Friday, October 31, 2025

NANGMAH VANGIN VANRAMAH TU NGE AWM ANG?

_Isua Zui Awmzia_

By Rick Warren
— October 31, 2025
“Mi zui rawh u; tichuan, mihring mantuah ka siam ang che u.” [Matthaia 4:19]

Isua Chanchin ṭha chu hriain i lo pawm ve tawh em? I lo pawm tawh a nih chuan midang hnenah i hrilh ve leh a ngai ang! 

Matthaia 4: 20-ah chuan Isuan sangha mantu ṭhenkhat a ko chhuak a: “Mi zui rawh u; tichuan, mihring mantuah ka siam ang che u,” a ti a ni. “Tin, lênte chu kalsanin an zui ta nghâl a.” [Matthaia 4:19] 

Chu chu engnge a awmzia ni ang? Khang mite kha, “Mihring nun thlak danglam dan ka kawhhmuh dawn che. Midangte vanrama hruai dan ka kawhhmuh dawn che u. Ka hnena midangte hruai turin ka hruai ang che u a. Chanchin ṭha hrilh dan ka kawhhmuh ang che u,” a tihna a ni. 

Engnge nang i dinhmun? Vanramah tu emaw tal nangmah vangin an kal dawn em? Len i deng lo a nih chuan amah i zui lo tihna a ni. A awmzia chu, midang hnenah Chanchin Ṭha i hril lo a nih chuan, Isua zirtir i ni lo tihna a ni. Pathian chuan Chanchin Ṭha hril turin a duh che. 

Hetiang hian han ngaihtuah chhin teh: cancer enkawl dam theihna ka hria a, ka zep a nih chuan a dik lo hle ang! Mahse dik tak chuan chu aia ṭha leh ropui zawk ka hria. I nun liam tawh ngaihdam a nih dante pawh ka hria a, dam chhan, vanramah in i nei.  Tichuan Pathian chuan a ko che – nangmah kha – Chanchin Ṭha hril turin. 

Vanramah i la kal dawn, a chhan chu mi tute emawin Isua chanchin an hrilh vang che a ni. Tute emawin Isua chanchin an hrilh tawh vang che a ni. Chu inzawmna khaidiat chu pawhchhiat i phal thei lo ang. 

Isua chuan a zirtirte hnenah hetiang hian a sawi, “Chutichuan, kal ula, hnam tina mi zirtîrahte siam ula, Pa leh Fapa leh Thlarau Thianghlim hmingah chuan baptis ula, 20thu ka pêk zawng zawng che u pawm tûrin zirtîr rawh u. Tin, ngai teh u, kei kumkhuain, khawvêl tâwp thleng pawhin, in hnênah ka awm zêl ang,” tiin. [Matthaia 28: 19-20]

Chanchin Ṭha chu i hria e. Tun hun tak hi midang hnena sawi hun tak a ni!

Ngaihtuah zui atan. 

• Tu nge Isua Chanchin Ṭha chu hrilh hmasak ber che u? 
• Isua hnung i zui hnu chuan tu nge Isua chanchin chu i lo hrilh hmasak ber? 
• Tun karah hian tu hnenah nge Chanchin Ṭha i hrilh ngai nia i hriat? 

Isua Chanchin Ṭha chu i lo dawng ve tawh em? 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Thursday, October 30, 2025

NUN HLUTNA DIK TAK AWMNA

_Isua Zui Awmzia_

By Rick Warren
— October 30, 2025
“Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zâwka a lo kal ang khân.” [Matthaia 20:28]

Mi hlim ber berte chu midangte tana an nun hmang ṭhintute an ni. 

A chhan chu Pathian ram chu khawvel lalram nen chuan an danglam hlauh a ni. Pathian ramah chuan a chhunga mi ropui ber chu a hnuhnung ber leh midang rawngbawlsaktute chu an ni tlat. Bible chuan hetiang hian a sawi: “Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zâwka a lo kal ang khan,” tiin [Matthaia 20:28]

Chuvangin, Isua zirtir anga thlarauva mi a ṭhanlen dawn chuan midang rawngbawl dan a zir hmasak a ngai ang. Nun awmzia chu lakkhawl lam aiin pek chhuah lam zawk chu a ni si a. 

Thurawn ka han pe hlek teh ang che u: Hlimna bul pawimawh tak pakhat chu kan hlutna hmuh chhuah a ni. 

Mahse thil pawi tak chu, kan hlutna awmna hi hmun dik lovah kan zawng chiam chiam fo. Hlawhtlinna chuan hlutna min pe lo, a chhan chu nang aia mi hlawhtling zawk i la hmuh belh zel ang. Hlawh chuan hlutna a pe ngai lo vang che, i dinhmun emaw mipat hmeichhiatna pawhin. 

I hlutna tak tak chu khawiah nge i hmuh ang? Rawngbawlnaah [service]. 

Amah i lo an theih nan Pathian chuan midangte rawngbawl dan zir turin a duh che. Mi khawngaihthlak ber berte chu mahni chauh inngaihtuahtute chu an ni – anmahni nawmna, mamawh leh duhzawnga nung te chu. Mi hlim berte thung erawh chu, an hausa emaw an rethei emaw, midangte rawngbawlna atana an nun hmangtute chu an ni. 

Kan entawn tur [model] chu Isua a ni. Ani chuan, “Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zâwka a lo kal ang khan,” tiin a sawi [Matthaia 20:28] Midangte “rawngbawl tur” leh “inhlan turin” a lo kal a nih kha. Chu chuan ringtu nun chu a sawifiah awm e. Midang rawngbawlsak leh pek chhuah chu i zir nasat ang zelin, i lo hlim deuh deuh ang. 

Chutiang deuh chuan, rawngbawlna chu thlarauva insawizawina a ni. Taksa insawizawi chuan i taksa a tichak deuh deuh ang chiahin midang rawngbawlsakna chuan i thlarau nun a tichak deuh deuh ang. I hun zawng zawng Bible chhiar leh sermon ngaithlain hun i hmang thei a. Chung i thil zirte chu a taka hmang chhuakin midang rawng i bawlsak a ngai thung ang.  

Isua chuan hetiang hian a sawi bawk: “Tu pawhin mi zui a duh chuan, mahni hrehawm pawisa lovin, a kraws puin mi zui rawh se,” tiin. [Matthaia 16: 24] 

Chu thupek chu zawm chuan hlimna neiin i hlutna i hmu chhuak ang. Tin, a pawimawh ber Isua anna kawngah i lo ṭhang lian deuh deuh ang. 

Ngaihtuah zui atan. 

• Pathian rawngbawltu midang tana a nun hmangtu hriat i nei em? 

• Midang tana i nun i hman avanga hlimna chu i lo nei ve tawh em? 

• A tak taka nangmah leh nangmah inphat dan, kraws put dan leh kar [week] kan hman meka Isua zui dan tur chu eng nge ni  ang? 

[ *Lettu:* Peka]

Wednesday, October 29, 2025

A ZIRTIR TEN ISUA LEH KOHHRAN AN HMANGAIH

_Isua Zui Awmzia_

- Rick Warren
- October 29, 2025
_"In inhmangaih chuan mi zawng zawngin ka zirtirte in ni tih chumiah chuan an hria ang," a ti a (Johana 13:35)._

Isua ziritr i nih chuan amah chauh ni lovin, a chhungte pawh i hmangaih tur a ni.

Isuan, "In inhmangaih chuan mi zawng zawngin ka zirtirte in ni tih chumiah chuan an hria ang," a ti (Johana 13:35).

Isua ziritr nihna langsar tak chu thil ban bel chi (sticker) emaw, t. shirt emaw, chhinchhiahna atana eng emaw i hâk kha a ni lo. Isua zirtir i nih finfiahna chu zirtir tu pawh - Pathian kohhran i hmangaih anga hmangaih hi a ni. Isuan, "Ka ziritr i nih dawn chuan, keimah chauh ni lovin, min neitu tu pawh i hmangaih tur a ni," a ti.

Tuin emaw, "Isua ka hmangaih a, kohhran erawh ka duh lo, an tih i hre tawh maithei. Chu chu Isua zirtirte aṭanga i hriat tur a ni lo. Krista chu kohhran tan a thi a ni. Dik tak chuan, he leia chatuan daih tur chu kohhran chiah hi a ni. Vanram chu Pathian chhungte hmangin tihkhah a ni ang, chuvangin vawiina kohhran hmangaih zir hian thil lo thleng tur atan inrin dan tur min zirtir a ni.

Bible hian ringtu dangte hmangaih chungchang heti hian chiang takin a sawi: "Miin, 'Pathian ka hmangaih e,' tiin a unau haw si sela, amah chu dawthei a ni, a unau a hmuh tawh renga mah a hmangaih loh chuan, Pathian a hmuh ngai lohva chu engtin nge a hmangaih theih ang? (1 John 4:20).

Pathian chhungte hmangaih hi inpawlna (fellowship) tih a ni. Chu inpawlna kaltlang chuan thlarau lam ṭhanlenna a lo thleng ṭhin a, nangmah chauhin thlarau lamah i ṭhang lian ngawt thei lo.

Bible-ah hian ṭawngkam pakhat "tawn" tih hi hmun tam takah i hmu ṭhin ang. Bible chuan inhmangaih tawn tur te, inngaihsak tawn tur te, inṭanpui tawn tur te, rawng inbawlsak tawn tur te, inlawmpui tawn tur te, inṭawngṭaisak tawn tur tein min ti a ni. 

Kristian podcast-ah nitin i ngaithlain, i chhiar pawh a ni maithei e, mahse chu chuan a tiṭhang lian kher lovang che - hriatna erawh a neih belhtir ang che. Pathian i hmangaiha, nangmah i inhmangaih ang leh i vengte i hmangaih chuan i lo ṭhang lian dawn a ni.

Hei hi sakhaw dangte aia a danglamna leh Isua  nena inlaichinna min siamsaktu a ni. Sakhua chuan thianghlim turin mi dangte lak a,anga in la hrang turin a hrilh fo ang che. Mahse hei hi Isua zirtir dan letling thawk a ni. Isua chu bazar hmunah te, inneihna hmunah te, inkawm khawmna hmunah te a kal ṭhin. Ani chuan Pathian leh thil dang hmangaih hi ṭhanlenna bul a ni tih a hria - an bul hnaia i awm loh chuan mi i hmangaih thei lovang.

Pathian kan hmangaihna hi ringtu dangte tana kan inpek danah teh a ni. Bible chuan 1 John 3:16-ah, "Hemiah hian hmangaihna chu eng nge a nih kan hria, amah chuan kan tan a nunna a pek tak avangin, keini pawhin unaute tan kan nunna kan pe ve tur a ni," a ti.

Ngaihtuah zui atan.

Krista taksa i zawm theih dan tur - in kohhranah, hnathawhnaah, in ṭhenawmah, in chhungkuaah leh a dangte ziak chhuak la. Zawmpui i neih vak loh chuan, tunkarah hian engtin nge tam zawk i neih theih ang?

Engtikah te nge ringtu ten mi dangte tana an inpekna an lantir ṭhin?

Tunge Pathian chhungte zinga mi hmangaih harsa i tih? Chu mi chu hmangaih turin eng thil nge i tih ang?

[ *Lettu: Marova Punte* ]

Tuesday, October 28, 2025

CHANCHIN ṬHA I HRILNAAH, HMANGAIHNA LANTIR RAWH

_Isua Zui Awmzia_

By Rick Warren 
— October 28, 2025
“Chutiang bawkin kan duhzawng tak in lo nih tak avang khan, kan duh ngawih ngawih che u a, Pathian Chanchin Ṭha chauh ni lovin, keimahni nun pawh pek hial che u kan peih kha.” 1 Thessalonika 2:8

Isua zuitu i nih chuan, leiah hian a aiawha palai i ni nghal a ni. I tihtur chu khawvel pumpuia a tiam chanchin ṭha chhandamna hi a ni. Chanchin ṭha i hrilna kawngah chuan mi zawng zawng hnenah - hmangaihna i lantir tur a ni.

Engvangin nge palai i nihnaah chuan hmangaihna chu i lantir kher a ṭul? Pathian chu hmangaihna anih vang a ni. Midang hnenah hmangaihna i lantir si loh chuan Isua aiawh i ni thei lo vang.

Kawng thumin hmangaihna i lantir thei ang.

*1. Midang tan i nun hlan rawh.* Hei hi a dik a ni, hmangaihna mawlmang taka i lantir theih dan chu midang i ṭanpui hian a ni.

Bible chuan, “Chutiang bawkin kan duhzawng tak in lo nih tak avang khan, kan duh ngawih ngawih che u a, Pathian Chanchin Tha chauh ni lovin, keimahni nun pawh pek hial che u kan peih kha.” (1 Thessalonika 2:8).

Midang ṭanpuina chu kawng hrang hrangin a ni thei a. Rilṭamte hnena eitur pek te, zirna kawnga ṭanpui te, lirtheia hruai ngai hruai te, lusunte hnem te, chung lo pawh chu kawng hrang hranga ṭanpui dan a awm ṭeuh a ni.

Hetiang zawng hian ngaihtuah rawh: Ram khat palaite hi an pisaah an awm reng lo; an kal chhuak a midangte nen an inkawm ṭhin. Chutiang chiah chuan, Biak In chhungah chauh i kristianna i lantir chuan, palai ṭha tak i ni lo vang. Kalchhuakin hliam leh damlote mamawhtute i pan a ngai a ni.

*2. Mi zawng zawng chawimawi rawh.* Isua palai i nih avangin, midang i hmusit thei lo vang. Tu te pawh ni se, engang pawhin awm se la. Kan zavai hian Pathian anpuia siam vek kan ni. Bible pawhin hei hi fiah takin a sawi a ni, “Mi zawng zawng chawimawi rawh u. Unauhote chu hmangaih rawh u. Pathian ṭih dek rawh u. Lalber chu chawimawi rawh u.” (1 Petera 2:17).

Ram khat Palai te chu hnam dangte nen an inkawm fo va, chungahte chuan fing taka an awm angai ṭhin a ni. Chutiang chiah chuan Isua palaite chu hetiang hian an awm tur a ni: “In thinlungah Krista chu Lalah ruat rawh u; nangmahnia awm in beisei chhan zawt apiang che u chhang turin inpeih sa fo ang che u, nimahsela thuhnuairawlh tak leh tih dek chungin; chhia leh tha hriatna thiang tak nei ula, chutichuan an sawichhiatna che u kawngah chuan Kristaa in awm dan tha tak sawihnawmtute chu tihmualphovin an awm thei ang.” (1 Petera 3:15-16).

*3. Inlaichinna ṭha siam.* Tirhkoh Paula tan hei hi engnge awmzia ni le: “Chak lote ka lak luh theihna turin chak lote hnenah chak lo angin ka awm ṭhin; eng emaw ti tala ṭhenkhatte tal ka chhandam theihna turin mi zawng zawng hnenah engkim ka ni tawh.” (1 Korinth 9:22).

Midang ṭhenkhat chu nangmah ang tho va Isua mamawh te pawh an ni ve ang. Chutiang ringlo mite chuan Isua an hmuh theihnan hmangaihna leh duhsakna neiin inlaichinna ṭha i siam phawt angai a ni. Tichuan chumi hnuah Isua an hmu ve thei dawn a ni.

Isua hmangaihtu palai i nih chuan, vanah lawmman a tiam che a ni: “A rulhna roluah tur chu Lalpa hnen ata in hmu dawn tih hriain, in tih apiang chu mihring tan anga ti lovin, Lalpa tan anga ti zawkin, chak takin ti rawh u; Lalpa Krista rawng in bawl a nih hi.” (Kolossa 3:23-24).

Ngaihtuah zui atan

* Ṭanpuina mamawh ngawih ngawih hriat i nei em? Engtin nge i ṭanpui theih ang?

* Tunge chawimawi harsa i tih? Nangmah ang tho va Pathian siam chu zahawm taka i biak theih nan ṭawngṭaiin Pathian hnenah dil ang che.

* Chanchin ṭha mamawh nia hriat i nei em? Chu mi chuan Isua a hriat theihnan engtin nge inlaichinna ṭha i siam theih ang.

*[Lettu: Sangpuia]*

Monday, October 27, 2025

LEIAH HIAN ENGNGE MAWHPHURHNA I NEIH?

_Isua Zui Awmzia_

By Rick Warren 
— October 27, 2025
“Thlei bik nei lova mi tin hnathawh ang ṭheuhva ngaihtuah ṭhintu chu Pa anga in lam chuan heta in cham chhung zawng ṭih dekin awm rawh u.” 1 Petera 1:17

Khawvel hi i in a ni lo tih hi i hre tawh ṭhin ang. Nimahsela ngun takin i ngaihtuah em? Isua zuitu i nih chuan, i in chu leiah a ni lo vang. I in awmna chu vanram ah a ni, chatuana i awmna tur hmun a ni.

Mi tam zawk chu kum 70, 80 damin an awm a, kum 100 dam te pawh an awm— chumi bak zawng chu vanramah chatuanin i awm dawn a ni. He leia i awm chhung hi chu, palai angin reilote atan i awm tihna a ni.

Ram khat palaite hi ngaihtuah teh. An ram aiawha palai ni turin ramdangah an awm ṭhin. Nimahsela an awmna chu an ram a ni lo. An inbengbel bawk hek lo. Reilote atan an chenga, an awmchhan ang takin an tihtur an ti mai a ni.

Chutiang dinhmun chiah chu i ni. He leiah hian Isua aia palai ni turin, reilote atan mai i awm a; chatuana vanrama awm tura duan i ni. 

Bible chuan: “Thlei bik nei lova mi tin hnathawh ang ṭheuhva ngaihtuah ṭhintu chu Pa anga in lam chuan heta in cham chhung zawng ṭih dekin awm rawh u” (1 Petera 1:17). Bible chuan, “He khawvel hi lo chen lutuk suh. Palai mai i ni si a. I tihtur chu Isua aiawh a, i kiangvela mi leh midangte hnena chanchin ṭha hril hi a ni.”

Philippi 3 ah chuan, the Bible-in ringtute leh ringlote a khaikhin a, ringlote chuan, “Khawvel thil an duh ṭhin a ni. Keini zawng van khua leh tui kan ni si a, van aṭanga min chhandamtu Lal Isua Krista lo kal tur chu nghakhlel takin ka thlir a ni.” (Philippi 3:19-20).  

He khawvelah hian sum leh pai, ropuina leh thiltihtheihna um a tan laklawh a awl hle mai. Nimahsela Isua neitute chuan ngaihdan hran, chatuana nun an ngaihtuah tel tur a ni.

Chuta an tihtur pawimawh em em a chu la hrelo te hnena Isua chanchin ṭha hrilh a ni.

2 Korinth 5:20 ah chuan, “Chutichuan, Krista aia palai kan ni a, Pathianin keimahni min hmangin a ngen chiam che u tih theih a ni; 'Pathian nen lo inrem rawh u,' tiin Krista aiah kan ngen che u a ni.” 

Pathianin he leiah hian palai ni turin a dah che a. Vawiinah mi tuemaw hnenah chu chanchin chu hrilh ang che!

Ngaihtuah zui atan

* Engkawngah te nge he khawvel hi i chenna hmun nghet ang maia i lantir?

* Engkawngah te nge vanram chu i chenna hmun nghet tur leh he khawvel hi chu reilote atan i chenna mai tur angah i lantir?

* Vawiinah hian tu hnenah nge Chanchin Ṭha i hrilh ang?

*[Lettu: Sangpuia]*

Sunday, October 26, 2025

ISUA AIA PALAI I NI

_Isua Zui Awmzia_

- Rick Warren 
- October 26, 2025
_"Krista aia palai kan ni."_ (2 Kor. 5:20)

Isua zuitu i nih chuan a aiawha palai i ni. Bible-in chiang takin a sawi, _"Krista aia palai kan ni."_ (2 Kor. 5:20)

Palai chu engnge ni? Awlsamtein sawifiah ta ila, palai chu inlaichinna ṭha siam tura aiawha hmun danga tirh chhuahte hi an ni. Palai chi hrang hrang an awm - ram inrelbawlna lam palai, ei leh bar chungchanga palai, hnam nunphung chungchanga palai, sumdawnna kawnga palai, leh inzirtirna tur kawnga palai. Bible chuan thlarau lam nunkawnga palai a awm tih min hrilh- chu chu nang leh kei hi kan ni!

Isua aia palai i nihna kawnga mawhphurhna pathum i nei.

*A hmasa berah chuan khawvelah Isua ai i awh.* Chu chuan i nundan kawng tinreng a nghawng tur a ni. Philippi 1:27-ah chuan heti hian kan hmu, _"Engpawh ni sela, in awm dan chu Krista Chanchin Tha nen inmawi phawt rawh se."_

Kum tam tak liam taah khan California-a high sikul zirlaite zingah science leh environment chungchang inhmuhkhawmnaa sikul aiawh tur palai pariat an thlan chhuah zingah ka tel ve hlauh mai. Kawngka pana in ka chhuahsan laiin ka pain, "Ka fapa, tu ai nge i awh hre reng ang che" tiin thu min chah. California ai ka awh a ni mai lo. Warren chhungkaw ai ka awh a ni. Warren chhungkaw ai ka awh a ni mai lo a, Isua Krista ai ka awh zawk a ni.

Vawiin hun i hman maiin he thu hi i rilruah vawng reng rawh: tu ai nge i awh hre reng rawh. Hna i thawk emaw, i infiam a ni emaw, traffic jam-ah i tang a ni emaw tu ai nge i awh hre reng rawh. Ephesi 4:1-ah heti hian kan hmu, _"Koh i nihna angin nung rawh."_ (NIV)

*A pahnihnnaah chuan, tihtur pek i ni.* The Message chuan heti hian Isua ṭawngṭaina a letling, _"He khawvelah hlen tur hna min pek ang khan, anni pawh khawvelah hna ka pek hi."_ (Johana 17:18)

Hna hlen tur i neih chuan chu chu a pawimawh ber.  Chawl mai mai tur ni lovin chumi hna hlen tura dah chu i ni. Hna hlen tur i nei. Khawvela hna awm zawng zawnga pawimawh ber chu miten Pathian an hriat a chatuan nun an neih theihna tura ṭanpui hi a ni.

Paula chuan heti hian a ti, _"Nimahsela ka tlansiakna kawng ka hmabak hlen tur leh, Pathian khawngaihna Chanchin Tha hriattir tur, Lalpa Isua hnenah kha mi rawngbawl hna ka hmuh kha thawk zo phawt ila, ka nun pawh thlakhlelh tlakah ka ruat lo ve."_ (TT. 20:24)

*Pathumnaa chuan, thusawi tura thuneihna pek i ni.* A chang chuan midangte hnena Pathian chanchin sawi hi i hreh a ni mai thei. Mahse Isua a chanchin sawi turin thuneihna a pe che: _"Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin, inhnenah ka awm zel ang."_ (Mat  28:19-20)

Hei hi hre reng rawh: Isua zuitu i nih chuan, a aia palai i ni. A ai i awh a, a hna thawh tur i nei a, a chanchin ṭha puang tura thuneihna pek i ni tihna a ni.

Ngaihtuah zui atan.

I nitin nun dan kha han ngaihtuah teh. Engtik hunah nge Isua ai ṭha deuha i awh? Engtik laiin nge i beih fe a ngaih?

Hna nei angin i nung em? I hna hlen tur kha i thawh ṭhat zawk theih nan engnge i tihdanglam ang?

Mite hnena chanchin ṭha hril hi a harsa nge a awlsam? Isuan a chanchin sawi turin thuneihna a pe che tih i hriat theih nan engtinnge a puih che?

*I chatuan hmun tur tifel turin i inpeih em?*
Vawiin hian Pathian hria a i chatuan hmun tur tifel turin i inpeih em? Isua pawma a hnena i nunna hlan tura i la inpe ngai lo anih chuan heti hian i ṭawngṭai thei ang. Ṭawngkamah buaina tur a awm lo. I thinlung kha a pawimawh. Heti hian ṭawngṭai rawh:

"Ka Pa, bul ṭan ṭhat ka ngai tih ka hria e. I hmaah ka sual ka puang a i ngaihdam ka dil e. I thu chuan tupawhin Krista a rin chhan thil siam thar a lo ni tih min hrilh. Heta hi ka awm e. Ka mihring hlui hi hlipin mihring thar min rawn din rawh. I Thlarauin min chhung khat la min siam anga nung turin min pui ang che. Isua hi ka Lal leh Chhandamtuah ka pawm e. Amen" 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, October 25, 2025

I TANA DING TUR MI I MAMAWH

_Isua Zui Awmzia_

- Rick Warren 
- October 25, 2025
_"An rote, an sumte an hralh a, an chakkhai daih lek theuhvin an zaa hnenah chuan an sem ṭhin a."_ (TT 2:45)

Thlarau nuna ṭhan lenna hi midangte nena kan chenhonaah a thleng ṭhin, chuvang chuan ṭhian pawlho neih hi a pawimawh hle.  Kan nuna Pathian thiltum tihhlawhtlinna kawngah min pui ṭhin. Mahse ṭhian pawlho pawimawhna pakhat chu a taka an inpui ṭhin hi a ni.

Bible chuan kohhran hmasate chungchang heti hian a sawi, _"An rote, an sumte an hralh a, an chakkhai daih lek theuhvin an zaa hnenah chuan an sem ṭhin a"_ (TT 2:45).

Chu chu ṭhian pawlho te tak te tih ṭhin dan tur chu a ni. In in leh a chheh vel tihfaina tur khawl hawh tur i mamawh hunin tu emawin a hmantir ang che. I fate hriselna endik i ngaih laia mamawh i neih thutin an rawn pui ang che. Hna i zawn hunah zawh tur i nei ang a. Harsatna i tawh huna sawifiah dan pawh i thiam loh laiin tu emawin thingpui inah emaw, chaw eiah emaw a sawm che a, emaw rawn kawm tur hrim hrim chein a lokal thei bawk.

Hei hi Krista taksa, a kohhrante inpuihtawn dan chu a ni.

Kan inṭawngṭaipuitawn aia mihringte a taka kan inpuih emaw kan inzawm emaw a awm thei dawn em ni? Chu chu ṭhian pawlho te tak tein kan tih theih reng a ni.

Tirhkohte Thiltih bung 2-ah chuan kohhran te kha "ṭhahnemngai takin an ṭawngṭai ṭhin" tih min hrilh (TT. 2:42). Vawi tam tak a huhoa ṭawngṭainain thil a tih theihzia ka lo hmu tawh- pawlho te taktein harsatna tawkte an ṭawngṭaipui a thil ropui tak a lo thleng ṭhin- thilmak hial a thleng ṭhin! 

Ṭanpui dil ngaihna hre lo khawp emaw, ṭawngṭai dan tur hre lo khawp emaw hiala hun khirh i tawng tawh em? Chu'ng hunah tak chuan i tana ṭawngṭai turin midang i mamawh. I rilru a hah a, i chau a, i keh chhia a, i beidawng a, lungngaihnain a bual che avangin mahni tan i ṭawngṭai thei lo a ni.

Chutah tak chuan i tana ṭawngṭai tur ṭhian pawlho i mamawh a ni, i tana Pathian ring a, rinna neihsak tur chein.

Mahni maia phurrit phur tura duan kan ni lo. Inṭanpuitawn tur kan ni. Chengho tura duan kan ni a. Kan inneitawn a ni.

Ngaihtuah zui atan.

Kar thar tur atan hian engtinnge in ṭhian pawlho zinga mi tu emaw i ngaihsak theih ang?

Eng kawngah nge rinhlelhna emaw hriat chian lohna i neih avanga rin ngam tur mi i mamawh? Tunge i hnen lokal anga ṭawngṭaipui ang che?

Engvangin nge ṭawngṭaina hi kan inngaihsan dan lantirna ṭha berte zinga mi anih? Eng ang thiltihtheihna nge a neih? 

[Lettu: Mapuia Fanai]

Friday, October 24, 2025

IN INPAWLHONA CHU MUMAL TAKA I KALPUI A NGAI

_Isua Zui Awmzia_

By Rick Warren 
— October 24, 2025
“Tirhkohte thu zirtîr ngaithlaa inpâwl khâwmin, chhang phel leh ṭawngṭaiin an awm ho ṭhîn a... Ni tin Tempulah lungrual takin an inkhâwm ṭhîn a, in hrang hrangahte chhang an phel a, hlim tak leh inphal takin chaw an ei ho ṭhîn.” [Tirhkohte 2:42, 46]

Inpawlhona [fellowship] hmangin inlaichinna a piang ṭhin —
rinna, thil tih tur, Kristaa inpumkhatna hmangin inlaichinna a lo awm ṭhin. Chutiang inlaichinna chu kawng khat chauhin a awm thei a - chu a mumal taka a kal reng a ngai. 

Mi tute nen emawa in inhmu khawm fo a nih chuan a ṭha lutuk tlat! Mahse i rawngbawlpuite nen pawh in inhmu khawm fo lo a nih chuan inpawlhona mumal tak in nei thei lo ang. Kar khatah vawi khat tal inhmu khawm tura inlungrual thei a nih chuan chu chu duhthusam a ni, chutiang hunah chuan Bible te zir hovin ṭawngṭaihona te in nei thei ang a, in infuihtawn thei bawk ang. 

In inpawlhona chu  hun bi awmze nei takin kalpui ni rawh se. 

Tirhkohte 2 chuan  Jerusalema kohhran hmasa ber chu hetiang hian a sawi, “Tirhkohte thu zirtîr ngaithlaa inpâwl khâwmin, chhang phel leh ṭawngṭaiin an awm ho ṭhîn a... Ni tin Tempulah lungrual takin an inkhâwm ṭhîn a, in hrang hrangahte chhang an phel a, hlim tak leh inphal takin chaw an ei ho ṭhîn.” [Tirhkohte 2:42, 46]

Inpawlhonaa keimahin hmaraw ṭangkai ber pakhat anga ka ngaih fo chu chaw a ni. Kohhran hmasate pawh kha an inpawlhona hmanraw pawimawh tak chu chaw eiho tho  a ni!

Isua khan leia a rawngbawlna kha amah ringawtin a thawk ngai lo. A zirtirte nen khan an nung ho a. 
Isua khan midang a zirtir chang leh   a zirtirte nena inpawlhona a neih chanh apiang khan an zin a nih loh pawhin chaw an kil ho ṭhin. Eng vangin? A chhan chu mi an kal emaw chaw an ei lai emaw chuan an awm hahdam [relaxed] ṭhin a ni. An Inkharkhip loh lai tak a ni fova, an inveng run lova, midang ngaihdan thar leh thurawn pawh an dawng sawng thei. Chutiang hunah chuan inbiak leh inpawlhona awmze nei tak a neih theih ṭhin. 

Isua khan a zirtir mi tam vak lote nen khan awmze nei taka hun hman tumin theihtawp a chhuah a, hlim takin chaw an eiho ṭhin. Kohhran hmasate kha eng emaw chen an khawsahova an inzir tawnin an ṭawngṭaiho ṭhin a. Hlim takin chaw an ei ho ṭhin a ni.

Chutianga chaw hmanga inpawlhona chuan thlarauva inzawmna leh inpawlhona duhawm tak a chhuah ngei ngei ang. Chu bakah chuan Pathian chhungte zinga kan tel ve avang chuan khawvel mite hmaah kan eng kan enchhuahtir ang a, midang tana tel ve chakawm takin kan inlantir ang. 

Ngaihtuah zui atan. 

Rawngbawlpui/ṭhiante [small group] zinga chaw in eiho hmang chuan engtin nge in buaina ṭhenkhat in chinfel theih ang? 

Chaw hmang chuan engtin nge kohhrana in hmang lo in ṭhiante nen chuan inpawlhona in neih ang a, bible-a kan hmuh midang chunga ṭhat chhuah dan chu in lantir theih ang? 

I rawngbawlpui emaw Pathian mi ṭhenkhatte nena in hun hman chu rawngbawlna huanga i hun hman dangte ang bawkin i ngai ve thei ang em? Eng vangin nge? 

[Lettu: Peka]

Thursday, October 23, 2025

TLANG CHHIP THLENG TURIN THAWHPUI [TEAM] I MAMAWH

_Isua Zui awmzia_

By Rick Warren 
— October 23, 2025
“Chutiang bawkin keini pawh tam tak ni mah ila, Kristaah chuan taksa pumkhat kan ni a, kan za hian taksa pêng anga inzawm tawn ṭheuh kan ni." [Rom 12:5]

Sir Edmund Hillary-a lehkhabu  _High Adventure_ , -ah chuan Mount Everest an lawn hmasak ber tuma an thil tawnte a chuang a. "Mahni chauha Mount Everest lawn tum chu thil atthlak tak a ni ang. Team [thawhpui] tute emaw i neih loh chuan a theih lo tawp ang," tiin a sawi hial. Chu chu mihring nun pumpuiah hian a dik hrim hrim zawk a ni.

I nuna "tlang" eng pawh mai chu nangmah chuan i lawn tak tak ngai lo vang. Nangmah puitu tu emaw i mamawh zel. 

Vawiin hian eng anga tlang sang nge i lawn dawn ka hre lo. I tlanglawn tur chu lusunna emaw inthenna a lo ni mek thei bawk. Mi  thenkhat tlang lawn tur chu leiba emaw sum leh pai kal fuh lo vanga buaina lian tak pawh a ni thei. 
 
Thenkhat thung chuan rilru hrehawmna leh natna hneh an tum mek pawh a ni thei. Mi thenkhat chuan beisei loh deuha an hna an chan avanga buaina chinfel tumin hringnun tlang an lawn dawn mek a ni thei bawk. Mi dang thung chuan hlauhna leh thinrimna an tana Pathian ruahmanna tibuaitu hneh tuma insangmarin 
tlang lawn an tum ve mek a ni thei. 

Nimin lama i natna te chu vawiinah lo tarlang tawh suh. Kal liamtir mai kha a tha e. Kawngkhar i khar khum a tha ber a,  tichuan i buaina, i rilru natna, mi i huatna, i hlauhthawnna, i lungngaihna, i hlauhna te chu i paih bo thei ang. I natna hmunah pawh chuan hmalam panin i kal thei tawh ang. 

Kan tih tur ti thei lova min tibuaitute chu kalsan kan duh vek a. Kan theihna hai chhuahte chu kan duh hle. Ka hmabaka a sang lai ber thlenga Pathian thatna dawn chu kan duh vek. 

Pathianin thleng tura a duhna hmun/tlang chu nangmah ringawta i kal chuan i thleng thei ngai lo thung ang. Thawhpui nangma kianga ding a, fuihtu che chu i mamawh a ni. Thian i tluk changa kaithotu tur che chu i mamawh. Pathianin i tana a kawng ruat zawh dik tur chuan chung mite chuan an tanpui thei ang che. 

Nangmah tanpui theitu tute emaw [small group] tel lo chuan i tithei ngai lo vang. 

"Chutiang bawkin keini pawh tam tak ni mah ila, Kristaah chuan taksa pumkhat kan ni a, kan za hian taksa pêng anga inzawm tawn ṭheuh kan ni." [Rom 12: 5]

Ngauhtuah zui atan. 

Vawiin hian eng buaina tlang nge lawn chhuah i tum? Kohhran leh Pathian mite atang chuan eng nge i mamawh? 

Pathian chuan eng vangin nge in mamawh tawn turin min siam i hria em?

Vawiin hian midang tu emaw chu Pathianin an tana a kawng ruat zawh zel thei tur leh Pathian ring tlat tur chuan engtin nge i fuih zel theih ang? 

[Lettu: Peka]

Wednesday, October 22, 2025

ISUA ANGA MI ZAWM THEIH

_Isua Zui Awmzia_

- Rick Warren
- October 22, 2025
"Lalpa i Pathian chu i thinlung zawng zawngin i hmangaih tur a ni...nangmah i inhmangaih angin i vengte pawh i hmangaih tur a ni," (Marka 12:30-31).

Pawl tê (small group) hi a hlawk a ni mai lova - a Pathian thu bawk a ni!

Isua khan kum 30 mi a nihin a rawngbawl hna a ṭan a. A tih hmasak ber chu baptisma chan a ni. A thil tih pahnihna chu pawl tê a din a, a pawla tel turin mi 12 a khawm a. Kum 3 chhung chu zin kual a, ei tlang leh rawngbawl hovin hun an hmang a ni.

Isua pawhin pawl a mamawh a - a famkim tho si! Nang pawhin pakhat emaw a aia tam emaw i mamawh ve a ni.

Engvangin? Nang pawhin hetianga tel vena  pawl tê hi i mamawh, a chhan chu an inzawm kual vek vang a ni.

Hei hi a pawimawh hle a chhan chu nun hi hmangaih zirna a nih vang a ni. Inzawmna in neih loh chuan in inhmangaih tak tak thei lovang. Pawl hi mi dangte nena inlaichinna siam tura thil enchhin zirna hmun a ni a. Mi dangte hmangaih tura enchhinna hmun a ni bawk.

Mipui pungkhawm ho nen in inkawm thei lo. Mahse pawl ho zingah chuan thil i zawtin, finna thilte chu in inṭawmpui thei a ni. Pawl hoah chuan thil eng emaw bikah in inṭanpui tawn thei a, thlawpna i dawng thei a, i nun hniam lai leh san lai  thil pawh i sawi thei a ni.

Tunlai khawvela kan harsatna pakhat chu mikhualte nen kan cheng ho hi a ni. Mite hian inlaichinna chungchang an zir ta lo hle mai a. Inkawm dan kan thiam lova - chu aia ṭha lo lehzual chu a tum pawh kan tum ta lo hi a ni. Electric hmanga motor dahna kawngkhar hian min timikhual zo ta vek a ni! Ṭhenawmte laka inhnamhnawih emaw anmahni tawh emaw pawh kan tum ta lo.

Inlaichinna siam kawngah hian kan ṭha tawk lo, a chhan chu zir turin chutiang dinhmunah chuan kan indah loh vang a ni. 

Isua chuan nuna thil pawimawh ber chu hmangaih zir hi a ni a, chu chu Thupek Ropui a ti: "Lalpa i Pathian chu i thinlung zawng zawngin i hmangaih tur a ni...nangmah i inhmangaih angin i vengte pawh i hmangaih tur a ni," (Marka 12:30-31). A awmzia ber chu khawvela i tih tur pawimawh chu inlaichinna siam zir hi a ni, chu chu Pathian hmangaih leh mi dangte hmangaih a ni. Chumi ti tur chuan, mi mal taka mi i hrit a ngai a ni.

Kohhrana mi zawng zawng i hriat a ngai vek kher lo. Mahse tute emaw chu i hriat a ngai si a ni.

I dam loh emaw, damdawi in i chhuahsan emaw, i hlawh a pun emaw, i hna i chân emaw, i bâ i pek theih loh emaw, thlawhna ṭumhmuna kal i mamawh laia hretu che tu emaw i mamawh a ni. An hria che a. Nangmah nena lawm an duh a. I mamawh hunah an lo lang dawn a ni.

Ngaihtuah zui atan.

Eng vangin nge Isua anga hmangaih zir tur hian tum a ngaih?

Mi dangte tana i nun hawng tur hian eng thil pali nge i hlauh?

Eng ang kawngin nge Isua khan a zirtirte kha a 'pawl te' hmanga a entawn tur pek?

[Lettu: Marova Punte]

Tuesday, October 21, 2025

PATHIAN CHUAN A THUTIAM A VAWNG

_Pathian Aw Hriat_

- Rick Warren
- Oct 21, 2025
“Kan thlahtute hnena a sawi ang khan, Abrahama leh a thlahte chu chatuana a khawngaih turzia hriat reng nan, a chhiahhlawh Israelte chu a chhawmdawl ta a," a ti a. Luka 1:54-55

Pathian chuan a thutiam a vawng tlat ṭhin. A rinawmin a ṭha em em a, nangmah ngei pawhin i chhut thiam ang.

Chu chu alawm Mari fakna hla Luka 1-a kan hmuh chu: “Kan thlahtute hnena a sawi ang khan, Abrahama leh a thlahte chu chatuana a khawngaih turzia hriat reng nan, a chhiahhlawh Israelte chu a chhawmdawl ta a," a ti a.” (Luka 1:54-55).

Mari pianhma kum sanghnih ah khan Abrahama chu a awm a. Pathianin Abrahama chu thu a tiam a. Abrahama thlah aṭangin Chhandamtu a lo chhuak dawn tih thu a tiam a ni.

Mari'n Abrahama hnena Pathian thutiam chu a hrereng a. Chu a thutiam ang ngei chuan Mari pawhin nau a pai tur chu a ring a ni.

Chumi awmzia chu, Mari chanchin chu a pianhma kum sangkhat hmalamah khan a lo inṭan daih tawh tihna a ni. Pathianin Abrahama hnenah thu a tiam a. Isaia hnenah hrilhlawkna a lo thleng a: “Chuvangin Lalpa ngei chuan chhinchhiahna a pe ang che u; ngai teh u, nula thianghlim pakhat a rai ang a, fapa a hring ang a, a hmingah Immanuela a sa ang.” (Isaia 7:14).

Pathianin Mari awmdan tur chu leilung pianhmain a lo duang lawk tawh a  ni. Chu chu Mari chuan a pawm hmiah a, Pathian pawhin a vawng tlat a ni. A fapa Isua chu, lo piang a, nung a, kan sualna vanga krawsa thi a, tholeh turin lo a tir a ni.

Pathianin i tan pawh ruahmanna a nei a. Pathianin leilung a din hma daih tawhin, a rilru ah i awm tawh a, nitina i nun hman tur thlengin a duang lawk tawh a ni. Tunah chuan chu Pathian thil ruahman chu i pawm duh leh duh loh chu i duhthlannaah a innghat ta a ni.

I nuna Pathian thil ruahman chu i pawm thei em? I pawm thei anih chuan, hetianga ṭawngṭai tur hian ka sawm che a ni:

Ka Pa, vawiinah hian ka nuna i ruahmanna tlawm takin ka pawm e. I tana siam ka ni tih ka inhrechhuak a. Tuman min ngaihsak angin min ngaihsak ve lo. I hnung zui hi malsawmna a ni. Mi tlawmte i chawimawi ṭhin a, chuvangin ka rawn inphahhniam a ni. Thutiamte i vawn tlat avangin ka lawm e. Vawiinah hian rinnain thu ka intiam e. Ka hmalam huna lo thleng tur chu hrelawk vek lo mah ila. I hnenah leh ka nun atan ka intiam ve tawp a ni. Vawiin aṭang hian i hnung zui turin ka intiam e. Isua hmingin ka dil a che. Amen.

Ngaihtuah zui atan

* Pathianin Abrahama hnenah thu a tiam a—chu thutiam chu Isua ataka a lo lan hma kum sanghnih hmalamah khan a ni. Chu chuan nangmahah beiseina a pe che nge a tihnual zawk che?

* Engtinnge Pathian zahngaihna nang leh i chhungte chunga lo lang chu i hmuh? 

* Vawiinah hian mahni inpe turin i ṭawngṭai thei em ? I thei anih chuan nidangah pawh lo chhiar chhunzawm zel ang che. I thei lo anih chuan, engin nge i inpekna tur dal che le?

*[Lettu: Sangpuia]*

Monday, October 20, 2025

PATHIANIN INNGAITLAWMTE A CHAWIMAWI

_Pathian Aw Hriat_

By Rick Warren 
— October 20, 2025
“An ṭhutphaha lal ṭhute chu a hnuk thla a. Hnam tlawmte chu a chawimawi ta a.” Luka 1:52

Pathianin duhthlan tur a pe fo ṭhin che a, duhthlanna i siam tur pawimawh em em chu, i duh dana i kawng zawh emaw Pathian tana i nun kawng zawh emaw hi a ni. Hei hi thudik chu a ni. Pathian tana nunkawng zawh tur chuan inngaihtlawm a ngai a ni tih hi.

Inngaihtlawm a ngai tih awmzia chu, “Lalpa, ka kawng zawh lo vin, i kawng zawh ka duh a. Keima ruahmannaah ni lo vin, i ruahmannaa kal ka duh a ni.”

Chapona chuan, “Lalpa, ruahmanna leh hmachhawp dang ka nei ve a. Keima duhdana kal ka ve ka duh,” a ti.

Nimahsela Bible chuan chapona ni lo vin, inngaihtlawmna thlang turin min duh a ni. Jakoba 4:6 ah chuan, “Pathianin mi chapote a dodal a, inngaitlawm te erawh chu khawngaihna a pe ṭhin,” a ti a ni. Thufingte 18:12 ah chuan, “Mihring rilru chapona chu boralna hmaah a kal a, Inngaihtlâwmna chu chawimawina hmaah.” Jakoba 4:10 chuan, “Lalpa mithmuhin inngaitlawm rawh u, tichuan a chawimawi ang che u.”   

Pathianin chawimawi che se la - i chhungkua te, i sumdawnna te, i nun te chawimawi se la. I hriselna leh i sum leh pai te pawh chawisang se la tih hi ka duh a ni. Nimahsela Bible chuan, heng zawng zawng hi inngaihtlawmna aṭang inṭan tur a ni a ti.

Isua nu Mari chuan, hei hi a hrechiang hle a, hetiang hian a sawi a, “A banin a tha chakzia a entir a, Mi chapote chu an inngaihtuahnain a tidarh ta a. An ṭhutphaha lal ṭhute chu a hnuk thla a. Hnam tlawmte chu a chawimawi ta a. Rilṭamte chu thil ṭha takin a tipuar a, Hausate chu kutruakin a kal botir ta a.” (Luka 1:51-53).

He hla thu hi a ropui hle a - mihring ngaihtuahna lam ang lo deuh va Pathian hnathawh lo lang sawifiahna a ni.

Mari kha lehkhathiam a ni lo, nimahsela Pathian leh a Thu kha a hrechiang a ni. A malsawmna pawh a mamawh niin a inhria a. Tichuan a inngaitlawm a, a nun atan Pathian lam kawng a zawh a ni.

Engnge i dinhmun ni ve le? Nangma kawng chu chapo takin i zawh nge? Inngaitlawm takin Pathian lam kawng chu i zawh zawk?

Ngaihtuah zui atan

* Engtiklai khan nge tlawmna aiin chapona i thlan le? Engnge a rahchhuah le?

* Engtiklai khan nge nangma duhzawng ni lo vin inngaitlawm takin Pathian duhzawng chu i thlan le? Engnge a rahchhuah le?

* Vawiinah hian eng kawng nge i zawh? Pathianin i tana a ruahman kawng chu zawh i duh tawh em le?

*[Lettu: Sangpuia]*

Sunday, October 19, 2025

PATHIAN RILRUAH I AWM RENG

_Pathian Aw Hriat_

- Rick Warren 
- October 19, 2025
_"Lalpa, englai pawha min ngaihtuah reng ṭhintu chuan mal min sawm ngei ang."_ (Sam 115:12, GW)

Pathian aia ngaihsaktu che an awm lo. Nangmah i inngaihsak aia nasa mahin a ngaihsak zawk bawk che.

Willie Nelson-a hlaah chuan heti hian kan hmu, "Ka rilruah engtik lai pawhin i awm ṭhin." Mahse he hla hian a sawi hi a dik famkim lo. Tu emaw i hmangaihna kha eng anga nasa pawh nise engtik lai pawha i rilru luahtu a ni thei lo.

Mahse hei hi hrilh che ka duh: Pathian rilruah i awm reng. Ngaihtuah loh lai che a nei ngai lo a. Tunah pawh khan a ngaihtuah che a ni.

Hei hi Bible-in min hrilh nawn fo. Sam 115:12-ah chuan heti hian kan hmu, _"Lalpa, englai pawha min ngaihtuah reng ṭhintu chuan mal min sawm ngei ang." _ (GW). The Living Bible chuan 1 Petera 5:7 thu heti hian a letling, _"I lungngaihna leh mangan te a hnenah bel vek rawh, a ngaihtuah che a a ngaihsak reng che avangin."_

I ngaihmawh apiang te Pathian hnenah thlen rawh - i manganna leh hlauhzawng thil engpawh nise. I nunah khan i ngaihtuahzawng, Pathianin a ngaihsak loh engmah a awm lo, a chhan chu a rilruah i awm reng avangin.

Pathian rilrua i awm reng avangin a thlir reng ṭhin che. I atana a ruahmanna te i ring ngam dawn tihna a ni.

Kum tam tak kal taa krismas hmasa ber a thlen hma khan Mari khan a nuna Pathian hun ruat a pawm a, a chhan chu Pathianin a ngaihsakin a thlir reng tih a hre tlat. Vantirhkohin Pathianin a Fapa nu atana a thlan thu a hrilh ve leh heti hian a ti, _"A bawinu hnam tlawmzia a hmu a, a ngaihsak si a."_ tiin (Luka 1:48, NIV)

"Ngaihsak" tih hian engnge a entir? A awmzia chu Pathian hi a inring reng tihna a ni. A ngaihtuah a, chin a hria a. A rilru a pe reng tihna a ni. Tumahin an ngaihsak loh lai che pawhin Pathian chuan a ngaihsak reng che. Engkim a lo hmu a. Isuan heti hian a sawi: _"Chawngzawng pahnih dar tangka pakhatah an hralh thin lo vem ni? Nimahsela, an zinga pakhat mah in Pa lovin leiah a tla lo vang. In samzaite lam pawh hi chhiar vek a ni asin."_ (Matthaia 10:29-30)

I lua sa ṭo zat kha i hre miah lo- mahse Pathian chuan a hre tlat. Chutiang khawp chuan a ngaihsak che a ni!

Pathian ngaihsakna - a ngaihtuahna avanga khan Mari khan Pathian ruahmanna kha a ring a ni. I tana a ruahmannaah rinna i nghat ngam dawn em?

Ngaihtuah zui atan.

Tunge i ngaihtuah nasat ber? Chumi chu eng ang takin nge i ngaihsak?

Pathian rilruah i awm reng tih hian i nunah engnge awmzia a neih?

I nunkawng eng pawh Pathianin a ngaihsak tih hriatna hian eng danglamna nge a thlen- i sam zai zat lam a hriatna hian.

*I chhandam nan Pathianah rinna i nghat em?*
Krista hi Lal leh Chhandamtuah i la pawm lo anih chuan engvangin nge tunah i pawm mai loh ang? Heti hian ṭawngtai la:

"Lalpa, ka sual hian i lak ata min ṭhen hrang a, keimah mai chu ka siamṭha thei lo. Mahse min hmangaih em avangin ka sual tlan nan Isua i rawn tir tih ka hria e. Misualte lam tura lokal a ni i ti a, kei pawh ka tel ve ngei mai. I khawngaihna avang leh ka phu lo chunga min hmangaih avangin ka lawm e. Nang nena inzawm ka duh a ni.

"Chuvangin, tunah hian Isuaah rinna ka nghat e. Ka Lal leh Chhandamtuah ka pawm a, amah kaltlanga chatuan nunna min pek ka ring e. Min hruai la, min tidanglam la, nitin Isua zui turin min pui ang che. Isua hmingin, Amen." 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

Saturday, October 18, 2025

PATHIAN HUN RUAT I PAWM ANG EM?

_Pathian Aw Hriat_

- Rick Warren 
- October 18, 2025
_"Lalpa chhiahhlawh ka ni a, a duh apiang ti turin ka inpeih reng e"_ (Luka 1:38, TLB)

I tana hun ruat chu i zawhna neihin nasa takin a hril. Zawhna zawh kawngah i huaisen a i rinawm zawh poh leh i kal thui zel ang.

Krismas hmasa ber a thlen hma khan Mari, Isua nu ni ta khan amah leh amah kha zawhna huaisen tak leh pawimawh tak a inzawh a ṭul: Pathianin ka tana a hun ruat hi ka pawm ang em tih zawhna hi.

Mari chungchangah hian ngaihdan dik lo tam tak a awm. Mahse Mari mibik ni tura siamtu chu Pathianin a tana a hun ruat a pawm tlat kha a ni. Pathianin a kohna zawnah Pathianah rinna a nghat ngam tlat.

Bible chuan Mari chanchin heti hian min hrilh: _"Tin, a thla ruknaah chuan Pathianin vantirhkoh Gabriela chu Galili rama khaw pakhat Nazaret an tihah chuan, nula thianghlim pakhat hnenah a tir a, chu nula chu Davida thlaha mi a hming Josefa nupui hual a ni a; nula hming chu Mari a ni. Tin, vantirhkoh chu a hnenah a lut a, 'Chibai, Vohbik! Lalpa i hnenah a awm,' a ti a. Tin, chu mi thusawi avang chuan a mangang ta em em a. "_ (Luka 1:26-29) 

Mari kha a la naupang hle - kum 15 aiin a la upa lo hial mai thei. Vantirhkohin a hnenah, "Pathianin khawvel tan chhandamtu a tir dawn a, mihringte anga lo piang turin. Nula thianghlim la ni mahla chu naute nu tur chu i ni" tiinna hrilh tawp mai. 

Marin engtinnge a lo chhan? _"Mari chu a mangang em em a . . ." _ Mari kha a mangang a ni. Engnge tih tur, engnge sawi tur, tu hnenah nge hrilh tur tih a hre lo. "Tuma'n min ring dawn lo. Ka nu emaw, ka ṭhiante emaw, Josefa ngei pawhin min ring lovang" tiin a ngaihtuah ngei ang. A hlauthawng a ni.

Heti hian a thawnthu chhunzawm a ni: _"Tin, vantirhkoh chuan a hnenah, 'Mari, hlau suh; Pathian ngaihsakzawng i ni e. Ngai rawh, i rai ang a, fapa i hring ang a, a hmingah chuan Isua i sa tur a ni. Ani chu mi lian a la ni ang a, Chungnungbera Fapa an ti ang; Lal Pathianin a hnenah a thlahtu Davida thutphah chu a pe ang a; Jakoba thlahte chungah chatuanin a lal ang a, a ramin kin ni a nei lo vang,' a ti a."_ (Luka 1:30-33)

Hei hi mihring pian dan phung pangngai ang mai a ni lo. Chu nau chu Pathian Fapa- Messia, Chhandamtu tur chu a ni.

Engtinnge Mari chuan a lo dawnsawn le? Heti hian a chhanna The Living Bible chuan a letling, _"Lalpa chhiahhlawh ka ni a, a duh apiang ti turin ka inpeih reng e"_ (Luka 1:38, TLB).

Engvangin nge Pathianin hmeichhe dang zawng zawng aiin Mari kha Messia nu ni tura a thlen le?

A zir thiamna vang a ni lo. Engmah a zir lo. A hausak vang a ni bawk lo. Thingtlang nula rethei ve te mai a ni. A puitlin vang pawh a hi hek lo. Tleirawl mai chauh a la ni. Engvangin nge Mari chu Pathianin a thlan si?

A chhan chu Pathianah rinna pumhlumin a nghat a, harsatna, hriatthiam lohna leh sawiselna dawng dawn mahse Pathian remruat a pawm tlat a ni.

Engtinnge i tih ve dawn le? Pathian remruatah aw i ti ve ngam dawn em- i kawng chu ringhlelin harsa dawn tih hre mahla? Pathian remruat chu i tan a ṭha ber tih ring ngam rawh, i remruat ve theih zawng zawng ai pawhin.

Ngaihtuah zui atan.

I hlauh avang emaw i hriat chian loh avang emawin Pathian kohna i hnial tawh em? Engnge a rah?

Hlau chung leh chiang lo riau chungin Pathian kohna i chhang tawh em? Engnge a rah?

"Vawiin hian Pathian remruatna pawm turin ka inring em?" tiin inzawt teh. Engnge i chhanna? 

[Lettu: Mapuia Fanai]

Friday, October 17, 2025

PATHIANIN I HNENA A THIL SAWI HRIAT RENG DAN

 Pathian Aw Hriat


By Rick Warren

— October 17, 2025



“Lalpa chuan heti hian mi chhâng a:

“Inlârna chu ziak la,

a chhiartuin tlân paha

A chhiar theih khawpa chiangin

Lungphêk chungah ziak rawh.” [Habakkuka 2:2]


Pathian aw ngaihthlak dan kawng khat leh a thil sawi hriat reng dan pakhat chu – ziah chhuah a ni. Chu chu thlarau huanga tute emaw chanchin chhui chian dan [journaling] a ni, Isua zuitu tan chuan chu chu hriat leh hmanchhuah ngei ngei a ngai. 


Chanchinbu [journal] chu mimal chanchin ziahna [diary] a ni lo. Diary chu i thil lo tih tawhte an ni a. Journal thung chuan Pathian hnena i ṭawngṭaina leh thil lo zir tawhte a chhinchhiah – i thil lo tihsual tawh leh chung aṭanga thil i lo zir chhuah tawhte chu an ni. Pathian nena inlendunna chanchin ziakna lehkhabu a ni. 


Journal ziah dan pakhat chu Pathian zawhna nangma lama i chhanna chu a ni. Bible i chhiar chang chuan i rilrua zawhna awmte chu ziak chhuak ang che. Pathianin i hnena a puan chhuahte chu ziak chhuak bawk ang che. 


Habakkuk-a chuan Pathian aw hriat a duh changa a awm dan chuan a awm a. Habakkuka lehkhabuah chuan Lalpa chuan hetiang hian a sawi, “Lalpa chuan heti hian mi chhâng a: “Inlârna chu ziak la, a chhiartuin tlân paha.  A chhiar theih khawpa chiangin lungphêk chungah ziak rawh,” tiin [Habakkuka 2:2] Chu chu Habakkuka lehkhabu kan lo neih theih dan chu a ni. Bung hmasa berah chuan Habakkuka chuan Pathian hnena a sawi chu a ziak a. Bung hnihnaah chuan Pathianin ama hnena a thusawi chu a ziak thung. 


Chu tho chu Sam bu kan neih dan chu a ni. Sam ṭhen/number eng emaw zatte chu Davidan Pathian nena hun fianrial an hman changa a ziak an ni. Thil ṭhenkhatah chuan amahin nia a hriat danin bul a ṭan a, Pathian thusawi angin a lehkhabu chu a khar thung. 


Journal kalpui dan dang leh chu ṭawngṭaina ziah chhuah a ni. I ziah chhuah chang chuan, thlarau malsawmna i chante chu i fate leh tute tan i hnutchhiah a ni. Thlarau journal i ziak a nih chuan chhuan eng emaw zat daih hnuhma i hnutchhiah theih chu chhut rawh. Bible chuan, “Chu chu ṭhangthar lo la awm tûr tân chuan ziak a ni ang a, Siama lo la awm tûr hnam chuan Lalpa chu an fak ang,” tiin a sawi [Sam 102: 18]  


I ṭawngṭainate ziakin i hnutchhiah a nih chuan Pathian chhanna i lo dawn tawhte chu i lo vawng ṭha dawn tihna a ni. Kan kohhrana member pakhat chuan hna nei lova kum khat vel a vak rawlawi hun lai chu min hrilh a. A hrehawmin a rapthlak hle tiin a sawi a, hlauhna leh rilru hahna nei reng rengin hun a hmang a. Mahse chutih hun lai chuan a chunga thil thleng apiangte chu a chhinchhiah a, zirlai a zir chhuahte chu felfai takin a ziak chhuak bawk. 


Kum sawm hnu emaw velah a hna chu a chan leh ta a. Hetiang hian min hrilh, “A hma anga a bul aṭanga ṭana chona leh rilru hahna buaipui lovin kum kaw liam ta vela ka thuziak te chu ka chhiar ta a ni. A hmaa ka nat anga nat kha a ngai ta lo. Pathianin min tuamhlawm dan kha ka la hre thei a. Chu mi kum chhung zawnga Pathian min hruai dan chu ka hmu nawn vek thei a ni,” tiin a sawi. 


I thil zir chhuahte chu i ziak lo a nih chuan i theihnghilh palh thei. Pencil tawi ber chu hriatna thui ber aiin a sei zawk – chuvangin ziak chhuak rawh! Tichuan, Pathian venhimna thu chu ziak chhuak ang che, i ngaihtuah nawn fo thei ang. 


Ngaihtuah zui atan. 


• “Ziak chhuak” tih awmzia chu engtin nge i lo mittha ve – lehkhabu danglam tak, computer-a file, nge phone-a i thil chhinchhiah chu? I thlirna pangngai chu thlak danglamin i ṭawngṭaina leh Pathian atana zirlai pawimawh i zirte chu ziak chhuak ang che. 


• Vawiin hian engnge i zir tur Pathianin zirlai a kawhhmuh che chu? 


• Heng zawhna awmziate hi hmu fiah turin ṭawngṭaina nen bul han ṭan teh: Pathian nihna zingah eng nge i duh ber? I chhungte/ṭhiante zingah tuten nge Pathian ṭanpuina mamawh? I mamawh phuhru turin Pathian ṭanpuina chu engtiangin nge i mamawh? Vawiin hian Pathian ṭanpuina engtin nge i mamawh? 


[ Lettu: Peka]

Thursday, October 16, 2025

FIANRIAL HUN NEI RAWH

_Pathian Aw Hriat_

By Rick Warren
— October 16, 2025
“Nang erawh chu i ṭawngṭaiin, i pindan chhûngrilah lût la, i kawng khâr la, i Pa a rûka awm hnênah chuan ṭawngṭai rawh; tichuan, i Pa a rûka hmu ṭhîntu chuan a rûl ang che.” [Matthaia 6:6]

I nun kha thil bengchhengin an hual vel a nih chuan Pathian aw i hre thei lo vang. A fala hun i hman a ngai, thawm bengchheng siam lova i awm a ngaih chang pawh a awm hial ang. Mi tam tak chuan chu chu fianrial hun tiin an sawi. 

A chunga Bible thu khi hetiang deuh hian a sawifiah theih awm e: “Pathian hmaa lemchang miah lova i khawsak theihna tur hmun fianrial thlang la. I nihna ang ang leh dik taka i intarlan theihna hmunah chuan awm ang che. Nangmah inbuaipui lovin Pathian i buaipui thei ang a, chu hmunah chuan a khawngaihna i tem thar leh ang. 

Pathian thusawi eng emaw lo hriat leh i nun tana a hmathlir lo hmuh chu thil inang chiah lo a ni thei: Hmuh che a duh. Dik tak chuan Jeremia 33: 3 ah chuan hetiang hian a sawi hial, “Mi au la, ka chhâng ang che, thil ropui leh inthup i hriat ngai loh chu ka entîr ang che,” tiin. 

Pathian chu i nghak niin i inhre mai thei a – mahse vawi eng emawzat chu Pathian chuan a nghak zawk che a ni. Inlaichinna in neih theih nan a siam che a, a kianga hun i hman chuan nuam a ti ṭhin. I nitin nunah chuan chanvo neih ve a duh a, i nitin hunah chuan awmze neia tel ve a duh hial. Pathian chu a dawh thei a, engtik lai pawhin hmuh che a duh. 

Mahse tunlaiah chuan hmun fianrial neih hi thil awlsam a ni meuh lo. Mi tam berte chuan an chenna khawvel bengchhengzia chu an hre chiang ang. Khualchhawn pindan te, ei chawp dawr te, elevator thlengin ri eng emaw an nei zel si. Kan nitin hun hmannaah hian khawi lai bik emaw chauh chu hmun fianrial a ni thei. 

Inah chuan naupang in kawl a nih chuan a harsa lehzual ang! Mahse beiseina siamsak che ka duh tlat. Susanna Wesley, John Wesley leh Charles Wesley te nu khan fa 18 lai a nei! A fapa John Wesley chu Methodist kohhran dintu niin America rama Kristianna pu darhtu a ni a, Charles thung chuan Pathian fakna hla [hymn] 6,000 chuang a phuah bawk. 

Nu fa 18 nei chuan engtin nge fianrial hun a neih theih a, chim buai lovin amah chauhin engtin nge hun a hman theih? Ama chanchin ziahnaah chuan nitin tlailam apiangin darkar khat tal thuthleng nghing thei [rociking chair] ah chuan a thu a, puanin a lu a khuh tlat ṭhin. Chutianga a awm tawh chuan a fate pawhin “A nu tihbuai loh tur!” tihna tih an hre ve thlap bawk. 

Wesley-a chuan a nu ṭawngṭaina chu a nun hruaitu niin a ngai a ni. Kum 1600 chho vela chhungkaw nu fa 18 neiin fianrial hun bahlah miah lova a hmang thei a nih chuan i thei tur e ni. Tum ngar ngar zawk rawh. Fianrial hun chu neih tum la, Lalpa chu zawng rawh. 

Ngaihtuah zui atan. 

• I ni khat huna darkar engzat kha nge thawm awm mang lovin i hman? 

• Eng ang thilte nge Pathian nena in hun hman chu dal ṭhin a, dahsawn ngai? 

• Bahlah miah lo fianrial hun i hman avang chuan i mimal nun leh i chhungte nun chu engtianga tihdanglam nge an nih mek/tawh? 

[ *Lettu:* Peka]

Wednesday, October 15, 2025

PATHIAN AW HRIAT I DUH TAK TAK EM?

  Pathian Aw Hriat


-Rick Warren

-Oct 15, 2025



“Lalpa in Pathian chu in zawn a, in thinlung zawng zawng leh in rilru zawng zawnga in zawn chuan in hmu leh ang.” Deuteronomy 4:29


Pathian aw hriat theihnana pawimawh hmasaber chu duh tak takna hi a ni. A pahnihnaah emaw a pathumnaah emaw dah lo vin, a pawimawh hmasaberah i dah tur a ni.


I inhnialpui mai mai atan Pathianin a ruahmanna leh a hmathlir hrilh che a tum lo. “Ka lo inngaihtuah phawt ang,” i tih mai mai turin Pathianin he leia a hun chhan che hrilh che a tum lo bawk.


Nangmah zawkin a tul a ni tih i hriat a ngai a. Hetiang hian i sawi zawk tur a ni, “Engvangin nge hetah hian ka awm. Ka nuna i thiltih tum hriat ka duh. I aw hriat ka duh. I hmathlir hriat ka duh.”  


Lal Davida khan Sam bu-ah a lo ziak a. “Aw ka Pathian, i duh zawng tih hi ka lawm zawng tak a ni” (Sam 40:8) “Ka nunna hi kehsawmin a awm a, eng lai pawha i rorelnate a ngaih avangin” (Sam 119:20)


Davida chuan Pathian chawimawi a duh ber thu a sawi a. Pathian thuawih leh a thu zawm chu a pahnihnaah a dah ve lo. Bible hmun dangah pawh Davida chuan, “Ka ngai che” “Ka chak e” “Ka duh e” “Sakhi luite tui chak ang ka ni” te  ati a ni.


I nun a lo chau a nih chuan, Pathianin atangin aw i hria ang.


Mi thnekhat chu Pathian hnenah thil tam tak an sawi a, nimahsela a hnen atangin aw an hre lo. An tan chuan tawngtai chu mi pakhat chauh inbiakna ang a ni. Mi pakhat chauh an tawngnaah chuan inlaichinna tha a awm thei lo - midang nena titihona a pawimawh a ni. Ka nupui bulah thu tam tak sawi ila, anin engmah rawn sawi ve si lo se la engnge a tangkaina? Inlaichinna tha a ni thei lo. Inbiaktawnna a ngai a ni. 


Deuteronomy 4:29 ah chuan, “Lalpa in Pathian chu in zawn a, in thinlung zawng zawng leh in rilru zawng zawnga in zawn chuan in hmu leh ang.” Hei hi thutiam a ni a, a hahdam thlak hle a ni! 


Ngaihtuah zui atan


* I nunah engnge i duh ber? Chu i duhna chuan i nunah engnge nghawng a neih?


* Engtin nge Pathian i duhna leh i chakna chu i chhem alh zel theih ang?


* Pathian hnenah kawng kawhhmuh i dilin i rilru puthmang engnge. Thuawihna nena chhang let turin i inringlawk thin em? 


[Lettu: Sangpuia]

Tuesday, October 14, 2025

PATHIAN AW CHUAN THLAMUANNA MIN PE

 Pathian Aw Hriat


PATHIAN AW  CHUAN THLAMUANNA MIN PE


-Rick Warren

-Oct 14, 2025



“Engah mah mangang suh u; engkimah tawngtai leh dilin, lawmthu hril tel zelin, in duhnate chu Pathian hnenah hriattirin awm zawk rawh se. Tichuan, Pathian thlamuanna, rilru reng renga hriat sen loh khan, in thinlung leh in ngaihtuahnate chu Krista Isuaah chuan a vensak ang che u.” Philippi 4:6-7


I nunah harsatna i tawka, thutlukna mumal tak pawh i siam thei lo anih chuan, nangmah i inngaipawimawh a Pathian aw i ngaithla lo tihna  a ni. Bible chuan, “Pathian chu buaina Pathian a ni lo va, remna Pathian a ni zawk si a” (1 Korinth 14:33). Pathian ch buaina Pathian a ni si lo.


Pathianin thu a sawi chuan, lungngaihna emaw manganna emaw a thlen ngai lo a ni. Chumi letling chiah chu a thlen a. Pathian aw i hria a ni tih hriattheihna chu, mangang leh lungngai taka i awm lai a - thlamuanna sawifiah hleih theih loh i chang hi a ni. Chu chu Pathian aw a ni ngei a ni. Pathian aw chuan thlamuanna min pe a ni. 


In fate tihtur in hrilh hian, buai leh thlabara siam in duh ngai em? In duh lo vang. Chu ai chuan, tihtur i hrilh chu hrethiam se la, thuawih takin ti se i duh zawk ang. Pa Pathian pawhin chutiang bawk chuan a duh a, a beisei a ni.


Lungngaihna emaw manganna emaw i neih chu, Pathianin ti tura mawhphurhna a pek che chu, “aih” i tih vang em ni? Chutah chiah chuan phurrit chu a lo lang zawk a ni. Nimahsela Pathian hnenah “aw” ti chunga i tih tur i zawh khan thlamuanna a thlen zawk a ni. 


Setana chuan rum taka min tihdarh a duh a, nimahsela Pathian chuan lainatna nen min hip khawm a duh zawk a ni. Setana chuan tihluihna hmangin min hnehchuhna remchang a zawng a. Nimahsela Pathian chu Berampu tha tak a ni. A lamah min hip khawpa, ama thlamuanna ngei kan chan a duh a ni.


Pastor ka ngaihsan em em, boral ta, Peter Lord khan a sawi thin a, “Pathianin i hnena a sawi tum zaa sawmkua hi chu thatho zawng infuihna a ni,” a ti. Thu lawmawmlo lam deuh hlir Pathian hnen atangin i hre thin a nih chuan, thil diklo a awm a ni. Pathian aw i ngaihthlaknaah a thlamuana lam i hre fuh thei lo emaw Pathianin a thinrim thlak zawng deuh hlirin thil a hrilh che nia i hriat chuan, engemaw diklo chu a awm a ni.


Bible chuan, “Engah mah mangang suh u; engkimah tawngtai leh dilin, lawmthu hril tel zelin, in duhnate chu Pathian hnenah hriattirin awm zawk rawh se. Tichuan, Pathian thlamuanna, rilru reng renga hriat sen loh khan, in thinlung leh in ngaihtuahnate chu Krista Isuaah chuan a vensak ang che u.” Philippi 4:6-7


Hetiang hian chhinchhiah rawh: Pathianin thu a sawi chuan, lungngaihna ni lo vin, thlamuanna  a thlen thin.


Ngaihtuah zui atan


* Eng thutlukna avang hian nge lungngai leh hrehawm ti taka i awm? Chu chu Pathianin a hrilh che niin i hria em?


* Tuna i buaina kha ngaihtuah teh. Philippi 4:6-7 a mi ah hian engnge i tih mek, a eng hi nge i tih tan ve ngai le?


* Pathianin ti tura a tih che engnge i tih loh awm le? Engnge a sawhkhawk le?


Pathian aw hi ila hre ngai lo a ni lo maw.

Johana 8:47 chuan, “Pathian hnen atanga chhuak chuan Pathian thu a pawm thin.” Chu chu Pathian mi nihna a ni. I hre thei tur a ni.


Pathian ta i ni em? Chhandam i ni tawh em - ila ni lo anih chuan - a kutah i nun pumpui hlan rawh. Thu lawmawm hrilh tur che ka nei! Pathian nena inzawmna i neih chuan buaina te pawh i chingfel thei a. Nun bul tan rawh la, hetiang hian tawngtai rawh le:


“Aw Lalpa, hriat che ka duh. I aw hriat ka duh. Ka nun i duh tih hriat ka duh. A vai chuan ka hrethiam vek lo, nimahsela min siam avang te, awmze neia min duan avang te leh min hmangaih avang tein ka lawm e. Krawsah ka sualnate zawng zawng rul tura Isua Krista i rawn tirh avang leh  ka lawm e. Min ngaihdam avangin ka lawm e. Nangmah hriatna leh i aw ka hriatna daltu zawng zawng te min hmuhtir la. I hnenah inpuan ka duh a ni. Pathian chhungkuaah min pawm ve la, vawiin atang chuan nangmah rin leh zui che hi ka duh e. Khawngaihin i awm a ni tih min hriattir la, i aw min hriattir ang che. Isua hmingin ka dil a che. Amen.”


I tawngtai thei anih chuan, Rick@PastorRick.com ah hian minlo hriattir la. Isua nena nun i hman theihnana tul leh pawimawh a thlawnin ka lo pe dawn che a ni.


[Lettu: Sangpuia]

Monday, October 13, 2025

PATHIAN HMANGAIHNA LANGCHHUAK I NI

_Pathian Aw Hriat_

By Rick Warren 
— Oct 13, 2025
“Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan.” Johana 3:16

“Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan.” Johana 3:16

Pathianin a hmangaih em em che a chutichuan  hmangaih avangin Isua a rawn tir a, hmangaihna thuchah a rawn keng a ni. Bible-in Pathianin hmangaihna a nei a ti lo,  1 Johana 4:8 ah chuan, “Pathian chu hmangaihna a ni,” a ti a. Hmangaihna chu a nihphung a ni.

Pathianin khawvel pumpui hi a siam a. Van leh lei a din a. Mihring a siam bawk a. Nang pawh a hmangaih avang chein a siam che a ni.

Tuna nunga i awmna chhan hi Pathian hmangaihna lo lang chhuak avang a ni tiin kan sawi thei ang. Pathian i hmangaih theih nan leh a hmangaih theihna tur chein a siam che a ni. Tunah khan i lung a phut det det na chhan leh i thawk theihna chhan chu Pathian hmangaihna vang a ni.

Ni ṭha lo vah pawh ni ṭha ang tho vin a hmangaih che a ni. A va ropui em!  A hmangaih nia i inhriat leh i inhriat loh lai pawhin a hmangaih che a. Phu lo nia i inhriat lai pawhin a hmangaih che a ni.

A hmangaihna che chu i thiltih engmahin a dal thei lo vang. A chhan chu i thiltih avangin a hmangaih lo che a. Hmangaihna chu a nihna a nih zawk vang a ni.

“Pathianin a hmangaih em em che a, chutichuan khawvelah a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan.” (Johana 3:16).

Krawsa khenbeh anih khan, Isuan hetiang mai hian a sawi niin a lang a, “Ka tawrh hi a nat tluk zetin ka hmangaih che a, i tello chuan damna chhan tur ka neih loh avangin, i tan ka thi dawn a ni.”

Pathian hmangaihna chuan mihring hriatna zawng zawng a khum zo vek a. Bible-in Ephesi 3:17-19 ah chuan, “Chutichuan Pathian famkimna tinreng tluka tihkhaha in awm theih nan, nangni hmangaihnaa zung kai leh nghahchhan neia awmin, mi thianghlim zawng zawng nen chuan a zauzia te, a seizia te, a sanzia te, a thukzia te hriat chian theihna leh, Krista hmangaihna hriat phak loh hriat theihna in nei thei ang.” 

Ngaihtuah pawh hian a mak a ni! Tu in nge Pathian hmangaihna zauzia leh seizia chu nge chhut chhuak thei ang? Chu tak chu Pathianin min hmangaihna a ni si a. Chutiang khawp chuan Pathianin a hmangaih che a ni. 
Ngaihtuah zui atan

* Pathian chu hmangaihna a ni, hmangaihna chauh a nei lo, a hmangaihna che i ngaihtuah dan pawh a thlak danglamin i hria em?

* I thil lo tih tawh te avangin Pathianin a hmangaih che harsa in i ring em? Danglam deuha thil i thlir theihna turin Pathian ṭanpuina engtiangin nge i mamawh?

* Ni ṭha leh ni ṭha lo vah pawh Pathianin a hmangaih che a ni tih i hriat chu engtiangin nge a pawimawh?

*[Lettu: Sangpuia]*

Sunday, October 12, 2025

I NGAIHDAN KHA PATHIAN THU NEN A INMIL EM?

_Pathian Aw Hriat_

- Rick Warren 
- October 12, 2025
_"Lei leh van a ral ang a, ka thu erawh chu a ral lo vang."_ (Luka 21:33)

A chang chuan kan duh dante hi Pathian thupek ang a ni emaw, Setana bumna a ni emaw, kan duh  dan ve hrim hrim a ni emaw hriat chian a har hle ṭhin. A danglamna i hriat a Pathian aw i hriatthiam a ṭul - a chhan chu chatuan daih nghawng a neih theih avangin.

Thil sual tam takah Pathian puh a ni fo. Mi ṭhenkhat chuan thil sual tiin heti hian an sawi daih thung, "Pathianin ti turin min ti!" tiin. The Living Bible chuan heti hian a letling, _"Miin Pathian hnen aṭanga ka dawn a ni a tih avang maiin engkim awih ringawt suh: Pathian aṭangin a ni em tih fiah hmasa zet rawh"_ (1 Johana 4:1).                                                         

Pathian duhdanin a thu a kalh ngai lovang. Tichuan heti hian i inzawt thei ang, "Ka rilrua ka ngaihtuahna hi Bible nen a inmil em le?" tiin. Pathianin thil a sawiin a rilru a thlak zung zung lo. A sawi tawh chuan, a dik a, a dik reng bawk ang.

Thudik chu a danglam ngai lo. Ngaihdan te, thil hmuh chhuah te, thiamna te hi a danglam ṭhin. Mahse Pathian thu erawh a danglam ngai lo. Thudik chu a ding reng. Thil a thar chuan a dik lo tihna a ni. Egnge ka sawi awmzia le? Thil a dik chuan a hma aṭangin a lo dik sa tawh tihna a ni. A chang chuan kan thil hmuh chhuahte hi thudik awm sa reng tawh an ni fo.

Pathian chu a ngai reng. A rilru a no ve lo a. A rilru a thlak thut thut lo. A thua a zam tawh chu bawhchhe turin a ti ngai lovang che.

I inzawh hmasak ber tur chu, "He ngaihtuahna hi Pathianin a lo sawi tawh nen a inmil em?" tih hi a ni.

Entir nan, Bible chuan chhiah pe turin min ti. Isuan Luka 20:25-ah heti hian a ti, _"A nih ahnu, Kaisara thilte chu Kaisara hnenah pe ula, Pathian thilte chu Pathian hnenah pe ta che u."_ Pathianin chhiah pe lo tur chein a ti che ni a ngaihdan i neih chuan Pathian aṭanga chhuak a ni lo tihna a ni. Pathianin chhiah pe tura a tih tawh che avangin chu a thu awm tawh kalh zawngin thu a rawn sawi tawh lovang.

Bible chuan vantirhkohte ngei pawh rawn kalin, "Bible-ah hian ziah belh tur ka nei tlat mai. Bible hi a ṭha a, mahse hei ennawn hnuab thil thar ka rawn belh e" tiin an rawn sawi pawh a ni thei a ti.

Pathianin awih lo turin a ti che. Paula thusawi chu The Living Bible chuan heti hian a letling: _"Pathian anchhia chu mi zawng zawng chungah, ka chungah ngei pawh, chanchin ṭha kan hrilh che u ni lo chanchin ṭha dang rawn hrilhtu che u chungah tla rawh se. Van aṭangin vantirhkoh meuh pawh lokal mahse, chanchin ṭha dang an rawn hrilh chuan chatuana anchhelawh ni rawh se."_ (Galatia 1:8)

Isuan Luka 21:33-ah chuan heti hian a sawi, _"Lei leh van a ral ang a, ka thu erawh chu a ral lo vang."_ Pathian thu chu chatuan atan a ni, a chhan chu thutak hi a danglam ngaih loh avangin. Kum 5000 kal taa thudik kha kum 1000 kal taah pawh a la dik reng, vawiinah ngei pawh, tun aṭanga kum 5000 lo awm turah pawh.

Miten, "Pathianin a sawi tawh a, ka ring a, a fel mai!" an ti mai thei. A ni lo! Pathianin a sawi a, a fel vek - i ring emaw ring lo emaw anih pawhin.

Chuvangin i ngaihdan kha Pathian aṭanga chhhuak a ni em tih i chian loh chuan he zawhna hi inzawt hmasa ber rawh: "He ngaihdan hi Pathian thu nen a inmil em?" tiin.

Ngaihtuah zui atan.

Pathianin engnge ti tura a tih che ni a i rin?

Chungte chu Bible nen a inkalh em? Engtinnge i hriat?

Pathian thupek i hriatthiam leh zual theih nan engtinnge amah nen inzawmna thuk zawk i neih theih ang? 

[Lettu: Mapuia Fanai]

Saturday, October 11, 2025

PATHIAN A NGAWIH RENG LAIA TIHTUR

_Pathian Aw Hriat_

- Rick Warren 
- October 11, 2025
_"Pathian a ngawih reng chuan chu chu i tan engnge ni? A hawisan daih chuan engnge i tih theih ang? Mahse a ngawi emaw a hawisan lai emaw pawh nise rorel turin a awm reng a ni."_ (Joba 34:29-30, MSG)

Pathianin kawng tam takin kan hnenah thu a sawi ṭhin: Bible hmangin, zirtirtute leh ṭhiante kaltlangin, thil kan hmuhte kaltlangin, kan natnate hmang pawhin a ni. Mahse kawng khata Pathianin kan hnena thu a sawi dan chu a harsa ber: engmah sawi lovin kan hnenah thu a sawi.

Hei hi a buaithlak khawp mai! Mahse Pathian kal khalhin mahniin engnge sawi a tum zawn chhuah tum suh. Pathianin ngawih chhan a nei. Pathian aw i ngaihchan chhungin mahni chungchang, Pathian chungchang leh midangte chungchangah zir tur i nei. I nghah chhung khan thlarau lama ṭhan lenna hun i nei a Pathian leh a thu zir chianna hun i nei a ni.

Pathian a ngawih reng laiin thil pahnih i tih ngai a awm.

*A hmasa zawkah chuan Pathianin engkim a thunun a ni tih hre reng rawh.* Joba 34:29-30 ah chuan heti hian kan hmu, _"Pathian a ngawih reng chuan chu chu i tan engnge ni? A hawisan daih chuan engnge i tih theih ang? Mahse a ngawi emaw a hawisan lai emaw pawh nise rorel turin a awm reng a ni."_ (MSG)

Pathian chu engtik lai pawhin a lalṭhutthlengah a ṭhu a, engkim a thunun a, a ruahman angin hna a thawk zel ṭhin. A ruahmanna te i hnenah a sawi lo a ni mai thei, mahse chuvang chuan ruahmanna a nei lo emaw hna a thawk lo emaw tihna a ni lo. Pathianin a hmangaih che a, i nunah tum a nei. Pathian ṭha tak a ni a! Amah i nghah chuan a ngaihsak zel ang che.

*A pahnihnaah chuan amah ring rawh.* Sam 50:15-ah chuan heti hian kan hmu, _"Harsatna i tawh hunin ka chunga rinna nghat turin ka duh che, tichuan ka chhanchhuak che anga nangin mi chawimawi ang"_ (TLB).

Vawiin hian Pathianin, "Min ring dawn em?" tiin a zawt che em? Sum leh paia i harsatnaah khan amahah rinna i nghat dawn em? I suangtuahnaah amah i ring dawn em? I thinlunga i vei em em, i rilru luah rengtu, i duhthusam, i hriselna kawngah amah i ring dawn em?

I dinhmun a inthlak a ni mai thei a, eng kawngah emaw harsatna i nei a ni mai thei. Mahse Pathian erawh a danglam ngai lo. Engkim a thunun a, a ngawih reng lai pawhin amahah thil ṭha ti turin rinna i nghat thei ang.

Ngaihtuah zui atan.

Pathian a ngawih renga nghah a ngaih laiin engtinnge i lo awm?

Harsatna i paltlang laiin engvangin nge Pathianin ropuina a duh (Sam 50:15)? Engvangin nge ropuina i pek ang?

Vawiin hian eng thil bik emaw dinhmunah bik emawah nge Pathianin amah ring tura a tih che? 

[Lettu: Mapuia Fanai]

Friday, October 10, 2025

A HUN TAKAH PATHIANIN A CHINGFEL ANG

_Pathian Aw Hriat_

By Rick Warren
— October 10, 2025
“Awmpuitu, Thlarau Thianghlim, ka hminga Pain a rawn tirh tûr chuan engkim a zirtîr ang che u, in hnêna ka sawi zawng zawng pawh a hriat chhuahtîr leh ang che u.” [Johana 14:26]

Pathianin Thlarau Thianghlim a pek chhan che i hria em? I tana Pathian thilthlawnpek a ni, he khawvela rinawm taka i nun theihna tura kawng kawhhmuh tur chein. Pathian chuan Thlarau Thianghlim kaltlangin thu leh ngaihtuahna leh thurawnte a pe ṭhin che a – chu chu pawlna a ni. 

Isua chuan Johana 14: 26-ah chuan, ““Awmpuitu, Thlarau Thianghlim, ka hminga Pain a rawn tirh tûr chuan engkim a zirtîr ang che u, in hnêna ka sawi zawng zawng pawh a hriat chhuahtîr leh ang che u,” tiin a sawi. Thlarau Thianghlim chu min zirtirtu a ni. Bible chuan min thlamuantu [counsellor] a ni a ti bawk. Tunlai khawvelah chuan coach thiam tak hnuaia zirin min tam tak chuan pawisa sang eng emaw zat an hmang ṭhin.  

Ṭhenkhatten coach rawihna atana cheng tam tak an sen laiin kei pawh kum sawmnga chuang min zirtirtu ka lo nei ve ta. A hming chu Thlarau Thianghlim a ni. Vawi eng emaw zawhna ka lo zawt tawh ṭhin – vawiin thleng ka la zawt zel – “Engnge ti tura min duh? Engnge ni leh dawn? Engtin nge i thu ka awih theih ang” tiin ka la dawr reng. 

Johana 14: 26 hi lehlin ṭhenkhatah chuan hetiang deuh hi a ni, Thlarau Thianghlim chuan “ka thil lo sawi tawh zawng zawngte kha a pe ang che u” tiin. Thlarau Thianghlim chu benga hriat theihin thu a sawi lo. A awmzia chu i thinlunga a luh tlang theih mai laia i beng kaltlang khera a chet kha a ngai lo a ni, i tana pawimawh hrang hrangte kha a hrilh mai thei che a ni. 

Thlarau Thianghlim chu i thinglungah eng emaw a thawk a nih chuan i thinglungah chuan thil eng emaw lo awm sa a awm a ni thei ang. Chu tak chu Bible i chhiar a ṭulna a ni. Pathian chu i chhiar a, i zir a, i rilru i hnawh khah chuan thutak i lo khawlkhawm lawk tihna a ni a. Chung chu Thlarau Thianghlim chuan a hun takah a hriat chhuahtir thei ang che. 

A chang chuan rilru hah changte i nei a, buaina i hmachhawn a, thlemna te pawh i tawk chamchi bawk a – Bible chu i lo kawl reng lo palh thei. I phone-ah Bible app i lo nei a nih pawhin i mamawh tak zawn chhuahna tur i hre chuang lo thei. Mahse i thinlung lama Pathian Thu i vawng a nih thung chuan Thlarau Thianghlim chuan awlsam takin a hriat chhuahtir ang che. 

Eng emaw riau i Bible chhiar aṭang chuan i dawn kher pawh a ngai chuang lo. Bible mumal taka zira a thu i vawn bawk chuan thutak i thinlungah i khawlkhawm a, chu chu Pathianin i hnena thusawi duh a neih sawina atan a ṭangkai em em a ni – i mamawh em em ni atan chuan. 

Ngaihtuah zui atan. 

• Engtiangin nge Pathian Thu chu i rilru leh thinlungah chuan i vawn theih ang? 

• Bible chuan Pathian duh dan a hriattir thei chein nitin a duh dana nung turin a ṭanpui thei che tih i ring em? Eng vangin? 

• Engtin nge i ngaihdante chu Thlarau Thianghlim aṭanga chhuak an ni tih i hriat theih ang? 

[ *Lettu:* Peka]

Thursday, October 9, 2025

TUIN NGE THUTAK HRILH CHE?

_Pathian Aw Hriat_

By Rick Warren
— October 09, 2025
“Mi a kawng chu ama mitah chuan a dik a, Mi fing erawh chuan rorêl a ngaichâng ṭhîn.” [Thufingte 12:15] 

Tute pawhin chak lohna lai kan nei vek. Kan nuna eng emaw lai tak hi chu siamṭhat ngai niin kan hmu dik tawk lo fo. Eng vangin? A chhan chu keimahni leh keimahni hi kan inhmuh chian tawk loh vang a ni – a chang chuan ka duh lo hrim hrim bawk. Kan thil chin ṭhan kalsan kan phal mang loh thil an awm a, chungte chuan kan ṭhanna an dal fo. 

Chuvang chuan Pathian chuan thudik hrilh tur che i bulah a rawn tir ṭhin a. Mi tute pawhin anmahni hmangaih taka thudik hrilhtu tur chu an mamawh ṭheuh. 

I tan chutiang mi chu an awm ve em? Midangin thil an hrilh duh loh che, nangmah pawhin ngaihthlak nuam i tih lem loh hrilh duhtu che Pathian mi chu an awm ve em? 

I ṭhian tu emaw i hnena thutak sawi duh an awm mang lo a nih chuan thil i tisual fo ang. I ṭhiante zingah chuan Isua ang tura kaihhruai theitu che chu hriat tum tlat rawh. 

Chutiang mi chu i ṭhiante tan pawh nih tum ve ang che. Mite famkim lohna lai chu khawngaihna leh hmangaihna nena hrilh hriat chu harsa i ti em? Pathian mite zingah chuan chu chu kan thil tih ṭhin niin chutianga inpui tawn chuan kan ṭhang lian a, Pathianin a duh tak ang mihring chu kan lo ni thei ṭhin. 

Hei vang hian Pathian chuan chapona hi a haw em em a ni. Chapona chuan keimahni inveng tak leh zirtir theih loh ni turin min inkharkhiptir ṭhin a. Kan chapo a nih chuan kan inhung a, mite aṭangin kan indah hrang ṭhin. Mite kaltlanga Pathian min biakna chu kan hre thei ta lo ṭhin a ni. 

Thufingte 12: 15 chuan, “Mi a kawng chu ama mitah chuan a dik a,
Mi fing erawh chuan rorêl a ngaichâng ṭhîn,” tiin a sawi. Pathian chuan midangte an ṭhanlenna kawnga pui turin a duh che. Nangmah kaltlanga an hnena thu a sawi chang a awm a – mahse huaisen erawh a ngai fo. Mite kaltlanga i hnena thu a sawi chang pawh a awm ang – tlawm emawh a ngaih chang a awm.  

Tu emaw tunah hian i ngaihtuahnaah an awm mek a ni thei. I ṭhian emaw unau emaw thawhpui emaw kawng dik lo zawh mek an awm thei a, chiang takin i hmu a – mahse engmah i sawi lo. i lo ngawi mai mai a, mahse nangmah leh nangmah i inhrilh chu i sawi tur a awm lo tih a ni. 

Mahse hmangaihna chu a che chhuak ṭhin. Mite i lainat takzet a nih chuan anmahni thu ṭha i hrilh ang. I lainat a nih chuan, an chak lohna lai i hmuhpui ang a, an hnenah chuan thutak chu i sawipui em em ang. Chutiang hunah chuan Pathian chuan i ṭawngkam chu an nun tana fuihna petuah a hmang thei ang. 

Ngaihtuah zui atan. 

• Engtin nge ṭhiante nena kar thar emaw kartawp emawa hun hman chuan midangte nena inrintawkna a siamsak ṭhin? 

• Midangte hnen aṭanga thurawn chu tlawm takin engtin nge i lo dawn theih ang? 

• Pathian chuan engtik hunah nge tu emaw i hnenah thudik a rawn sawitir? Engtin nge i lo dawn? 

[ *Lettu:* Peka]

Wednesday, October 8, 2025

KAWNG KHATA PATHIANIN I HNENA THU A SAWI DAN

_Pathian Aw Hriat_

- Rick Warren
- October 8, 2025
"Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, finna zirtir kawngah te a sawt bawk a ni. Pathian mi chu hna ṭha tinreng thawk tura kim taka inthuamin a famkim theih nan," 2 Timothea 3:16-17.

Kawng khata Pathianin thu a sawi dan chu a Thu hmangin a ni.

Mi tam takin Pathian chu a duhzawngte vana ziak turin an duh a. Mahse Pathian chuan a Lehkhabuah a ziah tawh avangin vanah chuan a ziak tawh lovang!

Pathian chungchang hriat i mamawh leh chhan neia i nuna, awmze nei zawka i nun theihna tur chu a Thu-ah a ni. Bible i keu ngai loh a, i chhiar ngai loh chuan, Pathianin i hnenah thu a sawi tam vak lo ang a-i chân fo dawn tihna a ni.

Bible chuan 2 Timothea 3:16-17-ah chuan "Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, finna zirtir kawngah te a sawt bawk a ni. Pathian mi chu hna ṭha tinreng thawk tura kim taka inthuamin a famkim theih nan," a ti.

Chhan pali avangin Pathianin Bible min pe: min zirtir a, min ṭanpui a, min siamṭha a, nun dan min kawhhmuh turin a ni. 'zawng zawng,' tih leh 'tinreng' tih hi chhinchhiah la. Bible a awm zawng zawng hi Pathian Thu a ni a, a vaiin a ṭangkai vek a ni. A awmzia chu za a za a rintlak a, za a za a ṭangkai a. I nun peng tin atan leh i damchhung atan i hmang thei a ni.

Bible a hmun ṭhenkhat hi chu hriat thiam har tak a ni. Ṭhenkhat chu mi dangte aia zir tam a ngai a ni. Mahse a vai hian chhan neiin a awm: ṭanpui tur chein.

Hei vang hian fianriala Pathian nena inpawla-nitina Bible zir hi a pawimawh a ni. I ti ṭan a nih chuan, minute 10-in bul ṭan phawt rawh. Nitin minute 10 ṭhu la, Pathian chu ngaihtuah la, amahah insawrbing rawh. Bible chhiar la, a sawi ngaithla ang che. Ṭawngṭaiin a hnenah thu sawi la. Amah hriat tum la, inzirtirin, inṭanpuitir la, siamṭha che a, a Thu kaltlanga nun dan inkawhhmuhtir ang che.

Eng vangin nge a pawimawh em em? Sam 119:105 chuan, "I thu hi ka ke atante hian khawnvar a ni a, ka kawng tan eng a ni," a ti.

Bible hi nun atan khawnvar ang a ni. I hmalam hun kum 3 laia hmuhtir thei che eng zung chak tak a ni ngawt lo. I ke pen tur ên thei khawp che a êng a ni a, a bak chu Pathian i rinnaah a innghat a ni. 

Hei hi rinna a kal tih a ni. A Thu zir a, a sawi ang ti a, nitin mahni tana lâk zel hi a ni.

Ngaihtuah zui atan.

Eng vangin nge Bible-ah hian hmun ṭhenkhat kan hriatthiam miah loh tur a awm?

Bible a hmun ṭhenkhat i hriatthiam loh laiah hian Pathianin engti turin nge a duh che?

Beih zui zelna leh inthununna hian eng ang takin nge thlarau nunah a ṭhantir che?

[ *Lettu: Marova Punte* ]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...