Wednesday, September 30, 2026

HMANGAIHNA TLUANTLING CHUAN KHAWNGAIHNA A PHUR CHHUAK ṬHIN

_I Nunpui Tur Hmangaihna Hmuh leh Vawn Ngheh Dan_

- Rick Warren
- September 30, 2026
_"Hmangaihnain a dawhthei a..." 1 Korinth 13:7._

In nupa nun chu rei tak awh tura i duh chuan hmangaihna a awm reng tura thutlukna khirh tak tak i siam a ngai ang, chu thutlukna chu vawi tam tak i siam nawn leh ṭhin a ngai bawk ang. Chu thutlukna zinga pakhat chu nun harsa tak karah pawh ni se, khawngaihna lantir hi a ni.

Inneihna a rei poh leh mi chunga khawngaihna lantir loh a awlsam a. Khawngaihna, ngaihdamna, pawmna leh dawhtheihna nasa tak tel lovin inneihna reng reng a tlo thei lo. I kawppui chu i ngaihthiam a ngai a ni.

Vawi khat chauh khawngaihna lantir chu a awlsam a, chu chu thil lian tak a ni lo. A harsa zawk chu miin vawi tam tak min tihnat emaw, min tihthinur hian a ni. I Korinth 13:7 chuan "Hmangaihnain a dawhthei a”...a ti. The Message Bible chuan, "Hmangaihna chuan engkim a tuarchhuak ṭhin," a ti bawk.

Inneihnaa khawngaihna i lantir reng a ngaihna thil pathumte chu:

*An fel lohna leh an chak lohna ten a tithinrim che a nih chuan khawngaihna i lantir a ngai.*
Mi tu emaw i hmangaihna chu a rei poh leh a fel lohna i hrechiang ting mai ang. Mi dem ching nge, khawngaihna lantirtu emaw, thil sawisel reng nge, ngilneihna lantir emaw, famkim chauh phut tlat nge zahngaihna lantir tih i thlang thei ang. Thufingte 17:19 hi The Living Bible chuan, "Hmangaihna chuan tihsual a theihnghilh ṭhin," a ti.

Vawi khat chu hmeichhe pahnih hi biak ina an inkhawm zawh hnuah an ti ti a, pakhat chuan pakhat zawk hnenah chuan, "I pasal khan khatianga a tih kha i la hre reng em?" a ti a. Thil ṭha lo thleng tawh chanchin a sawi a ni. A chhân dan kha ka duh em em mai a: "Ka theihnghilh tawh tih chiang takin ka hria a ni," a lo ti a.

Ṭhian duh tak, thutlukna siam tur a ni e. Mi famkim lo pahnihin inlaichinna famkim an nei thei ang tih rin chu atthlak tak a ni. Khawngaihna i lantir tur a ni. Hmangaihna chuan mi dang fel lohna a ngai pawimawh lo. Hmangaihna chuan tihsual a theihnghilh ṭhin. Ephesi 4:2 chuan, “Kawng tinrengah inngaitlawm leh thuhnuairawlh takin awm ula, inphahhniam takin hmangaihna nen indawh tawn rawh u,” a ti.

*An thusawi emaw, an thiltihin emaw a tihnat che chuan khawngaina lantir a ngai.*
Thudik tak chu, mihring kan ni a, kan intina tawn ṭhin. Chu chu tum reng vang ni lovin, tum loh deuh pawhin a ni fo. Kan sawi loh tur thil kan sawi ṭhin a. Mahni kan inngaihtuah a, mahni hma kan sial ṭhin. Kan thusawi leh thiltihah kan fimlkhur lo ṭhin a ni. 

Ni khat chu mi pakhat nen kan inbia a. Ani chuan, “Thil ka tisual a, ka nupui chuan ‘historical’ a nei a,” a ti a. 

Kei chuan, “hysteria’ i tihna a ni maw! Ka lo ti a. Ani chuan, “Ni lo ve, historical a ni. Ka tihsual tawh zawng zawng min hrilh vek a ni,” a ti ta a.

Bible chuan, ‘thil sual a hre reng ngai hek lo,’ a ti. Hmangaihna tluantling neih i duh chuan i thlah a ngai a ni.

*An sualin khawngaihna i lantir a ngai.*
I kawppui chu sualah a tlu dawn a, a chang chuan i lakah emaw, Pathian lakah emaw, mi dang lakah emaw pawh a ni thei. Kolossa 3:13 chuan, “Indawh tawn ula, mi dang laka thu pawi in neih pawhin inngaidam tawn rawh u, Lalpan a ngaidam che u ang bawk hian ngaidam ve rawh u,” a ti. Hmangaihnain a ngaidam ṭhin.

Inneihna ropui tak chu mi pahnih ngaihdamna ngah tak inzawm tawnna hi a ni. 

Naktukah chuan hmangaihna tluantling nei tura duhthlanna chi hnih kan zir leh dawn nia.

Ngaihtuah zui atan

I kawppui fel lohnain a tithinrim che a nih chuan khawngaihna lantir awlsam i ti em? I kawppuiin a tihnat emaw, a tih thinrim chein, ‘chiang taka theihnghilh’ dan engtin nge i zir theih ang?

I kawppuiin a tihnat chein ‘historical’-ah i chhuah ṭhin em? Tihnatna chu silai mu anga khâwl khawm lovin engtin nge i thlah theih ang?

Nang leh i kawppui in tlûka, in sual ṭhin laiin, in inneihna chu mi ngaihdamna ngah tak pahnih inzawmnaah engtin nge i siam theih ang?

[ *Lettu: Marova Punte* ]

Tuesday, September 29, 2026

IN INNEIHNA PUMKHATNA VAWNGTU

 _I Nunpui Tur Hmangaihna Hmuh Chhuah leh Vawn Ngheh Dan_


- Rick Warren

- September 29, 2026



“Krista Isua, Lalpa chu in lawm ang khan, amaha zung kai leh rem chhoh deuh deuhva awmin, an zirtir che u ang khan in rinnaah chuan nghet taka awmin, lawm thu sawi lo uarin, amahah chuan awm rawh u.” Kolossa 2:7


In inneihna chu thantir zel in duh chuan, thil pawimawh deuh mai in tih theih chu: Isua lo zui zel rawh u tih hi.


In nupa inkarah harsatna in tawh pawhin, a suihzawm zel dawn che u a ni. In inneihna chu a tawp mai dawna i hriat pawhin, kaihthawh leh theihna thiltihtheihna a nei a ni.


Bible chuan, “Krista Isua, Lalpa chu in lawm ang khan, amaha zung kai leh rem chhoh deuh deuhva awmin, an zirtir che u ang khan in rinnaah chuan nghet taka awmin, lawm thu sawi lo uarin, amahah chuan awm rawh u.” Kolossa 2:6. Kum tamtak liam taah khan Isua chu i Lal leh Chhandamtuah ilo thlang tawh pawh a ni maithei, amah chu nitinina zui chhunzawm thlang zel ang che. 


Kolossa 2:7 ah chuan, “Krista Isua, Lalpa chu in lawm ang khan, amaha zung kai leh rem chhoh deuh deuhva awmin, an zirtir che u ang khan in rinnaah chuan nghet taka awmin, lawm thu sawi lo uarin, amahah chuan awm rawh u.” In inneihna chu engtinnge i kalpui zel dawn. A taka hman nghal tur thurawn ka lo pe ang che. 


Pakhatna, Isua chu in inneihna laipuiah dah rawh u. In than zel theih nan midang kristian nupa tawngtaipui tur zawng bawk rawh u. In thian te a remchang apiang sawm ula, in inah chaweiah te sawm rawh u.


Pahnihna, i kawppui tan tawngtai la, i kawppui nen tawngtai rawh u. “Chutichuan, tihdama in awm theihnan in sualte thupha chawi tawn ula, intawngtaisak tawn thin rawh u.” Jakoba 5:16. Damna chan i duh em? I duh ka ring a ni. Bible thu khan min hrilh chiang hle a ni. Pakhatna, i diklohna pawm la, pahnihna, midang tawngtai sak ula, intawngtaisak tawn rawh u.


A tawp berah chua, Pathian Thu awih rawh u. Thufingte 3:6 ah chuan, “I kawng zawng zawngah amah hre reng la, i kawngte chu a kawhhmuh zel ang che.” Pathian i hnaih poh leh i kawppui pawhin a hnaih ve ang, aman a pawt hnai dawn che u a ni.


Ka kawmthlang huanah redwood thing kum eng emaw chen liamtaah khan ka phun a. Thangkhat lian aia rei chu, a thang tha khawp mai. Nimahsela harsatna a tawk ve a, a thi dawn ta mai. A hnah te  a tla kawlh a. A tirah chuan a lo eng chhuak a, a hnuah a lo sen leh a. Charlir Brown Christma tree ang mai a ni tawh. A hnuah chuan kan tui pekna a chhiah a, tui a lo dawng lo reng a ni tih ka hmuchhuak a. Tichuan tui ka pe a, ka enkawl chho leh ta a. Tichuan a ngai a lo awh chho leh tan a. Thing thi tep tawh chu a lo thang tan ve leh ta a. 


In inneihnaah chuan harsatna in tawk mai thei. Tui hmuh loh vangin a lo ro vek a. Charlie Brown Christmas tree ang pawh in lo ni maithei e. Nimahsela in damchhuak leh thei a ni.


Isuaah chuan zung kaih tlat ula, in inrem chho leh thei ang. Inneihna thi lek lek tawh pawh a kaitho leh thei a ni.


Ngaihtuah zui atan


* Nitinin Isua zui i thlang em? I thlang lo anih chuan, Isua i zui theihnan engnge thlak danglam ngai i neih le?


* In inneihnaah chuan tu nge fuihtu ber che? Kawppui ila neilo anih chuan, tuin nge fuih thin che? Fuihtu i neihloh chuan, kristian thian emaw zawng ang che?


* I nunah eng berin nge nunna thar mamawh le? In inneihnaah nge, inlaichinna dangah nge, i nuna thil dangah nge. Chawl hlek la, amahah i nun remchhoh i tum meknaah hian Isua hnenah nun thar dil ang che.


*[Lettu: Sangpuia]*

Monday, September 28, 2026

I KAWPPUI FUIHTU BER NI RAWH

_I Nunpui Tur Hmangaihna Hmuh Chhuah leh Vawn Ngheh Dan_

- Rick Warren
- September 28, 2026
“’Vawiin’ an tih chhung hian ni tinin infuih tawn zawk rawh u; chuti lo chuan, in zinga mi tu pawh hi sual bumnaa tihkhauhvin in awm dah ang e.” Hebrai 3:13

Tu te pawh hian mi ringtu kan mamawh a. Chu chu Pathian nen a kan inzawm dan pawh a ni. Kawppui nei tawh i nih chuan, in inneihna chhan pakhat chu i kawppuiin a rin vang che a ni. Chutiang chiah chuan Pathianin a siam chhan che chu i kawppui fuihtu ber ni turin a ni.

Engvangin nge inrintawnna chu a pawimawh? Buaina khawvela kan chen vang a ni. Nangmah tihchhiat tumtu hi an lo awm leh nawlh thin a ni. Chuvang chuan chutiang karah chuan i kawppui i rintlat hi a pawimawh a ni.   

Vawi engzat nge inringtawn tur kan nih? Bible chuan, “’Vawiin’ an tih chhung hian ni tinin infuih tawn zawk rawh u; chuti lo chuan, in zinga mi tu pawh hi sual bumnaa tihkhauhvin in awm dah ang e.” Hebrai 3:13. Nitina kan tihtur a nih chu.

I kawppui nena in inrintawn theihna tur kawng thum a awm a:

In hlutna in vawn sak rawh u. In chhungkhur chu i faksak chuan a hlutna a sang sawt ang. I kawppui chu i fak chuan i kawppui hlutna leh in inneih hlutna chu a sang sawt ang. Bible chuan, “Lungkham neih hian mi a tihrehawm a, thu tha erawh chuan mi a tilawm thin.” Thufingte 12:25

A chang chuan i kawppui chungchangah chuan fakna tur i neilo a ni maithei e. Engmah fakna tur i neihloh pawhin nangmah then lo va, a neih duh vang che ringawt pawh kha i fak tur a ni.

In chakna kha in infaksak tur a ni. Kan infak hian kan par vul thin. I kawppui chakna chu i faksak chuan a thang zel ang. Tirhkoh Paula khan entawn tur tha tak mi hnutchhiah a. A hunlai khan korinth kohhrante khan hawn harsatna tam tak an nei a. Nimahsela a lehkhathawn ah chuan, “Nangni lamah chuan ka tawng ngamzia hi a nasa a ni; thlamuannain ka khat a, kan hrehawmna zawng zawngah chuan hlimin ka khat liam a.” 2 Korinth 7:4. An chakna chu a fak a, an thatna lai a hmuhsak a ni.

I kawppui thatna chu i hmuhsak ve a ngai a ni. A chhe lai ringawt i hmuh chuan a tha lai i hmuhsak thei lo vang. A tha lai i enchuan a tha lai ber i hmu thei ang. Chuvang chuan a chhe lai siamtha tu nih tum la. Thutlukna i siam dawnin danglamna hmuh tum rawh.

In rawngbawlna pawh in faksak ula. I kawppuiin Pathian rawng a bawl vena chu tanpui tlat rawh. “Chu chu, in rinna leh ka rinnain kan inthlamuan tawn theihna tur, ka tihna a ni.” Rom 1:12

Pathianin inneihna chu chen ula tih a duh a, chutiang bawkin thlarau lamah hma in sawn theihnan hmang tangkai bawk ula a duh a ni. Nimin khan inneihnaa harsatna awm thei thil pahnih kan zir a, vawiinah pawh pahnih dang kan zir leh dawn a ni.

I kawppui nen kawng hrang hrangah in inrintawna, in inngaihhlut tawn zel chuan. Infuihtawntu tha tak in ni ang a, in inlaichinna pawh a thang chho zel ang.

Ngaihtuah zui atan

* Vawiinah hian i kawppui emaw nangmah hnaih deuh tu che i fuihna tur tawngkam pakhat lek engnge ni ang?

* I kawppui emaw i fa emaw i thian emaw ina chakna lai a neih pakhat han ngaihtuah teh? Vawiinah hian chu mawlh chu ngaihtuah rawh?

* I kawppui emaw midang tangkai tak kaltlangin Pathianin nagmahah eng thil nge a tih? Chumi nun atanga Pathianin nangmaha hna a thawhnate han sawi teh?

*[Lettu: Sangpuia]*

Sunday, September 27, 2026

HMANGAIHNA DAI TAWH HER LUM LEH DAN

_I Nunpui Tur Hmangaihna Hmuh Chhuah Leh Vawn Reng Dan_

- Rick Warren 
- September 27, 2026
_"Inlainat tawnna nen inhmangaih ula, inchawimawi tawn hi nuam ti bawk rawh u."_ (Rom 12:10, NLT)

Rei lote chhunga inhmangaih nghal mai hi rei tak chhung atana inhmangaih chhunzawm reng ai hian a awl daih zawk. A tira induh tawnna te, inthlakhlelh tawnna ang te kha a awm tawh lo hnuin engtinnge i tih ang? Hmangaihna dai tawh kha engtinnge i tihnun leh ang?

Thupuan bua Isuan Ephesi khaw kohhran hnena a thuchah ang hian ti rawh. Heti hian an hnenah a sawi, _"I hmangaihna hmasa ber kha i ban tak avangin"_ (Thupuan 2:4). Chu hmangaihna chu an neih let leh theih dan tur heti hian a hrilh nghal bawk: Chutichuan, i tlûksan tâk chu hre reng la, simin, a tîra i thiltihte kha ti leh rawh"_ (Thupuan 2:5).

Hre reng a, kir leh a, sim a, an tih ṭhin te ti leh turin  a ti. Chutiang chiah chuan in inneih hlima in inhmangaihna kha i hre lum leh thei ang.

*A hmasa berah chuan, i hriat reng a ngai.* Hmangaihna nei let leh tur chuan eng vangin nge in inhmangaih tih i ngaihtuah leta i hriat reng a ngai hmasa. Pathianin hriat reng theihna a pe che a. Chumi hmang chuan hun hmasa lam nawmna leh hmangaih taka in awmdun lai hlimawmzia ngaihtuah let rawh.

*Pahnihnaah chuan i kir leh a ngai.* I hmangaih kha i hriat reng a ngai - mahsw Isua hnenah i kir leh a ṭul. I buaina leh nawrtu che lama insawrbing kha thil awlsam tak a ni. Mahse Isuan a lam hawia i ngaihtuahna sawrbing turin a duh che.

*Pathumnaah chuan, i sim a ngai.* Kawng dangin heti hian a sawi theih, i ngaihtuah dan leh chet dan thlak rawh tiin. Hmangaihna hi thinlunga a den dan a ni ngawt lo; duhthlanna a ni. "Ka tuizawng ni lovin i tuizawng ka dah pawimawh zawk ang" ti a inpekna a kawk a ni. Kan thinlunga kan dawnsawn dan hi kan thlak thei lo tih hi a dik ngei e. Mahse hmangaih turin duhthlan theihna i nei. Chuvang chuan hmangaihna lantir tura i thlan loh ṭhinte kha thlakin i ngaihtuah dan leh chet dan kha thlak rawh.

*Palinaah chuan, ti nawn rawh.* Isuan heti hian a ti, _"A tira i tih ṭhinte kha ti leh rawh"_ tiin (Thupuan 2:5). I lo tih ṭhin dan ang khan ti leh rawh tihna a ni. In inhmangaih tirha i tih ṭhin ang kha ti leh rawh. Ngaihtuahna hi thiltihin a zui ṭhin. A taka hmangaihna i lantir anga i tih leh chuan in induhtawnna te kha a lo let leh ang.

Inhmangaihna kara hmelma lian ber chu uirena emaw thinrimna emaw khâkna emaw a ni lo. Nangmah lo chu tumahin in inkarah hun an rawn siamsak dawn lo che. "Haw la i kawppui nen hun va hmang rawh" tiin hna lama i puten an ti dawn lo che. Nangmahin hun i siam a ngai. Tumahin an ti lo ang. In inneihna kha nangma siam, i tunnun ngei a ni dawn.

Rom 12:10-a kan hmuh ang hian vawiin aṭangin i nung ang, _"Inlainat tawnna nen inhmangaih ula, inchawimawi tawn hi nuam ti bawk rawh u."_

Ngaihtuah zui atan.

I nun kha thlir let la khawi laiah nge Isua aia thil dang i lo thlir? Isua lam hawi leh turin eng kawngin nge ke i pen theih ang?

Rom 12:10-a "Lainatna nena hmangaih" a tih hi engnge a awmzia ni le?

Hmangaihna hi duhthlanna a ni. Kar thar chhung hian i kawppui emaw midang tu emaw i hmangaih tih engtinnge i tihlan ang?

[Lettu: Mapuia Fanai]

Saturday, September 26, 2026

HMANGAIHNA CHU INHER REM THEIHNA HI A NI

_I Nunpui Tur Hmangaihna Hmuh Chhuah Leh Vawn Reng Dan_
   
- Rick Warren 
- September 26, 2026
_"Naute u, thu chauhvin i hmangaih suh ang u khai, lei chauhvin i hmangaih hek suh ang u, thiltih leh tihtakzetin ni zâwk rawh se."_ (1 Johana 3:18)

Inlaichinna rei tak daih nei tur chuan inhe rem thiam hi a pawimawh hle. Inneihna chungchangah hei hi a dik khawp mai.

Hun lokal zel turah inher rem a ngaih hun i tawng fo dawn. Naupang an lo ṭhang lian ang a. Awm hmun i sawn ang a. I hna i thlak thei bawk a. Tu emaw an dam lo ang a. Dinhmun leh thil thleng a inthlak ṭhin avangin inher rem i ngai fo ang. Inher rem tur chuan mahni hmasial loh a ngai.

Mahni hmasial loh hi hringnuna zirlai harsa berte zinga a mi a ni a, i inneihna kaltlanga Pathianin zirtir a duh ber che pawh a ni mai thei. Bible chuan chutiang chu hetiang hian a awm dan tur ang min hrilh: _"Naute u, thu chauhvin i hmangaih suh ang u khai, lei chauhvin i hmangaih hek suh ang u, thiltih leh tihtakzetin ni zâwk rawh se."_ (1 Johana 3:18)

I kawppuite tana inher rem tih khan thil tam tak a kawk. Tam tak zinga pakhat chu mahni chauh inngaihtuah lo va an mamawh ngaihsak hi a ni. Bible chuan heti hian a ti, _"Mahni tuizawng chauh ngaihtuah lovin midangte tuizawng pawh ngaihtuah rawh u"_ (Philippi 2:4, GNT). Kan inneih rei poh leh kan mamawh kan inngaihsaktawn tlem telh telh fo ṭhin. Mahse chu chu Pathianin in inkara thleng atana a duh loh zawk a ni si.

Inher rem kan tih chu Bible-in intulut tawn rawh u a tih hi a ni bawk. Midangte mamawh phuhruk anih theih nan i mamawh ni a i hriat ṭhenkhatte i hnawl a ngai. The Living Bible chuan heti hian a letling, _"Krista chawimawi a nih theih nan intulut tawn rawh u_" (Ephesi 5:21).

Kan damchhung hian inher remna tur tam tak a awm, mahse a chang chuan kan inher rem a ṭulna hi thil hoteah a ni ṭhin. Chung zingah chuan mut tlai hlek emaw mut hmak hlek emaw, i kawppuiin chawlh nan thingpui dawr a duhzawng a thlan emaw kha a ni thei. I peih mai loh lai pawha midang thusawi ngaihthlak kha a ni thei bawk.

Kan nitin nuna chung thil hote te a thutlukna kan siam chu kan inhmangaihna thuk tak lantirna a lo ni ṭhin.

Hmangaihna fiahna tak tak chu ṭawngkama kan sawi hi a ni lo. Kan chetziaah a ni. In chhungkuaah lungrualna ṭha zawk i duh em? Isuan i kawppui a thlir dan tur ang khan thlir rawh. Chu chuan engkim a thlak danglam ang. Isuan a thlir dan anga i kawppui kha i thlir chuan dawhtheihna thuk zawk neiin ngaihdam theihna i nei bawk ang a. In tana ṭha tur zel zawk i thlir ang.

Bible chuan heti hian a ti, _"chhelna leh thlamuanna Pathian chuan, Krista Isua sawi angin rilru hmun khat pu tawnin awmtîr che u rawh se."_   Isua rilru ang i put chuan in inneihna kha chhawm nung zel turin inher rem theihna a pe ang che.

Ngaihtuah zui atan.

In inlaichinnaah eng kawng hoteah nge i inher rem ve tawh? I lakah engtin nge mite an inher rem ve? Chung inher remna chu engtinnge Pathianin mal a sawm?

Hmangaihna chuan thiltihah a inlantir ṭhin. Kar thar awm turah hian eng kawng khatin nge hmangaihna i lantir ang?

Tute nena in inlaichinnaah nge Isua rilru ang pu tura a hnena i ṭawngṭai a ṭul?

[Lettu: Mapuia Fanai]

Friday, September 25, 2026

IN INNEIHNA BORUAK CHU I NGAIHVEN EM?

_I Nunpui tur Hmangaihna Hmuh leh Vawn Ngheh Dan_

By Rick Warren
September 25, 2026
“ _Tin, in hmangaihnain hriat famkimna leh bengvârna tinrêng a ngah lehzual nân ka ṭawngtai ṭhîn_ .” [Philippi 1:9] 

Inneihna reng reng chu a nghet deuh deuh loh vek chuan a keh chhe hret hret ṭhin. Inlaichinna reng reng a awm awmin a awm reng thei lo. 

Chutiang a nih takah chuan in inneihna chu engtin nge i tihngheh deuh deuh theih ang? Paula chu hetiang hian a sawi, “ _Tin, in hmangaihnain hriat famkimna leh bengvârna tinrêng a ngah lehzual nân ka ṭawngtai ṭhîn_ ,” tiin [Philippi 1:9].  Hriat zauna leh hriat fiahna a awm a ngai. Inneihna boruak ṭha tak chu amahin a awm mai lo; a man petu an awm ṭhin. 

In inneihnain hma a sawn theih dan kawng pawimawh ber chu chik taka lo ngaihven chu a ni. Ngaihven tih chu hmangaih tihna a ni bawk. Mi tu emaw i ngaihven a nih chuan, “Ka ngai hlu che a, ka tan i pawmawh a. I thu leh hla ka ngaithla chak,” i tihna a ni. 

Mi tute emaw i ngaihven a nih chuan, a nihna takah chuan i nun peng pakhat i hlan tihna a ni, a chhan chu i hun leh i nun chu thil inang deuh thaw an ni a, chu hun chu i kokir tawh ngai dawn lo. Mi tute emaw hnena i pek theih hlu ber chu i hun chu a ni.  

Midang ngaihven chu midang hmangaih dan kawng hmasa ber a ni! Mi tu emaw i ngaihven ṭan a, tichuan chu mi pawh chuan a lo ngaihven ṭan ta che a. 

Tun hmaa in inlaichinnaah chuan i kawppui chu eng ang takin nge i lo ngaihsak tawh ṭhin? Pangparte i leisak a, lehkha i thawn a, phone hmangin vawi eng emawzat i lo be tawh. Darkar tam i lo be tawh ṭhin. Chutiang hunah chuan, “Ka ngaihtuahna zawng zawng ka pe che” i lo ti tawh mai thei. Mahse in inneih a rei deuh deuh ang zelin, ngaiah i lo neih hlek hlek thei. Chhungkaw bill, fate, senso, leh tuizawngten inngaihsak tawnna chu an eiral thei. Tichuan nupa inlaichinna chu a ei chhe ta tial tial a ni.   

I nupui/pasal i ngaihven a ṭulna lai eng emaw zat ka han hrilh nawn ang che. Pakhatnaah chuan I nupui/pasal chu hmangaih rawh. Hmangaihna chu mite ngaihven a ni. A pahnihnaah chuan Pathian chuan i nupui/pasal kaltlang chuan a be thei che.  

Bible chuan, “ _Pathianin kawng khatin thu a sawi ṭhîn a, A ni, kawng hnih pawhin, pawisak loh pawh ni se_ ,” [Joba 33: 14]. A chang chuan kan ngaihthlak ngun loh avangin Pathian aw chu kan hre thei lo. Mahse Pathian chuan tunah ngei pawh khan i hnenah thu sawi a duh ang, i nupui/pasal chu a biakna che hmanrua pawimawh tak a ni thei! 

A chang chuan kan chapona avang chuan kan nupui/pasalte chu kan ngaihsak tawk lo fo; hre vek emaw kan inti ṭhin. Kan thil ngaihruat satliah vang a ni thei bawk; an thil sawi tur chu hriain kan lo inngai mai thei. A chang chuan kan nghak hman lo hrim hrim zawk pawh a ni bawk! Mahse chutiang atan chuan damdawi min pe: “ _Ka unau duh takte u, hêng hi hre rawh u. Mi tinin ngaihthlâk lam uar sela, sawi lam chuh lovin dawh thei rawh se_ ,” tiin [Jakoba 1: 19]. 

Thu ngaihthlak lam i hmanhmawh a, a sawi chhuah lam i muang thung a nih chuan zawi zawiin thinrim insumtheihna pawh i lo nei deuh deuh ang. Chu chuan in inneihna pawh a sawhnghetin a tihmasawn zel ang. I ngaihven hram hram zel a ngai a ni. 

Ngaihtuah zui atan. 

• Philipi 1: 9 in a sawi ang chuan hriat zauna leh hriat thiamna chuan hmangaihna kawngah a tisawt tih chu a takin i lo tawng ve tawh em? 
• Pathian chuan i nupui/pasal kaltlangin emaw midang hmangin emaw i hnenah thu a lo sawi tawh em? 
• Eng ang inlaichinna thuah nge ngaihthlak lam chak ngaia a sawi lam muan ngai? 

[ *Lettu:* Peka]

Thursday, September 24, 2026

NUPUI/PASAL INLAICHINNA SIAMṬHAT DAN KAWNG THUM

_I Nunpui tur Hmangaihna Hmuh leh Vawn Ngheh Dan_

By Rick Warren
September 24, 2026
“Ama lâwm zâwng atâna tih tum tûr leh bei tûra nangmahnia thawktu chu Pathian a ni si a.”
[Philippi 2:13]

In inneihna a nih dan ang taka rah chhuak tur chuan i nupui/pasal nena in inlaichinna chu siamṭhat nawn fo a ngai ang. Nimin lam khan i hun kal tawha thil thlengte i pawm a ngai tih chungchang kan sawi tawh a, in nupa inlaichinna chu Pathianin a siamṭha thei tih pawm la, i tih theih ang ang chu ṭha takin ti rawh. Heng thil pathumte hi i ti thei ang: 

Nupa inlaichinna siamṭha tur chuan i natna pai mek hmachhawn rawh. Chu chu kawng hnihin i hmachhawn thei ang – ngaihdam dilin emaw midang ngaidam emawin. 

I nupui/pasal hnenah chuan i dik lova, an ngaihdamna i mamawh a ni tih i pawm mai a ṭul chang vawi tam tak a awm ang. Bible chuan hetiang hian a sawi, “Chutichuan, tihdama in awm theih nân in sualte thupha chawi tawn ula, inṭawngṭaisak tawn ṭhîn rawh u,” tiin [Jakoba 5: 16]. Nupa inlaichinnaah chuan thil holam te te anga lang thumal i zir a ngai: Ka lo dik lo a ni. 

Bible chuan, “Tu pawhin tu chungah pawh thupawi nei ang ula, indawh tawnin inngaidam tawn ula; Lalpan a ngaidam che u ang tak khân ngaidam ve rawh u,” tiin min chah [Kolossa 3: 13]. “Ka ngaidam dawn lo,” i lo tih tlat chuan in nupa inlaichinna tichhe tur chuan thutlukna i siam tihna a lo ni. Nitina inngaihdamna tel lo chuan nupa inlaichinna a kal thei lo. 

A dawt lehah chuan, nupa inlaichinna siamṭha tur chuan midang ṭanpuina i dap thiam a ngai. 

Buaina chu nangmah maiin hmachhawn suh. Thudik chu hei hi a ni, kan khawtlang nun hian nupa inlaichinna ṭha chu a er ngar ngar zawk. Mi tam tak chuan “Chhuak daih rawh. Khatiang hmunah awm reng suh,” titein an lo sawi ve chamchi bawk. 

In inneihna thuthlung tichaka nangmahni ṭanpui duhtu che u hmuh chhuah chu thil awlsam a ni kher lo thei. Thufingte 24: 3 chuan hetiang hian a sawi, “Finnain in chu sak a ni a, Hriat thiamnain tihngheh a ni,” tiin. I ṭhiante zingah rawn tlak deuh emaw, kohhran counsellor emaw, nupa inlaichinna kawnga mithiam emaw an nupa inlaichinna zahawm taka kalpuitu thurawn chauh chu la ang che.  

A tawp berah chuan, nupa inlaichinna siamṭha tur chuan Isua rinna kawngah insawrbing rawh. 

Amah chu in nun leh nupa inlaichinnaah chuan a laiah awm rawh se. “Isua, kan rinna innghahna bul leh tifamkimtu chu i en tlat ang u” [Hebrai 12: 3]. 

Inneihna chu thutthleng ke pathum nei ang a ni. Thutthleng ke pahnih nei chu a tlu ang, a ngheh tlat loh avangin. Inneihna a hlawhtlin theihna tur chuan mi pathum an awm a ngai – nangmah, i kawppui, leh Pathian. Pathian chuan inneihna chu mi pahnih tana a ruahmanna a ni ngai lo. I nun leh nupa inlaichinnaah chuan Krista chu a lai takah a awm a ngai. 

Mi ṭhenkhat chuan an neih loh tur zawk nei angin an inngai a. Tichuan engnge i tih tak ang? I ṭhen ang em? Pathian chuan vawiin hian hetiang hian a chah duh che, “Aih! Thutlukna i siam tawh a. Thilmak hmangin ka lo siamṭha ang e. Nangmah leh i nupui/pasal kha ka lo thlak danglam ang che u, ka duh anga min chettir chuan nupa inlaichinna i duhthusam ngei chu ka chantir ang che,” tiin min chah. Ka ṭhian duh tak, nupa inlaichinna chu hmangaihna chu duhthlanna a ni. I thuneihna piah lam thil vek a ni lem lo. Hmangaih tura thutlukna i siam a nih chuan chu chu nangmahah pawh a lo let leh ang. 

Ngaihtuah zui atan. 

• Ngaihdamna dil emaw midang ngaihdam emaw chu thil harsa a ni em? In nupa inlaichinnaah chuan nitin i nunpui theihnan Pathian ṭanpuina dil ang che. 
• I ṭhenrual emaw chhungte zingah emaw khan an inneihna i ngaihsan deuh chu tu nge ni? An thil tawn aṭang chuan engnge i lo zir theih ang? 
• In inneihna thutthleng [stool] chuan ke pahnih nge a neih a, ke pathum zawk? Isua chu i nun leh inneihnaah chuan a lailum laia a awm lo a nih chuan a nghet ngai lo vang. In inneihna chu a tluk lohna tur leh a laia a awm theihna tur chuan eng rahbi nge i tih ngai ang? 

Isua chu i nun laimu luahtu a ni ngei em? 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Wednesday, September 23, 2026

INNEIHNA SIAMṬHAT LEH DAN

_I Nunpui tur Hmangaihna Hmuh leh Vawn Ngheh Dan_

- Rick Warren
- September 23, 2026
"Thilṭha tih i ning suh ang u, kan inthlahdah loh zawngin a hun takah chuan kan seng dawn si a," (Galatia 6:9).

Pathian hi inneihna siamṭha thiam a ni a. Thil thi tawh, tâwp tawh leh nunna nei tawh lo te nunna pe leh thei a ni.

TV a siamṭhatna i en chuan, a tum ber chu mihring danglam daih siam tura siam/chei a ni zawk. Inneihna siamṭhatnaah pawh Pathianin chutiang tho chuan a ti a. Nang leh i nupui/pasalin in neih sa chu la a, thil thar, phûrawm, mit la, lungawithlak leh ropui taka siam a duh a ni.

Inneihna siamṭhatna atana tih tur hmasa ber chu i mawhphurhna la ngam rawh tih hi a ni.

Galatia 6:5 chuan, "Mi tinin mahni phur an phur ṭheuh dawn si a," a ti. I nupui/pasal thiltih emaw rilru put hmang emaw i thunun thei lo. I tih theih awm chhun chu nangmah insiamṭhat a ni. Nangmah i thawh a, anmahni siamṭhat i bansan chuan a inthlak danglam vek mai ang. Danglam taka i chet chuan, i kawppui pawhin nangmah nena inlaichinna thar a siam lo thei lo vang.

Mawhphurhna lak duh lohna dâltu lian ber chu inrem lohna hi a ni. "Kan inmil thlawt lo a ni" tih hi kan hre fo. Mahse harsatna tak chu puitlin lohna vang a ni zawk. Kei chuan ka duh ka duh a, nang pawhin i duh i duh a. Kei ka luhlul a, nang pawh i luhlul a. Mahni hma ka sial a, nang pawhin i hma i sial a. Chutih rual chuan harsatnaah i mawhphurhna la a i pawm thei a nih chuan inneihna chu i tidam ṭan tihna a ni.

Inneihna chungchangah na takin i hliam a, beidawnna emaw, engmah ngaihsak peih lohna i nei a ni mai thei. Engtin pawh awm la, he thudik pakhat hi ka hrilh ang che. Pathian hi in inneihnaah a beidawng ve lo va, i tih theih loh chu amahin a ti thei a ni.

Pathianin inneihna siamṭhat a duh chhan chu tih tangkhan che emaw, i nun tihhrehawm emaw a tum vang a ni lo. Inṭhenna hi a hua a, a fate tan a natzia a hria. In inneihna chu hlawhtling se a duh, a chhan chu i nuna hlimna a thlen theihzia a hriat vang a ni.

Inneihna siamṭhatna kawng thumna chu a ṭul apiang tih tum hi a ni.

Living Bible chuan heti hian a sawi: "Thil ṭha tih i ning suh ang u, beidawng lova kan tih tlat chuan a hun takah malsawmna rah kan la seng dawn si a," (Galatia 6:9) a ti. Inneihna ropui tak i hmuh apiangin, vanneih vanga lo awm a ni lo tih hria ang che. Thawhrimna nasa tak rah a ni. Inneihna ropui tak hi a lo awm ringawt ngai lo. In inneihna a ṭhat zawkna turin thawhrim tak tak a ngai a ni.

Hma la tura chakna i neih theih nan engtin nge rilru lam chakna i hmuh ang? Ṭawngṭai la, thu awih rawh. ln inneihna atana beih zel theihna tura chakna dilin Pathian hnenah ṭawngṭai la, a hrilh apiang che chu zawm rawh.

Ngaihtuah zui atan

Siamṭhatna pangngai ang bawkin, Pathian chuan i neih sa a hmang thei a, chuta ṭang chuan in inneihna a siamṭha thei a ni. In inneihnaah khan eng thil ṭha nge i hmuh tawh?

In inneihna a harsatna awmte zingah eng te nge mawhphurhna i lak theih? Chu chuan i kawppui i hmuh dan a tinêm deuh em?

Pathianin in inneihna a thlahthlam lo tih hriatna chuan engtin nge a tihchak che? Chu thudik chuan a ṭul apiang ti tura inpeih turin ṭanpui che rawh se.

[ *Lettu: Marova Punte* ]

Tuesday, September 22, 2026

NUPA NUN HIMNA TUR

_I Nunpui Tur Hmangaihna Hmuh leh Vawn Ngheh Dan_

- Rick Warren
- September 22, 2026

“Pathian … chuan mitthi te a kai tho va, thil thar a siam bawk a.” Rom 4:17 (CEV)

Pathianin inneihna chu chen ula tih a duh a, chutiang bawkin thlarau lamah hma in sawn theihnan hmang tangkai bawk ula a duh a ni. Nimin khan inneihnaa harsatna awm thei thil pahnih kan zir a, vawiinah pawh pahnih dang kan zir leh dawn a ni.

Inneihnaa harsatna awm thei pathumna chu buaina chinfelloh hi a ni.

Buaina thenkhat chu nupa inkarah a awm a, chinfellohin a awm a awm a, a punlun ta thin a ni. I sawi chhuah duhlohna chhan chu mimal thil a nih vang pawh a ni mahna. Sum leh pai chungchang emaw nupa nun emaw chhungte inkar emaw fate emaw thildang emaw pawh a ni thei. Buaina chinfelloh chuan harsatna nasa zawk a thlen thin a ni.

Buaina chinfelloh chu kan than hnan tawh vang pawh a ni thei tho mai. Nupaa in insiam khan, puitling sa in in innei a. Chhungkua inrelbawldan engkim neisa in ni. Chhungkuaa in thil hrisel in tih leh hrisello in tih te pawh a inanglo ang. Chutiang chiah chuan i kawppui pawh chhungkaw dang daihah a seilian ve a. Tichuan in lo innei ta a, in chhungkua ina a pangngai in tih leh annin a pangngai an tih pawh kha a inanglo leh zel thei a ni.

Inneihna chuan harsatna a siam lo va. Thil a hailang zawk a ni. Tan i lakna tur a rawn hailang mai zawk a ni. Entirnan, i nu leh pa i hua a ni maithei e. In inneih hnuah chuan engtiklai pawhin i kawppui chuan chu chu a rawn sawichhuak thei a ni, chutiang anih chuan buaina chinfelloh chu i nunhlui ami i rawnchhawm a, i kawppui kiangah a awm tawh tihna a ni. 

Chutianga i tih chuan, thil pahnih ka sawi ang: pakhatna, i kawppui tan thil nuam tak a ni lo vang. Pahnihna, in inneihna boruak i tichhia tihna a ni ang. Inneihna hliam damna tha ber chu nunhlui hliam tihdam hi a ni.

Inneihnaa harsatna palina chu ngaihdam theihlohna hi a ni.

Inneihnaah ngaihdam theihlohna a awm chuan, chu inneihnaah chuan inngeihlohna nasa zawk a chhuak thin. Mi famkimlo kan ni a, a chang chuan tum reng vang leh tum reng vang ni lo te pawhin kan inti na palh thin. Thil kan tisual a, kan tlu leh mai thin. Mahni hmasial kan ni si a. I na fo dawn a ni, nangmah tina thei tur ber chu i hmangaih ber kha ala ni zui. 

Chuvang chuan ngaihdamna chu nupa nunah chuan a pawimawh hle a ni. In na te in theihnghilh lo va, in pai reng chuan a zualkai tulh tulh dawn a ni.

Inneihnaa thil tha lo ber engnge ni ang? I ngaihtuah kha a ni lo maithei. Ngaihdam theihlohna hi a ni.  Ngaihdam theihlohna chuan min phuar tlat thin a ni. I na zawng zawng te i pai reng chuan in nupa nun chu a harsa tulh tulh dawn. Ngaidam la, liam tir rawh. Ngaihdam theihlohna aia inneihna tichhe thei thildang a awm lo.

Inneihnaa harsatnate kawng li kan sawi hnuah, “Rick, kan nupa nun chungchang vek i sawi. Beisei tur kan nei em?” i ti mai thei. “Aw, beisei tur awm e. Rom 4:17 (CEV)
ah chuan chuan “Pathian … chuan mitthi te a kai tho va, thil thar a siam bawk a.” Pathianin mitthi a kaitho thei anih chuan, inneihna thi tawh pawh a kaitho leh thei ang. 

Naktuk lamah lo chhiar leh la, engtinnge Pathianin inneihna a siamthat dan kan zirho dawn a ni.

Ngaihtuah zui atan

* Khawiah nge inneihna hian harsatna a thlen lo va, a hailang zawk tih i hmuh? He zirlai atang hian engnge i zirchhuah?

* Nitina i kawppui ngaihdam chu i inhuam em? Engtinnge  ngaihdamna thinlung i put theihnan tan i lak ang?

* Pathianin inneihna thi tawh a kaihthawh leh i hmu em? Nupa inneihna humhim leh tura beitute chungah engnge lo thleng le?

*[Lettu: Sangpuia]*

NUPA NUN HIMNA TUR

_I Nunpui Tur Hmangaihna Hmuh leh Vawn Ngheh Dan_

- Rick Warren
- September 22, 2026

“Pathian … chuan mitthi te a kai tho va, thil thar a siam bawk a.” Rom 4:17 (CEV)

Pathianin inneihna chu chen ula tih a duh a, chutiang bawkin thlarau lamah hma in sawn theihnan hmang tangkai bawk ula a duh a ni. Nimin khan inneihnaa harsatna awm thei thil pahnih kan zir a, vawiinah pawh pahnih dang kan zir leh dawn a ni.

Inneihnaa harsatna awm thei pathumna chu buaina chinfelloh hi a ni.

Buaina thenkhat chu nupa inkarah a awm a, chinfellohin a awm a awm a, a punlun ta thin a ni. I sawi chhuah duhlohna chhan chu mimal thil a nih vang pawh a ni mahna. Sum leh pai chungchang emaw nupa nun emaw chhungte inkar emaw fate emaw thildang emaw pawh a ni thei. Buaina chinfelloh chuan harsatna nasa zawk a thlen thin a ni.

Buaina chinfelloh chu kan than hnan tawh vang pawh a ni thei tho mai. Nupaa in insiam khan, puitling sa in in innei a. Chhungkua inrelbawldan engkim neisa in ni. Chhungkuaa in thil hrisel in tih leh hrisello in tih te pawh a inanglo ang. Chutiang chiah chuan i kawppui pawh chhungkaw dang daihah a seilian ve a. Tichuan in lo innei ta a, in chhungkua ina a pangngai in tih leh annin a pangngai an tih pawh kha a inanglo leh zel thei a ni.

Inneihna chuan harsatna a siam lo va. Thil a hailang zawk a ni. Tan i lakna tur a rawn hailang mai zawk a ni. Entirnan, i nu leh pa i hua a ni maithei e. In inneih hnuah chuan engtiklai pawhin i kawppui chuan chu chu a rawn sawichhuak thei a ni, chutiang anih chuan buaina chinfelloh chu i nunhlui ami i rawnchhawm a, i kawppui kiangah a awm tawh tihna a ni. 

Chutianga i tih chuan, thil pahnih ka sawi ang: pakhatna, i kawppui tan thil nuam tak a ni lo vang. Pahnihna, in inneihna boruak i tichhia tihna a ni ang. Inneihna hliam damna tha ber chu nunhlui hliam tihdam hi a ni.

Inneihnaa harsatna palina chu ngaihdam theihlohna hi a ni.

Inneihnaah ngaihdam theihlohna a awm chuan, chu inneihnaah chuan inngeihlohna nasa zawk a chhuak thin. Mi famkimlo kan ni a, a chang chuan tum reng vang leh tum reng vang ni lo te pawhin kan inti na palh thin. Thil kan tisual a, kan tlu leh mai thin. Mahni hmasial kan ni si a. I na fo dawn a ni, nangmah tina thei tur ber chu i hmangaih ber kha ala ni zui. 

Chuvang chuan ngaihdamna chu nupa nunah chuan a pawimawh hle a ni. In na te in theihnghilh lo va, in pai reng chuan a zualkai tulh tulh dawn a ni.

Inneihnaa thil tha lo ber engnge ni ang? I ngaihtuah kha a ni lo maithei. Ngaihdam theihlohna hi a ni.  Ngaihdam theihlohna chuan min phuar tlat thin a ni. I na zawng zawng te i pai reng chuan in nupa nun chu a harsa tulh tulh dawn. Ngaidam la, liam tir rawh. Ngaihdam theihlohna aia inneihna tichhe thei thildang a awm lo.

Inneihnaa harsatnate kawng li kan sawi hnuah, “Rick, kan nupa nun chungchang vek i sawi. Beisei tur kan nei em?” i ti mai thei. “Aw, beisei tur awm e. Rom 4:17 (CEV)
ah chuan chuan “Pathian … chuan mitthi te a kai tho va, thil thar a siam bawk a.” Pathianin mitthi a kaitho thei anih chuan, inneihna thi tawh pawh a kaitho leh thei ang. 

Naktuk lamah lo chhiar leh la, engtinnge Pathianin inneihna a siamthat dan kan zirho dawn a ni.

Ngaihtuah zui atan

* Khawiah nge inneihna hian harsatna a thlen lo va, a hailang zawk tih i hmuh? He zirlai atang hian engnge i zirchhuah?

* Nitina i kawppui ngaihdam chu i inhuam em? Engtinnge  ngaihdamna thinlung i put theihnan tan i lak ang?

* Pathianin inneihna thi tawh a kaihthawh leh i hmu em? Nupa inneihna humhim leh tura beitute chungah engnge lo thleng le?

*[Lettu: Sangpuia]*

Monday, September 21, 2026

INNEIHNA NGHET NEIH THEIH DAN

_I Nunpui Tur Hmangaihna Hmuh leh Vawn Ngheh Dan_

- Rick Warren
- September 21, 2026
“Pathian … chuan mitthi te a kai tho va, thil thar a siam bawk a.” Rom 4:17 (CEV)

Pathian duhzawnga inneihna nghet hi nangmahin i tum a nih phawt chuan a theih a ni. Bible chuan “Pathian … chuan mitthi te a kai tho va, thil thar a siam bawk a.” Rom 4:17 (CEV)

Tunlaia inneihna tam tak hi chu thawnthu lungchhiatthlak takah a chang tawh a ni. I duh a i tum anih phawt chuan, Pathianin a thlak danglam thei che a, i kawppui rilru pawh a thlak thei a. In inneihna chu inneihna hlimawm leh Pathian chawimawina inneihnaah i la chantir thei a ni.

In inneihna i siamthat hmain, in inneihnaah chuan harsatna leh inngeihlohna thlentu chu i ngaihtuah chhuah phawt a ngai a ni. Harsatna thlentu thil pali lai a awm thei a, chung zinga pahnih chu vawiinah hian kan zir dawn a ni.  

Inneihnaa harsatna ber pakhat chu a tak thleng thei lo beiseina hi a ni.

Inneihnaah hian a tak thleng theilo tur hi kan beisei nasa em em a. Inneihnaah chuan engkim felfaia famkim vek turah an ngai thin, chu chuan a hruai diklo thin a ni. Lemchana kan hmuh ho hi a tak tak thleng theilo tur an channa a ni hlawm a ni tih pawh kan hriat a ngai.

Hei hi thudik chu a ni, inneihna chu mi famkimlo pahnih inneihna a ni. Mi famkimlo pahnih inkawp aia inlaichinna famkim hi a awm hran chuang lo. Inneihnaah chuan puitlin kan zir angai a ni. I kawppui kha mi famkim a ni lo va, nang pawh i ni hek lo.   

Inneihnaa harsatna dang pakhat chu danglamna inpawm theihlohna hi a ni.

Nang leh i kawppui kha in danglam a ni tih i zirchhuak em? In inneih hma kha chuan in danglamna ai chuan in inanna kha in sawi tam zawk thin a nih kha.

Nimahsela inneih hnuah chuan, in danglamna avangin in inhau ta mai. Tunhma kha a ang thei ta lo. Mipa leh hmeichhe ngaihtuahna hi chu a danglam daih a ni. Mipa chu Mars atanga lo kal anni a, hmeichhia chu Venus atanga lokal anni tih an sawi pawh i hre maithei a ni. Nimahsela chu chu a dik lo. Planet hran daih atanga chhuak kan ni lo. Kan inanlohna inzirtawna inpawm thiam mai tur kan ni a nih chu.

Chumi avang chuan i tuar tawp tur tihna a ni lo. I ngaihhlutsak tur a ni. Pathian min siam dana kan inanlohna hi chhan neiin min siam avang a ni.  

Kawppui nei tawh i nih chuan, thlarau lama i than theihnana Pathian hmanrua tha ber chu i kawppui kha a ni. Awmzenei takin Pathianin i than theihnan a hmang a ni.

In inneihnah i kawppui nena hma in sawn zel theih nan naktuk lamah harsatna dang pahnih kan zir leh ang.

Ngaihtuah zui atan

* Kawppui nei tawh i nih chuan, in inneih hmain atak chang thei lo tur beiseina engnge i neih? Chungte chu khawi atanga lo kal nge?

* Engkawngah nge i kawppui chu i ngaihnathiam theih ang, a chhan chu mi famkim a ni lo va, nang pawh i ni hek lo?

* I kawppui danglamna chu haw mai lo vin engtin nge i pawm theih ang? In danglamna chuan in nupa inkarah engtinnge thanlenna a siam theih ang? Engtinnge in danglamna chu in hman tangkai ang?

*[Lettu: Sangpuia]*

Sunday, September 20, 2026

ENGIN NGE INNEIHNA TINGHET?

_I Nunpui Tur Hmangaihna Hmuh Chhuah Leh Vawn Reng Dan_

- Rick Warren 
- September 20, 2026
_"I tan ani chu innghahna nghet, chhandamna, finna leh hriatna tuikhur a ni ang; Pathian ṭihna hi he robawm hawnna chahbi ngei chu a ni."_ (Isaia 33:6, NIV)

Inneihna hi nghet taka a dinna turin thil pathum a awm. Pahnih  a ni lo, pathum a ni. Nangmah, i kawppui leh Krista.

In inneihna kha nangmahni pahnih chauhin in thawh tur atan Pathianin a ti hauh lo. Inneihna hi ṭhutna ke thum nei (stool) ang hi a ni. Han ngaihtuah chiang teh. Hetiang ang ṭhutphah hi ke pahnih nei i hmu ngai lo ang. Ke pahnih neia siam anih chuan a ding nghet thei lo. A ding nghet zo lo ang, hetiang ang ṭhutna chuan ke pathum a neih a ngai.

Chutiang chiah chuan in nupa inkarah khan in pahnih chauh in nih chuan a tawk lo. Nangmah, i kawppui leh in inneih a din nghehna turin Pathian a tel a ngai.

Bible chuan heti hian a ti, _"Pathian thuruk, Krista ngei chu an hria ang. Ani chu Pathian finna leh hriatna robawm hawnna chahbi ngei chu a ni si a"_ (Kolossa 2:2, GNT)

Lirnghing a thlen fona hmuna cheng ka ni a. Kan in hian innghahna nghet ṭha tak a neih loh chuan lir a nghin hunah kan in a tlu ang tih kan hre vek.

I hringnunah khan lirnghing i hmachhawn fo ang. Hriselna kawnga lirnghing te, sum leh paia lirnghing te, rilru sukthlek kawnga lirnghing te, harsatna leh beidawnna chitin i hmachhawn ang. In inneihna kha lungphum nghet taka a ding a nih loh chuan a nghet zo lo ang.

Innghahna lungphum nghet chu engnge ni ta ang? Isua Krista. Bible chuan heti hian min tiam, _"I tan ani chu innghahna nghet, chhandamna, finna leh hriatna tuikhur a ni ang; Pathian ṭihna hi he robawm hawnna chahbi ngei chu a ni."_ (Isaia 33:6, NIV)

In inneihna kawnga i tih theih ṭha ber chu Isua Krista hnena hlan hi a ni. I kawppui nen Krista lakah in nun i inhawng hmasa phawt ang a. Tichuan in nun ve veah hmun pawimawh ber in chantir hnuin in nupa inkarah dah hmasa leh ber ula.

Kan nupa inzawmna ṭhan lentir zel kha ka nuna nuna chona hautak ber niin ka hria. Mahse hlawkna tam tak min petu a ni bawk. Krista hnenah i nun hlan la, i inneihna pawh kha hlan rawh. I hlawkna/hlutna i hmu ngei ang tih ka tiam a che.

Ngaihtuah zui atan.

Engtikah nge i kawppui nen khan in inlaichinna kha mahni maia siamṭhat in tum, Isua puihna tel lovin? Engnge a rah chhuak?

I nunah eng lirnghing lakah nge Isuan a chhanchhuah che?

In inneihnaag khan Isua a tel ve em? A tel chuan eng danglamna nge a thlen? A tel loh chuan vawiin hian sawm ve turin i inpeih em?

*Isua hi Lal leh Chhandamtuah i la pawm lo anih chuan tunah i pawm nghal thei reng e.*

I nuna Lal atan sawm la i inneihnaah khan hmun pawimawh ber chantir rawh. Heti hian ṭawngṭai rawh le: "Lalpa, suala ka tluk avangin i hmangaih ka phu lo tih ka hria e. Mahse min hmangaih em avangin ka tana thi turin Isua i rawn tir a. Amah chu ka ring a, amah avangin chatuan nunna ka nei thei tih ka ring e. Khawngaih takin ka sualte avangin min ngaidam la. Ka Lal leh Chhandamtuah ka pawm che a, ka nun i tan ka hlan e. Min hmangaih a, min chhandam a, nun bul min ṭan thartir avangin ka lawm e. Ka nunah leh kan nupa inkarah lal ber turin ka duh a che. Isua hmingin, Amen"

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, September 19, 2026

INNEIHNA HI INTIAMNA A NI

_I Nunpui Tur Hmangaihna Hmuh Chhuah Leh Vawn Reng Dan_

- Rick Warren 
- September 19, 2026
_"I nupui tana rinawm tura i intiamna kha bawhchhe suh ang che"_ (Malakia 2:16, GNT)

Inneihna kara inlaichinna pumpui sawifiah tur hian eng thumal pakhat nge i hman ang? "Hmangaihna" tih hi i rilrua thu lo lang hmasa ber a ni mai thei. Mahse thumal dik zawk ni a ka hriat chu "intiamna" hi a ni. Thil thlengin a zir viau chuan mi pahnih inhmangaih takin an awmdun thei. Mahse intiamna/inpekna hi inneihna laimu tak zawk chu a ni.

Inneihnaa intiamna/thutiam hi Pathianin vawng nung tura min duh chu a ni. Inṭhenna chungchangah thu khauh tak mai a nei: "'In mak hi ka haw si a' tiin sipaihote Lalpa chuan a ti . . . I nupui tana rinawm tura i intiamna kha bawhchhe suh ang che"_ (Malakia 2:16, GNT). Inṭhenna hi tunlai khawvela thil thleng mek a ni a, Pathian khawngaihna leh ngaihdamna avang hian ka lawm em em a ni. Mahse inṭhenna hi Pathian duh dan a ni lo. Pathian duh dan chu damchhunga awmdun tura intiamten an thutiama an din ngheh hi a ni.

Chuvang chuan ka'n fuih ang che u: In inneih tawh chuan nghet takin ding ang che u. Tlan chhuahna zawng suh u. "Thihnain min ṭhen hma loh zawng" in tih khan damchhung atana in intiamna a ni. Inṭhenna hi duhthlan theih ang mai maiah ngai suh ang che u.

Intiamna kan tih hian a chang chuan eng emaw changa hlim loh leh lungawi lohna a ni mai thei, mahse a tlangpuiin intiamna chuan lawmman, inlaichinna duhawm tak nei zel turin a keng tel fo ṭhin.

Intiamna tichak thei thil pakhat chu inhnimhnaih reng, taksa innghen reng emaw inngaihtawnna emaw hi a ni. Mi zawng zawng, nupui-pasal nei emaw nei lo emaw pawh hian tisa taka innghenna hi kan mamawh. Naute, kan deh tam apiang hi an ṭhang chak a, puitling pawh an taksa deh tam apiang an dam rei a ni tih an lo zir tawh.

Inlaichinna tir lamah hian nupate hian an kut invawn thlah an harsat em em ṭhin. Mahse hun a liam zel a, chung an inngainatnate chu a lo bo ve tial tial ṭhin. In hah a. In buai a. Inhuatna tlemte kha in ṭhan lentir ṭhin.

Hetiang hian han ti teh u: I kawppui lakah khan  ngainatna lantir chungin han che teh, chutiang rilru i pu chiah lo anih pawhin. Hmangaihna nena thiltih hi chuan hmangaihna min neihtir ṭhin.

Inneihnaah hian taksa indehtawnna kan tih hian nupa nun pawh a tel ngei mai. Pathianin nupa nun hi inneihna tihnghehna hmanrua atan a hmang tlat. The Message chuan heti hian a letling, _"Nupa nun hi vun indehtawnna aia thuk daih a ni. Taksa inzawmna ai mahin nupa nun chu a thuk a ni. Pathian thua a inziah ang ngeiin, 'Mi pahnih kha pumkhat an lo ni ta a.'" (1 Kor. 6:16)

In inneihnaah hun khirh tak tawk mek ni a i inhriat chuan in intiamna kha en nawn leh la, in taksa inhiptawnna en bawk la. Chungah chuan harsatna i neih chuan ṭanpuina dil rawh! Counselor ṭha takin a pui thei ang che, in thutiama in rinawm theih nan.

Ngaihtuah zui atan.

Engtikah nge i rilru puthmang aia midangte tana i intiamna a pawimawh ni a i hriat?

Engtikah nge tisa taka inhipna hian i nunah a ṭha zawnga danglamna a thlen?

Kar thar lo awm turah hian eng kawng khatin nge mi pakhat hnenah ngainatna i lantir theih ang?

[Lettu: Mapuia Fanai]

Friday, September 18, 2026

NUPA INLAICHINNAAH CHUAN“ KEI” TI LOVIN “KAN” TI RAWH

_I Nunpui Tur Hmangaihna Hmuhchhuah Leh Vawn Reng Dan_

By Rick Warren
September 18, 2026
“Tin, unaute u, in zain thu thuhmun in sawia, in zînga inṭhenna rêng a awm lohna tûrin, rilru hmun khat leh ngaihtuahna hmun khata fel taka in inzawm tlat zâwkna tûrin.” I Korinth 1:10

Nupui/pasal i neih rual chuan “ka” tih thumal hmang lovin “kan” tih i hman ṭan nghal a ngai ang. Bible lehlin pakhat The Message chuan hetiang hian a sawi, “Midang ngaichanga nun dan i zir a ngai a, in inpumkhatna lai chu tinghet ang che” tiin [I Korinth 1: 10]. Midang ngaihven dan i thiam tih awmzia chu - anmahni i ngaihtuah a, an lakah phung i thlu a, anmahni zah leh dawhthei takin i en tihna a ni. 

I Korinth chuan midangte ngaichang thiam turin min chah a. A maha lo piang mai thei erawh a ni lo! Kan pianpui miziaah hian mahni hmasial sa kan ni. Kan mimal mamawh, natna leh duhzawng te, midang mamawh kan ngaihtuah thlen hmain ka ngaihtuah hmasa ṭhin. Mahse Pathianin inneihna a buatsaih chhan ber pakhat chu midang ngaihven zawktu mihring, Isuan midang a thlir anga thlirtu, kan nih theihna tur a ni. 

In inneihnaah chuan i kawppui emaw, midang hrim hrim emaw ngai pawimawh lehzual tur chuan i inpeih tawh em? Heng thil pathumte hi midang ngai pawimawh thiam tur chuan i chet chhuahpui thei ang: 

*Mite ṭanpui turin pen chhuak rawh.* Mite ngaihven tih chuan mite mamawhna ngaihtuah chunga anmahni ṭanpui tura va dawr a kawk, “Ka lo pui dawn che em ni ang?” tiin. Bible zirtirna chuan, “Inhmangaih tawnin rawng inbâwlsak zâwk rawh u,” tiin a sawi [Galatia 5: 13]. 

Midangte lian taka kan inchhawk dan awm tho mahse hun tam zawkah chuan thil te tham teteah an ni fo. Midang ngaihsak tih chuan i thil lo tih lai mek dah a, i nupuiin ei tur a chawi lut lai lo chhawk mai chu a ni thei. I pasal a chauh em em laia i fate khuma lo pawm phei chu a ni mai thei bawk. Kartawpa hna thawh dun a, a hnua in awl ve ve theihna tura ṭanrual mai pawh a ni thei.  

*An rinhlelhna leh hlauhna hriatthiampui* . The Living Bible lehlin chuan, “ _Midangte rinhlelhna leh hlauhna chu hre thiamin an rit phurhte chu kan chhawk zangkhai tur a ni_ ” tiin a sawi [Rom 15: 1]. Mi dang hlauhna chu awmze nei lo anga kan ngaihsak chang a awm, kan hlauhna thung chu kan ngai thutak hle ṭhin thung si. Nupa inlaichinna hriselah chuan i kawppui hlauhna chu i ngaih thutak sak ngei ngei ang. 

Thingtlangah ka sei lian a, kan tet lai chuan kan in kawngkhar kan kalh ngai lo. Ka nupui chhungte thung chuan, kawngkhar kalh leh kalh loh chu an ngai thutak hle ṭhin. Kum eng emaw zat a ral hnu chuan, ka nupui ngaihmawh zawng chu kan ngaih pawimawhpui ta hle a, amah ang chiah chiah chuan ka enghelh lo mai pawh a. 

*An tihsual ngaihdam* . Mi famkim lovin mi famkim lo dang i nei tih hria la, chuvang tak chuan inlaichinna sawisel bo i kawppui nen chuan beisei suh ang che u. Misualin misual a nei tihna a ni a, nupui/pasalte chuan inngaihdamna damdawi bur tam tak kan mamawh tlang ṭhin. Bible chuan, “ _indawh tawnin inngaidam tawn ula; Lalpan a ngaidam che u ang tak khân ngaidam ve rawh u_ ,” tiin a sawi [Kolossa 3: 13]. Ngaihdamna chu nupa inlaichinnaah a nghahchhan lung pawimawh em em a ni. Mite kan ngaih pawimawhna kan lantirna tur a ni. 

Jakoba 3 chuan hetiang hian min zirtir, “ _Chung lam aṭanga finna lo chhuak erawh chu … zahngaihna leh rah ṭhain a khat a_ ,” tiin [James 3: 17]. In nupa inlaichinnaah chuan fing taka awm i duh chuan i kawppui ngaihven dan i zir a ngai ang! 

Ngaihtuah zui atan. 

• Vawiin hian i nupui/pasal emaw [Mi tu emaw tan] engtin nge i ṭangkai theih ang? 
• I nupui/pasal thil hlauh zawng tak ngaihthahsak mai mai chi i nei em? Chu a hlauhna chu engtin nge i lo fimkhurpui theih ang? 
• Hliam emaw na eng emaw i pai avanga midang ngaihdam theih loh i lo nei ve tawh em? 

[Lettu: Peka]

Thursday, September 17, 2026

INBIANGBIAKNA CHU INNEIHNA KIPUI A NI

_I Nunpui Tur Hmangaihna Hmuhchhuah Leh Vawn Reng Dan_

By Rick Warren
September 17, 2026
“ _Palai rinawm chu damna a ni_ .” Thufingte 13:17

Pathian chuan nupa chu inngeih, inrem leh inpawh taka awm turin a siam a. Bible chuan, “ _Chumi avâng chuan mipain a nu leh pa kalsanin a nupui a vuan ang a; tin, an pahnih chuan tisa pumkhat an lo ni tawh ang. Hei hi thuril thûk tak a ni; kei chuan Krista leh a kohhran thu a sawina niin ka hria,_ ” tiin a sawi bawk [Ephesi 5: 31-32]. 

A nihna takah chuan chu nupa inlaichinna duhthusam chu nupa tam berte hian an phak lo. Pathianin a duh dan ang taka thaa nupa nun kalpui tur chuan hruai theitu rahbi eng emaw zat an awm. 

Nupa nun suihzawmtu ber pakhat chu mumal taka inbiakpawh a ni. Living Bible lehlin chuan “ _Inbiakpawhna rintlak chuan hmasawnna a thlen_ ,” tiin a sawi [Thufingte 13: 17]. Mite nena in inlaichinna laia hma i sawn duh a nih chuan ṭha taka midangte biangbiak dan i zir a ngai ang. 

Midangte biangbiak danah chuan mi hrang hrangten tih dan tete kan nei vek. Mi ṭhenkhat chuan thudik tak an sawi mai a, mi tam tak chuan an awm danin an lantir thung. Thenkhat chuan zawi tein an lantir laiin midang chuan ring takin an lantir. Nupa inlaichinna hriselah chuan an kawppuite awm dan chu a nupui/pasal chuan ngunthluk takin a lo ngaihven ṭhin. 

Dik leh chiang takin thu chu sawi dun ṭhin tur a ni. Bible lehlin pakhat The Message chuan, “‘ _aw’ emaw ‘aih’ emaw ‘aih’ emaw ti mai rawh. I duh dan anga thil kalpui tuma i nawr ngawt chuan i kal sual ang_ ,” tiin thurawn a pe [Matthaia 5: 37]. 

A chang chuan inpawh taka thu sawi dun tur chuan mahni lam insiamrem pawh a ngai thei. Ni khat aia tam nupui/pasal i nei tawh a nih chuan eng emaw ti tal chuan in lo inhnialin in inbakkaih tawh ngei ngei ang. Dik tak chuan Pathianin nupui pasal nei tura min duh chhan chu mihring nun hi thlirna mit pakhat ai tama thlir tura min duh vang a ni. I pian chhuahna khawvel, i mizia leh awm dan chuan i kawppui thlirna nena thlirna inang lo a pe ngei ngei ang che. I inherrem hlek a nih loh chuan buainain a nangching ang che. “ _Chhûngkua pawh inṭhena mahni an indo chuan chu mite chhûng chu an ding khawchhuak thei lo vang_ ” [Marka 3: 25]. 

Nupa chuan an fate an enkawl dan, chawlh an hman dan, an unaute leh chhungte dan nena hun an hman zat, in leh lo chei dan, an nupa nun [physical intimacy] chenin inhre thiam tawnin inherrem dan an zir tur a ni. 

A tawpah chuan mahni inherrem chu puitlinna leh mahni hmasial loh dan zir chu a ni ta ber mai. Bible-ah chuan hetiang hian kan hmu bawk, “ _Chutichuan, kan Lalpa Isua Krista Pathian leh a Pa chu, thinlung hmun khat leh inthuruala kan chawimawi theihna tûrin, chhelna leh thlamuanna Pathian chuan, Krista Isua sawi angin rilru hmun khat pu tawnin awmtîr che u rawh se_ ,” tiin [Rom 15: 5]. 

Dik tak chuan midang hmangaih dan thiam chu a ni ta ber zawk thin. Thinlung lam a inherrem a, langtlang taka inbiakpawhna ṭha a awm a nih chuan chu chu hmangaihna a ni mai. Paula chuan, “ _hmangaihna chu… mahni hma a sial lova…_ ” tiin a sawi [I Korinth 13: 4-5].  

Ngaihtuah zui atan

• In nupui/pasal nen inlaichinna emaw midang inlaichinna nghet tak neite emaw han ngaihtuah teh. Inpawh zawka thu in sawi dun theih dan tur han ngaihtuah teh? 
• Inhriattawn ṭha avanga inlaichinna ṭha zawk lo piang chu i mit ngeiin i lo hmu ve tawh em? 
• Paula chuan, “mahni hma a sial lova” tiin a sawi. Engtik laiin nge i duh dan khera thil tih i lo tum ve ṭhin? Tawngṭai nen Pathian hnenah thlen la puitlinna neia hmasialna i kalsan theih nan chutiang thilah chuan inbuatsaih rawh. 

Pathian chhandamna thil thlawnpek chu i pawm thei ang em? 
Bible chuan, “ _Rinna avânga khawngaihnaa chhandam in ni; nangmahni thawh chhuah a ni lo va, Pathian thilpêk a ni; thiltih avâng a ni lo ve; chuti lo chuan, miin an chhuang dah ang e,_ ” tiin a sawi [Ephesi 2: 8-9]. 

_Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e_ . 

“ _Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen_ .” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Wednesday, September 16, 2026

I RILRU A HRISEL EM?

_I Nunpui Tur Hmangaihna Hmuhchhuah Leh Vawn Reng Dan_

- Rick Warren
- September 16, 026
"Mi fel, ama remruat thiama awm mi fate chu an nihlawh e," Thufingte 20:7.

Nupui ṭha famkim emaw, pasal ṭha famkim emaw i hmuh hma a nupui pasal i neih loh chuan nupui pasal i nei ngai lovang, a chhan chu tumah famkim an awm si lova. Mahse rilru lama hrisel leh ṭhanglian zel mi i neih a ngai a. Nang pawh chumi kawngah chuan i ṭhan a ngai a ni.

Bible chuan rilru lam hriselna chungchang tam tak a sawi a. Pathian thu aṭanga rirlu hriselna tehfungte chu hetiang hi a ni:

Rilru lama hrisel mi chuan thinrimna inthunun theih loh a nei lo.
 "Thinrim hmang mi chu ṭhian suh la, mi thinchhia chu kawp suh," (Thufingte 22:24). Thinrim ching nupui pasal chuan nakinah a thinrimna chu nangma lamah a la hawi dawn a ni.

Rilru lama hrisel mi chuan ngawl vei a nei lo.
 "Uain heh mi zingah leh sa heh mite zingah tel suh," (Thufingte 23:20). Hetah hian ei leh in a sawi a, mahse ngawl vei theihna kawng tam tak a awm-thil siamna khawl lam te, thil tenawm en te, pawisa heh te pawh.

Rilru lama hrisel chu a kha ngai lo. 
"Fimkhur rawh u, chuti lo chuan, Pathian khawngaihna ata in bo dah ang e, khâkna zung eng emaw lo chawra tibuai che uin, chu chuan mi tam tak chu tihbawlhhlawhin an awm ang," (Hebrai 12:15). Khâkna hi tûr ang a ni a, a ei ral ang che.

Rilru lama hrisel chuan mahni hma a sial lo. "Mi rilru duham chuan inbeihna a chawk chhuak," (Thufingte 28:25). Nupa inkara buaina chhan bulpui ber pakhat chu mahni hmasialna hi a ni.

Rilru hrisel chu a duham lo.
"Mi duham chuan ama chhungkua a tibuai ṭhin," (Thufingte 15:27). Thufingte 23:6 chuan chiang lehzualin,"Mi kawm hnenah chaw ei suh," (NLT) a ti bawk.

Rilru lama hrisel chu a thilphal a, a ngilnei bawk. 
"Mi thilphal nunna chu tihthauvin a awm a, tui leih ṭhintu chuan mahni pawh a inleih a ni," (Thufingte 11L25). Thufingte 11:17 chuan, "Zahngai thei mi chuan ama nunna atana thil ṭha a ti ṭhin a, mi nunrawng erawh chuan ama tisa buaina a thlen ṭhin," a ti. 

Rilru lama hrisel chuan thudik a sawi ṭhin. "Mi fel, ama remruat thiama awm mi felte chu an nihlawh e," (Thufingte 20:7). Hmangaihna chu rinnaah a innghat a, rinna chu thudikah a innghat a ni.

He thil inziah tlar hi i chhiar a, i ngaihzawngah heng mizia te hi a awm lo tih i hriat chuan in inlaichinna chu ngaihtuah nawn leh a hun tawh a ni. Nangmahah ngei pawh heng mizia te hi a kim lo a nih chuan, nupui pasal i neih hmaa ṭhang lian turin Pathian ṭanpuina dil ang che.

Nupui pasal i nei tawh a nih pawhin, nang leh i kawppui tlin tawk lohna lai te hria a, inthlak tuma, rilru hriselna lam pana ṭhang lian tura Pathian ṭanpuina dil chu a la tlai lo a ni.

Ngaihtuah zui atan

Rilru hriselte mizia hi thlir let la. Khawi laiahte nge i tih ṭhat?

Rilru hriselna kawngah eng laiah nge ṭhan i la ngaih? Chumi lama i ṭhan theih nan ṭanpuina eng nge i mamawh?

Rlru lama la puitling lo ni a lang ngaihzawng emaw, ngaihzawn tum emaw i nei em? I nei a nih chuan eng thlak danglamna nge i mamawh?

[ *Lettu: Marova Punte* ]

Tuesday, September 15, 2026

INNEIHNAAH THLARAUVA INPUMKHAT A PAWIMAWH

_I Nunpui Tur Hmangaihna Hmuh leh Vawn Ngheh Dan_

- Rick Warren
- September 15, 2026
“Chu chu, in rinna leh ka rinnain kan inthlamuan tawn theihna tur, ka tihna a ni.” Rom 1:12

Mi tu emaw nen inanna kawng tam takah i nei ang, nimahsela i nuna pawimawh lai ber - Pathian nena in inzawmna - i neihpui si loh chuan - Pathian thil tum inneihna  chu in nei thei chuang lo vang. 

Thlarauva inpumkhatna in neih erawh chuan, Pathian in rinna chungchangah in rilru a thuhmun tawh ang a, inlaichinna tha tak in nei ang a, kawng thuhmun in zawh thei ang. Thlarauva inpumkhatna chuan kawng hrang hranga inpumkhatna a thlen nghal bawk ang.

Nimahsela i kawppui nen thlarauva in inpumkhat si loh chuan, Pathianin in laka a beisei taksa, rilru leh thlarauva inzawmna tak tak in nei thei lo vang. Ke pen harsa i ti ang. Chuvang chuan Pathian nena inzawmna in neihnaah inpukhata in awm a ngai a ni.

Bible chuan, “Ringlomite nen rual lo taka nghawngkawl bat dunin awm suh u; suahsualna leh felnain eng nge intawmna an neih? A nih loh leh thim leh engin eng nge inpawlna an neih? … A nih loh leh ring lo leh ringtu chuan eng nge chan dun an neih?” 2 Korinth 6:14-15. Kawng danga kan sawi chuan, thlarauva inpumkhatna in neih si loh chuan, kawng dangah pawh engtinnge in inpumkhat theih teh lul ang?

Tlang takin ka han sawi ang e. Pastor ka ni a, midang rilru tihnat leh pawisawi hi ka hlau thin khawp mai. Keimah angin awm se; hlim se tih ka duh a. A kawppui te mizia danglam tak mi pakhatin a sawi ka sawi chhawng thei lo, nakinah hnuah chuan a kawppui chu ringlo mi a nih thu min hrilh a ni. 

Kei chuan hetianga hrilh mai hi ka duh thin a, “A pawi hlei nem. Kal zel ru. Hlim takin awm ru.” Nimahsela harsatna hrang hrang an neih avanga an inthen hnuah chuan hetiang hian ka hrilh a. “Ka hmangaih che avangin hei hi ka hrilh che a ni. I nunah tihsual lian tak i nei. Thlarauva inzawmna in nei lo va. Pathian duhdana inpumkhatna chu in nei ngai dawn lo. Krista hnenah i nun i hlan tawh si chuan, chhandamtu hnawltu nen chuan engti kawng zawng mahin in inpumkhat thei lo vang.

Chuvangin Bible chuan chiang takin a sawi, “Ringlomite nen rual lo taka nghawngkawl bat dunin awm suh u.?” 2 Korinth 6:14. Pathian duhzawng a tha ber tih i tum chuan, ringlo mi reng reng chu melh suh ang che.

Nimahsela thlarauva inzawmna in neih ve thung erawh chaun, “Chu chu, in rinna leh ka rinnain kan inthlamuan tawn theihna tur, ka tihna a ni.” Rom 1:12. Chutiang chuan Pathian duhzawng innneihna a ni. A pasal rinna a nupui tanpui se, a nupui rinna chuan a pasal tanpui se tih a duh bawk a ni.

Pathianin in inneihna chu venhima malsawm a duh a. Nghet takin invuan ula tih a duh a ni. Chu erawh chu thlarauva in inpumkhatna atang chauhin a tihsak thei che u a ni.


Ngaihtuah zui atan

* Thlarauva inpumkhata inlaichinna i neihpui kha ngaihtuah la. I kawppui emaw, chhungkaw member emaw i thian hnai emaw a ni thei. In rinna hmang chuan engtinnge in inpuih tawn?

* 2 Korinth 6:15 ah chuan Paulan,  “ring lo leh ringtu chuan eng nge chan dun an neih ang?” a ti a. Engtinnge i chhan ang?

* Thlarauva inpumkhatte inneihna Pathianin mal a sawmna engtikah nge i hmuh? Chu chuan engtinnge a chawh phur che?

*[Lettu: Sangpuia]*

Monday, September 14, 2026

CHANCHIN ṬHA CHUAN LAWMNA A THLEN

_Kristianna Tak Tak_ 

By Rick Warren 
September 14, 2026 
“Pathian an fak a, mi zawng zawng lawm zâwngin an awm ṭhîn. Tin, a chhandam mêk apiangte chu Lalpan ni tin an hnênah a teltîr zêl ṭhîn.” Tirhkohte 2:47 

Biak Ina inkhawm chu a hlimawm i ring em? Ka ring a ni! 

Chibaibuk chu lawmna a ni a. Kût kan hmang ang hi a ni. Pathian rama telte fuankhawmna a ni. Hlimtaka fakna chuan ringlomite pawh a hip a. A chhan chu mi tinrengin hlimna an zawng a ni.  

Khawvelah hian chanchin ṭha lo a tam em em a. Nimahsela "gospel" hi chu "chanchin ṭha lo" ni lo vin "chanchin ṭha" a ni. Chachin ṭha chu midangte tana lawmna thlentu a ni. Chuvangin i kristian puite nena in inkhawm hian hlim takin in inkhawm thei a ni. 

Chutiang chuan ringtu hmasate kha an awm a ni. Tirhkohte 2:47 chuan, “Pathian an fak a, mi zawng zawng lawm zâwngin an awm ṭhîn. Tin, a chhandam mêk apiangte chu Lalpan ni tin an hnênah a teltîr zêl ṭhîn.” 

Heng thumal pahnihte hi en teh: “fakna” leh “lawmna.” An fakna chu a hlimawm a ni. Pathiam chuan kan rilrua awmte puanchhuahna hun remchang min siamsak ṭhin a. Chibaibuknaah chuan kan lawmnate kan puangchhuak ṭhin a ni. 

Kristian kan nih avang hian, kan nunhlui chu theihnghilhsak kan ni a, nun leh zelna chhan tur kan nei a, vanah in kan nei bawk a ni. Chu chuan a ti lawm lo che anih chuan, engin nge ti lawm tawh ang che. Kohhran a lo pianni khan Peteran hetiang hian a sawi a, “Chuvângin, ka thinlung a hlim a, Ka lei pawh a lâwm a; Chuvângin, ka tisa pawh beisei takin a awm bawk ang.” (Tirhkohte 2:26). 

Chu hlimna chu keimahni chauha chan tur a ni chuang lo. Peteran Lal Davida thusawi a sawi chhawng a, “Tirhkohte 2:28 

"Nangin nunna kawngte mi hriattîr a, Nangin i hmêlin lâwmin mi tikhat ang,’  tiin.” (Tirhkohte 2:28). I kawng i hriat chinah chuan (Pathianin i nuna a thil tum), Pathian chenchilhna i hrethiam ang,  chawplehchilhin lawmnain i khat nghal ang. 

A chang chuan hlimna pawh a chuai. Chutiang hunah chuan thil tih tur i nei ta. Pakhatnaah chuan, Davida angin ṭawngṭai rawh, “I mi chhandam hlimna chu mi pe leh la, Thlarau tihnuamin mi chelh reng ang che." (Sam 51:12).  

A dawt leha i tihtur chu mak i ti viau ang. Thilphal a takin i zir tawh ang. Chutiang chuan alawm ringtu hmasate kha an khawsak: " A ring apiang chuan engkim an inṭâwm hlawm a, an rote, an sumte an hralh a, an châkkhai daih lek ṭheuhvin an zaa hnênah chuan an sem ṭhîn a.” (Tirhkohte 2:44-45). 

Engtinnge an tih ? “Hlim tak leh lungawi takin” (Tirhkohte 2:46). 

Kristianna tak tak chu mi zawng zawng tan a ni. Chu Chanchin Ṭha chuan hlimna a thleng ang che! 

Ngaihtuah zui atan 

* Engvangin nge hlim taka fak leh chawimawina hian ringlomite a hip theih? 

* Engtiklai khan nge fak leh chawimawinaah lawmna i chan? 

* Tun hnuah hian fak leh chawimawinaah lawmna i chang chauh em? Anih loh chuan Davida angin ṭawngṭai rawh, “I mi chhandam hlimna chu mi pe leh la.” (Sam 51:12). 

*[Lettu: Sangpuia]*

Sunday, September 13, 2026

KHAWIAH NGE HMANGAIHNA I HMUH THEIH ANG?

_Kristianna Dik Tak_

- Rick Warren 
- September 13, 2026
_"Ringtu zawng zawng te chu inpawhtlang takin an awmho a"_ (TT 2:44, GNT)

Hun khirh tak i tawn mek lai khan kohhran chhungkua tluka min ngaihsaktu an awm chuang lo.

Kohhran din tirh aṭangin chutiang chu a lo ni tawh. Kristianna piantirh lai khan Isua zuituten Rom sorkar aṭangin tihduhdahna nasa tak an tuar. Mi tam tak chu thah hial an ni. Chuvang chuan an inhui khawm ṭha a, an inngaihsaktawn em em a ni. An inhmangaih a, an inchhawmdawltawn bawk.

Chutiang inchhawmdawltawnna sawi nan chuan Baibul ṭawngkam tak mai a awm. Inpawlho tih hi a ni. Inpawlho kan tih chuan Isua tana kan inpe ang chiaha kan ringtupuite tana kan inpekna hi a ni.

Tirhkohte Thiltih 2:42-ah chuan heti hian kan hmu, _"Ringtu zawng zawng te chu tirhkohte zirtirna ngaithlain, inpawlhoin, chhang eihoin (Lalpa zanriah telin), an ṭawngṭaiho ṭhin a"_ (NLT). Heti hian Bible lehlin dangah kan hmu bawk, _"Chhungkua ang maiin an awm"_ (CEV).

Kohhran hi chhungkua tiha sawina kan hmu fo. Sumdawng pawl a ni lo a; pawl inzawm khawm a ni lo a; khawtang pawl a ni lo bawk. Kohhran chu chhungkua a ni. Bible-in kohhrana kum upa te chu thlarau lama pa anga en tur leh, kan kum rualpuite chu unaunu leh unaupa anga en turin min ti tlat. Tun thleng hian kohhran ṭhenkhatte chu "unaunu," "unaupa" tiin an la inko hial. 

Chhungkuaah chuan engnge in awm dan? I pawm a, an dik lo deuh hlek anih pawhin i ṭan hram ṭhin. Harsatna an tawhin i pui ṭhin bawk. Mamawh an neihin i pe ṭhin a. Tisa taka inngainattawnna an nei ṭhin, in inkuah emaw inchul emaw ṭhin, an mamawh hun a zirin.

Hetiang inpawlna hi inah an neitawn fo ṭhin. Tirhkohte Thiltih 2:46-ah heti hian kan hmu, _"Tin . . . an in lamahte pawh chhang an phel a, hlim tak leh lungawi takin an chaw an ei ṭhîn a."_ 

Kohhran hmasa kha hetiang anga an inhmangaih avang hian a ṭhang duang hle. Kristian ni lote khan kristiante rin dan hrethiam lo mahse an inhmangaih tak tak a ni tih erawh an hmu thiam.

Rom lalram chhungah khan ringtute tluka mi hmangaihna ngah an awm lo. Tirhkohte Thiltih 2:44-ah heti hian kan hmu, "Ringtu zawng zawng te chu inpawhtlang takin an awmho a"_ (TT 2:44, GNT)

Hmangaihna chuan min phuar khawm. Ringtute tih tak zeta an inhmangaih khan midangte an hip tlat. Chutiang inpawlna chu in kohhranah i seng lut dawn em?

Ngaihtuah zui atan.

Engtik khan nge i ringtupuite inah inpawlna tak tak i tem?

Engtinnge ringtute, chhungkhat ang maia an inngaihsakna i hmuh?

Engvangin nge ring lo mite hi kohhran inhmangaih takte hian an hip ni a i hriat?

[Lettu: Mapuia Fanai]

Saturday, September 12, 2026

KOHHRAN HIAN MIN SIAMTHAR THEITU THUTAK A PAI

_Kristianna Dik Tak_
   
- Rick Warren
- September 12, 2026
_"Thutak chuan a zalentir ang che u"_ (Johana 8:32, NIV).

Kristianna tak tak chuan nun thlak danglam thei thutak a keng. Thutak, nun siam thar thei a keng tiin a sawi theih bawk.

Pathian kohhranin a pek hi rilru lam zir thiamnain emaw, thu ṭha tak tak infah emaw aiin a ṭha zawk. Kohhran chuan chanchin ṭha a pe, Pathian thutak chu.

Isuan heti hian a ti, _"Thutak chuan a zalentir ang che u"_ (Johana 8:32, NIV). Thutak (nangmah, Pathian leh nunna leh thihna chanchin) i hriat hian hma chu saltang i ni. Hnam nunphung, mite beiseina, ṭhiante nawrna leh thil dang dang salah i tang. Mahse thutakin a chhuah zalen che a ni.

Kohhran chuan hmun dangah i hmuh theih loh Pathian thutak i hmaah a rawn chhawp chhuak a. I hun kal tawh ngaihdam a ni thei tih te, damchhan i nei thei tih te, vanrama cheng turin i inbuatsaih thei a ni tih thutakte hi tudang mahin an nei ve lo. Chanchin ṭha ang hian eng thuchah mahin mi nunah danglamna a thlen thei lo.

Kohhran a pian ni a kristian sermon hmasa berah chuan Petera khan heti hian a sawi a, _"Ka thusawi hi ngun takin ngaithla rawh u . . . Zawlnei Joela chuan heti hian a lo sawi: . . . 'Vanah te leh leiah te chhinchhiahna ka lantir anga . . . Pathian hming lam apiang chhandam an ni ang"_ (TT. 2:14, 16, 19, 21, NIV).

Petera chuan chanchin ṭha chu a sawi chhunzawm zel a, Tirhkohte Thiltih bung 2-naa a thusawi kha hlawm riatah dah ta ila:

Isua khan Pathian nihna famkim a nei! A thilmak tihin a lantir (chang 22)

• Krawsah Isua a thi. (chang 23)

• Pathianin Isua a kai tho. (chang 24-32)

• He thutak hian lawmna, hlimna leh beiseina min pe (chang 26)

• Pathianin van aṭangin a Thlarau a rawn tir. (chang 33-35)

• Simin baptisma kan chang tur a ni. (chang 36-38)

•Thlarau Thianghlim pek kan ni ang. (chang 38-39)

•Khawvel lak ata kan nun dan a danglam tur a ni. (chang 40)

• Chanchin ṭha kan ti hi a mak lo ve. Chanchin ṭha a ni tlat!

Kristianna dik tak chuan nun thlak danglam thei thutak a keng a. Chu chu vawiin hian lo pawm la, midanglam i ni tawh ang.

Ngaihtuah zui atan.

Pathianin thihna ata Isua a kai tho leh tih hriatna kan tih hi engnge?

Eng kawngah nge thutakin a zalentir che?

Peteran Tirhkohte Thiltih bung 2-a chanchin ṭha a sawi hlawm riat khi en let la, vawiin hian eng berin nge fuih thar che?

[Lettu: Mapuia Fanai]

Wednesday, September 9, 2026

MI DANGTE RAWNGBAWLSAK HMANGA PATHIAN RAWNGBAWL

_Sum Enkawl Dan_

- Rick Warren
- September 9, 2026
_"Mi tinin thilpek in hmuh ang zelin Pathian khawngaihna tinreng enkawltu ṭhate angin, chung chuan rawng inbawl tawn ṭheuh rawh u," (I Petera 4:10)._

I pian hma daih tawh khan Pathian chuan i nun hmanga i thawh ve tura a duh chu a lo ruat fel diam tawh a ni. Ephesi 2:10 chuan, "Thil ṭha ti atan Krista Isuaah chuan siama awmin, ama kutchhuak kan ni si a, chu thil ṭha tih chu kan awmna turin Pathianin a buatsaih lawk a ni," a ti.

Pathian chuan he khawvela ama rawngbawl turin a duh che a. Hmun luah khat ve mai tur te, thil awmsa hmang ral tur te leh thi mai turin a dah lo che. Khawvel hi hmun ṭha zawka siam tur te, thawh tur bik nei tur te leh a siam ang tak che a rawngbawl turin a dah che a ni.

Nangmah ang hi tumah an awm lo. Pathianin a ruahman anga rawng i bawl loh chuan khawvel hian a puzzle chu a hloh dawn a ni.

Thil ṭha tih hming dang chu 'rawngbawlna' tih a ni. I talent leh thiamna hmanga mi dang i ṭanpui apiangin rawng i bawlsak tihna a ni. Bible chuan Petera 4:10-ah "Mi tinin thilpek in hmuh ang zelin Pathian khawngaihna tinreng enkawltu ṭha angin,chung chuan rawng inbawl tawn ṭheuh rawh u," a ti.

I hlawkna tura talent i lo hman ṭhin te kha i hria em? Chungte chu nangma tan chauh a ni lo. Pathianin theihna leh thiamna a pek che kha mi dangte hlawkna tura a pek che a ni.

Pathianin khawvel hi inmamawh tawn turin a siam a. Mi pakhatah engkim a famkim vek lo, amaherawhchu engkim famkim vek erawh kan mamawh lo. Mi dangte nena inring tawn tur leh mi dangte aṭanga hlawkna chang tura siam kan ni.

Vanram i thlen hunah chatuanin Pathian rawng i la bawl dawn a, chuvangin tun aṭang hian zir lawk turin a duh che a ni. 

He leiah hian direct-in Pathian rawngbawl theih a ni lo. Tuna Pathian rawng i bawl theihna awm chhun chu mi dangte rawng bawl hi a ni. Chuvangin mi dang i ṭanpui apiangin Pathian tan i ti tihna ang a ni. Vanrama i tih tur chu he leiah hian i lo zir lawk a ni.

Pathian rawng ṭha taka bawl i duh em? Mi dangte rawngbawlsak hmangin tunah hian ti ṭan rawh le.

Ngaihtuah zui atan

Eng thilpek nge mi dangte rawngbawlsak nan hmang lova nangma tan chauha i lo hman?

I rawngbawlna mi dangin an hmuh loh leh an hlut loh khan Pathian thuin engtin nge a fuih che?

Vanramah eng ang rawngbawlna nge Pathianin a buatsaihsak che a i rin?

[ *Lettu: Marova Punte* ]

Tuesday, September 8, 2026

KAWNG ENGKIMAH PATHIAN A HMASABERAH DAH RAWH

_Sum Enkawl Dan_

- Rick Warren
- September 8, 2026


"Sawma pakhat chu in nunah Lalpa dah hmasak in zirna tur a ni" Deuteronomy 14:23 (TLB).

Thil engemawah Pathian malsawmna dawn i duh chuan, chumi thilah chuan Pathian dah hmasa la. Chuvang chuan, i sum chungchangah Pathianin malsawm che sela i tih chuan, i sum leh paiah Pathian i dah hmasak ber a ngai a ni. Sawma pakhat innghahna chu hei hi a ni: i lakluh atanga hmun sawma ṭhena hmun khat Pathian i pe ang tih hi.

Sawma pakhat chungchanga *thutiam, a chhan, a hmun* leh *a nî* sawina Bible châng pali a awm.

Pakhatna, "I sumin LALPA chawimawi la. I thil lo pung hmasa ber zawng zawngte nên; Tichuan i buh in chu a lo khat liam ang a, I sawrkhur uain tharin a luang liam ang" - Thufingte 3:9-10. Pathian chuan i thil tharchhuah/thawhchhuah hmasak apianga amah i chawimawi chuan, sum leh pai zawngin mal a sawm ngei dawn che a ti a ni.

Kum 50 vel zet liamtaah khan Kay-i nen tu emaw lakah bâ kan nei dawn a nih pawhin, Pathian lakah chuan kan bâ ngai lovang tiin kan intiam a. Pathian hi kan pe hmasa ber anga, ngaihtuah buai lovin kan pe mai thin ang kan ti a. Cheng 10 ka hlawh chuan, cheng hmasa ber kha kan pe a. Cheng za ka hlawh chuan, a hmasa cheng sawm kha kan pe leh mai a. A tir ata Pathian hnen atanga kan dawn kha a ni hrim a, a dang zawng zawngah pawh a malsawmna dawn zel ka duh a ni.

Pathian hian engvangin nge sawma pakhat pe turin min tih le? Deuteronomy 14:23-na chuan, "Sawma pakhat chu in nunah Lalpa dah hmasak in zirna tur a ni" (TLB) a ti. Pathian hian i sum a mamawh a ni lova. Mahse, chumiin a entir: i thinlung zawk kha a duh a ni. Amah ring ngam turin a duh che a ni.

Khawiah nge sawma pakhat i pek ang? I venga chhang dawrah i pe dawn em ni ang? I unau kum thum lai hnathawka kal bo ta hnenah zawk em ni ang? Ni lo e. Chung chu lainat tanpuina thilpek inpek a ni. Sawma pakhat pek hi mi kan lainatna avanga tanpuina inpek ang a ni lova, Pathian chibai bukna a ni. Pathian hnen a thleng zawk thin.

Malakia 3:10-ah chuan, "Ka inah ei tûr a awm theih nân sâwma pakhat zawng zawng chu thawhlawm inah rawn la rawh u, Vân tukverhte chu hawnsak che uin Malsawmna dawn sên loh khawp hial ka vûr dawn che u nge dawn lo, mi han fiah teh rêng u, Sipaihote LALPA chuan a ti." Thawhlawm in chu temple/biakbuk emaw, Pathian chibai bukna hmun emaw hi a ni.

Engtikah nge sawma pakhat i pek ang? Pathian chibai i buk niin i pe ang. Bible chuan 1 Kor 16:2-ah, "Ni sarih ni hmasa berah chuan mi tinin, malsawmna in hmuh angzia zelin dah khawl ṭheuh ula; ka lo kal huna thawhlawm khawn reng reng a awm loh nan," a ti a. Chawlhkara ni hmasa berah Pathian hnena i pek hian, i ni hmasa ber, i sum zinga a hmasa ber i pek hian, "ka nunah a hmasa ber i ni" tia i puanchhuahna a ni.

Bible châng hi han en ta la. 'Dah khawl' a tih hi lo chhinchhiah la. Sawma pakhat hi phur thut a pek tur a ni lova. I tum lawk anga, chumi ang chuan Pathian remruatna i chawimawina niin, sawma pakhat chu zahawm takin i pe thei ang. 

Tichuan Pathianin mal a sawm dan che leh a hman zel dan che chu i nunah i hmu zel dawn a ni.

Ngaihtuahzui atan

* A tak tak ramah hian, i lak luh atanga sawma pakhat Pathian hnena pek hi eng nge a awmzia le?

* Pathian hian hmun dangah ni lovin a biakinah sawma pakhat pek tur a tih chhan hi eng nge ni a i rin?

* Rinawm taka sawma pakhat i pek theih na'n vawiin hian engtin nge i in ruahman theih ang le?

*[Lettu: Sangpuia]*

Monday, September 7, 2026

VANA RO KHAWLKHAWM DAN

_Sum Enkawl Dan_

- Rick Warren 
- September 7, 2026
"I ro awmna apiangah i rilru pawh a awm ang." (Matthaia 6:21)

Vana ro i khawl khawm apiang kha chatuana i hlimpui turte an ni a, i sum leh pai thil ṭha tih nana i hman apiang khan vanah ro i khawl khawm a lo ni.

Niminah khan i sum leh paite i nun siam nan, Krista taksa inpawlhote fuih nan leh, ṭanpui ngaite ṭanpuina hmanga chatuan atan ro khawl khawm chungchang kan zir a. Vana i chanpual tur a pun leh zual theih nan i peipun tur thil pahnih a la awm cheu mai.

*4. Khawvel pum huapa Pathian sumhnâr.* Chanchin ṭha puan darh nan leh thlarau bote Krista hnena hruai nana i sum leh lai i hman kha a ni. Luka 16:9-ah chuan heti hian kan hmu, _"Ka hrilh a che u. Sum lemin in tan, thiante siam rawh u; sum a boral huna chatuana awmnaah chuan an awmtir nan che u."

Mi tam tak chuan he changin a sawi tum hi an hre lo. Sumin ṭhian i lei thei tihna em ni? Ni lo ve. A awmzia chu, mite vanrama an luh theihna turin engtin emaw thawk chhuak turin Pathianin a duh che tihna a ni, tichuan vanram i luh huna an lo lawm theih nan che.

Chu chu he khawvel kan cham chhunga thil kan peipun theih ropui ber a ni. Tu emaw talin i zarah vanram an lut dawn em le?

*5. Pathian sum bawm.* Pathian chibai bukna atana i sum leh pai i pekte kha Pathian sum bawm chu a ni. 

Thufingte 3:9-10 ah khan heti hian Pathianin min tiam,  _"I sumin LALPA chawimawi la. I thil lo pung hmasa ber zawng zawngte nên; tichuan i buh in chu a lo khat liam ang a, i sawrkhur uain tharin a luang liam ang."_ _"I thil lo pung hmasa ber zawng zawng"_ a tih hi sawma pakhat a ni - i thawh chhuah zawng zawng aṭanga zaa sawm (10%) kohhran kaltlanga i pek kha a ni.

A nihna takah chuan Pathian hnenah engmah i pe thei tak tak lo, engkim neitu a ni tlat a. Mahse i naupan laia i nu leh pate hnen aṭanga i pawisa hmuhte kha ngaihtuah la. I nu piancham ni a thilpek tur i va lei khan i nu pawisa tho a ni i hman ni. Chutiang a nih chuan i thil leisak kha a ngaihlu ta lo tihna a ni em? Ni lo ve - kha thilpek phena i ngaihsakna leh hmangaihna kha a ni a hmuh zawk ni. Chutiang chiah chu i thilpek chunga Pathian rilru puthmang pawh a ni.

Bible chuan i ro awmna apiangah i rilru pawh a awm ang tiin min hrilh. He leia thilte hi i ngaihhlut berte an nih chuan nitin i ro awmna chu i hlat zel tihna a ni. A chhan chu nitin he leiah hian i awm a, nitin chatuan atana ro i khawl khawm theih hun a liam zel a ni. He lei thil, i chhuahsan turte hi nitin i hlat zel a ni.

Mahse Pathian sum bawma i khawl khawm zel a, i sum leh paite a rawngbawl nana i hman chuan nitin vanah ro i khawl khawm a ni ang. I ro chu hlat lovin nitin i hnaih zel zawk a lo ni ang.

Missionary Jim Elliot chuan heti hian a sawi, "A kawl theih hauh loh pe a, a hloh theih hauh tawh loh tur hlawhtu chu mi â a ni lo ve" tiin.

Chatuan atana ro khawl khawm  tura i sum leh pai hmang turin i inring em? Hetianga ṭawngṭai hian bul i ṭan thei:

"Lalpa, chatuan daih tur ni lova ka sum leh pai tam tak ka lo khawh ral tawh avangin min ngaidam ang che. Vanrama khawl khawm zawk tawh tura bul ṭan ka duh e. Thlarau lama chak leh zual nan te, finna leh hriatna  kawnga ṭhan len nan te, leh i duh ang mi ka lo nih theihna turin vawiin hian ka sum leh pai i duh anga hmang turin ka inhlan e. I thil min pekte hi midangte nena inlaichinna ṭha zawk leh Kristaa ka unaute laka hmangaihna ka lantir theih nana hmang turin min pui ang che.

"Ka sumte midang rawngbawlsak nana hmangin chatuan atana khawl khawm ka duh a. Thil phal tak mi leh midangte tana malsawmna thlentu nih zir ka duh e. Ka sumte hi midangte i hnena hruai nana hman ka duh a; ka thilpekte a zara  miten vanram an luh hi ka duh a ni. Tin, Lalpa, ka thilpekte leh hlante hmang hian chatuan atan khawl khawm ka duh a; ka thil neih zawng zawng lut hmasa berte hmang hian chawimawi che ka duh a ni.

"Lalpa, engkimtithei chu ka rohlu a nih theih nan ka sum  ngainatna zawng zawngte thlah ka duh a ni. Ka hloh theih tawh loh tur thil nei tura ka kawl theih loh thil ka pek avang hian mi â ka ni lo tih min hriat nawntir fo ang che. Isua hmingin, Amen."

Ngaihtuah zui atan.

* Nangmah avangin tu emaw takin vanram a luh phah dawn em? Mi dangte Isua hnena hruai turin i sum enkawl danah eng thutlukna nge i siam theih le?

* Sawma pakhat i pe em? I sum thawh chhuah zawng zawng aṭanga sawma pakhat zel kha. I la pe lo a nih chuan engtin nge pe thei turin i sum enkawl dan i siamrem theih ang?

* Engtik khan nge chatuan atan i sum hmanga i lo khawl khawm le? Chumi avang chuan Pathian malsawmna i dawng tawh em?

*[Lettu: Sangpuia]*

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...