Saturday, May 31, 2025

I PAWLTE HMANGAIH ZIR RAWH

 Tihdanglam Tawh


- Rick Warren 

- May 31, 2025



"Tin, tirhkohte zirtirin, inpawlin, chhang phelin, ṭawngṭaiin thahnemngai takin an awm reng a . .  . Tin, a ring apiang chuan engkim an inṭawm hlawm a." (TT 2:42, 44)


Mihringte kan damchhan pakhat chu hmangaih kan zir hi a ni. Chu chu Pathianin he khawvela a dah chhan che a ni- a siam zawh che a vanrama hruai nghal mai lo chein. Hmangaih kan zirna hmun ṭha berte zinga pakhat chu ṭhianho/pawlho hi a ni.


A nihna takah chuan hmangaih kan zirna, kan fiahna hmun chu ṭhianho/pawlho hi a ni.


Pathianin amah leh midangte hmangaih i zir a duh. Ringtute inpawlhona- finna kawnga i lo ṭhan lena Pathian tana rinawm taka ke i pen theih nan Kohhran a pe che. I nuna i zir lai lian ber chu hmangaih zir hi a ni- chu chu midangte nen inchenhonaah i zir a ni. 


Midangte bula i khawsak loh chuan midangte hmangaih i zir thei lovang- midang, i mi hriat lohzawng te leh i ngainat loh mite pawh an ni ang. Hei vang hi a nia sakhaw tam tak chuan i lo thianghlim theih dan kawng khat chu midangte lak ata i inlak hran hi a ni ti a an inzirtir ni. A chang chuan chu chu kawng awlsam tak niin a lang fo.


Isuan kawng ṭha zawk a awm tih min hrilh. He khawvela a awm chhung khan mi kianga hun a hman theih nan an inah te, bazarna hmunah te, biak inah te, khawpuiah te, tuipuiah te leh kawngpuiah te hun a hmang ṭhin. Mi tupawh, khawiah pawh awmin tawk se a hmangaih a, a ngaidam a khawngaihna a lantir ṭhin. Midangte bula i khawsak loh chuan chutiang anga hmangaih ve chu i zir thei lovang. 


Ṭhianho/pawlhoah chu chu kan zir thei. Bible-ah chuan hmangaihna zir tih sawi nan inpawlho tih ṭawngkam hman a ni. Chu chu pawlho te tak tein min pek ropui tak chu a ni- min hmangaihtu leh min pawmtute nena inpawlho a, Isua zuitu ṭha zawk nih kan zir hi.


Tirhkohte Thiltih 2:42-ah he kohhran hmasa chanchin hi heti hian min hrilh: "Chhungkua ang mai an ni" (CEV) tiin. A chang chuan kan thisen zawmpui chhungkua te ai mah hian thlarau lama kan chhungkua te nen kan inpawh zawk fo.


Tirhkohte Thiltih 2:42 hi The Message chuan heti hian a let ve thung, "An nunho theih nan an intuluttawn a" tiin.


Hmangaihna hi rilru phawklekna/nona lam a ni lo, inpekna zawk a ni. Hmangaihna hi rilru sukthlek mai mai emaw i tih chuan i rilru a inthlak rualin a reh nghal ang. Hmangaihna chu duhthlanna a ni. Pawl te takteah chuan Pathianin min hmangaihna nasa tak a lantir tawh avangin inhmangaihtawn kan thlang a ni.


Midangte hmangaih zir hi a buaithlakin a hnawk chang a awm fo a, a harsat chang a awm fo bawk ṭhin. Mahse i pawlte, Isua i rinpuite hmangaiha an tana i inpek chuan thil ropui tak a thleng ṭhin- mahni maia i ṭhan len theih lohna kawngah i ṭhang lian ṭhin.


Ngaihtuah zui atan.


Midang, hmangaih har i tih em em nena inpawlna hun i hman khan Pathianin engnge zirtir a tum che ni a i hriat?


Engvangin nge hmangaihna hi zir a pawimawh em em? Engtinnge Pathian chanchin min hrilh?


Engtinnge inpekna hian thlarau nuna ṭhang liana hmangaihna nun thuk zawk nei tura a puih che?


[Lettu: Mapuia Fanai]

Friday, May 30, 2025

CHIN ṬHA LO BEIH LET DAN KAWNG LI

_Tihdanglam Tawh_

By Rick Warren
— May 30, 2025
“Chutichuan, chhûmpui nasa tak ang thlîrtuten min hual vêl avângin, min tihnawk thei apiang leh sual min tibuai ṭhînte chu hlîpin, kan hmaa intlânsiaknaah hian chhel takin i tlân zêl ang u.” [Hebrai 12:1]

In tinin kan chenna in tihfai runpui kan nei ṭhin ang deuh hian kan rilru ngaihtuahna tihfai runpui kan neih chang a awm a ngai – hun rei tak daih thei tur ang chi kha. I nun kha tihdanglama a awm theihna tur chuan nangmah timuangtu che chu a khat tawka i thinthlak fo chu a ngai ṭhin. 

Hebrai 12: 1 chuan, “Chutichuan, chhûmpui nasa tak ang thlîrtuten min hual vêl avângin, min tihnawk thei apiang leh sual min tibuai ṭhînte chu hlîpin, kan hmaa intlânsiaknaah hian chhel takin i tlân zêl ang u,” tiin min fuih. 

Thil chin ṭha lo [bad habit] tih chhin chu tawpsan leh aiin a harsa zawk daih tih i lo hre ve tawh em? Chutiang chin ṭha lo kalsan a harsat chhan chu kawng li-in i lo sawi dawn teh ang:  

A chhan chu hun rei tak i lo tih tawh vang a ni. I nuam tihzawng, natna leh chin dawklakte chu zan khat thil thua ti i ni lo. Thil tam berte chu naupan tet ata tawha i tihte an ni a – i damkhaw chhuah theihna tura i lo chinte pawh an awm thei ang. Tun dinhmunah chuan i ṭangkaipui a ni thei a, i lo hmang thiam tawhin nangmahah an lo bei nghet hle tawh pawh a ni thei bawk. 

A chhan chu i nihna siamtu an ni tawh. Kan nihna [identity] leh kan chak lohna kan ngaih pawlh chuan a huangtau zawngin emaw a thawkrim zawngin emaw insum theihna nei lovin emaw kan vak thei. Eng emaw tak angin kan inhmu a, tun dinhmuna kan nihna ang ang chu kan nihna kumkhua turah kan ngai a, insiamṭhat pawh kan ngam ta mang lo. “Ka insiamṭhatte chuan engtin nge ni ang?” te kan ti ta hu zawk ṭhin. 

A chhan chu ken tel an nei. Kan duhzawng chu kan neih belh ṭhin. A chang chuan thiltih ṭha lo zawk chu kan chawisang thung a, a chhan chu kan natnate an tuam mawiin, a chang chuan kan hlawhchhamnaah chhuanlam min pe a, miten min ngaihsak chang a awm bawk. 

A chhan chu Setanan a do a ni. Setana chuan thlak danglam che a, chhuah zalen che chu a tum lo. Inthlak danglam tura rilru i sawhngheh rual rual chuan, zawi tein, “Tu nge nia i inhriat? I insiamṭha thei lo. Vawi tam tak i lo tum tawh ṭhin; awmzia a awm chuang lo vang. Tum lo mai rawh!” a ti ang che. 

I thinlung tihthianghlim chu thil awlsam a ni ngai lo vang. Hun eng emaw chen a duh a, i dawththeihte pawh a ngai ang. Kristaa i nihna tharte pawh chu i inhriattir nawn a ngai ang. A lawmman tam zawk leh duhawm zawkte chu ngaihtuah ang che – inlaichinna duhawm tak Isua Krista nena in inzawmna aṭanga i neih turte chu. Thlarau Thianghlimah chuan i innghah a ngai a, a thiltihtheihna chu Setana chakna aia nasa fe zawk chu a ni.  

Chutiang rilru nitina i pu a nih ngat chuan Pathianin i tlan kawng tura a buatsaih chu chak zawk leh zangkhai zawkin i zawh thei dawn nia. 

Ngaihtuah zui atan. 

I nihna chin ṭha lo nena zawm tlattu che nangmah pawhin i inhriat dan chu eng nge ni? 

I nuna sual awm chuan engtin nge a tihkhawmuan che? 

Thil chin ṭha lo i hriat theih ang zawng zawngte chu engtin nge nungchang ṭha leh awmze nei hmang chuan i thlak zel ang a, Isua anna kawngah chuan i ṭhanlen zel theih ang? 

[ *Lettu:* Peka]

Thursday, May 29, 2025

DANGLAM TUR CHUAN THUTAK HRIAT A NGAI

_Tihdanglam Tawh_

By Rick Warren
— May 29, 2025
“Anni chu thutakin tithianghlim rawh, i thu chu thutak a ni.” [Johana 17:17]

I nun khawi lai pawh thlak danglam i duh a nih chuan chu mi chungchanga Pathian thusawi i hriat hmasak a, chu mi-ah chuan Pathian thu chu i hman a ngai ang. 

I sum dinhmun i chingfel duh a nih chuan Pathianin sum chungchang a sawi dan leh chu mi chungchanga thutak a sawi chu i nunah i hman a ngai ang. In nupa nun chu i siamṭha duh a nih chuan Pathianin inneihna chu engtin nge a sawi a tih i hriat a, chu mi mila i khawsak a ngai bawk ang. 

Thutak tih awmzia chu engtin nge i hriat thiam? Isua chuan Johana 17: 17 ah chuan, “Anni chu thutakin tithianghlim rawh, i thu chu thutak a ni,” tiin a sawi.  

Pathian thu zirna huangah chuan thianghlim tih hi “sanctification” tiin an sawi a. Sanctification tih awmzia chu ṭhang lian, inthlak danglam zel, Pathianin a duh dan anga awm deuh deuh tihna a ni. Chu nun chu Pathian thu i awih ang zelin i changin i lo ṭhang lian deuh deuh ang. 

Ephesi 4:15 ah chuan hetiang hian kan hmu, “… hmangaiha thu dik tak sawiin, engkimah amahah kan ṭhang lian thei zâwk ang; amah chu Lu a ni, Krista chu,” tiin. 

I nun chu thlak danglam a nih dawn a nih chuan thutak i hriat hmasak ngai a awm. Eng vangin nge? A chhan chu nungchang i tana ṭha lo zawng zawngte chu thudik lo i vawn tlattea innghat an ni fo. I nun chu i thlak duh a nih chuan chu thudik lo chu i hriat a, “An dik lo” i tih a ngai a ni. Tichuan i thil ngaihtuah dan chu i thlak danglam thei ang. 

I hun kal tawha i nun i hmuh dan emaw i hma lam hun i thlir dan emaw chu an lo dik lo thei. Hun kal tawh chungchang emaw, tun hun emaw, hun lo la awm tur chungchanga Pathianin thil a sawite chu i hriat thiam loh a, i ring tawk lo a nih chuan thlarauva ṭhan len chu a harsa hle ang. 

“Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni; Pathian mi chu hna ṭha tinrêng thawk tûra kim taka inthuamin a famkim theih nân.” [II Timothea 3: 16-17]

Bible chuan kan kawng zawh tur min kawhhmuh a. Kan kal dik lohna lai pawh min hriattir bawk. Kawng dika let leh dan pawh min hrilh. Kawng dika kal zel dan min kawhhmuh bawk. Pathian Thu tak tel lo chuan khawi lam kawng nge kan zawh dawn kan hre tak tak thei ngai lo. Kawng dik leh dik lo hriatna awm chhun chu a ni e. 

Nun inthlak danglam chu thutak hmanga lo thleng a ni a. Pathian thua i awm ang zelin i ngaihtuak dan pawh thlak danglam zel a ni ve ang. I ngaihtuah dan chu thlak danglam a nih chiah chuan i nun chu thlak danglam a ni ve nghal ang. 

Ngaihtuah zui atan

I hun kal tawh chungchanga thudik lo i vawn tlat si chu engnge ni? 

Pathian thutak hre chiang zel tur chuan engtin nge Bible i zir dan chu thlak danglam ngai ta ang? 

Hun lo la awm tur chungchanga thudik chu engnge ni? Chu chuan vawiina kan nun hi engtin nge a hruai theih? 

[ *Lettu:* Peka]

Wednesday, May 28, 2025

TLO TUR ZINGAH AWM RAWH

 Pathian Nena Inzawm: Lalpa Tawngtaina


- Rick Warren

- May 28, 2025



"Chatuanin, chhuan zawng zawng thlengin, kohhranah leh Krista Isuaah chuan ropuina awm rawh se," (Ephesi 3:21).


Pathian ramah i chenga, a thiltitheihnaah i awma, a ropuina tura i nung a nih loh chuan i nunah eng thil mah i hlenchhuak zo lo vang.


Isua Chanchin Ṭha mi zawng zawng hnena i tarchhuaha, Pathian chhungte i zawm khan Pathian ropuina i tarlang a ni.


II Korinth 4:15 chuan, "Engkim nangmahni ṭhatna tur a ni si a, khawngaihna chu mi tam zawk zara tihpuna awmin, Pathian ropuina turin lawmthu nasa taka a sawitir theih nan," a ti. Pathian chuan sakhuaa min hruai emaw, biak ina min hruai emaw lam a sawi lo va. Isua hnena mi dangte hruai thlen a sawi zawk a ni. I rinna mi dangte hnena i va puan khan Pathian i tiropui a ni.


Mi dangte hnena Isua chanchin puan chhuah hian Pathian ropuina a thlen a ni ngawt lova, a chhungte zawm hian a tiropui a ni. Pathian chhungte chu kohhran hi a ni. Ephesi 3:21 chuan, "

Chatuanin, chhuan zawng zawng thlengin, kohhranah leh Krista Isuaah chuan ropuina awm rawh se," a ti. 


Bible chuan engtikah emaw van thar leh lei thar a la awm ang a ti a. chatuana awm reng tur chu a kohhran hi a ni.


Vawiin aṭanga kum sâng lo awm turah hian lei hi la vir reng ta sela, Microsoft emaw, Hollywood lemchan emaw a awm lovanga. Ram tam tak hi a awm tawh kher lovang, a chhan chu leia lal ram reng reng chatuan daih a awm lo a ni. Vawiina kan thil duh takte pawh hi a la ral dawn. 


Mahse Pathian chhungte erawh chu an awm reng anga. Pathian mite chu an awm reng ang. Pathian kohhran pawh a awm reng dawn. Chu chauh chu awm reng tur chu a ni!


Nangmah hmangaiha, Pathian thutak leh hriatna kawnga ṭanpui thei tur che i mamawh a ni. I talent i hman chhuah theihna tur leh mi dangte hmangaihna i dawn theihna tur i mamawha. Tuin emaw Isua Chanchin Ṭha a ngaihthlak ve theihna tur hmun i mamawh a ni.


Thlarau lam chhungte zawm hi i nuna thil pawmawh ber a ni ang tih ka hrilh vang che hian ngaihdam ka dil a ngai kher lovang. Engvangin maw? A chhan chu kohhran-Pathian chhungte hi thil dang zawng aiin a daih reiin a tlo dawn a ni.


Ngaituah zui atan


Chatuan daih tur thil chauh i thlir theihna turin i ngaih pawimawh zawng thlâk a ngai em?


Tualchhung kohhranah i awm lo a nih chuan, chumi lam hawi turin engtin nge ke i pen ang?


Tualchhung kohhranah i lawi a nih chuan thilpek i dawn leh i theihnate chu kohhran leh khawtlang tana rawng i bawl theih nan engtin nge i hman ang?


[ Lettu: Marova Punte]

Tuesday, May 27, 2025

THILPEK I DAWN KHA MIDANG TAN

 Pathian Nena Inzawm: Lalpa tawngtaina


- Rick Warren

- May 27, 2025



“Mi tinin thilpek in hmuh ang zelin Pathian khawngaihna tinreng enkawltu ṭhate angin, chung chuan rawng in bawl tawn ṭheuh rawh u” 1 Petera 4:10. 


Bible chuan, “Mi tinin thilpek in hmuh ang zelin Pathian khawngaihna tinreng enkawltu ṭhate angin, chung chuan rawng in bawl tawn ṭheuh rawh u” 1 Petera 4:10. Midang tanpuinan i theihnate i hman chuan, Pathian chu chawimawiin a awm thin.    


Pathianin i nunah midang tan thawkturin a duh che a. I theihna leh thiamnate chu nangma tan ngawr ngawr a pe lo che. Midang hlawkna tur zel a ni a - an theihna te chu i hlawkna tur a ni ve thung a ni,


Ka thiam loh zawng miin an thiam hian ka lo lawm thin a. Entirnan, chhiarkawp lam thiammi te hi an hlu ka ti thin. A chhan chu ka harsat em vang a ni. An lo tihfel zung zung hian a lawmawm ka ti thin. 


Khawl lam thil siamte chungah ka lawm thin. Keima lirthei kawl ngei pawh ka siam thiam si lo va. Min zawt ta sela a ngaihna pawh ka hre lo ang.


Tu te pawh thiam kan nei theuh mai.


Pathianin kei pawh theihna min pe ve. Ka theihna pakhat chu Pathian Thu midangte hriatthiam tura hrilhfiah hi a ni. Chu theihna chu ka hmang chhuak a, nangin malsawmna ilo dawng ta a ni. Ka theihna chu i tan. Nangmah tanpuina tur a ni.


Hei hi a ni ka sawi duh tak chu: Theihna i nei ve tih hi. Midangin malsawmna an dawn theih nan i hmang em? Midang tanpuina turin i hmang em? 


Pathianin theihna a pek che i hman loh chuan, midang chu bumin an awm phah tihna a ni. I theihna hmangin Pathian ropuizia i puangchhuak thei. Midang rawngbawlsakna turin hmang chhuak rawh. I theihna hmanga midang rawng i bawlsak hian Pathian a ropui a ni. 


Malsawmna ni turin malsawm i ni a. I kiang vela mite malsawmna thlentu i nih theihna turin Pathianin mal a sawm che a ni. Nitinin i theihna chu Pathian ram tan - a thiltihtheihna leh a ropuina turin - nangmah in ngaihtuah lo vin, midang ngaihtuah zawk ang che.

 

Ngaihtuah zui atan


* Pathianin eng thilpek nge a pek che?


* Chu i thilpek dawn chu midang tanpuinan engtinnge i hman? Midangin an hlawkpui lehzual theihnan kawng dang engte nge i hriat?


* Miin Pathian ropuina turin an theihnate nangmahniah ah an rawn hmang chhuak a engtin nge ilo pawm theih ang?


[Lettu: Sangpuia]

Monday, May 26, 2025

PATHIANIN A HMANGAIH CHE ANGIN MIDANG PAWH HMANGAIH RAWH

 Pathian Nena Inzawm: Lalpa tawngtaina


- Rick Warren

- May 26, 2025



“Engkim a tuar hram hram a, engkim a ring a, engkim a beisei a, engkim a tuar chhuak thin.” 1 Korinth 13:7


Pathianin hmangaihna min pek ang tho hi midangte pawh hlan chhawng ve turin min duh a ni. Chu chu thurawn emaw duhthlan tur emaw pawh a ni lo. Amah Isua hnen atang ngeia thupek kan dawn a ni zawk.  “Thupek thar ka pek che u hi, inhmangaih ula; keiin ka hmangaih ang che u hian nangni pawh inhmangaih ula.” a ti a. Johana 13:34


Isua zuitu i nih chuan, i ngaina emaw ngaina lo emaw - Kristan a hmangaih che angin mi zawng zawng i hmangaih tur a ni. Chumi awmzia chu chhan neilo in i hmangaih anga, i ngaidam vek ang a, hlutna tam tak an nei tih i hre bawk tur a ni. 


Hetianga midang i hmangaih theih chuan in inlaichinna pawhin danglamna a nei ang! 


Bible chuan, “Engkim a tuar hram hram a, engkim a ring a, engkim a beisei a, engkim a tuar chhuak thin,” a ti. 1 Korinth 13:7


Hei hi Pathianin a hmangaih dan che a ni. Pathianin i lakah dawhtheihna a nei tawp lo va. Pathianin a ring tawp lo che a. Pathianin i tana tha ber a beisei tawp lo che a. I lakah Pathian a beidawng ngai lo. Chutiang chiah chuan midang lakah pawh tih a duh a ni.


“Hmangaihnain a tuar hram hram.” Hei hian khawngaihna a rawn lantir a. Midang chungah pawh lantir ve ang che. 


“Hmangaihnain engkim a ring.” Hei hian rinna a puang chhuak a. Midang hnenah hetiang hian sawi la, “Hun harsa paltlang mahla, ka rinna ka lantir zel ang che.”  


“Hmangaihnain engkim a beisei.”  Hmangaihna chuan a tha ber a beisei a ni. In nupa inkarah a tha ber i beisei ve em? Nge a tha ber dawttu atan i inbuatsaih zawk?   


“Hmangaihnain engkim a tuarchhuak.” Hmangaihna chuan a chhe ber pawh a tuar thin. Chumi awmzia chu midang chungah pawh hetiang hian i sawi a ngai, “Engtin pawh min sawisa mahla, eng dinhmunah pawh ding la, ka hmangaih tawp lo vang che.”  


Vawiin hian in inlaichinnaah danglamna i hmu duh anih chuan, hetiang hian tawngtai ang che:


“Lalpa, kan inlaichinna chungchangah buaina ka tawk a ni tih ka pawm a. A buai zo vek tawh a ni, vawi tam siam that ka tum a. Danglamna tak tak kan mamawh a ni. Keimahah hian danglamna thlena bul tan ka duh a ni. Hlauhna lak ata min tanpui la, achhan chu harsatna hrang hrang ka tawh leh dawn tih ka hria. Tun atanga chatuan thlengin ka thinlun hlan che ka duh a. Hmangaihnaa nun leh hmangaihnaa chhun khat nih ka duh e.   


“Nangman min pawm angin, midang pawh pawm thei turin min tanpui la.Nangman min hmangaih angin, chhan awmlova midang hmangaih thei turin min pui ang che. Min ngaihdam angin midang ngaidam ve thei turin min tanpui la. Min ngaihhlut ang bawkin midang pawh ngaihlu turin min pui ang che. Kan kiang hnaite hnena khawngaihna lantir tur leh rinna puangchhuak turin min pui ang che. Midang hnen atanga a tha ber beisei tur leh a chhe ber pawh tuar thei turin min pui ang che. Isua hmingin ka dil a che.      


Ngaihtuah zui atan


* I nunah Pathian dawhtheihna i tawng tawh em?


* Midang nena in inlaichinna kawngah a harsat lai pawhin engtin nge dawhtheihna leh beiseina i lantir ang?


* Midang nena in inlaichinna kawngah engtin nge a tha ber dawttu thlen tir turin i beih? A tha ber chu engtin nge i beisei?


[Lettu: Sangpuia]

Sunday, May 25, 2025

PATHIAN THILTIHTHEIHNA DAWN DAN

_Pathian Nena Inzawm: Lalpa Ṭawngṭaina_

- Rick Warren 
- May 25, 2025
_"Pathian ram chu thu tam tak sawi ringawt a ni lo; Pathian thiltihtheihnaa chen hi a ni zawk."_ (1 Kor. 4:20, NLT)

Nun chhun khah nun nei tur chuan Pathian thiltihtheihnaa i nun a ngai.

Bible chuan 1 Kor. 4:20-ah heti hian min hrilh, _"Pathian ram chu thu tam tak sawi ringawt a ni lo; Pathian thiltihtheihnaa chen hi a ni zawk."_ (NLT)

Mahni chaknaa innghat chunga nun tluantling leh duhawm hmang tura duan i ni ngai lo. Pathianin amaha innghata inpumpekte a hmang a mal a sawm ṭhin. I ngaihtuah phak aia nasain hna a thawk thei bawk!

Mahse a thiltihtheihnaa i nun phawt a ngai. Ephesi 3:20-ah chuan heti hian kan hmu, _"Tichuan, keimahnia thawk ṭhin thiltihtheihna ang zelin, kan dil leh kan ngaihtuah zawng zawng aia nasa zawk ti theitu hnenah ngei chuan"_.

Anih chuan engtinnge i nunah Pathian thiltihtheihna i neih theih ang?

Heng kawng thum te hi zir ila:

*Ṭawngṭainain Pathian thiltihtheihna i nei thei.*
Thiltihtheihna i nei lo anih chuan i ṭawngṭai ngai lo a tih theih ang. Ṭawngṭaina leh thiltihtheihna hi an kalkawp tlat. Jakoba 5:16-ah chuan heti hian kan hmu, _"Mi fel ṭawngṭaina chuan thil nasa tak a ti ṭhin."_ 

*Pathian thu i awih tawp mai khan a thiltihtheihna i dawng ṭhin.*
Pathianin ti tura a tih che i tih tawp mai khan, a lo harsa deuh emaw i hriat ngai loh emaw pawh nise, a man i pek a ngai dawn pawh nise, awmzia awm lo angin lang mahse, midangten ti ve lo mahse- Pathianin i chungah a thiltihtheihna a vur ang che.

*I beidawn mai loh khan Pathian thiltihtheihna i nei ang.*
Beidawng reng reng suh! I rinna a ṭhan lan theih nan Pathianin a fiah fo che. Harsatna i tawk emaw, tihkhawmuan i ni emaw, kal ngaihna i hre tawh lo emaw, i beidawngin i hnual viau emaw a ni thei, Pathianin amah i rin theih nan a zirtir che a ni. Bei hram hram la - engtinnge mal a sawm dawn che tih thlir reng rawh. 

I damchhunga i tih theih aiin kar khat chhung leka Pathianin i nuna a tih theih kha a tam daih zawk. Chuvangin Pathian hnena inpek hi tlai a awm ngai lo. "Ka upa tawh lutuk. Harsatna ka ngah lutuk tawh! Thil dik lo ka lo ti tam tawh lutuk" i ti a ni mai thei e. Mahse a ni lo. Pathian lam hawia a thiltihtheihnaa nung turin tlai a awm lo. I hnena pe turin a inpeih reng zawk a ni.

Ngaihtuah zui atan.

Engtinnge i ṭawngṭaina nunah Pathian thiltihtheihna i lo tawn tawh?

Pathian zui hi i tan thil hriat chian miah lo a ni em? Rinnaa huai taka ke i pen khan engtinnge Pathianin mal a sawm che?

I nunkawng eng berah emaw i beidawng rum rum tawh em? Bansan mai suh! I beidawn loh chuan Pathianin mal sawm che a duh reng.

[Lettu: Mapuia Fanai]

Saturday, May 24, 2025

PATHIANIN TIHTUR NEIIN A SIAM CHE

_Pathian Nena Inzawm: Lalpa Ṭawngṭaina_

- Rick Warren 
- May 24, 2025
_"Thil ṭha ti atan Krista Isuaah chuan siama awmin ama kut chhuak kan ni si a;chu thil ṭha tih chu kan awmna turin Pathianin a buatsaih lawk a ni."_ (Ephesi 2:10)

Mahni tan chauha nung turin he khawvelah hian dah i ni lo.

Sum thawk chhuak a, chawlh hun thleng thawk a thi leh mai tur ringawt ni lovin chu aia chhan ṭha zawk neia siam i ni. Tihtur neia siam i ni, chu i tihtur chuan i nun awmzia a hril a ni.

Bible chuan heti hian a ti, _"Thil ṭha ti atan Krista Isuaah chuan siama awmin ama kut chhuak kan ni si a;chu thil ṭha tih chu kan awmna turin Pathianin a buatsaih lawk a ni."_ (Ephesi 2:10)

Heti hian a sawi theih bawk, mi bik i ni. Hun kal tawh, tun hun leh hma hun lo awm turah nangmah ang chiah an awm ngai lo. Pathianin danglam bik takin a siam che a, chuvangin he khawvelah hian nangmah chauhin i thawh theih tur thil a awm. Chung chuan i damchhunga i tihtur a hril a ni.

I damchhan chu i hriat hma loh chuan i nung ve satliah mai a ni. Nun i hmang ṭha a ni mai thei, mahse Pathianin a siam chhan che anga i nun loh chuan nun famkim i chen thei lovang.

Isuan Marka 8:35-ah chuan heti hian a sawi, _"Tupawh a nun humhim duh apiangin a chan ang a; tupawh keimah avang leh Chanchin Ṭha avanga nun chan apiangin a humhim ang."_

Pathianin tihtur a pek che karah i nun hmang chho turin ruahmanna a siamsak che. Chutianga tih theih dan kawng awm chhun chu lungphum nghet tak, Isuaa innghah hi a ni. _"Lungphum rem tawh sa lo chu lungphum dang tuman an rem thei tawh si lo va, chu lungphum chu Isua Krista chu a ni."_ (1 Kor. 3:11)

Innghahna rintlak awm chhun Isuaa innghat turin duh i thlang thei. I nun tichhe thei tur thil dangral mai mai umin i tlan thei bawk e.

Thil chiang tak chu engtik niah emaw Pathian hmaah i ding ang a heti hian a la zawt ang che: "Khawvela i awm chhunga tihtur ka pek che i thawk zo em?" tiin. Chumi niah chuan Pathianin hna a pek che i thawk zo nge thil ho te te uma tlan i thlang zawk tih a chiang tawh ang.

Pathianin a duan che anga nung turin tlai tih a awm thei lo. Isuaah innghatin Pathianin hna a pek che thawk turin bul ṭan rawh le.

Ngaihtuah zui atan.

Eng angin nge miten Pathian siam chhan ni lovin mahni duhdan anga an nun i hmuh? Eng angin nge chutiang chuan i lo awm ve?

Engvangin nge miin Pathianin a siam chhan hre chhuak tura hun rei tak an mamawh ni a i hriat?

I nunah Pathianin engnge siam chhan a neih ni a i rin?

*Isua Krista kaltlanga Pathianin chhandamna min tiam i ring tawh em?*

Isua hnena inhlan tura i inpeih chuan heti hian ṭawngṭai rawh le:

"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

"I hmaah ka sual ka puang a, min Chhandamtu i ni tih ka pawm e. Chhandamna chu thiltih vang ni lovin, rinna avanga khawngaihnaa lo thleng a ni i tih hi ka pawm e. Vawiin hian nun zawng i tan ka hlan e.

"Phut let nei lova min hmangaih avangin ka lawm a. Ka nun zawng hi min siam chhan angin, mahni tan ni lovin i tana hman ka duh e. Ka nun i tan ka hlan a, min chhandam a i chhungkuaa min pawm turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, May 23, 2025

INSIAMṬHAT I DUH CHUAN NANGMAH ṬANPUI THEITU TUR DAP RAWH

_Pathian nena Inzawm: Lalpa Ṭawngṭaina_

By Rick Warren
— May 23, 2025
“Mahni maia thawh ai chuan thawhpui neih a ṭha, hlawhtlin a awl zâwk. Pakhat a tlûk chuan pakhatin a kaitho thei a, mahni chauhva thawk chu tlu palh sela a vânduaithlâk hle ang, kaitho tûr tu mah an awm dâwn si lo.” [Thuhriltu 4:9-10]

I nuna thlemna i tawh mekte laka zalenna chu engtiang takin nge i lak thutak le? 

I la thutak takzet a nih chuan hetiang hian ka han sawi tlang bawl bawl teh ang: Nangma mimal chakna ringawt, mite ṭanpuina tel lo, chuan i hneh ngai lo vang. Nangmah leh nangmah inthlak satliah chuan i hneh ngai lo vang. 

Chuvang chuan insiamṭhat theihna kawng a awm lo tihna erawh a ni lo. 

Dik tak chuan, nangmah leh nangmah mai chuan i insiamṭha zung zung thei lo a ni tih i hmuh hnu chuan engtiang takin nge Pathian chu i nun siamṭha tur chuan midangte a hman tih i hmu thiam ang. 

Pathian chuan kan mamawhte inphuhru tawn turin min thlun zawm diat diat a ni tih hi thudik tak a ni. Kan natna damna, chin ṭhan [habit] ṭha lo leh buaina hrang hrang kalsan turin midangte ṭanpuina kan mamawh ṭhin. 

I nuna mawhphurhna latu an awm a ngai a. I thil duh loh ber chu i mamawh ber a ni thei. Ṭhian tu emaw i mamawh changa lo ngaihventu che i mamawh a, ṭhang lian turin an tanpuina chu i mamawh bawk. 

Bible chuan Thuhriltu 4: 9-10 ah chuan, “Mahni maia thawh ai chuan thawhpui neih a ṭha, hlawhtlin a awl zâwk. Pakhat a tlûk chuan pakhatin a kaitho thei a, mahni chauhva thawk chu tlu palh sela a vânduaithlâk hle ang, kaitho tûr tu mah an awm dâwn si lo,” tiin a sawi. Hei hi thlemna chungchangah pawh a dik tho.  

Tu emaw nangmah ṭanpui theitu che, i chin ṭha lo [habit] sim tura ṭanpuitu che chu i mamawh a ni. Nangmah mai chuan i inthlak danglam ngai lo vang. 

Tute pawhin thlemna an tawk vek. Engtik nia emaw chuan heng thlemna hrang hrangte hi kan la kalsan vek anga ngaihna hi thil dik loh a ni. Thudik zawk chu hei hi a ni, i lo puitlin deuh deuh ang zelin Setana chuan a bei nasa zawk zel ang che. 

Bible chuan, “Unaute u, miin sual a ti lai phâwk ula, nangni thlarau mite chuan chu mi chu dimdawi takin tundin leh tum ṭhîn rawh u; nangni pawh mahni invêng ṭha ṭheuh ula, thlêmna in tâwk ve dah ang e.  2Phur inchhâwk tawn ṭhîn ula; tichuan, Krista dân chu in zâwm a ni ang,” tiin min fuih. [Galatia 6: 1-2]

Krista dan chu engnge ni? Nangmah i in hmangaih angin i vengte i hmangaih tur a ni. Engtin nge keimahni kan inhmangaih ang chuan kan vengte kan hmangaih theih ang? Thlemna an tawhna hmunah kan ṭanpui ang. Kan nun eng emaw lai kan kalsan duh emaw thlak danglam duh lai kalsan tura lo ṭanrual chu a ngai a ni. Nungchang tha lo thlak danglam tur leh a thara bul ṭan tura lo ṭanrual chu a ngai a ni. 

Pathian chuan in mamawh tawn turin min siam a. Midang nangmah ṭanpui tura i sawm chiah khan i thil tum beidawnsan mai theihna rilru kha a tlem sawt a, thlemna leh buaina kha ven khat chuan a veng ṭan tihna a ni. Chu chu vengte hmangaih dan ṭha ber chu a ni – i vengte chuan an hmangaih sawt bawk ang che. 

Ngaihtuah zui atan. 

Mi rintlak chuan eng ang mizia nge nei sela i tih? 

Insiamṭhat i duh changa i tana mi rintlak i hmelhriat zingah chuan tu nge awm? 

I harsatna chingfel turin Pathianin tu emaw hnenah a hruai ve tawh che em? Engtin nge i hmachhawn a, engnge i zir chhuah? 

[ *Lettu:* Peka]

Thursday, May 22, 2025

I NGAIHTUAH DAN THLAK.RAWH

_Pathian nena Inzawm: Lalpa Ṭawngṭaina_

By Rick Warren
— May 22, 2025
“An ṭanhmun kan ṭhiatsak zêl a, Pathian hriatna kawng chapo taka dodâltu apiang kan tudawl a, ngaihtuahna tinrêng Krista bawihah kan siam bawk a ni.” [II Corinthians 10:5]

Hei hi thlemna hneh dan thuruk chu a ni. Do suh. Thil dang ngaihtuah rawh – a chhan chu i thil do reng rengte chu an insawhnghet zel ang. 

Bible hian thlemna do lo turin a ti lo che tih i lo hre ve tawh em? Sual do rawh a ti thung che a, chu chu thil hrang daih a ni. Thlemna hmachhawn dan rahbi pawimawh tak chu nawr let a ni lo. I thil ngaihtuah lai mek thlak zawk chu a ni. 

I rilrua i pai apiangte chuan an thunun ṭhin che. Sual nena indona chu engtik lai pawhin rilru lamah ṭan a ni ṭhin. Chu chu Bible-ah pawh Sam 119:6 ah kan hmu, “I thupêk zawng zawng zâwm ila, Ka mualpho tawp lo vang,” tiin. Eng vangin? A chhan chu Pathian thutak chu i ngaihtuah vang a ni, thil dang i ngaihtuah lo tihna a ni a, thlemna angte chu!”

I nun kil tinah khan chu chu a dik ang – a ṭha leh ṭha lo lamah pawh. Pathian lam thilte i ngaihtuah a nih chuan, i nun pawhin chutiang lam chu a hawi zui nghal mai ang. Khawvel thil leh thil dik lote i ngaihtuah a nih chuan i rilru pawhin chutiang lam chu a hawi zui ve nghal thuai ang. I insawrbingna lam apiang chu i vei zui ṭhin. I thil vei zui zawng chuan an nei zui bawk che. 

A rahbi pawimawh tak chu i rilru puthmang thlak chu a ni. 

Thlemna chuan rahbi kalkawng bik a nei ṭhin: ngaihtuah, chet chhuah leh thiltihin a lang chhuak ṭhin. I rilru nen an inzawm a, i rilru a tiche a, phurna a pe che a, tichuan a takin i che chhuak ta ṭhin.  

Chuvang tak chuan thlemna do aiin i rilru chu thil dang hawitir ang che. “An ṭanhmun kan ṭhiatsak zêl a, Pathian hriatna kawng chapo taka dodâltu apiang kan tudawl a, ngaihtuahna tinrêng Krista bawihah kan siam bawk a ni.” [II Corinthians 10:5]

Isua baptisma a chan a, thlalera ni 40 hun a hman hnu khan Setana chuan a thlem a, “Pathian Fapa i nih chuan hêng lung hi chhanga chang tûrin thu pe rawh,” a ti a nih kha [Matthaia 4: 3]. Isua khan, “Aih, ka ril tam love” a ti lo. A ril a ṭam! Ni 40 chaw a nghei tawh. Mahse thil dang daih a ngaihtuah thung. Bible thu a sawi a. “Mihring hi chhang chauhvin an nung lo vang a, Pathian kâa thu tin chhuakin an nung zâwk ang,’ tih ziak a ni,” a ti daih [Matthaia 4: 4] 

Thlemna eng pawh i do nasat poh leh a thunun nasa ting ang che. I rilrua awm chu i do tak tak thei ngai lo, mahse thil dang daih ngaihtuah tum ang che. Chutianga i tih ngat chuan an duhawmna chu a ral tial tial ṭhin, a chhan chu i ngaihtuahna chu thil dangah a awm tawh tlat. 

Ngaihtuahna thunun tih leh Kristaa ngaihtuahna kawltir tih chu vawi tam tak tihnawn ngai a ni. I dinhmun chu i thunun reng thei lova, i duh dan pawh chu thil thunun harsa tak a ni. Mahse i ngaihtuahna erawh thunun theih a ni. Chu chu i duhthlanna thil a ni. 
 
I ngaihtuahna chu i thlak danglam thei a nih chuan i duhzawng/nuam tih zawng thlak a ni ang a, i thiltih pawh i thlak ve nghal ang. 

Ngaihtuah zui atan. 

Eng thil ngaihtuahna atan nge i hun chu i hman? Thil eng emaw ngaihtuah lova i hun i hman chuan i ngaihtuahna chuan khawi lam nge a hawi? 

Eng ang dinhmunah nge i ngaihtuahna chuan sual lam a hawipui ṭhin che? 

Khawvel lam thil ngaihtuah lova Pathian Thutak leh thudik ngaihtuah tur chuan engtiang takin nge i insawizawi theih ang? 

[ *Lettu:* Peka]

Wednesday, May 21, 2025

THLEMNA I TAWHIN, PATHIANIN ṬANPUI CHE A DUH

_Pathian Nena Inzawm: Lalpa Ṭawngṭaina_

- Rick Warren
- May 21, 2025
_"Mangan niah chuan mi ko la, ka chhan him ang che, tichuan, nangin mi chawimawi dawn nia,"_ Sam 50:15.

Pathian chu min ṭanpui turin a inpeih reng tih Bible-in min hrilh. Ṭawngṭai dan tur min hrilh chu, "Sual tura thlemnaah min hruai lut suh la, mi sual lakah chuan min chhandam zawk ang che," (Mt 6:13) tiin. Hei hi ṭawngṭaina hmanga chhan chhuahna a ni. Ṭanpui tur chein Pathian hnenah dil rawh.

Ṭawngṭaina hmanga chhan chhuahna chu he ṭawngkam tê mai hi a ni: "Min ṭanpui rawh." "Zahngaihna a khat kan Pathian," tih kher a ngai lo. Thlemna lak aṭanga chhan chhuah i mamawh a nih chuan heti hian ṭawngṭai rawh: "Min ṭanpui teh. Ka mit min tihngilsak rawh. Hemi hi ka ngainatzawng a ni lo. Min en dan hi ka duh dan a ni lo, vawiinah ka hmu dawn lehnghal. Aw Lalpa, min zanpui teh! Vawiinah hian min ṭanpui ka ngai a ni, a chhan chu keimaha engkim hian pumpelh a duh a ni!"

Bible hi chhan chhuahna dila ṭawngṭai ṭhinte hlirin a khat - chung mite chu Davida te, Daniela te, Petera leh Paula te an ni. A dil apiangte mamawh Pathianin a ngaihtuahsak ṭhin.

Eng vangin nge chhanchhuahna dila i ṭawngṭaiin Pathian chu ṭanpui tur chea i beisei ang? A chhan chu Pathianin thu a lo tiam tawh vang a ni. Sam 50:15 chuan, "Mangan niah chuan mi ko la, ka chhan him ang che, tichuan nangin mi chawimawi dawn nia," a ti. Pathian chuan, rei tak inbiak  a ngai kher lo a ti. "Ka mangannaah hian Lalpa min ṭanpui rawh, keima theihna chuan ka hneh zo lo," ti ang che.

 I dinhmunah khan Pathian chuan a lainat em em che a. I nuna thil thleng zawng zawng kha a hre veka. Mi ṭhenkhat bula i awma i thinur dan te a hria a. Thlemtu che pawh a hria. Hei hi han en teh, "Pathian Lalber, kan chak lohnate min hriatpui thei lo nei kan ni si lova, keimahni anga kawng tinrenga thlemna tawk tawh, sual erawh chu sual lo, nei kan ni zawk e," (Heb 4:15-16). 

Hei hi chhinchhiah teh, "Isuan min hriatpui. Eng vangin nge lainatnaa khat a nih? A chhan chu thlemna kan tawh ang tho a lo tawh ve tawh vang a ni. 

Nang chuan, "Min lo nghak teh," i ti a. Isua a thinrim i ring em? Aw, ring e. Isua hian amah a inkhawngaih i ring em? Ring e. Bible chuan Isua chu keimahni ang bawka kawng tinrenga thlemna tawk tawh, sual erawh chu sual lo a ni a ti. Chu chu a danglamna chu a ni.

Keimahni angin zalen taka duhthlanna a neia, mahse keimahni ang lo takin a sual ve lo a ni. Engnge chu chu a awmzia? A awmzia chu thlemna hneh turin a ṭanpui thei che a ni. He chang hian, "Pathian hnenah...huaisen takin lo kal rawh," a ti. "I ṭanpui ka mamawh," tiin Pathian hnenah sawi rawh.

Thlemna i tawhin Pathian chu dawhthei lo emaw, zar buai theih emaw a ni lo. A hau lo vang che. Thlemna tawh hi sual a ni ngawt lo. Ani chuan, "Ṭanpui tur chein ka lo kal," a ti. Ṭanpui tur chein i dil dawn em?

Ngaihtuah zui atan

Thlemna i tawh laiin Pathianin a ṭanpui duh che tih i hriat hian engtin nge i ṭawngṭaina chu a tih danglam?

Chhan chhuahna dila i ṭawngṭai lai kha han ngaihtuah la. Engtin nge Pathianin a chhân che?

Isuan thlemna a lo tawk ve tawha mahse, sual erawh chu a sual lo tih hriatna hian engtin nge thlemna hneh tura inrintawkna a nehtir che?

*[Lettu: Marova Punte]*

Tuesday, May 20, 2025

KRAWS THILTIHTHEIHNA NEN NGAIDAM RAWH

_Pathian Nena Inzawm: Lalpa tawngtaina_

- Rick Warren
- May 20, 2025
“Heng hi hria ila: kan mihring hlui chu a hnenah khenbehin a awm ve ta, sual pu taksa chu tihborala a awm theih nan, tun achinah sual bawiha kan awm lohna turin.” Rom 6:6

Kan pianpui nungchang hi chuan sual lam hi a awn sa reng a. Nimahsela Isua Krista avang chuan kan mihring hlui zia chuan tuna kan nunah chuan thuneihna a nei tawh lo a ni. Rom 6:6 ah chuan, “Heng hi hria ila: kan mihring hlui chu a hnenah khenbehin a awm ve ta, sual pu taksa chu tihborala a awm theih nan, tun achinah sual bawiha kan awm lohna turin.” Mi sual kan la ni reng, nimahsela Krista thiltihtheihna avang chuan tunhma kan tih thin te ti tawh lo tura thuneihna kan nei tawh a ni. 
 
Kan mihring hlui ziaah chuan min tinatu te thungrulh ve emaw, ngaihdam miah loh te emaw a ni thin. Nimahsela chutianga kan khawsak chuan buaina zakhua a thlen ang.

Hei hi chanchin tha chu a ni, khakna te, sualna leh huatna bawih atang te chuan kan chhuak thei a. Kan duh loh chuan nunhlui leh kan natnaah te chuan kan la awm zel thei a ni.   

Ngaihdamna kan thlang thei bawk.

Kraws lam thlir aia rilru natna tihkianna tur dang a awm chuang lo. Sulhnu leh natna zawng zawngte laka zalenna min pe thei khawp thuneihna a nei a. Huatna nei reng chunga i awm a ngai lo. Thlarau Thianghlim tanpuinain, i  rilru na te kian tir la, ngaidam la, zalen takin awm ang che.

I ngaihdamna mamawh em em tu chu ngaihtuah la, nangmah huatnain a khat pawh a ni maithei e, hetiang hian tawngtai turin ka duh che a ni:

“Lalpa, hemi hian ka rilru a tihnatna zawng zawng i hria e. Chu rilru natna chu pai chhunzawm zel ka duh tawh lo va. Midang huatna neih ka duh lo. I khawngaihna leh Kraws thiltihtheihna chu ka rilru natna lak kianna turin leh min tinatu chu ka ngaihdam theihnan ka mamawh a ni. Hei hi ka inher danglamna tur a ni. I ngaihdamna hi ka mamawh hmasa a ni. Midang ka tihnat tam tak an awma, nangmah leh anmahni nena inlaichinna siam that ka duh a ni. Nitina ka mamawh khawngaihna avangin ka lawm e. Vawiinah hian huatna ka neih hi tihbo ka duh a, nangman min ngaihdam anga midang ngaihdam ka duh ve a ni. Ka rilru chu a lo thar leh fo thin a, ka rilru natna hi lak kian a nih hma chu hemi hi ka ngaidam leh ang te ka ti thin a ni. I khawngaihnain ka na te hi min tihdam sak ang che. Isua hmingin ka dil a che. Amen.”  

Ngaihtuah zui atan

* Ngaihdamna hi vawikhat chauh tur em ni? Engnge a chhan?

* Nangmah maia i tih theih loh tih tir turin engtin nge Thlarau Thianghlim i chettir ang?

* Khakna hi engvangin nge thil chi nen an tehkhin fo? Engtin nge kan nunah chu chi chu kan thanlen tir fo thin le?

*[Lettu: Sangpuia]*

Monday, May 19, 2025

KHAKNA NI LO VIN KHAWNGAIHNA THLANG RAWH

_Pathian Nena Inzawm: Lalpa tawngtaina_

- Rick Warren
- May 19, 2025
“Fimkhur rawh u, Pathian khawngaihna ata in bo dah ang e, khakna zung eng emaw lo chawra tibuai che uin, chu chuan mi tam tak chu tihbawlhhlawhin an awm ang a.” Hebrai 12:15

Lungawilohna i nei chhunzawm zel anih chuan mi tu emaw in an thunun che tihna a ni. 

Hetiang hian i sawi tawh em, “Min ti a vek tawh.” Chumi i sawi awmzia chu i hrethiam em? “Min thunun tawh” i tihna a ni. Chumi thang atanga i chhuah theihna awm chhun chu Pathian khawngaihnaa tihdam i nihin a ni.

Hebrai 12:15 chuan, “Fimkhur rawh u, Pathian khawngaihna ata in bo dah ang e, khakna zung eng emaw lo chawra tibuai che uin, chu chuan mi tam tak chu tihbawlhhlawhin an awm ang a.” 

Khakna nei chhungkaw member pakhat lekin chhungkua a tihchhiat dan i hre tawh em? Khakna phei chu inkaichhawn chi a ni a, thlahte thleng pawhin an nei thei a ni. Mi tu emawin chu inthlahchawnna kal zel tur chu an chhut chat a ngai a, nangmah hi i ni thei a ni. I nu leh paten khakna an neih chhan chu, an thlahtuten khakna an neih vang a ni, chu khakna kal zela chu i chhu chat dawn a ni. Kawng khat chiaha chhut chah dan a awm a: Khawngaihnaa tihdamna hmangin a ni. 

I nunah Pathian khawngaihna i dawng lo anih chuan, harsatna kawng hrang hrang chuan khakna a neih tir ang che. Khawvelah hian sualna a awm tlat a, nun hi chu a bawlhhlawh a ni. Leilung kehchhe tawhah kan awm a ni. Lei hi vanram a ni si lo. Mi tha lo te chu thil tha lo nen an lo lang si thin a. Hringnun hi a felfai mawlh si lo a ni.

I nunah khawngaihna i nei lo anih chuan, khakna chuan a man ang che a, i nun tihchhiat a tum ang.    

Ngaihdamna pawh chu a felfai chiah em? Felfai lo ve.

Felfai leh felfai loh lampang pawh a ni lo. Dikna chungchang zawk a ni. Khawngaihna a ni. Felfai taka thil ti turin mi i ngaidam kher lo. Thil dik ti turin i ngaidam zawk a ni, a chhan chu i thinlung chu tur hlira khata awm tir i duh loh avangin. Huatna leh khakna chu pai reng i duh loh vang zawk a ni. 

Ngaihdamna chu a thlawn a ni, nimahsela a tlawm lo. Isua nunna in a tuar a ni. Pathian Fapa meuhin a tuar a ni. Isua chu krawsa a thih dawn ah khan, “Ka Pa, anni hi ngaidam rawh. An thiltih sual an hre lo anih hi” a ti. “An thiltih hi an hrechiang lo va. Chuvang chuan ka Pa, ngaidam rawh” a ti a ni. Chutiang ang khawngaihna chu huatna leh khakna hneh turin i neih ngai a ni.

Dikna chu Pathian kutah dah la. I khakna chu khawngaihnain tidam ang che.   
    
Ngaihtuah zui atan

* Mi tu emaw khakna nei i hrawn tawh em? Chu chuan i nunah eng nge nghawng a neih?

* Engvangin nge engkim hi a felfai a ni tih i hriat a pawimawh?

* Fel taka thil a kal lohna khawvelah hian, vawiinah hian tu hnenah nge khawngaihna i lantir ang le?

*[Lettu: Sangpuia]*

Sunday, May 18, 2025

NGAIHDAMNA LEH RINNA NEIH LETNA

 Pathian Nena Inzawm: Lalpa Ṭawngṭaina


- Rick Warren 

- May 18, 2025



"Duh takte u, in phuba la suh ula, Pathian thinurna kian zawk rawh u, 'Phuba reng reng keima lak tur a ni, keiman ka thungrul ang, Lalpain a ti,' tih ziak a ni si." (Rom 12:19)


Midang kan ngaihdam theih loh avanga huatna nena kan tei kan tei chuan Pathian aiin kan hria ti  ni awm takin kan awm tihna a ni. 


Mahse Bible-in dikna hlen chhuah chungchangan kan lo enghelh ve tur a awm loh thu min hrilh. Rom 12:19-ah chuan heti hian a ti, "Duh takte u, in phuba la suh ula, Pathian thinurna kian zawk rawh u, 'Phuba reng reng keima lak tur a ni, keiman ka thungrul ang, Lalpain a ti,' tih ziak a ni si." (Rom 12:19)


Tunge ralthuam nei ṭha zawk, nang nge Pathian? Tunge teh dik thei zawk, nang nge Pathian? Pathian a nih ka ring! Tu emaw chunga dikna lekkawh emaw Pathian kuta hlan emaw thlan ngai ni ta se Pathian kutah ka dah ang. Pathian kutah hlan kha ka thlang zawk mai ang.


Ngaihdamna hi engnge anih loh ka'n hrilh ang che u. Ngaihdamna kan tih hian an chungah rinna i nghat leh nghal tihna a ni lo. Ngaihdamna hi rang deuha thleng thei a nia, mahse rinna chu kum tam duh a ni. Ngaihdamna chu khawngaihnaah a innghat a. Rinna chu thiltihah a innghat. Rinna i hlawh chhuak thei a. Ngaihdamna erawh i thawk chhuak lo.


Mi tam tak chuan midang an ngaihdam duh lo, a chhan chu midangte kan ngaihdam  chuan hun lokal leh zelah pawh an rin zel a ngai tawh dawn ni a an hriat vang a ni. Mahse a ni lo. Chu chu thil dang daih a ni. Rinna chu hlawh chhuah chi a ni.


Ruihhloin a tihbuai chhungkua te chuan, "Min ngaihdam thei ang em? an ti a. I ngaidam ngai em em ang. "A hmaa a awm dan angah khan kan let leh thei ang em?" Thei lovang. Hmalam i pan zel ang, mahse thil ngai reng a ni thei lo.


Ngaihdamna leh iaichinna tihṭhat thar leh te hi a inang lo. Ngaihdamna chu nangma'n i tih tur liau liau a ni- an dil emaw dil lo emaw, an chhang emaw chhang lo emaw, an mamawh em tih an hria emaw hre lo emaw. Nangma tana ngaidam i ni.


Inlaichinna siamṭha leh tur chuan ngaihdamna aia thui fe kal a ngai. Inchhirna a keng tel. Rinna tun din lehna a keng tel a. Hun a duh viau bawk ṭhin.


Mi tam tak tan chuan hun hluia kir leh tluk anih dawn avangin- natna ngai bawk, chin ṭhan ṭha lo leh ninna te, an ngaidam thei lo. Chu chu a dik lo! A hma anga in kir leh kher a ngai lo. Mahse Pathian kuta i dah a ngai.


Engtinnge i natna te i paih chhuah? I ngaidam a, dikna, thinlung thlakna leh chhun khah lehna a thlen theih nan Pathianah rinna i nghat.


Ngaihtuah zui atan.


Huatna kan thlah loh avangin tute chungah emaw kan let leh emaw kan ti ṭhin. Mahse huatna hian tunge a tihnat?


Engvangin nge inlaichinna siamṭha leh tura simna a ṭul?


Eng kawngtein nge inlaichinnaah rinna i tihngheh leh ang?


[Lettu: Mapuia Fanai}

Saturday, May 17, 2025

ENGVANGIN NGE I NGAIHDAM ANG?

_Pathian Nena Inzawm Lalpa Ṭawngṭaina_

- Rick Warren
- May 17, 2025
_"Tichuan chu bawia pu chuan a khawngaih ta em em a, a thlah a, a bat chu a ngaidam ta a."_ (Matthaia 18:27)

Khâkna leh huatna kara hringnun hman chhoh zel hi nin chang i nei ṭhin em?

Chutiang anga nung tura duan kan ni ngai lo- mahse mihring kan ni miau a. Pathian kutah dikna leh inlaichinna boruak siamṭhatna dah aiin kan natna te vawn reng leh kan rilru luahtir reng kan duh zawk fo ṭhin.

Mahse Pathian thu chuan engvangin nge kan natna te leh huatna te kan paih bo chhan tur min hrilh. Rawn lan chhuahtir fo lova kan paih thawl zawk a ngai ṭhin. Kan ngaihdam a ngai a ni.

Engvangin nge i ngaihdam ang?

*Pathianin a ngaihdam che avangin.*
Matthaia bung 18-naah chuan Isuan a chhiahhlawh ngaidamtu lal pakhat chungchang a sawi a. Chang 27-naah chuan heti hian a ti a, _"Tichuan chu bawia pu chuan a khawngaih ta em em a, a thlah a, a bat chu a ngaidam ta a."_ Lalin a chhiahhlawh leiba a ngaidam ang hian Pathianin kan ba min tlaksak turin Isua Krista a rawn tir a ni. I thil tihsual kha engpawhnise a man pek a  ni tawh.

_"Tin, nangni in bawhchhiatnate leh in tisaa serh tan lohna avangin thi in lo ni a, nangmahni ngei chu amah nen a tinung che u a nih kha; kan bawhchhiatna zawng zawngte min ngaidam a, batna lehkha thupeka ziak, kan chunga awm, min dodal thina chu a thai bo tawh si a: chu ngei chu kraws-a khengbetin a la kiang ta a."_ (Kolossa 2:13-14)

*A chhan chu huatna neih hi mahni inhremna a ni.*
Mahni intihnatna a ni. Huat i neih chuan i va huata te ai mahin nangmah kha a hliam nasa zawk ang che. A nihna takah chuan kum tam tak liam ta a thil thleng khan a lan tina reng che tihna a nia, midang chuan an theihnghilh tawh ang! I hun kal tawh chu hun kal tawh a ni a, i la vawng nung reng anih loh chuan a tina thei tawh lo che.

*A chhan chu nitin ngaihdam ngai i ni.*
Bible-in chiang taka min zirtir chu i pek chhuah theih loh chu i dawng thei bik lo tih hi a ni. Ngaihdam nih i duh em? Bible chuan midang i ngaidam ṭhin tur a ni tiin min zirtir.

Ngaihdamna hi nunphung a ni. Vawi khat i va ngaihdam zeuh ringawt kha a ni lo. Nitina i mamawh a ni. Midang ngaihdam i dil a ngaih chang a awm a. Pathian leh midang hnen aṭanga ngaihdamna i dawn a ṭul chang a awm bawk a. Midangte i ngaihdam a ṭul hun a awm bawk. Ngaihdamna hi tawp mai tur a ni lo. Ngaihdamna hi lawm tur a ni a, hman tur a ni bawk.

_"Tin, inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u."_ (Ephesi 4:32)

Ngaihtuah zui atan.
Engvangin nge huatna hian na taka min uai beh ni a kan hriat? Chu chuan engtinnge kan taksaah nghawng a neih?

Pathianin a thawhsak che ngaihtuahin engvangin nge vawiin hian i ngaihdam ve a ṭul?

Fianrial nun leh Bible zirna nun hian engtinnge mi ngaihdam theihna nun nei tura min puih?

[Lettu: Mapuia Fanai]

Friday, May 16, 2025

THIL TISUAL NGAI LO ANG MAIIN

_Pathian Nena Inzawm: Lalpa Ṭawngṭaina_ 

By Rick Warren
— May 16, 2025
“Chutichuan, puih kan ngaih hun taka zahngaihna leh khawngaihna kan hmuh theihna tûrin, khawngaihna lalṭhutthlêng chu huai takin i hnaih ang u.” [Hebrai 4:16]

Ngaihdamna chang turin Pathian hmaa i inkiltawih emaw i zah emaw a ngai lo. Bible-ah chuan, “Chutichuan, puih kan ngaih hun taka zahngaihna leh khawngaihna kan hmuh theihna tûrin, khawngaihna lalṭhutthlêng chu huai takin i hnaih ang u,” tiin min chah [Hebrai 4:16]

Khawngaihna lalthutthlengah chuan inhauna, inhremna leh inhnarna a awm ngai lo. Kan sual chung chung pawha Pathian hmaa kan kal chuan a zahngaihna kan chang a, a khawngaihna kan dawng ṭhin. 

Khawngaihna [grace] leh zahngaihna [mercy] tih chu engnge an danglamna? Zahngaihna [mercy] chu i tihsual zawng zawngte nena Pathian i pan changa ngaihdamna i chan chu an ni. Khawngaihna [grace] thung chu danglam tura thiltihtheihna chu a ni. I mamawh ve ve. I sualna atan a zahngaihna chu i mamawh a, hun liam tawha i tihsual zawng zawng atan chuan [ngaihdamna i mamawh]. Khawngaihna [grace] pawh i mamawh, insiamtha tura chakna i mamawh avang chuan. Pathian chuan rinawm tak leh inngaitlawma a hnen i pan phawt chuan, a pahnih chuan i chang ang tiin a tiam a ni. 

Pathian ngaihdamna chungchang chu ka lo hrilh ang che. 

Ngen chiam suh. Nangmahin ngaihdam nih i duhna aia nasa zawkin amah chuan a ngaidam duh che! Ngen chiam duh suh. 

Dawn [bargain]in tham [bribe] duh suh. “Lalpa, Ka ti tawh ngai lo vang! Hetiang hian ka lo nung tawh thin. Zaa sawmhnih kohhran tan ka pe ang!” tih vel lam a ni lo. Tham suh la. Ngen chiam hek suh. 

Ring tawp mai rawh. 

Eng nge i rin chu? Hebrai 4: 16a Pathian thutiam chu ring tlat rawh. 

Engtin nge i tih ang? In puang rawh. Inpuanna dik chu, “Lalpa ka ti tawh ngai miah lo vang,” tih chu a ni lo. “I dik zawk e, Lalpa. Keimah ka dik lo. Ka dik lo,” tih chu a ni. 

Bible chuan Rom 5: 1 ah chuan hetiang hian a sawi, “Tichuan, rin vânga thiam kan chan tâk avângin, kan Lal Isua Krista zârah Pathian nên inremin kan awm ta,” tiin.

Thiam chantir [justified] tih awmzia chu engnge ni? “Tisual ngai lo ang maiin” tihna a ni. A awmzia chu Pathian chuan dik leh thiam lohna nei lo angin Isua thiltih avang chuan nihna a pe che tihna a ni. 

Thinlung tlen thianghlim chu neih i duh em? I sualna chu eng ang tak pawhin lo bal tawh mah sela, Pathian chuan, “Sualin sen hlur tawh mah ula, Vûr ang maia vârin ka sil fai ang che u, Senduk tluk mah ula, Sahmul vâr ang maiin in vâr leh ang,” tiin a sawi [Isaia 1: 18]
Ngaihtuah zui atan.

Pathian chuan i sualna lai ber chu ngaidam theiin i ring em? Eng vangin nge? 

Pathian hmaa i Inpuanna chu a englai chu nge thlak danglam ngai? 

Rinna avanga thiam chantir i nih chuan, kan sualna avanga thupha chawi fo chu a ṭulin i hria em? 

Silfaina chang turin i inpeih tawh em? 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

 *I inpeih tawh em?* 

He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu* : Peka]

Thursday, May 15, 2025

A THARA BUL ṬAN TURIN SIMNA NENA BUL ṬAN

_Pathian nena Inzawm: Lalpa Ṭawngṭaina_

By Rick Warren
— May 15, 2025
“Kan kawngte chu
fiahin en ngun ila,
Lalpa lam i hawi ang u.
Kan thinlung chu
kan kutte nên
vâna Pathian lamah chuan
i chawikâng ang u.
Kan bawhchhia a, kan hel a,
nangin min ngaidam lo ve.’” [Ṭah Hla 3:40-42]

Ṭha taka bul ṭan tur leh chhia leh ṭha hriatna thiang nei tur chuan simna hmanga bul ṭan a ngai. Huaisen tak leh chiang taka nangmah leh nangmah i inhmuh theih nan i sualte Pathian chuan hmuhfiahtir tur che chuan dil ang che. I nun pumpui kha ngun takin chhut nawn la – i sualna zawng zawngte avang chuan sim ang che. 

Sim tih awmzia chu engnge ni? Awmzia pathum a nei thei ang: Pakhatna, i sualnaah chuan mawh i phur tihna a ni a. Pahnihna, chung sualnate chu i hawisan tihna a ni a. Pathumna, Pathian leh a khawngaihna lam chu i hawi tihna a ni. 

Bible chuan, “Kan kawngte chu
fiahin en ngun ila,
Lalpa lam i hawi ang u.
Kan thinlung chu
kan kutte nên
vâna Pathian lamah chuan
i chawikâng ang u.
Kan bawhchhia a, kan hel a,
nangin min ngaidam lo ve,’” tiin a sawi [Ṭah Hla 3:40-42]

Simna tih awmzia chu i sualna awmzia hriatfiah chu a ni ngawt lo. “Thil lian tak a lo ni tak tak lo” tih ngawt a ni lo. Thil lian tak a ni thei a, i hriat tawh mang lo thil pawh a ni thei. “Hman hmana mi a ni tawh,” emaw, “Ka paltlang kawng pakhat a ni,” emaw, “Mi pawhin an ti vek,” tih ngawt chi a ni lo. A awmzia a awm tak tak thei lo! Sual awmzia sawifiah emaw, sawi nep emaw, chhuanlam siam emaw, midang dem emaw chu a theih loh. Chung chu simna dik tak an ni thei lo. 

Hei hi ngaihtuah teh: i dam theihna tura a kawng daltu lian ber chu nangmah i ni e. Pathian chu i nghak lo; mi tu te mah i nghak tak tak lo. Pathian chuan i natna, nungchang ṭha lo, hringnun buainate chu tihdam a duh a, a daltu lian ber chu nangmah i ni e. 

Bible chuan I Johana 1: 8 ah chuan hetiang hian a sawi, “Sual ka nei lo,” kan tih chuan mahni kan inbum a, thutak chu keimahniah a awm lo va ni,” tiin. 

Nangma miziaa awm mahni leh mahni intichhe ṭhin nungchang chu paih i duh em? Nangmah leh nangmah inbum i bansan hunah nangmah leh nangmah intihchhiat chu i bansan chauh ang. Huaisen taka mahni nihna hriat chian leh thil dik lo a nihna ang chiaha pawm chu a ngai a, hriat thiama sawifiah chiam emaw a chhuanlam sawi chiam aiin chu chu a pawimawh zawk. 

I inpawm a, i inpuan a, i nun aṭanga i paih chhuah chu a ngai a ni. Tichuan, Pathian chuan i natnate chu a tidam thei ang. Nungchang ṭha zawk Isua ang thei turin a ni chuan a lo pe ang che. Hun tam tak liam taa i buaina te chu a la kiang ang a, zalenna leh amah nena inzawmna thuk zawk a pe ang che. 

Ngaihtuah zui atan. 

Sual zep ruk nangmaha bet tlat nei lo ang maia i khawsakpui mek chu eng nge ni? Inthiam lohna nei lo ang maiin eng vangin nge i awm? 

Simna nun nei tur chuan vawiin hian engnge i tih dawn? 

Pathian chuan i sual i puan hnu chuan engnge ti turin a duh che? 

[ *Lettu:* Peka]

Wednesday, May 14, 2025

CHHIA LEH THA HRIATNA THIANG TAKA HMAN DAN

_Pathian Nena Inzawm: Lalpa tawngtaina_
 
-  Rick Warren 
-  May 14, 2025
"Aw Pathian, ngun takin min en chhuak la, ka thinlung hi hria ang che: Mi fiah la, ka ngaihtuahnate hi hria ang che: Tin, keimahah hian suahsualna kawng rêng rêng a awm nge awm lo en la, Chatuan kawngah chuan mi hruai ang che." Sam 139:23-24

Chhia leh tha hriatna thiang nei tura kawng zawh hmasak ngai chu thlarau lam intehna hi a ni.

Pathian nen fianrial hun hmang la, “Lalpa, nang nena thawhdun ka duh. Nang leh kei inkara ka tihdikloh zawng zawngte tarlan ka duh a. Ka tihdik loh ka hriat si loh te ka hmuh theih nan min pui ang che.” Pathian hnenah rilru fim i neih theih nan leh i sualte hailan anih theih nan dil rawh.

Sam 139:23-24 ang hian tawngtai la, "Aw Pathian, ngun takin min en chhuak la, ka thinlung hi hria ang che: Mi fiah la, ka ngaihtuahnate hi hria ang che: Tin, keimahah hian suahsualna kawng rêng rêng a awm nge awm lo en la, Chatuan kawngah chuan mi hruai ang che." Tin, “Lalpa, ka thinlung chhung en la. Ka hnung tawlhna chhan te ka hriat theih nan min pui ang che” tiin.

Finrial hun i mamawh a ni. Hmanhmawh lo la. “Lalpa, minute nga chiah ka sual puan nan hian ka nei,” ti suh ang che. Hun inpe la. Ziak chhuak vek ang che.

Engvangin nge ziahchhuah vek chu a pawimawh? I ziah chuan a chiang bik dawn a ni. Lei leh kut zungtang inkarah hian tibuaitu engemaw chenah a la awm thei. Sawi chhuak la, ziak bawk ang che. I ziak lo anih chuan, i ngaihtuahnaah a la awm tam tawklo a ni ang e.

Thu pawimawh deuh ka zawt ang che. Pathian malsawmna i beisei danah hian engtiang chiahin nge i lak thutak? Rinawm tak tak i duh em? Pathian laka rinawm i tum em? Nangma lakah ngei pawh rinawm i tum em? Midang lakah rinawm i tum em? Nge pawisak nei lem lo va khawsak i duh zawk? Pawisak nei lem lo a kan kal chuan Pathian malsawmna a lo thleng thei thin lo. 

Nimahsela rinawm leh dik taka i khawsa a nih chuan hma i sawn tihna a ni. Pathian atanga chhuak hlimna leh lawmna i la chan ngai loh i chang ang. I nuna buaina leh natna hrang hrang i hmachhawn thinte lak ata i zalen tep tihna a ni ang. 

Khawtlai lo la. Vawiin hian nangmahin hun insiam la, thlarau lam inenfiah nan hmang la. I nuna a rawn thlak danglam ang. 
 
Ngaihtuah zui atan

* Thlarau lam inenfiah thei lo va awm tir tu che eng nge ni?

* Pathianin engkim a hriat vek lai hian, engvangin nge a chang hian kan la rinawm loh fo nia i hriat?

*  Engtiangin nge hlauhna hian kan nuna sualna, natna leh thil tha lo te a tih buai? Chapona hi engnge ni?

*Pathianin i nun a tihdanglam theihnan i inring em?*
I sualna te i puang duh aniha, i nunah Isua i thlang duh anih chuan, heti hian tawngtai ang che.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*

Tuesday, May 13, 2025

I DAWN CHU PATHIANIN PECHHUAK TURIN A DUH CHE

_Pathian Nena Inzawm: Lalpa tawngtaina_

-  Rick Warren 
-  May 13, 2025
“Thilphalna tinreng, keimahni avanga Pathian hnena lawmthu sawina siamtu chu nei tura engkima tihhausaka awmin, thehtu hnena chi petu leh ei atan chhang petu chuan in theh tur chi chu a pe che uin a tihpunsak ang che u a, in felna rahte chu a tihhlawksak bawk ang che u. He chhawmdawlna rawngbawlna hian mi thianghlimte tlakchhamnate chu a phuhruksak chauh pawh a ni si lo va, Pathian hnena lawmthu sawina tam taka changin a luang liam bawk a ni.” 2 Korinth 9:10-12

Pathianin a pek che chu, nangmah kaltlangin midang pawh pek ve a duh a ni.

Pathianin khawvelah malsawmna a pek theihnan a hman theih tur mi a zawng a ni. Heti hian a zawt a, “Malsawmna chu a dawngtu nge i nih dawn? Miten malsawmna an dawnna tura a kalkawng zawk?” A dawngtu i nih chuan, vawi khatah i puar der ang. Nimahsela, “Lalpa, malsawmna kalkawng nih ka duh a, keimah kaltlangin miten i malsawmna dawng rawh se” i tih chuan, chutiang mi chu Pathian malsawm a duh thin.

Bible-in 2 Korinth 9:10-11 ah, “Thilphalna tinreng, keimahni avanga Pathian hnena lawmthu sawina siamtu chu nei tura engkima tihhausaka awmin, thehtu hnena chi petu leh ei atan chhang petu chuan in theh tur chi chu a pe che uin a tihpunsak ang che u a, in felna rahte chu a tihhlawksak bawk ang che u.”

He thutiam hi chu Pathianin a dawn tir che i pekchhuah peih leh peih loh ah a innghat a. Pathian malsawmna i dawn chu midang hlan ve duhna i nei em?

Min hrethiam la, “Midang tanpui tur chuan ka la hausa tawk lo” tiin i sawi a ni maithei e. Engzat pawh nei la, i thilphal thei tho a ni. Bible ah pawh hmeichhe pakhat dar tangka dere pahnih chauh nei a, pe vek tu kan hmu a ni. 

“Midang pek tur khawp chu i nei ngah thei lo vang” tih hi chu a dik tluan tling lo. Engemaw tal chu pek tur i nei a ni. Midang tapuina kawngah i tha i thawh ve thei a. I rinna chu phal takin midang hnenah i pechhuak thei bawk a ni.

Hun harsa i paltlang a nih pawhin hetiang hian sawi la, “Lalpa, neih chu ka nei ngah lo, nimahsela ka dawn a piang hi ka pechhuak duh a ni. Ei leh in tur tlemte ka nei a, nimahsela midang chaw eia sawm ka duh a. Ka neih apiang hi pek ka ui lo a ni.” Pathianin thil pathum a tiam che a. Pakhatna, thlarauva thanlen. Pahnihna, midang tanpui tura a hmanrua atana hman che. Pathumna, Pathian chawimawi.

I neih apiang chu i pekchhuah chuan, i ngaihtuah phak bakin Pathianin malsawmnain a vur ang che.

Ngaihtuah zui atan

* Tunkar chhung hian tu hnenah nge Pathian malsawmna i pekchhuah ang?

* Tun dinhmunah hian pekchhuah tur nei tam lo va i inhriat chuan, Pathianin engtin nge a ngaih ang che?

*  I thilpek atanga Pathianin mal a sawm dan che han sawi teh?

*[Lettu: Sangpuia]*

Monday, May 12, 2025

TUN ATAN ZEL PATHIANAH INNGHAT RAWH

TUN ATAN ZEL PATHIANAH INNGHAT RAWH

- Rick Warren 
- May 12, 2025

_"Engah mah mangang suh u; engkimah ṭawngṭai leh dilin, lawmthu hril tel zelin, in duhnate chu Pathian hnenah hriattirin awm zawk rawh se . . . a dik apiang te, a zahawm apiang te, a fel apiang te, a thianghlim apiang te, a duhawm apiang te, a thangmawi apiangte – ṭhatna reng a awm a, fakna reng a awm phawt chuan – chung chu ngaihtuah rawh u."_ (Philippi 4:6-8)

Pathianin tun atan zel amaha rinna nghat turin a duh che. "Nitin kan ei khawpin chaw min pe ang che"- karleh atan emaw nakum atan emaw ni lovin, vawiin atan zelin ti a ṭawngṭaia dil turin min ti.

Nitin Pathiana rinna kan nghah theih nan Bible chuan thil kan tihtur pali a awm tih min hrilh: _"Engah mah mangang suh u; engkimah ṭawngṭai leh dilin, lawmthu hril tel zelin, in duhnate chu Pathian hnenah hriattirin awm zawk rawh se . . . a dik apiang te, a zahawm apiang te, a fel apiang te, a thianghlim apiang te, a duhawm apiang te, a thangmawi apiangte – ṭhatna reng a awm a, fakna reng a awm phawt chuan – chung chu ngaihtuah rawh u."_ (Philippi 4:6-8)

*Mangang suh.* Mangan hi engnge kan dah len viau? A chhan chu chin ṭhan ṭha lo a ni satliah lo - sual a ni! Pathian chu a thutiamah a rinawm a, harsatna lian leh te deuhah te pawh a chungah rinngha i nghat thei ang. _"Chutichuan, atuk atan lungkham suh u, atuk chuan ama tan a lungkham chawp dawn si a. Ni khat atan ni khat hrehawm chu a tawk a ni."_ (Matthaia 6:34)

*Engkimah ṭawngṭai rawh.* Ṭawngṭaina hian thil a tidanglam thei. Rom 8:32-ah chuan heti hian kan hmu, _"Ama Fapa ngei pawh zuah lova, kan zaa aia petu chuan thil zawng zawng pawh athlawnin min pe tel lo va ngem ni?"_

*Engkimah Pathian hnenah lawmthu sawi rawh.* Engpawh thleng se lawmthu sawi rawh. Bible-in "Engkim tan lawmthu sawi rawh" a ti lo a, "Engkimah lawmthu sawi rawh" a ti zawk. I nuna thil ṭha lo lo thleng avangin lawmthu i sawi kher a ngai lo. Mahse Lalpan "kalsan tawp lovang che u" ti a min tiam avangin engkimah lawmthu in sawi thei ang. 

*Thil dik ngaihtuah rawh.*
Thil thianghlim, hmangaihtlak, dik leh zahawm ngaihtuah tur chu khawiah nge i hmuh ang? Pathian leh a ṭhatna i enin chutiang thil chu i hmu ang. Isaia 26:3-ah chuan heti hian kan hmu, _"I chunga rilru nghattu chu, nangmah a rin che avângin, thlamuang tak maia awm tûrin i veng ang."_ 

Bible chhiar la- zir la, vawng la, i rilru chu thudikin chhungkhat rawh - tichuan Pathian hmangaihna leh ngaihsaknaah rinnaah chuan i ṭhang lian thei ang.

Ngaihtuah zui atan.

Ṭawngṭaina hian thil a tihdanglam theih i ring em? Engvangin? 

I ngaihtuahna kha khawi lam hawizawngin nge a kal ber? A dik, zahawm, fel, thianghlim, duhawm leh thang mawi apiang te i thlir ṭhin em?

Vawiin hian eng thilah nge Pathian hnenah lawmthu i sawi ang?

[Lettu: Mapuia Fanai]

Sunday, May 11, 2025

PATHIANIN I DIL HUN A NGHAK

_Pathian Nena Inzawm: Lalpa Ṭawngṭaina_

- Rick Warren 
- May 11, 2025
_"Chutichuan, nangni mi sual mahin in fate thil ṭha pek nachang in hriat chuan, in Pa vana mi chuan a diltute chu thil ṭha a pe zawk em em dawn lo vem ni?"_ (Matthaia 7:11)

Pathian hi engkim bul a ni. He leia i hmuh theih zawng zawng te leh he khawvel leh van thengreng thleng pawha i hmuh theih loh te pawh, a siamtu chu Pathian a ni. Thil ṭha lo awm tawh zawng zawng leh la awm tur zawng zawng te lamin a hnen aṭanga chhuak a ni.

Pathian aṭanga engkim i la dawn anih chuan i hriat tur thil pali a awm:

*A hmasa berah chuan engkim mai hi Pathian thilpek a ni.* I thil neihte kha engmah i hlawh chhuah a ni lo. Pathian khawngaihna thilpek vek a   ni. Pathianin pe chhuak duh lo sela i nei hauh lovang.

Bible chuan Jakoba 1:17-ah heti hian min hrilh, _"Thilpek ṭha leh thilpek famkim zawng zawng chu chung lam atangin engte Pa hnen ata, a lo chhuk ṭhin a ni."_ Hei vang hian Lalpa ṭawngṭaina, hemi huang bik hi "pe" tih aṭangin a inṭan: "Nitin kan ei khawpin chaw min pe ang che." Engvangin? A chhan chu thilpek a ni. I hlawh chhuak thei lo.

*Pahnihnaah chuan Pathianin a pek theih loh che mamawh i nei lo.* A kum leh atan emaw vawiin atan pawh nise engnge i mamawh dawn i hre miah lo! Mahse engpawh nise Pathianin pe thei tur chein thiltihtheihna a nei.

Philippi 4:19-ah chuan heti hian kan hmu, _"Tin, ka Pathian chuan Krista Isuaa a ropuina ngahzia ang zelin in tlakchhamna tinreng pawh a phuhruksak ang che u."_ "A ropuina ngahzia" tih awmzia chu ren hauh lovin tihna a ni. Pathianin a hna kang ve thei ngai lo a nei.

*Pathumnaah chuan, Pathianin i mamawh apiang pek che a duh.* Matthaia 7:11-ah chuan heti hian kan hmu, _"Chutichuan, nangni mi sual mahin in fate thil ṭha pek nachang in hriat chuan, in Pa vana mi chuan a diltute chu thil ṭha a pe zawk em em dawn lo vem ni?"_ Pathian chu Pa ṭha tak a ni a, i mamawh apiang pek che a duh. I mamawh a ni tih i hriat hma hauh pawhin Pathian chuan i mamawh a hria. I dil aia tama pe tur chein a inpeih reng a ni.

*Palina chu hei hi a ni: Pathianin a nghak reng che.* I mamawh i la dawn mai si loh a awm anih chuan Pathianin i dawn a duh lo tihna a ni mai; amah i la dil lo pawh a ni thei. A nghak reng che! Jakoba 4:2-ah chuan heti hian a ti, _"In dil loh avangin a ni in neih loh ni."_ (NIV).

Vana i Pa, lei leh van siamtu i nei a, i duh apiang, i mamawh apiang dil la a ngaihsak em em ang che.

Ngaihtuah chhunzawm atan.

I mamawh i hmuh theihna turin tunge i belh ang?

I mamawh Pathian hnena thlen turin engnge i lo nghah?

Engtinnge Pathianin i mamawh zawng zawngah a chhang che a ni tih i hriat ang?

[Lettu: Mapuia Fanai]

Friday, May 9, 2025

PATHIAN HNENA I INPEKNA PUANZAR ZAR CHHUAK RAWH

_Pathian nena inzawm: Lalpa Tawngtaina_ 
 
By Rick Warren 
— May 09, 2025
“I thinlung zawng zawngin LALPA ring la, Nangma hriatnaah innghat suh; I kawng zawng zawngah amah hre reng la, I kawngte chu a kawhhmuh zêl ang che." [Thufingte 3:5-6]

Inpe tih awmzia chu i hmalam hun zawng zawng Pathian kuta dah tihna a ni. Thufingte 3: 5-6 chuan hetiang hian a sawi, "I thinlung zawng zawngin LALPA ring la, Nangma hriatnaah innghat suh; I kawng zawng zawngah amah hre reng la, I kawngte chu a kawhhmuh zêl ang che," tiin.

I nuna khawi lai kha nge Pathian hnenah i la hlan loh? In "choka" leh  "thian kawmna pindan" [Living room] chu i lo hlan tawh a ni thei. I nuna thawmhnaw dahna [closet] te kha eng nge an an? I nuna khawi lai ber kha nge Pathian hnena la hlan loh awm thei ang? 

Thenkhat chuan mipat hmeichhiatna chungchangte chu Pathian hnenah in lo la hlan lo thei. "Pathian chuan mipat hmeichhiatna chu nupa tan chauh tih a sawi ngei a, mahse keima duh danin ka kal mai dawn" in lo ti a ni thei e. Chuvang chuan rilru hahna in nei a ni mai thei. 

Thenkhat thung chuan in sum leh paite chu Pathian hnenah in lo la pe lo a ni thei bawk. "Pathian chuan mi uiawm tak nih a phal lova. Thil phal turin min duh tih ka hria. Mahse tunah chuan ka la tlin rih lo a ni" in ti pawh a ni mai thei. Chuvang chuan rilru hahna in nei a ni thei. 

Thenkhat erawh chuan mite nena in inlaichinna chu Pathian hnenah in la hlan lo a ni thei bawk. "Chumi chu ka ngaihdam a ngai tih ka hria. Mahse ka la ngaidam mai dawn lo in lo ti pawh a ni thei." Chuvang chuan in hah pawh a ni mai thei. 

Thenkhat chuan sual zep ruk Pathian hnena puan chhuah loh in lo nei reng pawh a ni thei ang. Thil chin dawklak Pathian kuta kawltir loh pawh in lo nei palh thei bawk. Natna emaw buaina eng emaw pai reng Pathian hnena hlan loh in lo la nei ru thei bawk. 

Thenkhat chuan  
Isua hnenah chuan in nun chu in lo la hlan ngai miah lo a ni thei. Baptisma chang turin in lo la inpe ngai miah lo a ni thei bawk. Kohhran chhungkaw zingah chuan in lo la tel ve ngai lo a ni thei.  
 
In inhlan a ngai. Inpe [Surrender] tih awmzia chu i puanzar zar chhuah a, "Lalpa ka do peih tawh lo che. Hahdamna, buaina ni lovin ka duh zawk e," i tihna a ni e. 

 Pathian nena indo chu a hahthlak i ti hle lo em ni? I inpekna puanzar chu zar ang che - chu chu rinna lanchhuahtirna sang ber chu a ni e. 

Ngaihtuah zui atan. 

I nuna khawi lai ber kha nge i hahpui em em lai chu? 

Chu buaina i neih hmang chuan i nuna khawi lai kha nge Pathian kuta i la hlan loh tih chu han chhui teh. 

Pindan eng emaw ber chu thlang chhuak rawh. Vawiin hian chu pindan Pathian hnena hlan tur chuan eng rahbi thar nge i rah ngai ta ang? 

[ *Lettu* : Peka]

Thursday, May 8, 2025

I CHUNGA THIL LO THLENG CHU PATHIAN CHUAN A CHHAN A HRILH LO CHE EM NI?

_Pathian nena Inzawm: Lalpa Tawngtaina_ 

By Rick Warren 
— May 08, 2025
“Lalpa-ah chuan châwl la,
amah chu nghâk fan fan rawh.” [Sam 37:7]

Mi thenkhat chu lungawina zawngin an tal buai chiam thin, a chhan langsar tak pakhat chu an chunga thil thlengte chu a awmzia an hre lova hriat an duh si chu a ni.  Pathian erawh chuan thil thlen chhan tam berte chu min hrilh lem lo thung a, a beidawnthlak hle a ni!

Eng vangin nge Pathian chuan i nuna thil thleng zawng zawngte chu a hrilhfiah lem loh che? A chhan chu a fiah che a ni. Mahni i inthunun thei zel ang nge, a chhan leh awmzia hre mumal lo chung pawhin lungawi takin i kal zel thei nge thei lo tih chu nangmah atangin hriat a duh a ni. 

Hei hi thil nihna chu a ni, Pathian chuan thil nihna leh awmzia hrilhfiahsak che chu a ba hauh lo che a, hrilhfiahsak che pawh ni se i hre thiam vek kher chuang lo vang. 

A hrilhfiahsak che a nih pawhin nangmaha natna chu lak kian a ni chuang lovang. He khawvela thil eng emaw zatte hi chu thihna lui ral piah lama i kai meuh hma chuan i hre thiam tak tak ngai lovang.
 
Pathian chuan a hrilhfiahna a pe lo chung che pawhin 
chutiang hun harsa chu hmangin kawng harsaah chuan a hruai chang che a awm fo thung si. 

Kan naupan laia school kan luh tan tirh vel khan kan classroom a reh thap hun lai chu class test kan neih hun lai chu a ni thin. Kan zirtirtu chuan "Tawng suh u! Zawhna kha chhiar ula, chhang rawh u" tiin min hrilh thin a. Tichuan kan zirtirtute ngei pawh chu an ngawi chhunzawm ta thin. 

I nunah Pathian chu ngawi leh mel sang tam tak chuang daiha awm anga i hria a nih chuan i rinna kha fiahin a awm mek tihna a ni. Pathian chuan i insum thei dawn em tih te, nghet zawkin amah i vuan dawn em tih te, lungawi zel i tum dawn em tihte chu a hre duh a ni. 
 
Tun karah emaw thla tharah emaw 
kuminah emaw natna i paltlang a nih chuan Pathianin a chhan a hrilhfiahna che chu i thil mamawh ber a ni lem lo. I mamawh tak zawk erawh chu Pathian awmpuina che chu a ni e. 

“Lalpa-ah chuan châwl la,
amah chu nghâk fan fan rawh.” [Sam 37:7]

Ngaihtuah zui atan. 

I hun kal tawhah engtiang takin nge Pathian awmpuina i lo chan ve tawh thin - a chhan hrilhfiahna ai chuan a awmpuina chu i mamawh zawk daih a ni tih i hria ang. 

Engtiang takin nge tunah khan Pathian chuan a fiah che? 

Pathian hnenah chuan "eng vangin nge" ti lovin engnge thil dang i dil zawk ang? 

[ *Lettu* : Peka]

Wednesday, May 7, 2025

LIAM TIR LA, PATHIAN THUHNUAIAH A AWM TIH HRIA ANG CHE

_Pathian Nena Inzawm: Lalpa tawngtaina_
 
-  Rick Warren 
-  May 7, 2025

“Ngawi ula, Pathian ka ni tih hi hre rawh u: Hnam tin zingah chawimawiin ka awm ang, leiah hian chawimawiin ka awm ang.” (Sam 46:10)

Nitin mai hian, i nunah tuin nge thuneiin, tuin nge thutlukna chu siam dawn tih in zawh fo a ngai: Pathian nge nangmah.

Duhthlanna chu indona a ni. I nunah thunun tum tam tak i nei a. Nangman dan i insiam chawp a. Kan thawpikna ata tihkiana a awmna chu Pathian chu Pathian nihtir hi a ni. “Lalpa, ka thunun theih loh chu nangmah chauhin i thunun thei,” ti ang che. Sam 46:10 chuan, “Ngawi ula, Pathian ka ni tih hi hre rawh u: Hnam tin zingah chawimawiin ka awm ang, leiah hian chawimawiin ka awm ang.” 

Tunkarah engnge i hmachhawn dawn tih ka hre lo. Harsatna i hmachhawn lo thei bawk. Pathianin ti tura a duh che chu ka hrilh nghal thei che. I thinrimna chu liamtir la, Pathianin a thunun a ni tih hria ang che. Liamtir la, hria ang che! Chu chu i nuna thlamuanna i neih theihna a ni.

Kan thunun theih loh thil kan hmachhawn apiang hian, thil pahnih hi tih kan tum thin a. Thenkhat chuan, an thunun theih loh poh leh, thunun lehzual an tum thin. Thenkhat chuan chu mi letling chiah chuan an khawsa thung. An bansan hmak a! Zahthlak takin an khawsa thin a ni.

Khing thil pahnih khi a atthlak ve ve a. A sawt lo khawp mai. A tuartu nih emaw thunun tum vak ai chuan, Pathian thunun turin hlan zawk ang che.

Thawpik taka i awmna chhan pakhat chu Pathian nen in inrem loh vang a ni. Pathian chauhin a thunun theih te kha thunun te i tum thin  alawm. I tih nasat poh leh Pathian i bawl kual vel mai mai tihna a ni. Chu chuan Pathian i ep angah a chantir daih ang che. Chutah chuan i chak loh mai bakah, i chauh phah zawk hial ang.

Serenity Prayer an tih hi, Lalpa tawngtaina behchhana an siam a ni a. Nimahsela, a tawp lam hi an chhiar tel lo duh khawp mai a: “Chumi ni-ah chuan kan nung anga, hlimin kan chen anga; harsatna te chu thlamuanna kawngah ngaiin; he khawvel sualna te chu tam mahse Isua en ila, keiman thawk thei lo mah ila; amah kan irn chuan min thawhsak vek ang, chutichuan kumkhuain amah nen kan cheng za tawh ang. Amen”

Chutah chuan thiltihtheihna a awm! I tih theih loh pawh ama hnenah engkim i hlan chuan thunun theihna chu a awm a ni.  

Ngaihtuah zui atan

* Amah nena hlim taka engtik ni emaw a chenho chu engtiang taka nuam nge ni ang?

* I nunah eng thil nge thunun i lo tum tawh le? Engtin nge nangmahah nghawng a neih?

*  I thunun theih lohte thunun tura Pathian hnena i pek chiah khan, i taksa, rilru leh thlarauah engnge rah i hmuh?

*Mahni inpekna nen i tawngtai thei em?*

Isua Krista chu i Lal leh Chhandamtu ah ila pawm ngailo anih chuan, engvangin nge i tih nghal mai loh? Isua i zui duh tih chu tawngtaiin Pathian hnenah i thlen thei ang:

“Aw Lalpa, ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thildang vang a niilo i tih avangin ka ring che a ni. Ka nunah hian Lal ni turin ka pawm ta che. Vawiinah hian i hnung zui ka duh a, ti tura min tih apiang chu ti turin ka inpeih e.

“Nung tura min siam ang ngeia nun ka duha. Hlimna dik chhar ka duha, mahnia tana nuna ai chuan damchhunga i rawngbawl ka duh a ni. Ka nunna i hnenah ka hlana, min chhanddam tur leh i angchhunga min pawm ve turin ka ngen a che. Isua hmingin ka dil e. Amen.”    

Isua pawm tura i tawngtai thei anih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh tanna tura thil pawimawn a thlawnin ka pe dawn che nia.  

*[Lettu: Sangpuia]*

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...