Friday, June 30, 2023

PATHIAN THU I CHHIAR CHINAH DUH TAWK MAI SUH

 Ni 40 Chhung Pathian Thuah

By Rick Warren

— June 30, 2023



“Chutichuan, mi tin hêng ka thu hi hriaa zâwm apiang chu, mi fing, lungpui chunga in satu nên tehkhin tûr a ni.” [Matthaia 7:24]


Pathian Thu nena i thil tih theih thil tam tak a awm. I dawng thei a, i chhiar thei a, i zir thei a, i vawng thei a, i ngaihtuah zui thei bawk. Mahse i thil zirte chu a taka i hmang chhuak lo a nih chuan, chung thil zawng zawngte chuan ṭangkaina an nei lo ang. Jakoba 1: 22 chuan, “Thil tih awm si lova thu ngaihthlâk ngawt tâwka ngaiin mahni inbum hek suh u,” tiin a sawi hial.  


Thu a taka titu nih chu thil harsa tak a ni thei, a chhan chu Satana chu tihtakzetin a sapatal si a. Bible zirna hmuna in awm mai chu pawi a ti lo i thil zir chu ataka i nunpui hma chuan. 


Mahse, Pathian Thu chu i awih hma chuan a fan chhuak tak tak ngai lovang che. Thutak i chhiar emaw i zir satliah emaw avang chuan i nunah i senglut ngei ang tihna a ni lo. 


Dik tak chuan, hmanhlel takin Bible zirnaah i tel mai thei a – Bible hminga intawhkhawmna emaw seminar emaw inkhawmpuiah pawh i kal thei – mahse chuti chung chuan a taka hmang chhuak hman lo khawpin i buai em em thei tho. I thil lo zir tawh pakhat chu a lehpek tel tura i kalna lamah pawh i manghilh leh vek thei bawk. 


A taka nunpui lo chuan i Bible lo zir tawh zawng zawngte chuan hlawkna an nei lo ang. Isua chuan, “Chutichuan, mi tin hêng ka thu hi hriaa zâwm apiang chu, mi fing, lungpui chunga in satu nên tehkhin tûr a ni,” tiin a sawi [Matthaia 7:24]


Isua pawhin Pathian malsawmnate chu a thutak awihna aṭangin miin a chang ṭhin tiin a sawi, hriatna satliah aṭangin a ni lo. “Chûng chu in hre ta a, in zawm chuan in lâwm ang,” tiin. [Johana 13: 17]. 


Ṭhianzahova Bible zir hi a hlawk thlak takzet a ni. Midangte nen chuan keimahnia kan zir chhuah ngai reng reng loh tur kan zir chhuak ṭhin. Midangte chuan i hmuhfiah loh thil chu an hmuhtir chang che a awm ang.  


Hmasawnna rahbi rah tum ang che. Pathian chhungte chuan thutak chu a taka nun chhuahpui tur chein ṭanpui che rawh se. 


Thutak a tak nunpuitu nih dan tha ber tur chu chhiar chhuak ṭhin ang che i chhiar a, i zir a, i ngaihtuah zui hnu chuan. I thil tum chu a chin chhuakin ziak chhuak thin ang che. Chu i thil tih tur chuan mimal thil (i telna), a taka tih theih (i thil tih theih), i finfiah theih (hun bithliah theih) ni rawh se. Chu thil nun chhuahpui tur chuan Pathian nena in inkar, midangte nena in inlaichinna, leh i nungchang a khawih phak ang. 


Pathian Thu nunpuitu i nih ang zelin, i nun chu innghahna sawi nghin theih lovah chuan a insawhnghet deuh deuh ang. 


Ngaihtuah zui atan. 


Pathianin a Thua ti tura a tih che i la tih loh thil chu eng nge ni? 


Engtin nge Pathian hmaa inkunpuihote chuan Thu nunpuitu ni turin an fuih thar che? Chutiang mi i nei lo a nih chuan, engtin nge chutiang mi chu i hmuh theih ang – pakhat aṭanga bul ṭanin? 


Mi tam zawk nena Bible zir emaw conference emaw chu eng nge a hlutna? I thil zir tawhte chu engtin nge i hman chhuah? 


[*Lettu*: Peka]

Thursday, June 29, 2023

PATHIAN THU CHAUH HI INNGHAHNA TLAK A NI

 _Ni 40 chhung Pathian Thuah_ 



— Rick Warren 

— June 28, 2023

“Chutichuan, mi tin heng ka thu hi hriaa zawm apiang chu, mi fing lungpui chunga in satu nen tehkhin tur a ni.” Matthaia 7:24

Inghahna a zir zelin in lian leh te i sa thei ang. Innghahna tha lo emaw diklo ah chuan in lian tak i sa thei lo vang. Reiloteah a chim mai ang.

Chutiang chiah chu i nun pawh a ni. Innghahna diklo va i awm chuan Pathianin ni tura a beisei ang che i ni thei lo vang. 

I nun i siam chhoh zelna turah hian innghahna diklo tam tak an awm a, chungte chu:

*Tunlaina.* Mi thenkhat chuan midang tih ang apiang hi tih an tum ve thin a. A lar viau a nih chuan, tih ve mai zel an duh thin. Vawiina lar hi naktuk lamah chuan lar tawhlo tur a awm ve bawk. Tunlai mite ang zela nun tum chu inghahna che renga in sak ang a ni. Awmzia a awm thin lo!

*Thil lo chin thin.* Mi thenkhat thung erawh chuan mi tih thin dan apiang emaw an nu leh pa te tihdan ang apiang an ti mai thin. Chu chuan awmzia a nei ve deuh; thil chin thin chu an chhunzawm chuan awmzia a nei thei. Mahse eng thil mah hi kumhlun tur a  awm si lo. A lo hlui tawh chuan, a lo thing ve tawh thin. Marka 7 ah Isuan Pharisaite hnenah thudik aiin thil chin thin ngai pawimawh lo turin a ti. Chu chu keini tan pawh min hrilhnawnna tha tak a ni.

*Ngaihtuahna.* Pathianin ngaihtuah theihna min pe a; kan hman ve a ngai a ni. Mahse kan ngaihtuahna chu diklo theilo a ni bik lo. Thufingte 16:25 ah chuan, “Mi ngaiha kawng dik ni awm taka lang, a tawp chu thihna kawng ni si a awm,” a ti. Kan zinga fing ber pawh hian tihsual chang an la nei dawn. Chutiang ngaihdan chu neih tur a ni. Pathian chauh hi engtiklai pawha rintlak a ni. 

*Rilrua lan dan.* Thenkhat te hi chu an thinlunga a thawh dan angin an khawsa a. Dik nia an hriat ang chuan an ti a. Mahse an thinlunga a thawhdan chu a dik loh chuan – an daw tihna a ni! Midang ai mah chuan nangmah leh nangmah i inbum tihna a ni. I thinlunga a thawhdan ang zela i khawsak ringawt chuan i rilrua awmdan ang zelin i khawsa mai ang.

Tunlai mil zawnga khawsak te, thil lo chin thin dan ang te, ngaihtuahna leh thinlunga vei dan hmang te a innghah chu a a rintlak loh a nih chuan, eng tin nge i nun chu i siam ang?

Pathian Thuin

Isuan, “Chutichuan, mi tin heng ka thu hi hriaa zawm apiang chu, mi fing lungpui chunga in satu nen tehkhin tur a ni,” a ti.

Tunlaina chu a danglam zel a, chin thin dan pawh a thing zel a, ngaihtuahna pawh a sual thei a, thinlunga lan dan pawh a daw thin a. Pathian Thu erawh chu a dik reng a, a danglam ve ngai lo.

Pathian Thu chu i hrethiam reng lo mai thei a. I ngaina reng lo maithei bawk. Politic atang phei chuan a dik reng theilo bawk. Mahse engtiklai pawha innghahna tlak chu hei chauh hi a ni.  

Ngaihtuah zui atan. 

* I nun chu eng thil ah nge i innghah ve? Engtin nge a kaihhruai che?

* Bible-a innghat pumhlum turin engin nge dal che? 

*Bible-a i innghahna ti nghet leh zual turin vawiiah hian i eng nge thlak danglam ngai awm le? 

*[Lettu: Sangpuia]*

PATHIAN THUTAKA INHNANGFAK DAN KAWNG NGA

 Ni 40 Chhung Pathian Thuah

By Rick Warren

— June 29, 2023



“Krista thu chu finna tinrêngin nangmahniah awm ṭeuh rawh se.” [Kolossa 3:16]


I taksa tana tisa chaw i mamawh ang chiah khan i thlarau tan chakna nei turin thlarau chaw i mamawh. Bible chuan thlarau chaw a nih thu a insawi a – i thlarau tan tui, bawnghnute, chhang leh sa a ni thei. Chakna i neih theihna tura i mamawh chu a pai kim hle a ni.   


In sak viltu i nih chuan hnathawktu kar hnih eng mah ei tawh lote chu hna thawk turin i tir chhuak lo vang. Sipai hotu ni ta ang la thla khat chuang chaw ei tawh lote chu ral do turin i tir chhuak lo tawp bawk ang. 


Chutiang chiah chuan, rilṭam zeta i awm a nih chuan thlarau indonaah chuan hnehna i chang tlem viau ang. I hmachhawp tih tur hlen chhuak tur chuan chaw ṭha taka eiin Pathian Thu ngeia i intihchak a ngai a ni. 


Tisa chaw i ei ang lo takin, Pathian Thu i ei apiangin i ril a ṭam deuh deuh zel ang a. Pathian ṭhatzia i hmuh tam ang zelin, amah i duhna chu a lo nasa zual zel ang!


Bible chuan Kolossa 3: 16-ah chuan hetiangin a sawi: “Krista thu chu finna tinrêngin nangmahniah awm ṭeuh rawh se,” tiin. Paula chuan Bible chu kan nunah hausa tak, ropui tak leh inpe taka awmhmun a rem theih nan kan thinlung buatsaih turin min sawm a ni. 


Engtin nge Pathian Thu chuan i inchawm ang a, Bible chu i nunah nghet takin a lo awm theih ang? 


I bengin Thu chu dawng rawh. Inkhawm turin thutlukna siamin Pathian Thu hril chu ngaihthla ngun rawh. 


Thu chu i mit ngeiin chhiar rawh. I ina Bible kawl satliah chuan i nun chu engtin mah mal a sawm lo vang. I thinlung ngeia Bible chu i chhiar a ngai a, chhiar ngeiin bul ṭan ang che. 


I kut leh kain Thu chu zirchiang ang che. Pathian Thu i zir lai chuan, i kut chuan pencil hum ang che. Pathianin a thu zirtir che chu ziak chhuak bawk la. Ringtu dang tute emaw nen sawi khawmin in thil zir chhuahte chu sawiho ṭhin ang che u. 


Thu chu ngun takin ngaihtuah ang che. Pathian Thu chu ngaihtuahin ṭhial nawn ang che. 


Thu chu i thinlungah vawng tlat ang che. Bible chu i mamawh hun takah i lo kawl kher lo thei a. Pathian Thu chu i thinlungah vawng tlat ang che. 


Pathian chuan a Thu ṭhatna chu tem satliah ngawt turin a duh lo che a. A chena chen turin a duh che! I nun kha thlak danglam turin a duh che – chu chu he rahbi panga hmang hian a inṭan thin. 


Ngaihtuah zui atan. 


Engtiangin nge Pathian Thua chawm len nun chu a danglam bik niin i lo hmuh ve? 


Pathianin a thil zirtir che chu i ziak chhuak em? Pathian chuan eng thil nge tun hnaiah a zirtir che? I la ziak chhuak lo a nih chuan, tunah khan ziak nghal rawh tichuan i theihnghilh lo vang. 


Eng thlarau indona nge vawiin hian i hmachhawn? Engtin nge Pathian Thu chu indona muala chakna atan vawiin hian i hman? 


[*Lettu:* Peka]

Tuesday, June 27, 2023

BIBLE HRILHFIAH DAN RINTLAK KAWNG RUK

 _Ni 40 chhung Pathian Thuah_ 

*BIBLE HRILHFIAH DAN RINTLAK KAWNG RUK*

— Rick Warren 

— June 27, 2023


“Pathian thute chu Pathian Thlarau vek lo chuan tuman an hre lo.” 1 Korinth 2:11

Bible hrilhfiah dan dik leh dik lo a awm a. Hrilhfiahna thenkhat chuan hrilhfiahna dik lo a thlen thin. Mahse hrilhfiahna thenkhat chuan kawng dikah a hruai dawn che a ni. 

Bible hrilhfiah dan rintlak kawng rukte chu hengte hi a ni:

*Bible hrilhfiah turin Rinna leh Thlarau Thianghlim i mamawh.* Bible hi ringlo mite tan chuan engmah a ni lo. Ringtute tana Pathian hmangaihna lehkhathawn a ni a. Bible hi thlarau mite hriatthiam chi thlarau lam lehkhabu a ni. Bible-in 1 Korinth 2:11 ah chuan, “Pathian thute chu Pathian Thlarau vek lo chuan tuman an hre lo,” a ti.

*Bible vek hi Bible hrilhfiahtu tha ber a ni.* Bible-in Bible vek a hrilhfiah a ni. Hemi hi hmang thin la, Bible leh Bible hi entawn thin ang che. Bible leh Bible entawn hian, Pathianin a Thu hmanga thu sawi a tum chu i hrethiam thei ang. 

*Thuthlung Hlui i chhiarin Thuthlung Thar rilrua dah chungin chhiar la, Thuthlung Thar i chhiarin Thuthlung Hlui i rilruin vawng bawk rawh.* Thuthlung Thar hi Thuthlung Hluiah thuhrukin a awm a. Thuthlung Hlui hi Thuthlung Tharah hailanin a awm a ni.

*Bible Thu chiang lo lai chu a chiang zawk behchhanin hrilhfiah thin rawh.* Bible-ah thu chiang lo lai deuh nia i hriat chu Pathianin a sawi tum chiang takin hriat tum rawh. Entirnan, Baptisma chungchanga chiang lo deuh lai chu, chhandamna leh baptisma chungchanga Bible Thu chiang taka behchhanin hrilhfiah thin rawh.

*Thurin hi thil thleng behchhanin siam tum suh.* Bible-a thil thleng lachhuakin a awmzia hriat tum la: chu chu zirchhuah tum rawh. Chumi hmang chuan thurin innghahna neih tum suh. Marka 1 ah, Isua chu zing takah tho vin, fianrial tawngtai neiin a kalchhuak a, chutiang chuan i ti ve kher tur tihna a ni lo. Thurin chungchang i zir a nih chuan, thurin chungchang inziakna la chhuak la, chung hmang chuan zirchhuah tum rawh.  

*I tawnhriat behchhanin Bible hrilhfiah suh.* Bible zirnain a tum chu i ngaihdan leh tawnhriatte Bible-a nemnghehna zawn hi a ni lo va. Ngaihdan te, rilru puthmang te hi chu a daw thei a. Chu ai chuan, Pathian thudik zawnchhuah tum la, chu chu hmang fo rawh. Rilru inhawng takin Bible zir la, Pathian duhzawng eng nge ni hriat tum rawh.

Pathianin Bible i zirin chiang lo ruaia kalsan che a duh lo va. Khang kan zir tak te kha hmang tangkai la, Pathian rilru pu chungin Bible i chhiar thei tawh ang.

Ngaihtuah zui atan. 

* He thu awmzia hi eng nge i ngaihdan: “Thuthlung Thar hi Thuthlung Hluiah thuhrukin a awm”?

* Thalrau Thianghlimin hna a thawh theih nan i inhawng em? Bible i hrilhfiah dawnin Thlarau Thianghlimin a puih theihna tur chein rilru inhawng takin i awm em? 

*Bible hrilhfiah dan kawng ruk zingah hian eng hi nge pawimawh ber nia i hriat? Eng vang nge? 

*[Lettu: Sangpuia]*

Monday, June 26, 2023

A TAKA BIBLE KAN NUNPUINA TURA ZAWHNA PATHUMTE

 _Ni 40 Chhung Pathian Thuah_


- Rick Warren 

- June 26, 2023



_"LALPA chuan hâlral thilhlan inthâwina aiin LALPA thu âwih chu a lâwm zâwk dâwn lo vem ni?  Ngai teh, inthâwina aiin thuâwihna a ṭha zâwk a, Berâmpa thâu aiin a thu zawm a ṭha zâwk a ni."_ (1 Samuel 15:22)


Kristian anga i lo ṭhanlen hian Pathian thu i nunpui nghal a ngai a. Pathian thu chhiar ringawt a tawk lo. Mahse i nunin a taka Pathian thu nunpui i tum ngai lo a nih chuan i beidawnna/lungngaihna i tawng fo mai thei. Engtinnge i tih ang?


Vawiinah hian Bible i chhiar apianga i nun nena i hmehbel theih dan tura zawhna i zawh theih pathum hrilh che ka duh. Hengte hi an ni:


*1. Ziak a nih hunlai khan he Pathian thu hian engnge sawi a tum?*

*2. Pathian thu sawi phenah hian engnge thutak ral thei lo chu?*

*3. Engtinnge tunah hian ka nunah hna a thawh?*


Heng zawhna pathumte hi "a taka thlunzawmtu lei" tiin ka sawi. Bible khawvel leh hringmi khawvel nun kan thlun zawm a ni.


Paulan 1 Korinth 8-naa milem pathian hnena hlan tawh ei chungchang a sawi hmang hian he lei hi i han dawh ṭan teh ang. A hmasa berah chuan, 1 Korinth 8:1-13 hi han chhiar teh. Tichuan khing a taka thlunzawmna zawhnate khi engtinnge chhan anih lo thlir zel rawh.


*Ziah anih lai khan helai Pathian thu hian engnge sawi a tum le?* Korinth khuaa kohhranho zingah khan milem pathian engah maha ngai lo leh chung pathian hmaa thilhlante chuan thiltihtheihna an nei lo tih hria an awm a. Chung mite chuan zalen takin an lo ei ṭhin a ni- mite  engtinnge an ngaih ang tih reng ngaihtuah lovin. Mahse chung mite thiltih ngai thei miah lotu ringtute an awm ve leh bawk. Paulan ringtu puitling tawhte kha Kristaa an zalenna kha an unaute tihlung nih loh nana hmang lo turin a hrilh a ni.


*Pathian thusawi phena tawp chin nei lo thutak chu engnge?* Kristaa i zalenna kha midangte hliam nan hmang suh. Zalenna chu hmangaihna nen a ni tur a ni.


*Ka tan engtinnge a thawh ve ang le?* I chenna hmun velah khan pathiam lim hnena ei tur pek a lar lem lo mai thei. Anih chuan he lai thu hi a ṭangkai ta lo tihna em ni? Ni lo ve! He thu tawp chin nei lo thutak hi han thlir teh le. Heti hian a takin kan nunpui thei ang: kan kiang  vela mite kan ngaihsak tur a  ni, chu chu hmangaihna kan lantir dan a ni. Mahni han inzawt teh, "Lalpa, mahni hmasial vang emaw, chapo vang emaw mite dinhmun hriatthiam loh vang emaw a mite rinna a nghin phahna a awm em? Zalenna ka hriatthiamna avang hian ka chapo em, emaw midangte hmangaihnain ka phuar khawm em?"


Nitin Pathian thu i chhiarin heng zawhna pathumte hi a takin hmang ṭhin rawh. Hun a kal zel anga, chu Pathian thu i chhiarte aṭanga Pathianin zirtir che a duh chu a chiang telh telh a ni tih i hmu ang.


Ngaihtuah zui atan.


Bible-a thawnthu i hriat lar em em mai pakhat kha han ngaihtuah teh. A thawnthu kha han chhiar nawn leh la, khing zawhna pathumte khi han zawt teh. Kha thawnthuah khan thudik dang emaw a taka nunpui tur thil dang emaw zir chhuah tur engnge i hmuh belh?


Bible thutakte hi engtik lai pawha hman theih, a thu kente pawh vawiin atan pawha la hman reng theih niin i ring em? Eng angin nge Bible hi i nunkawng hruaitu anih?


I thiltihah engtinnge chiang zawkin Bible i rinna i lantir ang?


[Lettu: Mapuia Fanai]

Sunday, June 25, 2023

BIBLE HI I HRIATNA HNAR RINGAWT NI LOVIN I NUN TIDANGLAMTU NI RAWH SE

 _Ni 40 Chhung Pathian Thuah_

- Rick Warren 

- June 25, 2023



_"Chutichuan, mi tin heng ka thu hi hriaa zawm apiang chu, mi fing lungpui chunga in satu nen tehkhin tur a ni."_ (Matthaia 7:24)


Bible zir hi thil hlauhawm tak a ni thei tih i hria em? Bible zirna hian chhiatna nasa tak a thlen thei asin!


Thil mak tak a ni tiraw, ka hria alawm. Mahse Pathianin Bible hi chhiar mai ringawt atan ni lovin, a taka nun chhuahpui turin min duh a ni. Chuvang chuan Pathian thu chhiar reng si a i nunpui loh chuan i nun innghahna a nghing ang. 


Tlang chunga thu a sawi khan a thuchah sawi tawp lamah Isuan heti hian a sawi, _"Chutichuan, mi tin heng ka thu hi hriaa zawm apiang chu, mi fing lungpui chunga in satu nen tehkhin tur a ni."_ (Matthaia 7:24). Chu mifing in sak chu thlipui na tak karah pawh a ding chang tlat a ni.


Mahse midang chanchin heti hian Isuan a sawi ve thung, _"Tin, mi tin, heng ka thu hi hriaa zawm lo apiang chu, mi a tiauvut chung maia in satu nen tehkhin tur a ni."_ (Matthaia 6:26). A thawnthu chu in hre vek tawhin ka ring a: Mi â pa in sak kha chu thlipuiin a nuai chhe vek anih kha.


Bible hi thil ka hriatna tur atan ringawt ni lovin kan nun tidanglamtu atana Pathianin min pek a ni. A taka i nunpui chuan i nun innghahna rintlak tak i din tihna a ni.


I nuna Pathian thu i nunpui a ṭulzia chhan dang pathumte chu:


*1. I nuna thutak i nunpui loh chuan hriatna hian chapona min pe ṭhin.* 1 Kor. 8:1-ah chuan heti hian kan hmu, _"Hriatna zawngin mi a uantir ṭhin a, hmangaihna erawh chuan mi a siamṭha ṭhin."_ Kristiante hi mi thinram ber, sual ber, uikawm ber, khirh ber leh mi lo teh zung zung ṭhin kan ni thei, Pathian thu kan nunpui loh chuan. A chhan chu hriatna ringawt hian chapona a thlen avangin.  Mahse i hriatna i nunpui kha Pathianin a duh a ni.


*2. Hriatna chuan a taka tih a phut.* Jakoba 1:22-ah chuan, _"Nimahsela, thu ngaithlatute mai ni lovin zawmtute lo ni zawk rawh u, chutilochu mahni inbum in lo ni dah ang e."_ Miin a hriata chu a thiltihah a lan chhuahtir tur a ni. Bible kan zir laia kan lo ziah ve satliahna khan thlarauah ṭhan lenna min pe dawn lo. Pathian a thupekte zawm turin a duh che a ni - duhthlan theih pawh a  ni lo.


*3. Hriatna chuan mawhphurhna a tipung.* Bible chuan, _"Chutichuan, tupawh thil ṭha tih tur hriaa ti si lo chu a tan sual a ni."_ (Jakoba 4:17). Bible i zir hunin Pathianin i nuna hmasawn i ngaihna laite a hrilh ang che. Chu chu a hmuhtir chinah che chuan i chungah mawhphurhna a dah nghal ang. Bible hriatna a thuk poh leh mawhphurhna zawm tur a tam  a ni..


Pathian zira i nunpui mek lai hian thlipui na tak pawhin a tihchhiat theih loh tur a din tihna a ni.


Ngaihtuah zui atan.


Biak in i chhuahsan ve leh emaw Bible i zirna lehkhabu kha i fianrial hun i hm an zawh ve leh engnge i tih? Engtinnge Pathian thu i nunpui theihna tura puitu cheah i hman ang?


Darkar khat liam taa i thusawi leh thiltihte kha han ngaihtuah let teh. Pathian thuin a zirtir che angin i nung em?


A thu i zirna aṭangin engnge ti tura Pathianin a tih che, i zawm zel tur?


*I chatuan hmun tur khawiah nge?* 


A Fapa, Isua Krista hmangin Pathianin a ṭhatzia a lantir tawh. Bible chuan heti hian a ti, "_Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan."_ (Johana 3:16)


Chatuan nunna a tiam che chang turin i inpeih em? Anih chuan heti hian ṭawngṭai rawh le: "Lalpa, Isua Krista hi i Fapa a ni tih ka ring a. I hmaah ka sualte puangin i ngaihdam ka dil e. Ka sual lak bo a nih theih nan ka ai Isua a thi a, nangin i kai tho leh a ni tih ka ring e. Tun aṭang chuan Isua hi ka Lal leh Chhandamtuah ka pawm e. Min hriat la, i duhzawnga nung turin min pui ang che. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


[Lettu: Mapuia Fanai]

Saturday, June 24, 2023

FIANRIAL HUN ATAN RUAHMANNA AWLSAM

 _Ni 40 Chhung Pathian Thuah_


- Rick Warren

- June 24, 2023



"Mi taima ngaihtuahna chuan neihnunna lam chauh a pan a. Mi thatchhia erawh chuan tlakchhamna lam chauh a pan a ni." Thufingte 21:5


Fianrial hi i nuna i tih tam takte ang thova i tih thin a ni ngei ang. A nih loh vek pawhin: hlawhtling tur chuan, ruahmanna tha neih a ngai a ni. Bible chuan, "Mi taima ngaihtuahna chuan neihnunna lam chauh a pan a. Mi thatchhia erawh chuan tlakchhamna lam chauh a pan a ni" a ti.  


Fianrial i hmang ngai lo a nih chuan, awlsam taka hman thin dan tur ruahmanna tha i nei kher lo maithei a. A mawlmang thei ang ber hi ruahmanna siamah chuan a tha ber zel. Harsa taka i siam chuan, i petek daih thei a ni. Fianrial hun tha tak hmang tur chuan Bible leh Notebook chauh hi i mamawh chu a ni mai.


A nih chuan nitin a fianrial hman chu eng nge a an le?


*LALPA hmaah chuan ngawi la.* Bible chuan 'Lalpa nghak' tiin a sawi a. Ngawi renga ṭhuin bul i tan dawn a ni.


*Mawlmang takin tawngtai la.* Tawngtainain bul tan la. Pathian hnenah rilru fim tak te, rilru pek theihna leh a thu chhiar hriatthiamnate dil rawh. 


*Bible chang chu muangchangin chhiar la.* Hetah hian Pathian nena in inbiakna chu a intan chho dawn a ni. A thu hmangin a bia che anga, tawngtaina hmangin i lo chhang let ang. Muangchangin chhiar la. Chhiar teuh emaw, rang taka chhiar kha tum lem suh. I chhiar muan poh leh i thu chhiar kha i ngaihtuah nasa dawn a ni.


*Pathian thu chu ngaihtuah la.* Pathianin thu a sawi thialsawm turin hun hmang rawh. Bawngin luang a thial ang mai hian thial la. I rilrua ngaihtuah chungin han buan tak tak la. Pathian thu ngaihtuah dan pawh kawng hrang hrang a awm a ni.


*I hmuhte chu ziakchhuak la.* Pathianin a thu hmanga a biak che chuan, a biakna che ngai pawimawhin ziak thlap thin rawh. Pathianin thu a hrilh che hre reng turin a pui ang che.


*Tawngtai leh la.* Rilru pe zel la. A thu hmanga a hriattirna cheah lawmthu sawi rawh. A biakna che chungchangah Pathian chu bia la. I ngaihdan te pawh chumi chungchangah te chuan han hrilh ve rawh. I rilrua awm thil dang engpawh i sawipui thei ang.


Fianrial hun hman theih dan hi kawng khat chauh a awm lova. Mahse hetiang deuha ruahmanna nei hian bul han tan teh. Reiloteah Thufingte 21 in thu a tiamte hi i tawng mai anga, i tih hram hramna nun chuan nun tam neiin a siam ang che.


Ngaihtuah zui atan...


Pathian nen inpawlna thuk takah fianrial hi i ngai ṭhin em? Eng vang nge?


Pathian hmaah ngawi renga i awm theihna turin tibuaitu engte nge i dah bo ngai?


Eng vangin nge a changa Bible muangchanga han chhiar a, han ngaihtuah zui vang vang hi a harsat em em thin?


(Lettu: Msa)

Friday, June 23, 2023

I FIANRIAL HUN CHU A NINAWM KHER A NGAI LO

 _Ni 40 Chhung Pathian Thuah_

By Rick Warren

— June 23, 2023



“Thil tih awm si lova thu ngaihthlâk ngawt tâwka ngaiin mahni inbum hek suh u.” [Jakoba 1: 22] 


Thil eng pawh a thothang ṭhat chuan a chak a, thil thar chhuah a awlsam bik. Nunna thahrui chak tak pai ang maiin a hmaa thil awm a su danglam thei hial a. Bible in zirhona chu awmze nei taka tih theih niin i lo hre ve tawh em? 


Mahse chu chu engtin nge a lo thlen theih? Engtin nge “fianrial hun” kan sawite chu thiltihtheihna nasa tak neiin kan buatsaih theih ang? 


Thil eng pawh a insawrbing ang zelin a thawk na thei ṭhin. In Bible zir hun chhung chu hlawk zawka hman a nih dawn chuan thlur bing bik i neih a ngai. He thu hi ṭawngkam danga kan sawi dawn a nih chuan Bible i chhiar chang chuan Pathianin ti tura a tih che chu chip chiar taka tih kha a tha ka ti. Pathian chuan i nitin nuna i hman tur a tih chu hman ngei i tum dawn nia. 

  

Heng hi nitin nuna hmang a, ṭhanlenpui dan dik a awm: Bible i chhiar zawh hun chuan a hman chhuahna tur thuhlawm pakhat ziak chhuak la. Tichuan, a sawitu ni satliah mai lovin a "titu" ni turin a ṭanpui dawn che nia. 


Entirna ṭha tak chuan nihna pali a nei thei ang. 


1. *Mimal thuhla a ni.* Dilna lehkha eng pawh mi dang i lak kep thiang lo. Khawvelin a thil mamawh lam chu a ni ber lova, i nupui/pasal duhzawng emaw i fate duhzawng pawh chu eng ual a ni chuang lo.  Nangmahin i tih a ngai a ni. 


2. *A hman chhuah mai theih.* I thurawn chu a tak taka nangmah ngei pawhin i tih theih ni se. Thil tlanglawna kalpui chuan hlawkna a nei tam lo vang. Dik tak chuan, thil tlanglawn deuha thawh chuan rah a chhuah tam thei lo va, ṭanpui ngai deuhin a chhuah hial thei che I kal dawn tak tak chuan. 


3. *A tih theih.* I thil tih tumte chu i tlingtla ngei a nih loh chuan i hnual hle ang. I tumna chuan ni khatah vawi 5 ṭawngtai tur a tih pawhin i ti chuang kher lo vang. Thil theih a ni lo! Mahse a lehlamah chuan, i thil tum chuan ni khatah ṭawngtaina vawi khat tal hman tur a tih che chuan ni khat a liam lo vang. Chu chu thil awmze nei a ni a. Chu chu a tak taka duhthala tih theih chu a ni. 


4. *Finfiah theih a ni.* Tawngkam danga sawi chuan i thil tih tumte thlawhtling turin hun bi thliah i siam a ngai. I thil tumte tihlawhtling tura hunbi thliah i siam loh chu duhthusam mai a ni ang. 


Bible i chhiar lai zawng zawng aṭang khan i nuna i lakluh tur i lo dawng teuh tawh nghe nghe ang.  Chutianga a lo thlen chang chuan, Bible-in Jakoba 1: 22 chuan, “Thil tih awm si lova thu ngaihthlâk ngawt tâwka ngaiin mahni inbum hek suh u,” tiin a sawi. 


Ngaihtuah zui atan. 


He fianrial thuzir i zir zawh hnu chuan engtiang takin nge i inthlak danglam ang? 


Eng thu pakhat nge vawiin ni hian nun chhuahpui i tum? 


Pathian Thuin ti tura a tih chu tih chakna i nei em? Chu chu i nunah a hmuh theih em? 


[ *Lettu:* Peka]

Thursday, June 22, 2023

ZAWHNA PATHIAN THU ṬHIAL TIRTU TUR CHE

 Ni 40 Chhung Pathian Thuah

By Rick Warren

June 22, 2023



“Thu ngaithlatute mai ni lovin, zawmtute lo ni zawk rawh u; chuti lo chu, mahni inbum in lo ni dah ang e.” [Jakoba 1: 22] 


Ringtu i nihna anga fianrial hun i hman chang chuan Pathian Thu i ngaihtuah ṭhin ang. Bawngin a chaw a thial nawn ang chiah chuan Pathian Thu pawh ṭhial la – ṭhial nawn, ṭhial nawn, ṭhial nawn ang che.


Pathian thu “ṭhial” tur chuan tih dan danglam tak pakhat ka hrilh ang che, SPACEPETS tih lam pum a ni. A thumal tinte chuan Pathian Thua zawhna i neih chu chhan a tum ang. 


1. *Sual puan tur a awm em?* Thil siam ṭhat ngai Pathian Thu chuan hriattir che a nei em? 


2. *Thutiam hauh ngai a awm em?* I Bible thu chhiar chu mitin huapzo a ni em tih inzawt rawh. Tih tur a sawi zawng zawngte chu I hlen tawh em? Thutiam zawng zawngte chuan finfiahna an nei a ni. 


3. *Rilru dik lo siamṭhat ngai a awm em?* Thil eng emaw danglam taka ngaihtuahna hman ngai a awm em?   Rilru kha, lunngaihna, inthiamlohna, hlauhna, khakna, chapona, dawngdahna leh mahni hmasialna chinfel ngai i nei em? 


4. *Thuawih tura thupek a awm em?* Thupek zawm tur a awm em, hun harsa tak karah chuan? 


5. *Zui tur nun ṭha a awm em?* Zui tlak nun ṭha a awm nge, kalsan ngai thil ṭha lo a awm?


6. *Ṭawngṭaina hlan ngai a awm em?* Bible ah chuan Paula, Davida, Solomona, Ruthi, Estheri, Elijah leh Isaia te chu, midang tak te nen an ṭawngṭai tih kan hmu. An ṭawngṭaina chu chhan a ni dawn tih in hria Bible-a a chuan avang chuan. 


7. *In tihdik loh pumpelh tur a awm em?* Mite thil tih dikloh zawng zawng chu kan tihnawn kher a ngai lo ang. Bible-a mihringte tihsual ang chu eng nge i tih ve loh ang?

 

8. *THUTAK vawn tur chu a awm em?* Vawi eng emaw zat, Bibleah chuan kan tih ve theih hauh loh thil kan lo chhiar tawh ṭhin ang. Bible-in Pathian chungchang Pa Pathian, Isua leh Thlarau Thianghlim, vanram leh hremhmun, hun kal tawh leh lo la awm tur a sawina te chu kan pawm tawp mai a ngai a ni.  


9. *Pathian chu kan fakna chhan tur chu a awm em?* Bible thuah chuan eng emaw i lawmna tur thu i hmu ziah thei ang a, Pathianin a humna che leh a chhandamna che pawh a ni thei e. 


He zawhna chi hrang hrang tarlan takte khian i thil lo tih tawh ṭhin nen inzawmna an nei ang a. Heng zawhna chi hrang hrangte hi Bible nena i dah kawp tur lehkhapuanah chuan ziak chhuak ang che. Tichuan, fianrial hun I hman chang apiangin Jakoba 1: 22 zui thiam turin an pui ang che: “Thu ngaithlatute mai ni lovin, zawmtute lo ni zawk rawh u; chuti lo chu, mahni inbum in lo ni dah ang e.” 


Ngaihtuah zui atan. 


Heng tih dante hi i chhiar zawh hnu chuan, nimin lama fianrial huna i Bible chhiar tawhte chu chhiar nawn leh la, chu thuah chuan vawiin a i zir hi hmang chhuak nghal ang che. Eng thil thar nge i hmuh chhuah?  


Engtik lai aṭang khan nge Pathian thu ngaihthlak satliah leh nun chhuahpui chu a danglamna i lo hriat ve? 


Vawiin hian Pathian thutiam eng ber nge i rinchhan mek? 


*[Lettu:* Peka]

Wednesday, June 21, 2023

BIBLE ZIRDAN TANGKAI KAWNG THUM

 _Ni 40 chhung Pathian Thuah_ 

— Rick Warren 

— June 21, 2023


“Mihring hi chhang chauhvin an nung lo vang a, Pathian kaa thu tin chhuakin an nung zawk ang.” Matthaia 4:4

Pathian Thu chu i nunah hmang chhuak zela i nun thlak danglam turin Pathianin a duh che a. Pathian Thuin a thlak danglam theihna turin, a Thu i zir angai a ni. Nimin khan Bible zir nana pawimawh deuh pahnih kan zir a, khawi hmunah pawh tih theih a ni. 

*1. Zawhna diktak zawt rawh.*

*2. I hmuh dan ziak rawh.* 

Vawiinah chuan kawng thum kan zir belh ang.

*3. Pathian Thu nunpui.* Zawhna i zawt a, i hmuh dan i ziak leh a. Bible i zirna chu “eng nge?” tih laiah i awm mek tihna a ni. Bible chu i nunpui a nih chuan, “eng nge?” atangin “engtin nge?” ah i lut chiah tihna a ni. Kawng danga kan sawi chuan, “He Bible thu hian ka nun engtin nge a tih danglam ang?”

Nuna hmanchhuah hi Bible zirna in a tum ber a ni. Diktak chuan, nuna i seng luh chauh hi Bible ah chuan i pawm tihna a ni. Mi dang hnena Krista chanchin thehdarh hi i pawm zawng a ni em? Thilpek pek te hi i pawm em? Anih chuan, chung chu i ti thin em? I ti ngailo a nih chuan, Bible zirtirna chu i pawmlo tihna a ni ang. Bible chungchanga kan hrasatna tlangpui chu kan hriatthiam lo vah ni lo vin, kan hriatthiam reng si, kan nunpui loh hi a ni zawk.

*4. Awmzenei takin Bible zir rawh.* “Dip-and-skip method” an sawi hi i hre ve tawh em? Bible i keu phawka i zir duh lai i kawk chat a. Ni dangah bu dang daih a mi i zir leh a. Hetiang anga i zir chuan i hlawkpui lem lo vang. Awmzenei takin zir tum zawk rawh. A chang indawtin, a bu indawtin, a thupui indawt zelin zir thin ang che. 

*5. Bible chu chhiar nawn zel rawh.* Hei hian i nun a thlak danglam ang. Bible zir chu a ngai zir hnu hun reilotea a ngai zir leh te hi a nuam em em a ni. I chhiar tam poh leh hlawkna i tel tam dawn a ni.

Vawiin aia Bible zirna hun remchang dang a awm chuang lo. Bible zirtur i thlan dan chu eng pawh nise, kan zirtak kawng nga te kha zawm zel la. I chhiar apiangah hlawkna i chhar zel ang. 

Ngaihtuah zui atan. 

* Bible i chhiara nuna i sengluh si loh englai nge awm? Pathianin i nunah senglut turin engtin nge a duh che i rin?

* Bible i chhiar hian i duh duh lai i chhiar thin a nih chuan, engtin nge awmzenei takin i zir ang? 

*Kawppui rintlak i nei em? I neih loh chuan Bible zirnaa pui thei tur che tu nge i biak rawn ang? 

*[Lettu: Sangpuia]*

Tuesday, June 20, 2023

BIBLE ZIRDAN TANGKAI KAWNG HNIH

 _Ni 40 chhung Pathian Thuah_

— Rick Warren 

— June 20, 2023


“I dan thu atanga thilmak ka hmuh theih nan, ka mitte hi mi tihvarsak ang che.” Sam 119:18

Pathian Thu i zir chu i nunah i sengluh zel chuan i nun a ti danglam ang. Mahse chu chu Pathian Thu zir chakna thinlung atanga i tan a ngai thung a ni.

Bible chuan, “I dan thu atanga thilmak ka hmuh theih nan, ka mitte hi mi tihvarsak ang che,” a ti. Sam 119:18

Pathian chuan thil tam tak hmuh tir che a duh a, mahse a Thu chu mit meng chunga i en a ngai thung a ni. 

A nih chuan engtin nge Pathian Thu chu i zir ang? Tangkai taka Bible zir tur chuan kawng nga a awm a, vawiin hian kawng hnih kan en ang a, naktuk lamah kawng thum kan en dawn a ni.

*1. Zawhna diktak zawt rawh.* Bible zirna chu Bible thu chungchanga zawhna tha tak zawh atangin a intan a ni. Zawhna ah hian zawh chin tawk a awm chuang lo va, a thu ah hian finna leh hriatna chhuisen loh a awm vang a ni. I laih thuk poh leh rangkachak chu i laichhuak tam ting mai dawn a ni.

Zawhna i siam atang chuan i Bible zir chu i thlir ngai loh atangin lam atangin i thlir thiam ang. Pathian Thu zir tura i inbuatsaih apiangin thu dik i haichhuak zel ang.

*2. I hmuh dan ziak rawh.* Bible i zir dawn apiangin pen leh lehkhapuan tello vin zir suh.  Zawhna i siam atang chuan chhanna i neih chuan ziak zel rawh. Ziaka i dah hmain Bible chu chhiar phawt la, amaherawh chu Bible chu zir tak tak tur chuan, i zirchhuah chu ziakchhuak ve zel rawh.

Navigators ministry dintu Dawson Trotman chuan, “Kan thil ngaihtuahte hi lei hmawr leh kutzungtang a kaltang chuan a lo lang chhuak zawt zawt zel,” a ti. Kawng dangin sawi ila, thil hrethiam tur chuan, i sawi chhuah emaw i ziakchhuah emaw a ngai a ni. Bible changah engmah zirchhuah i neihloh pawhin, i hmuh loh thu chu ziak tho rawh. I thil ziak atang chuan ngaihdan thar i nei thiam ang.

Bible in i nun ti danglam se tih i duh em? Zawhna tha tak tak zawt la, i zirchhuah te chu ziak zel rawh!      

Ngaihtuah zui atan. 

* Bible i zirnaa i thu zawh tur tha tak tak eng te nge? I zir leh hun atan ziak chhuak rawh le.

* Bible i chhiar hian i hmuhdan i ziakchhuak thin em? I ti ngailo a nih chuan, tunah chuan i hmuhdan ziak turin inbuatsaih rawh le.   

* Pathian Thu nitina i zirna hmun ngaihtuah la. I zir tha thei nge daltu a awm thin? Tha taka i zir theihna turin khawi hmun nge i thlan ang le? 

*[Lettu: Sangpuia]*

Monday, June 19, 2023

BIBLE ZIR DAN AWLSAM

 _Ni 40 Chhung Pathian Thuah_

- Rick Warren 

- June 19, 2023



_"Krista chanchin, a chhungril hausakna zawng zawng nen in nunna chu luah khat rawh se"_ (Kolossa 3:16, NLT)


I nun thlak danglam thei tur khawpa Bible zir tur hian a hrilhfiahna bu (commentary) emaw Bible computer lam aṭanga zirna (software) i mamawh ber lo. Thlaler hmun roah Bible chauh neia i tan laiin vawiina kan zir tur hmang hian ṭhan len dan kawng i hmu thei ang.


Niminah khan Pathian thua kan insawrbing a pawimawhzia kan zir tawh a. Pathian lawmzawnga a Thu a i insawrbing theih dan chu hei hi a ni. "A sawia sawi" tiin he Bible zir dan hi ka vuah a. Bible zir dan awlsam tak leh thlarau lam nuna chaw lak dan awlsam tak a ni.


Bible chang khat la chhuak la, chhiar nawn chhiar nawn rawh. I chhiar apiangin thumah kawh bik nei zel la. Thumal hran i thlurbing zel chuan thlir dan hrang i nei zel ang.


Kolossa 3:16 hi thlir chhin ila: _"Krista chanchin, a chhungril hausakna zawng zawng nen in nunna chu luah khat rawh se"_ (NLT)


*A hmasa berah chuan "rawh se" tih hi chhinchhiah la.* "Rawh se" tih chuan phalna a pe a. I nunah Pathian thuin hna a thawh theihna turin i inluah khahtir a ngai a ni. 


*A chang hi han chhiar nawn leh la, "chanchin" tih hi thlur bing leh la.* "Krista chanchin . . . in nunna luah khat tlat rawh se." A awmzia chu i rilruah Pathian thu i tuh a ngai tihna a ni.


*A thu laimu ber "Krista" tih hi zirchiang leh la.* Tu emaw finna lam zir mi emaw,  zirtirtu emaw, thil sawihona kaihruaitu emaw i zir chiang a ni lo. Krista thu a ni i zir ni!


*"Luah khat" tih hi han zir chiang leh la.* Pathian thu nilenga i nun kaihruaitu tur hi en thuak ringawt suh. I nun Krista thuin a luah khat theihna tur chuan zung i kaihtir a ngai.


*"In" tih hi zir chiang leh rawh.* Pathian thu hi pastor-te emaw Pathian thu zir mekte emaw tan chauh a ni lo; i tana Pathian thu a ni! Bible hi ringtu zawng zawngte tan a ni.


*A tawp berah chuan "hausakna zawng zawng nen" tih hi en leh la. Pathianin a thu hi i nuna thil ho tê mai atan chauh a duh lo. I nunah mawina ropui tak thlentu atan a duh a ni.


A thumal te te thlirin thu hausa tak tak a nihzia i hmu thiam tawh em? Pathian thu zirna in emaw lehkhabu ropui tak tak emaw i rawn kher a ngai lo. Tupawh niin khawiah pawh awm la, heti hian i ti ve thei a ni!


Ngaihtuah zui atan.


I nunah engtinnge Pathian thu hausakzia leh a khawngaihna hi a lan chhuah ang?


Engvangin Pathian zir dan dang hi han tihchhin hrim hrim a ṭulna?


Bible chang eng emaw thlang chhuak la, "a sawi a sawi" zirna hmang hian han zir ve chhin teh. U zir chhuah ang ang te chu ziak chhuak la.


[Lettu: Mapuia Fanai]

Sunday, June 18, 2023

ENGTINNGE BAWNGIN CHÎK TAKA NGAIHTUAH DAN MIN ZIRTIR?

 _Ni 40 Chhung Pathian Thuah_

- Rick Warren

- June 18, 2023



_"Hê Dân Bu hian i kâ a chhuahsan tûr a ni lo va, a thu inziak zawng zawng i zawm theih nân achhûn azânin ngaihtuah berah neih ang che. Tichuan i kawng zawh chu a hmuingîlin i lo hlawhtling dâwn nia."_ (Joshua 1:8)


Thusawi ropui tak tak leh Bible zirtirna ril tak tak ka hriat hian engtin nge zirtirtu chuan chung Pathian thu rangkachak hlawm dik tak mai te chu a hriat tih ka ngaihtuah ṭhin a. Chuvang chuan a ni kum 40 liamtaah khan ka lehkhabu hmasa ber chu ka ziah ni; keimah ang bawk midangte ṭanpui turin. Rick Warren-a Bible zirna kalphung hian Bible zirdan tur kalphung 12 min hrilh a. Chungte chu: bung te tea zir te, thupui zirchianna te, leh chang tin zirchian te.


Ka duh ber chu Pathian pawla Bible zir hi a ni. Pathian pawla Bible zir hi thumal pakhat a kan sawi dawn chuan 'chik taka ngaihtuah' (meditate) a ni. Mi tam tak tan chuan chik taka ngaihtuah hi thumal ṭha lo a ni thei. Khawchhak lam mite tih dan emaw ṭhang thar sakhuate (New Age) nen an sawi zawm ṭhin a ni. Kristian thenkhatten 'chik taka ngaihtuah' an tih chuan an mitthlaah bawp khawkherh a ṭhu a mahni inngaihtuah reuh reuh lai an hmu ṭhin.


Chu chu khawchhak lam emaw Buddhist te tihdan a lo ni maithei; mahse, Kristiante tihdan a ni ve lo. New International Version Bible-ah hian 'chik taka ngaihtuah' tih hi ringtute Pathian pawlna nun sawifiah nan vawi 29 lai hman a ni. Pathian chuan chik taka ngaihtuah turin a duh che.


Pathian thu chik taka i ngaihtuah chuan malsawm tur chein thu a tiam a ni. Joshua 1:8 chuan, _"Hê Dân Bu hian i kâ a chhuahsan tûr a ni lo va, a thu inziak zawng zawng i zawm theih nân achhûn azânin ngaihtuah berah neih ang che. Tichuan i kawng zawh chu a hmuingîlin i lo hlawhtling dâwn nia"_ a ti.


Tichuan, engtin nge i tih ang le? 'Chik taka ngaihtuah' tih milpui chu 'ngaihtuah mûk/ṭhial nawn' tih a ni. Lo neitu i nih loh chuan he thumal kawh tum hi i hre lo maithei. Bawngin a chaw a ṭhial nawn a ṭhial nawn ang hi a ni. Vawi tam tak a ṭhial nawn ṭhin.


Hetiang hian a thawk a ni: bawng chuan hnim a ei a, a ṭhial a, tichuan, a lem nghal mai a. A pumpui chhungah chuan a awm ta a, chemical leh acid te a zu chiah vek a. Tichuan, eitur thar angin a irh chhuak leh a hnim dangte nen a ei leh ṭhin. Chutiang chuan vawi tam tak a ti ṭhin a ni. Hnima chaw ṭha awm zawng zawng kha a dawng kim vek a ni.


Bible chik taka ngaihtuah pawh hi chutiang deuh chu a ni. Pathian chuan a thu ṭha zawng zawng dawng turin a duh che. Ṭhial a, lem a, ṭhial nawn leh ṭhin turin a duh che.


Vawiinah hian han ti ve chhin teh. Pathian thu chhiar ringawt suh, zir chiang la;  beng sikin ngaihtuah rawh.


Ngaihtuah zui atan.


Pathian nena hun hmang turin hmun, hun leh tihdan i nei em? Engtin nge chik taka ngaihtuahna chuan i Pathian pawlnaah hlawkna a pek belh che?


Joshua 1:8 a kan hmuh 'hmuinhilna' leh 'hlawhltinna' hian nangmahah eng awmzia nge a neih? Pathian hian hlawhtlinna hi eng nen nge a tehkhin ni a i hriat?


Vawiinah hian eng bung leh chang nge ngun taka i ngaihtuah dawn?


[Lettu: Mapuia Fanai]

Saturday, June 17, 2023

PATHIAN CHUAN I RINTE CHU I NUNGCHANGAH CHANTIR A DUH

 Ni 40 Chhung Pathian Thuah

Rick Warren

17 June, 2023



"Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni; Pathian mi chu hna tha tinreng thawk tura kim taka inthuamin a famkim theih nan" 2 Timothea 3:16-17.


Tumkhat chu Bible lehlin tha ber min zawt a. Ka chhanna chu: i nunah i lehlin khan a ni mai tiin. Chu chu Bible zir kan tih hi a ni mai. I nunah Bible hi i letling a nih loh chuan, Pathianin a duh angin Bible kha i zir lo tihna a ni. 


Pathian hian kan nun hi min tidanglam turin Bible min pe a. Thinlung zau zawk min pe a, hriatna zau zawk chauh ni lovin. Jakoba buah chuan, "Nimahsela, thu ngaithlatute mai ni lovin zawmtute lo ni zawk rawh u, chutilochu mahni inbum in lo ni dah ang e" (Jak 1:22) a ti a.


Kawng dang zawng chuan, Pathian chuan i thil rinte kha i nungchangah chantir turin a duh che a ni.


Pathian hian Biblea a tumte hi 2 Timothea 3:16-17ah chiang takin a sawi a: "Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni; Pathian mi chu hna tha tinreng thawk tura kim taka inthuamin a famkim theih nan" a ti a. 


Bible in a tum ber chu kan nuna thil diklo tilang tur emaw kan nun dan kawhhmuh tur chauhin emaw a ni lova. Pathian hian a thu hi kan nun thlak vek turin min pe a ni. 


Bible chu kawng hrang hrangin a inhrilhfiah a. Entirna atan, tuboh, khandaih leh chem ang tein a insawi a. Heng zawng zawngte hi danglamna thlengna hmanrua vek an ni a. Pathian hian Bibleah a tum ber chu i nun thlak danglam vek a ni.


Bible chuan Pathian thutak chu bawnghnute angte, tui angte, chhang angte, sa angten a sawi a. Heng zawng zawngte hian eng nge in anna an neih? Chaw i ei that loh emaw tui i in that loh chuan, i thi mai ang. Chutiang bawkin, Bible tel lovin i nung thei hauh lo a ni. Kan nunna atan Bible a tul a, a chhan chu nunna min pek vang a ni.


Bible hi 'Pathian Thu' tiin kan ko thin a. Mahse Bible pawh hian Isua hi Pathian Thu tiin a sawi tho a. Johana 1:14 ah chuan, "Thu chu tisaah a lo chang a, kan zingah a awm ta a, (Pa fa mal neih ropui angin a ropuizia kan hmu,) khawngaih leh thutakin a khat" a ti a. Pathian chuan a Thu Nung, Isua, i rinna bultantu leh tawpna atan a pe che a. Tin, a Thu ziakin, Bible, i rinna i nunpui theih nan a pe bawk che a. 


Vawiin hian i nun hi Bible hian a tidanglam thei a. Mahse i keu a, i chhiar ve a ngai a ni.


Ngaihtuah zui atan...


Mitin hian Bible an chhiar thei a, mahse an chhiar tak tak hunah an nun a danglam ang. Eng nge a danglamna i hria em?


I nun atan Pathian thu hi tulin i hria em? Engvangin nge?


Isua chu Pathian Thu a ni a. Bible zir leh Isua nena inpawhna hian eng nge inzawmna a neih?


(*Lettu:* Msa)

Friday, June 16, 2023

MUMAL ZAWKA BIBLE ZIRNA NEIH DAN KAWNG LI

 Ni 40 Chhung Pathian Thuah

By Rick Warren

-June 16, 2023



“Ka thu-a in awm reng chuan ka zirtîrte in ni tak tak ang.” [Johana 8:31]


Isua zuitu i nih tak zet chuan i hun liam tawh eng emaw laiah chuan mumal taka Bible chhiar ṭhin turin thu tlukna i lo siam tawh tihna a ni ang. Kar tluana chhiar ṭhin turin thu tlukna i lo siam a ni thei. Thla eng emaw zat i lo chhiar tawh a ni mai thei. Bul ṭan dan ṭha tak chu hun tiam eng emaw chhunga Bible chhiar chu a ni ngei mai – mahse i chawlhsan thiang lo. 


Isuan hetiang hian a sawi, “Ka thu-a in awm reng chuan ka zirtîrte in ni tak tak ang.” [Johana 8:31] Isua leh a thu aṭanga zir tura intiamna chu hun rei tak daih niin a zirtir nihna pawimawh a tling. 


Thutakah chuan engtin nge i chhunzawm ang? Hun rei tak daih Bible zirna hmang chuan amah nen engtin nge in inzawm theih ang? 


 *1. Chhiar turin thutlukna siam rawh.* I inpeknaa innghat a ni. Pathian Thu chu i nuna a lailum laia a awm hun ṭha nghak suh. Vawiin aṭangin i intiamkamna chu chhiar ṭan rawh. 


 *2. Puang chhuak rawh.* I thil tih tum chu midang bulah sawi rawh. Mi rinawm nih tum la. Pathian nena in inkar a ruka siam mai chu tluksan a awlsam. 


 *3. Bei fan fan rawh.* In thutiam su danglam thei thil chu engmah insiam suh. I nuna a lailum lai luahtir turin theih tawp chhuah ang che, a bikin a thla tir lamah phei chuan. I tih theih loh ni a thlen fo a nih chuan Pathian Thua inchiah thuk a har ang.


4. *Zawmpui nei rawh.* Nangmah puibawma fuihtu che thlarauva i zawmpui nei ang che. Chu mi hnenah chuan fianriala i thil zirte chu i hrilh hre thei ang. I ṭhian hnai emaw, ṭhenawm emaw chhungkaw zinga mi an ni thei bawk. Bible chuan, “Mahni maia thawh ai chuan thawhpui neih a ṭha, hlawhtlin a awl zâwk,” tiin a sawi. [Thuhriltu 4: 9] 


Pathian nena fianrial nun chu dam chhung daih thil a ni a, hun rei lote mai atan an ni lo. Zirchianna chuan i nuna bet tur chuan i thil tih mekte chu kar ruk tal a zawn zata i tih ngai niin an sawi. Vawiin hian Pathian Thu chu i nun atan hmang rawh – i nun pumpui atan.  


Ngaihtuah zui atan. 


Pathian Thu chu i nuna a inphum ngheh lehzual theih nan eng thu tlukna nge vawiin hian i siam ngai? 


I inpekna thu chu tu bulah nge i sawi ang, tuin nge rintlakah ngai ang che? 


Nitina Pathian Thua awm i tumna lamah chuan eng buainain nge i rilru la peng nasa ber tih hriat tum rawh. Chutianga rilru la peng ṭhin thilte chu titlem turin engtin nge i chet chhuah ang? 


[ *Lettu* : Peka]

Thursday, June 15, 2023

PATHIAN THU CHUAN I THEIHNA A HAI CHHUAK ANG

 Ni 40 Chhung Pathian Thuah

By Rick Warren

— June 15, 2023



“Ka thu-a in awm reng chuan ka zirtîrte in ni tak tak ang; thutak in hria ang a, thutak chuan a zalêntîr ang che u.” [Johana 8:31-32]


Nangmah mai chuan i theihna i hai chhuak mai lo vang – nangmah Siamtu chauh chuan a thei. Pathian chauh, nangmah siamtu che chuan nangmaha theihna awm chu a hria. I nu leh pa te, i kawppui te, i ṭhiante, leh i hnathawhnaa i chunga awmte chuan a them mai bak an hriatsak lo che. 


Pathian chauhin i theihna tak tak a hria. 


Mi tam tak chu mite fakna umin an tlan a. A hun tam tak chu miten an ngaihdan turin thlirin an hmanhlel a. I ngaihtuahnaah chuan nangmah bumtu che thusawi chu a rik nawn tluk tluk chang a awm – i laka rilru dik lo an put kher loh pawhin. Anni chuan I thil tih theih loh leh thiam loh zawng chu an sawi hmuh fo ang che.  


Chu ngaihtuahna chu i rilruah i tiri nawn tluk tluk ang. Mahse dawt muhlum mai an nih kha! Nangmah dik lo taka sawitu che khan nangmaha theih tak tak awm kha a hre kher ngai lo.  


I theihna tak tak hre turin, nangmah Siamtu che i biak pawh a ngai. Amah chauh chuan i nun awmzia chu a hre thei a ni. Amah chauh chuan i theihna a hai chhuak thei bawk. Engtiangin nge a tih? 


Isua chuan Johana 8: 31-32 ah hetiangin a sawi, “Ka thu-a in awm reng chuan ka zirtîrte in ni tak tak ang; thutak in hria ang a, thutak chuan a zalêntîr ang che u,” tiin. 


Pathian thu chuan i tih tur leh nih tur zawng zawngte chu a la hai chhuak ang. Chumi kaltlang chuan a theih ni pawha i hriat ngai loh thilte chu a la kawhhmuh ang che. 


Chu chu engtin nge i tih theih ang? 


 *Pakhatna, Pathian Thu zir rawh.* I Bible i keu a, i zir tak tak hma chuan engtik lai mahin Pathian chuan i theihna a hai chhuak ngai lo vang. Ngaihtuahna satliah hmang chuan eng theihna mah i hai chhuak lo vang. Bible-in ti tura a tih che i zawm chauhin i chang thei ang. 


 *Pahnihna, Pathian Thu pawm rawh.* i nuna thuneitu chu Bible a ni tur a ni. I chhiar lai bung leh chang chu i duh lo a ni mai thei, mahse – Pathian hruaina tha ber i nun tana i duh a nih chuan – i nun dana thuneihna sang ber neitu anga i pawm a ngai. 


 *Pathumna, Pathian Thu awih rawh.* Pathian thu chu satliah deuha zirin satliah deuhin i pawm ngawt thei lo. Bible zirtirna chu a taka i tih a ngai. I Bible hriat ṭhenkhat avanga malsawmna chan ngawt chu thil theih a ni lo. 


I suangtuahna mai ai pawha ropui zawk ni tura siam i ni. Bible chuan I Korinth 2: 9 ah, “Mita la hmuh ngai loh, benga la hriat ngai loh, Mihring rilrua lût ngai lo, amah hmangaihtute tâna Pathianin a buatsaihsak chu,” tiin a sawi. 


Pathian Thu chu keu la, Pathian chauhin a ngaihtuah phak ti thei tur chuan inpeih ang che. 

 

Ngaihtuah zui atan. 


Pathian Thu chhiar kawngah chuan i taima em? Vawiin hian engtiangin nge awm i tum? 


I nuna khawi laiah khan nge Pathian malsawmna dilin i dilna i thlen? Chu chu Pathian laka i rinawmna zawn chu a ni em? 


Bahlah miah lova Bible i chhiar chang chuan engtiangin nge i lakah Pathian chu a inpuan? 


[ *Lettu* : Peka]

Tuesday, June 13, 2023

PATHIAN THU HI RINNA CHAWMTU A NI

_Ni 40 chhung Pathian Thuah_ 

*PATHIAN THU HI RINNA CHAWMTU A NI*

— Rick Warren 
— June 13, 2023


“Rinna chu hriatna avangin a lo awm thin a, tin, hriatna chu Krista thu avangin a lo awm.” Rom 10:17

Bible ah vawi tam kan hmu a, a thu kan awih chuan kan aiawhin Pathianin min thawhsak zel dawn a ni. Chung thutiamte chu ka chhiar changin inrintawkna min pe thin a ni. Pathianin ti tura min tih chu ka tih chuan rah duhawm tak ka hmu dawn tih min tiam tih pawh ka hria a ni.

Kum 1981 kum pumpui deuh thaw kha ka depressed ve a. Chu chu Southern California-a Saddleback Church din tura ka kal hma kum chiah a ni. Rilru, thinlung, tisa leh thlarauvah ka chau tawngkhawng a ni. Chhum chhah takin ka lu ah min khuh luk a, talchuak theilo ang mai hian ka awm a ni.  

Ka rinna min chawmtu Bible thu te hi chu ka theihnghilh mai mai lo ang: “Kum khat chhung mai chuan ka hnawhchhuahsak lo vang che; chutilozawng ram chu a lo tiau mai ang a, ram sate chu i tan a lo tam lutuk dah ang e. I lo punna ram chu i luah khah hma chuan zawi zawiin ka hnawhchhuahsak hret hret zawk ang che.” Exodus 23:29-30. 

Exodus 23:29-30 ah hian, Pathianin Israelte hnenah ti hian a sawi a, “Heng i hmelmate hi i hria em? Nangni aiin an lian zawk a. Kum khat chhung hi chuan a ram zawng zawng hi ka la pe lo vang che. Zawi zawiin i la ang a – indo apiangin i la bek bek ang. I thang lian zel ang a. Ram zawng  zawng enkawl thei tura chakna i neih hnuah chuan, i la nei vek ang.”   

Heng thute hi ka chhiar chang hian, thutiam chu keimahah a lo thleng nghal ni maiin ka hre thin. Kum khat chhungin ka puitlin lo tih ka hrechhuak leh bawk a. Ka damchhung zawng chu Isua Krista rawng ka bawl dawn a, a ma hunah leh a thuneihna hnuaiah ka ti thei ang tih ka ring a ni. 

Chu thu hriatchianna chuan hmachhawp nei zel turin inrintawkna min pe a. Bible Thu chuan ka rinna a chawm a. I rinna pawh a chawm thei a ni. 

Mi tam tak chu ka dawihzepin kan inringtawklo fo va. A nihna takah chuan thih hi kan hlau a ni! Risk lak kan ngam lo va, hlawhchham kan hlau va, thih kan hlau a ni. Rinna nei mi chuan inringtawk takin a kal zel tur a ni zawk.

Rinna nei mi nih i duh em? Pathian Thu hi rinna chawm tu a ni. Bible in Rom 10:17 ah chuan, “Rinna chu hriatna avangin a lo awm thin a, tin, hriatna chu Krista thu avangin a lo awm.” a ti a ni.  

Pathian Thu chuan tihtur ringawt a hrilh lo che a. Ti tura thiltihtheihna a pe che a, tichuan i rinna a lo thanglian zel ang.
 
Ngaihtuah zui atan. 

* Pathianin i nunah eng nge tihhlawhtlin a tum nia i hriat? I mamawh chu a pe ang che tih i ringtawk em?
 
* Rinna nei miten hlauhna an la neih fo i ring em? Engvangin nge?  

* Vawiinah hian rinna nei turin Pathian thutiam eng nge tarlan tur i neih le?

Lettu: Sangpuia

Monday, June 12, 2023

I KE PEN LEH TUR ATANA I MAMAWH TAWK ÊNG

 _Ni 40 Chhung Pathian Thuah_


- Rick Warren 

- June 12, 2023



_"I thu hriatthiamna hian mi narante rilru a tiêng ṭhin."_ (Sam 119:130, CEV)


Mi zawng zawngin êng kan mamawh. I chheh vela thilte i hmuh theih nan leh thil i rah lohna turi êng i mamawh.


A thu kaltlangin Pathianin i rilru tihên a duh. Bible chuan heti hian a ti, _"I thu hriatthiamna hian mi narante rilru a tiêng ṭhin."_ (Sam 119:130, CEV)


Pathianin mi tinrêng hi êng - Ama êng ngei mai - min pek a duh. A nihna thutak hmangin i rilru tihên a, i nun kawng rahbi leh tur a buatsaihsak che pawh tihên a duh a ni. 


Pathian thua insawrbingna hi chu êng tihênna chahbi pawimawh tak chu a ni. I rilru kha êngah i dah a ngai. Pathian thua insawrbing kan tih hian khawvel pawn lama ngaihtuahna dah tihna a ni lo; Pathian thu ngun taka zir hi a ni. Chutiang anga i tih chuan i nunah êng i la lut dawn tihna a ni.


A thu kaltlangin Pathian hringnun hi thlir dan dang hlakin a thlirtir che a ni. Sam 119:105-ah chuan, _"I thu hi ka ke atânte hian khawnvar a ni a, ka kawng atân eng a ni."_ tih kan hmu. Pathian thu hian kal dan tur min kawhhmuh ṭhin. Pathianin i zawh atana a duh kawng a kawhhmuh che a ni.


Sam 119-na ziah a nih lai hian "khawnvar" a tih hian miten thim hnuaia an kal laia an ken ṭhin khawnvar/bati a sawina a ni. Tunlaia eng, hmehên (flashlight) kan hman dan ang deuh hi a ni. Heng hmehên hi i hman a, a aia hla chhun zel i duh anih chuan hmalam pana ke i pen zel a ngai.


Vawi tam tak ka tanna kawng min ên turin Pathian aṭangin êng ka zawng tawh ṭhin. Mahse Pathianin kan mamawh tawk chauh eng min pe tih ka hre tawh. I hmalam ke i pen leh chiah khan chumi hmabak atan chuan a chawpin êng a pe zel che a ni.


Pathian thu tihênna hmanrua ṭha ber chu a thu anga ṭawngṭai hi a ni, Sam 119:18-na ang hian, _"I dan thu atanga thilmak ka hmuh theih nân, Ka mitte hi mi tihvarsak ang che."_



Pathian thu aṭangin thil mak ropui tak hmuh i duh chuan i nuna Pathianin a duhzawnga hna a thawh theih nan i mit tivâr turin Pathian hnenah dil rawh.


Tiêng turin a inpeih reng a nia.


Ngaihtuah zui atan.


Engtinnge i ke pen leh chiah tur atan Pathianah i rinna i nghat a ni tih i lantir ang?


Vawiin atan hian i hriatfiah theih nan engnge Pathian hnena i dil tur?


Bible chhiar tih leh Bible ngun taka zir tih hi engnge a danglamna?


[Lettu: Mapuia Fanai]

Sunday, June 11, 2023

ROKHAWMTU I NIHNA LAN CHHUAHTIR DAN

 _Ni 40 Chhung Pathian Thuah_

- Rick Warren 

- June 11, 2023



_“Tûnah hian unaute u, nangni hi Pathian leh a khawngaihna thuah ka kawltîr a che u; chu chuan a siam lian thei che u a, mi thianghlimte zîngah ro chan a neihtîr bawk ang che u."_ (Tirhkohte Thiltih 20:32)


Rochan i hnena rawn thleng tur a awm. Chu chu engtin nge ka hriat? Bible-in Pathian thu chhiar ṭhinte chuan rochan kan neih tur thu min hrilh.


Tirhkohte Thiltih 20:32 ah chuan,  _"Tûnah hian unaute u, nangni hi Pathian leh a khawngaihna thûah ka kawltîr a che u; chu chuan a siam lian thei che u a, mi thianghlimte zîngah ro chan a neihtîr bawk ang che u"_ tiin min hrilh.


Chhungkaw mi i nih avangin rochan i nei ṭhin; i chang ngei tur pawh a ni.


I pa lo boral ta se a thu rochhiah i chhiar miah lo a nih chuan i â hle a ni ang. I chan ngei tur pawh nangmah vangin i chan loh phah thei. A fa i nih anga i neih ngei tur pawh i chang lo thei.


Lal Isua zuitu i nih chuan ringtu chauh i ni lova, a hnena cheng ve a chhungkua i ni. Chu chuan chhungkaw mi vanneihna a keng tel a ni. Thlarau ro i chang dawn a ni.


Pathian fa i nihna anga i vanneihna tur pawh hre lova i nun i hmang a nih chuan a lungngaihthlakin a âtthlak dawn hle a ni. Pathian chuan ṭhang lian a, a hnen aṭanga i dawn turte hre turin a duh che. Chutiang chang tur chuan Bible i chhiar a ngai a ni.


II Timothea 3:16-17 chuan, _"Pathian Lehkha Thû zawng zawng hi Pathian thâwk khuma pêk a ni a, zirtîr nân te, inzilh nân te, intihdik nân te, dikna kawnga inzirtîr nân te a ṭangkai a ni. Pathian mi chu thil ṭha tinrêng thawk chhuak tûra famkim taka a inthuam theih nân."_ a ti.


Bible awm chhan chu Pathianin a siam chhan che anga nung tura pui tur chein a ni. Pathian aṭanga i chanpual tur a ni. Pathian chuan a siam chhan che anga ṭha taka inthuam turin a duh che. Chutiang ti tur chuan a thu hmangin thil chi li a ti:


*A zirtir che.* Pathian chuan eng kawng nge zawh tur a hmuhtir che.


*A hau che.* Kawng dik lo i zawhin a hrilh ṭhin che.


*A siam tha che.* Kawng dik i zawh leh theih dan a hmuhtir che.


*A buatsaih che.* Kawng dika i awm reng theih dan a kawh hmuh che.


Chutiang chuan Pathian thu chuan ṭhang lian turin leh i rochan tur i chan ngei theih nan a buatsaih ṭhin che a ni. Bible chhiar mai kha i tih ve tur chu a ni.


Ngaihtuah zui atan.


Lalte Lal hnen aṭanga ro khawm tur i neih avang khan engtinnge i nun dan a danglam ang?


Bible hian a zirtir che, zilhhau che, a dik lo a tihdiksak che, leh a sawizawi che i duh em? Engtinnge Pathian thua i hun neih danin i chhan dan a hril?


Bible zirtirna ang zela i nun theih nan i nunphungah engte nge thlak danglam ngai le?


*Isua kaltlanga roluahtu i nihna kha i la tawh em?*

Pathian chatuan chhungkua, nghak rengtu che zingah chanvo i nei ve. Sawmna zau taka hawn a ni a. Mahse Isua Lal leh Chhandamtu a i pawm a  ngai.


I inpeih em? He ṭawngṭai tawite hmang hian bul han ṭan teh le:

"Lalpa, ka thih hunah ka chanchin i hmaah ka sawi dawn a ni tih ka hria a. I lakah thil sual tiin i remruat ang ni lovin ka duh danin ka nung a ni tih ka hrua. Tun aṭang hian ka nun dan thlak ka duh. Sual lak ata i hnen lam rawn pan ka duh.


"Ka sual sual man ka tawrh loh nan ka sual zawng zawng ai thi tura Isua i rawn tirh a avangin ka lawm e. I ngaihdam ka phu lo tih ka inhria. Lalpa, i khawngaihna chauhin min chhandam thei tih ka hria. Famkimna hmunah lut turin ka felnain a tlin ngai dawn lo tih pawh ka hria.


"Isu, min hmangaih em avanga ka sual zawng zawng i phurh avangin ka lawm e. Vanram luttlakah min siam a, min chhandam turin ka ngen a che. Tunah hian ka pumin, chatuan atana min chhandam turin ka dil a che. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.


[Lettu: Mapuia Fanai]

Saturday, June 10, 2023

BIBLE CHUAN I NUNAH THIL THEIHLOH A TI THIN

 _Ni 40 Chhung Pathian Thuah_


Rick Warren

10/6/2023



"A thil siamte hmahruaitu ang kan lo nih theih nan ama duhzawngin thutak lakah chuan min hring a ni." Jakoba 1:18


Pathian chuan a thara bul i tan lehnan a thu a hmang thin a. Mahse bultan thatna mai a ni lo - inthlak danglamna a ni bawk a ni. I nun kha thlak danglam a duh a, tichuan mihring a duh anga a siam, nun hlawhtling tak nei i lo ni thei dawn a ni.


Bible hi lehkha bu dang ang lo tak a ni. Thil theih lohte hi kan nunah a taka thil thleng a lo nih tir a, a chhan pawh thil tihtheihna a neih vang a ni. Pathian thu a nih miau avangin.


Bible chuan eng thilte maw a tihsak che? Pathian thu lo chuan chhandam i ni thei lovang. Vanram i pan hauh lovang a. Isua kross thihna chanchin pawh i hre lovang. I nuna Pathian thiltum pawh i hre thei ngai lovang.


Bible tel lo chuan, Pathian pawh hi i hre lovang.


Pathian chuan heng engkim mai hi pek che a duh a, chung zawng zawng bultanna chu Pathian thu a ni.


Bible hmang hian, Pathian chuan kan nun a siam tha leh thin a. I uaina hrui hmawrah uai tang hram hram angin i ngai viau thei, Pathian chuan a thara bul tanna, tih that lehna atan a thu a hmang thin.  Bible chuan chu chu "Piangthar" a ti a.  Jakoba 1:18 chuan, "A thil siamte hmahruaitu ang kan lo nih theih nan ama duhzawngin thutak lakah chuan min hring a ni" a ti a. 


Engtin nge chu chu a thlen theih? Bible hi thlai chi nen tehkhin a ni a. I thinlungah Bible chuan zung a kaih chuan, a lo tiak a, a thang lian a, rah a chhuah thin. Isua ang nun ze mawi nei turin i mizia kha a siam tha a, Pathian ngainat zawng  ngaina turin a siam ang che. Pathian thu chuan a that zawk avangin a tidanglam thin.


Hemi chungchang hi Isua khan a sawi a: (Johana 6:63) Tinungtu chu thlarau a ni, tisa chu engmahah a tlaktlai lo; in hnena thu ka sawite hi thlarau a ni, nunna pawh a ni. Pathian thute hi lehkha pheka thu awm satliah ang a ni lova. Thlarau niin nunna a ni bawk. Thlarau thil tihtheihna a ni a. Pathian thu chuan  khawtlang nunleh kan chanchin pawh a ti danglam thei a. Thil theihloh ni awm hi a ti thei a ni. 


DL Moodya, kum zabi 19 laia Chicago pastor khan, "Kan hriatna tih zauna atan chauh Pathian thu hi min pe lova, kan nun thlak danglam turin Bible hi min pe a ni" a ti.


I nun ngei kha han ngaihtuah ta la. I nun kha engtia tih danglam nge a ngaih le? I nunah khan englai ber khan nge tidanglam turin theihna nei lo riaua i ngaih le?


Keimahni a kan theih mai loh hi Pathian Thu chuan a tidanglam thei a. Pathian thu zirna hun tha kha i nunah beh tir tlat la, tichuan thil theih loh ni angte kha a takah a lo chang tur tan khan lo inring ang che.


Ngaihtuah zui atan...


Isua nen in inzawmna emaw Pathian thu i zir avanga i nunin rah a chhuahte engte nge?


Pathian thuin midang nun a tih danglam tawh zia i hmu tawh em?


I nunah thil theih loh Pathianin a tihsak thei che tih i rinte engte nge?


(Lettu: msa)

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...