Tuesday, March 31, 2026

I HLAWHCHHAMNA PAWM LA, PATHIAN KHAWNGAIHNA I DAWNG THEI ANG

_Khawngaihna Chungchanga Thu Lawmawm_

Rick Warren
March 31, 2026
"Thil ṭha titu, thil sual ti hauh lo khawpa mi fel chu lei chungah hian an awm lo takzet a ni” Thuhriltu 7:20.

Hnam ṭhenkhat ah chuan, hlawhchhamna hi ngaihdam theih loh sual ang mai a ni a. Hlawhtlinna hi kan ngaisang khawp a. Mahse chutiang phurrit chuan mipuiah rilru hahna nasa tak a thlen thung. 

Hlawhchham hlauhna hian hmel hrang hrang a nei a. Duhthlan ngaihna hre lo, hnathawh atchilh leh a ṭha ber zel atchilhnaah a hruailut ṭhin. Hlawhchham kan hlauh avangin, hlauthawng chung chung pawha thil tih kan ngam ṭhin lo a ni.

Mi tam zawkah chuan, he hlawhchham hlauhna hian kan thinlung hi a ṭham bet tlat a. Khawvela mi fing leh hriatna ṭha ber berte pawh hi hlauhna hian a lo zim buai viau tawh thin a ni.

Hemi avang hian he thu hi uluk taka ngaihtuah turin ka duh che a ni: mi tin hian tihsual kan nei ṭheuh a. 'i harsatna' a ni bik chuang lo, mihring harsatna zawk a ni. Bible chuan, “Thil ṭha titu, thil sual ti hauh lo khawpa mi fel chu lei chungah hian an awm lo takzet a ni” a ti. (Thuhriltu 7:20) 

I nunhluiah tihsual i nei a ni mai lova, i hmalam hunah pawh i la tisual fovang. Ka sawi ngam a ni. Fimkhur luat avanga hlauthawnawm pumpelh vek pawh a dik chuang lo.

Pastor ka nih angin miten min zawh fo chu, “Hlawhchham ta si ila? tih hi a ni. “Ta si ila” i tih awmzia chu engnge ti a zawh ka duh thin.

Vawi tam tak i nunah i hlawhchham tawh a. Kei pawh ka ni tho. Tunah pawh khan i nun eng emaw laiah i hlawhchham mek mai thei. I hmalam hunah pawh i hlawhchham nual mai thei bawk.

Mi lar tak takte pawh hi an inchhuih tlu ve fo ṭhin. Basketball thiam ber berte pawh hian an vawm zawng zawng zahve chauh a lut ṭhin. Baseball thiam ber berte pawhin vawi thumah vawi khat chauh an vaw dik tlangpui a. Hlawhchham hi thil pangngai a ni.

Mi famkim lo i ni tih hi i inpawm hma loh chuan hlawhchham i hlauhna hi i hneh ngai lovang.

Bible chuan i hlauh tur pakhat chiah a sawi: “Fimkhur rawh u, chutilo chuan Pathian khawngaihna ata in bo dah ang e.” (Hebrai 12:15).

Khawngaihna i mamawh a. Kan vaiin kan mamawh!

Hlawhchham kan hlauhna kan kalsan theih chiah hian kan nun a chelhna ata kan zalen ang. Chutiang a thlen chuan, Pathian khawngaihna famkim chu kan dawngsawng thei dawn a ni.

Ngaihtuah zui atan

* Eng kawngah nge hlawhchham i hlauh ber? 

* Hlawhchham i hlauhna hian i ke pen engtin nge a tihbahlah?

* Hlawhchham hlau miah lovin engtin nge i thiante nen Pathian duhzawng in tih hlawhtlin theih nan in infuih ang le?

*[Lettu: Sangpuia]*

Monday, March 30, 2026

KRISTA AVANG CHUAN I TI THEI

_Khawngaihna Chungchanga Thu Lawmawm_

By Rick Warren 
March 30, 2026
“Thlarau Thianghlim thiltihtheihna zarah beiseina in ngah theihna turin, beiseina Pathian chuan in rin avangin, lawmna leh remna tinrengin tikhat che u rawh se.” Rom 15:13

Hringnunah hian himna i mamawh em? Inrintawkna leh theihna neih i duh em? I duh ang tih ka ring a ni. Tu te pawh hian himna kan zawng ṭhin.

An eizawnnaah te, an hnaah te, chhungkuaah te, pawn lam landanah te, an theihnaah te, an hriselnaah leh thil dangah himna an zawng a. Nimahsela, chung zawng zawng chu vawi lehkhatah a bo nghal vek thei a ni. Chuvang tak chuan, an thinlungah himlo nia inhriatna an nei ṭhin a ni.

Himna rintlak nei tur chuan, Pathian nena inlaichinna, innghahna nghing ve mai mai theilo ah i innghah a ngai a ni. 

Tirhkoh Paula chuan chu chu dik a ti hle a. Lei lama a innghahna zawng zawng lak bo sak anih hmu pawhin, hetiang hian a la sawi thei tho va, “Mi tichaktuah chuan engkim ka ti thei a ni.” (Philippi 4:13).

Lei lama innghahna rintlak lo va i innghah avangin him tawk lo va inhriatna i nei fo ang. Pathian Thu hmanga innghahna rintlak i zawn a hun ta hle a ni. Bible in engtin nge a sawi tih hmang hian i rilru luahkhah tir rawh le. Bible ah chuan: “Hman lai khan mi reng in ni lo va, tunah erawh chuan Pathian mi in ni ta a; hman lai khan zahngaihna in hmu lo va, tunah erawh chuan zahngaihna in hmu ta a.” (1 Petera 2:10).

Zirchianna in a sawi dan chuan i mi ngaihsan berin i nihna leh i hlutna a sawi dan hi a pawimawh hle tih a ni. Him leh inringtawk taka nung tur chuan Isua Krista chu i nuna mi pawimawh berah i dah a ngai a ni. Isuan nang chu i hlu a, hmangaih tlak, ngaihdam tlak leh theihna nei a ti che a ni. Pathian khawngaihna avang chuan, Pathianin i tana thil ṭha a ruahman lawk te chu ti thei turin theihna i nei a ni.

A pawimawh berah chuan: Tu nge i rin dawn? Mi ten rintlak tak tak loh an sawite chu i duh chuan i ring thei a, Pathianin a sawi thudik chu i ring thei bawk. Pathianin a hmuh dan che anga i inhmuh theih chuan, himlo nia i inhriatna aṭangin zalen i ni tawh ang. Min sawi che mahsela engmah a pawi tawh lo, ' Tunah chuan Pathian ta i ni tawh tlat a ni.'

Rom 15:13 ah chuan, “Thlarau Thianghlim thiltihtheihna zarah beiseina in ngah theihna turin, beiseina Pathian chuan in rin avangin, lawmna leh remna tinrengin tikhat che u rawh se.” 

Pathian chuan i nun chu i rin vanga beiseina chuan tikhat che rawh se. Isuaah chuan i ti thei a ni.

Ngaihtuah zui atan

* Pathian nena in inlaichinnaah ni lo, hmun dang khawiah nge himna i zawn ṭhin le? Chung chu engtinnge a hlawhchham dan?

* Pathian khawngaihna avanga a duhzawng ti tura theihna a pek hnu leh a pek hma che ah khan engnge danglamna awm le?

* Vawiina i thil hmachhawn mekah hian Pathian chakna i mamawh em le?

*[Lettu: Sangpuia]*

Sunday, March 29, 2026

KHAWNGAIHNA HLAWKNA HMUH DAN

_Khawngaihna Chungchanga Thu Lawmawm_

- Rick Warren 
- March 29, 2026
_"Dan chu Mosia kaltlanga pek a ni , mahse Pathian hmangaihna tawp ngai lo leh rinawmna chu Isua Krista kaltlangin a lo lang a ni."_ (Johana 1:17, NLT)

Nimin khan kan nuna Pathian khawngaihna hlawkna kawng sawm kan zir a. Khang hlawknate i chhiar lai khan engtinnge chu khawngaihna chu i nunah i lo dawn theih ang tiin i ngaihtuah mai thei. Pathian khawngaihna kaltlanga i nuna duhzawng hre vek si a lo dawnsawn duh loh chu a lungchhiatthlak viau mai thei.

Anih chuan engtinnge Pathian khawngaihna chu i lo dawn ang?

He zawhna hi a chhanna chiah chiah a awm lo mai thei. A chhanna hmu turin Pathian thu zirna hmuna i kal kher a tul lo.

Bible hian thumal pathum hmangin Pathian khawngaihna dawn dan awlsam tak min kawhhmuh: Krista rinna hmangin.

Johana 1:17-ah chuan heti hian kan hmu, _"Dan chu Mosia kaltlanga pek a ni , mahse Pathian hmangaihna tawp ngai lo leh rinawmna chu Isua Krista kaltlangin a lo lang a ni."_ (NLT)

Pathian khawngaina chu mi pakhat, Isuaah a infun tlat a ni. Sakhuana emaw serh leh ang thil emaw hmangin Pathian khawngaihna i chang thei lo. Dan zawmna hmangin i dawng thei lo. Midangte rinna kaltlangin i dawng thei hek lo.

Isua kaltlangin i dawng a ni.

Pathian khawngaihna hi a thlawn a ni a. I lo dawn mai kha a tawk a ni.

Mahse chiang takin ka'n tarlang ange: Pathian khawngaihna hi a tlawm hauh lo. Isua nunna a duh hial asin. Khawngaihna hi thil to ber a ni hial ang. Isuan krawsah thiin a man a pe tlat.

Krawsa Isua thihna khan kan nunah thil pathum a rawn hlen:
*Sual man a rawn pe.* Tu emawin kan sual man a pek a ngai. Isua nen inlaichinna in neih chuan i sual man a pe tawh a, Pathian i hriat a i hmangaih theih nan kawng a hawng a ni tih hriain hahdam takin i awm thei.

*Sual thiltihtheihna a tichhia.* Krawsa Isua thihna khan tlukna min thlentir thintu kan chin than thil te, kan natna te leh buainate tidanglam turin theihna min pe. Pathian khawngaihna avangin Pathian thu kan awih theih nan Thlarau Thianghlim kan nei a ni.

*Sual nuai bo a la ni ang.* Engtik niah emaw chuan Isua zuitu zawng zawngte chu vanramah an la kal vek ang a, chutah chuan sualna awm tawh lovang. Pathian nena chatuana cheng tura beiseina kan nei - natna, dam lohna leh lungngaihna awm tawh lohnaah chuan.

Pathianin khawngaihna man to tak i hmaa a hun mek hi thilpek ropui ber a ni. I nun a tidanglam vek ang.

I lo pawm mai kha a tawk a ni.

Ngaihtuah zui atan.

Engtinnge i nunin Pathian khawngaihna avanga i lawmzia a lantir?

Pathian khawngaihna hi hriatthiam a awlsam viau a a hlawkna te a ropui viau lai hian, engvangin nge mi tam takin an pawm loh chhan ni a i hriat?

Tunkar chhung hian engtinnge i thian emaw i chhungte hnenah emaw Pathian khawngaihna chanchin i hrilh ang?

Pathian khawngaihna chang turin i inpeih em?
Vawiin hian i chang thei a nia! Heti hian tawngtai rawh le: "Lalpa, Isua hi i Fapa a ni tih ka ring a. I hmaah ka sualte puangin i ngaihdam ka dil e. Ka sual avangin Isua chu thiin i kai tho leh a ni tih ka ring. Vawiin aṭang hian ka Lal leh Chhandamtu a pawm ka duh e. Min hruai la, i duh anga nung turin min pui ang che. Isua hmingin, Amen." 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, March 28, 2026

PATHIAN KHAWNGAIHNA HLAWKNA SAWM

_Khawngaihna Chungchanga Thu Lawmawm_

- Rick Warren 
- March 28, 2026
_"Ama lawmzawng atana tih tum tur leh bei tura nangmahnia thawktu chu Pathian a ni si a."_ (Philippi 2:13)

Kristian kan nihna zawnah kan chhandamna nena inzawm tlat khawngaihna hi kan ngaihtuah chian a ngai. Mahse khawngaihna chu Krista hnen kan pan dan aia thuk zawk a ni si. Kan kristian nung zawng zawng hi Pathian khawngaihnain a chhung khat tur a ni.

Pathian khawngaihna atanga lo chhuak ni lo hian Pathian tan engmah kan ti thei lo. Bible chuan heti hian a ti, _"Ama lawmzawng atana tih tum tur leh bei tura nangmahnia thawktu chu Pathian a ni si a."_ (Philippi 2:13)

Khawngaihna hian kan nunah hlawkna kawng sawm lai a rawn thlen:

*Khawngaihna avanga chhandam kan ni:* Vanram luhna theihna kawng awm chhun chu khawngaihna hi a ni. I hlawh chhuak thei lova, i thawh hlawh thei lova, i lei thei hek lo (Ephesi 2:8-9).

*Khawngaihna avanga ngaihdam kan ni.* Phu lo viau mahila Pathianin kan sualte chu a khawngaihnain min tlen faisak a ni (Isaia 43:5).

*Khawngaihnaa chhawmdawl kan ni.* Pathianin ti tura theihna a pek che bak tihtur a pe lovang che. Chu chakna leh theihna chu a khawngaihna vang a ni (Philippi 2:13).

*Khawngaihnaa tihdam kan ni.* Pathianin kan phu lo nachungin kan thinlung keh chhiate tuam damin kan hliamte min tidam a ni (Sam 147:3).

*Khawngaihnaa zalen kan ni.* Isua nena kan inlaichinna hi hna eng emaw tihtur vang mai mai a ni lo. Pathianin a lo tih tawha chawlh hahdamna zawk a ni. I ringtu nun kha Kristaa chawl hahdam nun a nih loh chuan dan anga nun mai i ni ang (Matthaia 11:28-30).

*Khawngaihna avangin thiamthil pek kan ni.* Pathianin mitin hi theihn min pe theuh a, chu theihna chu a tana hmang tur kan ni (Rom 12:6).

*Khawngaihna avanga hman kan ni.* Pathianin kan thiltih vangte ni lovin a khawngaihna avangin he khawvela a thil ruahman tihhlawhtlin nan min hmang a ni.

*Khawngaihna avanga chhandam kan ni.* Chhandamna hi Pathian thilpek anih avangin kan hloh thei lo. I thawh chhuah theih thil ni ta se i thawh loh ni la lain i hloh nghal ang (Juda 1:24).

*Khawngaihna avanga siamthar kan ni.* Pathianin khawngaihna kaltlangin, kan rilru siamtharin min tithar thin (Rom 12:2).

*Khawngaihnain mi puitlinga siam kan ni.* Pathianin Isua ang tura min siamna hi kan thawh hlawh emaw kan thiltih vang emaw ni lovin Pathian khawngaihna a ni. (2 Petera 3:18).

Pathian khawngaihna hian kan nunah thiltihtheihna a nei a. Heng a hlawkna zawng zawng en hian, "Engtinnge Pathian khawngaihna chu ka dawn ang?" i ti mai thei. He zawhna hi naktukah kan zirho ang.

Ngaihtuah zui atan.

Khing a hlawkna sawm zing atang khian eng ber khi nge pawm harsa i tih ber? Engnge a chhan?

Engtinnge khing a hlawkna zinga pakhat khi la chhuakin miin a hriatthiam a a nuna a lakluh theihna turin i puih ang?

Khawngaihna hlawkna khian i nunah tihtur emaw thlak tur emaw a inrintawkna engnge a pek che?

*Krista hnen pana a khawngaihna chang turin i inpeih em?*

Isua i zui duh a ni tih lantir nan heti hian tawngtai rawh le: "Lalpa, suala tluin i hmangaihna dawn ka phu lo tih ka hria e. Mahse min hmangaih em avangin kan tana thi turin Isua i rawn tir a. Amah chu ka ring a, amah kaltlangin chatuan nun ka nei thei tih ka hria. Isua chu ma Lal leh Chhandamtuah ka pawm a, a hnenah ka nun ka hlan e. Min hmangaih a, min chhandam a, nun thara bul min tantir avangin ka lawm e. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, March 27, 2026

MIHRING NUNA THIL PAWIMAWH BER

_Khawngaihna Chungchanga Thu Lawmawm_

By Rick Warren
March 27, 2026
“Nimahsela, ka tlânsiakna kawng ka hmabak hlen tûr leh, Pathian khawngaihna Chanchin Ṭha hriattîr tûr, Lalpa Isua, hnên ațanga khami rawngbâwl hna ka hmuh kha thawk zo phawt ila, ka nun pawh thlâkhlelh tlâkah ka ruat lo ve.” [Tirhkohte 20:24]

Mihring nuna thil pawimawh ber chu nupui/pasal neih emaw, sum tam tham tak nena chawlh emaw, zin khawthawn emaw, lar emaw, in țha tak neih emaw a ni lo. 

Paula chuan Tirhkohte 20:24-ah chuan hetiang hian a sawi, “Nimahsela, ka tlânsiakna kawng ka hmabak hlen tûr leh, Pathian khawngaihna Chanchin Tha hriattîr tûr, Lalpa Isua, hnên ațanga khami rawngbâwl hna ka hmuh kha thawk zo phawt ila, ka nun pawh thlâkhlelh tlâkah ka ruat lo ve.” tiin. 

Mihring nuna thil pawimawh ber chu Pathianin tih tur a pek che hlen chhuah chu a ni. Isua chu kraws-ah i tan a thi a, chhan mumal tak neiin a chhandam che. Chuvangin chatuan daih lo thil buaipui chuan phe phe duh suh. 

Pathian chuan chhan mumal tak neiin khawvelah a dah che. Tih tur bik nangmah chauhin i tih theih tur a ruatsak che a. Chu tih turin a ken tel chu Pathian khawngaihna Chanchin țha midangte hnena hrilh chu a ni bawk. Chu chu mi tu emawin an hrilh vang chein i lo hre ve a ni. Tu nge i hrilh chhawn ve dawn? 

I țhiante/chhungte zingah chuan Isua la zui lo an awm leh awm loh han ngaihtuah teh. Pathian chuan anmahni Chanchin Ṭha hrilhtu nih chu i duh em? Chanchin Ṭha chu i kawl a, chu chu an hriat ve a ngai. Mite thuawih tih awmzia chu Pathianin i tana hna a thawh anmahni hrilh ve chu a ni thei ang – a tan pawh thil pawimawh a ni a – amah nena inlaichinna an neih theihna a ni bawk. 

Mi tu emaw i tan an thi a nih chuan chu thu hriat chian chu i duh hlein i ring em? Isua chu khawvela mi zawng zawng tan a thi a. Tun kar tawpah hian mi maktaduai eng emaw zatte chu Tv hmaah an thu leh ang a, thei tui emaw thinpui dawmin thenkhat chuan chanchinbu an chhiar ang, ngaihtuah nawn ang che – chung mite chuan Isua Krista chu an tan a thi a ni tih leh a khawngaihna chu an tan a ni tih an hre lo.  

Bible chuan II Petera 3: 9 ah chuan Lalpa a dawh theih chhan chu “Mi țhenkhatin muanga an ruat angin Lalpa chu a thutiam kawngah chuan a muang lo ve; tu ma boral duh lova, mi zawng zawng sim duhin, nangmahni lamah a dawh thei a ni zâwk e,” tiin a sawi. Pathian chuan a chhungte chu a ngai pawimawhin a latnat takzet a ni. 

Pathian hnena zahngaihna kan lantir theih dan chu lawm taka kan nun a, kan thil neihte ui lova kan pek chhuah a, mi tam thei ang ber hnena Pathian khawngaihna Chanchin țha hril chu a ni. 

Ngaihtuah zui atan. 

• Pathian khawngaihna Chanchin Ṭha chu tu hnen ațangin nge i lo hriat hmasak ber? Chu thuchah i pawm chian chuan i nun chu engtiangin nge a lo danglam? 
• I kiang vela mite hnena Chanchin Ṭha i hrilh loh chhan chu engnge ni? 
• Han in ngaihtuah la i testimony han ziak teh – Pathianin i tana a hnathawh chanchin chu – tichuan Pathian khawngaihna Chanchin Tha hrilh theihna hun țha a lo her chhuah hun chuan i lo inpeih thei ang. 

[ *Lettu:* Peka]

Thursday, March 26, 2026

I THILPHALNAIN PATHIAN KHAWNGAIHNA A LANTIR

_Khawngaihna Chungchanga Thu Lawmawm_

By Rick Warren
March 26, 2026
“Mi tinin ui chunga pe lovin, pêk loh theih loh anga ngaia pe hek lovin, an thinlunga an tum ang zelin pe ṭheuh rawh se; Pathian chuan hlim taka petu a ni a hmangaih ni. Tin, Pathianin khawngaihna tinrêng in chungah a vûr thei a ni; chutichuan, nangnin engkimah a tâwk zet nei fovin, hnathawh ṭha tinrêng atân in ngah thei ang.” [II Corinthians 9:7-8]

Khawngaihna chungchang i hriat thiam theih dan leh khawngaihnaa i awm leh awm loh chu thilpek i pek danah a lang chhuak. 

Bible chuan, “Mi tinin ui chunga pe lovin, pêk loh theih loh anga ngaia pe hek lovin, an thinlunga an tum ang zelin pe ṭheuh rawh se; Pathian chuan hlim taka petu a ni a hmangaih ni. Tin, Pathianin khawngaihna tinrêng in chungah a vûr thei a ni; chutichuan, nangnin engkimah a tâwk zet nei fovin, hnathawh ṭha tinrêng atân in ngah thei ang,” tiin a sawi [II Corinthians 9:7-8].

“Mi tinin” tih bik kha chhinchhiah ila: “engkim” tih te, “engtik lai pawhin” tih leh “I mamawh zawng zawng” te pawh chu chhinchhiah bawk la. Krista anna kawnga ṭhang liante tana thutiam an ni. Krista anna nei tih chu engnge a awmzia? Engkim petu a ni. Pathianin khawvel a hmangaih em avangin thilpek a pe. Thilpek dan i zir mek lai chuan – i hun, mi biangbiak, sum, thil neih, leh hun ṭha te i hman ang zelin Isua i lo ang deuh deuh ang. Midangte chunga ṭhatna leh thilphalna lantir tluka khawngaihna nun i nunpui tih tarlangtu engmah dang an awm thei lo. 

In pastor-in thilpek chungchang a sawi changa hlauhtawnna emaw buaina eng emaw i lo nei a nih chuan khawngaihna awmzia tak tak chu i la hre lo tihna a ni. Pathian thu han en nawn leh teh. Hlim taka petu a ni a hmangaih ni tiin a sawi a, i mamawh zawng zawng a pe thei che tih a sawi bawk – engtik lai pawhin, engtiang pawhin, eng ang pawhin.   

Hei hi zawhna awm thei a ni: i tana a nun petu Pathian chu i ring thei dawn em? I chhandamna atan amah i ring thei a nih chuan i thil neih hrang hrang a pek tawh che vawngtu atan chuan i ring thei em, a bikin i sum leh pai thuah? 

Thudik chu hei hi a ni, engmah i nei tak tak lo. Pathian chuan kum 70 emaw 80 emaw tan mai a hawhtir che. A tak takah chuan ama ta a ni. 

Pathian chuan engmah ui lovin min pe. Tichuan hetiang hian min chah thung, “Lawmna nun nei rawh. I thil neihte kawmpui suh.” Pathian chuan i thilpek chu a mamawh em? Aih. Amah anna kawngah ṭhang lian turin a duh thung che. “Engkim mai pek che ka duh” i tih hun a nghakhlel em em thung. 

Rom 8: 32 chuan, “Ama Fapa ngei pawh zuah lova, kan zaa tâna petu chuan engkim a thlâwnin min pe tel lo vang em ni?” tiin a sawi. 

Pathian chu i hmangaihin amah fakna hla sain amah thil engkimah i dah hmasa a nih pawhin a thilpek i kuta awm thuah chuan i uikawm nge i thilphal. Khawngaihna i hnena a pek che chu engtiangin nge a hlutna mite hnenah i tarlan? 

Ngaihtuah zui atan. 

• Hlim taka petu niin i inngai ve em? Eng vangin nge?
• Sawma pakhat chungah chuan i lo rinawm tlat avangin Pathianin engtiangin nge mal a lo sawm ve tawh che?  
• Pathian khawngaihna chu i nun chuan engtiangin nge a lo chhan let ve tawh? 

Isua zui tur chuan i inpeihin a chhandamna chu i lo pawm tawh em? 

Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Wednesday, March 25, 2026

PATHIAN NENA INLAICHINNA TINGHET TURIN PEN KHAT

 _Khawngaihna Chungchanga Thil Lawmawm_


- Rick Warren

- March 25, 2026



_"I lamlet chuan ka tungding leh ang che a, ka rawng i bawl ang,"_ Jeremia 15:19.


Isua ringtu i nih chuan Pathian chhungte zinga piang i ni a, i piang lo ngawt thei lo. Sual hian Pathian i hnaihna tur a tibuai chung che pawhin inlaichinna i la nei thei cheu. Engtiklai pawhin i kir thei a, i hnaih leh thei tho a ni.


Tichuan, suala i tluk hian eng nge i tih ang? Ṭawngkam khat lekin: Kir leh a ni mai! Isua hnenah kir leh rawh. A awlsam lutuk tlat.


Pathian chuan Isaia 1:18-ah, "In sualte chu sen lâr angin awm tawh mah sela, vur angin a vâr ang," a ti.


Ngaihdam theih loh tur thil sual a awm a nih chuan Isua vawi thum phatsan a nih zân kha a ni ang. Mahse, Isuan Peteran a phatsan dawn tih a hria a, Petera chu a hnenah a lo kir leh dawn tih pawh a hria. He thil a thlen hma hian Isuan pindan chungnungah, Petera hnenah, "I rin a bo loh nan ka ṭawngṭaisak che a ni, i hawi kir leh hunah nangin i unaute tinghet ang che," a ti (Luka 22:32).


Isuan Petera rawngbawlna hi a hma aiin, a phatsan hnuah a ṭangkaiin a sâwt zawk dawn tih a hria. A rin ang ngeiin, a ni ta reng a ni! Peteran Bibleah hian lehkhabu pahnih a ziak a, Petera lehkhathawn 1-na leh 2-na a ni. A hnuah chuan a chanchin hriatte chu a chhungte a hrilh a, Chanchin Ṭha Marka ziak a lo ni ta a ni.


Pathianin a theihnghilh tawh che niin i ngai a ni mai thei. A theihnghilh lo che. Beram vengtu ṭha chuan beram bo pakhat zawng turin beram 99 a kalsan a ni (Matthaia 18:12-14). I tluksan tawh dan a hria. Thil lian tham tak pakhat vang a ni emaw, thil tê tham tak vang emaw a Isua i hnaih ṭhin ang khan tunah chuan i hnaih tawh lo niin i inhria a ni mai thei. Chutianga i awm a nih chuan uirenaa a tlûk hnua Pathian hnena Davida a lo kir leh a a ṭawngṭai ang khan ṭawngṭai ve rawh. "I mi chhandam hlimna chu mi pe leh la, thlarau tih nuamin mi chelh reng ang che," a ti (Sam 51:12). Davida chuan, "Lalpa, ka chhandamna mi pe lêt leh rawh," tiin a ṭawngṭai lo, a chhan chu a chhandamna a hloh loh avangin. A hloh chu a lâwmna a ni.


I hlimna i hloh tawh a nih chuan, rinnaa pên khat lek i pên leh chuan Pathian hnenah i kîr leh ang a, kawng engkimah siam thar leh i ni ang.


Eng vangin nge vawiinah hian Isua hnenah i lo haw loh ang?


Ngaihtuah zui atan.


I thil tihsual hnuah Pathian i biak emaw, sima i inchhir lohna chhan tur eng thil nge awm?


Sual avanga i nuna thil tihchhiat tawh, Pathianin a siam ṭhat leh tur eng thil nge i mamawh?


Sima ama lam i hawikir leh hian Krista tan engtin nge i ṭangkai lehzual theih ang? Pathian ram tan eng thil nge tihhlawhtlin i duh?


[ *Lettu: Marova Punte* ]

Tuesday, March 24, 2026

PATHIAN HMANGAIHNA CHUAN A HLIAHKHUH TLAT CHE

 _Khawngaihna Chungchanga Thil Lawmawm_


- Rick Warren

- March 24, 2026



Isaia 43:25 ah chuan, “Kei, keimah ngei hi, keimah leh keimah avang ngawta in bawhchhiatnate thai bo thintu chu ka ni; in sualnate pawh ka hre reng lo vang.” 


Pathian khawngaihna avang chuan ngaihdam tlak i ni ta. Thil sual i ti fo thin a, a chang chuan sual lian deuh te pawh i khawih thin. Nimahsela Pathian chu nangmah ngaidam turin a inpeih reng.


Bible chuan, “Kei, keimah ngei hi, keimah leh keimah avang ngawta in bawhchhiatnate thai bo thintu chu ka ni; in sualnate pawh ka hre reng lo vang.” Isaia 43:25


He changah hian thil pahnih hmu la tih ka nei a. Pakhatna, Pathian chuan i phu reng avangin i sual chu a ngaidam a ni lo. Ngaidamtu anihna avang zawkin a ngaidam che a ni. Pahnihna,Pathian chuan i sualnate a hre reng lo vang. I sualnate chu a thinlungah a pai reng dawn lo a ni. 


Chung thudik te chu pawm a harsa maithei e! Mi thenkhat chuan Pathian chu nu leh pa rum deuh - “kan ngaihdan a ni tawh lo” emaw “I ti sual leh tho vang” emaw tih tawngkam chhakchhuak turah an ngai thin. Pathian chu chutiang mi a ni ve lo. Nangmah a mawhpuh hlur lo che a. Pathian chuan a ngaidam che a, hmangaihnain a hliahkhuh zawk che a ni.


Bible chuan, “Hmangaihnaa thianghlim leh sawiselbovin ama hmaah kan awm theihna turin leilung pian hmain Kristaah min thlang.” Ephesi 1:4.


Krawsa Isua a thih khan, i sualna zawng zawngte - i tih sual zawng zawng bakah i la ngaihtuah chhin ngai lohte thlengin a tlaksak vek tawh che a ni. Pakhat te pawh pek loh a nei lo. Chuvang chuan nangman i pek ve a ngai ta lo. Hmangaihna chuan i sual te chu a khuh vek tawh a ni.


I tihtur ber chu Isuan a tihsak tawh che rin a, a ngaihdamna leh chhandamna lo dawn hi a ni mai. Chu chu ti tura i inpeih chuan hetiang hian tawngtai rawh le:


“ Ka Pa duhtak, ka sualnate avangin ka inchhir a, i hmaah ka sualnate ka puang e, i ngaihdamna ka dil a che. Isua Kristaa awm te tan chuan thiam loh channa reng a awm tawh lo tih thu min tiam avang leh Krista Isua kaltlanga ka sualnate lak bo a nih avangin ka lawm e. 


“Ka Lalpa leh Chhandamtu atan Isua hi ka pawm e. Ka nun i tan ka hlan a, i khawngaihna leh hmangaihna ka ring e. Min chhandam avang leh mi thara min siam avangin ka lawm e. Nitina Isua hnung ka zui theihnan min pui ang che. Isua hmingin ka dil a che. 


Isua i pawm a, a chunga mi anga i tawngtai anih chuan, Rick@PastorRick.com ah min hriattir ang che. Isua nena zinkawng i zawh tan theihna turin thil pawimawh ka lo thawn dawn che nia.


Hei hi hre reng bawk ang che, Pathian ngaihdamna i pawm chiah a ni emaw kum engemaw chen i lo zui tawh emaw pawh a ni maithei e, Pathian chuan a ngaidam che a, a hmangaihna chuan a hliahkhuh che a ni.

 

Ngaihtuah zui atan


* Miten i sualnate an hriat reng te hian i rilruah engnge awm?


* Pathian chuan a ngaidam che tih leh i sualnate a hre reng lo a ni tih i hriat hian engnge i rilruah awm?


* I sualnate hriatreng tum an awm em? Pathianin a ngaidam che angin, an tan tawngtaisakin, ngaihdam i dilsak thei ang em?


*[Lettu: Sangpuia]*

Monday, March 23, 2026

PATHIAN HMANGAIHNA CHU A DANGLAM BIK

_Khawngaihna Chungchanga Thil Lawmawm_

Rick Warren
23 March, 2026
“Tlâng liante chu an kal bo vang a, tlâng tête chu sawnin an awm bawk ang; ka ngilneihna erawh hi chu i lak ata a kal bo lo vang a, ka remna thuthlung chu sawnin a awm hek lo vang, Lalpa, a khawngaihtu che chuan a ti." Isaia 54:10.

I rilru hliamin a awm tawh em? Hnawl i lo ni tawh ṭhin em? Tuman an hmangaihlo che niin i inhria em? Chutiang rilru vawiinah hian i pu maithei e. Hei hi ngaithla la tih ka va duh em. Pathianin a hmangaih che tih hi. A hmangaihna che chu a tawp ngai lo vang. Bible chuan hetiang hian min tiam a,“Tlâng liante chu an kal bo vang a, tlâng tête chu sawnin an awm bawk ang; ka ngilneihna erawh hi chu i lak ata a kal bo lo vang a, ka remna thuthlung chu sawnin a awm hek lo vang, Lalpa, a khawngaihtu che chuan a ti." Isaia 54:10

Pathian hmangaihna chu mihring hmangaihna aiin kawng hnihin a danglam zawk a:

*Pathian hmangaihna chu a pangai reng a ni.* Pathian hmangaihna hi a danglam ve thut thut lo. Ni ṭha leh ni ṭha lovah a innghat ve lova. Nu pakhat chuan a nu rilru danglam ṭhin chungchang a sawi a. Ni khat chu min kuah a, a tukah erawh chuan min ngaihthah leh daih a. Pathian hmangaihna chu chutiang a ni ve lo a ni. A hmangaihna che chu a danglam ve lova, nitin a ngai reng a ni.

*Pathian hmangaihna chuan chhan a nei lo.* "Chumi khami a nih chuan ka hmangaih ang che" emaw "chumi avang chuan ka hmangaih che" emaw ni lovin, Pathian chuan "Ka hmangaih che" a ti tawp mai a ni. I thiltih ṭhatah a hmangaihna che a innghat lova, ama nihnaah a innghat zawk a ni. Pahian hmangaihna chuan, "Ka ta i ni a, ka siam che a. Ka tlan che a. Chatuan atan ka duh che a ni" a ti mai a ni. Pathian hmangaihna chu famkim a ni a, a danglam lo. I hlawhchhuah pawh a ngai lovang.

Pathian hmangaihna rinhleh hian buaina a thlen thin. A nihna takah chuan, sual i tih a piangin, a hmangaihna i rinhleh leh a ni aia hre zawka i inngaih vang a ni. Entirnan, Pathianin inneih huam chhungah mipat hmeichhiana hi vawng tura a tih che khan, a khirh vang a ni lova. A hmangaih che a, i tana tha ber a hriat vang a ni. A remruatna atanga penchhuah i tum a mahni a kal i tum khan, a hmangaihna ringhlelin i tihsual man hrehawmn tak i tawrh a ngai thin a ni.

Heng thudik pahnih hmang hian i nun i siam thei ang: nghet takin Pathianin a hmangaih che a, chhan nei lovin a hmangaih bawk che a ni. Hmangaih che hi a tawp lovang, engvang pawhin. Chu chu i rin reng theih tur innghahna tlo leh nghet chu a ni.

Ngaihtuah zui atan

* Hmangaihna inthlak zung zung engtik khan nge i tawn le? Pathian hmangaihna i hriatthiam dan engtin nge a tihdanglam?

* Pathian hmangaihna ringhlelin, mahni kawng i zawh thin dan engtin nge? Engnge a rahchhuah le?

* Pathian chuan  nghet tak leh chhan nei lovin a hmangaih che a. Chutiang hmangaihna chuan i nunah engtin nge danglamna a thlen le?

*[Lettu: Sangpuia]*

Sunday, March 22, 2026

ENG ANG TAKA HLU NGE I NIH?

_Khawngaihna Chungchanga Thil Lawmawm_

- Rick Warren 
- March 22, 2026
_"Ka tan i hlu a ni"_ (Isaia 43:4, GNT)

Eng ang chiaha hlu nge i nih i rin?

I sum leh pai hlutna kan sawi lo. I hlutna kha a ni kan sawi. Sum hlutna leh mihring hlutna hian inzawmna an nei lo. I bungraw neihte hlutna khan i hlutna nen inzawmna a nei lo kan ti thei bawk ang. Bible chuan, _"I thil neih atangin i nun kha teh a ni lo"_ tiin min hrilh (Luka 12:15 NLT)

Chuvang chuan heti hian ka zawt a che: mihring i nihnaah hian eng anga hlu chiah nge i nih le?

Thil hlutna hi tehkhawng pahnih hmanga teh theih a ni: thil neitu, leh chumi tana a man pe phaltu atangin.

A hmasa zawkah chuan, a neitu hian a hlutna a tilang. Entir nan, Elvis-a lirthei lo neih tawh kha i lirthei ai khan a man a to daih ang em? Michael Jordan-a pheikhawk hluite pawh? Thil hi a neitu a zirin a man a sangin a hniam thin a ni.

Tu ta nge i nih? Isua zuitu i nih chuan a chhanna a awm sa: "Pathian ta i ni" (1 Johana 4:4, NLT). "Isu, ka sual simin i chhandamna ka pawm e" i tih rual khan Pathianin a chhungkuaah a seng lut nghal che a; a ta i ni. Chuvang chuan i hlu em em a ni.

Hlutna tehkhawng dang leh chu miin a man an pek phal zat atangin a ni. Infiam mite thlalak leh chanchin ziahna bu hi a lei ngamtu a zirin a man a to viau thei. Lemziak mawi tak pawh hi a lei ngam huaitu a zirin a hlu thin.

Eng zata lei nge i nih? The Living Bible chuan heti hian a sawi, _"Isuaa lei leh man pek i ni tawh a, a ta i ni tawh"_ tiin (1 Kor. 7:23). Isuan a nunna i tan a hlan. I hlutna i hriat duh chuan kraws en mai rawh. Isuan a ban pharin, "Hetiang zeta hlu hi i ni asin" a ti che a ni.

Hlutna nei tlem hle ni a i inhriat dawn chuan a dik lo a ni tih hre reng rawh. Isua ta i ni a. A tan i hlut em avangin a nunna i tan a hlan a ni.

Pathianin, _"Ka tan i hlu a ni"_ a ti (Isaia 43:4, GNT). Pathian khawngaihna avangin i hlu a ni.

Ngaihtuah zui atan.

Vawiin zirlai i chhiar hma hian eng anga hlu nge i nih tih zawhna hi engtinnge i chhan ang?

Tuna engtinnge i chhan tak ang?

Pathian tan i hlu a ni tih hriatna hian i nitin nunah eng danglamna nge a thlen ang?

[Lettu: Mapuia Fanai]

Saturday, March 21, 2026

NGAIHDAMNA TAK TAK LAN DAN

_Khawngaihna Chungchanga Thil Lawmawm_

- Rick Warren 
- March 21, 2026
_"Tin, inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u."_ (Ephesi 4:32)

Ngaihdamna tih thumal hi kan duh hun hun sawi a mite rei lote lawmna siam mai maina tur a ni lo. Chu chu ngaihdamna dik tak a ni lo.

Bible chuan ngaihdamna dik tak hian ze li a nei tiin a sawi:

*1. Ngaihdamna chu eng anga nasaa ngaihdam nge i nih tih hriat rengna hi a ni:* Ephei 4:32-ah chuan heti hian kan hmu, _"Tin, inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u."_ Hei hi ngaihdamna dik tak intanna chu a ni. Ngaihdamna i ni tih i inhriat loh chuan midangte ngaihdam ve i duh lovang. Mahni chunga i khirh chuan midangte chungah pawh i khirh ve ang. Mahse Pathian hnen ata khawngaihna i dawn nasat poh leh midangte khawngaihna i ngah ang. Pathian ngaihdamna i chan nasat poh leh midangte i ngaidam nasa ang.

*2. Ngaihdamna chu mahni dikna chanvo dah tha ngama thil siam remna a ni.* The Living Bible chuan heti hian a letling, _"I phuba la suh la. Pathian kutah dah zawk rawh, amah ngeiin phuba ka la ang a ti a ni."_ (Rom 12:19). Hringnunah hian inangtlang tak rorelna hi a awm lo fo, mahse nakinah Pathianin ro a la rel ang. Thil dik lote a la siamtha ang. Chuvangin tunge dik taka rorel thiam zawk ang - nang nge Pathian?

*3. Ngaihdamna chu sual thatnaa chhanna hi a ni.* Bible-in Luka 6:27-28 ah chuan heti hian min hrilh, _"Ka thu ngaitute u, ka hrilh a che u, In hmelmate chu hmangaih ula, a hua che u chu an thatna tur ti ula, anchhe lawhtu che u chu malsawmsak ula, a sawisatu che u chu tawngtaisak rawh u."_ Engtinnge midang i ngaidam tak zet a ni tih i hrilh theih ang? I natna mai ni lova mite natna i en a, an tana Pathian malsawmna i dilsakin.

"Engtinnge ka ngaihdam theih ang? Min tina tak zet asin" i ti a ni mai thei. Hetiang thil hi Pathian hmangaihna chauhin a ti thei. Chuvang chuan i nun kha Pathian hmangaihnaa i chhun khah a ngai a ni.

*4. Ngaihdamna chu a tul chen tih chhunzawm a ni.*_"Chu mi lai chuan Petera a lo kal a, a hnenah, "'Lalpa, ka unauvin vawi engzat nge ka chungah thil tisual sela ka ngaihdam tur? Vawi sarih thlengin em ni ang?' a ti a. Isuan a hnenah, ‘Vawi sarih thlengin, ka ti lo va che. Vawi sarih hmun sawmsarih thlengin, ka ti zawk che a ni.'"Juda-te danah chuan vawi thum thleng mi ngaihdam tur a ni a, chuvang chuan Petera chumi let aia vawi khata tam a bituk chhin a ni. Mahse Isuan chu aia nasaa ngaidam turin a ti thung.

Vawi engzat nge mi i ngaihdam ang? I natna a reh a phuba lak i chakna a reh thlengin. A rei thei ang ber tihna anih chu.

Ngaihtuah zui atan.

Pathian khawngaihna hian i nunah eng danglamna nge a thlen? Chu khawngaihna chu engtinnge midangte chungah i pawh fan ang?

Vawiin hian tunge Pathian malsawmna i dil ang? Chu i tawngtaina chu engtinnge i natna rehna kawng a nih theih ang?

Nangmah duh lotu che emaw i chanchin a dik lova sawitu lakah eng thil tha nge i tih theih ang?

[Lettu: Mapuia Fanai]

Friday, March 20, 2026

PATHIAN KHAWNGAIHNA CHANG LA, HAHDAM [RELAX] RAWH

_Khawngaihna Chungchanga Thil Lawmawm_

By Rick Warren
March 20, 2026
“Pathian khawngaihna tû man an tlûksan loh nân te, in zîngah mi tibuai leh tibawlhhlawh thei rilru chhia a lo chhuah loh nân te fîmkhur ula.” [Hebrai 12: 15] 

Pathian khawngaihnaa “RELAX” [hahdam] taka awm dan chu engnge ni? 

*R - [Realize] Mi tumah an famkim lo tih hre [realize] rawh.* 
Bible chuan hetiang hian a sawi, “Ṭhat famkimna zawng zawng tâwp chu ka hmu ta a; I thupêk erawh chu a zau khawp mai a ni,” tiin. Chung thute chu Pathian lam hawia sawi an ni, a chhan chu amah chauh chu a famkim! Khawtlang nun emaw ngaihdan emaw thil famkim a awm lo. I nuna thil thlengah chuan engmah famkim a awm lo vang. Mahse, Pathian Thu chu a famkim si. Bible chu i chhiar a, i nun hruaitu atana i hman chuan innghahna famkim i nei thei ang. 
 
*E - [enjoy] Tiamchin nei lo Pathian hmangaihna chu chen [enjoy] rawh* 
Bible chuan, “Ngai teh u, Pain min lo va hmangaih nasa êm; Pathian fa-ahte min vuah tâk hi!” tiin a sawi [I Johana 3: 1]. Krista zuitu i lo nih tak chiah chuan Pathian bawih i ni ringawt lo. Lal fapa/fanu i ni tel tihna a ni! Naupang chu an nihna ang anga pawm an ni a. Chhungkaw inhmangaih tawnna boruakah chuan hahdam tak leh thlamuang takin an awm ṭhin.  

*L - [Let] Pathian chuan chingfel rawh se.* 
I thunun theih loh thil chu engtin nge i lo hmachhawn ṭhin? “In manganna zawng zawng ama chungah nghat vek rawh u; a ngaihtuah êm êm che u a ni.” [I Petera 5:7] 

Sangha man tumin luiah i kal a, i len chu i thlahdul ta a. Len deng tura eng emaw thlah dul ngai a awm ang chuan fel famkim duhna [perfectionism] kalsan tur chuan eng emaw i kalsan a, Pathian chu i chettir a ngai ṭhin. 

*A - Hlauhna ni lovin, rinnain che rawh*
Pathian chhungte zinga i tel ve theih dan chu a hmasain han ngaihtuah teh. Ephesi 2: 8 chuan hetiangin a sawi, “Rinna avânga khawngaihnaa chhandam in ni,” tiin a sawi. Khawngaihna kaltlang lo chuan vanram kai theih dan kawng a awm miah lo. Chhandamna chang thei turin i thawk ṭha tawk thei ngai lo vang. Pathian aṭanga chhuak a thlawn vek zawk an ni. 

*X - [Exchange] I famkim lohna leh Pathian thlamuanna/remna chu thleng rawh.* 
Famkim duhna chuan thlamuanna a tichhe thin. Bible-ah hetiang hian kan hmu, “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tân chawlhna in hmu ang,” tiin a sawi [Matthaia 11: 28-29].

Vawi tam tak i la tisual dawn. Mahse, Pathian khawngaihna chang tawhtu i nih ngat chuan engmah lungkham i neih a ngai lo vang. Dik tak chuan hlawhchham chu i tan a hlauhawm ve lo, hetiang hian Bible-ah kan hmu, “Pathian khawngaihna tû man an tlûksan loh nân te, in zîngah mi tibuai leh tibawlhhlawh thei rilru chhia a lo chhuah loh nân te fîmkhur ula” tiin [Hebrai 12: 15]. 
Tun hunah ngei hian Pathian khawngaihna chu chang la, hahdam takin awm ang che!

Ngaihtuah zui atan. 

• Engtin nge tumah famkim an awm lo tih hriatna chuan huatna emaw mahni inthiamlohna emaw chu a kalsantir theih ang che? 
• Pathian hmangaihna chu engtin nge i lo hahdampui ve tawh?
• Pathianin khawngaihna mite zalenna petu chu engtin nge i lo hmachhawn ve dawn?  

[ *Lettu:* Peka]

Thursday, March 19, 2026

THIL FAMKIM DUHNA AṬANGA ZALENNA

_Khawngaihna Chungchanga Thil Lawmawm_

By Rick Warren
March 19, 2026
“Duhthusâm anga khaw awm i nghah chuan Buh tuh hun emaw, seng hun emaw i hmu lo vang.” [Thuhriltu 11:4]

Pathian khawngaihna mite tizalentu chu i hriat thiam hun chuan ṭha famkim kher nih duhna aṭang chuan i zalen tawh ang a, lawmna leh zalenna thar i nunah i chang tawh ang. Eng vangin? Thil famkim kher duhna chu i nun tan kawng tam takin a ṭha lo. 

*1. I remhriatna a tichhia.* Hmachhawp eng emaw bul pawh i ṭan theih mang reng reng loh chu i lo hmachhawn tawh em? “Kan ti tak tak tawh ang e” tih i nei mai thei, mahse bul i ṭan thei ngang si lo. A chhan awm thei chu a famkima tih i duh vang a ni thei. Chetna atana remchang emaw hun duhthusam emaw i thlir a ni thei a, i faten lehkha an zir zoh hun emaw pawisa eng emawzat i khawl hun i nghak pawh a ni thei bawk. I thil tum chu a san lutuka, thil famkim chauh i pawm dawn a nih chuan chu chuan a tiṭhuanawp che ang a, engmah tak tak i ti thei lo zawk hial ang. 

Bible chuan hetiang hian a sawi, “Duhthusâm anga khaw awm i nghah chuan Buh tuh hun emaw, seng hun emaw i hmu lo vang.” [Thuhriltu 11:4]

*2. Mite nena In Inlaichinna a tichhia:* Tute mahin engtik lai pawha an thil tihdik loh sawichhuahsaktu emaw sawisel rengtu emaw chu an duh ngai lo. A huatthlala awmin a thinrim thlak a ni! Bible chuan, “Bawhchhiatna thuptu chuan inhmangaihna a zawng a, Thil sawi sawi hmang chuan ṭhian bulte a tiṭhen ṭhîn,” tiin a sawi [Thufingte 17:9]. 

Ṭhafamkim nih tumna [perfectionism] – dik ber nih tumna leh midang tihdik reng tumna – chuan inlaichinna a tichhe fo, a chhan chu thinlung hahdam lo nun a nih vangin. Ṭhatfamkim tumho chu anmahni tan leh midang tan an khirhin duh dan bik te an nei ṭhin.  

3. *I hlimna a tichhia:* Thuhriltu 7: 16 chuan, “Kherkhiap lutuk suh la, intifing lutuk hek suh; engah nge mahni i intihchhiat ang?” tiin a sawi. He Bible thu hian mifel dik tak chungchang a sawi lo. Mi khirhkhiap chungchang a sawi a ni. Thil tha eng pawh i tih chhiat vek theih dan chu hleihluak taka kalpui chu a ni.  

Nangmah pawt hniamtu langsar ber chu nangmah ngei kha i nih chang a awm [Chu chu dik kan ti tlang viau mai thei]. Min sawisela, min nek min nektute chu kan ngaina lo zel a, chu chuan engnge a tarlan chiah ni ta ang? A thu laimu chu nangmah leh nangmah kha i induh lo tihna a ni. I ṭha tawk lo tiin i inthlir tihna a ni. I dik lohna lai nangmah ngei pawh i inhrilhnawn fo chuan nangmah leh nangmah i infuih turah i ngai thei. A ni miah lo! Chu chu mi khirhkhiap zia mai a ni, chu chuan nangmah leh nangmah kha a pawt hniam ang che. 

Mi khirhkhiap te enkawlna damdawi pakhat a awm a – lehkhabu emaw doctor pisa emawah hmuh theihin a awm lo. Zalen taka i awm theihna chu Pathian khawngaihna mite tizalentua chawlh chu niin mi famkim famkimna chu a ni. 

Ngaihtuah zui atan. 

• Ṭhat famkim chu eng laiah nge i lo tum ve? Hmalam i pan theih nan chuan eng nge i kalsan ve ngai ang?
• I tan hahdam taka nun thiam chu eng vangin nge a pawimawh? Chu chuan Isua zuitu la ni ve lo tan engnge awmzia a neih ang? 
• Nangmaha ngaihtuahna leh nihna Pathian thutiam leh thutak hmanga thlak danglam ngaite chu engte nge an nih?   

[ *Lettu:* Peka]

Wednesday, March 18, 2026

I HARSATNA PALTLANG TURIN KHAWNGAIHNA A TAWK

Khawngaihna chungchanga thil lawmawm

- Rick Warren
- March 18, 2026
"Chumi chungchang thuah chuan mi kiansan theih nan Lalpa chu vawi thum ka dil a. Tin, ani chuan ka hnenah, 'Ka khawngaihna i tan a tawk e, ka thiltihtheihna hi chak lohnaah asin tihfamkimin a awm ni,' a ti ta a." (2 Korinth 12:8-9).

Harsatna chinfel theih loh leh thlak danglam theih loh thil i hmachhawn hian engtin nge i tih ang? I nunah i thunun theih loh thil chhungril lama tinatu che i tawh hian eng nge i tih ang?

Pathian khawngaihna a tlukluh mai hi a ni.

Thlemna te, hrehawmna te, phawklekna te, hahna te, harsatna te i tawh huna kal zel tura khawngaihna i dawn theih nan thil pali i tih a ṭul:

*1. Pathian ṭanpuina dil rawh.*
Mahnia ti thei nia i inhriat hian i nuna Pathian thiltihtheihna i pumpelh a ni. I tlakbalna pawmin, "Lalpa, hei hi ka chelh zo lo," ti rawh. Bible chuan, 'Pathianin mi chapote a dodal a, inngaitlawmte erawh chu khawngaihna a pe ṭhin.' Chutichuan, Pathian thu thuin awm rawh u, Pathian hnaih rawh u, tichuan, anin a hnaih ang che u," (Jakoba 4:6-8).

*2. Pathian thu hmangin inchhungkhat rawh.*
Ni tin Bible zir la, chu chuan hnem che sela, tichakin, chakna thar pe che  rawh se. Sam ziaktu chuan. "Ka nunna hi vaivutah a bet tlat a, i thu ang zelin mi tiharh ang che," (Sam 119:25) a ti. A chinfelna chu mahni inenfiah a nih chuan i danglam der tawh tihna a ni a. Pathian en i mamawh a ni. Ani chauh hi khawngaihnaa min chelh rengtu awmchhun chu a ni.

*3. Pathian mite thlawpna chu pawm rawh.*
Bible chuan kan harsatnaa mi dangte kan ṭanpui hian Krista dan kan zawm a ni a ti. Chu chu, " Nangmah i inhmangaih angin i vengte pawh i hmangaih tur a ni," tih hi. Pathianin nangma tan chauha nung turin a ti lo che. "Ka khawngaihna i tan a tawk e. ka thiltihtheihna hi chak lohnaah asin tihfamkimin a awm ni," a ti (2 Korinth 12:8-9). Kan chak lohna hian Pathian khawngaihna leh mi dangte kan mamawhna hre fiah turin min pui thei a ni.

*4. Pathian thutiamte chu ring tlat rawh.*
Bibleah hian i tana thutiam hi 5000 aia tam mah a awm. Hei hi pakhat chu a ni: "Chakna reng nei lote chu a tichak ṭhin. Tleirawlte meuh pawh an chauvin an hah ang a...Lalpa nghaktute erawh chuan an chakna chu an siam ṭha leh ang a, mupuite angin thlain an thlawk chho vang a, hah lovin an tlan ang a, chau lovin kein an kal ang," (Isaia 40:29-31).. Vanram beiseinain i mit chu len rawh, helai leh tun chauh ngaihtuah lovin. 

Pathian khawngaihna hi engtiklai pawhin i tan a awm reng e. Harsatna chinfel theih loh i neihin beidawng mai suh la. Chunglam en tlat ang che.

Ngaihtuah zui atan

Tunah hian eng ang dinhmunah nge Pathian khawngaihna i mamawh?

Pathian thutiam khawilai ber nge chutiang dinhmunah chuan i mamawh?

Pathian mi eng angin nge kal zel tura i mamawh pe thei che?

[Lettu: Marova Punte]

Tuesday, March 17, 2026

PATHIAN KHAWNGAIHNAIN A CHHANCHHUAH DAN CHE KAWNG THUM

 _Khawngaihna Chungchanga Thil Lawmawm_


- Rick Warren

- March 17, 2026



“Pathian khawngaihna tak tak a ni tih hriattirin tawi tein inhnenah ka ziak a ni; chungah chuan ding nghet rawh u.” 1 Petera 5:12


Hringnun kan intlansiaknaah hian tlakhawlhna tam tak a awm a. Nimahsela chung harsatna karah chuan, Pathian khawngaihna i hmuh hmaih lo vang.


Bible chuan 1 Petera 5:12, “Pathian khawngaihna tak tak a ni tih hriattirin tawi tein inhnenah ka ziak a ni; chungah chuan ding nghet rawh u.” 


Chu intlansiaknaah chuan harsatna lian tak tak pathum avangin i tlansiakna kawng pawh i zawh tawp lo maithei a ni. Nimahsela chung karah pawh chuan, Pathian khawngaihna chuan a chhanchhuak ang che.


*1. Thlemna i tawhin Pathian khawngaihna chuan sual khawihlo turin a pui che.*

Thlemna hi harsatna siam theitu hmasa ber a ni. Bible chuan, “Pathian zawng a rinawm a ni, ani chuan in tuar theih tawk aliam chu thlemna in tawh a phal lo vang; in tuar theihna turin thlemna rualin tlan chhuahna kawng a siam nghal zawk ang.” 1 Korinth 10:13


Pathian khawngaihna chuan i tlanchhuah theihnan a pui ang che. I kawngzawh lai thlak pawh a ni thei a, kawngka atanga tlanchhuah pawh a ni thei, emaw i ngaihtuah dan thlak danglam emaw a ni thei bawk. Engpawh chu lo ni se la Pathian chuan tlanchhuahna kawng a hawnsak ang che.


*2. I chauh lai pawhin Pathian khawngaihna chuan a chelh ding che.*

Thlemna chu i tawk reng kher lo thei a. I chauh hle chang ni te pawh a awm ang! Hringnun hian chakna tam tak a mamawh si a, abiktakin thil awlsam zawng lo va thil dik tih i tum hian i chau zual ang. Anih chuan thil dik i tih avanga i chauh lai chuan khawiah nge thiltihtheihna i lak ang? 


“Kristaa nangmahni nena min tinghettu leh keini min thihtu chu Pathian a ni; ani chu min chhinchhiahtu leh kan thinlunga zakhamna Thlarau min petu a ni bawk.” 2 Korinth 1:21-22. Thlarau Thianghlim chu nangmahah a awm a, nangmah maia i tih theih loh i tih theihna tura chakna petu che a ni.


*3. Harsatna i tawh pawhin Pathian khawngaihna chuan kal zel turin a pui che.*

Kan tihsual vang ni miah lo va kan rilru nat chang hi hringnunah hian a awm thin a, chung chu a mi den dan a na lehzual thin a ni.


Chutianga i awmlai chuan engnge i tih ang? Chutah tak chuan nangmah inkhawngaihna kha bansan la Krista leh a thiltihtheihna chu thlir zawk ang che. Isaia 41:10 ah chuan, “Hlau suh u, kei in hnenah ka awm si a; mangang suh u, kei in Pathian ka ni si a: ka tichak ang che u a; a ni, ka tanpui ang che u; a ni, ka felna kut dinglamin ka chelh reng ang che u.”

 

Ngaihtuah zui atan


* Hun harsaah Pathian khawngaihna chuan engtinnge a hruai che?


* Mahni chauh inngaihtuahna hian eng harsatna nge  a siam che? Chu chu chuan lamah i nei ve thin em?


* Pathian khawngaihna chu nangmah kaltlangin engtinnge midangah lantirin a awm ve theih ang?


*Pathian thilpek khawngaihna chu chhandam i nih theih nan i pawm dawn em?*

Bible chuan, “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilo chuan miin an chhuang dah ang e.” Ephesi 2:8-9


 Hetiang hian tawngtai rawh:

“Aw Lalpa, misual ka ni tih ka inhria a, i ngaihdamna ka dil e. Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin Isua hmingin ka dil a che. Amen”


*[Lettu: Sangpuia]*

Monday, March 16, 2026

PATHIANIN A PAWM CHE

_Khawngaihna Chungchanga Thil Lawmawm_

By Rick Warren 
March 16, 2026
Ka nu leh ka pa chuan mi kalsan ta si a, Nimahsela LALPA chuan mi la pawm ang.” Sam 27:10

Tute mah hi an nun a tluangpurh lo. Harsatna, ser leh hliam kan nei ṭheuh a ni. Chung harsatna zinga hrehawm ber pakhat chu nu leh pa, ṭhiante, min ruaitute, leh midangin min hnawlna hi a ni. Kum 40 liamtaa an thusawi pawh ni se i thinlungah a la cham reng ang.

Nimahsela chanchin ṭha a awm: hliam tuarte tan Pathian khawngaihna avanga damna a awm a ni. Bible chuan, “Lungchhiate chu a tidam a, an hliamnate chu a tuam ṭhin a.” (Sam 147:3). 

Pathianin min tihdam dan langsar tak chu kan ngaihtuah dan a thlak danglam hi a ni. Bible chuan, “Pathian duhzawng, a ṭha leh lawm tlak leh, ṭhat famkim chu in hriatfiah theih nan, in rilru athara awmin lo danglam zawk tawh rawh u.” (Rom 12:2).

Mi tam zawk chuan a ni lo zawngin thil kan dawngsawng ṭhin a, ngaihdan diklo te kan ṭawmpui mai ṭhin a ni. Mi in i chungchang an sawi ah buai lo la, Pathianin i chungchang a sawi ngaipawwmawh zawk la, chu chuan i thinlung hliamte chu tidam rawh se.

Pathianin i chungchang a sawiah hian thudik tam tak a awm. Chung zinga pakhat chu hei hi a ni: Pathian pawmtlak i ni tih hi.

Tute mai pawh hian pawmtlak ni tura inhmakhua vek kan ni. Kan nu leh pa te, kan ṭhian te, kan hmelma te, kan thik deuh te leh mikhualte thleng hian min pawm se kan ti a ni. Kan thawmhnaw inthuam dan te, kan lirthei khalh aṭang te, kan chenna in emaw kan hnathawh emaw aṭangte hian mi hneh kan tum ve bawk ṭhin a ni.

Engtin pawh bei mah la, hnawl i ni tho vang. Nimahsela Isuan a hnawl lo vang che.

Bible chuan, “Chuvangin Krista chuan Pathian tihropui nan a lawm che u ang bawk khan inlawm tawn rawh u.” (Rom 15:7). Pathianin a pawmna che chu phutlet nei lo vin a  ni. I tih ṭhat viau avanga pawm che a ni lo va, khawngaihna avang zawkin a pawm che a ni. Chuvang chuan i sualna chu engmahlo mai a ni tihna em ni. Ni lo ve. Khawngaihna avang zawkin Pathianin danglam theihna min pe a ni.

I nunah Isua i pawm tawh ka ring a, chutiang tho chuan Pathianin a pawmna che pawh i hriatthiam ka ring a ni? Bible chuan, “...nangni zawng chi thlan, lal puithiamho, hnam thianghlim, Pathian mite ngei in ni si a.” (1 Petera 2:9). Heng zawng zawng hi Pathian khawngaihna vang a ni.

Nu leh pa emaw ṭhiante emaw nangmah ruaitu emaw lamin an pawm theihlohna che a awm maithei e. Nimahsela thil pawimawh deuh ka hrilh ang che: Anmahni pawmna i mamawh hran lo - a chhan chu lei leh van lal ber pawm i ni tlat.

Sam 27:10 ah min tiam a, “Ka nu leh ka pa chuan mi kalsan ta si a, Nimahsela LALPA chuan mi la pawm ang.” Pathianin a pawm che a. Chu chu a tawk em em a ni.

Ngaihtuah zui atan

* I eng na nge Pathian tihdamna i mamawh?

* Tuna i dinhmunah hian tu pawmna nge i mamawh ber?

* Pathianin khawngaihna avangin a pawm che tih i hriatna chuan Krista i hriatna engtiangin nge a tihdanglam le?

*[Lettu: Sangpuia]*

Saturday, March 14, 2026

ENGVANGIN NGE KHAWNGAIHNA DAWNG TURA I LA BEIH FAN?

_Khawngaihna Chungchanga Thil Lawmawm_

- Rick Warren 
- March 14, 2026
_"Engkim mai hi Pathian thil thlawn pek, khawngaihna hmanga siamṭhat ngai a ni. Isua Krista kaltlangin sual laka tihfihlim a ngai a ni."_ (Rom 3:24, NCV)

Mi, kalkawnga kal mai mai za hnenah "Engtinnge vanram i luh ang?" tiin zawt ta la chhanna tam tak, mahse ngaihdan bulthum inang si i dawng ang: i thawh chhuah a ngai tiin. "Mi tha nih tum la i theih tawp chhuah rawh," "Mi rilru tha ni turin theih tawp chhuah rawh," Thil tha lo aiin thil tha ti tam rawh" tihte i dawng ang.

Mahse chhandamna chu thilpek a ni, thilpek dawng turin thawh hah a ngai lo. A thlawn a ni! I thawh chhuah theih a ni lo, i lei thei hek lo a, dawng tura i thawh theih pawh a ni lo.

Kristianna leh sakhaw dangte hian inan lohna lian tak an nei. Kristianna chu khawngaihna chunga din a ni a. Sakhaw dang zawng chu thiltihah a innghat a, tawngkam pakhatin i khaikhawm thei: "ti rawh" tiin. Pathian hriat ni tur te, malsawmna dawng tur leh vanram kai turin tihtur i nei. Dan leh hrai, sakhaw puithuna thiltih te- eng emaw i tih ve a ngai.

Kawng lehlamah Kristianna hi heti hian tawi deuhin a sawifiah theih "a kin ta" tiin. Isuan Pathian nena in inzawm lehna turin krawsah a man a pe tawh. A tawk tawh!

Ṭumkhat chu mi pakhatin heti hian min zawt, "Pastor Rick, chhandam ka nih theih nan engnge ka tih ang?" tiin. "I tlai lutuk tawh" tiin ka chhang (mak a ti hle). "Kum 2000 vel laiin i tlai alawm! Chhandam nana i mamawh kha tih a ni tawh, engmah tih theih i nei tawh lo."

Isua Kristan a thawk zo tawh. Krawsah i chhandamna a thawk zo tawh a, tunah chuan i tan thilthlawn pek a ni tawh. Chuvang chuan kraws lerah Isua kha "A kin ta" tiin a au a ni. "Ka boral ta" a ti miah lo, a boral lo tlat. Vawiin thlengin a la nung. "A kin ta" a tih kha i tan a ni. Mi zawng zawng chunga khawngaihna lantir tura ruahmanna kha a tlak chiah ta  a ni.

Rom 3:24-ah chuan heti hian kan hmu,  _"Engkim mai hi Pathian thil thlawn pek, khawngaihna hmanga siamṭhat ngai a ni. Isua Krista kaltlangin sual laka tihfihlim a ngai a ni."_ (NCV)

I thiltih ang zela vanram kai tur i ni lo. Isua Kristan i tana a lo tih tawh ang zela vanram kai tur i ni.

Khawngaihna hi kan hriatthiam chauhin kan dawng ang, a chhan chu thilpek kan dawn hlu ber a ni tlat.

Ngaihtuah zui atan.

Engvangin nge mi tam tak hian Pathian thil thlawn pek khawngaihna dawng lova an chhandamna thawh chhuah an tum ni a i rin?

Pathian chhandamna thlawn pek kan dawn hnu hian engvangin nge midangte hnena kan hrilh ve a pawimawh?

Pathian khawngaihna chiang zawka i hriat chianna hian engtin nge i nun a tihdanglam?

*Pathian khawngaihna thlawn pek dawnm turin i inpeih em?*
Chhandamna thlawn pek i la dawng lo anih chuan heti hian ṭawngṭai rawh:

"Lalpa, ka sual hian i lak ata min ṭhen hrang tih ka puang a, mahni maiin ka siamṭha thei lo a ni. Mahse min hmangaih em avangin ka sual man atan Isua i rawn tir tih ka hria. Mi bote zawnga chhandam tura lokal a ni tih ka hria a, chu chuan min huap ve a ni. I hlata nun ka duh tawh lo e. Min khawngaih em avangin ka lawm a, nang nena inzawm ka duh a ni.

"Chuvangin tunah hian Isuaah ka rinna ka nghat e. Ka Lal leh Chhandamtuah ka pawm a, amah kaltlanga min tiam ang ngeiin chatuan nunna ka neih ka beisei. Min hruai la, min tidanglam la, nitin Isua zui turin min pui ang che."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, March 13, 2026

HAH TAWNGKHAWNG LO TURA MITE NENA THAWHHO

_Thil Pawimawh Sawihona_

By Rick Warren
March 13, 2026
“Mahni maia thawh ai chuan thawhpui neih a ṭha, hlawhtlin a awl zâwk.” [Thuhriltu 4:9]

Pathian chuan hna pawimawh bik tak a pe che tih i hria em? Chu chu i nun chhan a ni. Thil tha ti tura siam chein chu hna chu i pian hma daih tawh khan a lo ruat lawk a ni. Ephesi 2: 10 chuan, “Thil ṭha ti atân Krista Isuaah chuan siama awmin,” tiin a sawi.

Mahse chu hna ṭha chu nangma chakna rinchhan chauha thawk turin a ti ngai lo che. A nih loh chuan i hah tawngkhawng thlengin a hnuk chau ang che. 

Bible chuan, “Mahni maia thawh ai chuan thawhpui neih a ṭha, hlawhtlin a awl zâwk,” tiin a sawi [Thuhriltu 4:9]. 

A chang chuan mi ṭhenkhat chuan thil ropui tak tak anmahni chaknain an ti thei niin kan ngai. 
Entirnan, mi ṭhenkhatten kan hriat sual chu Kolkata kawtthlera mite chhawmdawl hna chu Mother Theresa khan amah maia thawk niin kan ngai. Mahse dik tak chuan amah ṭanpuitu sisters mi ṭhahnem tak a nei a ni. 

Amah ang chiah chuan Pathian hna thawk tura a tih che chu hlen chhuak turin nangmah tanpuitu eng emaw zat i mamawh. Nangmah mai chuan, thil tam tak i ti thei ang. Midangte nena awmze neia i thawhpui chuan thil tam zawk i ti thei ang. 

Vur sur them/lapaw satliah chuan engmah tak tak a thlak danglam ngai lo. Mahse eng emawzat an infin a nih chuan lirthei tam tak che vel pawh a tikhaihlak thei thung! Mahni mai chuan, nang leh kei hi chuan engmah tak tak kan ti thei lo vang. Mahse kan thawhho chuan thil lian tak thlak danglam turin theihna kan nei a, Pathianin ti tura min tihte kan tih ṭheuh chuan thil lian tak kan ti thei ang. 

Vawiin hian i chau a ni mai thei. Nangmah ṭanpuitu che i nei em? Neih loh chuan kohhran chhungkua aṭanga ṭanpuina awm thei chu i nei lo tihna a ni. I inkhawm mai thei, mahse a chhunga mite nen chuan in inzawm chuang hauh lo thei. 

I kiang vela mite chu i chau tawngkhawng tur venpuitu tur che an ni. Tun karah hian chung mite chu zawm ang che. 

Ngaihtuah zui atan. 

• Pathianin i hna thawh tura a pek che chu i hmu chhuak ve tawh em? Chu chu engnge ni, engtin nge midangte chuan chu hna chu i hlen chhuah theih nan an ṭanpui theih ang che? 
• Midangte nena in thawh ho lai chu han ngaihtuah let teh. Mite nena thawhhona chuan engtin nge rah chhuah ṭha ber a thlen theih ang?
• Engtin nge ṭhianzaho [small group] emaw kohhran chhungkua emaw chuan hah tawngkhawnga thawk kher lova i tih tur tlingtla tur chuan an puih theih ang che?   

Pathian chatuan chhungkuaah chuan hmun i nei e. 

Sawmna chu mitin tan hawn a ni a. Ring la nei ang che. Chhandamna chu Isua lam hawia amah zui tura thutlukna siamtute tana thilthlawnpek a ni.  

Pathian chuan a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Thursday, March 12, 2026

PATHIANIN A HMU CHE I TUARNA PAWH

_Thil Pawimawh Sawihona_

By Rick Warren
March 12, 2026
“Chutichuan, Pathian remtih anga tuarte chuan thil ṭha ti zêlin an thlarau chu Siamtu rinawm tak hnênah kawltîr rawh se.” [1 Peter 4:19]

Mi ṭhenkhat chuan thil eng emaw an tuar avangin thil tisual niin an inngai ṭhin. An tuarna chu Pathian duh dan pawn lama an awm vanga thlengah an inngai fo. Mahse Bible chuan a chang chuan Pathian duh dan ngeia kan tuar chang a awm thu a sawi thung. 

“Chutichuan, Pathian remtih anga tuarte chuan thil ṭha ti zêlin an thlarau chu Siamtu rinawm tak hnênah kawltîr rawh se.” [1 Peter 4:19]

A chang chuan Pathian duh dan ngeia i tuar chang a awm a. A chang chuan Pathian remtihnaa i nat chang pawh a awm bawk. A chang chuan Pathian remtihnaa buaina tawkin i rinna avanga cheksawlha i awm chang a awm hial. Engnge a chhan? A chhan chu Pathian chuan i taksa/pang nawmna satliah ai chuan i nungchang zawk chu a ngai pawimawh fe zawk a ni. Krista anna kawnga ṭhan lentir che chu nun nuam leh awlsam tak pek che ai chuan a ngai pawimawh hle zawk a ni. 

Mite cheksawlh a, diriam chingtute i kianga an lo kal chang chuan engtin nge i awm ang? I Pathian rinawmnaah chuan innghatin, chatuana i kianga awm tiamtu chu ring chhunzawm zel ang che. Tichuan thil ṭha ti chhunzawm zel bawk rawh. 

Buaina leh elrelna tam zawk i la tawk dawn. Chu chu ringtu nun a ni! Rei tak ata tawh khan thil ka hriat chhuah chu mite chuan nuihzat chein i nihna chungchang an sawi thei ang, mahse an dang tak tak thei ngai lo vang che tih chu a ni. I rinna sawinghing turin emaw thil dik lo ti turin emaw an ti lui thei lo ang che. Mite i hmachhawn dan chu – huatna emaw hmangaihna nen emaw pawh ni se – i thuneihna a ni. Nnagmaha Thlarau Thianghlim ṭanpuina nen chuan thutlukna dik tak chu i siam thei. 

Hmalam pan zel la. Rinawm zel la. Thil dik chauh ti ṭhin ang che. Mi tute emaw remtihna chu hlim turin i mamawh lo. Tute emaw i kawm kher pawh a ngai kher lo. I dinhmun leh nihna pawh nangmah dotute chu mumal taka i hrilhfiah vek a ṭul hek lo. 

Thil dik tih kawngah chuan hmalam i pan hram hram a ṭha ber ang. 

Pathianin a hmu reng che. A enkawl dawn che. Chatuana i kianga awm ve tura a tihna che chu a tihlawhtling ngei ang. 

Ngaihtuah zui atan. 

• A chang chuan tuarna chu Pathian ruahmanna chhungah a thleng ve a ni tih hriatna chuan a tihahdam che em? Eng vangin nge? 
• Ringtu i nihna zawna i tih turte chu miten an diriam chang che pawhin chhunzawm zel tur niin i in hria em? 
• Pathian thutiam i hriat rengna chuan hun harsaah chuan a chelh reng chein i in hria em? 

[ *Lettu:* Peka]

Wednesday, March 11, 2026

HMANGAIHNA I CHHAN LET KHAN LAWMMAN ROPUI TAK A NEI

_Thil Pawimawh Sawi Hona_

- Rick Warren
- March1 2026
_"Fate kan nih chuan ro luahtute kan ni a, a hnena chawimawia kan awm ve theihna tura amah kan tuarpui tak zet chuan,"_ Rom 8:17.

I nun zar buaitu che kha i la hre reng em? Hmachhawn theihna kawng leh thil sual, thil ṭha a rulh theihna awm chhun chu chatuana i lawmman dawn tur hriat reng hi a ni.

Tlâng chunga  thusawi zingah hei hi Isuan min tiam: "Miin keimah avanga an hau che ua,an tihduhdah che ua, dawta sual tinrenga an hek hunah che u, in eng                  a thawl ang. Lawm ulangin, nasa takin hlim rawh u, vanah in lawmman a awm hnem si a. chutiang bawkin in hmaa zawlnei awmte pawh an tihduhdah ṭhin kha," (Matthaia 5:11-12).

Isuan a tih anga i hmelmate i chhân let hian Pathianin a Zawlnei ropui Mosia te, Abrahama te, Elija te nen in inang a ni a ti a. Pathian mi ropuite zingah i tel ve tihna a ni.  Nangmah chauhin i awm lo ve. 

Isua Krista i rin avangin dodalna i tawk a ni mai thei. The Living Bible chuan, "Rei lo te chhunga kan hrehawm tuar nep tak hian chatuan ropuina, khaikhin rual loh khawpa nasa chu min siamsak a ni," (2 Korinth 4:17). Pathian chuan a hausakna chatuan atana malsawmna chu pek che a tiam, a chhan chu hrehawmna leh dodalna i lo tawh tawh avangin i nâ chu rei lo te atan a ni a, mahse i lawmman erawh chuan chatuan a daih thung.

I fate emaw, naupang i hriat, hnam zia leh nunphungin  phal leh dik a tih kalha an awm avanga tihduhdah an awm a ni thei. Miin dik lo taka an tih avanga an lungngaihin hei hi  hriat reng a ṭul: lawmman ropui tak dawn tur i nei! Chatuan lawmman dawn tur ngaihtuah chuan rei lo te a buaina tawh chu a man (worth) hle a ni.

"Fate kan nih chuan ro luahtute kan ni a, a hnena chawimawia kan awm ve theihna tura amah kan tuarpui tak zet chuan," Rom 8:17.

Krista chuan he khawvela i thil tuar zawng zawng chu a lo tuar ve vek tawh a. Mawi lo taka tihna te, zar buaina te, dodalna te, sawiselna te, phiarrukna te a lo tawk tawh a ni. Pathian fa i niha isua tuarna i ṭawmpui a nih chuan chatuan lawmman pek i ni ang.

Hemi awmzia hi i hria em? Tihbuai leh sawisak i hmachhawn khan chatuana Pathian ropuina chu i ṭawmpui ve dawn a ni.

Thutiam mak leh thilthlawnpek mak tak chu a va ni em!

Ngaihtuah zui atan

Vanram i lo suangtuahna, Pathian thilthlawnpek chatuan atana Pathian bula awm vena chu eng kawngin nge thlak danglam a ngaih?

Miin an vauna che mawi lo taka i  chhan let ṭum a awm em? Tlawmna te, thilphalna te leh hmangaihna te nen hmachhawn ta la i dinhmun chu engtin nge a                  tihdanglam ang?

[ *Lettu: Marova Punte* ]

Tuesday, March 10, 2026

I HMELMA CHU I ṬAWNGṬAISAK A NGAI KHER EM NI?

_Thil Pawimawh Sawihona_

By Rick Warren 
March 10, 2026
“Sual ngam chein awm suh la, ṭhatnain sual chu ngam zawk rawh.” Rom 12:21

Tunlaia thil harsa tak pakhat chu sual ṭhatnaa beihlet hi a ni. Mi tihdan phung ni lo tlat hi a harsatna lai chu a ni. 

Mi i nunah tibuai turin lo inrawlh ta se la, a eng zawnga i hmachhawn a ngai a ni. Rom 12:21 chuan, “Sual ngam chein awm suh la, ṭhatnain sual chu ngam zawk rawh.”

Ṭhatnaa sual ngam chu rinnaa ke penna a ni. A chhan chu tunlaiah chuan sual chu sual veka ngam leh thim chu thimna bawka ngam kan duh ṭhin a ni. Hei hi khawvelin min zirtir dan a ni miau si. Chuvang tak chuan keini chuan rinnaa kan beihlet a ṭul a ni, Pathian rinchhan chungin thim chu eng hmanga kan beihlet a ṭul a ni.

Thim chu engin beilet la. Huatna chu hmangaihnain. Khakna chu ngilneihnain. Sual sualin inngamtir suh la. Sual chu ṭhatnain inngam tir zawk rawh.

Thil huphurhawm tak a ni. Harsa kha tih a ngai si a ni: “Kei erawh chuan ka hrilh a che u, in hmelmate chu hmangaih ula, a tiduhdahtu che u chu ṭawngtaisak rawh u.” (Matthaia 5:44).

A awlai em? A harsa khawp mai. A pangngai lo em? Pangngai lo reng a ni. Kan duhthlan a ni em? Aw ni e. I hmelma aia ṭha zawk nih chu i duhthlan a ni. Thim aia eng thlan chu Isua kawng zawhna a ni. Isua khan sual nen inbei ta se la, a kalsanin a theihnghilh nghal ngawt lo vang. A nun a hlan tawp ang a, engang chiaha hmangaih ngai nge annih tih a lantir ang - chutiang tak chuan a ti reng a nih kha.

Pathian chuan thungrul turin a duh lo che a. Thil ṭha ti turin a duh che a. A harsa ber te pawh hmangaih turin a duh che a ni.

Isuan hmangaihdan ṭha ber leh hmelma te hmangaih dan min zirtir a. A nun chu i entawn anih chuan, he khawvela mahni chauh inngaihtuahna ramah hian ke i pen a ṭul dawn a ni.

Sual ngam tura rinnaa ke pen chu a awlai dawn lo. Nimahsela Isua thuhretu rinawm tak i ni zawk dawn a ni.

Ngaihtuah zui atan

* Engtinnge Isuan hmelmate hmangaih dan leh ṭhatnaa sual ngam dan min zirtir?

* Engvangin nge Isuan min hmusittute ṭawngṭaisak zawk tura min tih? Engnge chu chuan danglamna a thlen?

* I hmelma tan i ṭawngṭaisak fo ṭhin em? Chumi laka i rilru puthmang chu engtiangin nge a danglam?

*[Lettu: Sangpuia]*

Monday, March 9, 2026

ENGVANGIN NGE SUAL CHUNG PAWHIN PATHIANIN I RIN ANG

_Thil Pawimawh Sawihona_

By Rick Warren 
March 9, 2026
"Tu sual pawh sualin thungrul suh u. Mi zawng zawng ngaiha thil mawi ngaihtuah lawk rawh u. A theih phawt chuan nangmahni lam tal, mi zawng zawng nen inremin awm rawh u.” Rom 12:17-18

Miin an nuihsawh che emaw an hmuhsit emaw che hian, Pathianin thil ṭha lo aṭangin thil ṭha zawk a thlen tir theih i ring em?

A ti thei a ni. Nimahsela rin leh awih a harsa ṭhin. Miin an beih che hian inven emaw beih let emaw i chak em. Pathian chu dikna Pathian a ni a, a hna chu thil ṭha zawk a thlen theihna tura thunun te, khaichhuah leh tundin te hi a ni.

“Tu sual pawh sualin thungrul suh u. Mi zawng zawng ngaiha thil mawi ngaihtuah lawk rawh u. A theih phawt chuan nangmahni lam tal, mi zawng zawng nen inremin awm rawh u. Duh takte u, in phuba la suh ula, Pathian thinurna kian zawk rawh u, “Phuba reng reng keima lak tur a ni, keiman ka thungrul ang,’ Lalpain a ti,” tih ziak a ni si.” (Rom 12:17-19).        

He thu hi ngaihtuah teh “i theihtawp chhuah rawh.” A theih hram chuan midang nen inremin awm rawh u. A chhan chu mi ṭhenkhatte hi chu lungrualpui harsa deuhte hi an awm ṭhin tih Pathian pawhin a hria a  ni. Miin an diriam che a nih pawhin, Pathian chuan thungrul turin a duh lo che a. Kal bosan zawk turin a duh che a ni.

Hetiang hian i sawi maithei e, “Ka chunga thil thleng hi in hre lo a ni. Ka rilru an tina a. Hrehawm takin min siam a, rulh let ve ka duh a ni.”

Nangmah hmusittute chuan man beh che a. I rilru lak pen a, beih che an chak ṭhin. Engahmah i ngai lo anih chuan an nuihsawh thei lo ang che. Online ah pawh chu tho chu a ni. Miin facebook vela i chungchang thu an ziak anih pawhin i ngaihsak loh chuan engtinmah an ti thei lo ang che. Engmah i sawi loh chuan an thunun thei lo ang che.

Mi hnena thu i sawn dawn apiangin, “Min ti a vek mai,” i tih chuan, i rilru i thunun tur kha midang hnenah i hlan i tihna a ni. I tih duh ka ring lo. I rilru i thunun theihna chu midang hnenah daih chuan i hlan duh ka ring lo.     

Rom bung 12 ah chuan Pathianin duhthlan tur a pe che a: Phuba i la thei emaw Pathian rinchham chungin Pathian kutah i dah thei bawk. Tu nge ti fel thei zawk ni a i rin le?

Phuba lak tum lo vin. Kal bo la. Liam tir zawk la. Pathian thawh tir zawk ang che.

Ngaihtuah zui atan

* Social media ah i chungchang an sawi vak chuan engtin nge i tihtawp theih ang?

* harsatna chu nangmah maiin chinfel i tum nge Pathian kuta dah i tum ṭhin zawk? Engtinnge i chinfel ṭhin le?

* Pathianin a duh anga i rilru i thunun theihna tura ataka chet i lak theih dan tur engang nge ni?

*[Lettu: Sangpuia]*

Sunday, March 8, 2026

HEI HI HRE RENG RAWH: LALTE LAL FA I NIH HI

_Thil Pawimawh Sawihona_

- Rick Warren 
- March 8, 2026
_"Fa duhtakte u, Pathian ta in ni a. Chuvangin heng mite lak ata hi hnehna in chang tawh, a chhan chu he khawvela mi aiin nangmahnia awm chu a lian zawk si a."_ (1 Johana 4:4, GW)

Engnge i nihna? Kristian i nih chuan lalte Lal leh pathiante Pathian fapa emaw fanu emaw i ni. Pathian chhungkaw zinga mi i ni a. A anpuia siam i ni. Pathianin a hmangaih che. Chhan neiin a siam che a, i nunah tum a nei a ni.

Tihduhdah emaw sawisak emaw i nihin tunge i nih tih i hriat a ṭul. Engvangin? A chhan chu tihduhna hi chak lohna, him lohna, mahni insitna rawng a kai theih vang a ni. Mi tihduhdah/nuihsawh tuartute hian inrintawk lohna emaw an rinhlelhna nei emaw an zui chawk. Mi rilru hnual emaw him lo riaua inngaite emaw an zawng ṭhin. Mi, an dinhmun a him loh ber laia hliam an duh ṭhin.         

Tunge i nih? Miin an sawi che ang i ni lo. Pathianin tunge i nih tih chiang takin a sawi. Pathian chuan thudik chauh a sawi ṭhin a, chu thudik chuan a zalentir che a, inrintawkna leh huaisenna a pe che. Inrintawkna i neih loh chuan bumna leh hruai kawina laka i nep ṭhin. Vawiin hian i nihna leh Isuaah tunge i ni tih i chian a ngai, chu chuan i nun pum a hril avangin.


Pathian chu nangmah siamtu che a ni a. I tan Isua a thi a. Thlarau Thianghlimin a chenchilh che. Mi tihduhdahnaah lungngai suh, a chhan chu tiduhdahtu che khan i chungah thuneihna a nei tak tak lo.       

Bible chuan heti hian a ti,  _"Fa duhtakte u, Pathian ta in ni a. Chuvangin heng mite lak ata hi hnehna in chang tawh, a chhan chu he khawvela mi aiin nangmahnia awm chu a lian zawk si a"_ (1 Johana 4:4, GW). Setanan hmusittu che hmanga tluktir che a tum mai thei. Mahse nangmaha awm kha he khawvela awm aiin a lian zawk tlat.   

I nihna hre reng rawh, chu chu Davida, Israel lalte zinga ropui ber chuan heti hian a ziak: _" Ka hlauh chang apiangin, Nangmah ka ring ang che. Pathian ka ring a, a thu ka fak ang a: Pathian ka ring a, ka hlau lo vang: Tisa chuan eng nge mi tih theih ang?"_ (Sam 56:3-4).

Pathian i lamah a ṭan chuan dotu che chu tupawh ni sela a pawimawh lo. Pathian i lama a ṭan chuan i nihna tidanglam thei leh Pathianin i chunga a rilru put hmang a thlak theihna tur khawp hialin tunge i chunga thil tithei ang?

Engmahin a thei lo.

Ngaihtuah zui atan.

Vawiin thuzir aṭang hian Bible chang pakhat thlang la. Fuihtu atan che leh midang, tihduhdah tuartute fuih nan vawiin hian vawng rawh.

Isua ni lo eng thilah nge i nihna i nghah? Chu chuan engtinnge i inrintawkna a tihdanglam?

Sam 56:4-ah heti hian kan hmu, _"Tisa chuan engnge mi tih theih ang?"_ Ringtu kan nih avang hian tisa natna emaw rilru natna emaw kan tuar ve ngai dawn lo tihna a ni em?

*Vawiin hian a chhungkuaa tel turin Pathianin a sawm che.*
Bible chuan Pathian mithmuhah tumah tling zo kan awm loh thu min hrilh. Mahse Pathianin a la hmangaih che. A hmangaih em che avangin chhanchhuak tur che Pathian chhungkuaa i tel theih nan Isua a rawn tir a ni.

I inpeih chuan he ṭawngṭaina hian bul ṭan rawh le:

"Lalpa, misual niin i duhzawng anga nung lovin mahni duh dan angin ka nung ṭhin tih i hmaah ka puang e. Ka sual avanga thi turin Isua i rawn tirh a avangin ka lawm e. Isu, ka ring a che, min ngaidam a, min chhandam a, i chhungkuaa min pawm turin ka dil a che. Isua hmingin, Amen." 

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, March 7, 2026

HMASAWNNA KHAWVELA MI VAU HMANGTE HMACHHAWN DAN

_Thil Pawimawh Sawihona_

- Rick Warren 
- March 7, 2026
_"Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh, van hmunahte thlarau sualho awmte an ni zawk e."_ (Ephesi 6:12)

Kan zirna inah te, hnathawhna hmunah te leh online-ah te hian midang vau/tihduhdah hi hluar mek zel a nih hi.

Mi tuin emaw midangte thuhnuai emaw vau beh emaw nana tharum hman a tum hian midangte hnuaichhiah/vau behna rawng kai a ni a. Hei hian vauna, thudik lo theh darh, tawngkaa beih, zar buai, pawlho zing ata midangte hnawl a huam tel a ni.

Invaubehna hi tisa taka mi chunga thil thleng chauh a ni mai tawh lo. Tunlai khawvelah chuan thuthawn hmang te, social media-te, video games leh apps hrang hrang hmangin kan inbetawn mek tawh. A awmzia chu cyber-bullying (thiam thil hmanga intihduhdahna) hi heng zawng zawngah hian a thleng mek tihna a ni. Chhuan liam tate zingah kha chuan naupangten intihduhdahna pumpelh turin infiamna hmun an chhuahsan mai ṭhin a, mahse tunlai khawvelah chuan intihduhdahna hi i phone emaw, tablet emaw, computer emaw kaltlangin a thleng thei reng. A chang chuan tal chhuahna a awm lo emaw tih hial tur a ni.

Heng thil hi nangmah emaw i faten emaw in tawh hunin a rawn chhuahna hriat hi a pawimawh khawp mai. 

_"Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh, van hmunahte thlarau sualho awmte an ni zawk e."_ (Ephesi 6:12)

Invauna/tihduhdahna hi i buaina ber a ni lo. Indona dik tak chu thlarau thil a ni. Sual hi thil tak a ni, Bible pawhin kan buante hi tisa leh thisen an ni lova, mahse thlarau sualhote an ni zawk a ti. Setana hian hlauhna, thinurna leh huatna chawh thawh hi a tum a ni, chu'ng tana hmun lo kian apiang - a bikin Pathian nena inzawmna nei lo emaw Thlarau Thianghlim hruaia awm lote emaw a bitum a, a hneh thuai ṭhin.  

Setana hian Pathian tihnat a duh a, mahse a thei lo - chuvang chuan a tih theih sang berah a ṭuan ta a: Pathian fate a bei ta ṭhin a ni. Nu leh pate tihnat dan chak ber chu an fate tihnat a ni. Chuvang chuan zirna in emaw hnathawhna hmun emaw a intihduhdahna/invauna hmachhawn nana pawimawh em em chu ṭawngṭaina hi a ni, a chhan chu mihring chauh hmachhawn i nih loh avangin. Heng zawng zawng phenah hian thlarau indona a awm tlat a ni.

Intihduhdahna/invauna titawp turin theihna i nei lo a ni mai thei, mahse Pathianin a nei.

Chuvang chuan ṭawngṭainain bul ṭan zel rawh. Chutah chu thlarau sual hnathawh hneh thei tura Pathian thiltihtheihna i neihna hnar a ni.

Ngaihtuah zui atan.

I thawhpuite kha intihduhdahna hmachhawn turin engtinnge i hrilh ang? I fate hnenah engnge i sawi ang?

Intihduhdahna phena thlarau sual hnathawh i hmuh khan engtinnge i thlir dan a tihdanglam?

Engtinnge ṭawngṭaina hian Pathian thiltihtheihna nen min thlun zawm? 

[Lettu: Mapuia Fanai]

Friday, March 6, 2026

HNAMTE THLENG PHAKA PHONE HMAN DAN


By Rick Warren
March 6, 2026
“Hêng zawng zawng hi Pathian tih vek a ni: ani chuan Krista zârah amah nên inremin min awmtîr a, inremna rawngbâwl hna chu min pe a.” [2 Korinth 5:18]

Social media-ah min hmuh chang in nei ang. Mahse coffee ka duhzawng ka tarlanna emaw zaithiam ka tih zawng kan tarlanna erawh chu in hmu ngai lo vang. 

Twitter te, Facebook leh Instagram ka zawm ve tirha thutlukna mumal tak ka siam chu mite fuihna atan leh miten Isua an zuina kawnga anmahni ṭanpuina atan chauh ka hmang ang tih a ni. Chu chu coffee tui tih zawng tarlan chiam ai chuan ṭangkai zawk hlein ka hria. 

“Hêng zawng zawng hi Pathian tih vek a ni: ani chuan Krista zârah amah nên inremin min awmtîr a, inremna rawngbâwl hna chu min pe a.” [2 Korinth 5:18]

Instagram-a i fate thlalak tar chhuah emaw i chawhmeh duhzawng tak i restaurant ngainatna hmun ngeia eina thlalak tarlante chu a sualna a awm miah lo. Mahse Pathiana thlamuanna miten an neih theih dan kawng kawhhmuhna atana i hmang tel lo a nih chuan i dam chhan tarlanna hun ṭha i bawhpelh tihna a ni ang. 

Pathian chuan van leh khawvela hna pawimawh ber chu min pe a: Isua Krista chhandamna thu chu hril turin min ti. Isuan hnam tin zinga zirtir siam tura a zirtirte a chah khan i hnenah pawh a sawi! Kum 2,000 dawn chu khawvel pumpuia kal tih awmzia tipuitling tur chuan lawnga chuan phawt emaw thlawhnaa chuan phawtte chu a ngai ṭhin. 

Vawiinah thung chuan khawvel pang lehlam thleng tur chuan i in i chhuahsan kher a ngai lo. I mut kawr hain i mut pindan aṭang chuan kan Lalpa chanchin ṭha chu i hril thei tawh – chu chuan mit khap kar lekin khawvel a dap chhuak nghal thei bawk. Chu chu ringtu chhuan danga miten an neih ve theih hauh loh chu a ni. Chu remchang chu mawhphurhna sang tak nen an kalkawp thung: chu chu hnamte hnena chanchin ṭha hril chu a ni. 

Bible chuan I Chronicles 16: 24-ah chuan, “A ropuizia hnam tin hnênah hril ula, Mi tin hnênah thil mak a tihte chu puang rawh u.” tiin a sawi. 

Khawvela hnam tin zingah chuan Pathianin an tana thil ropui tak a tihsak chanchin chu hrilh theihna hun ṭha i nei e. Chu remchang chu i kut zungṭang hmawrah khan a awm mek. 

Ngaihtuah zui atan. 

• Social media-ah chuan Isua chanchin sawi chu eng vangin nge i hlauh? 

• Social media chuan chanchin ṭha hril theihna remchang engtin nge a siamsak che? 

• Social media chu chanchin ṭha i hrilh theihna hmun pakhat a ni a. Lal Isua chhandamna i puan chhuah theihna thil dang chu engnge ni thei ang? 

*Isua chuan thu a tiam che.* 

Vawiin fianrial thuzir hian i phone hmanga Chanchin ṭha hril theihna remchang a hriattir che. Mahse chu Chanchin ṭha chu i lo dawng ve tawh em? 

Isua chuan Johana 11: 25-26 ah hetiang hian a sawi, “Kei hi thawhlehna leh nunna chu ka ni; tu pawh mi ring chu thi mah sela a nung reng ang; nung apiangin mi ring chu kumkhuain an thi lo vang. Chu thu chu i ring em?” tiin. 
 
Pathian chuan a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...