Sunday, May 31, 2026

SUAL HNEH THEIH NANA PATHIAN HMANRAW HNAI BER

_Chatuan Nihna Laimu_

- Rick Warren 
- May 31, 2026 
_"Kan sualte la bo tura Isua Krista kan rin phawt chuan Pathianin min lo pawmin, mi felah min puang dawn a ni tih a sawi a. Tupawh niin eng ang pawhin lo khawsa tawh mahila Krista hnen kan pan phawt chuan hetiang hian chhandam theih kan ni ang."_ (Rom 3:22,  TLB)

Mihring,  khawvela lo piang chhuak tawh phawt chuan buaina inang kan hmachhawn vek: Kan sualnain Pathian laka min ṭhen hranna hi. Mahse Bible chuan a hneh theih dan awlsam leh ban phak leka awm min kawhhmuh,  _"Chanchin ṭha,  mi zawng zawng tana hlimna thlentu tur chu"_ (Luka 2:10,  NLT). 

Bible chuan heti hian a ti,  _"He Chanchin Ṭha chuan Pathianin a mithmuha lawmtlaka min siamṭhatzia a tarlang a. Hei hi a bul aṭanga a tawp thlengin rinnaa thawh zawh a ni. 'Rinnain a ni mi felin nunna a hmuh' tih ziak ang khan"_ (Rom 1:17,  NLT). 

Pathian thu vekin heti hian a ti bawk, _"Rinna avânga khawngaihnaa chhandam in ni; nangmahni thawh chhuah a ni lo va, Pathian thilpêk a ni. Thiltih avâng a ni lo ve; chuti lo chuan, miin an chhuang dah ang e."_ (Epesi 2:8-9). 

Isua thihna leh thawhlehnain Pa hnen a hruai thleng che hi Chanchin Ṭha chu a ni. Heti hian kan sawi thei bawk,  a Fapa Isua Krista kaltlanga Pathian i rin chauhin vanramah i lut thei. 

Krista i rinna chu engtinnge i lantir ang? Hei hi Bible-in min zirtir dan kawl awlsam tak chu a ni:

*Chhandamtu i mamawh a ni tih hi pawm mai rawh.* Mahni theihnain Pathian hnen i thleng thei lo.  Misual i ni a. I bawhchhe tawh. Vanram chu mi famkimte awmna a ni,  mahse i famkim ve si lo. 

Mahse Bible chuan heti hian a ti, _"Kan sualte thupha kan chawi chuan, kan sualte ngaidam tûr leh kan fel lohna zawng zawng tlêng fai tûrin, amah chu a rinawmin a fel a ni."_ (1 Johana 1:9)

The Living Bible chuan heti hian a letling: _"Kan sualte la bo tura Isua Krista kan rin phawt chuan Pathianin min lo pawmin, mi felah min puang dawn a ni tih a sawi a. Tupawh niin eng ang pawhin lo khawsa tawh mahila Krista hnen kan pan phawt chuan hetiang hian chhandam theih kan ni ang."_ (Rom 3:22,  TLB)

*Isua ring rawh*
Chhandamna chang turin engnge i mamawh tih Bible-in tlang takin a sawi: _"Isua Krista ring la chhandamin i awm ang"_ (TT.  16:31). A awmzia chu Bible-in Isua hi tunge a ni a tih hi ring la, i hma hun atan amahah innghat pumhlum rawh a tihna a ni. Isuan, _"Keimah hi kawng leh thutak leh nunna ka ni; keimaha kal lo chu tu mah Pa hnênah an thleng ngai lo"_ a ti (Johana 14:6)

I rinna chuan Isua a tinzawn bik tur a ni: _“'I kain Isua chu Lalpa a ni tih i ṭana, mitthi zîng ata Pathianin a kai tho tih i thinlunga i rin chuan, chhandamin i awm ang,' tih hi. Miten thinlungin an ring a, felna an hmu ṭhîn a; kain an ṭan a, chhandamna an hmu bawk ṭhîn a ni .  .  . 'Tu pawh Lalpa hming lam apiangte chu chhandamin an awm ang'tih a ni a."_ (Rom 10:9, 10, 13)

*I inpekna chu Isua hmaah puang rawh*
I nunna zawng zawng nen i ring a ni tih Isua hrilh rawh. Amah leh a thutiam i ring a ni tih hrilh rawh. Isuan heti hian a ti, _"Tin, Isua chu a au va, 'Tupawh mi ring chu kei mi ring a ni lo, mi tîrtu ring a ni zâwk e. Tupawh mi hmu chu mi tîrtu hmu a ni. Êntua khawvêla lo kal ka nih hi, tu pawh mi ring apiang thima an awm reng loh nân.'" (Johana 12:44-46). 

*Pathian thutiamah innghat rawh*
Johana 3:16-a Pathian thutiamah hian i innghat thei ang: _"Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân."_

Eng thil pawh i lo ti tawh a ni thei a,  i tih chen chu eng anga rei pawh lo nise Pathianin Isua ring apiangte chu a kiangah vanramah chatuanin an cheng ang tih min hrilh. 

Ngaihtuah zui atan. 

Isua hnenah i la inpe lo anih chuan engin nge dal che? Tunah hian ke pen turin i inpeih em?

Isua hnung zuitu i lo nih tawh chuan vawiina kan zirlai hian engtinnge Isuan a chhandamna che a hriat nawntir che? Tunkar lo awm turah hian tu hnenah nge Chanchin Ṭha i hrilh ang?

Pathianin Isua ringtu apiangte chu vanramah chatuanin an cheng ang tih min tiam a. He thutiam hian i nunah eng danglamna nge a thlen?

*Isua hnena i nun i hlan tawh em?*
Isua hnenah i la inhlan lo anih chuan engvangin nge i nghah khawtlai kher ang? Heti hian ṭawngṭai rawh le:

"Isu, nang ka rin phawt che chuan ka sualte ngaihdam niin i chatuan hmun vanramah min lo pawm ang tiin min tiam a.  Ka chhandamna ka thawh chhuah a ngaih loh avangin ka lawm e. Krawsa i inpekna zara Pathian thil thlawn pek a ni e. 

"I hmaah ka sual ka puang a, ka Lal leh Chhandamtu  i ni tih ka pawm e. Vawiin hian nun zawng i hman atan ka hlan e. Ka nun zawng hi min siam chhan angin, mahni tan ni lovin i tana hman ka duh e. Ka nun i tan ka hlan a, min chhandam a i chhungkuaa min pawm turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, May 30, 2026

CHATUAN HUN ATANA PATHIAN THUTIAM

_Chatuan Nihna Laimu_

- Rick Warren
- May 30, 2026
_"Mathei lovin ṭhatna leh ngilneihnain ka dam chhûng zawng hian mi zui zêl ang a; tichuan, Lalpa inah kumkhuain ka awm reng ang."_ (Sam 23:6)

Pathianah chuan nimin hun i hman te,  vawiin leh naktuk te hi a inzawm vek. Ringtu zawng zawng hnenah,  "He hun ropui tak mai hi i tan ka ruahman a ni.  Ṭhatna leh lainatna ten an zui zel che a - i damchhungin an zui zel ang che. Mahse chu chu a tawpna a ni lo! A tawpah i tan thil ropui tak ka la ruahman a ni!" tiin a sawi ang a ni. 

Davida khan nimin,  vawiin leh naktuk Pathian a zawm dan heti hian a sawi,  _"Pathian inah chatuanin ka cheng ang"_ tiin (Sam 23:6, NLT). Davida khan ringtute hnenah hun tawpa thleng tur min hrilh nawn a ni. Vanramah kan kal dawn!

Pathian nen chuan a ṭha leh nuam lam kan pan zel a ni. 

Paula chuan heti hian a sawi _"Kan awmna leia in hi ṭhiat mah sela, vânah in, kuta sak loh, chatuana awm tûr, Pathian hnên ata in nghet chu kan nei tih kan hre si a."_ (2 Kor. 5:1)

Chatuan hian eng anga rei nge a daih dawn? Chatuan a ni mai!

Engtik niah emaw i taksa kha a thi ang a,  mahse i thi ve lo vang. I lei taksa kha a ṭawih ral ang,  mahse chu chu i tawpna tur a ni lo. Meidilah emaw vanramah emaw i la awm ang.  Chatuan daih tura siam i ni; zawhna awm chhun chu khawi zawk nge i chatuan hmun tur tih hi. 

Engvangin nge ringtute hian kan hmalam hun kan chian? Bible-in heti hian a sawi tlat, _"Chutichuan, taksaa kan awm chhûng hian Lalpa hnênah kan awm lo tih hriain, kumkhuain muang takin kan awm ṭhîn .  .  . muang takin kan awm, ka ti, taksaa awm lova Lalpa hnêna awm kan duh zâwk."_ (2 Kor. 5:6, 8). 

Engtik niah emaw i la thi dawn.  Krista i rin chuan vanramah i kal ang.  Natna, lungngaihna, tawrhna,  beidawnna leh hlauhna lak ata zalen i ni ang. 

Pathianin i lungngaihna zawng zawng a tibo tawh ang,  _"Thihna a awm leh thei tawh lo vang a, lungngaih te, ṭah te, nat te pawh A awm leh tawh hek lo vang; Thil hmasate chu a ral ta."_ (Thupuan 21:4)

Krista hnung zuitu i nih angin he thudik hi i ring thei ang: A ṭha ber chu a lo la thleng ang tih hi!

Ngaihtuah zui atan. 

I nunah engnge chatuan daih tur awm?

Chatuan hun thlir chunga i nun i hman khan engtinnge i nundan a nghawng: i thlen tum,  ruahmanna,  hun hman dan leh midangte nena inlaichinna ang te hi?

I hmalam huna Pathian nena in inkar chungchanga i inrin tawkna kha i nunah a lang chhuak em? Engvangin?

*Pathianin nang nena chatuan hun hman a duh a.  Vawiin hian a sawmna aw hi "Aw" tiin i chhang dawn em?

Isua thihna leh thawhlehna hmangin Pathianin a chhungkuaa chatuan atana i tel ve theihna kawng a hawng a. Hun kal tawha i thil tih tawh leh i awmna chu eng hmun pawh nise Pathian chatuan chhungkuaah i tan hmun a awm a, a nghak reng che. Sawmna zau taka hawn a ni a.  Ring la lo dawng mai rawh. 

I inpeih em? He ṭawngṭaina hian bul ṭan rawh le: 
"Lalpa, ka thih hunah ka chanchin i hmaah ka sawi dawn a ni tih ka hria a. I lakah thil sual tiin i remruat ang ni lovin ka duh danin ka nung a ni tih ka hria. Tun aṭang hian ka nun dan thlak ka duh. Sual lak ata i hnen lam rawn pan ka duh.

"Tun aṭang hian ka nun thlak danglama Isua zui ka duh e. Isua chu ka Lal leh Chhandamtuah ka pawm a.  I thutiam ang takin chatuan atan i chhungkuaah min pawm ka ring e. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, May 29, 2026

PATHIANIN CHATUAN HUN A CHHUNGTE – NANGMAH NEN HMAN A DUH

_Chatuan Nihna Laimu_

By Rick Warren
May 29, 2026
“Mitthi zîng ata Isua kaithotu Thlarau chu nangmahnia a awm chuan, mitthi zîng ata Krista kaithotu chuan nangmahniah a thlarau chêntîrin, in taksa thi thei chu a tinung ang.” [Rom 8:11]

Pathian chuan hringnun hi a dik [fair] ang tiin a tiam ngai lo. Vanram chauh chu Pathian duh dana engkim tihna hmun a ni a; he khawvela hringnun erawh chutiang chu a ni ve lo. Leilung keh chhe mekah kan cheng zawk a ni. 

Mahse he khawvela thil thleng hi mihring chanvo awm chhun erawh a ni lo. 

Khawvelah hian kum 60, 80 emaw 100 emaw pawh i hmang mai thei. I chatuan hmunah thung chuan kum maktaduai tam tak i la hmang dawn. Bible chuan Isuaah chuan i rinna i nghat a nih chuan, i chatuan hun chu Pathian nen vanramah in la hmang dawn a ni tiin a sawi. 

Chu chu Krista ringtu lawm taka an awm chhan tur pawimawh ber a ni – Pathian chuan chatuana nunna min pe!

Chatuan hun chu a ropui dawn. 

Bible chuan hetiang hian min tiam: “Mitthi zîng ata Isua kaithotu Thlarau chu nangmahnia a awm chuan, mitthi zîng ata Krista kaithotu chuan nangmahniah a thlarau chêntîrin, in taksa thi thei chu a tinung ang,” tiin [Rom 8:11].

Vanram chu engtin nge a awm dawn? I hmangaih kal hmasate nen in la intawkkhawm ang. Lawmman te i dawng ang a. I chawl hahdam ang. Mawhphurhna nuam i tih zawng tak chu pek i la ni ang. 

Tichuan Rom 8: 11-in a sawi angin taksa thar pek i ni tawh ang. Chu tak chu vanram chungchang ka ngaihtuah a, min tiphur em em tu chu a ni – lei taksa upa leh awngrawp a bo tawh tur chu. 

Pathianin a siam chhan che chu chhungte a duh a ni. A chhungte nena chatuan hun hman chu a duh. Nangmah nen a chatuan hun chu hman a duh a ni! Chu thutak chuan nasa takin mi a tihlim thei ang. 

Ngaihtuah zui atan. 

• Engtin nge he hringnun tawite chatuan hun nena i khaikhinna chuan chatuan hun i thlir dan a thlaktir che? 
• Pathian chuan vanramah a duh che a nih chuan eng vangin nge he leiah hian a la dah che? He khawvela i chen lai hian engnge i tih tur ni ta ang? 
• I tih tur hlen tur chuan engnge i lo tih ve? 


*I chatuan hun hmanna tur chu i thlang fel tawh em?* 

He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Thursday, May 28, 2026

VANRAM CHU I NING ANG EM?

_Chatuan Nihna Laimu_

By Rick Warren
May 28, 2026
“Tu pawh tlêm te chunga rinawm chu tam tak chungah pawh a rinawm ṭhîn; tu pawh tlêm te chunga rinawm lo chu, tam tak chungah pawh a rinawm lo ṭhîn a ni. Sum lem chungah mah in rinawm loh chuan, tuin nge sum tak chu kawltîr ang che u?” [Luka 16:10-11]

Vanram chu ning dawn tlata i inngai a nih chuan ngaihtuah nawn leh ang che. 

Vanramah chuan chhum chunga ṭhuin i inkuangkuah mai mai dawn lo. Pathian chuan a siam che avangin i tui zawng a hria a. I thil nuam tih zawng, thiamna leh chem kalna [talent] chu amah aṭanga chhuak an ni. Thlarauva thilpek i dawn te, i mizia leh thiltawnte chu amah aṭanga chhuak an ni. Pathian chuan nangmaha nihna danglam tak a pek che chu he lei atan chauh hian an ni lo. Chatuan daih i nihna atan buatsaih che a tum zawk a ni.  

Vanramah pawh hna i nei dawn a. Vanrama i hna leh he leia i hna chu an inang dawn lo: Vanramah chuan i hna chu nuam ti takin i thawk ang. I hnaah chuan rilru buaina leh manganna i nei tawh dawn lo. Awmze thuk tak an neiin, an hlimawm dawn a, a hlawk thlak bik viau zel ang. I hna thawh atana i duhthusam thin ngei chu i thawk dawn!

Vanrama i hna chanpual bik tur chu ka hriat lawksak thei lo che. Mahse he leia Pathianin a hna pek che chunga i rinawm dan mila mawhphurhna pek i ni ang tih erawh ka rin dan a ni. 

Pathian chuan a thlir reng che a, a fiah mek bawk che. Hringnun hi mawhphurhna rei lote mai atan a ni, Pathian chuan engtiang taka rintlak, rinawm leh innghahna tlak i ni tih a hre duh. 

Mawhphurhna pek i nihnaah chuan engtiang taka rinawm nge i nih? Theih tawp i lo chhuah ṭhin a nih chuan vanramah chuan a aia tam zawk pek i ni ang. Vanram i kai chhan tur chu Pathian khawngaihna a ni ngei dawn a, mahse chu hmun i thlen hnua lawmman i dawn tur leh mawhphurhna bik pek i nih tur chu he leiah hian engtiang taka rinawmin nge rawng i lo bawl ṭhin tih chu a ni ang. 

Bible chuan hetiang hian a lo hrilhfiah: “Tu pawh tlêm te chunga rinawm chu tam tak chungah pawh a rinawm ṭhîn; tu pawh tlêm te chunga rinawm lo chu, tam tak chungah pawh a rinawm lo ṭhîn a ni. Sum lem chungah mah in rinawm loh chuan, tuin nge sum tak chu kawltîr ang che u?” tiin a sawi [Luka 16:10-11]

Pathian chuan engtiang takin nge i sum, i hun, inlaichinna, hriselna leh hun ṭha te chu i hman tih a thlir reng che. 

I sum i hman dan chu engtiang taka rinawm nge i nih tarlangtu a ni a, vanrama i awm dan tur thui tak a hruai ang. Pathian chuan lei rosum chunga i rinawm lo va – leiba i nei reng a, sawma pakhat i pe thei lova, i uikawm viau a nih chuan i chatuan hmunah chuan eng mawhphurhna nge a pek che i rin?  

Pathian chuan engtiang takin nge i mawhphurhna chu i hlen – mahni inthiam lohna neihtir che a duh a ni ringawt lo, a chhan chu vanrama hlimna awm thei ang ang chu chen ve ngei turin a duh zawk che. 

Pathianin mawhphurhna a pek che chunga rinawm taka chet chhuah i thlang a nih chuan vanramah chuan chu aia tam zawk chu a pe ve ang che. 

Ngaihtuah zui atan. 

• I hna chu i rinawm leh rinawm loh fiahna anga i ngai a nih chuan engtin nge chu chuan i hna chu a nghawng ang? 
• Hna thawh nuam lo leh awmzia awm em em lo thawk tur chuan Pathian chuan engah nge a tih che? 
• Vawiin lama i hna chungchangah engtin nge i rinawm theih ang? 

*I chatuan hun hmanna tur chu I thlang fel tawh em?* 

He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Wednesday, May 27, 2026

KHAWIAH NGE I LAWMMAN DAWN I DUH?

_Chatuan Nihna Laimu_

- Rick Warren
- May 27, 2026
_"In hmelmate hmangaih ula, an ṭhatna tur ti ula, puktir rawh u, beidawng hauh lovin, tichuan, in lawmman a tam ang," Luka 6:35._

Vanram chu i tan a ṭha tawk viau ang. Mahse vanramah chuan lawmman dawn tur a la awm cheu dawn tih i hria em?

He khawvela Isua thu i awih avanga i thlitih zawng zawngah lawmman pek i ni ang.

Pathianin i nun pumpui hi a hmu vek a. Vanah chuan i thiltih ṭhat te, i ṭawngkam ṭha te, i ngaihtuahna ṭha te, i mize ṭha leh thutlukna ṭha tak i siam te, i thilphalna leh i inpekna te avangin lawmman pek i ni ang. I hmelmate i hmangaih avang leh thil dik tih a harsat lai pawha i beidawn loh avangin lawmman i la dawng ang.

Mi dangte Isua Krista hnena i hruai thlen avangin lawmman pek i ni ang. (Vanramah nangmah avangin an kal ve dawn em?).

Kristian i nih avanga sawiselna i tuar chhuah avang leh ringtu i nih avanga tihduhdah i tuar avangin lawmman pek i ni ang. Hei vang hian Isuan heti hian a lo sawi, "Miin keimah avanga an hau che ua, an tihduhdah che ua, dawta sual tinrenga an hek hunah che u, in eng a la thawl ang. Lawm ulangin, nasa takin hlim rawh u, vanah in lawmman a awm hnem si a, chutiang bawkin in hma a zawlnei awmte pawh an tihduhdah ṭhin kha." Matthaia 5:11-12.

Pathianin engkim a hmu vek a, lawmman a la pe vek dawn che a ni.

He lawmman hian i chhandamna nen inzawmna a nei lova. Vanram i luh theihna kawng awm chhun chu Isua Krista'n i tan a lo thawh tawhsa rin mai kha a ni. I thiltih ṭhat avangin vanramah i lut ngawt thei lo. Mahse Bible chuan, vanram i thlen hunah chuan i thiltih ṭhat ang zelin lawmman pek i ni ang a ti.

Hemi chungchang hi hmun hrang hrangah a tam mai. Matthaia 10:42 chuan, "Tu pawh, heng mi tê tak zinga pakhat hnenah hian zirtir a nih avanga tui vâwt no khat chauh pawh pe apiang chuan, tihtak meuhvin ka hrilh a che u, an lawmman chu an chân tawp lo vang," a ti a. Mi tu emaw hnena tui no khat pek emaw, chaw ei tur pek emaw chu thil ho tê angin lang mah se, i tih apiang chu Pathianin, "Kha kha ka chhinchhiah a, a vaiin ka vawng ṭha vek e," a ti a ni.

I lawmman dawnna tur chu nangman i thlang thei. He khawvela i damlai hian nge i duh, nakin hun lo la thleng turah zawk? 

Isuan, "In hmelmate hmangaih ula, an ṭhatna tur ti ula, puktir rawh u, beidawng hauh lovin, tichuan, in lawmman a tam ang," a ti Luka 6:35.

He khawvela lawmman - larna te, hausakna te, hmingṭhatna te, hlawhtlinna te, nawmna te i thlan chuan kum 80 vel chauh i chên thei ang. Mahse vana lawmman i khâwl chuan chu lawmman chu chatuanin i chên thei dawn a ni.

He khawvelin a pek theih lawmman ringawtah lungawi mai suh. Pathian fa i nih angin, beisei tur ṭha leh ropui zawk tam tak i la nei a nia!

Ngaihtuah zui atan

"Isua ni se engtin nge a tih ang?" tih thu hi Kristiante zingah chuan hman rim tak angin lang mah se, vana lawmman dawn theihna tur thutlukna siam nan engtin nge a ṭangkai le?

Pathian thu i awih avanga lawmman pek a duhna chhan che hi eng vang nge ni a i rin?

Eng kawngah te nge he khawvela lawmman beiseia i thawh? Eng kawngah te nge vana lawmman beiseia i thawh ve thung?

[ *Lettu: Marova Punte* ]

Tuesday, May 26, 2026

VANRAMA I HMUH LOH TUR THIL PANGA

_Chatuan Nihna Laimu_

- Rick Warren 
- May 26, 2026
"Pathian Engkimtitheia vela thilmak inthupte chu i hrethiam thei dawn em ni? Van aia sâng leh thlan khur aia thûk a ni sia a. I hriatna a tlem si a i hrefiah zo dawn em ni, heng thilmakte hian lei leh tuifinriat tehna an pel vek si a." (Joba 11:7-9, CEV) 

Mipa naupang ka nih lai khan ṭum khat chu kan chhungkuain chawlh hmang turin Disneyland-ah kan kal a. Kawnga kan tlan lai chuan ka pain kan thlen huna a hmun awm dan tur vel chu min hrilh mawlh mawlh mai a. Mahse chumi hmun kan thlena ka luh ngei phawt loh chuan chumi hmun nawmzia chu min hrilhfiah hlei thei tlat lo. Ka lo suangtuah lawkna ang zawng zawng kha a khûm vek zawk a ni! 

Joba 11:7-9 ah chuan heti hian kan hmu, "Pathian Engkimtitheia vela thilmak inthupte chu i hrethiam thei dawn em ni? Van aia sâng leh thlan khur aia thûk a ni sia a. I hriatna a tlem si a i hrefiah zo dawn em ni, heng thilmakte hian lei leh tuifinriat tehna an pel vek si a." (CEV) 

Vanram hi sawifiah thei loh, a hmun thlen hma loh chu tumahin an hriatthiam zawh rual loh a ni. Mahse Bible hian chatuan hmun tur chungchang pawimawh tak tak sawi a nei, vanrama thil awm lo tur panga pawh a sawi. 

*Vanramah chuan natna a awm lovang.* Bible chuan heti hian a sawi, "Mitthi thawhlehna pawh hi chutiang bawk a ni. Ṭawih theia tuhin a awm a; ṭawih thei lova kaihthawhin a awm; chawimawi lohva tuhin a awm a, ropui taka kaihthawhin a awm: chak lova tuhin a awm a, thiltihtheihna neia kaihthawhin a awm."(1 Kor. 15:42-43). Vanramah chuan natna a awm tawh dawn lo, taksa thar i neih tawh dawn avangin. 

*Vanramah chuan lungngaihna a awm lovang.* Pathianin"an mit ata mittui zawng zawng a hru fai ang" (Thupuan 21:4). Pathianin a ngaihsak che avangin i mittui tla leh natna zawng zawng kha a lo chhinchhiah vek a. Mahse vanram i luh hun chuan thinlung kehchhia te, hnawl nihna te, khawharna te, tawrhnate leh rilru natnate a awm tawh lovang. 

*Vanramah chuan tawrhna a awm lovang.* Bible chuan heti hian a ti, "An riltam leh tawh lo vang a, an tuihal leh tawh hek lo vang; niin a em hek lo vang a, lum reng reng pawhin a tihrehawm hek lo vang." (Thupuan 7:16). I mamawh apiang vanramah chuan pek i ni tawh ang. 

*Vanramah chuan sualna a awm tawh lovang.* "Pathian . . . chuan hlimna nasa tak nen a awmna hmun nuamah chuan sual kai lovin a hruai ang che u" (Juda 1:24, NLT). Isua Krista khan krawsah  tuarin i sual man zawng zawng a pe, tichuan amah i tawh hunah amah anga i awm theihna tura i nungchangte siam danglama a awm theih nan. 

*Vanramah chuan thihna a awm lovang.* _"Thihna emaw, lungngaihna emaw natna emaw a awm tawh lovang. Hengte hi chatuan atan a bo tawh ang."_ (Thupuan 21:4, NLT). Kawng tam takin vanram hian ropuina nasa tak mai a nei a, mahse chung zinga ṭha ber chu Pathian nen chatuan atan in chêngdûn tur hi a ni. 

Bible chuan, _"A kim lovin kan hria a, a kim lovin thu kan hril bawk thin a ni. A famkim a lo thlen hunah erawh chuan a kim lo hi tihban a ni tawh ang . . . Tunah zawng darthlalangah kan hmu riai ruai a ni, chutih hunah erawh chuan inhmatawnin a ni tawh ang; tunah zawng a kim lovin ka hria, chutih hunah erawh chuan mi hriat kim thin ang hian ka hre kim tawh ang."_ (1 Kor. 13:9,12) 

Engtikah emaw chuan engkim a la chiang ang. Awmze nei vek a la ni ang. "Chuvang chuan hengte hi ka nuna a thlen Pathianin a phal a ni" i la ti ang. Chumi hma chu Pathianin amah i rin a duh a ni. 

Ngaihtuah zui atan. 

* Tunah khan tawrhna te, dam lohna te leh lungngaihna tam tak tuar mahla vanramah chuan Lalpan a la kiang vek tawh dawn tih min tiamna hi i tan a tawk em? Engvangin? 

* Vanram thlen hun engin nge nghahhlelhtir ber che? 

* He leia i awm chhung hian eng kawngtein nge Krista i an theih ber le? Chu chu i tih engnge a pawimawhna? 

*[Lettu: Sangpuia]*

Monday, May 25, 2026

PATHAN TEL LO CHATUAN AWMDAN

_Chatuan Nihna Laimu_

- Rick Warren
- May 25, 2026
"Chatuan nun in nei tih in hriat theih nân nangni Pathian Fapa hming ringtute hnênah hêng thu hi ka ziak a ni." 1 Johana 5:13

Hremhmun chungchâng i ngaihtuah hian i rilruah thlalak lo lang a awm ngei ang. Rawng sen leh dum te, mei alh nasa tak te, leh Diabola'n thil zawng zawng a thunun lai thlalak te a nih i ring a ni thei e.

Bible chuan hremhmun hi hrehawm tawrhna hmun angin a sawi a. Matthaia 13:42 chuan, "Rawhtuina meiah an paih ang; chutah chuan an ṭap ang a, ha an ṭhial ang" a ti a ni.

Chu hrilhfiahna chu a râpthlak hle a, mahse hremhmuna thil râpthlâk ber chu eng nge a nih i hria em? Hremhmun chu Pathian nêna inṭhen hlenna hmun a nihna hi a ni a, chu tak chu Pathian tel ve lohna hmun chu a ni.

Bible chuan 1 Johana 4:18-ah, "Hmangaihnaah hian hlauhna rêng a awm lo va, hmangaihna famkim chuan hlauhna zawng zawng a hnawt bo zâwk ṭhîn" a ti a. Hmangaihna thu ep chu hlauhna a ni. Hmangaihna tel lova nun chu thih hlau reng renga awmna hmun tihna a ni.

Pathian chu hmangaihna a ni a, chuvângin hremhmunah chuan hmangaihna a awm lo. Pathian chu êng a ni a, chuvângin hremhmun chu thim chhah tak a ni. Pathian chu a ṭha a, chuvângin hremhmunah chuan thil ṭha rêng a awm lo. Pathian chu nunna a ni a, hremhmun erawh chu chatuana thihna hmun a ni. Pathian chu khawngaihna a ni a, chuvângin hremhmunah chuan khawngaihna a awm lo.

Pathian hriatna hlimna leh a hmangaihna tel lova chatuan hmun hman dân tûr chu han ngaihtuah teh—chatuan hlimna rêng rêng awm lohna hmun tur chu.

A râpthlâk hle ang—ngaihtuah pawh a ngaihtuah ngam loh a ni. Mahse, chu chu he dam chhûng nun hian Isua hmangaih leh zui thlang lotute tân chuan thil awmze dik tak a ni si a. Bible chuan, "Tu pawh, Lalpa hmangaih lo chu ânchhe dawngin awm rawh se (Pathian nêna inṭhen hlenna—bo hlenna tûr)" a ti a ni (1 Korinth 16:22).

I dam chhûng nunah "Ka nunah hian Pathian ka duh lo" i ti a nih chuan, chatuana i awmna tûr chu Pathian tel lovin a ni ang tihna a ni. He leia i thlan apiang kha chatuana i awmna tur a ni dâwn a ni.

Mahse, chanchin ṭha a awm e! Hremhmunah lût lova vânramah i kal ngei dâwn tih hriat chian dân a awm a ni. Bible chuan i hma hun awmdân tûr hetiang hian a sawi: "Chatuan nun in nei tih in hriat theih nân nangni Pathian Fapa hming ringtute hnênah hêng thu hi ka ziak a ni" (1 Johana 5:13).

Engtik hunah pawh a thleng thut thei, thil thleng ngei ngei tûr chungchângah hian i rin kual a ngai lo. Vawiin hian i thih hunah Pathian hmaah chatuan i hmang dâwn tih i hre fiah thei a ni. Khawtlai tawh suh.

Vawiin hian i hma hun rêl fel rawh.

Ngaihtuah zui atan

*   Thihna hi engtik lai pawha thleng thei a ni tih hre reng siin, mi tam takin he thil pawimawh tak chungchânga thu tlûkna siam hi an khawtlai tîr tlat ni i hrin?

*   Vânram kal tûr khawpa mi ṭha nia in-ngai mi hnênah eng nge i sawi ang?

*   I chatuan hmun hman tûr i hriat chian dân hian i tûn nuna i nun dân hi engtin nge a tih-danglam?

*Isua i la rin lohva i la zui lo a nih chuan, engvângin nge i la nghah reng dâwn?*

I sualnate khân Pathian nêna inṭhenna a thlen che a. Pathian nêna in-rem lehna chu Pathian khawngaihna chauh a ni. Bible chuan, "Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni. Thil ṭha tih avângin a ni lo, chuti ni se miin an chhuang dah ang e" a ti si a (Ephesi 2:8-9).

I siamtu nêna in-rem i duh a nih chuan, he ṭawngṭaina hi han hmang teh:

"Lal Isu, ka sualna avânga i hnên aṭanga inṭhen hran leh ka duh tawh lo. I hnêna ka rinna ka dahlut a nih chuan, ka thiltisual zawng zawngte ngaihdam a ni ang a, ka nun chhan tûr ka zir ang a, chatuana i in vânramah min lâwm ang tih min tiam a ni. 

"Ka sualna ka puang a, ka Chhandamtu leh chatuan nunna kawng awmchhun i ni tih ka ring e. Chhandamna chu thiltih avâng ni lovin, rinna avânga khawngaihna thilpêk a ni tih i sawi hi ka ring a. Ka Lalpa atân ka nunah ka lo pawm che a. Vawiin hian ka nun zawng zawng hi i kuta enkawl tûrin ka hlân che a ni.

"Min siam dân ang chiaha nun a, keima hmasialna ni lova i rawngbâwl nâna ka nun hman ka duh a ni. Ka nun ka hlân che a, min chhandam la, i chhûngkaw zîngah min pawm ve rawh. Isua hmingin ka ṭawngṭai e. Amen."

Isua pawm tûra i ṭawngṭai a nih chuan, khawngaihin Rick@PastorRick.com-ah hian email min thawn la, i hriat tûr hmanrua Isua nêna in zin kawng i ṭan nâna ṭangkai tûrte ka lo thawn dâwn che nia.

*[Lettu: Sangpuia]*

Sunday, May 24, 2026

PATHIANIN VANRAM KAWNG A SIAM

_Chatuan Nihna Laimu_

- Rick Warren
- May 24, 2026
_"Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân."_ (Johana 3:16)

Kum eng emaw zat chhung hian mi tam tak,  sual a awm a ni tih pawm duh lotu ka tawng ve ta.  Mihringte hi kan piantirh ata fel leh mahni hmasial lo, mahni mamawh aia midangte mamawh dah hmasa zawk ṭhin niin an ngai. 

Chu'ng mite chuan chanchin tharte hi an ngaithla ve ngai lo em ni aw ka ti ṭhin! He khawvel hi inlaichinna keh chhia,  thutiam hlen lo leh sual khat a ni tih hmu turin hawi zau tam a ngai lo.  Sual hi i velah a awm - khawvel inrelbawlna aṭanga tualchhunga innghirnghona thlengin, inhuatna,  khâkna leh hlemhlêtna hmuh tur a awm reng. 

Sual leh ṭha lo a awm avangin hremhmun pawh a awm. 

Nova hun laia thil dik kha tunah pawh a la dik reng: _"Lalpa chuan leiah hian mihring sualzia chu nasa tak a ni tih leh, an rilru suangtuahzia rêng rêng chu sual hlîr a ni fo mai tih a lo hria a. Tichuan, leiah hian mihring a lo siam tâk avângin Lalpa chu a inchhîr a, rilru nat nân a hman phah ta a."_ (Gen. 6:5-6)

Pathianin khawvela thil dik lo,  thil sual tam tak a hmuh chuan a rilru a na em em a ni - a chhan chu mi zawng zawng min hmangaih a,  kan inhmangaihtawn a duh bawk a ni. 

Pathian chu dik leh thianghlim a ni a.  Mi famkim,  sual thei lo a ni.  Chuvang chuan engtik niah emaw chuan rorelin thil dik lote a la siam dik ang: _"He khawvel ro hi a la rel ang.  Khawvel chungah dikna nen ro a la rel ang a,  ramtin chungah thutakin a la rel ang"_ (Sam 96: 13,  NLT). 

Chumi hma chuan amah i hmangaih theihna turin duh thlan theihna turin Pathianin duhthlan theihna a pe che - hmangaihna chuan duhthlanna a keng tel.  Chuvang chuan a ni he khawvel hi sualin a tihchhiat.  Mahse vanramah chuan sual a awm tawh lo va.  Hmun famkim a ni tawh ang. 

Vanram chu famkimna hmun a nih chuan mi felte chauh an lut thei tihna a ni a. Mahse harsatna lian tak a awm - i fel famkim lo,  kei pawh ka ni tho.  Tumah fel famkim an awm lo!

Chatuan daih tura siam i nih a i famkim si loh chuan vanram,  famkimna hmunah i lut thei lo tihna a ni.  Anih chuan khawiah nge i kal ang? Bible chuan hremhmunah a nih thu min hrilh. 

Mahse Pathian hnenah lawmthu awm rawh se.  Vanramah a hnena i awm ve theihna turin  Fapa,  Isua Krista kaltlangin kawng a hawng si a: _"Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân. Khawvêl thiam loh chantîr tûrin Pathianin a Fa khawvêlah a tîr lo, khawvêl amah avânga an dam theihna tûrin a tîr a ni zâwk e. Tu pawh amah ring chu thiam lohvin an awm lo vang; tu pawh ring lo chu tûn apangin thiam lohvin an awm, Pathian Fapa mal neih hming an rin loh avângin."_ (Johana 3:16-18). 

Hremhmun hi a awm tak tak a,  Vanram pawh a awm. Krista thlang la,  thiam lohna channa a awm lovang.  I kutah duhthlanna a awm!

Ngaihtuah zui atan. 

Midangte hnena chanchin ṭha i tlangaupuiin engvangin nge meidil chungchang hi tlang taka kan sawi a ṭul?

"Engvangin nge meidil a awm i rin?" ti a an zawh chein engtinnge i chhan ang?

Pathian hian dikna kengkawh lo hian hmangaihna a nei theiin i ring em? Engvangin?

Pathian hnena chatuana awm i thlang dawn em?
Bible chuan heti hian a ti, _"Isu Kristaa kan rinna kan nghah ruali Pathian hmaah thiamchang kan ni. Hei hi tute tan pawha thudik a ni"_ (Rom 3:22,  NLT). Sual kalsana Isua hnena inhlan tura i inpeih chuan heti hian ṭawngṭai rawh le. 

"Lalpa, misual ka ni tih hriain i ngaihdamna ka rawn dil e. Isua hi i Fapa a ni tih ka ring a. Ka sual avanga thiin i kai tho leh a ni tih ka ring. Vawiin aṭang hian ka Lal leh Chhandamtu a pawm ka duh e. Min hruai la, i duh anga nung turin min pui ang che. Isua hmingin, Amen." 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, May 23, 2026

I CHATUAN HMUN TUR THLANG FEL THUAI RAWH

_Chatuan Nihna Laimu_

- Rick Warren 
- May 23,  2026
_"Kan inpeih tawk tak zet a ni,  he lei taksa hi chhuahsanin Lalpa kiangah kan la haw dawn a ni. "_ (2 Kor.  5:8,  NKJV)

Engvangin nge vanram i thlan ang tih i hriat theihna turin chatuan nihna dik tak kan zir mek a ni. Mahse chatuan chungchanga i hriat tur pakhat a la awm: i thih hnuah hun remchang dang i nei tawh dawn lo tih hi. 

I chatuan hmun tur i thlan a ngai.  Mahse i thih hma ngeiin,  he khawvela i la dam lai hian i thlan fel a ngai.  Let leh theih a ni tawh dawn lo! Pathianin duhthlanna dik siam turin i damchhung hun a pe che a.  Duh i thlang fel lo zel anih chuan i thih hnuah duhthlanna siam leh turin hun i nei tawh lovang. 

Bible chuan i lei taksa i chhuahsan huna thil lo thleng tur heti hian a sawi - _"Lala kiangah kan la haw ang"_ (2 Kor. 5:8,  NLT).  Vanram leh meidil inkarah chawlh handamna tur a awm lo. An inkarah hmun a awm lo va.  Hmun laihawl a awm lo. 

"Thih hnua sual tenau kan faina" (purgatory) an tih hi i hre fo tawh mai thei. Kohhran chanchinah he thu hi chhiar ṭhin nimahse Bible-in min zirtir lo thung. 

Kraws lera Isua a thih dawn lai khan a kiangah misual khenbeh a ni ve a. A hun tawpah tak tak kha misual kha Isua hnenah inpein heti hian a ti a,  _"Isu,  i ram i thlen hunah mi hre reng ang che"_ (Luka 23:42) tiin.  Chhandamna chungchanga a hriat zawng chu Isuan a chhandam thei tih kha a ni. Kohhran thurin emaw Pathian thuril emaw a hre ve hauh lo. Ṭawngkam dik zawng zawng a hre hek lo.  Isua hnenah khan "awle" a ti mai a ni. 

A rinna avang khan Isuan a hnenah, _"Vawiinah hian ka hnenah pradis-ah i awm ang"_ a ti a ni (Luka 23:43). 

Vanram thleng tura nangma lama i tih thei chu Isua hnena "awle" tih kha a ni mai. Chu chu a ni mai! Chumi hnua thutiam chu chatuana Pathian hnena cheng tura tiam i nihna kha a ni. 

Mahse Isua zui tur duhthlanna siam turin nunna pakhat chauh i nei.  Vanrama i luh theihna turin Pathian engkim a thawk.  Tunah chuan a thutiam i lo dawn chiah a ngai. 

Vawiin hian i chatuan hmun tur thlang fel turin hun remchang i nei a, nakinah ti suh!

Ngaihtuah zui atan. 

Engvangin nge tunlai mi tam tak hian ringtu ni tura duhthlanna chungchangah nakin an tih fo ṭhin?

Engtinnge Isua kianga misual an khenbeh pakhat khan beiseina a pek che?

Kar thar lo awm tur chhung hian Isua an thlan theihna turin tu hnenah nge hun a tawi tawhzia i hrilh ang?

*Isua hnenah "awle" ti turin i inpeih tawh?*

Bible chuan heti hian a ti,  _"Isua Kristaa kan rinna kan nghahin Pathian nen inremin kan lo awm.  Hei hi mi zawng zawng tana thudik a ni"_ (Rom 3:22,  NLT).  Sual kalsana Isua hnena inpe tura i inpeih chuan heti hian ṭawngṭai rawh le:

"Lalpa,  misual ka ni tih ka hria a,  i ngaihdamna ka rawn dil e.  Isua Krista hi i Fapa a ni tih ka ring a. Ka sual avangin a thi a,  nangin i kai tho leh a ni tih ka ring. Ka Chhandamtuah pawmin vawiin aṭang hian ka Lal atana zui ka duh e.  Min hruai la,  i duhzawng ti turin min pui ang che.  Isua hmingin,  Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, May 22, 2026

THUTLUKNA PAWIMAWH BER I HMAA AWM CHU

_Chatuan Nihna Laimu_

By Rick Warren
May 22, 2026
“Mihring rilruah chuan chatuan a dah bawk a.” [Thuhriltu 3:11]

Vanram leh hremhmun chu an awm tak tak. Pathian chuan a Thua nunna awmzia tak tak leh chatuan thil awmzia chu hre ngei turin a duh che.  

Thil nihna pawimawh hmasa ber chu Pathian chuan a hmangaih ni turin a siam che a, nangmah pawhin amah chu hmangaih let ve turin a duh bawk che. Thupek ropui chuan, “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni,” tiin min chah [Matthaia 22: 37]. 

Thil nihna pahnihna chu hei hi a ni: Chatuan daih tura siam i ni. Thuhriltu 3: 11 chuan, “Mihring rilruah chuan chatuan a dah bawk a,” tiin a sawi bawk. He leilung kalphungah hian i kawngte chu tluang viauin lang ṭhin mahse “Hei aia ṭha hi a awm tur a ni” tiin i ngaihtuah fo ang.  

Chu chu a ni reng a ni! Thihna piah lama i hun hman tur chu tuna i hun hman mek ai hian a la rei zawk fe dawn. Tun hun hi chu chatuan atana lo inbuatsaih lawkna mai a ni e. 

Chuvang ngei chuan hringnuna a laimu pathumna chu hei hi a ni: Pathian chuan chatuan hmun pahnih a siam a, vanram leh hremhmun an ni. 

Pathian chuan leilung a din lai aṭang daih tawh khan vanram pawh a lo buatsaih tawh. Isuan Matthaia 25: 34-ah chuan “Ka Pa voh bîkte u, lo kal ula, khawvêl siam ṭan tirh ata in tâna ram buatsaih chu chang rawh u” a ti a nih kha. Khawvel sualnain a tihchhiat rengna hmunah hian i cheng reng dawn lo. Hmun famkima la kal tur leh Pathian bula la awm tur chuan thutlukna i siam thei ang.  

Mahse hremhmun pawh chu a awm ngei bawk. Isuan a sawi chhunzawmnaah chuan, “Ânchhe dawngte u, kumkhaw mei, Diabola leh a tirhkohte tân an buatsaihah chuan mi kal bosan rawh u,” tiin a sawi [Matthaia 25: 41]. Hremhmun chu diabola leh amah zuitute tana siam a ni a, Pathian laka helte tan. Pathian laka helna thinlung putu apiangte chu an la kal ve ang. 

Hremhmun a awm ngei zia ka sawi hian midang ka sawi ṭhaihna leh tihlauh duh vang a ni lo. Hrehmun chungchang leh nihna chu chiang takin hria ula tichuan hringnun nihna zinga a palina chu in man fiah thei ang, chu chu hei hi a ni: chatuan hmun i hmanna tur chu i thlang dik thei ang. 

Deuteronomy 30: 19 chuan, “Vawiinah hian nunna nge in duh thihna, Pathian malsâwm dawn nge in duh ânchhia, a eng zâwk nge in thlan, hretuah lei leh vân ka sâwm e. Nangmahni leh in thlahte in dam zêl theih nân nunna thlang rawh u” tiin min chah.

Pathian chuan nunna chu thlang turin a duh che u, amah nen chatuan hun i hman theih nan. A Fapa, Isua Krista kaltlangin vanram chu a hawng a ni. Isuan hetiang hian min tiam, “Tu pawh a ringa, baptisma chang chu chhandam an ni ang a, tu pawh a ring lo chuan thiam loh an chang ang,” tiin [Marka 16: 16]. 
Isua ring tura thutlukna i siam a nih chuan Vanramah amah nena cheng reng tawh tura tiam i ni. Chu chu thutiam a ni!

Ngaihtuah zui atan. 

• Pathian chuan eng vangin nge amah hmangaih leh hmangaih loh chu i thutluknaah a dah? 
• Hrehmun hriat chianna chuan engtin nge Pathian hmangaihna chu a hriat chiantir che? 
• Pathian chuan engtiangin nge chatuan atan a lo buatsaih ve che? 

Pathian Thutiamah chuan i lo innghat thei ang. 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Thursday, May 21, 2026

I TUN HUN LEH NAKIN HUN TIDANGLAM THEITU THUTAK 5

_Chatuan Nihna Laimu_

By Rick Warren
May 21, 2026
“Thil hmuh theihte chu kan thlîr lo va, thil hmuh theih lohte chu kan thlîr zâwk si a. Thil hmuh theihte chu a ral mai dâwn a, thil hmuh theih lohte erawh chu chatuanin a awm ang.” [II Korinth 4:18]

Mita i hmuh theih zawng zawngte kha hun rei lote atan mai an ni. I thil hmuh theih loh zawkte chuan chatuan an la daih ang. 

Chutiang chatuan leh thlarau thilte chu thil pawimawh tak tak zawk chu an ni. 

Dik tak chuan thlarau thilte chu taksa thuhla ang thovin an tak a. Thlarau thilte zawkah chuan i ngaihtuahna i sen lehzual a ṭha ang – a chhan chu a tak tak zawk chu an ni si a. Heng thlarau thil pangate hi i hriat thiam a ngai ang: 

*Pathian chuan amah hmangaih turin a siam che* . Jeremia 31: 3 chuan, “Hmangaih tâwp lovin ka hmangaih che a, Ngilnei takin ka hruai zêl ang che,” tiin a sawi. Hmangaih tur chein Pathian chuan a siam che a, chu hmangaihna chu chhanglet turin a siam bawk che. Chu lai tak chu hringnuna a pawimawh lai chu a ni. 

*Chatuan daih tura siam i ni.* Bible chuan, “mihring rilruah chuan chatuan a dah bawk a,” tiin a sawi [Thuhriltu 3: 11]. Evangelist Billy Grahama khan hetiang hian a sawi ve bawk: Eng tik niah emaw chuan Billy Grahama chu a thi ta tiin tuten an la sawi ang. Chu thu chu lo awih miah suh ang che u a ti. Ni dang zawng zawng aiin ka nung tawh zawk ang. Ka address ka thlak mai mai tihna a ni ang. Pathian bulah ka cheng tawh zawk tihna a ni ang a ti. Pathian kiangah tunah chuan a awm ta ngei a ni. 

*Pathian chuan chatuan daih tur hmun pahnih a buatsaih a.* Vanram leh hremhmun te chu hmun tak tak zawk an ni. Thil sawifiahna tawngkam satliah an ni lo. 

*I chatuan hmun i hmanna tur chu i thlan a ngai.* Vanram emaw hremhmun emawah chuan i awm palh dawn lo. I duhthlannain a hruaina hmunah che ngei chuan i la awm ang. Isua chu i lal atana i pawm a nih chuan vanramah chatuanin hun i hmang ang a. I hnawl a nih thung chuan hremhmunah chatuanin i awm tawh ang. Duhthlan tur pahnih a awm. 

*Vawi hnih duhthlanna hun ṭha i nei dawn lo.* I duhthlanna chuan hun bithliah a nei a. I damchhung hun zawng zawngte chu i chatuan hun hmanna tur siamna atan a awm a, mahse chu thutlukna chu i thih hun chuan i nei tawh lo vang. 

Heng thutak pangate hian i chatuan hun an khawih phak a, chatuan huna i awmna tur an la hril dawn a ni. 

Khawvela kan awm chhunga kan nun hi sawi lawk theih a ni lo, Isua chu i la thlang lo a nih chuan, vawiin hian thlang mai rawh. Isua tana i nun i hlan tawh a nih thung chuan he thu hmang hian ṭawngṭai ang che: 

“Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

Ngaihtuah zui atan. 

• Thil hmuh theih loh lam en chu eng vangin nge a pawimawh? 
• Thlarau thil hmuh theih loh eng emaw Pathianin ngaihven tura a duh che chu eng nge ni? 
• Pathian chuan Isua zui turin i dam chhung hun zawng zawng engah nge a pek che a, eng vangin nge i thih hnuah chuan chu hun tha chu pek i nih tawh loh ang? 

*[Lettu:* Peka]

Wednesday, May 20, 2026

I KHAWL KHAWMNA HLAWK BER TUR CHU

_Hlim Reng Theihna Dan_

- Rick Warren
- May 20, 2026
"Thilpek chu zawng ka ni lova, rah nangmahni lama pung tur chu zawng ka ni zawk e," Philippi 4:17.

Mi dangte tana i thilphal hian i chenna tur chatuan atan i khâwl a ni.

He thil hi Isuan "vana ro khâwl khâwm" a ti. Bible-ah pawh vawi 6 lai a sawi a! Isuan thil pakhat vawi 6 a sawi nawn chuan ngaihsak ngei ngei rawh. I ngaihsak loh chuan malsawmna i hmuh tur ang i hmu lovang. 

Matthaia 6:19-20-ah Isuan, "Leia sulrul leh tuiekin a ei chhiatnaah, rukruten an reh pawha an ruknaah hian in tan rote khawl khawm suh u. Vanah, sulrul leh tuiekin a ei chhiat lohnaah, rukruten en reh pawha an ruk hek lohnaah chuan in tan rote khawl khawm zawk rawh u," a ti. 

Mi tam ber chu he khawvelah hian kum 100 pawh an dam tling lova. I thih hnuah lei ro thil hlute hi engmah i chhawm dawn lo. Mahse vana ro i khawl erawh chu chatuanin i la chên dawn a ni.

Chuti a nih chuan, vanah engtin nge ro i khâwl ang a? Engtin nge a hma lama i lo thawn lawk theih ang? A tih dan ṭha ber chu mihringa khâwl/peipun hi a ni. Chhandamna thawh chhuah lam ka sawi lo a nia, chu chu Isuan a tifel vek tawh a ni.

Pathian chuan mihringa khâwl turin a duh che a ni, a chhan chu chatuan thlenga nghawng leh lawmman a neih dawn vang a ni. Thil pahnih chiah chatuan daih tur a awm a, chu chu Pathian Thu leh mihringte a ni. Mihring chu vanramah emaw, hremhmunah emaw chatuanin an awm dawn a, mi pakhata i inpeka khan danglamna lian tak a thlen thei a ni.

Philippi 4:17 chuan, "Thilpek chu zawng ka ni lova, rah nangmahni lama pung tur chu zawng ka ni zawk e," a ti.

Paulan Philippi kohhran hnena lehkha a thawn a, an ṭanpuinaah lawmthu a sawi a. mahse a lawmna ber leh a hlimna ber chu - an inpekna leh an thilphalna chuan vanah ro a khawl khawmsak tih hriatna hi a ni. Paula hmangin an khawl/peipung a, mahse anmahni chenna tur in atan an peipung bawk a ni.

I thilpek apiangin lawmman i dawng ang. I hun i pe em? Vanah lawmman i dawng ang. I tha i sêng em? Vanah lawmman i dawng ang. I sum i pe em? Vanah lawmman i dawng ang.

I bul velah mi dangte tana ṭhat chhuahna tur leh chatuan in atana khawl/peipunna tur remchang a tam lutuk. Hmaih miah suh!

Ngaihtuah zui atan

Mihringte tana i peipun theih nan i hun, i tha leh i sum te chu eng angin nge i hman?

I tan eng hi nge pek chhuah harsa ber - i hun, i tha, nge i sum?  I harsat berna lai takah khan phal taka pe thei turin Pathian hnenah rinna dil rawh, tichuan malsawmna i dawng ang.

He leia ro khawl aia vana ro khawl chu nunphunga i neih theih nan eng tin nge i chîn chhoh ang?

[ *Lettu: Marova Punte* ]

Tuesday, May 19, 2026

MANGANG SUH; ṬAWNGṬAI ZAWK RAWH!

_Hlim Reng Theihna Dan_

— Rick Warren 
— May 19, 2026
“Ama Fapa ngei pawh zuah lova, kan zaa aia petu chuan thil zawng zawng pawh a thlawnin min pe tel lo vang em ni?” Rom 8:32.

Naupang ka nih laia ka mamawh apiang chu ka pa ka hrilh ṭhin a. A chang chuan ka thil mamawh chu man to deuh a nih chang a awm ṭhin, nimahsela ka duhzawng apiang lei nan chuan ka pa’n khawi aṭangin nge pawisa a neih ang tih chu ka manganpui ngai reng reng lo thung. Chu chu ka hna a ni lo! Ka pa ngaihtuah tur a ni ve tawh thung a ni. Naupang ka nihna anga mawl taka dil tawp mai chu ka hna a ni.

Chutiang bawkin Pathianin engtin nge a pek dawn che tih chu i ngaihtuah tur a ni lova. Dil mai chu i hna a ni. 

Dil hmaa i mangan chuan, Pathian awm ring lo ang mai i ni, van Pathian kan nei tih ring lo ang mai i ni ang. Mangan chu Pathian awm rin lohna a taka lantirna – Pathian a awmlo emaw rintlak a ni lo tih lantir hi a ni.

Bible-ah chiang takin kan hmu: Engkimah ṭawngṭaia dil turin Pathianin min duh. Jakoba 4:2 ah chuan, “In dil loh avangin in nei lo va” a ti.

Mangang mai lovin – dil zawk ang che. Mangan ai chuan engkimah ṭawngṭai ang che.

Philippi 4:6 ah chuan, “Engah mah mangang suh u; engkimah ṭawngṭai leh dilin, lawmthu hril tel zelin, in duhnate chu Pathian hnenah hriattirin awm zawk rawh se” a ti.

I man thiam em? Pathian chuan eng dinhmunah pawh a hnen pan turin a duh che a ni. Thil te leh lian pawh nise, eng thil pawh a hnen thlen zel ang che.

Rom 8:32 a kan hmuh angin, “Ama Fapa ngei pawh zuah lova, kan zaa aia petu chuan thil zawng zawng pawh a thlawnin min pe tel lo vang em ni?” 

Pathian chuan i harsatna lian ber sualna pawh a chinfelsak che a, thil dang phei chu tehkhin tham a ni lo.

Pathianin a hmangaih em che avanga i sualna avanga i aia thi tura Isua a rawn tir a nih chuan, i sum leh pai chungchanga ṭanpui tur che pawhin a hmangaih tawk che a ni tih i ring lovem ni? I hriselnaah pawh ṭanpui tur chein a hmangaih che tih i ring lovem ni? Inlaichinnaah te pawh? Eizawnna thlan chungchang te pawh? Hun tiam chhunga i tih tur thlengin?

I nun kawng engkimah khan Pathian a inrawlh a. Dik tak chuan i mamawh chu a hre daih tawh a – mahse i dil hun a lo nghak ve a ni.

I thawpiknate tih zangkhai deuh i duh em? I mamawh te nena amah pan turin Pathianin a duh che. Engahmah mangang lo turin rilru siam la – engkimah ṭawngṭai zawk ang che.

Ngaihtuah zui atan

* Pathianin i mamawh zawng zawng a hria a nih chuan, engvangin nge Pathianin chung i mamawh te chu dil turin a tih che i rin?

* I mamawh Pathian i dilna tur chu engin nge dal che?

* Pathianin i ṭawngṭai a chhanna chiang takte kha han ngaihtuah la. Chung avang chuan i mamawh dang pawh dil zel turin engtin nge phurna a pek che?

*Pathian thilpek chhandamna hi i pawm thei em?*

Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi 2:8-9. 

I sualna te i puang duh a niha, i nunah Isua i thlang duh a nih chuan, heti hian ṭawngṭai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i ṭawngṭai a nih chuan, Rick@PastorRick.com ah hian e-mail min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Monday, May 18, 2026

LUNGKHAM LUAT A SAWT LOHNA CHHAN PALI

_Hlim Reng Theihna Dan_

* Rick Warren
* May 18, 2026
"Engahmah mangang suh u." — Philippi 4:6

Hna kan thawh avangin zânah kan muttui loh phah ngai lo, lungkhamna erawh chuan min ti mutui lo ṭhin a ni. Bible-ah hian Pathianin kan nuna lungkhamnain hmun a neih dânhah kaihhruaina fiah tak min pe a. Philippi 4:6-ah chuan, "Engah mah mangang suh u," tiin min hrilh a ni.

Engtinnge i lungkhamnate chu i theihnghilh theih ang?

*Lungkham hi thil sawtna awmlo a ni:*
Lungkham hi a sâwt loh chhan hrang hrang a awm a. A hmasa berah chuan, lungkhamna hian harsatna min siam zawk ṭhin. Mi tuemawin i chanchin chhia an sawi a, chu chu i ngaihtuah vung vung a nih chuan, a hma aiin a lian zâwkin i hre dâwn a ni. A pahnihnaah chuan, lungkham hian engmah a tidam lo. Thil i thlâk danglam theih loh tûr lungkham hi a sâwt lova; tin, thil i thlâk danglam theih tûr lungkham lek phei chu hun khawhralna mai a ni. I thlâk danglam thei a nih chuan kal la siamṭha nghal mai rawh!

*Lungkham hi mihring pianpui a ni lo:*
Lungkham tûrin tumah hi an lo piang ngai lo. Ka pianpui a ni i ti a nih pawhin a ni lo. Lungkham hi i zir chawp a ni zâwk. Lungkham hi mihring pianpui a nih loh avângin hriselna atân pawh a ṭha lo hle a ni. Kan taksa hi lungkhamna dawl zo tûra siam a ni lo. Miin lungkham vângin ka dam lo an tih ṭhin hi thudik a ni. Doctor-te sawi dân chuan, mi tam tak hi an hriselna tichhetu inthiamlohna', 'lungnihlohna, leh lungkhamna hi an thlah thei a nih chuan damdawi in aṭang hian an chhuak thei nghal ang. Thufingte 14:30 chuan, "Thlamuanna hian taksa a tihrisêl a," tiin a sawi a ni.

*Lungkham hian ṭangkaina a nei lo:*
Lungkhamna hian kan hun kal tawh a thlâk thei lova, kan hma lam hûn pawh a thunun thei lo. Vawiin nî min tihrehawm sak zâwk chauh a ni. Lungkhamna chuan nangmah chauh hi a thlâk danglam che a ni, chuvang chuan hlimna reng nei lovin i awm phah kha! Eng harsatna mah a la chinfel sak thei lo che.

*Lungkham a ngai lo:*
Pathianin a siam che a, amah ngeiin a chhandam che a, i chhûngah a Thlarau a dahlut bawk a ni. Chutiang khawpa ngaihsaktu che chuan i mamawh zawng zawng a ngaihtuah dâwn lo che em ni? Lungkham a ngai lo a ni.

I hringnuna lungkhamna  hi hneh i duh em? A hmasaberah chuan engmah lungkham nei lo tura thutlukna siam hi a ni. Engvângin nge? Lungkham hi a sawt lo va, mihring pianpui a ni lova, ṭangkaina a nei lova, tin, lunghkham a ngai miah lo bawk a ni.

Bible chuan, "In manganna zawng zawng ama chungah nghat vek rawh u; a ngaihtuah êm êm che u a ni," a ti (1 Petera 5:7). Pathian hian a mimal takin a ngaihtuah che a, i mamawh a hria a ni. Chuvângin i manganna, i rilru hahna, leh i lungkhamnate kha engtin nge i tih ang? Thlah rawh. Pathian hnênah hlân tawp rawh.

Ngaihtuah zui atan

*  Pathiana rinna i nghahna ang zelin i rilru hahna leh i lungkham thilte pawh a lo awm ṭhin em? 

* Tunah hian eng nge i lungkham mek? Chu i lungkham chu thlak danglam emaw thlah emaw turin eng nge tih theih i neih?

* I manganna leh i lungkham zawng zawngte hi Pathian chunga nghat turin (1 Petera 5:7) a taka tih theih eng nge i neih?

*[Lettu: Sangpuia]*

Sunday, May 17, 2026

HLIMNA NUN NEITUTEN ENG ZAWHNA NGE AN NEIH?

_Hlim Reng Theihna Dan_

- Rick Warren
- May 17, 2026
_"Hmu tawh reng inti ka ni lo va, famkim tawh reng inti pawh ka ni hek lo; 'Krista mi man chhan chu ka man thei dah law maw,' tiin, a ûmin ka ûm zâwk a ni. Unaute u, manah ka inngai lo."_ (Philippi 3:12-13)

Mi inngaitlawm apiangte an hlim ṭhin. Engvangin maw? Ṭhan leh zir an ṭhulh ngai loh avangin. 

The Message chuan heti hian a letling,  _"Rinnaah in ding nghet em tih infiah ula . . . Mahni inenfiah fo rawh u"_ (2 Kor.  13:5)

Mahni i inenfiah fo ṭhin em? Heti hian tichhin teh: Zing i thawh ve leh heti hian Pathian hnenah zawt ṭhin la, "Vawiin hian engnge ka tih ang?" tiin. Hei hi tlawmna nun nen chauha tih theih a ni a, mahse i tih fo chuan hlimna nun a thlen ṭhin. 

Paula khan tlawm taka ṭhan len leh zir pawimawhzia kha a hre chiang hle. Philippi 3:12-13ah chuan heti hian a ti, _"Hmu tawh reng inti ka ni lo va, famkim tawh reng inti pawh ka ni hek lo; 'Krista mi man chhan chu ka man thei dah law maw,' tiin, a ûmin ka ûm zâwk a ni. Unaute u, manah ka inngai lo."_  

He thu hi Paulan a hun hnuhnung lam,  kum lamah pawh a upat ve deuh tawhah,  Rome khawpuia tan ina a tan laia a ziah a ni. A hun tawp lam a ni a. Mihring lama thlir pawhin mi puitling tak a ni tawh. Mahse a tum ram a la thlen loh thu a sawi. Miin "Thlarau lamah ka tum ka hlen ta e" ti dawn ta se Thuthlung Thar bu tam tak ziaktu aia sawi thei tur hi an awm chuang lo. Mahse Paula chuan,  "Krista mi man chhan chu ka man thei dah law maw tiin a umin ka um zawk a ni" a la ti fan! 

Chapona hi ringtute tana thang,  Paula nun entawn thei lo tur leh Isuaa ṭhang lian thei lo tura min siamtu a ni.  Engvangin? A chhan chu, puitlin tawh leh ti tawh ni a i inhriat chuan thlarau nuna ṭhang lian turin ke pen a harsa ṭhin a ni. Kawng lehlamah chuan tlawmna hian zirtir theih mihringa min siam avangin hlimna a thlen ṭhin. 

Hlimna leh tlawmna nun hi a kalkawp tlat,  a chhan chu heng zawhnate hi i inzawt,  "Engtin nge kawppui ṭha zawk ka nih theih ang? Engtinnge ṭhian ṭha zawk ka nih theih ang? Engtinnge hotu ṭha zawk ka nih theih ang? Engtinnge Isua zuitu ṭha zawk ka nih theih ang?" Heng zawhnate hi i zawh loh chuan thil pawimawh tak i kalkan tihna a ni,  i ṭhan tawh loh avangin- ṭhantirtu che chu Pathian a ni si a. 

Sam 139:23-24 hmang hian hlimna kawng i zawh theih nan tlawmna nen ṭawngṭai rawh: _"Aw Pathian, ngun takin mi en chhuak la, ka thinlung hi hria ang che; Mi fiah la, ka ngaihtuahnate hi hria ang che; Tin, keimahah hian suahsualna kawng rêng rêng a awm nge awm lo en la, Chatuan kawngah chuan mi hruai ang che."_

Ngaihtuah zui atan. 

Tunge i hmelhriatteah hlimna nun tak nei ni a i hriat? Engtinnge tlawmna an nunpui?

Kum kal taah khan engtinnge thlarau nunah i ṭhan len? I ṭhang lian a ni tih engtinnge midangten an hriat ang?

Thlarau nuna i ṭhan len nan engvangin nge i ṭhiante thlawpna i mamawh?

[Lettu: Mapuia Fanai]

Saturday, May 16, 2026

I BUAI EM AVANGIN PATHIAN I HRE CHANG LO FO ṬHIN EM?

_ Hlim Reng Theihna Dan_

- Rick Warren 
- May 16,  2026
_"Isua hriat chian ka duh a, thihna ata kai thotu thiltihtheihna nasa tak mai chu temchhin ka chak a ni.  Amah anga tawrh ve a,  a thihna ṭawmpui ka duh a ni. "_ (Philippi 3:10,  NLT)

Nitin Pathian hriat chian leh zual tuma kan beinaah hian hlimna kan tawng ṭhin. 

Paula chuan Philippi 3:10-ah heti hian a sawi, _"Isua hriat chian ka duh a, thihna ata kai thotu thiltihtheihna nasa tak mai chu temchhin ka chak a ni.  Amah anga tawrh ve a,  a thihna ṭawmpui ka duh a ni. "_ (NLT)
 
Lehlin dangah chuan Paula kha Pathian nen "an inhmelhriat ṭha hle" tiin kan hmu bawk,  a chhan chu amah hrechiang tura hun a inpek avangin. Midang hriat tih leh hriat chian tih inan lohna a hrechiang hle a- Paula khan Krista hriat chian kha a duh em a ni. 

Pathian nena in inhriatna ṭha tak mai kha tih palh thil thua thleng a ni lo.  I mu i harha Isua nen inzawmna thuk tak in lo ni a ni ngawt lo. Paula chuan tumna nen chauha thleng a ni a ti.  I hun i sen a ngai a.  I thinlung i pek a ngai.  I theihna leh i neihte i sen a ngai. Pathian hrechiang tur chuan i neih ṭha ber ber i sen a ngai. 

Thang pakhat,  Pathian i hriat chian leh zualna dal theitu chu buaina hi a ni.  Kan buai viauna hian inlaichinna a tichhe thei ang hian Pathian nena in inlaichinna pawh a tichhe thei. 

Sam 46:10-ah chuan heti hian kan hmu,  _"Ngawi ula,  Pathian ka ni tih hre rawh u."_ 

Pathian nena in inlaichinna ṭhan lentir tur chuan a tan hun i pek a ngawi renga i nghah a ngai.  Nitin rilru sawrbing nana hun rei lote i hman khan danglamna nasa tak a thlen thei.  Nitin darkar khat i ṭawngṭai ziah tur ka tihna a ni lo.  Zingah Bible chhiar leh ṭawngṭai nan minute 10 emaw 15 emaw hmangin bul i ṭan thei. 

A pawimawh ber chu chin ṭhana neih a,  Pathian hrechiang tura hun i inpek kha a ni.  Chutiang chauh chuan Paula ang khan Pathian ropuizia hriain i hrechiang zual zel ang. 

Heti hian nitin ṭawngṭai ṭhin rawh: "Lalpa,  vawiin hian engmah dang ka tih loh chuan hriat chian leh zual che ka duh a,  hmangaih leh zual che ka duh a ni." Hetianga i ṭawngṭaia i nunpui chuan i nunah hlimna nasa zawk i tawng ngei ang. 

Ngaihtuah zui atan. 

Nitin minute 15 vel hun i hman ziahna kha eng thil nge? Engvanga ti nge i nih,  a pawimawh vang nge chin ṭhana i neih vang?

Pathian nena hun i hman theih lohna tura daltu,  buai taka siamtu che kha engnge?

Pathian nen hun tam zawk i hman theih nan engtinnge i hun hman dan i her rem ang?
[Lettu: Mapuia Fanai]

Friday, May 15, 2026

PATHIAN KHAWNGAIHNAA ROPUI THLANG RAWH

_Hlim Reng Theihna Dan_

By Rick Warren
May 15, 2026
“Mahni felna (Dâna felna chu) nei lovin, Krista rin avânga felna (rin avânga Pathian laka felna chu) nei zâwkin, amaha awm ka lo nih theihna tûrin.” [Philippi 3:9]

Pathian hmangaihna chu phu lehzual turin engmah i tih belh thei tawh chuang lo a ni tih hriatna chu khawvela thil thawven thlak ber a ni hial awm e – chu chu hlimna kipui ber a ni bawk. 

Bible chuan, “Keini, Pathian Thlarau zâra Pathian bia leh, Krista Isua chhuang leh, tisa chunga rinna rêng nghat lotute hi serhtanho kan ni zâwk si a,” tiin a sawi [Philipi 3:3]

Pathian hmangaihna chu i thawh chhuah a ngai a ni tih i ngaihtuahna a awm rual chuan chu chu dan thlirna a ni tih hre nawn ang che, chu chuan i hlimna a chhuhsak palh ang che. 

Dan ngaihtuahna chuan engtin nge Isua hnathawh tawhte ring lovin Pathian chu i thiltih hmang chuan i rin theih ang tih a ngaihtuahtir che a ni. I hlutna chu thil tih eng emaw hmanga lantir turin a ti che a, chu chuan Pathian khawngaihna hmuna chawl thei lo turin a tibuai che.  

Paula kha Pathian khawngaihnaah a chawl thiam ṭhin. Philipi 3:9 ah chuan hetiang hian a sawi, “Mahni felna (Dâna felna chu) nei lovin, Krista rin avânga felna (rin avânga Pathian laka felna chu) nei zâwkin, amaha awm ka lo nih theihna turin,” tiin. Chu thu chu a awmzia sawifiah theih dan chu hei hi a ni: i thawk chhuak thei lo. i thiltih kha a ni lo; a ngaihdamna thuhla a ni. 

Dan thlirna mit chu i lo vuah ve palh thei em? Dan thlirna mit i hman ve chang chuan midang fel lohna lai chu i hmu zung zung ṭhin. Nangmah kha i nihna ang anga pawmtu leh hmangaihna dawngtu anga inngaihna i nei lo a nih chuan midang lakah thikthu a chhe hma bik. Nangmah kha engthawl taka i nun loh chuan midangte chu eng vangin nge engthawl taka an khawsak i phal teh ngawt bik ang? 

A lehlamah chuan khawngaihnaah chuan i nung tih engtin nge i hriat theih ang? Khawngaihnaah i awm a nih chuan midangte lakah khawngaihna i lantir ang. Midang ngaihdam i awlsam ang a, Pathian ngaihdamna chu nangmahah a chian thar zel avang chuan. Vanram kalkawng chu thawhchhuah chi a ni loh avang chuan i engthawl phian zawk thei. 

Tuktin Pathian khawngaihna chu inhrilh nawnin he ṭawngṭaina thu hmang hian Pathian pawl ang che, “Lalpa, vawiin hian i ngaihdamna famkim ka chan avangin lawmthu ka hrilh a che. Min hmangaihna hi thuk zawka chang turin engmah tih theih ka nei lo. Ka thiltih avang hian min hmangaih nep sawt ngai lovang tih pawh ka hria e!” tiin. 

Khawngaihna i nunpui deuh deuh ang zelin lawmna pawh i lo nei tam deuh deuh ang. 

Ngaihtuah zui atan. 

I nunah khan Isua ring turin i lo inpeih tawh em? 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Thursday, May 14, 2026

ENG NGE LAWMTHU SAWINA TAWNGTAIIN A TIH?

_Hlim Reng Theihna Dan_

By Rick Warren
May 14, 2026
“Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan, Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u.” [Philippi 4:6-7]

Philipi 4: 6-7 ah chuan Bible pumpuia thuchah har ber pakhat chu kan hmu thei a ni: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan, Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u” tih chu. 

I nunna thuhlaah chuan lungkham nei lova khawsak a harsa fo vang, a bik takin thil hlauhawm i hmachhawn changin, mahse Pathianin a tih dan a hria. Engkimah ṭawngṭaia dilin Pathian hnenah lawmthu hrilh turin a duh che. Lawmthu sawi ṭawngṭaina chuan remna a thlen thei. Pathian chuan i mangan apiangin i ṭawngṭai tur a ni tiin a sawi.  

Nu leh pate chuan lawmthu sawi ṭawngṭaina thiltihtheihna chu an hre thiam ang. Nu leh pa tam berte chuan fanu fapa thil tihsak an nih changa lawmthu sawi ngai lo chu an lawm hauh lo vang. 

Chutiang chiah chuan Pathian chuan a hmu a ni. Ani chuan i mamawh leh duhzawngte dil turin a beisei che. Thuthlung Tharah hian vawi 20 chuang “dil rawh u” tih a sawi a. Mahse lawm chunga dil turin a ti che. 

Bible chuan i thil dil chu chiang taka sawi tur leh lawmthu sawina nena kalkawptir turin a nawr che. “Engkim avangin kan lawm e” ti mai lovin Pathian chuan engtiang taka lawm nge i nih sawi turin a duh che. 

Ka nupui hnena “I chungah ka lawm hle a ni” ka tih chang chuan a chhan sawi chiang turin min ti ṭhin. Amah ka ngainat chhan leh a chunga ka lawm chhan bik sawi turin min ti ṭhin. Pathian pawhin a duh. Tichuan i ṭawngṭai chang chuan Pathian chuan eng vangin nge a chungah i lawm tih chiang taka sawi turin a duh che.  

Rinna thuk zawk lehzual tarlanna chu Pathian lawmthu lo hrilh lawk chu a ni. A tak taka a thlen hmaa Pathian hnena lawmthu lo hrilh lawk theihna rinna chuan thilmak a kai chhuak nge nge ṭhin.  

I lawm deuh deuh ang zelin i nuna Pathian hnathawh chu i hmu chiang deuh deuh thei ang. Bible chuan Pathian chu a mite faknaah chuan a cheng ṭhin a ni tiin a sawi a. I lawmthu sawina chu i nuna Pathian thiltihtheihna atan a hmang a ni. 

Tichuan, Pathian hnena lawmthu sawina atan i hun neih mek hi hmang ang che. Hma lam pan zel la, a tahtawl te tein, Pathian hnena lawmthu sawi chu zir la, a hnathawh tawhte thlir la, i beisei angte chu a tihsak ang che. 

Ngaihtuah zui atan. 

• Engtin nge thinlung lawmna chuan Isua lam a hnaihtir chein i nungchang a siamṭhatsak che? 
• I lawmna leh ṭawngṭainate chu ziah chhuah i lo tum ve tawh em? Chu chuan engnge a tihdanglam theih ang? 
• I hmalam hun atan Pathian chuan mal a sawm theih dan tur che chu engnge ni? Chungte avang chuan a taka a lo thlen hma hauh chuan lawmthu hrilh rawh. 

[ *Lettu:* Peka]

Wednesday, May 13, 2026

PATHIAN DUH ZAWNG CHU HEI HI A NI: LAWMTHU SAWI RAWH

_Hlim Reng Theihna Dan_

- Rick Warren
- May 13, 2026
_"Engkimah lawmthu hril rawh u, chu chu nangmahni lam thuah Krista Isuaah chuan Pathian duh zawng a ni si a, I Thessalonika 5:18._

Khawvel hmun tam takah lawmthu sawi nan ni bik emaw, hun bik emaw an siam ṭhin. Mahse Pathian chuan kum khat chhunga ni khat lek ni lovin, ni tina tumna tak tak nena lawmthu sawi ṭhin turin a duh che a ni. He thlarau lam thil hi chîn ṭhana nei turin a duh che a, hei hi Isua zuitu rinawm tak takte nunah chuan a lang chhuak ṭhin. Isua i hnaih zawh poh leh Pathian hmangaihna i hrechiang telh telh ang a, i lâwmna a pung zual sauh dawn a ni.

Nasa taka lâwm tih chu eng nge a awmzia?

Bible chuan I Thessalonika 5:18-ah chuan,  "Engkimah lawmthu hril rawh u, chu chu nangmahni lam thuah Krista Isuaah chuan Pathian duh zawng a ni si a," a ti. Kawng engkimah lawmthu sawi rawh - chu chu lâwmna nasa tak a ni.

Harsatna i tawh laiin engtin nge lawmthu i sawi theih ang? Thil engkimah Pathian hnenah lawmthu i sawi theih chhan chu amah Pathianin engkim a thunun vek vang a ni. Sualna aṭang pawhin thil ṭha a chhuahtir thei a. I thil tihsual lian ber berte pawh a ṭha lam zawngin a her danglam thei a ni. Eng pawh lo thleng se, Pathian chuan a hmangaihna che chu a thlauthla dawn chuang lo a ni.

I dinhmun a chhiat em em lai pawh khan lawmthu sawina tur thil za chuang i hmu thei a ni.

Nasa taka lawmthu sawi - kawng engkima lawmthu sawi hi Pathian duh zawng a nih chhan chu inlaichinna a siam vang a ni. Chu chu eng nge a awmzia? Lawmthu sawi hian nangmah leh mi dangte inkâr leh nangmah leh Pathian inkârah inlaichînna thûk zawk a siam a ni.

Mi tu emaw hnaih lehzual i duh chuan chumi hnenah chuan lawmthu sawi ṭan rawh. I nupui/pasal nen in inkâr a hla riauin i hria a ni mai thei. In inneih tirh lama in inhmangaihna meipui kha a mit tawh a, in inngaihzawn tirha in tih ṭhin - in inhmangaihnazia inlantirna te kha in tih tawh loh vang a ni. Tunah chuan in inpawm danah 'a awm ve tur reng alawm' in ti tawh a. Inngaihzawn laia in tih ṭhin kha ti ṭan leh la: Lawmthu hrilh rawh. Khawngaihna leh fuihna thu tlemte ziak la. Chhûn laiah pawh bia la, 'ka lawm e' tih hrilh ṭhin rawh.

I ṭhianteho nen inpawh lehzual i duh em? Pun khawmna hmun chauh pan suh. Kâr laihawlah i ṭhiante  chu bia la. 'I chungah ka lawm e, a chhan chu hei hi a ni,' ti rawh. I ṭhiante chunga i lâwm zawh poh leh, in inpawh lehzual ang a, nang pawh lawmthu sawi nachang hriatnaah i ṭhanglian lehzual dawn a ni.

_"Lawmthu sawi chungin a kawngkharah chuan lut ula, fak chungin a biak in hung chhung kawtlaiah chuan lut rawh u, a hnenah lawmthu sawi ula, a hming chu fak rawh u," (Sam 100:4-5)._

Ngaihtuah zui atan.

Tunah hian eng dinhmunah nge lawmthu sawi i harsat ber? Chu i dinhmunah chuan lawmthu sawina tur thil pakhat tal han sawi teh.

I nupui/pasal, i ṭhian emaw hnenah lawmthu sawina tur awlsam tak eng nge awm?

Lawmthu sawina rilru i neih belh zel hian nangmah leh mi dangte nena in inlaichinnaah eng nge danglamna i hmuh?

[ *Lettu: Marova Punte* ]

Tuesday, May 12, 2026

MIDANG THAWHPUI DAN KAWNG HNIH

_Hlim Reng Theihna Dan_

Rick Warren
May 12, 2026
“Unaute u, in zain thu thuhmun in sawi a, in zinga inṭhenna reng a awmlohna turin, rilru hmunkhat leh ngaihtuahna hmunkhata fel taka in inzawm tlat zawkna turin kan Lalpa Isua Krista hmingin ka ngen a che u.” 1 Korinth 1:10

Hlimna te hi vanneih vang mai a ni lo. A zira zir chi a ni. Hlim taka nun hmang tur chuan midangte nena thawhho dan thiam i zir a ngai a ni.

Kei chuan midangte thawhhopui zirna tiin ka sawi ṭhin. Hei hi zir thiam ngai tak, sikul lama an zirtir si loh, amaherawhchu zir thiam erawh chuan, hringnuna hlimna nasa zawk min pe theitu a ni. 

Midangte nena thawhho dan thiam turin engnge i zir ngai le?

*Pakhatnaah chuan, midang thawhpui zir rawh*

Philippi kohhran chuan Rom tanina tang mek Paula pui turin Epaphrodita an tir a nih kha. “Nimahsela Epaphrodita, ka unaupa, ka hnathawhpui, ka sipaipui leh in tirhkoh, ka thil tlakchhamna mi chhawmdawltu hi in hnena rawn tirh ṭulin ka hria.” Philippi 2:25

Paulan Epaphrodita chu a unaupa, hnathawhpui leh sipaipui angin a sawi a. An thawhhona ṭhatzia kawng thum laiin a tarlang a ni. Hringnun hmanhona hi chhungkua, inpawlhona leh ralbeihna a ni. Epaphrodita pawh member pakhat a ni. He khawvel aṭangin a ralbang lova, mahnia beih mai a duh hek lo a ni.

Ringtute kan nih angin, Setana beihna kawngah kan thawkho a, chuvang chuan kan nihna chu a lo inanglo pawh a ni thei e - midang kan thawhpui a ngai a ni. Midang thawhpui dan zirna ṭha ber chu biak in hi a ni.

*Pahnihnaah chuan, midang ngaihtuah mi nih zir rawh*

Paulan Philppi 2:26 ah Epaphrodita chungchang a sawi leh a, “Ani chuan in zain a ngai em em si che u a, a na tih in lo hriat avangin nasa takin a lungngai bawk.”

Paula chu midang ngaihtuah mi a nihzia kawng hnihin a rawn tarlang leh ta: Paulan a hnathawhpui a damloh avangin a ngaihtuaha, Philippi kohhran ten a damlo a ni tih an hriat avangin Epaphrodita chu a lungngai bawk tih kan hmu a ni.

Midangte mamawh, hlauhna leh buainate ngaihtuah i zir a nih chuan, mi hlim thei tak ila ni ang. Entirnan, i kawppui chu i ngaihtuah hle a nih chuan, inneihna hlimawm tak in hmang zel ang. Amaherawhchu i ṭawngkam leh cheziaah i fimkhurlo a nih chuan inneihna hrehawm tak in hmang ang.

Bible chuan, “Unaute u, in zain thu thuhmun in sawi a, in zinga inṭhenna reng a awm lohna turin, rilru hmunkhat leh ngaihtuahna hmunkhata fel taka in inzawm tlat zawkna turin kan Lalpa Isua Krista hmingin ka ngen a che u” a ti. 1 Korinth 1:10

“Rilru hmunkhata nun” han tih hian hnathawh a hril nghal tlat a ni. Huana thlai rah tir tur chuan hnathawh a thlai chin a ngai ang hi a ni, chu chuan rah duhawm tak hlimna leh inlaichinna ṭha zawk a siam a ni.

Ngaihtuah zui atan

* I rawngbawlpui leh rawng i bawlsak mek kohhrante zingah engvangin nge a chang chuan thawhpui an harsat em em?

* I thawhpui zingah te emaw i rawngbawlnaah emaw thawhhohna ṭha zawk leh inngaihtuahtawnna in neih lehzual theihna turin eng thil thar nge i hman ang?

* In chhungkuaah emaw i ṭhian hnaite zingah emaw thawhhohna ṭha zawk leh inngaihtuahtawnna in neih lehzual theihna turin eng thil thar nge i hman ang?

*[Lettu: Sangpuia]*

Monday, May 11, 2026

HLAU SUH, PATHIAN I HNENAH A AWM!

_Hlim Reng Theihna Dan_

Rick Warren
May 11, 2026
Ama lawm zawng atana tih tum tur leh bei tura nangmahnia thawktu chu Pathian a ni si a.” Philippi 2:13

Vawiinah emaw tunkarah emaw nakumah emaw eng harsatna pawh lo tawk la, nangmah chauhin i hmachhawn lo vang. Pathian chu i kiangah a awm, nangmah a awm a, i tan a awm a ni.

Philippi 2:13 ah chuan, “Ama lawm zawng atana tih tum tur leh bei tura nangmahnia thawktu chu Pathian a ni si a.” 

Pathian chu nangmahah a thawk mek a ni. Thawk mek “working” hi Greek thumal energos aṭanga lak a ni a. Chumi aṭang chuan chakna kan tih mai “energy” hi a lo chhuak ta a ni. I nunah hian Pathian chu chakna (energy) siamtu a ni a. I duhna ringawt chuan i kal lo a ni. I chakna ringawtin i kal chuang lova. Pathian chuan eng harsatna pawh lo hmachhawn la, chakna i mamawh apiang ka pe ang che a ti a ni.

I hnenah a awm a ni ringawt lova, i hnenah a awm zel a ni. Bible chuan, “Fahrahin ka kalsan lovang che u; in hnenah ka lokal leh ang … chumi ni chuan kei ka Paa ka awm te, nangni keimaha in awmte, kei nangmahnia ka awmte in hria ang.” (Johana 14:18, 20) 

Chu chu thutiam a ni tawp mai a ni! Bible chuan Krista chu nangmahah a awm a, i chenna a ni a, Thlarau Thianghlima char tlat a ni. Chumi awmzia chu, Setanan luhchilh tur chuan, Pathiana minung pathum awm a paltlang a ngai tihna a nih chu. Chu chu inhumhimna ṭha tak leh hlauhawm lak ata pawh inhnemna ṭha tak a ni.

Pathian chu i kianga awm leh i hnena awm a ni ringawt lova. Sam 23:6 chuan, “Matheilovin ṭhatna leh ngilneihnain ka damchhung zawng hian mi zui zel ang a; Tichuan, Lalpa inah kumkhuain ka awm reng ang”

Berampuin a beramte a thlah chuan, vengtu uisathiam te chu an hnungah an awm ṭhina, beram rualte kalna chu a dik em tiin an thlithlai reng ṭhin a ni. Bible chuan i hnung zuitu uisathiam chu ṭhatna leh ngilneihna hi a ni a ti a ni.

Pathian ṭhatna leh ngilneihna chu engtik lai pawhin i nunah a thawk reng a ni. Pathian chuan i phu miah loh pek a nei che a – chu chu a ṭhatna hi a ni. I sualna avanga i phu reng hremna chu a lekkawh lova, chu chu a ngilneihna a ni.

A ṭhatnaah chuan malsawmna i dawnte leh chhandamna i dawnte hi a pek che an ni. “Rinna anga khawngaihnaa chhandam in ni, nangmahni thawhchhuah a ni lo va, Pathian thilpek a ni; thiltih avang a ni lo ve, chuti lo chuan, miin an chhuang dah ang e” Ephesi 2:8-9

Pathian chuan i nun che vel hi a thlir reng che a ni! Zingtin thovin inring tawk takin heihi sawi ṭhin ang che, “Lalpa, vawiinah hian keimahah leh ka kiangah leh ka tan i awm dawn avangin lawmthu ka hrilh a che”

Chu chu hlauhna i hmachhawn apianga a tih kianna tura chanchin lawmawm, hlimnain a hliah zelna tur a ni.

Ngaihtuah zui atan

* I hnena awm i thiltihtheihna aṭanga Pathian thiltihtheihnaa innghah zawkna chu engnge nia i hriat? 

* Pathian awmpuina chu engtik hunah te nge i rinhlelh ṭhin? Pathian hnenah i nunah hna a thawk lai i hmuh theihna turin rinna dil la?

* Harsatna i tawh laiin Pathian i hnenah a awm a ni tih i hriat hnuin i thil thlir dan engtin nge a inthlak?

*Pathian ngaihdamna chang tur leh nun thar neia bulṭan turin i inpeih em?*

Isua ringtute tan chuan thiam loh chantirna a awm lo tih Pathianin min tiam a ni. I sualna lak ata chhandam turin Isua a rawn tir a ni. Krawsa a thihna avang chuan thil i tihsual tawhte leh i tihsual tur te nen lam a man a pe tawh a ni. I sualna avangin amah leh amah inhlanin, a felna min pe a, Pa Pathian nena inlaichinna kan neih theihna turin hna min thawhsak a ni.

Chanchin ṭha chu chutah chuan a tawp lo. Pathian chuan Isua chu thihna ata a kai tho bawka, sualna leh thihna ata a thiltihtheihna chu a lantir bawk a ni. Chu chuan vanrama chatuana amah nena chen theihna min neihtir a ni.

I nun chu Isua Krista hnenah i hlan duh chuan, he ṭawngtaina hmang hian ṭawngṭai ang che. “Lalpa, misual ka ni ka inhria e, chuvang chuan i mi ngaihdamna ka dil e. Isua Krista hi i Fapa a ni tih ka ring a. Ka sualna avangin a thi a, thihna hnehin a tho leh a ni tih ka ring e. Min chhandamtu a ni tih ka pawma, ka Lalpa atan ka pawma, vawiin aṭangin amah zui turin ka inpe e. Ka nun hruai la, i duh zawng ti turin min pui ang che. Isua hmingin ka dil e.

Isua i pawma i ṭawngṭai a nih chuan, email ah hian min lo bia la Rick@PastorRick.com min hriattir ang che. Isua nena i zinkawng i zawh theihna tura thil ṭangkai ka lo thawn dawn che nia.   

*[Lettu: Sangpuia]*

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...