Friday, May 31, 2024

I CHAKNA ZAWNG ZAWNGIN PATHIAN HMANGAIH RAWH


Thil Tidanglam Tura Hrual
By Rick Warren
— May 31, 2024
“In tih apiang chu mihring tân anga ti lovin, Lalpa tân anga ti zâwkin, châk takin ti rawh u; Lalpa Krista rawng in bâwl a nih hi.” [Kolossa 3:23]

Isua chuan thupek pawimawh ber chu, “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,” tiin a sawi.” [Marka 12: 30]

Kan lo zir tawh angin, Pathianin min beisei dan chuan chutiang thil hrang hrangah chuan puitling nih chu a ni. Kawng eng emaw berah chuan tha ngei a ni tih amah chuan a hria. Chumi awmzia chu Pathian chuan tawng tur [thinlung], midang hrethiam [thlarau], mifing [rilru] and titu [Chakna nei] turin a hrual che. 

Vawiin hian ka chakna zawng zawnga Pathian hmangaih dan kan zir dawn a ni. 

Thawktu [doers] hote chuan an chaknain Pathian an hmangaih thin. Mi thothang tha an ni a – thil hlenchhuaktu, thawk zo thintu an ni. A tak taka chet chhuahnaah hna thawk zotu leh a tak tak a che an ni fo. 

Thawktu [doers] an awm chhan chu khawvelin an hnathawh a mamawh a ni – Thawktute chuan hna an tlingtla mai thei zel. Ngaihdan an nei a, chakna, theihna an nei. A tak taka chetchhuahna kawng ah chuan Isua kut leh ke ber an ni fo. 

Mahse famkim lohna lai kan nei vek, thawktu [doers] tan chuan hna chuangtlai a ni. Thawktu [doers] tam berte chuan an thawk mawlh mawlh a. Chawlhdan emaw chawlhlailawk emaw chu an ngaihtuah thiam miah lo a ni. 

Sam 127: 2 ah chuan hetiang hian kan hmu, “Zîng takah in tho va, tlai takah in châwl a, Thawh rimna chaw in ei ṭhin hi, in tân a thlâwn mai a ni; Hetiang hian a mi duh tak chu a muthilhtîr ṭhîn a ni,” tiin. Hna thawktu [doer] i nih chuan  chu Bible chang chu i inbualna pindana a tarlang turin han zeldin teh. Pathian chuan a mite chu tha taka mu thin turin a duh.  

Kum rei lote liam taah khan ringtu i nih chuan, i hun kal tawh chu ngaihdam i ni tawh, dam chhan I nei ta a, vanramah in i nei a ni. Mahse Krista ke bula I lo kal hnu pawha thil la inthlak danglam mang hauh lo a awm. 

Ni tam vak lo liam taah khan, ringtu i lo ni a nih chuan, i hun liam tawha I tihsual avang chuan ngaihdam i ni a, dam chhan i nei a, vanramah chuan in i nei bawk. A tichak duh che.   

Kolossa 3: 23 chuan hetiang hian thurawn ropui tak min chah, “In tih apiang chu mihring tân anga ti lovin, Lalpa tân anga ti zâwkin, châk takin ti rawh u; Lalpa Krista rawng in bâwl a nih hi,” tiin. 

Pathian chuan thawk tura a duang che a nih chuan, he khawvelah hian a hna thawk zo turin a duh che tihna a ni. Mahse nangmaha thawk zo vek turin a duh lo thung che, i chakna ringawt chuan thawk turin a duh ngai lo che. 

A chang chuan thawh tlem a that zawk changte pawh a awm – Pathian tana tlem tihna a ni lo thung, kawng thenkhata sawr tet niin a pawimawh zawkah a tam zawka thawh theihna tur a ni ang. 

Ngaihtuah zui atan. 

Pathian chu engtiangin nge i chakna zawng zawng chuan i hmangaih le? 

Sam 127 chuan Pathian chuan chawlhna duhtu hnena pek chu nuam a tih thu kan hmu. Pathian chawlhna chu engtiangin nge i lo chan ve tawh? 

Thawktu [doer] ni tura Pathianin a hruai che a nih chuan khawi laiah nge tam zawka i thawh theihna turin i insawrzim ang? 

[*Lettu*: Peka]

Thursday, May 30, 2024

I HRIA A NIH CHUAN TI ANG CHE

Thil Tidanglam Tura Hrual

By Rick Warren
— May 30, 2024
 
“Thil tih awm si lova thu ngaihthlâk ngawt tâwka ngaiin mahni inbum hek suh u.” [Jakoba 1:22]
 
Nimin lamah khan Marka 12:30 “Lalpa i Pathian chu i thinlung zawng zawngin, i nunna zawng zawngin, i rilru zawng zawngin, i chakna zawng zawngin i hmangaih tûr a ni,” tih thu chu kan zirho tawh a nih kha. Kha thu kha kawng danga kan ngaihtuah dawn chuan - i thusawi zawng zawng, i phurna zawng zawng, i ngaihtuahna zawng zawng leh i thiltih zawng zawnga Pathian hmangaihna lantir chu a ni. Pathian chuan ṭawng thei, phurna nei, ngaihtuah thei leh thil titheiin a siam ngei che.
 
Thusawitu chuan an thinlungin Pathian an hmangaih thei a. Phurna nei mi chuan an thlarau chuan an hmangaih thei bawk. I finna hmang chuan Pathian chu i hmangaih thei niin i hria em? Mifing chuan an thluak hmangin Pathian an hmangaih thei. I rilru leh ngaihtuahna Pathian lam hawia i sawr khawm chuan chu chu Pathian chibai bukna a ni.
 
Mifingte chuan Bible zir (Bible study) chu nuam an ti ṭhin. Sam 119: 97 chuan hetiang hian a sawi, “Aw, I dân chu ka va ngaina êm, Ni tin ka ngaihtuah ṭhîn a ni,” tiin.
 
Mi fing chu ringtu an lo nih chiah chuan Bible zir [Bible study] an ngaina nghal mai zel a. Chutiang lehkhabu ang chu khawvelah a awm lo miau a ni! Hringnun chhanna a pai a: Hetah hian engah nge ka awm? Khawiah nge ka kal dawn? Hringnun bulpui hi engnge ni? Ka nun hian awmzia a nei em? Hun kal tawh chu engnge ni? Engnge kan hmabakah awm? Khawi aṭanga lo kal nge ka nih?
 
Khawvel hian mifing a mamawh a, a chhan chu thil eng pawh chik taka ngaihtuah turin an ṭangkai a ni. Thenkhat chuan thu har tak takte chu midang tana a awmzia hmu chhuak tura an ngaihtuah a ngai. Zawhna har tak ngaihtuah a, a chhanna min chhawpsaktu kan mamawh. Chuvang ngei chuan scientist, thuziaktu, mifing leh thil siamchhuaktu kan mamawh.
 
Mahse mifing chu tlawm taka nung tura a nun a uluk a ngai thung. Bible chuan hetiang hian a sawi, “Mahni fing inti hle suh la, Lalpa ṭih la, sual kalsan rawh,” tiin. [Thufingte 3:7]. Eng vangin? A chhan chu Pathian chu Pathian a nih vangin, nang erawh chu i ni lo.
 
Inngaihtlawmna chu mimal duhthlanaa innghat a ni. Bible chuan vawi khatmah tlawmna nun i neih theihna tura Pathian hnena dil turin a ti lo che. “Lalpa hmaah chuan tlawm rawh” a ti zawk che a ni. Duhthlanna a ni. Tlawmna nun chu nangma mimal nuna thil thleng chu a ni. Midang thumahin an thawhsak thei lo che. An tlawmtir thei che a, mahse inngaihtlawmna erawh an neihtir thei lo che. A laimuah chuan, inngaihtlawmna chu Pathiana tlukluh pumhlumna chu a ni. I chakna hnawl lam a ni mai lova, i chak lohna lai pawm chu a ni tel.
 
Mifingte pawh chuan an thil hriat awmze neia nunpui tura an fimkhur a ngai. I hria a nih chuan, ti mai ang che! Jakoba 1: 22 chuan hetiang hian a sawi, “Thil tih awm si lova thu ngaihthlâk ngawt tâwka ngaiin mahni inbum hek suh u,” tiin [Jakoba 1:22]
 
Pathian thu chu kan nun hruaitu a ni; a duh dan anga nung turin a kawngte zir turin min duh a. Min Siamtu a ni, ka nun dan tura kawng ṭha ber chu a hria. Chutah chuan kan innghat thei ang: Pathian chu kan kiangah a awm, a zirtirnate chu zui turin min kawhhmuh a ni.
 
Ngaihtuah zui atan.
 
I chakna hnawl nge i chaklohna dik taka sawi chhuah chu harsa zawk? Eng vangin nge?
 
I rinna innghahna chu han ziak chhuak rawh le. Chutiang mil chuan i nung ṭhin em?
 
Engtin nge i rilru chu Pathian chibai buk turin i buatsaihin i sawrbing ṭhin?
 
[*Lettu:* Peka]

Wednesday, May 29, 2024

A SAWI LAM DUHTAWKIN A TAKA TIIN BULṬAN RAWH

_Thil Tidanglam Tura Hrual_

-  Rick Warren 
-  May 29, 2024
“Thawhrimna zawng zawngah hian hlawkna a awm a, kaa sawi mai erawh chuan tlakranna mai a thlen a ni.” (Thufingte 14:23)

I thil sawi chhuah chu i rilru nen inzawmna a nei thin.

Thinlunga khatliam chu kaa atangin a lo chhuak thin a ni. Thinrimnaa i khah chuan i ka atangin thinrimna a lo chhuak ang. Rilru hrehawmnaa i khah chuan, i tawngkam chhuakah a lang ang. I thinlung chu lawmnaa a khah chuan, i ka atang chuan lawmna a lo chhuak ang.

Bible in Marka 12:30 ah chuan, “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tur a ni,” a ti. Heti zawng pawh hian i sawi thei ang: I tawngka chhuak zawng zawngah te, i rilru zawng zawngah te, i ngaihtuahna zawng zawngah te leh i chetze kawng tinrengah pawh Pathian i hmangaih tur a ni. Pathian chuan sawi tur te, vei tur te, ngaihtuah tur leh thawk turin a din che a ni.

Thinlunga vei neite chuan ngawi renga awm hi an harsat a. An sawichhuak thin a ni. Thinlunga vei i neih chuan i vei chu sawichhuak thin ang che. Thinlunga pai neite chuan thawnthu sawite nuam an ti a. Inkawm khawm a, titina hun hman te, thinlung taka inkawm te nuam an ti thin a ni. 

Khawvel hian midang bepawp zung zung thiam a  mamawh a ni. Mi nawlpuiina kan vei zawng te min sawichhuah tira, min sawiho tir theitu hi kan mamawh a ni. Zirtirtu, counsellor leh coach-te tlang taka min hrilha kawng min kawhhmuh thei kan mamawh a ni. Fiamthu thiam kan mamawh a. Thuhriltu kan mamawh a. Heng tawnghmang thiamte hi khawvel hma min sawn tir theitu an nih avangin kan mamawh a ni.

Pathianin min vau lawkna chu heihi a ni: A takin i che ve tur a ni tih hi. Thufingte 14:23 chuan, “Thawhrimna zawng zawngah hian hlawkna a awm a, kaa sawi mai erawh chuan tlakranna mai a thlen a ni,” a ti. Tawngkam danga kan sawi chuan, hmalam panin i kal tur a ni. I ruahmanna te a sawi ringawt chu duhtawk tawh la, a taka a thlen theihnan tan la rawh le.  

Ngaihtuah zui atan

* Thinlunga vei neite hi engtin nge i hriat? An titina atangin hlawkna engnge i neih le?

* I ruahmanna siamte chu tihhlawhtlin lovin ala awm reng em? Tunkar chhung hian pakhat tal a hlawhtlin theihnan hian engtin nge tan i lak ang?

*  Eng thil nge a tlai tawh hnua i sawichhuah chauh thin le? Chu chuan tuna i rilrua i pai mek engtin nge a hrilhfiah? 

*[Lettu: Sangpuia]*

Tuesday, May 28, 2024

THAWK TLEM LA I THAWK TAM THEI ANG

 Thil Tidanglam Tura Hrual


RICK WARREN

MAY 28, 2024



“Zing takah in tho va, tlai takah in chawl a, Thawhrimna chaw in ei thin hi, in tan a thlawn mai a ni: Hetiang hian a mi duh tak chu a muthilhtir thin." Sam 127:2 


Bible in Marka 12:30 ah, “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tur a ni,’ a ti a ni. Heti zawng pawh hian kan sawi thei ang: Pathian chu i ṭawngkam chhuak zawng zawng te, i ngaihtuahna zawng zawngin, i rilru puthmang zawng zawngin, i chetzia zawng zawngin i hmangaih tur a ni. Pathian sawitur te, hrethiam tur te, ngaihtuah tur leh thawk turtein min din a ni.


Hnathawktute chuan an chakna zawng zawngin Pathian an hmangaih a ni. Hringnunah chuan chaktakin an thawk a — tihlawhtling tu, hnehtu, hnathawktu niin, hmalam pan tura midang fuihtu leh a taka thil a thlen theihnana nawrkaltu anni ṭhin.


Hnathawktute damchhan chu engnge ni ta ang le?


Khawvel hian tha thawhtu a mamawh a ni. Inbiakpawhna te, phurna te leh inngaihthiamna ringawtte hi chu a tawk lo. A taka hnathawh kawr haa titute hi kan mamawh a ni. A taka hma la theitu te, thiltih hmang a hlawhtlinnaa min hruai theitute hi kan mamawh a ni. 


Tute pawh hian hawi lam kan nei ṭheuh, hnathawktu tan chuan hnathawh zel kha a ni mai. An thawk reng mai ni. An ngaihtuahna a chawl lo va, an rilruah an pai reng a. An buai reng mai a ni.


Pathianin Sam 127:2 ah, “Zing takah in tho va, tlai takah in chawl a, Thawhrimna chaw in ei thin hi, in tan a thlawn mai a ni: Hetiang hian a mi duh tak chu a muthilhtir thin,” a ti. Hnathawktu i nih chuan, in bual in ah hmuh reng theih turin tar la a ṭha ngawt ang. Pathian chuan a hmangaihte chu fiah a duh ṭhin a  ni.


Ṭhenkhat hi chuan thawh tlem in mamawh zawk a ni. Pathian tana thawk tlem tur ni lovin, thildangah i hun seng tlem deuh la a pawimawh ber atan hun i nei tam thei zawk dawn a ni.


Bible chuan ringtu i nih chuan, Pathianin kan thinlung min siamthar sak a ti: “Chu mi avang chuan tupawh Kristaa a awm chuan thil siam thar a lo ni a; thil hluite chu a ral ta a; ngai teh u, a lo thar ta.” (2 Korinth 5:17).


Ringtu i nih tawh chuan, i hun kalta ami kha chu ngaihdam i ni a, nunna chhan tur i nei a, vanah in i nei a ni. Isua i neih hnu pawha thil danglam lo tur ka hrilh ang che: I theihna a la ngai reng, a hnena i kal khan Pathianin a tlakhniam tir lo che. I hawi zawng a thlak mai a ni. Diktak chuan chaknaa thuam belh zel che a duh zawk. A hnen aṭanga finna nei i ni tih inhre reng rawh.


Pathian chuan amah i biak dan leh i hmangaih danah mi tuemaw anga ti ve turin a ti lo che a. I finna hmanga a rawngbawl turin a duh che a ni. Chu chang a ni lo, a finna chu paihthlak sak lovin, a thuambelh zel zawk ang che. Tunhma aiin i theihna leh nihna sang zawkah a vawrh ang che.


Ngaihtuah zui atan


* Sawitu nge, Ngaihtuahtu nge Thawktu i nih ? Engvanga chutianga ti ṭhin nge i nih?

* Thil pawimawh ber i tihtam zawk theihnan engthil nge i thawh tlem ngai ta le?

* Pathian i biak dan leh i chawimawi danah miten i finna leh theihna engtin nge an hmuh?


[Lettu: Sangpuia]

Monday, May 27, 2024

ENGNGE KAN INMAMAWH TAWN CHHAN

_Thil Tidanglam Tura Hrual_

May 27
Rick Warren 
“Mi tinin thilpêk in hmuh ang zêlin Pathian khawngaihna tinrêng enkawltu ṭhate angin, chûng chuan rawng inbâwl tawn ṭheuh rawh u.”
‭‭1 Petera ‭4‬:‭10‬ ‭

I theihna te kha mi dangte malsawmna atan a ni a. Bible chuan 1 Petera 4:10-ah chuan, “Mi tinin thilpêk in hmuh ang zêlin Pathian khawngaihna tinrêng enkawltu ṭhate angin, chûng chuan rawng inbâwl tawn ṭheuh rawh u" a ti.

Tumah hi engkima tha kan awm lo. Min mamawh a, ka mamawh che a. Tumahin talent zawng zawng an nei vek ngai lo. Tumah he khawvelah hian mi famkim, "tumah ka mamawh ve lo" ti thei an awm lo. Kan inmamawh vek a. Thawk ho tura siam kan ni. Chuvang chuan kohhran chhungkua leh pawl a kan awm a ngai thin a. Kan intelkhawm hian kan tha leh zual thin.

Hetah hian hlawhtlinna chahbi a awm a: i chakna laiah khan intinghet la, tichuan i chak lohna kha awmze nei lovah i chhuah dawn nia. Mi hlawhtling zawng zawngin hei hi an ti vek. I thatna laiah khan thawkrim la, ti tha zual zel rawh.

Hlawhtlinna dan pahnihna chu: i that tawk lohna laia tha mi dangte nen inkawp rawh u. Tifamkimtu che kha kawp la. Mi tin hian thawh ve tur kan nei theuh. Tumahin an nei vek lo. Kan inmamawh tawn vek a ni.

Hei hi kan inneih chhan pakhat pawh a ni. Inneihnaah chuan kan chakna te hmanga inti chak tawn tur leh, kan chak lohna te in dawm tawn tur kan ni a. Kan chakna kan indawm tawn loh hian engnge thleng? Kan in sawisel thin. Chu chu inneih chhan a ni lo. Inneihna chuan misual pahnih a suihfin a, tichuan inlaichhinna famkim a lo awm thei dawn a ni. Mahse inneihnaah chuan, i kawppui chak lohna i hria a, i tanpui thei dawn a ni.

Entirna atan, bill pek leh sum hman dan ruahman chungchang hi ni ta se. Bible hian tu zawkin nge ti tur tih a sawi miah lova. Tunge thiam zawk tih kha ngaihtuah mai ula, chutiang chuan thiam lo zawk kha intanpui tawn ula. Chumi vang chuan a ni ka nupui Kay-i hian motor a khalh ziah. A chhan chu kei aia a khalh fimkhur zawk vang a ni.

I hnathawhna hmunah pawh a ni tho mai. I sumdawnna hlawhtling tura i duh chuan, hei hi a kaida chu a ni: an Thlarau thilpek dawn, thinlung, theihna, mizia, an tawnhriat te ang zelin thawhtir la, an thatna laiah dah ang che. Chutianga i tih chuan, i enkawl an ngai lovang a, i fuih pawh an ngai lovang. Engvangin maw? An nuam tih kha an ti theuh anga, chung chu an thatna lai tak vek kha a ni.

Pathian chuan mitin hi kan theihna te mi dangte tana hmang turin min duh a. Kan inmamawh tawn vek a ni.

Ngaituah zui atan...

Hnathawhnaa i thawhpuite chu engtin nge chhawmdawl ngai, fuih ngai leh tanpui ngai nen an danglam?

Engtin nge an tuina hmuna i dah zel khan mi dangte a tanpui le?

Mi dangte duan an nih dan i hriatthiamna khan engtin nge kan danglamna a pawm thiamtir che?

(Lettu: Msa)

Sunday, May 26, 2024

I THEIHNA HMAN CHHUAH LOH HMAN DAN

_Thil Tidanglam Tura Hrual

- Rick Warren 
- May 26, 2024
_"A pu lokal hunah chhiahhlawh hna thawk a hmuh chu, chu mi ngei chu malsawmin a awm ang"_ (Luka 12:43, NCV)

Tute pawh hian theihna, la hman chhuah miah loh kan nei. Mahse chung i theihna te chu Pathian ropui nan leh thil ṭha tih nana i hman theih dan kawng thum a awm.

*1. I theihna te zir chiang rawh.*
I nun zir chiang la. I theihna te zir chiang rawh. Engah te nge i ṭhat riau? Ziak chhuak rawh. Tunlai ṭhangtharte zingah hian an hmalam hun atana an inbuatsaih theih dan tur hrilh thei dawn ta ila hei hi ka sawi ang: i theihna/chakna hria la. I chak lohna hre rawh. Pathianin theihna a pek che kha hrechiang rawh.

Nu leh pa te u, in fate hnenah heng hi an hriat theih nan pui rawh u - an thlarau thilpek, an thinlung, an theihna, an mizia leh tawnhriat. In fate hian in rin phak bak theihna an nei a nia.

*2. I theihna te Pathian tan hlan rawh.*
A duh a a hman atan Pathian hnenah hlan rawh. Rom 12:1-ah chuan heti hian kan hmu, _"Inthawina nung leh thianghlim leh Pathian lawm tlak ni turin in taksa chu inhlanah ka ngen a che u."_ "Lalpa, heng theihna te hi min pek a ni a. Tunah i tan ka rawn hlan let dawn e. Min pek chhan ang taka hman ka duh a ni" ti rawh.

*3. I theihna te chu tipung rawh*
A awmzia chu nunpui la, hmasawnpui la, tat hriam la, puntir rawh. Pathianin theihna engpawh a pek che kha tihpun theih a ni. Roreltute 10:10-ah chuan heti hian kan hmu, _"Hrei a bil a, miin a tah hriam loh chuan tha rum a ngai lehzual ang; Mahse a sawt ber mai, finna, hlawhtlin nân."_

Engtinnge thiamna i neih ang? Hmang ṭhin rawh. Pathian chuan i hrei i tahhriam a ngai a ti. Hrei bil chuan tha a heh ṭhin. Thawkrim satliah ngawt lovin fing taka thawk turin min ti. I theihna te- i sukthlek, i thiamzawng tahhriam kha thlarau nuna i mawhphurhna a ni.

Pathianin nangmahah thil tam tak a dah. A hmasa berah, a siam che a. A dawt lehah thlarau thilpek leh nihna a pe bawk che a. I tana thi turin Isua a rawn tir leh a ni. Pathianin i tan thil tam tak a ti a, chung chu chhang let ve turin a duh che a ni. Engtik niah emaw, "I thilpek te kha engtinnge i tih? Engtinnge i theihna te min chawimawi nan, midangte rawngbawlsak nan, nun nan, leh mite entawn atan i hman? Engtinnge midangte ṭanpui nan i hman?" tiin a la zawt ang che.

Luka 12:43-ah chuan Isua heti hian a ti, _"A pu lokal hunah chhiahhlawh hna thawk a hmuh chu, chu mi ngei chu malsawmin a awm ang"_ (NCV). Chu malsawmna chu i dawn ka duh a ni. Pathianin theihna a pek che a nihna ang tak i hmang lai a rawn hmuh che hi ka duh a ni.

Ngaihtuah zui atan.

Pathianin theihna a pek che khan engtinnge i tih?

Engtinnge naupang zawk te hnenah Pathianin a a hrual dan hrethiam tura i puih ang?

Pathia in theihna a pek che avangin lawmthu sawi rawh. Engtinnge ṭawngṭai tur tih i hriat chiah loh chuan heti hian ṭawngṭai rawh. "Lalpa, theihna min pekte hi ka hre miah lo mai, mahse ka lawm e. Hmu chhuak thiam turin min pui ang che. Vawiin hian ka theihna te chu i hnenah ka rawn hlan let a che. I theihna min pek te hi i duh anga hman ka duh a. Ka theihna te hi tihpun ka duh a ni. Ka thiltihah hian hmasawn ka duh a. Ka theihna sang ber anga awm a chawimawi che ka duh a ni. Ka theihna te hi nangmah chawimawi nan, i rawngbawl nan, eizawn nan, leh mite tana entawn tur atana hman ka duh a. Sum leh pai nei lote puih nan leh kohhran ṭhan len nana hman tur sum thawh chhuah nan  ka theihna te hi hman ka duh. Min pui ang che. Isua hmingin, Amen." 

[Lettu: Mapuia Fanai]

Saturday, May 25, 2024

TIHTUR NIH VANG NI LOVIN, SIAM CHHAN I NIH ANGIN RAWNGBAWL RAWH

_Thil Tidanglam Tura Hrual_

- Rick Warren 
- May 25, 2024

_"Mahni chungchang dik takin enfiah rawh u."_ (Rom 12:3, NLT) 

Bible chuan Pathianin i thinlung ngaithla turin a duh che tiin min hrilh a. Engnge ti tura a duh che tih i hriat theihna turin eng ti tura siam nge i nih i hriat a duh. Mahse, tunlai mi tam tak hi chu an hmanhmawh tawh lutuk a an thinlung ngaihthlakna hun pawh an nei tawh meuh lo.

Kan ngaihchan thiam a ngai! Kan hmanhmawh lutuk a, tih tur tam tak nei a inhriain kan rilru a tawt a; thil tam tak kan tih a ngai lo a ni tih kan hrechhuak tlai khawhnu leh a.

Chu chuan tunlai American tam takte nun a tilang chiang hle. Pan bik nei lovin an tlan fua fua a. Mahse, Pathian chuan ngaichanga kan thinlung ngaithla turin min duh a ni. _"Mahni chungchang dik takin enfiah rawh u."_ (Rom 12:3, NLT)

Pathian nen hun hmang a heng zawhnate hi zawt turin ka duh che: Eng tih hi nge nuam ka tih? Eng ti turin nge ka lo insuangtuah ṭhin? Engin nge min hip? Eng chungchang nge ka sawi a, ka ngaihtuah a, nileng a ka zir pawh a ka nin theih reng reng loh? Ka nunah hian eng hunlai khan nge ka lo hmantlak ber?

Ṭum khat chu Saddleback Kohhrana kan inkhawm banah pitar kum 80 mi baptisma ka chantir a. Ṭhian pawlho zinga hotu nih a duh a. Chu chu thil hlu tak a ni- kum 80 mi hruaitu han nih chu! "Kum tam tak kal taah khan dan ang ni lovin kan duh vang rengin Pathian rawng kha lo bawl ta ila aw" a ti vawng vawng mai.

Mi zawng zawng hian chu thudik chu hria se ka duh a ni. Chu chuan a ni siam che - i thlarau thilpek, i thinlung, i theihna, i nungchang leh i tawn hriatten. Kan nihna ang angin, min siamdan ang angin Pathian rawng kan bawl mai a ni. Ka tihtur a nih vang ni lovin kan hmangaih avang zawkin Pathian rawng hi kan bawl ṭhin a ni.

Pathianin ti tura a duan che anga i tih mai khan amah i tiropui a ni. Chu chu nundan tur a ni. Nawrna avang te, riruatna avang te emaw inthiam lohna avang te a Pathian rawngbawl tur i ni lo. I hlim leh lawmna avang zawkin a rawngbawl ṭhin rawh.

Tunge i nih leh eng hna nge pek i nih tih  fimkhur takin zirchiang la, Pathianin he khawvel a ti tura a tih che chu haichhuak la. Tichuan, hlim takin va ti ang che.

Ngaihtuah zui atan.

I tihtur piah lamah engtinnge Pathian rawng i bawl? Chu i phurna chuan engtinnge rawngbawlna kawngah i rilru put dan a tihdanglam?

Engtik khan nge lawmna avanga Pathian rawng i bawl? Chu i phurna chuan engtinnge rawngbawlna kawnga i rilru put dan a tihdanglam?

Pathianin khawvelah hian eng ti turin nge a dah che ni a i rin? Pathianin a siam chhan che anga nung turi  vawiin hian engtinnge ke i pen ang le?

[Lettu: Mapuia Fanai]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...