Monday, August 31, 2026

PATHIANIN HARSATNA HMANGIN I THANLENNA TUR A TANPUI

_Sum Enkawl Dan_

By Rick Warren
— Aug 31, 2026
“Lalpa Thlarauin kan chhûngah a thawh zêl avângin, amah ang zêlin kan lo danglam ṭhîn,” a ti.” [2 Korinth 3:18 TLB]

I nunah hian thil engmah i zir theih loh tûr a awm lo. Mahse, thil thleng chu rilru ṭha takin i lo dawnsawn a ngai.

“Pathian, engati nge hei ka chungah thleng?” tih ai chuan, “Pathian, he thil thlengah hian eng nge zirtur ka neih?” tih zawk tûr a ni. Nunah thil thleng tin hian a tha zawngin emaw, a chhe zawngin emaw min siam thei a ni. Nangma duhthlannaah thui tak a ingnghah avangin a dawnsan dan tur chu i kutah a awm a ni.

Harsatna hian tum pakhat a nei a; chu chu thlarau lama puitling zawk i nihna tur  leh Isua Krista ang zâwka i lo nihna tûr a ni.

Philippi 2:5 chuan, “In nunah Krista Isua rilru leh nungchang angin ngaihtuah ula,” (ICB) a ti. Pathianin i nun a tum langsar tak pakhat chu thlarau lamah i puitlinna leh Isua ang i lo nihna a nih chuan, Isua chu engang mi nge a nih ang?

Bible chuan Isua nungchang chu Thlarau rah tiin a sawi a. Chûng chu: “hmangaihna, hlimna, remna, dawhtheihna, ngilneihna, ṭhatna, rinawmna, thuhnuairawlhna te, insumtheihna” te hi an ni (Galatia 5:22–23, GW). Hêng nungchang ṭha te hi Pathianin i nunah a tuh leh a siam chhoh duh te an ni. I nun chu hmangaihna, lâwmna, remna leh hêng thil ṭha zawng zawngte hian luan chhuak zel se a duh a ni.

Pathian chuan hêng nungchang ṭha te hi i nunah a siam chhuak ṭhîn a; mahse, a tam ber chu chûng nungchang te nêna inmillo tak dinhmunah te min dah ṭhin.

Hmangaihna zir tûrin, mi hmangaihna tlâk loh deuhte zîngah min dah ṭhîn. Mi zaidam takte, keimahni ang deuhte leh kan laichînte hmangaih chu a awlsam. Mahse, Pathian chuan hmangaih harsa kan tih deuhte pawh kan bulah a dah ṭhîn. Chutiang chuan a thlâwnin a mi hmangaihna chu eng nge ni tih min hriattîr a ni.

Lâwmna zirchhuak tûrin, i duh zawng zawng a pe kher lo vang che. Harsatna leh lungngaihna karah pawh amah chu a tâwk reng tih min hriattîrin lâwmna min zirtîr ṭhîn.

Remna pawh nuam taka i awm lâi chauhin Pathianin a zirtîr lo che. Nunah buaina tinrêngin min chîm a, thil zawng zawng a buai lâi ngei hian Pathian rinchhan dân leh remna tak tak min zirtîr ṭhîn.

Dawhtheihna pawh, kawngah traffic jam-ah te, mi dang nghah an ngaihna hmunah leh nunnain min nghah tirna kawng hrang hrang tam takah hian Pathianin min zirtîr ṭhîn.

Krista ang nih chu kumkhaw nun kalphung zêl a ni. Bible chuan 2 Korinth 3:18-ah The Living Bible chuan, “Lalpa Thlarauin kan chhûngah a thawh zêl avângin, amah ang zêlin kan lo danglam ṭhîn,” a ti.

Pathian Thlarau chuan i nun tawp thlengin i chungah a thawk zêl ang a, thlarau lamah i puitlinna tûrin a ṭanpui zêl ang.

Pathianin i puitlinna tûra a hman ṭhin dânte chu i ngaihdânah hrehawm emaw, i duh loh emaw an ni maithei, mahse, chûngte chu Pathianin rah ṭha berte i nunah an rah chhuahpui mek tih hre reng rawh.

Ngaihtuah zui atan

* Harsatna emaw, i rilru a tihbuaina thil thleng emaw i tawh hnâi ber ngaihtuah la. Chu thil chu i thlarau lam ṭhanlenna tûrin Pathianin engtin nge hman a tum?

* Engati nge harsatna leh hrehawmna chuan hausakna leh nawmna aiin min zirtîr ṭhat zâwk ṭhin?

* Harsatna i hmachhawn a, Pathianin i nunah ṭhatna tûrin engtin nge a hman tih i hmuh theih loh chuan, Pathianin eng ti tûrin nge a duh che i rin?

*[Lettu: Sangpuia]*

Sunday, August 30, 2026

HRIAT TUR LEH TIHTUR PAWIMAWH BER

_Sum Enkawl Dan_
   
- Rick Warren
- August 30, 2026
_"In thil hlante ka duh lo - min hmangaih ka duh a ni; in thilpekte ka duh lo - min hria ula ka duh a ni."_ (Hosea 6:6, TLB)

Bible chuan "Pathian chu hmangaihna a ni" a ti (1 Johana 4:8, NLT). Pathianin hmangaihna a nei a ti miah lo. Amah chu hmangaihna a ni a ti. Pathian nihna laimu a ni a. Pathian chu hmangaihna a ni.

Hmangaihna nei mi ni a inhriain, "Hmangaihnain ka khat a ni" ti chungin i kal kual vel a ni mai thei. Mahse midang chungah i hmangaihna chu i lantir loh chuan thil ṭha tak a chhuak chuang lo.

Bible chuan Pathianin a hmangaih tur atana siam i nih thu min hrilh. Tun thlenga i la thawkna chhan chu hei hi a ni: Pathianin a hmangaih ni turin a siam che. Hmangaihna anih avangin a hmangaih ni turin a siam che a ni.

Pathianin a mamawh miah lo che. A khua a har lo. Mahse a duh che! Siam i nihna chhan ber pakhat chu Pathian hmangaih ni turin a ni.

He thudik hi i mah fuh a i nihna leh damchhan innghah nana i hman chuan mahni insitna avangin harsatna i nei tawh lovang. Pathianin a hmangaih tur mihringte a siam theihna turin lei leh van ropui tak hi a siam a ni tih i hriat a, hlutna thuk tak nei i ni tih i inhriatna khan i insitna zawng zawngte kha a khuh bo dawn a ni.

Ramsa te ang lo takin Pathian anpuia siam kan ni a. Chu chuan Pathian hriaa hmangaihna let ve theihna min pe.

Ni khat chu Isua kawnga a kal laiin mi pakhatin heti hian a zawt a, "Lalpa, Pathian Thuah hian engnge pawimawh ber?" tiin. Isuan heti hian a chhang a, _"'Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni,’ tih hi. Chu chu thupêk ropui leh pawimawh ber a ni."_ (Mat. 22:37-38). Hringnuna thil pawimawh ber chu Pathian hriat leh amah hmangaih hi a ni.

Hosea 6:6-ah chuan Pathianin heti hian a ti, _"In thil hlante ka duh lo - min hmangaih ka duh a ni; in thilpekte ka duh lo - min hria ula ka duh a ni."_ (Hosea 6:6, TLB)

Hringnuna thil ropui ber i hriat theih chu Pathianin a hmangaih ni turin a siam che tih hi a ni a. I tih ve theih ropui ber chu amah hmangaih let hi a ni.

Zing i thawh ve leh, thil dang i tih hmain i khum sira ṭhuin heti hian ṭawngṭai rawh, "Lalpa, vawiin hian engmah thawk zo hman lo pawh ni ila hriat chian leh zual che a, hmangaih zual che ka duh a ni" tiin.

Chu chu chhan neia nun bul ṭanna a ni.

Ngaihtuah zui atan.

Engtin nge "i thinlung zawng zawng, i thlarau zawng zawng leh i rilru zawng zawngin" Pathian i hmangaih theih ang? (Mat. 22:37)

Pathian hriat leh hmangaih i ngaih pawimawh hmasakin engtin nge thil dang i ngaih pawimawh dan a thlak danglam ang?

Engvangin nge vawiina kan thuzir ang hian thutak nena ni chhiar ṭan a, Pathian leh a Thu nena hun hman a pawimawh?

[Lettu: Mapuia Fanai]

Saturday, August 29, 2026

HUNBI TIN HIAN CHHAN A NEI

_Sum Enkawl Dan_

- Rick Warren
- August 29, 2026
_"Tichuan, thil ṭha tih i ning suh ang u; kan inthlahdah loh zawngin a hun takah chuan kan seng dâwn si a."_ (Galatia 6:9)

Bible chuan hringnunah hian hunbi a awm thu min hrilh. Thuhriltu 3:1-aah chuan heti hian kan hmu, _""Engkim tân hian hun ruat a awm a, vân hnuaia thiltih zawng zawng tân hun remchâng a awm."_ 

Hringnun hi hunbi hrang hrangin a siam kan tih hian nghah hun pawh a awm tihna a ni. "Tunhma" leh "tun" inkarah (emaw "tun hun" leh "nakin hun" inkarah emaw) hian muanchan hun a awm ngei ngei ṭhin. Hei hian mi tam tak a tithinur ṭhin. Thlai chi kan tuh a, a rah a chhuah thuai loh hian beidawn a awl viau ṭhin.

Mahse a rah chu zawi zawiin a hmin ṭhin. Tomato hi a kunga hmin ngei nge a hrin laia lawh, a hnua dah hmin i duh zawk? Tomato, a hmin hnua lawh leh a hel lai, a puitlin hmaa lawh te hi khaikhinna a awm miah lo. I lawh hmat erawh chuan a tuina i chân ang.

Sum enkawlna chungchangah chuan i tuh hun ni lo, hunbi dangah a rah i seng ṭhin. Thei zawng zawng hi an hmin hun a inang lo tih pawh hriat a ṭha. Theitê kung khata mi pawh a hmin rual vek lo. An inhmin chhawk a, vawi khata a hmin tlem tlem i lo ṭhin. Bul i ṭan a, Pathian duh dan anga sum i enkawlin a tukah a rah i seng nghal dawn lo. Hun eng emaw chen a duh ve. Hunbi dangah a rah i seng nan i nghah ve a ngai.

Mahse i nghah lai pawh khan Pathian chuan a thawk reng. Rim taka i thawh emaw sum i hman emaw chunga a rah chhuak i nghah lai khan engmah a thleng lo emaw i ti mai thei.

Mahse a thleng mek asin! I chi tuh kha lei hnuaia a awm lai khan zung a kai mek a. Chu chi chu Pathian malsawmna nen a rawn ṭo chhuak ang a, a ṭhang lian zel ang. Engtik niah emaw thing kung tuaiah rawn changin a thawk zel a ni tih i hmu ang.

Mahse chumi hun thleng chuan, a rah i la lawh theih hma pawh khan Pathianin a thawk zel a ni tih i rin a ngai.

Thlaite hian ṭhang lian turin hun an mamawh. Vawi leh khata puitling thut a awm ngai lo. Lo neitu tumah, thlai tuh a, a hnu rei lo te a a rah va lawh tum an awm ngai lo. Amaha i ṭhantir a ngai, Pathian hun ruatah ṭhantir rawh.

Galatia 6:9-ah chuan heti hian kan hmu, "Tichuan, thil ṭha tih i ning suh ang u; kan inthlahdah loh zawngin a hun takah chuan kan seng dâwn si a."_

Ngaihtuah zui atan.

Pathianin i nunah rah a chhuahtir theih nan engnge i la nghah?

Rah seng tura i nghah khan thlarau nunah eng angin nge i ṭhan len? Amah i nghah lai khan Pathianin engnge a zirtir che?

Engvangin nge Pathianin i tuh rah seng tura  a nghahtir che ni a i hriat?

[Lettu: Mapuia Fanai]

Friday, August 28, 2026

MAMAWH I NEIH CHUAN A CHI THLAK RAWH

_Sum Enkawl Dan_

By Rick Warren
August 28, 2026
“ _Buh fang leia a tlâk lohva, a thih loh chuan a mal chauhvin a awm reng ṭhîn; a thih erawh chuan tam takin a rah ṭhîn_ .” [Johana 12:24]

Lo neitu chuan a lo chu a hanna a dak a, ei tur a thar chhuah theih loh hnu chuan engtin nge a tih a tih ṭhin? A phunnawi mai lo vang. A ṭawngṭaisak chiam pawh a ṭul ber lo vang! A chhuak ang a, thlai chi a thlak ang, a chhan chu thlai chi a thlak zet loh chuan engmah a thleng dawn lo. Ṭawngṭaiin a duh duh dil pawh ni se, a ṭawngṭaina chuan a tih tur ai a awh dawn lo.  

Pathian i nghak emaw i ti mai thei. Chu hna chu Pathian chuan a thawhsak dawn che niin i ngai mai thei bawk. Nupui pasal tur Pathianin a pek hun che i nghak a ni mai thei. Pathian chu thilmak ti thut turin i nghak a ni thei bawk. Mahse Pathian thung chuan “Keimah min nghak emaw i ti em ni? Ka lo nghak che a sin! Thlai chu chu thlak turin ka lo nghak che alawm” a ti daih thei thung. 

Hringnuna thil eng pawh mai chu thlai chi aṭanga bul ṭan an ni: inlaichinna, nupa nun, sumdawnna leh kohhrante chu. Thlai chi miin a thlak zet loh chuan engmah a thleng lo vang. 

Eng vangin nge Pathian chuan thlai chi chu thlak turin a phut che? A chhan chu thlai chi thlak chu rinna thuhla a ni. I thil neih sa chu hmang la, hmang chhuak ang che. Chu chuan rinna a phut ang a, chu chuan Pathian ropuina a thlen ang.  

Isua chuan he leia a lo kal chhan, kraws-a a thih chhan leh thawhleh chhan chu thlai chi thlak leh seng angin a hrilhfiah a ni. Johana 12: 24 ah chuan Isuan, “ _Buh fang leia a tlâk lohva, a thih loh chuan a mal chauhvin a awm reng ṭhîn; a thih erawh chuan tam takin a rah ṭhîn_ ” tiin a sawi.  Isua chuan, “Ka thihna leh thawhlehna avang chuan mite chu chhandam an niin vanramah an kal ang. Thlai chi chu ka thlak dawn a, chu chi chu ka nun hi a ni,” tiin a sawi.  

Thlai chi thlak leh a rah seng tih awmzia chu hetiang hi a ni: I thil mamawh chu a chi i tuh ang. I mamawh chu – hun tam zawk, chakna tam zawk, sum tam zawk, ṭanpuina tawm zawk, inlaichinna tam zawk, finna tam zawk – a nih chuan a chi thlak ang che. Hun tam zawk i mamawh a nih chuan i fate chu hun tam zawk pe ang che. Sum tam zawk i mamawh a nih chuan a mamawhtu hnenah chuan pe chhuak ang che. Finna tam zawk i mamawh a nih chuan finna i neihte chu midang hnenah pe ang che. Nangmah kha inpe chhuak rawh!

Nangmahin i mamawh ngawih ngawih midang hnena lo pek chhuah ringawt chu thil awmze nei lo a ni thei, mahse chutiang rilru chiah chu Pathianin mal a sawm chak chu a ni a, mihring nunah chu chuan rah ṭha tak a chhuah ṭhin. 

Ngaihtuah zui atan. 

• Pathian thilpek i lo nghah mek chu eng thil nge ni? 
• Chu i thil mamawh nei tur chuan Pathian chuan engnge ti tura a duh che nia i hriat? Vawiin hian eng chi nge i thlak ngai? 
• Thlai chi i thlak a, i insenral chang chuan eng ang rah nge nangmahah leh midangah chuan i lo hmuh ṭhin? 

Krista nena a thara bul tan tur chuan i inpeih tawh em? 

Eng ang pawhin lo awm tawhin khawi hmunah pawh lo awm tawh la, Pathian chatuan chhungte chuan nghaktu leh thlir rengtu i nei e. Sawmna chu zau taka hawn a ni e. Ring la chang mai rawh. 

I inpeih tawh em? He ṭawngṭaina hmang hian bul ṭan ang che: “Lalpa duh tak, ka thih hun chuan ka nun chungchang ka la sawi dawn tih ka hria. I lakah thil sual ka lo ti tawh tih ka hria a, keima ruahmanna nangma duh dan ni lo ang chuan ka lo khawsa tawh ṭhin. Chu chu thlak danglam ka duh a, a thara bul ṭan leh ka duh a ni. Sual kalsana i lam pana kal chu ka duh e. 

Ka thil sual tih zawng zawng avanga hremna chu kei thi tur hian Isua zara ka pumpelh avangin lawmthu ka hrilh a che. I ngaihdamna chu ka phu lo tih ka hria. I khawngaihna chauh chuan min chhan thei tih ka hria, Lalpa. Hmun famkimah chuan lut turin ka famkim ngai dawn lo tih ka hria. 

“Isu, min hmangaih em avangin ka sualna zawng zawng chu i lo phur ta a, lawmthu ka hrilh a che. Vanram kai tlakin min siam a, min chhandam turin ka ngen a che. Isu, nangmah chu ka ring a che. Min chhandam nghal a, chiang taka min chhandam a, chhandamna famkim min pe a, chatuan atana min chhandam thei a ni tih ka hria. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu:* Peka]

Thursday, August 27, 2026

I THILNEIHTE KHAN AN THUNUN CHE EM?

_Sum Enkawl Dan_

By Rick Warren
August 27, 2026
“ _Kei erawh zawngin felna neiin i hmêl ka hmu ang a_ ;
_Nangmah anna neia ka men hunah chuan ka lungawi tâwk zet ang._ ” [Sam 17:15]

Mihring nun awmzia hi thil neih chungchang a ni lo. I thil neihte chu thlir dan dika i thlir a ngai a, a nih loh chuan nangmah zawk kha an thunun an che. Engtik niah emaw chuan a enga mah chuan an daih rei lo tih i hmu chhuak ang. 

Isua chuan Luka 12: 15-ah chuan hetiang hian a sawi, “ _Fîmkhur ula, awhna rêng rêng lakah invêng rawh u; mihring nunna hi a hausaknaah a innghat lo ve_ ,” tiin. 

I hlutna chu i thil neih zat aṭangin teh ngai suh. I hlutna chu i thil hlu nei aṭangin teh hek suh. Khawvela thil hlu ber berte chu thil an ni lo tih hre chhuak zawk ang che. Khawvelah hian engmah i luhpui lova, engmah i chhuahpui hek lo vang. Hringnun hi thil neih lam emaw thil ropui tih lam emaw a ni lo, inlaichinna thu leh Pathian leh mihringpuite hmangaih thiam dan chungchang zawk a ni.  

Mihring nun hi bungrua emaw thil emaw chungchang a ni lo tih hriat chianna ṭha ber chu chatuan thil ngaih pawimawh a ni. Chatuan daih thilah insawrbing rawh. Thil neih dangte hi rei lote atan mai an ni a, chuvangin bungraw neih chu hna berah neih suh. Thil pahnih chauhin chatuan an daih ang: Pathian thu leh mite chuan. 

Duhthlanna i siam a ngai. Khawvelin a hrilh dan che chuan hlim leh zual turin a aia tam, hlawhtlinna dang, thil hlu tam zawk leh him zawk i mamawh. Duh i thlan a ngai: Khawvelin thil lei tur, i duh dan, i hmel, i hlawhtlinna tur a hrilh che chu i ngaithla dawn nge, Lal Isuan a sawi zawk chu i ngaithla dawn? Krista thu nge i ngaihthlak dawn mite nun? Khawvel nge i ngaihthlak dawn Pathian Thu? Pakhat zawk chuan lungawi lo zetin a kalsan che ang a; a dang chuan lungawina tak tak a pe ang che. 

Sum leh paia zalenna i neih hma chuan, “I nun bul ber” chu eng nge ni? Neih tam chu a ni ber em? Eng nge ka ngaihtuah a, ka sawi a, eng lam nge ka hawi? Eng atan nge ka nun hi ka hman?” tih chu i inzawt tawh ngai em? 

Hawi vel la, mi tam tak dam chhan nei i hmu thei ang. Mi lar television-a mite leh sumdawng hausa in khuaa mite pawh i hmu ang. Chung mite sum bawm chu a khat liam zawih zawih a ni ber ang a. Dam chhan tam tak an nei ang, mahse ṭhenkhatte chuan tlemte chauh an nei thung.  

Nang kha engnge i dinhmun? Ei leh in tur ngawr ngawr chu tam tak i neih mai thei, mahse dam chhan i nei em? Pathian nen inlaichinna i nei em? Khawvelin min zirtir dan chuan engkim kan nei thei. Mahse a tak takah chuan engkim chu i nei thei lo. A pawimawh zawk chu, hlim turin chung zawng zawngte chu i mamawh lo. I duhthlanna milin i hlimin i hlim lo vang. 

Lungawina thuruk - i himna leh lungawina chu i thil neihah ni lovin nangmah neitu zawk hriat fiahnaah chuan a ni. Chu chu Kristaah i hmu thei. 

Bible chuan hetiang hian a sawi, “ _Kei erawh zawngin felna neiin i hmêl ka hmu ang a_ ;
_Nangmah anna neia ka men hunah chuan ka lungawi tâwk zet ang_ ,” tiin [Sam 17: 15]

Ngaihtuah zui atan. 

• Pathian nena leng dun lovin eng ang bungrua nge i lo lak khawm ve tawh ṭhin? 
• Hlawhtlinna emaw zahawmna hlawh chhuak tur chuan eng inlaichinna nge i lo hralh ve tawh? Vawiin hian chung inlaichinna te siamṭha tur chuan engnge i tih ang? 
• “Thil neih vek” chu i tan a ṭha ang em? Eng vangin nge? 

*Lettu:* Peka

Wednesday, August 26, 2026

VAWIIN ATANA HLIMNA THLAN DAN

_Sum Enkawl Dan_

- Rick Warren
- August 26, 2026
"Mi tu hnenah pawh Pathianin hausakna leh sum leh pai a peka, chumi chu chen turin theihna te, a chanvo pawm theihna te, a thawhrimna nuam tih theihna te a pek hi, heng hi Pathian thilpek a ni," Thuhriltu 5:19.

Bible chuan I Timothea 6:19-ah chuan Pathianin "engkim lawm taka kan chen turin min pe" (NIV) a ti. Chutiang Pathian chu kan Pathian a ni. Khawvel hi chên turin min pe a. Mahse hei hi buaina chu a ni: Thil  tam zawk neih kan buaipui lutuk a, kan neihsa pawh kan cêen hman lo a ni.

Lungawina thuruk chu Pathianin a pek tawhsa che chen thiam hi a ni. Thuhriltu 5:19 chuan, "Mi tu hnenah pawh Pathianin hausakna leh sum leh pai a peka, chumi chu chên turin theihna te,a chanvo pawm theihna te, a thawhrimna nuam tih theihna te a pek hi, heng hi Pathian thilpek a ni," a ti.

Neih belh tum ai chuan tuna i neihsa te kha ngaihsak zawk rawh. I mit meng la, Pathianin a pek tawhsa che kha ngaihlu la, i neihsa te chu hlim takin chên rawh.

Nuam ka tih ber pakhat chu kan huan aṭanga ni chhuak en hi a ni. Chutah chuan kum tam liam ta khan ṭhutthleng ka hûng a. Target dawr aṭanga ka lei niin ka hria, a to lo. A rawng a da tawh a, a ṭhen a tliak tawh bawk. Chu ṭhutthleng hlui tawh takah chuan ṭhuin ni chhuak chu ka thlir ṭhin a. Hlimna nasa tak min pe ṭhin.

Lunghlu a chei ṭhutthleng man to takah ṭhuin ni chhuak chu thlir ta ila, ka ṭhutthleng hlui aiin ka hlimpui zawk ang em? Teuh lo mai, ka hlimna chu engmahin a belhchhah lovang. A nihna takah chuan lunghlua chei ṭhutthleng neih loh leh ka ṭhutthleng hlui a lungawi mai hian ṭhatna a nei zawk a ni! Tumahin an ru dawn si lo va!

Mahni inzawt ta ila, "Tunah hian eng thil nge ka hlimpui loh? A tam zawk chuan, 'a hunah chuan' tih ngaihtuahnaah kan lut ṭhin a: "He thil hi ka thlen hunah chuan ka hlim ang" tiin.

"Bialpa/bialnu ka neih hunah ka hlim ang." "Kan inneih hunah ka hlim ang." "Fa ka neih hunah ka hlim ang." "Ka fate sikul an kal hunah ka hlim ang." "Kan inneih leh hunah ka hlim ang," te kan ti a.

Mahse hei hi thudik chu a ni: Hlim i thlan ang zelin i hlim dawn a ni. Tunah i hlim lo a nih chuan, nakinah pawh i hlim chuang lo vang. Hlimna hi duhthlanna a ni!  

Khawvela hmun rethei ber berah ka hruai ang che a, mi pahnih inṭhenawm chiah a awm ka entir ang che. Pakhat a hrehawm a, pakhat a hlim thung. Eng vang nge? Hlimna hian kan dinhmun nen inzawmna a nei lova, kan rilru put hmang nen a inzawm zawk a ni.

Tuna i thil neihah i lungawilo a nih chuan, tam zawk i neih pawhin i hlim chuang lovang tih ka chiang a ni. Engzat pawh nei la,  tlemte tal chu i duh belh zel dawn si a.

Hlimna hi duhthlanna a ni a. Pathianin a pek tawhsa che hi tunah hlim taka chen tum rawh le!  

Ngaihtuah zui atan

Pathianin thilpek a pek che eng thil nge i chen kim loh awm?

Hlim turin eng thil nge i nghah?

Hlimna hi duhthlanna a nih chuan engvangin nge mi ṭhenkhatin hlim an thlan loh?

[ *Lettu: Marova Punte* ]

Tuesday, August 25, 2026

MIDANG NEN I INTEHKHIN ANG NGE I LUNGAWI MAI ANG?

_Sum Enkawl Dan_

By Rick Warren
— Aug 25, 2026
“Châkna chavai mai mai ai chuan mita hmuh sa ngei chu a ṭha zâwk. Hei pawh hi engmahlo leh thil lothlâwn mai a lo ni.” [Thuhriltu 6:9]

Lungawi theih dan kawng tha ber pakhat chu midangte nena inkhaikhin loh a ni. Buaina langsar ni fo chu mite nena inkhaikhin i uar lutuk kha a ni! Kan inkhaikhin chamchi a ni ber.

Mi tute emawh inah i va leng a, i thil tih hmasak ber chu inkhaikhin a ni: “An chhuat hi ka duh e! An puanzar hi han en teh! E he, an tv chu leh! Nangmah i inngaihtuah ve ta thung a, “Kan ina kan thil neihte chuan an tluk lo hle mai!” Tu emaw i kal pel a, “A sam a tih dan kha ka duh hle mai, ka sam ve hi zawng a hnawk nuai mai vawiin chu,” i ti chiam ṭhin. 

I inkhaikhin ve reng a, chu chuan a tihnual rawih ṭhin ang che. I tih tawh loh a ngai! Lungawina chu i zir dawn a nih ngai chuan i nun chu midang nena khaikhin i bansan vat a ngai ang. 

Nangmahin nei kher lova mite thil neih i lawmpui thiam a ṭul. Mite hlawhtlinna emaw thil neihte chu itsikna tel lo leh neih ve vek tum kher lovin i lawmpui thiam a ṭul. 

He thu hi mi tam takten an thil hriat thiam loh a ni: Bungrua eng emaw chu nei kher lovin i hlimpui ve thei tih chu! Tlang thengthaw nuam taka teihawi nuam i ti a ni thei. Eng vangin nge mite thlam hawh mai theih emaw i ṭhiante thlam chu nangma puala lei kher lovin i hawh mai lovang? Thil eng pawh nei kher lovin a nawmna a chen theih.  

Thil khaikhin miah loh chu pawm dan ṭha a ni satliah lo – Pathian thupek a ni zawk. Exodus 20: 17-ah chuan hetiang hian kan hmu, “ I vêngte in leh lo awt suh; i ṭhian nupui pawh ît suh, a bawihpa emaw, a bawihnu emaw, a bâwng emaw, a sabengtung emaw, a neih eng mah i awt tûr a ni lo ,” tiin.

Awhna chu thil neih tumna thunun theih loh a ni. Sual pumpelh ngai tak a nih avangin Thu Sawm pekah pawh telh a ni hial. Awt tih chu Greek ṭawnga a awmziaah chuan thil in duh tak in thlah phal tawh loh tihna ang a ni. Pathian thil thlawn pek i dawn zinga Amahin pe chhuak tura a tih che i pe chhuak thei lo a nih chuan, i nei a ni tawh lo – chu thil chuan nangmah zawk kha a nei che a ni. 

Mahse duhna tih thung erawh a dik lo vek lem lo. Dik tak chuan engmah i duh loh tlat chuan i tihlawhtling thei ngai lovang. Krista anna kawnga ṭhan len chu i duh loh tlat chuan i ṭhanglian thei ngai lo vang. Mi thil phal nih i duh loh chuan i thil phal ngai lo vang. 

Chutianga Krista-anna, lungawina nun chu mite nena i inkhaikhin tawh loh hunah chauh i chang ang. Mite nena i inkhaikhin chuan chu chuan awhnaah a hruai lut che a, mite thil neih i awh chiah chuan lungawina i nei thei tawh ngai lovang. 

Thuhriltu 6: 9 chuan hetiang hian a sawi “Châkna chavai mai mai ai chuan mita hmuh sa ngei chu a ṭha zâwk. Hei pawh hi engmahlo leh thil lothlâwn mai a lo ni,” tiin. 

Ngaihtuah zui atan. 

* Mite thil neih i lawmpui ve theih nan engtin nge i thil neihte i thlir dan kha i thlak danglam ang? 

* Pathian chuan bungrua ni lo thil dang eng angin nge i nun chu chhungkhat turin a duh che? 

* Ringtute chuan Pathianin an duhzawng a pek dan tur an sawi chamchi a. Eng ang lawmna nge Pathian chuan pe che sela i duh?  

*[Lettu : Sangpuia]*

Monday, August 24, 2026

I SUM THUHLAAH HLAUHNA NI LOVIN RINNA VUAN RAWH

_Sum enkawl dan_
 
 By Rick Warren
— Aug 24, 2026
“Chutichuan, a talent kha lâksak ula, talent sâwm neitu kha pe rawh u. A nei apiang an pêk belhchhah ang a, a ngah êm êm ang; a nei lo erawh chu a neih chhun pawh an lâksak ang.” [Matthaia 25:28-29]

I nun i dahkham theih loh chhan kha eng nge ni? Sum leh paia i intodelh theih loh chhan kha eng nge ni? A awmzia chiah ka hrilh ang che: Hlauhna a ni.

Bible-ah chuan Pathianin sum leh paia thua inkaihhruaina a duan i hmu thei ang. Pathian thutiamah chuan chung chu i zawm chuan malsawmna i dawng bawk ang. Mahse rinna an phut a, chu chuan mi tam tak a tihlau ṭhin. Pathian duh dana thil tih chu an hlau a ni.

Hlauhna chi hrang hrangin a uai bet thei che. Hlauhna chi khat chu mahni inrinhlelhna a ni, hetiang hian, “Hmanah i hlawhchham tawh a, tinawn tawh miah suh,” tiin. Mahse i lo hlawhchham tawh avang chuan i beidawng ang tihna a ni ngawt lo. Mi zawng zawng an hlawhchham tawh vek; mahse thil awmzia zir chhuahna awm chhun a ni. Pathian chuan mi naran an hlawhchham hnua beidawng duh lova kal zui ngar ngarte chu a hmang ṭhin.

Zirtir pahnih – Juda leh Petera te – khan Isua khenbeh a nih hma khan an phatsan a. Thil sual inang an ti a, mahse an danglamna chu an hlawhchham hnua an awm dan kha a ni. Juda chuan a sualna thlirin Pathian ngaihdamna a ngaihtuah thei lo. A inchhirna chuan amah a khuh vek a. tichuan a hnuah chuan amah nunna hial a la ta a ni.

Peteran a sualna a hriat chhuah hnu chuan, a ṭawngṭai a, a sual a sim a, Pathian ngaihdamna a dil thung. Tichuan Isua khan Pentecost nia thuchah sawi turin Petera a thlang a, chu mi ni vek chuan mi 3,000 lai chhandamna an ni. Isua chuan a zirtirte zinga a hlawhchham ber kha a kohhran dinna hmanrua atan a hmang zui hial.

Eng ang Pathian nge a nih chiah! Mi ropui leh lawm hlawh a thlang lo. A zirtirte zinga a daisual nasa ber a thlang mauh mai.

Sum leh paiah emaw thil dangah emaw buai namen lovin i buai mai thei. Mahse hun kal tawha i lo awm dan chu a pawimawh ber lo. Tun dinhmuna i kawng zawh mek kha a pawimawh ber.

Talent chungchang Matthaia 25-a kan hmuhah chuan mi hausa pakhat chuan a chhiahhlawh pathumte hnenah chuan hla taka a zin hmain sum leh pai a kawltir ṭheuh a. A let leh hnu chuan an dinhmun a zawt diat diat a. Pahnihte chuan an pu sum chu a letin an peipung a, a pathumna thung chuan a hlau a, a chanpual chu thukruin, peipung lo leh thawk lovin a lo dahbo a ni. A hlauhna chuan a pu chu tibeidawngin a tihnual hle, hetiang hian thutawp a siam hial, “Chutichuan, a talent kha lâksak ula, talent sâwm neitu kha pe rawh u,” tiin. An hotupa chuan a thil lo pek tawh ang ang chu a laksak leh vek a ni.  

Pathian duh dan anga thil tih i tum changin hlauhna a lo inlar ve ṭhin. Setana chuan i sum chungchanga Pathian thupek i hlamchhiah theih nan sum enkawl chungchanga theihna i neihte chu rinhlelhtir che a tum ang. Mihring nunah hlawhtlin i duh chuan i hlauhna up beta i pen zel a ngai. I thil hlauh ber ngei pawh i tih mai a ngaih chang a awm!

Rinnaa hmalam i pan a, sum leh paia hahdamna i chan theih nana Pathian thupek zawm i tum changin Pathian malsawmna i chang a, chu chu malsawmna tam zawk leh mawhphurhna sang zawkin a chhunzawm ṭhin.  

Matthaia 25: 29 chuan hetiang hian a sawi hial, "A nei apiang an pêk belhchhah ang a, a ngah êm êm ang; a nei lo erawh chu a neih chhun pawh an lâksak ang,” tiin.

Ngaihtuah zui atan.

Sum leh paia hlawhchhamna eng angin nge i nuna Pathianin sum inkaihhruaina a pek che zawm thei lo turin tihniam che?

Pathian hnenah sum enkawltu i nihna angin mawhphurhna sang zawk chang turin i lo dil tawh em? Eng vangin nge?

Pathianin sum thua a ro rel dan chu a eng lai nge zawm harsa riauva i hriat? Vawiin hian chung hlauhnate chu han sawi teh.

 *Pathian thutiamah i innghat thei ang.* 

I sualna chuan Pathian aṭangin a ṭhenhrang che, chu chu nangma lamah chuan siamṭhat theih engmah a awm lo. Tichuan mi tu emaw i sual lak aṭanga chhan tur che leh Pathian pawm tlaka siamtu tur che i mamawh a ni.

Chuvang chuan Pathianin Isua a rawn tir a. Kraws-a Isua thihna chuan i thil lo tihsual tawh zawng zawng leh la tihsual turte man a tlaksak che. Isua chuan Pathian Pa nena inlaichinna nei turin remchang a siamsak che. Bible chuan hetiang hian a sawi, “ Isua Krista an rin avângin tu pawh a ring apiangte chu Pathianin thiam a chantîr a ni,” tiin [Rom 3: 22]

I sualte inchhir a Isua i rin chuan Isua nena inzin kawng chu i zawh ṭan thei ang. Isua Krista kuta tlu lut tura i inpeih a nih chuan he ṭawngṭaina hmang hian ṭawngṭai ang che: “Lalpa duh tak, misual ka ni tih ka hria a, i ngaihdamna ka rawn dil e. Isua Krista chu i Fapa a ni tih ka pawm a. Ka sual avangin a thi a, i kaitho leh ngei a ni tih pawh ka ring. Ka chhandamtu atana pawmin ka Lal atana pawmin amah zui tlat ka duh e. Ka nun hi hruaiin I duh zawng ti turin min pui ang che. Isua hmingin ka dil e. Amen.”  

Isua pawm tura thutlukna i siam zo chiah a nih chuan he mail Rick@PastorRick.com ah hian min lo bia ang che. Isua nena in zinkawng atana thuziak pawimawh tak takte ka lo thawn ang.

*[Lettu : Sangpuia]*

Sunday, August 23, 2026

SUM HI I TA A NI LO, I ENKAWL ZAWK MAI A NI

_Sum Enkawl Dan_

- Rick Warren 
- August 23, 2026
_“Mi, ram danga kal dâwna, ama bawihte kova, a sumte an hnêna kawltîr ang chu a ni si a. Bawih pakhat hnênah talent nga a pe a, bawih dang hnênah talent hnih a pe a, bawih dang hnênah talent khat a pe a; an tih theih tâwk tûr ang zêl ṭheuhvin a pe a; tichuan, a kal ta a."_ (Matthaia 25:14-15)

Isuan mi hausa pakhat, hmun hla taka a zin chhuah dawn avanga a chhiahhlawhte enkawl tura a sum a sem thu a sawi a. A haw ve leh a sum an lo enkawl dan chanchin a zawt diat diat a.

Hetiang hi a ni: _“Mi, ram danga kal dâwna, ama bawihte kova, a sumte an hnêna kawltîr ang chu a ni si a. Bawih pakhat hnênah talent nga a pe a, bawih dang hnênah talent hnih a pe a, bawih dang hnênah talent khat a pe a; an tih theih tâwk tûr ang zêl ṭheuhvin a pe a; tichuan, a kal ta a."_ (Matthaia 25:14-15)

Mi hausa pa chuan vawngtu (steward) ṭha a zawng a ni. He laia "vawngtu" tih ṭawngkam hi Sapṭawng Upaa "enkawltu" (manager) tih nen a inzawm tlat. Thil i vawn dan, i enkawl dan kha sum leh paia i zalenna hriltu a ni. Sum leh paia tlakchham loh dan hmasa ber chu a neitu nihna dan hi a ni: I thil neih engkim kha Pathian ta a ni a; a enkawltu mai i ni!

I hun vawngtu tura koh i ni a. I inthunun theihna turin i koah mawhphurhna dah a ni bawk. I hriselna, inlaichinna leh hamṭhatna te chunga mawhphurhna i kutah dah a ni. I thil neih zawng zawng vawngtu emaw enkawltu emaw ni turin Pathianin a ko che.

"Mahse ngawi lawk teh! Ka sum tur ka thawk chhuak a, tunah nangin ka ta tur a nih loh tur thu min hrilh maw?" i ti a ni mai thei. Sum thawk chhuak thei turin i taksa kha khawi aṭanga i neih nge? Hnathawk tura finna i neih kha khawia mi nge? I neih zawng zawng kha Pathian hnen aṭanga i dawn a ni.

Hringnunah hian engmah neih i nei lo; i puk vek a ni. Khawvela i cham chhung hian Pathian sum i hmang mai chauh a ni. Eng emaw hun chhung atan a puktir mai che a ni. I hmaah tu emaw a puktir a, i thih hnuah pawh midang a puktir leh ang. I ta a ni lo; Pathian ta a ni. I enkawl tur mai chauh a ni.

Neitu Dan i theihnghilhin engin nge hriattir ṭhin che? Sum kha i ta emaw i tihin i lungngai ṭhin. Ṭul loah i rilru i tihahin i hnual mai ṭhin anih hi.

Sum enkawl hi thlarau kawnga inthununna a ni. Pathianin vanramah eng chen nge thlaraua i rintlak dawn tih fiah nan a sum i enkawl dan a thlir reng a ni. Hei hian i awm a tinuam lo mai thei, mahse neitu nihna danah hian zalenna a awm a ni.

Pathian hi a neitu a ni a, a enkawltu mai i ni tih i hriat reng chuan lungngaihna tur i nei tlem sawt ang a, Pathian sum uluk taka enkawl turin ke i pen ang.

Ngaihtuah zui atan.

Sumdawnna lian tham enkawltu ni ta la, hetiang anga nawrna na tak hi a neitu nihna ang maiin i nei ang em? A neitu ang tluka hlawhtlin duhna i nei ang em? Engvangin?

Engtinnge thlarau nuna thununna, sum enkawlna kawng ang chi hi i neih ang?

Sum lama thutlukna siamna kawngah engtinnge ṭawngṭaina hi a ṭangkai? Sum enkawlna kawngah engvangin nge ṭawngṭai a pawimawh?

[Lettu: Mapuia Fanai]

Saturday, August 22, 2026

SUMA RINAWMTE CHU PATHIANIN LAWMMAN A PE ṬHIN

_Sum Enkawl Dan_

- Rick Warren 
- August 22, 2026
_"A pu chuan a hnênah, ‘Bawih ṭha leh rinawm, i tiṭha e; tlêm te chungah i rinawm a, tam tak chungah ka awmtîr ang che; i pu lâwmnaah lût rawh,’ a ti a."_ (Matthaia 25:21)

Sum hi i rinawmna tehfung pawimawh tak a ni. Pathianin thil dang tam tak aiin i rinna fiah nan a hmang nasa zawk. Engvangin? A chhan chu miin thawhrimna zawng zawng nena an beih avangin a ni.

Pathianin sum enkawl thiamte hnena lawmman a pek hi han en teh: _"A pu chuan a hnênah, ‘Bawih ṭha leh rinawm, i tiṭha e; tlêm te chungah i rinawm a, tam tak chungah ka awmtîr ang che; i pu lâwmnaah lût rawh,’ a ti a."_ (Matthaia 25:21)

Thil inbuk tawk dan chu hei hi a ni: Pathianin sum i enkawl thiam chuan lawmmawn a pe ang che. Matthaia bung 25-ah chuan lawmman chhawng thum kan hmu: nem nghehna, kaisanna leh lawmna.

Pathianin heti hian a nem nghet ang a ni, "I ti ṭha e! Thil ka pek che chungah rinna ka nghat ngam dawn em tih ka fiah che a, fiahna i pal tlang e. Chhiahhlawh fel leh rinawm, i ti ṭha e."

A rahbi pahnihna chu kaisanna a ni. Thil tlemte chunga rinawmna i lantir chuan Pathianin mawhphurhna sang zawk a pe ang che.

Mawhphurhna ṭha taka i hlen chuan Pathianin a lawmpui ang che. Tichuan Pathian lawmna i ṭawmpui ang!

Isuan heti hian a ti, _“Tu mân hotu pahnih rawng an bâwl kawp thei lo: pakhat huain pakhat an duh ang; a nih loh leh, pakhat ṭanin pakhat an hmusit ang. Pathian leh sum rawng in bâwl kawp thei lo ve."_ (Matthaia 6:24)

Pathian leh sum rawng in bawl tur a ni lo a ti miah lo tih chhinchhiah la. In bawl thei lo a ti zawk a ni. Thil theih a ni lo bawk. 

Sum hi chhiahhlawh ṭangkai tak mahse pu hlauhawm tak a ni. A thuhnuaiah i awm tawh chuan rilru hah reng rengin i awm reng ang. I lungngai reng ang a. I tawt up up reng ang.

Mahse sum hi i thuhnuaia i dah a, i chhiahhlawha i siam chuan i rawng a bawl ang. Sum rawng i bawl loh a sumin i rawng a bawl chuan thlamuang takin i awm thei ang.

Ngaihtuah zui atan.

Pathianin i sum enkawl dan enfiah ta se mark engzat nge a pek ang che? Engvangin?

Engtik khan nge i sumin a thunhnuai che? Engtikah nge sum i thuhnuaiah i dah? Chungah chuan Pathian nena in inlaichinnaah engnge danglamna awm?

Engtinnge i sumin a thuhnuai loh che a i thuhnuai theih zawkna turin i sum i enkawl ang?

[Lettu: Mapuia Fanai]

Friday, August 21, 2026

ZAHNGAIHNA LANTIR A PAWIMAWH CHHAN PALI

_Pathian Ṭhatna Hnuaia Len_

By Rick Warren
August 21, 2026
“ _Mi khawngaih thei takte chu an eng a thâwl e; Khawngaih an la hlawh dâwn si a_ .” [Matthaia 5:7]

Midang sawisel hrat tak i nih chuan nang pawh miten sawisel che an la chak ang tih i hria em? Midanga chunga zahngaihna lantir ṭhintu i nih thung chuan, i chungah mite pawhin zahngaihna an lantir ve ang? Midang laka mi thilphal chi i nih chuan, mite pawh i chungah an thilphal ve ang? Midang laka i awm dan ang apiang chu i chungah pawh a lo la thleng ve ang. 

Chutiang chiah chu Pathian zahngaihna chu a ni. 

Isua chuan Matthaia 5: 7-ah, “ _Mi khawngaih thei takte chu an eng a thâwl e; Khawngaih an la hlawh dâwn si a_ ,” tiin a sawi. 

Mahse Pathian chuan midang chunga zahngaihna lantir turin engah nge min tih? Zahngaihna lantir chu engvangin nge a pawimawh? 

A chhan chu Pathianin zahngaihna a hmuhtir che.
Ephesi 2: 4-5 chuan, “ _Nimahsela, Pathian chuan khawngaihna a ngahin, a mi hmangaihna nasa tak avâng khân, kan bawhchhiatnate avânga thi kan nih lai meuh pawhin Krista rualin min tinung ve a (khawngaihnaa chhandam in ni ta e)_ ” tiin a sawi. Pathian chuan amah aṭanga zahngaihna a hmuhtir che chu midang hnena pe chhawng zel turin a ti che. 

A chhan chu Pathian chuan zahngai thei tak ni turin a duh che. 
Hringnun khaikhawmna chu engnge ni ta ber? Hei hi a ni e: “ _Aw mihring, ṭha chu a entîr tawh che a ni; Lalpan a phût che chu eng nge ni? Dik taka tih leh khawngaihna ngainat leh, i Pathian nêna thuhnuairawlh taka lên dun a ni lo vem ni?_ ” [Mika 6:8] 

A chhan chu i hmalam hunah chuan zahngaihna tam zawk i la mamawh dawn. 
Tun dinhmun aṭanga vanram i thlen hun thlengin thil tihsual eng emaw i la ti leh ang, Pathian zahngaihna i la mamawh zel dawn. Mahse i pek phal loh chu i dawng bik dawn lo. Jakoba 2: 13 chuan “ _Khawngaihna tel lova thil titu chu khawngaihna tel lova rêlsak a ni ang, mi khawngaih thei erawh chuan rorêlna hlauh tûr a nei lo_ ,” tiin a sawi. 

A chhan chu zahngaihna lantir chuan hlimna a thlen. 
Matthaia 5: 7 chuan, “ _Mi khawngaih thei takte chu an eng a thâwl e; Khawngaih an la hlawh dâwn si a_ ,” tiin a sawi. Thumal “eng thawl” tih chu hlim tihna a ni, zahngaihna awmzia chu i hriat chian ang zel leh i nunpui tam ang zelin i lo hlim deuh deuhin malsawmna pawh i chang tam zel ang. 

A chhan chu khawvela mi tam tak chu anmahni tan an nung a, midang laka zahngaihna leh khawngaihna lantirtu chu midang zingah an langsar fo vang. Midang chunga zahngaihna i lantir lai chuan chu zahngaihna chu miten an hriat rengna che ni rawh se, chu chuan chatuan daih danglamna a thlen ang!

Ngaihtuah zui atan. 

• “Khawngaihna duh” tih awmzia chu engnge ni [Mika 6:8]?
• Midang chunga zAahngaihna i lantir lai chuan Pathian chuan eng malsawmnain nge a vur let ve che – tih a harsat em em lai pawh chuan? 
• Kar liam taa zahngaihna i lantirna tur ni si, mahse i lantir tak lohna chu tu nge ni?  

Pathian chuan i nunah danglamna ropui tak a lo thlen che. 

Pathian chuan a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “ _Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen_ .”
 
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 
 
[ *Lettu:* Peka]

Thursday, August 20, 2026

PATHIANIN A HMANGAIH HLE CHE

_Pathian Ṭhatna Hnuaia Len_

By Rick Warren
August 20, 2026
“ _Pathian hmangaihna chu hetiang hian kan zîngah a lo lang, a zâra nun kan neih theihna tûrin Pathianin a Fapa neih chhun khawvêla a rawn tirhah hian… Hei ngei hi a ni hmangaihna chu: Keinin Pathian kan hmangaih ni lovin, Aman min hmangaih a, kan sual thupha chawi nân a Fapa a rawn tîr ta zâwk hi_ .” [1 John 4:9-10]

Hringnuna thil eng pawh mai – inlaichinna, hna, hriselna, sum leh paite - chu an danglam reng ṭhin. Mahse thil pakhat khawvela danglam ve ngai reng reng lo a awm a: chu chu Pathian hmangaihna a ni. 

Eng dinhmunah pawh Pathian chuan a hmangaih che. I hlawhchham lai, i tlakran lai, leh sual lai te pawh chuan Pathian hmangaihna chu an kiam ngai chuang lo. Pathian hmangaihna chu i innghahna atan a tlak a ni tih hriatna chuan i innghahna tur lungpui a pe ang che. 

Bible chang lar ber mai, John 3: 16 chuan hetiang hian a sawi, “ _Pathianin khawvêl a hmangaih êm êm a; tichuan, a Fapa mal neih chhun a pe a_ ,” tiin.

Chu chang thlana thuziak langsar lutuk lo “em em” tih chu “hmangaih” tih bulah tarlan a ni. Thumal “em em” tih chuan Pathian hmangaihna nasa tak a tarlang thung. Pathian hmangaihna thil phal tak, hmangaihna ropui, laksawn theih loh chuan a chelh reng che a ni. I hlim ni leh lungngaih ni chuan a hmangaih che a. I sual ni leh a tana i rinawm ni pawh chuan a hmangaih reng che. 

Chu hmangaihna ropui tak chu i mihring finna hmang ringawta hriat chu a fuh tawk lo thei ang. I thinlung hmanga i dai a ngai a, i thlarau aṭang ngei pawha i hriat a ngai ang. Hmangaihna chu Pathian zia a ni tawp. Pathian chuan leilung siamin a chhunga thil awm zawng zawngte chu a hmangaih theih turin a siam vek a ni. I hmangaih ve theih nan nang pawh a siam che. 

Dik tak chuan, Isuaah chuan Pathian chuan hmangaihna tak tak awm dan min hmuhtir a ni. Bible chuan, ““ _Pathian hmangaihna chu hetiang hian kan zîngah a lo lang, a zâra nun kan neih theihna tûrin Pathianin a Fapa neih chhun khawvêla a rawn tirhah hian… Hei ngei hi a ni hmangaihna chu: Keinin Pathian kan hmangaih ni lovin, Aman min hmangaih a, kan sual thupha chawi nân a Fapa a rawn tîr ta zâwk hi_ ,” tiin a sawi [1 John 4:9-10]. 

Mi tam tak chuan an hmangaih thu che an sawi a. Mahse Pathian chuan a hmangaihna a lantir thung. A tana a nat em em thlengin a hmangaih che. A Fapa a lo hlan ta reng a ni. Isua i tana a thih chuan hetiang deuh hi a ni – Ka hmangaih em che avang hian i tel lova nun ai chuan thih ka thlang zawk e a tihna a ni. 

Bible chuan hmangaihna dik tak – i nun nghah tlakna hmangaihna chu engtiang takin nge an awm tih a tarlang. Hmangaihna dik chuan engkim a pe a. Hmangaihna dik chuan chatuan thlir chungin a tuar a ni. 

Chutiang hmangaihna chu i tan Pathian chauhin a nei. Ban phar chungin ṭhatna, zahngaihna leh hmangaihna lantir tur chein a lo nghak che. 

Ngaihtuah zui atan. 

• I hringnun chu thil tihbo theih emaw laksawn theih emaw mai mai loah chuan eng vangin nge i nghah ngai? 
• Eng vangin nge Pathian hmangaihna chu i rinhlelh fo? 
• Isua Kristaa Pathian hmangaihna chu midang hnenah eng vangin nge i hrilh ang? 

Isua chuan Pathianin engtiang takin nge a hmangaih che tih a tarlang

Pathian chuan a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”
 
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 
 
[Lettu: Peka]

Wednesday, August 19, 2026

CHATUAN ATANA CHHUNGKAW INHMUH KHAWM LEHNA

_Pathian Ṭhatna Hnuaia Len_

- Rick Warren
- August 19, 2026
"Chutah chuan Lalpa nen chhungkaw inhmuh khawm lehna ropui tak a awm dawn a. Chuvangin, he thu hian inthlamuan tawn rawh u," I Thessalonika 4:17-18 (MSG).

Ka naupan lai chuan vanram chungchang hi ka ngaihtuah vak ngai lo. A chhan pakhatna chu, khawvelin a sawi danah chuan a ninawm hmel em em a. Pahnihnaah chuan, hla tak a niin ka hria. Pathumnaah chuan, ka hmelhriat tumah an la awm lo. Mahse tunah chuan vanramah ka hmelhriat tam tak an awm tawh a, an hnena kala, an bula awm leh chu ka nghakhlel tawh tak zet a ni.

Vanramah chuan Lalpa hmangaihtu kan hmangaihte nen kan inhmu khawm leh ang. Pathian chhungkuaa awm zawng zawng chu chutah chuan an awm vek dawn a ni.

Vanramah chuan tu nge biak hmasak ber i duh ang? A hmasa berah chuan Lalpa i hmu ang a, chibai i buk ang tih a chiangsa. Mahse a dawtah tu nge hmuh i chak? Hmasang aṭanga tun thlenga Isua ringtu zawng zawng chu an awm vek dawn a ni. Mosia biak i duh em? I be thei ang! Abrahama te, Mari te, Paula te pawh hi? Jona hnenah thil zawh tur tam tak ka nei. Kristiante chanchina mi hriat hlawh scientist te, khawvel hruaitu te, hnam tin chi tin aṭanga lo kal te i hmu ang. Kumkhuain anmahni biakna hun i nei dawn a ni.

The Message Bible chuan, "Chutah chuan Lalpa nen chhungkaw inhmuh khawm lehna ropui tak a awm dawn a, " a ti (I Thessalonika 4:17).

A va nuamin a va hlimawm dawn em tih i ngaihtuah ngai em? Tichuan chang 18-naah chuan, "He thu hian lo inthlamuan tawn rawh u," a ti.

Ka nu vanramah a awm tawh, ka pa vanramah a awm tawh, ka u, Jim-a vanramah a awm tawh a, ka fapa Matthew-a pawh vanramah a awm tawh. Ka rawngbawlpui tam takte pawh vanramah an awm tawh a ni. Thihna piah lamah ka chhungte leh ka ṭhiante an tam poh leh vanram chu ka tan a hlu zual sauh sauh a ni.

Isua hma a ding tur leh i ṭhiante leh chhungte nena inhmu khawm leh turin i ngaihtuahna chuan a tilawm che em? Mi tu emaw kan ṭahpui lai hian he thlamuanna thu hi kan hrilh tur a ni. Anni leh an hmangaihte chuan Isua chu chhandamtu a an pawm a nih chuan thihna hi tawpna a ni lo. An la inhmu leh dawn a ni.

Hei hi kan chunga Pathian ṭhatna a ni, chatuan atana chhungkaw inhmuh khawm lehna aia beiseina ropui zawk a awm lo a ni.

Ngaihtuah zui atan

Vanramah Pathian chhungkuaa mite nen in inhmu leh dawn a ni tih hriatna chuan Chanchin Ṭha hril darh turin engtin nge a fuih che?

I mi hriat zingah tu berin nge vanram, kumkhua a awmna tur thu hi hriat mamawh? Engtin nge i tih ang?

Khawvel i chhuahsan hunah, vanramah eng thil e nge sawi i chak ber ang?

[ *Lettu: Marova Punte* ]

Tuesday, August 18, 2026

KRISTA CHUAN MI NUNAH HRIATTHIAMNA A THLEN ṬHIN

_Pathian Ṭhatna Hnuaia Len_

 — Rick Warren 
— August 18, 2026
“Pathian chu buaina Pathian a ni lo va, remna Pathian a ni zawk si a." 1 Korinth 14:33

Pathian chuan khawiah pawh kal la, a aiawh zel turin a duh che a. Chutiang bawk chuan ram hrang hrang pawhin aiawh an tirchhuak ṭhina, Pathianin a hmangaihna leh a ngaihdamna thu tlangaupui turin a tirchhuak ve che a ni.

Mahse rinnaa puangchhuak turin inrintawkna i tlachham maithei a. Sumdawng rilru pu tan lo chuan a harsa maithei e. Mahse chu chu a dik lo a ni! Pathian chhungkuaa midangte tel tura sawm turin ṭawngkam thiam kher a ngai lo.

Tute pawhin chhungrilah zawn kan nei vek tih ka sawi tawh a. Chuvangin, Isua chanchin midang i hriattir hian, an thil zawn chu nangman i pe tihna a ni ang. Chu chu chakna kan neih phahna a ni!

Rinna puanchhuah nana inrintawkna nasa zawk neih theihna chu : Mi tam zawkin an rin pawh an hrechiang lo. Pathian awm ring lo emaw, Kristian emaw, Muslim emaw an in ti maithei e. Amaherawhchu i zirchian hnuah chuan chung ho chuan eng rinna ber nge an zawm tih pawh i hre lo hial ang.

Mi tam tak chuan ngaihdan mumal neiin an inhriaa, amaherawhchu anmahni ngei pawh chiang loin an tawp fo ṭhin. Entirnan, "engmah hi thil dik ber a awm lo" an ti. Mahse chu thil chu engmah lo mai a ni a, thu inkalh tlat a ni. A dika dik chuan, chung ho chuan thil dik ber chu a awm ngei a ni tih rinchhanin an nung zawk a ni. Chu chuan an rinna chu a mumal lo va, an chiang lo a ni tih a hriat theih bawk.

Mahse Kristaa beiseina chuan ringtute nunah chiang takin thu a sawi ṭhin. An mamawhna ang zelin hriatthiamna a pe bawk. Bible chuan 1 Korinth 14:33 ah, “Pathian chu buaina Pathian a ni lo va, remna Pathian a ni zawk si" tih min hrilh. Pathian Thu thutak chuan thu inkalh, chiang lo leh thil dang buaina hrang hrang lakah a chhuah zalen a ni.

“Tin thutak in hria ang a, thutak chuan a chhuah zalen ang che u,” a ti a.(Johana 8:32 NIV).

Hetah hian mihring chungchang ngaihnawm deuh a awm: mite chuan an rilrua a lan ang zelin thutlukna an siam mai ṭhin a. An rilrua lang chu finna hmanga ṭanchhan an tum ṭhin. Chuvangin, i rinna i hmanchhuah dawn hian, finna thuril hmangtea inhnialte hlau suh, a chhan chu mi fingte pawhin an rilrua thu awmte hmangin thutlukna an siam ve tho mai!

A lehpekah chuan rinna puanchhuahna kawngah inrintawkna i tlachham a nih pawhin, hahdam takin awm la, Isua rinna thuchah chuan ringtute nunah mamawh chhanna a pe ṭhin a ni.

Ngaihtuah zui atan

* Rinna hriatthiam harsa emaw inkalh deuh emaw i neih tawh kha eng nge? Pathian Thuin engtin nge hriatchiannah a hruai luh che?

* Pathian Thu thutak rilrua behchhan aiin rilrua landan maiin miten eng thutlukna nge an siam ṭhin le?

* Tuin nge rinna dik taka ṭawmpui thei che?

*[Lettu: Sangpuia]*

Monday, August 17, 2026

HRINGNUNAH HIAN ENGNGE PAWIMAWH BER

_Pathian Ṭhatna Hnuaia Len_

- Rick Warren
- August 17, 2026
"A ni takmeuh mai, ka Lalpa Krista Isua hriatna ropui bîkzia avângin thil engkim pawh chânnaah ka ruat a ni; amah vângin thil zawng zawng ka chân ta vek a, chûng chu hnâwmhneah lek ka ngai a." Philippi 3:8.

Nitin zing i thawh hian, thil eng hi nge awmze nei ni a, eng hi nge engmah lo mai mai tih i hriat fo a tul. Thil ho mai mai leh tangkaina nei lo thilah inti buai reng reng suh ang che.

Engnge awmze nei tih hi engah nge kan inhrilh nawn fo a tul le? Thil holam mai mai avangin kan hlimna hi kan hloh fo thin vang a ni. A nihna takah chuan, thil lian tham ni lem lo, thil ho te te kan ngaihtheihloh te avang hian kan hlimna hi kan hloh thin a. Kawngah motor i han khalh kual dawn veleh midang an rawn inrawlh lut zuk te mai mai hian i hlimna a tibuai fo thei a. I thawmhnaw tawk thinte kha i tawk ta hauh lova, i hlim lo leh ngawt a. Kan nun nasa taka tibuai fo thin thil hi thil ho te te a ni fo thin a, mahse thil engmah lo mai mai an ni fo a ni.

Paula chuan Philippi 3:7 ah khan, "Nimahsela, ka tâna hlâwkna tûr apiangte chu, chûng chu Krista avângin chânnaah ka ruat ta a ni" tiin a ziak. 

Isua Krista i tawh hma khan engnge i tan a hlawkna tur thil hlu ber ber ni le? I eizawnna lam a ni em? I sum siamna lam te? Ngaihzawng neih emaw lar emaw pawh a ni thei e.

Paula chuan chung thil zawng zawngte chu, "Ka Lalpa Krista Isua hriatna ropui bîkzia avângin thil engkim pawh chânnaah ka ruat a ni; amah vângin thil zawng zawng ka chân ta vek a, chûng chu hnâwmhneah lek ka ngai a" (Philippi 3:8) a ti a. 

Thil tangkai lemlo thil ten an tihbuai viau che chuan heng zawhna hi han inzawt ta la: Heng hi kum 100 hnuah pawh awmzia a nei angem? Chatuan chu sawi loh, naktuk maiah pawh thil tam tak hi chuan awmzia an nei lo mai thin a ni. I ngaihhlut thilte khan Isua nena inlaichinna i neih avanga hlimna i neih nen hian an el pha hauh lo a ni. 

Kristian i lo nih khan, i hlutna chu Isua khan a thlaksak che a. I tih duh thilte kha tih i duh tawh lova. I "duh" a thlaksak che a ni.

I nunah Pathian a lo tel hian, Isua hriatna avanga hlimna chu i chhar ta a. Chu chu thil awmze nei hlu ber chu a ni.

Ngaihtuah zui atan...

* I hlimna rawksaktu che eng thil ho mai mai nge i buaipui thin le?

* Chatuan lam thlir turin i hawi lam Pathianah chauh nghat turin eng thil nge a tak taka i zawm theih le?

* Isua i neih hmaa thil pawimawh ber kha engnge ni? Tunah eng angin nge i ngaih tak le?

*[Lettu: Sangpuia]*

Sunday, August 16, 2026

PATHIAN HMANGAIHNA TAWP LO CHUAN A ZUI ZEL CHE

_Pathian Ṭhatna Hnuaia Len_

- Rick Warren 
- August 16, 2026
_"Mathei lovin i ṭhatna leh hmangaihna tawp nei loo chuan ka dam chhûng zawng hian mi zui zêl ang a."_ (Sam 23:6, NLT)

I natna, chin ṭhan ṭha lo leh ensanna karah pawh Pathianin a thlir reng che. A ṭhatna chuan a zui zel che a, a hmangaihna tawp nei lo chuan a zui zel che a ni.

Heti hian i thlir thei bawk: Tu emaw, a fate venga zui reng, an kalna apianga zui ṭhin han ngaihtuah teh. Engpawh pal tlang mahla i kiangah Pathian a awm reng a, i thihhawkte a then faipui che a, a hmangaihna tawp nei lo chu i tan a awm reng tiin a hrilh nawn fo bawk che.

A awmzia chu, i hmalam hun kha zawhna hlira hmachhawn lo vin mak tihna i khat zawk thei. Engpawh thleng se i kiangah Pathian a awm zel. A ṭanpui ang che: _"444Mathei lovin ṭhatna leh ngilneihnain ka dam chhûng zawng hian mi zui zêl ang a; Tichuan, LALPA inah kumkhuain ka awm reng ang."_ (Sam 23:6)

Pathian ṭhatna chu engnge, a hmangaihna tawp ngai lo chu engnge? Pathian ṭhatna chuan kan phu loh thil tam tak min pe a ni. A hmangaihna thlawn ngai lo - a khawngaihna - a awmziaah chuan thiam loh chang tur min chhanchhuak tihna a ni.

Hei hi hre reng rawh:

• Pathian ṭhatna chuan i mamawh pein a venghim ang che.

• A hmangaihna thlawn lo chuan khawngaihin a ngaidam ang che.

• Pathian ṭhatna chuan i mamawh apiang a pe ang che.

• A hmangaihna thlawn lo chuan a thawi dam ang che.

• Pathian ṭhatna chuan a ṭanpui ang che.

• A hmangaihna thlawn lo chuan a tidam ang che.

Pathian thutiamah i innghat thei ang: "kumkhuain Pathian inah i cheng ang" tih thutiam telin. Chuvangin, Pathianin amah zui tura i mamawh a pek vek hnu che pawhin hmun famkim a lo buatsaihah chuan chatuan atan a la hmuak cheu che a ni.

Pathianin i nun chhung chu a hmangaihnain a zui zel che ang a, a chenchilhna chatuanin i chang zel ang.

Chu baka chanchin lawmawm a awm dawn em ni!

Ngaihtuah zui atan.

Eng hmathlir lian nge i neih? Engtinnge Pathian ṭhatna leh hmangaihnain a zui zel che tih hriatna hian i tum ram thleng turin nitin a puih che?

Hmalam huna zawhna ni lova mak ti chunga zuan luh hi engnge a awmzia?

Engtinnge i chunga Pathian ṭhatna leh midang chunga chutiang tho a lantir tur chu thu hi i tlangaupui ang?

[Lettu: Mapuia Fanai]

Deborah's birthday

Saturday, August 15, 2026

HLAU LO VIN I HMA HUN HMACHHAWN RAWH

_Pathian Ṭhatna Hnuaia Len_

- Rick Warren 
- August 15, 2026
_"Mathei lovin ṭhatna leh ngilneihnain ka dam chhûng zawng hian mi zui zêl ang a; Tichuan, LALPA inah kumkhuain ka awm reng ang."_ (Sam 23:6)

Engtik niah emaw chuan i lei taksa kha a la thi ang, mahse chu chu a tawpna a ni lo. Chatuan atan khawi hmunah emw zawk hian i la cheng dawn: vanram emaw meidil emaw. I taksa a thi ang, mahse i thi ve dawn lo, chatuan daih tura siam i ni tlat.

Chatuan chuan eng chen chiah nge a daih dawn? Chatuan a ni mai!

Bible-in ringtute hi engvang nge hma hun chungchanga inring tawk ber an nihna tur chhan min hrilh: _"Chutichuan, taksaa kan awm chhûng hian Lalpa hnênah kan awm lo tih hriain, kumkhuain muang takin kan awm ṭhîn . . . muang takin kan awm, ka ti, taksaa awm lova Lalpa hnêna awm kan duh zâwk."_ (2 Kor. 5:6, 8)

Thi tura i inpeih hma loh chuan nun dan tur dik tak i thiam ngai lo ang. Mi zawng zawng kan la pal tlang dawn a ni tih ka hriat reng hi inbuatsaihna tel miah lo a hmachhawn tur chu mi mawl chauh an ni ang.

Engtik niah emaw chuan i la thi dawn. Isua i rin chuan vanram i kai ang, "Pathian ina chatuana cheng turin" (Sam 23:6). Vanaramah chuan natna, lungngaihna, tuarna, beidawnna leh hlauhna a awm tawh lo ang. "_An mit ata mittui zawng zawng a hru fai ang a; Thihna a awm leh thei tawh lo vang a, Lungngaih te, ṭah te, nat te pawh A awm leh tawh hek lo vang; Thil hmasate chu a ral ta "_ (Thupuan 21:4).

Ringtute tan chuan thihna hi kaisanna kawngka a ni. Hmuh ṭha zawk leh buaina awm tawh lohna hmun a ni.

Chu'ng thudikte chuan i tan engkim a thlak thleng tur a ni! Nun hi a awlsam dawn a tihna erawh a ni lo. I hlim reng ang a, thil tih dan tur i hre vek ang emaw, thil sual i ti ngai lo ang tihna emaw a ni lo.

Mahse hlau lo vin hma hun i hmachhawn thei tihna a ni. Pathian i harsatna lian ber, chhandamna a thawk a. A kalsan ngai lo che ang , chatuanin a bulah i la cheng ang.

Ngaihtuah zui atan.

Engtin nge hmalam hun atana i inrintawkna khan i nunah nghawng a neih?

Isua zuitu an thih hian engvangin nge kan lungngaihna karah beiseina kan neih theih?

Vanram hi eng ang tak nge a nih i rin? Bible hian vanram hi eng angin nge a sawi le?

*Khawiah nge chatuan hun i hman dawn?*
Bible chuan Pathian Fapa, Isua kaltlang chauhin vanram i luh theih thu min hrilh. Vanram hi i thawh chhuah theih a ni lo: _"Rinna avânga khawngaihnaa chhandam in ni si a; nangmahni thawh chhuah a ni lo va, Pathian thilpêk a ni; 9thiltih avâng a ni lo ve; chuti lo chuan, miin an chhuang dah ang e."_ (Ephesi 2:8-9)

Isua hnena inpe tura i inpeih chuan heti hian ṭawngṭai rawh le:
"Lalpa, i Fapa Isua Krista ka rin chuan ka thil tihsual te ngaihdam a ni ang tiin min tiam a. Min siam chhan ka zir ang a, engtik niah emaw i chatuan inah min la pawm ngei ang.

"Thil ka tisual tih ka pawm a, i ngaihdamna ka dil e. Ka sual lak bo anih theih nan Isua ka tan a thi a, nangin i kai tho leh a ni tih ka ring. Vawiin aṭang hian Isua chu Chhandamtuah pawmin a hnung zui ka duh e. Min hruai la i duhzawng anga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Friday, August 14, 2026

ZAHNGAIHNA LANTIR DAN KAWNG RUK

_Pathian Ṭhatna Hnuaia Len_

By Rick Warren
August 14, 2026
“ _Chung lam aṭanga finna lo chhuak erawh chu a tîrin a thianghlim phawt a, chumi hnuah chuan inrem a duh a, a nunnêm a, a tih nuam a, zahngaihna leh rah ṭhain a khat a, thlei bîk a nei lo va, a vervêk lo a ni_ .” [Jacoba 3:17]

Zahngaihna chu lunghlu an deuh a ni a; kil hrang hrang a nei ṭhin. Bible chuan zahngaihna kil sarih lai chanchin chu a sawi a, chutianga zahngaihna pe chhuaktu nih chu i hre thiam a nih chuan mite nena in inlaichinna chu a thlak danglam vek thei ang.  

*1. Zahngaihna mite ngainat loh mihring chunga dawhtheihna lantir a ni.* 
Bible chuan Jakoba 3: 17 ah chuan, “ _Chung lam aṭanga finna lo chhuak erawh chu a tîrin a thianghlim phawt a, chumi hnuah chuan inrem a duh a, a nunnêm a, a tih nuam a, zahngaihna leh rah ṭhain a khat a, thlei bîk a nei lo va, a vervêk lo a ni_ ,” tiin a sawi. I fin deuh deuh ang zelin i dawh thei deuh deuhin, zahngaihna i lo ngah deuh deuh ang. 

*2. Zahngaihna chu hliama awmte ṭanpui a ni.* 
Zahngaihna tel lo chuan nangmah i in hmangaih angin i vengte i hmangaih thei ngai lovang. Thufingte 3: 27 chuan “ _A phute tân ṭhatna ui suh, i kutah tih theihna a awm phawt si chuan_ ,” tiin a sawi. 

*3. Zahngaihna chu midang hun ṭha siamsak a ni.* 
Mi tuin emaw a tihnat che chuan an tih anga chet ve a, chu mi chu tihnat ve sak a chakawm hle. Bible thung chuan, “ _Khâkna te, thinurna te, tauhna te, ânna te, sawichhiatna te zawng zawng chu bânsanin awm rawh se, sualna zawng zawng nên. Tin, inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u_ ,” tiin a sawi [Ephesi 4: 31 -32]. 

4. *Zahngaihna chu min tinatute tana thil ṭha tih a ni.*
Zahngaihna chu mite hnenah chuan an phu ni lovin an mamawh pek a ni. Eng vangin nge chu chu i tih ang? Chu chu Pathianin a tih dan chiah a ni: “ _Amaherawhchu, in hmêlmate hmangaih ula, an ṭhatna tûr ti ula, pûktîr rawh u, beidawng hauh lovin; tichuan, in lâwmman a tam ang a, Chungnungbera fate in ni bawk ang; ani chuan mi lâwm nachâng hre lote leh mi sualte a khawngaih ṭhîn. In Pain mi a khawngaih angin mi khawngaih ve rawh u_ ,” tiin [Luka 6: 35 -36]. 
 
5. *Zahngaihna chu kan pawisawitute chunga ṭhatna lantir a ni.* 
Inhnial nikhuaa chak zawk nih ai chuan mite Krista hnena hruai zawk chu i tuipui tur a ni. Bible chuan hetiang hian a sawi, “ _ṭhenkhat mei ata la chhuak thuai ula, chhandam rawh u; ṭhenkhat an tisa bawlhhlawh kaina silhfên lam pawh chu tenin, hlau chungin khawngaih rawh u_ ,” tiin [Juda 1: 23].  

6. *Zahngaihna chu mite ngainat loh mihring hmangaih a ni*
Hei hi zahngaihna fim ka tih chu a ni, a chhan chu ṭhian nei lo emaw khawtlang leh hna thawhnaa miten an kawm serhte va kawm hram hram chu a ngaih vang a ni. Pharisaiten Isuan chhiahkhawntute leh misualte bula chaw a ei laia an chhuahchhal khan Isua chuan, “ _Inthawina duh lovin khawngaihna ka duh e,’ tih hi a awmzia va zir rawh u; mi fel takte lam tûra lo kal ka ni lo va, mi sualte zâwk lam tûra lo kal ka ni asin_ ,” a ti daih a nih kha [Matthaia 9: 13]. 

Ngaihtuah zui atan. 

• In chennah bialah Krista bula hruai aia inhnialnaa hnehtu zawk nih duhtu mihring i lo hmu tawh ngai em? Nangmah ngei pawh chutiang chuan i lo ti ve tawh ngai em? 
• Zahngaihna chu dan aia inlaichinna ngaih pawimawh a nih chuan i nitin hnathawhnaa i thawhpui leh ṭhenawmte nena in inlaichinna chu i thlak danglam ngai ang? I chhungte nena in inlaichinnaah chuan engnge thlak ngai? 
• Tun karah hian i kiang vela nangmah tinatu che zingah engtin nge zahngaihna i lo lantir theih ang?

[ *Lettu:* Peka]

Thursday, August 13, 2026

HNUNG LAM LEH HMA LAMA VENHIMNA

_Pathian Ṭhatna Hnuaia Len_

By Rick Warren
August 13, 2026
“LALPA chuan amah hmangaihtu zawng zawng chu a vawng ṭha ṭhîn a.” [Sam 145:20]

Isua-ah rinna i nghat a nih chuan i hmalam hun chu hlauthawng chunga i thlir a ngai tawh lo vang. A ṭhatna leh zahngaihna chu i kiangah nitin a awm zawk a ni. 

Dik tak chuan Bible chuan “Matheilovin ngilneihna leh thil ṭhate chuan Ka dam chhûng zawng min zui zêl ang a, Tichuan, LALPA inah ka awm kumkhua tawh ang,” tiin beiseina nena Pathian lam a thlir tlat turin min chah [Sam 23: 6]. 

Berampui Ṭha chu i nei a, i hmaah chuan a talhtum leh a tiang nen a ding reng tawh. I hnung lamah khan beram vengtu uisathiam eng emaw zat an ding bawk. I nunah khan, chung beram vengtu uite chu a ṭhatna leh zahngaihna an ni a, ran rualte chu vengin khuar khuruma i tlak loh nan i hnungah kalin an lo veng che a ni. Chung beram vengtu ui pahnihte chuan Berampu Ṭha chu i zui theih nan an veng che a ni. 

*Pathiatna ṭhatna chuan a thlir reng che.* Thlah hauh lovin Pathian chuan a en reng ṭhin che tih i hria em? Pathian chuan a en reng zel che, a chhan chu amah hmangaih turin a siam che a ni. I nun kil tin mai kha a hria e. 

Sam 145: 20 chuan, “LALPA chuan amah hmangaihtu zawng zawng chu a vawng ṭha ṭhîn a” tiin a sawi bawk. 

A thlir satliah che a ni mai lo va, a veng che a ni. Bible chuan, “I kalna apianga vêng tûr chein Vântirhkohte chu a tîr ang a,” tiin a sawi hial zawk [Sam 91: 11]. 

Pathianin a ven vang mai che chuan i chungah thil ṭha chauh a thleng ang tihna erawh a ni lo. Tuarna leh beidawnna pawh i nunah chuan a lo thleng fo ang. Mahse Pathian thutiam chuan i chunga thil thleng apiang chu a ṭha zawngin a inher rem vek ang – a hnathawh dan chu tun damchhung hian i hmu thiam vek lo zawk ang. 

*Pathian khawngaihna leh zahngaihna chu i nunah a thawk mek a ni.* Bible chuan hetiang hian min muan mawlh mawlh, “Duhsak chein ka khawngaih leh ta che,” tiin [Isaia 60: 10]. 

Khawngaihna awmzia chu Pathianin i thil phu loh a pek che chu a ni a. Zahngaihna chu Pathianin i thil tawn tur a tawntir loh che chu a ni bawk. I thil lo tihsual, hlawhchham, leh sualna zawng zawng te avang chuan hremna chang tur i ni a, mahse Pathian chuan ngaidam chein zahngaihna a pe che a ni. Chu chu khawngaihna a ni. 

Zahngaihna lantir chu Pathian mizia a ni. Zahngaihna lantir chu a thil chin ṭhan tak a ni a! A ning ngai lo. Hrehawm pawh a ti lo. A kianga i lo let fo chang pawh chuan i lakah a beidawng ngai lo. Pathian chuan, “Awle, Thawhtanah, Nilaiah, Fridayah, ṭhatna chu ka pe ang che a, zahngaihna chu Inrinniah, Pathian niah ka pe ang che, nangmahin lo buaipui phawt teh,” a ti ngai lo. 

Thudik chu hei hi a ni, engtik lai pawhin nitin i kiangah a awm a, i tan ṭhatna leh zahngaihna chu a lantir reng a ni. 

Tumahin tun kar lo awm turah hian emaw, nakum emaw tun aṭanga kum 10-ah emaw thil lo thleng tur an hre lawk lo. Mahse Pathian lam i hawi chuan, chu chu thil theih a ni: Pathian chuan a ṭhatna liam zawih zawih, ṭhatna leh zahngaihna a neihtir ang che. Hlauh tur a awm lo. 

Ngaihtuah zui atan. 

• Sam 103: 2-13 chhiar rawh. Pathianin i chunga zahngaihna a lantir tawh zawng zawng chu ngaihtuah rawh. 
• Engtiangin nge Pathian zahngaihna dik taka thlirna chuan i nunah nghawng an neih ang? 
• Pathian chu i ṭhatna tura hna a thawk reng a nih chuan a tan chuan engnge i tih ngam ve ang? 

[ *Lettu:* Peka]

Wednesday, August 12, 2026

NANGMAH ANG KHA TU MAH AN AWM LO

_Pathian Ṭhatna Hnuaia Len_

- Rick Warren
- August 12, 2026
"Rilru dam chu tisa nunna a ni a, itsikna erawh chu ruh mawihna a ni," Thufingte 14:30.

Pathian ṭhatna a khat liam nun neih i duh chuan a hmasa bera i tih tur chu lawmthu sawi ṭan la, phunnawi bansan rawh. A pahnihna chu lungawi la, inkhaikhin bansan rawh.

Pathianin nangmah ni turin a siam che a, mi dang ni turin a siam lo che! Mi dang nen i inkhaikhin chuan awhna leh huatna i nei ang a, an awm dan i entawn phah thei bawk.

Mahse Pathian hian thil inang chiah a siam ngai lo. Thil dik tak chiah a siam ṭhin. Phir inang chiah pawh hi sâng tam takah danglamna an awm tho. Nangmah i nih duh loh chuan tu nge nangmah chu ni ta ang?

Thudik tak chu inkhaikhin hian buainaah min hruai lut ṭhin tih hi. I hmel, i zirna, i kawppui, i hna, i fate mi dang nen i khaikhin chuan harsatna pahnih a thlen ṭhin. 

Pakhatna, i beidawng hle ṭhin, engtik lai pawhin nang aia tiṭha zawk, hmel ṭha zawk, pawisa ngah zawk emaw, thiamna nei zawk an awm reng avangin. Pahnihna, chaponain i khat ṭhin. Eng vang nge? Nang aia tichhe zawk an awm reng avangin.

Bible chuan, "A dik thei a, hahdamna vei khat neih pawh hi buai philia thawka vei hnih neih ai chuan a ṭha," (Thuhriltu 4:6) a ti.

Social media avangin tunlaiah mi dangte nena inkhaikhin a awl ta hle. Ni tin, "Min en teh, Hei hi ka ti thei asin! Hei hi ka nei asin," tih i hmuh reng chuan awhna leh lungawi lohnaah a hruai lut thei che a. Mi dangte hneh tuma thiltih ve mai pawh a awl thei. mahse tu mah hneh i tum kher a ngai lo. Hlimna a khat nun neihna chabi chu Pathianin a siam dan ang che a lungawi taka awm mai hi a ni.

I buai lutuk avangin i chau em? Rilru leh thlarau lama hrisel i duh em? Bible chuan, "Rilru dam chu tisa nunna a ni a, itsikna eawh chu ruh mawihna a ni," (Thufingte 14:30) a ti.

Lungawina hi engin emaw min tihhlim hun nghah ni lovin, neihsaah a ni zawk. Mi dangte nen inkhaikhin bansan la. Pathianin a pek cheah lungawi rawh, tichuan i hlimna chu a lo luangliam dawn a ni.

Ngaihtuah zui atan

Tunah hian i nunah eng nge i hlimpui ber?

Pathianin mi dangte mal a sawm anga a sawm ve lo che ni a i hriat chuan chu chu engtin nge i hriat? Chutiang hunah chuan Pathian ṭhatna chungchang eng nge i hriat chhuah theih?

Social media ang chiin a ti lungawi lo dawn che ni a i hriat chuan a nghawng tur tihtlem nan eng nge i tih ang?

[ *Lettu: Marova Punte* ]

Tuesday, August 11, 2026

I THLUAK THLAK DANGLAM THEI NUNPHUNG

_Pathian Ṭhatna Hnuaia Len_

— Rick Warren 
— August 11, 2026
“Pathian fa sawiselbote in nih theihna turin phunnawina leh inhnialnate awm lovin engkim ti rawh u.” Philippi 2:14

Thawpikna nun atanga lungchhuak nun neih i duh chuan, thil pathum i tih ṭan ngai leh thil pathum i bansan ngai a awm a ni.

Vawiin hian a inkawp pakhatna chu kan enho dawn a: Lawmna nun nei ṭan la, phunnawi bansan rawh.

Zirchianna atanga a landanin lawmna chuan i thluakah chemical chi hrang hrang a pechhuak a – dopamine, serotonin leh oxytocin te an ni a – chu chuan hlimna leh muanna a pe che a ni.

Lawmna rilru chu i thawhhlim atangin i nei thei a. I muthmun atanga i thawh hmain i lawmna tur thilte ngaihtuah la. Entirnan, “Lalpa, boruak thianghlim min pek avangin ka lawm e; mutna tur khum min pek avangin ka lawm e; hlauhthawnawm dinhmuna ka din loh avangin ka lawm e” tiin. Lawmthu sawina tur engmah i ngaihtuah theih loh pawhin, lawmna nun neih duhna chuan i thluak chemistry kha a khawih danglam ang.

Bible chuan, “Pathian fa sawiselbote in nih theihna turin phunnawina leh inhnialnate awm lovin engkim ti rawh u” min ti. Philippi 2:14.

Eng thil emaw avanga i phunnawi hian eng hlawkna nge i neih? Khaw lum emaw vawt avanga i phunnawi hian a inthlak danglam phah em? I phunnawi avang khan i landanah danglamna i neih phah em? I kawppui, i fate emaw i hna emaw avanga i phunnawi khan danglamna an neih phah em?

Phunnawina hi hun khawhralna mai mai a ni. Thil awmze nei lo a ni. Hlutna a awm lo va. Phunnawina chuan nangmah a siamthat phah lo che. Chu ai chuan i nun kha Pathian duh dan a hmangin, “in rinnaah chuan nghet taka awmin, lawmthu sawi lo ngahin, amahah chuan awm rawh u” Kolossa 2:7

Nakinah chuan miin ti hian min la ti ang, “Pastor Rick, Pathian duhzawng hi hriat ka duh a ni. Ka inlaichinnaah hian eng nge ti tura Pathianin min duh? Ka hnaah hian eng nge ti tura min duh? Ka school ah hian eng nge ti tura min duh?”

“Engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a.” (1Thessalonika 5:18).  Eng vangin nge Pathianin rahbi pakhatna i rahchhuah hmain rahbi pahnihna chu rah dan a zirtir tehlul ang che? I kawppui turah Pathian duhzawng i hriat duh chuan, Pathianin rahbi pakhatna zawh chhuak phawt turin a duh che – chu chu lawm fo rawh tih hi a ni – tichuan rahbi pahnihna, pathumna leh a dangte pawh a rahtir zel ang che. 

Nun thawpik ni lo vin luangchhuak nun neih i duh zawk chuan, phunnawi tawpsan la, lawmna nun nei ṭan rawh le.

Ngaihtuah zui atan

* Vawiinah thil pakhat i thlak danglam theih miah loh tur thil eng nge? Chu chu i lawmna tur thilteah chuan telh rawh le.

* Tunkar chhung hian phunnawi duhna thinlung i put chuan, i chunga Pathian thatzia ngaihtuah la. Engtin nge danglamna a thlen ang le? 

* Tu te nge i nunah lawmna nei? Engti kawng zawngin nge i rilru chu i tihlan ang?

*Pathian venhimna chhe thei lo neih i duh em?*

He tawngtaina mawlte hmang hian tawngtai ta che: “Lalpa Duh tak, ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thildang vang a ni lo i tih avangin ka ring che a ni. Ka nunah hian Lal ni turin ka pawm ta che a. Vawiinah hian i hnung zui ka duh a, ti tura min tih apiang chu ti turin ka inpeih e. Isua hmingin ka dil e. Amen.”    

Isua pawm tura i tawngtai thei a nih chuan, he email-ah hian min lo hriattir la, min lo bia ang che Rick@PastorRick.com. Isua nena zinkawng i zawh tanna tura thil pawimawn a thlawnin ka pe dawn che nia.  

*[Lettu: Sangpuia]*

Monday, August 10, 2026

PATHIANIN NUN LUANGLIAM PEK A DUH CHE

_Pathian Ṭhatna Hnuaia Len_

- Rick Warren 
- August 10, 2026
"Kei grep hrui chu ka ni, nangni a pengte chu in ni; tupawh keimaha awm renga kei pawh amaha ka awm rengna chu, chu mi chu tam takin a rah ṭhin; keimah lovin engmah in ti thei si lo." (Johana 15:5)

Pathian ṭhatna i rinhlelha mahnia hlimna tur i zawn rual rual khan i nunah harsatna tam tak a lo thleng nghal ṭhin. Rim taka hnathawhah te, chiai luatah te, leh phurrit tak phurhah te i tlak ṭhin - hnualna nasa a thlen ta ṭhin.

Mahse Pathian chuan phurrit tak nei nun ni lovin nun luang liam a tiam che.

Isuan, _"Nun an neih nan- nun tam tak an neih nan ka lokal a ni"_ a ti (Johana 10:10, GNT)

Engtinnge nun tam, nun luang liam chu i tem ang?  Pathian ṭhatnaa i khah reng theih dan tur kawng khat a awm, nitin chu chu i tihin: Isua nen inzawmna nun neihin.

Johana 15:5-ah chuan Isuan amah nen inzawmna  nun neih chu grep hrui nen a tehkhin: _"Kei grep hrui chu ka ni, nangni a pengte chu in ni; tupawh keimaha awm renga kei pawh amaha ka awm rengna chu, chu mi chu tam takin a rah ṭhin; keimah lovin engmah in ti thei si lo."_

Grep hrui aṭanga a peng khat i sah thlak chuan engtinnge a awm ang? A vuai anga a thi ang. Chutiang chiah chu i ni ve ang.

Pathian hi i tan tha leh chakna hnar a ni. Mahni chakna ringa ke pen i tum a nih chuan phurrit nasa tak i nei ang. Mahse amah nen inzawmna nun i neih chuan chakna i mamawh ang i nei ang. Bible chuan heti hian a ti, _"I lawmna chu a luangliam ang."_ (Johana 15:11, NLT)

Isua nen inzawmna nun neih theih dan kawng khat chu fianrial hun hman hi a ni. Fianrial hunah chuan Pathian nen hun hmang dun turin, a thu chhiar leh ṭawngṭaina hmanga amah hrechiang leh zual turin hun i insiam ṭhin.

Marka 1:35-ah chuan, _"Tin, zingah khawvar hma daihin a tho va, a chhuak a, thlaler hmunah a va kal a, chutah chuan a ṭawngṭai a"_ tih kan hmu.

Isua meuh pawhin Pathian Fapa ni mahse Pathian nena inzawm nun neih a ṭulzia a hria! Nitin Pathian nena hun hman dun aṭanga chakna i mamawh zat chu eng tak ni ang maw?

A chang chuan fianrial hun hman i châk loh viau ṭum a awm mai thei- mahse hmang rawh. Fianrial hun hmang tura i châk hun i nghak dawn a nih chuan Setanan châkna nei miah lo tura siam che a tum ngei ang.

Hun tam zawk, tha thar, hriatna zau zawk leh remchang ṭha zawk mamawhin i inhria em? Nitin Isua nena hun hman hi tih ṭhana nei turin ka duh che. Isua nen inzawmna nun i neih chuan Pathian ṭhatna leh thiltihtheihnain i luangliam ang a- chu chu i mamawh a ni tih i hria ang.

Ngaihtuah zui atan.

* I nuna eng phurrit kha nge Pathian ṭhatna nasa tak nena thlak thleng i duh?

* I hmangaihte nena hun i hman tam poh leh in inlaichinna a ṭha sawt ang. Eng angin nge chu chu Pathian nen hun hman dun nen a inan?

* Engin nge Pathian nen hun in hman dunna dal ṭhin? Tunkar chhung hian fianriala Pathian pawla hun i hman hunin ama lam chauh i thlir theih nan eng daidanna nge i siam ang?

*[Lettu: Sangpuia]*

Sunday, August 9, 2026

PATHIAN HI NUNNA BUL A NI

_Pathian Ṭhatna Hnuaia Len_
   
- Rick Warren 
- August 09, 2026

_"Ka novah hian a liam reng a. Matheilovin ṭhatna leh ngilneihnain ka dam chhûng zawng hian mi zui zêl ang a."_ (Sam 23:5-6)

I nun kha a luang liam em? Midangte an tho i nih chuan a luang liam nasa ve viau ang - mahse ṭhatnaa luang liam ni lovin. Mi tam tak chu an hun  hman dan tur ruahmanna a khat em em a, an sum an hmang nasa em em a, ba an ngah em em a, an rilru vein hlirin a khat , an taksa chhawr nasa mah mah a, ni awl an nei mang lo va,  mite fakna an ngaihlu mah mah bawk. A tawpah chuan an rilru a hah a, an chiai a, an lo luang liam ta ṭhin a ni! Pathian ṭhatna an tem phak ta ṭhin lo a ni.

Engvangin kan tlin phak baka kan tih ṭhin? Kan chan ve loh kan hlauhna hian kan tlin phak bak min kaltir fo. Mahse thudik tak chu hei hi a ni, Pathian ṭhatna leh thilpeka i hahchawlh chuan engmah i chan ngai lo.

Pathianin rilru tawt tak aṭangin luang liam nun nei turin a duh che. I mamawh zawng zawng pek che a duh - a pe thei bawk che! A hmasaah chuan, thil pahnih inang lo tak, Pathian malsawmna tam tak lak ata dah hrangtu che emaw a malsawmna hruai thlengtu che emaw i hriat a ṭul: rilru te leh rilru zau.

*Rilru te* i put chuan, "Hun ka nei tam lo. Sum ka ngah lo. Chakna emaw hmelhriat ṭha emaw hun remchang emaw hriatna emaw zirna ṭha emaw ka nei lo" tiin i ngaihtuah reng ṭhin. I tlai fo ṭhin emaw i nei tlin lo hlek ṭhin emaw tihna a ni. Rilru te chuan i neih tlemna a la vawng a, a rah chu nuna luan liamna a ni.

*Rilru zau* erawh chuan Pathian hausakzia a thlir a, a rah chhuah chu nuna luan liamna dik a ni.

I bula mi khan i boruak hip tur a ruksak che avangin i lungngai ṭhin em? Teuh lo. Pathianin mi zawng zawng mamawh aia tam boruak a siam tih i hre tlat.

Bible-ah hian tam, hnianghnar, tam tak, thilpek tam tihte hi Pathianin a pek che sawi nana hman ṭhin a ni. Pathianin i mamawh leh mi zawng zawng mamawh a ruala pek tur che u tam tak a nei.

The Mesage chuan Isua thusawi heti hian a letling, _"Nun tak leh chatuan daih nun, an suangtuah aia ṭha an neih nana lokal ka ni"_ (Johana 10:10).

Pathian hi i nun bul a nih avangim engmah tlakchham i hlauh a ngai lo. A ṭhatna, hlimna, malsawmna, beiseina leh muannaa tihkhah che hi a duh a ni. _"Ka novah hian a liam reng a. Matheilovin ṭhatna leh ngilneihnain ka dam chhûng zawng hian mi zui zêl ang a."_ (Sam 23:5-6)

Ngaihtuah zui atan.

Rilru te hi kan thil thlir dan emaw rilru put hmang eng hian nge lantir?

Engtinnge rilru zau chuan i nunah muanna thlen?

Engvangin nge Pathianin malsawmna tam tak min pekte ni lova midangin engngr an neih tih kan thlir zawk fo ṭhin?

*Pathian thilpek tam tak hi Isuaah a inṭan.*
Bible chuan Pathian Fapa, Isua kaltlang chauhin vanram i luh theih thu min hrilh. Vanram hi i thawh chhuah theih a ni lo: _"Rinna avânga khawngaihnaa chhandam in ni si a; nangmahni thawh chhuah a ni lo va, Pathian thilpêk a ni; 9thiltih avâng a ni lo ve; chuti lo chuan, miin an chhuang dah ang e."_ (Ephesi 2:8-9)

Isua hnena inpe tura i inpeih chuan heti hian ṭawngṭai rawh le:

"Lalpa, i Fapa Isua Krista ka rin chuan ka thil tihsual te ngaihdam a ni ang tiin min tiam a. Min siam chhan ka zir ang a, engtik niah emaw i chatuan inah min la pawm ngei ang.

"Thil ka tisual tih ka pawm a, i ngaihdamna ka dil e. Ka sual lak bo anih theih nan Isua ka tan a thi a, nangin i kai tho leh a ni tih ka ring. Vawiin aṭang hian Isua chu Chhandamtuah pawmin a hnung zui ka duh e. Min hruai la i duhzawng anga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

Saturday, August 8, 2026

PATHIANIN A PAWT LET CHE NIA A LAN LAI

_Pathian Ṭhatna Hnuaia Len_
   
- Rick Warren 
- August 08, 2026
_"Mal min sawm hma loh chu ka thlah lo vang che."_ (Genesis 32:26, NIV)

Pathianin Jakoba mal a sawm khan ram pek te, thlah tam tak pek te, chi ropui taka siam leh midangte tana malsawmtu nih kha a tiam a ni. Jakoba leh a chhungte kha Pathian hnam thlanah a siam a ni.

Mahse tun ang huna a tih dan ang tho hian Pathianin Jakoba kha thu a tiam a, chutah chuan a rinna a fiahsak bawk a ni.

Genesis bung 32-ah chuan Jakoban zankhuain Pathian a buan a, a dawhtheihna, rinna leh innghahna fiahin a ni. Tichuan Pathianin Jakoba malpui ruh a hliam a, dinhmun khirh takah a ding ta a. Jakoba chu hliam niin a lo chau ta a, khawvar dawnah chuan heti hian a sawi ta a, _"Mal min sawm hma loh chu ka thlah lo vang che."_ (Genesis 32:26, NIV)

Hetianga buaipuite hnena sawi hi thil awm ang a ni em le? An inbuan lai khan Jakoba khan a buanpui kha mihring pangngai a ni lo tih a hre tlat. Pathian a buan a ni. Chuvang chuan Jakoba khan Pathianin mal a sawm thei a ni tih a hria a thlah mai a duh lo a ni.

Tunah khan Pathian nen in inbuan niin i hria a ni thei a, in inbuan rei tawh hle a ni thei. Pathianin ti tura a tih che, thil phal tur emaw, mipat-hmeichhiana kawnga a thu awih tur emaw, hmelmate chunga ngilnei tur emawa a tih lai chein i ti duh lo a ni mai thei.

I buan mek Pathian kha i nuna hmathlir ṭha tak petu che a ni a. A thlentir theitu pawh amah a ni! i hmathlir chu Pathianin bahlahtir che a tum lo - a buatsaih zawk che a ni. I beih fat fatna khan chakna a pe che ang a, dawhtheihna a neihtir chein inpawh fan theihna a pe ang che.

In inbuanna khan inpekna nun a neihtir bawk ang che. Bansan a hun ta ni a i hriat ve leh Pathian lam hawiin heti hian sawi rawh, "Keimahah thil ṭha a thlena mal min sawm dawn phawt chuan he inbeihna hi ka chawlhsan dawn reng reng lo" tiin.

Hetiang anga Pathian fiahna i chhan let chuan a hriak thih turin i inpeih tawh tihna a ni.

Ngaihtuah zui atan.

I nunah eng kha nge Pathianin mal a sawm duh ni a i rin? Eng thilin nge Pathian malsawm i dawnna dal?

I nunah Pathian hnathawh, a na a nih pawha lo dawngsawng tura i inpek khan engtin nge Pathianin a puih che?

Pathian hriak thih i duh em? Engvangin?

[Lettu: Mapuia Fanai]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...