Wednesday, August 31, 2022

ZAWN CHHUAH TLAKA HLU I NI

  _Kohna mila nun: Engvangin nge khawvelah hian ka lo pian ve?_

— Rick Warren 

— 31 Aug, 2022

“Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan.” Johana 3:16

Mi chuan thlarauva bo mek te chu hlu lo riauva ngaihna an neih ṭhin. Chutiang tur chu a ni lo. A nihna takah chuan thlarau bo te chu an hlu em em zawk a ni.

Thil bo leh thil dah hai hi chu a inang theilo a ni. Thil ka dahna ka hai palh chuan ka tan a pawimawh tawk lo tihna a ni a. Amaherawhchu ka tihbo chuan, bo chu zawng turin ka tan a hlut em vang a ni. I sam ṭawn dahna chu i hai fova; i tarmit erawh chu i tibo thung a ni.

Zawn chhuah tlak an nih chauhvin mihring chu an hlu a ni. Heti zawng hian ngaihtuah rawh: Pathian kutchhuakte chu an bo vin an hlutna a hniam lo va, a sang zual sauh a ni.

Pathian nena inzawmna neilo te chu mibote an ni. Pathian nena in inzawmna i tihchah chuan, kawng i bo va, Pathian venhimna te, i theihna te, i hlimna leh vana i awmna tur thlengin i hloh a ni. Khing kan sawite khi chu tlemte chauh an ni zawk. Mahse thil pakhat hloh loh i la nei: chu chu i hlutna hi a ni.

Pathian chuan a hmangaih em che avangin a neih hlu ber Isua a pe che a ni. Bible-a chang lar ber chuan heti hian a sawi a ni, “Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan.” Johana 3:16

Pathian tan i hlut em avangin nangmah chhanchuak turin a rawn kal tawp a ni. He leiah nausen niin a lo piang chhuaka, thing krawsah i sualna avanga thi turin a lo kal a ni.

Isua he khawvela a lo kal nachhan chu i mamawh vang a ni. Pathianin a Fapa a rawn tira, i tih theih ngai reng reng loh tur chu a rawn tihtir a ni: i sual man bat tlak turin. Chu chu mamawh lo la chuan Pathianin a ti miah lo vang.

I sualna avang chuan engti kawng zawng  mahin Pathian nen inlaichinna in nei thei lo va. Chuvang chuan Isua chu he leiah lo kalin – i sualna zawng zawng lak ata chhandam turin, chuvang chuan ngaihdam i ni a, Pathian nena inlaichinna nung pawh i neih theih phah a ni. 

Eng vangin nge Pathianin a pathianna, a ropuina leh chawimawia a awmna hlip thlain, nangmah chhanchhuak tur chein a lo kal? A chhan chu a hmangaih vang che a ni. I hriatthiam phak bakin a hmangaih che a. Pathian hmangaihna hriatthiam tum chu fanghmirin Internet hriatthiam a tum ang hi a ni – fanghmir hian hrethiam turin theihna a nei lo a ni. Chutiang chiah chuan Pathian hmangaihna chu hrethiam tak tak turin theihna i nei lo a ni.

Pathian hmangaihna chu i hriatthiam a ngai lo va. Lei leh vana Pathian, a neih hlu ber petu che chuan a ngaihlu che a ni tih hi pawm tawp rawh. 

Ngaihtuah zui atan

* Thlarauva bo mekte i hmuh dan leh Pathianin a en dan han khaikhin teh?

* Johana 3:16 hian i nunah danglamna eng nge a thlen?

* I nunah tu nge thlarauva bo mek leh Pathian laka an hlutna hriatthiam ngai tu nge? Tunkar chhung hian chu mi chu engtin nge i hneh theih ang?

*Pathian thutiamah chuan innghat rawh*

I sualna chuan Pathian nen a ṭhen hrang ta che a, chu chu siamṭha turin eng theihna mah i nei lo. Chuvang chuan midang i sualna lak ata nangmah chhandam tur leh Pathian hnaihtirtu che i mamawh ta a ni.

Chuvang chuan Pathianin Isua a rawn tir a. Krawsah Isua chu thiin i sualna zawng zawng chu a tlak fel ta a. Pa Pathian nena inlaichinna in neih theihna turin Isuan hna a thawhsak che a ni. Bible chuan, “Isua Krista an rin avangin tu pawh a ring apiangte chu Pathianin thiam a chantir a ni, danglamna reng a awm lo” Rom 3: 22.

Isua nena i nun bul chu i sualnate puangin i ṭan thar leh thei e. I nun chu ama hnenah i hlan thei a nih chuan hetiang hian ṭawngṭai rawh le. “Lalpa duh tak, misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”

Isua pawm tura i ṭawngṭai thei a nih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawh a thlawnin ka pe dawn che nia.  

*[Lettu: Sangpuia]*

Tuesday, August 30, 2022

THLARAU LAMAH KAL NGAIHNA HRELOIN I AWM EM?

 _Kohna mila nun: Engvangin nge khawvelah hian ka lo pian ve?_

— 30 Aug, 2022

“Hmangaihnaa thianghlim leh sawiselbovin ama hmaah kan awm theihna turin leilung pian hmain Kristaa min thlan ang khan, a khawngaihna ropuizia fak turin ama lungduha lawmzawng angin Isua Krista zarah ama tan faa siam tura min lo ruat lawk tawh avangin (He a ruahmanna ah hian a va duhthawh tak em!)” Ephesi 1: 4-5.

Hun engemaw chen liam tawhah khan, pa pakhat hi ka office-ah a lo kala, “Kristian chu ka ni a, mahse thlarau lamah hmasawnna pawh ka nei lo. Kal ngaihna pawh hreloin ka awm a ni” a ti.

Kei chuan, “Eng nge i harsatna chu nia i hriat," ka ti a.

Ani chuan, “Ka harsatna chu Pathian ka hmangaih tawk lo hi ni berin ka hria” a ti a.

Kei chuan, “Chu chu i harsatna a ni lo. I harsatna chu Pathian i hmangaih tawk loh vang hi a ni lo. I harsatna chu Pathianin a hmangaihzia che hi i hre lo a ni zawk” ka ti a. 

Hmangaihna bawk hi hmangaihna chhanletna chu a ni. Bible chuan, “Amahin min hmangaih hmasak avangin kan hmangaih a ni” a ti a. (1 Johana 4:19). “Pathian ka hmangaih lo,” i tih chuan Pathianin a hmangaih nasatzia che i hre lo tihna a ni.

Dik tak chuan, he khawvel a siam hma pawhin Pathianin a hmangaih tawh che a. Bibleah pawh kan hmu a ni. “Hmangaihnaa thianghlim leh sawiselbovin ama hmaah kan awm theihna turin leilung pian hmain Kristaa min thlan ang khan” tiin. Ephesi 1: 4.

Nun awmzia leh kohna hrethiam tur chuan, Pathian nihphung i hriat a ngai a ni. Pathian chu hmangaihna a ni. Hmangaihna chu a nun lairil a ni. 

Tichuan a hmangaihna chuan a rawn zawng chhuak che a. Pathianin a hmangaih tur che a duan i ni tawp mai a ni.

Thudik chu i zawna i haichhuah chuan, i nunna chhungril berah dah la. Chakna ropui tak, inrintawkna leh thlamuanna te i hmu ang. Pathian chuan lei lung zawng zawng hi awmze nei takin mihringte tan a siam a, chuvang chuan nang pawh a siam che a, a hmangaih che a ni. 

Thil pawimawh ber i hriat tur chu Pathianin nangmah hmangaih tur chein a siam che a ni. Thil pawimawh ber i tih ve theih chu amah hriat leh hmangaih let a ni. Pathian hmangaih let hi i damchhan pakhat a ni. Fanghmir leh chengkawl te chuan hmangaihna an nei lo. Nang erawh chu Pathian anpuia siam i ni a, hmangaihna i nei a ni.

Mi tam zawk chuan an damchhan hreloin an hun pum an hmang ral a. Thil hrang hrang hriat an ngah – sumdawnna lam, sport lam, technology thar ber ber thlengin – mahse Pathian an hre tlat lo. Pathian hmangaihna ril tak  leh malsawmna tam tak an tana a dah chu an hmuh ṭhelh a ni. 

Mahse nang erawh chu chutiang chuan awm ve suh. Pathianin i tana ruahmanna a neih chu a chiang a ni. A rawngbawl te, a thuawih te, amah rin te chu a pawimawh a ni. Amaherawhchu i damchhan hmasa ber chu amah hmangaih hi a ni.

Ngaihtuah zui atan

* Kohna hmasa ber chu Pathian nena inlaichinna ṭha tak neih hi a ni a, engtin nge i chhan let ve le?

* Pathian nena in inlaichinna chu ngaihtuah la. Hmangaihna aiin thil dang dan leh dun leh serh leh sang lampang zawk a ni em? A nih chuan, eng vang nge?

* Eng vangin nge a chang chuan mahni thiltih tawp sana, Pathian hmangaihnaa chawlh mai hi harsa ka tih fo ṭhin?

*I nunah Isua i thlang tawh em?*

Pathian chu i hria a ni mai thei e, mahse mimal takin amah chu i hria em? Pathian nena inlaichinnaah chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam inni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi :8-9. 

I sualna te i puang duh a niha, i nunah Isua i thlang duh a nih chuan, heti hian ṭawngṭai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtik niah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i ṭawngai a nih chuan, Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Monday, August 29, 2022

ENGTINNGE PATHIANIN A THEIHNGHILH THEIH ANG CHE?

 Kohna mila nun: Engvangin nge khawvelah hian ka lo pian ve? 

- Rick Warren

- August 29, 2022 



"Chumi hmun Isuan a va thlen chuan a dâk a, a hnênah, 'Zakai, lo chhuk thuai rawh, vawiin hian i inah ka thleng dâwn a ni,'  a ti a." (Luka 19:5) 

A landan avang leh a sualte avangin a damchhungin Zakaia kha nuihsawh leh hnawl a ni ṭhin a. Chu chu mi zawng zawng aṭanga a beisei pawh a ni - Lal Isuan engkim a rawn thlak danglam hma kha chuan. 

Zakaia chu Juda mi Rom mite hnuaia chhiahkhawntu a ni a. A hlep a chen theih nan, Rom mite hnena a lak aia tam deuhin Judate hnen aṭangin chhiah a la ṭhin a. A chipuite hnen ngei aṭangin hlawkna a um ṭhin a ni. 

Mahse hei hi Zakaian Lal Isua a hmuh ve leha thil thleng chu a ni: "...Isua chuan amah enin a hming ngeiin a ko a! 'Zakai!' tiin." (Luka 19:5) 

Lal Isuan Zakaia kha a en mai ni lovin, amah kha a hre ngei a ni tih lantir nan a hming ngeiin a ko. Zakaia mak tihdan tur kha han ngaihtuah ve mah teh. Engtin nge Isua khan a hming a hriat? 

Zakaia tih awmzia chu 'Thianghlim' tihna a ni a. Mahse, mi tam zawk chuan a hming letling thawk hi an sawi ṭhin dan a ni. Sawrkar hnathawk eiru ṭhin; thianghlim tih chauh lo chu a nihna a ni vek zawk. Mahse, Isuan Zakaia a koh khan, "Thianghlim (Zakai), vawiinah i inah ka thleng dawn" a ti a. Isua chuan a landan ang ni lo hian a awm thei tih  a rawn nemnghet a ni. 

Chutiang chiah chu i chunga Pathian rilru put hmang a ni. Tunah khan khawiah nge i awm tih a hriat mai bakah tunge i nih a hria a ni. Engnge i paltlang mek, engvang nge, tih leh eng angin nge a nghawng che tih a hria a ni. Nangmah i inhriat aiin a hrechiang zawk che a. A ngaihsak em em che a ni. 

Thil sual i tihte avanga Isuan a hauh che i rin avangin a hnen i hnaih ngam lo a ni mai thei. Mahse tu tana siam nge i nih tih Isuan a hrilhhre duh che a ni. Eng ang taka nasain nge a hmangaih che tih hriattir che a duh a ni. 

Bible chuan heti hian a ti, "Hmeichhiain a fapa, a rila rah chu, khawngaih lohna tûrin a nau a hnute hne lai chu a theihnghilh thei êm ni? Thei e, chungte chuan an theihnghilh a ni thei e, nimahsela kei chuan ka theihnghilh lo vang che. En teh, ka kutphahahte hian ka ziak che hi; i kulh bangte chu ka hmaah a awm reng fo a ni." (Isaia 49:15-16) 

Isuan a kut a phar chhuaha sipaiten thira an kilh khan chutah chuan i hming a chuang tawh a ni. Vanram i kai hunah chuan Isua taksaah chauh lo chuan midang tumahin ser an nei lovang. Eng anga nasain nge a hmangaih che tih lantir nan chung serte chu chatuanin a awm reng dawn a ni. 

Chung serte hmang chuan Isuan heti hian thu a sawi niin a lang, "Ka theihnghilh theih che i ring em ni? Hetiang tak hian ka tan i hlu asin!" 

Ngaihtuah zui atan. 

I inhriat aiin Pathianin a hrechiang zawk che tih hian a thlamuan che nge inthlahrunna a neihtir che? Engvangin? 

Pathianin thilpek emaw nungchang eng emaw a pek che, nangmahin i hriat miah loh, mahse midangin an lo hmuh si kha engte nge? 

Engtinnge hun kal tawh emaw tun hun emawa i thil sual mekte khan Pathian hmangaihna leh pawmna che a rinhlelhtir che? 

[Lettu: Mapuia Fanai]

Sunday, August 28, 2022

RAWNGBAWLNA HMANGIN A KOHNA CHE HLEN RAWH


 Kohna mila nun: Engvangin nge khawvelah hian ka lo pian ve? 

- Rick Warren

- August 28, 2022 


"Nangniho hi Krista taksa chu in ni a, a pêngte in ni ṭheuh bawk a ni." (1 Kor. 12:27) 

Ringtu dangte rawngbawlsak tura koh i nihna tipuitlung tur chuan Kohhran mite i zawm tlat a ngai. Bible chuan, "Nangniho hi Krista taksa chu in ni a, a pêngte in ni theuh bawk a ni." (1 Kor. 12:27) a ti. 

Khawi Kohhran pawh zawt ta la, Krista taksaah chuan i hnathawh kha a pawimawh hle thu an lo hrilh ang che. Ringtutinte hian tihtur kan nei ṭheuh a, kan tihtur ṭheuh te chu an pawimawh em em vek a ni. Lalpa tan a thil tih reng reng a te lua a awm lo, engkimin awmzia an nei vek ṭhin. 

Chutiang chiah chuan, Kohhranah hian rawngbawlna pawimawh lo bik a awm lova. Ṭhenkhatte chu langsar tak an ni a, ṭhenkhatte erawh langsar ve lem lo mahse, hlu/ṭangkai em em te an ni thung. Langsar lo taka rawngbawlna emaw rawngbawlna te tham a kan ngaihte hian danglamna lian tak an thlen fo ṭhin. 

Ka ina thil pawimawh ber chu chokaa eng lian tak ka chhit ni lovin, zan ka thawh pawha ka inchhuih palh loh nana min vengtu ka room chhunga êng te takte ka chhit zawk kha a ni. Chutiang bawkin, Krista taksaah chuan rawngbawlna lian leh pawimawhna lamin inkungkaihna an nei lo. Rawngbawlna zawng zawng hi an pawimawh vek; hnathawk turin kan in mamawh tawn vek a ni. 

I taksa pêng pakhat khan hna thawk thei lo ta se engtinnge i awm ang? I dam lo ang. Taksa pêng dangte pawhin an tuar ṭhin. I thin khan chawlh duh tlat ta se, " Ka hah tawh! He taksa tan hian hna ka thawk peih tawh lo! Chawm ni ve tawh turin kum khat tal chawlh ka duh! Ka tana ṭha ber tur ka tih ve angai tawh! Pêng dangte hian thawk ve tawh rawh se" tiin.

Eng nge lo thleng ang le? I taksa a thi ang. Kristian ni si, rawng erawh bawl duh hauh si lote avang hian kohhran tam tak chu tunah hian an thi mek a ni. A sirah ṭhuin thlirtute ang chauha an lo awm avangin taksa hian a tuar phah ta a ni. 

I suangtuah theih bak piah lamah Pathianin rawngbawl turin a ko che a ni. Ephesi 2:10-a a sawi ang khan, "Thil ṭha ti atan Krista Isuaah chuan siama awmin ama kut chhuak kan ni si a; chu thil ṭha tih chu kan awmna turin Pathianin a buatsaih lawk a ni." 

Eng kawng zawng pawha midangte rawng i bawlsak hian Pathian rawngbawl i ni. 

Ngaihtuah zui atan. 

Krista taksaah hian eng kawngah te nge i theihna leh thiamnate Pathianin a hlawk thei ang bera a hman theih i rin? 

Miten Pathian rawngbawlna kawng an zawh lohna turin eng chhuanlam nge an siam ṭhin? Chung chhuanlam bulpui chu eng nge ni a i rin? 

Chhandamna hi Isua Krista i rinnaah a innghat a nih si chuan engvangin nge Pathianin thil ṭha ti atan a duh che? 

[Lettu: Mapuia Fanai]

Saturday, August 27, 2022

TUNGE I TAN THILPEK LO LAKSAK CHE

 _Kohna mila nun: Engvangin nge khawvelah hian i lo pian ve?_

By Rick Warren

Aug 27, 2022



"Tin, thilpek hrang hrang a awm a, Thlarau erawh chu hmunkhat a ni. 

Rawngbawl dan hrang hrang pawh a awm a, nimahsela Lalpa chu hmunkhat a ni. Hnathawh dan hrang hrang pawh a awm a, Pathian erawh chu hmunkhat a ni – mi zawng zawnga engkim thawktu chu." 1 Kor 12: 4-6.

Mi dang tam zawkte ang i nih chuan, Pathianin tunge ni turin a siam che tih i ngaihtuah buai ve fo ang. Pathianin a duan dan che danglam bika i hriat chuan, chunglam chu i hawiin, i nun tan awmze nei zawkin i chhuah thei ngei ang.

Ramri kham pel meuhva, i rinna Krista a nghat chunga i ke i pen meuh chuan, Pathianin thilpek pali a pe che a ni:

*Ngaihdamna.* Rom 5:15-ah chuan, "Nimahsela thilthlawnpek chu sualna nen a inang lo bawk. Mi pakhat sual avang mah khan mi tam tak chu an thih si chuan, Pathian khawngaihna leh mi pakhat Isua Krista khawngaihna avanga thilpek chu mi tam tak chungah vurin a awm ngei ang". I rinna Isuaah i nghah chuan, a tih hmasak ber chu i tihsual  zawng zawng nuaireh sak che hi a ni. Ngaihdam  i ni a! I tan thiamloh chantirna a awm tawh lo.

*Chatuan nunna.* Pathian chuan rei tak daih ruahmanna a siamsak che a. Rom 6:23-ah chuan, "Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan, chatuana nunna a ni" a ti a. Vanram kawng hi i thawkchhuak emaw i hlawhchhuak ngai dawn lova. Kawng i hmuh theihna awmchhun chu rinna hmanga Pathian thilthlawnpek lo dawn hi a ni.

*Thlarau Thianghlim.* Rom 5:5-ah chuan, "Thlarau Thianghlim kan hnena min pek khan Pathian hmangaihna chu kan thinlunga a leih tawh avangin beiseina chuan a timualpho lo va" a ti a. I nun kaltlanga Pathian i nuntir leh nuntir loh engtin nge i hriat theih ang? Thlarau rah i inthuam zel khan: hmangaihna, hlimna, remna, dawhtheihna, ngilneihna, thatna, rinawmna, nunnemna, mahni inthunna te hi.

*Theihna bik.* Bibleah hian, theihna bik riaute hi Thlarau thilpek tiin sawi a ni a. Thilpek emaw taksa nei thilpek dang nen a in ang lova. Pathianin i tih atana a duh i hlen theihna atana theihna te an ni. Ringtu tam takin thilpek an dawng tih pawh an inhre lo fo mai. Engte nge thilpekte chu tih tak ngial pawh an hre lo thin. Mahse Isua zuitu i nih chuan, i neih ngei a ngai a ni.

Bible chuan 1 Kor 12:4-6-ah chuan, "Tin, thilpek hrang hrang a awm a, Thlarau erawh chu hmunkhat a ni. 

Rawngbawl dan hrang hrang pawh a awm a, nimahsela Lalpa chu hmunkhat a ni. Hnathawh dan hrang hrang pawh a awm a, Pathian erawh chu hmunkhat a ni – mi zawng zawnga engkim thawktu chu" a ti. 

Thlarau thilpek chu eng nge ni? I nun tan hian Pathianin tum a nei a, tin Thlarau thilpek chu a duhzawng i tihna tura Pathianin a thuamna che a ni. Pathianin theihna a pek loh che thil tihtir a tum ngai lovang. 

Ngaihtuah zui atan.

Kristian i lo nih khan Pathian chuan ngaihdamna, Thlarau Thianghlim, chatuan nunna leh  theihna te pek i ni a. Heng thilpekteah hian eng nge i ngaihtuahna luah tam ber? Eng nge i theihnghilh thin? Eng vang nge?

Pathianin theihna bik eng nge a pek che? Krista taksaah chu chu a hmanna i hmu tawh em?

Kristian dangte Thlarau Thilpek dawnte atangin hlawkna i dawng tawh em?

*Pathian khawngaihna hi hlawhchhuah i tum emaw, Vanram kawng i sial chawp a ngai lo*

Bible chuan, "Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; 

thiltih avang a ni lo ve, chutilochuan miin an chhuang dah ang e" (Ephesi 2:8-9) a ti a ni. 

(Lettu: Msa)

Friday, August 26, 2022

I THIAM THILTE KHA PATHIANIN A HRUAINA TUR HMUHTIRTU CHE AN NI

 Kohna Mila Nun: Eng Vangin Nge Khawvelah Ka lo Pian ve? 

By Rick Warren

— Aug 26, 2022 

“A duhzâwng ti thei tûrin thil ṭha tinrêngin thuam famkim che u sela, Isua Krista zârah a lâwmzâwng ang taka awm tûrin min siam sela." [Hebrai 13:21] 

Hmanlai hian ramsa ṭhenkhatte chuan school din an tum a. An ruahman dan chuan an zirlaiah chuan intlan siak, inzuan san siak, tui inhleuh siak leh inthlawh san siakte a awm ang. An thutluknaah chuan ramsa zawng zawngte chuan chu zirlai chu an zir vek tur a ni. 

Chu tak chu buaina bul a ni ta tlat. 

Varak chu tui hleuhah na na na chuan an zirtirtu aiin a thiam zawk a, inthlawh siakah chuan a tling ngawr ngawr a, intlansiakah phei chuan a ti chhe takzet. Tichuan tui hleuh chu chawlhsanin, school banah chuan intlansiak lama insawrbing turin an ti ta a. Chu chuan a ke phah parh duai mai chu a tina tak vak mai a, tui hleuhah pawh chuan thiam naranah a chhuak ta daih. Mi tam berte chu an hlauhthawnna a kiang hawk a, an hahdam ta siai siai a – varak tih chuah lo chu.  

Sazupui thung chu a pawlpuite zingah intlansiakah chuan a sang ber a, mahse a tui hleuhna lamah chuan khawsikpui a chhar a, school chu a chawlhsan a ngai ta hial a. 

Thehlei chu thingkung lawnah chuan a thei fal hle a, amaherawhchu, inthlawhsan siakah chuan a bei a dawng takzet a chhan chu an zirtirtute chuan thing aṭanga thlawhtir lovin lei aṭanga an thlawhtir vang a ni. A zuanna lamah chuan a ke tha a tina ta hial a, chuvang chuan thingkung lawnah chuan “C” chauh a hmu a, intlansiakah pawh “D” a hmu ta ṭawk a. 

Mupui pawh buaina pakhat a tling, a thiam theih loh avangin hremna a tawk hial a ni. Entirnan, thingkung inlawnsiakah chuan midang zawng zawng aiin thing ler a thleng hmasa a, mahse thlawh ṭalh a tum zel. A tawpah chuan tui inhleuh siakah a tel duh ngang lova, an hnawt chhuak ta hial. 

Ramsa zirna in chu mumal taka kalpui theih loh a ni tih chu i ngaihtuah thiam awm e. 

Ramsa ṭhenkhatte chu thil ṭhenkhat an thiam hle a, thil engkim thiam tura beisei chi an ni miah lo. Varak chu varak anga awm tura siam a ni a – thil dangah a tlak loh. 

Chutiang chiah chu mihringte pawh kan ni. Pathian chuan mitinte hi a hrang ṭheuhin min siam a. Mitinte chu huang pakhata awm vek tura i phut chuan, beidawnna, hnualna, hniamna leh hlawhchhamnain a zui ang. 

Pathian chuan nangmah kha ni turin a siam che. Theihna danglam bik a siamsak che a, amahin a duh dan taka awm turin a ti che. 

I nun atana Pathian duh zawng chu i lo ngaihtuah ve tawh ngai em? I thil thiam zawng en rawh. Chungte chu i kawng kawhhmuhtu tur che an ni ang. I thiamna bik riau i hmu fuh a nih chuan Pathianin i nun hmang tura a duh dan che chu i hmu thiam thuai ang.  

Bible chuan hetiang hian a sawi, “A duhzâwng ti thei tûrin thil ṭha tinrêngin thuam famkim che u sela, Isua Krista zârah a lâwmzâwng ang taka awm tûrin min siam sela." [Hebrai 13:21] 

I thiam thil milin Pathian chuan a duh zawng ti turin a thuam che. Chung theihnate chu i hman chhuah ang zel chuan, i nuna thil ṭha  hlen chhuah zel dan i hmu thei ang. 

Ngaihtuah zui atan. 

Pathian chuan eng theihna danglam bik nge a pek che? 

Pathianin a siam dan ang che ni lo thil eng angah nge in ham tan i lo tum ve tawh? Eng nge a rah chhuah?  

Engtik laiin nge thiamna a pek ang chiah che a i chet chhuah avanga nangmahah thil ṭha a thlentir?  

*Pathian Chhandamna Thutiam chu I Ring Thei E* 

Pathian chuan a hmangaih che a, danglamna hlu tak neiin a siam che. Mahse i sualna chuan Pathian lak atangin a tihrang che a, chu sualna tihfai theihna chu nangmahah a awm miah lo. Pathian tan i intithianghlim thei ngai lo. Chuvang chuan, i sual lak ata tifai theitu che leh Pathian pawm tlaka siam theitu che chu i mamawh a ni.  


Chuvang chiah chuan Pathian chuan Isua a lo tir a. Isua Kraws-a a thihna chuan i tihsual tawh zawng zawng leh la tihsual zel tur ba chu a tlak a. Isua hnathawh chuan Pa Pathian nena inlaichinna nei turin a buatsaih bawk che. Bible chuan hetiang hian a sawi, “Isua Krista an rin avângin tu pawh a ring apiangte chu Pathianin thiam a chantîr a ni, danglamna rêng a awm lo,” tiin [Rom 3: 22] 


Amah ring chung leh i sual avanga ngaihdam dilin in zin dunna kawng chu i zawh ṭan thei ang. Isua Krista tana i nun hlan i inpeih a nih chuan he ṭawngṭaina mawlmang tak hmang hian ṭawngṭai ang che: “Lalpa duhtak, misual ka ni tih ka hria a, i ngaihdamna ka rawn dil a che. Isua Krista chu i Fapa a ni tih ka pawm a. Ka sualte avangin a thi a, nangmahin nunna nei turin i kaitho leh tih ka ring e. Ka chhandamtu atana pawmin ka Lal anga zui ka duh e, vawiin aṭang ngei hian. Ka nun hi hruai la, i duh zawng anga nung turin min pui rawh. Isua hmingin ka dil e. Amen.” 

He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni. 

[ *Lettu* : Peka]

Thursday, August 25, 2022

PATHIANIN MIDANGTE PUIH THEIHNA A PE CHE

 Kohna Mila Nun: Eng Vangin Nge Khawvelah Ka lo Pian ve? 

By Rick Warren

— August 25, 2022 

"Chutichuan ka unaute u, mi dang (Pathian lama kan rah theihna turin mitthi zing ata kaihthawha ngei kha) in neih theih nan, Krista taksa avangin Dan kawngah tihthihin in lo awm ta a." [Rom 7:4] 

Pathianin midangte tanpui turin a siam che. I hnathawh emaw i thiltih chu eng pawh ni se, hun puma Pathian rawngbawl tura koh i ni. “Rawngbawl duh lo Kristian” chu inhmeh lo tawp a ni. 

Bible chuan hetiang hian a sawi, "Ani chuan kan thiltih angte ni lovin, ama ruat leh khawngaihna ang zawkin min chhandam a, kohna thianghlimin min ko bawk a; chu khawngaihna chu leilung pian hmain Krista Isuaah chuan min pek a ni tawh."[II Timothea 1:9] 

Isua kha khawvelah tihtur bik neiin a lo chhuk a. Pathian chuan i tan pawh tih tur bik ruahmanna a nei. 

"Nimahsela, thim ata chhuaka, a eng mak taka lut tura kotu che u thatna chu in entir theih nan nangni zawng chi thlan, lal puithiamho, hnam thianghlim, Pathian mite ngei in ni si a."[I Petera 2:9] 

Missionary, pastor leh hun puma rawngbawltu dangte anga Pathian kohna chan chu mi tlemte chanvoah i ngai a ni mai thei, mahse Bible chuan ringtu zawng zawngte chu rawngbawl tura koh kan nihzia a sawi. 

Pathian chuan theihna leh thiamna chi hrang hrang midang tihsawtna tur chu a pe che a, midangte sawtpui tur theihna leh thiamna a pe che a. I theihna chu mite tana i hmang lo a nih chuan, mite i bum tihna a ni ang. Mite chuan an theihna i tana an hmang lo a nih chuan an tih tur i lakah an hlen chhuak lo tihna a ni thung. 

Entirnan, lirtheia a khawl pakhat carburettor chu i hre lo a nih chuan, mi tute emaw chu khawl siam thiam tak an awm tihna a ni a, a ropui i ti em? A lehlamah chuan, in venga kurtai siam thiam ber i lo niin, i ṭhenawm te chu i thil siam chu i lo sem dan dan tawh thin a ni thei. 

Kan khawtlang nuna kan sawi tam ber chu “Kei kei kei” tih a ni. Mahse chu chu a dik lo hulhual tlat si! Pathian erawh chuan i theihna te midang ṭanpuina atana hmang turin a ti che. 

I theihnate Pathian tana i hman chhuah chiah khan A kohna che chu i tihlawhtling zel tihna a ni. Bible chuan hetiang hian a sawi, “Pathian tân rah kan chhuah theihna tûrin tûnah zawng mi dang ta, mitthi zîng ata kaihthawha ta chu kan ni e,” tiin. [Rom 7:4] 

Isua chuan Pathianin tih tur a pek tlingtlain Pa a chawimawi a. Pathian chuan chu chu entawn atana hmang turin a duh che. 

Ngaihtuah zui atan. 

Engtin nge Pathianin theihna a pek che chu midang tanpuina atan i lo hman ve? 

Eng hnaah nge i tlin lo chung chung Pathian chuan ti tura a koh tawhna che chu? 

I ṭhian hnai, kohhran khata i lawipui, ringtupui te chu rawngbawlna kawngah engtiang takin nge i lo fuih ve tawh ṭhin? 

*Pathian chuan a hmangaih che a, danglamna hlu tak neiin a siam che* 

Mahse i sualna chuan Pathian lak atangin a tihrang che a, chu sualna tihfai theihna chu nangmahah a awm miah lo. Pathian tan i intithianghlim thei ngai lo. Chuvang chuan, i sual lak ata tifai theitu che leh Pathian pawm tlaka siam theitu che chu i mamawh a ni.  

Chuvang chiah chuan Pathian chuan Isua a lo tir a. Isua Kraws-a a thihna chuan I tihsual tawh zawng zawng leh la tihsual zel tur ba chu a tlak a. Isua hnathawh chuan Pa Pathian nena inlaichinna nei turin a buatsaih bawk che. Bible chuan hetiang hian a sawi, “Isua Krista an rin avângin tu pawh a ring apiangte chu Pathianin thiam a chantîr a ni, danglamna rêng a awm lo,” tiin [Rom 3: 22] 

Amah ring chung leh i sual avanga ngaihdam dilin in zin dunna kawng chu i zawh ṭan thei ang. Isua Krista tana i nun hlan i inpeih a nih chuan he ṭawngṭaina mawlmang tak hmang hian ṭawngṭai ang che: “Lalpa duhtak, misual ka ni tih ka hria a, i ngaihdamna ka rawn dil a che. Isua Krista chu i Fapa a ni tih ka pawm a. Ka sualte avangin a thi a, nangmahin nunna nei turin i kaitho leh tih ka ring e. Ka chhandamtu atana pawmin ka Lal anga zui ka duh e, vawiin aṭang ngei hian. Ka nun hi hruai la, i duh zawng anga nung turin min pui rawh. Isua hmingin ka dil e. Amen.” 

He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni.

Wednesday, August 24, 2022

I NUNAH ENG NGE A LAIPUI BER?

  Ṭha taka nun innghahna

— Rick Warren 

— 24 Aug, 2022



“Tin, ani chuan a hnenah, ‘Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni’ tih hi. Chu chu thu pek ropui leh pawimawh ber a ni” Matthaia 22: 37-38.

Pathian chuan i nunah a laipui chan a duh a. I nunah a kil khata awm ve a duh lo va. I nuna peng pakhat ve maia awm a duh hek lo. Leilung leh a vel zawng zawng Pathian – nangmah siamtu leh hmangaihtu che chuan – i thinglung lairil ber leh nangmah ti che veltu ah ṭan a duh a ni.  

Kawng dangin lo thlir leh ila: Pathian chuan nang nena hmangaihnaa inzawmna neih a duh a ni.

Bible chuan, “Tin, ani chuan a hnenah, ‘Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni’ tih hi. Chu chu thu pek ropui leh pawimawh ber a ni” tih min hrilh a. Matthaia 22: 37-38.

Thudik tak chu hei hi a ni, i nunah thil enge maw tak chu a laipuia dah i nei a ni. I eizawnna emaw, i chhungkua emaw, i tuina lam emaw te pawh. Sum hmuhna lam emaw lar khelhna lam emaw a laipuiah i dah a ni thei bawk.   

Mahse Pathian ni lo thil dang reng reng a laipuia dahna hi milem biakna  a ni tlat. Exodus 20:3-4 ah chuan, “Keimah lo chu Pathian dang reng reng i nei tur a ni lo. Milem siam chawp leh thil, a anpui reng reng – chung lam vana mi emaw, hnuai lam leia mi emaw, lei hnuai lama tuia mi emaw – i tan i siam tur a ni lo” tih kan hmu.

Pathian aiin thil dang chu a laipuiah i neih tawk zawk a ni tih engtin nge i hriat? Awlsam te a ni.  Pathian chu a laipui berah i neih loh chuan, i mangangin i thaw a pik ṭan a; i hlauthawng nghal a ni. Chungte chu Pathian chu a laipuiah i nei tawhlo a ni tih hriatna hma hruai a ni.

Chutiang lo deuh chuan thlir leh ta ila, Pathian chu i nun laipuiah i dah a ni tih engtin nge i sawi theih ang? I thla a muang a. I lungngaihna a kiang a. Bible chuan, “Pathian thlamuanna, rilru reng renga hriat sen loh khan, in thinlung leh in ngaihtuahnate chu Krista Isuaah chuan a vensak ang che u” a ti a ni. (Philippi 4:7)

Hei hi inzawt la: “Ka damchhung atana ka nun laipui ber tur hi eng nge ni ang le?”

Thutlukna i siam turah chuan a pawimawh ber a ni.

Ngaihtuah zui atan

* Engti zawngin nge mihring emaw thil emaw chuan i nuna laipuia dah turin an thlem ṭhin che?

* Pathian chu a laipui berah i dahloh in i nun eng ang nge ni ṭhin le?

* I nun laipui bera Pathian i dah laia i rilru awmdan kha han sawifiah teh?

*Pathian ngaihdamna chang tur leh Isua nena nun bul ṭan turin i inpeih em?*

Pathian chuan i nunah a laipui chan a duh a – chu chu a chhandamna  i pawm chuan a i nei thei a ni. Pathian chuan Isua ringtute tan chuan thiamloh chantirna reng a awm tawhlo tih min hrilh a. I sualna laka chhandam turin Isua a rawn tir a. I thil tih sual tawh leh la tihsual tur zawng zawng te pawh krawsa a thihna chuan a tlak fai vek a ni. A inhlanna avang chuan a felna kan lo hmu a, Isuan Pa Pathian nena inzawmna kan neih theih nan hna min thawhsak a ni.

Chanchin ṭha chu chutah chuan a tawp mai lo. Pathianin thihna hnehin Isua chu a kai tho va, sualna leh thihna chu a ngam ta tih a tichiang a ni, chuvang chuan chatuanin vanramah amah nen kan leng dun thei dawn ta a ni.

I sualna te i puang duh aniha, i nunah Isua i thlang duh anih chuan, heti hian ṭawngṭai ang che.

"Lalpa duh tak, misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”


Isua vuan tura i ṭawngṭai thei a nih chuan, khawngaihin Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.


*[Lettu: Sangpuia]*

Tuesday, August 23, 2022

PATHIAN CHUAN THEIHNA I NEI A TI A CHE

 _Ṭha taka nun innghahna_

— Rick Warren 

— Aug 23, 2022


“Mi tichaktuah chuan engkim ka ti thei a ni.” Philippi 4:13

Pathianin a siamchhan che ang taka nung turin theihna i nei tih i hre tawh em? Midang el phak lo i ni lo. Mi engmah lo i ni lo. Pathian chuan theihna pumhlum i nei a ti.

Kan nihna dik tak chu, Krista avangin tute pawh hi puithiam kan lo ni ta: “Nimahsela, thim ata chhuaka, a eng mak taka lut tura kotu che u thatna chu in entir theih nan nangni zawng chi thlan, lal puithiamho, hnam thianghlim, Pathian mite ngei in ni si a.” (1 Petera 2:9).

Puithiam chuan eng nge a tih tur ni ta le? Pathian chuan, "Ka tirh che u hi ... chutichuan thim chu eng lamah an hawisan ang a, Setana thuneihna chu Pathian lamah an hawisan ang, sual ngaihhnathiamna an hmuh nan leh mi rin avanga thianghlim tawhte zinga ro chan an neih nan,’ a ti a.” (Tirhkohte 26:17-18).

Ringtu tin te hi puithiam kan nih avangin PEACE vuahin rawngbawlna tura hmachhawp ka siam a. Hei hi Pastor-te tana siam a ni lo va. He khawvela ringtu zawng zawng te tana siam a ni: P (Promote)- chu inremna chawisan leh kohhran phun lama rawngbawlna a ni a. E (Equip) chuan eirukna hluarnaa hruaitute tha tihchak te, A (Assist) chuan rethei te ṭanpuina lam a hawia, C (Care) chu damlo leh natna neite enkawl lama rawngbawl a ni a, E (Educate) chuan chhuan thar te leh ziak leh chhiar thiam awm lohnaah zirna pek te a kawk a ni.

Krista chu nangmaha a chen avangin, khing zawng zawng khi i ti thei a ni. I theihna chu i mihring theihna hmanga teh a ni lo va. Philippi 4:13 ah chuan hei hi kan hmu, “Mi tichaktuah chuan engkim ka ti thei a ni.” Tin, 2 Korinth 3:5 ah chuan, “Engpawh keimahni atanga chhuaka ruat turin keimahni ngawtin kan tlin kan ti lo va; kan tlin theihna chu Pathian hnen ata a ni zawk" a ti.

Mahse mi tak tak chu rilru kap runin thlamuang lo takin an khawsa a. Theihna nei pawhin an inhrelo. Chu rilru chu eng vanga pu nge an nih? A chhan pakhatah chuan a ṭha lo zawnga hmana miina an sawi kha an rilruah a la awm reng. Chung thil chu hmana diklo kha a ni a — tunah pawh a la diklo reng a ni.

Hei hi i tana thudik chu a ni: Pathian Thlarau chu nangmahah khan a awm a ni, puithiam i ni, Krista chakna avangin thil engkim i ti thei a ni. Amahah chuan, theihna pumhlum i nei a ni.

Ngaihtuah zui atan

* Miin Pathian chaknaa an inghah theih lohna chhan tlanglawn engte nge nia i hriat?

* Mahni theihna hmanga thil tih tum fo ṭhinte hi eng ang mi angin nge an lan?

* Engkawngah te nge theihna nei anga lan harsa i tih? Chungah te chuan Pathian i rin theih nan engtin nge ke i pen ang?

*[Lettu: Sangpuia]*

I PUMA NGAIHDAM I NI

 Ṭha taka nun innghahna 

- Rick Warren 

- August 22, 2022 



"Chutichuan tunah zawng Krista Isuaa awmte tan chuan thiam loh chantirna reng a awm tawh lo." (Rom 8:1) 

Krista hnena i nun i hlan khan Pathianin i sualte a la let a ni mai lo - a chhuah zalen a, i pumin a ngaihdamna che a ni. 

Bible chuan heti hian a ti, "Chutichuan tunah zawng Krista Isuaa awmte tan chuan thiam loh chantirna reng a awm tawh lo." (Rom 8:1) 

Krista ngaihdamna tel lo chuan inthiam lohna leh zahnain i nun i hmang ṭhin. Tirhkoh Petera khan heti hian a sawi: "Hman lai khan zahngaihna in hmu lo va, tunah erawh chuan zahngaihna in hmu ta a." (1 Petera 2:10). Pathian zahngaihna in hmuhin engnge lo thleng? I sualte a hru fai. Ziahna bang (whiteboard) lian takah i sualte kha ziah niin, nawhrehna lian tak a la a, a nawt reh vek ang mai hian. 

Chu chu *Khawngaihna* tih a ni. 

Mi tam tak, Krista hmangaihna pawm tawhtu kristian ṭhenkhatte ngei pawh hian khawngaihna hi an la hrechiang lo. An nunah thil duhawm lo a lo thlenin, "Ka chungah Pathian a lung ni lo tlat" tiin an ngaihtuah fo. Mahse chutiang chuan Pathianin a fate a enkawl ṭhin em ni? A fate chungah a lung ni lo ṭhin em? Aih, chutiangin a ti ngai lo. Chutiang chu khawngaihna a ni lovang. 

Heng chhan pahnihte aṭang hian Pathianin a ngaidam pumhlum che a ni tih i hre thei ang: 

*Ngaihdamna hi Pathian zia a ni.* "A hnenah ngaihdamna dil tura ka let leh fo ṭhin avang hian Pathianin min ning ṭhin ang em le?" tiin i ngaihtuah ngai em? Chu zawhna chu Pathianin a lo chhang diam tawh: "Kei, keimah ngei hi, keimah leh keimah avâng ngawta in bawhchhiatnate thai bo ṭhintu chu ka ni; in sualnate pawh ka hre reng lo vang."(Isaia 43:25). A nihna avangin a ngaidam che a ni- a va ropui em! 

*Isuan i sual man a pe vek tawh.* Ephesi 1:7-ah chuan heti hian kan hmu: "A thisen avangin amahah chuan kan tlanna kan nei a ni." Pathianin a ngaidam che - engtin emaw ngaihdamna i hlawhchhuah vang a ni lo - mahse Isuan ngaihdam i nih theihna tura hna a thawh tawh vang zawk a ni. Krawsa Isua thihna khan i sual man zawng zawng a pe tawh, i la tihsual turte lamin. 

Pathian chu zahngai thei leh ngaidam thei Pathian a ni a. A ngaihdam duh che. Vawiin hian a zahngaihna i dawng dawn em? 

Ngaihtuah zui atan. 

Pathianin,  "Kei, keimah ngei hi, keimah leh keimah avâng ngawta in bawhchhiatnate thai bo ṭhintu chu ka ni; in sualnate pawh ka hre reng lo vang." (Isaia 43:25) a tih hian engnge i chhanna le? 

I nun kha sual ata "zalenna" nun entirna niin i inhria em? Engvangin? 

Eng kawngahte nge Pathian ngaihdamna hlawh chhuah i tum le? 

*Pathian ngaihdamna dawnga Kristaa nun thara nung turin i inpeih em le?* 

Isua ringtute tan chuan thiam loh channa a awm loh tur thu Pathianin min tiam a. Sual ata chhamdam tur chein Isua a rawn tir a ni. Krawsa a thihna khan thil i tih tawhte leh i la tihturte tan man a pe vek tawh. I sual tana a inhlanna leh a felna a pek che hmangin Isuan Pa Pathian nen inzawmna i neih leh theih nan kawng a hawnsak che a ni. 

Hetah hian chanchin ṭha hi a la tawp mai lo. Pathianin Isua kha thihna ata a kai tho a, chu chuan sual leh thihna chunga a thiltihtheihna a entir a ni. Chu chuan chatuana vanrama a kianga i chen ve theih nan kawng a hawng a ni. 

Isua Krista hnenah i nun hlan tura i inpeih chuan he ṭawngṭaina hmang hian bul han ṭan teh le: "Lalpa, misual ka ni tih ka hria a, i ngaihdamna ka dil e. Isua Krista hi i Fapa a ni tih ka ring a. Ka sual atan a thi a, nunna neiin i kai tho leh a ni tih ka ring e. Ka Chhandamtu atana pawma, vawiin aṭanga hian ka Lal anga a hnung zui ka duh a ni. Min hruai la, i duh anga nung turin min pui ang che. Isua hmingin, Amen." 

Lal Isua hnenah i inhlan thar a, lal leh chhandamtu a i pawm a nih chuan khawngaihin Rick@PastorRick.com-ah hian min lo be dawn nia. Lal Isua nen nitin hun in hman theih nana puitu che atan thil tangkai tur lo thawn che ka duh a ni. 

[Lettu: Mapuia Fanai]

Sunday, August 21, 2022

PATHIANIN A HMANGAIHNA CHE KHA CHATUAN DAIH A NI

 Ṭha taka nun innghahna

- Rick Warren 

- August 21, 2022



"Lalpa chu a ṭha si a, A ngilneihna a ngai reng a, A rinawmzia pawh kumkhuain a pangngai reng a ni."(Sam 100:5)

Pathianin a hmangaih tluk chein tumahin an hmangaih lo che a. Lalpa chuan, "Hmangaih tâwp lovin ka hmangaih che a, ngilnei takin ka hruai zêl ang che" a ti. (Jeremia 31:3)

Eng ang nasa pawhin mihringte chu lo inhmangaih ṭhin mah ila, kan beidawn chang a awm fo ṭhin. Entirnan, ka nupui hi ka hmangaih em em a; mahse, ka tibeidawng fo ṭhin. Hmangaih viau mah ila ka fate pawh hi ka ti beidawng fo. Saddleback Kohhran member te pawh hi ka hmangaih em em; mahse, tihbeidawn chang ka nei fo ṭhin.

Mahse, Bible chuan Pathianin chatuanin rinawm taka min hmangaih thu min hrilh. Pathianin a hmangaihnain a lama min hip ṭhin thu a sawi hial.

Pathian hmangaihna zia pahnih i hriatthiam ngai a awm:

*Pathian hmangaihna chu phut let nei lo a ni.* Pathianin "Chumi i tih chuan ka hmangaih che" min ti ngai lo. Chutiang chu phut let nei hmangaihna a ni. Phut let nei hmangaihna chuan, "Min hmangaih avângin ka hmangaih che,"  "Min tihlawm chuan ka hmangaih ang che," "I hmelthat avângin ka hmangaih che" a ti ṭhin. Chu chu hmangaihna tak tak a ni lo. Miin a hmelṭhatna hloh ta se engnge a chungah thleng ta ang? A aia hmelṭha zawk a hmuhin eng nge thleng ang? I hmangaihna kha a tawp nghal dawn tihna em ni? Chutiang hmangaihna chu phut let nei hmangaihna a ni.

Mahse Pathian hmangaihna ve thung chuan, "Min hmangaih reng ṭhin lo mah la, nghet reng ṭhin lo mah la, thil dik ti reng ṭhin lo mah la ka hmangaih che" min ti a ni.

*Pathian hmangaihna chu a nghet a ni.* A danglam lova, sawi lawk theih loh a ni lo. Nupa nghet lo tak kara seilian i ni mai thei. Chung nupa te chuan naupang an ti nghet lo/ralmuang lo  ṭhin. Pa pakhat chuan heti hian a sawi, "Ka pa hian min khirh dawn nge min kuah dawn tih ka hre ngai lo. A sawi lawk theih ngai loh" tiin. Chu chu hmangaihna nghet lo a ni.

Pathian nen chuan ,"Vawiin hian Pathianin min hmangaih ang em?" tih zawhna i nei ngai lovang. A hmangaihna chu chatuan thlengin a ni. Sam 100:5 chuan, "Lalpa chu a ṭha si a, A ngilneihna a ngai reng a, A rinawmzia pawh kumkhuain a pangngai reng a ni." a ti.

Tu nen pawh, thil eng pawh, engtia rei pawh lo tidun tawh mah ula, Pathian chuan chatuan thlengin a hmangaih ang che.

Ngaihtuah zui atan.

Tu emaw tiamkam/phut let nei rana i hmangaih lai kha han ngaihtuah teh. Eng nge i phut chu? Phut nei miah lovin hmangaih ta la eng nge danglamna awm ang?

Tunkar hian ni tin Pathian hmangaihnaah nghet takin ding la kar dang zawng aiin eng danglamna nge i hmuh ang?

Pathian hmangaihna hrechiang leh zual turin engtin nge ke i pen ang?

*I nunah Isua rin ngamna i nei em?*

Bible chuan Pathian Fapa, Isua Krista kaltlang chauha vanram kan luh theih tur thu min hrilh. Vanram luh hi thawh chhuah chi a ni lo: "Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e." (Ephesi 2:8-9)

I sualte puanga Isua chauh ring tura i intiam thei a nih chuan he ṭawngṭaina hian bul ṭan rawh le:

"Lalpa, Isua ka rin chuan ka sualte ngaihdam a nih tur thu min tiam anih kha, tunah chuan min siam chhan anga nun ka zir anga, tichuan engtikah emaw i hnenah, vanramah min hruai ve ang.

"Ka sual ka puang a, Isua hi ka Lal leh Chhandamtuah ka pawm e. Isu, i hnung zuia i rawngbawl ka duh a ni. I hnenah ka nun ka hlan a, min chhandam tur leh i chhungkua min pawm turin ka ngen a che. Isua hmingin, Amen."

Lal Isua hnenah i inhlan thar a, lal leh chhandamtu a i pawm a nih chuan khawngaihin Rick@PastorRick.com-ah hian min lo be dawn nia. Lal Isua nen nitin hun in hman theih nana puitu che atan thil tangkai tur lo thawn che ka duh a ni.

[Lettu: Mapuia Fanai]

Saturday, August 20, 2022

PATHIAN TAN I HLU A NI

 Tha taka nun innghahna

Rick Warren

August 20, 2022



"Chungleng savate hi en rawh u; buh an tuh lo va, an at hek lo, buh inah an seng lut hek lo; nimahsela in Pa vana mi chuan a chawm si a. Nangni chu anni ai chuan nasa takin in hlu zawk lo vem ni?" Matthaia 6:26.

Pathian tan hian i hlu nasa em em a ni. Isaia 43:4-ah pawh, "Ka mitah hian hlu tak leh zahawm tak i ni a, ka hmangaih che a ni" (ESV) a ti a. 

Engvangin nge a lakah i hlut em em?

*Pakhatna, i hlut chhan chu Pathian hi i Pa a ni a, a fa i nih vang a ni.* Bible chuan, "Chungleng savate hi en rawh u; buh an tuh lo va, an at hek lo, buh inah an seng lut hek lo; nimahsela in Pa vana mi chuan a chawm si a. Nangni chu anni ai chuan nasa takin in hlu zawk lo vem ni?" (Matthaia 6:26) a ti a ni.

*Pahnihna, Isuan i tan a nun a pek avangin i hlu a ni.* Bible chuan, "Lei leh Kristaa i man pek tawh a ni a, chuvangin a ta i ni" (1 Kor 7:23) a ti a ni.

Pathian ta i nihna chuan hlutna a pe che a. Thil lilamna hmunah i kal chuan, milâr tak takte thilhlui chu an man a to thei em em thin a. Bur eng emaw mai mai emaw, hmanrua emaw, pheikhawk mai mai pawh a ni thin. Mahse rimawi thiam em em emaw, infiammi hmingthang tak emaw, President tu emaw ta emaw a nih chuan a hlutna a sang daih thin. Ka tingtang ai hian rock star tingtang chu a hlut daih i ring em? Tehreng mai! Thil mai mai pawh hi a neitu a zirin hlutna nasa tak a nei thei a lo ni tih i hre thei ang.

Mahse thil hlutna chu a neituah chauh a innghat chuang lova. Miin chumi atan man a pek phal zatah pawh a innghat ve bawk. Hmeichhe naupang rukbo chungchang ka chhiar kha ka la hre reng mai. Lal hausa tak leh thiltithei tak fanu a ni a. Lal chuan, "A kir leh theih nan aman engzat pawh pek a ni ang. Amah chu lalber fanu a ni" tiin thu a chhuah a ni.

Lalber fanu emaw fapa i ni a. Pathian fa i ni. Man to ber mai chu i tan Isua Kristaah pek a ni a. Isua chu khawvelah lo kalin, i tan a tuar a. I chhandamna chu Pathian chuan a fapa nen a thleng a, i zalenna tur chu. Krista chuan chatuan nun i neih theihna turin a nun a hlan a ni.

I hlutzia i hriat duh tak tak chuan, kross kha en mai ang che. Kross khan i hlutna a tifiah a ni.

Mi tuin emaw engmah i ni lo tih an hrilh che chuan, an tidik lo hulhual a ni. Engmah lo i ni lova. I hlu mah mah zawk a ni. Kristaah chuan tawp nei lovin Pathian tan i hlu a ni.

Ngaihtuah zui atan...

He thu i chhiar lai hian i hlutzia Pathianin engtin nge a hrilh chein i hriat?

Mite hian Pathian pek hlutna nei ve a an inrin loh hian, eng thutlukna nge an siam thin?

Kross i en loh chuan, i hlutna kha khawi hmun dangah nge i zawn thin?

(Lettu: Msa)

Friday, August 19, 2022

PATHIANIN THIL DANG ZAWNG AIIN A THLANG CHE

 Tha taka Nun Innghahna

By Rick Warren

— August 19, 2022 



"Chutichuan, a khawngaihnaa thiam chantira lo awmin, chatuana nun beiseina ang zela roluahtu tura siamin kan awm thei ang."[Tita 3:7] 

Pathian chuan a duh che. Midang chu, nangmah duh lo angin an lang mai thei. A nih loh pawhin, an duh lo tak tak thei che. Mahse Pathian chuan a duh che a, a pawm thlap che. Dik tak chuan, a duh mai che a ni satliah lo. A hmangaih che! 

Pathianin a pawmna che chu i thiltiha innghat a ni lo. Dik tak chuan, i thil tih engah mah khan a innghat lo hial zawk. Isua nihna leh hnathawh zawh tawhah chuan a innghat zawk. A awmzia chu, Pathian chuan hetiangin a sawi, "Chutichuan, a khawngaihnaa thiam chantira lo awmin, chatuana nun beiseina ang zela roluahtu tura siamin kan awm thei ang."[Tita 3:7] 

Pathianin min pawmna chu kan hriatthiam a ngai hle – a chhan chu thinlung hliam na ber berte chu hnawl nihnain a hrin an ni. Chuvang tak chuan kan damchhung hun tam tak chu kan nu leh paten, kan thiante leh ṭhenrualte leh kan mizah zawng leh thik zawngten min pawm theih nan kan bei ngar ngar ṭhin. 

A nih loh pawhin, naupang i nih lai chuan, in inkhelh changa an inkhelhpui tur an thlan chang chuan hetiang hian i lo ngaihtuah ṭhin a ni awm e, “Lalpa duh tak, a hnung bera an thlan chu min nihtir lul suh,” tiin i lo ṭawngṭai ṭhin a ni thei. A nih loh pawhin lawmman emaw kaisanna eng emaw chang tur an thlitfim chang chuan mahni inngaihhlutna i neih chu sawi nghin a ni ṭhin. 

Hei hi chanchin ṭha a ni: Bible chuan Ephesi 1:4-ah hetiang hian a sawi, “Hmangaihnaa thianghlim leh sawisêl bovin ama hmaah kan awm theihna tûrin, leilung pian hmain Kristaa min thlan ang khan,” tiin. 

Amah Pathian ngei chuan a thlang che. Thu mak chu a van ni em! Ni, tuifinriat, sava leh thil dang zawng zawng siam a tum hma khan a lo thlang tawh che. Chu chuan Pathian mithmuhah eng tiang taka pawm tlak nge i nih a tifiah ang. 

Ngaihtuah zui atan. 

Hun kal tawha miten an lo hnawl tawhna che chu vawiina nangmah leh nangmah i inhmuh dan engtin nge a nghawng? Pathian chuan a pawm thlap che a ni tih hriatna chuan engtinge khakna i pai chu a va tihdam theih ang? 

Engtin nge miten an pawm theih dan tur che chuan i khawsak ang? Pathian ngaihdamna chu thawhchhuah i lo tum ve tawh ngai em? 

Pathianin a pawmna che dawnsawn dan ṭha ber chu midangte pawm a ni. I ṭhiante zingah khan tute nge an nihna ang anga pawm an ni tawh tih hriattir ngai? 

[ *Lettu* : Peka]

Thursday, August 18, 2022

PATHIANIN TUM HNIH MUANGCHANGA KAL TURA A DUHNA CHE

 Ṭha taka nun innghahna

By Rick Warren

—August 18, 2022 



“A kawng zawng zawngte zawh tûr leh, kan pute thu a pêk tawh anga a thupêkte, a thuruatte, a rorêlte pawm tûra kan thinlungte a lama a hawitir theihna tûrin.” [1 Lalte 8:58] 

Vawiin hi hunbi chungchang kan zirhona hnuhnung ber tur a ni. Pathianin a chang chuan rang taka che chhuak turin a duh che a, a chang chuan muang tea kal dem dem turin a  duh thung che. Pathianin muang tea kal dem dem tura a duhna che kawng hnih i thlirho dawn teh ang. 

Pakhatna, thil lian tham i hmachhawn dawnin muangte in che rawh. Thufingte-ah kawng tam takin kan hmu. Thufingte 21: 29 chuan hetiang hian a sawi, “Mi suaksualin a hmêl a tiruh a, Mi fel erawh chuan a kawng a rêl fel ṭhîn” tiin. 

Thufingte 4:26 chuan hetiang hian a sawi thung, “I ke tân kawng tirualrem la, i kawng zawng zawng tihngheh ni rawh se” tiin. 

Engtin hunah nge i kawng zawh lai i chhut ang? In nuna thutlukna lian – hnathawh chungchang, rawngbawlna lam, nupui pasal chungchang, thil lian tham lei dawn hunte an ni. 

Thufingte 22: 3-ah hetiang hian kan hmu, “Mi fing chuan hlauhawm a hmuhin a biru a, Mi mâwl erawh chuan a tâwn mai a, a tuar phah ṭhîn” tiin. Ngaihtuahna mumal tak seng lova thutlukna i siam fona chu i pawisa hman thuah a ni. Chuvang tak chuan mi tam takten leiba an nei reng a ni. 

Eng nge a chinfelna? “Mi taima ngaihtuahna chuan neihnunna lam chauh a pan a, Mi thatchhia erawh chuan tlâkchhamna lam chauh a pan a ni”. [Thufingte 21:5] 

Muangchanga i chet hun tur chu i chi tuh alian chho mek i hmuh hunah a ni. Bible-in thlai chi tuh leh seng chungchang vawi tam tak a sawi. Thlai chi i tuh chuan a hnuah a rah i seng leh ṭhin. 

Chu chu i nun pumpuiah a dik ang. Lainatna i tuh chuan lainatna i seng ang. Mi relchhiat i tuh chuan relchhiat i seng ang. Thilphal i tuh chuan thilphalna i seng ang. I tuh apiang chu i la seng ang. 

Thlai chi tuh leh a seng inkarah hun zau tak a tla ṭhin. Vawiinah hian leiah apple chi thlak ta ang la, a tukah mai chuan i seng lo hulhual ang. 

Thlai tuh leh seng dan thuhla a thil chiang bal chu i chin aia tam i seng thin chu a ni. Buh mal khat i tuh a nih chuan buh fang mal khat mai chu i seng lo tawp ang. Buh kunga a mal tam tak, a kawra a khuh chu a lo chhuak ang a. A chi pakhat chu intipungin i tuh aia tam fe i seng thei ang. 

Seng tur meuh chuan rei fe i nghah a ngai ang. Hei hi chu thutiam chu a ni: 

He inlârna hi hun bîk nei a ni a.A thlen hun thlîr reng la, a daw lo vang.A muan pawhin nghâk deuh la, A thleng ngei dâwn, a tlai dâwn lo. [Habakuka 2:3] 

Pathian hunbi chu a rintlak a ni tih pawm ang che. A chang chuan Pathian chuan kal hmanhmawh turin a duh che a, a chang chuan muangchanga kal turin a duh thung che, mahse a hruai dan che chu a ṭha ber fo vang. 

Solomona kha Bible-a mi Ropui ber pakhat a tling. Pathian hunbi hre thiam thei turin Solomona ṭawngṭaina hmang khan ṭawngṭai ang che: “A kawng zawng zawng zawh tûr leh, kan pute thu a pêk tawh anga a thupêkte, a thuruatte, a rorêlte pawm tûra kan thinlungte a lama a hawitîr theihna tûrin.” [1 Lalte 8:58] 

Ngaihtuah zui atan. 

I thil hmachhawn mekah kal muan a ngai nia i hriatna chu eng nge ni? 

I nunah khan eng ang chi nge tuh ngai nia i hriat? 

Khawi hmunah nge Pathian hunbi chu i rin ngam ngai ṭhin? Eng ang hunah nge kal muan ngai nia i hriat a, engtik hunah nge kal chak ngai thin? 

[ *Lettu* : Peka]

Wednesday, August 17, 2022

DAWHTHEIH HI A MAWI EM EM A NI

  _Ṭha taka nun innghahna_

— Rick Warren 

— 17 Aug, 2022



“Dawhtheih hi a mawi em em a ni” Thufingte 14:29

I nunah hian lut leh chhuak hi a awm reng a. A chang chuan Pathianin chak deuha kal turin a duh che a, a chang chuan muang leh deuh turin a duh che a ni. Thufingte 14:29 in a sawi angin, “Dawhtheih hi a mawi em em a ni.” 

Vawiin leh naktuk hian Pathianin muang tura a duh hun che kan kan thlir dawn a ni.

*Pakhatnaah chuan, thudik chiang takin i hria a nih loh chuan i hmanhmawh tur a ni lo* Kan tih dan phung chu innawr thut thut leh hmanhmawh taka tih hi a ni a. Chu chuan chawplehchilha thiltih leh thutlukna siam zung zung chu a ṭha alawm tiin an hrilh ang che.

I rilruah chuan ‘i thinlung duhzawng angin kal rawh’ tiin a rawn thum ri tluk tluk maithei e. Mahse Bible chuan, “Thinlung hi thil zawng zawng aiin bum hmang ber, chhe lailet der a ni a; tuin nge hre thiam thei ang?” a ti. Jeremia 17:9

Rilrua lan dan mai chuan kawng diklo vah min hruai fo ṭhin. Chuvangin i chhungril piah lam thudikah chuan lo innghat ang che. 

Bible-ah bawk hian a chiang a ni: “Thudik hriat hmaa thutlukna siam chu – a zahthlakin a atthlak bawk a ni” Thufingte 18:13 (TLB)

Chuvangin thudik chiang taka i hria a nih loh chuan, hmanhmawh lo la. I rilru a chak zek zekna leh hmanhmawh duhnaah te khan innghat suh ang che. I ngaihtuahna piahlama thudik awm kha ngaihtuahin hun hmang lawk ṭhin ang che.

*Pahnihnaah chuan, i nat emaw, i thinrim emaw, i thawpik emaw chuan hmanhmawh lo bawk ang che.* I thinrim viau tawh chuan fing taka chet ai chuan chhanlet nghal emaw i duh rum rum ṭhin.

Jakoba 1:19 ah chuan, “Mi tinin ngaihthlak chuh sela, thusawi chuh lo sela, thin tinel rawh se” a ti.

He lai changa rimawi tak chu i hria em? Hmanhmawh la, muang chang la, muang chang leh rawh min ti a, chumi awmzia chu; ngaihthlak lamah i chet ran chuan, ṭawng lamah muang thung la, thinrim lamah pawh muang rawh min ti bawk tihna a ni. Mahse ngaithlak lamah i chet muan viau chuan, ṭawng lamah leh thinrim lamah i che rang thung dawn tihna a ni.

Thufingte 15:18 chuan heti hian min ti daih thung a, “Mi thinchhia chuan inhauna a chawk tho va, mi thluak nem erawh chuan inhauna a tireh.”

Thufingte 15:28 (NLT) ah chuan, “Pathian mi thinlung chuan a thusawi hmain a ngaihtuah hmasa ṭhin” a ti a.  Kawng dangin lo sawi ta ila, Pathian mi chuan a ka aṭanga a sawichhuah hmain a rilruin a ngaihtuah hmasa phawt ṭhin a ni.

A chang chuan i thinrim anga, i na anga, i tawt up up ang. Chu chu hringnun a ni miau si a. Mahse chutiang hun chu a lo thlen leh pawhin thawk han la la. Thufingte 14:29 chuan, “Thinur har mi chu finna nasa tak nei mi a ni a, mi ti thawt thawt erawh chuan atna a chawimawi” a ti a ni.

I inchhir lehna turin thutlukna hmanhmawh siam suh.

Chutiang bawkin thu chiang engmah i hriat loh chuan hmanhmawh suh. I thinlungin a duh ang mai khan che nghal lo la, ngaihtuah lehna hun insiam la, fing takin thutlukna siam ang che.

Hei hi hre reng rawh: Dawhtheih hi a mawi em em a ni.

Ngaihtuah zui atan

* Thutlukna rang taka i siamna kha han ngaihtuah let leh la. Eng te nge a rahchhuah ni le?

* Tun hnaia thutlukna i siam tumnaah han tih khawtlai i nei em? Chutah chuan Pathianin a hruai dan che engtin nge i hmuh?

* Jakoba 1:19 ah chuan, “Mi tinin ngaihthlak chuh sela, thusawi chuh lo sela, thin tinel rawh se” a ti a. Heng zingah hian i tana harsa ber eng nge ni? Chu i tana harsa ber chu engtin nge i zawm theih ang?

*I nunah Isua i thlang tawh em?*

Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi :8-9. 


I sualna te i puang duh a niha, i nunah Isua i thlang duh a nih chuan, heti hian ṭawngṭai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i ṭawngṭai a nih chuan, Rick@PastorRick.com ah hian email min lo thawn la. Isua nena zinkawng i zawh ṭanna atana pawimawh te a thlawnin ka lo thawn ang che.

*[Lettu: Sangpuia]*

Tuesday, August 16, 2022

THIL ṬHA TI TURIN KE PEN CHAK LA, CHHANDAMNA LO PAWM ANG CHE

  Ṭha taka nun innghahna

— Rick Warren 

— 16 Aug, 2022

“A phute tan ṭhatna ui suh, i kuta tih theihna a awm phawt si chuan.” Thufingte 3:27

Pathian Thlarau duh dana chetchhuah dan kan hnungah khan kan sawi tawh a. Chungte chu: Pathianin thil ti tura a tuk che chu ti nghal rawh. Ngaihdam tur emaw ngaihdam dil tur emaw an awm chuan ti nghal rawh. Pathian hnena i thutiam chu ti nghal vat rawh. Thlemna i tawh rualin tlanchhuak nghal bawk ang che!

Vawiinah chuan engtik hunah nge chet vat a tul tih kawng hnih kan en dawn a ni.

*Pakhatnaah chuan, thil ṭha ti tura hun ṭha i neih chuan che chhuak nghal rawh.* Bible pawhin min hrilh nawn chamchi a:  Mi dangte tana thil ṭha tihna hun remchang i neih chuan ti nghal rawh.  

Pathianin mi dangten i nunah mamawh an neih theih nan hun a siamsak ṭhin che a – chung hun ṭha chu i chan ve reng a ngai a ni. An mamawh chu a tha zawnga ṭanpuina a ni thei a. Ṭhenkhatte erawh chu rilru lam, ngilnei taka biak emaw, fuih thar ngai pawh an ni thei a ni.

Thufingte 3:27 ah chuan ti hian kan hmu, “A phute tan ṭhatna ui suh, i kuta tih theihna a awm phawt si chuan.” 

Entirna heti hian lo pe ta ila, mi in leh lo nei lo i hmuh chuan, in leh lo pawh nei lo ṭanpui tur ka nei tiin sawi suh, chu ai chuan, ṭanpui nghal mai rawh.

Bible-a Thuhriltu 11:4 ah chuan, “Hun ṭha ber i nghah chuan, eng thil mah i ti hman lo vang” (TLB) a ti.

Thil ti tur hian hun ṭha ber hi a awm ngai lo vang. Naktuk hun pawh i thleng ngei dawn em hriat a ni lo zui. Johana 9:4 ah chuan, “Chhun a nih laiin mi tirtu hna kan thawk tur a ni; zan a nih dawn tak hi, chu mi hunah chuan tuman hna an thawk thei lo vang” tiin.

A tawp berah chuan, rang taka i chet chhuah hun tur chu a pawimawh ber a ni. *Pathianin chhandamna hun a siamsak che chuan rang takin i che tur a ni.* Pathianin chhandamna hun a hawnsak che a, vawiin hi chu chhandamna pawm hun chu a ni.

“Tunah chuan ni rih lo ve,” i tih chuan, a nihna takah chuan Krista chu i hnar tihna a ni. Bible-a 2 Kor 6:2 ah chuan, “Tun hi hun lawmawm chu a ni a; tun hi chhandamna ni chu a ni” a ti.

Engtin nge chhandamna chu i pawm ang? I nihna kalsana Pathian lama hawi hi a ni. Krista chu ring la, i nuna lo lut turin, i sualte ngaidam tur leh a siam chhan che ang tak a i nun theihna turin sawm ang che.     

Pathian hnen atanga chhandamna chu i pawm thei a nih chuan, heti hian ṭawngṭai rawh le:

"Lalpa Isu, mi mal taka hriat che ka duh a. Ka nun kawngkhar ka hawng a, ka Lal leh Chhandamtu atan ka pawm che a ni. Ka sualna zawng zawngte ngaihdamna ka dil che a. Krawsa kan sual avanga i thihna avang leh khawngaihna leh chatuana nunna min pek avangin lawmthu ka hrilh a che. Ni tura min duhna anga ka nun theih nan ka nun hi min kaihruai ang che." Amen.

Chhandamna hi i dawn phak thilpek hlu ber chu a ni. Vawiinah hian rang takin lo pawm ang che.

Ngaihtuah zui atan

* Mi dangin i hnena thil ṭha an tih kha engtik nge? Nangmahah engtin nge a thawh?

* Thil ṭha ti tura hun remchang tak eng te nge i bawhpelh tawh le? Chung zing aṭang chuan pakhat thlang la, vawiin hian tih tum ang che.

*Pathian ngaihdamna chang turin a chunga ṭawngṭaina hmang khian i ṭawngṭai thei a nih chuan*, khawngaihin Rick@PastorRick.com ah hian min lo hriattir la. Isua nena zinkawng i zawh ṭan theihna tura thil pawimawh ka lo thawn dawn che nia.

[Lettu: Sangpuia]

Sunday, August 14, 2022

PATHIAN THUPEK ZAWM TURIN HMANHMAWH RAWH

 _Ṭha taka nun innghahna_ 

- Rick Warren

- August 14, 2022 



"I thupêkte zâwm tûrin ka hmanhmawh a, rei ka rial lo."(Sam 119:60) 

Nimin lamah khan "Pathian Thlarau hruaia kal" awmzia kan sawi tawh a. A chang chuan zawi muanga che tur te, a chang leh hmanhmawh taka che turtein Pathian Thlarauvin min hrilh ṭhin a. Vawiinah chuan hmanhmawh taka che tura min tihna kawng hnih kan sawi dawn a ni. 

A hmasaah chuan, Pathianin tihtur a pek che chuan rang takin i che ṭhin tur a ni. 

Kan Bible-ah hian nun inzirtirna a tam hle mai a. Bible chuan thupêk a ti a, chu chu zâwm tûrin Pathianin a duh che a ni. 

Nu leh pate hian an fate zirtirna an pe fo ṭhin a. Naupang chuan, "Ka lo inngaihtuah dawn nia" a tih chuan thupêk a zâwm lo tihna a ni. 

Chutiang bawk chu nangmah leh Pathian inkarah pawh a ni ve bawk a. Engnge maw ti tura a duh che chuan rang taka zâwm tûrin a beisei che a ni. 

"Tin, Isuan an hnênah, 'Mi zui rawh u'. . ." (Marka 1:17). Kha Sanghamantu pahnihte khan an eizawnna kalsana amah zui tûrin a ti a ni. An tan chuan thil lian tham tak a ni. 

Engtinnge an chhan? "Tin, lênte chu kalsanin an zui ta nghâl a." (Marka 1:18) 

Pathianin tihtur a pek che chuan ti nghal tûrin a duh che. 

Sam 119:60 chuan, "I thupêkte zâwm tûrin ka hmanhmawh a, rei ka rial lo" a ti. Thuawihna kawng a nih chuan, hmanhmawh hi thil ṭha tak a ni. 

A pahnihnaah chuan, ngaihdam dil tûrin Pathian Thlarauvin a tih che chuan rang takin dil ṭhin rawh. 

Kan thiamlohna leh huatna vawn tlat hi, tur in ang a ni. Dam reng chung siin a ei ral thei che. "Chutichuan, maichâm bula thilpêk i hlan lai ngeia, i unauvin i chungah lungnih lohna a nei tih i hriat chhuah leh chuan, chuta maichâm hmaah chuan i thilpêk chu hnutchhiah la, kal langin, i unau chu rem zet la, chumi hnuah chuan i thilpêk chu rawn hlân rawh." (Matthaia 5:23-24) 

Pathian chibai i bukna kha i ngaihdam dilna ti khawtlai tu che atan chhuanlam tling a ni lo. Nang leh midang inkara thil kal dik lo a awm a nih chuan siamṭha hmasa zet phawt rawh. 

Pathianin tihtur a pek chein emaw, midang nena in inkar siamṭhat ngai a awm chuan muang chang suh, rang taka chet hun a ni. 

Ngaihtuah zui atan. 

Vawiinah hian Pathianin eng tihtur nge a pek che? 

Tuin nge i ngaihdamna mamawh? 

Tu ngaihdamna nge i mamawh? 

[Lettu: Mapuia Fanai]

Saturday, August 13, 2022

I HUN KHA ENGKIM A NI

 Ṭha taka nun innghahna

Rick Warren

August 13, 2022



"Engkim tan hian hun tha leh kawng dik a awm vek a, mahse kan hre tlem hle thung a ni" Thuhriltute 8:6 (GNT)

I nun kawng hrang hrang - sumdawnna a thutlukna i siam atanga  i laichin hnai ber thlengin- hun hian thil a ti danglam thei hle thin. Tin, Krista zuitu kan nih angin,  Pathianin hun a tih mila awm thiam a pawimawh em em bawk a ni.

Hlawhtlinna ropui reng reng hian hun bik eng emaw a nei zel a. Ropui taka ball lo man tur chuan, a hnung daltute leh a lo dawngtu inkarah hun a dik thlap a ngai a. Sumdawnnaah pawh, hun dik hi - mi rawih leh in zarpharh chungchangah phei chuan engkim a ni thei a ni. I zai chuan, rimawi tumtute nen hun vawn thiam a pawimawhzia i hre chiang hle ang.

Kum engemaw zat liam taah khan 'Purpose Driven Church' tih bu ka ziak a. Bung khatnaah khan hruaitu dinhmun (leadership) chu tui chunga tleng (surfing) nen ka tehkhin a. Tui chunga tleng thin (surfers) reng rengin, 'tuifawn i siam ang u' an ti ngai lova. Tuipuiah khan tui an tifawn thei lo a ni. Chu chu Pathian chauhin a tih theih a ni a. Pathian siam tuifawnte kha an lo nghak mai thin a ni.

Chumi awmzia chu tui chunga tleng thinte chuan chumi lo thleng nghah nan hun rei tak an hmang thin a ni. A chang chuan tuifawn an hmu a, an kal liamtir chang pawh a awm. A chhan chu a hun a la dik lo tih an hriat vang a ni. Tuifawn dik an hmuh veleh an in hai kal chak tulh tulh a, tui fawn chu an va nang fuh a. Chu tuifawn chungah chuan an chuang ta thin a ni. 

Tuifawn chungah eng emaw hmanga han tleng (surfing) chu awlsam takin a lang a, mahse thiamna nasa tak a ngai a ni. Hringnunah pawh chu tho chu a ni. Hun dik hre thei turin i intahhriam a tul a ni. Bible chuan Thuhriltute 8:6-ah khan, "Engkim tan hun tha leh kawng dik a awm vek a, mahse kan hre tlem hle thung a ni" a ti. 

Hringnun hian hunbi vawn a nei thin a. A hun dik têa thil ti thei turin thiam a ngai em em a ni. Kristiante chuan chutiang thiamna chu 'Thlarauva nun' tiin an sawi thin a. Krista zuitu nihna kawngah i thanlen poh leh, Thlarauva i nun pawhin hma a sawn tulh tulh ang. A chang chuan Pathian Thlarau hian chak takin a kaltir ang chia. A chang chuan muangtêin a kaltir bawk ang che.

Ni engemaw ti chhung chu Pathianin kal chak tur leh kal muang tura a duh hunte kan zir dawn a. I nunah mahni tuifawn siam tumin i bei viau maithei a emaw, Pathianin tuifawn a siam che lo nghah a, lo chuan dan pawh i zir zawk thei a ni.

Ngaihtuah zui atan...

I sumdawnnaah emaw inkungkaihna kawngah a hun chiah chiah hle mai i tih ang kha engtik nge? Engtikah nge a hun a dik loh thin?

Pathian tuifawn nghak lova mahnia siam i tum changte chu eng hun te nge? Eng nge a rah chhuah?

Pathian Thlarauva nun hman i nei tawh em? Eng nge a an awm?

(Lettu: Msa)

Friday, August 12, 2022

PATHIANIN LEI LEH VAN A SIAM CHHAN

 Inlaichinna tha 

By Rick Warren

— August 12, 2022 



"Hmangaihnaa thianghlim leh sawiselbovin ama hmaah kan awm theihna turin leilung pianhmain Kristaa min thlan ang kha; a khawngaihna ropuizia fak turin ama lungduha lawmzawng angin Isua Krista zarah ama tan faa siam tura min lo ruat lawk tawh avangin."Ephesi 1:4-5 

Pathianin lei leh van a siam chhan chu, chhungkua neih a duh vang a ni – chu chhungkua chu kohhran a ni. Chu kohhran chu lei leh van awm chhan ber a ni. 

Pathianin lei leh van a ngaihtuah hmain nangmah kha a ngaihtuah che tih i lo hre tawh ngai em? Chutiang taka hlu chu i ni e; Chutiang tak chuan Pathian hmaah i pawimawh a ni. 

Engtin nge thil eng emaw chu tu emaw tan chuan a hlu tih i hriat theih ang? Eng anga thil hluin nge an thleng phal tih aṭangin a hriat theih ṭhin. Krista chu kohhran tan a thi a. Mi tuten emaw thil eng emaw tana thih an ngam a nih phawt chuan, chu thil chuan hlutna lian tak a nei tihna a ni. 

Bible chuan hetiang hian a sawi, 

"Hmangaihnaa thianghlim leh sawiselbovin ama hmaah kan awm theihna turin leilung pianhmain Kristaa min thlan ang kha; a khawngaihna ropuizia fak turin ama lungduha lawmzawng angin Isua Krista zarah ama tan faa siam tura min lo ruat lawk tawh avangin."Ephesi 1:4-5 

Pathianin khawvel a din hma daih tawh khan a thil tih tum ngar ngar chu a kohhran hmanga hnathawh a ni – hnam hmangin a ni lo va, sawrkar leh pawl hmangin a ni hek lo. Lei thuneihnate chu rei lote atan mai an ni a, khawvel buaina hmachhawn tur pawhin an lian tawk lo. Kohhran chauh chu a lian tawk a ni. Kohhran chauh chu chatuan hawlhtlang tur a ni. 

Hetiang hian in ngaihtuah chhin teh ang. Khawvel pumpuiah vawiin hian ringtu maktaduai 250 vel an awm. Chu chu China rama mihring aiin an tam, anni hi khawvela mihring bit berna ram an ni.  

Tichuan, khawvelah hian kohhran chu mihring ngah ber a ni satliah mai lo va, thil ropui ber neitu a ni bawk: Pathian hmangaihna chu. I Johana 4: 19 chuan hetiang hian a sawi, “Amahin min hmangaih hmasak avangin kan hmangaih a ni” tiin. 

Pathianin khawvel a siam chhan bulpui ber, kohhran a siam chhan ber chu Pathian hmangaihna vang a ni tih chu mak i ti em? Chuvang tak chuan Pathian chhungte zinga tel tluka hamṭhatna ropui chu khawiah mah a awm lo.  

Ngaihtuah zui atan. 

Eng thilin nge Pathian chuan a ngaihtuah hmasa ṭhin che tih hriattir che, leilung a din hma hauh pawh khan? 

Kohhrana a hnathawh tlingtla turin eng tin nge Pathian chuan a hman ve che? 

Engtin nge Pathian hmangaihna chuan midang rawngbawlsak turin a ṭanpui che? 

Krista chu i nuna atan i lo la sawm ngai lo a nih chuan he ṭawngṭaina mawl mangte hian lo ṭawngṭai ang che: “Lalpa, nangmah ka mamawh che tih ka hria e. Ka nun kil tinah hian dah hmasak ber che ka duh. I Thlarau chu ka nunah rawn chhung ang che. I lakah thil ka tisual tih ka pawm a, ka sual zawng zawng min ngaidam a, nangmah zui che ka duh e. Nangmah rin dan leh hmangaih dan che zir ka duh a che. I duhdan, hmatlir leh ruahmanna te hriat leh tihhlawhtlin ka duh bawk. Khawngaih takin I chhungte zingah min pawm rawh. Isua hmingin ka dil a che. Amen.”  

Chu ṭawngṭaina chu i hlan tawh a nih chuan he thu hian chhunzawm ang che, “ _Ka Pa, ka hlauhna mit hi rinna mita thlak ka duh e. I chungah rinna nghah ka duh, nangmah aṭanga beiseina nei tur leh i tana thil ropui tak thawh thei turin. Hmathlir mumal tak neih ka duh a, I thiltum hriat ve ka duh. Isua hmingin ka dil a che. Amen_ .”  

He ṭawngṭaina hi i hlan thei a nih chuan, he mailah hian Rick@PastorRick.com min lo bia ang che. Isua nena inzin kawng atana thuziak pawimawh tak tak lo thawn che ka duh a ni.

(Lettu: peka)

Thursday, August 11, 2022

MIDANG TANPUIIN PATHIAN CHHUNGTE ZINGAH TEL RAWH

 Inlaichinna tha 

By Rick Warren

— August 11, 2022 



“Nangin khawvêla kei mi tîr ang khan, kei pawhin anni chu khawvêlah ka tirh hi.” [John 17:18] 

Isua Krista zuitu i nih chuan, Pathian chuan he khawvela i tih tur bik a tuksak che. Khawilai emaw a khawsa ve naw naw turin a din lo che; I mimal hlawkna um tur ngawr ngawr pawh i ni lo. 

Pathian aṭang chuan tih tur siamsak i ni. Pathian chhungte zinga i tel rual chiah chuan i nun a danglam nghal. Damchhan mumal tak i nei nghal a. I nun chu nangma thu hla a ni ta miah lo va, Pathian duh dan hlenchhuah chu a bulpui ber a ni ta daih. 

Pathian hnathawh pumpuiah chuan i chanvo bik chu rem taka inchuktuah a ni. Pathian chuan leilung pumpui a din a, a chhan chu chhungkua neih a duh a ni. Khawvel a mamawh lo. Thla leh arsi dang a mamawh lo. Arsi a mamawh lo. Chung zawng zawng a siam chhan chu, a mihring siam ṭhenkhatte chuan an duhthlanna ngeiin a chhungte an la ni dawn tih a hriat chian em vang a ni.   

Pathianin tih tur Isua hnena a pek kha tunah chuan kohhran hnenah a pe ve ta thung a. Isua i hriat rual rual chuan, i kal nghal a ngai! I ṭhiante leh chhungte chu i hrilhhriat a ngai. Chutah chuan i tawp mai thiang lo thung. Pathianin a chhandam duh loh mihring a la siam ngai miah lo va. Mitinte chu a hmangaih a – khawvel pumpuia mihringte chu. 

Pathian chuan a hnathawh chu khawi hmunah pawh nunpui turin a duh che: In chhungkuaah, khawtlangah leh khawvelah. I hnathawh tur chu khawvel pumpuiah leh in khawtualah a awm. Bible chuan hetiang hian a sawi: 

“Jakob-ho hnamte tundin nan leh

Israel-ho zinga humhimnate chu awmtir leh nana, ka chhiahhlawha i awm hi, thil te tak te a la ni, jentail te ti engtuah pawh ka ruat bawk ang che, kawlkil thlenga ka chhandamtuah i awm theihna turin." [Isaia 49: 6] 

Chu chu khawvel tana Pathian hmathlir a ni. Chu chu i tana rawngbawlna a ruatsak che chu a ni bawk. Khavel pumpuia mite chu amah hre turin a duh a. Chutianga a thlen theihna tur chuan nangmah kha a hmang duh che. 

Isaia lehkhabua Pathian Thute chu missionary leh pastor-te bika chah a ni lo. A chhungte zinga in tel ve a nih chuan a rawngbawlna hmachhawp chu i tan pawh pek a ni! 

Ngaihtuah zui atan. 

Pathian hnathawh hlen chhuak turin tuna i awm dan kha thlak danglam ngai a awm em? A nih chuan, i nunah chu chu engtin nge a lan chhuah ang? 

Pathianin khawvel huapa a hnathawhah chuan nangma khawtuala awm reng chung siin engtin nge i tel ve theih ang? 

Pathianin tih tur a pek che chu i ngaihtuah changin hlauhna emaw zam rukna emaw i nei tawh ngai em? Tunah khan ṭawngṭaina nei nghal ang che. Pathian chu a hna hlen chhuak tura i inbuatsaih lai khan huaisenna, hriat thiamna leh khawngaihna pe tur chein kar ang che.

*[Lettu: Peka]*

Wednesday, August 10, 2022

PATHIAN THU I AWIH THEIHNA TUR ṬHA BER HAN NGAIHTUAH CHHUAK TEH

 Inlaichinna Ṭha

— 10 Aug, 2022



“Thu ka pek apiang che u in tih chuan ka ṭhiante in ni ang.” Johana 15:14

Isuan Johana 15:14-ah, “Thu ka pek apiang che u in tih chuan ka ṭhiante in ni ang” a ti a ni.

Ramhuai nungchang ang maia i khawsak chuan Isu ka hmangaih che i ti thei lo vang. Mahni hmasial reng renga i khawsak chuan Kristian ka ni pawh i ti thei lo vang. Bible chang mahni duhlai chauh la a, a dang ngaihthah si i nih chuan Isua zuitu i inti thei lo vang. Isuan ka thu pek apiang che u in zawm chuan ka thiante in ni ang a ti.

Eng vangin nge Kristian ten Pathian thu an awih? Ringlomiten hei hi an hriat ṭhelh fo ṭhin. Ringlomite chuan, “Kristian nih ka duh lo, Pathian thu ka awih peih lo. Nangni ringtute chuan in hlauh tlawna, a thu in awih mai mai a ni. Kei chuan ka peih ve lo” an ti.

Eng vangin nge Pathian thu chu kan awihna chhan ni reng reng le? A chhan chu min hmangaihna vang a ni! Kan tana ṭha ber tur a ngaihtuah a. Mi tumah dang rengin min hmangaih ang ni lo vin min hmangaih a ni.

Bible chuan khawvelah hmangaihna a awmna chhan chu Pathian chu hmangaihna a nih vang a ni a ti. Pathian thu kan awihna chhan chu suala kan inhriat vang emaw, kan mawhphurhna a nih avang emaw kan hlauhtlawn emaw  vang a ni lo va. Hmangaihna avang zawkin a thu kan awih a - min lo hmangaih tawhna leh min chhandam tawhna avang zawkin.

High school naupang ka nih lai khan, mi pakhat hi ka hnenah lo kalin heti hian a sawi a, “I in khuahkhirh lutuk” min ti. Kei chuan, “eng nge i sawi awmzia?” ka ti a. Ani chuan, “Kristian i nih avangin engmah kan tih ang pawh zalen deuhin i ti ve thei lo” min ti.

A mitah ka  ena heti hian ka hrilh a, “Damdawi ka duh apiang ka ti thei. Zuk chi pawh ka zu thei. In chi pawh ka in vek thei. Party-na ah pawh ka duhna apiangah ka kal thei. Nula pawh ka duh zat zat ka mutpui thei. Mahse danglamna ka nei: Isuan ka duhzawng pawh a thlak danglam zo ta.”

Chung thilte chu ka tih duh tawh lohna a rei tawh a. Tunah pawh ka ti duh ta lo. Reilote atana nawmna leh thil lo thlawn mai a ni a, a zunah an uai thuai ṭhin. Zalen tak angin an lang a, mahse an daih rei lo. An zahawm lo va, an ral zawk a; lawmnaah ni lo vin, lungngaihnaah an tlak zawk ṭhin.

Isuan, “Pain mi hmangaih ang bawkin kei pawhin ka hmangaih che u hi; ka hmangaihin awm reng rawh u. Nangnin ka thupekte in zawm chuan ka hmangaihin in awm reng ang; keiin ka Pa thupekte ka zawm a, a hmangaihin ka awm reng ang bawk hian. Ka lawm nangmahnia a awm reng nan leh, in lawm a kim nan, heng thu hi in hnenah ka sawi hi.” (Johana 15:9-11)

Amah hlauh avang ringawta a thu awih turin Pathianin a duh lo che a. Hremna hmachhawn hlauh avanga ringawta a thu awih pawh a duh chuang lo. Hmangaihna avangin Pathianin a thu awih turin a duh che a ni. A hmangaihna chuan hlimna tak takah min hruai lut a ni.

Ngaihtuah zui atan

* Mi dang thu i awih khan (nu leh pa emaw, zirtirtu emaw leh i pu emaw pawh nise) hlauhna avang a ni em? Hmangaihna avangin engtik khan nge thu i awih? Khing pahnihah khian eng nge danglamna awm le?

* Pathian hmangaihnaa i ṭhan hian, i duhzawng engtin nge a tih danglam le?

* Hmangaihna avanga Pathian thu i awih khan i nunah lawmna engtin nge i lo tawnhriat tawh le?

*[Lettu: Sangpuia]*

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...