Wednesday, April 30, 2025

ENGKIM CHAN MAH LA, I MAMAWH CHU ILA NEI RENG

_Kut Ruaka kal_

- Rick Warren
- Apr 30, 2025
Hringnun hi miin thil a neih tam aṭanga teh a ni lo"_ (Luka 12:15, NLT)

Chânna leh chhiatnate hian thil thlir dan min neihtir ṭhin. I ngaihhlut thilte tarlangin engnge i dah pawimawh hmasak tur an hrilh ṭhin che. A hma zawnga i lo tih ṭhin aia nasain engnge pawimawh ber an hriat chhuahtir ṭhin che.

I nun chu thil engzat nge i neih tih ah te, i hlim leh hlim loh pawh i thil neih atanga i in teh chuan hlimna tluan tling turah i innghat lo tihna a ni - achhan chu thawklehkhatah an bo vek thei si a.

I ngaihhlut thilte aiin i hlu zawk. I sum hlu tak aiin i hlu zawk. I thil neih khan i damchhanah tangkaina a nei lo a ni. 

I ngaihdanah chuan in (home) chu kuta sak, tha tak, khawsakhona ah emaw i ngai a nih chuan - thawklehkhatah i hnen atanga lakbo nghal ni ta se, engnge in chu tih i hrilhfiah thar a ngai ang. In chu hmun hi a ni lo. Inlaichinna a ni zawk a. Chhungkua hi a ni in chu.

Pathian hian kan nunah thiltum a nei a, chu chuan awmzia min neih tir chauh a ni. Mi tangkai leh awmze nei kan nihna chu hlawhtlinna te, hlawh neih emaw mi pawimawh kan nihna avang hi a ni lo, Pathian leh midang rawng kan bawlna atang chauhin a ni.

Isuan, “Hringnun hi miin thil a neih tam aṭanga teh a ni lo,” a ti. (Luka 12:15, NLT). Chuvang chuan i nun chhan leh i nuna lo tel ve thildang hi thliar fel ang che.

Khawvelah engmah hi a nghet si lo va engtin nge himna i zawn ang? Khawvela himna i hmuh theihna awmchhun chu i hnen atanga lakbo mai mai theih lohva rinna nghah hi a ni.

I hna i chan thei em? Thei tehreng mai.  I sum leh pai, i mawhphurhna leh i sum khawlte i hloh thei em? Engtiklai pawhin i hloh thei. I thatlai mawina kha i hloh thei em? Thei tehreng mai.

I hnen atanga an laksak theih miah loh che chu: Isua nena in inlaichinna hi a ni. I hloh dawn lo, a chhan chu i hnena awm reng a tiam che a ni. Engkim chan mah la, a thuhnuaiah a la awm reng a ni tih ring ang che. A rilru a thlak dawn lo va, i laka a rilru puthmang pawh a thlak lo vang. 

He khawvel danglam chak tak maiah hian - i himna, i beiseina leh i nun chu innghahna nghet leh tlo Isua hnenah innghat ang che.   

Ngaihtuah zui atan

* Isua hi ka lo kalsan daih a ni tih rilru i put lai kha a awm em? Chu chu engtin nge ilo hmachhawn?

* Sum leh pai leh ropuina lam i ngaihtuah nasat zawk khan Isua i rinna engtin nge nangmahah a nghawng?

* Vawiinah hian midang rawngbawlsak turin engnge i tih ang?

*I hnen atanga lakbo theih tawh loh tur thilah i rinna nghat turin i inpeih em?*

I nunah Isua ila sawm ngailo a nih chuan, remchanna siamsak che ka duh a ni. Pathian hnenah Isua kaltlanga chhandamna thutiam chu i ring a ni tih tawngtaiin hrilh ang che. “Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.
 
“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”
 
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zin kawng atana thuziak pawimawh tak tak lo thawn che ka duh e.

*[Lettu: Sangpuia]*

Tuesday, April 29, 2025

KHAKNA HNEH DAN KAWNG THUM

_Kut Ruaka kal

- Rick Warren
- Apr 29, 2025
“Fimkhur rawh u, Pathian khawngaihna ata in bo dah ang e, khakna zung eng emaw lo chawra tibuai che uin, chu chuan mi tam tak chu tihbawlhhlawhin an awm ang a.” Hebrai 12:15

Engkim hloh veka i inhriat chuan, khakna i neia i hneh a ngai tawh hle tihna a ni. Engvangin nge? A chhan chu tuna i hrehawmna aia nasain khakna chuan a hliam theih vang che a ni.

I hun liam tawh chu liam tawh a ni. Khakna chu i thlang chhunzawm zel anih chauhin a tina thei che a ni. I kal liam tir a ngai! Khakna chuan hun kal tawh kha a thlak danglam thei lo a. Hmalam hun pawh a thunun thei chuang lo. A tihtheih zawng chu i nun chawhbuai vek kha a ni.  

Bible chuan, “Fimkhur rawh u, Pathian khawngaihna ata in bo dah ang e, khakna zung eng emaw lo chawra tibuai che uin, chu chuan mi tam tak chu tihbawlhhlawhin an awm ang a.” Hebrai 12:15

Khakna neih zel i duh leh duh loh chu i duhthlannaah a awm a ni. Heng kawng thumte hi khakna hneh dan te anni.

*Pakhatna, i thlak danglam theihloh chu pawm mai rawh.* Kan nun tam zawk hi chu kan thunun theih piahlam anni. Achang chuan harsatna hnehdan awlsam tak chu lo pawm hmiah mai hi a ni a, chu chuan rilru a ti hahdam zawk.

Rinna chu thil lo thleng hnual miah lo va, huaisen taka lo hmachhawn hi a ni, achhan chu  engkim hi Pathian kutah an awm vek a ni. Pathianin a hmangaih che a, a ngaihsak che a, a hmu che a, a tanpui dawn che a ni.

*Pahnihna, i hloh tawh ai chuan ala bang kha ngaihtuah rawh.* I hloh hnuah pawh lawmna tur zawng hram rawh. Lawmna tur hi a awm zel a ni. Pathian atanga kan dawnte hi ngaiah kan neih chang a awm fo thin.

Scientist te chuan lawmna thinlung kan neih hi a hrisel ber tih an hmuchhuak a ni. Chumi awmzia chu i hlim poh leh i rilru leh taksa a hlim dawn tihna a ni. 

*Lemchang lo vin, tawngtaina nen hmachhawn rawh.* Thihna avanga lusunnaah hian hrehawm ti lo anga awm kher a tul lo. Nimahsela, nu leh pa kan nih phei chuan, thil kan thlir thiam a ngai thung a ni. Kan faten thihna an hmachhawn anih pawhin, “A na viau ang. Nimahsela kan paltlang thei ang. Pathian hi a tha a, kan kiangah a awm reng. Kan tang tlang anga kan hneh thei ang,” tiin kan hrilh dawn a ni. 

Chutiang tak chuan tawngtai la. Pathian hnenah thlen la, thlen fo thin ang che! Tawngtaia a hnena i thlen hian a lawm em em zawk a ni. I hliam te a dam zel theih nan, Pathianin i nunah hna a thawh a, i na te, khakna i neihte i kalsan theihna turin i dil zel dawn nia.
    
Ngaihtuah zui atan

* Engtiangin nge khakna chuan nang leh i chhungte a nghawng?

* I thlak danglam theihloh tur i pawm a ngai ta si a, chu chuan thil lo thleng tawh chu i theihnghilh tur tihna a ni em? Engvang nge. Eng nge a chhan?

* Engvangin nge lawmna thinlung hi a taka lanchhuah tir a pawimawh?

*[Lettu: Sangpuia]*

Sunday, April 27, 2025

I KA HUP THIAM LA THINRIM NGHAL ṬHIN SUH

_Kut Ruaka Kal_
 
- April 27, 2025
- Rick Warren

_"Nimahsela mi tinin ngaihthlak chuh sela, thusawi chuh lo sela, thin tinel rawh se."_ (Jakoba 1:19)

Tunlaiah chuan thu kan sawiin kan sawi zo hman lo fo tih hi i lo ngaihtuah ṭhin em? Miin thu an sawi laiin kan lo pawh chahsak fo ṭhin. Mipui hmaa titihonaah i hmu ṭhin ang. TV-ah i hmu ṭhin ang, mi pathum emaw pali emaw an ṭhukhawm a, thusawi inchuhin an ngaihdan a dik a ni tih lantir an tum ṭheuh. Mahse, thu an sawi rual vek chuan tumah an inngaihthlaksak tak tak thei lo.

Engtinnge kan tel ve?

Tunlai khawvel thil kal zung zung tawhnaah hian mite hi kan dawhthei ta lo khawp mai. Kan rilrua awm sawi chhuah thuai kan chak, emaw, kan sawi lai sawi zawh vat a thu dang sawi leh thuai kan chak ṭhin - chuvang chuan midangte thusawi leh an ngaihdan kan ngaihthlaksak peih tak tak tawh lo.

Jakoba 1:19-ah chuan heti hian kan hmu, _"Nimahsela mi tinin ngaihthlak chuh sela, thusawi chuh lo sela, thin tinel rawh se."_ A hmasa pahnih i zawm a- i ngaihthlak a i ṭawng nghal zung zung loh chuan a pathumna chu amahin a rawn thleng mai. Mite i ngaihthlak thiam a i ṭawng zung zung loh chuan i thinrim mai mai lovang.

Nu leh pa, hnathawhpui, ṭhenawm te, kawppui te kan nih hian thinrim mai a awl fo. Kan dawhtheihna kan hloh chuan thinrimna leh inhauhna a lo hnai ṭhin.

Mahse Bible hian i thinrimna hmachhawn dan fel tak min hrilh: i ṭawng hmain midangte nghaihthlak zir la, mite i chhan hmain anmahni hriatthiam tum rawh. Chutianga i tih chuan i thinrimna thunun dan i zir tihna a ni.

Thinrimna lamah harsatna nei lo anga i inngaih chuan i lo thup thiam hle tihna pawh a ni thei. Thinrimna kan tih hian mi zawng zawng hi ramsa rimchhe tak emaw ṭuanmuang tak (satel) emaw kan ni. Kan thinrimin kan bula vel kan tirim chhe vek ṭhin. Satel erawh chu an kawr chhungah lutin a thinrimna hmeh daih a tum ṭhin. I hmu miah lovang, mahse chhungrilah a la kang hluah hluah a ni.

Ramsa rimchhe tak leh satel te hian an thinrimna an enkawl ve a ngai - midangte ngaihthlak thiam a thu sawi zung zung loh an zir a ngai.

Ṭawng zung zung lo la, i thinrim nghal zung zung lo ang. Mite muangchanga i chhan letin a ngaihthlaksak dan pawh i thiam zawk ang.

Ngaihtuah zui atan.

Vawiin hian midangte nen titinaah i ṭawng ve hmain ngaihthlak zir rawh. Eng danglamna nge a thlen ang?

Miin a thusawi an ngaihthlaksak a ni tih a hriatin engnge a nghawng ni ang le?

I thinrim hunin thinram tak nge thinrim mai mai lo mi nih i tum? Thinrimna hmachhawn thiam turin i nunah eng danglamna te nge i duh?

[Lettu: Mapuia Fanai]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...