Hun Rei Daih Thil Ngaihlu Tura Nun Buatsaih
- Rick Warren
- June 30, 2024
_"Kan sualte thupha kan chawi chuan kan sualte ngaidam tur leh kan fel lohna zawng zawng tlengfai turin amah chu a rinawmin a fel a ni."_ (1 Johana 1:9)
Pathian tehfung hi a danglam ngai lo: Inneih hmaa mipat-hmeichhiatna hman hi thil pawmzam theih a ni lo. A hma aṭangin pawm a lo ni lo tawh a. A ni lo zel bawk ang. Innei si lova chen dun reng hi Pathian hmuha thil dik a ni lo. A hma aṭangin a ni lo tawh a, a ni lo zel bawk ang. Uirena- inneihna kara rinawm lohna hi Pathian hmuha thil dik lo a ni. A hma aṭangin thil dik lo a lo ni tawh a, a ni zel bawk ang. Hurherhna lam chuanna movie/lehkhabu hi Pathian hmuha pawmtlak a ni lo. A hma aṭangin a ni lo a, a ni lo zel bawk ang.
Mahse khing zinga pakhatah khian i lo tluk tawh avang khan hma hun i nei ta lo tihna erawh a ni lo. Pathianin intithianghlim a nun bul ṭan ṭha leh turin hun a pe che a ni.
Engtinnge chutiang chuan i tih ang?
*Sim rawh.* Simna awmzia chu "i rilru thlak danglam" tihna a ni. "Lalpa, i dik e, kei hi ka dik lo a ni. Ka thiltih kha sual a ni," tiin Pathian hmaah i kun a. I sualte sawi mawi a chhuanlam siam i tum lo va. A pawimawh ber chu tuna i tih kha a ni. Tunah khan dik lo takin kawppui i nei a nih chuan vawiin hian titawp nghal rawh.
*Ngaihdamna chang rawh.* Pathianin ngaidam a, tithianghlim a, tidam leh tur chein a nghak reng che. I sual avanga zahna, inchhirna, tawrh rukna leh na i neihte aṭangin a zalentir ang che. Pathianin thinlung thianghlim pek che a duh. Chanchin duhawm tak chu, Pathianin a ngaihdam rual che khan nangmah i inngaidam thei a ni.
*Thlir nawn la, insiamṭha rawh.* Vawiin aṭang hian Pathian mithmuha thianghlim taka nung turin inpe rawh. A awmzia chu, i nupui/pasal nen chauh nupa nun hmang turin inpe rawh.
*Nitin puihna dil rawh.* Isua hnenah i nun hlan rawh (i la inhlan lo anih chuan). I rilru i thunun theihna turin a hnenah dil rawh, a chhan chu i rilru a i ngaihtuahna aṭanga "sex" hi lo inṭan a ni si a. Karleh emaw thla leh emaw tan chauh ṭanpuina dil suh. Nitin-minute tin, mipat-hmeichhiatna hman khaw lohna lak ata i fihlim theih nan puihna dil rawh.
I tisa châkna khan i nun a tichhe vek thei, kawng i hawnsak chuan. I duhthlanna a ni! Vawiin hian sima Pathian ngaihdamna chang turin duhthlanna siam rawh. Pathianin bul ṭan ṭha turin a pui che anga, rinna nena amah i zui tlat chuan nakinah i kawppuite nena in inkar pawh mal a sawm ang.
Ngaihtuah zui atan.
I hun kal taah mipat-hmeichhiatna sualah i tlu tawh em? A chunga kan sawi tak te khi zawm la, bul ṭan ṭhat tum rawh.
Kan tunlai khawsak phung hian engtinnge thutak hi a danglam a ni tih pawmtir che a tum?
Engvangin nge zahna leh inchhirna te hi midang, i kawppui thar tur nena in inkarah lak luh loh a pawimawh?
*Isua hnenah i inpe tawh em?*
Engpawh tiin khawi hmunah pawh kal tawh mahla Pathian chhungte zingah i tan hmun a awm a, an la nghak reng che. Sawmna zau taka hawn a ni a. Ringa dawn mai kha a tawk a ni.
I sualte puangin Pathian ngaihdamna dil rawh. Isua Krista kaltlangin chhandamna, sual hawisana a hnen pantu apiangte, Isua Krista Lal leh Chhandamtu a pawm apiangte hnena a thlawna a pek kha dil rawh. A chhungkua pawm tur chein Pathian hnenah dil rawh.
I inpeih em? He ṭawngṭaina hmang hian bul han ṭan teh le: "Lalpa, ka thih hunah i hmaah ka chanchin ka sawi dawn tih ka hria e. Ka phatsan ṭhin che tih ka hria a. I chungah thil ka tisual tih ka hria a, i duhdan ni lovin ka duhdanin ka nung tih ka hria e. Chu chu vawiin hian thlak ka duh a ni. Sual kawng zawh tawh lova i hnung zui ka duh e.
"Ka tan thi tura Isua i lo tirh avang leh chumi zara chatuan nunna ka neih theih avangin ka lawm e. Min ngaihdam ka phu lo tih chu mahila, i khawngaihna chauhin min chhandam thei tih ka hria e.
"Isu, min hmangaih nasat em avanga ka sual zawng zawng i phurh avangin ka lawm e. Ka sual man pein vanram hmu tlakah min siam a, ka Lal leh Chhandamtuah ka pawm a che. Tunah ngei hian, chiang takin, ka pumin chatuan atan vanrama min hruai turin i thutiam i hlen ang tih ka ring. Isua hmingin, Amen.
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,
[Lettu: Mapuia Fanai]