Tuesday, February 28, 2023

SABBATH HI ENGNGE A NIH CHIAH LE?

 _Hringnun i nun chhuahpui ngei tur chu_

- Rick Warren 

- February 27, 2023


"Ni ruk chhûngin i thawk tûr a ni a, i hna zawng zawng chu i thawk tur a ni: a ni sarih nî erawh chu LALPA i Pathian tân chawlhni a ni e: chu mi nî chuan hna rêng rêng i thawk tûr a ni lo" (Exod. 20:9-10)

Bible hi Pathianin nun ṭha leh hrisel zawk i nun chhuahpui theihna tura zirtirna hlirin a khat a ni.

Exodus 20:9-10 ah chuan heti hian kan hmu, _"Ni ruk chhûngin i thawk tûr a ni a, i hna zawng zawng chu i thawk tur a ni: a ni sarih nî erawh chu LALPA i Pathian tân chawlhni a ni e: chu mi nî chuan hna rêng rêng i thawk tûr a ni lo."_ Hah chawlh hi a pawimawh em em mai a, Pathian pawhin Thu sawm pekah a tarlang hial. Kartluana  rim tak maia i thawh laiin ni khat tal hahchawl ṭhin turin a duh che a ni. Chu hahchawlhni chu "Sabbath" tih a ni a, hahchawlh ni tur a ni a, Pathianin chawlhkar khata a ni sarihna zelah chawl tur chein a duh a ni. (Eng ni berah emaw ni lovin a ni sarihnaah tak a duh a ni). He chawlhni hi a pawimawh em em mai a, Pathian ngei pawh khan leilung leh khawvel a siam khan a ni sarih niah a chawl a ni - a chauh vang ni lovin kan hahchawlh dan tur entirna min pe a ni.

Mi tam tak tan chuan nilênga han chawlh mai kha thil awmai lo tak a ni mai thei. Nilênga chawlh tih hi engnge a awnzia le? Heng kawng thumte hi Sabbath- Pathianni emaw eng ni ber emawa i chawlh theih dan tur chu a ni.

*1. I taksa hahchawlhtir rawh.* 

Pathianin hahchawlh mamawh turin a siam che. I lirthei i khalh laiin i hmazawnah eng sen vet vet a lo det a lo det tawh chuan ngaihthahin i tlan lui zel lovang. I ding anga u lirthei i enchiang ang, a chhan chu lirthei khawlah chhe thei a awm tihna a ni tlat. Chutiang chiah chu a ni. Nitin nilênga i taksa chhung lam khawlten hna an thawh reng chuan engtikah emaw i taksa chhung lam khawlte kha an chau rup ang. Ṭha taka hna an thawk reng theihna tur chuan hahchawlhtir an ngai ṭhin - chuvang chuan kar khat chhungin eng ni emaw berah hahchawlh i mamawh ṭhin.

*2. I rilru tithar ṭhin rawh.*

Hei hi mi hrang hrang a danglam thei. Ngawih mai mai i mamawh thei a. Midangte nen in inlaichinna i tuaithar a ngai zawk pawh a ni thei. Anih loh pawhin han hawi thawnvenna hian a tuaithar leh che a ni thei bawk. I rilru siamthar/tuaithar lehtu chu engpawh lo nise chu chu i Sabbath niah ti ṭhin ang che.

*3. I thlarau nun ngaihtuah rawh*

I Sabbath niin, Pathian lak ata chawl suh. Pathian chibai buk turin hun insiam zawk rawh. Chibai bukna hian kan nun hi thlir lam neiin a siam ṭhin. Mahse en liam mai awl tak a ni, chuvang chuan i Sabbath niin chibai bukna hun siam ngei rawh. Pathian chibai buk hman lo khawpa i buai anih chuan i buai thlawn mai tih hre rawh. Sam 127:2-ah chuan heti hian kan hmu, _"Zing takah in tho va, tlai takah in chawl a, Thawhrimna chaw in ei thin hi, in tan a thlawn mai a ni: Hetiang hian a mi duh tak chu a muthilhtir ṭhin a ni."_

He thudik hi han chhiar nawn teh: Pathianin a hmangaihte chawlh hahdamtir hi nuam a ti. I hahchawlhni tur insiam la- awmze neiin hmang rawh.

Ngaihtuah zui atan.

Eng ni ber nge i tan Sabbath atana ṭha ber? Engvangin?

Engin nge i thlarau nun tuaithar ber le? Chumi tan chuan engtinnge i chawlh hahdamna niah hun i pek ang?

Engtinnge i ṭhiante leh chhungten Sabbath ni an hriatthiam theih nan i puih anga, chumi chu egvangin nge i ngaih pawimawh ang?

[Lettu: Mapuia Fanai]

I TIH TUR I TIH HMAIN CHAWL HLEK LA TAWNGTAI ZIR RAWH

  _Hringnun i nun chhuahpui ngei tur chu_

— Rick Warren 

— Feb 28, 2023


“Pathian tana thil pe turin intiam thut suh. I inchhir leh dah ang e.” Thufingte 20:25

A chang chuan ringruh sawh tliah hlauhawm khawpin kan nunah hian kan tlan chak thin a – tlan muan dan thiam a har tawh thin a ni. 

Thufingte 20:25 chuan, “Pathian tana thil pe turin intiam thut suh. I inchhir leh dah ang e” min ti a ni.

Pathianin he changah hian eng nge a sawi? Thil i tiam hmain ngaihtuah la. Thutlukna siam hmain rilruin buk la. I thlan hmain hrechiang la. I lak hmain enchiang ang che.  

Heti hian sawi ila, i hna i thawh leh hmain chawl hlek la tawngtai rawh. I inpekna kha tawngtai chungin fimkhur takin ngaihtuah nawn ang che. Chu chuan i nun chu a ti kalmuang deuh ang.

He thudik hi harsa mah se ka zirchhuah a ngai: Thil dang i ngai pawimawh zel a nih chuan i hnaah i inpekna a hniam zel ang. Hnathawh tur i duang chhuak zel a, eng emaw chu i paih then a ngai a ni.  

Ka pu pakhat, Peter Drucker chuan, heti hian min hrilh thin, “I thil chin thar min hrilh suh. I thil bansan min hrilh zawk rawh,” a ti. Hruaitu tha hriat theihna chu thil tih tawp tur leh paih tur a hriatna hi a ni. Bati hi lehlam lehlama i chhit chuan, i fingvar vak lo tihna a ni. I hal ral vek dawn tihna a ni zawk!

I tih thin i bansan avangin harsatna i tawk em? Hun remchang i nei a nih chuan, heng thil pathumte hi tih tum ang che:

*1. “A hlu em?” tih inzawt rawh.* I hun, theihna, thiamna, larna emaw sum emaw te chu a hlu em?

*2. “Eng nge ka bansan tur chu?” tih inzawt rawh.* I hloh tur ngaituah bawk rawh.

*3. “Aih,” tih zir rawh.* Hringnuna himna ropui ber a ni!

Pathianin in hringnunah buai taka awm tur leh chak taka tlan turin theihna a pe lo che a. Hun remchang i nei a nih chuan, thawk han la hlek la, tawngtai ang che.  

Ngaihtuah zui atan

* Eng vangin nge hun remchang bawhpelh tura, “aih” tih hi a harsat thin? 

* Eng tin nge thalaite hi an hnathawh zelnaah ngaihtuahna fim tak seng chunga tawngtaina hmang turin i puih theih ang?

* Thla ral ta khan eng thil thar nge i tih belh? Tunah hian i tih thin te zinga mi eng nge i paih then ang le?  

*[Lettu: Sangpuia]*

Sunday, February 26, 2023

LUNGAWI ZIR CHUNGIN MUANGTEIN KE PEN RAWH

 _Hringnun i nun chhuahpui ngei tur chu_

- Rick Warren 

- February 26, 2023



"Kei zawng eng ang pawhin awm mah ila, lungawi zel ka ching tawh si a." (Philippi 4:11)


Muangtea ke pen i duh tak tak anih chuan i hun hman danah bul ṭan suh. I thinlungah bul ṭan zawk rawh.


Pilippi 4:11-ah Paula chuan heti hian a sawi, _"Kei zawng eng ang pawhin awm mah ila, lungawi zel ka ching tawh si a."_ Hetah hian Paula khan lungawi kha a "zir" a ni tih a sawi hi lo chhinchhiah hmasa la. Lungawi sa tura piang i ni reng reng lo a. Kei pawh ka ni hek lo! Lungawi lohna hi mihring zia pakhat a ni - thil danglam tura beisei tlat te, thil ṭha zawk tura beisei tlat ang te hi. Mahse muangtea ke pen tawh i tum dawn chuan lungawina i zir a ngai. Chu lungawina chu hmu tur chuan hun a liam ve palhawt te a ngai ṭhin.


Paulan lungawi nun chu a rawn hrilhfiah a. Heti hian a rawn sawi, _"Pathian ngaihsakna hi lungawina tel zawngin hlawkna nasa tak a ni reng a ni. Khawvelah hian engmah kan luhpui si lo va, engmah kan chhuahpui thei bawk hek lo. Nimahsela, ei tur leh silh tur neiin chungah chuan kan lungawi ang."_ (1 Tim. 6:6-8)


Paulan nun hi thil neih tam lam aṭanga teh tur a nih lohzia uar takin a sawi. Mi a lungawi chuan, "Ka lo pian hma khan engmah ka nei lo; ka thih hnuah pawh engmah ka nei dawn lo. Ni e, mamawh chu ka nei alawm, mahse chungte chu ka damchhan erawh an ni lo- chuvang chuan ka neih tawkah ka lungawi ang" tiin thil a hrethiam ṭhin.


Lungawina chu engnge a nih loh ka han sawifiah leh ange. I thiltum hlen chhuah tum lova i ṭhulhsan kha lungawina a ni lo; tum neia Pathianin a pek che nun chhuahpui tura duan i ni. Lungawina tih hian tihhlawhtlin tum te, suangtuahna te, leh ruahmanna te i nei tur a ni lo tihna  a ni lo. Pathianin a duhzawng anga tum neia nung turin a duh che a ni.


Lungawina awmzia chu: Hlim turin thil i neih tam a ngai kher lo; i thil neihte chunga i lawmna kha a ni.


Hlim hi duhthlan thil a ni. Ṭawngkam danga kan sawi dawn chuan hlim i duh chen ang zelin a ni i hlim ni! Hlim lohna i neih changin i thil tawnte i mawhpuh mai thei lo. Tuna i dinhmunah khan i lungawi lo a nih chuan dinhmun dangah pawh ding ta la i lung a awi kher chuang lovang. Lei keh chhe tawha chêng kan ni a, engmah hi a famkim lo; i nunah khan dik lo lai a awm reng a ni.


Dinhmun harsa takah pawh ding mah la i mamawh apiang a pe dawn che a ni tih rinna nen hlim zir zel turin Pathianin a duh che. Lungawi zir hi thil kal mek a ni. Engvangin nge vawiin aṭang hian lungawi i zir mai loh ang?


Ngaihtuah zui atan.


Engtinnge lungawi zirna hian muangtea pen turin a puih ang che!


Pathian duhzawng thil tum neih tih hi engnge a awmzia?


Lawmna nun neih hi muangtea ke pen chunga lungawina nun neih zir dan a ni a. Vawiin hian eng kawng khat talin nge lawm i zir theih ang?


[Lettu: Mapuia Fanai]

Saturday, February 25, 2023

I TALENT LEH THEIHNATE HLUTNA NEIHTIR LA

 _Hringnun I Nun Chhuahpui Ngei Tur Chu_

- Rick Warren

25/2/2023


"Mana lei in ni tawh asin, chuvangin in taksaah chuan Pathian chawimawi rawh u." 1 Kor 6:20

Pathian hman theih tura i inpeih chuan, thil pawimawh ber ber atante i hun i hmanral ngawt hi a hmuh duh a ni lem lo va. Chatuan thlir chunga i talent te i hman a duh tel a ni.

Bible chuan 1 Korinth 6:20-ah chuan, "Mana lei in ni tawh asin, chuvangin in taksaah chuan Pathian chawimawi rawh u" a ti. 

Vanram chungchang hi mi tam tak Kristian tam takte telin ngaihdan dik lo tak an nei. Mi thenkhat chuan Vanram i thlen chuan, i tih tur chu kawr var haka, tingtang tum a, chhum chung vela lenkual vel kha tih ber turah an ngai a. Mahse heng thil engmah hi Bibleah a inziak lo a ni.

Chuti a nih chuan kum chhiarsen loha tam chu vanramah chuan engtin nge i hman tak ang le?

Pathian hian Vanramah rawng i bawl theihna tur kawng a ngaihtuah a. Pathian rawng i bawl theihna tur hlimawm tak tak, tih tur bik eng emaw i nei dawn a ni. Tunah chuan, chu rawngbawlna atan chuan i inzirna hun a pe che a. Chumi hun remchang chu i hmang tha em tih a thlir reng a ni.

Mi tam tak chu mahni tana nungin, thutthlengah an thu deng deng hi a ni mai a. Van thlen a, "Awle Lalpa, ka thutna ata hi min sawn la, 'A team' ah min telh rawh. I rawng chu min bawltir ta che" tih mai theih an inring a ni.

Mahse chutiang chu thil nih dan a ni hauh lo. He leiah chhe takin emaw tlemte chauha inzirna hun i hman laiin, eng vangin nge chatuan atan rawngbawlna pawimawh tak a pek ang che?

Mi tam tak chuan Vana an kenluh tur hi an chiang lo thin a. I sum neihte Vanah i la lut dawn hauh lova. I thil neih engmah i la lut lovang a. He leia thil engmah i la lut dawn lo a ni.

Eng nge Vanah i ken luh tak ang le? Thil pahnih chauh mawle: i mizia leh i theihna te. Tun hi rawngbawlna kawnga i theihna leh i mizia Isua ang zel tura i buatsaih theih hunlai a ni.

Pathian tan i talent te i hmang thin em? Nge, mahni tan chauh i lo hmang thin zawk? Pathian chuan he leiah leh chatuan thleng pawhin tha taka a rawng i bawl theih hi a duh a ni.

Ngaihtuah zui atan...

Vanram chungchangah eng nge ngaihdan dik lo i lo put ve le? Vawiin hian Vanram chungchang eng nge i zir le?

I theihna leh talent te engti zawngin nge Pathian tan i hman le?

I rawngbawlna kawnga thiamna te engti kawngin nge i tih thanlen theih ang le?

(Lettu: Msa)

Friday, February 24, 2023

I HUN HLAWK TAKA HMAN

 _Hringnun I Nunchhuahpui Ngei Tur_ 

By Rick Warren

February 23, 2023


“ _Ring lote lakah fing takin awm ula, in hun chu hmang ṭha rawh u_ .” [Kolossa 4:5]


Pathianin a hman theihna tur chea inpeih sa ata awm i duh chuan rahbi eng emaw zat i hlen chhuah hmasak a ngai ang. Pakhatna, nimin lama kan zir tak ang khan chu Isua Krista i hriat chian a ngai ang. Tichuan, tuna i hun kha chatuan hun thlir chunga i hman a ngai bawk ang.  


Kolossa 4: 5 chuan hetiang hian a sawi, “ _In hun chu hmang ṭha rawh u_ ,” tiin. Hun chu i thil neih zinga a hlu ber a ni. Sum aiin a pawimawh fe zawk. Sum tam zawk i nei a ni thei a, mahse hun tam zawk i nei thei tawh chuang lo.  


I nun kha, hun bithliah eng emaw hnuaia awm mek i ni. Hun i siam thei lo, hun chu i hawh thei bawk hek lo, i pawtsei thei lo bawk. Nangmah chauhin i hmang thei. Kar khat chhungin mitinten hun inzat vek an nei: darkar 168 a ni. I hun kha awmze nei taka i hmang a nih loh chuan i nun pumpui kha awmze nei taka enkawl i thei lo vang – a chhan chu i hun kha i nun a ni tel.  


I hun hman dan kha Pathianin he khawvela a fiahna che kawng khat niin chu chu chatuan hun atana i inbuatsaihna a ni. Tunah khan i chatuan huna a thil tihtir tur che hre turin engtin nge i tun hun i hman a en mek bawk. 


Setana ruahmanna pakhat chu thil pawimawh lo buaipuia inhambuaitir vak che a, thil pawimawh zawk hmaihtir che chu a ni, chatuan atana inbuatsaihna chu. Setana chuan sual tihtir kher kher che a tum ber lo; Thil sual a tihtir theih loh che chuan buai taka siam mai che chu a thil tum a ni.  


Bible chuan Tirhkohte 20: 24-ah chuan thil i tih ngei ngei tur che chu a kawhhmuh che: “ _Lalpa Isua hnên ata ka hmuh rawngbâwl hna thawh tûr ka hmabâk, Pathian khawngaihna Chanchin Ṭha puan darh tûr hi ka hlen theih phawt chuan, ka nun pawh hi thlâkhlelh tûrah ka ngai lo_ ” tiin.


Pathian chuan a hmang duh che – thil pawimawh ber atana i hun i hman chauhin chu chu i tipuitling thei ang. Tuna i hun kha chatuan thlir chunga i hman a ngai. Nangmah leh nagmah kha hei hi i inzawh a ngai, “Tun huna ka hun ka khawhralna hi kum nga emaw kum sawm emaw lo awm leh turah engtia sawt nge ni ang? Eng chin hi nge chatuan atana ṭangkai tur chu? I siamrem a ngai ang. 


Chatuan hun thlir chungin i hun kha hmang la, tichuan Pathian ṭanpuinain thil pawimawh ber chu i thlang thei ang – a thil tumte chu. 


Ngaihtuah zui atan. 


I calendar emaw i hun hman dan ziahna emaw kha han en teh. I hun hman mekah khan chatuan atana sawngsawhlawtna nei eng zat nge awm?  


He khawvela i awm lai hian eng hna nge Pathian chuan ti tura a duh che? 


Pathianin hna a pek che chu tihlawhtling turin eng anga danglamin nge i hun chu i hman ang? 


[ *Lettu* : Peka]

Wednesday, February 22, 2023

PATHIAN NENA IN INLAICHINNA ṬHANTIR DAN

_Hringnun I Nun Chhuahpui Ngei Tur Chu_ 

By Rick Warren

— February 22, 2023



“ _Mi ṭhenkhat erawh chuan an lo lâwm a, amah an ring a, an hnênah Pathian fate nih theihna a pe a_ .” [Johana 1:12]


Nimin lam khan i nuna Pathian thil ruahman chu hria a, he khawvel i cham chhunga Pathianin a hman theih dan tur che kan sawi ho a nih kha. Nun hi chatuan hun atana inbuatsaihna a ni – mahse chu chu a tak taka kan nun naah eng nge a awmzia? Tuna i nun kha engtin nge chatuan atana inbuatsaihna atan i hman theih ang? 


Pakhatna, Isua Krista i hriat chian a ngai. 


Bible chuan hetiang hian a sawi, “ _Mi ṭhenkhat erawh chuan an lo lâwm a, amah an ring a, an hnênah Pathian fate nih theihna a pe a_ .” [Johana 1:12] Mi zawng zawngte hi Pathian fate an ni vek lo tih hi lo hria la – an nuna amah pawmtute chauh chu a fate an ni. Pathian chuan amah ringa inlaichinna neihpui a duh che. 


Mite nena inlaichinna in neih ang tho khan Pathian nen pawh inlaichinna neih tur a ni a – eng emaw ti chhunga amah be ni mai lovin. 


Entirnan, ka nupui, Kay-i nen hian inlaichinna ṭha zawk neih zel ka duh chuan, eng nge ka tih hmasak ang? Pakhatnaah chuan, amah nen chuan hun ka hman fo a ngai. Amah hre chiang zel turin ka hun ka pe ang a, ka hun te chu chhinchhiah tlak tak a nih theihnan ka bei ang. Hun i hmanpui loh mihring nen chuan engtik lai mahin inlaichinna in nei thei ngai lo vang. 


Chutiang chiah chuan Pathian nen pawh inlaichinna i siam ang. Amah nena hun hmanna tur insiam rawh. Chutianga amah nena hun hman theihna pawimawh ber chu nitin fianrial hun hman a ni. Pathian nen chuan fianrial hmangin, amah chu chibai bukin amah aṭangin zir ang che. Pelh lovin hun hmang la, awmze nei takin amah nen hun hmang rawh. 


Pathian nena hun hman dan kawng hnihna chu amah nena inkawm/inbiak a ni. Pathian nena in inlaichinna awmzia ber chu ṭawngṭaina a ni. I ṭawngṭai nun chu ngawrh taka kalpui dan kawng hrang hrang a awm. Ṭawngṭaina chungchang zawhna leh chhanna thuziak lam chhiar rawh. Ṭawngṭaina lehkha Bible thu behchhana siamin bual pindan darthlalangah i dah ang, i hnathawhna dawhkanah i dah thei bawk a, i phone-ah pawh ṭawngṭai ngei tura hrilh hretu che eng emaw i dah thei ang. A nih loh pawhin chhungkuaa ṭawngṭaina hun bik in insiam a ngai pawh a ni thei ang. Eng ang pawhin kalpui mek la, in inbiakna hun chu tipung deuh deuh zel ang che. 


Pathian i hriat chian theihna tura i hun, tha leh zung, i nun i hmanna chu engtik lai mahin i inchhir ngai lo vang. Rahbi hmasa ber chu rapin Pathianin a hman theihna tur che a hun tam zawk pein amah nena inbiakna tam zawk hmang ang che. 


Ngaihtuah zui atan. 


Pathian nena in inlaichinna kha khawvela thil pawimawh ber i tan a ni em? I nuna a eng ber khan nge chu chu a dik a ni tih finfiah? 


Nitina fianrial hun Pathian nena in fianrial hun chu mumal zawka i kalpui theihnan i hun hman dan eng nge thlak danglam ngai? 


Pathian nena in inkhawmna chu tihmasawn turin eng thil pahnih nge i tih ngai han ngaihtuah teh. Chung ngaihdante chu vawiin hian engtin nge i chetchhuahpui ang? 


 *Pathian chuan a ṭhatna chu a Fapa, Isua Krista kaltlangin a lantir.* 


Bible chuan hetiangin a sawi, “ _Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân_ .” [Johana 3: 16]


Chatuan nunna chungchanga Pathian thutiam ring tur chuan i lo inpeih tawh em? A nih chuan, he ṭawngṭaina tawite hian han ṭawngṭai teh: 


“ _Lalpa duhtak, Isua Krista chu i Fapa a ni tih ka pawm a. Ka sualte thupha ka chawi a, i ngaihdamna chu ka dil a ni. Isua chu ka sualte la bo turin a thi a, i kai tho leh a ni tih pawh ka ring e. Isua chu Chhandamtuah ka pawm duh a, vawiin aṭang hian ka Lalpa zui turin ka inpeih e. Ka nun hi hruai la, i duhzawng tih min zirtir ang che. Isua hmingin ka dil e. Amen_ .”


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nena in zinkawng atana thuziak pawimawh tak tak lo thawn che ka duh e. 


[ *Lettu* : Peka]

CHATUAN HMUNA LUT TURA INPEIH TURIN I NUN HMANG RAWH

  _Hringnun i nun chhuahpui ngei tur chu_

— Rick Warren 

— Feb 22, 2023

“Hmangaihnaa thianghlim leh sawisel bovin ama hmaah kan awm theihna turin, leilung pian hmain Kristaa min thlan ang khan; a khawngaihna ropuizia fak turin ama lungduha lawm zawng angin, Isua Krista zarah a man tan faa siam tura minlo ruat lawk tawh avangin.” Ephesi 1:4-5

Pathian hman theiha awm tur chuan, a hmasa ber atana i hriattur chu damchhan hriat hi a ni.

Bible chuan Pathianin a siam chhan che a sawi a, “Hmangaihnaa thianghlim leh sawisel bovin ama hmaah kan awm theihna turin, leilung pian hmain Kristaa min thlan ang khan; a khawngaihna ropuizia fak turin ama lungduha lawm zawng angin, Isua Krista zarah a man tan faa siam tura minlo ruat lawk tawh avangin.” Ephesi 1:4-5

Pathian chuan a chhungkuaa telve turin a siam che a. A siam chhan che chu amah nena inlaichinna nei tur leh hmangaih tur chein – amah hmangaih let a phut tel bawk. Amaherawh chu Pathian chhungte nih theihna kawng khat chiah a awm: Isua Krista rinna kaltlangin a ni.

Pathian chuan a chhungkuaa tel ringawt turin a duh lo che a. Chatuana amah nena lengdun turin a duh che a ni. Ephesi 1:10 ah chuan, “Hun bi kim khawsak hunah a lawm zawng (engkim – vana thil awmte, lei chunga thil awmte pawh – Kristaa fawk khawm tur chu) amahin tih a tum ang khan; amah ngeiah chuan a ni.” Pathian thil tum pakhatnaah chuan, a chhungkuaa i telve hi a ni a, a dawt lehah chuan, ama hriat hi a ni. Tichuan chatuana ama hnena chen tir ve che a duh bawk a ni.

Kan chanchin hian a vawrtawp a hnaih zel a. Engtikniah emaw chuan Pathianin amaha rinna nghat zawng zawng a hruaikhawm anga, vanramah chatuanin amah nen an cheng tawh dawn a ni.

He leia kan awm hi chu chatuan atana inbuatsaihna a ni a. Bible chuan Pathianin, “Mihring rilruah chatuan a dah” a ti a ni. Thuhriltu 3:11. Chumi awmzia chu kumkhuaa awm tur i ni a. Chatuan atana buatsaih i ni tihna. Mihirng tu te pawh hi chatuan hmun eng emaw zawk zawkah kan cheng theuh dawn a: vanah Pathian nen emaw Pathian atanga inlakhranna hremhmunah emaw a ni ang.

Pathianin kum 80 emaw 90 emaw atan chauh a siam lo che a, kum engemaw zat atan chauh a siam bawk lo che a ni. Pathian chuan i nunna atan hian thui tak a zam a. He leia nunna chu eng nge ni ta? Chatuan atana inbuatsaihna a ni. Pathian chuan a siam tawhna che leh i nun mekna ai mah chuan chatuan atan i inbuatsaihna hi a ngai pawimawh zawk a ni. Hlim taka khawsa tur chuan a duh ngei mai che – amaherawh chu chatuan atana i inbuatsaihna thulh thak tur khawp ni lovin.

Nun chu hun ropui tak lo thleng tur atana inenlawkna ang a ni a. Pathian hriatna nena chatuan atan inbuatsaih a ngai a, Isua ang zel tur leh, he leia Pathianin a siam chhan che hriaa ama hman theiha awm turin.

Ngaihtuah zui atan

* Pathian chhungkuaa tel turin tan ila tawh em? I la lo anih chuan, engin nge ti khawtlai che? A nih chuan ringtu i nih hnuaah hian eng nge i damchhan nia i hriat? 

* He leia chatuan atana i inbuatsaihnaah hian engti kawngin nge Pathian ilo tawn ve?

* Hlimna aiin i nungchang i ngaihlu zawk em? Pathianin i hlimna ai chuan harsatna hmanga i nungchang siam a tumna hi engtin nge i chhan ang?  

*Pathian chhungte ni turin i inpeih em?*

Pathian chuan amah nena inlaichinna nei turin a siam che a – chu chu Isua i rin hnuah chauh i nei thei ang. Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam inni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi :8-9. 

I sualna te i puang duh aniha, i nunah Isua i thlang duh anih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian emai min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Tuesday, February 21, 2023

ITSIKNA HI PATHIAN I RIN LOHNA LANTIRNA PAKHAT CHU A NI

  _Hringnun i nun chhuahpui ngei tur chu_

— Rick Warren 

— Feb 21, 2023


“Isua, kan rinna siamtu leh tifamkimtu lam chu enin, kan hmaa intlansiakna tur awmah hian chhel takin i tlan zel ang.” Hebrai 12:1

I thinlunga thikna awm lang thin tihbo ngai te zinga mi tawngkam pakhat chu “a fair-lo” tih hi a ni. 

Chu tawngkam chu hetiang hi a ni: “A fair-lo em mai, chu chu a ti bik a, ka ti ve lo” “A fair-lo, a tan chuan a awlsama, ka tan a awlsam ve lo” “A fair-lo, a faten lawmman an dawng bika, ka faten an dawng ve lo” “A fair-lo, anni chuan chawlh an hmang thei bika, keiin ka thei ve lo” tih te. 

Itsikna hi dik tak chuan Pathian nena inbuanna a ni. Itsikna i neih apiangin Pathian nen in inbei tihna a ni. I itsik chuan, hetiang hian i sawi tihna a ni, “Lalpa, i chhem bo daih. I thiltih hi a dik lo. Ka nih tur ang ka nih theihna turin thluak i nei tawk lo. Min hmangaih tak tak a nih chuan, hetiang hian min siam lovang a, mi dangah min siam zawk ang.” 

Pathian chuan, ni love, “Mi danga ka siam che chuan, i piang ve lovang” a ti.

Hei hi harsatna chu a ni: Itsikna i neih chuan, Pathian i ring tawk lo. I thinlung zawng zawng pawh a ngaihtuah tih i awih lo. I tana tha tur chu nang ai pawhin  a hria a ni tih i hre lo.

Hringnunah i neih loh thil te a awm a, chung i neih loh chhan te pawh chu Pathianin a hria a ni. Talent thenkhat Pathianin a pek loh che pawh a awm. Remchanna thenkhat Pathianin a pek loh che pawh a awm. I tawn lem loh thil te pawh a awm zel a ni.

I thinrim tun thei a, a nih loh pawhin Pathianah i lawm thei bawk. Pathian chu i aiin a fing zawk a, thil a hre zawk a ni. Chhiar nawn leh teh: Thil a hre zawk!

Pathianin intlansiakna tur min pe theuh a. Mi dang intlansiaknaah i tlan thei lova, mi dang pawh i intlansiaknaah an tlan thei bik lo. Pathianin intlansiakna tur a pekah che i tlan theia emaw nangma siam chawp intlansiaknaah i tlan thei bawk. Mi tam zawk chu mahni siamchawpah an tlan thina, a tawpah thihna a thlen thina eng vang nge an ti thin a ni.

Pathian chuan intlansiakna tur a pekah che tlan turin a duh che a. I nun atan ruahmanna a siam a ni. Pathian intlansiaknaah i rilru i pek chuan, mi dang lo tlan ve turah i lungngai lovang a. Nangmah lo autu leh lo tantuah pawh i buai lem lo vang. Nangmah tantu mi pakhat atan chiah i nung a: Pathian a ni.

Bible chuan Hebrai 12:1 ah, “Isua, kan rinna siamtu leh tifamkimtu lam chu enin, kan hmaa intlansiakna tur awmah hian chhel takin i tlan zel ang” a ti. Pathianin a kohna che i hriatchian chuan, mi dang Pathianin a kohve teah pawh buaina i nei tlem ang.

Mi dang itsik reng renga awmna hi hun khawhralna mai a ni. Pathianin a siamna che angin awm tawp mai rawh!

Ngaihtuah zui atan

* Naupangin, “A fair-lo em mai” a ti a, engtin nge i chhan ang? Chu naupang i chhanna atang chuan eng nge i zirchhuah? 

* I mamawh chu nangmah aiin Pathianin a hre zawk tih hi i ring em? Eng vang nge, eng nge a chhan?

* Pathianin engti turin nge a koh che? Chu intlansiakna a siamsak che chu tlan turin tunah eng nge i tih mek?  

*[Lettu: Sangpuia]*

Monday, February 20, 2023

HMANGAIHNA CHU MIDANGTE CHUNGA PATHIAN ṬHATNAAH A LAWM ṬHIN

 _Hringnun i nun chhuahpui ngei tur chu_


- Rick Warren 

- February 19, 2023

"Lâwmte chu lâwmpui ula, ṭapte chu ṭahpui rawh u." (Rom12:15) 

Bible chuan, _"Lâwmte chu lâwmpui ula, tapte chu tahpui rawh u"_ (Rom12:15) tiin min hrilh. A thu hnuhnung zawk khi chu zawm mai a har lova, a thu hmasa zawk erawh zawm a har em em thung si tih i hre tawh em?

Miin harsatna an tawhin lo khawngaih mai a har lo. An lungngaih laia lo fuih mai te hi thil awlsam tak a ni. Mahse, kan hnaivaia mi kha a hnaah lo kaisang ta se engtin nge niang? A harsa ṭhin a ni! Mi hlawhtlinna  lawmpui ai chuan lo ensan mai hi a awl ṭhin a ni. An chunga thil ṭha lo thleng turte pawhin i lo duh mai thei. An êng a thim chuan i eng kha a eng zual tura i ngaih avangin.


Mahse, thudik chu hei hi a ni: Pathian khawngaihna hi a nasa em em a ni.


Grep huan neituin a  grep huan a thawk tura mi a chhawr thu Isuan a sawi a. Huan neitu chuan hnathawktu hrang hrang a ruai a, chawhma lama thawk tur te, chawhnu lama thawk tur te, ṭhenkhat te chuan darkar hnih khat lek lek te an thawk a mahse, hlawh pek hun a thlen chuan huam neitu chuan a inzat vekin hlawh a pe hlawm a.


Chawhma lama thawk tura rawihte chuan a dik lova hriain huam neitu hnenah chuan an phunnawi a, mahse, huam neitu erawh chuan, _"Ka ta chu ka duh duha ka tih a thiang lo vem ni? Ṭhat ka chhuah avangin nangin i lo itsik em ni?’ tiin a chhang a."_ (Matthaia 20:15)


Midangten Pathian malsawmna an dawn i hmuhin chutiang chuan i ti ve mai thei. I thawkrimin Pathianin ti tura a tih che apiang i ti zel a. Mahse, midang tam tak mal a sawm tih i hmu a. Nangmah anga thawkrim leh Pathian tana rinawm a i hmuh loh avangin anni chuan an phu lovin i hria a ni.


Pathianin mal a sawm zat ang tho che a midangte pawh malsawm a duh chuan engnge a danglamna? Midangte pek a duh thilahte lo buai tur i ni lo. Pathianin a pekte i lo enkawl dan kha i buaipui tur chu a ni. 


Thîkna chunhchang hi ka han sawifiah teh ang. Thîkna hi i bulhnaiah a awm reng. I rualpuite nen in inlaichinnaah thîkna a awm ṭhin. Zai thiam emaw lemchan thiam emaw i hmuh changin, "Aw, saw mi anga lar saw ni ve ila aw" i ti fo ṭhin. Mahse i ṭhian/chhung hnai berten a ni thîkna nun rawn chawk tho ṭhin zawk. I ṭhiante emaw i chhungten emaw hlawhtlinna an chan khan hmuh a harsa ṭhin a ni.


Thîkna hi chhungril lamah a ni. Mite a ngaihlu lo a, inlaichinna a tichhia a, mi retheiah a chhuah ṭhin ta che a ni. A lang mai lova, mahse mi tichhe thei thil a ni. Tin, hlimna tam tak a chantir ṭhin che.



Nupui/pasal neih i duh a mahse i la nei lo. I nei tawh a, in inṭhen tawh pawh a ni zawk mai thei. Tunah inneih hi i duh ta miah lo. Inneih sawmna i dawn rualin i phun nghal. Mite khawnvar a ên laiin chu chuan i khawnvâr êng a tithim dawn niin i ngai ṭhin. Mahse i ngaihtuahna kha a dik hauh lo.  


Mite hlawhtlinnaa lawm thiam dan i lo zir khan hlimna tam tak i chhar chhuak ang. I chunga thil ṭha a lo thlen chauha hlimna i neih chuan i damchhungin mi khawngaihthlak tak i ni ang. Mahse mite hlawhtlinnaa lo lawmpui dan i zir chuan englai pawhin lawmna i hmu ang.


Thîkna hi mite chungah rilru hrisel lo i put theih thil duhawm lo ber a ni. 1 Korinth 13:4-ah chuan heti hian kan hmu, _"Hmangaihna chuan a thik ngai lo"_ tiin (ESV).


Hmangaihna chuan a thîk ngai lo. Mite chunga Pathian ṭhatnaah a lawm zawk ṭhin.


Ngaihtuah zui atan.


I nuna thil hlimawm a lo thlenin tunge a lawmnaa kal turin i sawm thin? An tan chutiang ṭhian chu i ni em?


Thîkna in inlaichinna a tihchhiat i hmu tawh ngai em?


Eng angin nge i thinlungah thîkna a rawn luh ṭhin? Lo dang turin engnge i tih theih?


[Lettu: Mapuia Fanai]

LUNGAWINA HI THLARAU NUNA PUITLINZIA LANTIRTU A NI

 _Hringnun i nun chhuahpui ngei tur chu_

- Rick Warren 

- February 20, 2023


"Kan thil neih loh apiang ît kual reng ai chuan kan neih sa mekte chunga lungawi hi a ṭha zâwk." (Thuhriltu 6:9, GNT)


Inchhir ai chuan lawm a ṭha zawk a. Phunnawi ai chuan engkim hi Pathian min pek a ni tih hriatreng a pawimawh.


1 Korinth 4:7-8 ah chuan, _"Mi dangte aia danglam bîka siamtu che u chu tunge? I dawn bâk eng nge i neih bîk? Dawng reng siin, engati nge i dawn ni lo anga i uanpui? In tlai na lailêng e! In hausa tawh bawk si a! Keini tel lovin lal ang maia ro in rêl ta hi ka duh dân tak pawh a ni asin, nangnite nên hian rêl tlâng thei nghê nghê ila!"_ tih kan hmu.


Itsikna chuan, "Engvangin nge anni kher? Engvangin nge a hrisel zawk? Engvangin nge kei aia hna ṭha leh pasal ṭha a neih a keiin engmah ka neih ve loh?" tiin a zawt ṭhin.


Lawmna erawh chuan, "Engvangin nge kei kher? Mi tam takin tui thianghlim in tur an neih loh laia ka neih bik? Engvangin nge tihduhdah ka nih loh? Engvangin nge ka rinna avanga tan ina ka tan loh?" a ti zawk ṭhin.


Hlimna nun nei tur chuan tam tak i neih a ngai a ni tih hi thîkna innghah bulpui a ni. Mahse a dik hauh si lo. Hlimna hi duhthlanna a ni. Tunah pawh i hlim loh chuan i neih tam sawt avangin i hlim phah dawn chuang lo. Mi tam tak, nangmah aia ngah zawkte chanchin hrilh tur che ka hre tam mai, mahse chu chuan hlimna tam zawk a pe kher lo. Hlim i duh ang chen zel khan a ni i hlim ni.


Thuhriltu 6:9-ah chuan heti hian kan hmu, _"Kan thil neih loh apiang ît kual reng ai chuan kan neih sa mekte chunga lungawi hi a ṭha zâwk."_ (GNT)


Engvangin maw? Tumah hi lungawi sa kan awm miah lo! Lungawina hi hringnuna bet sa a ni hauh lo. Mahse lungawina hi puitlinna lantirtu a ni. Naute an lungawi lo ṭhin. An duh anga thil a awm vek loh chuan an lungawi thei ṭhin lo. I duh anga thil a awm loh pawha lungawi thiam i zir khan puitlinna chu a ni. Neih loh duh belh renga nun ai chuan kan neih chhuna lungawi thiam te hi a ṭha zawk hle.


Ka han sawifiah leh zual ange. Thîkna hi châkna a ni mai lo; châkna chu a ṭha. Tumruhna nen thil ṭha tih châkna i nei thei. Thîkna erawh duhthusamna a ni lo; i nunah duhthusam/tum i nei ngei ang. Thîkna chuan tum ram a nei lo; duhthusam te, tum bik te, tihhlawhtlin tum te, leh Pathianin thil ṭha ti tura a duh zawng zawngte nen.


Miin thil an nei a, chung thilte chu i neih ve phawt loh chuan hlimna i nei thei dawn lo a ni tih rinna hi  thîkna chu a ni. Chutiang rilru chu pu lovin, i nihna leh i thil neihah te lungawi zir rawh. Engkim mai hi Pathian thilpêk an ni si a.


Ngaihtuah zui atan.


Hlimna kawng i zawh theih nan vawiin hian engnge i tih ṭan theih le?


Tute emaw thil neihte avanga huatna thinlung pu tura thlem i nih hunin chu thîkna nun chu engtinnge lawmna nuna i thlak ang?


Engvangin nge Pathian hian mihringte hi englai pawha hlim reng lova hlimna hi kan duhthlana a dah ni a i rin?


*Isuaah hian i duhthlanna engnge le?*


Bible chuan Pathian Fapa, Isua Krista i rin chauhin vanram i luh theih tur thu min hrilh. Vanram hi thawh  chhuah chi a ni lo: _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)


Isua hnena i nun hlan i duh chuan hetiang hian ṭawngṭai bul han ṭan ta che:

"Lalpa duhtak, I Fapa Isua Krista ka rin chuan ka tihsual zawng zawngte min ngaihdam a, ka nun chhan ka zir ang a, tichuan, engtik niah emaw I chatuan hmun a min thlen ve i tiam a.


"Ka tisual a ni tih ka puang a I ngaihdamna ka dil a ni. Isua kha ka tan a thi a a tho leh a ni tih ka ring a. Isua chu min chhandamtu a pawm a, vawiin aṭang hian a hnungzui ve ka duh e. Ka nun min hruaiin I duhzawng min zirtir ang che. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


[Lettu: Mapuia Fanai]

Saturday, February 18, 2023

MI DANGTE TEHNA HI INTHIKNA BUL A NI

 _Hringnun I Nunchhuahpui Ngei Tur Chu_

- Rick Warren

18/2/2023


"Mi tinin mahni thiltih fiah theuh zawk rawh se, chu mi hunah chuan mi dang chung ni lovin, mahni chung chauhvah chhuan tur a nei ang," Galatia 6:4.


Mi dangte teh chin hi mi dangte thikna intanna a ni a. Mi dangte teh fo chin i sim theih chuan, thikna pawh i sim thei ang.

Helai hi a buaithlak lai chu a ni: mi dangte lo teh zung zung hi kan nuam tih zawng a ni tlat mai hi. Engkim mai hi kan tehin kan khaikhin a. Kan lenzawngte, kan piante, kan rawngte, kan tawngdan te, kan finna thleng hian inteh kan ching em em a. Kan chhungkua, kan fate, kan hna, kan theihna leh kan in leh a vel thleng hian kan teh thin a ni ber e.

Pathian chuan mi dangte nen intehkhin atthlakzia hi min hrilh a, "Thenkhat mahni insawimawite zingah chuan kan inchhiar tel ngam lo va, anmahni nen kan intehkhin ngam hek lo; amaherawhchu anni zawng mahni leh mahni intehin, mahni leh mahni intehkhinin rilru nei lovin an awm" (II Kor 10:12) tiin. 

I lo tehkhin a piang khan chapona emaw thikna thangah lut thei dinhmunah i ding ziah a. Nang aia tha nia i hriat chuan, i thik vat a. Midangte aia tha zawka i inhmuh chuan, i rilru a chapo ru vat thin a ni.

Chapona leh thikna hi tehkhinna avanga lo awm an ni chawk. Pathian chuan tehkhin hi atthlak a ti hle a; i ching tur a ni lo. Nangmah mai khan danglam tak, anpui nei hauh lo i ni a. Tehkhin chi i ni lo.

Bible chuan Galatia 6:4-ah, "Mi tinin mahni thiltih fiah theuh zawk rawh se, chu mi hunah chuan mi dang chung ni lovin, mahni chung chauhvah chhuan tur a nei ang" a ti. 

Van i thlen hunah Pathian chuan, "Chumi khami ang kha engah nge i nih ve loh?" a ti hauh dawn lova. Chu ai chuan, "I nih ang ang kha engah nge i nih loh thin?" a ti zawk hial ang.

Van i thlen hunah chuan theihna talent i neih miah loh emaw hun remchang i neih miah loh hmanga teh a lawmman pek i ni dawn lova. I nun i hman dan leh pek i nih i hman thiam danah a innghat zawk dawn a ni.

Mi dangte nen intehkhin hi tulna engmah a awm lova. A nihna takah chuan, mi dangah i rilru i pek tlat chuan i mawhphurhna i thlir thiam thei ngai lovang.

I dinhmun a zir te, i thil tawn tawh a zirte, theihna a pekte hmangin theih tawpa a tha thei ang bera nung turin Pathianin a duh che a. Mi dangteah i thlirna tlang nghat lova mahni ngei i danglam bikna hre reng chunga i in en thiam a hun takzet a ni.

Ngaihtuah zui atan...

Mi dangte thlir chunga i beiseina thlen tum ai chuan khawi lam nge i en a tul zawk le?

Mi dang tu emaw i hmelhriat khan hlawhtlinna chang se, chumi chu i lawmpui thei tak tak em? Eng vangin?

Pathianin theihna leh thilpek a pek che chu engte nge? Nangmahah a tha ber i nih theihna turin engtin nge i hman tangkai le?

(Lettu: Msa)

Friday, February 17, 2023

ITSIKNAIN I NUN A TIHCHHIAT THEIH DAN KAWNG LI

 _Hringnun I Nunchhuahpui Ngei Tur Chu_ 

By Rick Warren

February 17, 2023


“ _Îtsîkna leh mahni hmasialna awmnaah chuan buaina leh sualna chi tinrêng a awm ṭhîn_ .” [Jakoba 3:16]

Pathianin i tana ruahmanna a neih leh i nuna tihtur a pek che ti thei lova siamtu che thil sual pakhat a awm a. Itna emaw, chapona emaw thinrimna emaw a ni lo. Lungkham buaina a ni lo va, hlauhna leh beidawnna pawh a ni hek lo. Dik tak chuan, chu thil chu i ngaihtuah tlem viau ang. A verther em avangin i nun a ei chhiat dan chu i chhut mai thiam lo hial zawk ang.    

Chu chu engnge ni? Itsikna a ni. 

Midangte i itsik chang chuan i ngaihtuahna chu i thil neih loh leh i nihna ni lo zawkah i dah ngar ngar tihna a ni a. A tawpah chuan, Pathianin i tana a thil ruahman chu i ṭhelh hlauh thei hial ang. 

Itsikna i nun aṭanga tibo turin itsiknain i nun a tihchhiat theih dan kawng li hriat thiam kan tum dawn a ni. 

 *1. Itsikna chuan i danglam/hlutna a hnawl.* 

Sam 139:13-16 chuan hetiang hian a sawi, “ _A ni, ka taksa pêng tin hi i siam a ni, Ka nu pum chhûngah min rem khâwm a… I thiltih hi a mak êm êm a, ka hre chiang hle a ni. Ka ruhrel hi i lakah thup a ni lo, A rûka siam ka nih lai leh Lei chhûngrila min rem khâwm lai pawh khân. Kutke ka neih hma pawhin mi hmu vek a, Ka dam chhûng ni tûrte a inṭan hma daihin, I lehkhabu-ah chuan ziak vek a ni_ ”, tiin. 

Pathian chuan tute emaw ang turin a siam lo che. Pathian chuan nangmah ni mai turin a din che a. Mahse itsikna chuan i thiam thil leh danglam bikna chu a hmuh hmaih tir che a ni. 

 *2. Itsikna chuan i ngaihtuahna a pawt peng.* 

Midang thlir ran chungin Pathian ruahmanna chu i zui tak tak thei lovang. Inpekna thlur sungin in awm ang a, eng tak tak mah i nunah i hlen chhuak lo vang. 

Isua chuan Matthaia 6: 24-ah chuan hetiangin a sawi, “ _Tu man hotu pahnih rawng an bâwl kawp thei lo, pakhat huain pakhat an duh emaw a ni ang a; a nih loh leh pakhat chu an ngaina ang a, pakhat chu an hmusit ang. Pathian rawng leh sum rawng in bâwl kawp thei lo ve_ ,” tiin. 

 *3. Itsikna chuan i tha leh hun a eiral.* 

Bible-in a sawi chiang ber awm e: “ _An theih tâwka miin rim taka hna an thawh chhan pawh ka hre ta; an ṭhenawmte an awh vang a ni; hei pawh hi ho tak a ni, thli man tum ang mai a ni. Thawh peih loh vânga rilṭâma thih chu âtthlâk tak a ni tih a ni a. Thli man tum anga, ṭhûm neih tuma phili sek ai chuan hahdam taka vei khat neih a ṭha zâwk. Vân hnuaiah thil ho dang ka hmu bawk. Fa pawh nei lo, unau pawh nei lo, mahni chauhva awm si, rim taka thawk reng mai, hausa inti ngai lo a awm, a duhzâwng pawh a ei ngam lo va, tu tân nge a thawh tih pawh a ngaihtuah lo. A va hovin a va retheihthlâk thlâwn êm_ !” [Thuhriltu 4:4-8].

 *3. Itsikna chu sual dangah a pakai zel* 

Itsikna chuan thil engkim leh mitin a tichhe vek thei. Bible chuan hetiangin a sawi, “ _Îtsîkna leh mahni hmasialna awmnaah chuan buaina leh sualna chi tinrêng a awm ṭhîn_ .” [Jakoba 3:16]

Kan buaina laimu ber chu thinlung lam harsatna hi a ni. Itsikna chu thinlung lam buaina a ni. 

Itsikna chu chibai inbukna ang deuh a ni. Vawi tam tak mite i itsik a, i chibai bukna chu kawng a bo ṭhin. Itsikna chuan, “Chu chu ka it a ni. Ka duh e. Ka hmangaih a ni. Chu chu ka nunpui duh a ni,” tiin a sawi. Chutiang thumal chiah chu Pathian chibai bukna ṭawngkam atana i hman tho chu an ni. Chutiang chiah chuan Pathian aia thil dang chibai i buk chiah chuan milem chibai i buk tihna a ni. 

I nun aṭang khan itsikna chu i thai reh duh em? Chu zawhna chu mahni inzawt chungin bul ṭan ang che: “Eng nge chibai ka buk? Pathian chu chibai bukin ka nuna zahngaihna a lantir avang chuan lawmthu ka hrilh em? A nih loh leh, ka khawsak phung, thil neih leh larnate hi chibai ka lo buk zawk em? 

Pathian chu tihtak zeta i rin a, i tana a tha ber a thawk dawn tih i hriat chuan, “ _Krista Isuaa a hausakna ropui tak aṭangin in mamawh tinrêng a pe ang che u_ ” tih chu i nei thei ang [Philipi 4: 19], tichuan itsikna chu a thamral riai riai tawh ang. 

Ngaihtuah zui atan. 

Engtiangin nge itsikna chu i thinlungah a lo luh theih? A nghawng lian tak chu eng nge ni? 

Itsikna chuan Pathianin danglam bik taka a siam dan che chu a theihnghilhtir che. Pathianin i nuna danglamna a phiar zawm tlat chu eng te nge ni? 

Itsikna chu milem biakna chi khat ang deuh a ni tih hriatna chuan itsikna i thlir dan chu engtin nge a thlak danglam? 

[ *Lettu* : Peka]

Thursday, February 16, 2023

PATHIANIN KHAWNGAIHNA I LANTIR A DUH CHHAN PALI

 _Pathian Ṭhatna Hnuaia Nun Dan_ 

By Rick Warren

February 16, 2023


“Mi khawngaih thei takte chu

an eng a thâwl e;

Khawngaih an la hlawh dâwn si a.” [Matthaia 5: 7]

Mite tute emaw lakah i phunchiar a nih chuan i lakah pawh an phunchiar ve a ni tih i chik ngai em? Midang laka khawngaihna i lantir a nih chuan, i lakah khawngaihna an lantir let em? Mite laka i thil phal a nih chuan i lakah pawh an thil phal ang ti raw? Mite chunga i awm dan ang ang kha i chungah a lo let leh ṭhin ang. 

Chu chu Pathian khawngaihna thuah pawh a dik chiah. 

Isua chuan Matthaia 5: 7 ah hetiang hian a sawi, “ _Mi khawngaih thei takte chu an eng a thâwl e; Khawngaih an la hlawh dâwn si a_ .”

Mahse engvangin nge Pathian chuan mite chunga khawngaihna lantir turin a duh che? Khawngaihna chu eng vangin nge a pawimawh em em? 

 *A chhan chu Pathianin khawngaihna a hmuhtir che.* 

Ephesi 2: 4-5 chuan hetiaang hian a sawi, “ _Nimahsela, Pathian chuan khawngaihna a ngahin, a mi hmangaihna nasa tak avâng khân, kan bawhchhiatnate avânga thi kan nih lai meuh pawhin Krista rualin min tinung ve a (khawngaihnaa chhandam in ni ta e)_ ” tiin. Pathian chuan chu khawngaihna i chan ngei chu midangte hlan chhawng ve ngei turin a duh che. 

 *A chhan chu Pathian chuan khawngaih thei tak ni turin a ti che.* 

Nun awmzia tlangpui hi i hre duh em? Hei hi a ni e: “ _Aw mihring, thil ṭha chu a entîr tawh che a ni lâwm ni? LALPAN a phût che chu eng nge ni? Dik taka thil tih te, khawngaihna ngainat te, Thuhnuairawlh taka i Pathian nêna lên dun te hi a ni lâwm ni?_ ,” tiin [Mika 6: 8]

 *A chhan chu khawngaihna nasa zawk nakin zelah i la mamawh dawn.* 

Tun hun leh vanram i thlen hun inkarah hian vawi tam tak thil i la tisual leh dawn, chuvang chuan Pathian khawngaihna chu i la mamawh dawn. Mahse nangmah pawhin i pek phal loh chu i dawng thei lo vang. Jakoba 2: 13 chuan hetiang hian a sawi, “ _Khawngaihna tel lova thil titu chu khawngaihna tel lova rêlsak a ni ang, mi khawngaih thei erawh chuan rorêlna hlauh tûr a nei lo_ ,” tiin.  

 *A chhan chu khawngaihna lantir chuan hlimna a thlen ṭhin.* 

Matthaia 5: 7 chuan Pathianin mite chungah khawngaihna lantirtuten malsawmna an chan tur thu a sawi a. “Malsawmna” tih thumal chu “hlimna” tih pawh a kawk bawk, chu nihna ziarang chu i lantir uar ang zelin, i lo hlim deuh deuhin malsawmna i dawng tam zel ang. 

 *A chhan chu khawvela mi tam takte hi anmahni tan chauha nung mai an ni* , khawngaihna leh zahngaihna lantirtute chu an ding chang zel ang. Zahngaihna lantir ṭhintu angin miten hria che rawh se, Pathianin i chunga khawngaihna a lantir ṭhin ang zel che chuan, chu chuan chatuan daih danglamna a neihtir ang che!

Ngaihtuah zui atan. 

“Khawngaihna duh” tih awmzia chu eng nge ni? 

Mite chunga khawngaihna i lantir chang chuan Pathianin malsawmna a vur dan che chu i hmu em – thutlukna siam har tak pawh a lo ni thei? 

Kar liam taa khawngaihna tute emaw hnena lantir theihna i neih mahse i bawhpelh tak chu han ngaihtuah the. Lo ti ta la, in dinhmun engtiang takin nge a thlak danglam ang? 

[ *Lettu* : Peka]

Wednesday, February 15, 2023

CHHUNGKAW INTAWHKHAWM LEHNA DUHAWM BER

  _Pathian thatna hnuaia nun dan_

— Rick Warren 

— Feb 14, 2023


“Lalpa nena chhungkaw intawhkhawm lehna hun lian tak a la awm dawn a. Chuvangin heng thu hian inthlamuan tawn rawh u.” 1 Thessalonika 4:17-18 (The Message)

Ka la naupan deuh lai chuan, chuti takin vanram hi ka lo ngaihtuah ngai lo. Pakhatnaah chuan – khawvelin a sawifiah danah hian a nawm loh hmel ka ti. Pahnihnaah chuan – kawng thui tak kal ngaiin a lang bawk. Pathumnaah chuan, chutah chuan hmelhriat pakhatmah ka nei lo bawk. Mahse tunah chuan vanrama awm hmelhriat tam tak ka nei ta. Anmahni hmuh leh an zinga awm chu ka nghakhlel hle tawh a ni. 

Vanramah chuan, Lalpa hmangaih vetu kan chhungte nen kan intawkkhawm leh dawn a. Pathian chhungte zawng zawng chu an kal vek dawn a ni.

Tu nge vanramah chuan biak hmasak ber i chak? Ni e, Lalpa chu i hmuin chibai i buk hmasa ber dawn a ni. A dawtah tu nge hmuh i chak? Ringtu tawh phawt chu an awm vek dawn. Mosia kha biak i chak em? I be thei ang! Abrahama emaw Mari emaw Paula emaw te kha? Nangma chungchang erawh chu ka hre lo, mahse kei chuan Jona hnenah thu zawh tur tam tak ka nei a ni. Kristian mi lar tak tak te leh scientist te leh khawvel hruaitute leh ram leh hnam hrang hrang atanga lo kalte i hmu thei dawn a ni. Anni nen chuan chatuanin in titi thei ang!

Bible chuan, “Lalpa nena chhungkaw intawhkhawm lehna hun lian tak a la awm dawn” a ti. 1 Thessalonika 4:17 (The Message). A hlimawm tur zia mai chu, i ngaihtuah thiam em?

Ka nu chu vanah a awm a, ka pa pawh a awm a, ka u Jim-a pawh a awm a, kan naupang ber Matthew-a pawh a awm a. Vanramah khian rawngbawlpui tur mi tam tak ka nei a ni. Thian leh chhungkua thihna paltlang tawh tam tak ka neih avangin, vanram chu ka tan chuan a duhawm lehzual ta a ni.

1 Thessalonika chuan heti hian a chhunzawma, “Lalpa nena chhungkaw intawhkhawm lehna hun lian tak a la awm dawn a. Chuvangin heng thu hian inthlamuan tawn rawh u” a ti. 1 Thessalonika 4:18 (The Message)

Isua awmpuina hnuaiah i thiante leh i chhungte nen in intawkkhawm leh dawn a ni tih i hriatna chuan a tiphur che em? Lusun an awm chuan chu thu chuan kan thlamuan thin tur a ni. Anni leh an hmangaihten Isua chu Chhandamtu a ni tih an rin chuan, thihna chu a tawpna a ni lova. Nakinah an la hmu leh dawn a ni!

Hei tak hi kan chunga Pathian thatna chu a ni, chuvangin he kan hringnunah hian chatuan hmunah chhungkaw intawhkhawm ropui tak a awm leh dawn a ni tih tluka beiseina lian a awm chuang lo.   

Ngaihtuah zui atan

* Pathian chhungte chu vanah kan inhmu leh dawn a ni tih i hriatna chuan chanchin tha hrilhna kawngah engtin nge a tihphur che? 

* Pathianin chatuana awmna tur in min pe dawn a ni tih hi i nunah tu nge hrilh i bat? Engtin nge i tih ang le?

* He khawvel i chhuahsan hnuah vanramah chuan eng chungchang nge sawia i inrin? 

*Chhungkaw intawhkhawm lehnaah chuan i tel ve ang em?*

Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi :8-9. 

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

*[Lettu: Sangpuia]*

HEI HI PATHIANIN A HMANGAIH DAN CHE CHU A NI

  _Pathian thatna hnuaia nun dan_

— Rick Warren 

— Feb 15, 2023


“He miah hian Pathian hmangaihna kan chungah a lo lang ta, amah avanga kan nun theihna turin Pathianin a Fapa neih chhun khawvela a rawn tirhah hian. He miah hian hmangaihna a awm, keimahnin Pathian kan hmangaih kan ti a ni lo va, amahin min hmangaih a, kan sualte thupha chawina ni turin a Fapa a rawn tir ka ti a ni zawk e.” 1 Johana 4:9-10

Hringnunah hian thil danglam reng a awm a – inlaichinna te, hna te, hriselna te leh sum dinhmun te. Mahse thil pakhat danglam ve ngai lo a awm a: Pathian hmangaihna hi a ni.

Pathian chuan eng ang mi pawh ni la a hmangaih che a.  I hlawhchhamnate, i kehsawmna leh i sualnate hian a hmangaihna che chu a hliah thei chuang lo. Pathian hmangaihna chu lungpuia innghat ang mai a nghet tlut a ni tih hriain i hringnun hmang ang che.

Bible-a chang lar tak, Johana 3:16 chuan, “Pathianin khawvel a hmangaih em em a, chutichuan a Fapa mal neih chhun a pe a” a ti.

Pathianin a hmangaihna che chu a satliah lova, “em em” tih hi a telh kher a ni. Chu chuan Pathian hmangaihna nasatzia a hril a ni. Pathian hmangaihna chu thilphalna leh hmangaihna chungchuang a ni a, lak bo theih rual a ni lo. Mihring ngaihtuahna piah lam a ni. I thatni leh i chhiatni pawhin a hmangaih che a. A chunga i sual lai leh i rinawm lai pawhin a hmangaih tho che a ni.

A hmangaihna che chu vawi leh khata i hrethiam nghal mai lo pawh hi a pawimawhna a ni a. I rilru ngaihtuahna zawng zawnga hriatthiam ngai a ni. Hmangaihna hi Pathian zia a ni a. Pathianin a hmangaih theih tur lei leh van leh thil dang zawng zawng hi a siam a. Chumi hnuah a hmangaih theih ngei tur nangmah a siam che a ni. 

Dik tak chuan, Pathian chuan min hmangaihna tak tak chu Isuaah a ti lang a ni. Bible chuan, “He miah hian Pathian hmangaihna kan chungah a lo lang ta, amah avanga kan nun theihna turin Pathianin a Fapa neih chhun khawvela a rawn tirhah hian. He miah hian hmangaihna a awm, keimahnin Pathian kan hmangaih kan ti a ni lo va, amahin min hmangaih a, kan sualte thupha chawina ni turin a Fapa a rawn tir ka ti a ni zawk e.” 1 Johana 4:9-10

Mi thenkhat chuan an hmangaih thu che an sawi a. Mahse Pathian chuan a hmangaihzia che chu a ti lang thung a ni. A hmangaih nasat em che avangin a tuar a. A Fapa a hlan hmiah a. Isua a thih khan a hmangaihzia che a lanna chu, i tel lova nun ai chuan thih a thlang zawk a ni.

Bible chuan hmangaihna dik tak a sawi chu – i nuna i hman chhuah ve theih tur hi a ni. Hmangaihna takah chuan inhlanna a tel a. Hmangaihna tak chuan a pe vek a. Hmangaihna tak chuan chatuan atan a tuar zel a ni.

Chutiang hmangaihna chu Pathian chauhin a nei a ni. Ban pharin a thatnate, a lainatnate leh a hmangaihnate ti lang turin a lo nghak che a ni.   

Ngaihtuah zui atan

* Eng vangin nge i nunna chu thil hloh theih emaw lak bo mai mai theih loh emawah innghah a ngaih? 

* Eng hunah te nge Pathian hmangaihna i rinhlelh fo thin?

* Pathian hmangaihna Isuaa lo lang chuan, engtin nge mi dang i hmangaih ve a tul a ni tih a hrilh che? 

*Pathianin a hmangaihzia che chu Isuan a ti lang*

Krawsa Isua a thih khan, i thil tihsualte leh i la tihsual tur thlengin a ngaidam vek tawh che a. Pa Pathian nena inlaichinna nei thei turin a siam phah che a ni.

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtik niah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

*[Lettu: Sangpuia]*

Monday, February 13, 2023

ENGVANGIN NGE HLAUTHAWNG LOVA HMALAM HUN I HMACHHAWN THEIH?

 _Pathian ṭhatna hnuaia nun d

- Rick Warren 

- February 13, 2023



"Matheilovin ṭhatna leh hmangaihna tawp ngai lo chuan  ka dam chhûng zawng hian mi zui zel ang a. Lalpa inah chatuanin ka chêng tawh ang." (Sam 23:6, NLT)


Engtik niah emaw chuan i lei taksa an la thlah liam ve ang, mahse chu chu i tawpna tur erawh a  ni hauh lo. Vanramah emaw meidilah emaw, chatuanin hun i la hmang dawn. I lei taksa a thi anga mahse i thi lovang, chatuan daih tura siam i nih tlat avangin.


Chatuan hian engtia rei nge a daih dawn le? Ele, chatuan a daih dawn!


Bible-in engvangin nge ringtute chu an hmalam hun atana inring tawk ber an ni tur tiin min hrilh tlat: _"Chutichuan, taksaa kan awm chhung hian Lalpa hnenah kan awm lo tih hriain . . . muang takin kan awm, ka ti, taksaa awm lova Lalpa hnena awm kan duh zawk."_ (2 Kor. 5:6, 8)


Thih i inpeih hma loh chu he khawvela nun dan tur i thiam lovang. Mi â chauhin kan nuna kan pumpelh theih hauh loh thil hi inbuatsaih miah lovin a tawn tlang ang.


Engtik niah emaw i la thi ngei dawn. Isua pawmtu i nih chuan vanramah i kal ang, _"Lalpa inah chatuanin ka chêng tawh ang"_ ti turin (Sam 23:6). Vanramah chuan natna, lungngaihna, tawrhna, rilru hahna leh hlauhna ata i zalen tawh ang. _"An mit ata mittui zawng zawng a hrufai ang a; thihna a awm leh thei tawh lo vang a, Lungngaih te, ṭah te, nat te pawh A awm leh tawh hek lo vang; thil hmasate chu a ral ta"_ (Thupuan 21:4).


Ringtute tan chuan thihna hi kaisanna a ni. Buaina awm tawh lohna hmuna kaisanna a ni.


Chu thutak chuan i tan engkim a thlang danglam tur a ni! Nun hi  a awlsam dawn a tihna erawh a ni lo. I hlim reng anga, engnge i tihtur i hre zel ang, sualah i tlu tawh ngai lovang tihna a ni lo.


Mahse hlau miah lovin hmalam hun i hmachhawn zel dawn tihna a ni lo. Pathian i buaina lian ber, chhandamna a chingfel tawh a. Kalsan ngai lovang che, a kiangah kumkhuain i la chêng zawk ang?


Ngaihtuah zui atan.


Engtinnge i hma huna i inrin tawkna hian i nunah nghawng a neih?


Isua zuitu a thih hian engvangin nge kan khawhar lungngaihna karah beiseina kan neih theih?


Vanram hi eng ang chiah nge a nih i rin? Bible hian vanram hi eng angin nge a sawi?


*Chatuan hi khawiah nge i hman dawn?*


Bible chuan Fapa Isua Krista kal tlanga Pathian i rin chauhvin vanram i thleng thei a ti. Vanram hi hlawhchhuak chi a ni lo. _"Khawngaihna avânga rinnaa chhandam in ni a, chû chu nangmahni lama chhuak a ni lo, Pathian thilpêk a ni zâwk e; thiltih avâng pawh a ni hek lo; ni  se mi tûpawhin inchhuan phah nân an hmang mai dâwn asin."_ (Ephesi 2:8-9)


Isua hnena i nun hlan i duh chuan hetiang hian ṭawngṭai bul han ṭan ta che:

"Lalpa duhtak, I Fapa Isua Krista ka rin chuan ka tihsual zawng zawngte min ngaihdam a, ka nun chhan ka zir ang a, tichuan, engtik niah emaw I chatuan hmun a min thlen ve i tiam a.


"Ka tisual a ni tih ka puang a I ngaihdamna ka dil a ni. Isua kha ka tan a thi a a tho leh a ni tih ka ring a. Isua chu min chhandamtu a pawm a, vawiin aṭang hian a hnungzui ve ka duh e. Ka nun min hruaiin I duhzawng min zirtir ang che. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


[Lettu: Mapuia Fanai]

Sunday, February 12, 2023

PATHIAN CHUAN I THATNA TURIN A THAWK THIN

 _Pathian Thatna Hnuaia Nun Dân_

- Rick Warren

11/2/2023



"Matheilovin thatna leh ngilneihnain ka dam chhûng zawng hian mi zui zel ang a: Tichuan LALPA inah kumkhuain ka awm reng ang." Sam 23:6.


I nat lai mek emaw, chin than i neih lai leh rilru lama harsatna i neih laite pawhin Pathian chuan a hmu reng che a ni.


Lal Davida chuan Sam 23:6 ah chuan, "Matheilovin thatna leh ngilneihnain ka dam chhûng zawng hian mi zui zel ang a" a ti. 


Davida khan, "Thatnain mi zui zel ang" a tih khan, "thil tha chauh ka chungah a thleng ang" a tihna a ni hauh lova. Davida khan mi dangte ang bawkin mitha chungah pawh thil tha lo a thleng ve thin a  ni tih a hre ve reng a. A lakah dik lo taka tih ni mah se thinlung taka Pathian zuitu a la ni cheu a ni. A laka tisual miah lotu lakah pawh sual nasa tak a tisual ve tho a ni. 


Davida khan a sawi tum ber chu, thil hi eng anga tha lo, sual leh harsa pawh ni se, thil chu eng anga hnawk pawh ni se, Pathian chuan kan thatna turah a chan thei a ni. A thatna chuan min zui zel a, eng ang pawhin lo peng thin mah ila.


Pathianin ringtute hnenah thutiam tha tak mai a tiam chu: "Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria" (Rom 8:28).


Ka chunga thleng engkimah hian, Pathian kan hmangaih a, a remruatte kan zui hian kan thatna turin a thawk thin a. He chang hian engkim hi a tha a ni a ti lova. Mahse,  ringtu i nih chuan, Pathian remruatna leh a ruahmanna atan engkim a thleng thin a, chu chu thil tha tak a ni.


He thil awmzia chu harsatna te, tuilairapa awmna te, hneh nihna te, leh hringnuna chhiatna lo thleng thei reng rengte hi Pathianin a duhna tih hlawhtlinna atana her danglam theih loh a nei lo.


Chu chu i rin chuan, i nuna thil i thlir dan a ti danglam anga, chu chu Pathian leh mi dang nena in inlaichinnate, i nunhlui te, i hmalam te, vawiin a i tawn zawng zawng thilte nen hian. I nunah Pathianin hna tha a thawh i rin chuan, huaisen takin fiahna harsa ber pawh i hmachhawn thei zel ang.


Ngaihtuah zui atan...


Eng ang harsatna, tuilairapa awmna emaw hneh nihna emaw hmachhawn theih loh hial ang maia ngaih i neih le?


Rom 8:28 atang hian chutiang dinhmunah chuan Pathianin engtin nge chhang let tur chea a duh che?


I nunah Pathianin thil tha lo thil thaah a chantir ngaihtuah let la. I nunhluiah eng vangin nge Pathian rinawmna chu hriatreng a tul le?


(Lettu: Msa)

PATHIAN HMANGAIHNA CHUAN A UMZUI ZEL CHE

 _Pathian ṭhatna hnuaia nun dan_

- Rick Warren 

- February 12, 2023



"Matheilovin ṭhatna leh hmangaihna tawp ngai lo chuan  ka dam chhûng zawng hian mi zui zel ang." (Sam 23:6, NLT)


Nimin khan Pathian ṭhatnain a zui zel dan che kan zir tawh a. A chang ngaiah tho khan lal Davida chuan Pathian hmangaihna tawp ngai lovin a umzui zel che tih min hrilh.


Nu leh paten an fate hnungah an zui a an thlithlai reng lai han mitthla chhin teh. Natna, chin ṭhan leh rilru hahna duhawm loh tak tak i tawn laiin i kiangah Pathianin a awmpui che a i harsatnate sukiang turin a pui che a, a hmangaihna tawp ngai lo chuan a awmpui reng che a ni tih a hrilh reng che.


Chumi awmzia chu hmalam hun zawhna nena dai lut lovin mak tihna nen i dai lut thei ang. Engpawh thleng se i hnenah Pathian a awm zel ang. A pui zel ang che: _"Matheilovin ṭhatna leh hmangaihna tawp ngai lo chuan  ka dam chhûng zawng hian mi zui zel ang a. Lalpa inah chatuanin ka chêng tawh ang."_ (Sam 23:6, NLT)


Pathian ṭhatna chu engnge a nih a, a hmangaihna tawp ngai lo pawh chu engnge a nih le? Kan phu miah loh thil ṭha kan nuna a rawn thlen hi Pathian ṭhatna chu a ni a. A hmangaihna tawp ngai lo - a khawngaihna chu - kan phu ngawih ngawih thiam loh channa a la let hi a ni.


Hei hi hre reng rawh:

• Pathian ṭhatna chu mamawhte min pein min venghim ang.

• Pathian khawngaihna (hmangaihna tawp lo) chuan i sualte a ngaidam ang.

• Pathian ṭhatna chuan i mamawh apiang a pe ang che.

• Pathian khawngaihna chuan a hnem ang.

• Pathian ṭhatna chuan a ṭanpui ang che.

• Pathian zahngaihna leh hmangaihna chuan a tidam ang. 


Pathian thutiam, _"Lalpa inah chatuana"_ i chên tur thute thleng hian lo chhinchhiah rawh. Tichuan, he damchhunga a hnung i zuina tura i mamawh apiang a pek che bakah i tan hmun nuam tak a buatsaihsak che chuan a lo nghak reng che a ni.


I nun chhungin Pathianin a hmangaihnain a umzui zel ang che, tichuan a hnenah chatuanin i chêng tawh ang.


Chu chu chanchin ṭha ber chu a ni!


Ngaihtuah zui atan.


Eng ang suangtuahna lian nge i neih? Pathian ṭhatna leh hmangaihna chuan chu i suangtuahna tipuitling tur chuan a pui dawn che tih i rinna chuan eng angin nge nitin i hmalaknaah a puih che?


Zawhna ni lova thilmak beiseina nen zawk a hmalam hun thlir chuan nangmahah eng nge awmzia a neih?


I laka Pathian ṭhatna leh a thilpek che ang kha engtin nge midang i hrilh chhawn ang? 


[Lettu: Mapuia Fanai]

Friday, February 10, 2023

LAINATNA ZIARANG PASARIH

 _Pathian Ṭhatna Hnuaia Nun Dan_

By Rick Warren

February 10, 2023



“ _Chung lam aṭanga finna lo chhuak chu a hmasa berah a thianghlim a, a dawtah a nêlawm a, a nunnêm a, a tihnuam bawk a; khawngaihnain a khat a, rah ṭha a chhuah ṭhîn; hleih a nei lo va, a vervêk hek lo_ .” [Jakoba 3: 17]


Lainatna chu lunghlu ang mai a ni a; ziarang hrang hrang a nei ṭhin. Vawiin hian chu lunghlu ziarang pasarihte chu kan zirho dawn a ni. Lainatna i lantir a nih chuan mite nena in inlaichinna chu thlak danglam a ni dawn a ni tih ka tiam a che.


 *1. Lainatna tih awmzia chu mite chetsualna dawhthei taka pawm a ni.* Bible chuan Jakoba 3: 17-ah chuan hetiang hian min hrilh, “ _Chung lam aṭanga finna lo chhuak chu a hmasa berah a thianghlim a, a dawtah a nêlawm a, a nunnêm a, a tihnuam bawk a; khawngaihnain a khat a, rah ṭha a chhuah ṭhîn; hleih a nei lo va, a vervêk hek lo_ ,” tiin. I fin deuh deuh ang zelin, i dawhthei deuh deuhin lainatna i ngah tial tial ang. 

 *2. Lainatna awmzia chu i chenpuite zinga natna nei apiang ṭanpui a ni.* Lainatna tel miah lo chuan nangmah i in hmangaih angin i vengte i hmangaih thei ngai lo vang. Thufingte 3: 27 chuan, “ _I theih phawt chuan mamawhte tân i thil ṭhate ui suh_ ,” tiin min chah. 

 *3. Lainatna tih awmzia chu mite hun ṭha siamsak a ni.* Miten an tihnat che chuan anmahni chhan let emaw anmahni kalsan mai emaw chu i duh fo ang. Mahse, Bible chuan hetiang hian a sawi, “ _Huatna te, thinurna te, tauhna te, ânna te, sawichhiatna zawng zawng te nangmahni aṭangin paih bo rawh u, sualna zawng zawng nên_ ,” [Ephesi 4: 31] tiin. 

 *4. Lainatna chu nangmah tinatu che chunga ṭhat chhuah a ni.* Lainatna chu mite mamawh phuhruksak chu a ni, an phu ang ang pek erawh a ni lo. Chu chu eng vangin nge i tih ang? A chhan chu, chu chu Pathianin i chunga a tihdan chiah a ni: “ _In hmêlmate chu hmangaih zâwk rawh u, an chungah thil ṭha ti ula, hmuh kîr leh beisei kher lovin pûktîr rawh u; tichuan, lâwmman tam tak in hmu ang a… In Pain mi a khawngaih ṭhîn ang bawkin nangni pawhin mi khawngaih ṭhîn rawh u_ .” tiin [Luka 6: 35-36].

5. *Lainatna chu in pawisawitute chunga zahngaihna lantir a ni.* Mite nena inhnialnaa chak zawk nih aiin Krista ke bula mite hruaitu nih chak zawk ang che. Juda 1: 23 chuan hetiang hian a sawi, “... _ṭhenkhat mei ata chhan chhuah ngaite chu hnûk chhuak thuai rawh u; ṭhenkhat chu hlau chungin khawngaih ula, an tisa bawlhhlawh kai silhfênte chu ten rawh u_ .” 

6. *Lainatna chu mite ngaihsak loh tute emaw zarzawm chu a ni* . Hei tak hi ngaihtuahna fim tak hmanga lainatna tiin ka sawi, a chhan chu, ṭhian nei lo tute emaw chu ṭhianah i siam a, khawtlanga mite ngainat loh ho chu i zarzawm tihna a ni. 


Isua chhiahkhawntute leh mi duh loh ṭhenkhat kianga chaw a ei laia pharisaiten an chhuahchhal khan Isua chuan hetiang hian a chhang a nih kha, “ _Inthawina aiin khawngaihna ka duh e,’ tih hi eng tihna nge va zir rawh u. Mi dikte lam tûra lo kal ni lovin, mi sualte lam tûra lo kal ka ni zâwk_ ,” tiin. [Matthaia 9: 13] 


7. *Lainatna chu kalphung aia thil ṭha ngainat a ni.* Rom 13: 10 ah chuan hetiang hian kan hmu, “ _Hmangaihnain vêngte a tikhawlo ngai lo va; chuvângin, hmangaihna hi Dân zawh famkimna a ni_ .” Lainatna lantir i duh a nih chuan, kalphung hmaah i mihringpuite chu dah ang che. Inrelbawlna hmalamah an mamawh chu dah la. Inkhuahkhirhna hmalamah inlaichinna chu dah bawk la. Dan hmaah hmangaihna chu dah bawk ang che. 


Ngaihtuah zui atan. 


Eng vangin nge inhnialnaa chak zawk nih chu Krista bula mite hruai aia kan chak zawk fo? 


Lainatna tih awmzia chu dan aia inlaichinna dah pawimawh tih a nih chuan i hnathawhpuite nena in inlaichin dan chu engtianga thlak danglam tur nge ni ta ang? I chhungte nena in inlaichinna chu engtin nge ni ta ang?


Tun karah hian, natna neite tu emaw chungah lainatna lantir turin engtiangin nge i beih ang?


[ *Lettu* : Peka]

Thursday, February 9, 2023

ṬHATNA LEH NGILNEIHNA CHUAN A ZUI ZEL ANG CHE U

 _Pathian Ṭhatna Hnuaia Nun Dan_ 

Rick Warren

February 9, 2023



“LALPA chuan amah hmangaihtute a vêng ṭhîn.” [Sam 145:20]


Isua chunga i rinna i nghah chiah chuan i hmalam thilah hlauh i neih a ngai lovang. A ṭhatna leh ngilneihna chuan a awmpui zel ang che. 


Berampu Ṭha chu i zui a nih chuan i hmaah a tiang leh talhtum kengin a hruaiah ang che. Tichuan, ran rual hnunga beram vengtu ui an awm angin – ṭhatna leh ngilneihna – chuan a zui zel che ang a, khuarkhuruma i inbilh loh nan an veng tlat ang che. Chung beram vengtu uite chuan Berampu Ṭha venna kawnga i kal theihnan an khalh zel ang che.  


 *Pathian ṭhatna chuan a enkawl ang che.* Pathianin a venna che tel lo chuan mit khapkar mai pawh a liam ngai lo tih i hria em? Pathian chuan a ngaihsak tlat che a, a chhan chu a siam chhan che chu nangmah a hmangaih theih nan che a ni a. I nun pumpui chu a hmu tlang vek hial a ni. 


Sam 145:20 chuan hetiang hian a sawi, “LALPA chuan amah hmangaihtute a vêng ṭhîn,” tiin. 


A veng che a ni satliah mai lo va, a humhim tlat bawk che a ni. Bible chuan hetiang hian a sawi, “I kalna apianga vêng tûr chein Vântirhkohte chu a tîr ang a,” tiin [Sam 91: 11]


Pathian venhimna chuan i chungah thil ṭha chauh a thlentir ang tihna a ni lo. Tuarna leh beidawnna te i hmachhawn chang a awm tho ang. Mahse, Pathian chuan i chunga thil thleng hrang hrang karah chuan thil ṭha a thlentir ang – a hnathawh dan chu i dam chhung huna i hmuh hman leh hmuh hman loh chu thuhran a ni thung. 


 *Pathian khawngaihna leh lainatna chu nangmahah a thawk.* Bible chuan Isaia 60: 10 chuan hetiangin a sawi, “Ka thinurin ka han vel tak na che a, duhsak chein ka khawngaih leh ta che,” tiin.  


Khawngaihna tih awmzia chu Pathianin i phu loh thil a pek che chu a ni. Lainatna chu Pathianin i phu reng pawh a pek loh che chu a ni. I thil lo tihsual tawh zawng zawng, hlawhchhamna leh daisual tawhnaah hremna i phu a, mahse Pathian chuan ngaidam chein Krista avangin a khawngaih ta che a. Chu chu lainatna a ni. 


Zahngaihna chu Pathian mizia a ni bawk. Zahngaihna chu a hmuhtir chak che! A ning ngai lo che. A chau ngai lo bawk. A aia tam zawk duha i let nawn fo a nih pawhin a ning ngai lo che. Pathian chuan, “Awle, thawhtanah, nilaiah, zirtawpah, ka ṭhatna ka lantir ang a, thawhlehah leh ningani chuan zahngaihna ka lantir ang a, inrinni leh Pathianni chuan in awm awmin lo awm rawh u,” a ti mai ngai lo. Chutiang chu a ni ngawt lo.  


Thudik chu hei hi a ni, Pathian chuan nitinin a awmpui che a, a ṭhatna leh ngilneihna chu i chungah a lantir reng ṭhin. 


Karlehah eng nge thleng dawn mi tu mahin an hre thei lova, nakum emaw tun aṭanga kum 10 hnu thil lo la thleng tur chu an hre thei lo lehzual ang. Mahse, i hmalam hun i hmachhawn mek lai chuan, hei hi i vawng reng thei ang: Pathian chuan i nunna chu luang liam zawih zawih khawpin a ṭhatna leh ngilneihna chu a chantir thei ang che. Engmah hlauh tur a awm lo. 


Ngaihtuah zui atan. 


Sam 103: 2-13 kha chhiar la, Pathianin a zahngaihna a lantir dan kawng hrang hrangte chu ziak chhuak ang che. 


Pathian zahngaihna dik taka i thlirna chuan engtiangin nge i nuna i lungawi leh lungawi lohna chu a nghawng theih? 


Pathian chuan i thatna turin engkim a thawk thin a ni tih chu i ring takzet a nih chuan engtiangin nge atana thil ti turin huaisenna i neih theih ang? 


[ *Lettu* : Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...