Monday, July 31, 2023

SAWIA NUNPUI ṬHIN RINGTU NIH DAN

 Midangte nen a ṭha zawk

- Rick Warren 

- July 31, 2023



"In thusawiah emaw in thiltihah emaw, Lalpa Isua aiawh a ti leh sawi ang zelin inngai rawh u" (Kolossa 3:17, NLT)


Pathianin a chhan nei zelin i nunah mi a rawn tir ṭhin. Anni hnenah chuan Pathian aiawh i ni zel! An hnenah Pathian hmangaihna leh chhandamna i hrilh loh chuan tunge hrilh ang?


I chhung te, ṭhian te, ṭhenawm te, leh thawhpuite hnena chanchin ṭha i hrilh theih nan Pathianin hmun bikah a dah che a ni. Pathianin an nunah tum a nei a, Pathian chhungkuaa an tel ve a duh a ni tih an hnena i hrilh a ṭul. An hnenah Pathianin lehkha a thawn dawn lo. I hnenah a thawn tawh che. Amah anna kawnga i ṭhan len zel a, miten Pathian nihna- ngaidam thei, khawngaihna nei, dawhthei leh Pathian rinawm a ni tih nangmah kaltlanga an hriat a duh a ni.


Bible-in hemi chungchang hi chiang takin a ziak: "Muang taka i awm theih nan i theih apiang ti rawh. I eizawnna kha enkawl ṭha la, i hna chauh thawk rawh . . . Chutianga i tih chuan ring lo miten an zah ang che." (1 Thess. 4:11-12, NCV)


Ringtu, thawh huna thawk a, sawi huna sawi kan mamawh; he thu hi i lo hre fo tawh mai thei, mahse ho tê, dik si a ni. Ringtu rinawm te chuan an rin an sawi satliah ngawt lo. Miten Isua hriatna aṭanga hlimna leh beiseina an hmuh theih nan a takin an nunpui zawk a ni. "Sawia nunpuitu" ringtu an ni. An kain chanchin ṭha an puang a, an nunin chanchin ṭha an lantir bawk.


 "In thusawiah emaw in thiltihah emaw, Lalpa Isua aiawh a ti leh sawi ang zelin inngai rawh u" (Kolossa 3:17, NLT)


Ṭawngṭai dan harsa/hlauhawm ber chu "Min hmang rawh" tih hi a ni. Hetiang hian han ṭawngṭai ve teh! "Lalpa, min hmang rawh! I hmangaih a ni tih hre lote hnenah i hmangaih thu puang turin min pui rawh. Chhan neia din an ni tih hre lote hnenah i siam chhan hriattir turin min pui rawh "


Chutiang ṭawngṭaina chuan khawvel a tidanglam thei- mahse chu danglamna chu kan zingah, kan mi hriatte leh hmangaihte aṭangin a inṭan ṭhin.


Kan hmuhtir loh chuan an hre lovang.


Ngaihtuah zui atan.


I rinna kha mite hnena hrilh nge a taka hmuhtir awlsam i tih zawk? Engtin nge tunah khan a pahnih hian i nunah i lantir mek?


I bul vela mite hmuhah Pathian aiawh i ni. Mi aiawhtute mawhphurhna engnge le?


Vawiina kan ṭawngṭai zir dan ang hian mimalin ṭawngṭai rawh le. I nuna Pathian thu hriattir ngai zualte hming tar lang la.


[*Lettu:* Mapuia Fanai]

Sunday, July 30, 2023

PATHIAN I BEISEI DAN TISANG RAWH

 _Midangte nen a ṭha zawk_

- Rick Warren

- July 30, 2023



_"Rinna hi thil beiseite a taka awm  ngei a ni tih hriatna, thil lang lote hmuh fiahna a ni."_ (Hebrai 11:1)


Kan beisei ang ngeiin mi thinlungah Pathianin hna a thawk ṭhin.


Saddleback Kohhranah chuan inkhawm kan ṭan reng rengin ka tawngtai a, "Lalpa, i thiltih beisei lotute titipui chu hun khawhralna mai a ni a. Chuvang chuan, mi nun i thlak danglam dawn avangin lawmthu ka hrilhlawk a che. Rinnain i thlentir ka beisei tlat a. Ka nihna vang ni lovin nangmah i nihna avang zawkin." Chutiang rinna chu a ni Pathianin mi nun thlak danglam nan a hman ṭhin.


Chanchin ṭha an hriat vawi khatnaa Isua Krista pan ta sawi tur an tlem hle. In ngaihtuah nan leh duhthlanna dik an siam theih nan hun an mamawh a ni.


Tumah beidawnsan suh. Tumah hi beisei bo an ni lo. Hebrai 11:1 chuan, _"Rinna hi thil beiseite a taka awm  ngei a ni tih hriatna, thil lang lote hmuh fiahna a ni."_ a ti. 


I bialpa emaw i fa emaw i ṭhian hnai takte ringtu an nih ve theih nan i ṭawngtai ṭhin a ni mai thei. Kum tam tak i lo ṭawngtai tawh a, mahse, kum nga kal ta emaw kum hnih kal ta emaw a an awmdan nen enin Pathian an la hnaih lo a ni thei.


Engnge i tih ang? Rinnain ṭawngtai rawh, Pathian a chet beisei chungin. Rinna chu kan hmuh theih loh aṭang hian a chiang ṭhin. Pathian hnenah, "I hnen pan tura an inbuatsaihna reng hmuh tur a awm lo. Mahse, ka ṭawngṭai zel anga an nunah a i thawh ka beisei tlat ang, hmu thei lo mah ila" tiin ṭawngṭai ṭhin rawh.


Bible-a ṭhian palite thawnthu kha i la hria em? Ṭhian zeng pakhat an neih kha. Isuan an ṭhianpa kha a tidam thei tih an ring a, chuvang chuan, pherah an muttir a, Isua hnenah an hruai kha. An rinna Isuan a hmuh khan, _"Ani chuan an rinzia a lo hmuhin a hnênah, 'Ṭhiana, i sualte ngaihdam a ni tawh e,'" a ti a. Tichuan, a tidam ta anih kha.


Isuan zeng chu a ṭhiante rinna ang zelin a tidam ta a, ama rinna vang ni lovin. A chang chuan midangte tan rinna i neih a ngai; tichuan, Pathian a chet beisei rawh.


I rinna tlemte kha Pathian lian takah dah la; tichuan, chhanna ropui tak i hmu ang.


Ngaihtuah zui atan.


Ringtu a lo nih ve theihna turin tu tan nge i ṭawngṭai ṭhin? Pathiana i beiseina emaw i ṭawngṭaipui dan engtin nge i thlak danglam ang?


I nun kaltlangin Pathianin engnge tihlawhtling se i tih?  Engtinnge i nuna Pathianin hna a thawhdan turah i lawmzia i lo tihlan lawk theih ang?


Eng thil nge i hmuh theih loh avanga nemnghehsak i mamawh?


[Lettu: Mapuia Fanai]

PATHIAN NEN LO INREM RAWH U

  

TKP DAY vawi 72-na thuchah

2 Kor. 5:20



Engvanga Pathian nena inrem tur nge kan nih? Pathian nena kan inrem chu a ngai kher em ni? Engtin nge Pathian nen kan inrem ang? Pathian nena inrem turin eng nge kan tih ang?

 

Pathianin Krista avangin inremah min siam

Eden bawhchhiatna avangin Pathian leh mihring te hi mihrang kan lo ni tawh a. “Nimahsela, engkim hi Pathian hnen ata chhuak a ni a; ani chuan Krista avangin amah nen inremin min siam a, inremna rawngbawl hna min pe a; khatia Pathianin Kristaah chuan khawvel hi amah nen inremin a siama, an bawhchhiatnate chu bawhchhiatnaa ruatsak lova, inremna thu min kawltir kha. 2 Kor. 5:18-19. Chutichuan Krista aia palai kan ni a, Pathianin keimahni min hmangin a ngen chiam che u tih theih a ni: “Pathian nen lo inrem rawh u,” tiin Krista aiah kan ngen che u a ni. Amahah chuan Pathian felna kan lo nih theihna turin, sual reng reng hre lo chu Pathianin keimahni avangin sualah a siam a.” 2 Kor 5:21

 

Isua kross hmangin Pa Pathian leh Fapa Pathian chuan khawvel nen inremna a siam a. Kross-a a thih hma khan, Biak in puanzar a thler hma leh Isuan, “A kin ta’ a tih hma si khan Pa Pathian chuan Fapa chungah mihring sualna chu a nghat a, Isua chuan mihringte sualna chu a phur ta a, chu chuan dikna Pathian a tilungawi ta a. Mihringte sualna a phurh avangin mihringte tuar ai a tuar ta a ni. Thing Kross chungah khan mihringte aiawh a nih avangin Isua chu Pathian hmelma a ni a, rorelsak niin Pa Pathian thinurna no chu intir a ni ta a ni. Chutih laiin, Paulan Kristaah Khawvel chu amah nen inremin a siam a ti a, a awmzia chu Pa leh Fapa an thawk dun tihna a ni. Fapa tuarna avangin Pa Pathian a lawm tihna ni lovin, khawvel nena inremna hna a thawh zawh avangin a lungawi a ni.   

 

Kan inrem theihlohna chhan chu keimahni lam felloh vang a ni thin

Pathian leh mihring inremlohna chhan chu mihringte avang a ni a, thuawihlohna avangin inrem taka lengdun thin Pathian leh mihring chu then hranin kan lo awm ta. Pathian bawkin bul rawn tan lehin inremin kan awm thei ta chauh a ni. Tunah pawh hian Pathian chu sawi loh, kan mihring pui te pawh remloh engemaw zat kan nei awm e, kan inremlohna chhan chu engpawh lo ni se, keimahni lam felloh avang a ni e ti ila kan tisual tam awm lo ve. Keimahni lam fel ila chuan Pathian nen kan inrem anga, kan mihringpui te nen pawh inrem takin kan khawsa thei em em ang.

 

Pathian leh midangte nena inrem turin bul i tan ang u

A hmasaberah chuan Pathian nen kan inrem phawt angai ani. Pathianin min rem tawh kan tih rual rual hian keimahni lam hian tun thleng hian kan la remlo ve thei tlat a ni. Tirhkoh Paulan, “Pathian nen lo inrem rawh u” min tih angin Pathian nen kan inrem angai hmasa a ni. Tichuan Pathianin inremna rawngbawl hna pawimawh tak min pe a, chu rawngbawl hna chu bul tantu kan ni tur a ni. “Tu sual pawh sualin thungrul suh u. Mi zawng zawng ngaiha thil mawi ngaihtuah lawk rawh u. A theih phawt chuan nangmahni lam tal, mi zawng zawng nen inremin awm rawh u.” Rom 12:17-18.

 

Inremna hi Lal Isua duhzawng a ni

Isua tawngtaina atang khan inremna leh inpumkhat a duh zia chu kan hre thei awm e. “Henghote tan chauh hian ngensak ka ni lo, an thu avanga kei mi la ring turte tan pawh ngensak ka ni bawk e; an zaa pumkhat an nihna turin, ka Pa, nang keimaha i awm leh, kei nangmaha ka awm ang bawk hian, anni pawh keimahnia an awmna turin; nangin kei mi tir tih khawvelin an awh theihna turin. Tin, nangin ropuina mi pek kha keiin anmahni ka pe ta; anni chu pumkhat an nihna turin, keini pumkhat kan ni ang bawk hian; kei anmahniah, nang keimahah, anni pumkhata an awma, an famkim theihna turin; nangin kei mi tir tih leh, mi hmangaih angin anni hi i hmangaih tih, khawvelin an hriat theihna turin.” Joh 17:20-23

 

Inremna rawngbawl hna min pek angin keimahni zawnah theuh i thawk ang u

Vawiinah hian remloh tam tak kan nei ang. Inremna rawngbawl hna thawk turin min ruat tawha, chu hna tha tak chu thawk ve thei dinhmuna kan din ve avangin kan thawk ve tur a ni. Hmun dang khaw dangah kan thawk theilo a nih pawhin kan awmna hmun theuhah inremna rawngbawl hna kan thawk ve tur a ni. Kan chhungkuaah bul kan tan ang, kohhran leh khawtlangah inrempui tur kan nei anih chuan theihtawp kan chhuah angai bawk a ni.

 

Pathianin inrem lehna min siam sak bakah a aia palai hna thawk turin min ti a. Sawrkar tin hian ram dangah palai an nei a, chung palaite chu sawrkar lakah an rinawm a ni. Palai chuan a tirtu hnen atangin thuchah a keng a, ama phuah chawpin thu a sawi ngai lo va, a tirtute duhzawng angin a sawi thin a ni. Paula chu van sawrkar aiawh angah a inngai a. Krista hnen atanga Pathian thuchah a ken chu, “Pathian nen lo inrem rawh u,” tih hi. Inrem lehna a awm theih nan Krista chuan a tuarin Kraws-a a thihna a thlang a. Ani chuan sual avanga kan tuar tur zawng zawng chu a tuar ta. Chutichuan, Kristaah chuan inrem lehna chu tihpuitlin a ni ta a ni.

 

Krista aia palai kan ni

Pathianin kan inremna turin Krista a tuartir a. Kristan Paula, a aiawha a tir ang hian, keini ho pawh hi, Pathian nena inrem turin min tir a ni. Paulan a hnathawh a hriatthiam dan chu ram danga Lalin a aiawh palai a tirh ang (India ramah chuan IFS) hi a ni. Lalin tihtur a pek chu a sawi a, chu chu amah kal tlangin Lalin a sawi pawh kan ti thei awm e. Palai chuan a ngaithlatute tihlawm tumin thu a sawi lova, amah tirtu tihlawm a tum zawk. Ama thuneihnain thu a sawi lo va, a ngaihdan a sawi hek lo. Amaherawhchu, palai, ambassador chu thu kengtu, tirh kah a ni satliah lova, amah tirtu lal leh ram aiawh a ni.

 

Chutichuan Krista aia palai kan ni a, Pathianin keimahni min hmangin a ngen chiam che u tih theih a ni: “Pathian nen lo inrem rawh u,” tiin Krista aiah kan ngen che u a ni Paulan a tih ang khan.  Paula chu Krista aia palai a nihna anga Korinth mite Pathian nena inrem tura a ngen angin, keini pawh Krista aia Palai kan ni a, Pathian leh mihring inremna thu tlangaupui ve tur kan ni. Inremna rawngbawl hna hi duhthlanna leh tumna tak tak tel lo chuan a hlawhtling thei lo va. Isua duh dan tawmpuitute chauhvin inremna an siam thei a ni. Paulan Krista aiah tute nge a ngen kan tih chuan Korinth Kristiante leh khawvel pumpui a huap a ni.

 


 

Saturday, July 29, 2023

ZIRTIRA SIAM TURIN ṬHIAN SIAM RAWH

 _Mi dangte nen a tha zawk_

- Rick Warren

29 July, 2023



"Ngaihtuah hmunkhatin awm tawn theuh rawh u. Inngaihtuah sang lutuk suh ula, mi tete pawl zawk rawh u. Intifing suh u" Rom 12:16.


Thian satliah ni lo, kan mamawh chang pawh a min hlat lo tur thian tha tak tak hi mi tin hian kan duh theuh. I nuna tel ve tawh sate nen Pathian chuan inthianthatna tha tak siam turin a duh che a, chutichuan anni nen Chanchin Tha hi mi dangte in hrilh ve thei dawn a ni. I thawhpui leh zirpuite, thenawmte leh infiampuite i nunah a dah a, a chhan chu duhthlanna pawimawh tak tak an siam turte in inhrilh tawn theihna turin a ni.


Isuan an tana a tihsak tawhte i hrilh loh chuan, tuin nge anni chu hrilh ang le?


Bible chuan Rom 12:16-ah, "Ngaihtuah hmunkhatin awm tawn theuh rawh u. Inngaihtuah sang lutuk suh ula, mi tete pawl zawk rawh u. Intifing suh u" a ti. 


Kristiante hi thil uchuak tak pahnihah eng emaw zawk zawk chin em em kan nei: mal tlatna a nih loh chuan mi dang entawnna. Kristian thenkhat chuan, "Khawvel tih bawlhhlawh ka duh lova. Keimah hi ka inthiar fihlim dawn a ni. Bang ka insiam anga, nunphung keimahin ka nei mai dawn a ni" an ti thin.


Mal tlatna hi a hlawhtling ngai lo! Chutiang zawngin engtin nge thian i siam theih ang?


Kawng dang leh chu mi dangte entawnna a ni. Chumi chuan, "Khawvel kalphung hian kal ve ila. Milarte inchei angin inchei ila. Mi dangte chungchang kan duh duh kan sawi anga. Hnam langsar zawkte tih angin kan duh duh ngaihluin, tum kan nei anga. Khawvelah hian kan mihrang lovang" an ti. 


Chu chu Pathian duh dan a ni leh chuang hauh lo! Khawtlang nun kalphung hniam takah i intahluh a duh hauh lo a ni.


A chhanna chu mal tlatna emaw mi dang lakchhawn  lam a ni lo ve ve. Bible chuan êng leh chi ni turin min hrilh a. Pathian thatna hmangin khawvel luhchhuah turin min ti a ni.


Pathian chuan thianghlim tur leh i rinnaah  ding nghet turin a duh che a. Khawvel kawngkhar atanga chhuak a, i nuna a dah mi dangte hre turin a duh che a. I kianga mite nen inlaichinna i siam laiin, khawvelah cheng a, mahse khawvel mi ni lo turin a duh che a ni.


"Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a." II Tim 1:7.


Ngaihtuah zui atan...


Mi dangte hriatchian aiin engatinge a chang hian mahni a tal hran mai a chakawm zawk thin?


Khawvel nun lakchhawn kawngah eng thangah nge i lo rah per ve tawh le?


Mi thenkhat nunah nangmah chauh kha Isua aiawhtu lo ni ta la, kristianna hi eng angin nge an hmuh ang le? Chu chuan engtianga i thlak danglam turin nge a duh che?


(Lettu: Msa)

Friday, July 28, 2023

NANGMAHA PATHIAN CHANCHIN ROPUI KHA MIDANG HRILH RAWH

 Midangte Nen A Tha Zawk

By Rick Warren

— July 28, 2023


“Ka thuhretute in ni tûr a ni.” [Tirhkohte 1:8]


Midangte hnena Pathian ropuina puan chhuah dan ṭha ber chu i nuna Pathian inpuanchhuahna sawi kha a ni. Chu chuan thil engkim a tidanglam ngei ang. 


Isua chuan Tirhkohte 1: 8 ah “Ka thuhretute in ni tûr a ni,” tiin a sawi. “Thuhretu” tih ṭawngkam ka hriat apiang chuan rorelna pindan [courtroom] ka rilruah a lang ṭhin. He khawvel tidanglam tura Pathianin a tihna che tarlangtu pawimawh tak a ni ang. Dan hre mi anga awm tur leh thubuai chan turin min ti lo va. Roreltu anga awm a, mite ro relsak tur pawhin min ti lo. Thuhretu ni turin min duh a ni. 


Thuhretu chuan engnge a tih? Thuhretu chuan “Hei hi ka thil hmuh chu a ni. Chu chu ka benga ka hriat chu a ni” a tih mai a tawk. Thuhretu chuan midang hnenah a nuna Pathian hnathawh chu an hrilh hre ṭhin. 


Thian leh thian inkarah miin thu lawmawm an ngawihpui ngai lo. I ṭhian hnenah chuan Pathianin i tana a thil ṭha tih chu hrilh chhawng la, chu chuan chatuana danglamna a siamsak ang che. 


Bul ṭan mai dan chu i hre lo em? Hetiang hian mawlmang tein i pen chhuak thei: I chanchin ziak chhuakin i ṭhian hnaite hnenah puangzar ang che. I kianga mite hnenah chuan sawi la, tichuan i zir zel tihna a ni ang. I chanchin i sawi chhuah theihna tur Chanchin Tha mamawhtu hnenah chuan Pathianin hun ṭha a pe ang che. 


Chanchin ngaihnawm leh ngaihthlak nuam i paltlang lo niin i inhria a ni thei e. Mahse I tih sual lakah Pathianin a chhandam che a nih a, chatuan daih tur beiseina leh lawmna  a pe che a nih chuan chu chu thil ninawm a ni ngai lo vang! Chu thu chu mite hnena i puanzar theih thil lawmawm ber a ni ang. 


“Lo kal ula ngaithla rawh u … tichuan Pathianin hna a pek che chu i zo thei ang.” [Sam 66: 16] 


I ṭhian hnai zingah khan Pathianin i nuna a hna thawh chu kohhranten kan hriat ka ring. 


Ngaihtuah zui atan. 


Mite hmaa Pathian thu sawi chu engvangin nge i harsat? 


Mi tu emaw manin engtin nge tu emaw hnena Chanchin Tha hril chu a harsa lem lo a ni tih chu i hriat theih ang.  


I Chanchin mumal taka chhinchhiah chu engvangin nge a pawimawh i tih? 


[*Lettu*: Peka]

Thursday, July 27, 2023

CHANCHIN ṬHA NANGMAH CHAUHIN I HRIL A NGAI LO

 Midangte Nen A Tha Zawk 

By Rick Warren

— July 27, 2023



“Rilru hmun khata Chanchin Ṭha rinna thu ṭana bei tlângin, dotute eng kawngah mah hlau lovin in awm tih in chanchin ka hre thei ang.” [Philippi 1:27]


Hna eng emaw thawk tura siam i ni. Pathian chuan a hmangaihna chu midangte hnena puang turin a duh che – i ṭhian, i chhungte leh i hnathawhpuite hnenah – a chhungte zinga la tel ve lo, a chhan chu Pathian chuan mi zawng zawng chu a chhungte zinga tel ve turin a duh a ni. 


Mahse malin i awm lo! Pathian chuan midangte nena pen chhuak turin a duh che. Philippi 1: 27 chuan hetiang hian a sawi, “Rilru hmun khata Chanchin Ṭha rinna thu ṭana bei tlângin, dotute eng kawngah mah hlau lovin in awm tih in chanchin ka hre thei ang,” tiin.  


Engtin nge i ṭhiante nen chuan Pathian hmangaihna thu hi in puan chhuah ang? Chu chu i ṭhiante nen chuan engtin nge in chet chhuahpui ang? Pawl te zawk [small group] hmangin in ti thei ang.  


Pakhatna, ṭawngṭai ho rawh u. I ṭhiante Pathian la nei lote tana ṭawngṭai tur chuan chu pawl te zawk [small group] chu ngen ang che. Tumah Pathian hmangaih turin i nawr lui thei lo vang, mahse i ṭawngṭaisak mai thei ang. I ṭhiante chuan i ngaihdan an pawmpui lo chein i remruatna chu an hnawl a ni thei. Mahse i ṭawngṭaisak thu hlaah chuan engmah an ti thei lo. An thinglungah a tlang mai ṭhin!  


Kolossa 4: 3 ah chuan, “Keini pawh min ṭawngṭaisak rawh u, Pathianin a thu hrilna kawng min hawnsak nân,” tiin. 


Hun tha dila i ṭawngṭai chang chuan engnge thil lo thleng i hre thei ang? Chhanna chu i hmu zung zung ṭhin! Ṭawngṭaina chuan thil a hmuhfiah tir che. I chhungte tana i ṭawngṭai chang chuan, i chhungte mamawh chu i hre thiam a. I rawngbawlpuite tana i ṭawngṭai chuan i thawhpuite mamawh chu i hre thiam mai bawk ṭhin.    


I kiang vela khawsate i hriat chian deuh deuh ang zelin, in inanna laite chu hriain hun remchang inangah chuan Chanchin Ṭha chu i hrilh thei ang.  


Midangte hnena Chanchin Ṭha i hrilh theih hma chuan anmahni nena inlaichinna i siam a ngai. Engnge in tuina inang, daihriat inṭawm, leh mamawh inang chu ni ang? Thian rual tlem zawk zingah chuan in nuam tih zawng tiho turin in sawm thei ang, “Ringtu ni lem lo pawhin nuam a tih zawng chu eng nge ni thei ang? Tu nge kan zinga tel ve turin kan sawm ang?”  


Pathian chuan hun ṭha leh hmangchang chi hrang hrang min pe ang. Ṭhianza [small group] ang chuan ṭawngṭaiho ula, mi tu emaw rawng in bawlsak theih mihring chu en kual rawh u.  


Ngaihtuah zui atan. 


A huhova Chanchin Ṭha hril tih chu engnge a awmzia? 


Engtin nge mite chu inkhawm tura in sawm chang leh in ṭhianzaho zingah tel ve tur leh an nuam tihzawng ti tura in sawm chuan an dawnsawn che u? 


I ṭhian emaw i thawhpui emaw zingah chuan tu nge Pathianin i ṭawngṭaisak tur mi a rawn hruai? In inpawh lehzual theih nan in tui zawng thil inang engtin nge in sawi dun ang? 


Vawiin hian Isua I zui dawn em? 


Bible chuan hetiangin a sawi, “Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.” [Johana 3: 16]


Chatuan nunna chungchanga Pathian thutiam hlen tur ring tur chuan i lo inpeih tawh em? A nih chuan, he ṭawngṭaina tawite hian han ṭawngṭai teh: 


“Lalpa duhtak, Isua Krista chu I Fapa a ni tih ka pawm a. Ka sualte thupha ka chawi a, i ngaihdamna chu ka dil a ni. Isua chu ka sualte la bo turin a thi a, i kai tho leh a ni tih pawh ka ring e. Isua chu Chhandamtuah ka pawm duh a, vawiin aṭang hian ka Lalpa atana zui turin ka inpeih e. Ka nun hi hruai la, a duhzawng tih min zirtir ang che. Isua hmingin ka dil e. Amen.”


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 


[*Lettu*: Peka]

Wednesday, July 26, 2023

HNEH THEI TURA PATHIAN CHHANNA CHU RINGTUPUI TE AN NI

 _Midangte nen a ṭha zawk_

By Rick Warren 

— July 26, 2023


“Elrel leh inngaihhlut avanga engmah ti lovin, mi tinin inngaitlawm takin mahni aiin mi dang tha zawkah ruat theuh rawh se; mahni ta ta mai en lovin, mi dang ta pawh en theuh rawh se.” Philippi 2:3-4

Tu te pawh hian kawng dika kan kal theihna turin mi dang min pui tur leh min veng tur kan mamawh theuh a ni. Philippi-ah chuan, Tirhkoh Paula chuan mahni ta ta mai en lovin, mi dang ta pawh en theuh rawh se a ti. Tunlai nunphung nen chuan a va inang lo em! Tunlai mi tam zawk chuan – keimah – ka mamawh zawng, ka tuina, ka duh zawng leh ka thil tum kan ti vek tawh. Mahse Paula chuan mi dang ta pawh kan en ve tur a ni a ti.

Mi tam tak chuan taksa lama harsatna min thlen thei kan kiang vela mi te emaw kan ngaihtuah thin. Mahse thlarau lamah pawh hmelma kan nei a, mihringte ai mah hian min tina thei tih i hria em? A hming chu Setana a ni a, hneh che a tum a ni. I nunah harsatna rawn thlen a tum a, inlaichinna tihchhiat a, na thei ang bera siam che a tum a ni.

Eng vangin nge tihnat che a tum? A chhan chu Pathian tihnat a tum a, mahse a thei lo va, Pathian fateah a tuan ta zawk a ni. Nangmah mai chuan engtikah mah Setana i hneh lo vang. Mahse mi dang nangmah ngaihven a, tanpui thei tur che i neih chuan i hneh thei ang. 

Thuhriltu 4:12-ah hian thurawn tha tak kan hmu, “Amah maia awm kha chu miin hneh thei mah sela, pahnih chuan an lo dodal zo dawn a ni, hrui thum hrual chu a chat lawk lawk ngai lo ve.”

I hnung lamah tu emaw tal pui tur che i nei em? Mi tu emaw tal thlarau lama indonaah nangmah venghim tur emaw enzui thei tur che i nei em? “Harsatna lian tak paltlang mah la i kiangah kan awm ang. Kan ti hnualin emaw thawpik takin kan awmtir lovang che,” ti thei I ringtupui i mamawh a ni.

I ringtupui te hi hmelma hneh thei tura Pathian chhanna a ni. Thuhriltu 4:10 chuan,”An tluk pawhin pakhat chuan a thian chu a khaiding dawn si a; mahni chauhva awm kha erawh chu a chung a pik e, a tluk chuan khaidingtu tur a nei si lo.”

Hre reng rawh: I duh chuan i bei thei a, nimahsela nangmah mai chuan i dam khawchhuak thei lo a ni. Kan ruala kal tur, thawhpui tur leh min venpui tur mi dang kan mamawh theuh a ni.

I hnunglam i hawi a ngai lo, a chhan chu khawiah pawh Pathian chhungte i nei vek a ni. Chung ho chu i rin chuan, rinnaah leh thudikah i dingnghet thei ang. 

Ngaihtuah zui atan

* I hnungah emaw enzuitu che tu nge awm?

* Chung ho chuan thlarau lam himna leh thanlenna kawngah engtin nge an puih che?

* Engtin nge ringtu awmkhawm te chuan Setana hnehna kawngah hma an lak thin?

*[Lettu: Sangpuia]*

Tuesday, July 25, 2023

THUHRETU NI TURA THAWHHO DAN

 _Midangte nen a ṭha zawk

By Rick Warren 

— July 25,2023


“Thupek thar ka pek che u hi, inhmangaih ula; keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtirte in ni tih chu miah chuan an hria ang,” a ti a. Johana 13:34-35

Tu te pawh hi khawvelah hian kan nun hmanga thu sawi turin Pathianin min duh ṭheuh a ni. Kan nun hmanga thusawi hi kan mission pakhat a ni. Mi dangte thu kan hriattir hian, thuhretu kan ni tihna a ni.

A huhova thuhretu nih hi a hlawk lehzual a. Sipai chu pakhat chauh an tirchhuak ngai lo ang hian, Pathian pawhin mahni chauhin mission rawngbawlna chu thawk turin min ti lo a ni. Thuhretu ni turin kan chhuak tlang tur a ni a ti.

Dik tak chuan, keimahni kan inhmangaih hian Pathian la hre lote hnena thuhretu kan nihna ṭha ber chu a ni. Johana 13 ah chuan, in inhmangaih chuan mi zawng zawngin ka zirtirte in ni tih chu miah chuan an hria ang Isuan a ti. Kristiante hmangaihna dika an in hmangaih hian mite thinlungah thu a sawi a. Pathian chhungte an nih zia a ti lang bawk a ni.

Hei hi thuhretu kan nih dan tur chu a ni: “Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a.” (2 Timothea 1:7). 

Thuhretu i nihna kawngah hlau leh khurin i awm ṭhin em? Hlauhna chungchanga Pathian chhanna chu i ringtupui te hi an ni—Chanchin ṭha i hrilhna kawngah chuan i ringtupui ten an dinpui che a ni.

Nangmah avanga vanram kai tur pakhat tal an awm em? I Kristianpui te nena in thawkho a nih ngat chuan, “Aw! Keimah avangin mi pakhat tal chu vanramah a kal ang,” i ti thei ang.

Philippi 1:28 ah chuan, “Rilru hmunkhata Chanchin Tha rinna thu tana bei tlangin, dotute eng kawngah mah hlau lovin in awm tih, in chanchin ka hre thei ang,” a ti.

I Kristianpui dangte nen rilru hmun khata thuretu in nih ngat chuan, mi pakhat tluk deuhthawa in lungrual in ni dawn a ni. Chutiang chu kan ringtupui te nena inlaichinna chungchanga Pathianin awm tura min duh dan a ni. 

Kan inmamawh tawn vek a. Pathianin thuhretu ni turin min hmang duh a, a huhova thawk turin min duh a ni!

Ngaihtuah zui atan

Thuhretu nihna kawngah engte nge i hlauh emaw engte nge i la vawn ṭhat?

I ringtupui te chuan hlauhna kawngah chuan engtin nge an puih theih ang che?

Kohhran pawna mi ten in inhmangaih dan an hmuhin, Chanchin tha dik tak chu engtin nge an ngaih ang?

*Isua chanchin i ṭhiante hrilh ve rawh!*

Tu pawh Isua ring tawh phawt chu chatuanin ama bulah an cheng ang tih Pathianin min tiam a nir. Hetah hian lut la https://pastorrick.com/gods-plan-to-bring-you-to-heaven-4/, Vanram i thlen theihna tura Pathian thil ruahman Biblein min zirtir thu awl te te i hmu ang. Mi dangte Isua hnena hruai nan i hmang thei ang a emaw mi dang hnenah anmahnia an chhiar ve turin i thawn ve thei bawk ang. 

I ṭhian, i ṭhenawm leh i chhungte hnena Chanchin ṭha hi i thehdarh  hnua thil thleng a awm a nih chuan min lo hrilh ve la. Hetah hian min lo be daw nia Rick@PastorRick.com.

*[Lettu: Sangpuia]*

Monday, July 24, 2023

INHUMHIMNA LÊN I NEI EM?

 Midangte nen a ṭha zawk

- Rick Warren 

- July 24, 2023



"A tâwp berah chuan, in zâin rilru hmun khat pûin awm ula, inlainat tawn ula, unau hmangaihin inhmangaih ula, mi khawngaih thei tak leh inngaitlâwm takin awm rawh u." (I Petera 3:8)


Pastor ka nihna angin, mi tumahin mahni a an paltlang loh tur thil tam tak ka paltlang a. Kan hmangaihten zai an tawk a, thi leh dam kara an awm nghah hi tumahin hmachhawn ngai suh se. Rai lai hun hlauhawma a awm laiin tu hmeichhia mahin an _test result_ mahni chauhvin an nghak tur a ni lo. Thihna kotlangah tumah an ding tur a ni lo. An kawppuiten an chhuahsan zan hmasa berah tumahin mahni chauhvin hun an hmang tur a ni lo.


Hun harsa leh rapthlak tak takte hi pumpelh theih an ni lo. Tupawhin kan tawk ṭheuh dawn. Mahse, mahnia kan hmachhawn a ngai lo. Heng hun harsa takah hian Pathian chu kan him nan kan mamawh a ni. 


*Engnge Pathiana kan himna lên chu?* Kan ringtupui te, i lam ṭang tlat ṭhin mi tlemte te kha an ni. Heng mite hi kan pawlte kan ti thin. Hei hi heng mite tana Pathian remruat chu a ni, "A tâwp berah chuan, in zâin rilru hmun khat pûin awm ula, inlainattawn ula, unau hmangaihin inhmangaih ula, mi khawngaih thei tak leh inngaitlâwm takin awm rawh u"(I Korinth 12:26). Pawl khata mite hi kan beidawn huna Pathian chhanna te an ni.


"Lâwmte chu lâwmpui ula, ṭapte chu ṭahpui rawh u." (Rom 12:15) tih nen hian an sawi tum a inang reng.


A chang hmasa hi chu a awlsam khawp mai. Midangte chunga thil ṭha a thlen chuan an lawmna hun a lo va tel ve mai kha thil awlsam tak a ni.


Mahse miin hun khirh tak a tawh hun chuan a harsa viau mai thei. Mahse thil harsa lo tak a ni. Hun harsa i paltlang mek lai khan fuih i duh miah lo. I kianga lo awmpui che a, i kut vuan a, kuah che a, ṭahpuitu che a ni i duh zawk.


Paulan heti hian min hrilh, "Chuvangin, infuih tawnin, intisawt tawn ṭheuh rawh u, in tih reng ṭhin ang hian." (I Thess. 5:11). Mite fuih kan tih hian ṭawngkaa fuih emaw thuchah sawi khum emaw hi a kawk reng lo. A chang chuan fuihna ṭha ber chu kan lo awm ve mai te, an bula ngawi renga ṭhut te, leh ṭahpuite hi a ni fo.


Inhumhimna lên - hun harsa ber i paltlang lai pawha i kianga awm reng tur ṭhiante i nei em? I neih loh chuan vawiin hian chhuak la, chutiang mi tur chu zawng rawh. Hringnunah hian hun khirh takte hi kan la tawk ngai dawn, mahse inpuahchah lova i hmachhawn kher a ṭul lo.


Ngaihtuah zui atan.


Bible zirna zing awm leh ṭhian pawlho zinga awm hi engnge an danglamna?


Tunge i inhumhimna lên chhungah awm ve? Engtinnge midangte nen inpawllho tura pawl i siam a chutiang taka inpekna i neih?


Engtinnge a takin midangte inhumhimna lên i pek theih ang?


[Lettu: Mapuia Fanai]

Sunday, July 23, 2023

MIDANGTE NEN KAN THAWH DUNIN THIL TAM ZAWK KAN PUITLIN ṬHIN

 _Midangte nen a ṭha zawk_

- Rick Warren

- July 23, 2023



_"Krista Isuaah chuan thil ṭha ti tûra siam kan ni a; ama kutchhuak kan nih avângin thil ṭha tih chu kan awm dân tûra Pathian buatsaih lâwk a ni."_ (Ephesi 2:10)


He khawvelah hian Pathianin eng hna emaw ni thawk turin a dah che a, chu hna chu nangmah chauhvin i thawk thei. Ephesi 2:10 chuan, _"Krista Isuaah chuan thil ṭha ti tûra siam kan ni a; ama kutchhuak kan nih avângin thil ṭha tih chu kan awm dân tûra Pathian buatsaih lâwk a ni."_ a ti. Mahse, nangmah chauhva i thawh atan a ruahman lo thung. Thawhpui tur i mamawh a ni.


Nangmah chauhva hna i thawh tam lutuk chuan engtiangin nge i awm ṭhin tih i hrechiang ang. I hah a, i chau ngawih ngawih a, i hnual phah fo va. Beidawn mai i duh fo ṭhin mai thei e. Eng vangin? A chhanchu, nangmah chauhva thawh i tum ṭhin vang a ni. Chutiang chu Pahian ruahman dan a ni si lo.


Bible chuan, _"Pakhat aiin pahnih an ṭha zâwk. 

An thawh rah a hlâwk duh zâwk bawk."_ (Thuhriltu 4:9) a ti. A huhova in thawh hian thil tam tak in thawk thei zawk a. Chu mai bakah, thawhpui ṭha tak i neih phei chuan hun hlimawm leh nuam tak an hmanpui thei zawk dawn a ni.


Han mitthla teh: Vur them ang mai kan ni ṭheuhva. Keimahni chuan danglamna tam tak kan thlen thei lo. Mahse, vur them pakhat chu a dang tam tak nen an awm khawm chuan veivahna an dang chat thei tlat thung. Vur them te ang hian kan thawhho hian danglamna tam tak kan thlen thei a ni, kan hmaa thawh tur ṭheuhte ṭha taka kan thawh hian.


He khawvela kan thawhho hian chatuan atan kan lo inbuatsaih lawk a ni tih i hria em? Vanramah chua , kan thawhho vek a ngai tawh a nga, mahse, tlemte ṭheuh bak thawh kan ngai tawh lovang a, hnain min hmuak ṭun tawh lovin kan hah a lo dam tawh ang.  Mahni thawh tur ṭheuh kan thawh dawn avangin tumahin phurrit tak kan phur tawh lovang a. Mahse,hna chu thawh zawh a ni tho ang.


I hringnun zinkawngah engkim hi nangmah chauhva i thawh tur a ni lo tih hria la. Kalpui tur chein midang i mamawh a, tin, thawhpui tur pawh i mamawh bawk a ni. I ringtupuite nen phurrit in inchhawktawn chuan, Pathian ropuina turin i thawk tam fe zawk dawn a ni.


Ngaihtuah zui atan.


Nangmah chauhvin thil tam tak tih puitlin i tum tawh em? Eng nge a nghawng?


Eng tin nge kohhran ,Pathian chhungkuate hian kan thawhho hian Pathian ropui nan kan thawk tam thei zawk a ni tih kan lantir ang?


Pathianin thawh tur a pek che tipuitling turin eng kawng tak nge midang i mamawh?


[Lettu: Mapuia Fanai]

Saturday, July 22, 2023

MI DANGTE NEN KAL DUN THATNA

 _Mi dangte nen a tha zawk_

Rick Warren

22 July, 2023



"Mihring amah chauhva a awm hi a tha lo ve" Gen 2:18.


Nun hi zinkawng a nih avangin Bible chuan ke a kal angin a tehkhin fova. Kan thu mai mai ngai lo a ni. Thuthlung Thar bu zawng zawngah hian, finna te, hmangaihna te, êngah te, thuawihnate a kal thin turin min ti a. Isua anga kal turin min ti a ni. 


Kan damchhung hian mi dangte kianga kal turin min zirtir a. Hetah hian mi dangte nen kaldun a tulna chhan kawng thum a awm:


*A him zawk.* Kawtthler reh takah emaw khawpawnah mahniin zan rehah i kal tawh em? A hlauhawm deuh thin a ni ti raw. Mahse i kiangah mi dang awm se chuan, i thla a muang sawt ang.


*In puih a awl.* Hringnun hi yard 50 vel han tlan vak ang a ni lova. Thui tak intlansiakna zawk a ni. A tawp thleng turin mi dangte nen i skal hian thahrui leh phurna a pe dawn che a ni.


*A finthlak.* Mahni a kal aiin mi dangte nena kan kal hian kan zir tam zawk a. Kawng dik lo lamah mahnia i kal chuan, i hrechhuak ngai lo maithei. Mahse i kiangah thian i neih chuan, a tu emaw zawk zawk chuan kawng dik lohna in hrechhuakin, in hawizawng a dik zawngin in her rem thei ang.


Mi dangte nen i kal chuan thil pawimawh tak tak i zir thei ang. Mi dangte zinga tel i thiam phah anga, mi thawhpui i thiam dawn a ni.


Tin, hmangaih dan i zir thei bawk ang. Genesis 2:18 chuan "Mihring mahni maia awm chu a tha love" a ti a. Pathian chuan i khua a har a duh lova, khawtlang min pek hi Pathianin kan khawhar lohna tura a duan a ni. Mi dangte nen i kal chuan, Isua anga mi dangte hmangaih dan i zir zel dawn a ni.


Mi dangte kianga kal chuan mi dawnsawn dan pawh min zirtir a. Bible chuan 1 Pet 4:9 ah "Phunnawi lovin inmikhual tawn ula" a ti a. Eng thilah nge i phunnawi thin? I thiante tan i in i hawn loh chhan kha eng nge?


"Ka in chu a felfai lo lutuk a" i ti a ni maithei. In i enkawl thiam dan lampang aiin nangmah kawm che kha an duh zawk a. Khawngaihna an lantir thin a ni.


"Kan in chu a lian lova" i ti pawh a ni thei e. Mi pathum in leng em? Isua chuan "Mi pahnih emaw pathum emaw ka hminga an inkhawmna a piangah an zingah ka awm si thin a" a ti a (Matt 18:20).


Mi tin hian mi tu emaw ta nih kan duh theuh, a chhan pawh Pathian hian inlaichinna nei tura min siam vang a ni. Ringtu dangte kiangah i kal chuan, chu duhna chhanna chu i hmu ang.


Ngaihtuah zui atan...


Mi dangte i kianga an awm avanga harsatna i paltlang eng thil nge awm le?


Mi dangte lo dawngsawng tha lo tur hian eng chhuanlam nge i neih le? I rilru engtia thlak nge i ngaih?


Tute nge i nunah kawng i zawh dunpui theih le? An mal lo a ni tih engtin nge i hriattir ang?


(*Lettu:* Msa)

Friday, July 21, 2023

I NATNA CHUAN SIAMṬHA CHE SELA, TICHHIA CHE SUH SE

 I Kawng Zawh Lai Zawh Chhuah Dan

By Rick Warren

— July 21, 2023


“Na taka vuakna hian sual simna a thlen a, Vuak nek hian chhûng lam a tithianghlim thei.” [Thufingte 20:30] 


Eng ang mihring pawh lo ni la, Pathianin i nuna a thiltum pawimawh hmasa ber chu Isua antir che chu a ni a. Chutiang tur chuan, Isuan a paltlang kawng ngeiah khan a hruai ang che. 


A chang chuan Isua kha a khua a har a, miten an hre thiam lova, an sawisel a, thiam loh an chantir ṭhin. A chang chuan chau em em in a awm a, a chang chuan mite aṭanga in la hrangin hun fianrial a mamawh bawk ṭhin. Isua khan thlemna hial a tawk a nih kha!


Pathian chuan Isua kha khang thilah khan a zuah lo – nang pawh a hlah thlem lovang che. 


Hebrai 5:9 chuan “Isua chu tuarna hmanga tihfamkim a ni” tiin a sawi. He thua “tihfamkim” tih hi “hlen chhuak,” tihna a ni. Isua khan a hna kha tuarna kaltlangin a hlen chhuak a ni. 


I tan pawh chu chu a dik ang. Thil tam tak hi natna kaltlang chauha kan zir chhuah a awm. 


II Korinth-ah chuan, Paula chuan mi thenkhat tihduhdahna nasa tak, tuarna leh natna paltlangtute hnenah lehkha a thawn a. “Ngai teh u, Pathian duhzâwng anga in lungngaihna hian ṭhahnem a va ngaih nasat tîr che u êm! In dikzia tihlan duhna te, sual huatna leh sual tih hlauhna te in nei ta a; min ngaihna te, ṭhahnemngaihna te, mi sual hrem duhna te in neih thar tâk hi! Tûnah chuan he thilah hian in inhnamhnawih ve lo tih nangmahni ngeiin in tilang chiang ta. In hnêna ka lehkhathawn kha thil sual titu avâng emaw, a tihsual tuartu avâng emawa ziak ka ni lo va, Pathian mit hmuha kan tân ṭhahnem in ngaihzia nangmahni ngeiin in hmuhchhuah theih nân ka ziak a ni zâwk. Chuvângin, kan thlamuang ta a ni; Tita lâwmna avângin kan hlim lehzual a, in za-in a rilru in tihahdam êm êm a ni. [II Korinth 7: 11-13] 


Paula khan Korinth mite hnenah chuan tuarna avanga thil pasarih an chan tur chungchang a sawi a. Tuarna avang chuan an nun zawk a, an ngaihven zawk, an fimkhur zawk, an zahawm zawk, mihring nihna an hre thiam zawk, an phur zawk, an taima zawk tiin. 


Chung nihna pasarihte chu i nunah i nei duh ang em? I nuna natna chu thil ṭha atan leh amah thawhpuina tana hmang turin Pathian chu i dil thei ang. 


Natna chuan a thlak danglam che. I awmna ngaiah a kalsan lovang che a. A hma aiin i ṭha zawk thei a, a hma aiin i kha zawk thei bawk. 


Vawiin hian eng thil nge i paltlang ka hriatpui lo che. Tisa buaina, sum tlakchhamna emaw tute emaw nena buaina a ni thei ang. Nangmaha nghet taka bet, bo mai lo tur eng emaw a ni thei ang. Eng pawh ni se, i nun chu siamṭha zelin Isua anna kawngah i ṭhanglian thei ang. 


Paula leh a rawngbawlpuite an tuar laia chatuan thil an thlir ngar ngar ang khan nang pawhin i thlir thei ang: “Chumi avâng chuan kan zâm lo ve, kan pâwn lam mihring hi awngrawp telh telh mah sela, kan chhûng lam mihring chu ni tin siam tharin a awm zâwk a ni. Rei lo te chhûnga kan hrehawm tuar nêp tak hian chatuan ropuina, khaikhin rual loh khawpa nasa chu min siamsak a ni.” [ II Korinthians 4:16-17]


Ngaihtuah zui atan. 


I thil tawn thil harsa zingah Isua anga natna thlentu che chu eng nge ni? 


Chatuan thil phak nun chuan engtin nge natna paltlang turin a ṭanpui che? 


Eng thil harsa nge tunah khan i tawh mek? I tuarna hmang chuan engtin nge Isua i lo an deuh deuh theih ang? 


Vawiin hian Isua I zui dawn em? 


Bible chuan hetiangin a sawi, “Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.” [Johana 3: 16]


Chatuan nunna chungchanga Pathian thutiam hlen tur ring tur chuan i lo inpeih tawh em? A nih chuan, he ṭawngṭaina tawite hian han ṭawngṭai teh: 


“Lalpa duhtak, Isua Krista chu I Fapa a ni tih ka pawm a. Ka sualte thupha ka chawi a, i ngaihdamna chu ka dil a ni. Isua chu ka sualte la bo turin a thi a, i kai tho leh a ni tih pawh ka ring e. Isua chu Chhandamtuah ka pawm duh a, vawiin aṭang hian ka Lalpa atana zui turin ka inpeih e. Ka nun hi hruai la, a duhzawng tih min zirtir ang che. Isua hmingin ka dil e. Amen.”


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 


[*Lettu:* Peka]

Thursday, July 20, 2023

TUARNA INCHHAWK ZANGKHAI DAN KAWNG

 I Kawng Zawh Lai Zawh Chhuah Dan

By Rick Warren

— July 20, 2023



“Phur inchhâwk tawn ṭhîn ula; tichuan, Krista dân chu in zâwm a ni ang.” [Galatia 6:2]


Ringtuten inpawlhona chungchang kan sawi tam fu a. Mahse chu thumal chuan awmzia hrang hrang a nei thei a – inkhawm hmaa inbiak satliah aṭanga rawngbawlna chhuah hote a huam thei ang. Mahse inpawlhona ṭangkai ber chu tuarna inchhawk tawn a ni a – mite natna intuarpuina chu. 


Intuarpuinaah chuan Pathian chuan i natna chu midangte i bula pawh hnaih nan a hmang thei. I remti a nih chuan natna chuan mite i hmangaihna chu a tizual thei ang. Tuarna chuan min tipuitling a, min tifimkhur a, min tidanglam ṭhin. Mi luhlul leh mahni hmasial ber berte harsatna kaltlangin mi hmangaihna ngah, thil phalah a siam ṭhin, a chhan chu an tuarna an inchhawkin midangte natna chu an phurhpui vang a ni.  


Kan fapa, Matthew-a thih khan kan nupa chuan chhiarkawp aṭanga chhut chuan kan inneihna chu a ṭha lo thei tih kan hria. Nupa kawp chawi hmun thuma ṭhena hmun khat an fa hlohte chu an inṭhen tih kan hria. Kan inneihna chhawm nun zel chu kan tum zui ta tlat a. Khawngaihna kan inpe tawn ṭhin. Kan kawppuite awm dan lo buk fo loh chu kan tum ta bawk. Kan tum em avang chuan kan lusunna chuan min tipumkhat lehzual a ni. 


Galatia 6: 2 chuan hetiang hian a sawi, “Phur inchhâwk tawn ṭhîn ula; tichuan, Krista dân chu in zâwm a ni ang.” Krista dan chu engnge ni? Isua chuan hetiang hian min hrilh: “Nangmah i in hmangaih angin i vengte i hmangaih tur a ni” tiin [Matthaia 22: 39]. Mite nena in natna, tuarna leh harsatna in inchhawk tawn a nih chuan – inpawlhona innei a nih chuan – Kristain i vengte hmangaih tura a hrilhna che kha i zawm tihna a ni. 


Mi tam tak chuan hmangaihna chu chocolate leh rose pangpar leh inlemna hla [Love song] chu ni berin an ngai fo. Mahse hmangaihna dik tak chuan midang ṭhatna turin hna a thawk ṭhin. Hmangaihna chuan taksa natna a thawi dam a. Hmangaihna chuan huan a sam fai a. Hmangaihna chuan lusun chhungte chu ṭhutpuiin a tuarpui ṭhin. Hmnagihna dik chu chutiang chu a ni. Hmangaihna dik chuan hna a thawk ṭhin. Chu chu i remti a nih chuan natna chuan midangte hmangaih dan a zirtir ang che. 


Tuarte tuarpui i duh a nih chuan tihnat theiha i awm a ngai a. I rilrua thil awmte chu mite bula i sawi chhuah aiin natnate chuan Pathian lama a pawh hnaih che a ngai ang. 


Ngaihtuah zui atan. 


Tihnat theiha awm chu eng vangin nge a hlauhawm a, mite bula i natna thu sawi chu engtianga him lo nge a nih? 


Hmangaihna dik chuan mite ṭhatna turin hna a thawk ṭhin. Nangma tan ni lovin mite tan rawng i bawl tih chu engtin nge i hriat theih ang?


 Engtin nge vawiin hian mite i biak pawh theih ang, an natna hmuna tanpui turin emaw i natna te chu tuar thei tur chuan? 


[*Lettu:* Peka]

Wednesday, July 19, 2023

KE PEN KHAT PAWH A PAWIMAWH

  _I kawng zawh lai zawhchhuah dan_ 

— Rick Warren 

— July 19, 2023


“Chutichuan Davida chu lei ata chu a tho va, a insil a, hriak a inthih a, a puante a inthlak a; tin, Lalpa inah a kal a, Pathian chibai a buk a; tin, a in lamah a kal leh a, tin, chaw a han lam a, a hmaah chuan an hlui a, a lo ei ta a.” 2 Samuela 12:20

Heti hian han ngaihtuah teh, kum 10 chhung rinawm taka ilo thawh ve tawhnaah chuan ni khat thilthu ah hna atang chuan an ban ringawt che a, engtin nge i awm ang?

I hrilhhai viau ang! Engtia awm tur nge tih pawh i ngaihtuah thiam lo vang. Chutiang chu mi tam takin beiseiloh taka thil an tawna an awmdan tur a ni.

Lusunna, vanduaina, chetsualna leh thihna kan hmachhawnnaah pawh hian Pathianin i dam theihnan thlamuanna nei turin a duh che a ni. I ke pen hmasak ber tur chu inpumpek a ni a, inpumpekna chuan thil tangkai tak tih a kengtel bawk a ni.

Ke pen khat lek pawh nise. A hunlai anih chuan i pen ve mai tur a ni.

Bible chuan Lal Davidan a fapa nausen a chan hnu khan, hetiang hian ke a pen tih a sawi: “Chutichuan Davida chu lei ata chu a tho va, a insil a, hriak a inthih a, a puante a inthlak a; tin, Lalpa inah a kal a, Pathian chibai a buk a; tin, a in lamah a kal leh a, tin, chaw a han lam a, a hmaah chuan an hlui a, a lo ei ta a.” 2 Samuela 12:20

Engvangin nge lal in lamah a kal? Lal a ni a, lal in chu a rorelna a ni.  A hnathawhna hmun a ni a. Chumi awmzia chu hnathawk turin a kirleh ta tihna a ni.

A fa sen thihnu ni khat lekah chuan Davida lusunna chu a tawp ta tihna em ni? Ni lo e. Tuman lusunna hi an tuar zo thei lo; an paltlang zawk a ni. Davida pawhin lu a la sun reng a, a lungngai reng a, a la indawm kun reng a ni. Nimahsela, pen khatin ke a pen a, a inah kir lehin, a intichak thar leh a ni.

Thihna avangin i kawlpui chu lo thlawn mahse – i thil hlu chu laksakin awm mah la, i suangtuahna te chu bo mahse, doctor-te atangin thu lungchhiatthlak tak hre mah la – thlamuanna nei turin hmalamah i ke pen rawh. 

Ke pen chakna thinlung i neih hmaa ke pen i tum loh chuan, hun rei tak chu pen chakna i nei dawn si lo. Rinna nena ke pen tur i ni zawk.

Hma lam pana ke i pen avang hian i lusunna chu a tawpsan a ngai chuang lo.

Ngaihtuah zui atan. 

* I lusun lai hian hmalam pan tura chakna chu khawi atangin nge i lak ang?

* Thihna i hmachhawn lai hian, ho te pawh nise, vawiinah hian engtin nge ke i pen ang? 

* Engvangin nge thihna hi chu thil dang aiin a danglam bik tih i hriat a pawimawh, engtia rei nge hmalam pana ke pen turin hun a duh?

*I ke pen hmasaber chu Isua nen a ni em?*

Pathianin a that zia chu Fapa, Isua Krista kaltlangin a nemnghet a. Bible chuan, “Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan” a ti. (Johana 3:16).

Pathian thutiam chatuana nunna chu chang turin i inpeih em? I inpeih anih chuan, hetiang hian ṭawngṭai rawh le: “Lalpa duh tak, misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”

Isua vuan tura i ṭawngṭai thei a nih chuan, khawngaihin Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Tuesday, July 18, 2023

I LUSUNNAAH CHUAN, THLAMUANNA NEIH TUM HMASA RAWH

  _I kawng zawh lai zawhchhuah dan_ 

— Rick Warren 

— July 18, 2023


“Naupang chu a la dam lai khan chaw te ka ngheiin ka tap tak a; ‘Naupang chu a dam theih nan Lalpa chuan min khawngaih mahna, tunge hria ang i?’ ka ti a ni a. Nimahsela tunah chuan a thi ta si a, engah nge chaw ka nghei tawh ang? Ka ko kir leh thei dawn em ni?” 2 Samuela 12:22-23

Miten thu lungchhiatthlak tak an hriat hian, awih harsa an ti thin. Thudik chuan min barakhaih em avang leh a nat em avangin kan hnawl a. A ni thei lo vang a kan ti a. A tak ngeia thleng chu pawm harsa kan ti fo. “Hetiang hian a thleng tur a ni lo,” kan ti thin.

Nimahsela a tak ngeia thil thleng chu, kan hnawl ngawt thei lo a ni. Chutah chuan kan inpumpek ve ta. Chu inpumpekna chu thudik pawmna a ni a, thlamuanna nei tura ke penna hmasa ber a ni a. Thil thlak danglam theih loh chu i pawm ve mai tur a ni.

Lal Davidan a fapa nausen a thih khan heti hian a ti, “Naupang chu a la dam lai khan chaw te ka ngheiin ka tap tak a; ‘Naupang chu a dam theihnan Lalpa chuan min khawngaih mahna, tunge hria ang i?’ ka ti a ni a. Nimahsela tunah chuan a thi ta si a, engah nge chaw ka nghei tawh ang? Ka ko kir leh thei dawn em ni?” 2 Samuela 12:22-23. A chhanna chu, “theih loh” tih hi a ni. A fapa chu a kal tawh a. Engtin nge Davidan a tih? Thil thlak danglam theih loh chu a pawm mai a ni.

Thihna i hmachhawn reng rengin i tih theih hmasa ber chu, a danglam thei tawh lo tih i hriat chuan pawm mai rawh.

I pawmna avang chuan i ngaihsaklo tihna a ni lo. Chu pawmna awmzia chu i na lo tihna a ni lo. I na a ni! Chu i pawmna chu thil thleng chu a tha e i tihna pawh a ni chuang lo. A awmzia takah chuan a danglam theih tawh miau loh avangin i pawm a, chona thar hmachhawn turin ke i pen dawn tihna a ni.

I nuna thil lo thleng tawh i pawm thiam ngai si eng nge ni? I hna chung changah hun remchang dang an siamsak che i beisei a, mahse chu chu a liam leh si a.

I kawppui nena in inthennaah, a lo kirleh ang tih beisei takin i thlir a. Mahse a lo kir thei si lo.

I nuna thil hlu tak liam tawh chu i ngaihtuah a, lo kir leh thei se aw i ti a. Mahse chu hun liam tawh chu koh kir theih a ni tawh lo tih i pawm a ngai si a.

Duhthusam la thleng thei si lo, bansan i hreh si chu i nei a. I nunah duhthusam thar, tum thar leh hmathlir thar i neih a ngai a ni.        

Engkim – a tha leh tha lo pawh he khawvelah hian a thleng si a. Hun chu liam mah se, Pathian thuhnuaiah kan awm tih i rin a ngai a ni. A rorelna tha tak hnuaiah i inpumpek thei a nih chuan thlamuanna nei turin a pui ang che. 

Ngaihtuah zui atan. 

* I natna leh i lusunnaah pawh Pathian chu engkim thununtu a ni tih engtin nge i hriat theih ang?

* I natna dik tak pawmtura i beihnaah Pathian thu dik tak hrilhtu tur che eng vangin nge i mamawh? Tu in nge chu chu ti thei ang? 

* Duhthusam thar neih i duh a nih chuan, i hmachhawpte chu Pathian hnenah i hlan ngam em? Engtin nge i nuna Pathian thil tum chu chang turin i inpeih a ni tih Pathian i hriattir ang?

*[Lettu: Sangpuia]*

Monday, July 17, 2023

I HLAUHNA KARAH PAWH PATHIAN RING TLAT RAWH

 I Kawng Zawh Lai Zawh Chhuah Dan


- Rick Warren 

- July 17, 2023



"Chutianga thihna rapthlak ata chu Pathianin min chhanchhuak tawh a, min la chhanchhuak leh ang; min la chhanchhuak leh zel dawn tih, amahah chuan beiseina kan nghat a." (2 Kor. 1:10)


Pathianin a enkawl reng che a- chuvang chuan hlau reng reng suh. Duhthlang thei i ni: Pathian ring la, i hlauhna kha inhnehtir suh.


2 Korinth 1:10-ah chuan heti hian kan hmu, "Chutianga thihna rapthlak ata chu Pathianin min chhanchhuak tawh a, min la chhanchhuak leh ang; min la chhanchhuak leh zel dawn tih, amahah chuan beiseina kan nghat a."


Ringtute hnena Pathian thutiam chu, kan chungah engpawh thleng se amah kan hmangaiha kan zui tlat chuan kan ṭhatna turin a thawk zel dawn tih hi. Romans 8:28-ah chuan hei hi kan hmu, "Tin, Pathian hmangaihtu, amaha ruat anga a kohvate tan chuan, an ṭhatna turin engkimin a thawhsak hlawm thin tih kan hria." 


Ringtu i nih phawt chuan i ṭhatna turin engkim a thleng ang tiin Bible chuan min hrilh. Thil engkim hi a ṭha vek a ni a ti hauh lo. Thil engkim, kan ṭhatna turin an thawk a ni a ti zawk.


Kan nuna thil thleng zawng zawng hi a ṭha vek ang tiin Pathianin min tiam tihna a ni lo tiin a sawifiah theih bawk ang.  Thil engkim hi kan duh danin emaw thawnthu ngaihnawm tak angin emaw a tawp vek dawn a tihna a ni lo. Sum peipunna kawnga i thutlukna zawng zawng khan sum maktaduai chuang a neihtir lovang che. Innei zawng zawng nupa hlim tak an ni vek kher lo. Doctor-te thuchhuak pawh a ṭha lam vek a ni bik lo.


Pathian hi i duh duh i hmeh chhuah theihna a ni lo. I duhthusam kha a thupek a ni lo!


Mahse, amah i hmangaih avangin engkim- a ṭha leh a chhia- i ṭhatna tur atan hman a tiam a ni. Thil nawi remkhawm (puzzle) ang a ni. Them pakhat kha chu engmah a ni lo. Mahse awmze neia kan rem khawm chuan milem mawi tak a lo chhuak ang.


Chu chu a dik avangin i hlauhnate i palzut thei tawh ang. Ringtu nunah Pathianin thil ṭha a lak chhuah theih lohna tur harsatna te, tuilairapa awmna te, hneh nihna te, leh chhiatna nasa takte  a awm ngai lo. Chuvang chuan hmalam hun atana lo hlauhthawn lawk a ṭul lo tihna a ni.


I hlauhnate khan Pathian i rin lohna lai a tilang ṭhin. Vawiin hian hlauhthawnna i neihna lai te kha chhinchhiah la, Pathian hnenah i hlauh chhan zawt rawh. Tichuan i hlauhna chu amah rinnain thlaktir rawh.


Kawng dang pawimawh tak a la awm leh.  I hlauhnaah Pathian rin i zir theih nan Pathianin a puih che beisei rawh. Beiseina eng chuan i rinna pho chhuakin i nuna Pathianin i ṭhatna tura a thawh a hmuhtir che a ni.


Ngaihtuah zui atan.


I nunah eng hlauhna nge neia i inhriat?


Kawng ṭhenkhatah Pathian i rin a, kawng ṭhenkhatah i rin leh si loh hi engvang nge ni a i hriat?


A chhanchhuak dawn ta lo che ni a i rin hnuah engtik khan nge Pathianin a chhanchhuah che?


[Lettu: Mapuia Fanai]

Sunday, July 16, 2023

HRINGNUN HIAN THLEI BIK A NEI FO. LALPA ERAWH A ṬHA RENG

 I Kawng Zawh Lai Zawh Chhuah Dan

- Rick Warren 

- July 16, 2023



"Khatia tuar zawh rual loh khawpa phurritin min delh beh reng lai khân, dam rêng pawh kan inbeisei tawh lo va. Ni e, thih chauh hmabâkin kan inhria a, mahse keimahnia innghat lova, mitthite kai thotu Pathian chauh kan rin theihna tur a lo ni a." (IIKorinth 1:8-9)


Kan nun hi rilru natnain a tuam vel a. Kan tuar a, kan mal ngawih ngawih a, kan hnual a, sawichhiatna kan tawk bawk ṭhin. A chang chuan hleih nei deuhte in kan hre ṭhin a; mahse, a ni si lo!


Hei hi han inzawt teh: Lal Isua khan a tuar em? Mala awm chang a nei em? Hnual chang a nei ve em? Hriatthiam loh leh dik lo taka sawichhiatin a awm em?


Aw! Kan hriat aia chiangin tuarna hi Lal Isuan a hrechiang zawk asin. 


Tumah hian tuarna, malna, hnualna leh sawichhiatna kan pumpelh thei lo, a chhan chu, Lal Isua ang turin Pathianin min buatsaih mek a ni. Chutiang ti thei tur chuan Lal Isuan a kaltlang tuarnate kha kan tem ve a ngai a ni.


Pathian chuan chhiatna a siam tihna em ni? Ni lo, Pathian chu a ṭha a ni. Sualna a thlentir lovang a, thil sual a ti hek lo vang. Mahse, hun thim leh harsate hi kan ṭhatna turin a thlen tir ṭhin. Midangte kan puih theih nan min hmansak ṭhin a, Amah rin dan min zirtir bawk a; tin, ringtu dangte nen a min hnuhhnaih nan a hmang ṭhin.


Tirhkoh Paula leh a bul vela awmte khan a dikzia an hria. Paula chuan, "Kan hrehawm lai zawng zawnga min thlamuan ṭhîntu Pathianin min thlamuan ang taka hrehawm tuarte kan thlamuan ve theihna tûr a ni." a ti. (II Korinth 1:4)


Paula chuan amah leh a ṭhianten hun harsa kara Pathian rin an zir dan heti hian a sawi: "Khatia tuar zawh rual loh khawpa phurritin min delh beh reng lai khân, dam rêng pawh kan in beisei tawh lo va. Ni e, thih chauh hmabâkin kan inhria a, mahse keimahnîa innghat lova, mitthite kai thotu Pathian chauh kan rin theihna tur a lo ni a." (II Korinth 1:8-9) 


An harsatna kaltlangin Pathian leh an ringtupuite nen inlaichinna ṭha an nei: "Mi tam takte ṭawngṭaisakna azârah thilpêkte kan dawng a, chuvângin kan aiawha mi tam takin lâwmthu an sawi theih nân min ṭawngṭaipui ve rawh u." (II Korinth 1:11)


Tichuan, hun harsa a lo thlenin engtin nge kan tih ang le?

•Hnual duh miah suh.

•Pathian chu i hnenah a awm reng a ni tih hre reng rawh.

•Pathian venhimna leh hruainaah innghat tlat rawh.


Hun harsa hi kan paltlang ṭheuh a. Pathian mite danglamna chu Pathianin kan hnena awm reng a tiamna kan ring a, thlarauvah min ṭhanlentir a, kan harsatna chu thil ṭhaah min chansak a ni.


Ngaihtuah zui atan.


Isuan pawhin a tuar tawh a ni tih hriatna hian tawrhnate awlsam zawkin a paltlang tir che em? Engvangin nge?


Engvangin nge Pathian i rin theih ang?


Tunah khan eng harsatna nge i tawh mek? Kha harsatna paltlang thei tura ringtu dangte pawt hnai turin engnge i tih ang?


*I nunna Isua rinna i nei tawh em?*


A Fapa Isua Krista kaltlangin Pathianin a ṭhatzia a lantir tawh. Bible chuan heti hian min hrilh, "Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan."(Johana 3:16)


Chatuan nunna a tiam che chang turin i inpeih em? Anih chuan heti hian ṭawngṭai rawh le: "Lalpa, Isua Krista hi i Fapa a ni tih ka ring a. I hmaah ka sualte puangin i ngaihdam ka dil e. Ka sual lak bo a nih theih nan ka ai Isua a thi a, nangin i kai tho leh a ni tih ka ring e. Tun aṭang chuan Isua hi ka Lal leh Chhandamtuah ka pawm e. Min hruai la, i duhzawnga nung turin min pui ang che. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.


[*Lettu:* Mapuia Fanai]

Friday, July 14, 2023

TAWRHNA CHU RAWNGBAWLNAA CHANTIR DÂN

 _I kawng zawh lai zawh chhuah dan_


Rick Warren

15 July, 2023



"Hrehawma kan awm leh, nangmahni thlamuanna tur leh chhandamna tur a ni a; thlamuana kan awm leh, nangmahni thlamuan vena tur a ni a, chu chuan kan hrehawm tuar bawk hi chhel taka in tuarnaah chuan a thawk thin a ni". 2 Kor 1:6


Mitin mai hian an nunah buaina leh harsatna an tawk theuh a. Pathian chuan chung harsatna tuar thei tur chuan khawngaihna a pe ang che. Tin, i tawn hriat tawh thilah te chuan inphal taka midangte tanpui ve turin a duh bawk che a. Pathian chuan i natna tawhte chu tham ral mai turin a duh lo a ni.


Bible chuan, "Hrehawma kan awm leh, nangmahni thlamuanna tur leh chhandamna tur a ni a; thlamuana kan awm leh, nangmahni thlamuan vena tur a ni a, chu chuan kan hrehawm tuar bawk hi chhel taka in tuarnaah chuan a thawk thin a ni" a ti a. 


Pathian hian a chang chuan midangten malsawmna an chan theihna turin harsatna i paltlang a phal thin tih hi i hre tawh ngai em? Hun thim takte, beidawnna emaw depression emaw a paltlang tir mai thei che a, tichuan midangte i la tanpui ve thei dawn a ni.


A nihna takah chuan, i chakna atang ni lovin, i chak lohna ber ber atangte a thu i dawnte hi a ropui ber berte an ni zawk thin a.


Zu ngawlvei tanpui tur hian chu ngawlveina atanga chhuak tawhte tluka tha tunge awm ang? Nupa inthenna atanga dam leh tawh tluka nupa inthen hnena tanpuina pe tha thei tunge awm ang? Fa natna khirh tak tuar neitu nu leh pate hi chutiang bawk lo tawk tawhte aia an natna hrethiam tunge awm ang le?


I nunah tih danglam i duh em em thilte kha Pathianin thlarau lama i than lenna leh i rawngbawlna atana i tana a duh thil te a ni fo a. Nangmahah Pathianin hna a thawh mek laiin, nangmah kaltlangin midangte tanpui a duh bawk a ni.


Bible chuan hmangaihna chu a beidawng ngai lo a ti a. Beiseina a nei reng a, thil engkim a tuar chhuak thin a. Hmangaihna chuan midangte a ngaihsak a. Hmangaihna chuan midangte harsatna leh mamawhte chu i harsatna leh mamawhte ah a chantir a. Hmangaihna chuan Pathianin a en angin midangte mamawh te, an phu vang ni lovin a hmuh sak a.


Chu chu Isua pawh khan a tih kha a ni. Ama hlawkna tur ni lovin kan chhandamna turin - harsatna tinreng leh zahna te kha kross-ah a tuar chhuak vek a. A hniak min hnutchhiah chu zui vein, natna i tawrh tawhte chu midangte tanpui nan hmang ve ang che.


Ngaihtuah zui atan...


Engtin nge miten natna hrehawm tak tak an paltlang tawh te chutiang ang tuar ve te tanpui nan an hman thin? 


Eng natna leh harsatna thuk tak nge midangte tanpuina atana i hman theih, i lo paltlang tawh le?


Engvangin nge Pathianin min en anga midangte kan en ve a tul thin? Chu chuan midangte nen kan inlaichinna engtin nge a tih danglam theih le?


(Lettu: Msa)

AWMZIA A AWM LO CHANGIN ENGNGE TIH TUR

 I Kawng Zawh Lai Zawh Chhuah Dan

By Rick Warren

July 14, 2023


“Engkim i tithei tih ka hria,

I tum chu dâl rual a ni lo.

Eng mah hre si lo hian engtizia nge

I remruat hi ka lo sawisêl mai le!

Ka hriatthiam lohte chu ka lo sawi a ni,

Chuvâng tak chuan ka inten a,

Vut leh vaivuta ṭhuin ka sim ta e.” [Job 42: 2-3, 6]


I hriat thiam loh thil thlengah chuan “Engah nge?” tia inzawt mai lovin Pathiana innghah dan chu i zir a ngai zawk ang. 


Joba bung 37 chhung kha chu, Joba khan “Engah nge” tiin zawhna kha a zawt ngar ngar a: Engah nge ka chungah a thlen? Engah nge hei hi i remtih? Engah nge a nat em em? Engah nge a nawm loh em em? Engah nge ka ṭawngṭaina chu i la chhan loh fo?” tihte a ni nuai mai. 


Bung 38 naah thung chuan Joba khan zawhna a zawt ta lova, Pathianin zawhna a zawt ta thung a, “Zawhna enge maw zat ka nei e” [Job 38: 3]. A dawt bung hnihah chuan Pathian khan Joba kha Pathian chauhin a chhan theih zawhna hmangin a chhaih buai a ni. 


A zawhna thenkhatte chu, “Leilung ka din lai khan khawiah nge i awm? Lei hipna awmzia hi i sawifiah thei em?” tihte an ni a, chumi zawha bung pahnihah chuan, Joba chuan mihring mai a nihzia a lo hre chiang ta a, a hriatnate chu a tlem hle a ni tihte a hre zui ta bawk. Pathian chhuahchhal turin tu nge a nih? 


Joba khan zawhna zawt zui tawh lovin, Pathian chu a rinin a ring ta zawk a ni. Hetiang hian a chhang ta a, 

“Engkim i tithei tih ka hria,

I tum chu dâl rual a ni lo.

Eng mah hre si lo hian engtizia nge

I remruat hi ka lo sawisêl mai le!

Ka hriatthiam lohte chu ka lo sawi a ni,

Chuvâng tak chuan ka inten a,

Vut leh vaivuta ṭhuin ka sim ta e.” [Job 42: 2-3, 6]


Thil nihna tak tak i hriat hma chuan engtin nge i lo awm thin, thil a chian hma, thil che vel chuan awmzia a neih miah loh lai chuan engtin nge i awm? 


Pathian i hriatnate chu nangmah leh nangmah inhrilh nawn leh la. Pathian a rinhleh lai ngei pawh chuan Joba chuan a thil hriat ṭhenkhat dikna chu a hre chiang hle: Pathian chu hmangaihna a ni [Job 10: 12], Pathian chuan engkim a tithei [Joba 36: 22], Pathian chu thuneitu a ni [Job 34: 13], Joba chuan Pathian tan thiltum a nei [Joba 23: 14], Pathian chuan a venghim dawn [Job 5: 11]. 


Pathian chuan i nun paltlang mek kha a chin chhuakin, a kipa kawiin a hre chhuak vek a. I thawk dan kha a lo thlir reng bawk. Pathian chuan engmah reng a hmaih lo. 


I thil paltlang mek i paltlang chhan kha i inhre lo mai thei, mahse hi Pathian hnenah chuan i sawi a ngai tho: “I ṭha a ni tih ka hria. Engkim i tithei tih ka hria. Ka nun hi fiah takin i hmu tih ka hria. Thuneitu i ni a, hmathlir mumal tak i nei tih ka hria.” Tichuan, Pathian chu i rin a ngai – eng thil pawh lo thleng rawh se. 


Eng ang thil pawh lo paltlang tawh la, Pathian chu a nihna dik tak hrilh ang che. A thunun thiam! Tichuan, “Engah nge” tih chu bansan la, Pathian chu i thil hriat thiam loh thilah pawh ring ang che. 


Ngaihtuah zui atan. 


Pathian i hriat dan chu a dik chiah em? Heng thilte hi a dik a ni tih engtin nge i hriat theih ang? 


Engtin nge Pathian hriat thiamna chuan amah rin lehzualna kawngah a ṭanpui ang che? 


I ṭawngṭaina thu Pathian chu eng vanga rintlak nge, engvangin nge i rin ang a, hmangaih taka a enkawlna che avanga lawmthu sawina chu lehkhapuanah ziak chhuak ang che. 


[ *Lettu* : Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...