Tuesday, January 31, 2023

I INHUMHIMNA KHA HLAN RAWH

  _Pathian ṭhatna hnuaia nun dan_

— Rick Warren 

— Jan 31, 2023


“Mi dotute mit hmuhah ka hmaah hian dawhkan i buatsaih thin a.” Sam 23:5

Lal Davida khan beih a tawh awmzia kha a rilru, ṭawngka leh taksa zawng zawng khan a hre chiang a ni. La ṭhalai tak a nih lai khan zawlnei Samuelan Israel lal ni turin hriak a lo thih tawh a, mahse chutihlai chuan Saula chu lal a ni reng a ni. Davida chuan Saula rawng chu rinawm takin bawl mah se, Saula chuan lal la ni mai tur chu a thik a, thah a tum a ni. Davida chu Saula hnen atang chuan pukah a biru zak zak a, chutihlai chuan ama chungchangah dawt thuthang a awm reng bawk a. Davida chuan lal Saula lakah ṭawngkam bawlhhlawh reng reng a chhakchhuak ngai lo. A diriam ngai hek lo – a chhan chu Pathianin a rilru ang pu mi Davida chu lal ni turin a buatsaih lawk a ni.

Davida chuan, “Mi dotute mit hmuhah ka hmaah hian dawhkan i buatsaih thin a” a ti a ni. Sam 23:5   

Davida chu thawpik takin a awm em ni? Ni lo e! Amah leh amah inveng turin a theihna engmah a hmang lo, amah veng turin Pathian chu a ring tawp mai a ni.

Beihna i tawh mek lai te, mi hriatthiamloh i nih lai te leh mi nuihsawh i nih lai te a Pathiana innghat tlat tur chuan rinna nasa tak leh tlawmna te neih a tul a ni. Chutiang dinhmuna i awm chuan, chet laka, engemaw tak tih i tum awm e. Nangmah beitu chu engtin nge i beih let ang? Ni lo e. Pathian chinfeltir zawk ang che. 

Pathian chu nangmah venghim turin ring ang che.

Pathian chuan nangmah venhim ringawt che a duh tawk lova, nangmah nena lendun a duh a ni.

“Nangmaha an rinna nghat zawng zawngte erawh chu nangmahah chuan lawm sela, i hum thin avangin hlimin au kumkhua hlawm rawh se: i hming ngainate pawh chu nangmahah chuan lawm takin awm rawh se.” Sam 5:11

Sam 23 leh 5 na te hi ruaiṭhehna emaw inpawlkhawmna emaw a hun lo deuha buatsaih angin a tarlang ve ve a. Beih kan tawh mek lai chuan a hun lo niin kan hre thin a ni.

Tunah hian do i nei mek a nih chuan, Pathianin a hria. I hnathawh tur i bei mek a ni maithei. I hriselna chungchang i bei mek maithei. I hminghliau tur i bei mai thei. I zahawmna turin i bei maithei. I phur thar theihna turin ruai buatsaih turin a duh che a ni.

Indona mualah chuan inpawlkhawmna buatsaih turin a duh che a, ruai buatsaih turin a duh che a ni. Chutiang infuihna chu tunlai hunah hian neih theih a ni a. I manganna te, i natnate thunun turin Isua hnen i thlen chuan a thutiamah chuan i chawl dawn a ni.

Pathian fa i nih avangin, vana Pathian chuan a chhuang hle che a ni. Sawiseltu chuan hmusitin, diriamin, nuihzatin, sawisel che mahsela, i nuna Pathian malsawmna hi chu an titawp thei lo a ni.

Bible chuan, “Ruai ṭheh inah chuan kei mi hruai a, ka chunga a puanzar chu hmangaihna” a ti. Hla thlan khawm 2:4 

Ngaihtuah zui atan

* Tunah hian eng indonaah nge i awm mek? Eng hmelmain nge titlu mek che?

*I inhumhimna Pathian hnena hlan turin i eng nge hlan ngai? 

* Indo laia chawlhna chuan engtin nge chak zawka do turin a puih che?

*[Lettu: Sangpuia]*

Monday, January 30, 2023

PATHIANIN A THLAHTHLAM NGAI LOVANG CHE

 _Pathian ṭhatna hnuaia nun dan

- Rick Warren 

- January 30, 2023


"Ka beramten ka aw an hre ṭhin, kei pawhin anni chu ka hria, anni chuan mi zui ṭhin; an hnenah chatuana nunna ka pe a; kumkhuain an boral lo vang a, tuman ka kut ata mi chhuhsak hek lo vang." (Johana 10:27-28)


Mahniin i inchhandam thei lo - mahse mahnia inchhandam tur i ni lo! I tih theih chu Pathian kuta innghat chunga, "Lalpa, i hnenah ka inpumpek e- ka nuna ṭha leh ṭha lo zawng zawngte nen hian. Ka famkim lo va, mahse nang mi famkim i ni, chuvang chuan chhandamna min pek hi ka pawm e" tiin.


Chutia i tih chuan i chhandamnaah chuan i chawl hahdam thei ang. 


Mahse engtik niah emaw Pathian kut ata kal bo i duh hun a lo thleng ang. "Engnge ka rin pawh hi ka hre lo ve" tiin hnunglam hawi duhna i nei ang. Mahse Pathian chuan a hmangaih em che avangin thlah hmasak che a tum ngai lovang.


Isuan heti hian a ti, _"Ka beramten ka aw an hre ṭhin, kei pawhin anni chu ka hria, anni chuan mi zui ṭhin; an hnenah chatuana nunna ka pe a; kumkhuain an boral lo vang a, tuman ka kut ata mi chhuhsak hek lo vang. Anni mi petu, ka Pa chu, mi zawng zawng aia ropui ber a ni a; tuman Pa kut ata chu an chhuhsak thei lo vang."_ (Johana 10:27-29)


Pathian kuta i vawn rual rual khan "chatuana nunna" Pathianin a pek che kha i hloh mai mai thei lo. Engvangin maw? A chhan chu i chhandamna kha i thil sual tihte aia i thil ṭha tihte a tam zawk lamah a innghat lo tlat. Isua Krista hlutnaa teh a ni zawk.


Mi ṭha ve pangngai nih avanga vanram kai tur ni ta ila krawsa Isua thihna te, a tawrhna te, a lungngaihna te leh a natnate engmah lo mai an ni tihna a ni dawn a. Isua Krista tel miah lova vanram i kai theih dan tur awm sela chuan chu chu Pathianin a thlang ngei ang. Mahse kawng dang a awm lo tlat.


Isua chu "boralte zawnga chhandam turin a lokal" (Luka 19:10), chumi awmzia chu khawvel hi a bo tihna a ni. Mi zawng zawng hi vanramah kan lut vek dawn lo. Mi zawng zawng vanrama lut vek tur ni ila Isua kha leia a lokal a ṭul miah lovang. Tin, hetianga ,_"sual lamahte thi tawhin felna lamah kannun theih nan amah ngeiin thingah khan a taksain kan sualte a phur a"_ tih hi a ngai lovang (1 Pet. 2:24) .


Pathianin kuta i nun i kawltir khan chatuan thlenga chelh tur chein a intiam a ni. Hei vang hian a ni i chhandamnaah i hahchawl thei ka tih. Krista i rin tlata mahni theihnaa vanram kai tur i ni lo tih i inhriat chuan, tumahin, Setana a ni emaw, lungngaihna a ni emaw, dam lohna a ni emaw, khawtlangin emaw i chhandamna an ruksak theil lo che. Berampu ṭha kuta awm i ni tlat.


Ngaihtuah zui atan.


I chhandamnaah Pathian puih i tum khan engtinnge khawngaihna i hriatthiam dan a lantir?


I chhandamnaa i hahchawlhin i nunah engnge danglamna thleng ang?


Sam 23:1-ah chuan, _"LALPA chu mi vengtu a ni a; ka tlachham lo vang."_ tiin kan hmu. Krista tih loh engnge he khawvelah hian i mamawh ni a i hriat?


*Pathian hmangaihnaa hualhim leh a thutiam* hlen lo ngai lo kha i duh chuan Beram vengtu hnuaiah chêng rawh.


He ṭawngṭaina hmang hian bul i ṭan thei e: "Lalpa, misual ka ni tih ka hria a, i ngaihdamna ka rawn dil e. Isua Krista hi u Fapa a ni tih ka ring a. Ka sual tana thiin nangin i kai tho leh a ni tih ka ring. Min chhandamtu a pawma a hnung zui ka duh. Isu, ka nunah lo lut la, ka ngaihhlut zawngte, ka dah pawimawh thilte, ka damchhan te leh ka kalnate lo tidanglam la. I duh ang miah min siam ang che. Isua hmingin, Amen. 


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


[Lettu: Mapuia Fanai]

Sunday, January 29, 2023

PATHIANIN A EN DAN ANG CHEIN MIDANG PAWH EN VE RAWH

 _Pathian ṭhatna hnuaia nun dan_

- Rick Warren 

- January 29, 2023


"Rûkrû chu ru tur leh tihlum tur leh tichhe tur lo chuan a lo kal lo. Kei zawng nun an neiha, chhenfakawm taka an neih theih nâna lo kal ka ni. Kei hi Berâmpu Ṭha ka ni. Berâmpu Ṭha chuan a berâmte tân a nunna a pê."(Johana 10:10-11)


Mi kan thlir dan hi  kan rilru put hmang hian a hril fo ṭhin. Mipui kan hmuh hian awlsam takin kan thinurin emaw kan dawhthei lo fo emaw ṭhin. Mahse, Isua erawh chuan mipuite chu a hmuhin, _"Vêngtu nei lo berâmte anga chau leh baihvâi tak an nih avângin a khawngaih ta êm êm a"_ tiin a sawi (Matthaia 9:36).


Chutiang chiah chuan Pathianin a en che: khawngaihna nen. A tihnual lo che a. A chawisang che! Eng ang pawhin thinrimin, nain emaw phatsan niin emaw inhre mahla, Isua chuan lainatna nen a chhang let zel ang che. A tel lova engmah kan nih loh zia a hria, _"Vêngtu nei lo berâm angin."_


Berampute tel lo chuan berâmten chhantu an nei lo. Tin pawh an nei lova, an tlan chak lova, an ha pawh a hriam em em lo. Berampute venhimna an mamawh a ni 


Bible-ah hian berâmte chu Pathian mite chhinchhiahna an ni a. Johana 10:10-11 chuan, _"Rûkrû chu ru tur leh tihlum tur leh tichhe tur lo chuan a lo kal lo. Kei zawng nun an neiha, chhenfâkawm taka an neih theih nâna lo kal ka ni. Kei hi Berâmpu Ṭha ka ni. Berâmpu Ṭha chuan a berâmte tân a nunna a pê."_ tih kan hmu.


.Hetiang khawngaihna hi Isua hnen aṭang chauha lo chhuak a ni, kan Berampu ṭha chu. Lainatna leh midangte hriatthiamna nen hian a in ang lo.


Lainatna chuan, "I na chu pawi ka ti hle mai" a ti a, chutah chuan a tawp ṭhin. Midangte dinhmun hriatthiamna hi a thuk deuh zawk a, "Ka natpui hle mai che" a ti thung a. Mahse, khawngaihna erawh chuan, "I natna ti bo turin engpawh ka ti ang" a ti thung a ni.


Chu chiah chu a laimu, Lal Isuan a nunna, a thihna leh thawhlehna hmanga a lantir chu ni. I natna ti reh turin engkim a huam a kraws-a thihna pawh thleng dawn mahse, a kut leh ke a perek a kilh ngai hial mahse. Khawngaihna hian engkim a huam a ni.


Isuan leia a lokal chhan a sawi chu, _"Mihring Fapa meuh pawh rawngbawlsaka awm turin a lo kal lo va, rawngbawl tur leh mi tam tak tlan nana a nun pe zawk turin a lo kal a ni si"_ (Marka 10:45). Hetah hian "rawngbawl" tih leh "pe" tih hi lo chhinchhiah bik rawh. Isua hnung zui tih awmzia an rawn tarlang a ni.


Mi thinlung hliamte leh ṭanpui ngaite Isua thlir dan angin i thlir ve em? An natna damna tur a nih phawt chuan tiin hmangaihna leh lainatnain i khat em? 


Bible-in Isuan mite na tuar a hmuhin lainatna nen a thlir ṭhin tih min hriattir. Pathianin amah ang turin a duh che a ni 


Ngaihtuah chhunzawm atan.


Tu chungah emaw lainatna i lanṭir ṭhum kha han ngaihtuah let teh. Engtiinge i chhan letna khan i lainatnaah nghawng a neih?


Pathian chu lainatnaa khat a ni tih hi i hmufiah lawk lo em? Engvangin?


I nunkawng eng berah nge Pathianin midangte chunga lainatna rilru pu tam tura a duh che ni a i rin?


[Lettu: Mapuia Fana]

Saturday, January 28, 2023

ISUAN A BERAMTE A ENKAWL DAN

 _Pathian Ṭhatna Hnuaia Nun Dan_

- Rick Warren

28/1/2023



"A ta zawng zawng a chhuahtir veleh, an hma a hruai a, beramte chuan amah an zui thin a, a aw an hre si a." Johana 10:4


Nimin khan Pathian thatnain a kawhhmuh dan che leh a ven dan che kan zir a. Vawiinah chuan Pathian thatna hlawkpui dan kawng thum : Beram pu Isua kaltlanga a hruai dan te, a venhim dan te, a chhan dan te kan zir dawn a ni.


*Pathian chuan a hruai che.* Kan rilru a buai emaw kan vahbo chang hian, Isua chuan a zawng hmu che anga, a hruaikir leh ang che. Beramte ang mai hian, kan vak bo thin a. Pathian chuan Isua chu zawn leh chhanchhuah hna thawk turin a rawn tir a, "bote zawnga chhandam turin" tiin (Luka 19:10).


Eng vangin maw? Mitin hi Pathian lakah kan hlut theuh vang a ni.


Pathianin i bona ata a hruaikir che chuan a hrem kher lovang che a, mahse a thunun ang che. Berampuin beramte an vahbo tawh lohna turin an ke an ṭawnsak ang hian, Pathian chuan i ke a tibai mai thei che a ni, i bo tawh lohna turin.


*Pathian chuan a veng che a. I hlawhchham emaw i tlu emaw, Isua chuan a chhanchhuak chein, siamthatna kawng a zawhtir ang che.* 

Kan vakbo mai a ni lova, kan inchhuiha kan tlu fo. Thu lawmawm chu, Isua hnenah chhanchhuak tur leh siamthar turin kan kal zel thei hi a ni.


Isua chuan, "Nangni zingah tupawhin beram pakhat nei ula, chu chu Chawlhniin khuarkhurumah tla ang sela, tunge chelhin kai chhuak lo vang che u? 

Beram pakhat ai chuan mihring pakhat chu a va hlu zawk em! Chuvangin, Chawlhniah tihthat a thiang e," a ti a (Matt 12:11-12). Ransa tlute chhanchhuah hi thil nihphung a nih chuan, i tluk changin Pathian pawhin a ti ngei ang le.


*Pathianin a chhandam che. Chhan tur che a i rin ngam chuan, Isua chuan a thutiam hlen turin a thawk ngei ang.* 

Mahni inchhandam hi i theih zawng hna a ni lova. I tih tur chu Pathian hnenah i kut nghata, "I ta vek ka ni e - ka chhiatna, thatna leh mawi lohna zawng zawngte nen" tih mai hi a ni. Thlah lo tur chein Pathianin a hmangaih em em che a ni.


Isua chuan tihian a sawi a, "Anni mi petu, ka Pa chu, mi zawng zawng aia ropui ber a ni a; tuman Pa kut ata chu an chhuhsak thei lo vang" tiin. 


Isua chu i chhandam tu-ah i rin chuan, mahni ta mai i ni tawh lova. I bo emaw, a ngaihna hre lova i awm emaw, khuarkhuruma tla ang maiin i awm emaw pawh nise, Berampu tha chu i tan a awm reng tih i ring thei ang. A hruai ang chia, a veng ang chia, a chhanhim ang che.


Ngaihtuah zui atan...


A lak ata i vahbona atangin engtikah nge Pathianin a hruaikir che? I bo leh lohna turin engtin nge a thunun tawh che?


Pathianin dinhmun tha lo atangin engtikah nge a hruaichhuah che? Chumi chuan engtin nge i rinna a tih danglam le?


Pathian chuan kalsan lo tur che leh zui zel tur chein a intiam a. Chumi hriatna chuan i thutlukna siam engtin nge a tih danglam?


(Lettu: Msa)

Friday, January 27, 2023

ISUAN A VENGIN A HRUAI CHE

 _Pathian Ṭhatna Hnuaia Nun Dan_ 

By Rick Warren

January 27, 2023


“Rûkru chu ru tûr leh tihlum tûr leh tichhe tûr lo chuan a lo kal lo; kei zawng nun an neih nân, tam taka an neih nân lo kal ka ni. Kei berâm vêngtu ṭha ka ni; berâm vêngtu ṭhain berâmte tân a nun a pe.” [Johana 10:10-11]

Beramte reng reng chu ran mahni inveng thei lo an ni a, chuvangin berampu chuan anmahni venna leh kaihhruaina hmanrua an inchhawp zel ṭhin. Talhtum chu anmahni venna hmanrua atan a hmang a, tiang kawm erawh anmahni khaichhuahna leh puihna atan a hmang thung. 

Keini ngei pawh hi beram bo ven leh kaihhruai ngai ang kan ni – tichuan Isua chu kan tana Berampu Tha ni turin leiah a lo kal hial. “Rûkru chu ru tûr leh tihlum tûr leh tichhe tûr lo chuan a lo kal lo; kei zawng nun an neih nân, tam taka an neih nân lo kal ka ni. Kei berâm vêngtu ṭha ka ni; berâm vêngtu ṭhain berâmte tân a nun a pe,” tiin. [Johana 10:10-11]

Berampuin beramte venna leh kaihhruaina atan talhtum leh tiang a hmang ang chiah khan, Pathian chuan ven che a, kaihhruai che a tum ṭhin. Chutiang chuan kawng hnihin a ṭhawk thin: 

*Amah i zui chuan Isua chuan kawng dikah a hruai che.* 

Khawpui lian ṭhenkhat Paris ang te chu hruaitu tel lova i tlawh a nih chuan, thil pawimawh tak tak i hmaih nual ang, a chhan chu nangmah mai chuan en tur ber i hre mai dawn si lo va. 

Chu chu i nunah ngei pawh a dik ang. Hruaitu i mamawh – berampu – i hmaa kal tawh chu i mamawh a ni. Isua, Berampu Tha chu i mamawh, i hmalama kal a, nangmah hma khalh theitu tur chu. Bawng vengtu nen chuan an danglam viau, bawng vengtu chuan hnung lam atangin an rante an khalh ṭhin. Isua chuan i hnunglam aṭang chuan a nawrlui lo ang che. I hmaah kalin “Ka tih dan hi en la. Ka kalna kawng hi en rawh,” a ti ang che. 

Johana 10: 4 chuan hetiangin a sawi thung, “Ama ta zawng zawng a chhuahtîr zawh chuan an hma a hruai a, berâmte chuan amah an zui ṭhîn, a aw an hriat avângin,” tiin.

*I natnate a hnen i thlen chuan anin a khawngaih ang che.* 

Isua chuan min khawngaih ṭhin, a chhan chu a tel lo chuan engmah kan nih lohzia a hriat vang a ni. Matthaia 9: 36-ah hetiangin kan hmu, “Mipuite chu a hmuhin, vêngtu nei lo berâmte anga mangang leh chavaia an awm avângin a khawngaih ta êm êm a.” Greek ṭawng bul lamah chuan khawngaih tih hi Isua chu mipuite natnaah chuan na vein anmahni ṭanpui a duh tihna a ni.  

Chutiang chiah chuan Isua bula i natnate i thlen chuan, a hnar mai lo ang che; a lo kuangkuah che ang a. Inkiltawih suh la, a tidam ang che. 

Pathian ṭhatna avang chuan Isuan chuan a hruai chein a veng che. Isua chu kan tan Berampu Tha a ni, “Mihring Fapa pawh hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe zâwk tûra a lo kal ang hian,” tiin [Matthaia 20: 28] 

Naktuk lamah chuan Pathian ṭhatna hnuaia nun hlawkna kawng thumin kan zirho leh ang: engtin nge min hruai a, min ven a, min tlan tih thute chu. 

Ngaihtuah zui atan. 

Nangmah hruai turin i hmaah Pathian chu a kal ngei niin engtik laiin nge i hriat? Chu i thil tawn chuan engtin nge i rinna a sawhngheh? 

Isua khawngaihna chuan engtin emaw tal i nun emaw mi dang nun emawah chuan damna a thlen nia i hriat? 

Isua chuan engtiang hawiin nge a hruai che nia i hriat? I hnaah? I chhungkuaah? I vengteah? In kohhranah? Mite nena in inlaichinnaah? 

*Lalpa chu min Vengtu a ni i ti thei ang em?*

Pathian hmangaihna dai ve ngai lo leh thutiam phelh ngai lo chu chan i duh chuan chu Berampu Tha venna hnuaiah chuan intulut ang che. 

He ṭawngṭaina tawite hmang hian inhlan ang che: “Duh tak Lalpa, misual ka ni tih ka hria a, i ngaihdamna ka rawn dil a che. Isua chu i Fapa a ni tih ka pawm a. Ka sualte avangin a thiin i kaitho leh tih ka hria. Ka chhandamtu a ni tih ringin ka Lal atan amah zui ka duh e. Isu, ka nunah hian lo chengin ka ngaihhlut zawng, ngaih pawimawh zawng, ka damchhan leh hmabak hawi zawng hi min thlak danglam sak ang che. I duh zawng angin min thlak rawh. Isua hmingin kan dil e. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu* : Peka]

Thursday, January 26, 2023

HLAU SUH!

 _Pathian Ṭhatna Hnuaia Nun Dan_


By Rick Warren

January 26, 2023



“A ni, thihna hlim kawr ruam zawh mah ila, Ka hlau lo vang, Nangin min awmpui si a, I talhtum leh i vêntiangin min thlamuan ṭhîn.” [Sam 23:4]


Vawiin hian eng nge i lungkham ber? Sum leh pai a ni em? I hrilselna a ni em? I leiba a ni em? I fate an ni em? I hmalam hun ngaihtuahin i buai em? Dik tak chuan tun lai khawvelah hian manganpui tur thil a tam tawh hle a ni. Mahse Pathian chuan kawr ruam thim ber i paltlang lai pawhin i bulah a kal ve dawn tih a tiam che. 


Thil chhinchhiahtlak tak mai chu Bible-ah hian “Hlau suh” tih thumal chu chang 365 laiah kan hmu. Pathian chuan kum khata ni awm zawng zawng daih “hlau suh” tih thuchah min pe tihna a ni. “Hlau suh” tih thuchah chu ngaithla fo turin min duh tihna a ni.


Ka hlauhna leh manganna hmunah chuan eng vangin nge Pathian chuan a thuchah chu a sawi nawn fo a ṭul? A chhan chu kan natna leh buainaah te hian Pathian chuan thiam loh min chantir emaw min hrem emaw tih ngawih ngawih turin min ngaihtir fo. Chu chu a dik ber lem lo. Isua hi a finfiahna a ni.   


Pathian zahngaihna leh khawngaihna i hriat thiam hnu chuan i hmalam hun avanga phang taka i awm a ngai tawh lo vang. Pathian chuan nangmahin i tihhlawhtlin kher a phut miah lo. I thil lo tihsual tawh zawng zawng leh la tihsual tur zawng zawngte chu phurin i bat a tlak zo tawh. Kraws-ah khan a man a lo pe tawh a ni. Tichuan, thil ṭha lo a lo thlen hunah, hetianga i ngaihtuah hi a ngai lo vang, “Pathianin phuba a la a ni.” A nih loh pawhin, hei hi hria ang che, “A ni, thihna hlim kawr ruam zawh mah ila, Ka hlau lo vang, Nangin min awmpui si a, I talhtum leh i vêntiangin min thlamuan ṭhîn,” tiin. [Sam 23:4]


Heng Bible thute hi sawiin vawilehkhatah i hlauhnate chu bo duak tura beisei chi a ni lo vang. Heng Bible chang chungah hian i ṭawngṭai nawn tluk tluk a ngai ang nangmaha mihrinna a lo lan chang apiangin. Mahse, ṭawngṭai zel rawh. Pathian thutiamte chu nangmah leh nangmah kha inhrilhnawn ang che.  


An tlawlh ve ngai lo!


Ngaihtuah zui atan. 


I nuna lungkham tur a lo lan chang chuan Pathian thua a eng thutiam ber nge i chanvo atan i chhal theih ang? 


Eng angin nge Pathian chuan a hualhim che? 


Isua krawsa a tuarna chuan engtiangin nge i hmalam hun hlauhna ata a venhim che? 


 *Isua chu i hmalam hun atana i beiseina a ni.* 


Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: I kâin Isua chu Lalpa a ni tih i ṭana, mitthi zîng ata Pathianin a kai tho tih i thinlunga i rin chuan, chhandam i ni ang. Thinlunga ring chu thiam chantîr an ni a, kâa ṭan chu chhandam an ni bawk a.”  [Rom 10:9-10]. Isua avangin, i hmalam hun chu i hlauh a ngai tawh lo vang. 


Ama hnenah chuan i nun hlan i huam tawh em? He ṭawngṭaina hmang hian bul ṭan ang che: 


“Lalpa duh tak, i thu chuan i Fapa, Isua Krista ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.


“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 


[ *Lettu* : Peka]

Wednesday, January 25, 2023

ÊNG CHU EN TLAT RAWH

  _Pathian thatna hnuaia nun dan_

— Rick Warren 

— Jan 25, 2023


“A ni, thihna hlim kawr ruam zawh mah ila, thil tha lo reng reng ka hlau lo vang; nang ka hnenah i awm si a; i talhtum leh i tiangin mi thlamuan thin a ni.” Sam 23:4

Mi tam zawk thawpikna chhan chu chânna vang a ni thin. I hna te, i hriselna te, i hmingthatna te i sum emaw i hmangaih tak emaw i chan thei a ni. Heng zawng zawng bakah hian i nuna harsatna dangin a belhchhah phei chuan i thawpikna chu a zual zel ang. Chu kan channaah chuan a sawhkhawk langsar tak pahnih a awm. Pakhatna chu hlauhna a ni a, a dang leh chu lusunna hi a ni.

Lusunna hi a tha a ni. Lusunna chu nunna thar kan neihna tura kan insiamremna a ni. Dik tak chuan lusunna lo chuan nun thar chu kan tem thei dawn lo tihna a ni. Lusun khawharna chuan a kiansan thei lo che, nangman i kal chhuahtir a nih ngawt loh chuan.  

A dang lehah chuan hlauhna a ni, hlauhna erawh chu thil tha lo a ni thei. Bibleah hian “Mangang suh” tih te, “Lungngai suh” tih te, “Mittui ti tla suh” tih emaw “tap suh” tih emaw hi vawi khat mah a lang lova. “Hlau suh” tih erawh hi chu a lang a ni. Vawi 365 lai a lang a ni! Lusunna chuan min tichhe thei lova, hlauhna erawh chuan min tichhe thei a ni.

Sam 23:4-ah Davida chuan, “A ni, thihna hlim kawr ruam zawh mah ila, thil tha lo reng reng ka hlau lo vang; nang ka hnenah i awm si a; i talhtum leh i tiangin mi thlamuan thin a ni” a ti a ni.

Davida khan Beramputen Beram ven nan tiang leh talhtum an keng ziah thin a ni tih a hria. Chutiang chiah chuan Pathianin venhim theihna a nei a ni tih a hre bawk a ni. Chuvangin thihna hlim kawr ruamah pawh Pathian a ring tlat a ni.

Thihna hlim kawr ruam i zawha, hrehawm ti taka i awm mek a nih pawhin Pathianah rinna i nghat thei a ni. Hunin awmzia a neih loh lai leh, eng thil mahin awmzia a neih loh lai te, ruam atang chuan kawng thui tak zawh tur a la awm a ni tih kan hriat lai pawhin Pathian chu a rinawm a ni.   

Thihna emaw lungngaihna emaw hlim leh kawr thuk tak i zawh lai pawhin he chanchin tha hi lo hre reng rawh. Eng tel lo chuan a hlim ringawt chu a awm thei lo tih hi. Thil hlim i hmu a nih chuan, a awmzia chu eng chu a lo hnai hle tawh tihna a ni.

Thihna emaw eng hlim ruam pawh i zawh a nih pawhin, a chhanna chu, chu hlim lam chu han hawi la, eng chu en rawh le. A chhan chu, Eng – Isua, Khawvel Entu chu i en chhung chuan, thil hlim chuan a ti hlau tawh lo vang che. 

Davida angin, thihna hlim kawr i zawh lai pawhin, Pathianah rinna nghat la, tawngtai rawh, “Ka thlarau ka chhungah a chauh lai khan, nangmah ngeiin ka kawng chu i hria a.” Sam 142:3

Ngaihtuah zui atan

* Eng hlimte nge tun hnaia i hmachhawn mek? Chung hlimte chu eng vanga tihbaiawm viau nge an nih?

*Eng vangin nge hlauhna hian mi a tih mangan thin nia i hriat? 

* Bible chang i vawn hian hlauhna i hmachhawnnaah engtin nge a puih theih ang che?

*[Lettu: Sangpuia]*

Tuesday, January 24, 2023

I THIL HRIAT ZAWNG ZAWNG HI DIK VEK LO

 Pathian ṭhatna hnuaia nun 

— Rick Warren 

— Jan 24, 2023


“Mi mâwl chuan thu tin a ring a, Mi remhria erawh chuan a kalna a en tha thin." Thufingte 14:15

Tunlai hian i phone emaw TV emaw i en nasat lutuk chuan thu chi hrang hrang inang lo tak tak i dawng ṭhin ang. Thil pawimawh deuh mai chu i thil hriat zawng zawng kha a dik vek lo tih hi a ni.

Bible in Thufingte 14:15 ah, “Mi mâwl chuan thu tin a ring a, Mi remhria erawh chuan a kalna a en tha thin" a ti.

Internet, social media, TV, leh radio a thusawi nazawngte hian an thusawi an hrechiang vek kher lova. Ngaihthlak tlak an ni vek lova. Ngaihthlak tur thliarfel pawh a ngai ṭhin.

Mi ṭhenkhat chuan thil thleng ṭhenkhat an sawina chu remchangah lain an duhzawng lamah keuh thluk an tum ṭhin. Mi ṭhenkhatin hun khirh a lo thlenin politics emaw sum leh pai lamah remchanna lei tum an awm bawk ṭhin a. Mipuite chu thutlukna siam vat vat turin an sawi ṭhaih ṭhin. Chutiangah chuan tlulut lo turin fimkhur rawh! 

Thufingte 14:8 chuan, “Remhre finna chu mahni awm dan hriat hi a ni a, Mi âte âtna erawh chu bumna a ni" a ti.

Bible chuan hei hi min hrilh nawn chamchi a, harsatna a lo thlenin thutlukna siam leh chet chhuah a ngaia, chung hunah chuan thudikah innghat la, thudik lo, a lem emaw hlauhna emaw rilru sukthlekah innghat suh.

Harsatna a lo thlen hun pawha i mamawh zawng zawng finna leh fimkhurna turte Pathianin a pe vek tawh che a ni. Pathian chu harsatna karah i fiah thei ang a, harsatna karah pawh finna pe chein kawng dikah a hruai thei ang che. Isua zuitu i nih avangin, Thlarau Thianghlim chuan a hun mil zelin a kaihruai ang che a. Ngaihtuahthiamna a pe ang che. Chu chu Pathian thilpek a ni a. I chhia leh ṭha hriatna i hman a ṭul a, harsatna lakah pawh i inven fimkhur a ngai dawn a ni.

Isua zuitu kan nih angin, rinna nei mi ringawt ni lovin. Thudik duh mi kan ni tur a ni.

“Thu dik chu lei la, hralh leh tawh suh; A ni, finna te, zirtirna te, hriat thiamnate nên." Thufingte 23:23

Ngaihtuah zui atan

* Social media a i thil hmuhte chu mi dang hnenah i thawnchhuah hmain engtin nge a dik leh dik loh i finfiah ṭhin?

* Harsatna tawh laia mi dang tumah ring lo mi chu engtin nge i hrilhfiah ang?

* Isua zuitu kan nihnaah hian thudik duh mi kan ni tia min hriat hi engvangin nge a pawimawh em em?

*[Lettu: Sangpuia]*

Monday, January 23, 2023

HEI HI THAWNTHU TAWPNA A NI LO

 _Pathian ṭhatna hnuaia nun dan_

- Rick Warren 

- January 23, 2023



"Lehlam lehlama neksawrin kan awm a, nimahsela kan thaw a ipik si lo; mangangin kan awm a, nimahsela kan bei a dawng si lo; tihduhdahin kan awm a, nimahsela kalsanin kan awm si lo; vuak thlukin kan awm a, nimahsela tihboralin kan awm si lo . . . Lalpa Isua kaithotu chuan keini pawh Isua hnenah min kaitho ve dawn a, nangmahni nen min dintir dawn tih kan hre si a." (2 Kor. 4:8-9, 14)


I hmalam hunah engnge lo thleng dawn i hre miah lo a hlauhnain a man che a, chutah tak chuan i thawnthu kha tawp mai dawn niin a lang mai thei.


Mahse Bible chuan heti hian min hrilh,  _"Lehlam lehlama neksawrin kan awm a, nimahsela kan thaw a ipik si lo; mangangin kan awm a, nimahsela kan bei a dawng si lo; tihduhdahin kan awm a, nimahsela kalsanin kan awm si lo; vuak thlukin kan awm a, nimahsela tihboralin kan awm si lo . . . Lalpa Isua kaithotu chuan keini pawh Isua hnenah min kaitho ve dawn a, nangmahni nen min dintir dawn tih kan hre si a."_ (2 Kor. 4:8-9, 14)


I nun kha fiah lo riau leh hmabakah engnge lo thleng dawn tih i hriat loh laiin he thudik hi hre reng rawh: Chak lo thei i ni lo! Engpawh lo thleng se a tawpah hnehna i chang ngei ang. I nunna hial pawh chan mahla Isua Lal leh Chhandamtu a i pawm phawt chuan Pathian awmna hmunah  i kal nghal ang.


Vanram i thlen hun chuan i thawnthu kha a bul ṭanna chauh a ni ang.


Serial movie, a ṭhen tawp apiangah a tawp khar fel lova a changtupa hi a thi mai ang em aw tur chi i en tawh em? Thawnthu mahnise boruak sang tak a siam thei.


Mahse chu movie chan bung hrang hrang chu hmun khatah awm vek ta se hmun khatah, _disc_ -ah emaw thun a ni ngei ang. I hlauthawng hauh lovang, a chhan chu a changtupa ber kha a la dam reng dawn tih i hre tlat. Chu serial movie chu tan a nih leh hunah pawh a la tawp dawn lo tih i la hre fo. A changtupa chuan hun khirh tak pawh paltlangin a dawt lehah a inlan zel ang. 


Chutiang chiah chu hringnun hi a ni. Hun khirh tak paltlang mek mahla chu chu i nun tawpna tur a la ni lo tih i hre tlat. Chatuan nun i thlir  a nih chuan hun harsa karah pawh beiseina nen nun i hmang zel ang. 


Engtikah emaw, vana Isua i hmuh hunin i na te, i dam lohna te, lungngaihna te, hahna te leh i tawrhna te a reh ang. Hetiang hian vanram chu i thlir tur a ni: _"An mit ata mittui zawng zawng a hrufai ang a; Thihna a awm leh thei tawh lo vang a, Lungngaih te, tah te, nat te pawh A awm leh tawh hek lo vang; Thil hmasate chu a ral ta,” a tih ka hria."_ (Thupuan 21:4)


He kan nunna hi thawnthu tawpna a ni lo. Hmalamah engnge lo thleng dawn kan hre lo, mahse tu kutah nge kan hmabak hi a awm tih erawh kan hria. 


Ngaihtuah zui atan. 


I nun eng kawng berah nge i thil thlir dan, hlauhna aṭanga beiseinaah i thlak ang? 


Lungngaihna leh hlauhnain a man hun chein Isua hnen ata beiseina nei turin engin nge hrilh nawn ang che?


Engvangin nge ring lo miten kristiante chuan harsatna karah pawh beiseina leh inrintawkna an nei a ni tih an hmuh a pawimawh?


*I thih hunah khawnge i kal dawn tih i chiang em?*


Engtikah emaw i nunna a la tawp ang- i thawnthu erawh a tawp lovang. Isua hi i Chhandamtu a i pawm chuan chatuanin a hnenah vanramah i awm ang. Engtinnge i thih hnuah i chanchin a la awm i rin?


Bible chuan mi zawng zawngin thil kan tih sual thu leb sual man chu thihna a ni tih min hrilh. Mahse Pathianin a hmangaih em che avangin i sual tlan nan a Fapa Isua a rawn tir a, Pathian chhungkuaa i tel theih nan leh thihna hlauhna ata chhanhim tur chein.


Pathian chhungkuaa tel tura i inpeih chuan heti hian ṭawngṭai rawh le: "Lalpa, ka thih hunin i hmaah ka chanchin ka sawi dawn tih ma hria e. Ka hnawl ṭhin che tih ka puang e. I chungah thil sual tiin, i duhzawng ni lovin mahni duh angin ka awm ṭhin. Inthlak danglam ka duh e, tun aṭang hian. Sual kalsana i lam hawi ka duh e.


"Ka sual man ka pek a ngaih lohna tura Isua i rawn tirh avangin ka lawm e. I ngaihdamna ka phu hauh lo tih ka hria. Lalpa, i khawngaihna chauhin min chhandam thei tih ka hria e.


"Isu, min hmangaih avangin ka sualna zawng i kutah i lak avangin ka lawm e. Vanrama lut tlakah min pawm avangin ka lawm a, min chhandam turin ka ngen a che. Ka sualte leh thih ka hlauhna lak ata min chhandam turin ka dil a che. Isu ka ring a che. Engtikah emaw vanramah kan thawnthu nangmah nena ziak chhunzawm tura min hruai ka beisei. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


[Lettu: Mapuia Fanai]

Saturday, January 21, 2023

I HARSATNA LEHLAMAH ENG NGE AWM?

 _Pathian Ṭhatna Hnuaia Nun Dan_

- Rick Warren

Jan 21, 2023



"Kan hrehawm nep tak, tun mit khap kar chhung chauhva awm tur hian ropuina nasa tak chatuan atan min siamsak nasa tulh tulh a ni; 

thil hmuh theihte hi en lovin, thil hmuh theih lohte chu kan en zawk si a; thil hmuh theihte rei lo te atan a ni a, thil hmuh theih lohte erawh chu chatuan atan a ni si a." 2 Kor 4:17-18.


Tlakchhiatna a thlen hian, paltlang turin fing taka thil i tih a ngai thin. Pathian thu ngaithlain, Pathian thu hawi zawnga finchhuah i mamawh a, thutlukna dik siamin, chung hun chu a la liam dawn tih hre chunga hmalam pan i mamawh a. A awm reng dawn lo a ni.


Bibleah chuan 1 Petera  4:12-ah, "Duh takte u, in zinga fiahna nasa tak lo awm, nangmahni fiahna tura in chunga lo thleng hi, thilmak in chunga lo thleng angin mak ti suh u" a ti. 


He khawvelah hian, fiahna kan tawng fo thin a. Thil chiang sa a ni. Khawvela sual a luh atang khan, engmah hi a famkim thei ta lo. He leia engkim mai hi a famkim lova, heng - sik leh sa, sum leh pai, i taksa, i remruatna tha ber thleng pawh hian. Sualin engkim a khawih pawi avangin engmah he leiah hian tha famkim a awm lo a ni.


Isaia 24 chuan, "Lei hi a tapin a chuai e, khawvel hi a chauvin a chuai e, leia mi chungnungte hnuaiah chuan a chau ve.

Lei hi a awmnate hnuaiah chuan a bawlhhlawh zo ta; dante chu an bawhchhiat a, thuruat chu an tihdanglam a, kumkhaw thuthlung chu an bawhchhiat avângin. Lei hi a keh chhe vek a, lei hi tihralin a awm zo va, lei hi nasa takin a nghing a" a ti. (Isaia 24:4-5, 19).


He leiah hian engkim hi hloh, chhia leh chiangkuang lovah a chang zova. Thilsiamte an rûm a ni. Pathian hian eng vangin nge sual hi he leiah hian a awm ve a phal i ti mai thei, a chhan chu Pathianin duhthlang tura min duh vang a ni.


Tin, sual thlen tura duhthlang thin chu keini hi kan ni a. Mahni hmasial, mahni indah pawimawh em em, khawtlang leh kan chhehvela harsatna thlen thintute kan ni.


He lei hi Vanram a la ni lova. Chumi avang chuan a ni Isua khan Lal tawngtainaah, "Vana an tih angin, leia miin ti ve rawh se" (Matt 6:10) tia min zirtir ni. Vanram chu hmun famkim, natnate, lungngaihna te, rilru hahna te, nguinate awm tawh lohna hmun niin, chu Vanram chu he leia tawn kan beisei tur pawh a ni lo. Engtikah emaw chu hmunah chuan i la kal zawk anga, mahse tunah chuan a la thleng lo ve. 


Tuna fiahna i tawn zawngte hi i la paltlang anga. Nakinah chuan ral lehlam atangin Pathianin i harsatna hmuna hna a thawh zawng zawngte i la thlir anga, mak i la ti viau ngei ang.


Chona hmachhawn tur tam tak a la awm anga, dinhmun harsa tawh tur pawh a la tam ang. Mahse he thutak hi i la beisei fan thei ang, "Kan hrehawm nep tak, tun mit khap kar chhung chauhva awm tur hian ropuina nasa tak chatuan atan min siamsak nasa tulh tulh a ni; 

thil hmuh theihte hi en lovin, thil hmuh theih lohte chu kan en zawk si a; thil hmuh theihte rei lo te atan a ni a, thil hmuh theih lohte erawh chu chatuan atan a ni si a" (2 Kor 4:17-18) tih hi. 


Ngaihtuah zui atan...


Thlarau lamah, tisa lamah leh rilru lamah fiahna i tawn mekah hian engtin nge i thanlen ang?


Pathian hian thil thalo hi a thlentir ngai lova, mahse chu thil tha loah chuan tlanna a siam thin. I nunah emaw, midang nunah emaw tlanna a siam i hmu tawh ngai em?


Harsatna i tawh laiin engah nge i beiseina i nghah thin? Chu chuan a vawng thei che em?


(Lettu: Msa)

Friday, January 20, 2023

HRINGNUNAH HIAN RUAM KAN ZAWH HUN A AWM NGEI ṬHIN

 _Pathian ṭhatna hnuaia nun dan_

- Rick Warren 

- January 20, 2023



"A ni, thihna hlim kawr ruam zawh mah ila, thil ṭha lo rêng rêng ka hlau lo vang; nang ka hnênah i awm si a; I talhtum leh i tiangin mi thlamuan ṭhin a ni." (Sam 23:4)


Israel ramah khuan Jerusalem aṭanga Jeriko panna kawngah ruam thûk tak mai, Thihna Hlimkawr Ruam an tih chu a awm a. Lal Davida khan a dam laiin chu ruam chu a paltlang fo a ni tih a lang. Jeriko kawnga ruam ṭhenkhatte chu a mawng lamah a zuih thla a, feet 800 laia sang te an ni hlawm bawk. Chung ruam mawng aṭanga ni i hmuh theih hun chu chhun lai, kan lu chung zawna ni a awm lai chauh hian a ni. Bible-ah hian ruam tih hi hun thim, beidawnna, hneh nihna leh lungngaihna lam entir nan hman a ni fo ṭhin.


Sam 23:4-ah chuan heti hian kan hmu, _"A ni, thihna hlim kawr ruam zawh mah ila, thil ṭha lo rêng rêng ka hlau lo vang; nang ka hnênah i awm si a; I talhtum leh i tiangin mi thlamuan ṭhin a ni"_. Bible hian Pathian hi hun hlimawm kan tawh lai, tlang chhipa kan lawn chhuah tawh hnu chauha kan hlimpui a ni lo tih min zirtir a. Ruamah hrehawm tam tak i paltlan lai pawhin i hnenah a awm a ni. Ruam chungchangah hian i hriat reng tur thil pathum a awm:


Ruam hi kan nunkawnga tel ve tlat a ni a. Bible-in Deut. 11:11-ah heti hian a sawi, _"In va luah tur ram chu, tlâng te leh ruam leh van ruahtui dawng ram a ni zawk a."_


*Ruam chu a pumpelh theih loh.* Tunah khan ruam aṭangin i lo chhuak chiah a ni thei a, ruam lai takah i awm mek a ni thei bawk, i hmaah paltlang tur a awm a ni thei bawk. He leiah i awm chhung chuan ruam pumpelhna tur a awm lo. Ruam engzat nge i paltlang tih erawh i chhiar thei ang.


*Mi zawng zawng hmaah ruam a awm.* Tumah a hmaih lo. Mi ṭha lote chungah thil ṭha a thleng a, mi ṭhate chungah thil ṭha lo a thleng ve bawk. Khawvel kehchhia leh suala tlu tawha chêng kan ni a, chuvangin harsatna kan tawk ṭhin. Tuman harsatna an pumpelh thei lo. Tumahin natna an pumpelh thei hek lo. Tumahin harsatna tawk lovin nun an hmachhawn lo.


Bible chuan, _"Mi fel hreawmnate chu a tam a, nimahsela LALPAN chung zawng zawngah chuan a chhan chhuak ṭhin a"_ tiin min hrilh. 


*Ruam hi sawi lawk theih a ni lo:* I ruahman thei lo. A hun tur i hre thei lo.  Harsatna hian khel lovin min deng ṭhin. A nihna takah chuan, i ruamte leh i harsatnate chu hun chhe ber i tawh laiin a rawn thleng ṭhin —hun i neih loh lai te, i inrin  loh lai te, leh i remchan loh lai taktein a lo thleng ṭhin.  I mut laiten, i hriselna a ṭhat lai ten, tu mahin an tihbuai loh lai che te in ruam chu thlen tir thei zawk ta la a awlsam viau zawk ang em? Mahse nun hi chutiang chuan a kal lo.  Thufingte 27:1 chuan, _“A tûk lama thil lo awm tûr chhuang suh, chumi ni chuan eng nge a rawn chhuahpui dâwn i hre si lo"_ tiin min hriat nawntir a ni.


Hringnuna ruamah te beisei tur i hriat chuan, chu hun atana inbuatsaih dan tur ṭha i hriain Pathian awmpuina leh ruahmanna rinchhan zel i thiam ang.


Ngaihtuah chhunzawm atan.


Tunah khan khawiah nge i awm: ruamah nge, ruam i lawn chhuak chiah nge, tlang leh ruam inkarah i awm mek nge, tlangchhip i thleng tawh zawk?


Ruam te hmachhawn turin engtin nge rilru, taksa leh thlarauvah i lo inbuatsaih ve?


Engvangin nge Pathian hian tlangchhip a awm ringawt lova ruamte kan paltlang a phal?


[Lettu: Mapuia Fanai]

Thursday, January 19, 2023

TAHNA RUAM I KAL LAIIN, I HRIATRENG TUR THUDIK PATHUM CHU

 _Pathian thatna hnuaia nun dan:_

-Rick Warren [Jan.19, 2023]


" _Thihna kawr ruam zawh mah ila, Thil tha lo reng reng ka hlau lo vang, Nang ka hnenah i awm si a_" (Sam 23:4 NIV).

Tun maiah tahna ruam, thihna hlim kawr ruam chu i zawh lo mai thei e. Mahse, kawng dangah  awmin, kawng harsa leh hrehawmah i awm mek mai thei. I hringnun zin kawngah, chung tahna ruama i awm laiin kawng harsa leh bumboh tak niin, i chunga Pathian thatna chu hre lovin, i lo hmuh hmaih palh thei a ni. Mahse, chung hun khirh tak karah pawh chuan englai pawhin Pathian chu i ring thei a, aman a awmpui reng che  a ni. Ani chuan kawng dang tha zawk kawh hmuh a, hruai a tiam che a ni.

Sam ziaktu chuan, " _Thihna hlim kawr ruam zawh mah ila, Thil tha lo reng reng ka hlau lo vang, Nang ka hnenah i awm si a_" (Sam 23:4) a ti a ni.

Heng thudik pathumte hi chung "thihna hlim kawr ruam" i zawh lai pawhin, i hrereng tur a ni :

*(1)* *Malin i awm lo, Pathian chu i hnenah a awm reng a ni*.

I nuna hlimthla lo lang chuan, eng (light) in a awmpui reng che tih a tilang fiah a ni. Engtin nge hlimthla (shadow) chu i han hmachhawn ang? I hnunga hlimthla lo lang chu en lovin, eng (light) chu en zawk rawh. Isua chuan, "Kei khawvel entu ka ni. Min zui la, tichuan thimah i leng tawp lo vang. Eng (light) ka pek che nunna chu i nei ang" (John 8:12, CEV) a ti.

Bible chuan Pathian chu eng (light) a nih thu sawiin, amahah chuan thim (darkness) reng reng a awm lo, a ti. I nun tibuai a, tichiai leh tihlautu i ngaihtuah thinna chu i titawp tur a ni: chung thil - bills chi hrang hrang, hrisel lohna, fate hun lo kal tur dawna buaina leh lungngaihna te emaw, nu leh pate kum lo tam zel vanga tar chak loh hun tur ngaihtuah chiamna te chu i chawlhsan tur a ni. I hlauhthawnna ringawt ngaihtuah chiamna i tihtawp veleh Pa Pathian chu i ngaihtuah thei ang.

*(2) Pathianin thil tha leh tum mumal zawk a neih vangin, tahna ruama i kal a phal a ni*.

Pathian chuan thilsual (evil) a tithei lo. Harsatna chi hrang hrang, buaina leh lungngaihna emaw hlawhchhamna i hmachhawn mek lai pawhin, Pathian chuan hna a thawk reng a, tahna ruama i awmna chu thiltha tihna turin a siam mek a ni.

Rom 5:3-5 ah chuan, "Kan hrehawmna leh tuarnaah kan lawm a, chung thilte chuan chhelna min siam sak tih kan hria, tuarchhelna chuan nungchang tha leh hriatfiahna a siam a, nungchang (character) tha chuan beiseina a siam a, beiseina chuan zahna min pe dawn lo, a chhan chu Thlarau Thianghlimin kan thinlungah Pathian hmangaihna chu a chhunluh tawh vang a ni" ( ESV).

*(3) A tawpah lawmman chu a awm ang*.

Hlawhchhamna, hlauhna, lungngaihna, buaina, harsatna leh thihna hlim kawr ruam zawh laia Krista tana i rinawm tlatna chuan lawmman a pe dawn che a ni. Hetiang hian vanram i thlen hmain i la ngaihtuah ngei ang, "Engvangin nge maw ka lo sawisela phunchiar viau le? Chung tahna leh thihna kawr ruam zawh lai te chuan engah nge ka lo lungngaih em em le? Pathian chu englaipawhin, a hun tak zelah ka bulah a lo awm reng si a! Ani chu ka tan englaipawhin a tha em em a ni," tiin.

Bible-in a lo sawi angin, "Tuna kan hrehawmna te chu a te thamin, mit khar kar chhung ang lek a ni, a rei dawn lo. Chung thilte chuan ropuina nasa tak min siam sak zawk a ni" (2 Kor. 4:17, NLT), a ti.

*Ngaihtuah zui teh! :*

Tun maiah khan enge i hlauh ber? Eng dawt (lies) thuin nge tihlau zual che?

Tuna tahna leh thihna hlim kawr ruam i kal kai zawhah khan, engtinnge i hun lo kal leh zel turah Pathian thatna i lo tawn hriat tawhte chu i han hman tangkai ang le?

Harsatna leh buaina i tawh laiin, i chunga Pathian thatna leh hna thawh dan i lo tawn hriat tawhte chu engvangin nge, kawng dang i zawh leh hun tur atan a pawimawh ang?

*Vawiinah hian Isua i zui ang em?*

Pathian chuan a thatna chu a Fapa Isua Krista hmanga lan tirin, a tifiah a. Bible chuan, "Pathian chuan khawvel a hmangaih em em a: A fapa mal neih chhun, pakhat chauh chu a pe a, chutichuan tu pawh amah ringtu tawh phawt chu an boral lohva chatuan nunna an neihna turin" (John 3:16, CSB).

Pathianin chatuan nunna a tiam che chu nei turin, amah chu ring turin i inpeih em? I inpeih a nih chuan tihian tawngtai ta che: "Aw Pathian, i Fapa Isua Krista chu ka ring a. Misual leh thil tisual ngaihdam ngai ka ni tih pawmin, ka sualna ka puang a, i ngaihdamna ka dil che a ni. Isua thihna chuan ka sual a la bo tih ringin, amahah chuan nunna neiin thihna ata min kaitho tih ka ring a ni. Isua Krista chu vawiin atangin Chhandamtuah leh Lalah pawmin, amah zui turin ka inpe e. Ka nun min kaihruaiin i duhzawng titurin min tanpui ang che. Isua hmingin ka dil e. Amen".

Hetianga Isua hnenah tawngtaiin i inhlan/ inpe a nih chuan, khawngaih takin email: Rick@PastorRick.com-ah mi han hriattir dawn nia. Isua nen hun leh ni te i hman leh chhiar zel theih nan, i mamawh thilte thawn che ka duh a ni. 

[Lettu: CT Lalrinawma]

Wednesday, January 18, 2023

HRINGNUN CHU INLAICHINNA HI A NI

  _Pathian thatna hnuaia nun dan_

— Rick Warren 

— Jan 18, 2022


“Tlawm taka awm dan ka thiam a, hausaa awm dan pawh ka thiam bawk a; thil tinrengah leh thil zawng zawngah tlai leh riltama awm dan, hausa leh tlachhama awm dan thuruk chu ka hrechhuak tawh. Mi tichaktuah chuan engkim ka ti thei a ni.” Phil 4:12-13

Lungawinate hi mihringte hnenah hian a lo thleng mai bik lova. Mihringte hi buai takin kan awm zawk a. Lungawi erawh kan zir thei a ni. Lungawina zirchhuak tur chuan, kan pamhamna hi kan tihtawp a ngai a ni. 

Philippi 4:12-13 ah chuan, “Tlawm taka awm dan ka thiam a, hausaa awm dan pawh ka thiam bawk a; thil tinrengah leh thil zawng zawngah tlai leh riltama awm dan, hausa leh tlachhama awm dan thuruk chu ka hrechhuak tawh. Mi tichaktuah chuan engkim ka ti thei a ni.” 

Southern California tuifinriat kamah i kal chuan, chunglamah in mawi tak tak i hmu ang, mahse a neitute chu hawi thawveng turin an lo lang khat khawp ang. An thil beisei leh zelte nei turin hna an thawk a ni. Mi tam tak ang thovin, thil neih belh chak reng rengin an khawsa a nih chu. Chu thil neih belh zel chakna chuan i thil lei phak loh thlengin nei turin a ti ang che. A tawpah chuan sum leh pai lamah chin lem i nei lovang a, reiloteah i taksa leh i rilru a chau anga. In inlaichinna a chhe hret hret anga, nakinah phei chuan in mawi takte pawh chu i tan awmzia a nei tawh lovang.

Bible-in Thuhriltu 4:6 ah, “Hahdama veikhat neih pawh buai philia thawka veihnih neih ai chuan a tha a” a ti.

Hringnuna thil ropui berte chu bungrua leh thil neih thatte hi an ni lo.

America ramah chuan pawisa nei lova thih chu thil lungchhiatthlak takah an ngai a. Mahse kal zel turin hun tha an nei tawh lo! I pawisa neih chhun i hman zawh vek hnuah he khawvel i lo chhuahsan a nih pawhin, mi a ni lovin, mi fing ka ti ang che.

Tuman an thih dawn darkarah thil dang an dil ngai lo, an mihringpuite bawk a ni an koh thin ni. Chuvang chuan hringnun hi inlaichinna a ni ber a ni tih i hre thei ang. Chuvang chuan a tlai hmain zirchhuak vat la, i nun thawpikna ata pawh i zangkhai sawt ang.

Hringnun hi hlawhtlinna te, ropuina te leh thil neih rei rui te a ni lova.

Hringnun chu inlaichinna hi a ni.

Ngaihtuah zui atan

* Thil neih zel chu nge inlaichinna tha neih chu i tan pawimawh, i thiante leh i chhungten i thil chhut dan chu an hriatthiampui che em?

* Thil hlu hnutchhiah hi eng nge awmzia ni a i hriat? Eng ang thil hlu nge hnutchhiah i duh le? 

* Paulan Philippi 4:13 ah Krista, chakna min petu avang chuan thil engkim ka ti thei a ti a. Eng chungchang nge Paula hian a sawi nia i hriat?

*[Lettu: Sangpuia]*

Tuesday, January 17, 2023

PATHIAN THU HI I NGHEI THIN NGE I EI THIN ZAWK?

  _Pathian thatna hnuaia nun dan_

— Rick Warren 

— Jan 17, 2023


“I thute hi ka tan a va thlum em! A ni ka kâ atan chuan khawizu aiin a thlum zawk.” Sam 119:103

Ka nupui, Kay-i nena kan inhual hnu khan, thil mak deuh mai kan ti a.  Khawvel chhim leh hmarah kan inthen tlat mai a nih chu. Birmingham, Alabama-ah ani chu a insawna, khawpui chhung kohhranah a thawk a ni. Kei ve thung erawh chu Nagasaki, Japan-ah kohhran din turin ka kal ve thung. Kan inhual chhung zawng khan kan awm hrang deuh reng a ni. 

Khatih hunlai khan Cell phone te a awm ve lova. Japan biak nan minute khatah Dollar 15 a kal zel a, kan rethei bawk si a. Chuvang chuan tih dan kan ngaihtuah a, lehkha kan inthawn ta thin zawk a ni. Nitin lehkha kan inthawn ta thin a. A lehkhathawn dawn chu nitin ka hna a ni ringawt. Lehkhathawn a lo thlen rual rualin ka hawng a ka chhiar thin. Ka chhiar nawn leh thin a, tlar tin mai hi ka bih nawn thin. Tlar thenkhat phei chu ka thai a, ka vawng bawk thin. Ka tana hmangaihna thu a lo dah zawng zawng chu lo khawlkhawm vek ka tum a ni.

Bible-a Pathian hmangaihna thu i chhiarin eng angin nge i dawnsawn ve, lehkha ka dawnsawn ang chiahin i ni ve em le? 

Bible thu i pai zawp loha, finna hrang hrang awmte i lakkhawm thiam loh chuan, Pathianin i tana ruai a siam chu i la ei ve lo tihna a ni ang. Sam 119:103 chuan, “I thute hi ka tan a va thlum em! A ni ka kâ atan chuan khawizu aiin a thlum zawk” a ti. 

Bible-ah hian ei tur tam tak a awm a. Hriselna tur atana thlarau lam chaw a awm a ni.

Pathian Thu hi i ei thin nge i nghei thin zawk? Kar khata vawi khat inkhawma, sermon ngaihthlak hi Pathian Thu eina a ni ngawt lo tih hi i rilruah awm se. Karkhatah vawi khat chauh chaw i ei chuan i thang thei lo emaw i hrisel thei lo ang.

Isuan, “Mihring hi chhang chauhvin an nung lo vang a, Pathian kaa thu tin chhuakin an nung zawk ang” a ti. Matthaia 4:4.

Nitin Pathian Thu i chhiara, i zir a, i ngaihtuah chuan, Pathian Thu thlumzia chu i ei thei ang a, i rilru leh thinlung chu a chawm thei ang. 

Ngaihtuah zui atan

* Sam 119 atang hian i duh lai thlang chhuak la, vawi tam chhiar la. Pathian Thu Chhandamtu thu i chhiarin, chu lai atang chuan ei tur leh thatna i tan Pathianin eng nge i neih tih i hre thei em?

* Pathian Thu chhiarna leh zirna hun zingah emaw tlaiah emaw insiamin danglamna i thlen thei ang em? 

* Bible hi Pathian hmangaihna lehkhathawn a ni tih i hriatin Pathian Thu i chhiar chakna engtin nge a tih danglam?

*[Lettu: Sangpuia]*

Monday, January 16, 2023

PATHIAN HRUAINAAH CHUAN KAL NGAIHNA HRE LOVIN I AWM LOVANG

 _Pathian ṭhatna hnuaia nun dan

- Rick Warren 

- January 16, 2023


"I kawng chu tuifinriatah a awm a, I kalkawngte chu tui zau takah a awm a, I hniakte pawh hmuh theih a ni lo." (Sam 77:19)

Bible chuan Pathian chu i hun tawn apiangah a che reng ṭhin tih min hrilh. Mahse Pathian finna tel lovin i dinhmun i lo bûk mai thiang lo. Ṭawngkam dangin sawi ta ila, i dinhmun hrilhfiah kha Pathian kutah i dah tur a ni. Ani chauh chu thil nihna tak hre thei leh,  thil engpawh a ṭangkaina hmu theitu a ni. Chuvang chuan engkim hi Pathian thu hmanga teh hi a pawimawh em em a ni.

Thil eng emaw chungchangah thutlukna siam lawk thei lovin i awm a ni mai thei, mahni chauh inngaihtuahin i rilru a vak kual vel a, chu chuan Pathian aw a hliah a ni thei. Bible chuan heti hian a ti, _"Pathian chu buaina Pathian a ni lova, remna Pathian a ni zawk si a"_ (1 Kor. 14:33). Buaina Pathian a ni lo. Chuvang chuan buaina i tawhin engnge ni le? I nuna thusawitu kha Pathian a ni lo.


Sum leh paiah emaw, thlarau nunah emaw tisa lamah emaw harsatna lian tak i hmachhawn hun a lo thleng ang. Chutah tak chuan a ni "Lalpa ka sir tawn tawnah tlang lian tak mai a awm a, ka hma lamah ka kaltlang zawh loh ruam a awm bawk a ni" ti a i puan a la ṭul ang. Pathian chhanna nghakin a duhna hmunah tak che a hmu a ni tih a hrilh ang che. Kawng a awm lo ni a i hriatna hmunah tak chuan i tan kawng a siam dawn a ni.


Sam 77:19-ah chuan, _"I kawng chu tuifinriatah a awm a, I kalkawngte chu tui zau takah a awm a, I hniakte pawh hmuh theih a ni lo"_ tih kan hmu.


Tih dan tur i hriat tawh loh hunin Pathianin a hruai ang che. Mahni hriatna leh theihna maia kal turin Pathianin a siam lo che. Mahniin thil i siamṭha leh mai thei a ni tih beisei tur i ni lo. 


Pathianin kawng dika hruai che a duh a, a hnena u inpumpeka a hruaina i dil hun hunin chu chu a thleng ang.


Ngaihtuah chhunzawm atan.


Pathian kaihhruaina dila i ṭawngṭai laia i dilna a chhang lo ni a i hriatin engnge ti tura a duh che ni a i rin? Chung thil aṭangte chuan engnge i zir chhuah?


Engtinnge Pathianin i natnate hmanga i nuna a thil tum a hmuhtir che?


Engvangin nge Pathianin kal ngaihna reng reng awm tawh lohna hmuna a hruai luh ṭhin che ni a i hriat?


[Lettu: Mapuia Fanai]

Sunday, January 15, 2023

PATHIAN HNUNG ZUI LO CHIN DAN CHU BANSAN RAWH

 _Pathian ṭhatna hnuaia nun dan_

- Rick Warren 

- January 15, 2023


"He khawvel dan ang hian awm suh ula; Pathian duhzawng, a ṭha leh lawm tlak leh, ṭhat famkim chu in hriatfiah theih nan, in rilru a thara awmin lo danglam zawk tawh rawh u." (Rom 12:2)

Bible-ah hian ziaktu thuhmun, mahse thuchah inkalh tlat si hmuh tur chang hnih a awm: 

1 Johana 2:15-ah chuan heti hian kan  hmu, _"Khawvel hi hmangaih su ula, khawvela thil awmte pawh hi hmangaih hek suh u. Mi tupawhin khawvel hi a hmangaih chuan Pa a hmangaihna amahah a awm lo."_ A va chiang em!

Mahse Johana 3:16-ah chuan, _"Pathianin khawvel a hmangaih em em a . . ."_ a ti lawi si. A lan danah chuan thu inkalh tlat an ni.

"Khawvel" tih hi kawng hnihin hengahte hian a hmang. Chang kan tarlan hmasak zawk khian khawvel thil hlute a a kawk a, kan tarlan hnuhnung zawk khian khawvel chhunga mihringte a kawk thung. Isua zuitute chuan eng duhthlanna pawh lo siam tawh mahsela midangte an hmangaih tur a ni. Chutih rual chuan he khawvel thila kan ngaihhlut thil, nihna te, mahni hmasialna te leh mipat-hmeichhiatna hman khawlohna te hi kan haw tur a ni.

Harsatna awm ta chu hemi letling chiaha kan awm ṭhin hi a ni. He khawvel changkanna te kan hmangaih rualin kan mihringpuite kan haw hlauh thung. Kristiante tam tak chu hetiang hi kan ni. Danglamna nun neih aiin khawvel changkanna kan ngainain nawmchennaa tlan nuam kan ti ṭhin. Mahse chu chu Pathian min kohna hnuhnung zawnga kalna a ni.

He khawvel dan anga awm tura thlemna i la tawk dawn chauh. Hei hi kum sang chuang chhunga Israel-te buaina a ni. Ram dang ang nih an duh a. Mahse Pathianin hnam dang laka an danglam theih nan inzirtirna ṭha takte leh inkaihhruaina dan ṭha tak a pe a nih kha.

Nang leh kei atan pawh Pathianin chutiang chiah chuan min tihsak. Thuthung Hlui dan hnuaiah kan awm tawh miah lo, mahse Pathianin kan awm dan turte min hrilh vek a, he khawvela finna leh thiltihtheihna te nei thei turin min fuih a ni, _"He khawvel dan ang hian awm suh ula; Pathian duhzawng, a tha leh lawm tlak leh, that famkim chu in hriatfiah theih nan, in rilru athara awmin ] lo danglam zawk tawh rawh u."_ (Rom 12:2). 

In tih ṭhin nunphungten i nun an cheh hniah lutuk che avang khan i nuna Pathian duhzawng k hre lo mai thei. Heng hi hre miah lovin i lo tawng fo tawh ṭhin. Mahse he khawvel ang hian ngaihtuahin Pathian rilru ang i pu thei lo. Thutlukna i siam a ngai a ni.

Kan hnam nunphung ziarang mila Isua zuinaa harsatna awm thei chu rei lote atan chauh a nuam hi a  ni. Chatuan daih: Pathian thu i zawm a ngai.

Pathian thutakin i rilru tikhat la, chu chuan tute nge i hmangaih ṭhin tihah danglamna thlen rawh se. 

Ngaihtuah chhunzawm atan.

I nundan engte kha nge Pathian thu nen inkalh le?

Khawvel mite nundanin i nun a chiah hneh tawhna kawngte i thliar thiam mai lo a nih chuan i nunkawng hrang hrang (chhungkua, hna, kohhrana telna, ldt.) leh chungah chuan engin nge nawr kal ṭhin che tih ziak rawh. Chung i ngaihhlut kawngah te chuan engin nge kaihhruai che, emaw, Pathian thuin engnge ngaihlu tura a zirtir che?

Hun rei lote chhunga lungawina thlentu chu chatuan daih lo thil chu engnge a nih fakau le?

*Vawiin hian Isua i zui dawn em?*

He khawvel hian chatuan daih lo thilahte i nun pe turin a nawr che a. Mahse chung aia lian zawk, chatuan thleng daih tur thil atana siam i ni. Pathian duhzawnga nung tur chuan min chhandam tura a chunga rinna nghaha bul ṭan a ngai. Bible chuan heti hian a ti, _"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan."_ (Johana 3:16)

Ngaidam tur leh chatuana nunna nei turin Pathian i ring dawn em? Heti hian han ṭawngṭai rawh le: "Lalpa, Isua hi i Fapa a ni tih ka ring a. Suala tlu tawh ka ni tih ka puang a, i ngaihdamna ka rawn dil e. Vawiin aṭang hian Isua hi min chhandamtu a ni tih pawma a hnung zui ka duh e. Min hruai la i duh anga awm turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, January 14, 2023

INTHIAMLOHNA TIHBO DÂN KAWNG KHAT CHIAH A AWM

 _Pathian Ṭhatna Hnuaia Nun Dan_

- Rick Warren

Jan 14, 2023



"Nimahsela ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a: kan thlamuanna tûra thununna chu a chungah a tla a; a vuakna vualtea tihdamin kan awm ta.

Kan za hian berâm angin kan vâk bo va; mahni kawng kawngah kan peng theuh va; Lalpa chuan ani chuungah chuan kan zaa khawlohna chu a nghat ta a." Isaia 53:5-6


Mitin mai hian inthiamlohna tur thil tih kan nei vek a. Tumah ti dik famkim an awm lo. Mi dang tina tawh vek kan ni a. Mahni hmasialna chin nei vek kan ni bawk a. Thil duhawm ber ber kan sawi leh kan tihna te hi kan hmangaihte lakah chauh a ni tlangpui a ni.


Pathian lakah kan sualna kan khuhbo thei lo ang bawk hian, i inthiamlohna pawh i hliah thei lo. Chu mai a ni lo, i inthiamlohna khuh bo i tum apiangin, chhungril atangin a ei thin che a ni.


Inthiamlohna tihreh dan kawng khat chiah a awm a: i sualte puang la, Pathian ngaihdamna che ring ngam bawk ang che. Bible a 'sualna puan' tih hi Greek tawng chuan homologeo an ti a. Homo tih chu 'thuhmun' tihna a ni a. Logeo tih chu 'sawi' tihna a ni. Sual puanna tih awmzia chu, mawlmang tak chuan Pathian thlawpna tihna a ni mai: "Lalpa i dik. Ka dik lo a ni" tiin.


Naktukah emaw, karlehah emaw, kum 10 la awm turah emaw i la tihsual tur zawng zawng man chu a pe tawh a. Chu chu Pathian thatna chu a ni.


Isua chuan i sualna zawng zawng man chu a invur a. A felna chu a pe hlauh thung che a. Hei hi Bible thubul innghahna ber chu a ni: amahah chuan i nunna kehchhe tawh chu a famkim leh a ni tih hi.


Bible chuan Isaia 53:5-6ah, "Nimahsela ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a: kan thlamuanna tûra thununna chu a chungah a tla a; a vuakna vualtea tihdamin kan awm ta.

Kan za hian berâm angin kan vâk bo va; mahni kawng kawngah kan peng theuh va; Lalpa chuan ani chuungah chuan kan zaa khawlohna chu a nghat ta a" a ti. 


Ngaihdam niin i inhre lo a nih chuan, Pathian thatna i la hre chiang tawk lo a ni ngei ang. Isua a thih khan, i sualna chu a khuh vek a, tui thuk bera paihin, 'sangha man phal loh' tih tarin hai lan leh tawh loh turin a paih a ni.


I sualnate Pathian hnenah puang la. I sualna a ngaidamin a theihnghilh tak avangin, phawrhchhuah leh nachhan tur i nei lo a ni.


Ngaihtuah zui atan...


Mi thenkhat ten an inthiamlohna an enkawl dan tha si lote engte nge?


Vawiin hian inthiam lohna paih bo tur i nei em? Chumi tur chuan engin nge dal che?


Engvangin nge hlimna hi khawngaihna hriatthiam avangin a lo thlen mai thin?


*I inthiamlohna tihbona tur chu up bo tum lam ni lovin, i tih tawhte puan mai hi a ni.*


Bible chuan, "Kan sualte thupha kan chawi chuan kan sualte ngaidam tur leh kan fel lohna zawng zawng tlengfai turin amah chu a rinawmin a fel a ni" (1 John 1:9) a ti a. Tin, Vanram luh hi i hlawhchhuak thei lo a ti bawk a ni : Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; 

thiltih avang a ni lo ve, chutilochuan miin an chhuang dah ang e" (Eph 2:8-9)


(Lettu: Msa)

Friday, January 13, 2023

PATHIANIN LUNGNGAIHNA HMANGA A ṬHANTIR DAN CHE

 Pathian Ṭhatna Hnuaia Nun Dan

By Rick Warren

January 13, 2023


“Pathian hmangaihtu, ama ruat anga a kohte tân chuan, an ṭhatna tûrin engkimin a thawhsak ṭhîn tih kan hria.” [Rom 8:28]

Lungngaihna, channa leh natnate hi mihring nuna bet tlat an ni a. Mahse, heng thilte hi Pathian chuan i ṭhanna hmanrua atan a hmang tih i hria em? Kawng thumin a hmang ṭhin. 

 *Pakhatna, Pathian chuan i rilru chu natna hmangin lak a tum.* C.S. Lewis-a chuan hetiang hian a sawi, “Pathian chuan nuam kan tawlna hmunah hmuiphun maiin min bia a, ka chhia leh ṭha hriatna hmangin min bia a, kan natnaah chuan a rawn au ṭhin” tiin a sawi. Natna chu Pathian aurinna a ni. Eng satliah i hmuh chuan i insiam tha mai ngai lo va. Mei sain a hem hun chauh che i insiamtha ṭhin. 

Thufingte 20: 30 chuan hetiang hian a sawi, “Na taka vuakna hian sual simna a thlen a, Vuak nek hian chhûng lam a tithianghlim thei” tiin.

 *Pahnihna, Pathian chuan thil ṭha lo chu ṭhaah a chantir.* Bible-a chang lar ber pakhat chu Rom 8: 28 a ni awm e, “Pathian hmangaihtu, ama ruat anga a kohte tân chuan, an ṭhatna tûrin engkimin a thawhsak ṭhîn tih kan hria,” tiin. 

Eng emaw i chan a nih chuan ṭhan lenna hun ṭha a ni tih hria ang che. I natna tuar chungchangah duhthlang thei i ni kher lo ang, mahse mi ṭha zawka emaw mi ṭha lo zawka an siam thuah che chuan i thutluknaa innghat a ni. Chu i thil tawn chu tlukna lung emaw hmasawnna rahkaah emaw i chantir thei. Hei hi chhinchhiah ang che, i natna hmunah ngei pawh chuan, Pathian chuan i ṭhatna turin hna a thawk a ni.  

 *Pathumna, Pathian chuan chatuan atan a buatsaih che.* Bible chuan 2 Korinth 4: 17-18 ah hetiang hian a sawi, “Rei lo te chhûnga kan hrehawm tuar nêp tak hian chatuan ropuina, khaikhin rual loh khawpa nasa chu min siamsak a ni. Thil hmuh theihte chu kan thlîr lo va, thil hmuh theih lohte chu kan thlîr zâwk si a. Thil hmuh theihte chu a ral mai dâwn a, thil hmuh theih lohte erawh chu chatuanin a awm ang” tiin.

Vanramah i lirthei i chhawm dawn lo tih ka sawi kha i lo hre tawh ngei ang. I smart phone leh thawmhnaw te pawh vanramah i chhohpui dawn lo. Vanramah i hna i kaipui dawn lo. Mahse i nungchang erawh chu i chhohpui dawn. Nangmaha nangmah kha i chhohpui dawn. 

Pathian chuan i mize siamṭhat kha i nawmna ai chuan a ngai pawimawh fe zawk. Eng vangin? A chhan chu vanramah chuan natna leh lungngaihna tuar tawh lovin in cheng ngar ngar tawh dawn, mahse tun hun chu chutiang chu a la ni lo, tun hun chu a inbuatsaihna a ni. Zirlai zir hun a ni a. A insawisawi hun a ni. Pathian chuan he leia i natnate chu hmangin chatuan ropuina atan buatsaih che a tum a ni. Chu chu nawmna hmun a ni. 

Natna i tuar lai chuan, he zawhna hi inzawt ang che, “Pathianin engnge a tih?” I rilru lak a tum tihna a ni thei em? Thil ṭha lo aṭang chuan thil ṭha lak chhuah a tum em? I nungchang chu vanram atan a buatsaih tihna a ni em? 

Eng ang dinhmunah pawh, Pathian chuan i natna chu i ṭhanlenna atan a hmang thei tih hria ang che. 

Ngaihtuah zui atan. 

Pathianin i ṭhatna turin hna a thawk tih chu engnge a awmzia? Ringtute tan chuan thil ṭha chauh a thlentir tihna a ni thei ang em? 

Eng vangin nge vanrama thutiam aiin tun dinhmuna kan thil tawnte en chu a awlsam zawk? 

Natna i tuar hun atana i lo inpeih lawk theihnan tunah hian engtin nge i lo inbuatsaih lawk theih ang? 

[ *Lettu* : Peka]

Thursday, January 12, 2023

ṬAWNGṬAINA HMANGIN PATHIANIN I RINNA A TIṬHANGLIAN

 Pathian Ṭhatna Hnuaia Nun Dan

By Rick Warren

January 12, 2023

“Dîl rawh u, tichuan, an pe ang che u; zawng rawh u, tichuan, in hmu ang; kik rawh u, tichuan, an hawnsak ang che u.” [Matthaia 7:7]

Pathian chuan i duhzawng zawng zawng chu a pe thei che a ni mai lo va, a pe chak hliah hliah zawk hial che a ni! Pathian chuan i mamawh phuhruk chu engtiang takin nge a chak tih i theihnghilh chuan, i mamawh dil tawh loh mai emaw nangmah leh nangmaha rinna nghah mai chu a awl ta ṭhin a ni. 

Pathian chu “Thil liam tham” chauh dilin “thil te tham” chu i dil ngai lo a ni thei. Engnge han ngaihtuah teh? Engkim mai hi Pathian tan chuan an te vek. I dilna eng pawh mai kha Pathian mit hmuhah chuan an te em em vek mai a ni. I lua sam zawng zawng zat kha a hria a, bual inah tukina tla zat lam khan a hre vek a ni. 

I duhna i thlen avang khan Pathian chu i tibuai phak lova; amah zawk chu ṭawngṭaina kalhmang duangtu zawk chu a ni. Chuvang tak chuan Thuthlung Thar chuan vawi 20 chuang in mamawh apiang ṭawngṭainaa dil turin a chah che u a ni. Matthaia 7: 7 chuan hetiang hian a sawi, ““Dîl rawh u, tichuan, an pe ang che u; zawng rawh u, tichuan, in hmu ang; kik rawh u, tichuan, an hawnsak ang che u,” tiin. 

A chang chuan, Pathian chu thil dil lovin, nangmah leh nangmah i lo buai mai zel a. Mahse, buaina thama lian a nih chuan ṭawngṭaina thama lian a ni tihna a ni. Lungngaihna chuan engmah a ching fel lovang, mahse ṭawngṭaina chuan a chingfel ang.  

Pathian chuan nu leh paten an fate rin dan an zirtir ang chiahin rinna leh amaha innghah dan a zirtir ṭhin. Bible chuan hetiangin a sawi, “Chutichuan, nangni mi sual mahin in fate thil ṭha pêk nachâng in hriat si chuan, in Pa vâna mi chuan a dîltute chu Thlarau Thianghlim a va pe dâwn êm!” [Luka 11: 13] 

Hetiang hian nu leh fa inkarah a thleng ṭhin. Pakhatna, naupang chuan a mamawh tlakchham a hmu a. Pahnihna, naupang chuan a mamawh chu a sawi chhuak a. Pathumna, nu leh pate chuan a mamawh chu an pe ta a. 

Pathian pawhin chutiang inkhaidiat chiah chu amaha i innghah thiam theih nan a zirtir thin che. I mamawh tlakchham chu Pathian hnenah i sawi a. Chu thil mamawh chu a pe che a, tichuan amah rin lehzual dan i thiam ta a ni. 

I thil mamawhte chu Pathianah i thlen lo a nih chuan, engtin nge rinna kawngah chuan i ṭhan len theih ang? 

Pathian i dil chuan, a ṭhatna chu a lantir fo ang. Mahse, a chang chuan Pathian hun tiam nghak chhuak turin dawhthei taka i nghah a ngai chang a awm ang. Chhanna mumal tak a pe zung zung reng lem lo, a chhan chu i rinna chu fiah a duh a ni. 

Awle- vawiinah hian han chhin teh. Pathian hnenah i mamawhte chu thlen ang che. Tichuan i ṭawngṭaina a chhan dan che chu thlir ang che. Pathian chu a rintlak a ni tih i zir chhuakin amahah chuan i innghat thei ang, eng dinhmunah pawh.  

Ngaihtuah zui atan. 

Nangmah emaw Pathian i hmuh dan emawa thil dik lo eng emaw chuan engtin nge a ṭanpuina dil thei lovin siam che?  

Pathian chuan amaha i innghahna leh rinna chu i sum hmangin a fiah che. Chu chu eng vang nge ni ang? 

Tu ṭanpuina nge vawiin hian i mamawh le? Pathianin a hnathawhsak che avanga lawmthu sawinain bul ṭan la, tichuan a ṭanpuina dil ang che. 

[ *Lettu* : Peka]

Wednesday, January 11, 2023

NUN HAHTHLAK LUANCHHUAHTIR DAN

  _Pathian thatna hnuaia nun dan_*

— Rick Warren 

— Jan 11, 2022


“Kei grep hrui chu ka ni, nangni a pengte chu in ni; tu pawh keimaha awm reng a keipawh amaha ka awm rengna chu; chu mi chu tam takin a rah thin; keimah lovin engmah in ti thei si lo.” Johana 15:5

Pathian hnena chawlh hahdam chu hnathawhna avang leh thil dang avanga phili chung ai chuan a tha zawk a ni. Mahse thil tih ai chuan sawi chu a awlsam zawk si a. Pathianin hahchawlhna leh nun tam a neih chang tura ke pen chu a harsa thin a ni.

Heng kawng li hi thawpikna atanga nun tam nei tura nitina nangmah pui thei tur che an ni. 

*1. Nitin Isua nen inbe pawp rawh.* “Kei grep hrui chu ka ni, nangni a pengte chu in ni; tu pawh keimaha awm reng a keipawh amaha ka awm rengna chu; chu mi chu tam takin a rah thin; keimah lovin engmah in ti thei si lo.” Johana 15:5

Nangma theihna hmanga nun hi paltlang i tum a nih chuan, i chau tawngkhawng ang. Pathian thiltihtheihnaah i inthlunzawm loh chuan i thiltum i hlawhtling thei lo vang a, Pathian thatna pawh i tem thei lo vang.

*2. I phunnawinate chu lawmnain thlak rawh.* “Phunnawina leh inhnialna awm lovin engkim ti rawh u” Philppi 2:14 

Phunnawi reng hi rilru lama hrisel lohna thuk tak a ni. Kawng lehlamah chuan lawmna hi rilru lama hriselna ber a ni an ti bawk. Chung chuan thluakah damdawi tha tak chaw lutin, hlimna a siam a manganna a ti tlem a ni.

*3. Uikawm bansan la, thilphal zir rawh.* “Ka inah ei tur a awm theih nan sawma pakhat zawng zawng chu thawhlawm inah rawn la rawh u, van tukverhte chu hawnsak che u in malsawmna dawn sen loh khawp hial ka vur dawn che u nge dawn lo, min han fiah tehreng u.” Malakia 3:10 

Pathianin khuarel dan hi khawvelah pawh hian a hmang ve a: i pek tam poh leh i dawng tam ang. Chutianga Pathianin  a tihna chhan chu amah ang turin a duh che a ni – ani chu thil petu a ni si a.

*4. Inkhaikhin bansan la, lungawi zir rawh.* “A dik thei e, hahdama vei khat neih pawh hi buai philia thawka veihnih neih ai chuan a tha.” Thuhriltu 4:6

Lungawina han tih hian engmah tum mumal leh hmabak i nei tawh dawn lo tihna a ni lo. Hlim turin thil dang mamawh belh i nei lo tihna mai a ni.

Khuarel avangin, thenkhat chu an lungawi lova. Mahse nang chu Pathian khawngaihna avangin, hahdam takin i chawl thei ang. Thil engkim mai khawngaihna avanga Pathian thilpek a ni tih i hriat hnuah chuan buaina zakhua atangin mi dang te tana luanchhuahna hunah Pathian avanga nun tam neiin hun i hmang tawh ang.

Ngaihtuah zui atan

* Isua nena inzawmna pakhat chu Bible Study neih hi a ni. Mahse nitina Bible Study nei tura inngaih chu hahthlak viau turah i ngai em? Tlemte atangin tan rawh. Bul tan nan ni khatah Bible Study nan leh tawngtai nan minute engzat nge i pek theih ang?

* Social media hian i lungawina nun engtin nge a nghawng nia i hriat?

* Ni engemaw ti chhung chu, phunnawi lo turin i rilru insiam teh. Phunnawi duhna thinlung hi lawmthu sawinaah chantir rawh. Nitin i lungawilohna chu vawi engzatnge hlimnaah i chantir theih. Lawmna nun chuan nangmahah awmzia eng nge a neih? 

*[Lettu: Sangpuia]*

Tuesday, January 10, 2023

PATHIAN KHAWNGAIHNA MAKAH CHUAN I HAHDAM THEI ANG

  _Pathian thatna hnuaia nun dan_

— Rick Warren 

— Jan 10, 2022


“[Pathianin] Kan taksa siam dan hi a hriat a, vaivut mai kan ni tih a hriat reng avangin” Sam 103:14

I hlawhchham hian Pathianin mak a ti lem lo. Dik tak chuan a beisei zawk a ni!

Biblein, “[Pathianin] Kan taksa siam dan hi a hriat a, vaivut mai kan ni tih a hriat reng avangin.” Sam 103:14. Eng atanga siam nge i nih a hria che a, nangmah siamtu che a nih avangin. I talbuai deuh pawhin Pathianin a hmangaih bang chuang lo che. I nihna avang emaw i thiltih avangin a hmangaih lo che a, a nihna leh a thiltih te avangin a hmangaih zawk che a ni.

Pathianin a siam che a. A hmangaih che a. Engkim a rel fel a ni. Pathian chu hmangaih zual deuh tur chein i ti thei lo va. Pathian hmangaihna chu tlahniam deuh tur pawhin i ti thei chuang lo. I thatni leh i chhiatniah pawh a hmangaihna che a pangngai reng a ni. A hmangaihna chu i thiltih that leh chhiatah a innghat lo.

Bible chuan hmangaihna ang hi tawngkam a nei a: khawngaihna a ni. Hei hi mak danglam tak a ni! Thil thalo tawpkhawk pawh ti mah la, Pathian chuan a hmangaih bang lo vang che. Chu chu khawngaihna mak tak a ni. A khawngaihna hi i pawm thei a nih chuan, i hlawhchhamna lakah pawh i hahdam thei ang a, nung zel tur pawhin inrintawkna i nei thei ang.

Pathian hnenah i thiltih sual ngai bawk avangin vawi tam ngaihdam dilin i kal maithei e. A hmangaihna leh khawngaihna chu phu tawh lo pawhin i inhre maithei e. (Phulo nih inhriain i rilru chu a awm tawh mai thei). Pathian chuan i rilru i thlak zin em avangin a ning tawh viau turah che pawh i ngai mai thei. (Chutiang mi chu a ni lo)    

Pathian hian titipui che hi a kham ngai lo va. Buai takin a awm ngai hek lo. Vawi engzat pawh ngaihdam dil turin kal tawh mah la, lo kuangkuah tur chein a lo nghak reng che a ni.

I seilenna chhungkua chu phutlet neia hmangaihna lantirna pawh a ni thei. I nu leh paten an hmangaihna che chu lehkha i thiam theihnaah te, infiamna i theihzawngah leh khawtlangah hlawhtlinna i chanah te pawh a innghat maithei a ni. Chutiang kawngah te i hlawhchham hlauh chuan chhungkaw hmangaihna chu i chan nghal dawn tihna a ni ang.

Hahdam takin i awm thei e. Pathian chuan chutiang chuan a thlir ve lo tlat mai che.

Bibleah Pathianin, “Batna lehkha thupeka ziak, kan chunga awm, min dodal thina chu a thai bo tawh si a: chu ngei chu kraws-a khengbetin a la kiang ta a.” Kolossa 2:14 

Kristian nun chu thilsual tih tawh miah lohna nun hi a ni lo va, amaherawhchu suala awmreng nia inhriatna laka fihlimna nun a ni thei a ni. Pathianin i hlawhchhamnate kha a hria a – eng vang pawhin a hmangaih che a ni.

Chu chu Pathian hmangaihna mak chu a ni! A thatna i chunga a lantir dan a ni a, chutah chuan i hahchawl thei ang.

Ngaihtuah zui atan

* Suala awm reng nia inhriatna laka fihlimna chuan i nunah eng nge nghawng a neih?

* Pathian chuan i tihsual leh i hlawhchhamnate chu khawngaihna, hmangaihna leh ngaihdamnatein a chhang let che a. Mi dang thil tisual leh hlawhchham ve te i hmachhawn danah eng nge nangmahah nghawng a neih?

* Tunkar chhung hian Pathian khawngaihna mak Chanchin Thar duhawm tak chu tu hnenah nge i sawi chhawn ve ang? 

*Pathian khawngaihna avanga chhandam i ni*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chuti lo chuan miin an chhuang dah ang e.” Ephesi 2:8-9

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtik niah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawh tanna atana pawimawh te a thlawnin ka lo thawn ang che.

*[Lettu: Sangpuia]*

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...