Sunday, December 31, 2023

ENGTIN NGE RINGTUTEN HLAWHTLINNA KAN TEH ANG?

_Pathian Thutiam Mak_

- Rick Warren
- 31 December, 2023

_"Rinna lovin amah tihlâwm theih a ni lo; Pathian hnêna lo kal tûr chuan, amah chu a awm tih leh, taima taka amah zawngtute hnêna lâwmman petu a ni tih a ring tûr a ni."_ (Hebrai 11:6)

Engmah ti lova hlawhtlin ai chuan hlawhchham dawn mah ila thil ropui tih ve reng reng ka duh zawk.

Mahse, chu chu mi tam tak tum dan a ni. Chhem len ang maiin an nun an hmang ṭhin. Thlen tum an nei lo. Daidanna pal chauh thlen an hlauh avangin thla lawn an tum ngai lo. Mi hian hlawhchhamna hi engmah tih theih lohna nen a in ang lo a ni tih hi an theihnghilh emaw an hrethiam ngai lo emaw ni ber in a lang. Hlawhchham chu tum duh loh vang a ni.

Kei leh Kay- ten kum sawmli (40) aia tam liam ta a Saddleback kohhran kan din khan he thu hi ka thlanlunga ziak ka duh thu ka chhungte ka hrilh ṭhin- "A tum tal alawm" tih hi. Kan kohhran kha puitling lo mahse a danglam chuang lo.

Tum leh hmathlir ropui tak ka nei a. Chu chu thleng ngai lo mah ila, ka tum a ni tih tal an hriat ka duh. Vawiin chuan ka thlanlunga ka ziah thei dawn loh tak chhan chu, Pathian khawngaihna zarah ka tum ka ti hlawhtling thei a ni. Mahse, ruahmanna emaw sumdawnna emaw rawngbawlna tir lamah chuan "Ka tum tal alawm" tih kha a pawi reng reng lo.

Chu chu rinna a ni. Hlau mahla hmalam i pan a ni. Matthaia 9:29 chuan, _"Ani chuan an mit a dek a, 'In rin angin in chungah thleng rawh se,' a ti a."_ tih kan hmu. Hma lam i pana, i hriat lohteah pawh Pathian i ring a ni tih i lantir chuan  Pathian malsawmna vur tur che chu i thlang a lo ni.

Nun hi intlansiakna ni. Pakhatna ni turin tumah thui tak intlansiaknaah an tel ngai lo. Mi sang tam tak tlan zingah mi pakhat chauhvin pakhatna a la thei. Thui tak intlansiaknaah chuan "Ka ti thei ta. Ka tum a ni" an tih theih nan an tlan ṭhin.

Hringnunah hian thil tam takah pakhatna i ni vek thei lo, keipawhin ka thei lo. A pawimawh ber chu: chak takin i zo em emaw, i bansan hma lutuk em emaw, run dalah i tawlh ve mai mai em amaw tih hi? A hnena a hruai hma che chu Isua tan nasa tak leh chak takin i tlan em?

Hebrai 11:6 chuan, _"Rinna lovin amah tihlâwm theih a ni lo; Pathian hnêna lo kal tûr chuan, amah chu a awm tih leh, taima taka amah zawngtute hnêna lâwmman petu a ni tih a ring tûr a ni"_ a ti. Rinna chu tum/tichhin tihna a ni. I tum i ti hlawhtling emaw hlawhtling lo emaw chona awmze nei lo pawh ni rawh se.

Pathian ropuinana thil i tih hian eng pawh thleng se hlawhchham i in ti thei lo. Rinna a thil i tih chuan i hlawhtling sa a ni.

Ngaihtuah zui atan

Chak hi i tan a pawimwh ber em, anih loh pawhin, rim taka thawh a pawimawh zawk? Engvangin?

Pathian ropuinana thil tihchhin hi engnge a awmzia?

Kan tum kan hlawhtlinna bul ber ni fo chu thil lian tak kan tih ni lovin nitin zai te te a, inthlahdah hauh lova inthunun tak chunga kan tih bek bek hian a ni. I tum i hlenna kawngah engtinnge inthununna nen ke i pen ang?

(Lettu: Mapuia Fanai)

Saturday, December 30, 2023

HMANGAIHNA HI NAWR KALTU CHE ANIH CHUAN HLAUHNA A AWM LOVANG

Pathian Thutiam Mak

- Rick Warren 
- Dec 30, 2023
"Hmangaihnaah chuan hlauhna rêng a awm lo; hmangaihna famkim chuan hlauhna a hnawt kiang si a." (I Johana 4:18)

Mi tam tak chuan rinna hi hlauhna letling chiah niin an ngai ṭhin. Mahse, a ni lo. Hmangaihna hi hlauhna letling chu a ni.

Hmangaihna chu hlauhna pelin a che ṭhin. I thinlung kawngkaa hmangaihna a rawn luh chiah khan hlauhna a um chhuak nghal a ni. Hlau chung chuan hmangaihna tak takin a inhmangaih theih loh. Hmangaihna tak tak - Pathian hmangaihna i neih chuan hlauh i neih a ngai lo.

Naute chhanchhuak turin in alh hluah hluah chhungah tumah rinna avangin an zuanglut ngai lo. Hmangaihna avanga ti an ni zawk. Nu leh pate chuan an chhungkua an hmangaih avangin an nunna hial an hlan duh ṭhin.

Hmangaihna hi thil tih min tiphurtu a lo nih chuan hlauhna a lo kiang ang.

"Hmangaihnaah chuan hlauhna rêng a awm lo; hmangaihna famkim chuan hlauhna a hnawt kiang si a." (I Johana 4:18)

I thiltih tur eng emaw khan a tizam che a ni mai thei. Hlauhnain a rawn chim che ni a i hriat veleh han chawl det la eng angin nge Pathianin a hmangaih che ngaihtuah rawh. "Lalpa, min hmangaih takzet! Ka lamah i ṭang a ni. He thilah hian ka hlawhtlin i duh a. I chakna leh hmangaihna hmangin ka ti dawn a ni" ti a i sawi nawn fo a ngai ang.

Pathian chuan hlawhchham turin a duh lo che. I thiltiha i hlawhtlina i nun chhan tihlawhtling turin a duh che. A hmangaihnaa i rilru i pek chuan i hlau lovang. Hmangaihna famkim chuan hlauhna a tikiang ṭhin.

Kartawpa mi sang tam tak hmaa thu ka sawi hian ka hlau lo. Engvangin? A chhan chu, thil pahnih ka ti ṭhin: Pathian min hmangaihnaah ka rilru ka dah a, tin, ka kohhrante ka hmangaihnaah ka rilru ka dah bawk a ni. Mipui ka hlauh tur te an ni lo. Ka hmangaih tur chhungkua te an ni. Isua leh anmahni ka hmangaihna hian ka thusawi laia ka hlauhna tur a tikiang ṭhin.

Hlauh i neih chuan nangmahah i rilru i pe nasa lutuk tihna. Chu chu hmangaihna a ni lo. Hmangaihnaa i awm chuan nangmah ni lovin i chhehvela miteah i rilru i dah ṭhin ang.

Hmamgaihna i neih nasat zawh poh leh hlauhna a tlem ang. Chuvangin, i thiltih tiphur tur che a hmangaihna i hmang a nih chuan, ti turin hlauhna i nei lovang.

Hmangaihna chu nangmah tiphurtu che atan hmang la, hlauhna kiansan rawh.

Ngaihtuah zui atan.

Engvangin nge midangte aiin mahni inngaihtuah hi a awlsam zawk?

I nuna i thiltum tihhlawhtlinna kawngah engnge i hlauhthawn ber? I hlauhna chuan i phurna kawngah engnge a lanchhuahtir?

Mahni chauh i inngaihtuah laiin midangte i hmangaih thei em? Engvangin?

*Engpawh lo ti tawh mahla Pathianin a hmangaih che*

Mihring kan nih miau avangin Setana thangah awkin kan chhiar sen loh vawi tam tak sualah kan tlu ṭhin. Mahse engpawh tiin khawiah pawh awm tawh mahla Pathian chatuan chhungkuaah i tan hmun a awm reng a, an nghak reng che a ni. Sawmna zau taka hawn a ni. Ring la, pawm mai rawh.

I inpeih em? He ṭawngṭaina hmang hian bul han ṭan teh le: "Lalpa, ka thih hunah i hmaah ka chanchin ka sawi dawn tih ka hria e. Ka phatsan ṭhin che tih ka hria a. I chungah thil ka tisual tih ka hria a, i duhdan ni lovin ka duhdanin ka nung tih ka hria e. Chu chu vawiin hian thlak ka duh a ni. Sual kawng zawh tawh lova i hnung zui ka duh e. 

"Ka tan thi tura Isua i lo tirh avang leh chumi zara chatuan nunna ka neih theih avangin ka lawm e. Min ngaihdam ka phu lo tih chu mahila, i khawngaihna chauhin min chhandam thei tih ka hria e.

"Isu, min hmangaih nasat em avanga ka sual zawng zawng i phurh avangin ka lawm e. Vanram hmu tlakah min siam a, min chhandam turin ka ngen a che. Tuna ka nun chawk buai mektu ka sualna leh chin ṭhan ṭha lo lak ata min chhanchhuak turin ka ngen a che. Isu, ka ra ring che a. Tunah ngei hian, chiang takin, ka pumin chatuan atan vanrama min hruai turin i thutiam i hlen ang tih ka ring. Isua hmingin, Amen. 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,

[Lettu: Mapuia Fanai]

Friday, December 29, 2023

HLAWHCHHAM HLAUHNA CHUAN TIBUAI CHE SUH SE

Pathian Thutiam Mak

By Rick Warren
— December 29, 2023
 
“Pathian Thlarau kan chan hian min tidawih lo va, chakna te, hmangaihna te, mahni inthunun theihna te min pe zâwk a ni.” [2 Timothea 1:7]
 
Kay-i nena kan inneih aṭanga thla thum hnuah chuan, ka rilru leh taksa chau tawngkhawng avang chuan damdawiinah ka lut ta hial mai a. Hlawhchham hlauhna chuan min tuam a, ka nun chu a tawp ni maiin ka hria – kum 21 chauh mai chu ka la ni na a. Chu damdawi in a an rilru lam thiam [Psychiatrist] chuan hahchawlh ka mamawh thu min hrilh bawk.
 
Tichuan ka nu leh pa chenna California hmar lam chu kan pan a, chu hmunah pawh chuan hlawhchham let der anga inngaihna ka nei zui ta zel mai. Engmah hi ka ti ve tak tak thei lo niin ka inhria a. Engkim hian min tilungngaiin min tihlauthawng a ni.
 
Zan khat chu ka mang lamah thil ṭha lo ka lo hmu a. Ka harh chuan thlantuiin min lo bual hneh hle. Khumah chuan la zal zuiin ka thaw hlawp hlawp a, telephone ri ka hre zui ta a. Ka nu chuan a lo chhawn a. Phone lehlama mi chuan “Kha in kha Rick Warren-a khawsakna a ni em? Amah ka lo be thei ang em?” a lo ti a.
 
Phone ka han lak chiah chuan, chu pa chuan, “Rick, nang chuan min hre lo vang. Kan la inhmu ngai lo. I number ka neih dan pawh hi a pawimawh em em lo. Mahse San Diego hmunah ka cheng a, Pathian chuan ka hnenah thu sawiin, he Bible chang hi pe tur chein min ti a ni a ti a. Chu chu hei hi a ni: “Pathian Thlarau kan chan hian min tidawih lo va, chakna te, hmangaihna te, mahni inthunun theihna te min pe zâwk a ni.” [2 Timothea 1:7] Rick, Krista Isuaah chuan rilru fim tak neih kha i chanvo a ni,” a ti a. Phone chu a titawp ta mai a.
 
Pathian chuan chutiang chuan mi a hmang ngai lo niin i hria em? Awle, a dik si. Angel a ni thei a, a ni kher lo thei bawk. Pathian chuan “Saw pa saw lo be rawh” a ti pawh a lo ni mai thei. Thuawih vangin chu chu a lo ti a ni thei ang.
 
Chu Bible chang chu ka beidawn [depression] hun chhung zawng zawng – ka hlawhchham nia ka hriat lai, ka nun bul ka ṭan chhoh mek lai – chuan ka vuan ta ngar ngar a ni. Mahse Pathian chuan chu mai chu duh tawk lovin, thil chhiar sen loh a thawk chhunzawm ta zel a ni.
 
Pathian chuan nangmahah pawh a hna a tlingtla lo. Eng ang thil nge i lo paltlang tih chu a pawimawh lo. Natna i paltlang zawng zawngte chu pawi ka ti hle mai, mahse hlauhna chuan uai bet mai che suh se. I thiltih apianga Pathian ring tlat turin nangmah leh nangmah kha insangphek bawk la. Tichuan hmangaihna leh rinnaah chuan nung ang che.
 
Ngaihtuah zui atan.
 
Pathianin thinlung taka i umzui tur, i hlawhchhampui loh tur, eng ang hmathlir [dream] nge a pek che?  
 
2 Timothea 1: 7 chuan i hmathlir [dream] i umzuina kawngah chuan engtin nge i hman chhuah ang? Engtin nge rinnain hmalam i pan ang?

I hun kal tawha hlawhchhamna chuan i tih tur ti thei lo turin a uai bet ṭhin che em? Pathian chuan a hmangaih reng che a, i tana a kawng ruat tihhlawhtling tur chuan a ṭanpuina dil ṭhin ang che.  
 
[*Lettu:* Peka]

Thursday, December 28, 2023

KAN BEIDAWN LOH CHHAN

Pathian Thutiam Mak

By Rick Warren
— December 28, 2023
“Thil ṭha tih i ning suh ang u, kan inthlahdah loh zawngin a hun takah kan la seng ngei dâwn e.” [Galatia 6:9]

Pathian mi dik tak nih i duh chuan, nghet taka awm dan i zir a ngai ang. Chumi awmzia chu i tluk palh changin tho leh vat ang che. 

Thil eng emawzat i thunun theih piah lama mite chuan an tibuai thei che. Mahse i tho leh ṭhin a nih chuan, eng ang thil duhawm nge lo thleng ang? 

Hmanlai chanchin zirna chu tute emaw an hlawhchham hnua tho nawn leh ṭhinte chanchinin a khat a, an hlawhtlin hma chuan an beidawng mai ngai lo. 

General George Washington-a khan indona muala British a dote kha hmun thuma ṭhena hmun khat lai chu a tlawmna a ni. A hnungtawlh fo ṭhin, a chhan chu raldo mi duhthusama tam a nei lo a ni.  Mahse, a beidawng mai lo! Tichuan hnehna chu a chang chhunzawm a, United States-a President hmasa ber a lo ni ta a, America hnam pa tia hriat a ni ta hial bawk. 

Napolean-a khan Europe lailum lai chu France lal ang khan a thunun ṭhin a nih kha. A hun hmasa lamah thung chuan an pawla zirlai 43-na aṭang chuan 42-na te a ni chauh a ni. Zirlai thiam thei tak a ni lova, mahse raldo thiam hmingthang tak a ni, a raldo dan chu school tam takah an zir hial.  

Albert Einstein-a, khawvel scientist piang tawh zinga ropui ber pawh kha kum nga a nih hma chuan thumal pakhat pawh a sawi lo. Zirna lamah a misa vak lo bawk nen kum 16 a nih khan Swiss Polytechnic School-ah luh a dilna chu an pawmsak lo thung. Mahse Science leh mathematics huangah chuan vawiin thlengin thil thar ching chhuaktu pawimawh a tling. 

Babe Ruth, baseball inkhelthiam em em mai pakhat khan a inkhelh lai chuan home run 714 a nei a, chu chu  kum 40 chuang atan record a siam a ni. Mahse vawi 1330 lai a hlawhchham thung a ni. Kum eng emaw chhung chu Ruth chuan home run tam ber leh strikeouts tam ber record a nei a ni.

Heng mite hi thlarau mi chu an ni lem lo. Mahse an beidawn duh mai loh avangin khawvel hmuhah phei chuan thil ropui tak an su chhuak ngei ang. Pathianin a koh ang taka hmalam pana a tana thawk ṭhin a hmei a pa, mi dik takte nuna Pathianin hna a thawh theih dan hi han ngaihtuah ve mah teh

“Thil ṭha tih i ning suh ang u, kan inthlahdah loh zawngin a hun takah kan la seng ngei dâwn e.” [Galatia 6:9]

Kal zel la, i hlawhchhamna chu a tawpna ni suh se. Nangmah kaltlanga Pathian hnathawh theih chu i hre thei tak tak lo lehnghal.  

Ngaihtuah zui atan. 

Hlawhchham i hlauh avanga hmachhawp lian zawk chu i lo pumpelh char char tawh em? 

Bible-a mihring, mipa leh hmeichhe zingah an hlawhtlin hmaa lo hlawhchham tawhte chu han ngaihtuah teh. Anmahni atangin eng nge kan zir tur ni ang? 

Dik tih hi engnge a awmzia? Mi dik tia an hriat zui che i duh em?  Eng vangin nge? 

[Lettu: Peka]

Wednesday, December 27, 2023

I NGAIHTUAHNA CHU VANRAM LEH PATHIAN HMANGAIHNA LAMAH THLAK RAWH

_I Nun Tieng Turin Isua A Lokal_

Rick Warren
Dec 27, 2023
"Ngai teh, Pathian bawkte chu mihring zingah a lo awm ta, ani chu an hnenah a awm ang a, anni chu a mite an ni ang a, Pathian ngei chu an hnenah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaihna te, tah te, nat te pawh a awm leh tawh hek lo vang; thil hmasate chu a ral ta.” Thupuan 21:3-4

Pathianin khawvel tan leh i tana ruahman chu a la zo lo va. Engtikni ah emaw chuan Pathian ruahman tifamkim tur leh a zuitute hruaiturin Isua a lokal dawn a ni.

Isua khenbeh anih dawn zan khan, a zirtirte a kokhawm a. Mantira a awm dawn thu te, sawisak leh khenbeh anih lai an hmuhtur hrelawk sa vekin, thlamuanna thu a hrilh hlawm a ni. 

Hetiang hian a hrilh a: “In thinlung mangang suh se; Pathian in ring e, kei pawh mi ring ve rawh u. Ka Pa inah awmna tam tak a awm a, a awm loh chuan ka hrilh tawh tur che u a ni; in tan hmun siamin ka kal dawn hi. Tin, in tan hmun ka han siam chuan ka lo kir leh ang a, ka hnenah ka la ang che u; ka awmnaah nangni pawh in awm theih nan. Ka kalna tur a kawng chin in hria e, a ti a. Thoman a hnenah, ‘Lalpa, i kalna tur chin kan hre lo asin, a kawng engtin nge kan hriat ang?’ a ti a. Isuan a hnenah, Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo.” Johana 14:1-6


Apostol Johana kha Rom sawrkar khan Mediterranean Tuipuia Patmos thliarkarah an tan tir a. A thih hma khan, Pathianin vanram awmze tlangpui a hmuhtir a, chu inlarna chu Thupuan 21:3-4 ah ziak a ni: "Ngai teh, Pathian bawkte chu mihring zingah a lo awm ta, ani chu an hnenah a awm ang a, anni chu a mite an ni ang a, Pathian ngei chu an hnenah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaihna te, tah te, nat te pawh a awm leh tawh hek lo vang; thil hmasate chu a ral ta.”

Isua Krista chu Chhandamtu atan i pawm chuan, i thih hnuah vanramah i kal ve dawn a ni. Vanramah chuan lungngaihna, tuarna leh damlohna leh sual a awm tawh lo vang a. Thihna pawh a awm tawh dawn lo.   

Sual avangin, he leia awm zawng zawng hi a kehchhe tawh a - mahse Pathianin vanramah thil zawng zawng hi a siamthar vek dawn a ni. I tawrhna leh harsatna, i hriselna leh inlaichinna avangin lungngai duh suh. Pathian thlirna atanga - chatuan tarmit atanga i thlir chuan - he leia kan buaipui thinte hi chatuan a daih dawn lo va, chatuan atan chuan pawimawhna a nei dawn lo a ni.

Nimahsela chatuan thlirna tarmit neih chu vanram i thlen hun nghak kher suh la. Tunah hian i tan nghal thei a ni. Tun Krismas ah hian, i harsatna ringawt thlir suh la; i rilru inti hrehawm suh. Chu ai chuan, Pathianin a hmangaihna che leh Isua Krista ringtute tana a thutiam chu thlir zawk rawh.

Ngaihtuah zui atan

* Tunlai khawvel buaina karah hian vanram i hawi tlatna chhan eng te nge?

* Pathian thutiam chuan i buaina zawng zawng karah engtin nge i ngaihtuahna a thlak danglam?

* Engti kawng zawngin nge Pathian thutiam i vawntlatna chuan phurna a pek che?


*I ngaihtuahna chu Chhandamtu rinna atangin tan rawh*

Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam inni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi 2 : 8-9. 

I sualna te i puang duh aniha, i nunah Isua i thlang duh anih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian emai min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Tuesday, December 26, 2023

HEI HI VANDUAI THIL THU A CHHIAR I NI LO

_I Nun Tieng Turin Isua A Lokal_

*VANDUAI THIL THU A HEI HI CHHIAR I NI LO*

Rick Warren
Dec 26, 2023
"Chuvangin rinna avanga thiam changa awmin, kan Lalpa Isua Krista avangin Pathian nen inremin i awm ang u.” Rom 5:1

Hei thu hi vanduai thil thu a chhiar i ni lo.

I pian hma tawhin Pathianin hetah hian i awm ang tih a lo hre tawh a. Rilru i pek theihna turin ruahmanna a lo siam tawh a, chutiang chuan hetiang hian a sawi a ni: “I nuna hrehawm i tawrhte ka hmu a, ka hmangaih bang lo che a. Ka tan hian i pawimawh a ni. I hriat aia nasa hian ka hmangaih che a. Hmangaih tur che in ka siam che a, min hmangaih let hun tur hi ka nghak reng che a ni.”

Pathian chuan, “I hun la neih zawng zawngte hi i nun duhawm ber nise ka duh a. I hnenah ka awm a, i tan ka awm a. I hun liam tawh atang khan chhanchhuah che ka duh a ni. Ka siamchhan ang tak che a chhanchhuah che ka duh a ni.  Ka khawngaihna in chhandam che ka duh a. Chutianga min tih tir chuan, thlamuanna ka pe ang che, i nun thlamuanna, midangte nena inremna thlengin. Amaherawhchu Krismas thilpek dawng turin kawngkhar i hawn a ngai a ni.” 

Krismas thilpek min pek chu hawng duh ngai lo ila, i rilru a tihrehawm dawn lo vem ni. Ka hawn miah loh chuan chu thilpek chu hlutna neilo leh tangkaina neilo a ni ang.

Isua Krista hi Pathianin Krismas thilpek atana a pek che a ni a. Ni e, mi tam tak chuan Krismas vawi tam in hmang tawh a, nimahsela, chu Krismas thilpek tha ber: chhandamna chu in hawng ngai lo a ni. Krismas thilpek lian ber dawng duh si lovin engah nge Krismas chu kan la hman cheu vang? Nun hlui ngaihdamna te, nun duhawm zawk neihna leh vanram kaina thilpek chu kan hawn duh si loh chuan krismas chuan awmzia a nei lo vang.

Isua Kristan i hnenah hetiang hian a sawi a, “I rilru hahnate chu thlamuannain ka thlaksak thei che a. I sualna, mualphona, zahna leh fellohnate chu ngaihdamnain ka thlaksak thei che a ni. I lungngaihna leh mangannate chu rinna leh inrintawknain ka thlaksak thei che a. Nun beidawnna leh thawpiknate chu beiseinain ka thlaksak thei che a ni. I nunruaknate chu damchhan neiin ka thlaksak thei che a ni. I nun buainate chu fiahtakin ka thlaksak thei che a. Nimahsela, i thinlung kawngkhar chu ka karchhe dawn lo va. Min sawm luh erawh a ngai thung a ni. Tu nge i nih tih leh khawi atanga lo kal nge i nih tih khan awmzia a nei lo. Min duh a nih a, ka sawi ang ti tura i inpeih a nih chuan, kawngkhar chu hawnin a awm ang.”

*Isua i la ring lo va, amah zui turin ila inpe lo a nih chuan, engvangin nge ila nghah reng?* 

Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam inni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi 2 : 8-9. 

I sualna te i puang duh aniha, i nunah Isua i thlang duh anih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian emai min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Monday, December 25, 2023

ISUAN NUN CHI THUM A PE THEI

_I Nun Tieng Turin Isua A Lo kal_

- Rick Warren
Dec 25, 2023
"Kei zawng nun an neih nan, tam taka an neih nan lo kal ka ni"  Johana 10:10

Mi tam tak chuan hringnun hman dan tak tak hi an thiam lova. An nung ve tawp mai a ni.

Isua chuan Johana 10:10 "Kei zawng nun an neih nan, tam taka an neih nan lo kal ka ni" a ti. Krismasah khan nun chi thum- kan nunhlui, kan tun nun leh kan hmalam hun atan min pe turin a lo kal a ni.

*Pakhatna, nun thar min pe turin Isua a lo kal.*
Chumi awmzia chu engkim kan tihsual tawh chu ngaihdam leh theihnghilh a ni a. Engkim a hrufai vek a ni!

Mi thenkhat chuan "ka piangthar" an tih hian a awmzia chu Isuan nun bultan tharna a pe tihna a ni. I lo tisual a, Pathian khawngaihna i pawm a, ngaihdam i dil chuan i nunhlui avanga inchhir reng a tul lo. Nun thar i nei dawn a ni.

*Pahnihna, Isua chu nun tam min pe turin a lo kal.*
Dam khawchhuahna atan te, hlawhtlinna atan te, he leia hlutna nei tur chauhte hian siam i ni lo. Awmze nei tura siam i ni. Isua chuan nun tam tiin a sawi a, chu chu i hlutna, awmzia i neihna leh i tangkaina zawng zawng thuang khata a awmna hi a ni. Chu chu Pathianin i nun ni tura a duh chu a ni.

*Pathumna, chatuan nunna min pe turin Isua a lo kal.*
Pathian chuan i nunhlui, i tun hun leh i hmalam chu a chingfel ang. Chu chu Isuaa a Krismas present che chu a ni.

Tum khat chu Peter Drucker-a, management consultant lar tak mai chu ringtu ni tura thutlukna a siam hun ka zawt a. A ni chuan, "Khawngaihnain a tum zawng zawngte ka hmuhchhuah a, ka hriatthiam a, chu aia tha chu engmah ka hmu dawn lo tih ka hriatin Isua tan ka nun ka hawng a ni" a ti. 

Krismas hmasa berah khan, vanah mifingte khan arsi eng tak an hmu a, an zui ta a, nausen Isua chu an hmu ta a ni. Mitin khan arsi eng kha an hmuh a rinawm, mahse tumah khan engmah an ti lo. Mifingte kha an fin nachhan chu arsi zui chuan thilpek ropui ber hnen an thlen dawn tih an hria a ni.

Eng anga fing nge i ni? Khawvel Eng tia Isua hriat hi thil pakhat a ni a. I nun tih entir hi thil dang daih a ni.

Ni eng tel lovin i awm thei lo ang chiahin, thlarau lama enna tel lo chuan i awm thei lo. Krista engah chuan in hawng la, nun thar, nun tam leh chatuan daih i chhar dawn nia.

Ngaihtuah zui atan...

Kristian i nih atang khan bul tan thatna hi engtin nge i tawn le?

Engtin nge i nun awmzia hriatthiamna leh zawnna hian nun tam a thlen che? Nun tam neih chu engnge a awmzia?

Krismas hmasa berah khan engin nge mite kha Krista an hriat lohna tura dal le?

(Lettu : Msa)

Sunday, December 24, 2023

ISUA CHAUHIN CHHANDAMNA HNA A THAWK THEI

I Nun Tieng Turin Isua a Lokal

- Rick Warren 
- Dec 24, 2023
"Chutichuan, mi tûpawh Kristaa a awm chuan thilsiam thar a lo ni a; thil hluite chu a ral ta a; ngai teh u, thil engkim a lo thar ta." (II Korinth 5:17)

Ka tleirawl laiin nipui ṭum thum ngawt mai lifeguard-ah (tui tla chhanchhuaktu) ka ṭang a. Lifeguard dangte ang thovin tui tlate, anmahni inchhan an tum chhung chuan kan chhan thei lo a ni tih ka hre ve tlat. Mi tuia an tlak chuan an mangang nghal ṭhin a. Lân tumin an inham buai hle ṭhin. Chutianga mahni inchhan an tum laia lifeguard-ten chhanchhuah an tum chuan tuiah an tlak hlumpui mai ṭhin. Chuvang chuan, lifeguard ṭha chuan tui tlate chauh hunah chiah chhanchhuak turin a hleuh ṭhin. Anmahni a tum lova lifeguard-te chunga rinna an nghah chuan lifeguard-te tan hna a awlsam phah ṭhin. An darah  kuahin vaukam lamah awlsam takin hleuh chhuahpui mai tur a ni.

Mahni inchhan tum an chhanchhuah theih loh.

Mi ṭhenkhat chuan an thlarau nun mahni inchhanchhuah an tum ṭhin. An thil tihṭhatte avanga vanram kai an inring ṭhin. Mahse, chu chu Pathian tehna a ni ve lo. Vanram chu a famkim a, keini chu kan famkim lo. Mi famkimtu emaw, a theihna hmanga chu hmun kal theihna tur chu kan mamawh, chu mi chu Isua Krista a ni. Lal Isua ring lova vanram kai theihna dang awm se Pathian chuan chu chu a ti ngei ang. Mi ṭha tak ni a vanram kai kan tum chuan Isua thihna leh thawhlehna kha a thlawn mai a ni dawn a ni.

Kan theihna avangin vanram hi kan kai dawn hauh lo. Chuvang chuan a ni Pathianin kan sualte tlan nan Isua Krista khawvela lokal tura ruahmanna a siam ni. Mahse, nangmah inchhanchhuah i tumna i tawpsan hma chu a chhandam thei lo che. Bansan la, ring ṭan rawh.

Thilsiam zawng zawng a chak ber chu eng zung a ni a, second khatah mel 186,000 lai a chakin a kal. I rin loh chuan i refrigerator kha a ên hmaa hawn han tum chhin teh. I thei hauh lovang.

Mahse, chu aia chak chu a awm, chu chu Pathian hnena a chhamdamna i dilna chhanna chu a ni. Vawilehkhatah a rawn thleng nghal ṭhin, a khawmuang ve ngai lo. Nghah hun a awm chuang lo. "Lalpa, min ṭanpui rawh! I chhandamna ka mamawh e" i tih hun kha a chhan hun che chu a ni mai. Pathian chhanna chu a thleng nghal ṭhin. I chhandamna chu a him a ni. II Korinth 5:17 ah, "Chutichuan, mi tûpawh Kristaa a awm chuan thilsiam thar a lo ni a; thil hluite chu a ral ta a; ngai teh u, thil engkim a lo thar ta" tih kan hmu.

Ṭawngṭaina i nun tidanglam nasa bertu a ni ngei ang.

Ngaihtuah zui atan. 

Engtinnge mahni inchhandam i lo tum ṭhin? 

Chhandama i awm theih nan engvangin nge Pathianin a hnena inpumpek tura a phut che ni a i rin?

Isua hnenah i la inpe lo anih chuan engin nge dal che?

*Isua ringin a hnenah i la inpe lo anih chuan engvangin nge i nghah khawtlai kher ang?*

I sualten Pathian lak ata an la hrang che a. Pathian khawngaihna chauhin amah nena inzawmna nun nei leh turin a hruai kir thei che.

Bie chuan heti hian a sawi, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

I Siamtu nen inremna nun neih i duh chuan heti hian ṭawngṭai rawh:

"Isu, ka sualte hi nangmah nen min ṭhen hrangtu ni tawh lo se ka duh. Ka rin che chuan thil sual ka lo tih tawhte min ngaidam dawn tih min tiam a. Min siam chhan ka zir anga, engtikah emaw i hnena chêng turin min la pawm ang.

Ka sualte ka rawn puang, min chhandamtu i nih ka ring e. Ka sual te ka puan a ka rin che chuan chhandam ka nih tur min tiam a. Ka thiltihte avang ni lovin, Khawngaihna avanga chhandam ka ni i tih hi ka pawm e. Ka Pathianah ka pawm che a. Vawiinah hian i remruatna hnuaia awm turin  ka nun zawng zawng ka hlan a che." 

"Nung tura min siam anga nun ka duh a, ka nun zawng zawng hi ka tan ni lovin i rawngbawl nan hman ka duh a. Ka nun i tan ka hlan a, min chhandam tur leh i chhungkua a min pawm ve turin ka ngen a che. Isua hmingin ka dil e. Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,

[Lettu: Mapuia Fanai]

Saturday, December 23, 2023

KUM KHAT CHHUNGA HUN DUHAWM LOH BER A NIHIN

_I Nun Tieng Turin Isua a Lokal_

- Rick Warren 
- Dec 23, 2023
_"Mi tin ta tur chanchin tha lawmawm em em ka rawn thlen che u a ni. Vawiinah hian in tan Davida khuaah Chhandamtu a piang ta, Lal Krista chu."_ (Luka 2:10-11)

Kan hliamte tuam dam turin, kan hliam kan tihlan ngam lohte thlenga tidam turin Krismasah Isua a rawn kal a ni.

Khawvel khawi hmunah pawh kal la, tute pawh tawk la midangte nena inanna kan neih pakhat chu mi zawng zawng hian lang lo lamah hliam eng emaw kan nei vek hi a ni.

Mi zawng zawng hian mite hmuha tihlan kan duh loh hliam kan nei. Mite hmuh loh turin i zep ṭha viau pawh a ni thei. Hlawhtling leh hlim hmel takin i awm a ni mai thei- mahse chutiang i ni lo tih kan hria, a chhan chu tumah hi chutiang kan awm loh vang a ni!

Hun rei tak kal taah khan tu emawin i chungchang thuah thil ṭha lo tak sawiin emaw i chungah thil ṭha lo tak a lo ti emaw a ni thei, chu chuan a hliam che a ni. Anih loh pawhin tu emaw chunga i thiltih avang emaw a chungchang i sawi dan avang emawin i inchhir em em a, mahse i thup tlat a ni thei. A nat em avang leh a hrilhhaithlak em avangi  tumahin an hriat i duh lo a ni thei.

Tichuan Krismas a rawn inher chhuak ta a, kum khat chhung atana ni hlimawm ber, kan lawm em em tur chu a ni. Mahse i nihna takah chuan mi tam tak chu an khua a har a, an chhungkuain an harsatna an chinfel theih lohte avangin an na a, an rum a ni. An hliam, an thup bo mekte a lan chhuah lohna turin chawlh hun tawhah pawh rim taka an thawh a la ngai a ni. 

Tun Krismasah hian i hliam chu eng anga na pawh nise tuam dam turin Isua a lokal a ni. I huatna te, lungngaihna te, inthiam lohna te, hlauhna te, khâkna te, ninna te leh natna te kha laksak chein a hmangaihna êngin a hliah khuh thei che a ni. Hei hi Isua Khawvel Êng a nihna chu a ni.

Doctor-te chuan êngah hian damna a awm a ni tih an hmuchhuak tlat. Kan thluak chhe laite siamṭhat nan êng hmanna enkawlna an hmang. Inzaina tinrengah eng chakna (laser) hi hman a ni. Kei ngei pawh ka mitin fiah taka a hmuh leh theihna turin kum tam kal taah khan eng chakna hmanga ka mit hi thai a lo ni tawh.

Vawiin hian doctor-ten dam lote tihdam leh nana an thiltihte hi mak leh ropui tak a ni. Mahse thinlung keh chhia te, thlarau chau te, inlaichinna keh chhia te leh rilru chaute hi Pathian chauhin a tidam thei. I nate tidam turin a ni khawvelah a lokal ni.

Isua a lo pian lai khan vantirhkohin, _"Mi tin ta tur chanchin tha lawmawm em em ka rawn thlen che u a ni. Vawiinah hian in tan Davida khuaah Chhandamtu a piang ta, Lal Krista chu."_ tiin a rawn puang (Luka 2:10-11).

Krismas ni hmasa bera vantirhkohten chanchin ṭha an rawn puan khan i tan pawh vawiin hian chanchin ṭha a ni. Eng na pawh i lo tawrh tawhte tan khan beiseina a awm a ni. I hliamte Isua ênga i rawn kalpui chuan i tidam che anga, hlimna i nei thar leh ang.

Ngaihtuah zui atan.

Mi zawng zawng hian lang lo lamah hliam kan nei vek. Chu thudik chuan engtinnge mite i hmachhawn/en dan a tihdanglam ang?

I hliamte Isua ênga rawn thlen tih hi engnge a awmzia? Ṭawngṭainaa Pathian hnena thlen turin engnge i mamawh?

Vawiin hian tunge hliam tuar, Krismas chanchin ṭha hria sela i duh em em?

[Lettu: Mapuia Fanai]

Friday, December 22, 2023

ENG THILTITHEI ZAWK I MAMAWH

I Nun Tieng Turin Isua a Lo Kal

By Rick Warren
— December 22, 2023
“Kei khawvêl êng ka ni. Tu pawh mi zui chu thimah an lêng tawp lo vang a, nunna êng an nei zâwk ang.” [John 8:12]

Hun thim paltlang chang kan nei ṭheuh. I ruahmanna a hlawhtlin tak loh avanga hun thim a awm bawk. Mite nena in inlaichinna leh sum leh pai chungchanga rilru hahna emaw, natna avanga hun thum emaw i hmangaih tak i chan avanga hun thimte chu a awm bawk ang.   

Chutiang hun thim i paltlang lai chuan hruaitu eng chu i mamawh ang. 

Buaina kan thunun theih loh kan hmachhawn chang chuan, Pathian lam kan hawi kher lo fo. Chu aiah chuan, keimahni leh keimahniin chingfel mai turah kan inngai tlat zel. Kan ngaihtuahna hun awlah chuan lutin kan thinlung pawhdawh (drawers) chu pawt chhuakin hmehen [flashlight] chi hrang hrang kan la chhuak ta ṭhin. 

Chu hmehena [flashlight] “inlaichinna” tih thuziak bik chu la chhuakin keimahni en enin kan lo eng ve ngawt zel. Nupui pasal kan inneih a, fate kan neih theih chuan emaw college rap phaka an awm chuan nun chu hlimawm dawnin kan ngai bawk. 

Chu chu a dik lo a nih chuan, kan nuna hmehen [flashlight] dang chu la chhuakin “hna/eizawnna” tihte chu kan keu leh chiam ṭhin. Kan hna hi kan thlak thei a nih chuan, thil engkim hi a dik leh ang tih kan ngaihtuah. Mahse chu chu a dik chuang lo. Tichuan “mipat hmeichhiatna” emaw “pawisa” emaw “Seminar/ Mahni inṭanpuina” tih lam te kan han hawi leh ren rawn a.  

Chu pawh chu a thawk tha lo a nih chuan hmehen [flashlight] dang “hmun dang [location]” chu kan phawrh chhuak leh zui. Thil dang zawk chu a nih phawt chuan thil chu tha zawk dawn tlat ngaihna kan nei fo. Mahse hmun [location] dang kan pan a nih pawhin kan harsatna chu kan chhuahpui a ni lekfang fo – a chhan chu kan buaina lian ber chu keimahni chhungah a awm tlat.   

Hmehen [flashlight] kan nei mai lo. Eng ngei kan mamawh. Kan mamawh chu Khawvel Entu, Isua Krista chu a ni. 

Isua kha hmehen te leh satliah mai a ni lo. Amah chu Meichher [searchlight] a ni! Amah chu a lian a, thil a titheiin mel ngaa mi ngei pawh hmu theitu a ni. 

I hun thim laiah chuan, hmehen [flashlight] nangma thiltihtheihna innghatah chuan i rinna kha nghat hlek suh. Pathian enga innghat hmehen chu hmang ang che – tawngkam danga kan sawi dawn chuan, rinnaah innghat rawh. 

Isua chu amah ring thiam thei tura ṭanpui tur chein dil rawh, tichuan a tanpui ang che. 

“Kei khawvêl êng ka ni. Tu pawh mi zui chu thimah an lêng tawp lo vang a, nunna êng an nei zâwk ang.” [John 8:12]

Ngaihtuah zui atan. 

Pathianin i kawng zawh tur a thlan zawh tur chuan eng vangin nge i thil theih zawng zawng chu Pathian ruahmanna nun chhuahpui tur chuan a tawk loh?  

A chang chuan rinna tlemte neih mai chu tawk tihchang i nei em? Eng vangin nge”? 

Isua zui tih chu engnge a awmzia? Amah i zuina kawngah chuan eng laiah nge rinawm lehzual tul nia i hriat? 

*Isua chu i lo la ring lo a nih a, amah zui tura thutlukna i siam a nih chuan engah nge i khawtlai kher ang leh?* 

Krismas chu nausen Isua pianna a ni satliah ngawt lo. Isua a lo ṭhang lian zel a, i sual tlanna atana a thihna chu a tel. Bible chuan hetiang hian a sawi, “Rinna avanga khawngaihnaa chhandam in ni; nangmahni thawh chhuah a ni lo a, Pathian thilpek a ni; thiltih avang a ni lo e, chutilochuan miin an chhuang dah ang e" tiin [Ephesians 2:8-9]

He Krismas hunah hian chu thilpek chu dawng tura i inpeih a nih chuan, he thu hmang hian tawngtai ang che: 

“Lalpa duh tak, misual ka ni tih ka pawm a, i ngaihdamna ka dil a. Isua chu i Fapa a ni tih ka pawm e. Ka sualna avangin a thi a ni tih ka ring a, i kaitho leh a ni tih ka ring bawk. Isu, ka chhandamtu atan ka pawm duh che a, ka Lal nia vawiin ni aṭanga zui tur chein ka inpeih e. Ka nun hi hruai la, i duhzawng tih min zirtir ang che. Isua hmingin ka dil e. Amen.”   

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[Lettu: Peka]

Thursday, December 21, 2023

TUNAH CHUAN ISUA NIHNA KAN HRE TA

I Nun Tieng Turin Isua a Lo Kal
 
By Rick Warren
— December 21, 2023
 
“… êntu atân khawvêla lo kal ka ni, mi ring apiang chu tu mah thima an awm loh nân.” [John 12:46]
 
Eng nge hriat sual i neih? A nih loh pawhin, vawiin lamah chuan i hmalam hun, inlaichinna, i sum leh hriselna ngaihtuahin i buai a ni thei. Eng thil pawhin buaina lo thlen che sela, Pathian eng chu i enchhuahpui mai a ngai a ni.  
 
Isua chuan hetiang hian a sawi, “… êntu atân khawvêla lo kal ka ni, mi ring apiang chu tu mah thima an awm loh nân.” [John 12:46]
 
I kiang vela thil thlengah khan chhanna nei vekin emaw hre thiam vekin emaw i awm lo a ni thei, Pathian chuan thim zingah nangmah maia i nun hmang turin a ti lo che. A berah chuan, a nihna chungchang hriatna bikah phei chuan thima i awm a duh lo lehzual. Isua Krista chu Pathian nihna min hrilh hre turin he khawvelah hian a lo kal a ni.
 
Leilunga nihna mumal nei lo [impersonal force] nen chuan inlaichinna kan neihpui mumal thei ngai lo. Chuvang tak chuan Pathian chu mihring angin khawvelah a lo piang a – Tichuan a nihna tak chu kan hre thei a ni.  
 
Chu chu eng vangin nge a pawimawh? A chhan chu i hlauhna leh lungkham tam ber kha Pathian i hriat fuh loh vanga lo awm an ni. Mahse Pathian i hriat fuh hnu chuan, i buaina a kiang sawt a, i rilru hahna a kiam sawt ang.
 
Pathian nihna chiah chu i hriat fiah loh chuan, amah chu pumpelh dan i dap ang. A hlauh pawh i hlau hial ang. I buainate chu a kianga thlen lovin nangmaha chinfel i tum ang. Anmahni i hriat loh chu i hmangaihin i ring thei lo vang!
 
Mite chuan “Pathian ka mitthla dan chuan…” tiin an sawi ṭhin a. Chumi awmzia chu Isua nihna chu i rinthu maia innghat a ni. Mahse Pathian hriatna tak tak chu rinthu a ni tawh lo. Thutak kan mamawh.
 
Isua chuan Joahana 14: 9 ah chuan hetiang hian a sawi, “Kei mi hmu chuan Pa a hmu a ni,” tiin.
 
Krismas avang chuan Pathian nihna chu kan hre thei a ni. Pathian nihna dik tak pawh kan hriat phah, a chhan chu Isua khan khawvelan kan luh dan ang chiahin a lo lut a: mihringa lo piangin.
 
Pathian nihna thenkhat mihring angin lo piang lo sela chuan kan hriat ngai miah loh tur a awm. Engtin nge Pathian chu hmangaihna, ngaihdamna leh chatuan mi a ni tih i hriat ang? A chhan chu Isuan min hrilh a ni, chu chu a nun a hman danah kan hmu thei.
 
Thima i nun a ngai tawh lo vang. Isua khan i nun zawng zawng enna zalenna, fiahna leh lawmna neia i neih theih nan a lo piang a ni.
 
Ngaihtuah zui atan.
 
I nun khawi laiah khan nge Pathian enna leh fiahna chu i mamawh?
 
Isuan Pathian nihna a hmuhtîr che avang chuan engvangin nge i lawm ang? Engtin nge Pathian nihna chu kawng dangin i hriat ang?
 
Pathian kan nih loh avanga thil kan hriatthiam tak tak theih ngai loh thil a awm a. Pathian chuan chutiang buaina chu engtianga hmachhawn turin nge a duh che nia i hriat?
 
[Lettu: Peka]

Wednesday, December 20, 2023

KRISMAS AH A PAWIMAWH ATAN HUN INSIAM RAWH

_I Nun Tieng Turin Isua A Lokal_

By Rick Warren 
— Dec 20, 2023
“Tin, Lalpan, "Marthi, Marthi, thil tam tak i ngaihtuah a, i buai a nih hi: thil pakhat chauh a pawimawh e; Marin chan tha chu a thlang a, chu chu laksak tur a ni lo ve," a ti a, a chhang a. Luka 10:41-42

Tunkum Krismas chu thilti tam lo vin, ti tlem turin inngaihtuah teh. I nun i tih mawlmang hian,  hlimna i neitam ang a, zalenna neiin, i thawpik a kiang ang.

Buai kum kan hman mek ah hian, kan calendar te, kan rilru leh thinlung te thil pawimawh atan kan dah a ngai — chatuan daihlo tur chu kum 5 pawh daihloh tur phei chu ngaihtuahloh a ṭha a ni.

Thil te tham kan tih hi, thilsual an ni kher lo. Pathian nena i hun i hman theihna turin i hun te chu thil ṭhaa i hman a ngai. Rawngbawlna kawngah engtiklai pawha Pathian tana hnathawka i inhman pawhin, Pathian kalsan lo va, nangmahah hna a thawh theih nana i awm a ngai a ni. 

Mari and Marthi hnen aṭang pawhin zirtur kan nei a ni. Unau an ni a, Isua ṭhiante an ni bawk a  ni. Nikhat chu an inah chawei turin an sawm a. Mari chu Isua ke bulah a ṭhu a, a zirtirna a ngaithla a ni. Marthi chu eirawngbawlin a buai a, engkim peihfel turin a inbuatsaih a ni.

Chu chu Krismas ang mai a ni lo'm ni? Thla khat chhungin heng bazar nan, gifts tuamnan, in chei nan, eng dah nan, tree siam nan, cards thawnchhuah nan, chawhlui buatsaih nan leh inhmuhkhawm nan te i hmang a. Krismas a lo thlen chuan inbuatsaih nan buai reng rengin hun i hmang a, Isua tan hun reng reng i nei lo a ni tih i hrechhuak ang.

“Marthi erawh chu rawngbawl ngawtin a buai hle a; tichuan a hnenah a lo kal a, "Lalpa, ka laizawnnun keimah chauh rawngbawl tura mi thlahthlam hi pawi i ti lo vem ni? Mi pui turin ti rawh khai," a ti a. Tin, Lalpan, "Marthi, Marthi, thil tam tak i ngaihtuah a, i buai a nih hi: thil pakhat chauh a pawimawh e; Marin chan tha chu a thlang a, chu chu laksak tur a ni lo ve," a ti a, a chhang a.” (Luka 10:40-42).

Mari chuan thil hlu pakhat a hria a: Pathian Fapa hriatchian hi a ni.

Chatuan hmunah chuan pawimawh dang a awm lo vang. Pathian he leia hnathawk a, kum a tam hnua chawl turin a ti lo che a. Amah hrechiang turin a duh che a ni.

Kumin Krismas atana ka duhsak che chu, chawl hahdam la, thawk la la, thil pakhat chauh ngaihtuah rawh.

Ngaihtuahzui atan

* Pathian nena inlaichinna ṭha nei turin eng thil ṭha in nge i rilru la a, veng tlat che?

* Khawtlang chuan hlawhtling tur chuan nitin thil tam tak i tih a ngai an ti a. Bible in engtin nge a sawi ve le?

* Tun Krismas ah hian Isua ah i rilru i pek zawk theihna turin engtin nge tihdan tharin bul i ṭan ang?

*[Lettu: Sangpuia]*

Tuesday, December 19, 2023

PATHIAN RUAHMANNA CHU A ṬHA A, MAHSE THIL REMCHANG TAK A HMANG KHER LO

_I Nun Tieng Turin  Isua A Lokal_

By Rick Warren 
— Dec 19, 2023
“ Tin, Josefa pawh, Davida chhungte leh a thlah a nih avangin, Galili rama Nazaret khua atangin, Mari a nupui hual rai teuh chung nen chuan hming ziak turin, Judai rama Davida khua Bethlehem an tihah chuan an kal ta a. Tin, heti hi a ni a, chuta an awm laiin a hrin a lo hun ta a.” Luka 2:4-6

I nuna Pathian ruahman chu a ṭha a. I tan hlawkna tur a ni. Ruahmanna duhawm tak a ni. Nimahsela, hrehawmna tello a ni lo va, a remchang reng dawn lo bawk a ni.

Isua piandan ah hian a chiang hle a ni. Chu thil chu Mari leh Josefa tan chuan a remchang mawh hle a ni. Bible chuan, “Tin, chung lai chuan heti hi a ni a, Kaisara Augustan khawvel zawng zawng hming ziak tur thu a pe a. Tin, Josefa pawh, Davida chhungte leh a thlah a nih avangin, Galili rama Nazaret khua atangin, Mari a nupui hual rai teuh chung nen chuan hming ziak turin, Judai rama Davida khua Bethlehem an tihah chuan an kal ta a. Tin, heti hi a ni a, chuta an awm laiin a hrin a lo hun ta a.” (Luka 2:1, 4-6).

Pathian Fapa Nu leh Pa ni tura an inbuatsaihnaah hian, Mari leh Josefa chuan Kaisara Augustan, tu te pawhin an pianna khaw lamah hming ziak tur thuchhuah an hre ve a ni.

Heti zawng hian i thlirpui teh ang: Sawrkarin mi tu pawh an lo chhuahna khua ah an let tur a ni ti ta se la — kan zavai hian vawi leh khat ah kan buai nuaih ang! Thlawhna te, Rel te, leh motor service zawng zawng an booked vek a rinawm a ni. Kawngpui zawng zawng a khat vek ang a. A hahthlakin a buai nuaih dawn a, remchanlohna tam tak a awm ang.

Rai puar thla kua lai ni tawh chu engtin tak buai ang maw han ngaihtuahpui ve teh. Raipuar ṭeuh tan Sabengtung chunga chuang chunga zinchhuah han buaithlak turzia chu han ngaihtuahpui teh. Chu chu Mari awmdan a ni. A tawp a tawp a Bethlehem an thlen khan, ran inah, ran hoin an hual velna karah nau a hrin a nia.

Isua lo pianna tur atan khan thil remchang tak kha a awmlo khawp mai. Nimahsela khang zawng zawng kha Pathian thil ruahman vek an ni. Hun reitawh tak aṭang khan Isua chu Bethlehem ah a piang dawn a ni tih sawi lawkna a awm daih tawh a ni. Chu thil remchanlohna piahlam ah chuan, Pathianin Mari leh Josefa tan, an beisei aia ṭha, an la suangtuah ngai reng reng loh an dawn phah zawk a ni.

Josefa leh and Mari chuan rilru nuam lo leh hlau chung chung pawhin Pathian an ring a. Nang pawh, Pathianin i tana ruahmanna a siam chu ring tawp mai rawh, Pathianin thil ṭha chu a hre zawk a ni. Pathianin thil remchang lemlo takte pawh i mamawh ang zelin a hmang thei. I tana ṭha turin awmze neiin, hna a thawk reng zel a ni.

Ngaihtuahzui atan

* I mamawhna kawngah ṭangkai a nih theihnan engtin nge Pathianin i remchanlohna a hman?

* Remchanlohna leh harsatna a lo awmin Pathianin nangmah eng nge nun chhoh pui zel turin a tih che?

* I damchhan i hria em — Pathianin a siam chhan che i hria em? A siamchhan ang taka i nun theihnan engtin nge a pek che?

*[Lettu: Sangpuia]*

Monday, December 18, 2023

ENG PAWH LO TI TAWH MAH LA, PATHIAN CHUAN A HRUAIKIR LEH ANG CHE

_I Nun Tieng Turin Isua A Lo kal_

- Rick Warren
Dec 18, 2023
"Khawngaihna nasa takin ka hruaikir leh ang che" Isaia 54:7

He Krismas hunpuiah hian, i nunah intuaitharna eng emaw i mamawh em? Ro deuh riauin i inhria em? Tihharh tharna i mamawh em?

Pathianah lo kir rawh.

"Rick, i tih tawhte i hre lo a ni" i ti mai thei. Ka hriat a tul lo, a chhan chu tunge i nih emaw engnge i tih tawh a pawimawh ber lo. Pathianin a hnena kir turin a duh tho che  a ni.

"Thla tam, kum tam ka vah bosan tawh a. Pathian chuan min hau mai lovang maw?" i ti maithei. Bible chuan heti hian a sawi a ni, "Khawngaihna nasa takin ka hruaikir leh ang che" (Isaia 54:7).

Pathian hi i chungah a thinrim lova. I chanchin avangin a thinrim a ni. Nangmah siamtu aia hmangaihtu che tumah an awm lovang. Pa Pathian chuan a siam che a, Fapa Isua chu i tan a thi a. Pathian Thlarau chu i chhungah a cheng bawk a. Krismas hi Pathian hmangaihna che tifiahtu a ni.

Mi tam tak hian Pathian hmangaihna hi an hre thei thin lo, a chhan chu aw dik lo an ngaihthlak thin vang a ni. Mi dang thusawi emaw nangma thu leh hla ngawt i ngaihthlak chuan, a tihniam zel ang che. Mahni i inhrilhte kha awih vek lo la, a chhan chu a dik vek lo a ni. Mi dang i tihderh aiin nangmah i intihderh nasa ang. Nangmah intehtu tha ber i ni lo, a chhan chu i inhriat dan kha a danglam reng dawn a ni. 

Tunge i rin tur i thlan a ngai a. Mi dang ngaihdanah i nun hi i nghat mai dawn em ni? Social media a sawiselnaahte i innghat dawn em ni? I inhriat dan kha i ring ber dawn em?

Emaw, Pathianin a sawi dan che thutak ni zawk chu i ring dawn?

Tirhkohte 3:19-ah chuan, "”Chuvângin, in sualte thai bo a nih theih nân sim ula, hawikîr leh rawh u; chutichuan, Lalpa hnên ata harh hunte a lo la thleng thei ang a,“ a ti.

Felfai lo tak i ni a, mahse thuk taka hmangaih i ni. Tawp thei lo tluka hlu i ni bawk. I beidawng maiin kawng dang hawi ngaihna hre lovin i awm a ni thei e. Mahse Tu emaw i hawi theih rengna a awm a ni.

Hmangaihna thuk tak nen, Pathian chuan a hruaikir leh ang che.

Ngaihtuah zui atan...

I tihsual nasa tak takte nen khan Pathianin a hmangaih che i ring em? Engvangin?

Eng aw nge i ngaihthlak tam ber? Eng ngaihdan hian nge i nun luah ber?

Pathianin a thuah i chungchang engtin nge a sawi? Chung chu i ring em?

(Lettu: Msa)

Sunday, December 17, 2023

KUMIN KRISMAS HI I CHHANDAMTU TAWH NAN HMAN TUM RAWH

I Nun Tieng Turin Isua a Lokal

- Rick Warren 
- Dec 17, 2023
"Amah a mite hnenah a lo kal a, amaha miten an lo lawm si lo. Nimahsela amah lawm apiang chu, an hnenah Pathian fate nih theihna tur a pe, a hming ringtute chu." (Johana 1:11-12)

Tumah mi famkim an awm lo. Chu chu mi zawng zawng hriat a ni! Khawvel hmun hrang hranga ka zin kualnaah mi sang chuang ka tawk tawh a, mahse tumah sualna nei lo a inchhal ka la tawng miah lo.

Ka tehfungin midang tumah ka teh lo, Pathian tehna phei chuan ka teh lo, nang pawh i nih kha. Kal dan phung nei vek kan ni a, che chhe fo ṭhin vek kan ni.

Chuvang chuan i sual tana nun rawn hlan, i chhandamtu Isua hi i hriat a ṭul a ni.

Vanram chu famkimna hmun- lungngaihna, inchhirna leh natna awm tawh lohna hmun a ni. Vanram chu i suangtuah phak piah lam daih a ni! Vanram chu famkimna hmun a ni, mahse nang leh kei erawh kan famkim lo. Pathianin mi famkim lote vanrama a hruai chuan vanram chu famkimna hmun a ni thei lovang. Kan famkim lohna zawng zawng nen Pathianin vanrama min hruai chuan vanram chu khawvel ai hian a ṭha bik dawn hauh lo tihna a ni.

Mahse Pathianin ruahmanna a nei: Krismas hun laiin khawvelah a lokal a. A Fapa, Isua Krista chu nun famkima a nung turin a rawn tir a. I sual vanga i thih lohna turin i aiin a thi a. Amah i rin avangin vanram i luh theih phah ta a ni. Ruahmanna ṭha tak a va ni em! 

"Amah a mite hnenah a lo kal a, amaha miten an lo lawm si lo. Nimahsela amah lawm apiang chu, an hnenah Pathian fate nih theihna tur a pe, a hming ringtute chu." (Johana 1:11-12)

Isua Chhandamtu a i pawm ve leh Pathian chhungte zinga chhiar i ni a, chu chhungkua chu chatuan daih a ni.

Pathianin mi zawng zawng a siam a. Pathianin mi zawng zawng a hmangaih. Mi zawng zawng hi Pathianin chhan neiin a siam. Mahse a chhungkuaa tel tura zawm ngei ngei tur, a Fapa ringtute tan chauh Pathian chu Pa a ni. Chu chu thil awm dan a ni.

Pathianin a siam che a, a chhandam bawk che. Krismasa a lokal chhan chu i sual zawng zawng aia thi turin a ni. 

A lam i hawi a chibai i bukna turin chu aia chhan ṭha chu hrilh tur che ka hre lo.

Ngaihtuah zui atan.

Krismas vuatvet buai hun lai hian engtinnge thiltih vang ni lovin khawngaihna avanga chhandam nih i inhriatna hian hahchawlhna a pek che?

Engvangin nge Pathianin amah thlang tura a duh che ni a i rin?

Kumin krismasah hian Isua lam i hawi theihna turin engtinnge a taka i nun ang?

*Vawiin hian i chhandamtu atan Isua ring rawh*

Isua chhandamtu a pawm nan hian Krismas aia hun ṭha engnge? Vawiin hian a hnenah i nun hlan tura i inpeih chuan heti hian ṭawngṭai rawh:

"Isu, nangmah ka rin che chuan thil sual ka tih zawng zawng min ngaihdam ang tih min tiam a. Ka nun chhan ka zir anga, engtikah emaw i chatuan hmunah min lo lawm ve ang."


"Ka sualte ka rawn puang, min chhandamtu i nih ka ring e. Ka Pathianah ka pawm che a. Vawiinah hian i remruatna hnuaia awm turin  ka nun zawng zawng ka hlan a che. I hnung zuia ti tura min tih apiang ti turin ka inpeih e." 

"Isu, min hmangaihna leh khawngaihna, vanram thleng tura min puitu avangin ka lawm e. Ka phu hauh lo tih ka hria. Ka chhandamna ka thawh chhuah a ngaih loh avangin ka lawm e, chu chu a theih dawn lo tih ka hre si a. Ka nun zawng zawng hi ka tan ni lovin i rawngbawl nan hman ka duh a. Ka nun i tan ka hlan a, min chhandam tur leh i chhungkua a min pawm ve turin ka ngen a che. Isua hmingin ka dil e. Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,

[Lettu: Mapuia Fanai]

Saturday, December 16, 2023

LUNGNGAIHNAIN A CHIM ṬAN DAWN CHEIN ENGNGE TIH TUR?

I Nun Tieng Turin Isua a Lokal

- Rick Warren 
- Dec 16, 2023
_"LALPA-ah chuan chawl la, amah chu nghak fan fan rawh; a awm dana vanneihna dawngtu avângin intilungngai duh suh."_ (Sam 37:7)

Lungngaihna i neih chuan i lo chau a, i chiai a, dawhtheihna i tlachham ṭhin. I lungngaihna chhan chu i beisei aia thil a thleng chak a i duh angin i enkawl ṭha hman lo emaw i beisei aiin thil a thleng muang lutuk a Pathian i tur ṭhin emaw vang a ni. 

Thil awmzia kan hre sa vek anih chuan nghah pawh pawi ka  ti lo fo. Mahse lungngai mai lova dawhthei taka Pathian kan nghah chuan chu chu rinna lantirna a ni. Pathian zia i lantir a ni. Dawhthei taka i nghah khan Pathianah rinna i nghat a amah i ring tlat a ni tih i lantir. Amaha tlawm takin i innghat tihna a ni.

Sam 37:7-ah chuan heti hian kan hmu, _"LALPA-ah chuan chawl la, amah chu nghak fan fan rawh; a awm dana vanneihna dawngtu avângin intilungngai duh suh."_

Midangte nen kan inkhaikhin fo hi lungngaihna/chauhna min thlentu lian tak pakhat a ni. Pathian hmangaihna leh kan tana a hnathawh en lovin midang kan en a, an thil neih, kan neih si loh te kha kan en zawk fo ṭhin. 

Midangte nena inkhaihkhin hi englai mahin thil finthlak tak a ni ngai lo. Engvangin maw? Nangmah ang tumah an awm lo! Midangte tana a a ruahman ang ni lovin Pathianin i tan ruahmanna a nei tlat. Pathianin midang nuna ruahmanna a neih ang chiah kha i nunah nei ve se i tih chuan  i nunah Pathian ruahmanna i ṭhelh nuai ang. Inkhaikhinna hian lungngaihna a thlen chawk. I inkhaikhin khan lungngaihna i nei ṭan ta ṭhin a ni.

Mahse lungngaihna hian hlutna a nei miah lo. Second khat pawh lungngaih nana i hman chuan i khawh ral mai mai a ni, a chhan chu lungngaihna hian eng hlawhtlinna mah a thlen thei lo. Lungngaihna hian hun kal tawh a siamṭha thei lo. Hma hun pawh a thunun thei hek lo. Lungngaihna hian vawiin hian a tirethei ang che. Ṭhutthleng su thei a chuan ang vel a ni, hmalam leh hnung lamah kan inawn chhawn sek ringawt. Hmalam pan si lovin tha tam tak i khawhral a ni ringawt mai.

Philippi 4:6-ah heti hian kan hmu, _"Engah mah mangang suh u; engkimah ṭawngṭai leh dilin, lawmthu hril tel zelin, in duhnate chu Pathian hnenah hriattirin awm zawk rawh se."_

Lungngaihna hian eng danglamna mah a thlen lovang, mahse ṭawngṭaina chuan a thlen ang. Chuvangin tun krismas vuakvelah hian lungngai lo la, ṭawngṭai zawk rawh.

Ngaihtuah zui atan.

Engvangin nge lungngaihna hian chutiang ngaihtuahna dik lo chu min puttir ṭhin?

Engtinnge mite nun i hmuh mai aṭang khan an lungngaih leh lungngaih loh, Pathianah rinna an nghet em tih i hriat ang.

Ṭawngṭaina hian thil  a tidanglam ṭhin tih hi i awh e? Engvangin?

[Lettu: Mapuia Fanai]

Friday, December 15, 2023

MI TUMRUH CHUAN CHET LOH HUN AN HRIA

Hun Khirh Tak Kara Ke Pen Dan
 
By Rick Warren
— December 15, 2023
 
“Tin, zîng takah, khua a la ên hmain a tho va, a chhuak a, hmun fianrialah a kal a, chutah chuan a va ṭawngṭai a.” [Marka 1:35]
 
Harsatna hmachhawn dan kawng pawimawh tak chu ringtu tam takten an thil pumpelh chu a ni hlauh fo: Pathian nen fianrial hun hmang tam rawh. Chu Thlarauva insawizawina chu chhelna atan leh buaina hnawk chinfelna atana thil pawimawh em em a ni.
 
Ṭawngṭaina chu rilru hahna chhawktu pawimawh a ni. Inpaihthawlna hmanrua niin, mawi loh hlau reng reng leh mite sawisel hlau reng renga nun hman pumpelhna a ni. I phurrit kalsan dan kawng awlsam a ni, a bikin nangmahin i thil phurh theih lohte chu. Chu hmun chu Pathian chu a remchang a, buaina i tawh mek aṭanga a puih duhna che a hriattirna che chu a ni. Chutah chuan damna a awm.  
 
Pathian nena fianrial hun hman chu engtin nge ngaiah i neih theih ang? Ngaia neih tih chu vawi eng emaw zat tih nawn aṭanga lo awm a ni. Vawi eng emaw zat i tihnawn fo loh chuan ngaia neih tihna a ni thei lo, nitina i tih fova thlah lova i ti ṭhinte a nih ngawt loh chuan.
 
Isua chuan thlaraua khawsak dan chu a nunpui a ni. Bible chuan Luka 22: 39 ah chuan Isua chuan Jerusalem chu chhuahsanin Olive Tlangah chuan ṭawngṭai turin a kal thin tih min hrilh. Marka 1: 35 chuan hetiang hian a sawi, “Tin, zîng takah, khua a la ên hmain a tho va, a chhuak a, hmun fianrialah a kal a, chutah chuan a va ṭawngṭai a,” tiin.
 
Isua khan chiang taka a thil hriat chu, eng anga buai pawh ni se, Pathian nena fianrial hun hman a, ṭawngṭaina hun kha chu a thlah ngai lo tih a ni. Chu tiang hun i nunah khan i nei ve em? I hnathawh thil dang bansanin Pathian hmaa kunin siamtharna i chang ṭhin em?
 
Isua chanchin a than khan mipui tam tak chuan a thusawi ngaithla turin a kiangah an lo kal a. Isua erawh chuan Pathian nena fianrial hun hmang turin a inbuatsaih thung. Bible chuan hetiang hian a sawi, “Nimahsela, ani chu thlalêrahte a kal hrang a, a ṭawngṭai ṭhîn a,” tiin. Isua khan ṭawngṭai tura mipuite kha kalsan fo a duh a nih chuan engtianga nasain nge keini pawh hian kan mamawh ve ang tih han ngaihtuah teh.
 
A chhan chu bengchheng chuan hahna a siam a, chuvang chuan i ni bul ṭanna atan phone, tv. Radio leh social media te ni lovin Pathian zawk hmang ang che. Hahdam takin awm la, ngawi la, Pathian aw erawh ngun takin ngaithla ang che. Tichuan, Pathian aw ngaithla thiam a, a kianga awm thiam thei turin ṭan la rawh.  
 
Ngaihtuah zui atan.
 
Engtin nge thlarau thil leh inthununna te chu a tak taka chet chhuahpui thei tura phurna i neih theih nan i thil ngaihtuah dan chu i thlak danglam ang?  
 
Pathian awmnaah chuan engin nge i taksa leh rilru chu ngawihtir ṭhin?
 
Pathian nena fianrial hun tam zawk kan hman theihna tura rahbi thar chu kan rap ngam lo fo mai. Chu rahbi thar chu i nunah eng ang nge a nih?
 
[Lettu: Peka]

Thursday, December 14, 2023

I ṬHIANTE ṬANPUINA I MAMAWH

Hun Khirh Tak Kara Ke Pen Dan

By Rick Warren
— December 14, 2023
“A hnêna awma, thu hrila, a tirh tûr mi sâwm leh pahnih a ruat a.” [Marka 3:14] 

He thu “I hna chu ṭha taka thawh zawh i duh chuan …” tih hi dah khat turin hrilh ta che ila, “Nangmahin ti mai rawh…” tiin in dah khat mai thei. 

Chu tak chu mi duh tui em em hoten an chauhpui hlauh fo chu a ni – a chhan chu hna zawng zawng chu nangmah mai chuan i thawk thei lo vang. 

Isua kha mihring a ni a, keimahni ang mai a ni. Keimahni ang chiahin, amah chauha hringnun buaina kha hmachhawn tur a ni lo. 

A rawngbawlna a ṭan dawn khan Isua khan a thil tih hmasak ber kha i hria em? Ṭhianzaho [small group] a buatsaih a. Marka 3: 14 chuan hetiang hian a sawi, “A hnêna awma, thu hrila, a tirh tûr mi sâwm leh pahnih a ruat a,” tiin. Chung mite chu a ṭhiante an ni. Isua khan ṭhianzaho [small group] rawngbawlna atan tak tak hma khan a din a, a chhan chu Pathian khan rawngbawlna a neih lai khan hun harsa ber laia a kianga awm tur ṭhian a mamawh vang a ni. 

“Kha hna kha zawh i duh chuan nangmah khan thawk rawh” ti theitu awm chhun chu Isua kha a ni. Engkim tih theihna a nei a, mahse chuti chung chuan a hna thawk turin ṭhiante a mamawh tho. 

Kraws-a khenbeh a nih hmaa Gethsemani huana a kal dawn khan Isua khan a zirtirte hnenah thu a sawi a, chu chu Matthaia 26: 38 ah chuan hetiang hian kan hmu, “hei hi ka thisen, sualte ngaihdam nâna mi tam tak tâna chhuak tûr, thuthlunna chu a ni,” tiin. Isua khan amah ṭawngṭaipuitute a mamawh a. Isua meuh pawh khan hun harsa a paltlang lai chuan ṭhiante a mamawh a ni. 

Kan buaina tam berte hi chu keimahni siam a ni. Keimahni maia innghat emaw kan tih chang hian kan buai fo – mahse a ni lo. Pathian chuan leilung leh vante enkawltu atan min ko lo, i nun mai pawh kha enkawltu awm chhun atana tih i ni chuang lo. A hruaina leh tichakna i mamawh a, ṭhiante [small group] ṭanpuina i mamawh bawk. 

Midangte ṭanpuina kan duh lo chang a awm fo, a chhan chu keimahni lama inrintawk lohna leh chapona vang a ni thei, chuvang chuan kan chau fo. Mahse Pathian mi nangmah tanpui duhtu leh tihchak duhtu che an awm – i ṭanpuina leh thlawpna mamawhtu pawh an awm ve bawk. 

Inphahhniam la, nangmah mai chuan engkim i ti thei lo tih chu pawm ang che. I tih a ngai lo! Pathian chuan ṭanpui i ngaih huna ṭanpui tur chein kohhran a siam a. Amah ring tura thutlukna i siam a, i inphahhniam hun chuan chutianga nangmah pui theitu bulah chuan a hruai ang che. 

Ngaihtuah zui atan. 

Pathian mi kalkhawmte tan chuan eng vangin nge chaklohna leh inngaihtlawmna chu a pawimawh? 

Chauh tawngkhawngna [burn out] chu i hmachhawn hnai em? Eng nge a chhinchhiahna chu? 

Tun dinhmunah khan eng vangin nge ṭhiante ṭanpuina i mamawh? Ṭawngṭai la, Pathian chu nangmah a puihna tur che mumal tak zawt ang che. 

[Lettu: Peka]

Wednesday, December 13, 2023

DUHTHLAN TUR ṬHA BER A NI TAK TAK EM?

_Hun Khirh Tak Kara Ke Pen Dan_

— Rick Warren 
— Dec 13, 2023
“Tupawh leilehnaa kut nghata hnung lam en chu, Pathian rama mi ni tlak a ni lo ve," a ti. Luka 9:62

Ka lo upa ve zel a, duhthlanna siam hi a pawimawh a ni tih ka hre ve zel a ni. Duhthlan tur leh remchang pawh a awm zel a ni. Thil han thlan chat hian ṭangkaina a nei zel.

Bible in 1 Korinth 10:23 ah, “Thil engkim tih a thiang a, nimahsela thil engkim tih a tha kher lo. Thil engkim tih a thiang a, nimahsela thil engkim tihin mi a siam tha lo.”

Ṭawngkam danga sawi chuan, thil ṭhenkhat hi chu a ṭha lo tihna a ni kher lo — a ṭangkai lo mai zawk a ni. Chu chu i thliar fel theih chuan, i nunah harsatna lo thleng pawh ni se i hmachhawn thiam ang a. I inpawt fan thei ang!

Chumi kawng chu zawha i inhriat hnuah chuan, thil pawimawh lo chuan a tibuai nep sawt ang che. Chatuan atan i inruahman thei ang. Hringnuna pawimawh ber chu i hre thei ang a, tichuan thil ṭha ringawt ni lo vin, thil pawimawh ber i thlang thei ang.

Isua chu engkim ngaihtuah thiam mi a ni a. Duhthlanna siam ṭhin mi a ni a, Pathian ram tan a inphal a, a Pa duhzawng a ti zel ṭhin.

Luka 9:51 chuan, "heti hi a ni a, amah hruai chhoh a hun dawnin, Jerusalem khuaa kal tumin a hawi tlat a.“

Thihna hmachhawn dawn pawh ni se, a ṭhulh chuang lo, hma lam panin ke a pen tlat a ni. Chu chuan rilru hrehawmna,  tuarna leh tihduhdahna a tawrhchhuahtir a ni. Paula pawh chutiang mi tho chu a ni a. Hetiang hian a ti, "Thil beitham 40 ti duah lo vin" "He thil pakhat hi ka ti ṭhin" a ti. A nuna thil pawimawh ber, thil pakhat a ti ṭhin.

Pathian hman theih turin theihna tam tak a pe che a, nimahsela daltu la awm chu thil pawimawh ber i la thlang fel lo hi a ni. Pathian rawngbawlna hun nei lo va i inhriat chuan, i rilru i pe lo tihna a ni. Pathian hriat tumna aia social media a hun i hman tam zawk chuan, i rilru i pe lo tihna a ni. Isua thlan aia thil dang zawk i ti a nih chuan, i rilru i pe lo tihna a ni ang.

Bible hi a chiang khawp mai: “Tupawh leilehnaa kut nghata hnung lam en chu, Pathian rama mi ni tlak a ni lo ve," a ti. Luka 9:62

Engtik niah emaw chuan Pathian hmaah ila ding dawn a. Thilpek i dawn aṭang khan eng nge i tih tia zawhna chu engtin nge i chhan ang le?

Ngaihtuah zui atan

* En  bik neiin i hun i hmang em? I nun aṭangin eng nge chhanna pek tur i neih?

* Thil pawimawh ber i tih theih lohna daltu (thil ṭha pawh ni se) eng te nge ni le?

* Thil pawimawh ber bawhzui tur leh hmachhawn turin engtin nge Pathian a inpuan?

*[Lettu: Sangpuia]*

Tuesday, December 12, 2023

DUHNA HRANG HRANG CHU INKAWKALH LO SE

_Hun khirh Tak Kara Ke Pen Dan_

By Rick Warren 
— Dec 12, 2023
“Keima thu thuin awm ka tum lo va, mi tirtu thu thu zawka awm ka tum thin avangin.” Johana 5:30

Zinga i thawh hma nachhan hi eng nge ni? I hna avang nge? Lehkha i zir dawn vang nge? Mi dang rawngbawlsak leh hmangaih duh vang nge? Harsatna karah pawh kal zel tur zawkin em ni?

Harsatna chu engtiklai pawha hmachhawn i duh lo a nih chuan, engin nge phurna pe che tih i hriat a ngai a ni.

Chu chu engvang nge? A chhan chu phurna chhan hrang hrang i neih chuan kawng dang dangah kal i rilruk mai ang. Isuan, “Tumahin hotu pahnih rawng an bawl kawp thei lo,” a ti. (Luka 16:13).

Pathian pawhin mi zawng zawng a ti lawm thei lo. Mi ṭhenkhatin ruahsur tura an ṭawngṭai laiin, ṭhenkhatin ni a sat theih nan an ṭawngṭai thung. Pastor anga kum 42 rawng ka bawl lai khan, mi ka ti lunghnur fo tih ka hria, a chhan chu miten beiseina inang lo an neih ṭhin fo vang a ni. Mi zawng zawng ka tilawm thei lo va, nang pawhin i tilawm vek thei lo.
Bible chuan mihring tihlawm tum chu thang a ni a ti. I rilru leh thinlung la pengin i tan daltu a ni thei. Chuvangin Isuan Johanan 5:30 ah, “Keima thu thuin awm ka tum lo va, mi tirtu thu thu zawka awm ka tum thin a." Isua erawh chuan tih lawm tur a hria a ni.

Pathian tihlawm i tum lo a nih chuan, kawng tinrengah mihring tihlawm i tum tihna a ni ang. Pathian tihlawm chu a awl a, rilru hahna pawh a tikiang a, a chhan chu Pathian tihlawm chu thil dik tak a nih vang a ni. Chuvangin Isuan thil a tuar chak em em a. Mi pakhat chiah tihlawm a tum avangin.

I hlimna chu tu tihlawmnaah nge a innghah? Tu nge tihlawm i tum cheu? Thenkhat tan chuan, nu leh pa, fate chophur ngai lo leh enkawl thiam lem lo tak te. Ṭhenkhat tan chuan, kan pu te, engtiang pawha beiha tihlawm harsa em em te hi an ni.

Nangmah hi a tuartu chu i ni lo. I duhthlan tur tluk chiahin i zalen a ni. Tumahin i remtihna tel lo chuan an beiseina i puitlinsak ngawt thei lo a ni.

Mi pakhat tan chauh va i nun chuan, hnawl nihte i hlau lo vang. Chu ai chuan, Pathianin a siam chhan che ni turin hmangaihnaa thuam leh zalenna pek i ni zawk ang.

Ngaihtuah zui atan

* Mi dang ni lo vin, Pathian chauh tih lawm i tum chuan —rilru leh thinlung zalenna engtia nasa nge i neih theih ang?

* I rilru hahna chuan mi dang tihlawm i tumnaah engtin nge nghawng a neih? I ngaihtuah chian deuh hnuah ni lo va i hriat chuan, en thuk leh deuh rawh!

* Pathian tihlawm dan chu engtin nge i hriat theih ang?

*[Lettu: Sangpuia]*

Monday, December 11, 2023

NGAIHDAN PAKHAT CHIAH A PAWIMAWH

_Hun Khirh Tak Kara Ke Pen Dan_

- Rick Warren
Dec 11, 2023
"Khawvel eng in ni e. Tlang chhipa khaw awm chu thuhruk theih a ni lo." Matthaia 5:14

Tunge i nih i chian loh chuan harsatna te, mi dangte leh hun harsaten a tidanglam thei che a, chu chuan mi a tihah thin a ni.

Kan nunphung hian he tihdanglamna kawngah hian teltir min tum ngar ngar thin a. Nihna a chiangkuan lohna i neih a, engnge i nih i hriatchian loh chuan hneh i awlsam em em dawn a. I thinlungah Pathianin chhan nei lova a hmangaihna cheah leh Pathian fa i nihnaah i innghah theih loh chuan i hah reng fo dawn a ni.

Isua khan tunge a nih kha a inhai ngai lo. A nihna takah chuan Pathian thuah hian vawi 18 zet mai tunge a nih a sawi a. Hengte hi "ka ni" (I am) a tihnate a ni tiin an sawi thin a, entirna atan, khawvel eng ka ni. Pathian Fapa ka ni. Kei hi kawng leh thutak leh nunna chu ka ni. Nunna Chhang chu ka ni a tih ang te. Isua khan tunge a nih kha a inhrechiang hle tih a tilang a ni.

Johana 8:18-ah Isua chuan, "Kei hi mahni thu inhriattirtu ka ni" a ti a. Mi dangte kha ama nihna sawi turin a mamawh hran lo. Mi dangin an pawmpuina pawh kha a zawng chuang hek lo.

Pawmpuina i zawna, mi dangte ngaihdanah i innghah chuan i hah lo thei lovang. A chhan chu, tunge i nih i inhriat loh chuan, mi dangin an thlanfelsak ngawt thei lo che. I nih loh pui nih tumin i hah hle thei a ni. Lemchangin, hmaikawr i vuah a ni ngawt anga. I chau mai ang.

Isua khan khawvel eng a nih kha a inhria a. I chungchang pawh a sawi tho mai: "Khawvel eng in ni e. Tlang chhipa khaw awm chu thuhruk theih a ni lo" (Matthai 5:14). I hlutzia hi i hrethiam em? Mi dangte sawi vang pawh ni lo, Pathianin a sawi avang zawk liau liau a ni. He khawvelah hian nangmah ang chiah tumah an awm lo.

Nangma chungchanga thutak hi i pawm a ngai - i chakna leh i theihchin leh chaklohnate. Pathian chuan heng zawng zawng nei hian a siam che a, i duh zawng i tihna turin engkim a pe bawk che a ni.

Chumi chu i pawm chuan,  i nihnaah i thlamuangin i hah lo thei dawn a ni.

Ngaihtuah zui atan...

Pathian fa nih chu engnge a awmzia? Engnge a hlawkna? Engnge min beisei let?

I chak lohna pawh hi engvangin nge i pawm tel a tul?

Pathianin a sawi aiin mi dangin i nihna an sawiah i innghah chang ngaihtuah la. Chu chuan engtin nge a nghawng che?

(Lettu: Msa)

Sunday, December 10, 2023

MAHNI INHRIATNA HIAN I RILRU HAHNA A TIHNIAM THEI

_Hun Khirh Tak Kara Ke Pen Dan_

- Rick Warren
- 10 December, 2023
_"Ngai teh u, Pa hian min lo va hmangaih tehlul êm! ‘Pathian fa’ tia vuah kan ni vê ta reng mai! Khawvêl erawh chuan min hre si lo, amah a hriat miau loh avângin."_ (I John 3:1)

Hun harsa takah kan awm mek a. Pathianin ti tura min kohnate tihlawhtling turin tunhma aia nasain tawrhchhel kan zir a ngai a ni. Chuvang chuan  tawrhchhelna rahbi hmasa ber chu Pathian hmangaihna che hriatreng hi a ni. Chu chu rilru hah damdawi a ni.

Kan nun chhan tihhlawhtlinna pakhat chu Isua an zel hi a ni. Isua chuan pa Pathianin a hmangaihna a ringhlel ngai lo. Johana 10:17-ah khan, _"ka Pa chuan mi hmangaih a ni"_ tiin a sawi nawn awn awn a ni.

Pathian chuan Isua a hmangaih angin phut let lovin, hleihluak takin, chawl lovin leh tawp-in-tai nei lovin min hmangaih a ni tih hriat hi tawrhchhelna innghahna pawimawh tak a ni. Paula chuan Rom 8:38-39-ah, _"Thihna te, nunna te, vântirhkoh te, lalna te, thiltihtheihna te, thil awm mêk te, thil lo la awm tûr te, sânna te, thûkna te, thil siam dang rêng rêng pawhin, kan Lalpa Krista Isuaa awm Pathian hmangaihna laka ta chu min ṭhen thei lo vang tih ka hre chiang a ni,"_ a ti. Pathian hmangaihna lak aṭang hian lak hran theih kan ni lo tih hriatna hian min tituarchhel thei a ni.

"Pathian chuan Isua chu a hmangaih ngei ang chu, a Fapa a lawm" i ti mai thei e. Mahse, Isuan Pathian fate in nihna anga a hmangaihna che u a sawi kha in hria em? Johana 15:9-10 chuan, _"Pain mi hmangaih ang bawkin kei pawhin ka hmangaih che u hi; ka hmangaihnaah hian awm reng rawh u. Nangnin ka thupêkte in zawm chuan, ka hmangaihnaah in awm reng ang; Keiin ka Pa thupêkte ka zâwm a, a hmangaihin ka awm reng ang bawk hian"_ a ti.

Pathianin eng anga nasa in nge a hmangaih che tih i hriatthiamna kha i mimal nun himna a ni. Pathianin englai pawhin phut let nei lo leh famkimin a hmangaih che tih i chian loh chuan awlsam taka midangte pawm loh mi i lo ni thuai ang. Midangte tihlawm tumtu mai i lo ni dawn a ni.

Mahse, Pathian fa i nihna i chian tlat chuan, Pathianin a ngaihdan che i pawm tlat chuan hun harsate mahni inring tawk tak leh thawveng zawkin i hmachhawn thei zawk dawn a ni.

Pathianin a hmangaihna che nasa tak hriat thar zel i duh chuan a thute en ṭhin rawh.

_"Ngai teh u, Pa hian min lo va hmangaih tehlul êm! ‘Pathian fa’ tia vuah kan ni vê ta reng mai! Khawvêl erawh chuan min hre si lo, amah a hriat miau loh avângin."_ (I Johana 3:1)

Ngaihtuah zui atan.

I nihna leh Pathianin a thlir dan che tarlanna chang dang engte nge awm?

Engvangin nge Pathian hmangaihna hrethiam mai lova a hmangaihna che pawm thiam pawh a pawimawh?

Engkawngah te nge i inpawt fan ve thei a ni tih i lantir ang? Pathian thu nena inzawm reng turin engnge i tih ang?

Saturday, December 9, 2023

ISUA KAWNG, ZAIDAMNA NUN KHA ZAWH RAWH

_Hun Khirh Tak Kara Ke Pen Dan_

- Rick Warren
- 9 December, 2023

_"Ka nghâwngkawl bât ula, ka hnên aṭangin zir rawh u; nunnêm leh rilrua inngaitlâwm ka ni asin; tichuan, in thlarau tân nun hahchâwl in nei ang."_ (Matthaia11:29)

Mi zawng zawngin _anxiety_ (chiaina, rilru mumal lohna) damdawi hi hriat kan duh vek a chhan chu kan lo paltlang ṭheuh tawh thil a ni. Nun harsat hun lai takah kan awm a, kan taksa leh thlarau chawlh hahdamna tur hmuh thiam a har hle.

Mahse, thuruk a ni lo. Lal Isuan lungkham titlem a amah ring tam turin a duh che. Matthaia 11:29 - ah hetiang hian a sawi, _"Ka nghâwngkawl bât ula, ka hnên aṭangin zir rawh u; nunnêm leh rilrua inngaitlâwm ka ni asin; tichuan, in thlarau tân nun hahchâwl in nei ang."_

Isua hnen i pan hnuah leh i phurritte i thlen hunah chuan amah aṭangim zir turin a duh che a ni. Engvangin? A chhan chu, Isua a hmanhmawh ngai lo. Ngilnei leh tlawmna thinlung aṭanga lo chhuak, hahna ni lo nunna  pe tur chein a pen a ni. Isua chuan inrem leh chhan neia nundan min zirtir a, entawn tur min hnutchhiahte hmang hian kan rilru leh thlarau zem kan chhungkhat thei a ni. A nundan zir la a tihdan angin ti zel rawh.

Isua anga nun zir hi hmasawn zel ngai a ni. Zankhat thil thu a thiam theih a ni lo a chhan chu i nundan pawh kha zankhat a i thiam a ni si lova. Mahse, eng ang reih pawh ngai se amah rindan i zir thiam ngei ang.

Isua aṭangin ngilneihna leh tlawmna i zir chhuak ang. Mahse, chu chuan engtin nge a puih ang che? Ngilneihna leh inngaihtlawmna hi rilru hah leh chau tihdamna a ni lo. "Keimah aṭang hian zir rawh, tichuan, tawrhchhelna leh feina ka zirtir ang che" ti turin i beisei a ni mai thei.

Isua chuan ngilneihna leh inngaihtlawmna hi zir turin a duh che, a chhan chu mi do leh chapona hi rilru hah leh nun ruak a min siamtu lian ber a ni.

Thil engmah kan nghah theih loh hian midangte kan do a lo ni ṭhin a, inpe mah mah angin kan lang ta ṭhin. Chu chu zaidamna nun letling chiah a ni.

Chapona chu engkim thunun vek tumna hi a ni. Keimahni hi kan rilru tihah leh chapona min pe theitute zinga mawhphurtu a ni.

Heng rilru tihah theitu lian tak tak te damdawi chu ngilneihna leh inngaihtlawmna hi a ni. Nitinin Pathian i nih lohzia leh mi chhandam theitu i nih lohzia i inhrilh nawn fona hmangin i zir thiam thei ang.

Isua nen hun hmang tam la, tichuan, ngilneihna leh inngaihtlawmna chuan hahdamna a thlen theih dan che i hre thei ang.

Ngaihtuah zui atan.

Hmanhmawh tura duan i nih i inring em? Engvangin?

Hahna thlen thei tur che in eng thil nge thunun i lo tum ve?

Engtiangin nge midangte chhandamtu anga i lo awm? Engangin nge a nghawng che?
Lettu: Mapuia Fanai

Friday, December 8, 2023

ISUAN I PHURRIT CHHAWK CHE A DUH

Hun Khirh Tak Kara Ke Pen Dan

By Rick Warren
— December 08, 2023
 
“Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tân chawlhna in hmu ang.  Ka nghâwngkawl chu a nuam a, ka phur pawh a zâng a ni,” [Matthaia 11:29-30]
 
I phurrit avangin i chau em? Thil engkimah inrawlh i lo tum a ni thei. Chu chu kan tih dan fo a ni, a chang chuan kan lo hre miah lo. Tih kan tum loh chang pawhin ngaihtuah mang lovin kan lo ti leh a, keimahni chu pawimawh ber emaw kan lo inti fo. Thil engkim kan chhut a ngai a. Thil engkim kan thlentir emaw kan ti fo.
 
I thil thunun tum chu i tum ang zelin, i phur a rit zel ang a, i hahin i nun chu a ruak deuh deuh ang. Thuneitu ber nih loh chu i zir a ngai fo ang!
 
I nun ruak avanga Isua i rawn pan a nih chuan, chu chu thuawihna nun dawttu a ni: “Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tân chawlhna in hmu ang.  Ka nghâwngkawl chu a nuam a, ka phur pawh a zâng a ni,” [Matthaia 11:29-30]
 
Thil eng emaw i ning a nih chuan, thunei ber nihna i kalsan a hun tihna a ni thei.
 
Nghawngkawl [yoke] tih chu artui laimu tihna ni lovin leilehna ran pahnih chunga bah chi a ni a, lei lehnaa an nawr dun tur chu a ni. Nangma nghawngkawl mai pawh rit i tih tawh sa laia Isua phur lak belh chu thil harsa tak a ni ang. Eng vangin nge mi dang nghawngkawl chu i la lak cheu ang a, i lo phurh ve zel ang?
 
Nghawngkawl neih chhan chu phur tihzanna tur a ni a, tihrih belhna tur a ni lo. Nghawngkawl inzawn tih awmzia chu phur inchhawk tihna a ni. Ran pahnih thuruala nghawngkawl an phur dun a nih chuan an phur chu a zang sawt ṭhin, a rih belh ngai lo.
 
Isua nen in phur in inṭawm loh chuan chak takin i inpal buan buan ang a, khuarkhurumah i inbilh palh ang tih a hlauhawm. Mahse amah nen in phurh dun chuan i kal chak lutuk tur a veng che ang a, khuarkhuruma i inbilh a phal hauh lovang.  
 
Nghawngkawl chuan phur a tizang a, buaina awm thei lakah a venghim ang che. Galatia 5: 25 chuan hetiang hian a sawi, “Thlarauva nung kan nih tawh chuan Thlarau hruai ang zêlin i awm ang u,” tiin.
 
Isua nena phur inṭawm chuan Pathian Thlarau hruainaah in kal tihna a ni – amah nena thawh dun leh a ruala kal chu a hlawk a ni. Isua chu a hmanhmawh ngai lo, amah nen in inzawm ngat chuan nang pawh i hmanhmawh vut vut ngai lo vang.
 
Ngaihtuah zui atan.
 
Pathian lam pana a ṭanpuina i dil changin eng vangin nge i phurrit zawng zawng chu a lak bo duak mai loh ṭhin?
I nunah engtianga chakin nge kal i duh? Hriselna leh hahdamna nei turin engtianga chaka kal nge ngai?
 
Matthaia 11: 29-30 kha ennawn leh teh ang. Isua chuan a nghawngkawl i bahpui chuan engnge thawk tura a duh che? Chu chu engtin nge i tih theih ang?
 
[Lettu: Peka]

Thursday, December 7, 2023

I THLARAU A CHAU EM? ISUA PAN RAWH

Hun Khirh Tak Kara Ke Pen Dan

By Rick Warren
— December 07, 2023
 
“Ka hnênah lo kal ula, keiman ka chawlhtîr ang che u.” [Matthaia 11:28]
 
Isuan, “Ka hnênah lo kal ula, keiman ka chawlhtîr ang che u” [Matthaia 11:28] a tih khan, eng ang chawlhna nge a sawi?
 
Isuan in thlarau tana chawlhna a tiam kha taksa chawlhna satliah aia thuk zawk a ni – a chhan chu tun dinhmuna i harsatna chinfelna atan khan taksa chawlhna satliah chu a ni ngawt lo.
 
Nun ruaka Isua i rawn pan chang khan rilru, thlarau leh ngaituahnaa phurrit nen i rawn pan a. Taksa chawlhna ringawt ni lovin, rilru hahna, lungngaihna, buaina, hmanhmawhna leh manganna laka chawlhna i mamawh a ni. Hahdamna i mamawh chu muthilh emaw zin khawthawn vanga hahdamna satliah emaw ringawt a ni lo.
 
Mi tam ber chuan an taksa a chauh changin hahdam dan an hre mai a, chu chu an rilru leh thlarau a chauh changa hahdamna nen thil hrang daih a ni. I chauh chang chuan movie en a, a nih loh pawhin i phone i en mai thei bawk. I zal mai thei a, a nih loh pawhin intihthawven nan i vak vel thei. I ṭhian ṭha te nena hun hman pawh i thlang mai thei, a nih loh pawhin mahnia khawsak chu i duh zawk thei ang.  
 
Chung zawng zawngte chu thil ṭha an ni vek – mahse a enga mah chuan i thlarau tan chawlhna an pe lo vang che.
 
Pathian chauhin i thlarau chu a siamtha thei ang. Chuvang tak chuan, i Thlarauva nun ruak, thlarau lungngaihna emaw hahna a paltlang a nih chuan Isua chuan a kianga kal turin a duh che.  
 
Isaia 40: 29 chuan hetiang hian a sawi, “Hahte a tichak a, Chaute a tichak thar leh ṭhîn,” tiin.
 
I nun chhungril chu a ruah/ruak changin nangmah hual veltute chuan i chet tam lehzual a ngai tiin an sawi a. Pawisa tam zawk i thawhchhuah a ngai, thil tam zawk i mamawh a, thil tam zawk i tih a ngai a, hmun tam zawka i zin a ngai an ti. Kal rawh, kal rawh. A aia nasa zawk zelin che rawh. Mahse chu tak chu i nun a ruak chhan chu a ni!
 
Isua chuan chu mi letling chiaha awm tur chuan a duh che: Kal suh. A kiangah kal rawh – I nihna ang ang khan pan ang che.
 
I thlarau chuan he khawvelin a pek theih chinah hian chawlhna a hmu ngai lo vang. A chhan chu i thlarau kha he khawvel thilin a hnawh khah tura siam a ni lo.
 
Pathian tana siam i ni, chawlhna tak tak chu i thlarau rethei a kianga i awmtir hunah chauh chuan chawlhna i hmu ang.
 
Ngaihtuah zui atan.
 
I kal muan hlek emaw i chawlh chang emaw chuan mahni inthiam lohna i nei ngai em? Chutianga i awm chang chuan engnge nangmah leh nangmah i inhrilh ang?
 
I hahna chu i taksa atang ni lovin i thlarau zawk atang chuan a ni tih engtin nge i hriat theih ang?
 
Isuan I thlarau a siam thar chang chuan eng thil ti turin nge siamthar nia i inhriat?
 
[Lettu: Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...