_I Nun Kal Zel Atana Pathian Hmathlir_
- Rick Warren
- 30 Nov, 2024
_"I sumin LALPA chawimawi la. I thil lo pung hmasa ber zawng zawngte nên."_ (Thufingte 3:9)
Ka naupan lai chuan ka nu leh pate tan thilpek tur ka siamsakin emaw ka leisak ṭhin a. Ka nu leh pate thilpek ka pek apiangin an lawm em em ṭhin. Ka hnen aṭangin mamawh an nei a ni lo, an nei miah lo. Ka ngaihtuah a ni tih an hriatna khan a ti lawm a ni.
Kum 8 mi ka nih laiin thil hlui zawrhna dawrah kalin ka nu tan kawr 25 cent man ka leisak a. Kawr mawi tak niin ka hria a. Ka nu chu size 12 a nih laiin ka kawr lei tum chu size 4 chauh a ni a. Dawr nghaktu chuan, "Ricky, i nu chuan a ke lian tak chu a thawlh thei tawp lovang" a ti a. Lawm lo em em in ṭap chungin ka haw a. Kawr chu ka nu ka pek chuan a phur em em a. A thih hnu chuan a thingrem pakhatah chuan ka kawr pek ngei chu ka hmuchhuak a. Khang kum zawng zawng chhung khan a lo dah ṭha reng a lo ni.
Pathian mamawh zawng pek theih engmah i nei lo. Mahse, thilpek i hlan khan, "Lalpa, ka hmangaih che. Ka ngaihtuah che a. Ka nuna hmasa ber turin ka duh che a ni" i tihna a ni.
Bible chuan heti hian a ti, _"I sumin LALPA chawimawi la. I thil lo pung hmasa ber zawng zawngte nên."_ (Thufingte 3:9) a ti. Chu chu sawma pakhat a ni. Bible chuan sawma pakhat chu i sum lak luh zawng zawng aṭanga za zela sawm i pek kha a ni a ti a, chu chu sum i lak luh reng rengin i tih hmasak ber tur a ni bawk.
Sawma pakhat pek hian Pathian a chawimawi chauh a ni lova. Pathian kan biakna a ni bawk. Mahse, Bible chuan thilpek zawng zawng hi Pathian biak na a ni vek lo a ti. A nih chuan thilpek hmanga Pathian ka biakna chu eng nge ni ang le?
Bible chuan, _"Ni sarih ni hmasa berah chuan mi tinin, malsawmna in hmuh angzia zelin dah khawl theuh ula; ka lo kal huna thawhlawm khawn reng reng a awm loh nan."_ (I Korinth 16:2)
*Thilpek hmanga chibai buk hi ruat bik a ni lo.* A awmzia chu i thunun theih a ni lo a, i kawhhmuh lo a, Pathian hnenah tihtur i hrilh lo tihna a ni.
*Thilpek hmanga chibai buk hi chibai i buk chiahin a thleng.* Ṭanpuina ngaite pual e pek emaw kan ṭhian mamawh te hnena pek emaw hi a ṭha lutuk, mahse chu chu sawma pakhat kan pekna a ni lo. Thilpek hmanga i rawngbawlna chu i lawina kohhranah a lut ṭhin.
*Thilpek hmanga rawngbawlna chu ruahmanna fel taka duan a ni.* A zawm zatin i pe a ni mai lo. Ṭawngṭainain mumal takin i thlen ṭhin.
*Thilpek rawngbawlna hi inbuk tawk zel a ni.* Engmah i thawh chhuah loh kar chuan engmah pe suh. I thawh chhuah tlem chuan i pe tlem deuh a. I thawh chhuah tam deuh chuan i pe tam deuh a ni leh mai.
A tawp berah chuan, Pathianin i pawisa kha a duh a ni lo. I pawisain a entir kha a duh chu a ni. Kan taksaa kan thazâm tihchet awlsam ber chu kan thinlung aṭanga kan pawisa bawm zawmtu hi a ni. Pathianin eng dang zawng aiin i thinlung a duh.
Ngaihtuah zui atan.
Thil i pek kha Pathianin eng ang rilru nge lo pu tura a beisei che ni a i rin? Tuna i rilru put hmang nen khan engnge a danglamna?
Pathian hnena i pek khan nge midang hnena i pekin hlimna i neih san zawk?
Pathianin i sum aiin i thinlung a duh zawk a ni tih hriatna hian engtinnge thilpekna kawngah i rilru a nghawng?