Sunday, April 30, 2023

SUM LEH PAIA INGHAH NGAMNA ZAWNNA TUR

 _Malsawmna Dawng Nun Rahbi_

- Rick Warren 

- April 30, 2023



_"Tin, ka Pathian chuan Krista Isuaa a ropuina ngahzia ang zelin in tlakchhamna tinreng pawh a phuhruksak ang che u."_ (Philippi 4:19)


Khawiah nge himna i zawn ang?


I bank account-ah emaw, i hnaah emaw, i sum peipunnaah emaw rinna i nghah chuan chu chu lungngaihna thlentu che a ni thei. Engvangin? A chhan chu chung thil zawng zawngte chu i hloh theih avangin a ni.


I hnen aṭanga tumahin an chhuhsak theih miah loh cheah himna i zawn a ngai: Pathianah! Pathian malsawmna dawn i duh chuan i hausakna ni lovin Pathian hausakna rin i zir a ṭul.


Hetah hian Bible-in Pathian hausakna chungchang a sawi: _"Tin, ka Pathian chuan Krista Isuaa a ropuina ngahzia ang zelin in tlakchhamna tinreng pawh a phuhruksak ang che u."_ (Philippi 4:19)


I hna kha i sum lakluhna hnar ber a ni mai thei e, mahse i inhumhimna a ni tur a ni lo. I hna kha i sum hmuhna kawng a ni a, a bul ber erawh Pathian a ni. Hei hi i hriatthiam chuan lungngaihna i tan tam takte kha an kiang ang. Ka han sawi nawn leh ange: i hna kha i sum hmuhna kawng a ni a, mahse a bul ber chu Pathian a ni.


In tuidehnaa tui herhhawna i herh a tui a lo haw lohin engtinnge i tih ang? "Khawvela tui zawng zawng a kang vek a ni maw! Tui a haw thei tlat lo mai, chuvangin he khawvelah hian tui a awm tawh lo chiang mai" tiin i sawi ang em?


Teh suh e. A tuizem ber kha harsatna thlentu a ni lo tih i chiang. Khawvelah tui tam tak a la awm tlat. A lo chhuahna kalkawng kha harsatna chu a ni, khawiah emaw hnawhtu a awm tihna a ni mai.


Chutiang chiah chu i nunkawng kha a ni. Tui lo chhuah kawng pakhat kha hnawh a nihin a vaiin a tawp vek tihna a ni lo. Pathianin a herh hawna dang awlsam takin a hawng thei.


I theihna leh chakna mil tawk lek Pathian a ni lo. I hnathawhnaah i chakna milin i thawk a ni thei. Mahse i hna kha i mamawh petu ber che a ni hauh lo. I hna khan Pathianin i mamawh a pekna che hmanrua mai chauh a ni.


I hna kha sum leh paia himna petu ber che ni a i ngaih tlat chuan i damchhungin him lo riauin i inhria ang. Pathian hi i mamawh petu ber che a ni tih i hriat a ngai. I mamawh tak leh a pek dan tur che i hriat theih nan amahah innghat rawh.


Hna chu kan hmu a, a liam leh mai bawk a. Kan bank account-te pawh a changin a lo pung vak a, a tlem leh a. Eibar te pawh a sang a, a hniam leh a. Eitur chhekkhawlte pawh a tamin a tlem thei. A pawi reng reng lo!


Engpawh lo thleng se, i him nan Pathian hausaknaah i innghat thei a ni.


Ngaihtuah zui atan.


Engtinnge Pathian hausaknaa innghahna hian i sum enkawl dan a nghawng?


I nunah khan tun hnaiah tui herh hawna hnawh pinin a awm em? Sum leh paia him nan engtinnge Pathian i rin, emaw engtinnge Pathian ring tura i beih?


I sum peipun leh enkawl dan khan i nuna i dah pawimawh engnge a entir?


[Lettu: Mapuia Fanai]

Saturday, April 29, 2023

PATHIAN CHU I CHHANHIMTU LO NI SELA

 _Malsawmna Dawng Nun Rahbi_

Rick Warren

29 April, 2023



"Ka nunna, Pathian chauh nghak rawh; Ka beiseina hi ama hnên atanga chhuak a ni si a.

Amah chauh chu ka lungpui leh ka chhandamna a ni: Ka kulhbing sâng a ni a; ka nghing lo vang.

Pathian hnênah ka chhandamna leh ka ropuina a awm a: Ka chakna lungpui leh ka inhumhimna chu Pathianah a awm." Sam 62:5-7


I hringnunah nangmah hrethiam lotu che leh ngaina lotu che i nei fo ang a. An sawisel ang che a, an teh ang che a, an bei ang che a, i chanchin dik lo pawh an tlangthantir ang.


Heng zawng zawngah hian, thil nihphung awm angah chuan lo beih let ve awm tak a ni a. An hriatdik loh che khan, lo inven i duh ve ngei dawn a ni. An beih che khan, beih let ve i duh ang a. An sawisel che khan, sawisel ve i chak ang a. An sawichhiat che khan, khin let ve i duh mai ang.


Ti ve miah suh! Chung aiah chuan, Pathian inchhantir zawk la. Beih i tawh a, sawisel, hriatthiam loh i nih apiang khan thlan tur pahnih i nei: mahni inchhan emaw Pathian inchhantir emaw a ni. A eng zawk nge ni ang le? Tu chuan nge chhan tha thei zawk che a i rin? Nang nge Pathian? Pathian zawk kha a ni chiang a ni.


Hei hi ngun takin han ngaihtuah teh: beihna te, dawtthu te, dik lo taka khinna hmaah i ngawih reng khan Isua i ang a lo ni reng tih hi. Pathian kutah i dah a, i ngawihsan khan Isua i lo ang ber a ni.


Bible chuan Isua kha, "Mi hauhva a awm laiin a hau ve thung lo va, a tuar laiin a vau lo va; fel taka ngaihtuah thintua hnenah chuan a inpe zawk a" (1 Pet 2:23) a ti.


Dik lo taka hekna leh sawichhiatnaah hian, Isua khan a bei let lo. A pawimawh ber chu, Pathian khan dik takin ro a rel sak anga, a chhanhim zawk ang tih a ring a ni.


Lal Davida khan a damchhung khan sawichhiat leh beih a tawk nasa em em a. A nihna takah chuan thikna avang pawh khan a nunna lak an tum fo a ni.


Mahse Davida thung chuan, "Ka nunna, Pathian chauh nghak rawh; Ka beiseina hi ama hnên atanga chhuak a ni si a.

Amah chauh chu ka lungpui leh ka chhandamna a ni: Ka kulhbing sâng a ni a; ka nghing lo vang.

Pathian hnênah ka chhandamna leh ka ropuina a awm a: Ka chakna lungpui leh ka inhumhimna chu Pathianah a awm" (Sam 62:5-7) a ti daih thung.


I hlawhtlinnaah mi thenkhatin an thik ang che a, thenkhat phei chuan an bei duh hial ang che. Mahse Davida ang khan, Pathian chu  humhimtu che, i Chhandamtu, i Vengtu, i Hnehna, leh i inhumna a nih a ngai a ni.


Pathianin chingfel sela. I tan, amah chuan chhan che rawh se.


Ngaihtuah zui atan...


Boruak tha lo han tawn chang hian i lo do let mai lohna turin eng thil tiin nge i lo inven theih le?


Beih i nih lai khan engatinge Pathian chuan ngawi tura a duh che? I dikna tilang tura bei let tur chea a duh mai loh chhan eng nge?


Miin i nungchang leh mizia an beihna khan nangmah aiin, anmahni nihna engtin nge a tihlan chian zawk fo thin le?


(Lettu: Msa)

Friday, April 28, 2023

NGHAH A NGAIH HUNA PATHIAN RIN DAN

 Malsawmna Dawng Nun Rahbi

By Rick Warren

— April 28, 2023



“Kei erawh chuan LALPA ka thlîr a, Min chhandamtu Pathian chu ka nghâk reng ang, Ka Pathian chuan ka aw a ngaithla dâwn si a.” [Mika 7:7]


Bible chuan chiang takin hringnun hun hrang hrang i paltlang dawn tih a sawi a. Pathianin thil pakhat a sawi nawn awn awn ṭhin chu nghah a ni.  


Mahse i hriat reng tur chu nghah lai mek chuan Pathian chu hna a thawk mek a ni. Nghah hun a thlen chuan Pathian chu hna a thawk ta lo tihna a ni lo. Dik tak chuan, chu hunah chuan a hruai mek che, a chhan chu chu hun chu i ṭhatna turin hna a lo thawk tawh ṭhin. 


Thutak chu hei hi a ni, i nuna hun tam ber kha eng emaw nghah nan i hmang fo dawn. Tichuan, Pathian i nghah lai chuan amah rin chhan dan i zir chhuak lo a nih chuan, i nuna hun tam tak chu Pathian ring lovin i hmang dawn tihna a ni thei. 


Pathian chu a hmanhmawh ngai lo; ani Chatuan mi a ni! Hna a thawh chang pawhin i nghah mek lai ngei pawhin amah rin i zir a ngai. 


Hetiang hian i zawt a ni thei, “Lalpa, engtikah nge? Engtikah nge a thlen dawn” Pathian chuan “Hemi hmang hian min ring thei ang” tihna ang deuh a ni. 


Hei hi mihring mizia dik tak a ni, “Nghak suh! A rang thei ang berin nei rawh,” tih chu. Chu chu hnam nun phung tam ber kalpui dan a ni. Mahse chu chu i nuna Pathian malsawmna kalhtu a ni thei – a chhan chu Pathian malsawmna chu nghaktu nunah a lo thleng ṭhin. Thuhriltu 3: 11 chuan, “Engkim hi an hun ṭheuhvah chuan mawi takin a siam a” tiin a sawi.   


Tunah khan nghah mek i nei em? School chawlh hun i lo nghak mek a ni thei. I “kawppui awm mi” i nun atan i lo nghak mek a ni thei a. I pasal/nupui i nghak a ni thei a, nau neih hun emaw, hna thar tha zawk i lo nghak mek a ni thei bawk. Thil kalphung chu a muang riauin i hria a ni thei bawk. Chu chu kan paltlang vek tawh.  


Bible-a thutiam chuan Pathian hnathawh thu min hrilh a ni mai lo va a hnathawh dan kalhmang pawh min hrilh bawk. Chu chu amah i nghah lai mek chu nangma tana i hauh a ngai: “Kei Lalpa hian a hun takah ka thlentîr thuai ang” tiin. [Isaia 60: 22]. 


Chu chu Pathianin Isua khawvela a tirh lai khan a thil tih chiah a ni. Khawvel khan kum sang chuang khawvela a lo kalna atan khan an lo nghak a ni. Ani chu a hun dik takah a lo lang ta a ni.


Tichuan Isua lo kal leh hun chu kum 2000 chuang kan lo nghak ta. Engtikah nge a thlen ang? Hun dik tak – Pathian hun ruatah chuan. Chu chu a lo let leh hun tur chu a ni.  


Chu chu i nunah ngei pawh nghah eng emaw i neih laiin i hmang ṭangkai thei ang. I hriat reng tur chu chhanna a hmuh mai loh hian Pathian chuan a hnar che tihna a ni kher lo. Pathianin “Ni lo” a tih chu “Tunah a la ni lo. He thilah hian min ring thei ang em?”  a tihna zawk a ni thei.   


Mika 7:7 chuan ““Kei erawh chuan LALPA ka thlîr a, Min chhandamtu Pathian chu ka nghâk reng ang, Ka Pathian chuan ka aw a ngaithla dâwn si a,” tiin a sawi. 


Chu chu rinna Pathianin mal a sawmsak ṭhin chu a ni. 


Ngaihtuah zui atan. 


Pathian chu I nuna thawk turin eng angin nge i lo nghah mek? I lo nghah mek thil chu engtin nge i lo dawn sawn ang? 


I hun ni lova a hun zawka Pathian nghah a ngaih chang chuan Pathian hnathawh chu i nunah chuan engtin nge i lo hmuh ṭhin? 


Dawhtheihna leh rinna zir chhuak thei turin engtin nge muangchang zawkin i chet chhuah theih ang? 


[*Lettu:* Peka]

Thursday, April 27, 2023

CHAK LOHNA THIL ṬHA A NI THEI

 Malsawmna Dawng Nun Rahbi

By Rick Warren

— April 27, 2023



“I hnên ata chakna dawng ṭhînte chu an nihlawh e.” [Sam 84:5]


I chau em? Phurna i nei tawh lo a ni thei a, ni i hman zawh apiang chuan i chakna i hmang zo ve nghal a ni thei. A chhan chu thil hote a ni: Mihring i ni tlat. 


I chakna chu a tlem a. Mahse Pathian chakna erawh tawpintai nei lo a ni. I chakna chu tiam chin nei a ni a. Pathian chakna erawh tiam chin awm lo a ni. I chakna chu hman zawh mai theih a ni a – chuvang tak chuan i chau ṭhin a ni! Mahse Pathian chakna chu hman zawh theih a ni lo. Pathian chakna chu a kiam ve thei mai lo va. Pathian chu a chau ve ngai lo. 


Sam 84: 5 chuan ““I hnên ata chakna dawng ṭhînte chu an nihlawh e” tiin a sawi. Pathian malsawmna chu i nunah chan i duh em? Chakna nei turin amah Pathian chu i rin chhan a ngai. 


Hudson Taylor-a kha kum zabi 19na laia China rama missionary huhang ngah tak a ni. Thlarauva pa ropui leh mithiam a ni. A upat hnu chuan a hriselna a tha lova, a awngrawp ta thuai a. A ṭhian pakhat hnenah lehkha a thawn a, “Ka chak lo ta hle a, ka thawk thei ta mang lo. Ka chak lo ta hle a, ka Bible pawh ka chhiar thei ta mang lo. Ṭawngṭai pawh ka thei ta mang lo. Nausen ang aiin Pathian rinchhana a ang chhunga awm mai bak theih ka nei ta love” tiin a ziak.  


I hun tawnah khan a chang chuan i chauh em avanga i ṭawngṭai theih loh chang te, Bible i chhiar theih loh lai te, Bible zirnaa tel theih loh lai te, engmah i tih theih lo changte a awm awm e. Chutiang hunah chuan engtiangin nge i awm ṭhin? Pathian chaknaah chuan chawl hahdam ang che – nausen ang maiin Pathian ban tha chakah chuan – ring bawk ang che.  


Pathian a hnaihtir che a nih ngai chuan i chak lohna pawh kha thil ṭha a ni zawk daih thei ang. II Korinth 12: 8-10 ah chuan Paulan hetiangin a sawi, “Chu chu mi lâk kiansak tûrin vawi thum Lalpa ka dîl a. Ani chuan, “ka khawngaihna i tân a tâwk e, ka thiltihtheihna hi chak lohnaah asin tihpuitlina a awm ṭhin,” mi ti a. Chuvângin, Krista thiltihtheihna chu keimaha a chên theih nân ka chak lohnate hi lâwm takin ka chhuang tawh zâwk ang. Krista avâng chuan chak lohnaah te, tihduhdahnaah te, harsatnaah te ka lâwm ṭhîn a ni; ka chak loh veleh ka lo chak leh ṭhîn a ni,” tiin.  


Chu chu Pathian rinchhan tih thu inkawkalhna chu a ni. I chak lo ang zelin, amah chu rinchhan dan i thiam ang. Amah i rinchhan tam ang zel chuan i lo chak deuh deuh ang. 


Ngaihtuah zui atan. 


Eng vangin  nge mahni chak lohna pawm emaw tihlan emaw chu a harsat em em? 


In khawtlang inzirtirnaa engtik lai pawhin in chak tur a ni tih chuan a hruai ve che?


Pathian chakna rin chhan tih chu eng nge a awmzia? Chu chu I nunah eng nge a nih chiah? 


[*Lettu*: Peka]

Wednesday, April 26, 2023

I NGAIHDAN NI LOVIN PATHIAN FINNA RING ZAWK ANG CHE

 _Duthusam Nei Tura Siam_

— Rick Warren 

— Apr 26, 2023



“I thinlung zawng zawngin Lalpa ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zel ang che; mahni ngaihin intifing suh la; Lalpa chu tih la, sual kalsan rawh.“ Thufingte 3:5-7


I thiltih tawh dik hle nia i hriat, mahse a tawpa diklo hle si i tawng tawh em?


Rilrua lang a awm thin a. Engtiklai pawhin a lang thin! Hla pakhat chuan heti hian a sawi, “Rilrua dik hle nia ka hriat kha engtin nge a dik loh theih?” Min tihder em ni? Thil diklo ni si dik deuha lang tam tak a awm a ni.


Thlaruk in inkawp hnuah chuan, hna thar i neih hnua i thilsawi kha i ngaihtuah chhuak ang, “Engtin nge khawvelah hian kan in man fuh theih zawk le?” Ngaihtuah chiang lova chet vutna chuan inthen laiin hrehawm lo angin lang mah se, a rei hnuah ser a siam thin a ni.


I nunah a theih chuan thihna kotlang leh hlawhchhamna hmachhawn loh i duh chuan Thufingte 3:5-7 hi ngaithla teh, “I thinlung zawng zawngin Lalpa ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zel ang che; mahni ngaihin intifing suh la; Lalpa chu tih la, sual kalsan rawh.”


I nunah Pathian malsawmna i duh tak tak a nih chuan, nangma ngaihdan emaw i rilrua lang ngai pawimawh lovin Pathian finnaah innghat zawk rawh. Kawng danga kan sawi chuan, Lalpa ring la, nangma hriatnaah innghat suh.


Engtin nge Pathian finna chu i lak ang?


Tawngtai la. Pathian pawl la, Bible chhiarin Pathian tawngtir rawh. Chutiang chuan Pathian finna i nei thei ang.     


Bible-in Jakoba 1:5 ah, “In zingah tupawhin finna a tlakchham chuan mi zawng zawng hnena hau lo leh ui lova pe thintu Pathian chu dil rawh se, chutichuan a hnenah pek a ni ang.”


Pathianin atthlak taka thil tisual turin a duhlo che a. Hlawhtling turin a duh che a ni. I hun, sum leh i chenpuite nen thutlukna fing taka siam turin a duh che a ni,


Thudik chu, Pathian tanpuina i nghak lova, amahin a nghak zawk che a ni! Hetianga sawi ang hi a ni, ”Hei! Heta hi ka awm, finna leh thilphalna ka pe ang che. Finna i neih ka duh a. I dil mai hi a tawk.”


Malsawma awm i duh chuan, Pathian finna i dawn a ngai a ni. Pathian finna i duh chuan, i dil a ngai a – tichuan dawng turin inhawng zau rawh.  


Ngaihtuah zui atan


* I rilrua lan dan anga thutlukna lian tak i siam lai kha ngaihtuah la. Eng nge a rahchhuah ni le? 


* Pathianin nangmahah engtin nge thu a sawi? Engtin nge a sawi tih i hriat?


* I nuna Pathian thiltumte i hriat theihna turin eng vangin nge nitinin amah nena inpawl a pawimawh?


*[Lettu: Sangpuia]*

Tuesday, April 25, 2023

ISUAN I BEIDAWNNA TAWP CHU BEISEINA TAWP NEI LOAH A CHANTIR

  _Duhthusam Nei Tura Siam_

By Rick Warren 

— April 25, 2023


“A ni, thih mai chauh hmabak tawhin kan inhria a, mahni inring lova, Pathian, mitthi kai thotu chu kan rin zawk theihna tur a lo ni. Chutianga thihna rapthlak ata chu Pathianin min chhanchhuak tawh a, min la chhanchhuak leh ang; min la chhanchhuak leh zel dawn tih, amahah chuan beiseina kan nghat a.” 2 Korinth 1:9-10

I beisei ang ngeiin i nunah Pathianin hna a thawk a ni. Tirhkoh Paula pawhin a hrechiang hle a, 2 Korinth 1:9-10 ah a sawi a ni, “A ni, thih mai chauh hmabak tawhin kan inhria a, mahni inring lova, Pathian, mitthi kai thotu chu kan rin zawk theihna tur a lo ni. Chutianga thihna rapthlak ata chu Pathianin min chhanchhuak tawh a, min la chhanchhuak leh ang; min la chhanchhuak leh zel dawn tih, amahah chuan beiseina kan nghat a.”

Hringnunah hian a chang chuan, thihna hial pawh hmachhawn tur angin — mihring lam thlirna aṭang chuan beiseina reng neih loh chang pawh i nei ang. Mahse chu thihna hmachhawnna chuan tum a nei a: Pathiana innghat turin a zirtir che a ni. A chang chuan hringnun hi a buai nuaiha kan thunun theih piah lam angin a lang ṭhin. Eng vangin nge chu chu Pathianin a thlentir? Mahni remhriatna leh finna ni lova amahah chuan rinna i nghah theihna turin a zirtir zawk che a ni. 

Hei hi a ni thudik chu: Hun kal tawhah khan Pathianin a chhanchhuak tawh che a, i tun dinhmunah chhanchhuah a duh che a, i hmalam hunah pawh a chhanchhuak ang che. Pathianin chhanchhuahna chu kawng thumin a hmang.

*1. A hun mil zela Pathian chhanchhuahna.* A chang chuan a hun mil zelin Pathianin chhanchhuahna thilmak a thlentir a, Tuipui Sen pawh a tichat a nih kha. Chutiang chu i nunah vawi engemawzat a thleng ang a. Amaherawhchu a thleng reng dawn lo thung a ni.

*2. Mimal taka Pathian chhanchhuahna.* A hun inthlakdanglam ai chuan, i chhungril kha Pathianin a thlak danglam ṭhin. Duhthusam, hmathlir, ngaihtuahna leh thlirna thar a neihtir che ani.

*3. Pathian chhanchhuahna tluantling chu vanramah.* Pathianin i harsatna zawng zawng tihkian emaw chinfelsak vek che hi a tum lova. He Leiah hi chuan natna, lungngaihna leh hrehawmna a bang lovang. Chhanchhuahna tluantling chu nakinah van hmunah a ni ang a, natna, lungngaihna, hrehawmna leh buaina zawng zawng a bo tawh ang.

Vanram luh dan chu kawng khat chiah a awm a. Isuan, “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo” a ti. (Johana 14:6). Thihna hmachhawn tur ang hiala beidawnga i awm pawhin, Isuan i beidawnna tawp chu beiseina tawp nei loah a chantir thei a ni. 

Thihna kotlangah i ding em ni? Chu i dinhmun leh nangma nunna ngei chu Isua Krista hnenah hlan turin ka sawm che a. Isuan a ngaihsak fo angin a ngaihsak ang che.

Ngaihtuah zui atan

* Engti kawng zawngin nge Pathian chhanchhuahna chu i lo paltlang ve tawh?

* I rinna chu eng chen pawh nise, i nunah Pathian hnathawh engtin nge i beisei?

* Rinnaa i zinkawngah hian harsatna emaw thihna kotlang hial i hmachhawn laiin Isua Krista i rinna hian engtin nge a tihdanglam che?

*Isua kaltlanga chhanchhuahna chu engtia chan tur nge*

Thihna kan hmachhawn laia Pathian chhanchhuahna tluantling chu vanram kaltlangin - Isua rin avang chauhin neih theih a ni.

Bible chuan, “Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan” a ti. (Johana 3:16).

Pathian thutiam chatuana nunna chu chang turin i inpeih em? I inpeih a nih chuan, hetiang hian ṭawngṭai rawh le:

“Lalpa duh tak, misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”

Isua vuan tura i ṭawngṭai thei a nih chuan, khawngaihin Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Friday, April 21, 2023

HUN HARSAT LAIIN I CHUNGAH THIL PAWIMAWH BIK A THLENG

 Duhthusam Nei Tura Siam Kan Ni

By Rick Warren

— April 21, 2023

“Chu veleh, Paula chuan sipai za hotu leh sipaite hnênah chuan, “Hêngho hi lawnga an awm reng loh chuan in him thei lo vang,” a ti a” [Tirhkoh 27:31]

Hringnunah buaina emaw, harsatna emaw natna eng emaw i tawh changin mi ṭha zawkah an siam thei che a, mi ṭha lo zawkah an siam thei bawk che. I ṭhang lian thei a, i tlawmsan thei bawk. Pathian duhzawng ang mihring i ni thei a, mihring thinlung sak tak i ni thei bawk ang. 

Hun harsa i paltlang lai chuan i nuna thil thleng ang thova pawimawh chu i chhungrila thil thleng chu a ni. I mizia chu chatuan thlenga chhawm tur a ni a – i thil tawn erawh an ni lo.  

Mihring nuna thil fel lo i hmachhawn dan chu nangmaha innghat an ni. Chuvang tak chuan tun huna i thil tih tur chu nangma thlan fel tur an ni ang. 

Tirhkohte bu 27 chuan fiahna kan paltlang laia hmachhawn dan chi thum min kawhhmuh a, chuta ṭang chuan Pathianin engtiangin nge hmachhawn tura min duh kan hre thei: 

 *1. Thle thle lovin en bik nei rawh.* “Lawng chu a rawn chhêm vir nawk a, thli lam hawia kar her rual ni ta hek lo, a duh duha len tûrin kan awm ta a, min lên min lên ta mai a.” [Tirhkohte 27: 15]. Paula leh mitang dang phurtu lawng Rom khawpui pan mek chu Mediterranean tuipuiah chuan ni eng hmu lovin ni 14 a thang tawh a. An khawsak a mumal tawh meuh lova, an then an then tawh mek a ni.

Mi ṭhenkhatten harsatna an tawh chang chuan buai taka then then an awm ṭhin. Tum mumal an nei lova, dam chhan, thlen tumna leh hmathlir pawh an nei lo. Tunlaiah chuan “fawr” tihte pawhin kan sawi thei ang. Fawr buaithlakna lai chu hun awlsamah chauh i fawr thei chu a ni. Hring nun hi a awlsam lova, a harsa em em si. I thil tum emaw i hmathlir emaw chu tlawmsan mai suh hun harsa i paltlang lai chuan.   

 *2. Tlawmsan suh, vuan tlat rawh.* “Thli leh tuifâwn chuan min vawrh reng avângin, a tûkah chuan lawng bungraw phurh chu an paih ṭan ta a” [Tirhkohte 27: 18]. Lawng chhunga thuneitu chuan lawng chu a tihzan a ngai a, tichuan an bungraw eng emawzatte chu tuiah an paihchhuak ta a, an thawmhnaw leh an chaw dah ṭhatte pawh an paih ta zel a. A chhan chu thlipui a nat em avang chuan, an thil mamawh ngawih ngawihte pawh an paih ta zel tihna a ni.   

Thlipuiin a nuai chang che leh i buaina chu tuar a harsat chang chuan hun ralmuanga i tih duh loh thleng thlenga i tih chang a awm ang. “Nupui pasal neih hi ka peih tawh lo” emaw “College kal ka lo tumna hi chu ka tlawmsan mai ang” i ti pawh a ni thei ang. 

Mahse Pathian chuan “Lawngah chuan awm rawh!” a ti. Pathian chuan hun harsa chu mite tihdanglam nan a hmang fo. Hun harsa tlanchhiatsan chu Pathian ruahmanna a ni ngai meuh lo. Pathian chuan zir a, ṭhang lian a, hmasawn turin a duh che – chutiang ti tur chuan englai pawhin i kiangah a awm. 

 *3. Beidawng lovin Pathian beisei rawh.* “Dam rêng kan inbeisei tawh lo” [Tirhkohte 27: 20] An bungrua, thawmhnaw leh ei tur an paih atanga ni 14 hnuah chuan lawnga chuangte chu an beidawng ṭan ta a. Mahse thil pakhat an theihnghilh tlat: Thlipui karah pawh, Pathian chu thuneitu a ni tih chu. A kalsan lo che. A awm tih i hre chiang lo mai thei, Pathian chu i lak aṭanga hla taka awm anga i ngai a nih pawhin, amah a nih loh chuan tu nge ni ta chuang ang!

Pathian chu thlipui karah chuan i kiangah a awm, tih a kaltlangpui ang che. Thlipui piah lamah chuan nakinah i nungchang chu siam ṭhain i rinna a sawhnghet a ni tih i la hre fiah ang.  

Ngaihtuah zui atan. 

I nuna khawi lai tak kha nge zalen taka then vel mai mai chu? Tum mumal tak engtin nge i zui theih ang? 

Engtin nge hun harsa chu i tlanchhiatsan theih ang? Hun harsa chu engtin nge i tuar theih ang? Chona hrang hrang i hmachhawn dan chuan engtin nge i mizia a thlak danglam?  

I nun khawi lai khan nge beidawng turin thlem che? Tawngṭaina hun hmang la, Pathian chuan a awmpui dawn che a ni tih ring ang che, a awm a ni tih i hre thei lo a nih pawhin. 

 *Isua chu eng ang takin nge i thlan?* 

A thutiam chatuan nunna chang tur chuan i inpeih tawh em? Inpeih tawh a nih chuan he thu hian ṭawngṭai ang che: 

Pathian chuan a hmangaihna chu a Fapa, Isua Kristaah chuan a lantir a. Bible pawhin hetiangin a sawi, “Pathianin khawvel a hmangaih em em a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zawk nan." [Johana 3: 16] 

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zin kawng atana thuziak pawimawh tak tak lo thawn che ka duh e. 

[ *Lettu* : Peka]

Thursday, April 20, 2023

THLIPUI TINTE CHU ZIRNA IN, FIAHNA TINTE CHU ZIRTIRTU

 Duhthusam Nei Tura Siam Kan Ni

By Rick Warren

— April 20, 2023

“Rei lo te chhûnga kan hrehawm tuar nêp tak hian chatuan ropuina, khaikhin rual loh khawpa nasa chu min siamsak a ni.” [2 Korinth 4:17]

Hring nuna harsatna kan tawh changin, kan thiltih hmasak ber ni fo chu tute emaw dem a ni fo. Mahse, i buaina lo chhuahna bul chu thil pawimawh ber a ni lem lo – Pathian chuan i nun tan chhan ṭha tak a lo nei zawk a ni ang.  

Pathian ruahmanna chu i harsatna leh natna aia lian zawk chu a ni. Ruahmanna mumal a nei! Tuna i natna kha en kanin khuareia i ṭhatna tur zawk awm thei chu i thlir a ṭha ang. 

Rom 5: 3-4 chuan hetiang hian a sawi, “Tin, chuti chauh chu ni loin, kan hrehawmnaah pawh lawmin i awm ang u, hrehawmna chuan chhelna a siam a, chhelna chuan hriatfiahna a siam a, hriatfiahna chuan beiseina a siam tih kan hre si a,” tiin. 

Buaina leh harsatna i tawh chhan chu eng nge ni? Pathian chuan eng emaw zir turin a duh che a ni. Thlipui zawng zawng chu zirna in a ni a. Harsatna tinte chu zirtirtu an ni. Tawnhriatte chu zirlai an ni a. Harsatna zawng zawngte chu hmasawnna tur an ni. 

Mi tam berte hi chu thil zir muang tak kan ni. Thil eng pawh a vawikhatnaa in thiam lo a nih pawhin Pathian chuan a lo thar thawh leh ṭhin. A lo lan leh ṭhin chhan chu Pathian chuan i nawmna aiin i nungchang zawk chu a ngaih pawimawh vang a ni. Ringtu ṭha tak anga i awm lai hmuh chu nuam taka i awm lai aiin a hmu chak zawk daih. 

Tunah khan harsatna lian tak i tawk mek a ni thei. Natna, inthiamlohna, sum chungchanga buaina, midang nena inlaichinnaa buaina a ni thei ang. Chu harsatna i paltlang lai chuan Pathianin i hnenah thu a sawi em? Teh reng mai. Pathian chuan he thu hi a sawi ngei e, “Beidawng mai suh; ṭhang zel rawh. Kha natna hmunah khan keimah ang deuh deuh turin ka siam dawn che a ni,” tiin. 

I harsatna kaltlang khan Pathian chuan a tih tum hlen chhuak rawh se – a siam ang mihring ang deuh deuh turin tidanglam che rawh se. 

He thu hi ring ang che: “Rei lo te chhûnga kan hrehawm tuar nêp tak hian chatuan ropuina, khaikhin rual loh khawpa nasa chu min siamsak a ni.” [2 Korinth 4:17]

Ngaihtuah zui atan. 

I harsatna chungchanga midang i dem chuan, chu buaina chuan engtin nge i thlarau leh rilru a nghawng? 

I nunah khan engtik hunah nge Pathian hmatlir chu i buaina leh natna ai chuan an lian zawk tih i lo hmuh ve tawh? 

Eng ang natna nge i lo paltlang ve tawh mek? Chu dinhmunah chuan rinawmna tih awmzia chu eng ang nge ni ta ang? 

[Lettu: Peka]

Wednesday, April 19, 2023

HARSATNA KALTLANGA PATHIAN ZUI DAN KAWNG THUM

  _Duhthusam nei tura siam kan ni_

By Rick Warren 

— April 19, 2023


“Khawvelah hian hrehawmin in awm thin; nimahsela thlamuang takin awm rawh u, keiin khawvel ka ngam ta” Johana 16:33 

Rinna a ke pen dan kawng ruk kan zir mek kha a ni a — duhthusam, thutlukna, khawtlaina, harsatna, thihna leh hruaichhuahna —heng kaltlang hian rinnaah kan ṭhang ve zel a, kan nungchang thlengin a insiam ve zel a ni.

A palinaah chuan i zinkawngah harsatna i paltlang mek kaltlangin Pathianin rinna kawngah ṭhanna a pe thung che a ni . Chung harsatnate chu fiahna a ni a, Pathian hruaia i awm zel theihna tura hun remchang a siamsakna che a ni.

Tirhkohte Bung 27-ah khan Paula leh mi tang dangte chu Rom panin harsatna tam tak paltlangin an kal a nih kha. Kawng dang aṭanga thlir chuan lawnga an zin mek laiin, Paulan lawngpute hnenah an kal zel a nih chuan thlipui na takin a nuai anga, an chan chu a chhe hle dawn a ni tih a hrilh a. Lawngpute chuan kal chhunzawm an la tum fan a ni.

Lawngputen harsatna an tawh ang hi pumpelh tur leh— rinawm taka Pathian kan zui theihna turin—harsatna kan tawh lai pawha kan hriat reng tur kawng thum ilo en ho teh ang:

*Mi dang ngaihdan ni lovin, Pathian ngaihdan chauh zawm rawh.* Paula te zinnaah khan, “Nimahsela sipai za hotu chuan Paula thusawi ai chuan lawngpu leh lawng neitu thu a awih zawk a.” (Tirhkohte 27:11). A chhan chu mithiamten a pawina a awm lo an tih avang a ni a, sipai za hotu chuan Pathian aṭanga inralrinna chu ngaihthahin tuipuia kal zel chu a ti ta zawk a ni.

Pathianin tih tur tuk che sela, mithiamten tih tur dang tuk bawk che sela, Pathianin a sawi chauh awih ang che. A aw chauh hi ngaihthlak a pawimawh a ni.

*A tam lam ni lovin, Pathian zawk zui zel rawh.* Paula te lawnga an zin khan, “a tam zawk chuan lawng chu chawl lovin kal zel se an duha” (Tirhkohte 27:12). Thlasik tuar nan litengsawl chu a rem loh avangin a tam zawkin, chuta tanga tuifinriata kal chhuaha Phoiniki khua thlen hrama chuta thlasik tuar an rawtpui a; A tam zawk ngaihdan hi a sual ve thei tho a ni! 

Thiante min nawrna avangin Pathian duh dan kan hnawl fo ṭhin. Mi tam tak te zinga pakhat chu Pathian a ni tih hrereng ang che.

*I dinhmun ai chuan, Pathian thu zawm zawk rawh* “Tin, chhim thli chu zawi zawia a lo tleh veleh chuan, an duhzawng an hmu emaw an ti a, thirchakai chu an khai chhuak a,... Nimahsela rei lo te achinah khawmual lam atang chuan thli na tak a lo tleh chhuk ta a” (Tirhkohte 27:13-14). Thli chuan a rawn nuai mek a ni tih Paulan a sawi chung pawhin, an kal lui zel thova.

Hun remchang i hmuh avang ringawtin, chu hun remchang chu i bawh zel tur tihna a ni chuang lo. Hnathawh tur an kawhhmuh apiang che emaw pawn lama kalchhuahpui tura an sawmna apiang che emaw chu i chhang zel tur a ni lo. Setanan hun remchang tak pawh a ruahman thei! Pathian hnen aṭangin kaihhruaina i dil zel a ngai a ni.

I nunah eng harsatna pawh tawk mah la,  Pathianah chuan rinawm tlat ang che, amah zui leh a thu awih chu a rintlak ber fo a ni.

Ngaihtuah zui atan

* Rinnaa i zinkawngah hian Pathianin engvangin nge harsatna i tawh a phal nia i rin?

* Vawiina kan zir aṭang hian eng ang thutlukna dik lo nge i lo siam ve tawh, chu chuan engtin nge harsatna a siam che? Chumi aṭang chuan Pathianin engtin nge a hruaichhuah leh che?

* Vawiina i harsatna tawh hi eng nge? Harsatnaah pawh Pathianin rinawm tlat turin engtin nge a koh che?

*[Lettu: Sangpuia]*

Tuesday, April 18, 2023

KHAWTLAI NIA I HRIATNAAH PATHIAN RINAWMZIA THEIHNGHILH SUH

  _Duhthusam nei tura siam kan ni_

— Rick Warren 

— April 18, 2023


“Aw ka nunna, LALPA chu fak la, a thiltih ṭhat zawng zawng chu theihnghilh suh u.” Sam 103:2

Kan duhthusam te tihkhawtlai anih chang hian, thil han theihnghilh mai te kan ching ṭhin. Kan tana Pathian thiltihte  leh hun kaltaa a ṭhatnate kan theihnghilh ṭhin a ni. Pathian chu kan hnenah a awm tih kan theihnghilh a. Pathianin kan tum puitlin turin a thiltihtheihna a hmang tih kan theihnghilh ṭhin.

Israel fate khan khatiang chiah khan thlalerah an lo tisual tawn a ni: “Min thlahtute khan Aigupta rama i thilmak tihte kha an hre thiam lo va; I ngilneihna nasa tak kha an hre reng ta lo va: Tuifinriatah an hel ta zawk a, Tuifinriat Senah khan. Chuti chung pawhin ama hming avângin anni chu a chhandam ta a, a thiltihtheihna ropui tak chu a hriattir theihna tûrin. . . Nimahsela a thiltihte chu an theihnghilh ta thuai a; a remruat chu an nghak peih lo va” (Sam 106:7-8, 13). 

An hriatrengna a reilohzia chu mak tak a ni! A mite chhanchhuahnan Aiguptaah Pathianin hri vawi 10 a lentir a. Reilote hnuah Israel faten Pathian thiltih chu an theihnghilh nghal a, Tuipui Sen an kan dawn chuan, "Kan thi vek dawn anih hi" an ti a. Pathian hnathawh an theihnghilh tawh a ni.

Tichuan, Pathianin maktak maiin Tuipui Sen chu a tikang chata, lei char chu an zawh kai a, mahse tuihal dangcharin an thi mai dawn nia an inhriat lai chuan an theihnghilh zo ta vek a ni. Mahse reilote hnuah Pathian thlalerah tui a pe leh ta a. Mahse reilote rilṭama an awmhnu chuan an theihnghilh leh ta a ni.

Pathianin an tana a thawhsakte an theihnghilh zel a ni!

Mahse, keini pawh anmahni ang tho kan nih avangin kan dem ve thei lovang. Thil engemaw kan nunah khawtlai hlek a awmin Pathianin engmah min thawhsaklo angin kan awm ṭhin. I nunhluiah khan Pathianin engemaw tal a tihsak tawh che em? A ti chiang a ni. Naktuk leh a tukleh zel ah pawh Pathian hnathawh chu chhiartur i hmuhbelh zel ang.

Theihnghilh daih lovin, Pathian thutiamte chu hriat tum zawk rawh. Bible ah hian vawi 7000 chuang lai mai Pathian thutiam kan hmu a ni. Harsatna i tawh apiangin thutiam chu zawng rawh 2 Timothea 2:13 ang hian: “Keini rinawm lovin awm mah ila, ani chu rinawmin a awm reng a ni; amah leh amah a inphat thei si lo va.” I harsatna tawhte aiin Pathian thutiamte chu a nasa zawk a ni!

Pathian thutiam nangmahah a la hlawhtlinglo anih chuan, a la nghak che tihna pawh a ni thei a ni. Hlauhlohna te, lungnihloh lohnate, theihnghilhlohna te zirturin min duh a ni. Thutiam a pek hma chein nangmah kha siam puitlin phawt che a tum a ni.

Pathianin vawilehkhatah thil a ti nghal thei ngei mai —mahse hna ropui zawk thawh a tum tlat thung a ni. Tihkhawtlai deuh thil a awm pawhin Pathian thiltum an tichhe chuang lo. I nunah Pathian thiltum a tihlawhtling zawk a ni.

“Aw ka nunna, LALPA chu fak la, a thiltih ṭhat zawng zawng chu theihnghilh suh u.” Sam 103:2

Ngaihtuahzui atan

* Pathianin engthil a tihsak che aṭangin nge a rinawmzia a tihchian?

* I duhthusam tihkhawtlaia a awm laiin engtin nge Pathianin a lo tihthianghlim che?

* Pathian i nghahmeknaah hian i thil ngaihdanah eng nge thlak danglam ngai i neih?

*[Lettu: Sangpuia]*

Sunday, April 9, 2023

ISUAN A TIHNGHEH TAWH CHU I HLOH THEIH TAWH LO

 _Isuan Engnge  A Tih Mek?_

- Rick Warren

- April 9, 2023



"Ka berâmte chuan ka âw an hre ṭhîn, kei pawhin an âw ka hria a, min zui ṭhîn a ni. An hnênah chatuana nunna ka pê a; an boral leh tawh ngai lo vang a; ka kut aṭangin tûma’n mi chhuhsak lo vang." (Johana 10:27-28)


Pa a fate hmangaih thei tak angin Pathian pawhin a fate tumah hloh a duh lo. He khawvelah hian sual thiltihtheihna chi hrang hrang a fate tina theitu tam tak a awm. Engvangin? A chhan chu Pathian fate an tihnat chuan Pathian an tina thei dawn a ni.


Mi Pathian hnena nun hlan duh, mahse an thu tiam hlen loh hlauhna nei hi thil thleng fo a ni. "Ka nunah hian thlemna tam tak ka tawk fo va, chhandam ka nihna hi ka vawng reng theiin ka ring lo" an ti fo ṭhin.


Mahse, i sual lak aṭanga i inchhandam thei lo ang bawkin nangmah pawh i inchhandam thei chuang lo. Chu chu Isua tihtur a ni. Engpawh i nunah thleng se i chhandamna chu a him a ni tih a chiansak ang che. Vanramah Pa hnenah chatuanin i chêng dawn a ni tih a ti chiang a ni.


Lal Isuan Johana 10:27-28 ah, _"Ka berâmte chuan ka âw an hre ṭhîn, kei pawhin an âw ka hria a, min zui ṭhîn a ni. An hnênah chatuana nunna ka pê a; an boral leh tawh ngai lo vang a; ka kut aṭangin tûma’n mi chhuhsak lo vang"_ a ti.


Pathian i vawnna kha thlah duhna i nei a ni thei mahse, ani chuan a thlahthlam ve ngai lovang che. Chu chu chatuana himna chu a ni, Isua hna a ni, i hna ni lovin.


Tirhkoh Paula chuan Isua chungchang hetiang hian a sawi, _"Chuvâng chuan a ni hêng thil hi ka tuar ni; nimahsela, ka zak lo ve, ka rina chu tunge a nih ka hria, a hnêna ka kawltir tawh chu chûmi nî a lo thlen thleng chuan min vawn himsak thei tih ka hre si a."_ (II Timothea 1:12)


Chu chu Lal Isuan tun kan khawvela a tih mek chu a ni. I chhandamna chu a venhimsak che a. Rinnaa Pathian chhungte nih thlang zawng zawng te chhandamna chu a venghim a ni.


I nunah thil tam tak i hloh thei. I chhungkua te, i hna te, i hriselna te emaw i rilru hial pawh i hloh thei e. Mahse, i hloh ve theih ngai loh chu i chhandamna kha a ni.


Chhandam ni turin i thawh ve a ngai lo, vawng him tur pawhin i thawh a ngai chuan lo. Pathian thil tih sak che ah chuan i chawl thei!


Ngaihtuah zui atan.


Pathian chhungte i nihna anga i himna chuan eng ti turin nge zalenna a pek che?


Mi ten engvangin nge an thawhchhuah ni lo an dawn te rin harsa an tih ṭhin?


Pathianin chatuan a chhandamna min pek tuin nge hria se i tih? I ringtupuite chatuana an himna thu chungchangah fuih ngai leh hriat nawntir ngai an awm em? Vawiinah hian anni chu engtin nge i hriattir ang?


*I chhandamna kha Isuaah a him*


Bible chuan Pathian fapa Lal Isua Krista i rin chauhvin vanram i lut thei ang a ti. I thawhchhuah theih a ni lo. _"Khawngaihna avânga rinnaa chhandam in ni a, chû chu nangmahni lama chhuak a ni lo, Pathian thilpêk a ni zâwk e; thiltih avâng pawh a ni hek lo; ni se mi tupawhin inchhuan phah nân an hmang mai dâwn asin."_ (Ephesi 2:8-9)


Isua hnena i nun hlan i duh chuan hetiang hian ṭawngṭai bul han ṭan ta che:

"Lalpa duhtak, I Fapa Isua Krista ka rin chuan ka tihsual zawng zawngte min ngaihdam a, ka nun chhan ka zir ang a, tichuan, engtik niah emaw I chatuan hmun a min thlen ve i tiam a.


"Ka tisual a ni tih ka puang a I ngaihdamna ka dil a ni. Isua kha ka tan a thi a a tho leh a ni tih ka ring a. Isua chu min chhandamtu a pawm a, vawiin aṭang hian a hnungzui ve ka duh e. Ka nun min hruaiin I duhzawng min zirtir ang che. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


[Lettu: Mapuia Fanai]

Saturday, April 8, 2023

ISUA CHUAN A TAWNGTAI SAK CHE

 _Isuan Engnge A Tih Mek?_


Rick Warren

8 April, 2023



"An tan ka ngensak hi; khawvel tana ngensak ka ni lo, nangin mi pekteho tan zawk a ni; i ta an ni si a. Thil zawng zawng ka ta apiang i ta a ni e, i ta chu ka ta a ni e; anmahni avangin chawimawiin ka awm thin." Johana 17:9-10


Isua hian i tan a tawngtai reng tih i hria em? Bible hian i tan a tawngtai fo tih a sawi nawn fo a. 


"Ngawi lawk teh, Isua chu Pathian a ni lawm ni? Amah leh amah hnenah engtin nge a tawngtai theih ang?" i ti mai thei.


Mahse han ngaihtuah mahla: mahni leh mahni i inbe fo lo maw! A chhan chu Pathian anpui a siam i ni. Isua chu Pathian a ni a, a ni chu Pathiana minung pathum - Pa, Fapa, Thlarau Thianghlim zinga mi a ni a. Nangma chuchang hi amah leh amah a inhrilh ve fo a ni. A tan i hlu em em a. A ngainat em em chu i ni a. A ngaihtuah em em che a, a sawi fo che a ni. Chutiang khawp chuan a ngaihtuah che a ni.


Isua Krosa a tih hma pawh khan, i tan a tawngtai daih tawh a. Johana 17:9-10ah chuan, "An tan ka ngensak hi; khawvel tana ngensak ka ni lo, nangin mi pekteho tan zawk a ni; i ta an ni si a. Thil zawng zawng ka ta apiang i ta a ni e, i ta chu ka ta a ni e; anmahni avangin chawimawiin ka awm thin" a ti a.


Isuan, "Lalpa pui rawh" a tih hi Pathian hian a hre reng a. Hei hi in tawngtaisakna niin, a awmzia chu midang aiawhin a ding tihna a ni. Midang tana tawngtaina  hi midang tawngtai sakna an ti mai a. Midang tan i tawngtai thei a, chu chu i tana Isua tih dan pawh a ni reng a ni.


I nun engkimah Isua chuan i tan a tawngtai a. Pathian a nih miau avangin a ti thei a ni. A buai ve ngai lo. A phili ve ngai lo bawk a. Vanah Pa Pathian dinglama thuin i tana sawisak tu a ni, "Thia kha Krista Isua chu a ni si a; a ni, tho leh ta zawk a, Pathian ding lama awma min sawisaktu bawka kha a ni" a ti a (Rom 8:34). Chumi awmzia chu i tluk palh emaw i tihsual khan, Isua khan Pa Pathian lamah han thle-in, chu i tihsual man chu a pe vek tawh tih a hrilh thin a ni. Tlak vek tawh a ni.


Isuan i tan a tawngtai avangin, tawngtaina mai tur hre mai lo mahla, engtikah pawh tawngtaina mawlte hmang pawhin i tawngtai thei reng a. "Isu, ka tan tun thlenga i tawngtai avangin ka lawm e, a chhan chu harsa ka ti em thin a ni" ti mai pawhin i tawngtai thei a ni.


Isua hnenah i tawngtai thei a. Isua hmingin i tawngtai thei a. I tan Isua a awm reng tih hria khan thlamuang takin i awm thei bawk a ni.


Ngaihtuah zui atan...


Isuan a tawngtai sak che tih i hriatna khan i rinna engtin nge a puih?


I tan a tawngtai a ni tih hre chungin, thil kalsual chang awm mahse, engvangin nge Isua chu i rinngam ang?


'Isua hmingin' kan tawngtai hian engvangin nge thiltihtheihna a ken tel le?


(Lettu: Msa)

Friday, April 7, 2023

PATHIANIN KHAWVELAH ENG NGE A TIH?

 Isuan Eng Nge A Tih Mek?


By Rick Warren

— April 7, 2023



“Ama duhzâwng leh a tum dân ang taka Isua Krista zâra a fa ni tûrin min lo ruat lâwk tawh bawk a.” [Ephesi 1:5]


Pathian chuan khawvelah hna a thawk reng țhin. Mahse a thiltih ropui ber erawh chu Chhungkua chatuan atana Hmangaih tur a buatsaih chu a ni. 

 

Pathian chuan leilung a din hma atang tawh khan a chhungte chungchang chu a duang lawk tawh a. Dik tak chuan, Pathian chuan chhungkua chu lo duh lo ta ang sela chuan, khawvel leh van zawng zawngte hi an awm lo vang! Khawvel chanchina thil thleng zawng zawngte leh thleng zel turte chu leilung tana Pathian hmathlir atanga te tak te mai an ni: Pathian chuan chhungkua a duh a ni. 


Ephesi 1:5 chuan hetiang hian a sawi, “Ama duhzâwng leh a tum dân ang taka Isua Krista zâra a fa ni tûrin min lo ruat lâwk tawh bawk a.” 


Tisa chhungte neih dan chu kawng hnih a awm thei a: Chu chhungkuaah chuan i pian emaw fa lak emaw i nih a ngai ang. Pathian chuan chu chu chhandamna hnathawhna atan a hmang tih Bible-ah kan hmu. Isua Kristaa i rinna i nghah chiah chuan, i lo piangthar ta a, Pathian chhungte zingah chuan i lo tel ve ta a ni.  


Mihring chhungkua chu rei lo te atan mai a ni a. Mahse Pathian chhungte erawh, thlarauva i chhungte chu – kohhran chu – a nghet a. Chatuan atan a ni. Chatuan chatuan atan a ni a chhan chu Isua Kristaa an rinna nghettu leh an nun tihdanglam tawhte chu an ni tlat.  


Hebrai 2: 11-ah chuan hetiang hian kan hmu, “Tithianghlimtu leh tihthianghlimte chu Pa thuhmun aṭanga chhuak an ni; chuvângin, anniho chu ‘unaute,’ tih a zak lo ve,” tih thu chu. 


I hre thiam em? Isua chuan a unaute tia koh che a duh a ni!


Pathian chhungte zinga tel ve chu thilthlawn pek a ni. Rom 6: 23 chuan hetiang hian a sawi, “Sual man chu thihna a ni si a; Pathian thilthlâwnpêk erawh chu kan Lalpa Krista Isuaah chuan chatuan nunna a ni ,” tiin. Mahse chu chu duhthlanna rinna nena siam ngai thil a ni. Chu chhandamna thutiam chu i pawmin i hnawl thei ang. 


Isua chuan krawsah thiin a nun a hlan tawh che a, i hun kal tawh chu ngaihdam a ni thei a, dam chhan neiin i nung ang a, vanramah in i nei tawh. 


Pathian, Pa chuan a chhungte chu chutianga amah ang tur chuan a duh. Tichuan, a chhandamna thilthlawnpek i pawm chiah chuan thinlung zawng zawnga amah hmangaih turin i intiam a ni mai lova, a chhungte zawng zawng pawh hmangaih turin i intiam tihna a ni – a chhan chu Pathian chu hmangaihna a ni. 


Pathian chu chhungkua dinin hna a thawk reng a. Chumi awmzia chu engtik lai pawhin i zawm thei tihna a ni!


Ngaihtuah zui atan. 


Eng vangin nge Pathian chuan he leia a chhungkua hi a chatuan chhungkua tarlang tur chuan a duh? 


Engtiangin nge Pathian kohhran chu a sak kawngah leh a ṭhannaah chuan tha i thawh ve? 


Eng vangin nge kohhran chu Isuan min hmangaih ang chiaha midang hmangaih zirna hmun ṭha a nih? 


*Pathian chhungte zinga tel ve tura sawmna chu zau taka hawn a ni.*


Eng thil pawh lo ti tawhin khawi hmunah pawh lo awm tawh mah la, Pathian chatuan chhungte kiangah chuan nangmah nghakhlel taka lo thlirtu i nei a. Ring la chang mai rawh. 


I inpeih tawh em? He ṭawngṭaina hmang hian bul i ṭan thei ang:


“Lalpa duhtak, ka thih hun chuan keimah chanchin ngei hi ka lo sawi dawn a ni tih ka hria a. I lakah thil ka tisual a ni tih ka hria a, ka duh dan anga nungin, i duh dan nilo zawnin ka nung ṭhin. Tun aṭang ngei hian chu chu thlak danglam ka duh e. Ka sual kalsan a, i lam lo pan ka duh e. 


“Ka sual zawng zawng aia Isua thi tura i rawn tirh avang khan hremna ka pumpelh ta a, lawmthu ka rawn sawi e. I ngaihdamna chu ka phu lo tih ka pawm a. I khawngaihna chauh chuan min chhandam thei tih ka hria e, Lalpa. Hmun famkima lut tur chuan ka ṭha tawk ngai dawn lo tih pawh ka hria. 


“Isu, min hmangaih em avangin ka sualte i phur a, lawmthu ka hrilh a che. Vanram kai tlaka min siam a, min chhandam turin i khawngaihna ka rawn ngen e. Ka ring che, Isu. I thutiam ang takin min chhandam nghal dawn tih ka hria, chiang takin, ka pumin, chatuan atan. Isua hmingin ka dil e. Amen.”


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 


[ *Lettu* : Peka]

Thursday, April 6, 2023

TIRHCHHUAHNA ROPUI: HNA CHU ZO ANG AW!

 _Isuan Engnge A Tih Mek?_ 


By Rick Warren

April 06, 2023



“ _Lei leh vâna thuneihna zawng zawng pêk ka ni ta.  Tichuan, kal ula, hnam zawng zawng zirtîrah siam rawh u; Pa leh Fapa leh Thlarau Thianghlim hmingah chuan baptis ula, thu ka pêk zawng zawng che u pawm tûrin zirtîr rawh u.  Tin, ngai teh u, kei, kumkhuain, khawvêl tâwp thleng pawhin, in hnênah ka awm zêl ang_ .” [Matthaia 28:18-20] 


Isua kha thihna ata rawn tho lehin vanramah a lawn leh satliah ngawt lem lo. Thawhlehna hnuah khan, Jerusalemah zinin ni 40 chhung mite a kawm a – vawi khat phei chu mi 500 hmaah a inlar! A inlar zin em avangin, Chanchin Ṭha kha Rom Lalramah khan chak takin a darh thei a ni. 


Vana a lawn leh hma chiah khan Isua chuan amah zuitute hnenah tih tur a hrilh a. Thupek an ni bawk a, Tirhchhuahna Ropui a ni bawk, puithiam leh pastorate emaw rawngbawltu leh missionary-te tan chauha pek a ni lo. Isua zuitu zawng zawngte tana pek an ni. 


Chu thupek chu hei hi a ni: “ _Lei leh vâna thuneihna zawng zawng pêk ka ni ta.  Tichuan, kal ula, hnam zawng zawng zirtîrah siam rawh u; Pa leh Fapa leh Thlarau Thianghlim hmingah chuan baptis ula, thu ka pêk zawng zawng che u pawm tûrin zirtîr rawh u.  Tin, ngai teh u, kei, kumkhuain, khawvêl tâwp thleng pawhin, in hnênah ka awm zêl ang_ .” [Matthaia 28:18-20] 


Chu hna chu Pathian chhungte zinga tel tawh phawt tana thawh tur a ni. Chu Chanchin Ṭha chu kan kiang vela mi leh hla deuha mite hnena hlan chhawn tur a ni ang. A chhan pathum a awm thei: 


Pakhatna, Pathian chuan chhungkaw lian tak a duh. Pathian chhungte zingah in tel a nih chuan a chhungkuaah chuan midang pawh tel turin a sawm che u. Chanchin Ṭha chu midang hnena puang chhuak turin a duh che. 


Pahnihna, Pathian chauh chuan chhandamna leh beiseina a pe thei che. Hei hi khawvela chanchin lawmawm ber a ni! Thuruk anga vawn chu sual lian tak a tling ang. 


Pathumna, Tirhchhuahna Ropui chu khawvel chanchina a hnukpui a ni a. Isua Krista lo kal lehna chu a thupek kan awih leh awih loh dana innghat a ni bawk. Pathian chuan Isuan hna min pek khawvel hnena Isua chanchin puang tura min tih chu kan zawh hun min nghak a ni. 


Bible chuan Pathian chu " _Mi țhenkhatin muanga an ruat angin Lalpa chu a thutiam kawngah chuan a muang lo e; tuma boral duh loa, mi zawng zawng lo sim duhin, nangmahni lamah a dawhthei a ni zawk e_ ," [II Petera 3:9] tiin a sawi a. Pathian chuan tumah a nawr lui ngai lo vang, mahse mitinte chuan “aw” tih emaw “aih” tih emaw an sawi theihna hun țha pek a duh mai a ni. 


Matthaia 24: 14 ah hetiangin kan hmu, “ _Ram Chanchin Ṭha hi hnam zawng zawng hriat tûrin khawvêl pum puia hril a ni ang a, chumi zawhah chuan tâwpna chu a lo thleng dâwn a ni_ ,” tiin. 


Hna chu zoh tumin i țang tlang teh ang u hmiang. A bul țanna atan vawiin hian Isua Chanchin tu emaw hnenah i sawi thei ang. 


Ngaihtuah zui atan. 


Chanchin Ṭha mamawhtu nia i hriat mi pathum ngaihtuah ang che. Chanchin Ṭha an hnena i sawi theih nan ruahmanna țawngțaina nen siam rawh. 


Isua zuituten khawvel mite hnenah Chanchin Ṭha an hrilh chu Pathianin eng vangin nge a phal nia i hriat?  


Ram dangah kalin Chanchin Ṭha i hril thei lo a nih pawhin, Chanchin Ṭha la hre loten an hriat ve theihna tura khawvel hmun hrang hranga thawktute lo chhawmdawlin rawng i bawl ve thei ang? 


[ *Lettu* : Peka]

Wednesday, April 5, 2023

DANGLAM TURIN PATHIAN PUIHNA I MAMAWH

  _Lei Rem Rap turin_

By Rick Warren 

— 05/04/2023


“Lalpa Thlarau chu kan chungah hna thawkin, amah kan ang zual zel a.” 2 Korinth 3:18 (TLB)

Mihring theihna ringawt hi chuan lei rem hi rah theih a ni lova. Pathian chauhin i nunah danglamna a thlentir thei a ni.

Hetiang hian ngaihtuah chhin la: Mi pakhatin hetiang hian dan siam sela, “Inhuatna awm suh se.  Chi inthliarna awm suh se. Pawlbik duhsakna awm suh se.” Mahse eng dan mah hian pawlbik duhsakna chu hmangaihnaah a thlak danglam theilo. Pathian chauhin chu chu a tithei - a chhan chu chhungril danglamna a mamawh vang a ni. Pathian chauhin thinlung danglamna nghet hi a thlentir thei a ni.

Chutihrual chuan, danglam i duh anih chuan i danglam thei a ni tih i inhrilh thei a, i danglam bawk ang. Amaherawh chu Thlarau Thianghlim tello chuan awmze nei emaw daihrei turin a thleng lo vang.

Bible in Zakaria 4:6 ah, “Chakna ni lovin, thiltihtheihna ni hek lovin, Ka thlarau zawkin le, tiin Sipaihote LALPA chuan a ti e.”

Sakei emaw Awle emaw a i intidanglam theilo ang chiahin, Isua ang turin i intidanglam thei heklo. Mihring theihna hi chu a tawk zo lo a ni.

I hliam te, i chindawklak te, i rilru hrehawmna te hi vawi leh khata i dawn vek anni bik lo va. Tikiang turin pawhin hun a duhtam a ni. Diktak chuan i hun pum hi a la dawn a ni. Muangchanga kalpui chi a ni a. Nangma theihna hmanga i kal phei chuan ṭha taka hlenchhuak turin dawhtheihna leh chhelna i nei lo vang.

Mahse chanchin lawmawm tak awm chu. Bible chuan, “Lalpa Thlarau chu kan chungah hna thawkin, amah kan ang zual zel ang” tih min tiam. 2 Korinth 3:18 (TLB)

Damchhung daih danglamna thlen tur chuan Thlarau Thianghlim thiltihtheihna a tel a ngai a ni. Lalpa Thlarau chu nangmahah a thawh chuan, Pathianin a siamchhan che ang takin a tidanglam dawn che a, amah ang zual zelin a siam ang che.

Pathianin pâ siam turin darkar ruk a hmang a. Oak thing puitling siam turin kum 60 a duh thung a ni.

Pâ nge nih i duh a oak thing zawk? Pathianin rilru puitling, thlarau lama chak, hlim leh Pathian mi hrisel nihtir min duh a ni.

Chawplehchilhin a thleng mai lo vang. Amaherawh chu Thlarau Thianghlim duhdanin a thleng ang.

Ngaihtuah zui atan

* Engtiklai khan nge nangma theihnain nasa taka inthlak danglam i tum? Eng nge a rahchhuah?

* Engvangin nge Pathian danglam turin thil ṭhenkhatah hian hun rei deuh zawk a hman nia i hriat?

* A chang chuan lei rem rap tura kan hmalakna tur chu te takte a ni ṭhin. Vawiinah hian Pathian duhzawnga  i nuna danglamna thlen turin engang hmalakna te takte nge i neih ang?

*Isua chungchanga i duhthlanna eng nge ni?*

Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam inni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi :8-9. 

I sualna te i puang duh aniha, i nunah Isua i thlang duh anih chuan, heti hian ṭawngṭai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Lalpa duh tak, misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”

Isua vuan tura i ṭawngṭai thei a nih chuan, khawngaihin Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Tuesday, April 4, 2023

LEI REM RAP TURA BIBLE-IN A PUIHNA CHE KAWNG LI*

 _Lei Rem Rap turin_

*LEI REM RAP TURA BIBLE-IN A PUIHNA CHE KAWNG LI*

— Rick Warren 

— Apr 4, 2023

“Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni; Pathian mi chu hna tha tinreng thawk tura kim taka inthuamin a famkim theih nan.“ 2 Timothea 3:16-17

Isuan Johana 17:17 ah, “Anni chu thutakin tithianghlim rawh, i thu chu thutak a ni” a ti.

Eng nge tihthianghlim tih awmzia chu? Isua ang tura thanlen zel leh lei rem rah hi a ni. Isua i thlan hnu hi chuan, hmana mi kha i ni tawh lo. Mi danglam i ni a. Tihthianghlimin i awm tawh a ni.

Engtin nge tihthianghlim i nih? Thutaka tihthianglimin i awm tawh. Pathian Thu chu i nunah i sengluh tam poh leh i danglam anga, siamtharin i awm zel ang. Thlarau Thianghlim puihnain lei rem rah i duhna laiah chuan danglamna neiin hma i sawn zel ang.

Danglamna nei turin Pathian Thu i hriat zel a ngai a. Chu chu lei rem rah dan kalphung a ni.

I awm danah khan i induhkhawp lova, i thutlukna siamte kha fuh tawk lo va i hriat chuan, Pathian Thu i mamawh tihna a ni. Pathian Thu chuan a taka tihlawhtling thei turin a pui ang che.    

“Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni; Pathian mi chu hna tha tinreng thawk tura kim taka inthuamin a famkim theih nan.“ 2 Timothea 3:16-17.

Bible chuan kal zel dan tur kawng a kawhhmuh che a. I kawngbona te a hriattir che a. Kawng dik i zawhna tur a kawhhmuh leh che a. Kawng dika i awm zel theihna turin a hriattir bawk che a ni.

Pathian Thu chuan danglamna thlen tura i mamawh zawng zawng a pe che a, kawng dika i awm theihna turin a hriattir bawk che a ni. Chuvang chuan nitina Bible zir leh fianrial hun hman hi a pawimawh hle a ni. Danglam tur chuan, thutak chu i hmachhawn a ngai a. Khawiah nge thutak chu a awm? Pathian Thuah a awm. Pathian Thuah i awm loh chuan, nitin thutak chu i zir lova, i hmachhawn lo tihna a ni.

Bible hi darthlalang a ni a, thil tha leh tha lo leh danglam i mamawhna lai tur thlengin a tilang vek a ni. Pathianin a Thu hmangin danglam i mamawhna lai te hriattir che sela, chutichuan nun awmze nei leh hlimnaah a hruai lut ang che.

Ngaihtuah zui atan

* Pathian chuan a Thu hmangin kawng dik leh kawng dika awm dan tur a kawhhmuh che a. Khawi atangin nge kawng dik zawh zel tura theihna chu i lak ang? 

* Pathian Thu i chhiar leh i ngaihtuahin nitinin fianrialna leh tawngtaina hun i hmang thin em? A nih loh chuan engin nge chung thil i tih theih lohna tura dal che?

* Pathianin a Thu hmanga kal zel tura a duhna che eng nge? Eng danglamna nge thlen i mamawh le?

*[Lettu: Sangpuia]*

Monday, April 3, 2023

I NUN TICHHE THEI NGAIHTUAHNA LAK ATA I RILRU ZALENTIR RAWH

 _Lei Rem Rap Turin_


- Rick Warren 

- April 2, 2023



"Tisa dana awmte chuan tisa lam thilte an duh thin; Thlarau dana awmte erawh chuan Thlarau lam thilte an duh ṭhin." (Rom 8:5)


Min tichhe thei ngaihtuahna lak ata kan rilru lak pen hi thil harsa tak a ni, a chhan chu kan rilruah hian thil ṭha do tlattu pathum an awm vang a ni - chung thilte chuan awlsam takin min kalsan ngai lo bawk. Chung lak ata i rilru zalentir tur chuan i beih a ngai!


Chung hmelma, i rilrua thawk ṭhinte chu engte nge?


A hmasa ber chu i ze hlui kha a ni. Rom 7:23-ah chuan heti hian kan hmu, _"Nimahsela ka taksa pengahte hian dan danglam a awm tih ka hria, chu chuan ka rilru dan a do va, ka taksa pengtea sualna dan awm hnenah chuan salah mi hruai ṭhin a."_ I pianthar hmaa i mize hlui khan i nunah nghawng tam tak a la nei. Ngaihtuahna ṭha lote hi a hrisel lo lutuk lo ti a ngaihtuahtir phet che a tum ṭhin.


A pahnihna, do ṭhintu che chu Setana hi a ni. Setana hian thil eng emaw ti turin a nawr lui thei miah lo che, mahse i rilru tihphurna hmangin hna a thawk thei. I rilruah ngaihtuahna hrisel lo a tuh char char reng a. Paula chuan , _"Setanan min dinchan khalh dah ang e; a ngamthlemna chu kan hai si lo va"_ tiin ngaihdam a thlang a ni (2 Kor. 2:11)


I rilru hmelma pathumna chu he khawvel ngaihhlut thilte hi a ni. Bible chuan heti hian a ti, _"Khawvela thil awm zawng zawng, tisa chakna te, mit chakna te, dam chhung ropuina lem te hi Paa chhuak a ni lo va, khawvela chhuak a ni zawk si a."_ (1 Johana 2:16). Khawvela thil reng rengte hian kawng dik lova hruai che an tum a. Engmah hian invawng fel a, mahni hmasial lo turin a fuih lo che.


Bible chuan he rilru insualna hmachhawn dan tur heti hian min hrilh: _"Tisaah awm mah ila, tisa indo angin kan indo lo va, (keini inralthuamnate chu tisaa mi a ni si lo va, kulhpui nghet takte thiatna tura Pathian zarah thil ti thei tak a ni zawk,) hnialnate leh thil sang tinreng Pathian hriatna dal tura sang taka siamte chu ṭhiatin, ngaihtuahna tinreng Krista thu awihna salah kan hruai a."_ (2 Kor. 10:3-5)


"Krista thuawihna sala hruai" tih hian i ngaihtuahna thunun tih a kawk a. I ngaihtuahnate kha a duh duhnaah vahtir mai mai suh. Pathian thutakah chuan hruai lut zawk rawh.


I ngaihtuahna chungah thu i nei niin a lang tlat, a chhan chu thu i neih tlat avang khan! I ngaihtuahnate kha kawng dik lo lama a kal dawn ve leh kawng dangah hruai daih rawh. Thil ṭha, dik leh hlu ni a i hriatte chu ngaihtuah rawh. Thlarau Thianghlimin a pui ang che.


Ngaihtuah zui atan.


Mahniin "ngaihtuahna ṭha" nei theiin i inring em? Engvangin nge i nu  tichhe thei ngaihtuahna lak ata zalentir tura Thlarau Thianghlim i mamawh?


I ngaihtuahna thunun thei reng turin tha thlah miah lova thawh i peih em? I chhannain engtinnge tuna ṭawngṭai leh Bible zirna hun i hman mek kha a lantir?


Engtinnge Pathian thu hriatna hian i ngaihtuahna a thlak danglam?


[Lettu: Mapuia Fanai]

HMANGAIHNA CHUAN THUDIK HMACHHAWN TURIN MIN PUI

 _Lei Rem Rap Turin_



- Rick Warren

- April 3, 2023


"Hmangaihna chuan thudik tak mi sawitir ṭhin tur a ni a. Tichuan kawng tinrenga ṭhang lianin Isua kan ang telh telh ang." (Ephesi 4:15, CEV)


Dawt i awih mai chuan mahni inhneh theihna tura i mamawh danglamna i thlen thei lovang.


I hlimna thlen thei tur nia an sawi thudik lo te, Pathian hi eng ang chiah nge a nih tih emaw, hlawhtlinna hi engnge a nih chiah tih chungchanga dawt thute i lo awih a ni mai thei. Mahni chungchang thuah emaw, hun kal tawh emaw hun la awm tur chungchang emaw dawt thu i awih a ni mai thei.


1 Johana 1:8-ah chuan heti hian kan hmu, _" 'Sual ka nei lo,' kan tih chuan mahni leh mahni kan inbum a, thutak chu keimahniah a awm lo a ni."_ Danglamna kawng hmasa ber chu hei hi a ni: Harsatna a awm a, chu harsatna chu nangmah i ni tih i pawm a ngai. Midang i puh emaw thudik i pawm duh lo emaw a nih chuan mahni inbum i nu ang a, chin ṭhan ṭha lo i tuh tihna a ni ang.


Mahni nun thlak danglam tur chuan mahni chungchanga thudik zir mai bakah hmachhawn ngam a, hmalam pan tura ke pen ngam a ngai.

 

Mahni nihna dik tak hmachhawn dan zir hi mahni tan, midangte tan leh Pathian tana kan tih theih thil duhawm ber erawh a ni tlat. Ephesi 4:15-ah chuan heti hian kan hmu, _"Hmangaihna chuan thudik tak mi sawitir ṭhin tur a ni a. Tichuan kawng tinrenga ṭhang lianin Isua kan ang telh telh ang."_ (CEV).


Ṭhan i duh em? Inthlak danglam i duh em? Nun thar neih i duh em? I nunkawng ṭhenkhatah khan siamṭhat nge i duh bul ṭan that?


Ephesi 4:15 kha han en leh la: _"Hmangaihna chuan thudik tak mi sawitir ṭhin tur a ni a."_ Nangmah i inhmangaih chuan, Pathian i hmangaih chuan, midangte i hmangaih chuan, mahni nihna dik tak i hmachhawn mai tur a ni.


Zawhna lo awm ta chu, thutak zawn hmuh dan ṭha ber chu engnge ni ta? Bible rawn rawh. I dam chhan i hriat theih dan awm chhun chu i Siamtu hriat leh Bible chhiar hi a ni.


I chak lohnate- i thil tawn aṭangin a ni emaw, thlahtute aṭanga i rochun a ni emaw, i nu leh pate aṭangin a ni emaw, i duhthlanna vang a ni emaw- hneh theih tur chuan i nihna dik tak i hmachhawn  ngam a ngai 


Thudik chu Pathian thuah a awm a ni.


Ngaihtuah zui atan.


I chungchang thuah thudik i hriata sim ngai ni a i hriat, mahse i hmachhawn hreh em em si a awm em? Chumi chungchangah chuan vawiin hian engnge i tih tur ni a i hriat?


I chak lohnate ngaihven nge haider awlsam zawk ni a i hriat? Engvangin?


Bible-in i chungchang thuah sawi tur a nei vak lo ni a i hriat chuan Pathian hnenah Thlarau Thianglim kaltlangin amah leh nangmah chungchanga i hriat turte hrilh tur chein dil rawh. A thu i hmangaih theihna turin i thinlunga chi tuh turin dil rawh.


[Lettu: Mapuia Fanai]

Saturday, April 1, 2023

Inneih Sawmna Official

 INNEIH SAWMNA


Kan fate Vanlalthansanga (Sangpuia) leh M. Lalremtluangi (Remremi) te chuan Dt 13 April 2023 Ningani Dar 1:00 Pm hian BCM Biak In, Immanuel Zawlpui ah tiam tlat e an ti ve dawn ta. 

Kan chhungkua kan lawmin kan phur ve em em a ni. Kan lawmna leh kan hlimnate hi min hriatpuia min telpui ve turin kan sawm a che u.

Inneih Sawmna pawh hi kan hriattir hmaih leh kan sawm hmaih te pawh awm theih a ni a. He kan sawmna hi lo hmu a piangte chu lokal vek turin kan sawm che u a ni.


 Pathian thu pawhin, "Mi zawng zawng zingah inneih hi chawimawiin awm rawh se" a tih angin. Kan faten Pathian hmaah Kohhranhote hriatpuiin Inneihna thu an tiam tur hi min telpui ngei turin kan beisei vek che u a ni.

Mi te angin ti ve theilo mah ila, kan tlin tawk leh phak tawkin, mo lawmna chawhlui pawh buatsaih ve kan tum a ni. Mo lawmna Ruai min kilpui vek turin kan sawm a che u.


Min bepawp duhtan

9436779578

8974119635


Rualnunnemi

Zawlpui

Inneih Sawmna


 

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...