Wednesday, October 27, 2021

ENGVANGIN NGE I NGAIHDAM ANG?

 - Rick Warren

- 27 October, 2021



“Tichuan, chu bawiha pu chuan a khawngaih ta em em a, a thlah a, a bat chu a ngaidam ta a” Matthaia 18:27.

Pathian Thu chuan i na leh midang i huatna chu theihnghilha, ngaidam turin a ti che a. I na chu ti punlun zel lo va, thlah daih tur i ni zawk. 

Hengte hi midang i ngaihdamna chhan tur kawng thumte chu an ni:

Pathianin a ngaihdam che avangin. 

Matthaia 18 ah chuan, Isuan, lal pakhatin a bawih a ngaihdam chungchang a sawi a. “Tichuan, chu bawiha pu chuan a khawngaih ta em em a, a thlah a, a bat chu a ngaidam ta a” Matthaia 18:27. Lalin a bawih ba a ngaidam ang chiah hian, Pathianin i sual man bat te tlak turin Isua Krista a rawn tir a ni. I nuna i thil lo tih sual tawh zawng zawng te chu Isuan a tlaksak vek che a ni. A mawh a phur a. Tanina i tan ai zawng zawng a pe vek a. Isua Krista chu i thiltih sual zawng zawng aiin a thi a ni.

Midang huat chu mahni inhremna mai a nih avangin.

Mahni inhremna mai a ni. Midang huatna i neih hian, i huata te aiin nangmah kha i na zawk zel ang. A dika dik chuan, kum kaltaa thil thleng tawh ila hriatreng te kha, midang chuan an lo theihnghilh daih tawh asin! I hun liam tawh chu liam tawh a ni a, a tina thei tawh lo che a ni – nangman hriat reng i duh tlat te a nih loh chuan. 

Nitina ngaihdam mamawh i nih avangin.

Bible-in chiang taka min zirtir chu, i pek phal loh chu i dawng thei bik lo tih hi. Midang i ngaihdam theih loh chuan Pathianin a ngaihdamna che chu engtin nge i dawn theih teh lul ang? Ngaihdama awm i duh chuan midang ngaidamtu i nih ve a ngai.  

Ngaihdamna hi kan nunphung ve reng a ni. Vawi khat chauh tiha tawpsan mai chi a ni lo. Nitin hian ngaidamtu i nih fo a ngai a ni. Ngaihdam diltu i nih a ngai a, Pathian leh midangin an ngaihdamna che chu pawm la, midang ngaidamtu ni bawk ang che. Hei hi tih chhunzawm zel tur a ni a, chu chuan hlimna a pe ang che. 

Ngaihtuah zui atan.

* I hringnunah eng na i tawrh nge hrehawm i tih ber, i rilrua lo lang nghal tunge? Chu mi chu i ngaidam tawh em? I ngaidam a nih chuan engnge i nunah nghawng a neih? A nih loh chuan vawiinah hian chu mi chu ngaidam tur leh i na te theihnghilh turin engtin nge bul i ṭan ang? 

* Pathianin kawng hrang hranga a ngaihdamna che i ngaihtuah ṭhin em, vawiinah hian tunge i ngaihdam ve ngai le?

* Pathian nena inpawlna fianrial hun, Bible zir hun leh Pathian hnena ngaihdam dil turin hun i insiam ṭhin em? A nih loh chuan, engtin nge chu chu i ngaih pawimawh theih nan hma i lak ang?

[Lettu: Sangpuia]

Tuesday, October 26, 2021

INPUANNA HI DAMNA BUL INṬANNA A NI

 - Rick Warren

- 26 October, 2021



“Tihdama in awm theih nan in sualte thupha chawi tawn ula, inṭawngṭaisak tawn ṭhin rawh u.” Jakoba 5:16

Rilru vei zawng inpuanna chu rilru lama damna hmahruai a ni.

Kan Bible chuan, “Tihdama in awm theih nan in sualte thupha chawi tawn ula, inṭawngṭaisak tawn ṭhin rawh u” a ti a ni Jakoba 5:16.

Rilru lama hriselna neih i duh em? Chumi nei tura rahbi i rah tur hmasa ber chu Pathian hnena i sualte puan hi a ni.

I sualte hneh tur leh rilru lama hriselna neia kal zel tur chuan rahbi pahnihna i rah leh a ngai a. I sualna chu mi tuemaw i hrilh a ngai a ni.

“Engvangin nge Pathianin ka nunah midang hnuh luh a tum?” tiin zawhna i nei maithei e. Hei hi a chhan chu a ni: Pathianin i harsatna bul chu inlaichinna a ni tih a hriat vang a ni.

Midangte nena in inkar chhiatna chu i harsatna bul a ni tih i hre lo fo ṭhin a ni. I nihna ang taka lan ai chuan, i nihna tak i thup ṭhin a ni. Mi ten engkim i nei vek lo tih an hriat reng pawhin nang chuan engkim nei angin i inlantir ṭhin a ni. Engkim ṭha vek lo mahse – engkim ṭha vek angin lem i chang ṭhin a ni.   

Chu i nungchang chuan midang lakah a tihrang che a. Inpawhna tak tak a dal a. Inhmangaihna tak tak in nei thei lo a. I rilrua sual inthup i neih reng avangin hmangaihna i nei thei lo a ni.   

I thuruk avang chuan i damlo ṭhin a. Thuruk i neih tam poh leh i damlo zual ang. Kawng dangin lo thlir ila, i rilru i puanna chu damna bul inṭanna a ni. I thu leh hla i sawipui theih leh ngaithla peih mi rintlak i hmuh chuan – eng nge lo thleng le? Anni pawhin harsatna an nei ve a ni tih i hmuchhuak ang.

Midang hnena i inbunruah chuan thil pakhat lo awma chu i thawl hawk ang. I thuruk thim chu enga i chhun chuan, chawplehchilhin a thiltihtheihna chu a hloh nghal ang. 

Tihdamna chan i duh chuan, thuruk neih bang la. I nunah eng thil nge mi tumahin hre ve lo se i tih le? Chung thilah tak chuan Pathianin khawngaihna te, lainatna te leh tihdamna te pek che a duh  a ni.

Ngaihtuah zui atan.

* Tu hnenah nge i sualna leh i rilrua awm te i puan ngam le? Chutiang bawkin chutiang chuan tu in nge rintlakah ngai ve che le? 

* Mi dang thu leh hla ngaithla peihah i inruat em le? Midangte ngaithla peih turin engtin nge tan i lak ang?

* Midang hnenah i sualte i puan khan eng damna nge Pathianin i hnenah a rawn thlen le? 

[Lettu: Sangpuia]

Wednesday, October 20, 2021

NI KHAT ZEL ATAN PATHIAN RING RAWH

 - Rick Warren

- 20 October, 2021



“Engah mah mangang suh u; engkimah ṭawngṭai leh dilin, lawmthu hril tel zelin, in duhnate chu Pathian hnenah hriattirin awm zawk rawh se … a dik apiang te, a zahawm apiang te, a fel apiang te, a thianghlim apiang te, a duhawm apiang te, a thang mawi apiang te - ṭhatna reng a awma, fakna reng a awm phawt chuan – chung chu ngaihtuah rawh u” Phillipi 4:6-8.

Pathian chuan ni khat atan zela amah chu ring turin a duh che a. Kar khat daih chaw te, thla khat daih chaw emaw kum khat daih tur chaw emaw dil turin a ti lo che a, “nitin chaw” (Matthaia 6:11) dil zawk turin a duh che a ni.

Bible chuan, “Engah mah mangang suh u; engkimah ṭawngṭai leh dilin, lawmthu hril tel zelin, in duhnate chu Pathian hnenah hriattirin awm zawk rawh se … a dik apiang te, a zahawm apiang te, a fel apiang te, a thianghlim apiang te, a duhawm apiang te, a thang mawi apiang te - ṭhatna reng a awma, fakna reng a awm phawt chuan – chung chu ngaihtuah rawh u” a ti Phillipi 4:6-8.

He chang hian nitina Pathian ring tura tih tur kawng li min zirtir a ni.

Engah mah mangang suh u. “A tuk atan lungkham suh u, a tuk chuan ama tan a lungkham chawp dawn si a. Ni khat atan ni khat hrehawm chu a tawk a ni” Matthaia 6:34. Engvangin nge manganna chu thil lian tham tak a nih? Chin dawklak ṭhalo mai ni loin, thil sual a ni. Mahse Pathian chu a thutiamah a ding ngheta, ring la, anin i harsatna chu a chinfel sak ang che.

Engkimah ṭawngṭaiin. Ṭawngṭaina chuan thil a thlak danglam ṭhin. Rom 8:32 ah chuan hei hi kan hmu, “Ama Fapa ngei pawh zuah lova, kan zaa aia petu chuan thil zawng zawng pawh a thlawnin min pe tel lo va ngem ni?” Pathianin i harsatna lian ber, van aṭanga i sual phurh chu –Isua i aiawha thi tura a lo tirh khan a chinfelsak che a ni. Pathianin a hmangaihzia che chu i aiawha thi tura Isua a rawn tirh aṭangin i hre tawha, i harsatna dang zawng zawng pawh chinfelsak tur chein a hmangaih tawk che tih i ring lo em ni?    

Engkimah lawmthu hrilin.

Engpawh lo thleng se, lawmthu hril zel ang che. Bible chuan, “Engkim avangin lawmthu hril rawh” a ti lova. “Engkimah lawmthu hril rawh u” a ti zawk a ni. (1 Thessalonika 5:18). I nuna thil ṭha lo avangin lawmthu sawi a ṭul lo va. Thi sual avangin lawmthu i sawi tur a ni lo. Cancer emaw car accident emaw avangin i lawm tur a ni lo va. Amaherawhchu Pathian chuan engkimah lawmthu hril rawh u a ti. Engvang nge? A chhan chu Pathianin a awmpui dawn che a. I mamawh apiang a phuhru dawn a. A ṭanpui dawn bawk che a ni. 

Thil dik chauh ngaihtuah zelin.   

Philippi bung 4 ah Pathianin thil ngaihtuah tur hrang hrang a pe che a – “a dik apiang te, a zahawm apiang te, a fel apiang te, a thianghlim apiang te, a duhawm apiang te, a thang mawi apiang te - ṭhatna reng a awma, fakna reng a awm phawt chuan – chung chu ngaihtuah rawh u,” a ti a ni.

Thil thianghlim leh duhawm ngaihtuah tur chu khawiah nge i hmuh ang? TV ah emaw social media ah emaw chuan i hmu lo vang.

Ngaihtuahna thianghlim, duhawm leh zahawm chu Pathian Thu-ah i hmu ang. Chhiar la, zir la, vawng la, i rilruah chentir ang che. Isaia 26:3 chuan, “I chunga rilru nghattu chu, nangmah a rin che avangin thlamuang tak maia awm turin i veng ang” a ti a ni.  

Vawiin hi ni khat zel atana Pathian i rin niah hmang ang che.

Han ngaihtuah la

Ṭawngṭaina hian thil a thlak danglamin i ring em? I rin emaw rin loh chhan engnge? 

I ngaihtuahna chu khawi lamah nge a kal ṭhin? I thil ngaihtuah te chu a dik te, a zahawm te, a fel te, a duhawm te, a thangmawi te leh faktlak lamah te a ni em?

Vawiinah hian eng thilah nge Pathian hnenah lawmthu sawi i ngaih? 

Tuesday, October 19, 2021

PATHIANIN I MAMAWH A PHUHRU THIN

 - Rick Warren

- 19 October, 2021



“Nangni … mahin in fate thil ṭha pek nachang in hriat chuan, in Pa vana mi chuan a diltute chu thil ṭha a pe zawk dawn em em lo vem ni?” Matthaia 7:11

Pathianin engkim a siam a. Thil engkim i hmuh theih leh hmuh theih loh te pawh. He leia thil awm zawng zawng leh lei chunga awm leh a piah lam thlengin ama siam an ni. Thil tha engkim lo chhuahna hi Pathian a ni a, amah chu inghahna tlak a ni.

Pathian chu engkim lo chhuahna hnar a ni tih i rin mek lai hian, heng thudik pali te hi hrereng rawh.

Thil ṭha engkim hi Pathian pek a ni.

Engmah hi i hlawhchhuah a ni lo va. Pathianin a khawngaih che avanga a pek che a ni. Pathianin a pek duh loh che chuan engmah i nei lo vang.

Kan Bible chuan, “Thipek ṭha leh thilpek famkim zawng zawng chu chung lama Pa hnen aṭanga lo chhuk a ni” a ti a Jakoba 1:17. Chumi avang chu a ni mahna, Lalpa ṭawngṭainaah pawh, “Nitin kan ei khawpin chaw min pe ang che” tih kan hmu Matthaia 6:11. Eng vang nge? A chhan chu Pathianin a pek che hi engmah i hlawhchhuah theih an ni lo – a hnen aṭanga thilpek a ni zawk

Pathianin i mamawh a pek theih loh che engmah a awm lo. 

Naktuka i mamawh tur emaw kumin chhunga i mamawh tur hi i hre lawk lo va. Engpawh chu lo nise, Pathianin i mamawh apiang a pe thei che a ni. 

Bible chuan, “Ka Pathian chuan Krista Isuaa a ropuina ngahzia ang zelin, in tlakchhamna tinreng pawh a phuhruksak ang che u” a ti Philippi 4:19. “Ropuina ngahzia ang zelin” tih awmzia chu Pathian chuan thilpekah ui a nei lo a. Hnâr tawp thei lo a nei a ni. 

Pathianin i mamawh apiang pek che a duh.

Matthaia 7:11 ah chuan, “Nangni … mahin in fate thil ṭha pek nachang in hriat chuan, in Pa vana mi chuan a diltute chu thil ṭha a pe zawk dawn em em lo vem ni?” tih kan hmu a. I mamawh engkim a pek che hian Pathian a lawm a ni.

Pathianin a nghak reng che.

I hringnuna i mamawh tak ila nei lo a nih chuan, Pathianin i dil hun a nghak pawh a ni thei a ni. Pathianin i mamawh chu pek loh a tum che a ni reng reng lo va, nangmah zawk hian Pathian hnenah i la thlen lo pawh a ni zawk thei a ni. Jakoba 4:2 ah chuan hei hi kan hmu, “In dil loh avangin in nei lo va” tiin.

I mamawh chu nei turin tunge i nghah, engnge i nghah? Pathian ni lo midang emaw thil dang emaw an nih chuan vawiinah hian i rilru chu thlak rawh. Pathian chu engkim i hmuhna hnar a ni tih ring mai rawh.

Han ngaihtuah la

I mamawh chu nei turin khawiah nge i zawn? 

Pathian hnenah i mamawh tak chu i dil lo a nih chuan, eng nge i nghah fo na chhan ni le?

Pathianin i mamawh apiang a pe che tih leh i ṭawngṭaina a chhang a ni tih hi engtin nge i hriat chian leh zual theih deuh deuh ang? 

[Lettu: Sangpuia]

Sunday, October 17, 2021

INREMNA RAWNGBAWL HNA

 2 Kor. 5:18

- Vanlalthansanga



Vawiin hi North East India Christian Council (NEICC) Day of Prayer a ni a, thupui chu II Korinth 5:18 thu, “Inremna rawngbawl hna” tih a ni. NEICC in a tum leh tih thinte chu India hmarchhaka kohhran inpumkhatna leh inunauna tha siam a ni a. Tin, a tul huna ram rorelna leh sorkar hmaah pawh kristiante aiawha din te, Chanchin Tha hril, tihdam rawngbawlna leh thuziak leh zirna kawnga thawhhona tha siam te, a tul anga khawtlang nun siamthatna leh khawtlang in harsatna a tawhte hmachhawn pui te a ni.

Pathianin Krista avangin inremah min siam

Nimahsela, engkim hi Pathian hnen ata chhuak a ni a; ani chuan ani chuan Krista avangin amah nen inremin min siam a, inremna rawngbawl hna min pe a; khatia Pathianin Kristaah chuan khawvel hi amah nen inremin a siama, an bawhchhiatnate chu bawhchhiatnaa ruatsak lova, inremna thu min kawltir kha. 2 Kor. 5:18-19  

Inpumkhat hi Lal Isua duhdan a ni

Isua tawngtaina atang khan inpumkhat a duh zia chu kan hre thei awm e. “Henghote tan chauh hian ngensak ka ni lo, an thu avanga kei mi la ring turte tan pawh ngensak ka ni bawk e; an zaa pumkhat an nihna turin, ka Pa, nang keimaha i awm leh, kei nangmaha ka awm ang bawk hian, anni pawh keimahnia an awmna turin; nangin kei mi tir tih khawvelin an awh theihna turin. Tin, nangin ropuina mi pek kha keiin anmahni ka pe ta; anni chu pumkhat an nihna turin, keini pumkhat kan ni ang bawk hian; kei anmahniah, nang keimahah, anni pumkhata an awma, an famkim theihna turin; nangin kei mi tir tih leh, mi hmangaih angin anni hi i hmangaih tih, khawvelin an hriat theihna turin.” 2 Kor. 5:20-23

Kan inrem theihlohna chhan chu keimahni lam felloh vang a ni thin

Pathian leh mihring inremlohna chhan chu mihringte avang a ni a, thuawihlohna avangin inrem taka lengdun thin Pathian leh mihring chu then hranin kan lo awm ta. Pathian bawkin bul rawn tan lehin inremin kan awm thei ta chauh a ni. Tunah pawh hian mihring pui remloh engemaw zat kan nei awm e, kan inremlohna chhan chu engpawh lo ni se, keimahni lam felloh avang a ni e ti ila kan tisual tam awm lo ve. Keimahni lam fel ila chuan inrem takin kan khawsa thei em em ang.

Inremna rawngbawl hna min pek avangin bul tantu i ni ang

A hmasaberah chuan Pathian nen kan inrem phawt angai ani. Pathianin min rem tawh kan tih rual rual hian keimahni lam hian tun thleng hian kan la remlo ve thei tlat a ni. Tirhkoh Paulan, “Pathian nen lo inrem rawh u” min tih angina Pathian nen kan inrem angai hmasa a ni. Tichuan Pathianin inremna rawngbawl hna pawimawh tak min pe a, chu rawngbawl hna chu bul tantu kan ni tur a ni. “Tu sual pawh sualin thungrul suh u. Mi zawng zawng ngaiha thil mawi ngaihtuah lawk rawh u. A theih phawt chuan nangmahni lam tal, mi zawng zawng nen inremin awm rawh u.” Rom 12:17-18.

Inremna rawngbawl hna min pek angin keimahni zawnah theuh i thawk ang u

Vawiinah hian remloh tam tak kan nei ang. Inremna rawngbawl hna thawk turin min ruat tawha, chu hna tha tak chu thawk ve thei dinhmuna kan din ve avangin kan thawk ve tur a ni. Hmun dang khaw dangah kan thawk theilo a nih pawhin kan awmna hmun theuhah inremna rawngbawl hna kan thawk ve tur a ni. Kan chhungkuaah bul kan tan ang, kohhran leh khawtlangah inrempui tur kan nei anih chuan theihtawp kan chhuah angai bawk a ni..  

 

 


Wednesday, October 13, 2021

PATHIAN TAN CHUAN THIL LIAN LUA ENGMAH A AWM LO

 - Rick Warren

-      13 October, 2021


Pathian chu Pa nih tling thiltithei a ni a. Harsatna i thlen zawng zawng te pawh a chinfel sak thei che a ni. A thiltihtheih piahlam engmah a awmlo a. Dilna lian lua emaw te lua emaw a awm hek lo.

Ṭumkhat chu nu pakhatin tihian min zawt a, “Rick, Pathian hnenah hian ka nuna harsatna ho te te hrilh ta ila a pawi em? Nge harsatna lian tham chauh ka thlen dawn?” Amah chu en chungin hetian hian ka chhanga, “Pathianin harsatna zawng zawng hi a lian lutuk a tih i ring em ni? A tan chuan thil te tham vek anni. Pathian tan chuan thil te tham emaw thil lian tham emaw engmah a awm lo.

Bible chuan, “Pathian thuchhuak reng reng thiltihtheiloh a awm lo” a ti a. Luka 1:37. He thu ka chhiar hnu hian “theihloh” tih hi ka dictionary aṭangin ka paih daiha. Achhan chu Pathian dictionary ah pawh a awm loh vang a ni. Engmah hi Pathian tan chuan tihtheihloh a awm lo.

Thilmak deuh mai chu ka fate an naupan lai khan thil tihtheiah min ngai kha a ni. Engkim hria, engkim tithei leh lei theiah min ngai tlat a ni. Mahse an upat deuh hnu chuan, an pa hian hriatloh ka neih te, chak lohna ka neih te, sumpai ka tlakchham te, thiam loh ka neih te leh chaklohna kawng tinrenga ka neih te an hrethiam ve tawh a ni. 

Mahse vana i pa khi chuan engkim a ti thei a ni. “Keimahnia thawk ṭhin thiltihtheihna ang zelin, kan dil leh kan ngaihtuah zawng zawng aia nasa zawk ti theitu Pathian ngei chuan.” Ephesi 3:20

Duhthusam lian tak nei mi ka ni a. Ka nuna ka duhthusam tam tak te chu Pathianin min tihhlawhtlin sak tawh bawk a ni. Mahse Pathian chuan, “Duhthusam engzat nge i neih ka ngaihtuah lo, Rick; i chungah ka la awm tho tho. I duhthusama aia lian zawk pawh khan ka suangtuah thei” tiin.

Nimina thiltihtheihloh kha vawiinah chuan thilmak a lo ni ṭhin. Pathian chuan thiltihtheihlohnaah hian thil a ti thei a. A ni chu kan Pa thiltithei a ni.

Han ngaihtuah la

I nunah thiltihtheihloh anga i ngaih tawh a hnua Pathianin a tih theih leh si eng nge i lo tawn tawh? 

He leia i pa nena in inlaichinna aṭang hian vana i Pa i ngaihdan engtin nge a siam?

I nuna i duthusam lian ber engnge? I duhthusam ti puitling tur chuan Pathianah i inghat em? Pathian chuan i duhthusam aia lian zawk i tan a nei tih hriatna chuan engtin nge a awm tir che? 

[Lettu: Sangpuia]

Tuesday, October 12, 2021

PATHIAN CHU I KIANGAH A AWM, HRIATTHIAMNA PAWH A NEI

 - Rick Warren

- 12 October, 2021



“Lalpa chuan a kotu zawng zawngte chu a hnaih ṭhin a.” Sam 145:18 

Pathian hi hla taka awm a ni lo va. I rin piahlam daih ani ang. Ani chu i lung lo phu leh tur tluka hnaiin a awm a ni.

I chetvelna apiangah a awm zel a. Kan Bible chuan “Pathian an zawna, an dap an dapa, an hmuh mial theih nan; nimahsela, ani chuan min hlatlo ṭheuh si a,” a ti a ni. Tirhkohte 17:27 

Pathian chu mel sang tam tak a hlaa awm angin i ngai maithei a. Amaherawh chu i ngaihtuahna leh anihna dik tak chu a inmillo fo ṭhin a ni. Pathian chu tunah pawh i kiangah a awm tih hi thudik chu a ni.

Hengte hi i Pa vana mi chungchanga thudik pathumte chu anni.

I tan chuan buai lai anei ngailo. Achang chuan nangmah zawk hi Pathian tan hian i buai lutuk ṭhin zawk a. Ani erawh chu i tana a buai lutuk lai a nei ngailo a. Chu chu Pathianin a hmangaih dan che a ni. Sam 145:18 ah heihi kan hmu, “Lalpa chuan a kotu zawng zawngte chu a hnaih ṭhin a.” I koh apiangin Pathian chu hnai takah a awm a ni. Amah i ngaihtuah aia nasain a ngaihtuah che a ni. I pian hmain a ngaihtuah tawh che a, nitina i thiltih zawng zawngte hi angaihtuah reng a ni.

I mamawh apiang pek che a duh a. Itsikna nen thil a ti ngai lo va, hlim takin a ti zawk ṭhin a ni. 

Matthaia 7:11 ah chuan hei hi kan hmu, “Nangni misual mahin in fate thil ṭha pek nachang in hriat chuan, in Pa vana mi chuan a diltute chu thil ṭha a pe zawk em em dawn lo vem ni?” Pathian chuan thilpek ṭha tak pe che nuam a ti tih hi lo hria la, lo hlimpui phawt mai teh. 

Ani chuan i na pawh a hriatthiampui che a ni. Tunkar hian hun harsa tak i paltlang anih chuan, he chang hi i mamawh ka ring: “Lalpa chuan thinlunga lungchhiate chu a hnaih ṭhin a, rilrua inchhir apiangte chu a chhandam ṭhin.” Sam 34:18. Pathianin chuan lainatna thuk tak a nei a. Harsatna i tawhin a inthiarfhlim ve mai lo va, a tuarpui zawk che a ni.

Pathian chu i kiang hnaiah a awm a, i thil patlang chu a hriatthiampui che a ni. A hnenah hawi kir la; nangmah nghakin ani chu a awm reng a ni.

Han ngaihtuah la

Vawiinah hian Pathian ko turin enge mamawh i neih le? 

Kan nuna hun thim ber kan tawh laiin eng vangin nge Pathian chu achang chuan hla taka awm nia kan hriat ṭhin le?

Pathian tana buai reng lo va hun i neih theihna turin engnge insiam ṭhatna tur i neih le?

[Lettu: Sangpuia]

Sunday, October 10, 2021

ISUA KRAWS CHATUANA NUNNA MIN PETU

 - Vanlalthansanga

Isua, kan rinna innghahna bul leh tifamkimtu chu i en tlat ang u. Ani pawhin a hmaa lawmman awm avang chuan, mualphona chu ngainepin kraws-ah chhel takin a tuar a, Pathian lalthutthleng ding lamah chuan a han thu ta a ni. Hebrai 12:2





Eden huana mihringte suala an tlukna kha a tihbo nan Pathianin vawi leh khatah thil a ngaihtuah chuk  chuk lo. Kraws-a Krista thisen hlu a tlanna chu leilung pian hma atanga lo ruat lawk tawh a ni. Mihring ten chatuan nun  an neih leh theihdan chu Krista thihna hmang chauhvin a ni kawng dang a awm lo. Kraws-a Lal Isua thihna, kan tana tlanna tura a buatsaihna hi Bible pumpui thu pawimawh ber a ni. 

Lal Isua hnathawh zingah chuan  Kraws-a a thihna hi a pawimawh ber tih theih a ni. A lokal chhan chu ‘rawngbawl tur leh mi tamtak tlan nana a nun pe zawk turin a lokal a ni si a’ (Mk 10:45). Thuthlung Hluia tlanna chu tifamkimin amah ngei chu mihringte tlan turin  leh an sual lak a ta chhandam turin Kraws-ah khan a thi ta a ni.

Pilatan a chungchang a ngaihtuah laiin a sualna a hmu lo, mahse mi zawng zawng sualna phurtu a ni a, khawvel sual chu amahah inbelin Kalvari tlangah thi khawp hialin tlanna a siam ta a ni.

Lal Isua chuan sualte tana inthawina  thaber leh famkim ber chu a hlan a ni, Amah ngei a inhlan a (Heb 9:12, 26) Thuhawihna inhlanna a ni. A thihna avangin, chatuana tlanna te, Pa Pathian nena inremnate leh chatuana nunna chu kan lo nei ta a ni. Amah avang chuan Pathian fa nih theihna te kan lo nei a, thiltihtheihnate, thlarau lawmna leh hlimnate kan lo chang ta a ni.

Kan tan chatuana chenna tur hmun min siamsak mek bawk a ni. A kut ata chu kan bo leh dawn tawh lo (Joh 10: 28). Kraws-a athihna chuan sual ngaihdamnate leh hnehnate kan tan min lo siam sak ta a, nel tak leh ngam takin Amah  chu kan lo be thei ta  a ni.

Isua, kan rinna innghahna bul leh tifamkimtu chu i en tlat ang u. Ani pawhin a hmaa lawmman awm avang chuan, mualphona chu ngainepin kraws-ah chhel takin a tuar a, Pathian lalthutthleng ding lamah chuan a han thu ta a ni. Hebrai 12:2

Friday, October 8, 2021

KRISTA TAKSAAH MAMAWH I NI

 - Rick Warren

- 8 October, 2021



“Taksa pumkhatah peng tam tak kan neia, peng zawng zawng thiltih erawh chu a inang lo va; chutiang bawkin keini tam tak ni mah ila, Kristaah chuan taksa pumkhat kan ni a; a mal malin inpeng tawn ṭheuh kan ni.” Rom 12:4-5 

Bible-ah kohhran chu “Krista taksa” tia koh a ni a. Isua Kristan a lei taksa nena a awm laia a thiltih ang kha, vawiina a zuitute hian ti chhunzawm turin a duh a ni. Keini ho hi he leia Krista taksa te chu kan ni.  

Kan Bible chuan “Taksa pumkhatah peng tam tak kan neia, peng zawng zawng thiltih erawh chu a inang lo va; chutiang bawkin keini tam tak ni mah ila, Kristaah chuan taksa pumkhat kan ni a; a mal malin inpeng tawn ṭheuh kan ni,” a ti a ni. Rom 12:4-5 

Tute pawh hi Krista taksaah chuan mamawh kan ni a. Krista taksa chu ti famkim turin kan zavai hian mamawh kan ni.

Jigsaw puzzle ang hi a ni a. I remkhawm char char a, mahse pakhat a kim ta lo. Eng nge i hriatchhuah le? A kimlo pakhat chu a ni.

Krista taksa chu chutiang chiah chu a ni. Tute pawh hi mamawh kan ni.

Nang chuan heti hian i sawi maithei, “Kei chu Krista taksaah chuan ke zungpui tin ang mai ka ni.” I ke zungpui tin a thlawm ve tawh em? I hrechhuak ang. Vawikhat chu 12-pound a rit in min tlak khum tawh a. Ka taksaah chuan tereuh te a ni, mahse ka hriatreng chu thla ruk chhung a kimlo ang a ni.

Thil langsar leh pawimawh hi hriat hran tum hram ang che. Thil ṭhenkhat chu an langsar vuta mahse ṭangkaina an nei tam lo.

Ka hnar hi a langsar hle a, mahse a ṭangkai tam lo. Ka hnar hi thlawn daih ta se ka damchhungin ka nung thei tho ang. Mahse ka kawchhungah hian, tumahina an hmuh loh, thin te, lung te, chuap te an awm a ni. An langsar lo va, amaherawh chu ka neilo anih vaih chuan ka thi nghal mai ang.  

Krista taksaah chuan i langsar lo a ni maithei e, mahse i pawimawh tlat a ni. Taksa ah chuan bung hrang hrang an awma, an vai chuan an pawimawh vek a ni. Kan vai hian tihtur pawimawh tak kan nei vek a ni. 

Han ngaihtuah la

Krista taksa nena in inṭhenhran lai kha ila hria em. I nunah engnge nghawng a neih kha? 

Krista taksaah chuan langsar vut silo in hna pawimawh tak engnge i thawh le? Rawnngbawlnaa i rilru put hmang engnge ni?

Krista taksaah chuan thilpek an dawn ang te hmang chhuaka midang te rawngbawl sak turin engtin nge i fuih theih ang?

[Lettu: Sangpuia]

Wednesday, October 6, 2021

RAHCHHUAK TURIN ZAWMPUI NEI RAWH

 - Rick Warren

- 6 October, 2021





“Keimahah awm reng rawh u, kei pawh nangmahniah ka awm reng ang. Peng chu grep hruia a awm reng loh chuan amahin a rah thei lo ang bawkin, nangni pawh keimahah in awm reng loh chuan in rah thei lo vang.” Johana 15:4 

Isuan a thih dawn zan khan amah zuitute a fuiha, “Keimahah awm reng rawh u, kei pawh nangmahniah ka awm reng ang. Peng chu grep hruia a awm reng loh chuan amahin a rah thei lo ang bawkin, nangni pawh keimahah in awm reng loh chuan in rah thei lo vang.” Johana 15:4 

Isuan thlarauva zawmna chu grep hruia awm ang hi a ni a ti. Nangma duhthua i awm anih chuan i nunah engmah rahchhuah i nei thei lo vang. Krista taksa nena in inzawm reng angai a ni. 

Thingzar sahthlak chuan rah achhuah theilo. Chutiang chu i nihna pawh a ni. Thlarauva zawm i neih loh chuan vuai leh thih mai bakah, i nunah rah i chhuah thei lo vang.

Kum tin thlai leh thei ka ching ziaha. Mahse a peng te chu paih annih chuan, chung pengte chuan tomato emaw thil dang engmah an rah thei ṭhin lo. Rahchhuah tur chuan pengte chuan zawmpui anneih angai a ni.

Krista taksa nena inzawm in nih chuan eng thei nge i rahchhuah ang le? “Thlarau rah erawh chu hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insumtheihna te a ni.” Galatia 5:22-23.   

I chungchang hriat ka neilo, mahse hmangaihna neih ngah ka duha. Hlim lehzual ka duha. Ei bar zawnna lam chu eng pawh nise inremna neih zel ka duh a ni. Ka tana mi pawimawh te hnenah dawhtheihna lantir zel ka duh. Mi ṭha tak nih ka duha. Ka thutiamte hlena rinawm taka nun ka duh bawk. Ngilneihna ngahlo te hnenah ngilneihna lantir ka duha. Insumtheihna neih belh zel ka duh bawk a ni.

Achunga kan sawi te khi Thlarau rah anni a, thlarauah zawmpui i nei a ni tih tihchianna a ni bawk. Khing kawng hrang hrangah te hian ṭhang lova i inhriat chuan, engnge ni le? Thlarauah i zawmpui i neilo tihna a ni.

Pathianin thlaraua inzawmna chu a ngai pawimawh hle a. A dika dik chuan nangma duhthua i awm anih chuan i nunah rahchhuah engmah i nei thei dawnlo a ni. Krista taksa nena inzawm ka mamawh a. Krista taksa nen chuan in inzawm reng angai a ni. Chu chu kan ṭhat tlanna a ni.  

Han ngaihtuah la

I nunah rah i chhuah ngei a ni tih lantirna engnge?

Eng theiah te nge rahchhuah i mamawh? Engtin nge i tih ang le?

Krista taksa nena in inzawm hian eng thil nge i nunah hlawkpuina i neih tawh le?

[Lettu: Sangpuia]

Tuesday, October 5, 2021

NGAIHTUAHNA DIK CHUAN HLIMNA MIN THLEN

  - Rick Warren

- 5 October, 2021



“A dik apiang te, a zahawm apiang te, a fel apiang te, a thianghlim apiang te, a duhawm apiang te, a thang mawi apiang te - ṭhatna reng a awma, fakna reng a awm phawt chuan – chung chu ngaihtuah rawh u.” Philippi 4:8

Pathian aṭanga hlimna chhuak chu vawilehkhata neih nghal mai theih a ni lo. Nitina i zawm ngai thil a awma: engahmah mangang lo va, engkimah ṭawngṭaia, engkimah Pathian hnena lawmthu sawia, a tawp berah chuan, thil dik lama rilru dah a ni.

I hlim duh a nih chuan, dawt thuin i rilru luahtir suh. Thu bawlhlawh dah suh la. Nangmah tiphur thei emaw mi ṭha zawk nihtir thei thil i rilruah dah zawk rawh. Bible chuan, “Thil ṭha lo reng reng ka mithmuhah chuan ka dah lo vang” a ti a ni. Sam 101:3. Chumi awmzia chu Pathianin i hlim a phal lo tihna em ni? Ni lo e. I tana ṭha tur a ngaihtuaha, i hlimna tur pawh a hrechiangtu a ni.

I hunawl neihah eng nge i ngaihtuah deuh ber? I nun hlut leh hlut loh chu i ngaihtuah hlut leh hlut lohah a innghat a ni.

Ngaihtuahna dik neih theih nan a taka kan tih theih pakhat chu rilru kawi put loha – midang dah hniam tlat chin loh hi a ni. Mi an ṭhatna lai kan ngaihtuah tlat zawk tur a ni. An ṭhatna lai i ngaihtuah theih loh chuan ngaihtuah lo law law mai rawh.

Bible chuan, “A dik apiang te, a zahawm apiang te, a fel apiang te, a thianghlim apiang te, a duhawm apiang te, a thang mawi apiang te - ṭhatna reng a awma, fakna reng a awm phawt chuan – chung chu ngaihtuah rawh u” a ti a ni. Philippi 4:8. Midang ṭhatna lai chauh sawi ṭhin kohhran din hi ka chak ṭhin. Nepnawi dawrah i luta mi tuemaw chuan zawhna a zawt che a, “chumi kha mi chu i hria em?” tiin. Nang chuan, “Aw hria e, an fel khawp mai” i ti a. Chu chu midang ṭhatna lai sawi dan chu a ni.

Pathian aṭanga hlimna dan chu: Engahmah mangang lo va, engkimah ṭawngṭaia, engkimah Pathian hnena lawmthu sawi leh thil dik lama rilru dah a ni. Hei hi i zawm theih chuan, Bible-in hei hi a tiam che  a ni. “Pathian thlamuanna, rilru reng renga hriat sen loh khan, in thinlung leh in ngaihtuahnate chu Krista Isuaah chuan a vensak ang che u.” Philippi 4:7

Hlimna tura pawimawh ber chu tunge ni? Isua Krista hi a ni. Ani tel lo chuan hlimna dan kan sawite khan awmzia a nei lo ang. Hlimna dik chu Isua nena inlaichinna dik neih rahchhuah hi a ni.

Han ngaihtuah la

Nilenga i thil ngaihtuah ṭhin eng nge ni le?

Inlaichinnaa harsatna i tawh mek han ngaihtuah teh? Engtin nge a dik apiang te, a zahawm apiang te, a fel apiang te, a thianghlim apiang te, a duhawm apiang te, a thang mawi apiang te i ngaihtuah hian chu in inlaichinna chu i tihdanglam theih ang?

Mi chanchin i sawiin i kianga an awm loh pawhin ṭha takin i sawi ṭhin em? Miin i chungchang ṭha taka an sawi avanga i lawmna han sawi teh? 

Isua nena inlaichinna dik neih dan

Isua hi ila ring lovin amah zui pawh ila thlang lo pawh a ni thei, engvangin nge hun i nghah kher? I sualna chuan Pathian nen a tihrang che a ni. Pathian khawngaihna avang chauhin amah nen inlaichinna dik i neih leh theih phaha, tichuan hlimna dik kawng chu zawh turin a hruai che a ni.

Bible chuan, “Rinna avanga khawngaihnaa chhandam in ni, nangmahni thawhchhuah a ni lo va, Pathian thilpek a ni; thiltih avang a ni lo ve; chutilo chuan, miin an chhuang dah e.” Ephesi 2:8-9

I siamtu nena inremna neih i duh chuan, hetiang hian ṭawngṭai rawh le:

“Duhtak Isu, ka sualna avanga nang nena kan inṭhenhrana hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chuti chuan i vanram in nuamah engtikniah emaw chuan min la pawm ve ang. 

“Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thil dang vang a ni lo i tih avangin ka ring che a ni. Ka nunah hian Lal ni turin ka pawm ta che a. Vawiinah hian i hnung zui ka duh a, ti tura min tih apiang chu ti turin ka inpeih e.

“Nung tura min siam ang ngeia nun ka duha. Hlimna dik chhar ka duha, mahni tana nun ai chuan damchhunga i rawngbawl ka duh a ni. Ka nunna i hnenah ka hlana, min chhandam tur leh i angchhunga min pawm ve turin ka ngen a che. Isua hmingin ka dil e. Amen.”    

[Lettu: Sangpuia]

Sunday, October 3, 2021

NUN AWMZIA

 Thuhriltu 12:13

NUN AWMZIA HI ENGNGE NI?



Bible-a kan hmuh, khawvel lal zawng zawngte hausakah ah leh finna a khum vek tu Lal Solomon-a khan, hringnun hi a hrechiang awm hle mai, nun hian awmzia a nei lem lo a ti a thlawt a ni. Pathianin a thinlunga finna thu a dahsak chu ngaithla turin khawvela mi zawng zawngte chuan Solomona chu an pan huai huai thin a (1 Lalte 10:24). Nimahsela Solomona meuh pawh khan “Ni hnuaia thil tih tak zawng zawng te chu ka hmu ta a, tin, ngai rawh, thil zawng zawng hi engmah lo leh thil lo thlawn mai a lo ni” (Thuhriltu 1:14) a ti a ni.

Nawmsipbawl te chu engmah lo a lo ni tih a hmu chhuak daih tawh a, thawhrimna te pawh hi vuivaina mai a ni a ti bawk a, khawvela hleineihna tam zia te pawh a hre daih tawh a ni. Pathianin mihringte chu tluang taka nung turin a siam a, nimahsela mihringte chuan an ti khirhkhan zo ta vek a ni tih hi Solomona hian a hmu chhuak chiang hle a ni.

Finna hre tur leh lei chunga thiltih tak zawng zawng hre tura chhun leh zan mu chhing lova a rilru a hman pawhin; Pathian thiltih zawng zawng, ni hnuaia tih takte chu miin a hmu chhuak thei lo tih a hmu a. Miin zawng eng ang mah sela, an hmu chhuak lo vang, mifingin hriat inring teh mah se, an hmu chhuak thei bawk hek lo vang a ti a ni (Thuhriltu 8:16).  

Kristian sakhua kan zui mek chungchang sawi daih teh ang. Sakhaw dangah chuan mihringin Pathian an zawnga. Kristiannaah chuan Pathianin mihring min zawnga. Isua zuitu kannih chuan, Isuan kan nun hi siam ṭhat aduha, midang tana nung turin min duh a ni. Solomonan Nun hi engmah lo mai a ni a tih a Nun awmzia hi kan hriat phawt angai a ni. 

Dam rei emaw dam rei loh emaw hi ani chuang lova. Hausak emaw retheih emaw pawh ani chuang heklo. Kan damchhunga Lal Isua zui hi kan tihtur ani a. Chu chu he khawvela kan awmchhung leh kan thihhnu pawha chatuana kan damna tur a ni. 

Isua hi zui tlak a ni a. Matthaia 4:19 ah Isuan, "Mi zui rawh u, tichuan mihring mantuah ka siam ang che u," a ti a. Kristianna chuan tawrhna pumpelh ringawt a zawng lova tuar chung pawha chawlh hahdam dan min zirtir a ni. Kristianna chuan tawrhna a lo thlen pawhin eng nge a chhan hriat a tum kher lova. Chu tawrhna aṭanga zirtur chu a zawng zawk a ni. 

Kristianna chuan mahni hma a sial lo va, midangte tana malsawmna kan nih theih dan ngawt min zirtira, chu chu Isua ngei pawhin ataka a zirtir anih avangin. Midang tana malsawmna kan nih chuan keini pawh malsawmin kan awm ṭhin. A tawp berah chuan, Pathian nena hringnun kan hman loh chuan nun hi engmah a lo ni lem lo va, a hrehawm thlawn mai a ni. 

“Heng thu zawng zawng khaikhawmna hi i ngaithla teh ang: Pathian tih la, a thu pek te vawng rawh; hei hi mihring zawng zawng tihtur chu a ni mai. Pathian chuan thiltih zawng zawng chungah ro a la rel dawn si a, thil inthup engkim, a chhia emaw, a tha emawte pawh, tih hi.” Thuhriltu 12:13.

 

 

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...