Wednesday, September 29, 2021

PATHIAN I HMATHLIR LAMAH I MIT LEN RAWH

 - Rick Warren

- 29 September, 2021



“I dan thu aṭanga thilmak ka hmuh theih nan, ka mitte hi mi tihvarsak ang che.” Sam 119:18.

Bible-ah Pathian hmathlir hmu thiam tam tak an awma, chung zingah chuan Isaia, Jeremia, Miriami, Estheri, Daniela, Jona, Ruthi, Mika leh Mari te an tel a ni. Pathian hmathlir hmuh thiam hi thil ropui tak a ni! Pathian chuan min hruai a duhna lam chu kan rilru lamah hlimthla angin chiang takin min hrilhfiah fo ṭhin.

A hlimthla hmu chunga ngaihtuahna hmang thiam te hnenah chuan a chipchiara sawi a ngai kher lo. Nangmah pawh i ni thei. Bible-a mi chanchin i chhiar khan, a tak ang maia chiang leh fiahin i hmu thei a ni. Lehkhabu i chhiar chuan, a thawnthu chu i mitthlaa i hmuthiam ang hian.   

Keini midang ho tan hian a harsa leh zual. Kei hi a hlimthlaa hmuthiammi ka ni lo a. A hlimthla ni loin, a thua ka ngaihtuah ṭhin vangin. 

A hlimthla nena thil ngaihtuahmi i nih loh chuan Pathian hmathlir chu engtin nge i neih theih ang le. 

Pakhatnaah chuan, Pathian hnenah zawhna bik chiang tak nei ang che.

Fianrial hun i hman hunah, Bible chhiar leh ṭawngṭaina i hman zawhin, ngawi rengin awm la, Pathian chu nghak rawh. Tihian Pathian zawt la, “Lalpa, engemaw tal ka hnena sawi duh i nei em?” Tichuan nghak ang che. Tihian zawt leh la, “Lalpa, ka ngaihtuah loh lam thil ka hriat tur ṭul a awm em?” Tichuan nghak leh ang che.

Jakoba 1:5 ah chuan. “In zingah tu pawhin finna a tlakchham chuan, mi zawng zawng hnena hau lo leh ui lova pe ṭhintu Pathian chu dil rawh se; chutichuan, a hnenah pek a ni ang” tih kan hmu a. Pathian chuan a hnena thurawn la ṭhin turin a duh che a, i dil chu chiang taka sawi turin a ti bawk che a. I dil hun a nghak che a ni.

Pahnihnaah chuan, Pathianin i hnena a sawi tum hre turin Pathian Thu chhiar ang che.

Sam 119:18-na hi châng ropui tak vawn tlak a ni: “I dan thu aṭanga thilmak ka hmuh theih nan, ka mitte hi mi tihvarsak ang che.” Pathian Thu i chhiar dawn apianga ṭawngṭaia bulṭanna tur châng ṭha tak a ni bawk. Harsatna i neih zawng zawng chhanna chu Bible-ah a awma. Amaherawh chu Pathian hmathlir hriat i duhnaah hian i nun hman chhoh zelna atan emaw tun hun atan ngei pawh hian Pathian Thu i chhiara, i zira, i vawna, i ngaihtuah a ngai a ni. 

Han ngaihtuah la

Pathian chhanna chu engvanga ngawi renga nghah harsa viau nge nia i hriat le?

Pathian hmaa ngawi renga awma zawhnate zawta a thu te zira hun hman chu engin nge dal che?

Eng hmathlir nge Pathianin a pek che? Eng chu nge i tih ngai ni a i hriat? 

[Lettu: Sangpuia]

Tuesday, September 28, 2021

FIANRIAL HUN INSIAM RAWH

 - Rick Warren

- 28 September, 2021



“Nang erawh chu i ṭawngṭaiin, i pindan chhungrilah lut la, i kawng khar la, i Pa a ruka awm hnenah chuan ṭawngṭai rawh; tichuan, i Pa a ruka hmu ṭhintu chuan a rul ang che.” (Matthaia 6:6.)

I hringnunah thil bengchheng a tam viau chuan Pathianin i hnenah thu a sawi thei lovang. Nangmah chauha awma, fianrial hun hman i mamawh a ni. Hei hi Pathian nena fianrial hun kan tih chu a ni.

Isuan heti hian a sawia, “Nang erawh chu i ṭawngṭaiin, i pindan chhungrilah lut la, i kawng khar la, i Pa a ruka awm hnenah chuan ṭawngṭai rawh; tichuan, i Pa a ruka hmu ṭhintu chuan a rul ang che.” (Matthaia 6:6.)

Hei hi Pathian aw hriat theihna hmanrua leh i nuna Pathian hmathlir i hmuh theihna a ni a: Pathianin biak che a duh a ni.

Hei hi hrechhuak ang che, Pathian hi i nghak lova, aman a nghak zawk che a ni. Pathian chuan amah nena inlaichinna nei turin a siam che a. Nitina hun hmanpui che a duh a ni. Nitina inhmuhna hun siam a duha. Pathianin a nghak mek che a ni.

Tunlaia fianrial hun hman chu a harsa mai thei e. I nunah hian thil bengchheng engzat chiah nge awm tih ka hre lo. I car--ah khan rimawi i ngaithla emaw i benga vuahin emaw i ngaithla reng mai thei e. Innghahkhawmna hmun, dawrah leh kailawnah te pawh rimawi a awm vek. Chuvang chuan i nunah hian fianrial hun hi a awm thlawt lo a ni. 

Inah naupang in neih phei chuan a harsa leh zual awm e. Mahse beiseina a awmin ka hria. Susanna Wesley hmeichhe ropui tak khan, fa 18 lai a nei a. A fate zinga pakhat, John-a chuan Methodist kohhran hi a dina, America ramah Kristianna a darhzau theih nan a thawh hlawk hle a ni. A fapa dang, Charles-a chuan hla 6,000 chuang a phuah a ni.

Fa 18 i neia engtin nge fianrial hun i neih theih zawk an tih kha. A chanchin an ziahnaah chuan, chawhnu apiangin a ṭhutna ngainat berah a thu chawta, a apron-in a lu a khuha, darkhar khat hun a hmang ṭhin. A fate chuan an nu chu a apron nena a inkhuh tawh chuan, “tumahin an tibuai ngam lo, an tibuai a nih vaih chuan a sawhkhawk an tuar zel!”

Wesley chuan a nu ṭawngṭaina chuan a nun chu a hruai hle a ti a ni.

Susanna Wesley chuan nitinin Pathian nen hun an hmang thei a, nang pawhin i ti thei a ni. Fianrial hun i neih theihna tur chuan hma la la, Pathian chu bia ang che.  

Han ngaihtuah la

Ni khatah engtia rei nge ngawi renga hun i hman ṭhin le?

Fianrial hun i hman theih nan i chhungte chu engtin nge i puih theih ang, i chhungten an thlawpa, an tibuai lohna tur chein?

Fianrial hun nitina i hman chuan nangmah mai ni loin i chhungteah nghawng eng nge a neih theih ang?

[Lettu: Sangpuia]

Sunday, September 26, 2021

ISUA ZUI

 Johana 21:15-17



ISUA ZUI AWMZIA

Sual Setana kalsana Lal Isua zui

Sual kalsana Krista tana ke pen

Nunhlui thihsana nunthara nun

Mahni duhdan kalsana Krista tana inpek

Engkim chan huama Krista zui


ENGTIA ZUI TUR NGE?

Lal Isuan “Tupawhin mi zui a duh chuan mahni hrehawm pawisa lovin nitin a kraws pu in mi zui rawh se.” Luka 9:23 a ti a, mahni nawmna leh hamthatna kan ngaihtuah chhung chuan Lal Isua kan la zui tak tak lo tihna a ni. Chapona tlang atanga chhuk thlain, tlawmna leh thuawihna nena Amah Lal Isua Krista chu kan zui angai a ni.

ENGTIA REI NGE KAN ZUI ANG?

Eng chen nge Isua hi kan zui ang le? Kum thum nge? kum li nge? Malsawmna min pek chhung zawng kan zui dawn? Term leh condition neiin Isua  hi zui chi a ni lova, thu delhkilh neilo (unconditional) leh term tawp chin nei lova kan zui a ngai a ni. Thupuan 2:10  ah chuan “Thih thlengin rinawmin lo awm rawh, tichuan nunna lallukhum ka pe ang che.” a ti a, kan duh chen leh kan peih chin chauha Isua zui hi a rem lo a ni. Duh huna zuia, duh loh leh peihloh huna zuiloh ngawt kha Lal Isua zuitute awmdan tur a ni lo a ni.

PHATSAN NI/CHANG A AWM THEI ANG EM?

Kumkhuaa zui tur kan nih laiin, mihring kan nih miau avangin phatsan chang, zui theih loh chang kan nei leh mai thin. Lal Isua an man khan a zirtirte ngei pawh khan an thlahthlama, an tlanbosan  vek a nih kha (Mk 14:50). A huai deuh ber Petera ngei pawh khan ar vawi hnih a khuan hmain vawi thum lai a la phat hman tho a nih kha (Mk 14:72). Keini Isua zuitu inti te pawh hian Lal Isua chu kan phatsan zing thin khawp mai, nimahsela zirtirte anga kan zui nawn leh angai a ni.

ZUI TAK TAK CHU A HARSA ANG EM?

Harsa e, zirtirte pawn Isua thih hnuah pawh Amah zui zel harsa anti,  Petera ngei pawhin Isua chu zui zel harsa tiin a thiante  nen, an hna ngai thawkin, len a den pui leh a nih kha (Joh 21:3) Amah a theihnghilh a, a zui chhunzawm zel loh avangin Lal Isua rilru a na a ni, chiang leh zual zawkin Petera hnenah Isuan question vawi hnih khat mai ni lo, vawi thum lai a siam a nih kha. “Simon, Johana fapa, hengte ai hian nangin kei mi hmangaih zawk em?... Simon, Johana fapa, nangin kei mi hmangaih em? … Simon, Johana fapa, nangin kei mi ngaina em?” John 21:15-18  Petera ang bawk hian Lal Isua hi kan lo phatsan tawh pawh a ni maithei, kan lo tisual ve tawh pawh a ni thei a, inchhira, sima, inlam letin Amah Isau kan zui thar a, kan zui nawn a ngai a ni. 

THLARAU THIANGHLIM A PAWIMAWH

Zirtirte kha Lal Isua vana a lawn chhoh hnu khan an hlau thawng em em a, Isuan Thlarau Thianghlim a thlen hma chu Jerusalem chhuahsan miah lo turin a ti a (Tirh 1:4), tichuan Thlarau Thianghlim a lo thlen hnu chuan (Tirh 2:1-2), chanchin tha chu huai takin an hril ngam ta a ni, hetiang chiah hian keimahniah Thlarau Thianghlim a lo thlen chuan, huai takin Lal Isua kan zui ngam anga, Isua chanchin te pawh huai takin kan hril thei ve thei tawh ang.

Wednesday, September 22, 2021

I THLARAU ZUNG CHU ENGTIN NGE I ṬHAN TIR?

 - Rick Warren

- 22 September, 2021



“Tin, pialtlep chunga mi chu heng mi hi an ni; an hriat veleh thu chu lawm taka pawmte hi; nimahsela, zung reng an nei lo, rei lo te chauh an awih a, thlem an nih hunin an bansan leh ṭhin.” Luka 8:13.

Fur lai chuan California chhim lama hnim zawng zawngte chu an hring ṭhina, ram pangparte leh hnim chi hrang hrangte chu an par a, an mawi hle a ni. Mahse, ruahtui a lo tawpa, tlang te chu a lo eng leh ta a. Engnge a chhan? A chhan chu hnim chuan zung pawnlang takah a neih vang a ni. Hnim zungte chu an pawnlang em ema, fur lai anga tui hip turin lei aṭanga thuk takah an zuk chhuk thei lo a ni.

Zung pawnlang tak nei thlai chu, a tirah ṭiakin lang ṭha mahse, an daih rei lova reiloteah an vuai mai ṭhin a ni. Chutiang chiah chu i thlarau nun pawh a ni. Eng sik leh sa pawh paltlang turin, zung thuk tak i mamawh a ni.

Luka 8:13 ah hei hi kan hmu a, “Tin, pialtlep chunga mi chu heng mi hi an ni; an hriat veleh thu chu lawm taka pawmte hi; nimahsela, zung reng an nei lo, rei lo te chauh an awih a, thlem an nih hunin an bansan leh ṭhin.”

A chang chuan Pathian Thu i ngaihthlakin nangmah inthlak danglam pawh tum lem lovin i lo phur viau maithei a ni. Atthlak takin i che a. Rilru no takin i chhang leta. Ngaihtuah mang lovin i che ṭhin. Amaherawhchu Thu chu nangmahah inchiah turin hun i nghak thei lo a ni.

Chutianga awm chu i duh tak zet em? Ni lo! Nun pawnlang tak neih chu i duh lova, nun thuk tak neih i duh a ni. Thlarau zung thuk tak kaih i duha - chutichuan chawlh hun te pawh lo thleng se, kum tam tak i daih anga, rah i chhuah zel thei dawn a ni. Thli na tak a lo tlehin in chhungkua a mi dam lo emaw i ṭhian hnai zinga mi thi awm ta sela, harsatna chuan a chhem leng zo lovang che, a chhan chu zung nghet tak i kaih avangin.

I thlarau zung chu engtin nge i ṭhantir le? Nitin Pathian nena inpawlin hun hmang la, i ringtu pui dangte nen kartin hun hman tum bawk ang che. Nangmaha Pathian nena inpawlna hun neila, i ringtu pui midangte nena hun hman tum bawk ang che.

Nitinin Pathian nen in inpawl loh chuan, hun harsaah i lo ro anga, chhem bovin i awm mai ang. Nangmah chauh chuan i inchingfel thei lovang. Nitin Pathian nena hun in hmannaah ngaihthlak tum ang che. Thu la, ngawi rengin hun hmang rawh. Bible chhiar la Pathian bia ang che. Hla te pawh ngaithla la. Thil i ziak duh a nih phei chuan ziak ang che. Pathian lam i ngaihtuah theihna thil chu engpawh ti ang che.      

Kartina inhmu khawm thei tur pawl emaw ṭhianho i mamawh bawk a ni. Mi tumah nun thlir thiam vek an awm lo. Mawlmang taka khawsa ve chawt te kan ni hlawma. In ṭhianho emaw pawlho emaw chuan i hmuh theih loh thil te chu an hmuhsak thei che a ni. Chuvang chuan kan inmamawh tawn ṭheuh a ni. In pawl emaw ṭhianho emaw infuih tawnna aṭang chuan thil thar in zir chhuak a, thuk zawkah in zung te chu a kaih ta ṭhin a ni.

Reiloteah emaw nakin deuhah emaw, i nun chuan hun harsaah a hruai thleng ang che. Zawhna ni ta chu chung hunah te pawh chuan dam khaw chhuak tur leh ṭhanglian turin zung thuk tak i kaih dawn em tih hi a ni.

Han ngaihtuah la

I thlarau zung chu a pawn lang nge a thuk? I nuna eng thil thleng chuan nge a takin a lantir?

Nangmah chauha Pathian nena inpawlna hun hman nge nuam i tiha, i Kristian pui dang te nena hun hman nuam i tih zawk? Engvang nge?

Thlarau zung thuk zawka kaih tura ṭhanglian turin i nunah eng thil nge ataka thlak danglam i duh le? 

[Lettu: Sangpuia]

Tuesday, September 21, 2021

PATHIAN AW HRIATTHEIHNA DALTU THIL PATHUM

 - Rick Warren

- 21 September, 2021



“Chuvangin, bawlhhlawh zawng zawng leh sual khat liam chu dah bo ula, thu tuh, in thlarau chhandam thei chu, thuhnuairawlh takin pawm rawh u.” Jakoba 1:21.

Pathian aw leh cell phone hian inanna an neih  enngnge? An pahnih hi chiang taka hre tur chuan awmna hmun dik taka awm angai ve ve a ni.

I cell phone-in thil ri a dawnsawn dan chu chu an inanglo ang. In lianpuiah chuan a ri pawh a chianglo deuh theia. Rampalaileng ah phei chuan i hmang thei kher lo ang. Signal ṭha leh mumal nei turin i awmna hmun a dik angai a ni.

Chutiang chiah chu Pathian nena in inlaichinnaa i awmdan tur dik chu. Chiang leh mumal taka Pathian aw hre tur chuan, i awmna hmun a dik phawt angai a ni.  

Pathian aw hre tura awmna hmun diklo chu engnge ni? Awmna hmun dikloa i awm chuan, i rilru i khara – Pathian duh zawng nilo in i duhzawng tih i duh ṭhin. Awmna hmun dikloa i awm chuan,  i rilru chu a sak tlata – Pathian aw hriat i duhlo ṭhin.

Pathian lamah i rilru a sakna leh i kharna chhan chu engnge? Heng thil pathumte hi Pathian aw hriatna daltute chu anni:

1. Chapona. I nunah Pathian mamawhlo nia i inhriat leh nangmahin i thil chinfel i duhzawk chuan, Pathian aw hre turin i ngaithlalo a ni maithei a ni. Chapona chuan Pathianin nangmaha thu a sawi tur ngaithla tura inhawnna a dal thei a ni.     

2. Hlauhna. Mi tam tak chuan Pathian aw an hre theilo, achhan chu Pathian aw hriat an hlauh vang a ni. Pathian aw i hriat emaw Pathian hruaia i awm emaw chuan sakhaw lama kalsual emaw i hlauh vang a ni. Anihloh vek pawhin Pathian aw ngaihthlaa Pathian hruaia awm tur chuan i nunah thil engemaw thlak danglam ngai a awm dawna chu chu i hlauh vang pawh a ni maithei a ni. 

3. Khakna. Midang rilru natna tur emaw, thil vei emaw, huatna tur emaw i neih chuan, Pathian aw i hre theilo ang – achhan chu i rilru a sak tlata. Thinlung sak tlatna chuan nangmah i inven phah tlata, Pathian pawh i hmangaih theilo a ni.  

“Chuvangin, bawlhhlawh zawng zawng leh sual khat liam chu dah bo ula, thu tuh, in thlarau chhandam thei chu, thuhnuairawlh takin pawm rawh u.” Jakoba 1:21.

Pathian aw i hriat theihlohna leh i nuna a thil tumte i nunchhuah pui theihlohna chhan khaknate, hlauhnate leh chaponate hi paih a hun tawh a ni. Chutianga i tih chuan thinlung inhawng takin Pathian aw i hre thei anga, thuhnuairawlh taka pawmin i hnena a thusawi chu i ngaithla thei ang.    

Han ngaihtuah la

Engtin nge Pathian aw emaw a duh zawnga a hruaina emaw chu i hriat? Hun kaltaah khan nangmahah engtin nge thu a sawi?

Khakna, hlauhna leh chaponate hi engtin nge tunlaiin nangmahah a thawh? Chungte chu la bo turin engtin nge hma i lak ang?

Pathianin ti tura a tih che tun thleng maia ila ngaihthah reng thil engnge ni? Vawiinah hian engtin nge i chhan dawn le? 

[Lettu: Sangpuia]

Sunday, September 19, 2021

TUARNA CHUNGCHANG

 Joba 1:20-22, 2:7-10

Vanlalthansanga





Mihring te hian kan duh emaw duhlo emaw tuarna, natna leh harsatna chi hrang hrang hi kan hma chhawn ve tlat mai. Hetia kan ngaihdan mawlmang takah hi chuan, kan tihsual leh tihdikloh ni lovah chuan chetsualpalhna emaw khuarel chhiatna emaw thil tha lo emaw natna emaw te hi chu tuarlo tura inngaihna a awm fo thin a ni. Abik takin, mi nunau pawisawilo leh naupang ten an tuar hian hriatthiam harsa kan ti a, a runthlak bik a, Pathian awm leh awm loh chungchangah pawh zawhna a awm fo thin reng a ni. Thenkhatte phei chuan Pathian hi a awm ngei ang tih an ring thei tawh lova, Pathian awm hi an hnawl phah ta reng  a ni.

Chutiang ang dinhmun harsa leh khirhkhan tak tuartute chuan hringnun hi hahthlak tiin hrehawm pawh an ti hle ang. Nimahse, he khawvela ka lo pian ve avang hian tuarna te hi chu tawk ve thei ka ni tlat. Pathianin tuarna leh harsatnate pawh kan tawh a phalve tlat si a ni. Chuvangin chhiatna nasa tak tuartu pawh nimah ila, tuarna hian awmzia a nei a ni tih kan zir angaia, chu tawrhna atang chuan zirtur kan neih leh beiseitur kan neihte kan ngaihtuah a ngai zawk a ni. 

Tuarna avang hian zawhna hrang hrang chhansen loh tur khawp a lut thei a ni. Chumi avang chuan tuarna awmzia leh zirtur kan neihte kan zirho dawn a ni.

Tuarna hi Rinna fiahna  a ni thei

Mihring ina kan tuarnate hi Pathianin kan rinna fiahna atan pawh a hmang thin a ni. Joba ngei pawh kha Pathianin a rinna fiahna atan khan a tuar kha a phal tlat mai. Joba kha tuartir a phala, nimahsela a nunna chu zuahturin setana hnenah a sawi a ni (Joba 2:6). A tuar hnuah Joba chu rinna kawngah hlawkna neiin, “Benga hriatna mai zawngin ka hre tawh chia, mahse tunah zawng ka hmu ta che” (Joba 42:5) a ti thei ta a ni. Chutiang chiah chuan hringnuna harsatna leh tuarna lo thlengah hian kan rinna kawng hmalam kan panna a ni thei a ni. 

Tuarna chuan thatna a keng tel thin

Atheist hovin Pathian an hnawlna chhan chu, he khawvelah hian tuarna a awm avang leh chu tuarna chuan thatna a keng tel thei lovah an ngai. “Pathian chu mi tha a nih chuan, ‘Tuarna tel lo khawvel a siam ngei ang” an ti a ni. Nimahsela tuarna tello khawvel a awm silo, tuarna chuan hmalamah thatna tamtak a keng tel zawk a ni. Hmeichhe nauvei na tuar rum vawng vawng chuan nausen duhawm tak a rawn pian tir thin a, kha a nau pai leh nau vei tuarna ringawt kha duh lovin pumpelhtir kan tum chuan, nausen duhawm tak kha a lo piang thei dawn si lo. Chuvang chuan tuarna chuan awmzia a nei theia, thatna a keng tel thin bawk a ni.

Tuarna hi malsawmna a ni thei

Tuarna chuan ringtu nunah malsawmna a thlen zawk thin a ni tih hi Joba nun atang bawk hian kan zir thei ang. “Lalpa chuan Joba chu a hmaa a neih let hnih a pe leh ta a” (Joba 42:10) tih kan hmu a, “chutichuan, Lalpa chuan Joba hun hnuhnung chu a tir aia nasa takin mal a sawm a: beram singkhat leh sangli, sanghawngsei sangruk, sebawng tuak sangkhat leh sabengtungpui sangkhat a nei a. Fapa pasarih leh fanu pathum a nei bawk a” tih kan hmu a ni. Heilo pawh hi sawi tur hrang hrang a awm thei ang, tuarna atanga Pathian hmu thar hi sawi tur an awm nual bawk a ni, chung zawng zawngte avang chuan he leia kan tuarna hi kan tan malsawmna a ni thei a ni.

Ringtu nunah tuarna kan mamawh

Pathianin mihringte a hmangaihna chu tuarnaah a rawn ti lang tlat mai. Kraws-a Lal Isua tuarna chu Pathianin mihringfate a hmangaihzia tarlanna chiangtak a ni tlat mai ni. Mihringte hi Pathian ropuina chang zo tawhlote kan nih avangin, tuarna tello chuan khawvel hi a awm thei tawh lo a ni. Ringtu nunah hian tuarna hi kan mamawh ve hrim hrim a, a chhan chu tuarna chuan mihring nun a siam tha thei zawk a ni, chuvang chuan ringtu chuan tuarna a hmachhawna, a luhchilh chuan, tuar chung a hneh thei a, tuar chungin beiseina thar a nei thei zel bawk a ni.

Isua angin kan tuar ve tur a ni

Chanchintha laipui chu tuarna hi a ni, tuarna avangin nunna kan neih theih phaha, tuarna avangin thihna leh thawhlehna a awma, beisei tur kan neih ve theih phah a ni. Kristan kraws-a min tuarsakna avang hian ringtute hian kan tuar ve a ngai a ni. Lal Isua nun kan tawmpui theihna chu kan tuar ve hian a ni. A tawp berah chuan, “Krista tuarnaahte tuarpuitute innihzia ang zelin lawm zawk rawh u, chutichuan ropuina a lo lan hunah chuan nangni pawh hlim takin in lawm ang.” I Petera 4:13.

Wednesday, September 15, 2021

ṬAWNGṬAINA TAK TAK CHUAN MI NARAN CHUNGLAM NUN MIN NEIHTIR

 - Rick Warren

- 15 September, 2021



“[Pathian] chuan kan dil leh ngaihtuah aia nasa zawkin a ti theia, keimahnia awm a thiltihtheihna ang zelin.” Ephesi 3:20 (NIV).

Pathian chuan i nun hi a zawng zawnga hmang turin a duh che a. Suangtuahna leh tum pawh nei lova - nun naran mai hmang turin a duh lo che a ni. Nimina kan zirho tak ang khan, Pathian chuan thil tum lian tak nei tur leh rinnaa ṭhanglian zel turin a duh che a ni. 

Ṭawngṭaina nun tak nei turin a duh bawk che a ni

Jabeza chuan ṭawngṭaina nun tak a neia. Chu chu a tum a tihhlawhtlin theih nana a thuruk dik tak chu a ni. Heti hian a ṭawngṭaia, “Aw, mal mi sawm sawm ngei ngei la, ka ramri hi mi zauh la, i kut chuan mi awmpuiin lungngaihna ka chungah a thlen loh nan sual lak ata mi thiarfihlim ang che,” (1 Chronicles 4:10). Tichuan tihian a chhunzawmna kan hmua, “Pathianin a thil dil chu a hlawhtlintir a.”

Pathian tih theih piah lam i dilin i suangtuah thei lo tih i hria em? Bible chuan heti hian a ti, “[Pathian] chuan kan dil leh ngaihtuah aia nasa zawkin a ti theia, keimahnia awm a thiltihtheihna ang zelin.” Ephesi 3:20 (NIV). I ngaihtuahnate kha ti zauvin thil ropui ber thlen theih dan tur te kha han suangtuah teh le – a tawpah chuan Pathian chuan i suangtuah phak bakin thil a la ti thei tih i hria ang.

Jabeza chuan hei hi a hriat chian avangin, kawng thumin a ṭawngṭaia:  

Jabezan a nunah Pathian thiltihtheihna a dil

Heti hian a dil, “Aw, mal mi sawm sawm ngei ngei la.” Nang chuan, “Pathian malsawmna chu ka dil tur a ni lo, chu chu mahni hmasialna a ni” i ti mai thei e. Mahse Pathian chuan, malsawm dila ṭawngṭaina chu ṭha a ti hle a ni. Ani chu vana awm police thiltithei tak, i chetsual rual ruala hrem tuma nghak che ang a ni lova. I nun chu malsawm a duh a ni.   

Jabeza chuan a nunah Pathian awmpuina a dil 

Heti hian a dila, “i kut chuan mi awmpui la.” Pathian awmpuina dilin a ṭawngṭai a ni. Jabeza chuan ram leh ramri zau zawk a neih chuan mawhphurhna sang zawk leh a mamawh pawh a tam zawk dawn tih a hria a ni. Chung zawng zawngah chuan Pathian ṭanpuina a mamawh dawn tih a hria a ni.  

Jabezan a nunah Pathian venhimna a dil

Heti hian a ṭawngṭaia, “Lungngaihna ka chungah a thlen loh nan sual lak ata mi thiarfihlim ang che,” Engvangin nge Jabezan Pathian venhimna a dil? A chhan chu hei hi a hrechiang a ni: Hlawhtlinna i chan nasat poh leh sawiseltu pawh i ngah zual ang. Chu chu Kristian nunah pawh a dik a ni: Pathian i hnaih zual poh leh i Kristianna pawh a nghet zual ang, chutih rual chuan sual pawhin a bei nasa zual ang che. 

I nunah Pathianin engnge ti se i duh? I harsatnaa ṭanpuina em ni? Dil rawh. I tum tihlawhtling tura ṭanpuina em ni? Dil rawh.

A hmasa berin, i duhthusam leh i tum te chu Pathian nena inrem turin ngaihtuah la. A dawt lehah chuan, Jabeza angin kawng thumin ṭawngṭai ang che – Pathian thiltihtheihna, Pathian awmpuina, leh Pathian venhimna dilin. Tichuan Pathianin i ṭawngṭaina chu engtin nge a chhan tih i thlir tawh mai rawh!

Han ngaihtuah la

Pathian hnena malsawmna dil hi a chang chuan kan tih loh tur niin i hria em? Engvangin nge chuti zawng chuan i rilru i put?

Engtianga zingin nge Pathian awmpuina i tihtawpa, engtianga zingin nge Pathian awmpuina dilin i ṭawngṭai? Pathian awmpuina chu a pawmawh viau nachhan engnge?

Engti kawng zawngin nge Pathian i hnaih poh leh Setanan tihbuai a tum che nia a hriat? 

[Lettu: Sangpuia]

Tuesday, September 14, 2021

AWMZE NEIA NUN HMAN DAN

 - Rick Warren

- 14 September, 2021



“Tin, Jabeza chu a unaute aia zahawm a ni a, a nu chuan, ‘Lungngai chunga ka hrin a ni a,’ tiin a hmingah Jabeza a ti a ni. Tin, Jabeza chuan, ‘Aw, mal mi sawm ngei ngei la, ka ramri hi mi zauh la, i kut chuan mi awmpuiin lungngaihna ka chungah a thlen loh nan sual lak ata mi thiarfihlim ang che,’ tiin Israel-te Pathian chu a au va. Tichuan, Pathianin a thil dil chu a hlawhtlintir a.” 1 Chronicles 4:9-10.

Mihring tute pawh hi a ṭha thei ang bera duan kan ni a. Mi naranah i inngai maithei e, mahse Pathian erawh chuan awmze nei taka nung turin a siam che a ni.

Bible-ah pawh mi naran hlir kan hmu a, amaherawhchu mi naran nun dan piahlamin an nung, a chhan chu anmahni kaltlangin Pathianin hna a thawk ang tih an rin vang a ni. Pathianin chhan neiin a siam hlawm a, chu chu tihlawhtling turin a duang a ni tih an ring a ni.

Entirna atan Jabeza hi lo la chhuak ila. Pathianin zahawmna a pe a ni tih kan hmu a, Bible-a 1 Chronicles ah khan bung 9 lai chu thlahtute chanchin chhuina a ni a. Chung hming lang te zinga a laihawlah chuan, Pathianin mi naran ve mai Jabeza chu chang 2 laiah thlang chhuakin a tarlang ve a ni.

Kan Bible chuan, “Tin, Jabeza chu a unaute aia zahawm a ni a, a nu chuan, ‘Lungngai chunga ka hrin a ni a,’ tiin a hmingah Jabeza a ti a ni. Tin, Jabeza chuan, ‘Aw, mal mi sawm sawm ngei ngei la, ka ramri hi mi zauh la, i kut chuan mi awmpuiin lungngaihna ka chungah a thlen loh nan sual lak ata mi thiarfihlim ang che,’ tiin Israel-te Pathian chu a au va. Tichuan, Pathianin a thil dil chu a hlawhtlintir a.” 1 Chronicles 4:9-10.

Bible chang 2 kan chhiarah khian Jabeza chungchang kan hriat tur chu a awm kim vek a. Chutah chuan thil dang lam vak tih a nei chuang lo, mi naran thil tih ang tho a ti a ni. 

Jabeza chu a dingchhuak thei tlat, thuruk pathum tihhlawhtlinpui a neih avangin. Vawiinah hian chung kawng hnih chu kan zir dawn a ni.

Thil tum lian tak a nei

Mi tam tak chu an nuna thil lo thleng pangngaiah an lungawia, Jabeza erawh chuan Pathianin awmze nei zawkin amah kaltlangin hna thawk se tih a duh a ni. Rilru zatve chauha nun hman a duh lova, awmze nei zawkin nun pumpui chu hlan a duh a ni.  

Jabeza chu mi tumruh tak mai a ni a, chutih ruala kan hriat tur pawimawh chu, kawng dik lamah a rilru chu a tha tho tlat a ni. Engtin nge Jabeza chu mahni hma a sial lo a ni tih leh a rilru chu a dik a ni tih kan hriat? Kan chhiar tak ang khan, “Pathianin a thil dil chu a hlawhtlintir a.” Dilna rintlak lo chu Pathianin a hlawhtlintir a rinawm lo a ni.

Mi tam tak chu an nun hi a fawn vel mai mai a. Tum mumal, ruahmanna lian tham, nun chhan mumal an nei lova. A rah chu, khawiah mah kalna bik an nei lova. Mi naran piah lama nun i duh chuan tum lian tak nei rawh! Nun awmzia hi engnge ni tih inzawta, “Engnge ka tih mek? Khawi lam nge ka zawh?” tih ngaihtuaha awm mai mai hun a ni tawh lo. Pathianin tum lian tak neia, rawngbawl duhnain a tih kal nei turin a duh che a ni.    

A rinna chu a ṭhanglian zel

Jabeza chuan Pathiana rinna thuk tak leh innghahna nun a neia. Theihna bik emaw talent emaw a neih sawi lan a ni lo. Bible chuan mi hausa a ni emaw mi lehkhathiam a ni emaw a sawi lang lo bawk. Mi pangngai ve mai a ni a, amaherawhchu rinna pangngai piahlam a nei thung a ni.

Hringnunah hian theihna leh talent ai pawha pawimawh a awm a. Rinna hi a ni. Mi tam tak talent ṭha tak tak nei awm mai mai an awm laiin rinna nei te chuan thil ropui tak an ti thung a ni. Rinna chu nangmah kaltlangin Pathianin hna a thawk ang tih rinna hi a ni.

Mi naran i nihna aṭang chuan engtin nge i tal chhuah ang le? Jabeza ang hian, tum lian tak leh rinnaa ṭhanglian nun leh thil tih theih loh te ti thei turin Pathianah innghat ang che. Missionary William Carey khan ṭum khat chu heti hian a sawi a, “Pathian tan thil ropui tak tih tum la, Pathian hnen aṭangin thil ropui tak beisei bawk ang che.”  

Naktukah chuan Jabeza hlawhtlinna thuruk pathumna, Jabeza a lo dinchhuah theihna leh ṭawngṭaina nun tak a neihna chanchin kan zirho dawn a ni. 

Han ngaihtuah la

Duhthusam emaw tum emaw lian tak, a taka tihlawhtling tura Pathian hnena dil duh i neih engnge ni?

I duhthusam emaw i tum emaw puitlin turin i ngaihdan chu engvanga dah pawmawh viau ṭhin nge i nih?

I tum chu tihlawhtling turin i theihna leh talent nge i ngaih pawimawh, Pathian zawk? Pathiana innghat leh zual turin vawiinah hian engtin nge hma i lak dawn le?

[Lettu: Sangpuia]

Sunday, September 12, 2021

TAWNGTAIIN RAM I LA ANG

 Matthaia 7:7-11; Phil 4:6 



Ṭawngṭai hi nuam kan ti em? A chang chuan kan ti lo a ni ti rawh u. A tuina kan pawh loh vang a ni. Kuhva ei mi chuan kuhva hi a tui an ti em em a, a tuina an pawh miau avangin ei reng an duh ṭhin a ni. Chutiang chiah chuan ṭawngṭai hi nuam ti tur chuan a tuina kan pawh angai a ni. Ṭawngṭai tuina leh a nawmna pawh tur chuan, ṭawngṭai tuina leh chakna kan neihloh lai pawhin kan ṭawngṭai fan fan angai a ni. 

Tawngtai mi an tih mi pathum

John Hyde-a hi Hyde Tawngtaia an ti mai thina, India rama Missionary-a lokal a ni. Mite chuan John Hyde-a a tawngtai chuan anmahni a khawih a, an mur ur ur mai thin tih an sawi a ni. John Hyde-a tawngtaina theihna phenah hian mi pakhat a awma, chu chu a pa thianpa a ni (chu pa chu missionary nih chak em em kal thei silo a ni). Chu pa chuan John Hyde-a tan tihian alo tawngtaia “Duhtak John, Thlarau Thianghlim i khah hma chu ka lo tawngtaisak reng ang che,” a ti a ni. Chu pa chu tunge a nih khawvelin an hre lo. Mahse, a tawngtaina chuan malsawmna chu Hyde-a hnenah a thlen a, tichuan ‘Hyde Tawngtaia’ kan lo nei ta a ni. 

Mary Slessor - Africa khawthlang rama Missionary ngaihsanawm tak Mary Slessor chu a nunah tawngtaina in awmzia aneih dan an zawt a. Heti hian a chhang a: “Ka damchhung hi ni tin darkar tin tawngtaina chhanna vurin a awm a; taksa hriselna te, rilru hahna laka chhanchhuahna te, mak taka hruaina te, hlauhawm tuktlawmna te, a hun taka chaw ei tur hmuh te, tling lo taka ka rawngbawlna ka chhunzawm theih nan te leh ka nun zel nan ka dilnate chhanin a awm thin. Pathian chuan mak kan tih khawpin tawngtaina a chhang thin tih kan finfiah thei a. Pathianin ka tawngtaina a chhang a ni tih ka hria” a ti a ni. 

Sir H.M. Stanley-a, ram hmuchhuaktu ropui tak chuan heti hian a ziak a: “Kei tehlul hian tawngtaina hi a sawt lo tia sawi ngam tur ka ni lo ve. Tih tak zeta ka dil chuan chhanin a awm thin. Ka hnung zuitute hlauhawmin a hual vel laiin, kaihhruaina eng dilin ka tawngtai thin a. An rilru manganna atanga kawng dika hruai chhuak turin kaihhruaina eng a lo chhuak thin. Pathian hmaa ka dilnate kan hlan zo, kan thawh rual rual hian kan tawngtaina chhan a ni tih kan hre thei a, lungawina eng chuan min tikhat thin a ni. Tawngtainate hi chhanin awm thin tih fiahna ka neihte hian min tilungawi hle a ni” a ti a ni. 

Bible-a tawngtai mi pahnih

Hani – lungngai leh mangang em em a tawngtai chu Pathianin a chhang a ni. Hani chuan fa a nei thei lova, a pasal Elkana chuan inthawini a lo thlen chuan, a nupui Penini leh leh a fapate leh afanute zawng zawng chu chanvo a siam a; Hani chu hmangaih em em mah se, Lalpan fa nei thei lova a siam avangin chan khat chauh a siamsak a. Fa a neih theih loh avanga a lungngaihna tizual turin amah ertu Penini chuan a lo deuhsawh thin a. Chutianga kum tin, a tih avangin Lalpa in a han kal apiang chuan a lungngaihna chu a lo chawthawhsak thin a, chutichuan a tap atap a, chaw pawh a ei thei thin lo. Hani chu a rilru a mangang em em a, Lalpa hnenah chuan a tawngtaia, lungchhe takin a tap a, thu a tiama, tichuan Pathianin tawngtaina a chhanga Samuela a pe ta a ni. 

Elija – Elija chu keimahni nungchang ang pu mihring bawk a ni a, a ni chuan ruah sur loh nan thahnemngai takin a tawngtai a; tin, kum thum leh thla ruk chhung zanwg lei chungah ruah a sur ta lo va. Tin, a tawngtai leh a, vanin ruah a surtir a, leiin a rahte a rawn chhuah tir leh ta a ni tih kan hria a ni. 

Ṭawngṭaiin Pathian i bepawp ang

Ṭawngṭai si Pathian bepawp lo kan awm ṭhin em? Kan Ṭawngṭaiin a thlawn maiin kan ṭawngṭai tur a ni lova, Thlarauva kan ṭawngṭai theihna turin kan ṭang tur a ni. Biak Ina Inkhawm khap a ni a, ṭawngṭai erawh chu khap a ni ve lo. I duh hun hunah nangmahin emawi thiante nen emaw in ṭawngṭai thei a sin. 

Ṭawngṭaina hi Indona a ni

Tawngtai hi thlarauva indona a ni a. Ṭawngṭaiin hmelma Setana leh a thiltihtheihna te kan bei tihna a ni. Sual thiltihtheihnate chu kan do va kan hneh zel angai a ni. Kan tawngṭai hian sual kan do a, kan hneh zel thei a ni. 

Ṭawngṭaia mi hrat khawkheng kan nih angai a ni

Mahni tan mai ni lo midang tan kan ṭawngṭai a hun ve tawh a ni. Ṭawngṭaia hrat lak a ngai a ni – George Muller-a chuan beidawng lo vin kum 63 aia rei a thian pakhat tan a tawngtai a, a thih hnu ah a tawngtaina chu a rah kan hmu a, a ruang an vui hma in, a tawngtai saka chu a piang thar a ni. 

Tawngtaiin Pathian Ram i la zel ang

Hun thim leh hun harsa kan tawh mekah hian ṭawngṭaiin Pathian i dawr ang u. Tun hmain kanlo ti ngailo anih pawhin vawiin aṭang hian ṭawngṭai mi ni turin i inbuatsaih ang aw. Ṭawngṭai lovin Pathian hnathawh kan nghak ngawt dawn em ni? Ni lo ve, kan duhna leh kan beiseina te chu ṭawngṭaiin kan dil anga, anin min chhang dawn a ni. Ṭawngṭaiin Pathian kan chettir thei a ni. Ṭawngṭai thiltihtheihna kan theihnghilh em ni? Tawngtaiin Pathian Ram kan la zel thei a ni. Ringtu awm mai mai kan nih a hun ta lo, tawngtaiin Pathian kan karlet angai a ni. Engkim tawngtai chunga kan dil hian Pathianin kan tawngtainate chu min hriatsakin min ngaithlak sak thin a ni.

 

Wednesday, September 8, 2021

HARSATNA PALTLANG TURIN PATHIANA AWM RENG A ṬUL

 - Rick Warren

- 8 September, 2021



“Jehosaphata chuan a hlau va, Pathian hruaina ṭawngṭaiin a dil a.” 2 Chronicles 20:3.

Harsatna a lo thlenin, Pathiana harsatna thlen dan hrilh leh a hnena ṭanpuina dila bul ṭan hi kan tih tur a ni. Amah chu biaa, i rilru bun ruak turin a duh che a ni. Amaherawh chu i mamawh hrilhin ṭawngṭaina bul ṭan suh ang che. A hmasa berah chuan ama hnenah intulut turin a duh che a ni. 

Lal ram pathumte lungruala Jehosaphata leh Israel beih an tum khan, lal chuan engti kawng zawng mahin a hneh thei dawn lo tih a hria a, a ṭawngṭai a ni. Chu a ṭawngṭaina chuan Pathian hnena ṭawngṭaia bul ṭan dan tur a zirtir che a ni.

A hmasa berah chuan Pathian ropuizia inhrilh nawn ang che

Jehosaphata chu heti hian a ṭawngṭaia, “Aw Lalpa, kan pi leh pute Pathian, vana Pathian i ni lawm ni? I kutah chuan thiltihtheihna leh chakna a awma, tuma chelh rual i ni lo va.” 2 Chronicles 20:6.

I thunun theih piah lam thil dila i ṭawngṭai a nih chuan, harsatna chu ngaihtuah bur lo la. Pathian ropuizia ngaihtuah zawk ang che. I rilruah Pathianin hmun a chan tam poh leh, i harsatna chu a te tial tial ang.

Pathian thiltihtheihna hi tawp chin nei lo a ni tih inhrilh nawn leh ang che  

“Aw kan Pathian, he rama chengte hi i mi Israel-te i hnawh chhuahsak a, i ṭhian Abrahama thlahte chatuan atan i pe a ni lawm ni? ” 2 Chronicles 20:7.

Khawvela thuneihna zawng zawng neitu chu Pathian a ni tih i hriat chhuah chuan, ani chu a rintlak a ni tih i hria ang. I ṭawngṭaiin, Pathianin nangmah a ṭanpuinate, mi dang leh Bible-a mite a ṭanpui tawhna te  ngaihtuah ang che.

Pathian chu a thutiam tawh hriattir nawn bawk ang che

Jehosaphata khan Pathianin Israel chu an ram a ni kumkhua dawn tih a tiam tawh chu a hrilh nawn a. Pathian chuan i tan pawh thu a tiam tho a ni. A nihna takah chuan i tana thutiam tam tak Bible-ah a awm a ni. I faten i thutiam tawh hrilh nawn che sela, hrehawm i ti viau maithei a ni. Mahse Pathian erawh chu a Thu sawi tawh hrilh nawn leh chu a lawm zawng tak a ni.   

A tawp berah chuan, harsatna paltlang chu Pathian dil rawh le

Jehosaphata chuan amah eptute chungchang heti hian a sawi a. “Aw kan Pathian, an chungah ro i rel dawn lawm ni? Mi chu zozai, mi rawn bei tura lo thawkte chu han bei thei ziazang kan ni si lo va; a tih ngaihna reng reng kan hre bawk hek lo, i lam kan lo hawi mai zawk a ni e.” 2 Chronicles 20:12

Han ngaihtuah la

I thunun theih loh thil i hmachhawnin tunge i biak hmasak ber? I harsatna chu engtia nasa a nihin nge Pathian hnenah i thlen ṭhin?

Eng harsatna bik i tawhin nge Pathian ṭanpuina chu harsatna paltlang turin i mamawh?

Pathianin a Thu hmangin thu a tiam che tih engtin nge i hriat? 

[Lettu: Sangpuia]

Tuesday, September 7, 2021

PATHIAN THU CHUAN THAWPIKNA A TI KIANGA, CHAWLHNA MIN PE.

  - Rick Warren

- 7 September, 2021



“A dik apiang te, a zahawm apiang te, a fel apiang te, a thianghlim apiang te, a duhawm apiang te, a thangmawi apiang te – ṭhatna reng a awma, fakna reng a awm phawt chuan – chung chu ngaihtuah rawh u.” Philippi 4:8.

Thutak lama ngaihtuahna pek reng chu a harsa fo ṭhina. Bible chuan heti hian a ti, “A dik apiang te, a zahawm apiang te, a fel apiang te, a thianghlim apiang te, a duhawm apiang te, a thangmawi apiang te –ṭhatna reng a awma, fakna reng a awm phawt chuan – chung chu ngaihtuah rawh u.” Philippi 4:8.

Hei hian rilru lama inthlakna a phuta. Chumi awmzia chu chin dan thar ṭha zawk i ching chhuak dawn tihna a ni.

Dawtin i rilru chu nitin a chawk buai ṭhina. Social media leh fakna ṭhenkhat chuan anmahni duh dan a thil i ngaihtuaha, i inthuam emaw, i awm emaw a nih loh chuan pawimawhna i nei lo an ti ang che. I lo puitlin deuha lehkha emaw infiamna lam emaw i thiam loh chuan, ṭangkaina nei lo an ti leh che a.   

He khawvel hi chu dawt thuin a khata, ṭhenkhat phei chu i awih hiala. Mahse khangte kha thudik lo an ni.

Chung thudik lo beih letna ṭha ber chu i rilru kha thudika chhun khah a ni. Pathian fa i nih hi thudik chu a ni. A tan i pawimawh a ni. Isuan thutak i hriat chuan, chu thutak chuan a chhuah zalen ang che a ti a ni.

Chhuak zalen tur chuan paltlang tur a awm tihna a ni. Paltlang tur nei la ka duh che a ni. Mahse chu chu Pathian Thua i awm chauhin a theih a ni, Bible, nitin chhiarin, minute reilo te pawh nise. 

Ti thei lo anga i inngai a nih chuan, social media emaw, TV emaw, chanchinbu emaw chhiara hun i hman zat kha han ngaihtuah teh. Thudik aia dawt thu zawkin i rilru a luahkhah reng chuan engtin nge rilru hrisel chu i neih theih ang?

I thil hriat zawng zawng hi thudik a ni vek lo. I thil sawi zawng zawng hi a dik vek bawk hek lo. Nitin Bible chhiarin ngaihtuah la, a chhan chu Pathian chuan thudik chauh a sawi a ni. Nangma chungchang a sawi te chu a rintlaka, nangma chungchanga thutiam a neih te pawh a hlen ang, Pathian chuan a thutiam a hlen ṭhin avangin.

Thil dik ngaihtuaha i rilru i sen chuan eng nge lo thleng le?

“Pathian thlamuanna, rilru reng renga hriat sen loh khan, in thinlung leh in ngaihtuahnate chu Krista Isuaah chuan a vensak ang che u.” Philippi 4:7.

I thinlung leh ngaihtuahna te chu chawlhtir i duh em? Chu chu mi tu te pawhina kan paltlang ngai a ni: thawpikna tlem zawk leh hahchawlhna tam zawk. Vawiinah hian Pathian Thu hmangin paltlang tur chuan bul ṭan ang che.

Han ngaihtuah la

Nitina i thil tih ṭhin Pathian Thu chhiar nana i thlak theih si eng nge ni? 

I thil ngaihthlak chu a dik nge dik lo engtin nge i hriat theih ang?

Kum engemaw zat i lo chin ṭhan tawh thil dik lo pakhat tal eng nge i neih? Bible-in thudik a tih chu eng nge? 

[Lettu: Sangpuia]

Sunday, September 5, 2021

KEHSAWM

  “Pathian chuan ‘lungchhiate chu a tidama, an hliamnate chu a tuam thin a ni’” Sam 147:3.

- Vanlalthansanga



Tumah hian he kan hringnun kawng kan zawhnaah hian harsatna leh buaina tawk turah kan inruat lova, kan in phallo bawk a ni. Nimahsela, kan hriatmiah loh laiin buaina chhumpui chuan min chima, kan nun ram a lo chauva, rilru na taka awmin, kan thinlung hi a lo kehsawm ta thin a ni.

Thinlung meuh a lo kehsawm tawh chuan, han tang leh ik tur hi kan awm tawh lova, beidawnna mai lo chu hmachhuan tur kan neilo thin a ni. Khawilam kawng nge ka zawh ang ti a kan in ngaihtuah ngial pawhin – rilru hrehawmna chuan min hneh leh zel thin a, kan tho chhuak hlei thei thin lo.

Nimahsela, heti hian min ngaihtuah tir – nun beidawng leh chau takin kan Lal Isua pawh khan a hringnun a lo hmang ve tawh a sin, “ka pa he no hian min pel lul rawh se..” a tih chung chung pawh khan, mangang leh hrehtak chungin thihna lamtluang a zawh a nih kha. Kan nun hi a kehsawm lohva, a kehchhiat lohva, a tuiral vek phawt loh chuan – hringnun awmzia hi kan hrethiam tak tak thei thin lo a ni. Chumi avang tak chuan hringnun kehsawm te ban phak ni turin Lal Isua kha a rawn keh sawm tawh bawk a ni. Rilru, taksa leh thlarau natnain i chungah thla a zar mek a nih pawhin mamawh chhanna leh chawlh hahdamna Lal Isua i tawh hma chuan kal zel rawh.

Thinlung meuh a kehchhiat a, a kehsawm tawh chuan damlai reng reng hi a awm thei lo. Taksa pumpui mai hi chhungril atang hian ana tana, ana chhuak vek thin. Inhnemna tur kan zawng, kan van ruai, kan hmu zo thin silo. Mi beidawngte hi mi khawngaihthlak an va ni teh lul em! Mihring hi a beidawna, beisei tur a neih tawh loh chuan dam leh zelna chhan tur a nei tawhlo a ni. Lal Isua ah inhnemna i zawn loh chuan i thlan tur chu mahni intihhlum a ni.

Pathianin hringnun hi kan zira, kan hriatthiam theihnan thil tam tam tak min paltlang tir thin a lo ni zawk a; a chang chuan kan thil tawnte hi a duhawm lo thin hle reng a ni. A chang chuan kan tihsual avanga tuar ni tein kan inhre thin a, achang leh ‘Pathian remruat dan hi ava mak em! hetiang ang hun harsa leh hrehawm in paltlang tir chu’ tiin Pathian pawh kan dem duh rum rum thin a ni. 

Kan thalaipui thenkhatte thinlung kehchhia avanga mahni an intihhlum leh ringawt thin hi chu a pawi ka va’n ti em. Lal Isua ah DAMNA a awm a ni tih hi han ngaihtuah chhuak hman hram thin se aw ka ti vawng vawng thin. Damtlak an la nih zia leh beisei tur anla neih tamzia hrechhuak thin se aw…damna chhan tur tam tak an la nei asin. “Pathian chuan ‘lungchhiate chu a tidama, an hliamnate chu a tuam thin a ni’” Sam 147:3.

Wednesday, September 1, 2021

RILRU PHAWRHA ṬAWNGṬAINA PATHIANIN A DUH

 - Rick Warren

- 1 September, 2021



“Lalpa ka Pathian hnenah chuan ka ṭawngṭaia, ka inpuanga.” Daniela 9:4.

Hetiang hian i ṭawngṭai tawh em? “Tunah hian ka lo muhil dawn ta a. Lalpa ka thlarau ka kawltir a che. Ka harh leh hmaa ka lo thi a nih pawhin, Lalpa ka thlarau nei ang che.” 

A nih leh hetiang hian i ti ṭhin bawk em? “Kan chaw ei tur hi taksa ṭhanlen nan malsawm ang che.”

Mi tam zawk chuan a tlangpuia kan tih dan a nih avangin khitiang khian kan ṭawngṭai ṭhin a. Mahse, eng nge a awmzia? Eng nge an sawi tum tak? 

Kan ṭawngṭaiin thil tam tak kan sawia, thudanga kan luh hmain kan thu ngai bawk kan chham leh fo ṭhin.

Pathian chuan takna tel lo leh rilru inphawrhna tel lo ṭawngṭaina a zawng lova. Mi tu emawina ṭawngṭaina hla an siamsa hmang pawhin ṭawngṭai mah la Pathianin pawi a ti lo. Pathian chuan ṭawngṭaia ṭawngkam thiamna ringawt a ngaihtuah lova. Ṭawngṭainaa thu chham tam ai mah chuan a phena rilru inphawrha ṭawngṭaina a duh zawk a ni. 

Ṭawngṭainaa Pathian hnena i dil chu engpawh nise – taksa thil, bungraw lam, thlarau thil emaw rilru lam emaw pawh nise – rilru inphawrh chungin dil ang che. Chu chu Pathian duhzawng a ni.

Danielan Israelte hruai tura finna a mamawh khan, “tihtakzetin Pathian hnenah dilin a ṭawngṭai a ni” Daniela 9:3. Dilna chu rilru inphawrh chunga dilna a ni a. Nitina dilna satliah ang hi a ni lo.

Tihtakzeta dilna leh rilru zawng zawnga zawnna a ni. Pathianin chutianga dilna chu a ngaithla a ni.

He lai chang hi lo en ve teh “Lalpa ka Pathian hnenah chuan ka ṭawngṭaia, ka inpuanga.” 

Hei hi ṭawngṭaina satliah a ni lova. Tih tak zeta ṭawngṭaina a ni. Hetianga i ṭawngṭai kha engtik nge ni kha?

Mimal takin inhre lo mahila, chutianga tihtakzeta i ṭawngṭai chu ka hrilh thei ang che, harsatna khirhkhan tak i tawrh lai a ni. Thil a kaltluan purh lai chuan khatiang khan i ṭawngṭai ngai lo a ni. I thinlung i leihbuaa, natna i tawrhin Pathian hnenah dilna i thlen a ni.

Amaherawhchu i ṭawngṭaina chu thinlung bunruaka tih vek theih loh a ni chuang lo. Han hawi velin kan chhehvela thil thleng te han en la, Pathian rilru ti kehsawm thil te chuan i rilru a ti kehsawm ve ang. Pathian pawh thinlung no ve tak a nih angin nang pawhin thinlunga hmangaihna nen i ṭawmpui thei ang.

Vawiinah hian i thinlung leihbua la. Chu i ṭawngṭai chhanna aṭang chuan amah a hnaihtir chein rinna thuk zawk a neihtir ang che.  

Han ngaihtuah la

I rilru tak tak Pathian hmaa i hawn vek ṭum kha engtik nge? Eng nge i ṭawngṭaina hla chu? 

Nunphung hi a pangngaia a kal hian, Pathianin amah chu eng nge dil turin a duh che?

Thinlung no tak i ni lo a nih pawhin Pathian hnenah i rilru zawng zawng phawrha i ṭawngṭai theih nan engtin nge i dil theih ang? 

[Lettu: Sangpuia]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...