_I Nun Kal zel Atana Pathian Hmathlir_
By Rick Warren
— November 28, 2024
“Taksa pum chu amahah a innghat a, tha leh zungin a phuar khâwm a, taksa pêng tin chu an tih tûr ang ti ṭheuhvin an ṭhang tlâng a, hmangaihnain an inchâwm lian ṭhîn a ni.” [Ephesi 4:16]
Pathian chuan thlarauva nausen ni reng turin a duh lo che. Ṭhanglian a, Krista ang deuh deuh turin a duh che a ni.
Hei hi a thu laimu chu a ni e: Nangmah mai chuan i ti thei lo vang. Nausente chu anmahni chuan an ṭhanglian thei lo. Ṭhanglian tur chuan midang ṭanpuina an mamawh ṭhin. Thlarauva chhungte i mamawh a, i naupan laia nangmah ṭanpuitu tur che chu i mamawh a ni. Thlarauva i chhungte chu i taksa awmna tur a ni satliah mai lo va. Rinnaa i ṭhanlenna hmun tur chu a ni.
Bible chuan hetiang hian a sawi, “Taksa pum chu amahah a innghat a, tha leh zungin a phuar khâwm a, taksa pêng tin chu an tih tûr ang ti ṭheuhvin an ṭhang tlâng a, hmangaihnain an inchâwm lian ṭhîn a ni,” tiin. (Ephesians 4:16 NLT).
Pathian chuan kohhran hruaitu bik a buatsaih a – pastor te, Bible study kaihruaitu te, mi tlem zawk kaihruaitu [small group leaders] te chu an awm – I nuna Isua nena in inkar tipuitling zeltu turte chu an ni. Bible chuan hetiang hian a sawi bawk,“Chutiang chuan mi thianghlimte tihpuitlin nân rawngbâwl hna thawk tûr leh Krista taksa tiṭhanglian tûrin a ruat a ni. Chu chu kan zaa rinna hmun khat kan vawna, Pathian Fapa hriatna kan neiha, mi puitling, Krista famkimna tluka mi famkim kan lo nih theihna tûr a ni,” tiin. [Ephesi 4:12-13].
Bible chuan hetianga ṭhan lenna thu hi sawi dan bik a nei leh a. Chu chu zirtir nun [discipleship] a ni. Lal Isua zirtir nihna chu thlarauva nausen nihna aṭanga thlarauva mi puitling dinhmun chu a ni. Chumi awmzia chu rinnaah chuan i puitling zel tihna a ni. I lo chak deuh deuh ang a. I thahruite chu a lo tam zel dawn tihna a ni bawk.
Lal Isua zuitu ang chuan engtin nge i ṭhanlen theih ang?
Bible chuan Tirhlohte 2 ah chuan kohhran hmasaa mite ṭhanlen dan hetiang hian a sawi, “A thu zâwm apiangin baptisma an chang a; chumi ni chuan mi sângthum laiin an belh ta a. Tirhkohte thu zirtîr ngaithlaa inpâwl khâwmin, chhang phel leh ṭawngṭaiin an awm ho ṭhîn a,” tiin. [Tirhkohte 2:41-42].
Hetiang hian chu Bible thu chu chhunzawm a ni, “Ni tin Tempulah lungrual takin an inkhâwm ṭhîn a, in hrang hrangahte chhang an phel a, hlim tak leh inphal takin chaw an ei ho ṭhîn,” tiin [Tirhkohte 2:46].
Pakhatna, ring mai rawh. Baptisma chang rawh. Chubakah chuan kohhran mite zingah chuan awm la Pathian chibai buknaah telin mi tlem zawk [small group fellowship] ah pawh tel ang che.
Kohhrana hruaitute aṭangin zir rawh. I ṭhiante aṭangin zir bawk la. Lal Isua zirtir leh a chhungte ni reng turin amahah inkawltir rawh.
Ngaihtuah zui atan.
Eng vangin nge Thlarauva ṭhanglian tur chuan Pathianin midang mamawha min siam?
Isua zirtir i nihna ang chuan engtiangin nge i lo ṭhanlen a, Krista taksa nen chuan engtiangin nge in inzawm?
I nun khawi emaw laiah kha thlarauva ṭhanlen chu eng vanga mamawh nge i nih? Thlarauva ṭhanglian turin kohhrana i chhungte chu engtin nge i rinchhan theih ang?
[ Lettu: Peka]
No comments:
Post a Comment