Monday, June 30, 2025

RILRU LAMA MILIAN HMACHHAWN TURA INBUATSAIHNA

 Tihdanglam Tawh


- Rick Warren

- June 30, 2025

 


“Tin, heta pungho zawng zawng hian Lalpa chuan khandaih leh feiin a chhandam lo tih an hre thei ang a; indona chu Lalpa indona a ni si a, ani chuan ka kutah hian nangni ho hi min pe dawn a ni,” a ti a. 1 Samuel 17:47


1 Samuela ah khan Davidan milian Goliatha a beih hma khan milian dang a bei hmasa a. Nimahsela chungte chu mihring milian an ni lo va, rilru lama milian an ni zawk a ni.


Goliatha tak tak chu beih tur a awm tawh lo, nimahsela chutiang ang tho va lian beih tur an awm teuh a ni. Chung harsatnate chuan Pathianin ni tura a duan dan ang che pawh ni thei lo vin a siam che a ni.


A hmasaber atan milian i hmachhawn chu khawtlaina hi a ni. Duhthusam ram hi vawilehkhatah a thlen thut theih loh. Kum tam nghah a ngai thin a. Nghah hun hi a awm ve hrim hrim a ni.


Davida nunah kha chuan a pa kha amah chelh khawtlai tu chu a ni. Samuelan Davida kha lal ni tura hriak a thih hnuah pawh khan, a pa Jesaian Davida chu beram veng turin a tir sauh sauh chauh a ni.


Pathian ruahmanna leh midang ruahmanna a inkalh chuan khawtlaina a awm ngei ngei thin, miin tihkhawtlai che an tum dawn a ni. Nimahsela Pathian chu a rinawm a, ama hun ruatah a thil ruahman chu a tihhlawhtling thin a ni.  


A pahnihnaah chuan hnualna hi a ni. Goliatha khan Isrealte hnenah khan hlauhna rau a rawn siam a, tu te pawh mai khan kha indonaah khan chak turah an indah tawh lo a ni.


Miin a tih theih lo vang tiin an hrilh thin che em? I duhthusam ti beidawng tur chein, a thleng thei lo vang tiin an hrilh thin che em?


A chang chuan thingtlang tlangval ve mai - Davida ang a - “He milian hi engmah a ni lo. Kan hneh thei ang,” ti tu kan mamawh ve thin a ni.


A pathumnaah chuan pawmlohna hi a ni. Davida chungchangah khan a lo thleng chiah mai, a unaute ngei ngei khan Goliatha bei tur chuan an ring thei tlat lo a nih kha. 


Mite hlauh zawng tak mai Pathianin a hmuhtir bawk si che a awm anih chuan kal zel rawh. An hrethiam lo vang che, an ring lo vang che a, an awih lo vang che. Chutah chiah chuan thutlukna pawimawh tak i siam a tul ta: midang pawmna nge Pathian pawmna i ngaih pawimawh zawk dawn? 


A palina atan chuan rinhlelhna hi a ni. Lal Saula kha indona lamah chuan mi chungchuang a ni. Chuvang tak chuan Davida te angin milian Goliatha - indonaa mi hrat khawkheng kha a hneh theih a ringlo hrim hrim a ni.  


Mi thiam zawk ten i ti thei lo vang an ti maithei che a ni. Chu chu nangmah inrinhlelhnan chuan a tawk viau a ni.


The Purspose Driven Life lehkhabu ka ziah khan editor hnen atang lehkha ka dawnga chutah chuan heti hian a inziak a, “He lehkhabu hi mi chhiarhlawh a ni dawn lo. Tumahin bung 40 lai mai chu an chhiar lo vang.” Mi thiam zawk te pawhin an sawi diklo ve tho. Pathianin a hmuhtir che chu engmah in tihkhawtlai tir suh.

Ngaihtuah zui atan


* I ruahmanna a khawtlai chuan nangmah leh Pathian chungchangah engnge i zirchhuah?


* Engang tawngkam in nge ti beidawng thin che? Engang aw nge i ngaihthlak ngai zawk?


* I ruahmanna ah emaw nangmah chungchangah emaw inrinhlehna i neihin Pathian Thuah eng thutiam nge phurna i neih theih nan i lakchhuah ang?


[Lettu: Sangpuia]

Sunday, June 29, 2025

A NGAIHNA HRIAT AVANGA LUNGNGAIHNA KARAH PATHIAN CHHANNA

_Tihdanglam Tawh_

- Rick Warren 
 June 29, 2025
_"Ama hming avangin felna kawngah te mi hruai ṭhin."_ (Sam 23:3)

Thutlukna dik lo siam i hlauh avangin i lungngai ṭhin a ni.

Mahse Pathianin a ngaihna i hriat lohnaah kawng a kawhhmuh thei che. Sam 23:3-ah chuan heti hian kan hmu, _"Ama hming avangin felna kawngah te mi hruai ṭhin."_ Thutlukna siam ngaihna hriat lohna- sum leh pai thuah a ni emaw, inlaichinnaah a ni emaw, eizawnna lamah a ni emaw- hneh theih dan chu min hruaitu atana Pathian hman hi a ni.

"Mahse heti hian ka tichhin tawh asin!" i ti a ni mai thei. Pathian puihna i dil tawh a, mahse a hma zawng aiin i rilru a buai zual a. A ngaihna i la hre lo a, Pathian duhzawng hriat harsa i ti em em a.

Pathianin a chhaih kual mai mai che em ni? Ni lo ve! Pathianin hruai che a duh. A duhna te chu i hriat duh aia nasa a ni tih i hriat a duh a. Mahse Pathian duhzawng i zawn laiin a ni lo zawk i en fo ṭhin. Hei hi mi zawng zawngin kan tih dan a ni.

Ṭhenkhat chuan kan rilru hneh deuhtu tur kan zawng a. A ṭhen chuan a tihdan kalhmang emaw a sehhmeh emaw kan duh a. A ṭhen chuan Pathian aṭangin thilmak danglam tak lo thleng turin kan beisei bawk.

Mahse hengte hian rilru hahna mai rawn thlenin Pathian duhzawng hmu thei lo turin a hliah ṭhin che a ni.

Pathianin chiang lo riau leh thutlukna siam hleithei lo khawpa i lungngaih a duh lo. Thutlukna i siam hmain a kaihhruaina i dil a, thutlukna i siam tawh hnuah pawh amah leh a ṭhatnaa innghat turin a duh che a ni.

Chutianga i tih chuan mahni inbuk nawn chhenna lak ata a zalentir ang che.

Jakoba 1:6-8ah chuan heti hian kan hmu, _"Nimahsela, ringhlel hauh lovin rinna neiin dil rawh se, ringhleltu chu tuifinriat fawn thli chhem len leh vawrh ang a ni si a. Chutiang mi, rilru bulbal nei lo, a thil tih zawng zawng nghet lo mi chuan Lalpa hnenah engmah hmuh inring suh se."_

Hei hi chanchin lawmawm chu a ni: I hma hun chu chiang lo ruai mahse inrel fel lo riaua inhriatna i neih emaw i lungngaih emaw a ngai lo. Pathian chu a pangngai reng a, a hruainaah che i innghat thei ang.

A changin emaw, engtik laiin emaw Pathiana rinna tak tak i nghah chuan thutlukna fing tak i siam theih nan i mamawh zawng zawng a pe ang che.

I kawng tinrenga hruai tur chein Pathian a awm reng ang. Hei hi a thutiam a ni a, a dik ngei ang tih i ring thei e: _"Ama hming avangin felna kawngah te mi hruai ṭhin."_ 

Ngaihtuah zui atan.

Pathian duhzawng i zawn laiin eng "thil dik lo" nge i zawn ṭhin- rilru lamah nge, a tihdan nge, chhinchhiahna mak tak nge, eng thil dang nge?

Engvangin nge mahni finna aiin Pathian hruainaa i innghah zawk ang?

Eng thutlukna pawimawh nge siam tur i neih? Pathianin a hruai che tih hriatna hian engtinnge i lungngaihna a tihtlem?

[Lettu: Mapuia Fanai]

Saturday, June 28, 2025

I PAWISA THU-AH CHUAN FING RAWH

_Tihdanglam Tawh_ 
 
By Rick Warren
— June 26, 2025
“Remhre finna chu mahni awm dân hriat hi a ni a, Mi âte âtna erawh chu bumna a ni.” [Thufingte 14: 8]

Pawisa chu Pathian tan ṭangkai taka hman tur a ni. Khek lutuk tur a ni lova. Khawl ngawr ngawr tur a ni hek lo. Pathian anga chibai buk tur pawh a ni lo. Hman tur a ni! Tun hun atana hmanrua mai a ni a – Pathianin kan kuta a dah a ni – thil ṭha atana hman tur a ni. 

Luka 16 ah chuan hotu rinawm lo mahse fing si chu mi ropui takah a chantir a nih kha. Chu hotu chuan ban a ni dawn tih a hria a, a hotupa laka leiba nei hote chu an ba tihtlem sakin ṭhianah a siam hlawm a nih kha. 

Isua khan kha hotupa kha eng vangin nge a ngainat? Chu pa chu a rinawm lo va, thil tihdik pathum a nei thung a, chu chu Pathian chuan zir ve tur leh i sum chungchangah pawh hmang ve turin a duh che a ni. 

 *Kha hotu khan hmalam a thlir thiam.* 
Mi tam tak chuan an sum thuhlaah chuan thui tak an thlir lo fo. Mahse engmah kan khawl lo a nih chuan buaina kan insiam mek tihna a ni. 

Thufingte 14: 8 chuan hetiang hian a sawi, “Remhre finna chu mahni awm dân hriat hi a ni a, Mi âte âtna erawh chu bumna a ni,” tiin.  

 *Thil a ruahman lawk* 
Sum leh pai ruahman dan chu engtin nge i hriat ang? Mawlmang te a ni: Budget i nei em? Budget chu ruahmanna zul zuia sum hman tihna a ni. Budget chuan i pawisa chu a kalna tur ngaihtuah buai lovin a kalna tur a hrilh ṭhin. Ruahmanna i siam a ngai. 

Bible chuan Thufingte 16: 9 ah hetiang hian a sawi, “Mihring rilruin a kawng a ruahman a, A ke pên erawh chu LALPAN a hruai ṭhîn,” tiin. 

 *Hotupa kha rang takin a che* 
Luka 16: 4 chuan hetiang hian a sawi, “Mihring rilruin a kawng a ruahman a, A ke pên erawh chu LALPAN a hruai ṭhîn,” tiin. 

Hotupa kha a tlai khawmuang tawh lo, a tlai hek lo. Ruahmanna a siam rualin a che nghal. “Engtik niah emaw chuan ka sum te hi ka la chingfel ang,” tih emaw “Thenkhat chuan ka hna atanga ka chawlh hunah ka la khawl ang,” an ti thung. 

Isua khan kha hotupa rinawm lohna chunchang kha a sawi lem lo, a rilru puthmang zawk kha a sawi a ni, “Ka lo chhut lawk ang e. Ruahmanna ka lo siam ang a. Chatuan daih eng emaw rah chhuak tur eng emaw chu ka lo ngaihtuah dawn a ni,” a ti a nih kha. 

A finthlak khawp mai! Isua chuan i sum thuah chuan chutiang chiaha ti tur chuan a duh che. I sum leh paite chu he laiah hian i hmang mai nge, hmalam thlirin, Pathian ram tana chatuan daih thilah i hmang zawk? 

Ngaihtuah zui atan. 

I sum chungchangah chuan engnge i endik ngai? 

I sum thuhlaah chuan engtin nge hmalam hun atan i lo inbuatsaih lawk ang? I sum nen chuan i hmalam hunah engnge tihhlawhtlin i duh ang? 

Hma lam hun atan chuan i sum enkawl thuhlaah chuan i dawngdah thin em? I hmalam hun atan chuan i sum hmang chuan engnge hlen chhuah i duh?  

[ *Lettu* : Peka]

VANRAMA MIDANG HRUAINA ATAN I SUM HMANG RAWH

_Tihdanglam Tawh_

By Rick Warren
 June 27, 2025
“Ka hrilh a che u, khawvêl sum lem hian in tân ṭhian siam rawh u; sum a ral hnuah chatuan rama lawm luh in ni thei ang.” [Luka 16:9]

Midangte vanrama hruaina atana sum hman tluka sum hmanna ṭha zawk dang a awm thei lo. 

Isua chuan, “Ka hrilh a che u, khawvêl sum lem hian in tân ṭhian siam rawh u; sum a ral hnuah chatuan rama lawm luh in ni thei ang,” tiin a sawi [Luka 16:9]. He Bible chang hi mi eng emawzatte thu hriat thiam loh a ni nghe nghe. 

Isuan a thil sawi chu hei hi a ni: hotu fing pakhat a hnua innghahna tur ṭhian siamtu ang khan chatuan daih ṭhian i sum hmang chuan siam ang che – tu emaw vanram an kai theihna tur emaw vanram i thlen huna nangmah lo lawm [welcome] tu tur che chu i sum hmang chuan siam ang che. 

Vanram chu i sum hmang chuan i lei ang tihna chu a ni lo, a chhan chu a lei theih loh. Isua chuan krawsah i man bat chu a tlak daih tawh. I chhandamna chu i lei thei ang tiin a sawi lo, a chhan chu i lei thei lo. Chhandamna chu khawngaihna avanga i chan chauh a ni. 

Isua chuan i sum neih chu chatuan daih ṭhian siamna atan hmang turin a hriattir che. I sum chu miten Isua an hmuh theihna tura hmang chhuak turin a duh che, chatuan daih ṭhian i siam ang a, chatuan daih lawmman i chang bawk ang. 

Vanram i thlen ni chuan vanram kawtchhuahah chuan mi za tam tak lo hmuak tur chein han ngaihtuah chhin la, kut bengin hlim takin, “Kan lo nghak reng tawh che asin! Chanchin Tha hrilna atana i sum i hman avang khan hetah hian kan lo awm ve a ni. Tunah chuan damchhung atan – ni lo, chatuan atan ṭhian kan lo ni ta! I sumte khan khang thil atan khan hman lo ta la, vanramah hian kan awm ve thei hauh lovang” an la ti ang. 

Chutiang chuan i sum i hmang ve em? I thilphalna avang chuan tu emaw vanrama kai tur an la awm em? 

Bible leia tu emaw a la nei lotu i lo pe tawh a nih chuan vanramah chuan ro i khawl tihna a ni. Khawvel hmun hrang hranga Chanchin Ṭha hrilna atana i sum i thawh ve a nih chuan vanramah chuan ro i khawl khawm tihna a ni bawk. Biak in sakna atana i che a nih chuan vanramah ro i khawlkhawm tihna a ni. A thla bia missionary ṭanpuina atana i che a nih chuan vanramah ro i khawl tihna a ni. Sum hmanna kawng lian leh ropui ber a ni. 

I sum chu vanramah chuan i keng thei lova, mahse vanrama kal turte chu i lo thawn lawk thei a ni. 

Ngaihtuah zui atan. 

Chatuan daih hauh lo thila i sum i khawhralna chu eng thilah te nge ni? 

Chanchin Ṭha hril tur Pathianin i hnena a lo hruai chu tu nge ni? 

Chatuan daih ṭhian nei tur chuan eng tiangin nge i sum chu i lo hman ve tawh? 

Vawiin hian Isua i zui dawn em? 

Bible chuan hetiang hian a sawi, “Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.” [Johana 3: 16]

Pathian chuan a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu* : Peka]

PATHIAN HNENA LAWMTHU SAWI LAWKNAIN THIL A TITHEI

_Tihdanglam Tawh_

- Rick Warren 
- June 28, 2025
_"Tin, mipuite a fuih zawh chuan sipaite hmaa kal chunga LALPA chawimawina leh a thianghlim mawizia fak tûra hla satu turte a ruat a, 'LALPA hnênah lâwm thu sawi rawh u, a ngilneihna chu kumkhuain a awm dâwn si a, ti rawh u,' a ti a"_ (2 Chronicles 20:21).

2 Chronicles 20:21-ah chuan lal Jehosaphata khan tihda  phung pangngai ang lo deuhin a sipaite a rem a: _". . . sipaite hmaa kal chunga LALPA chawimawina leh a thianghlim mawizia fak tûra hla satu turte a ruat a, 'LALPA hnênah lâwm thu sawi rawh u, a ngilneihna chu kumkhuain a awm dâwn si a, ti rawh u,' a ti a."_

Jehosaphata ral rel danah chu ralthuam keng te hmaa zaipawl kal hmasaktir kha a ni. Hei hi han mitthla teh: Lehlam pawlah sipai pawl thum infin khawm Israel-te bei turin an rawn thawk a. An indona tur ruam a awm bawk a. Tichuan, inphah hniam em em Israel fate an awm a. Jehosaphata chuan, "Zai mi deuh te hruaiin zaipawl kan din dawn a, chumi te chu raldo hmatawngah an kal ang" a ti a.

Hetah hian thudik pawimawh em em mai a awm: Israel fate khan indo hma hauhin Pathian hnenah lawmthu an sawi. Fakna leh lawmthu sawina te hi awkaa rinna kan lantirna a ni. Thil a thlen zawha Pathian hnena lawmthu sawina hi lawmna lantirna a ni a. Thil a lo thlen hmaa lawmthu sawina erawh rinna lantirna a ni thung.

Chang 22 leh 23-naah hian faknain thil a tihtheihzia hi lo chhinchhiah rawh: _"Tin, hla an saka an han fak veleh chuan Lalpan anmahni rawn beih tumtute chu a chawk buai a. Amona leh Moaba thlahte chuan Edom sipaite chu hnehin an tichimit vek a, tin anmahni leh anmahni chu intihboral tumin an inbei ta chiam mai a"_ (GNT). Pathianin sipaite a tichiaia a, Israel mipuiten an en reng laiin anmahni leh anmahni an intichimit vek a ni. Beiseina hmunah thiltihtheihna lantir a ni ṭhin.

I nuna hneh theih loh harsatna - hlawhtlin lohna thlentu zawk ni awm kha che kha i hria em? Pathianin harsatna a hnehsak hnu che a lawmthu sawina hi lawmna a ni a. Mahse a sutkian hma hauha lawmthu lo sawi lawkna hi rinna chu a ni.

I harsatna te sut kiansak tur che a Pathian hmun i ken chuan chu chu ring lote tan Pathian an hmuhna kawng a lo ni ṭhin. A hnung zuitute rinnaa an kal hian khawvelin a lo hre vat ṭhin. An nuna hnathawk tura beiseitute chungah Pathianin a thiltihtheihna lantir nuam a ti ṭhin.

Tunkar chhung khan i sum enkawl danah te, inlaichinnaah te, i eizawnna kawngah te emaw harsatna i tawk em? Hlawhtlin lohna chhan a lian zawkin i hria em? I harsatna kha a so liam viauin i hria em? Engnge i tih ang? Venghimtu che Pathian lam hawi rawh.

Ngaihtuah zui atan.

Vawiin hian eng kawngah nge Pathian hnenah lawmthu i lo sawi lawk theih ang?

An harsatna sukiang tura Pathiana rinna nghat tlat tute nge hriat i neih? Chutiang rinna chu eng ang chiahin nge a lan chhuah?

I ṭhiante leh chhungte aṭanga Pathian la hre lotute hnenah engtinnge i harsatna sukiang tura Pathiana rinna i nghahzia i entir ang?

[Lettu: Mapuia Fanai]

Wednesday, June 25, 2025

PAWISA CHUNGCHANGA I TIH LOH TUR THIL PALITE

_Tihdanglam tawh_

- Rick Warren
- June 25, 2025
"Tin, an hnenah, "Fimkhur ula, awhna reng reng lakah chuan inveng rawh u, sum ngah hi mihring dam chhan a ni lo ve," a ti a, Luka 12:15.

Luka 16-ah chuan sum enkawltu chu a sum enkawl dan dik loh avangin insawifiah tura tih a ni a, sum enkawltu chuan tih dan tur a ruahman ta a. A laka fimkhur taka che thei tur ṭhian siamin, a pu sum batute chu an leibat a tihhniamsak a ni.

A puin a thiltih dan a han hriat chuan, "Sum enkawltu fel lo chu a remhriat avangin a fak ta a, êng fate aiin he khawvel fate hi an tunlai kawngah chuan an fing zawk a ni," a ti (Luka 16:8).

Remhria tih awmzia chu-fing, fel, thuhnu dawn tihna a ni. Pathian chuan Bible-in a sawi dan ang taka remhre taka pawisa enkawl turin a duh che a ni.

He chanchin aṭang hian pawisa chungchanga tih loh tur thil pali kan hre thei.

*I pawisa khawhral mai mai suh*.
Luka 16:1 chuan, "Mi hausa tuin emaw sum enkawltu a nei a, chu mi chuan a sum a khawh ralsak mai mai kawngah a hnenah an hek a, " a ti.  I thil neih zawng zawng kha Pathian ta a ni a, a thlawna a pek che a ni, pawisa pawh telin, i puin a pek che kha khawhral mai mai lo tura i fimkhur a ngai a ni.

*I pawisa kha hmangaih suh.*
I nuna hmasa zawk tur i rel fel a ngai-Pathian nge pawisa tam tak thawh chhuah. A pahnih hian a rualin i dah pawimawh ber thei lo.

Bible chuan, "Chhiahhlawh tu mahin hotu pahnih rawng an bawl kawp thei lo, pakhat huain pakhat an duh ang, a nih loh leh, pakhat ṭanin pakhat an hmusit ang. Pathian leh sum rawng in bawl kawp thei lo ve," a ti (Luka 16:13).

*I pawisa kha ring suh.*
Eng anga tam nge pawisa i neih tih ka ngaihtuah lo-engtiklai pawhin i chân thei. Sum enkawltu chuan rang takin helai hi a zir thiam hman a ni, "Ka puin sum enkawltu aṭanga mi bân dawn  hi engtin nge ka tih ang aw, ka tih zia tur ka hre ta," a ti.

Ngelnghet taka awm i duh chuan i nun laipui chu nangmah aṭanga laksawn theih miah lohah i sa tur a ni. Thil pakhat i chân theih miah loh tur a awm: chu chu Pathian hmangaihna a ni.

*I pawisa kha i mamawh phuhru famkim turin beisei suh.* Pawisa i neih tamna khan engtiklai mahin hlim zawk, ngelnghet zawk leh hlu zawkah a siam lovang che: "Tangka sumah duh tawk a hmu lo vang a, hausak ngainatu chuan duh tawk a hlep hek lo vang," (Thuhriltu 5:10).

Pathianin a pek che chunga enkawltu remhre tak i nih theih nan, he thil pali hi sum enkawlna chungchangah i pumpelh dawn nia.

Ngaihtuah zui atan.

I pawisa hman kha mi dang pawisa ni ta se, eng anga danglamin nge i hman ang?

Miin i nun an ena, i pawisa hman dan an hmuh khan i tana thil pawimawh eng thil nge an sawi ang? 

A rualin engtin nge i thil lakluhah mit sâng tak leh lungawi hma tak i nih theih ang?

[ *Lettu: Marova Punte*]

Tuesday, June 24, 2025

I TAWRH LAIA PATHIAN THIL RUAHMAN

 Tihdanglam Tawh


- Rick Warren

- June 24, 2025

 


“Chuvangin, Pathian remtihzawng anga tuarte chuan thil tha tiin an thlaraute chu Siamtu rinawm tak hnenah kawltir rawh se.” 1 Petera 4:19.


Thlalak hlui kan lak thin dan kha ila hria em? Thla kan lak hmasak ber khan a thim (negative) in a lang vek a. Tichuan a sawngbawlnaah chu thlalak chu rawng pangngaia a lo chhuah theihna turin sawngbawl a ni a, tichuan thlalak thim (negative) chu a tak rawng anga rawn ti eng (positive) in mawi takin a lo chhuak ta thin a ni.


Chutiang chiah chu Pathianin min cheibawl dan a ni. Tu te pawh hian diklo taka tawrhna kan paltlang vek a. Miin min endan a dik lo va. Min namnul mai mai a. Keimahni atangin remchang an zawng a. Pathian chuan a thim chu rawn ti bo vin, Isua eng chuan a rawn chhun eng a, tichuan engah a rawn siam a - thlalak mawi taakah rawn chhuahin mi nungah min siam ta a ni.


Bible chuan hetiang hian a sawi, “Chuvangin, Pathian remtihzawng anga tuarte chuan thil tha tiin an thlaraute chu Siamtu rinawm tak hnenah kawltir rawh se.” 1 Petera 4:19. Diklo taka rorelsakin i awm anih chuan i hriatreng atana pawimawh em em a chu i lamah Isua a tang tih hi a ni.


Bible pumpuiah hian, diklo taka rorelna tuartu te chungah Pathianin a lainatna a bik takin a lantir a ni. Dikna Pathian a ni a. I tap te, i na te, i tawrhna te a hria a ni. I dawn tur awm tak dawng lo vin i inhria pawh a ni thei. Nimahsela Pathian chuan i tawrhnaah hian thil ruahman a nei a ni. 


I hringnuna tawrhna i paltlang zawng zawng ah te hrilhfiahna i dawng vek lo vang. Vanram i thlen hunah chuan thil tha lo i chunga lo thleng te pawh i hrethiam tawh ang. Pathian chuan chung zawng zawng hrilhfiah che chu a bat a ni lo thung.


Hei hi thu lawmawm a ni: Hrilhfiahna i mamawh lo. Pathianin a hmangaih che tih pawm tawp la. I tan thil ruahman a nei. A tinatu apiang che enkawl dan chu Pathianin a ngaihtuah ang. 


Pathianin tawrhnate hi awmzeneilo ah a chantir lo. Chanchin tha eng chu lo lawm la, Pathianin i tawrhna chu a hmang tangkai ang - fel lo taka i chunga rorelnate pawh chu - i nuna pangpar mawi tak a lo chhuahna tur a ni zawk ang.


Ngaihtuah zui atan


* Hun kaltaa i tawrhna chu midang tanpuinan engtin nge i hman ang? Hun remchang a siamsak zawk daih tawh che em?


* Engti zawngin nge fello taka rorelna avanga i tawrhna chu Pathianin i nun thanzelna atan a hman tangkai?


* Fello taka lo tuartir tawhtu che chu, rulh let ai chuan Pathianin engtin nge ti tura a duh che i rin? Hmangaihna nena chhanletna chuan engtin nge a nghawng che?


[Lettu: Sangpuia]

Monday, June 23, 2025

KRISTA ANGA HMANGAIHNA NEIH AWMZIA CHU

 _Tihdanglam Tawh_

 

- Rick Warren

- June 23, 2025

 


“Engkim a tuar hram hram a, engkim a ring a, engkim a beisei a, engkim a tuar chhuak thin.” 1 Korith 13:7

 

Pathianin hmangaihna min pek ang tho hi midangte pawh hlan chhawng ve turin min duh a ni. Chu chu thurawn emaw duhthlan tur emaw pawh a ni lo. Amah Isua hnen atang ngeia thupek kan dawn a ni zawk.  “Thupek thar ka pek che u hi, inhmangaih ula; keiin ka hmangaih ang che u hian nangni pawh inhmangaih ula.” a ti a. Johana 13:34

 

Isua zuitu i nih chuan, i huatzawng an ni emaw ni lo emaw pawh ni se- Kristan a hmangaih che angin mi zawng zawng i hmangaih tur a ni. Chumi awmzia chu chhan neilo in i hmangaih anga, i ngaidam vek ang a, hlutna tam tak an nei tih i hre bawk tur a ni.

 

Hetianga midang i hmangaih theih chuan in inlaichinna pawhin danglamna a nei ang!

 

Bible chuan, “Engkim a tuar hram hram a, engkim a ring a, engkim a beisei a, engkim a tuar chhuak thin,” a ti. 1 Korith 13:7

 

Hei hi Pathianin a hmangaih dan che a ni. Pathianin i lakah dawhtheihna a nei tawp lo va. Pathianin a ring tawp lo che a. Pathianin i tana tha ber a beisei tawp lo che a. I lakah Pathian a beidawng ngai lo. Chutiang chiah chuan midang lakah pawh tih a duh a ni.

 

*“Hmangaihnin a tuar hram hram.”* Hei hian khawngaihna a rawn lantir a. Midang chungah pawh lantir ve ang che.

 

*“Hmangaihnin engkim a ring.”* Hei hian rinna a puang chhuak a. Midang hnenah hetiang hian sawi la, “Hun harsa paltlang mahla, ka rinna ka lantir zel ang che.”  

 

*“Hmangaihnin engkim a beisei.”*  Hmangaihna chuan a tha ber a beisei a ni. In nupa inkarah a tha ber i beisei ve em? Nge a tha ber dawttu atan i inbuatsaih zawk?   

 

*“Hmangaihnin engkim a tuarchhuak.”* Hmangaihna chuan a chhe ber pawh a tuar thin. Chumi awmzia chu midang chungah pawh hetiang hian i sawi a ngai, “Engtin pawh min sawisa mahla, eng dinhmunah pawh ding la, ka hmangaih tawp lo vang che.”  

 

Vawiin hian in inlaichinnaah danglamna i hmu duh anih chuan, hetiang hian tawngtai ang che: “Lalpa, kan inlaichina chungchangah buaina ka tawk a ni tih ka pawm a. A buai zo vek tawh a ni, vawi tam siam that ka tum a. Danglamna tak tak kan mamawh a ni. Keimahah hian danglamna thlena bul tan ka duh a ni. Hlauhna lak ata min tanpui la, achhan chu harsatna hrang hrang ka tawh leh dawn tih ka hria. Tun atanga chatuan thlengin ka thinlun hlan che ka duh a. Hmangaihnaa nun leh hmangaihnaa chhun khat nih ka duh e.   

 

“Nangman min pawm angin, midang pawh pawm thei turin min tanpui la.Nangman min hmangaih angin, chhan awmlova midang hmangaih thei turin min pui ang che. Min ngaihdam angin midang ngaidam ve thei turin min tanpui la. Min ngaihhlut ang bawkin midang pawh ngaihlu turin min pui ang che. Kan kiang hnaite hnena khawngaihna lantir tur leh rinna puangchhuak turin min pui ang che. Midang hnen atanga a tha ber beisei tur leh a chhe ber pawh tuar thei turin min pui ang che. Isua hmingin ka dil a che.      

 

Ngaihtuah zui atan

 

* I nunah hmangaih harsa tih deuh i nei em? Pathianin a hmangaih ang tho chea i hmangaih theihna tur chein Pathian dil rawh.

 

* Pathianin a hmangaih dan che a midang hmangaih ve awmzia engnge ni?

 

* Midang hmangaihnaah hian a eng ber hi nge i mamawh nia i inhriat? Tuar hram hram nge, engkim rin nge, engkim beisei nge, engkim tuarchhuah?

 

*[Lettu: Sangpuia]*

Sunday, June 22, 2025

PATHIANIN A THLIR DAN CHE HRE RENG RAWH

_Tihdanglam Tawh_

- Rick Warren 
- June 22, 2025
_"Tlang liante leh tlang tête chu an lo tlusawp a ni thei, mahse ka hmangaihna che erawh a awm reng ang."_ (Isaia 54:10, GNT)

Pathianin a hmangaih che tih i rin loh chuan midangte hmangaih a harsa sawt dawn. Mahse eng anga thukin nge Pathianin a hmangaih che tih i hriat chuan midangte hmangaih pawh a awlsam sawt ang.

Chuvang chuan nitin mai hian engti nnge khawvelin a ngaih che a, engtin nge i inhmuh tih aiin engtin nge Pathianin a ngaih che tih i ngaihtuah nawn fo a ngai. _"Midang ngaih dan pawisak luat a hlauhawm a, LALPA-a innghah erawh chu a him."_ (Thufingte 29:25)

Heng thudik palite hi Pathianin i nihna i hriat reng nana pawimawh a ti. A hmangaihna i hriat renga midangte i hrilh ve nan a ṭangkai.

*I nihna zawng nena pawm i ni.*
Kan nu leh pate, rualpui te, kan mi zahzawng te, kan thikzawng te, leh kan laka mihran hlak te pawhin min pawm theihna turin nasa takin hma kan la ṭhin. Mahse hemi chungchang hi Pathianin a lo ruahman vek tawh tih hria la: _"Isuan . . . Pathian laka pawmtlakah min siam tawh."_ (Tita 3:7, CEV). Isuan kraws lera a hnathawh hmang khan Pathian tana pawmtlakah min siam tawh - i thil tih tawh leh tihtur chu engpawh nise.

*Tiamkamna awm lova hmangaih i ni.*
Pathianin, "Hei hi i tih chuan . . . ka hmangaih ang che," emaw ". . . hei vang hian a ni ka hmangaih che" emaw a ti lo. "Ka hmangaih che- chu chu a ni tawp mai" a ti zawk. Pathian hi hmangaih che bansan turin i ti thei lo, a chhan chu a hmangaihna che kha i thiltihah a innghat lova, tunge anih tihah a innghat zawk a ni. Isaia 54:10-ah chuan heti hian kan hmu, _"Tlang liante leh tlang tête chu an lo tlusawp a ni thei, mahse ka hmangaihna che erawh a awm reng ang."_ (GNT)

*Ngaihdam i ni.*
I tan Isua krawsa a thih a i sual tlan nana a nun a hlan avang khan Pathian ngaihdamna thilpek i lo dawn khan ngaihdam i ni. Rom 8:1-ah chuan heti hian kan hmu, _"Chutichuan tunah zawng Krista Isuaa awmte tan chuan thiam loh chantirna reng a awm tawh lo."_ Pathianin i sualna kha a zir nawn lo. A chhuah zalen zawk.

*Ngaihlut i ni.*
Thil hlutna tehna pahnih a awm: tu ta nge tih leh miin a man engzah nge an pek phal tihah.

Thudik chu, Pathian fa i ni tih hi- _"Kristan i man pein a lei tawh che"_ (1 Kor. 7:23, TLB). Pathianin a ta i ni a ti a, Isuan a nunna pein a lei tawh che a ni. Chutiang taka hlu chu i ni asin!

Pawm i ni a, hmangaih i ni a, ngaihdam i ni a, lei leh van Siamtu tana hlu tak i ni tih i hriat reng chuan chu hmangaihna chu midangte lakah nasa zawkin i lantir ve ang a, inzawmna thuk zawk i siam thei ang.

Ngaihtuah zui atan.

Engtinnge Pathianin a ngaih che tih hian eng ang takin nge mahni i lo inngaih dan a tihdanglam?

I nunah mite hmangaih a, pawm a, ngaidam thei lo turin engin nge dal che?

Engtinnge i nunah miten hlutna an nei tih i lantir ang?

[Lettu: Mapuia Fanai]

Saturday, June 21, 2025

HLAUHNA LAK ATA ZALEN TURIN PATHIAN HNENAH INPUMPEK RAWH

_Tihdanglam Tawh_

- Rick Warren 
- June 21, 2025
_"Pathian hnenah i thinlung hlan la, ṭawngṭaiin a lam hawi la, a ruka thil sual i tih te lamin a hnenah thlen rawh. Tichuan zahnain a kiansan che ang a; hlauh nei lovin inring tawk takin i awm ang. I buaina te chu lei hnuaia tui luang angin a luang ral ang a, i nun thim lai ber pawh chhun aiin a eng ang. Him leh dam takin i hahchawl ang a, lungngaihna kiansanin beiseinain i lo khat ang."_ (Joba 11:13-18, CEV]

1 Johana 4:18-ah chuan heti hian kan hmu, _"Hmangaihnaah chuan hlauhna reng a awm lo: hmangaihna famkimin hlauhna a hnawt chhuak zawk ṭhin a ni."_

Hlauhna lak ata zalen taka i nun theih nan engtinnge Pathian hmangainaa nun i zir ang?

Nitin mai hian i thinlung Pathian hnena i hlan pumhlum a ngai.

Zing i thawh ve leh khum i chhuahsan hmain heti hian sawi ṭhin rawh, "Lalpa, vawiinni ka hman ṭan hma hauh hian ka rilru zawng zawng i hnenah ka hlan e. Ka ngaihtuahnaah te hian lal ni turin ka duh che a. Ka rilru leh ka sukthlek thunun turin ka duh che. Ka thinlung i tan ka hlan e. I hmangaihnaa min chhuh khah ka duh a ni."

Joba 11:13-18ah chuan heti hian kan hmu, _"Pathian hnenah i thinlung hlan la, ṭawngṭaiin a lam hawi la, a ruka thil sual i tih te lamin a hnenah thlen rawh. Tichuan zahnain a kiansan che ang a; hlauh nei lovin inring tawk takin i awm ang. I buaina te chu lei hnuaia tui luang angin a luang ral ang a, i nun thim lai ber pawh chhun aiin a eng ang. Him leh dam takin i hahchawl ang a, lungngaihna kiansanin beiseinain i lo khat ang."_ (CEV]

He changah hian thupek pathum leh thutiam pariat kan hmu. Pathianin hetianga i tih chuan chutiang chuan a tih tur thu a sawi a. Pathian thutiam tam tak hi hmahruaitu neiin a awm ṭhin.

A hmasa berah chuan, thupek a pe che: Pathian hnenah nitin i thinlung hlan rawh. Ṭawngṭaiin a lam hawi la. I sual kalsan la- Pathian hmaah i sual puang rawh.

Tichuan a hlawkna tur pariatte hi thlir rawh: I zak lovang a, i inring tawk ang a, i hlau lovang a, i buaina te chu lei hnuaia tui luang ang mai a ni ang, hun thim i paltlang mek kha chhun aiin a enh ang a, i him a i thlamuan avangin hahdam takin i mu thei ang, beiseinain i lo khat ang a, lungngaihnain a kiansan ang che.

Eheu! Chutiang chu tunge tawng lo duh ang? Kartluana i hmuh theih turin he Bible chang hi khawiah emaw ziakin ak ṭha rawh. Heng thil pathum te hi hriat chhuahtir ṭhin che sela- i thinlung Pathian hnenah pe rawh, ṭawngṭaiin a lam hawi rawh, i sual te a hmaah puang rawh - tichuan Pathian thlamuannain a chhung khat ang che.

Tunkar hian han tichhin la, engtinnge Pathianin "hahdam taka, beiseina nei chung leh lungngaihna bo vek thei tura" a puih che i hre thei ang.

Ngaihtuah zui atan.

Engtinnge chapona hian Pathian hnena i inpumpekna tur a dal?

Eng hlauhna te nge tibo tura Pathian hmangaihna i mamawh?

Lungngaihna lak bo vek leh beiseinaa khat nun i neih chuan eng ang takin nge i nun a lan chhuah ang?

[Lettu: Mapuia Fanai]

Friday, June 20, 2025

I PHURNA [EMOTIONS] CHUNGCHANGA ZAWHNA PATHUM

_Tihdanglam Tawh_

By Rick Warren
— June 20, 2025
“Tisaa a dam chhûng chu mihring châknate ûm tawh lova Pathian duhzâwnga a awm tawh zâwk theih nân.” [I Peter 4:2]

Bible chuan I Petera 4: 2 ah chuan hetiang hian a sawi, “Tisaa a dam chhûng chu mihring châknate ûm tawh lova Pathian duhzâwnga a awm tawh zâwk theih nân,” tiin. 

Mihringte chak zawng chu engnge ni? I lungngaihna leh i phurna chu a ni. Krista zuitu i nih chiah chuan nangmah hruaitu tur chu Pathian duhzawng chu a ni ang, nuam i tih zawng leh i phurna lam chu ni tawh lovin.  

I phurna/lungngaihna [feelings] hmachhawn tur chuan nangmah leh nangmah zawhna pathum i inzawh a ngai ang. I thinrim emaw i beidawn emaw chang chuan – i awm dan chu eng pawh ni se – heng zawhna pathumte hi chhan han tum teh: 

“Eng vangin nge he phurna/lungngaihna hi ka neih?” A chhan chu hlauhna emaw lungngaihna emaw a ni thei ang. Chu chu a nih loh chuan i pain kum liam taa eng emaw a sawi pawh chu a ni thei ang. Kar liam taa miin an tihnatna che chu a ni thei a, vawiina i thinrimna hrang hrang inbelhbawm pawh a ni thei bawk. 

“A dik em?” Tuna nia i hriat dan mek kha a dikin i hria em? Chu thu chiah chu Bible kan hmuh ang chuan Elijah khan Pathian a chhuahchhal tuma chhanna a hmuh chu a ni, “Lalpa, Israel ram pumpuiah keimah chauh hi i rawngbawltu ka ni ta,” a tih tuma chhanna a dawn kha a ni. Pathian chuan a lo chhang a, “I thusawi awmzia chu engnge ni? Heng mi zozai hi ka rawngbawltute an la awm asin! Tuna i awm danah kha chuan khawvel pumpuia ka rawngbawltu awm chhun ang maiin i awm a ni! Ni lo. Chu chu a dik lo,” tiin a lo hnial a nih kha. 

“Tuna ka awm dan hian min pui nge min tina zawk?” Tuna i awm dan [feel] dan khan awm zui zel ta la, i duhzawng kha i nei thei ang em? Ka awm dan tam ber dik tak anga langte hi chu keimahni leh keimahni min eichhetu an ni. 

Thingpui dawrah i kal a, a thawktute chu an muang em em a. I ei tur lam chu rei tak i lo nghak a, nangmah aia minute 15 vel laia tlaia lo kalte chuan an ei tur chu an ei khalh daih che a. I tawt up up thleng chuan i nghak a, i thin a rim ta em em a. 

Chutiang thil a thlen chang chuan heng zawhna hi nangmah leh nangmah inzawt ang che. Chutianga i awm chhan dik tak chu engnge ni? I ril a ṭam! A dik em? Aw. I lungawi lo, a chhan chu an muang a ni. I thinrimna kha a ṭangkai nge ṭangkai lo? A thawktute laka lungawi lohna chu ṭangkaina pakhatmah a nei ngai lo. Mi tu emawin i thil tih zawng zawng chu a dik lo a ni a tih chuan, nangmah chuan insiamṭhat i lo chak phah ngai em? Aih! Nangmah leh nangmah thian inchantir i lo chak ang. 

Heng thil pathumte hi nangmah leh nangmah i inzawt a nih chuan nia i hriat [feel] dan chu hriatfiah tumin i buaina chinfel dan tur chu ngunthluk takin ngaihtuah ang che. 
Chu chu i phurna/thinrimna/lungngaihna [emotion] thunun dan chu a ni. 

Ngaihtuah zui atan. 

Kan rilru [emotions] in thil dik lo min hrilh chang chuan eng vangin nge thudik chu awih a harsat em em? 

Pathian duh danin a hruai tih chu eng nge a awmzia? 

[ *Lettu:* Peka]

Thursday, June 19, 2025

NIA I HRIAT [FEEL] DAN KHA A DIK VEK LO

Tihdanglam tawh

By Rick Warren
— June 19, 2025
“Tisa lam thil duh chu thihna a ni si a, Thlarau lam thil duh erawh chu nunna leh thlamuanna a ni … chuvângin, tisa duhzâwng anga awmte chuan Pathian an tilâwm thei lo.” [Romans 8:6, 8]

I rilru sukthlek [emotion] thunun theihna kha thlamuanna nei tura rahbi pawimawh ber pakhat a ni a. 

I rilru sukthlek thunun dan i zir a ngaih chhan Pathian thu atangin kawng thumin kan zirho dawn a ni. 

I rilru sukthlek i thunun a ngaih chhan chu innghahna tlak an ni lo fo. 

Ni ngeia i hriat kha a dik lo thei. I lo beisei lawk dan pawh a dik hauh lo thei bawk. I phurna/lungngaihna [emotion] satliah chuan kawng dik lovah an hruai palh thei che a. Thil tak takah rin ber atan nia i hriat dan chu rin chi an ni lo! 

Thufingte 14: 12 chuan, “Mi ngaiha kawng dik ni âwm taka lang, A tâwp chu thihna kawng ni si a awm.” tiin a sawi. Nia anga i hriat zawng zawng chu i pawm kher a ngai lo vang, a chhan chu dik ngei anga i ngaih leh rintlak ngeia i ngaihte chuan kawng dik an kawhhmuh kher lo vang che. 

I rilru/phurna [emotion] chu i thunun a ngai, a chhan chu an hruai sual palh ang che. 

I rilru/phurna [emotions] chu i thunun lo a nih chuan an thunun an che, i thinrimna/lungawi lohna chuan an duh danin an tibuai zui ang che. Nuam/hrehawm i tihzawng [feeling] ten an thunun che a nih chuan mite chuan tihbuai che an tum ang. Chu aia tha lo zawk chu, a kawi zawnga thil thlirna mit chu Setana hmanraw duhthusam a ni. Ani chuan hlauhna, thinrimna, leh lungngaihnate chu i nun tichhe tur chuan a hmang ang. 

Bible chuan I Petera 5: 8 ah chuan “Ngaihven ula, fîmkhur rawh u; in hmêlma Diabola chu, sakeibaknei rûm ṭhîn angin ei tûr zawngin a phî ruai ṭhîn,” tiin a sawi. 

Pathian tilawm tur chuan i rilru puthmang [emotions] chu thunun a ngai ang. 

I duh dan chuan i nun chu a thunun a nih chuan Pathian chuan a thunun thei lo ang che. I nuam tihzawng anga i khawsa a nih chuan nuam i tihzawng chu i pathian tihna  a ni a, chutiangah chuan Pathian chu i nunah Pathian a ni thei ngai lo vang. 

Rom 8: 6, 8 chuan hetiang hian min hrilh, “Tisa lam thil duh chu thihna a ni si a, Thlarau lam thil duh erawh chu nunna leh thlamuanna a ni … chuvângin, tisa duhzâwng anga awmte chuan Pathian an tilâwm thei lo,” tiin.  

Mi hlawhtling nih i duh a nih chuan i rilru puthmang [emotions] chu i thunun a ngai ang. 

Vawi eng emaw zat ngun taka Zirchianna lo kalpui tawh chuan mi hlawhtling ni tur chuan fin varna [IQ] aiin rilru puthmang chu a pawimawh zawk a ni tih hmuh chhuah a ni. I hmelhriat zingah chuan an thinrim laia an thusawi avang chuan mi eng zat nge hming chhe taka awm zui? An insumtheihlohna avang chuan hna leh remchang hloh engzat nge awm? 

Thufingte 5: 23 chuan, “Zirtîrna tlâkchham vângin
a thi ang a,
A ât êm avângin a bo vang.” tiin a sawi. 

Isua chuan i ngaihtuahna leh thiltih ringawt thunun chu a duh tawk mai lo – i rilru puthmang [emotions] zawng zawng chunga lal pawh nih a duh a ni. I rilru sukthlek [emotions] zawng zawng a hnena i hlan chiah chuan muanna tha zawk, thlarauva hahdamna leh thanhlenna i chang thei ang. 

Ngaihtuah zui atan. 

I thutlukna siam dawn chuan engtiangin nge i phurna/thinrimna [feelings] ah chuan i innghah? “Nia i hriat dan” [feelings] chu engtiang taka dik leh dik lo nge a nih? 

Eng vangin nge Thlarau Thianghlim ngaih chan chu a pawimawh? Engtin nge ni ang? 

Vawiin hian i phurna/lungngaihna [emotions] chu engtin nge Pathian kutah i hlan ang? 

[ *Lettu* : Peka]

Wednesday, June 18, 2025

RILRUA I HRIATNA KHAN CHHAN A NEI

_Tihdanglam Tawh_

- Rick Waren
- June 18, 2025
_Isuan, "A ropui ber chu hei hi a ni..... Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tur a ni tih hi,"_ Marka 12:29-30. 

Isua thusawi aṭang hian a rilru i hria em? Hmangaih satliah turin a ti lo che a. Amah chu tihtak zeta-thinlung zawng zawng, thlarau zawng zawng, rilru zawng zawng, chakna zawng zawnga hmangaih turin a duh che a ni. Pathian chuan lû a hriatna ringawt a duh lova, thinlung taka inzawm a duh a ni. 

Rilru hriatna chungchanga hriat tur thil a awm. 

*Pakhatna, Pathian chuan khawiha dektu a nei. Chutiang Pathian chu a ni*
Pathian chu lawma, lungngaia, na thei leh sual hua a ni a. Mi lakah a beidawng bawk ṭhin. Hetiang rilru i putna chhan hi Pathian anga siam i nih vang a ni. Hetiang hi Pathian nihphung ni lo se, i lawmin i lungngai ngai lovang.

*Pahnihna, i hriat theihna kha Pathian aṭanga i dawn a ni.* Lawm leh lungngai theia i awm kha mihring nihtirtu che a ni. Chu chuan nuna thil ṭha awm, rinawm turte, rintlak turte, ngilnei turte, thilphal turtein a siam che a ni. A chang chuan hei hi thilpek angin a lang lo fo, mahse thil ṭha lo hian a chang chuan awm chhan a nei ṭhin. 

*Pathumna, thil pahnih pumpelh tur a awm*
Rilru khawih riautu,  mihring nuna thil pawimawh tak chu i lo dawnsawn dan kha a ni, i ngaihdan emaw, a dik leh dik loh lam ni lovin. Engkim bulṭhut chu nangmah a den/khawih dan cheah  khan a innghat a. Chu i lo dawnsawn dan chuan i nun kha a thunun a ni. 

Stoicism chuan rilru hriatna hi a pawimawh lo, a pawimawh chu i finna leh i tumruhna kha a ni zawk a ti ve thung. 

Thil thlengin mi a khawih dan hi kawng hrang hrangin a awm. Ṭhenkhat chuan rilrua hriatna hi a pawimawh lo an ti a. An ngainepa, mahse chu chu a dik lo.

Bible chuan Pathian chungchang heti hian a sawi, "Pathian fel tak chuan thinlungte leh rilrute a fiah ṭhin si a," (Sam 7:9) a ti. I thil ngaihtuah leh rilrua hriatna te kha a ngaihsak em em zawk a ni.

Pathianin chhan neiin rilrua hriat theihna a pe che a, chumi hmanga amah chu thinlung leh tihtak zeta chibai buk turin a duh che a ni. 

Ngaihtuah zui atan.

Engtin nge a changa kan  thinlung aia kan lû ringawt hmanga Pathian chibai kan buk?

Ṭawngtam satliah nge i nih, inhampuar ve mai mai?

I rilru hriatna nena Pathian hnaih kha awlsam i ti nge harsa i ti?

[ *Lettu: Marova Punte* ]

Tuesday, June 17, 2025

PATHIAN KOHNA CHUNGCHANGA THUDIK CHU

_Tihdanglam Tawh_

- Rick Warren
- June 17, 2025
 
“... Kir leha chawla awmin, chhandamin in awm ang a, muang taka awmnaah leh ring taka awmnaah hian in chakna a awm ang...” Isaia 30:15

Kohna leh hmathlir chu a kalkawp thin. Pathianin a kohna che chu i nuna a hmathlir a ni. Pathian hmathlir chu i nunah neih i duha danglamna tak tak neih i duh chuan Pathian kohna i dawn a ngai a ni.

Miin “Pathian koh ka ni” an intih hian a harsa lam zawng hian an sawi thin a - missionary emaw pastor emaw rawngbawl tura hmun kilkhawr zawka an kal hian an sawi duh chawk. 

Nimahsela Pathian kohna chu thil buaithlak lam hi a ni lo. I tana awmze nei leh fel taka Pathian thil ruahman hi a ni zawk. 

Khawvela mi tu te pawh hi Pathian chuan min ko vek a. Kan vai hian Pathian hre tur leh hmangaih tura koh kan ni - a hmangaihna pawh midang hnena hrilh chhawng tura koh kan ni. A rawngbawl tur leh kan talent-te amah chawimawi nana hmang tur koh kan ni. Zawhna pawimawh tak chu, chu kohna chu i kan chhang dawn em?

Nimin khan mitdel dam leh Bartimaia chungchang kan zir a. Isua chu mipui zing atangin a ko va. “Tin, Isua a ding a, ‘Amah chu han ko teh u,’ a ti a. Tin,mitdel chu an ko va, a hnenah chuan, ‘Thlamuang takin awm la, tho rawh; a ko va che,’ an ti a. Tin, ani chuan a puan a paih a, a zuang tho va, Isua hnenah a kal a.” Marka 10:49-50

Bartimaia’n ngaihsak lo se chuan Isua kohna kha a hrelo palh thei a. A aurawl chauh ngaihtuahin, “Hetah hian ka awm, Min pui rawh“ a tihna lamah Pathian kohna a hrelo ve palh thei - Mipui zing atang pawhin, “Lawm rawh! Tho rawh! A ko a che,” tiin an hrilh a ni.  

Pathian kohna hriatdan chu inthlahdah miah lo va Bible chhiar te, tawngtai te leh fianrial hun hman hi a ni. Isaia 30:15 ah chuan, “... Kir leha chawla awmin, chhandamin in awm ang a, muang taka awmnaah leh ring taka awmnaah hian in chakna a awm ang...” 
I nunah Pathian kohna i dawn chuan, zui mai rawh, hlawhtlinna i chang ang - achhan chu Pathianin a koh te leh hmathlir a pek apiangte chu mal a sawm thin. Pathian nena inpawla fianrial hun hmang tam la, a kohna i chhan avanga malsawmna pek a duh zawng zawng che pawh i zirchhuak thei ang.

Ngaihtuah zui atan

* Eng kawng nge i hmuhfiah theihnan Pathian i rawn?

* Pathian aw hriat theihnan engvangin nge hmanhmawh lo va awm leh amah ngaihsak chu a pawimawh?

* Vawiinah hian hman hmawh lo va Pathian nena inpawla fianrial hun i hman theihdan ngaituah rawh le?

*[Lettu: Sangpuia]*

Monday, June 16, 2025

I HMATHLIR NEI LET TURIN PEN KHATIN PEN RAWH

 Tihdanglam Tawh


- Rick Warren

- June 16, 2025

 


“Bawlhhlawh kai lo thisen anga Krista thisen hlu chuan tlan in ni zawk tih in hre si a… amah avanga mitthi zing ata a kai thotu leh a ropuina petu Pathian ringtute in ni a, in rinna leh in beiseina chu Pathianah a awm theih nan.” 1 Petera 1:19, 21


I hmathlir awmzia chu - khawvel i thlirdan te, Pathian i thlir dan te, nangmah ngei pawh i inhmuh dan te - chu chuan i rilru puthmang te, i hlawhtlinna te, zenghet i neih leh neih loh te, i thlarau nun thlengin a khawih a. Chu chu hmathlir awmzia chu a ni.


Bible-in Isua leh Bartimaia chanchin min hrilh a, mitdelin a hmathlir a neih leh chungchang a ni. He chanchin atang hian, Pathianin i nun a tihdanglam theih dan leh hmathlir i neih let theih dan kan zirchhuak thei a ni.


Rahbi hmasaberah chuan hmathlir i neih leh theihnan leh i nun tihdanglama a awm theihnan Isuan i nun a thlak danglam thei tih i rin a angai.


Danglam tur chuan beiseina i neih a ngai a ni. Beiseina awmzia chu i tih theihloh leh midang tumahin an tih theih loh kha Isuan a ti thei tih rinna hi a ni. Thiltihtheihloh hi Pathian tan chuan a awm lo tih rinna hi a ni. 

 

Luka 18:35-38 ah chuan, “Jeriko khua a thlen dawnin, mitdel tu emaw kawng sirah kut dawhin a lo thu a; chu mi chuan mipui kal thawm a hria a, engtizia nge ni ta tih a zawt a. Tin, anni chuan Nazaret Isua a kal a ni tih an hrilh a. Tichuan ani chu, ‘Isu Davida Fapa, mi khawngaih rawh,’ tiin a au ta a.”


Mipui zingah dingin au vak vak mahla - rinna i neih loh chuan i tan awmzia a awm lo vang.


Bartimaia au aw kha beidawn vanga au a ni lo. Beiseina nei au aw a ni. A chhanna chu Isua chu a piahlawkah khan a awm a, chu chu bawhpelh a duh lo a ni. A chetchhuahna chhan chu beiseina  a neih vang a ni.


Mi tam tak chu beidawngin an awm, a chhan chu hmun diklo vah an zawn vang a ni. Mi thenkhat chuan sawrkar ah te beisei an nei a. Thenkhatin an hnaah beiseina an nghat a. Thenkhat chuan midangah beiseina an nei a, tumah hi, nang leh kei tiam hian, innghahna tlak an awm si lo, beidawngin an awm leh nge nge thin.


Beiseina tur pakhat chiah a awm. I hloh theih loh tur beiseina pe theitu pakhat chiah a awm. Chu chu Pathiana beiseina hi a ni. 


“Bawlhhlawh kai lo thisen anga Krista thisen hlu chuan tlan in ni zawk tih in hre si a… amah avanga mitthi zing ata a kai thotu leh a ropuina petu Pathian ringtute in ni a, in rinna leh in beiseina chu Pathianah a awm theih nan.” 1 Petera 1:19, 21


Kawng hrang hrang hmangin thlarau lama i hmathlirte kha i hloh thei a ni. Nimahsela neih let theih dan kawng khat chiah a awm chu chu Isua Kristan i nun a thlak danglam thei a, danglamna a thlentir thei che tih rin hi a ni. 

 

Ngaihtuah zui atan


* Sawrkarin i engnge thlak danglam se tih i duh emaw nangmahah engnge thlak danglam ngai nia i inhriat?


* Engvangin nge i rinna chhanlet nan Pathian a chet nia i hriat?


* Engtin nge Pathianin i awmdan a thlak danglam thei tih i lantir ang?


[Lettu: Sangpuia]

Sunday, June 15, 2025

I SUANGTUAHNA THUNUN TURIN I RILRU SIAM FEL RAWH

_Tihdanglam Tawh_

- Rick Warren 
- June 15, 2025
_"Engpawho thleng dawn mahse i dan te chu zawm turin ka rilru ka siam fel tawh si."_ (Sam 119:112, CEV)

Mi tam takte nunin awmze neia nghawng a neih loh fo ṭhinna chhan pawimawh tak chu an rilrua indona hmachhawn dan an zir ṭhin loh vang a ni.

I rilru thunun dan zir i duh chuan suangtuahna mi tichhe theite lak ata i fihlim a ngai. Tunah khan i hrechhuak tawh ngeiin ka ring a, a awlai lo a ni. I nuna danglamna daih rei tak i siamna tur daltu pathum an awm tih Bible-in min hrilh.

*Hmelma hmasa ber chu i ze hlui kha a ni.*
Paula chuan Rom 7:23-ah heti hian a sawi, _"Nimahsela ka taksa pengahte hian dan danglam a awm tih ka hria, chu chuan ka rilru dan a do va, ka taksa pengtea sualna dan awm hnenah chuan salah mi hruai ṭhin a."_

Thil tih i duh miah loh i tih chang a awm ṭhin em? Kha kha i rilrua i mihring ze hlui, sual lam awn reng leh thil ṭha tih i duhna insual ṭhin chu a ni.

*Hmelma pahnihna chu Setana.*
Setana engpawh ti turin a nawr lui thei lo che, mahse kawng a sialsak che a, chu kawngin a pawhna chu na tak a ni. Midangte a hmang thei a, inbiaktawnna (media) te a hmang thei bawk a, i rilruah suangtuahna ṭha lo tak a dah thei bawk.

*Hmelma pathumna chu khawvelin a ngaihhlut thil a ni*
Kan khawtlang nun hian mahni inthunun turin min fuih ṭhin em? A tam lo khawp mai. Kan fakna te chuan "Vawiin hian hahchawlh i phu a ni, "I duh dan ang takin ti rawh" min ti chamchi zawk.

1 Johana 2:16-ah chuan heti hian kan hmu, _"Khawvela thil awm zawng zawng, tisa chakna te, mit chakna te, dam chhung ropuina lem te hi Paa chhuak a ni lo va, khawvela chhuak a ni zawk si a."_

Heng hmelma nei chunga thlemna te, beidawnna te, hnualnate leh hlawhchhamnate kan sual fo hi a awm ve reng a ni.


Anih chuan he indona hi engtinnge i hmachhawna hnehna i chan ang? 2 Kor. 10:3-5 hi han chhiar teh: _"Tisaah awm mah ila, tisa indo angin kan indo lo va, (keini inralthuamnate chu tisaa mi a ni si lo va, kulhpui nghet takte ṭhiatna tura Pathian zarah thil ti thei tak a ni zawk,) hnialnate leh thil sang tinreng Pathian hriatna dal tura sang taka siamte chu thiatin, ngaihtuahna tinreng Krista thu awihna salah kan hruai a."_ 

I ngaihtuahna kawngah chuan duhthlan theihna i nei- i rilru pawhin a ngaichang ṭhin che! He chang hi i nun hruaituah hmang rawh: _"Engpawho thleng dawn mahse i dan te chu zawm turin ka rilru ka siam fel tawh si."_ (Sam 119:112, CEV)


Ngaihtuah zui atan.

Pathian thu zawm hian zalenna leh lawmna a thlen chein i ring em? Engvangin?

Setana i nunah, a bikin chhiatna thlen hial thei suangtuahna leh nungchang thlen turin engnge a hman?

I rilrua indona hneh turin Bible thu vawnna kawngah entinnge ke i pen ang?

[Lettu: Mapuia Fanai]

Saturday, June 14, 2025

HENG THIL PATHUMTE HIAN RILRU HRISEL NEI TURIN AN PUI THEI CHE

_Tihdanglam Tawh_

- Rick Warren 
- June 14, 2025
_"Isuan entirna min hnutchhiah hi ngaihtuah rawh. Misualten a chunga thil ṭha lo tinreng an tih lai pawhin a ding nghet tlat a. Chuvang chuan chau mai lovin bei hram hram rawh."_ (Heb. 12:3, NCV)

Pathianin i nunkawng tinrengah hrisel taka i awm a duh- rilru, thinlung, thlarau leh taksaah. Rilru paukhauh tak nei tur chuan thil dikah i rilru i sawrbing a ngai. I rilru hriselna kawnga hma i sawn theih nan heng thil pathum te hi ngaihtuah rawh.

*Isua lam ngaihtuah rawh.*
"I rilru luah tamtu ang apiang i ni ṭhin" tih an sawi hi i hre tawh mai thei. Isua an zel i duh chuan a lamah i ngaihtuahna i sen a ngai.

Heb. 12:3-ah chuan heti kan hmu, _"Isuan entirna min hnutchhiah hi ngaihtuah rawh. Misualten a chunga thil ṭha lo tinreng an tih lai pawhin a ding nghet tlat a. Chuvang chuan chau mai lovin bei hram hram rawh."_ (NCV)

*Midang ngaihsak rawh*
Philippi 2:4-ah chuan Bible-in heti hian min hrilh, _"Mahni hamṭhatna chauh ngaihtuah lo la, midangte tuizawng leh an thiltih te ngaihtuah bawk rawh."_ (TLB)

Chu chu tunlai kan nunphung nen a inperhsan hlauh tih i hria em? Kan tunlai khawvel hian mahni chauh inngaihtuah a midangte ngaihsak lo turin min zirtir mek. Mahse Isua kha a hun lai khawvel kalphung ep chiaha kal a ni a, amah ang tur chuan i midangte i nunah an len zawk a ngai.

*Chatuan ngaihtuah rawh*
_"Pathianin amah hmangaihtute tana a buatsaih chu tumahin an la hmu lova, tu beng mahin a la hre lova,  tu rilru mahin a la ngaihtuah ngai lo."_ (1 Kor. 2:9, NLT). Chutiang thutaka i rilru ngaihtuahna i sawrbing chuan i harsatna te kha nakin chatuana ropuina, lawmna leh nawmna lo hmuaktu che nen chuan tehkhin rual a ni lo.

I rilru kha i thil neih ropui ber a ni a, indona hmun hlauhawm ber a ni bawk. Pathian hnenah nitin a thua inchawm theih nan te, ngaihtuahna ṭha lo laka fihlimtir tur che leh i rilru kha Isua, midangte leh chatuan te a luahkhahtir tur chein dil rawh. Tichuan i rilrua indona awm te hmachhawn tura thuam i lo ni ang.

Ngaihtuah zui atan.

Eng kawngtein nge Pathianin i nuna midang a dah te nen Philippi 2:4 hi a taka i lantir theih ang?

Engtinnge Isua leh chatuan ngaihtuahna hian midangte ngaihsak tura a puih che?

Engtein nge chatuan thil i ngaihtuahna tur nitina dal ṭhin che? Engtinnge chung ngaihtuahna la pengtute chu i tihtlem ang?

[Lettu: Mapuia Fanai]

Friday, June 13, 2025

I NGAIHTUAHNAIN I NUN A THUNUN

_Tihdanglam Tawh_

By Rick Warren
— June 13, 2025
“Thil dang ber aiin i thinlung vêng ṭha rawh, Nunna lo chhuahna a ni si a.” [Thufingte 4:23])

Pathian chuan i thinlung thlak danglam chu i buaina chinfel aiin a ngai pawimawh zawk. 

Pathian chu kan buaina zawng zawng, kan lungngaihna, kan tuarna, kan natna leh lungngaihna zawng zawng la kiang turin kan duh a. Mahse Pathian chuan nangmah kha khawih hmasak che a duh thung, a chhan chu i thinlung ber kha i thlak hmasak zet loh chuan i nun chu i thlak danglam ngai lo vang tih a hria a – i ngaihtuahna i thlak hmasak a ngai a ni. 

I thinlung ven that chu eng vangin nge a pawimawh? Bible-in a chhan pathum a hrilh che. 

 *I thinlung chu khuahkhirh rawh, a chhan chu i ngaihtuahna chuan i nun a thunun a ni.* 

Thufingte 4: 23 chuan, “Thil dang ber aiin i thinlung vêng ṭha rawh, Nunna lo chhuahna a ni si a,” tiin min hrilh a. I ngaihtuahnate chuan i nun chu a dik zawngin emaw a dik lo zawngin emaw thlak danglam thei turin theihna a nei a ni. Entirnan, mi tuten emaw hetianga an thurawn chu i lo pawm ngawt mai thei: “Hlutna i nei lo. Hlutna i nei lo” an ti mai thei. Chu chu i ring a nih chuan, a dik lo chung pawhin, i nun pumpui a thunun tho tho ang. Ngaihtuahna nangmah thununtu tur che chu uluk taka i thlan a ngai a ni.  

 *I thinlung chu thunun rawh sual nena indona mual a ni si a.* 

Thlemna zawng zawng chu thinlunga intan a ni. Paula chuan Rom 7: 22-23 ah chuan hetiang hian a sawi, “Ka mihring chhûngril chuan Pathian Dân chu a lâwm a; nimahsela, ka taksaah hian thawktu, dân danglam tak a awm tih ka hria; chu chuan ka chhûngril ṭha tihzâwng dân chu a do va, sual dân ka taksaa thawk ṭhîn bawihah mi siam ṭhîn a ni.”

I rilru a buai chhan chu i thinlung/rilruah khan darkar 24 chhung indona a awm ṭhin vang a ni. A hahthlak em em chhan chu a nasa em em a, a pawimawh em em chhan chu i thinlung chu i thil neih ṭhat ber a nih vang a ni. Setana chuan i thil neih ṭhat ber chu a duh ve a ni!

 *I thinlung veng ṭha rawh, a chhan chu muanna leh hlimna hnar a ni si a.* 

Thinlung ven that loh chuan rilru hahna a thlen a, thinlung ven that thung chuan hahdamna a thlen thung. Thinlung ven ṭhat loh chuan innghirnghona a thlen a, thinlung ven ṭhat chuan mahni inrintawkna a thlen thung. I thinlung chu thunun i tum lova i ngaihtuahna te chu i thunun lo a nih chuan i nunah buaina tam tak nangmah leh nangmah i insiam ṭhin ang. Mahse thinlung thununtu thung chuan chakna, himna leh hahdamna a nei ang. 

“Tisa lam thil duh chu thihna a ni si a, Thlarau lam thil duh erawh chu nunna leh thlamuanna a ni.” [Romans 8:6].

I buaina chu i chingfel nghal mai thei lo a nih chuan i thinlung thunun tumin hma la hmasa ang che. Pathian ṭanpuina dilin ṭawngṭai la, i hun khirh tak karah chuan muanna leh hlimna i chhar chhuak thei ngei ang. 

Ngaihtuah zui atan. 

Pathian duhzawng eng ang thilin nge i thinlung chu i hnawh khah tawh? I thinlungah chuan eng nge awm a, dawt i lo rin tawh emaw thil chin ṭha lo Pathianin bansan tura a duh che chu eng nge ni? 

I thinlung thunun tur chuan eng ang hmalakna nge i kalpui theih ang? 

Pathian Thu chuan i thinlung thunun turin engtin nge a thawh ṭhin? 

[ *Lettu:* Peka]

Thursday, June 12, 2025

CHHANDAM THEIH I NI, THIL ENG ANG PAWH LO TI TAWH LA

_Tihdanglam Tawh_

By Rick Warren
— June 12, 2025

“Isua Krista an rin avângin tu pawh a ring apiangte chu Pathianin thiam a chantîr a ni, danglamna rêng a awm lo.” [Rom 3:22]

Isua Kristan kraws-a a hnathawh avang khan i thil lo tihsual tawh zawng zawngte chu ngaihdam theih an ni. I sual avanga thupha i chawi a nih chuan Pathian chuan a thlawnin, a vaiin, vawilehkhatah, vawi tam tak a ngaidam thei che.  

Vanram hi awm lo palh hlauh pawh ni se [ a awm zawng a awm ngei a], Isua Kristaa rinna nghah hi a la hlu em em tho vang. Mi sang tam hmaah thu ka sawi tawh a, mi tam takte chuan a ruka inthiam lohna, a ruka inchhirna leh a ruka zahna chu an pai fo ṭhin. Chutiang lak ata chu ngaihdam theih i la ni e. 

Rom 3: 22 chuan, “Isua Krista an rin avângin tu pawh a ring apiangte chu Pathianin thiam a chantîr a ni, danglamna rêng a awm lo,” tiin a sawi.  

A tawp lam hi ka duh hle mai. Tu nge i nih a pawimawh lo. Eng thil nge i lo tih tawh emaw tu nen nge in lo tih tawh emaw – engtia rei nge i lo tih tawh emaw khawiah nge i tih tawh emaw  a pawimawh lo – chhandam theih i ni e. Ngaihdam theih i ni e. Isua Krista chu i rin phawt chuan engkim chu ngaihdam theih a ni. 

Thil engkim mai hian eng thil emaw an paltlang vek. Hun thim emaw lungngaihna leh rinhlelhna leh beidawnna i paltlang mek a ni thei. Chutiang chu i lo ni ve a nih chuan ka ring ngam ang che. 

Rilru hahna leh beidawnna chu i paltlang mek a ni thei. Ka ring ngam ang che. 

Buaina [confusion] i paltlang mek a ni thei ang. I nun chu engtiangin nge i kalpui ang a, khawi lam nge i hawi zel ang tih chu i buaina a ni mai thei. Engtiangin nge hmalam i pan zel ang tih chu i buaina a ni mai thei. Ring fan fan turin ka cho duh che.  

Lungngaihna ni i hmang mek a ni thei, i thinlung chu zau taka tih thlerin a awm a ni thei. Ring tlat turin ka cho duh che. 

“Nimahsela, amah lâwm apiang chu, an hnênah Pathian fate nih theihna tûr a pe, a hming ringtute chu.” [John 1: 12]

Eng thil pawh lo paltlang tawh la, Pathian lamah let leh la, amah chu tlansan suh. Amah chu ring la, amahah chuan i mamawh chu hmuin thlamuanna i chang ang a, chu chu hmun dangah i hmu ngai lo vang. I nihna pumpui kha pawm, hmangaih leh ngaihdam – eng ang dinhmunah pawh – i ni tih chu vawng tlat ang che. 

Ngaihtuah zui atan. 

Eng vangin nge mite chuan Pathian chhandamna leh khawngaihna chu pawm harsa an tih em em chhan chu ni ang? 

Pathian hmaa “thiamchantir” tih awmzia chu eng nge ni? 

I ṭhian emaw chhungte zingah chuan Rom 3: 22 thuchah mamawh em emtu chu tu nge ni? 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...