ve theih ang? 

Ngaihtuah zui atan. 

• Isuaa beiseina i neih chu engtik hunah nge midangte hnenah chuan i lo sawi ve tawh? Engtin nge an lo dawn? 
• Mi thusawi ngun em ema i lo ngaihthlak tawh dan chu han ngaihtuah teh. Engnge chutianga i tih chuan i lo hmuh chhuah? 
• Engtin nge Pathian chuan sum thuah te, inlaichinna leh hriselna thuah chuan a lo ṭanpui tawh che? Chu testimony chu tu hnenah nge i lo hrilh ve tawh? 

*Pathian chhungte zinga tel ve dan.* 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Thursday, January 29, 2026

KRISTA PALAI I NI

_Kohhranin I Mamawh Ber A Phuhruk Dan_

By Rick Warren
— January 29, 2026
“Chutichuan, Krista aia palai kan ni a, Pathianin keimahni min hmangin a ngên chiam che u tih theih a ni.” 2 Corinthians 5:20 (NIV)

Pathian fa i nihna zawna i tih tur chu Pathian chhungte zinga tel ve tura midang sawm luh a ni. Dik tak chuan, Krista palai [ambassador] i ni e. Chu mi awmzia chu khawi hmunah pawh kal la, Isua ai i awh tihna a ni. 

Bible chuan, “Chutichuan, Krista aia palai kan ni a, Pathianin keimahni min hmangin a ngên chiam che u tih theih a ni,” tiin a sawi [II Korinth 5: 20] 

Krista aiawh palai em chu ka ni tak tak phak lovang i lo ti mai thei. Midang hneh tur chuan thilpek emaw theihna eng emaw ngaiin i hre mai thei. Kristaa beiseina i neih chu midang hrilh turin nangmah leh nangmah inrintawkna i lo tlachham tawh mai thei. 

Heng thil pangate hian Krista palai ni tur chuan mahni inrintawkna an pe thei ang che: 

*I thil thlakhlelh ang kha mi zawng zawngin an duh ve.* Pathian chhungte zinga tel ve tura i pianthar ni khan mihring i nihna i bansan ta tihna a ni lo. Duhzawng leh chak zawng, miten an neih ang zawng zawng kha i la nei vek. Chu mi awmzia chu, mite i kawhhmuh tum – mihring dam chhan hriat chhuah chu – mi zawng zawngin an zawn leh thlakhlelh a lo ni ve tihna a ni. 

*Zawhna i neih ang chiah kha midangte pawhin an nei ve.* I rilrua zawhna i lo neih ve mek – “Tu nge ka nih?” tih te, “Ka nun hian awmzia a nei em?” tihte kha Pathian aṭanga chhuak an ni. Zawhna holam te an ni mai lo va, mi zawng zawng tana zawhna pawimawh tak an tling. Chung chhanna te chu Pathian thuah an awm ve chiah bawk.  

*Mi tam tak chuan an thil rin chu an chiang lova, an inkawkalh bawk.* Entirnan, ṭhenkhat chuan khawvelah hian thil dik ber pawh a awm lo an ti a. Mahse chu chu dik berin an hre ve tho. Isuaa beiseina thuchah awm mite hnena i sawi chhuah chiah chuan mite nun chu a tifiah ṭhin a ni. 

*An thinlung Krista tana an hawn theihna tur chabi chu ngaihven rawh.* Chu chabi chu an thil mamawh an neih si loh emaw hliam tuam bo emaw a ni thei. Pathian pan theihna kawng awm chhun chu Isua Krista a ni. Mahse mite chu Krista hnenah chuan chhan hrang hrang avangin an lo kal – vawi eng emaw zat an natna vang chuan an lo kal bawk. 

*Ṭhenkhat chuan chhuanlawm neiin, nang erawh chuan Thlarau Thianghlim leh thutak chu i nei.* Midang nena Pathianin Krista kaltlanga a buatsaih thu i hril lai chuan nangmahin i thawk lo. I ṭawng lai mek pawh chuan Pathian chuan a awmpui che, midang nena in ṭawng lai mek pawh chuan Pathian chuan hna a lo thawk a ni. 

Vawi eng emaw zat chu, mi ṭhenkhat chuan an rinna thu sawi chhuah chu an ngam lo. Hei hi thu lawmawm chu a ni, a thu i sawi a tul hun chuan – engtik lai pawhin a ṭanpui ang che, amah i ring a nih phawt chuan!

Ngaihtuah zui atan. 

• Tuin nge Isua chanchin chu zirtir chein Pathian chhungte zinga tel ve tur chuan ṭanpui che? 
• Eng Bible chang ber chuan nge Pathian mite zinga i tel ve theihna turin ṭanpui che? 
• Tu nge tun hnaiah Pathian chhungte zinga tel ve turin i lo sawm ve? I ṭhian te emaw i chhungte zingah chuan tuin nge Isua Krista chhandamna chanchin i hrilh hun lo nghak mek? 

[ *Lettu:* Peka]

Wednesday, January 28, 2026

INHUMHIMNA TUR I NEI EM?

_Kohhranin I Mamawh Ber A Phuhruk Dan_

- Rick Warren
- January 28, 2026
_"Lawmte chu lawmpui ula, ṭapte chu tahpui rawh u,"_ Rom 12:15.

Hun harsa tak i lo paltlang tawh a nih chuan tu emaw i bula awma ṭahpui tur che pawimawhzia i hria ang. Chuvang chuan Pathianin kohhran chhungkua - pumpelh theih loh hun khirh tak i tawh huna mal taka i awm lohna tura tungding thei tur a duhpui che a ni.

Mi tumahin damdawi ina kan hmangaihte dinhmun hlauhthawnawm taka zai an nih laiin mahni chauhin an nghak tur a ni lo. Tumahin mahni chauhin damdawi enchhinnaah chanchin an nghak tur a ni lo va. Indona hmuna an fanu, fapa emaw an kawppuite chanchin mahni chauhin an nghak tur a ni lo. Thlan thar hma lamah mahni chauhin tumah an ding tur a ni hek lo. Beidawnna thuk tak aṭanga mahni chauha hetiang thil tawh hi a va na dawn em!

Dinhmun lungchhiatthlak tak i lo tawk tawh a nih chuan mi tu emaw i bula awma, ṭahpui tur che i mamawh.  

Dinhmun khirh tak a lo thleng a ni maithei, inhumhimna ṭha neih a finthlak ang.

I tana Pathianin inhumhimna a siam chu eng nge ni? Ringtu inpawl khawm i tana inpe leh nang pawh i inpekna tur chu.

Tunah khan i tan tunge inpe le? I mamawh hunah tunge i kiangah awm ang a, i beidawn hunah tu nge i bulah awm ang?

Bible chuan, "In zain rilru hmun khatin awm ula, inlainat tawn ula," (I Petera 3:8) a ti.

Ka ringtupui ṭhiante hian hun harsa tak karah min ṭanpui nasain, rilru hliam na takte pawh kan lo hmachhawn tlang a. Min ṭawngṭaisakin, min nghaka, thih ka hlauhin min ṭanpui bawk a. Rom 12:15-na, "Lawmte chu lawmpui ula, ṭapte chu ṭahpui rawh u," tih hi an nunpui tlat a ni.

Nang pawh heng ringtu ṭhiante nghaka ṭahpuitu che zingah i tel ve tawh em? Awmze nei lovin              khawsa ve mai mai suh, a chhan chu mite hi beidawnna laka Pathian chhanna an ni. 

Ngaihtuah zui atan.

Engtik hunah nge i tan mi an lo lan a, an ṭanpui che? Awm ve rawngbawlna chuan i rinna kawngah eng nge nghawng a neih?

Tute nge i tana inhumhimna tur siam? 

Miin harsatna an tawh laiin, engtin nge i inlantir ang?

[ *Lettu: Marova Punte* ]

Tuesday, January 27, 2026

TUIN NGE VENG CHE?

_Kohhranin I Mamawh Ber A Phuhruk Dan_

  - Rick Warren
  - Jan 27, 2026

“Amah maia awm kha chu miin hneh thei mah sela, pahnih chuan an lo dodal zo dawn a ni; hrui thum hrual chu a chat lawk ngai lo ve.” Thuhriltu 4:12

Chawlh hmang tura i zinchhuahin, i in chu i ṭhenawmte kutah i dah mai thei a ni. Veng ṭhenkhatah phei chuan vengtu ṭangrual pawl te pawh an in din hial a ni. I ina i thil neihte chu i ṭhenawm ten an enkawlsak che a ni maithei, tu in nge i thlarau chu enkawlsak thung che?

I nun chu kawng dika a kal theih nan tuin nge vengin, awmpuiin, tanpui che? 

Eng ang mi pawh ni mah la, nangmah enkawltu che leh thlarau lama i kal dik lohna hrilh tur che mi i mamawh a ni. Chung mi chu in kohhran chhungkuaah i hmu ang. A nihna takah chuan, chu chu Pathian chhungte awm dan tur a ni.

Philippi 2:4 ah chuan, “Mahni ta ta mai en lovin, mi dang ta pawh en ṭheuh zawk rawh u” a ti.

Tute pawh hian arkhawthim dai tawp - kan hmuh theih si loh harsatna leh thlemna kan tawhnaah kan nei vek a ni. Chutah tak chuan kohhran chhungkua an lo lang a. Hmelma lakah chuan, inralring rengin an awm thin a ni.

I nun tihchhiat tumtu hmelma i nei. A dika dik chuan, zing i thawh hma aṭang tawhin nitinin Setanan hneh dan tur che a ngaihtuaha, thlemna hrang hrang leh harsatna, kawng tihtawp emaw, kawng kual tak hmang tein a bei ṭhin che a. Rilru tih natna, chin dawklak leh rilru lama chi-aina hmangtein a bei ṭhin a ni. Nangmah maia lo beihlet i tum chuan, i hmelma chuan a hneh thei che a. Chutah tak chuan i ringtupui nangmah ṭanpui tur che i mamawh a ni.  

Thuhriltu 4:12  ah chuan, “Amah maia awm kha chu miin hneh thei mah sela, pahnih chuan an lo dodal zo dawn a ni; hrui thum hrual chu a chat lawk ngai lo ve” tih kan hmu a ni.

I vengte – kohhran chhungkua – chu thlarauva hnehna chang tura Pathian chhanna a ni. Kan awm khawm hian kan chak lehzual ṭhin a ni.

Ngaihtuah zui atan

* I nunah tute nge veng che a, i tlukna turah tuin nge hriattir che? Midang te tan chutiang mi chu i ni ve em?

* Ringtute inpawlhona chuan i chak lohna i hriat theihna kawngah engtin nge an puih che?

* Hmelma ina a beihna cheah engtin nge vawiinah hian rahbi pakhatin hma i sawn theih ang?

*[Lettu: Sangpuia]*

Monday, January 26, 2026

I NUNAH KAL DUN PUI TUR MI I MAMAWH

_Kohhranin I Mamawh Ber A Phuhruk Dan_

-- Rick Warren
-- Jan 26, 2026
"Mihring amah chauhva a awm hi a tha lo ve" Gen 2:18.

Nun hi zinkawng a nih avangin Bible chuan ke a kal angin a tehkhin fova. Kan thu mai mai ngai lo a ni. Thuthlung Thar bu zawng zawngah hian, finna te, hmangaihna te, êngah te, thuawihnate a kal thin turin min ti a. Isua anga kal turin min ti a ni. 

Kan damchhung hian mi dangte kianga kal turin min zirtir a. Hetah hian mi dangte nen kaldun a tulna chhan kawng thum a awm:

*A him zawk.* Kawtthler reh takah emaw khawpawnah mahniin zan rehah i kal tawh em? A hlauhawm deuh thin a ni ti raw. Mahse i kiangah mi dang awm se chuan, i thla a muang sawt ang.

*In puih a awl.* Hringnun hi yard 50 vel han tlan vak ang a ni lova. Thui tak intlansiakna zawk a ni. A tawp thleng turin mi dangte nen i kal hian thahrui leh phurna a pe dawn che a ni.

*A finthlak.* Mahni a kal aiin mi dangte nena kan kal hian kan zir tam zawk a. Kawng dik lo lamah mahnia i kal chuan, i hrechhuak ngai lo maithei. Mahse i kiangah thian i neih chuan, a tu emaw zawk zawk chuan kawng dik lohna in hrechhuakin, in hawizawng a dik zawngin in her rem thei ang.

Mi dangte nen i kal chuan thil pawimawh tak tak i zir thei ang. Mi dangte zinga tel i thiam phah anga, mi thawhpui i thiam dawn a ni.

Tin, hmangaih dan i zir thei bawk ang. Genesis 2:18 chuan "Mihring mahni maia awm chu a tha love" a ti a. Pathian chuan i khua a har a duh lova, khawtlang min pek hi Pathianin kan khawhar lohna tura a duan a ni. Mi dangte nen i kal chuan, Isua anga mi dangte hmangaih dan i zir zel dawn a ni.

Mi dangte kianga kal chuan mi dawnsawn dan pawh min zirtir a. Bible chuan 1 Pet 4:9 ah "Phunnawi lovin inmikhual tawn ula" a ti a. Eng thilah nge i phunnawi thin? I thiante tan i in i hawn loh chhan kha eng nge?

"Ka in chu a felfai lo lutuk a" i ti a ni maithei. In i enkawl thiam dan lampang aiin nangmah kawm che kha an duh zawk a. Khawngaihna an lantir thin a ni.

"Kan in chu a lian lova" i ti pawh a ni thei e. Mi pathum in leng em? Isua chuan "Mi pahnih emaw pathum emaw ka hminga an inkhawmna a piangah an zingah ka awm si thin a" a ti a (Matt 18:20).

Mi tin hian mi tu emaw ta nih kan duh theuh, a chhan pawh Pathian hian inlaichinna nei tura min siam vang a ni. Ringtu dangte kiangah i kal chuan, chu duhna chhanna chu i hmu ang.

Ngaihtuah zui atan

* Mi dangte i kianga an awm avanga harsatna i paltlang eng thil nge awm le?

* Mi dangte lo dawngsawng tha lo tur hian eng chhuanlam nge i neih le? I rilru engtia thlak nge i ngaih?

* Tute nge i nunah kawng i zawh dunpui theih le? An mal lo a ni tih engtin nge i hriattir ang?

*[Lettu: Sangpuia]*

Sunday, January 25, 2026

NEITU I NIH A NGAI

_Kohhranin I Mamawh Ber A Phuhruk Dan_

- Rick Warren 
- January 25, 2026
_"Taksa pumkhatah peng tam tak kan nei a, peng zawng zawng thiltih erawh chu a inang lo va, chutiang bawkin keini tam tak ni mah ila, Kristaah chuan taksa pumkhat kan ni a: a mal malin inpeng tawn theuh kan ni."_ (Rom 12:4-5)

Kohhran kan sawi mek lai hian, Pathianin kohhran inkhawma i tel ve chauh hi a duh tawk lo - a neitu i nih a duh.

Bible chuan heti hian a sawi, _"Taksa pumkhatah peng tam tak kan nei a, peng zawng zawng thiltih erawh chu a inang lo va, chutiang bawkin keini tam tak ni mah ila, Kristaah chuan taksa pumkhat kan ni a: a mal malin inpeng tawn theuh kan ni."_ (Rom 12:4-5)

Saddleback kohhran pastor ka nih lai khan kohhran inkhawma rawn tel ve satliah leh kohhran member kha an inan lohna ka sawi thei tlat. Min rawn chhimtute kha chuan dawrah ka bulah rawn kalin, "Pu Rick, in kohhran hi ka ngaina khawp mai" tiin min rawn be ṭhin. "In kohhran" an ti zel tlat. Mahse kan member-te chuan, "Pu Rick, kan kohhran hi ka hmngaih a ni" an ti thung.

I nihna i sawh sawn ve tawh em? Ei raltu aṭangin siam chhuaktuah i inlet em, mikhual aṭangin a neituah, chhimtu aṭangin lo lawmtuah? Kohhran chhungkua zinga i telna tur chhan pathumte:

*Kohhran chhungkua chuan Pathian lam chauh thlir turin a pui che.* Tunlaiah chuan kan chanchin kimchang te, kan mit la thei thil te, tihkhawtlaina te leh harsatnate hian kan mit a hiah fo. Mahse kohhran chhungkuaa i tel chuan Pathian lam thlir turin a pui ang che. Pathian lam hawi i tum poh leh i rilruah hmun a chang lian zel ang a, i harsatnate erawh an te zel ang.

*Kohhran chhungkua chuan i nuna harsatna hmachhawn turin a pui ang che.* Tunah chuan heng pathum zinga pakhatah hian i awm mek. Harsatna i chhuahsan chiah emaw, harsatna karah tak i awm mek emaw, harsatna lamah i pen lut mek emaw a ni thei. Hringnun hi harsatna, Pathianin mahni maia i chinfel tura a dah ni miah si lo hian a khat tlat. Chuvang chuan nangmah thlawp tur chein a kohhran a pe che a, annin an hmachhawnpui ang che. Malin i awm reng reng lo.

*Kohhran chhungkua chuan i rinnaa ding nghet turin a pui che.* Pathian chhungkuaa mite nen inzawmna ṭha tak i neih khan thlawptu dik i nei tihna a ni. Ngaih pawimawh tur dik tak neih kawngah an pui che a, thil te tham deuh leh lian deuh thliar dan an zirtir che. Hei hian i ngaih pawimawh tur a hriattir chea, i rinna a tinghet bawk.

Tunlai khawvelah chuan ngaihdan dik lo tak tak, Pathian min siam chhan min hlohtirtu tam tak a awm tawh. Kohhrana neitu nihna chan ve tlatna hian Pathian lam min hawitir a, hringnuna harsatna hmachhawn turin min pui a, i rinna a tinghet bawk. Chu chuan i nunah danglamna nasa tak a thleng ang.

Ngaihtuah zui atan.

Eng kohhran chhungkuaah nge i tel? Kohhran zingah i tel loh chuan engin nge i telna tur dal le?
Kohhran chhungkua khan engtinnge Pathian lam thlir tura a puih che?

Tunah khan eng harsatna nge i tawh? Engtinnge pui tur chein kohhran i belh ang? 

[Lettu: Mapuia Fanai]

Saturday, January 24, 2026

NEITU NIHNA HMUN PAWIMAWH BER

_Kohhranin I Mamawh Ber A Phuhruk Dan_

- Rick Warren 
- January 24, 2026
_"Pathianin . . . Pathian chhungkaw zinga mi ngei kan nih theihna turin pianthar theihna hun ṭha min pe a."_ (1 Petera 1:3, TLB)

Kohhran chu i kal fona ṭhinna hmun kha a ni lo a, i tel vena thil thleng a ni hek lo. Kohhran chu i tel vena thlarau lam chhungkua a ni a - he khawvela thil pawimawh ber a ni.

Engvangin nge kohhran chu a pawimawh em em? A chhan chu Pathian chhungkua a ni tlat. Kam damchhunga kan vanneihna hlu ber chu Pathian chhungte zinga tel hi a ni - "Pathian chhungkaw zinga mi ka ni a. Pathian fa ka ni" kan tih theihna hi.

The Living Bible chuan heti hian a letling, _"Pathianin . . . Pathian chhungkaw zinga mi ngei kan nih theihna turin pianthar theihna hun ṭha min pe a."_ (1 Petera 1:3)

Mihring anga i lo pian rual rual khan mihring chi thlah kal zela chhiar tel i ni. Chu chu i duhthlanna a ni hauh lo. Mahse thlarau lam chhungkuaah erawh duhthlan theihna i nei. Isua i Lal leh Chhandamtu a i pawm rual khan thlarauah i piang a, Pathian chhungte zinga chhiar tel nghal i ni.

Pathian chhungte zinga tel hlawkna tam tak zinga pakhat chu 1 Tim. 3:15-ah kan hmu, _"[Pathian] chhungkua chu Pathian nung kohhran, thutak innghahna chu a ni"_ (NCV). Lirnghing thlen fona ṭhin rama cheng i nih chuan innghahna nghet pawimawhzia i hrechiang leh zual ang. Chutiang chiah chuan kohhran chhungkua aṭanga thlawpna i dawn ṭhat chuan hringnunah lirnghing nasa tak lo thleng pawh nise i nghing ve lovang.

He leia engkim mai hi a la tlu chhia ang- kohhran tih loh chu. Sumdawnna hmun te, zirna in te, sorkar te, ram te hi khumkhaw daih tur an ni lo. Kohhran chauh hi tawp lova ding nghet tur a ni, a chhan chu Isuan a din a ni a, chatuan hmun thleng tur chhungkua din a tum a ni.

Matthaia 16:18-ah chuan Isuan heti hian a sawi, _"He lungpui chungah hian ka kohhranho ka rem chho ang a, Mitthi Khaw kulh kawngkharte chuan chu chu an ngam lo vang."_

He khawvel, engmah nghet leh chiang awm lohan ramah hian chatuan daih tur innghahna nei lungphum chungah hian i nun din rawh: Pathian chhungkua, innghah rinawm tak neiah hian.

Ngaihtuah zui atan.

Kohhran hi eng kawngtein nge "i ta" ni lova i "tel vena" mai a lo nih ṭhin?

Pathian fa i nihna ni lo eng thil dangin nge i nihna kha i nghah,  i chhungkua, eizawnna, ṭhiante, i thil neih, i political party telna - emaw eng thil dang emawah pawh?

Kohhran tih loh he khawvela thil dang zawng hi a tlusawp dawn a ni tih i hriatna khan engtin nge i rinna midangte hnena puang chhuak tura a tihphur che?

*Pathian chhungte zingah i tel tawh em?*
Pathianin chhandamna min pek a tiam dawnga a thlarau lam chhungkaw zinga tel tura i inpeih chuan heti hian ṭawngṭai rawh le:

"Isu, nang ka rin phawt che chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

"I hmaah ka sual ka puang a, ka Lal leh Chhandamtu  i ni tih ka pawm e. Vawiin hian nun zawng i tan ka hlan e. I hnung zuia min hrilh ang zela nung turin ka inpe e.

"Isu, min hmangaih avang leh min tlanna avanga vanram thleng thei ka nih avangin ka lawm e. Ka chhandamna ka thawh chhuah a ngaih loh avangin ka lawm e, ka thawk chhuak thei dawn si lo va. Ka nun zawng hi mahni tan ni lovin i tana hman ka duh e. Ka nun i tan ka hlan a, min chhandam a i chhungkuaa min pawm turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, January 23, 2026

PATHIAN AWMPUINA I MAMAWH, A SAWIFIAHNA LAM AIIN

_Koh I Nihna Nunpui Rawh_

By Rick Warren
— January 23, 2026
“Pathian hmangaihtu, ama ruat anga a kohte tân chuan, an ṭhatna tûrin engkimin a thawhsak ṭhîn tih kan hria.” [Rom 8:28]

Buainain hringnun a chim lai te, harsatna hmachhawn tur a len em em lai te, hringnun chu a buai em em lai leh engkim a kal dik theih reng reng loh lai te chuan a chhan bulbal ni awm zawn a awl em em.  

Mahse, vanduaithlak takin, a chhan sawifiahna chuan mi a thlamuan tak tak ngai lo. I nat chhan chu fiah takin hria pawh ni la, hriatna ringawt chuan a tidam kher lo vang che. I lusunna chu a titawiin emaw a tiziaawm chuang lo vang. I lungngaihna tawrh mek chu a tihnepsak chuang lo bawk ang che. 

A chhan hriat chhuah tumin “engah nge” lo ti chiam zel suh. Pakhatna, i thluak bur kha khawvel thil thleng zawng zawng hre fiah turin a lian tawk lo. Fanghmir internet khawvel hriat thiam tum ang lek i ni thei. Vanram i thlen zet hma chuan khawvela thil thleng tam berte hi chu i hre thiam tak tak ngai lo vang. Pathian hmaa i din zet hma chuan an fiah lo ruai ringawt ang. Chu mi hunah chuan i hmu fiah tawh thung ang. 

Chumi hma chuan? Hun harsa i paltlang lai meka i mamawh chu a hrilhfiahna lam a ni ber lo. I mamawh chu Pathian awmpuina a ni. 

Hun thim ber lai pawha i lawm reng theihna tur chhan chu Rom 8: 28-a thutiam kan hmuh chu a ni: “Pathian hmangaihtu, ama ruat anga a kohte tân chuan, an ṭhatna tûrin engkimin a thawhsak ṭhîn tih kan hria.” 

I nun chu eng ang taka keh chhia pawh ni se, a keh ang anga Pathian i pe a nih chuan thil ṭha takah a chhuah leh thei ang. Kraws-a thihna anchhedawng chu thawhlehnaah a chantirin chu mi hmang chuan khawvel mal a sawm leh a ni. 

Natna eng emaw i tuarte leh hriat thiam tuma i lo beih ve fan fante chu vawiin hian Pathian hnena i pek mai a fuh ber ang. A awmpuina duhawm tak chu a tharin dil ang che. Thil zawng zawng vanrama chhanchhuah an nih hma chuan lo kawl tlat rawh se. I natna te chu a man kawl sela midang malsawmna atan hmang rawh se, vawiin hian thil ṭha tihna atan hmang rawh se.  

Ngaihtuah zui atan. 

• Pathian awmpuina chu engtin nge i lo hriat chian zel theih ang? 
• I nun kehsawm laite chu Pathian hnena i kawltir lai chuan amah chu engnge i hrilh ve ṭhin? 
• Mi tute emaw natna Pathianin midang malsawmna atana a hmang lai chu i lo hmu ve tawh em? I natna chu chutianga a hman ve chu i phal em? 

[ *Lettu:* Peka]

Thursday, January 22, 2026

KAN DAM CHHAN HMUHNA TUR?

_Koh I Nihna Nunpui Rawh_

By Rick Warren
— January 22, 2026
“Ama duh zâwnga remruat ang zêla thil engkim titu tum anga ruat lâwk ni tawhin, amahah bawk chuan a ro tûra siam kan ni, keini Krista lo beisei hmasa tawhte hi a ropui fakna kan lo nihna turin,” tiin [Ephesi 1: 11-12]. 

Mark Twain-a chuan i nuna ni pawimawh ber pahnih chu i pian ni niin a dawttu chu i pian chhan hriat chu a ni tiin a sawi. 

Pathian chuan chhan neiin engkim a siam a. Thlai tinrengte chuan chhan mumal an nei vek. Vana arsite chuan chhan an nei a. Ramsa tinrengte chuan chhan bulbal an nei vek. I lungphu a phut chhan chu Pathianin chhan mumal neia a siam vang che a ni. I lo la dam ve ngawt mai khan dam chhan i nei tihna a ni. 

I dam chhan chu i hre duh a nih chuan mahni inhaivenna lehkhabu [self-help book] eng emaw, television emaw lemchan eng emawah zawng suh. Nangmah leh nangmahah pawh i hmu hek lovang, a chhan chu nangmah leh nangmah kha i insiam lo. Pathianin a siam che.  

Pathian chauh – nangmah siamtu che – chauh chuan i dam chhan chu a hrilh thei ang che. 

Bible chuan hetiang hian min hrilh: “Ama duh zâwnga remruat ang zêla thil engkim titu tum anga ruat lâwk ni tawhin, amahah bawk chuan a ro tûra siam kan ni, keini Krista lo beisei hmasa tawhte hi a ropui fakna kan lo nihna turin,” tiin [Ephesi 1: 11-12]. 

Pathian siam i ni a; Pathian tana siam i ni. Chu chu i hriat thiam hma chuan i nun chuan awmzia tak tak a nei ngai lo vang. 

Bible chuan chatuan daih tura siam i ni tiin a sawi a. Engtik nihah emaw chuan i lungphu a la chawl ang. Chu chu i taksa tawp hun tur chu a ni a, mahse i tawpna tak tak erawh a ni lo vang. Pathian chuan thil thui tak i nun tan ruahmanna a nei a. Chatuana nung turin a duang che. 

Lui ral lehlamah chuan helam ai hian hun i hmang tam zawk dawn. I dam chhung hun chu kum  80 emaw kum 100 emaw lai pawh lo hmang dawn ang ta la, a lehlamah chuan chatuan hun i hmang dawn.  

Bible chuan vanram tan i la inpeih lo tiin a sawi. Thil eng emaw i zir hmasak a ngai. Tun huna i nun hi hun lo la awm tur atana inbuatsaihna a ni – a chhan chu chu nun zawk chu chatuan daih tur zawk chu a ni si a. 

Ngaihtuah zui atan. 

• Eng vangin nge “Hetah hian engah nge ka awm” tih zawhna chu i chhan theih a ngaih?
• “Eng vangin nge hetah ka awm” tih chu engtiangin nge chhan i lo tum ve ṭhin? Eng ang mihring leh eng ang thil nge i lo rawn ve ṭhin? Engtiang takin nge chung chhanna chu i lo hmuh ve ṭhin?   
• I ṭhiante zingah tute nge an nun tana Pathian ruahmanna chu la hmuh chhuah ngai? Anmahni nena i thil zir chhuah chu engtin nge i tih chhunzawm zel ang? 

[ *Lettu:* Peka]

Wednesday, January 21, 2026

NUNDAN FAMKIM

_Koh I Nihna Nunpui Rawh_

- Rick Warren
- January 21, 2026
_"Chutichuan, kan zain Pathian hnenah mahni chanchin kan sawi ṭheuh tur a ni,"_ Rom 14:12.

He khawvela i nun a lo tawp hunah, Pathian hmaah dingin, mi dangte tan i thawk ṭha em tih a endik dawn a ni. Bible chuan, "Tichuan, kan zain Pathian hmaah mahni chanchin kan sawi ṭheuh dawn a ni," a ti (Rom 14:12).

Chumiin a kaihhnawih chu han ngaihtuah teh. Engtikah emaw chuan i hun leh i theihna nangmah leh mi dangte tana i hman kha Pathianin a la khaikhin dawn a ni.

Chumi thuah chuan mahni indah pawimawhna hmanga chhuanlam i siam zawng zawng thu belhchian dawl lo tak tak: "Ka buai lutuk," emaw "Keimahin tum ka nei," emaw, "Hnain, intihhlimnain, chawlh tumnain ka rilru a la peng a"  i tihte kha.

Chhuanlam i siam zawng zawngah Pathian chuan heti hian a chhang ang che: "Ka siamin ka chhandam che a, i hmingin ka ko bawk a che. Chuvangin mi dangte tan inhmang rawh. A englai nge i hriatthiam loh lai chu le?

Bible chuan ringlotute chu heti hian a zilh lawk a," Mahni hma chauh siala, thutak hnara, thil dik lo zawm zawkte chungah chuan Pathian thinurna leh thinrimna a lo thleng ang (Rom 2:8). Kristian ni si mahni tan chauha nung chuan chatuana lawmman a chân thung dawn a ni.

Bible chuan mi dangte rawng i bawlsak hian nundan famkimin i nung a ni a ti. Heti hian Isuan a sawi, "Tu pawh mahni nun humhim tum chuan an chân ang a, tu pawh keimah avang leh Chanchin Ṭha avanga nun chân chuan an humhim ang," (Marka 8:35).

Hetiang thu chiah hi vawihnih ve ve Matthaia leh Luka ziakah a sawi nawn leh a ni:

• "Tu pawhin mahni nun humhim  an tum chuan an chân ang a, keimah avanga an nun chân chuan an hmu ang," (Matthaia 10:39).

• "Tu pawh mahni nun humhim tum chuan an chân ang a, tu pawh keimah avanga nun chân chuan an hmu ang," (Matthaia 16:25).

• "Tu pawh mahni nun hmunhim tum chuan an chân ang a, tu pawh keimah avanga nun chân chuan an humhim ang," (Luka 9:24).

• "Mahni nun chhan tum apiang chuan an chân ang a, mahni nun chân apiang chuan an hum ang," (Luka 17:33).

I man thiam em? He thudik hi a pawimawh em avangin Chanchin Ṭha teah hian vawi nga ngawt a sawi nawn a ni. Rawng i bawl loh chuan i nung ve tawp tihna a ni - a chhan chu nun hi rawngbawlna tur a tih a nih vang a ni.

I lak aṭangin Pathianin eng nge a beisei. Mi dangte hmangaih zira, mahni hma sial miah lova mi dang rawngbawlsak hi a ni. 

Ngaihtuah zui atan.

Mi dangte rawng i bawlsak hian, chu rawngbawlna chuan engitn nge nangmahah nghawng a neih?

Eng vangin nge Pathianin mi dangte hmangaiha an rawng bawlsak zir tura a duh che nia i rin?

Eng rawngbawlna nge Pathianin ti tura a tih che i tih khawtlai. Chumi kawngah chuan engtin nge rawngbawl hna i han ṭan ang?

[ *Lettu: Marova Punte* ]

Tuesday, January 20, 2026

PATHIANIN I RAWNGBAWLNA TUR LEH I THAWH TUR A HRIA!

_Koh I Nihna Nunpui Rawh_

* Rick Warren
* January 20, 2026
“Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni." [Ephesi 2:10] 

Pathian chuan, rawngbawlna i lo suangtuah phak bak piah lam daih atan a ko che. Khawvelah eng emaw hnutchhiah ve tura koh i ni. 

Pathian chuan, i nun ngei khan thil tidanglam thei turin a siam che. Leilung hausakna ei ral ve satliah turin a siam lo che – ei a, thaw a, hmun awl luah ve satliah turin a siam lo che. Khawvelah hian nunna tiphuisui turin a din che a, a hmang hektu satliah tur ni lovin. Pathian chuan, eng emaw pe chhuak turin a duh che – midangte ṭanpui ve turin.  

Bible chuan hetiang hian a sawi, “Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni." [Ephesi 2:10] 

I theih dan ang anga, mite i ṭanpui apiangin a nihna takah chuan Pathian rawng i bawl a ni. Kolossa 3: 23-24 ah chuan hetiangin kan hmu bawk, “In tih apiangah mihring rawngbâwl ang ni lovin, Lalpa rawngbâwl ang zâwkin tih tak zetin ti ang che u. Lâwmman atân ro luah tûr Lalpa hnên aṭangin in hmu dâwn tih hre reng rawh u. Lalpa Krista rawng in bâwl a ni e,” tiin. 

A thusawi pakhatah chuan Isuan, “Thu dik ka hrilh a che u, hêng ka unau tê berte zînga pakhat chunga in tih chu, ka chunga ti in ni,” tiin a sawi [Matthaia 25: 40] 

Tichuan, Tirhkoh Paula'n chutiang thuchah tho chu a tlangaupui bawk: “Mihring rawngbâwl mai ni lovin, Lalpa rawngbâwl in nih zâwk avângin hlim takin thawk ṭhîn rawh u” tiin. [Ephesi 6: 7] 

Chutiang deuh tho chuan Thuthlung Hluiah Pathianin zawlnei Jeremia hnenah a sawi: “Pum chhûnga ka siam hma chein ka hria che a, Chhûl ata i chhuah hma pawhin ka serh hrang tawh che, Hnamte hnêna zâwlnei atân ka ruat che a ni,” [Jeremia 1: 5] 

He “hna ropui tak” hi mi tam berten an ngaihtuah chang chuan, pastor te, puithiam te, upa leh rawngbawltu dangte an mitthla ṭhin. Mahse, Pathian chuan a chhungkaw zinga mitinte chu rawngbawl turin a duh thung. Bible-ah chuan thumal ṭhenkhat “chhiahhlawh” leh “pastor” tih chu thumal inang a ni; “rawngbawl” tih thu leh “midang tana hnathawh” tih chu thu inang a ni bawk. Ringtu i nih chuan pastor/rawngbawltu i ni tihna a ni a, rawng i bawl a nih chuan Pathian tan i thawk tihna a ni bawk ang. 

Pathian chuan, a khawngaihna i chan rual khan, eng vangin nge vanramah a lak chhoh nghal loh che tih i ngaihtuah tawh ngai em? Eng vangin nge khawvel sual takah hian a fate an awm zui a phalsak? He khawvelah hian a hna chhunzawm turin a duh che a ni. 

Chhandam i nih chiah chuan Pathian chuan a hnathawh tlingtla turin a duh che a ni. Pathian chuan, a kohhran hna thawk turin a duh che, he khawvela rawngbawl turin a duh bawk che. 

Ngaihtuah zui atan. 

I nun khan leilung hausakna engzat nge a lo ei ral ve? Khawvelah hian eng ang zat nge i lo belhchhah ve? Chu chu a inbuktawk lo a nih chuan engtin nge a hmang raltu ni lovin a siamṭhatu leh thawhkhawmtu i lo nih ve theih ang? 

Pathian kohhran tan chuan eng nge i rawngbawlna tur chu nia i hriat? Tun karah hian chu rawngbawlna chu engtin nge i umzui ve theih ang? 

Pathian mission-a i hna chanpual chu eng nge nia i lo hriat ve? Tun karah hian engtin nge chu hna chu i umzui ve ang?  

*Pathian hmangaihna emaw vanram emaw chu i thawhchhuah a ngai lo.* 

Bible chuan hetiang hian a sawi, “Rinna avânga khawngaihnaa chhandam in ni si a; nangmahni thawh chhuah a ni lo va, Pathian thilpêk a ni; thiltih avâng a ni lo ve; chuti lo chuan, miin an chhuang dah ang e,” tiin [Ephesi 2: 8-9] 

Amaha tlu lut tura thutlukna i siam thei a nih chuan, he ṭawngṭaina hmang hian inhlan ang che: 

“Lalpa duhtak, misual ka ni tih ka hria a, i ngaihdamna ka rawn dil a che. Isua Krista chu i Fapa a ni tih ka pawm a. Ka sualte avangin a thi a, nangmahin nunna nei turin i kaitho leh tih ka ring e. Ka chhandamtu atana pawmin ka Lal anga zui ka duh e, vawiin aṭang ngei hian. Ka nun hi hruai la, i duh zawng anga nung turin min pui rawh. Isua hmingin ka dil e. Amen.” 

He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni. 

*[Lettu: Sangpuia]*

Monday, January 19, 2026

THIH HLAUHNA ATA ZALENNA

_Koh I Nihna Nunpui Rawh_

By Rick Warren 
— January 19, 2026
“Hmangaihnaah chuan hlauhna reng a awm lo: hmangaihna famkimin hlauhna a hnawt chhuak zawk ṭhin a ni.” 1 Johana 4:18

Pathian chuan zalen kan nih a duh em em a. Chuvangin Bible chuan, “Bawih ni lo turin Krista chuan min chhuahtir kha ...,” (Galatia 5:1).

Pathian aṭanga zalenna chuan engnge a pek che? Thil tam tak a pe che a, chhia leh ṭha hriat theihna te, Pathian biakpawh theihna te, thildik tih theihna te a pe che a. Thih hlauhna ata zalenna pawh a pe che a ni.

Thihna hi chu tu pawhin an hlau va, mi tlemte chauhin an hmachhawn ngam a ni. Thihna hmachawn miah lo tur anga hun hman hi awl tak a ni. Thihna hi chu loh theih loha hmachhawn ngai a ni a. Nimahsela mi â chiahin inbuatsaih miah lo vin hringnun an hmachhawn ṭhin.

Hei hi chanchin ṭha a ni: Thih hlauhna ata zalenna pe turin Isua a lo kal.

Hebrai 2:14-16 chuan, “Naupangte hi tisa leh thisen changte an nih hlawm avangin, amah ngei pawhin chung bawk chu a chang ve ta a; thihnain thihna thuneitu (chu chu Diabola a ni) a tihboral theihna tur leh, thih hlauh vanga dam chhunga bawiha awm zawng zawngte chu a chhan chhuah theihna turin..”

Thih hlauhna aṭangin ka zalen ta tih huai takin ka sawi thei ta. Engvangin? Pathian ka hre chiang a, amah chu ka hlau lo a ni. Kum 60 chuang a ṭhian ka ni tawh a. Thihna hlautu te chu Pathian hre lo te hi an ni. Amah i hriat chian poh leh i hlau lo vang, Pathian chu hmangaihna a ni si a. 

“Hmangaihnaah chuan hlauhna reng a awm lo: hmangaihna famkimin hlauhna a hnawt chhuak zawk ṭhin a ni.” (1 Johana 4:18).

Chhan pawh awm miah lo va hmangaihtu che chu engtinnge i hlauh theih ang? Nangmah ai maha ngaihtuah zawktu che chu engtinnge i hlauh theih ang? Pathian chuan a hre fai vek che a. I samzai zawng zawng pawh a hre fai vek a ni! Anih chuan a hnena kumkhuaa chen chu engvangin nge i hlauh teh lul ang?

Pathian i hriat chuan i thih pawhin i in i chhuahsan a ni lo, i inah i haw tihna a ni a. Chatuana i awmna tura i haw tihna a ni zawk. Chu mi hunah chuan Lalber chuan a ding lama mite hnenah chuan, ‘Ka pa voh bikte u, lo kal ula khawvel siam ṭantirh ata in tana ram buatsaih chu chang rawh u," a ti a.(Matthaia 25:34).

Lalpa chu fakin awm rawh se, zalen taka i nun theih avangin! Suala awm lo vin i nung thei ta, engtiklai pawhin khawi hmun aṭang pawhin i be pawp thei a, thil dik i ti thei a, thihna hlauh a ngai tawh lo va, a chhan chu Isua neitu i nih vang a ni.

Ngaihtuah zui atan

* Chhandamna chuan thihna chungchanga i ngaihdan leh i thusawi engtin nge a tih danglam?

* Chatuana nunna chu chang turin engtinnge i inbuatsaih ang?

* Pathianin beiseina leh zalenna Isua kaltlanga min pek hi tu hnenah nge i hrilh ve ang?

*Thihna i hlauh a ngai tawh lo.*
Mi ṭhenkhat chuan thih an hlau va — nimahsela Isuan thih hlauhna ata zalenna a pe thei che a ni. Chu zalenna chu i chan duha, Pathian hnena kumkhuaa awm chu i duh chuan hetiang hian ṭawngṭai rawh:

“Lalpa, i hmaah engtikniah emaw chuan ka ding dawn tih ka hria a. Ka lo ngaihthah ṭhinn che a, keima ngaihdanin ka kal fo ṭhin a. Nimahsela chu ngaihdan chu thlak ka duh tawh a ni.

“Ka sualna i tlan avang leh i khawngaihna avangin lawmthu ka hrilh a che. Nang ka ring che a, min ngaihdamna thu te, i hruaina kan chan tur te, vanrama min hruai i tumna i thutiam te ka ring a ni. Isua hmingin ka dil a che. Amen.”

A chunga mi anga Isua pawm tura i ṭawngṭai thei a nih chuan Rick@PastorRick.com ah hian min email ang che. Isua nena zinkawng i zawh theihna turin lehkhabu pawimawh tak tak ka pe ang che.

*[Lettu: Sangpuia]*

Sunday, January 18, 2026

ENGNGE I HMANGAIH BER HRIAT DAN

_Koh I Nihna Nunpui Rawh_

- Rick Warren 
- January 18, 2026
_"Chhiahhlawh tumahin hotu pahnih rawng an bawl kawp thei lo; pakhat huain pakhat a duh ang, a nih loh leh, pakhat ṭanin pakhat a hmusit ang. Pathian leh sum rawng in bawl kawp thei lo ve," a ti a."_ (Luka 16:13)

Engnge i hmangaih ber i hre duh em? I sum leh hun i hman ral dan khan han en teh.

Isuan i sumin i ngaih pawimawhzawng a lantir dan a sawi. Heti hian a sawi, "Chhiahhlawh tumahin hotu pahnih rawng an bawl kawp thei lo; pakhat huain pakhat a duh ang, a nih loh leh, pakhat ṭanin pakhat a hmusit ang. Pathian leh sum rawng in bawl kawp thei lo ve," a ti a."_ (Luka 16:13)

"Thei lo" tih thu hian thlarau lamah thutak ril tak a nei. Pathian leh sum rawngbawl kawp chu a harsa a, rilru hahna tur hlir a ni a ti miah lo. Pathian leh sum tan in nung kawp "thei lo" a ti tlat. A theih loh tihna a ni mai.

Pathian rawngbawl a sum tam tak siam tum chu hringnuna i tum ber a ni thei lo. Pakhatin pakhat a khen tlak a ngai. Hotu pahnih i nei thei lo.

I nunah i hmangaih ber i thlan a ngai. "Isua ka hmangaih ber a ni" i ti a ni thei e. Mahse i thusawi khan awmzia a nei thui tak tak lo; i thiltih kha a pawimawh zawk.

Engnge i hmangaih ber tih hriat i duh chuan thil pahnih en rawh: i calendar leh i sum chet vel dan (bank statement). I hun hman dan leh i sum hmanna khan i ngaih pawimawh thil a entir.

Tunlai khawvel nunphung tam takah chuan sum tan hian pathian nih a har miah lo - i nunah hmun pawimawh ber a luah tlat. Mahse chu chu Pathian duh dan a ni miah lo.

Hei hi Pathianin a duh chu a ni: midangte hmangaiha amah pawh i hmangaih a duh - midangte hmangaih nan sum hmang ṭangkai turin a duh che.

A letling chiaha i chet erawh chuan buaina i tawk a ni mai. Sum i hmangaih hmasak chuan midangte i hmang thung dawn - i mihringpuite kha chutiang atana siam chu an ni lo. Chutiang ni lovin, i sum kha midangte i hmangaihna lantir man leh Pathian i hmangaihna lantir nan hmang zawk rawh.

Engtin nge chutiang tur chuan i tih ang? I sum kha thil ṭha tih nan, chanchin ṭha hrilh nan leh mamawh neiten puih nan hmang rawh.

Hei hi hre reng la: sum tana i nun chuan, a bawihah i tang ang. Mahse sum i pek chhuah chuan i rawng a bawl thung ang.

Ngaihtuah zui atan.

I hun hman danin engnge i ngaih pawimawh ni a ber tih a entir?

I sum hman dan khan eng thil nge i dah pawimawh tih a lantir le?

Engtinnge i ngaih pawimawhzawng te thlak i mamawh? 

[Lettu: Mapuia Fanai]

Saturday, January 17, 2026

PATHIANIN MIDANGTE TANA MALSAWMNA NI TURIN A KO CHE

_Koh I Nihna Nunpui Rawh_

- Rick Warren 
- January 17, 2026
_"Mal ka sawm ang chia . . . nang malsawmna ni ang che."_ (Genesis 12:2)

Kristian tam tak chuan an hun, thiam thil, thilpek te leh an neih thil hmangtea midangte tana malsawmna nih an duh. Mahse duhthusam mai a ni lo. Malsawmna i dawn avangin Pathianin midangte tana malsawmna ni ve turin thu a pe che a ni. 

Midangte tana malsawmna nih dan tur i zawn mek lai khan, Pathian malsawmna dan kawng palite hi hre reng rawh:

*1. Malsawmna i dawnte kha midangte hnenah a luang lut ve tur a ni.*
I rilru a hlim a nuam taka i khawsak theihna tur chauha malsawmna dawng i ni lo tih hi Bible zirtir dan a ni. Midangte tana malsawmna i nih theihna tura malsawmna dawng i ni. Genesis 12:2-ah Pathianin Abrahama hnenah heti hian a ti, _"Mal ka sawm ang chia . . . nang malsawmna ni ang che."_ Hei hi malsawmna kawnga dan hmasa ber a ni: pawn lama luan chhuah hi.

*2. Midangte mal i sawm khan Pathianin i mamawhte a ngaihtuah.*
Midangte ṭanpui duh tak takte tan Pathianin engmah tih hreh a nei lo. Midangte tana malsawmna nih i tum tak tak anih chuan i mamawhte a ngaihtuah em em zawk ang.

Luka 18:29-30 ah chuan Isuan heti hian a ti, _"Tih tak meuhvin ka hrilh a che u, tupawh Pathian ram avanga in emaw, nupui emaw, unaute emaw, nu leh pa emaw, fate emaw kalsan tawh phawt chu, tun dam chhung la la hian a aia tam zawk hmu lo tur tumah an awm lo, hun lo la thleng tura chatuana nunna nen."_

Midangte ṭanpui i ngai pawimawh anih chuan Pathianin i harsatnaah a ṭanpui ang che. Chu chu malsawmna dik tak chu a ni - a chhan chu nang aiin harsatna chinfel a thiam zawk tlat.

*3. Midangte tana malsawmna i nih kha i hnenah a rawn kir leh ang.*
Midangte tana malsawmna i nih a midangte i puih nasat poh leh Pathian malsawmna i dawng nasa ang. The Message chuan heti hian a letling, _"Midangte tan i nun i hlan chuan i nunna i dawng let let leh ang, mahse dawn let leh ngawt ni lovin- malsawmna leh thil dang tam tak nen."_ (Luka 6:38)

Pekah Pathian i hneh thei lovang. Midangte tana malsawmna nih tuma i beih khan, "Malsawmna ka vur dawn che a. Tunge chak zawk i thlir ang hmiang. Tunge pe tam thei zawk inen ila. Midangte tan i luan chhuah tam poh leh malsawmnain ka vur let nasa ang che" tiin Pathiain a sawi tluk a ni.

*4. Pathianin malsawmna a vur tam nasat poh che leh midangte ṭanpui turin a beisei nasa che.*
Isuan heti hian Luka 12:48-ah a sawi, _"Tupawh tam tak an peka hnenah chuan tam tak an phut ang; tupawh tam tak an kawltira hnenah chuan tam deuh an phut ang."_

Pathian malsawmna hi midangte pekte hlau reng reng suh. Pathian thilpek che kha midangte tana i thil phal zual poh leh Pathian malsawmna i dawng let nasa tih i hmu thei ang.

Ngaihtuah zui atan.

Pathianin malsawmna a pek che ṭhenkhat kha han ngaihtuah teh. Eng ber nge midangte hnena i pek chhawn ve?

Pathian malsawmna i dawn tam dan aṭang khan engzat nge midangte pe ve tura a beisei ni a i rin?

Vawiin hian midangte tana malsawmna ni turin engnge i tih ang?

*Pathian hmangaihna chang tur emaw vanrama lut tur emawin i thawh chhuah a ngai lo.*
Bible chuan heti hian a ti, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

Pathian hnena inpe tura i inpeih chuan heti hian ṭawngṭai rawh le:

"Lalpa, misual ka ni tih ka hria a, i ngaihdamna ka rawn dil e. Isua Krista hi i Fapa a ni tih ka ring a. Ka sual avangin a rawn thi a, nangin i kai tho leh a ni tih ka ring. Isu, min Chhandamtu atana pawm che a vawiin aṭang hian i hnung zuitu nih ka duh e. Min hruai la, i duhzawnga nung turin min pui ang che. Isua hmingin, Amen." 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

Friday, January 16, 2026

PATHIAN THILPEK HMAN DAN

_Koh I Nihna Nunpui Rawh_

By Rick Warren
— January 16, 2026
“Pathian khawngaihna thilpêk tam tak enkawltu ṭhate angin Thlarau lam thilpêk in dawn apiang chu rawng inbâwlsak tawn nân hmang rawh u.” [1 Peter 4:10]

Pathianin a siam chhan che chu i hria em? I kawng zawh zel tur chu i hria em? I kalkawng hriat fiah dan tur pawimawh tak pakhat chu Pathian thilpek dawn lo hriat chian chu a ni. 

Chutiang thilpek chu hringnuna i thil buan zinga mi a ni a. I thunun theih piah lama awmte chu an awm a, i nu leh pa te, i pianna hmun emaw, i lo pian chhuahna khawvel leh chhungkuate chu i duhthlanna an ni lo. Chubakah chuan i PIANZIA [SHAPE] chu a la awm – thlarau thilpek i dawn, thinlung, theihna, miziaa leh thil tawnte chu. Chung thilte chu nihna danglam bik petu che chu an ni. 

Heng thumal hrang hrangte hi an nihna sang ber thlenga nun chhuahpui tur i ni. Mahse Pathianin theihna [thilpek] a pek che ni lo thil erawh i um zui a ngai lo vang. Chumi awmzia chu, lemziak thiam i nih loh chuan, lemziak thiam Rembrandt-a te anga ziak tura beisei i ni lo. Mechanic thiamna pek i nih loh chuan, Pathian chuan i ṭhenawma pa upa tawh lirthei oil thlak turin a ko lo vang che. 

Mahse Pathian chuan i theihna [thilpek] dawn ang ang chu midang ṭhatna atana hmang turin a duh ang che: “Pathian khawngaihna thilpêk tam tak enkawltu ṭhate angin Thlarau lam thilpêk in dawn apiang chu rawng inbâwlsak tawn nân hmang rawh u.” [1 Peter 4:10]

Vanram i thlen hun chuan Pathian chuan tute nen mah a khaikhin lo vang che, mahse nangmah leh nangmah kha a la khaikhin ang che. Theihna [thilpek] i dawn chu engtiangin nge i hman? Pathian chu tun dinhmun aiin ring zual sawt la, engtiangin nge i chet chhuah ang? Rom 14: 12 chuan, “Tichuan, kan za-in Pathian hmaah mahni chanchin kan sawi ṭheuh dâwn a ni,” tiin a sawi.

Thuthlung Hluiah chuan Estheri chanchin kan hmu a, Hebrai hmeichhe pakhat lalnu ni a, a mite chhanchhuaktu chanchin kan hmu. Pathianin thil pathum a pek hmangin a tih tur a hlen chhuak a nih kha. A fing a, a taksa a mawiin a hmelṭha a, midang biangbiak a thiam bawk. Chung nihnate avang chuan, “Estheri chu a hmu apiangte duh zâwng mi nih a kai a. Lal chuan hmeichhe dang zawng zawng aiin a hmangaih a, nula dang zawng zawng aiin khawngaihna leh duhsakna a hlawh a; tichuan, lallukhum a khumtîr a, Vasti aiah lalnuah a siam ta a,” tih kan hmu [Esther 2: 15, 17].

Pathian chuan Estheri khan chhan bik eng emaw atan thilpek [gift] a pe a. Chutiang chiah chuan Pathian chuan chhan neiin thilpek a pe che. Estheri ang chiah khan chutiang thilpek chu rinawm taka enkawl turin a duh che – mahni hlawkna atana hmang tur ni lovin midang tana hmang tura beisei i ni e. 

Pathian chuan Estheri hnena thilpek a pek chu Hebrai mite chu lalin a suat theihna lak aṭangin a chhanchhuak a. Engtin nge i thilpek dawn chu midangte malsawmna a thlentu a nih ve theih ang? 
Ngaihtuah zui atan. 

I nihna hre chiang tur chuan Pathian thilpek [gift] i dawn chu i hriat chian a ngai. Chutiang thilpekte chu ziak chhuak ang che – i chhungkua, i hnamzia, leh i SHAPE [thlarau thilpek, thinlung, theihna, miziaa leh thil tawn te chu]?  

I ziah chhuahte chu ennawn leh rawh. He zawhna hi inzawt ang che: “Heng ka thil ziah chhuah zingah hian midangte ṭhatna turin Pathianin engnge hmang chhuak nghal turin min duh?”

I thilpek dawn mila che tura beisei i ni a, midang thilpek dawnah i innghat lo. Engtin nge midangte nen inkhaikhin lovin awmze nei takin i nun theih ang? 

*[Lettu:* Peka]

Thursday, January 15, 2026

PATHIAN ANPUIA SIAM TIH AWMZIA

_Koh I Nihna Nunpui Rawh_

By Rick Warren
— January 15, 2026
“A hriat lâwkate chu ama Fapa ang taka awm tûrin a ruat lâwk si a; tichuan, Fapa chu unau tam tak zînga fa u ber a lo ni tawh ang.” [Rom 8:29]

A tirte aṭangin Pathian ruahmanna danah chuan a Fapa Isua ang turin a siam che. Pathian chuan chu chu leilung a din tirh khan a puang chhuak tawh, “Tin, Pathian chuan, “Keimahni ang, kan anpuiin mihring siam ila, tuifinriata sangha te, chunglêng sava te, ran te, ramsa te leh leia vâk chi zawng zawng chungah te thu nei teh se,” a ti a,” tiin [Genesis 1: 26]. 

Thil siam zawng zawng zingah mihringte chauh chu Pathian hlimthlaa siam chu an ni a. Hamṭhatna ropui tak a ni a – chu chuan zahawmna a keng tel bawk. 

Pathian ang thovin thlarau neia din i ni a. I thlarau chu boral thei lo leh chatuan daih tura siam a ni. 

Finna neia siam i ni a. I ngaihtuahna i hmang thei a, thil i chhutin buaina i neihte i chingfel thei. 

Mite nena inlaichinna nei tura siam i ni. Hmangaihna pe chhuakin i dawng thei bawk. 

Thil ṭha leh ṭha lo i hre thei. Dik leh dik lo i thliar thei a, chu chuan Pathian laka mawhphurhna a pe che. 

Mahse buaina pakhat a awm: Nangmaha Pathian anna hlimthla chu a kim ta lovin tihchhiat leh tihhmelhem a ni tawh sual avangin. Tichuan Pathian chuan Isua chu chu nihna chu pe let leh tur che chuan a rawn tir a – mihring piang tawh zawng zawng tan chuan a rawn tir a ni.  

Chu nihna pumpui leh Pathian anna nei tih awmzia chu engnge ni? Isua Krista anna nei chu a ni mai!

Chu chu Bible-a kan hmuh dan chuan, “A hriat lâwkate chu ama Fapa ang taka awm tûrin a ruat lâwk si a; tichuan, Fapa chu unau tam tak zînga fa u ber a lo ni tawh ang.” [Rom 8:29]

Bible chuan Isua chu Pathian ang chiah chiah a ni tiin a sawi a [II Korinth 4: 4], “hmuh theih loh Pathian tarlangtu [Kolossa 1: 15] tih leh “a nihna chiah chiah tarlangtu” [Hebrai 1: 3] ti pawhin a sawi. Isua chu Pathian a ni!

Tawngkam lar ang reng tak chu “pa siar, pa siar” tih chu pafa inang tak sawina atan hman a ni ṭhin. Ka fate chuan min ang riau a nih chuan min tilawm ang. Chutiang chuan Pathian chu a faten kan an chu a duh a ni. Bible chuan Pathian ang tura siam – dik leh thianghlim tura din kan nih thu a sawi a [Ephesi 4: 24].

Pathian hlimthla tarlangtu angin vawiin hian nung la, mite chuan vana i Pa chu engtiang takin nge i an tih ngaihtuah rawh se!

Ngaihtuah zui atan. 

• Eng tiang takin nge Krista anna kawngah chuan i lo kal ve tawh? 

• Krista chu miten engtiang kawngah nge i ang an tih ang? 

• Krista mizia chu i nunah chuan engtin nge i lo tihlansarh zel theih ang? 

*Krista chu amah hre lo chuan amah anna kawngah i ṭhang thei lo vang.* 

I zinkawng thar chu hetianga ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Wednesday, January 14, 2026

KRISTA ANNA AWMZIA

_Koh I Nihna Nunpui Rawh_

- Rick Warren
- January 14, 2026
_"In hmanlai awm dan kawnga mihring hlui, bumna chakna anga chhe deuh kha hlip thla ula, in rilru thlarauvah chuan a tharin lo awm ula, mihring thar, thutak felna leh thianghlimna Pathian anga siam khan inthuam bawk ula," Ephesi 4:22-24._

Sakhaw tam tak leh finna lam (philosophy) zirna chuan he dâwt thu - mihring hian pathian nihna a nei a, pathianah a chang thei tih hi an chawilar thin.

He chapona thil dik lo tak hi Setana thlemna hlui tak a ni. Setana chuan Adama leh Evi chu a thurawn pawma "Pathian ang" nihtir a tiam a ni (Genesis 3:15).

Pathian an chakna hi i dinhmun, i hmalam hun emaw i bul vela mite thunun i tum apiangin a lo lang thin. Mahse thil siam i ni a, thil Siamtu i ni ngai lovang. Pathian hian pathian ni turin a duh lo che a, Pathian ang a a hlut zawng, a thlir dan leh nungchang ang nei mi a duh a ni.

The Message chuan heti hian a sawi, "_"In hmanlai awm dan kawnga mihring hlui, bumna chakna anga chhe deuh kha hlip thla ula, in rilru thlarauvah chuan a tharin lo awm ula, mihring thar, thutak felna leh thianghlimna Pathian anga siam khan inthuam bawk ula," Ephesi 4:22-24._

Pathianin i nuna a thil tum hi nuam taka awmir che a ni lova. Thlarau lama ṭhang liana, Krista antir che a duh a ni.

Krista an tih hi i nina hloh emaw rilru nei lo, a tak ang tak tihna a ni lo. Pathianin danglam bik takin a siam che a, chu chu tihchhiat a duh lo. Krista anna chu i nungchang thlak danglam hi a ni, i nihna zia ni lovin.

I nungchang thlak danglam hi Pathian thil tum pakhat a ni tih i theihnghilh a nih chuan i dinhmun avanga thinrim mai a awl ang. "Eng vangin nge hei hi ka chungah a thlen. Eng vangin nge hun harsa ka tawh" tiin mak ti takin i inzawt ang. A chhan pakhat chu khawvel hi a chhiat tawh vang a ni. Pathian chuan nun hi awlsam tak a ni ang tih a tiam ngai lova - mahse harsatna chuan a ti ṭhanglian che a ni. Khawvel hi vanram a ni lo tih i hre reng dawn nia.

Johana 10:10 ah chuan Isua thutiam, "Kei zawng nun an neih nan tam taka an neih nan lo kal ka ni," a ti. Ringtu tam tak chuan he thutiam hi hrilhfiah sualin, nun tam tih hi hriselna famkim, nunphung nuam tak, hlimna daih rei, duhthusam a taka chantirna leh rinna leh ṭawngṭaina hmanga harsatna laka chawplehchilha chhâwk zangkhaina niin an ngai.

Kristian nun hi awlsam takah an ngai a. Vanram chu i duh duh i koh chhuah theih genie emaw, i chhiahhlawh emaw a ni lo. Nun hi awlsam tak ni tura ngaihdan i nei a nih chuan rinna i phatsan nasain thil nihna tak i pawm lo tihna a ni ang.

Thudik tak chu nun hi nangma chungchang thil a ni lo! Pathian avangin i lo awm a, thil dang vang a ni lo. I tan thil tak tak chatuan atan a buatsaihsak che a, eng vangin nge Pathianin vanram chu leiah a pek ngawt ang che?

Pathianin i nungchang tiṭhanglian a tichak turin khawvelah hun a pe che a - chuvangin chatuana vanrama i awm theih nan inpeih rawh le.

Ngaihtuah zui atan

Eng hunahte nge i dinhmun, i hmalam hun leh i bul vela mite thunun i tum ṭhin?

Pathian chuan i nawmsakna aiin i nungchang siam puitlin kha a tuipui zawk. Chu chuan harsatna i tawhin eng angin nge a thlirtir che?

Nun hi a awlsam lo hle chungin eng kawngin nge Pathianin nun tam nei tura a pek dan che i hmuh dan?

[ *Lettu: Marova Punte* ]

Tuesday, January 13, 2026

KHUALZIN HUN CHHUNG REI ZAWNG

_Koh I Nihna Nunpui Rawh_

- Rick Warren
- Jan 13, 2026
“Krista famkimna chu changin mi famkim kan la ni ve theuh dawn a ni.” Ephesi 4:13 (GNT)

Zuitu nihna chu Krista anna kawng hi a ni a. Damchhung zui zel hi a ni. 

Hetiang hi a thawhdan chu a ni: Nitinin Pathianin amah ang turin a duh a che. Bible chuan, “Mihring thar chuan in inthuam tawh si a, chu mihring thar chu hriat famkimna nei turin, a siamtu anpui anga siam tharin a awm mek a ni.” Kolossa 3:10

Tunlaiin mi kan hmanhmawh tawh em em a. Nimahsela Pathian chuan chakna leh nghehna hi a ngai pawimawh zawk a ni. Nang chuan rang taka thil chinfel leh tih zung zung i duh maithei a ni. Sermon emaw seminar emaw vawi leh khata i harsatna sutkianna, thlemna lak ata chhuahna leh natna inchhawk tirna i zawng maithei a ni. 

Nimahsela puitlinna tak tak chu, chak takin kal mah la, vawi lehkhatah a neih mai theih loh. Thanlenna hi chu a muang a ni. Pathian Thu ah chuan, “Keini chu kan zain hmai khuh lovin darthlalang anga Lalpa chhun enin, ropuina atanga ropui zelin, chu mi anpui ngeia awm turin tihdanglamin ka awm thin, Lalpa (Thlarau) ata chu ka hmuh ang zelin” 2 Korinth 3:18

Mi tam zawk chu an chaklohna atangtein an nihna a lo insiam thin. I inthlak danglam theih loh thu hetiang hian i sawi tawh hial maithei a ni, “Heti tawp hi ka ni mai.”

Thil hlauh i neih pakhat chu i chin tha lo te, i rilru na te i thlah liam a nih chuan, tu nge i nih tih i inhre lo vang tih hlauhna hi a ni. Hlauhna hian i thanna tur a ti muangin emaw a ti khaihlak emaw thei che  a ni.

Anih chuan Krista anna a i than theih nan chung chin thalo te chu engtin nge i thlah theih ang? Amahah chuan engtin nge i inthuam theih ang? Thil hlui paihin Krista ang zelin i thang lian thei ang. 

I nungchang chu i chin dawklak hoin a siam te anni - chin dawklak nei tur pawhin hun engemaw fe chu a duh a ni. I nunphungah i zaidam loh chuan mi zaidam ka ni i inti thei lo vang. I rinawm fo loh chuan mi rinawm ka ni i inti thei lo vang. Pasal a nupui chunga rinawm chauh chu mi chunga rinawm a ni thei chuang lo. Chuvang chuan i nunphung chuan i nungchang a tarlang a ni.

Krista nun chu i neih theih nan kawng khat chiah i tih ngai a awm: I nunphungah a beh hma chu nitina a taka i zawm a ngai tihna a ni. Chu chuan hun engemaw chen chu  a duh a ni.  

Chutianga i tih chuan, i kianga khawsa ten nangmaha danglamna awm an hmu thuai ang. Paula chuan Timothea hnenah, “Mi zawng zawng hnena i sawtna a len theih nan chung thilah te chuan taima la, chungah chuan inhmang zo rawh.” 1 Timothea 4:15

Ngaihtuah zui atan

* Nunphung tha lo i chhawm mek a awm em? Vawiinah hian Krista nunin engtinnge i thlak danglam theih ang?

* Miin eng ang nungchang neiin nge hmu che se la i duh?

* Krista anna kawngah i thanlen theihnan tu-in nge pui thei ang che?

*[Lettu: Sangpuia]*

Monday, January 12, 2026

ISUA THU I AWIH CHUAN AMAH I ANG ZEL ANG

 _Koh I Nihna Nunpui Rawh_


- Rick Warren

- Jan 12, 2026



“Ka thu-a in awm reng chuan ka zirtîrte in ni tak tak ang; thutak in hria ang a, thutak chuan a zalêntîr ang che u.” Johana 8:31-32


Isua zirtir nih i duh chuan, Isua sawi angin i awm fo a ngai.


Isuan, “Ka thu-a in awm reng chuan ka zirtîrte in ni tak tak ang; thutak in hria ang a, thutak chuan a zalêntîr ang che u.” Johana 8:31-32


He chang atang hian, Isuan thlarau lama thanlen dantur leh Zirtirn nihna min kawhhmuh a ni.


Pakhatna, zirtir nihna chu chhunzawm reng ngai thil  a ni. Thu i awih zel a ngai. I damchhung chu thlarauva i than chhunzawm zel a ngai a ni. Thusawi i ngaihthlak vang emaw i zir emaw avang khan vawilehkhatah i puitling thut thei lo. Zawi muanga insiam, damchhung daih tur a ni.


Pahnihna, thlarau lama thanlen dan pakhat chu thuawih hi a ni. Isuan, “Ka thu-a in awm reng chuan ka zirtir in ni tak tak ang,” a ti. Thlarau lam thalenna chu engzat nge i hriat tih lam a ni lo. Engzat nge i awih a, engzat nge i nunpui tih lam a ni zawk.


Mi tam tak chuan Bible Thu an hre em em a, nimahsela an nunpui chuang lo a ni. Bible Thu hria thenkhat hi chu khirh deuh deuh, mi nun teh ching an ni duh khawp mai. Bible chuan, “Hriatna zawngin mi a uantir thin a, hmangaihna erawh chuan mi a siam tha thin,” a ti. 1 Korinth 8:1. Hmangaihna tel lo hriatna chuan pawisak a nei thin lo.


Bible Thu thenkhat i hriat i awih leh nitina i nunpui hi thutak chu a ni.


Pathumna, thlarau lam thanlenna chu Pathian Thu angin a ni tur a ni. Isuan a zirtirte chu a thusawite awih turin a ti a - a chhan chu Pathian Thutak chuan i thlarau nun a chawm vang a ni.


Palina, thlarau thanlenna chuan a ti zalen ang che. Isuan a sawi tlat a lawm, “thutak chuan a zalêntîr ang che.”  


Thlarau lama i than nasat poh leh, i zalen tulh tulh ang. Mi in an beiseina atang te, i nunhlui atang te, i sualna, khakna, chin tha lo, zahna leh i ritphurh atangte in i zalen dawn a ni. 


Mi hlim taka nung thinte hi thlarauva an thanlen vang a ni - a chhan chu thutakin a ti zalen che a ni.


Nimahsela zankhat thil thuah a lo thleng lo. Pathian thu i awih poh leh Isua i ang zel dawn a ni. Chuvangin, “Keini chu kan zain hmai khuh lovin darthlalang anga Lalpa chhun enin, ropuina atanga ropui zelin, chu mi anpui ngeia awm turin tihdanglamin ka awm thin, Lalpa (Thlarau) ata chu ka hmuh ang zelin” 2 Korinth 3:18


Ngaihtuah zui atan


* Bible thu i hriat nimahsela i zawm si loh engnge awm?


* Isua i zui tantirh atanga amah i an ve na kawng khat engnge ni?


* Nangma nun ngei ah thutakin engtin nge a tih zalen che?


*[Lettu: Sangpuia]*

Sunday, January 11, 2026

ZIRTIR CHU ISUA BULAH A KHAWSA ṬHIN

 _Koh I Nihna Nunpui Rawh_


- Rick Warren 

- January 11, 2026



_"Tupawh ka rawngbawl duh chuan min zui tur a ni, a chhan chu ka chhiahhlawh chu ka awmnaah a awm zel tur a ni. Tupawh ka rawngbawl chu Pain a la chawimawi ang."_ (Johana 12:26, NLT)


Isuan amah "zuitu" nihna chungchang a sawi uar hle. Ringtu i nih chuan zuitu nihna hi i hre tam viau bawk ang.


Mahse Isuan "zuitu" a tih hian engnge a sawi tum ber le? Isua zuitu ni tur chuan amah nena hun in hman a ngai.


Inlaichinna reng rengah hun in inpek tam poh leh inzawmna a nghet zual ang. Isua nen in inlaichinnaah pawh chutiang chiah chu a ni. A chang chauha Isua zuitu a nih theih loh; hum puma zuitu nih a ngai.


Isuan heti hian a ti, _"Tupawh ka rawngbawl duh chuan min zui tur a ni, a chhan chu ka chhiahhlawh chu ka awmnaah a awm zel tur a ni. Tupawh ka rawngbawl chu Pain a la chawimawi ang."_ (Johana 12:26, NLT)


He chang hian thlarau nuna ṭhan lenna chungchangah thil pathum min zirtir.


A hmasa berah chuan, thlarau nuna ṭhan lenna hi duhthlanna a ni. Heti hian a chang a inṭan, "Tupawh ka rawngbawl duh chuan . . ." Pathianin ṭhang lian turin a tilui lo ang che, engmah ti lovin i lo ṭhang lian ngawt bawk lo. A rawngbawl i duh a i thlan a ngai - a zuitu ni turin.


Pathian i hlat viau ni a i hriat khan amah a tawlh hlat vang a ni lo. A awm reng a, amah hnaih turin a sawm reng che. Amah i hnaih emaw i hlat emaw turin duhthlan theihna i nei.


A pahnihnaah chuan, thlarau nuna ṭhan lenna hi inpekna a ni. Isuan a zirtirte kha "min zui tur a ni" a ti. Ṭhang lian tura thutlukna i siam khan inpekna nen i "zui ngei ngei" tur a ni.


Inpekna avangin i ṭhang lian. Nupui-pasala inneihna hi ṭhang lian zel tura inpekna a ni. Chutiang chiah chuan fa neih te, hna thar zawm te leh zirna kawnga kalte hi inpekna ngai vek thil a ni. I inpek apiangin i ṭhang ṭhin. Chu chuan Isua zui tura i inpekna kha a huam a ni.


Pathumnaah chuan, thlarau nuna ṭhan lenna hi inlaichinna a ni. Isuan heti hian a ti, "Ka chhiahhlawh chu ka awmnaah a awm tur a ni." Dan chungchang a ni lo. Sakhaw thila serh leh sang a ni lo. Tihdan kal hmang lam a ni lo. Beiseina thil lam a ni lo. Isua nena awmdun chungchang a ni.


Tunah hian Isua hi hmuh theihin leihah a awm lo tih chu kan hria. Anih chuan engtinnge amah nen kan awmdun theih ang? Kawng khat chu amah nena kan inbiak reng hi a ni. Mi hnathawk lai i biak lai te, in i tihfai lai te, lirthei i khalh lai te a tawi te a i ṭawngṭai te kha a ni. Hetia i tih fo chuan Pathian aw i hria ang, i rilru thutaka tikhatin i thinlungah ngaihdan a pe ang che.  


Isua zuitu anga ṭhang lian turin i inpeih em? Isua nen hun hmangin bul ṭan rawh.


Ngaihtuah zui atan.


Zuitu tih hian engnge i rilruah lo lang hmasa ber? Chu chu vawiin kan zirlai hian engtinnge a tihdanglam?


Engtikin nge inpekna thar neia i ṭhan len?


Tunkar thar turah hian Isua nena hun tam zawk hmang turin eng thil pakhat nge i tihdanglam ang? 


[Lettu: Mapuia Fanai]

Saturday, January 10, 2026

ENGVANGIN NGE KOHHRAN CHHUNGKUA I MAMAWH?

_Koh I Nihna Nunpui Rawh_

- Rick Warren 
- January 10, 2026
_"'In inhmangaih chuan mi zawng zawngin ka zirtirte in ni tih chu miah chuan an hria ang,' a ti a."_ (Johana 13:35)

Bible chuan kristian, kohhrana tel ngai lo chu taksa peng, taksaa bet lo ang emaw, beram rual zinga tel lo beram tla hrang emaw, naupang chhungte zinga khawsa lo ang emaw a ni tiin a sawi. Thil nih dan ang tura awm lo a ni. The Living Bible chuan heti hian a letling, _"Kristian zawng zawngte nen Pathian chhungkuaah in tel a ni"_ (Ephesi 2:19)

Tunlai khawvelah mahnia che tla kan tam tak avang hian thlarau lama fahrah tam tak an awm - "ringtu ṭhan ṭhu"kohhran/biak in hrang hranga zuang lawr, nihna mumal, mawhphurhna leh inpekna mumal pawh nei lo. Mi ṭhenkhat phei chuan kohhrana tel miah lo (emaw inkhawm ngai miah lo emaw) pawhin thlarau lamah a ṭhan leh theih tih ngaihdan an nei hial tawh. Mahse Pathian pawmzawng a ni hauh lo.

Kohhran hi a pawimawh em avangin Isuan krawsah a thih phah hial: _"Kristan kohhranho a hmangaih a, an aia mahni a inpe ang khan."_ (Ephesi 5:25)

Chuvang chian Isua zuitu i nih chuan ringtu inpawlho zinga i tel a pawimawh. Kohhran chhungkua zinga tel ve hi ringtu tak nihna lantirna a ni. Isuan heti hian a sawi,  _"'In inhmangaih chuan mi zawng zawngin ka zirtirte in ni tih chu miah chuan an hria ang,' a ti a."_ (Johana 13:35)

Kohhran tana i inpekna kha Isua zuitu i ni tih hmuh theiha i lantirna a ni a, ringtu i nihna zawna tichaktu che pawh a ni. Kohhran chhunhkua in inhmuh khawm khan midangte hnen aṭangin phurna leh fuihna i dawng ṭhin a, chutiang.chiah chuan midangte tiphurtu leh fuihtu i ni bawk.

Chawlhkar nuam tak hmangin kohhrante zinga inkhawm pawh ngai ta lo hialin i inngai a ni mai thei. Mahse i inkhawm loh chuan i fuihna dawngtu tur khan a dawng thei dawn ta lo a. Beidawnna hmawr tawpah an din lai mek a lo nih phei chuan i nui hmel emaw i awka dam tak emaw khan an nunah danglamna a thlen thei asin. Chu chu kohhrana tel awmzia chu a ni.

Hei hi thudik chu a ni: Ringtute hi ṭhang lian tura inmamawhtawn kan ni. Mi tam tak chuan thlarau nun ṭhan lenna hi mimal nuna innghat emaw an ti, mahse Pathian chuan ringtute chu an rinna midangte nena nunpui turin min ti. Mahni chauha khawsakna hmunah rinna thuk tak neih a har.

Dinhmun hrang hrang, hnam hrang hrang leh khawltlanga nihna hrang hrang aṭanga inhmangaih taka kohhrana mi an lokal khawmin khawvel hmuha thuhriatpuitu lian tak an lo ni. Galatia 3:28-a kan hmuh angin, _"Isua Kristaah chuan thuhmun vek in ni."_ (GW).

Ngaihtuah zui atan.

Engvangin nge kohhrana tel a pawimawh?

A hun kal tawha a natna emaw a lungawi lohna emaw avanga ringtu biak in thleng ngai lote hi engtin nge i tih ang?

Tunkar chhung hian engtinnge i thinlung kohhrana tel tura i siam ang? 

[Lettu: Mapuia Fanai]

Friday, January 9, 2026

PATHIANIN AMA TAN A SIAM CHE

_Koh I Nihna Nunpui Rawh_

By Rick Warren
— January 09, 2026
“Tin, Marin,
“Ka nunin Lalpa a chawimawi e, 
Ka thlarau pawh
mi chhandamtu Pathian
chungah a lâwm ta êm êm a.’” [Luka 1:46-47]

Ruahmanna an siam changin ringtu tam tak chu Pathian awm ring lo [atheist] ang main an che fo. Isuan anmahni a chhandam tih chu an hria a, mahse an hmalam hun atan Pathian chu an ring tak tak lo. An hmalam hun tur chu an duh dan ang anga ti mai theiah an inngai tlat zel. Mahse dik tak chuan, Pathian chuan mitinte chu danglam takin a siam ṭheuh a, ruahmanna mumal tak leh kalkawng bik a ruahmansak ṭheuh zawk a ni. 

Kum sanghnih vel liam taah khan Pathian chuan nula tuaitir pakhat Mari tan ruahmanna a nei a. A Fapa nu ni turin a siamin a thlang a ni. 

Pathian ruahmanna hrilh a nih chuan Mari khan engtin nge a lo dawnsawn? “Ka nun atan tih tur kan lo insiam ve vek tawh a. Ka buai lutuk. Ka tana ṭha ber tur chauh ka ti ve dawn,” a lo ti miah lo. Aih, Pathian chuan a tir tur ruahmanna a nei tih a hre thiam a, ti tura a tih ang ang chu tih a tum ta a nih kha. 

A lo chhanna chu fakna hlain a ni: “Ka nunin Lalpa a chawimawi e, Ka thlarau pawh mi chhandamtu Pathian chungah a lâwm ta êm êm a,’” tiin [Luka 1: 46-47]. Mari chuan Pathian chu a Lal leh Chhandamtu a ni tih a hre thiam a, a duh zawng tih kha a chak em em zawk a ni. A nun pumpuiin amah chu a ring a, angel-in an thu hrilh chu midang hnenah sawi ta se tuman an awih dawn lo a ni tih pawh a hre ve tho.  

Pathian chuan i kawng zawh tur mumal takin a buatsaih tih i ring em? Bible chuan, “Lalpa chu Pathian a ni tih hre rawh u; Min siamtu chu amah chu a ni a, ama ta kan ni; A mite leh a ran tlatna hmuna berâmhote chu kan ni,” tiin a sawi [Sam 100: 3]. 

Mi tam tak chuan an tana Pathian thil ruahman chu inches 18 lekin an ṭhelh ang – chu chu an lu leh thinlung inkar a ni. Chanchin ṭha chu mihring finna hmangin an pawm a, mahse an thinlung thlak erawh an phal lo thung. 

Thu dik chu hei hi a ni, nangma tana siam i ni lo. Pathian siam i ni a, Pathian tana siam i ni bawk. 

Leilung hipna leh chet vel dan chu i hre mai thei. Buaina chungchang hrilhfiahna pawh i hre thei. Vansang lawnna rocket pawh i siam thei mai thei. Mahse Pathian i hriat loh chuan mihring dam chhan leh awmzia i ṭhelh tihna a ni ang. 

I nun a tawp hun chuan i hnaah engtiang taka thil ropui nge i tih Pathian chuan a ngai thu tak viau lo vang a, i bank-a pawisa awmzatte pawh a ngai pawimawh hek lo vang. He zawhna hi a zawt zawk ang che: “Min lo hre tawh ṭhin em? Ka Fapa nen inlaichinna in lo nei tawh em, i tana kraws-a thi nen khan inlaichinna in lo nei tawh em” a la ti ang. 

Mihring nuna thil pawimawh ber chu Pathian hriat a ni a – a chanchin hriat a ni mai lova, mimal taka inlaichinna neih chu a ni. Pathian chu i lo hre chiang deuh deuh nge – i thinlung chu i thlaktir em vawiin hian? 

Ngaihtuah zui atan. 

• Nangma tan eng ang ruahmanna nge i lo siam ve? Chu ruahmanna chuan engtiang chiahin nge Pathian i rinna leh a duhzawng a tarlan? 

• I hmalam hun atan Pathian chu i ring takzet a nih chuan, i ṭawngṭaina nun chu engtianga thlak danglam nge a nih ang? Mite nena in inlaichinnaah chuan eng nge thlak danglam ngai? Khawvel kalphung chu engtiangin nge i lo thlir ve? 

• Pathian fakna hla – a duh dana awm i duh ve zia leh i dam chhan tih hlawhtlin i duhna thu chu han ziak chhuak ve teh.

[ *Lettu:* Peka]

Thursday, January 8, 2026

KRISTA KALTLANGA ZALENNA HMUH DAN

_Koh I Nihna Nunpui Rawh_

By Rick Warren
January 08, 2026

“Chutichuan, Fapain a zalêntîr che u chuan in zalên tak tak tawh ang.” [John 8:36]
Khawvel chuan zalenna chu phuartu awm lo angin an sawifiah ber a. “Ka duh duh ka ti thei a, ka duh duh ka sawi thei a, tu mahin ka awm dan tur min sawi sak thei lo,” tihna rilru a ni ber. 

Chutiang rilru nena i duh dana i khawsak lai chuan tute emaw chuan an lo nat phah ang. Chu chu khawvelin zalenna an hrilhfiah dan chu a ni – chu chu zalenna mahni hmasial tak a ni. 

Mahse Bible chuan zalenna dik tak chu Isua kaltlang chauhin a neih theih tiin a sawi thung: “Chutichuan, Fapain a zalêntîr che u chuan in zalên tak tak tawh ang,” tiin [John 8:36]. 

Pathianin Isua chu thinurna, thikna, duhamna, mipat hmeichhiat bawlhhlawhna, inlaichinna chhia, inhuatna leh mahni hmasialna phurrit lak aṭanga chhanchhuak tur chein a lo tir a ni. 

Chutiang zalenna dik tak nen chuan hlauhna, mahni inthiamlohna, lungkham, khakna leh thihna lak aṭang chuan a chhuah zalen che. Lem chan a ngai tawh lo, a chhan chu i nihna ang anga nung tur khan i zalen tawh. 

Engtin nge hlauhna chu kalsanin Isuaa zalenna dik tak chu i hmuh theih ang? Pathian hmangaihna nen chuan! Tirhkoh Paula chuan heti hian min zirtir: “Hmangaihnaah hian hlauhna rêng a awm lo va, hmangaihna famkim chuan hlauhna zawng zawng a hnawt bo zâwk ṭhîn,” tiin [I Johana 4: 18]. 

Pathian chuan engtiang takin nge a hmangaih che tih i hriat hun chuan chu hmangaihnaah chuan awm leh chawlh hahdam i thiam deuh deuh ang. Pathian hmangaihnaa nun i thiam chuan i lo zalen ang a – a thlirna aṭangin thil i thlir thiam ang a, nun awmzia chu i hmu thiam tawh ang. Zalenna chu ngen chhuah emaw hlawh chhuah emaw thil a ni ngai lo; Pathian thilthlawnpek a ni. 

Dik tak chuan, Pathian hmangaihna hnuaia nun hman chu amah chibai bukna a ni. Pathian chuan mite a hmangaih a, a ngaihsak a, a thilphal a ni tih i rin a, chu hmangaihnaah chuan i innghat a nih chuan amah chibai i buk tihna a ni. I Johana 4: 16 chuan hetiang hian a sawi, “Pathianin min hmangaihna chu keimahni ngeiin kan hria a, kan ring ta a ni,” tiin. 

Zalenna chu chutah chuan a inṭan – Pathianin a hmangaih che tih hriatnaah chuanna inṭan a, i nun pumpui chu chuan fin chhuak vek rawh se. 

Ngaihtuah zui atan. 

• Pathian hmangaihna pawn lamah zalenna chu i lo zawng ve tawh em? Eng nge a rah chhuah? 
• Engtik hunah nge Pathian hmangaihnaah chuan i lo nun ve tawh? Chu chuan i nun engtin nge a tihdanglam? 
• Pathian chu engtin nge i inhmangaihtir theih ang vawiin hian? 

*Kristaa zalenna chu chang turin i inpeih tawh em?* 

He ṭawngṭaina tawite hmang hian bul ṭan ang che: “Lalpa duh tak, mi sual ka ni tih ka hria a, i ngaihdamna ka dil a che. Isua Krista chu I fapa a ni tih ka ring a. Ka sualte avangin a thi tih ka ring a, i kaitho leh tih pawh ka hria. Ka chhandamtu atana pawm leh rin ka duh a, amah zui tur leh ka Lal atan vawiin aṭang hian kal ka duh e. Ka nun hi hruaiin zalen taka nun hmang turin min hruai ang che. Isua hmingin ka dil e. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...