Tuesday, October 31, 2023

CHAKNA THAR PETU CHE THUDIK CHU

  _Pathianin Bahlahnate Dinchhuahlehnaa A Chantir Dan

By Rick Warren 

— Oct 31, 2023


“Tihborala ka awm lo hi Lalpa zahngaihna a lo ni, a lainatnate chu a kang ngaih loh avangin. A thar zel thin tuk tinin, i rinawmna a ropui e. Lalpa chu ka chanpual a ni, ka nunnain a ti a, chuvangin amah chu ka beisei ang.” Ṭah hla 3:22-24

Rilru lama thawpikna hi thil thar a ni lo. Bible-ah ngei pawh thil thar a ni lo. Ṭah hla hi han chhiar ve teh. 

Jeremian Ṭah hla a ziah khan, Jerusalem chu ralin an tukdawl a. Israel fate chu sala hruai an ni a. Hmun thianghlim ber berte pawh tihchhiat a ni.

Jeremia rilru chu a hah hle a, a lehkhabu pumpuiah hian, a rilru hahna leh a thawpiknate Pathian hnenah a puangchhuak a ni.

Chutiang hrehawmna karah chuan, Pathian lam a hawi leh a. Hetiang hian a ziak a ni, “Hei hi ka han hrechhuak leh ta a, chuvang chuan beiseina ka nei ta,” tiin. Tah hla 3:21

Hun harsa tak kara Jeremia beiseina chuan engnge a rawn ken le? Rang takin a chhang a:

 “Tihborala ka awm lo hi Lalpa zahngaihna a lo ni, a lainatnate chu a kang ngaih loh avangin. A thar zel thin tuk tinin, i rinawmna a ropui e. Lalpa chu ka chanpual a ni, ka nunnain a ti a, chuvangin amah chu ka beisei ang.” Tah hla 3:22-24

Jeremia chuan a nun beidawnna ata chakna a neih leh theih nan Pathian chungchanga thudik panga lam a hawi leh a ni. Hengte hi a hrereng a:

* Pathian *Hmangaihna tawp lo*

* Pathian *Zahngaihna kang ngai lo*  

* Pathian *Rinawmna ropui*

* Pathian *Ngilneihna chuai ngai lo*

* Pathian *Beiseina tak tak*

I nunah buaina a lo thlen pawhin, i harsatna ngawt en suh. Indawm kun suh. Pathianah chuan i rilru pe zawk rawh.

Mi thenkhat chu an rilru a hrehawmin chocolate emaw thil dang eng emaw a inhrai puar an tum thin. Mahse chungte chuan thlamuanna a pe lo che.


A chunga kan sawi pangate khi ngaihtuah zawk la. I rilru a chauh pawhin Pathian lamah thudik ngaihtuahnaah chuan a hruai thei ang che. Chung chuan chakna thar a pe che ang a. Rilru zangkhai leh thawveng takin hun i hmang thei zawk ang.   

Chung thil pangaahte chuan i rilru nghat la, i hma lamah eng ang harsatna pawh lo tawk la, i tho leh  thei ang.

Ngaihtuah zui atan

* Jeremia anga harsatna - tunlaia mi tam takin an tawh hi - an khawpui tihchhiatsak leh ramdanga raltlan ngai ang hi - lo tawk ve ta la engtin nge i hmachhawn i rin?

* I rilru a lo chauhin - a chunga kan sawi eng thudik ber khian nge vawiin hian i nunah thu a sawi le? Engvang nge?

* I nunah harsatna a lo thleng leh a nih pawhin, Pathian chu tunge a nih tih i hriatrengna tur thil eng te nge le?

*[Lettu: Sangpuia]*

Monday, October 30, 2023

I RILRU A HAH LAIA PATHIAN TUAM DAMNA

 _Pathianin Bahlahnate Dinchhuahlehnaa A Chantir Dan_

- Rick Warren 

- Oct 30, 2023


_"Ani chuan hlobet hring dup hmunahte mi bawhtîr ṭhîn a."_ (Sam 23:2)


I rilru a lo chauh hunin engnge i tih ang?


Zawlnei Eliza chu a rilru a chauh laiin heng thil pathumte hi a intuaithar nan Pathianin ti turin a ti a, nangpawh i beiseina a lo chuai hunin intuaithar turin a pui ve thei che a ni.


*1. I taksa chawlhhahdamtir rawh:*

Khawvela Sam lar ber chuan, _"Ani chuan hlobet hring dup hmunahte mi bawhtîr ṭhîn a."_ (Sam23:2) a ti a. A chang chuan i chawlh hahdam duh ṭhin loh avangin Pathianin a chawlhtir che a ngai ṭhin a. I taksa a chauh chuan rilru leh thlarauvah i chak thei lo a ni.


Chu chiah chu Eliza chunga thleng kha a ni reng a. Pathian chuan Eliza chu a hau lo. Pathianin, "In sangmar rawh. Mahni i inkhawngaih mai mai a nih kha" a ti miah lo. Eliza chu a mutthilhtir zawk a ni. Bible chuan, _"Hnimbuk hnuaiah chuan a mu a a lo muhil ta a ni"_ tiin Eliza chungchang a sawi (1 Lalte 19:5).


A chang chuan i rilru a lo chauh der huna thlarau taka i awm theih dan ṭha ber chu mut hahdam a ni.


*2. I beidawnna te chhuahtir rawh:*

I awmdan te i lanchhuahtir hi damna bulṭanna a ni. I Lalte 19:10-ah chuan Pathian hnenah Eliza'n heti hian a sawi, _"LALPA, Sipaihote Pathian tân ṭhahnem ka ngai êm êm ṭhîn a; Israel faten i thuthlung an hawisan a, i maichâmte an tichhia a, i zâwlneite chu khandaihin an that a. Kei chauh hi ka awm tawh a; ka nunna lâk tumin min zawng a nih hi."_ tiin.


Eliza chuan engmah thup a nei lo. A awmdan te a zep hran lo. A beidawnna te Pathian hnenah a thlen zawk a ni.


Helai thu hi hriat hmaih miah loh tur a ni: I vuivaina te Pathian hnena i thlen hian mak A lo ti hran lo; sawi tur reng hre lova i awm thlengin a nghak ang che. Sawi chhuak vek rawh. A hnena i thlen apiang chu Pathian chuan a lo hmachhawn thei vek a ni.


*3. Pathian hre rengin ngaihtuah nawn fo rawh:*

I rilru a lo chauh hun leh chakna reng reng i neih tawh loh hunah, Pathian thusawi leh a nihna te hre reng ang che. Chutiang i tih chuan i harsatna en tawh lovin Isua lam i en thei tawh ang. Pathian thiltihtheihna te, a awmpuina te leh a zia te i lo hre thar leh ang. I harsatna aiin Pathian i hmuh len zawk fo a ngai a ni. 


I Lalte 19:11-13 i chhiar chuan Pathianin a thiltihtheihna Eliza hnena a tak ngeia a hmuhtir thu i hmu ang. Tunge thiltithei tih Pathianin a hmuhtir a ni. Chakna reng reng i neih loh ṭhin chhan ber chu Pathian hmakhalh a engkim nangmah a tih i tum vang a ni. Pathian lam chauh i thlir chuan, thiltithei zawk a nihzia i hmu anga - i thiltitheihna lo hman ve phet i tum tawh lovang.


Chakna reng reng i neih loh hun leh i rilru a lo chauh hun pawhin Pathian chuan a theihnghilh lo che. Eliza chunga a tih ang bawk khan pui tur che in a inpeih reng zawk a ni.


Ngaihtuah zui atan.


I rilru a chauh em em hun lai kha thlir let la, engtinnge i lo paltlang tawh le?


Rilru hahna i tawn maiin engvangin nge hahchawlh a harsat em em?


I rilru a hah em em lai khan Pathian hnenah i rilru i bun ruah kha a tawk mai lo. Midangte hnenah pawh i inbun ruah a ṭul. Tu hnenah nge ngam taka i inbun ruah ang le, tunge i rin ang?


[Lettu: Mapuia Fanai]

Sunday, October 29, 2023

HARSATNA I HMACHHAWN HUNIN PATHIAN THUTIAMAH INNGHAT TLAT RAWH

 _Pathianin Bahlahnate Dinchhuahlehnaa A Chantir Dan_

-  Rick Warren 

- Oct 29, 2023



_"Pathianin Israel chhungte chunga a thutiam zawng zawngte kha pakhat mah a thlawn lo, a sawi ang apiang kha a thleng vek a ni."_ (Joshua 21:45)


Hmasawn thei lova kan hnung tawlh chang ni hian thil awksam taka keh chhe mai theiah te kan rilru dah a awl fo ṭhin. Kan _account_ -a kan sum neih zatte kan en a. Kan bul vela mite kan en kual a. Kan thil vawnah te kan rilru kan dah ṭhin.


Mahse Pathian chuan thil engkim a keh chhe vek ni a a lan lai pawhin a thutiam chu innghahnatlak a la ni reng a ni tih hre reng turin min duh.


Bible-ah chuan heti hian kan hmu,  _"Pathianin Israel chhungte chunga a thutiam zawng zawngte kha pakhat mah a thlawn lo, a sawi ang apiang kha a thleng vek a ni."_ (Joshua 21:45)


Engmah rintlak awm tawh lo ni a a lan hunah pawh Pathian thutiam chu a la rintlak fan.


Hetiang chiah hian thlipuiin an lawng a nuai lai khan Paulan a chuanpuite a hrilh thu Tirhkohte Thiltih bung 27-ah kan hmu. Beiseina reng an nei tawh lovin an boral mai dawn niin an inhre tawh. Mahse Pathianin Paula hnenah an him tur thu a hrilh. Paula chuan Pathianah a rinna a nghat tlat a, a ṭhiante hnenah heti hian a sawi a: _"Chuvangin pute u, thlamuang takin awm rawh u; Pathian ka ring e, mi hrilh ang zelin a awm dawn."_ (TT 27:25)


Paula khan lawngah emaw lawng khalhtuah emaw khan a rinna a nghat miah lo. Pathianah a rinna a nghat tlat.


An lawng khan rei tak a daih dawn lo. Chu chu Paulan a hrechiang hle. Mahse Pathian thutiam chuan a daih rei dawn tih a hria.


Chhanchhuahna lawngleng dawrawm takah i rinna i nghat dawn em?


I chhanchhuahna lawng chu i theihna kha a ni mai thei. I ṭawngkam thiamna leh theihna te avangin i paltlang thei mai turah i inngai a ni mai thei.


I hmel ṭhatna pawh a ni mai thei. Chu chu i hlawhtlinna thurûk pawh a lo ni reng thei. Harsatna i tawh hunin i hmelṭhatnaah i innghat thei niin i hre mai thei.


I sum leh pai pawh i chhanchhuahna lawng chu a  ni thei. Harsatna engpawh tawk la sum hmangin i inkhul chhuak thei turah i inngai a ni mai thei.


Mahse chung i chhanchhuahna lawngleng dawrawm tak takte chu engtik niah emaw an la ral vek dawn. Harsatna thlipui tleh kara inhumhimna hmun awm chhun chu Pathian duh danah a ni.


Paula kha zawt mai rawh.


Tirhkohte Thiltih bung 27 kha hnehna ropui tak nen a tawp. _"Chutiang chuan an zain khawmualah him takin an kai ta vek a."_ (TT 27:44) 


Paula leh a ṭhiante chungah Pathian thutiam a takin a rawn thleng - an zanin an him vek. I tan pawh Pathian thutiam a la rawn thleng dik ang.


Thlipui tleh laia Pathian thutiam rin dan i zir chuan engkim a lo thleng dik vek ang. Tin, nangmah chauh kha ṭanpuina dawngtu i ni lo ang.


Pathianin kawngtluanin a hruai zel ang che.


Ngaihtuah zui atan.


Hun khirh leh harsa karah Pathian thutiam eng ber nge i tana hlu zual?


Eng "chhanchhuahna lawngleng dawrawm" ah nge i lo innghah ṭhin? Chungte chuan engnge an hruai thlen ṭhin che. 


Hun harsa i tawh huna i hman nghal vat theih turin Pathian thutiam pakhat tal vawng rawh. Ziak la, i chhiar fo theihna tur hmunah tar rawh.


[Lettu: Mapuia Fanai]

Saturday, October 28, 2023

PATHIAN AWMNA: ENG THLIPUI KARAH PAWH I TAN THIRCHAKAI NGHET

 _Pathianin Bahlahnate Dinchhuahlehnaa A chantir Dan_

- Rick Warren

Oct 28, 2023



“A ni, thihna hlim kawr ruam zawh mah ila, thil ṭha lo rêng rêng ka hlau lo vang; nang ka hnênah i awm si a; i talhtum leh i tiangin mi thlamuan ṭhîn a ni.” ‭‭Sam ‭23‬:‭4‬


Tumah hi bahlahna nei lo kan awm lova. Kan vai hian thlipui hi kan tawk leh zauh zauh thin a ni.


A pawimawh ber chu engtin nge kan lo chhanlet tih hi a ni. Bahlahna lai i neih hian, a dawtah eng nge lo thleng? I bahlahna chuan a hneh che em? Tih leh hram tum lovin i bansan em?


Kan fimkhur loh chuan kan bahlahna hian kan tana tangkai lo thutlukna min siamtir thei:


• *Kan tum atangin kan bo thei.* Kan rilruah aw te reuhte "Engnge tum hram hram hi a tulna?" tih kan hria a. Tichuan Pathianin min kohna chu kan um hram hram ta lo thin a ni.


• *Kan ngaihhlut kan hnawl.* A chang chuan, na taka an awm hnuah kan ngaihhlut thilte a inthlak a, kan tana pawimawhte kan thlah ta thung thin.


• *Kan hmalam hun atana lungngaihna.* Kan chhe vek tih kan inhria a, engkim a tawp vek a ni mai.


Kum 40 chuang pastor ka nih angin, mite hian heng kawng thum zinga pakhatah hian harsatna an hmachhawn thin a. Rinna fiahna dik tak chu fak hla sak laia i zuan san zawngah ni lovin, thihna hlimkawr ruam i zawh lai pawha i kal ngil danah khan a ni zawk.


Thlipuiah chuan thirchakai tha neih loh chuan len kual mai mai nihna a ni a. Thirchakai pakhat chauh kan mamawh a ni.


Bible a thu mawi tak mai pakhat chu, “A ni, thihna hlim kawr ruam zawh mah ila, thil ṭha lo rêng rêng ka hlau lo vang; nang ka hnênah i awm si a; i talhtum leh i tiangin mi thlamuan ṭhîn a ni.” Sam ‭23‬:‭4‬ ‭


Eng dinhmunah pawh Pathian hi thirchakai tha ber a ni zel a ni.


Beidawngin i awm a nih pawhin, Pathian chuan a kalsan lo che tih hre reng la. I tan thirchakai nghet tak ni turin lo thlang ang che.


I ruam zawh chu eng anga thim pawh ni se, hemi hun aia hnai hian Pathian ila hnaih ngai lovang. Mite hi an bahlah laiin chu thu chu ka hrilh thin, "A awm tih pawh hi ka hre thei lo" pawh an ti fo mai.


Mahse engtin nge i hriat tih kha a pawimawh lo. Bible chuan i ruam zawhlai thim berah pawh khan Pathian chu a awm zel a ti a. Chu chu a tak a ni- i awih emaw awih lo emaw pawh ni se.


Bible chuan, “Thihna te, nunna te, vantirhkohte, lalna te, thil awmsa te, thil lo la awm turte, thiltihtheihnate, sanna te, thukna te, thilsiam dang reng rengte pawhin kan Lalpa Isua Kristaa awm Pathian hmangaihna ata chu min then thei lovang tih dik takin ka hre si a" (Rom 8:38-39) a ti.


Eng thil pawh paltlang mah la, Pathian leh a hmangaihna che chu i tan a awm reng a ni. 


Chu thutak chuan eng thlipuiah pawh nghehna pek a tiam a ni.


Ngaihtuah zui atan...


Eng bahlahnain nge Pathian rinhlelhtir che?


Bahlahnain thuthlukna tangkai lo min siamtir thei tih kha enlet ta la. Engnge i tawn ve tawh le? Chu chuan engtin nge a nghawng che?


Engtin nge i bahlahnaah pawh Pathian a awm tih i hriatna khan harsatna paltlang turin a puih che?


(Lettu : Msa)

Friday, October 27, 2023

PATHIAN THILTUM CHU MIHRING BAHHLAHNATE CHUAN A TIBUAI THEI LO*

 Pathianin Bahlahnate Dinchhuahlehnaa A Chantir Dan

By Rick Warren

— Oct 27, 2023


“Paula, hlau suh, Kaisara hmaah i ding tûr a ni. Ngai teh, lawnga i zinpuite zawng zawng kha nangmah avângin Pathianin a hum dâwn a ni,’ mi rawn ti a.” [Tirhkohte 27:24]


I chet bahlahna eng emaw zatte chu nangmah thiltih emaw duhthlanna emaw hrin chhuah an ni. Thil i tisual a. I thiltih chuan tute emaw a lo tina hial a. Pathian thu i awih lo a ni. Tichuan, tunah chuan chuvang chuan thlipuiin a nuai ta hial che a ni.  

 

Mahse kan nuna thlipui kan hmachhawn eng emaw zatte chu kan thiltih eng emaw vang an ni lo. Kan tuar chhan zawk chu tute emaw thutlukna dik lo emaw – an sualna vang emaw a ni daih ang.  


Tirhkohte 27 ah hian tute emaw thutlukna dik lo siam avanga bahlahna thleng chanchin kan hmu a. Paula chu dik lo takin a thiltih sual ni lovah rorelsak a ni. Rom mi a ni a, chuvang chuan Kaisara hnenah thihna khawp thuah chuan a zualko leh thei a ni. 


Mi tang phurhna lawngin Rom khawpui a pan lai khan Paula chuan chhiatna an pan mek a ni tih a hrilh a. Mahse tuman an ngaihthlaksak lo, rei loteah thlipui rapthlak takin a nuai zui ta a nih kha. 


Amaherawhchu, chu thlipui chuan Paula nuna a thiltum chu a chhem bo ve tihna erawh a ni kher lo – chutiang chiah chuan thlipui chuan i nuna Pathian thiltum chu a chhem bo ve ang tihna a ni lo. 


I nuna Pathian thiltum chu bahlahna leh buaina i paltlang zawng zawng aia ropui zawk a ni. Tirhkohte 27: 24 ah chuan Paula hnenah chu chu angel-ten an lo hriattir a ni: “Paula, hlau suh, Kaisara hmaah i ding tûr a ni. Ngai teh, lawnga i zinpuite zawng zawng kha nangmah avângin Pathianin a hum dâwn a ni,’ mi rawn ti a,” tiin. [Tirhkohte 27:24]


Angel-te chuan Paula hnenah, an bahlahnate nen pawh, engtik niah emaw chuan Kaisara hnenah a chanchin sawi thei turin a awmpui tih a hriattir a ni. Pathian thiltum chu tih sukuk a ni ngai lo vang. 


Pathian chuan i nun tan ruahmanna dang a mamawh lo. Buaina i hmachhawn changin – i tih dik loh emaw midang tihdik loh emaw pawh ni se – Pathian chu nangmah kaltlangin a thawk thei lo tihna a ni ngawt lo. Chhiatnain a chim che a nih pawhin Pathian thil tumah chuan rem takin a inzep mai thei ang. 


Tute emaw thutlukna chuan i nun a kuai her lawp a nih pawhin Pathian chuan ama ropuina turin a hmang mai ang. 


Tute emaw thil tihsualin buaina a thlen che a nih chuan chu hmunah chuan Pathian chu hna a thawk tho vang. 


Thil engkim i hloh nia i inngaih changin, Pathian chu mak taka chein thiltih theih loh tur chu a tihsak ang che. 


Pathian thiltum chu i tisukuk thei lo. Mi tumahin an thei lo. 


Ngaihtuah zui atan. 


Tuten emaw i nunphung an tihbahlahsak che avanga buaina i lo hmachhawn tawh eng nge awm?  


Buaina thlipui karah i nuna Pathianin a thiltum tihlawhtling tura hna a thawh dan i lo tawng tawh em?


Eng vangin nge Pathianin hun harsa ah hna a thawh dan chu hmuh mai a harsat tlat fo? 


[ *Lettu* : Peka]

Thursday, October 26, 2023

ENG VANGIN NGE HUN HARSAAH MIDANGTE I MAMAWH

 Pathianin Bahlahnate Dinchhuahlehnaa A Chantir Dan

By Rick Warren

— Oct 26, 2023


“Chu chu in mi ṭawngṭaisakna avâng leh Isua Krista Thlarau mi pêk avângin, ka chhandamna a lo ni dâwn tih ka hre si a.” [Philippi 1:19]


Kan nunah eng emaw a bahlah changin kan lo dawnsawn dan chu a tha tawk lo hle zel: Ka inthiarfihlim duh, keimahni leh keimahnia awm kan duh a, midangte nawr kian kan tum fo. 


Mahse chu chu kan tih miah lo tur thil a ni. 


Thil bahlah eng emawin i rinna a tihchak loh changin, midang i tana Pathian rinchhantu i mamawh. Kohhran chhungkua i thachhangdawltu i mamawh. 


Joba’n a chhungkua, a thil neih leh a hriselna a hloh lai khan, chhiatna nasa tak a ni ngei ang – mi zawng zawng tan a ni ngei ang. 


Mahse he thu hi Joba ṭhian pakhatin a hrilh chu a ni: “Hausak châknain hruai bo che suh se, Thamna tam tak avângin bumin awm suh … A thiltih ropui tak hi hre reng la, Miten fakna hlain an chawimawi ṭhîn a ni. [Joba 36: 18. 24] 


Chu chu thurawn ropui tak a ni. Hun harsa i paltlang chang chuan, thinrim mai suh. I ṭawngṭaipui theih tur, Pathian i pawlpui theih tur leh nangmah ṭanpui thei tur mi nen chuan awm dun ang che u. 


Chutiang ṭanpuina chu engtin nge i hmuh theih ang? 


Pakhatna, tualchhung kohhran eng emawah chuan Pathian chibai buknaah tel ve rawh. Midangte nena chibai buknaah chuan i bahlahna laia thlirna tharin i thlir ang. 


Pahnihna, ṭhianzaho inpawl khawmna leh Bible zirhonaah tel rawh. Kohhran eng emawzatte chu mimal inlaichinna nei tur chuan an inkhawm pangngai ngawt chu a lian mah mah fo. Mi 10 emaw 12 vel lek Bible zirna hmunah tel ve rawh, chutiang hmunah chuan i harsatnate i sawi chhuak thei ang a, in ṭawngṭaiho thei bawk ang. 


I nun siamṭhat dan kawng chu i hmu lo mai thei. Pathian mi nangmah buatsaihtu leh Pathian en ngar ngar tura puitu i mamawh. 


I nun siamthar lehna tura rahbi pawimawh tak chu mite nena inpawlhona chu a ni ang. Paula zawt mai rawh. Rom tan ina a tan lai khan Paula chuan ringtu dangten an ṭanpui dan hetiang hian a ziak: “Chu chu in mi ṭawngṭaisakna avâng leh Isua Krista Thlarau mi pêk avângin, ka chhandamna a lo ni dâwn tih ka hre si a.” [Philippi 1:19]


Pathian mite ṭawngṭaisakna leh ṭanpuina nen chuan i tlukna chu rei lote atan mai a ni ang. I hun ṭawngṭaina ber chu i hmaah a inhung mek e.   


Ngaihtuah zui atan. 


Hun harsa kan hmachhawn a nih chuan i hnungtawlh nge midang bulah i tlanchhia? Chutiang lam hawia i kal chhan chu engvang nge? 


Ringtu dangte ṭanpuina chu i hnungtawlhna hmunah chuan engtiangin nge i hlawkpui? 


Hun harsatna hmunah chuan engtin nge i nuna Isua zuitute chu anmahni nghenga i awm theih ang? 


[ *Lettu* : Peka]

Wednesday, October 25, 2023

I LO HNUNGTAWLH ANIH PAWHIN, HMALAM THLIR TLAT RAWH

 _Pathianin Bahlahnate Dinchhuahlehnaa A Chantir Dan_

By Rick Warren 

— Oct 25, 2023


“Ka nu pum ata saruakin ka lo chhuak a, saruak vekin ka kir leh dawn a nih hi; Lalpan a pe a, Lalpan a la leh ta a; Lalpa hming chu fakin awm rawh se.” Joba 1:21

I lo hnungtawlh palh a nih pawhin, Pathian hnenah i chetchhiatna, i lungngai a ni emaw, i rilru a hrehawm a nih pawhin hrilh a tha e. I rilru a awm zawng zawng chu Pathian hrilh vek zawk tur a ni. 

Hrehawm ti takin awm ringawt suh.

Hrehawm taka awmna chuan harsatna i tawh pawha Pathian rinlohna lam a hawi a ni. Turin i nunna i eichhiattir mek ang a ni.

Joba chuan harsatna zawng zawng a tuar a. A chhungkua te, vanneihna te leh hriselna zawng zawng a chan vek a ni. Hrehawm ti taka a tuarnaah pawh, beiseinain hmalam a thlir tlat a. A nuna thil zawng zawng chu tlachhe vek angin lang mahse Pathianin thil engkim a thunun tih a vawng tlat a ni. 

Joba chuan, “Ka nu pum ata saruakin ka lo chhuak a, saruak vekin ka kir leh dawn a nih hi; Lalpan a pe a, Lalpan a la leh ta a; Lalpa hming chu fakin awm rawh se,” a ti a ni. Joba 1:21

Ka fate pathum an pianlaiin ka awm lai a ni vek a. Engmah an lo luhpui lo. Naupang lawm thil emaw, thawmhnaw emaw, cell phone emaw pawh an nei lo. Chutiang bawkin mitthi ka vuinaah tumahin an thil neihte thlanmualah an keng hlawm lo tih hi ka hre ve tawk thawkhat a ni. 

Engmah i luhpui lo va. Engmah i chhuahpui bawk hek lo.

I nunah thil tam tak a inthlak danglam ang. I rinna pawh fiah a ni ang. Joba angin nun duhawm ber chu pek i ni lo maithei. I lo hnungtawlh a nih pawhin vawilehkhatah i hrethiam lo maithei. Engpawh ni se Pathianah innghat phawt mai rawh.    

Enganga hnungtawlhna pawh lo tawk la, hei hi ring rawh …

* Pathianin a hmangaih reng che.

* Pathianin i nunah thil ruahman a nei.

* Pathianin i nun engkim hi a ngaihsak che.

* Thil hriatthiamloh i neih pawhin Pathianin thil a thunun tlat.

* Pathianin a veng ang che.

I lo hnungtawlh a nih pawhin, khing thudik panga te khian i hmalam nun chu a siam chho zel ang. Engkim lo tlachhia pawh ni se, khing qhmang khian i nun i sawhnghet thei ang.

Chutianga i hmalam i thlir tlat chuan hrehawm takin i awm rei lo vang.

Ngaihtuah zui atan

* I lo hnungtawlhin engtin nge hrehawmna i paltlang?

* I hnungtawlhna i hriatthiam dan hian engtin nge hmalam thlirna duhawm tak a pek che?

* Tunkar chhung hian tu hnenah nge devotional message hi i thehdarh theih ang?

*Vawiinah hian Isua i zui dawn em?*

Pathianin a thatna chu Fapa, Isua Krista kaltlangin a tilang tawh a. Bible chuan, “Pathianin khawvel a hmangaih em em a: Chutichuan a Fapa mal neihchhun a pe a, amah chu tupawh a ring apiang an boral lohva chatuana nunna an neih zawkna turin” a ti. Johana 3:16

Chatuana in nun theih nana Pathian thutiam chu ring turin i inpeih em? I inpeih a nih chuan, hetiang hian tawngtai rawh: “Ka sualnate ka puang a, ka Lalpa leh Chhandamtu atan Isua hi ka pawm e. I hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*

Tuesday, October 24, 2023

RILRU DIK TAK I PUT CHUAN PATHIANIN A CHINFELSAK THEI CHE

  _Pathianin Bahlahnate Dinchhuahlehnaa A Chantir Dan_

By Rick Warren 

— Oct 24, 2023


“Tho la, zanah ven tantirhan au chhuak rawh, I thinlung chu tui angin leih chhuak ang che Lalpa hmaan.”Tah Hla 2:19

I lo hnungtawlh a. I hna i hloh a. In inlaichinna a tawp a. Kawng dangah hlawhchhamna i nei leh bawk.

Eng nge i tih tak ang? Chu thil tha lo chu i pawm mai dawn em ni? Pathianin hria sela i duhte i hrilh em? 

Hrilh lo. A hmasa ber atana i tih tur chu i rilru Pathian hrilh la - i rilru hahna chu bunruak rawh. Pathian chu i rilru dik tak i hrilh chuan, chu chu Pathian biak dan a ni.

Hemi chungchangah hi chuan Joba hi entawn tlak a ni. Joban engkim a hloh va - chhungkua, ran rual, chenna leh sum leh pai. Bible-in Joba chhanlet dan chu mawihnai takin tarlan a tum lem lo: “Joba chu a tho va, a puan a pawt thler a, a lu a ziat kawlh a, leiah a tlu a, Pathian a bia a.” Joba 1:20

Joban khatih hunlaia Middle East-ho lusun danin a puan a pawthler a, a lu a ziatkawlh a. Chuti chung pawh chuan Pathian a bia a ni.

Engtik hunah pawh lusunna tawk la, rilru lamah i hmachhawn tur chu:

* Thinrimna: _Engvangin nge ka chungah a thlen?_

* Lungngaihna: _Engnge ka hloh hi?_

* Barakhaihna: _Eng thil nge lo thleng mek hi?_

* Hlauhna: _Hemi dawtah hian eng nge lo thleng leh ang?_

I lo hnungtawlh a nih pawhin, i rilrua awm zawng zawng chu i sawichhuah a ngai a ni. Pathianin a chinfelsak thei che _amah chu pe theitu che a nih avangin_.

Dik tak chuan, rilru natna i neihna chhan pawh Pathian anpuia siam i nih vang a ni. Rilru na thei Pathian a ni a; rilru puthmang a nei ve thin. I thinrimna, i lungngaihna, i barakhaihna leh i hlauhnate a chinfelsak thei che a ni.

Joba chuan tlang takin Pathian hnenah a sawi, nangpawhin i ti thei. Joba chuan, “Ka kam ka sum lo vang; thinlung lunghnurin ka sawi dawn e; rilru na ngawih ngawihin ka phunnawi dawn e,” a ti. Joba 7:11

Hnungtawlh palh pawha kan chhanlet dan tur tha ber chu a der ni lo va chhan let hi a ni. Pathianin a dera thil sawi a duh lo.

Bible-a hnungtawlhna nasa tak pakhat chu, Jerusalem suam, tihchhiat leh Israel mite tam tak thah an nih baka, sala man an nih thu kha a ni. Zawlnei Jeremia chuan heti hian a ziak a: “Tho la, zanah ven tantirhan au chhuak rawh, I thinlung chu tui angin leih chhuak ang che Lalpa hmaan,” a ti a ni. Tah Hla 2:19 

Pathian hmaah chuan rilru dik tak put hi a tha ber a ni.

Ngaihtuah zui atan

* Pathian hnenah i rilru dik tak sawichhiah hrehawm i ti thin em? Engnge a chhan?

*  I rilru dikna avang chuan Pathian hnaih phah sawt chang i nei tawh em?

* Lusunna a taka lanchhuahtir harsat chang a awm em? Vawiinah hian i rilru dik tak chu Pathian hnenah i hriattir theihna turin engtin nge hma i lak ang?

*[Lettu: Sangpuia]*

Monday, October 23, 2023

THUAWIHNA PHENA PATHIAN RUAHMANNA ṬHA BER HMUH DAN

 _Pathianin Bahlahnate Dinchhuahlehnaa A Chantir Dan_

-  Rick Warren 

- Oct 23, 2023


_"Tin, Simonan a hnenah, 'Zirtirtu, rim takin zankhuain kan bei a, engmah kan man lo va, nimahsela i thuin lente ka deng leh ang e,' a ti a, a chhang a."_ (Luka 5:5)


Tute pawh hian kan hnathawhnaah hnung tawlhna/mutanna kan nei ṭheuh. Mahse chung hnungtawlhna ata hmalam pan leh dan awlsam ber chu hei hi a ni: Pathian thuawih.


He thu hi han ngaihtuah teh: Pathianin i tana thil âtthlak leh mawl tak ni a lang ti turin a ti che a. Sum leh paiah, inlaichinnaah, leh rilru sukthlekah hlawkna engmah a awm lo a. Chu mai ni lovin thih hlauh takin i hlau a ni.


Mahse Pathianin ti turin a ti tlat che a. Pathian thu i awih dawn nge i duh ang angin i kal dawn, i kutah thutlukna a awm.


Tun ni hnih-thum liam taah khan Bible-a mi hlawhchham/hnung tawlhte chanchin kan zir a. Luka bung 5-naah chuan Simon Petera khan zankhuain len a deng a, mahse a hlawhchham thu kan hmu. Kum zabi pakhatna hun laia sangha mantute tan chuan hlawhchhamna lian tak a ni ngei ang.


Mahse Isua a lokala Simon Petera lawng kha thusawi nan a rawn hmang ta a. Isuan a hnenah, _"Li thuk lam pan la, sangha man turin in lente deng rawh,"_ tiin a sawi a (Luka 5:4).


Isuan Simon Petera hnenah tihtur a hrilh a- Simon Petera khan Isua thu awih turin thutlukna a siam a ngai.


Isua thupek kha thil âtthlak tak anga lang a ni. A lan danah chuan awmzia awm lo ang hial a ni. Zankhuaa len an den hnu pawhin an man lo a nia! Anih leh engvangin nge Isua khan Petera hnenah len deng tura, li thûk lam pan turin a tih? Li thûk lamah hian a ni sangha tam zawk awm ṭhin. Chutih rual chuan li thûk lama len den chu a hlauhthawn awm berna lai a ni bawk.


Tihchhin tawpna tel lo chuan rinna a awm thei lo.


Tichuan Petera chuan Isua thuawih a thlang a, _"Zirtirtu, rim takin zankhuain kan bei a, engmah kan man lo va, nimahsela i thuin lente ka deng leh ang e"_ tiin a chhang anih kha (Luka 5:5).


Isuan ti tura a tih angin Peteran a ti a. Ngaihdan ṭha tak leh pawmawm tak anih avanga ti a nio. Pathianin ti tura a tih avanga ti a ni. A hnial reng reng lo a, a hreh hek lo.


A thuawihna avangin chuan Pathianin Petera leh a ṭhianta kha an rin leh beisei phak loh hlawhtlinna a pe ta a ni. Bible chuan an lenah sangha a tam lutuk avangin lente a thler a, an ṭhiante pui tura an auh a ṭul hial thu a sawi a ni.


Mahse chung zawng zawng chu Peteran Isua thu a awih hnua thleng a ni- a thu zawm khan thil awihawm loh lutuk ni mahse.


I tih ngai miah loh ti turin Pathianin engnge a pek che? Thil tih theih loh ang hial a ni em? Sum leh paiah tlem tal hlawkna a awm dawn em? Li thûk lam pan turin a ti che em? Eng anga âtthlak hmel pawh nise a pawi miah lo. Pathianin huai taka tichhin ngam tur leh a thu zawm turin a duh che a ni.


Duhthlanna chu i kutah a awm: a him nuam lai, a pawn laiah i awm veng veng thei, li thûk lam, sangha tamna lamah i kal thei bawk. Pathian thu i awih chuan chuan a dang zawng chu aman a ngaihtuah ang. Thuawihna phenah i tana ṭha ber tur chu a awm a ni.


A thu i awih dawn em?


Ngaihtuah zui atan.


Harsatna, hnung lama tawlh letna tur khawp i tawn laia Pathianin thil har tak paltlang tura a tih chein Pathian thu awih a awl i ti nge harsa i ti?


Harsatna i tawh laiin engvangin nge Pathianin huai taka ke pen tura a tih che ni a i rin?


A thu awih tura i beih fan fan ngai turin Pathianin engnge ti tura a tih che? Vawiin hian thuawihna kawng zawh turin engnge tih theih i neih?


[Lettu: Mapuia Fanai]

Sunday, October 22, 2023

I HNA CHHUNZAWM NGAIHNA HRE LOVIN I AWM EM? I LAWNGAH ISUA CHUANTIR VE RAWH

 _Pathianin Bahlahnate Dinchhuahlehnaa A Chantir Dan_

- Rick Warren 

- Oct 22, 2023


_"Tin, in tih apiang chu thusawiah emaw, thil tihah emaw ama zarah Pa Pathian hnena lawmthu hril chungin Lalpa Isua hmingin ti vek rawh u."_ (Kolossa 3:17)

Pathianin i hnathawh mal a sawm lohna chhan mak tiin i zawt ṭhin em?

I hnathawhah hlawhtlinna hmu turin engvangin nge i beih ṭhin tih i hre tawh em?

A chhanna chu a ho viau mai thei. I hnathawha telpui tur chein Pathian i lo la sawm ngai miah lo a ni thei.

Luka bung 5-ah chuan Petera leh a ṭhiante khan zankhuaa sangha pakhat pawh an man loh hnuin an lente an lo tifai a ni tih kan hmu a. Tichuan an lawng pakhatah Isua a lo chuang kai a ni tih kan hmu. Hun eng emaw chhung chu lawng aṭang chuan Isuan mipuite a zirtir a - tichuan Petera chu len deng turin a ti ta a. 

Petera kha hreh tak chungin Isua thupek ang chuan a ti ta a, a bak zawng chu Pathianin a thawh chhunzawm ta a ni.

Sangha pakhat mah an man loh lai leh sangha tam tak, an lawngin a dawl zawh loh tur hial an man hun inkar kha eng ang chiahin nge a inhlat?

Dil ngaiah tho a ni a, lawng ngai reng a ni a, an lente pawh a ngai reng, sangha mantute pawh anmahni tho an ni a, sangha pawh dil danga mi an ni lo. Len ruak leh len sanghaa khat inan lohna chu lawnga Isua a tel ve kha a ni.

Isua kha danglamna thlentu a ni. Anmahniin len an deng tawh lo - an lawngah Isua a tel ve a ni.

Engnge i lawng chu? I eizawnna atana i hnathawh kha a ni?

I hnaah Pathian malsawmna i duh chuan inhnaah tel ve turin Pathian i sawm a ngai.

Hei hi chhandamna nen a inang lo. Mi tam tak, an nuna Isua neitu ni si, mahse an hnaa Isua tel ve si lo ka hre nual mai. I lawngah Isua a chuan ve na tur chuan i hna kha atan i hlan a ngai.

Simon Petera leh a ṭhiante khan chutianga an tih chiahin an ṭhian dangte puih ngai khawpa tam sangha an man a nih kha.

Engtinnge heng mite hian engmah lo ata tam tak an neih thut? An lawngte kha rawngbawlna atan Isua hnenah an pe a ni.

Pathianin chutiang chiah chuan i lakah a beisei. I hna kaltlanga a rawng i bawl theih nan Pathian hnenah hlawhtlinna dil suh. Chumi letling chiah chuan ti zawk rawh. Pathian hnenah, "Ka eizawnnaah hian nasa takin ka bei ve mek a, mahse ka neih ang apiang hi i rawngbawl nan ka pe ang" tiin ṭawngṭai rawh.

Chutah tak chuan Pathianin thilmak a ti ṭhin.

Bible chuan, _"Tin, in tih apiang chu thusawiah emaw, thil tihah emaw ama zarah Pa Pathian hnena lawmthu hril chungin Lalpa Isua hmingin ti vek rawh u."_ tiin min hrilh (Kolossa 3:17).

Engkim tih awmzia chu engkim a ni mai, i hna tiamin.

Tunah khan kalna ngaihna hre lovin i awm a ni mai thei, i eizawnna hlawhtlin nan kawng awm ang apiang i dap a ni thei. Hnathawhna hmun sawn te, hna thar zawn te, emaw i hnathawh thlak hlawk emaw i rilruah a awm a ni thei. Chu chu i tihtur tak pawh a ni.

Mahse hei hi ti hmasa rawh: I lawng thunun turin Isua sawm rawh. I hna khan Pathian ropuina turin hlan rawh.

Tichuan Isua thilmak tih thlir tawh mai ang che.

Ngaihtuah zui atan.

Engvangin nge mite hian hna ṭhenkhat- a bikim missionary-te leh pastor-te hna hi a dang aia rau bik riaua an hriat ṭhin?

I hna kha Pathian rawngbawlna atan han hlan ta la eng ang chiahin nge a lan ang?

I hna Pathian rawngbawlna atana hlanna daltu engnge?


[Lettu: Mapuia Fanai]

Saturday, October 21, 2023

PATHIAN CHUAN I BAHLAHNATE CHU I DINCHHUAH LEHNAAH CHANTIR RAWH SE

 Pathianin Bahlahnate Dinchhuahlehnaa a Chantir Dan

- Rick Warren

Oct 21, 2023


"An han den chuan sangha tam tak an khuh a, an lênte chu a chat pheuh pheuh va.”

‭‭Luka ‭5‬:6

I thiltihah beidawn rum rum chang i nei em, kawppui tha tak i nei a nia. I thawhrim luatah i chau pawh a ni thei e. I thinlung leh i nun zawng zawng i pe vek a, mahse i hlawhchham si.

Kan vai hian chutiang deuha bahlahna chu kan tawk theuh a. Mahse bahlahna hnulam zawk hi a pawimawh chu a ni. 

Simon Petera kha han zawt teh.

Sangha mantu a ni a. Nikhat chu a thiante nen zankhua a sangha man tuma an hlawhchham hnuah, len an su fai a. Sangha engmah an man loh khan sum engmah an siam lova. An beidawngin an chau viau ang tih a rintheih a ni.

Tichuan Isua a rawn kal a, thil theih loh chu a ti ta a ni. 

Petera hnenah chuan: “Tin, thusawi a bân chuan Simona hnênah, “Li thûk lam pan la, sangha man tûrin in lênte dêng rawh,” a ti a.”

‭‭(Luka ‭5‬:‭4‬)

Petera chhanna kha chhanna awm reng a ni: “Zirtîrtu, rim takin zankhuain kan bei a, eng mah kan man lo va; nimahsela, i thuin lênte ka dêng leh ang e,” a ti a, a chhâng a.” Luka ‭5‬:‭5‬ ‭

Chutiang chu kan ni ve fo a ni. Kan theihtawp kan chhuah a, mahse kutbengin kan awm chawk a. Thil engkim kan ti dik a, Pathianin min tihtir ni pawhin kan ring a, mahse engmah tarlan tur kan nei bau lo leh si!

Beidawng thei dinhmunah kan ding a ni.

Mahse Isua a rawn lang a. I nuna hna a thawh dan a rawn tilang a, i la hmuh ngai lohte nen. I mamawh a ti a. I dinhmun chhia ata a chhanchhuak che a.

Tichuan engkim chunga Lalpa a nihzia a tilang a ni.

Simon Petera leh a thiante khan Isua thu an awih a, “Tin, an han den chuan sangha tam tak an khuh a, an lênte chu a chat pheuh pheuh va.”

‭‭Luka ‭5‬:‭6‬ ‭

An mamawh tawk an man bakah, mi dangte chan ve tur thlengin a mantir a ni. 

An tumruhnaah Isua a tel ve khan, darkar 10 chhunga an theih loh sangha tham tak kha minute 10 emaw lekah an man ta a ni. Pathianin an bahlahna chu an dinchhuah lehnaah a chantir a ni.

I nunah bahlahna a awm nawn fo avangin i mangang thin a ni maithei. I chauvin i beidawng a, thil hi a pangngai leh thei ang em tih i ngaituah a. Petera manganna kha i hrethiam ang. 

Mahse i dinchhuah lehna hi a thleng tep maithei a nia.

I la hmu thei lo a nih pawhin, Pathian chuan i nunah hna a thawk reng a, a tha lo zawng thaah chantir zelin, i bahlahna pawh i dinchhuah lehnaah chantir a tum a ni.

Ngaihtuah zui atan...

I nuna thil i tihnaah Pathian thilmak tih engtin nge i hmuh tawh le? Chu chuan hmalam hunah engnge awmzia a neih?

I nunah engin nge thilmak tih theihna tura Pathian i rin ti hlauthawng ber che?

(Lettu: Msa)

Friday, October 20, 2023

HMANGAIHNA CHUAI LO TUR NEIH DAN

 _Hmangaihna Nen Ni 40_

- Rick Warren

Oct 20, 2023


"Engkim a tuar hram hram a, engkim a ring a, engkim a beisei a, engkim a tuar chhuak thin" 1 Kor 13:7

Hmangaihna chuai lo chu a tlo hle a. A tum a ruh a. A taima a. A chhe ber pawh a tuar hram hram a,  inlaichinna a tawpsan mai ngai lo. A luhlul a ni!

Inlaichinnain a tum chu i hlimna a ni mai lova, tihthianghlim che a ni. Inlaichinna chuan - i kawppui nen emaw, i fate emaw thianthate pawh ni se - mahni aia mi dangte ngaih pawimawh min zirtir a. Hun harsaah pawh i tum a ruh tlat khan, kawng danga i zir ngai loh tur thil tam tak i zir phah dawn a ni.

Kan nu nena kan inneih khan, mi inang lo lutuk pahnih kan ni tih kan inhrechhuak a. Kan inneih zanah kan inhnial tan a, chumi hnuah a zual tulh tulh a. Kan inhmangaih a, mahse kan inmil lo a ni.

Mahse thutiam kan nei a, inthen hi kan tum ngai lovang tiin. "Min tihlum hial dawn pawh ni se kan inneihna hi siamtha turin kan bei ang" kan ti a, a ni thelh a ni. Counselling kan kal a, sum kan neih lo chung pawh khan. Kan pahnihah kan in pek tawnna atan hlan tul apiang kan hlan ngam a. Kan thanglian zel a. Kan inneih kum 2 chhung kha chuan kan bei nasa tak meuh a, mahse kan lo tha telh telh a ni.

Vawiin hian hei hi i hriat ve a tul maithei: Tawp san suh! Bei zel la. Tum ruh la. Luhlul la. I beih a ngaih avang khan Pathianin hmangaihna chuai mai lo tur atana a pek che kha hloh reng reng suh. Chumi atana beih fan fan kha a phu em em a ni.

Hmangaih zir hi hringnuna zirlai ropui ber pakhat a ni a. Chu chu he leia Pathianin a dah chhan che a ni. Mahse a awlsam reng lo - mi dang han hmangaih mai hi a awlsam lo viau thin.

Hmangaihna chuai lo atan hian 'thuruk' hran pawh a awm chuang lo. A  ki pui ber erawh chu, Pathian hmangaihna nangmaha kaltlangtir kha a ni.

Philipi 2:5-ah chuan, "He rilru, Krista Isua pawha awm bawk kha, nangmahniah awm rawh se" a ti a. Mihringte chu kan chau thin a. Mahse Isua hmangaihna chuan mi dangte hmangaih thei turin a pui dawn che a ni.

I nun a hnenah hlan la - tichuan nangmah kaltlangin mi dangte i hmangaihtir dawn a ni.

Ngaihtuah zui atan.

In inlaichinnaah hmangaihna tlo tak nei turin engtia tuarhhel nge i nih a ngaih le? Chumi avang chuan engtin nge in inlaichinna a thanlen le?

Mi dangte tha zawka i hmangaih theihna turin engtin nge Pathian hmangaihna i zir theih ang?

Engtin nge mahni aiin mi dang i ngaihsak zawk a ni tih i hriat theih ang?

(Lettu: Msa)

Thursday, October 19, 2023

A NIH THEIH DAN TURIN SAWI RAWH

 Hmangaihna nen ni  

40

- Rick Warren

- Oct 19, 2023


_"Hmangaihna chuan engkim a beisei thin."_ I Korinth 13:7

Tu emaw lakah beiseina sang tak i nei a nih chuan a nih theih dan turin i sawi ṭhin. Eng nge chu chu a awmzia? A awmzia chu mi tu emaw kaltlanga Pathianin thil a tih i ring a, anmahnia Pathian thil tum i lo nemnghet tihna a ni.

Entirna ṭha tak mai chu Bruce Wilkinson-a, lehkhabu ziaktu leh zirtirtu hi a ni. Kum engemawzat liam ta khan, Multnomah University a zirtirtu a ni a, zirtirtuho ṭhutkhawmna hmasa berah chuan tih tur an tuksak a. Zirtirtu pakhat chuan a lehkhapuan kenlai chu a hmuhin, " Bruce-a, 'A' pawl pahnih pek i ni a. Chungho chu he University a zirlai thiam thei tak tak te an ni. An ti tak tak a, zirtir pawh an nuam. I ṭan kuma A pawl i chang hi vannei takzeta ni," a ti a.

Dik taka sawi chuan Bruce-a chuan chung zirlaite zirtir chu nuam a ti a ni tih a inhmuchhuak a. Pawl dangte ai chuan zirtir an nuam daih a. An fel zawk a, thu pawh an zawt ṭha zawk a ni.

Kum tawpah chuan, Bruce-a chuan an pawl hotu hnenah chuan, "Pu-a, 'A' pawl bawk hi chan leh ka inbeisei a nia," a ti a. An hotu chuan, 'A' pawl hi a awm hleinem. Kum ruk kalta khan kan titawp daih tawh alawm," a ti ta a.

Bruce-a chuan an tih ṭhatdan a ziahna lehkhabu a han enchian chuan 'A' pawl chu chuti taka hmasawn an ni hran lo va, mahse pawl dang ai chuan an tiṭha zawka, awmze neiin an ziak zawk a ni.  Bruce-a chuan - zirlai ṭha zawk ni tura a beisei avangin - chu a chona chuan a vawrh kâng a ni tih a takin a hmu a ni.

I nun pumpuiah khan, anmahni i beiseina avangin i bula mite kha i chher thei a ni. Mi dangte laka a ṭha ber i beisei hian, Isua hmangaihna tâwp lo chu i lantir a ni.

Bible chuan hmangaihnain a sawisel lo va, hun liam tawha thil tihsual a phawrhchhuak hek lo a ti. Paula chuan heti hian a sawi, "Hmangaihna chuan...a ṭha ber a beisei ṭhin," a ti (I Kor 13:7). Hmangaihna tluantling chuan hmalam a thlir a. Beiseina nen a ṭha lam a thlir ṭhin.

Hmangaihna tluantling chu beiseina hlira khata ni.

Ngaihtuah zui atan

I nuna tu emaw lak aṭangin a ṭha ber beiseiin i buai em? Ni ta se, i beiseina chu engtin nge a thlak ang?

I kawppui emaw, u pu emawin i lak aṭangin thil ropui tak beisei ta se engtin nge i awm ang?

Eng ang beiseina nge i lakah Pathianin a neia i ngaih?

[Marova Punte]

Wednesday, October 18, 2023

HMANGAIHNA TLO CHUAN KHAWNGAIHNA A LANTIR

 _Hmangaihna Nen Ni 40_

By Rick Warren 

— Oct 18, 2023


“Inngaihtlawmna leh thuhnuairawlhna zawng zawng nei a, hmangaihnaa indawh tawn chungin dawhtheihna nei ula.” Ephesi 4:1-2

Eng inlaichinna mah hi khawngaihna tel lo chuan a  dam zo lo. Mi dangte hriatthiamna i neih a ngai a. Thil i thlir liam chang pawh a awm a ngai a ni.

Bible-in, “Hmangaihna chuan engkim a tuarchhuak thin” a ti 1 Korinth 13:7. Tawngbul Greek tawnga a awmziaah chuan, “a chung khuh” tihna a ni a. In chung nei lo chu i nei duh ang em? I duh lo vang. Thli leh ruah laka phenna i nei dawn lo a ni. Inchung chuan i in chu a venghim a ni.

Chutiang chiah chuan, Bible-a hmangaihna chuan inlaichinna leh thil dang zawng zawng pawh a khuh vek a ni. Mi thil hote a tihsual avangin khawlo takah a chhuah lo a ni. Inlaichinnaah a chung khuh i mamawh a, a chhan chu hoteah an tihchhiat theih vang a ni, chutiang hmangaihna, khawngaihna lantir tel thei chu kan mamawh a ni. 

Engvangin nge inlaichinnaah chuan khawngaihna a pawimawh?

A chhan chu kan vai hian misual kan ni a. Nupui-pasal innei te pawhin chutiang misual tho chu kan nei a ni. Mi fel lo pahnih chuan inneihna famkim chu engtiklai mahin an nei thei lo. Chutiang bawkin inthianthatnaah pawh a ni tho. Eng inthianna mah hi a famkim thei lo - a chhan chu tu thian mah hi an famkim bik loh avangin. Mi fel lo pahnihte inlaichinna chu engtiklai mahin a famkim ngai bawk lo vang. 

Bible-in Rom 3:10 ah, “Tu mah mi fel tak reng an awm lo, pakhat mah an awm hauh lo,” a ti a ni. Tu mah hi za a zain kan fel thei lo. Mi pakhat chauhin thil a tisual ngai lo bawk. Kan vai hian thil kan tisual a, lehlam lehlamah mawphurhna kan nei theuh a ni. “Pakhat a thiam lo va, pakhat a dik lo” an tih ang deuh vin. Kan thiam lo ve ve thin a ni.

Chuvangin Bible-in a sawi angin mi dang chungah khawngaihna kan lantir a pawimawh a ni. Ngaihdamna hi thil pahnih angin a awm thei a. Mi dang kan pekchhuah duh loh chu kan dawng thei bik lo a ni. 

Pathianin a tih dan che anga mi dang chunga i lantir hian inlaichinna nghet chu i nei thei ang. Rom 15:7 ah chuan, “Kristan a lawm che u ang bawkin inlawm tawn rawh u,” min ti a ni. Mi dang lo lawm chu chhungkaw emaw thian tu emaw ngaihtuah chiang hmasa lo va, an thu ngaithlaksak thawt thawt ang pawh a ni thei.

Mi, an nunhlui pawh hmangaihna avanga haider saka, an nihna ang anga i pawm chuan, khawngaihna i lantir tihna a ni. 

Ngaihtuah zui atan

* Khawngaihna chuan engtiklai khan nge inlaichinnaah a tha zawngin danglamna a thlen?

*  Engvangin nge kan hmangaih em em te hi ngaihdam kan harsat tlat zel?

* Inlaichinna kehchhia emaw khawngaihna lantir ngaihna hun kha han ngaihtuah teh. Mi dangin i hnena ngaihdam an dil hun nghakin i awm tawh em? Chumi hnenah chuan khawngaihna i lantir theih nan engtin nge hma i lak ang?

*[Lettu: Sangpuia]*

Tuesday, October 17, 2023

HMANGAIHNA NUN NEI TURA RAHBI PAWIMAWH HMASA PANGA

  Hmangaihna Nen Ni 40

By Rick Warren 

— Oct 17, 2023


“Kristan a hmangaih che u a, rimtui atan Pathian hnena thilhlanah leh inthawinaa kan aia a inpek ang bawk khan hmangaihnaah awm rawh u.” Ephesi 5:2

He kan chenna khawvelah hian hun engemawchen chu ka khawsa ve ta, nimahsela, tun thleng mai hian hmangaihna chungchang ka hriat tlemzia hi Pathianin min hriattir thin. Tu te pawh hian Pathian hmangaihnaah hian kan than zel a pawimawh tih hi thudik a ni.  

A nih chuan engtin nge nunna tak tak, hmangaihna ril chu i neih theih ang? I nun zawng zawng chu a chhanna hre turin i khawhral zo vang. Bul i tan theih nan rahbi panga ka hrilh ang che - tichuan hmangaihna nun ropui tak chu i neih theih nan hma i la thei ang.

Hmangaihna puitlingin engtin a tih zir rawh. Mihringa danglamna chu thlir dan inthlakna atangin a intan a. Hmangaihna dik hre turin Pathian thlirna hmangin thlir la, a chhan chu khawvel hian hmangaihna awmze ril leh a tak tak hi a hrethiam lo a ni. Pathian Thu atangin chu thlirna chu i nei thei dawn a ni. 

Nitin hmangaihna hrilh nawnin awm fo rawh.  Zinglama minute 10 hmasa ber hian nilenga i awm nawm leh nawm loh a hril. Zing i thawh hlimah hetiang hian tawngtai la, ”Lalpa, kan tana pawimawh ber chu nangmah hmangaih leh mi dangte hmangaih hi a ni tih hre reng turin min pui rawh. He ni hi a lo thlawna ka hman lohna turin, nangmah hmangaih leh mi dangte hmangaih bakah thil dang engmah ti lo turin min pui rawh.”  

Pathianin hmangaihna chungchang a sawi chu vawn tum rawh. Pathian Thu chu hmangaihtu ni tura thutaka inkaihhruainain a khat a ni. Mi dangte hmangaih lo tura thlemna i tawh lai chuan Bible chu inah a dahnaah tha takin a lo awm thin. Chuvang chuan i vawn a ngai a, i mamawh hun apiangah i hmang chhuak thei dawn a ni.

Mahni hmasial lo vin, hmangaihna hmang chhuak rawh. Hmangaihna hi tihrawl ang a ni a. I hmanchhuah tam poh leh a lo chak zel ang. Hmangaihna nun neitu i nih duh chuan, a tirah chuan thil awm ang lo deuh nia i hriat pawh ti mai rawh. Nimahsela, i tih chhoh zel chuan, hmangaihna chu a pahnihna niin, hmangaihtu diktak i lo ni tawh ang.

 Mi hmangaihtute atangin tanpuina la rawh. I pindanah thuin lehkha i chhiar a nih chuan, hmangaih zirnaah chuan i la hlawkpui vak rih dawn lo tihna a ni. Hmangaihna chu mi dangte zinga awma, anmahni nena inzawmna neih chauhin a neih theih a ni. Chuvang chuan thian pawlho neih chu a hlu hle a ni! Chutah chuan thanlenna i nei thei ang a, Pathian atanga chhuak hmangaihna neiin, mahni hmasial lo vin, hmangaihna kawng i zawh thei ang.   

Hmun fianriala thu ringawt chung chuan hmangaihna i zirchhuak thei lo vang. Hmangaihna chu Pathian nena inlaichinna nei chung leh mi dang nena inlaichinna nei chungin i zir thei ang.

Ngaihtuah zui atan

* Pathian Thu nena ni thar leh i hun tha ber i hman zel theihna turin i hun hman thinah eng nge thlak danglam ngai?

*  School-a in zir dan tha ber ngaihtuah la. Bible chang i vawn theih nan engtin nge i hman tangkai theih ang?

* Eng miten nge hmangaihna nun nei nia i hriat? Eng kawngah te nge Pathian leh mi dangte an hmangaih?

I chatuan hmun khawiah nge i hman dawn? 

Kan sualna chuan Pathian lak ata min then hranga. Pathian khawngaihna avang chauhin Pathian nena inlaichinna dik chu i nei leh thei chauh a ni.

Bible chuan, “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi 2:8-9. 

I sualna te i puang duh a niha, i nunah Isua i thlang duh a nih chuan, heti hian ṭawngṭai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i ṭawngṭai a nih chuan, Rick@PastorRick.com ah hian email min lo thawn la. Isua nena zinkawng i zawh ṭanna atana pawimawh te a thlawnin ka lo thawn ang che.

[Lettu: Sangpuia]

Monday, October 16, 2023

THINRIMNA HI THINLUNGAH A INṬAN

 Hmangaihna Nen Ni 40

- Rick Warren 

- Oct 16, 2023


"Thinlunga khat liam chu kain a sawi ṭhin asin." (Matthaia 12:34)

I chin ṭhan ṭha lo tak mai thinrimna chungchangah engtinnge Pathianin a ṭanpui che? Harsatna laimu ber lam a hawi nghal, a chhan chu thinlung lama harsatna anih vang a ni.

Thinrimna hi i nungchangah emaw, i chawr chhuahnaah emaw, i thil dawnsawn danah emaw a inṭan lo. Thinlungah a ni a inṭan ni.

Bible chuan heti hian a ti, "Thinlunga khat liam chu kain a sawi ṭhin asin" (Matthaia 12:34). Chhungrila kan duhzawngte hi kain a sawi chhuak mai a ni. Mi ṭhenkhat chuan zahngaina tel miah lova an duh duh an sawi hnuah, "Keimahah hian engnge awm pawh ka inhre lo. Keimah ka ni miah lo mai" tiin an sawi ṭhin.

Ni e, i thinlunga awmte kha i kain a puang chhuak ṭhin. A thinlunga thinrimna awm chu a leiin a puang chhuak ṭhin. A ni lo zawng hlira thusawi mi i tawng anih chuan a thinlung pawh a ṭihbaiawm hle ang. Lei chapo ṭhin chuan thinlung him lo a entir. Midangte teh zung zung ṭhin lei chuan thinlung sual a entir. Lei bawlhhlawh chuan thinlung bawlhhlawh a entir.

A lehlamah, midangte fuih fo ṭhin i hmuh chuan thinlung hlim a nei tihna a ni. Mi hawihhawm tak a nih chuan hmangaihnaa khat thinlung a nei tihna a ni. A ṭawngkam veng thiam mi a nih chuan remnaa khat thinlung a nei tihna a ni.

I kaa ṭawngkam chhuak ṭhinah khan i lungawi em? I lungawi loh chuan i thinlung thlak a ngai tihna a ni. Thinlung thar i mamawh tihna a ni! Sam 51:10-ah chuan Davidan heti hian a sawi,  "Aw Pathian, keimahah hian thinlung thianghlim tak siam la, ka kawchhungah hian Thlarau dik tak siamthar leh ang che."

Thinrimna thununna ṭha ber chu i chhungril nun siamṭha tura Pathian thiltihtheihna hi a ni. Rom 15:5-ah chuan heti hian kan hmu, "Pathian hnen ata dawhtheihna leh zilhna chuan Krista duh dan angin midangte nen inrem taka in awm remti rawh se." (NCV)

I thinlung ṭapa a au chhuah fo chuan Isua Krista nen inzawmna ata lawmna leh thlamuanna i la dawng lo tihna a ni. Isuan thinlung hliam a hmangaihnain a thlak thei. I natna a hria a, i ṭawngka chhuakin nunna a ken a Kristaa i beiseina neih lantir a nih theih an a tidam ang che.

Ngaihtuah zui atan.

I ka aṭangin ṭawngkam nêm tak nge rum tak chhuak tam zawk?

I ṭawngkamin engtinnge midangte nunah nghawng nei se i duh? Chutiang chu a thlen theihna turin engnge i tihdanglam ṭul le?

Fuih ṭhintu che kha han ngaihtuah teh. An hnen aṭangin engnge zir theih i neih le?

Isuan i thinlung tidam rawh se.

Engpawh tiin khawiah pawh awm tawh mahla i thinlung hliam tuam dam leh turin Pathianin a hmangaihna nen a nghak reng che. Ring la, a chhandamna lo dawng mai rawh.

Isua hnenah i inhlan duh takzet anih chuan heti hian ṭawngṭai rawh le:

"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Ka thinlung hi i hmangaihna leh beiseinain min thlaksak rawh. Min hruai la, i duhzawnga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,

(Lettu: Mapuia Fanai]

Sunday, October 15, 2023

THLARAU NUN INSAWIZAWI DAN ṬHA BER

 _Hmangaihna Nen Ni 40_

- Rick Warren 

- Oct 15, 2023



_"Taksa insawizawi na hi sawt zawng a sawt ve bawk a; Pathian ngaihsakna erawh hi chuanin nunna tuna awm sa leh la awm leh tur pek tiamna a neih avangin kawng tinrengah a sawt a ni."_ (1 Tim. 4:8)


Pathianin duh dan anga midangte hmangaih tur chuan kan taksa, rilru leh thlarau siamthar reng thei tur thil tih ṭhin a pawimawh thu kan zir tawh.


Bible chuan hmangaihna tak tak chuan a "venghim a, a ring a, a beisei a, a tuar a chhel bawk. Hmangaihna chu a hlawhchham ngai lo" tiin min hrilh. Chutiang anga midangte hmangaih tur chuan Pathian hmangaihna lovin a theih loh. Thlarau nun ruak chungin chutiang thiltihtheihna chu i nei thei lo bawk.


Thlarau nun rona inṭan dawna thil lo thleng ṭhin i zir chian a ṭul. Chung a lo thlen chuan engmah hi awmzia awm lo niin i hre mai thei, midangte hmangaih pawh hi engmah lo mai angah i ngai mai thei. Harsatna i tawhteah Pathian i puh mai thei bawk.


Hengte hi i chung chauha thleng a ni bik lo. Bible-a mi ropui tak tak Davida, Mosia leh Abrahama te pawh kha  thlarau lam rona hmuna an chen lai khan an ni ve tho.


Thlarau nun chak lohna/rona hnehin engtinnge thlarau nuna chak renga i awm theih ang? I taksa chak ṭha reng tura i vawn dan nen a inang reng: Mahni inthununa tumna nen ngeia i kal a ngai.


Chu inthunun theihna chu i neih phawt chuan Bible-in i thlarau nun chakna chuan chatuan atan a rah i seng tur thu min hrilh: _"Taksa insawizawi na hi sawt zawng a sawt ve bawk a; Pathian ngaihsakna erawh hi chuanin nunna tuna awm sa leh la awm leh tur pek tiamna a neih avangin kawng tinrengah a sawt a ni."_ (1 Tim. 4:8)


Thlarau nun chak tak nei tura insawi zawina atan chuan Pathian nena hun hman aia ṭha a awm lo. 2 Korinth 4:16-ah chuan pawn lamah i taksain natna leh chak lohna nei mahse Pathian i pawlna chuan i thlarau nun a tichak reng ṭhin ang tih min hrilh. Pathian pawl nan hian nitin, hna i thawh ṭan hmain minute 10 chauh pawh fianrialin hun i hmang thei. Chumi hun chuan Bible chhiarin Pathian aw i hre thei a, ṭawngṭaiin Pathian i be thei bawk.


Chu hun chu midangte tihbuai lohin, Pathian nen chauh in hmang ang, a chhan chu Pathian nen in inlaichinna kha midangte nena in inlaichinna zawng zawng hriltu a ni tlat. 


Mihring hmangaihna chuan daih chin a nei. Mahse Pathian hmangaihna chu a ni ve lo! Isua hmangaih zual zel tur chuan finrial hun kha i nuna hun pawimawh berah dah rawh. Chutianga i tih chuan midangte nen in inlaichinna kha Pathian hmangaihnain a tidanglam ang. 


Ngaihtuah zui atan. 


Nitin i hun hman danin engtinnge fianrial hun i dah pawimawhzia a lantir? 


Pathian pawlna leh a Thu zirna atana i hun hman danin engtinnge midangte nena in inlaichinna a nghawng ni a i hriat? 


1 Korinth bung 13-naa hmangaihna kan hmuh ang hian midangte i hmangaih thei dawnin i inhria em? Engvangin? 


*Isua ring turin engvangin nge hun i la khawhral cheu ang?*


Isua i la ring lo anih chuan engah nge i nghah khawtlai reng ang? Isua hnena i nun hlan i duh chuan hetiang hian ṭawngṭai bul han ṭan ta che:


"Lalpa duhtak, I Fapa Isua Krista ka rin chuan ka tihsual zawng zawngte min ngaihdam ang tih min tiam a, ka nun chhan ka zir ang a, tichuan, engtik niah emaw I chatuan hmun a min thlen ve i tiam a. Ka tisual a ni tih ka puang a I ngaihdamna ka dil a ni. Ka Chhandamtu i ni tih ka pawm e. Chhandamna chu thiltih vang ni lovin rinna avanga khawngaihnaa lo thleng a ni tih ka ring e. 

Lalpa vawiin aṭang hian zui che ka duh e. Ka tana nung tawh lova i tana nun ka duh e. I tan ka nun ka hlan a, i chhungkuaa min pawm turin ka dil a che. Isua hmingin, Amen."


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia,


[Lettu: Mapuia Fanai]

Saturday, October 14, 2023

MI DANGTE ṬHA TAKA HMANGAIH HI I HAHPUI EM?

 _Hmangaihna Nen Ni 40_

- Rick Warren

Oct 14, 2023


"I kutin mi siamin, mi din a ni: I thupêkte chu ka zir theih nân hriatthiamna mi pe ang che." Sam 119:73


Hah lai chuan mi dang hmangaih pawh a har deuh thin.


A dik a ni: i taksa hriselna khan mi dang nen in inkungkaihnaah nasa takin awmzia a nei ang. Thahrui ngah hian awmzia a nei viau thei tlat a ni.


I chauh lai hian in inlaichinna chu engnge a an le? Thil te lam hian harsatna lian a thlen fova. Thahrui i neih loh deuh lai chuan i thin a chhe deuhin, i inveng deuh anga, emaw i khirh zual mai thei a ni.


Mi dangte hmangaih kawngah hmasawn i duh chuan i taksa ti harhvang tur thil chinṭhan i insiam a tul a. Hriselna atana tul hi kan Bible hian min zirtir nual, mahse a bulthut pawimawh ber berte chu tha taka chawlh hahdam te, chaw tha ei te, insawizawi te a ni.


*Chawlh hahdam.* Sam 127:2 chuan, "Zing takah in tho va, tlai takah in chawl a, Thawhrimna chaw in ei thin hi, in tan a thlawn mai a ni: Hetiang hian a mi duh tak chu a muthilhtir thin a ni" a ti a. I fate, i kawppui, i thiante hmangaih thei lo lek lek khawpa i chauh chuan, i harsatna chu a hmasa berah i taksa lamah a ni a, thlarau lam a ni lo. Tha taka zan kan han mut te hian kan thlir dan dang riau te hi a mak a ni.


*Chaw tha ei.* Bible chuan, "I kutin mi siamin, mi din a ni: I thupêkte chu ka zir theih nân hriatthiamna mi pe ang che" a ti a. Kan hlimpui leh kan tem atan Pathian hian thil tha tak tak hi min hlui a. Chaw te hi tui ti taka ei thei tur kan ni. Chutih rualin eng hi nge kan ei anga, eng chen nge kan ei ang tih hre thei turin finna min pe a. Kan zawm a tul a ni.


*Insawizawina.* "Mana lei in ni tawh asin, chuvangin in taksaah chuan Pathian chawimawi rawh u" tiin 1 Kor 6:20 ah kan hmu a. Taksa chau lo tur a i insawizawi fo a ngai a. Zirchianna aṭangin, kan insawizawi hian kan thahrui a ti kiam lo a ni tih an hmuchhuak a. An ti pung mah zawk a ni.


Hringnun hi chau tak chunga hmang turin Pathian hian a duang lo che a. Tha taka mi dangte i hmangaih theih loh chuan, engzat nge i hahchawlh a, engnge i ei a, i insawizawi thin dan enfiah thin ang che. Tichuan mahni inngaihsak turin thutlukna tha zawk, zawm hah deuh zawk pawh ni se siam thin ang che.


Nang leh i hmangaihten khuareiah inla chhawr zawk dawn a ni.


Ngaihtuah zui atan...


I nunah hahchawlhna aia hun luah tam engnge ni? I hriselna aiin a pawimawh em?


Eng ang kawngin nge Pathian hian i ei leh in kawngah finna a pek che? Chu finna chu engangin nge i zawm?


Insawizawi tur hian chau viaua i inngaih chuan, i thahrui siam leh turin engnge ngai? Insawizawina mawlmang tak tak, ke a kal te, ni eng emaw chen chu han ti chhinin, i danglamna i infiah peih angem le?


(Lettu: Msa)

Friday, October 13, 2023

THINRIMNA THUNUN LOH MAN ZAT

 Hmangaihna Nen Ni 40

By Rick Warren

— Oct 13, 2023


“Mahni chhûngkaw tibuaitu chuan eng mah a nei lo vang, Mi â-te chu mi fing chhiahhlawh an ni ang.” [Thufingte 11: 29]


Thinrimna thunun loh chu engtianga man tam nge tih i hriat chiah chuan thunun ngei duhna i nei ang. Thinrimna chuan man a nei a ni tih i hriat chiah chuan i thinrimna chu thunun i tum zual sauh ang.  


Thufingte lehkhabu chuan thinrimna hmachhawn dan chungchangah thurawn fing tak tak a duang chhuak a. Chung chang hrang hrangte nen chuan engtiangin nge in zawmna i neih inchhuidawn theih ang? 


“Mi thinchhia chuan inhauna a chawk tho” [Thufingte 15: 18]


“Mi thinram chuan a âtzia a tilang ṭhîn.” [Thufungte 14: 29] 


“Mi thinrimin bawhchhiatna a ngah ṭhîn.” [Thufingte 29:22].


A nih chuan heng hi engnge ni ta ang? 


“Mahni chhûngkaw tibuaitu chuan eng mah a nei lo vang, Mi â-te chu mi fing chhiahhlawh an ni ang.” [Thufingte 11: 29]


Insum thei lova i thinrim chang apiangin a chak lo zawk i ni thin. I hming thatna i hloh ang a, mite laka zahawmna, i hna, i sumdawnna emaw i chhungte hmangaihna thlengin i hloh thei. I hriselna pawh a chhe viau thei. 


I taksa kha thinrimna phur tura duan a ni lo. Pathian chuan i chhunglama chhekkhawl turin a ti lo che. Chutianga i tih chuan i dam lo thin. Mi tam tak mahni inthiam lohna, thinrimna  emaw lungawi lohna an thinlung atangin paih ta sela damdawiin chhuahsan thei nghal tur an awm ang. 


Miin thinrimna nun a neih avanga a tuarna chu eng emaw a awm reng thin. 


Mi tute emaw thinrimna chu thil eng emaw tihtirna hmanrua atan kan hmang fo. Eng vangin? A chhan chu a thawh vang a ni – rei lote chhung atan chuan. Nu leh pa tam berte chuan an fate chu tithinrim ta sela eng emaw hlauhna nena thil an tihtir thei tih an hria a ni. Mahse khuareiah erawh a tha lem lo fo. Khuareiah chuan thinrimna thunun mumal loh vanga mi tuarna chu kawng thum lai a awm ngei ngei: thinrimna nasa zawk, thatchhiatna leh kal hranna te. 


Chu chu I fate eng emawzat bulah a thleng ang, tleirawl/rawlthar zingah a ni zual. “Ka nu leh pate chu ka tilungawi thei ngang lo; an lungawi lo zel” tiin an ngaihtuah a. An beidawng hial mai thei. 


I thinrim reng a nih chuan, rei lo te ah chuan anmahni duh dana kalin anmahni leh mahni thiam chantir tumin an kal hrang mai ang. Tichuan inlaichinna chu a kehchhe hial ang. Inlaichinna chu thinurna thunun loh leh thinurna zualkai tluka tichhe thei an awm lo. 


Midang tu emaw nen chuan i thinrim dawn nge dawn lo tih chu i thutlukna tur a ni e. Chu thutlukna chu i siam hma ngeiin a man chu chhut hmasa ang che. A man chuan a phu chiah em? 


Ngaihtuah zui atan. 


Mi thenkhatten an thinrimna an thunuaia dah an duh chhan chu engvang nge ni ang? 


Thinrimna chuan mite nena in inlaichinna engtiangin nge a khawih? Engnge a man i lo pek tawh? 


Thinrimna chuan engtiangin nge i hriselna a tihchhiat tawh? Thinrimna emaw lungawi lohna chuan engtiangin nge i rilru, ngaihtuahna leh taksate chu a lo nghawng tawh? 


[*Lettu*: Peka]

Thursday, October 12, 2023

THINRIMNA HI DUHTHLANNA A NI

 Hmangaihna Nen Ni 40

By Rick Warren

— Oct 12, 2023


“Mi â chuan a thinur thu zawng zawng a sawi chhuak a, Mi fing erawh chuan an thup a, An ngawihpui ṭhîn.” [Thufingte 29:11]


I thinrimna thunun i duh chuan, thunun tura thutlukna i siam a ngai ang. 


“Ka thunun thei lo!” tih thu chu i bansan a ngai a, tichuan i tithei mai ang. Hmangaihna ang thovin thinrimna chu mimal duhthlanna a ni. I thinrim chang chuan, i duhthlanna ngeiin i thinrim tihna a ni. Tu mahin thinrim turin an nawrlui lo vang che. 


Mi thenkhatte chuan, “Min tithinrim hle mai” tiin an sawi fo. Mahse thudik tak chu hei hi a ni, i thuneihna tel lo chuan tuman an tithinrim thei lovang che. Thinrimna chu mimal duhthlanna a ni a, midang hmangaih thei tak i nih leh nih loh chu nangma duhthlannaa innghat an ni. 


Nangmah leh nangmah i inpawm mai aia thuk daih khan i thinrimna chungchangah khan thuneihna i nei lian ang. Entirnan hetiang hian ka lo pe ang che. 


In inah awmin I chhungte zinga tu emaw ber nen chuan in inhnial ta a. In awki a ring hle mai a, I thin a lo rim ta a. I lungawi lo ta hle mai. Vawi lehkhatah, phone a lo ri a, nem dam dapin I va chhang ta a, “Hello? Aw ni e! Duh tak, nangma tan a ni e!” tiin. 


Engnge lo thleng? Midang tana hamhaihna thlentu nih I duh ta lova, mahni leh mahni insawifiah chiam pawh tul lovah I ngai a, I thinrimna chu I hmet dai ta vat a. Thinrimna hi thunun theih tak a ni!


Bible chuan Thufingte 29:11 ah hetiang hian a sawi, “Mi â chuan a thinur thu zawng zawng a sawi chhuak a, Mi fing erawh chuan an thup a, An ngawihpui ṭhîn.” 


Mi a nge i nih duh a, mi fing zawk? I chunga thil lo thleng i hmachhawn dan chu i thuneihna liau liau a ni e. Thinrimna pawh i duhthlanna a ni. 


I thinrimna thunun a ngaih hun chu i thisen a lum hun emaw, i thisen kal a buai hun emaw, i bianga thisen lum che vel a lo thlen hun emaw, i thahrui a mar hun emaw chu a ni mai lo vang.  


Chutiang hun a thlen meuh chuan a chak lo zawkah I tang der tawh tihna a ni. 


Chutiang ni lo chuan, rorelna huanga i tel hma emaw in in kawngka biang i luh tlang hma emaw chuan thinrim lo turin thutlukna siam ang che. Hetiang hian ti ang che: “Vawiin hian, thinrim lo turin ka insum tlat dawn a ni. Thil thleng velten min nghawng chu ka remti dawn lo,” tiin.


I thinrimna thunun dan tha ber chu a hma lam atanga thutlukna siamin – I thuhnuaiah I dah dawn a ni tia thutlukna siamin I thuhnuaiah I dah thei ang. 


Ngaihtuah zui atan. 


Tun hma zawng khan engtin nge i thinrimna chu I lo thunun tawh thin? 


Tun hnai thil thleng nangmah tithinrimtu che chu engnge ni han ngaihtuah teh. Chutiang dinhmun chu tun hma lama I lo hmachhawn tawh aia tha zawka hmachhawn dan eng nge awm thei ang? I thusawi duh chu engtin nge I puan chhuah theih ang? 


Mi tute emaw an thinrimna thunun thiam lote chu engtin nge anmahni hmangaih tak chungin kawng kan kawhhmuh theih ang? 


[*Lettu*: Peka]

Wednesday, October 11, 2023

HMANGAIHNA CHU ENG NGE NI?

Hmangaihna Nen Ni 40

By Rick Warren 

— Oct 11, 2023


“Hei hi hmangaihna a ni, ama thupek ang zela kan awm hi.” 2 Johana 1:6

Hmangaihna hi kan nun laipui ber a nih avangin, hmangaihna awmzia hi kan hriatchian a ngai a ni.

Bible-in hmangaihna chu thupek a ni a ti. Pathian chuan inhmangaih tawn turin thu min pe a. “Hei hi hmangaihna a ni, ama thupek ang zela kan awm hi.” 2 Johana 1:6

Pathianin hmangaihna nei tura thu min pek avangin, hmangaih thei turin thiltihtheihna min pe tel bawk a ni. Chumi awmzia chu hmangaihna chu thinlunga turtu awm hi a ni lo - a chhan chu thinlunga turtu awm hi kan thunun theih loh fo avangin.

Bible chuan hmangaihna chu duhthlanna a ti. Bible-in 1 Korinth 14:1 ah, “Hmangaihna hi um zel u la, thlarau lam thilpekte pawh chak cheu rawh u.” Thil engemaw i “um” chuan, duhthlanna i siam tihna a ni. Hmangaihna chu duhthlanna a ni a; hmangaih emaw hmangaih loh emaw i duh zawk zawk i thlang thei a ni.

Mi thenkhatin ka kawppui hi ka ṭhen dawn, “Ka hmangaih tawh lo” tiin, anmahni thunun theih emaw an ti thin. Hmangaihna thinlung i neih chak loh lai pawha hmangaihna i lantir hi a ril zawk daih a ni. Pangpar an par hian hmangaihna an ti, nimahsela hmangaihna tak tak chu thlasikah a thleng; thil a harsat hun lai tak a ni. I rilrua a landan ai chuan, Pathianin a hmangaih che angin mi dang hmangaih zir ve rawh. Mi dang hnenah chuan engnge an phu ngaihtuah lo vin, an mamawh pe zawk rawh. 

Bible-in hmangaihna chu i nungchang hi a ni a ti. Hmangaihna chu thiltih hi a ni. Bible chuan, “Naute u, thu chauhvin i hmangaih suh ang u khai, lei chauhvin i hmangaih hek suh ang u, thiltih leh tih tak zetin ni zawk rawh se,” a ti. 1 Johana 3:18. 

Pathianin nitin hian hmangaihna kan lanchhuahtirna tur kawng min hawnsak a. Nimahsela, engtiklai mai pawh hian kan buai a, kan zawm thei lo fo thin. Heti hian vawi engzat nge i ngaihtuah, “Phone-in mi biak ka ngai; hnathawhnaah mi fuih tur ka nei; ṭhenawmte puih ka ngai,” mahse thildang a lan zel avangin i bawhpelh leh thin. Hmangaihna chuan hun remchang chu lain mi dang tanpui nan a hmang thin.

Bible-in hmangaihna chu inpekna a ti. Bible-in 1 Johana 4:16 ah heti hian a ti, “Pathian chu hmangaihna a ni; hmangaihnaa awm reng chu Pathianah a awm reng a, Pathian pawh amahah a awm reng a ni.” Pathian nena in inlaichinna chuan mi dang nena in inlaichinna pawh nasa takin a nghawng a. Mi dang hmangaihna thinlung i neih chuan Pathianah i awm reng ang a, nangmahah a awm reng bawk ang - Pathian chu hmangaihna a ni si a. 

Ngaihtuah zui atan

* Hmangaihna chu thupek, duhthlanna, nungchang leh inpekna a ni. Mi dang nena in inlaichinnaah eng ber hi nge i hmanchhuah ngai le?

*1 Johana 4:16 in a sawi, “Pathiana awm reng” tih hi eng nge awmzia?

* Hmangaihna chu thinlunga lang a ni lo va. Thupek a ni. He thudik hian mi hmangaih harsate i hmangaih theih nan engtin nge a fuih thar theih ang che?

[Lettu: Sangpuia]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...