Wednesday, May 31, 2023

DODALTU LO CHHUAHNA BUL TUNGE?

  _Malsawmna Dawng Nun Rahbi_ 

— Rick Warren 

— May 31, 2023


“Do tura insiamte chu thuhnuairawlh takin a zirtir zawk tur a ni; chutichuan, Pathianin thutak chu an hriat famkim nan a simtir hlauhvin, Pathian duh zawng ti atan Lalpa bawihin a manin, Diabola thang ata an chhuak thei mahna.” 2 Timothea 2:25-26

I rinna avanga dodalna i tawk a nih chuan, khawi atanga lo chhuak nge tih i hriat a tul.

Mi dang an ni lo va. I thawhpuite pawh an ni lo. Political party an ni lo va. I elpuite an ni hek lo. Dodalna leh sawiselna avanga hrehawm leh thawpik taka i awm a nih chuan – chu phurrit chu mi dang atanga lo kal a ni lo va. Setana atanga lo kal ngei a ni.

Thupuan 12:10 ah chuan Setana chu, “Kan unaute hektu” a ti a ni. Tawngkam danga sawi chuan, Kristian te hektu a ni a. A thiltum hmasaber chu paihthlak che a ni.

Thlarau lama indona hi hmuh theih lohin a awm reng a. Thil tha i tihna lama tibuaitu che hi mi dang an ni lo. Chungte chu hmanrua mai an ni. Thenkhatte chuan hmanruaah an tang a ni tih an inhre lo va. A nihna takah chuan thlarau lama indona a ni.

Ephesi 6:12 ah chuan, “Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh, van hmunahte thlarau sualho awmte an ni zawk e,” a ti.

Setanan a pawng a taka Isua Krista beih chu awmzia a nei loin a hria a, chu ai chuan Isua zuitute a bei ta zawk a ni. Isua neitute tibuai turin media te, music te, tunlaina leh thil dang tam tak a hmang thin a ni. Hnung lam atangin, “Kristiante chu an thing tawh a. An thil sawi awmzia an hre lo va. An rinna hi awmzia a nei lo,” a ti a ni. 

Bible-in a sawi ang hian zawm ang che: “Indonate a hring thin tih hriain, inhnialna atthlak leh fing lovahte chuan tel duh suh. Lalpa bawih chuan do tur a ni si lo va, mi zawng zawng chungah zaidamin, zirtir thiamin, sual chungah dawhtheiin, do tura insiamte chu thuhnuairawlh takin a zirtir zawk tur a ni … Pathian duh zawng ti atan Lalpa bawihin a manin, Diabola thang ata an chhuak thei mahna.” 2 Timothea 2:23-26

I nunah Thlarau Thianghlim ila nei lo a nih chuan, Setana hnen atangin invenna i nei lo tihna a ni. I rilru a thlaksak thei che a. Mi dang thik tur tein a ti che a. Depression thlengin a neihtir hial thei che a.  A ti thinrim thei bawk che a ni.

Chak ve tawkah i inngai maithei e, mahse nangmah maia Setana bei tur chuan i chak tawk lo va. I tih tur zawk a chu khawi atanga lo kal nge tiin – Sual chu i hriatchhuah a ngai a, mimal haw lo vin – Isuan a tih dan tur angin ti zawk ang che.  

Isuan amah dodaltu kha engtin nge a tih? Kraws lerah ngei pawh khan, “Ka Pa, anni hi ngaidam rawh; an thiltih hi an hre lo a nih hi,” a ti a ni. Luka 23:34

Nangmah beitute hian an thiltih hi an hre tak tak lo va. Isua leh Kohhran leh Kristianna tiduhdahtute hian an thiltih hi an hre lo a ni.

Isua angin tawngtai la, “Ka pa, ngaidam rawh” i tih chuan beihna i tawhna karah pawh hmangaihna i lantir thei ang a. Tichuan i hmelma tak tak bei turin chakna i neih belh zawk ang.

Ngaihtuah zui atan. 

* Mi an thiltih sual phenah Setana a awm a nih chuan, engtin nge Pathian hmaah an thil tih chu an sawi fihlim theih ang?

* Mi i ngaihdam theih hian tisa, rilru leh thlarauvah eng nge nghawng a neih le?  

* Setanan awlsam taka a beih theihna tur che eng lai che? Chungah te chuan i rinna a thanlen theih nan leh nghet taka i din theih nan Pathian dil ang che. 

*[Lettu: Sangpuia]*

Tuesday, May 30, 2023

PATHIAN REMTIHZAWNG A NIH CHUAN A TAWK

 _Malsawmna Dawng Nun Rahbi_ 

*PATHIAN REMTIHZAWNG A NIH CHUAN A TAWK*

— Rick Warren 

— May 30, 2023


“Kristian nih avanga tuar chu a zahthlak lo ve. A hming vanga koh kan nih avangin Lapa chu fakin awm rawh se.” 1 Petera 4:16

Thudikah i tang a, thil dik i ti a nih chuan a zahthlak lo a ni. Bible chuan 1 Petera 4:16 ah, “Kristian nih avanga tuar chu a zahthlak lo ve. A hming vanga koh kan nih avangin Lapa chu fakin awm rawh se,” a ti.

Heti hian ka zawt ang che: Nuihsawhna mai chuan a that dawn che em ni? Ni lo e. Paihthlak tumna chuan a that dawn che em ni? Ni lo e. Online-a insawichhiatna mai mai leh inhnialna chuan a paihthla dawn che em ni? Ni lo ve. Eng thil mah hian a that lo vang che. Dik tak chuan, eng thil mah khian i nun tak takah nghawng a nei pha lo a ni.     

He thudik hi i hria a nih chuan i nun a vawrh kang daih ang che: Hlim turin mi dang remtihna i lak a ngai reng reng lo.

Kha leh chen kha mi dang remtihna emaw pawlho remtihna emaw i lo zawng thin a nih chuan, hrilh che ka chak lo, amaherawhchu, tun thlenga ila la lo a nih chuan, i nei ngai lo vang. Thu lawmawm deuh chu, i mamawhlo tih hi a ni! Hlim turin mi dang tuma remtihna i lak a ngai lo.

Hringnunah hian eng pawh ti la, sawiseltu chu an awm dawn tho. Hei hi chu pumpelh theih a ni lo. Thil tha i ti emaw thil tha lo i ti emaw mi sawisel hi chu i hlawh dawn tho tho a ni.

Dodaltu che an awm a nih chuan, hei hi hre reng rawh: Pathian ngaidan aia mi dang ngaihdan a pawimawh zawk a nih ngat chuan, Isua i rin avanga an beihna cheah harsatna i tawk dawn a ni. Amaherawhchu Pathian chauh i en a, i thiltih a dik a nih bawk chuan, nghet takin i ding thei ang.

Heng thu hian inthlamuan thin rawh u: “In unau khawvela awmhote chungah chuan chutianga tuarna chu a thleng ve a ni tih hriain, ring nghet taka awmin amah [Setana] chu do rawh u.” 1 Petera 5:9

Ngaihtuah zui atan. 

* Thudik tanna hun a lo thlen tikah, mi dang remtihna lak chungchangah engtin nge i ngaihdan a nghawng ang?

* I rinna chungchangah dodalna awm se, ding nghet turin khawi atangin nge phurna i neih theih ang?  

* Miin i rinna avangin lo dodal ta che sela, khawvel hmun hrang hranga ringtute pawhin hrehawm an tuar a ni tih i hriatna chuan chakna engtin nge a pek theih ang che? 

*[Lettu: Sangpuia]*

Monday, May 29, 2023

A CHHAN CHHUI AIIN INREM LEHNA ZAWNG ZAWK RAWH

 _Malsawm Dawng Nun Rahbi_

- Rick Warren 

- May 29, 2023

_"Pathian chuan Krista kal tlangin amah nen inrem lehna a siam a, midangte nen pawh inrem tura rawngbawlna min pe bawk. Heti hian kan sawi thei bawk ang, Pathianin mihringte nena an inzawmna siamṭha leh turin Krista a rawn hmang a. An dik lohnate chu anmahni beih let nana hmang lovin chu inzawmna siamthar lehna chu midangte hrilh zel turin min ti a ni."_ (2 Kor. 5:18-19, GW)

Inlaichinna a inrem lohna siamṭhat i duh chuan  a chhan chhui vak lam ni lovin inrem lehna lam i ngaihtuah a ngai.

Heng thil pahnihte hian danglamna lian tak an nei.

Imrem lehna chu inlaichinna tihngheh lehna a ni. I nupui/pasal hlui kha i nei leh ang tihna lam erawh a ni lo, in inrem tihna mai a ni.

A chhan zir chianna chu in thu inhmuh lohna zawng zawng chinfelna a ni thung a - chu chu awlsam takin a thleng mai dawn lo. A dik tak chuan nupa in nihnaah te, ṭhian in nihnaah te, hnathawkho in nihnaah te in thu a in hmu vek lo vang; a chhanchu, kan danglam vek a ni. Mahse, in mil lohna nei lovin thu in hmu si lovin a awm theih. Chu chu puitlinna a ni. Chu chu finna a ni a. Chu chu Lal Isua anna a ni.

Inan tlanna awm lovin kan inpumkhat thei. Thu in hmu si lovin lungrual takin a kal theih. Ka nupui, Kay-i nen hian kum 40 lai kan innei tawh a, thil tam takah kan thu a in hmu lo fo. Mahse, in dawm tawnin lungrual takin kan kal ṭhin. Kan inrem a ni.

Nupate ka ti ti puina aṭangin hengte hi ka zir chhuak: inlaichinna siamṭhatna lam i thlir lutuk chuan, in buaina ber kha pawimawh lovah a lo chang thei tlat. Vawi engzat nge thil ho te te vanga nasa taka inhnial ṭhin. Thil te te avangin kan inhnial fo a, mahse, a tak takah chuan kan inhnial chhan ril ber a ni tlat lo, buaina lian zawk vang a ni fo. Thil zawng zawng a ngaihdan inang diak diak neih tum aiin in inlaichinna in ngaihtuah a ngai zawk a ni.

He khawvelah hian inbeihna tam tak a awm. Khawvel hi indona, inṭhenna, inhnialna, ngaihdan siam zung zungna, chi inthliarna, inrikrâpna leh thlawptu zawnnain a khat a ni ber. Chumiin nghawng chu inlaichinna keh chhia hi a ni. Ei leh barah kan keh chhia a, sorkar a keh chhia a, inneihna te a keh chhe bawk. Nun keh chhia leh thinlung keh chhia kan lo awm hial bawk.

He khawvel inbeihna tam tak karah hian ringtu i nih ang takin inrem lehna thlentirtu ni turin ka cho duh che. Mite ṭhen hrangtu ni lovin huikhawmtu nih tum rawh.

2 Kor. 5:18-19ah chuan heti hian kan hmu, _"Pathian chuan Krista kal tlangin amah nen inrem lehna a siam a, midangte nen pawh inrem tura rawngbawlna min pe bawk. Heti hian kan sawi thei bawk ang, Pathianin mihringte nena an inzawmna siamṭha leh turin Krista a rawn hmang a. An dik lohnate chu anmahni beih let nana hmang lovin chu inzawmna siamthar lehna chu midangte hrilh zel turin min ti a ni."_ (2 Kor. 5:18-19, GW)

Isua Krista zuitu i nih chuan inrem lehna hna thawktu tur i ni. Mite zingah chhuakin, "Amah nena inpawlna in neih leh theihna turin Pathianin engkim a thawk a ni. I sual man zawng zawng a pe tawh. A hmelma i nih a ngai lo ve. I chungah a thinrim lova, a hmangaih zawk che a ni. Pathianah awm la. Pathian nen inremin awm rawh u. Tin, chu inremna chu mite hnenah puang rawh."

Ngaihtuah chhunzawm atan.

In nupa karah emaw i ṭhiante nen in inkarah emaw eng inhnialna nge in sawi fel theih loh le?

Chu inlaichinna chu siamṭhat leh tuma bei lova inremna kawng zawng turin engnge i tih theih le?

In chhungkuaah emaw, hnathawhnaah emaw, khawtlangah emaw engtinnge inremna palai ni turin i thawh theih ang?

[Lettu: Mapuia Fanai]

Sunday, May 28, 2023

DODALNA I TAWHIN LUNGNGAI MAI LOVIN PATHIAN BE ZAWK RAWH

 _Malsawm Dawng Nun Rahbi_

- Rick Warren 

- May 28, 2023

_"Nimahsela, felna avanga lo tuar ta ang in nih chuan in eng a thawl ang. An hlauhawmna chu hlau suh ula, mangang hek suh u; amaherawhchu in thinlungah Krista chu Lalah ruat rawh u; nangmahnia awm in beisei chhan zawt apiang che u chhang turin inpeih sa fo ang che u, nimahsela thuhnuairawlh tak leh tih dek chungin."_ (1 Petera 3:14-15)

Kristianna hi mi derdêp, mi chak lo leh mi dawihzepte tan a ni lo. Isua hnung zui tura mi huaisente a kohna zawk a ni.

Engin nge Isua hnung zui tura ti che? Khawvel hmun danga kristiante hmachhawn ang nekchepna i tawk ve lo a ni mai thei. Mahse kan nunphung hi kristianna kalh leh khawvel zawnga a kal nasat avang hian lang lo lam aṭanga nawrna i tawk reng mai thei. 

Khawi aṭanga lokal pawh ni la i rinna avanga dodalna i tawhin hlauhthawnna neih kha a nih dan tur a ni. Anih leh engtinnge dodalna hlauhna ata chu i zalen ang? Engtinnge pawmsak loh nih hlauhna ata i zalen ang? Engtinnge hnawl nih hlauhna ata i zalen ang? 

Pathian hmangaiha chhun khah i nih a ngai. Bible chuan heti hian a ti, _"Hmangaihnaah chuan hlauhna reng a awm lo: hmangaihna famkimin hlauhna a hnawt chhuak zawk ṭhin a ni"_ (1 Johana 4:18). Dodalna i tawhin Pathianin a hmangaihna che kha thlir tlat zawk rawh. Pathian hmangaihnaa chawlte chuan hnawl leh pawm loh nih an hlau tawh lo.

1 Petera 3:14-15 ah chuan heti hian kan hmu, _"Nimahsela, felna avanga lo tuar ta ang in nih chuan in eng a thawl ang. An hlauhawmna chu hlau suh ula, mangang hek suh u; amaherawhchu in thinlungah Krista chu Lalah ruat rawh u; nangmahnia awm in beisei chhan zawt apiang che u chhang turin inpeih sa fo ang che u, nimahsela thuhnuairawlh tak leh tih dek chungin."_

I rinna chungchanga ngawi tura tih ni a i inhriat chuan duhthlang thei i ni: lungngaih i thlang thei a, Pathian chibai buk i thlang thei bawk. A awmzia chu, lungngai taka awm emaw i ṭawngṭai emaw i thlang thei tihna a ni a; harsatna, turtu che leh tawrhna i thlir thei a, Pathian lam i thlir zawk thei bawk.

I rinna avanga dodal i tawk anih chuan nekin i awm dawn. Mahse chu nekchepna lak ata chu i mit la sawn la Pathian lam thlir zawk rawh. Ṭawngkam dangin sawi ta ila, Pathian chibai buk thlang rawh- a chhan chu Pathian lam thlir hi chibai bukna a ni.

I rinna avanga dodalna i tawk leh anih chuan lungngaih aiah Pathian chibai buk thlang rawh.

Ngaihtuah zui atan.

I rinna avangin eng ang dodalna nge i tawh tawh le?

1 Petera 3:14-ah chuan thil ṭha tih avanga i tawrh chuan Pathianin lawmman a pe dawn che tih min hrilh. Engtinnge Pathianin chumi kawngah chuan lawmman a pek ang che?

I rinna avanga dodal i tawhin, khawi aṭangin nge Pathian hmangaihna thutiam chu khawiah nge i hmuh?

[Lettu: Mapuia Fanai]

Saturday, May 27, 2023

DODAL I NIHA I HRIAT RENG TUR THIL PATHUMTE

 _Malsawmna Dawng Nun Rahbi_

- Rick Warren

May 27, 2023


"Felna avanga tihduhdah tuar hnute chu an eng a thawl e; van ram an ta a ni si a. Miin keimah avanga an hau che u a, an tihduhdah che u a, dawta sual tinrenga an hek hunah che u, in eng a la thawl ang. Lawm ulangin, nasa takin hlim rawh u; vanah in lawmman a awm hnem si a; chutiang bawkin in hmaa zawlnei awmte pawh an tihduhdah thin kha." Matthaia 5:10-12.


Isua i hmangaih avang leh mi dangten an hmangaih ve loh avangin an nek bik riau chein i hre thin em? Thil pathum i hriat tur a awm:


*1. Dodalna hian Isua ang turin a siam thei che*.

Isua chuan Johana 15:18-20-ah chuan heti hian a ti,  “Khawvelin a huat che u chuan, a huat hma che u pawhin keimah mi hua tih in hria e. Nangni khawvela mi ni ula, khawvelin amaha mi a hmangaih tur; khawvela mi in ni si lo va, khawvela mi ka thlan chhuah zawk che u avang hian khawvelin a hua che u a ni e. ‘Bawih a pu aiin a ropui lo,’ tih thu ka hrilh tawh che u kha hre reng rawh u. Annin kei mi tihduhdah tawh chuan nangni pawh an tiduhdah ang che u; ka thu an zawm tawh chuan nangni thu pawh an zawm ang" a ti a. 


Puitling zawk i nih a, Isua i an zawk deuh deuh dawn chuan Isuan a lo paltlang tawh, khawharna te, beidawnna te, hahna te, thlemna te thlengin i kaltlang ve a ngai a. Pathian chuan a fapa mal pawh a zuah loh laiin, nang chu a zuah dawn bik che em ni?


*2. Dodalna chuan i rinna a ti thuk ang.*

I rinna kha tihrawl ang deuh a ni a. Thutthlenga thil ei laiin tihrawl a thang ngai lova. Rit chawi tih tel loh chuan tihrawl a insiam thei lo a ni.


Dodaltu i nunah a awm loh chuan, i rinna chu a thang ngai lovang. Khawvelin ringtu ropui tak tak a hriatte hian an rinna fiahna an lo tawk tam ber a. 1 Petera 1:7 ah chuan, "In rinna fiahna, rangkachak meia fiah hnu pawha boral thin aia hlu zawk chu, Isua Krista inlar hunah chuan fakna leh chawimawina leh ropuina tur a lo nih theih nan" a ti. 


*3. Dodalna chuan chatuan lawmman a thlen ang che.* Matthaia 5:10-12 ah chuan, "Felna avanga tihduhdah tuar hnute chu an eng a thawl e; van ram an ta a ni si a. Miin keimah avanga an hau che u a, an tihduhdah che u a, dawta sual tinrenga an hek hunah che u, in eng a la thawl ang. Lawm ulangin, nasa takin hlim rawh u; vanah in lawmman a awm hnem si a; chutiang bawkin in hmaa zawlnei awmte pawh an tihduhdah thin kha" a ti a. 


Pathian chuan amah avanga tuar tute zawng zawng chu mal a sawm em em anga. Mahse sualna avang erawh chuan lawmman a awm lo thung. Mahni dik intihna nun nena tihduhdahna i lo tawk a nih pawhin, martar i ni lova lo, i inbum mai zawk a ni. 


Sual avang hian lawmman a awm lova. Isua i anna ang zelin lawmman an pe dawn che a ni. I rinna i nunchhuahpui khan, ngilneihna leh zahna nen ti zel la. Isua angin Vanah lawmman i la hmu ngei ang.


Rinna avanga tih nawmnah i tawh emaw pawh ni se, heng thil pathum te hi hre reng la: dodalna chuan Isua a  antir thei che a, i rinna a ti thuk anga, chatuan lawmman a pe bawk dawn che a ni.


Ngaihtuah zui atan...


Engtin nge i rinna kalh zawnga thil thleng chu i lo dawnsawn? I lo dawnsawn danin engtin nge Pathian nena in lendunna a tih danglam?


In hnam danah tihduhdahna hi eng ang nge ni ve le?


Khawvel pumpuia ringtu tihduhdah tuarte tan engtiangin nge Lalpan tawngtai tura min duh ni ang?


(Lettu: Msa)

Friday, May 26, 2023

INNGHIRNGHONAAH ISUA ANGA AWM

 Malsawmna Dawng Nun Rahbi

 By Rick Warren

— May 26, 2023

 

“Mahni ṭhatna tûr chauh zawng lovin, mi dang ṭhatna tûr pawh zawng rawh u. Krista Isua rilru ang hi nangni pawhin pu zêl rawh u.” [Philippi 2:4-5]

Tu emaw nena inbuaina chingfel tura in inhmuh changin nangma lama i dik lohna chu i sawi chhuak hmasa tur a ni. Tichuan chu mi natna leh thlirnate chu I ngaihthla zui dawn nia.

Innghirnghona a awmna reng rengah – mimal thu hla atanga ram rorelna huangah thlengin – thu inchuh kan nei emaw kan ti fo. Mahni thinlung [emotion] buaina a ni zawk fo. Buaina a awmna apiangah, tu emaw rilru chu tihnatin a awm tihna a ni a; tu emaw chuan tihnawmnah emaw hau emaw niin a inngai ṭhin. Thu inchuh kha buaina chawk chhuaktu an ni lo. A phena thinrimna emaw lungngaihna emaw kha a ni zawk.

Natna neitu chuan mi a tina ṭhin. Mi tu emawin natna a tuar ang zelin mi dang a tina ve viau thei. Natna tuar lotu chuan midang an tina meuh lo. Hmangaihnaa khat mihring chuan mite an Hmangaih riau zel bawk. Hlimnaa khat mihringte chu midang lakah hlimna an hmu thei a. Mahnia muanna neitute chuan midangte an kawm danah nun muanawm bik riau a awm zel. Natna neitu mihring chuan midang a tina fo. Midang an hliam hial ṭhin.

Midangte nena inzawmna in duh chuan an natna, an mamawhna, an thil tuizawng aṭangin bul ṭan ang che. Sumdawng hlawhtling tak nih i duh chuan i thil hralh tur aṭangin bul ṭan tum suh. Nangmah dawrtute natna, mamawhna leh tui zawng aṭangin ṭan ang che. Zirtirtu hlawhtling tak emaw, pastor emaw eng pawh ni duh la, mite mamawhna, natna leh tui zawng aṭangin bul ṭan ang che.  

Philipi 2: 4-5 chuan, “Mahni ṭhatna tûr chauh zawng lovin, mi dang ṭhatna tûr pawh zawng rawh u. Krista Isua rilru ang hi nangni pawhin pu zêl rawh u,” tiin a sawi.

Tute emaw nena buaina in neih changin i dinhmun chauh thlirin nangma lam dinna entir tuma i hmanhlel hle laiin an dinhmun i hmuh kan ve tawh em? Midang ngaithla thei lek lova kan ṭawng ve ve chuan kan rilru a lo inhlat tial tial zel a ni.

Tichuan, i thil mamawh aia midangte mamawhna i dah pawimawh hmasak a ngai ang. Mite nena buaina chinfelna chu i dinhmun i thlir dan aṭanga ṭan tur a ni. Philipi 2: 4-a “en” tih thumal chu Greek thumal "scopos" tih atanga lak a ni a. Chu chu “microscope” tih te, “telescope” tih thumal te nena huang khata awm an ni.

Scopos tih chu “en chik/en bing” tihna a ni. Chu thuchah chu Isua rilru put hmang ang chiah chu i nei tur a ni tih chuan a chhunzawm. Chumi awmzia chu mite harsatna i thlir hmasak chuan Isua mizia i nei tihna a ni ang.  

Thufing pakhat chuan hetiang hian a sawi, “Mite hriat thiam nih tum hmain midang hrethiamtu ni ang che” tiin a sawi. Nangma mizia mila mamawhna ni lova, midang mamawhna i dah hmasak chuan, thil dinhmun awmzia i hmu fiah deuh deuh ang a, mite buaina chingfel turin hma i sawn tihna a ni ang.

 Ngaihtuah zui atan.

 Isua nun khan engtiangin nge mahni pawimawh en lova mite mamawhna en hmasa turin min zirtir?

Mite mamawhna a tak taka thlir thiam tura inkawhhmuhna chu eng nge ni buainain a hual vel loh chang che chuan?

Buaina thuhlaa i inchinfel hma chuan engtin nge i lo inbuatsaih ang mite dinhmun ngaihtuah a, an dinhmunte hre chiang tur chuan?

I chatuan hmun khawiah nge i hman dawn?

Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.

[Lettu: Peka]

Thursday, May 25, 2023

INNGHIRNGHONA CHINFEL DAN RAHBI HMASA BER

 Malsawmna Dawng Nun Rahbi

By Rick Warren

— May 25, 2023

 

“Tin, engati nge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni? . . . Mi vervêk! I mit ata khanchhuk kha la chhuak hmasa rawh; chutichuan, i unau mit ata hmawlh tê tak tê lâk chhuah tûr chu fiah takin i hmu ang.” [Matthaia 7:3, 5]

 

Hringnuna thil pawimawh tak i zir ngei tur pakhat chu inghirnghona chinfel dan a ni. I zir thiam lo a nih chuan i dam chhung hun tam zawk hrehawm taka i hman a ngai ang – a chhan chu mi famkim lo i ni a, kan nunah hian nitin deuh thawh inghirnghona chuan min hual vel thung si.

 

Buaina ching fel tur chuan keimahni zawk kan pen chhuah hmasak a ṭul. Chutianga ti tur chuan, Pathian ṭanpuina dila i ṭawngṭai hmasak a ngai.

 

Mi tu emaw buaina i neihpui chu in buaina chingfel tura thu sawipui leh hmalakna nei tura ṭhutpui tur chuan mi huaisen nih hmasak a ngai. Chu rahbi chu i rap a nih chuan, miten an lo dai sual tawhna chu i zawh loh a ngai a; i lo nat tawhna ah chuan midang dem kual suh la. I tihsualna aṭang chuan bul ṭan ṭha leh ang che.

 

Tute emaw hnena ngaihdam dilna tur chu i nei fo vang. In innghirngho chhan chu 99.99 percent chu midang thiam loh pawh ni se, i tihsual lai chu i pawm mai thei ang. Nangmaha khakna awm i thunun loh vang a ni thei. I kalsan dan chiah pawh a ni thei ang.  

 

I nunah chak lohna i neih midangten an hmuh fo leh i hmuh ve ngai miah loh a awm. I chak lohna lai an ni thei. Chuvang tak chuan i harsatna su kiang turin inngaihtlawmna thinlung neiin  i chak lohna laiah chuan bul ṭan ang che.

 

Isua chuan hetiang hian a sawi, “Tin, engati nge mahni mita khanchhuk awm chu ngaihtuah si lovin, i unau mita hmawlh tê tak tê awm chu i hmuh ni? . . . Mi vervêk! I mit ata khanchhuk kha la chhuak hmasa rawh; chutichuan, i unau mit ata hmawlh tê tak tê lâk chhuah tûr chu fiah takin i hmu ang.” [Matthaia 7:3, 5]

 

I dinhmun hmu chiang thei lo tura i mit timimtu chu eng nge ni chiah? Mi tuten emaw an tihnat dan che chu sawiin i thiam lohna tarlang si lovin hma la mai suh ang che.

 

Mite hriatthiamna i neih lohna chuan innghirnghona a thlen em? I zuau leh lutuk zawk em? Nangmah tinatu che lakah chuan lainatna i lantir thei em? I phut sang lutuk em? Eng nge i chak lohna te chu ni mek?

 

Chungte chu i hriat chhuah a, i puan chhuah chiah chuan i nuna inghirnghona chingfel turin i inpeih tawh tihna a ni ang.

 

Ngaihtuah zui atan.

 

Kan sualna te chu hmu fiah thei lo turin engin nge min tibuai?

 

Mite dem mai lova ngaihdam dila bul ṭanna chuan midang nena in inlaichinna chu engtiangin nge a khawih danglam?

 

I nunah khan mite nena buaina chinfel loh han ngaihtuah teh. A chinfelna lam ngaihtuah turin engtin nge hma i lak ang? Engtin nge i chet chhuah hmasak ang?

 

[*Lettu:* Peka]

Wednesday, May 24, 2023

CHATUAN ENG HNUAIA NUN DAN TUR

  _Malsawmna Dawng Nun Rahbi_ 

— Rick Warren 

— May 24, 2023


“Ama ropuina leh thatna zara min kotu, a chanchin hriat avangin a Pathian thiltihtheihnain nunna leh Pathian ngaihsakna lam kawngah chuan thil zawng zawng min pe si a.” 2 Petera 1:3

Mi tam zawk chuan chatuan hun hi an bengkhawn lova. Tuna kan awmna hmun leh tun hun atan hian an insengso a, inkhawhralna mai a ni. Thil engkim “hetah, tunah” kan tihte chu minute nga hnuah chuan an ral mai dawn a, kum 50 a daih dawn lova – chatuan atan a daih dawn bawk hek lo. 

California atanga Tokyo thlenga hrui kan zam chuan chatuan a daih maithei, he leia i nunna chu milimeter khat pawh a daih lo maithei thung.

A nih chuan engtin nge chatuana eng hnuaiah chuan i nun ang? Pathian ropuina hnuaiah nung ang che, a chhan chu vanramah pawh a ropuina min temtir ve dawn si a.

Bible in 2 Petera 1:3 ah, “Ama ropuina leh thatna zara min kotu, a chanchin hriat avangin a Pathian thiltihtheihnain nunna leh Pathian ngaihsakna lam kawngah chuan thil zawng zawng min pe si a,” a ti.

I nunnaah eng nge lo thleng zel dawn tih chu i thlan theih a ni lova. Amaherawhchu i hmachhawn dan tur chu i thlan ve fo a ngai a ni. 

I hmalam hun chu mi ti kher kher, sawisel ching, a thim zawnga thlir thin emaw ringhlel thin angin i hmachhawn thei a. Thil duhawm lo tak beiseiin thil tha lo tak pawh i paltlang thei bawk. Mi dang chunga khawngaihna nei lo leh mahni ropuina ngawt ngaihtuah pawhin i khawsa thei bawk.

A nih loh vek chuan hlim takin, thilphal tak leh mi khawngaihna neiin Pathian ropuina turin i khawsa thei bawk.

Eng zawk hian nge i nun tihlima i rin? Eng zawk hian nge hlawhtlinna chantir zawk che i rin? Eng zawk hian nge vanramah Pathian lawmna leh lawmman dawntir che i rin? 

Matthaia 5:16 chuan, “Chutiang bawkin in eng chu mi mithmuhin eng rawh se, chutichuan in thil tih thatte an hmu ang a, in Pa vana mi an chawimawi thei ang,” a ti.

Pathianin chhungte a duh avanga ama siamte kan ni a. Chatuanin ama chhungte nena cheng turin min duh a ni. Chatuanin nang leh kei hi chen dun puiah min duh a ni! Vanram hi lawmna i neihna chhan turte zinga pakhat a ni – Pathianin chatuana nunna min pe a, vanramah a kianga kan cheng ve mai tur hi mak tak a ni! . 

Ngaihtuah zui atan. 

* Pathianin chatuan atan he leia i hunah hian engtin nge a buatsaih che?

* Engtiangin nge lawmna leh thilphalna hian hlimna a thlen che?  

* Thil chhe ber i beisei hian, chu chuan Pathian i rinna dan engtin nge a a hrilhfiah? 

*Chatuan chungchangah rinhlelhna nei suh* 

Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi 2 : 8-9. 

I sualna te i puang duh a niha, i nunah Isua i thlang duh a nih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtik niah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Tuesday, May 23, 2023

RINNA NGHET NEI TURA PAWIMAWH KAWNG LI

  _Malsawmna Dawng Nun Rahbi_

— Rick Warren 

— May 23, 2023


“Pathian ngaihsak turin insawizawi rawh." 1 Timothea 4:7

Pathian hman theih nih i duh chuan, i rinna i tihngheh a ngai a ni.

Bible in 1 Timothea 4:7-ah, “Pathian ngaihsak turin insawizawi rawh,” min ti.

Mi tam tak chu zing an thawh hlimah, “Vawiin chu insawizawi ka ngai!” an ti a. Kei chuan ka ti ngai lem lo. Mahse tisa leh thlarau lamah insawizawi chu kan ngai vek. Hei pawh hi ka hria. Tisa emaw thlarau lam a ni emaw insawizawi hlawkna chu tel ka duh ve tho.

Thlarau lama insawizawina kawngah hlawkna nei turin, heng kawng li hi ti ṭhin la i rinna chu a nghet zual ang.  

*Bible Study.* Bible study mahnia neih hi a ṭha a ni. Mi dang Bible study kha i hlawkpui daih nachhan tur a awm lova. Rinna nghet nei tur chuan mahni ngeia Bible bih hi a ngai ve a ni.

Bible chuan, “Pathian Lehkha Thu zawng zawng hi Pathian thawk khuma pek a ni a, zirtir kawngah te, thiam loh chantir kawngah te, zilh kawngah te, felna zirtir kawngah te a sawt bawk a ni; Pathian mi chu hna tha tinreng thawk tura kim taka inthuamin a famkim theih nan.” (2 Timothea 3:16-17).

Pathian Thu hi kan hringnunah hna ṭha tinreng thawk turin a inpeih reng a ni. Pathian hman theiha awm reng i duh chuan Bible Study i neih ṭhin a ngai a ni.

*Kristian Lehkhabu chhiar rawh.* Thufingte 19:8 chuan, “Finna dawngtu chuan ama nunna a hmangaih thin a, hriatna vawngtu chuan thil ṭha a hmu ang,” a ti. Kristian lehkhabu i chhiar hian thlarau lamah ṭhanlenna a pe che a ni.

*I testimony ziakchhuak rawh.* Bible in 1 Petera 3:15 ah, “Amaherawhchu in thinlungah Krista chu Lalah ruat rawh u; nangmahnia awm in beisei chhan zawt apiang che u chhang turin inpeih sa fo ang che u, nimahsela thuhnuairawlh tak leh ṭih dek chungin,” a ti. Tuman an zirsak thei lo che ang deuh khan, tuman i chanchin hi an sawisak thei lo che a ni. Testimony chu kawngli ah ṭhen theih a ni a: Krista i neih hmaa i nun, Krista i mamawh a ni tih i inhriatchhuah dan, Kristaa i in tlukluh dan leh tuna i nundan te a ni.

*Small Group zawmpui nei rawh.* “In thil intihsak tawnna lamah leh, mi zawng zawng chunga in tihsakna lamah pawh, a ṭha apiang um fo zawk rawh u.” (1 Thessalonika 5:11). Rinna tinghet zel turin, i small group zawm te nena inailumtawn reng a ngai a ni. Small group zawm i neih loh phei chuan, rinna kawnga i ṭhan nan leh i thupaite sawipui tur mi i zawn a ngai a ni.

Pathian hman theiha awm reng i duh chuan heng kawngli te hian Rinna kawngah a tinghet ang che. Vawiin hian eng ber hi nge hman ṭan nghal i tum le?

Ngaihtuah zui atan

* Eng vangin nge Testimony ziak chu a ṭangkai nia i hriat ?

* I small group zawm chuan rinnaa ṭhanlenna kawngah engtin nge in inpuihtawn theih?

* Kristian lehkhabu chhiar zel turin engtin nge hun i insiam theih ang?

*[Lettu: Sangpuia]*

Monday, May 22, 2023

RINAWMNA NEI TURA THIL PAWWMAWH PARUK

  _Malsawm Dawng Nun Rahbi_

- Rick Warren 

- May 22, 2023


_"A lang lo lamah fing takin kan hruai kawi lo va. Kan duh ang mil turin Pathian thu kan her danglam hek lo. Kan tih apiang tlang takin kan tarlang zawk ṭhin."_ (2 Kor. 4:2, MSG)


Felna/Rinawmna nun nei tur chuan i nunkawng engkim mai kha ang khat tlata i enkawl a ṭul ang. I eizawnna kawnga hlawhtlinna neih i tum ang tho khan nupa inkarah pawh hlawhtlinna neih i duh ang. Fate enkawlna kawnga hlawhtlinna neih i duh ang tiat thoin rawngbawlna kawngah pawh hlawhtlin i duh ang.


Tunkar chhung hian rinawmna nun i neih theih nan kawng paruk ka kawhhmuh ang che. Hetia i tih hian mi fel/dik i lo ni ang:


*1. I thutiam i hlenin.*

Mi dik/fel chu an thuah an ding nghet ṭhin. An ti dawn tih an sawi tawh chuan an ti mai zel. Chutah chuan ka lo awm ang an tih chuan an lo awm ngei ṭhin. Thufingte 25:14-ah chuan heti hian kan hmu, _"A pêk loh pui pea insawi a, uangthuang chu ruahtui pai lo chhum leh thli ang a ni."_


*2. Sum puk rulh kawngah*

Hei hi thil hote emaw i ti mai thei, mahse Pathian mithmuhah a ho miah lo. I thawh chhuah aia tam sum i khawh ral em? I hmang ral a nih chuan thil dik a ni lo. I pek tlak theih loh ba i nei em? Chu pawh chu thil dik a ni hauh lo. Sam 37:21-ah chuan heti hian kan hmu, _"Misual chuan a pûk a, a rul ngai lo"_ tiin (GNT).


*3. Mi rel duh miah lohna*

Pathianin mipa leh hmeichhia, mi invawng fel tak thuruk vawng tlat mi, _social media_ vela vawrh darh mai mai ngai lo tur mi a zawng reng a ni. Mi, an hnung lam aṭanga rel ching suh. Chutiang ang i hriat pawhin ngaihthla duh miah suh, a chhan chu _"Mi kamtam tei ruai mi chuan thurukte a tilang a, mi rilru rinawm nei mi chuan thil a thup ṭhin."_ tih kan hmu (Thufingte 11:23)


*4. Sawma pakhat rinawm taka pek*

I sum i dah hmasakna apiang chu i ngaih pawimawh ber thil a ni ṭhin. Bible chuan heti hian min hrilh, _"Mihringin Pathian ata chu a rûksak tûr em ni? Mahse nangni chuan min rûksak thin. Nangni erawh chuan, Engahte hian nge kan rûksak che? In ti a, Sâwma pakhat leh thilhlanahte hian . . . Ka inah eitûr a awm theih nân sâwma pakhat zawng zawng chu thawhlawm inah rawn la rawh u, vân tukverhte chu hawnsak che uin Malsawmna dawn sên loh khawp hial ka vûr dawn che u nge dawn lo, mi han fiah teh rêng u, Sipaihote LALPA chuan a ti."_ (Malakia 3:8-10)


*5. I theihna sang ber pe zelin*

Kolossa 3:23-ah chuan heti hian kan hmu, _"Mihring tan ni lovin Pathian tan in thawk a ni tih rilru pu chungin phur takin thawk rawh u"_ (NLT). Ringtu i nih chuan i hotu lu ber chu Pathian a ni a, tumahin an hmu lo che anih pawhin Pathianin a hmu reng che a ni.


*6. Mite hmuha nun tak neih*

Mi rinawm chuan biak inah nun dang neiin a thawhna hmunah nun dang a nei leh daih ngai lo. _"A lang lo lamah fing takin kan hruai kawi lo va. Kan duh ang mil turin Pathian thu kan her danglam hek lo. Kan tih apiang tlang takin kan tarlang zawk ṭhin."_ (2 Kor. 4:2, MSG)


Ngaihtuah zui atan.


Mite relnaa tel lo turin emaw mite sawichhiatna fuih pawrh lo turin engtinnge i tih?


Rinawmna nun vawn nunna atana pawimawh em em mai i thutiam engte nge i hlen loh le?


Pathian hi a hring a hranin i hnathawhna pu ber dawhkanah ṭhuin lo vil ta che sela engtingnge i chet dan leh thawh dan i tih danglam ang?


[Lettu: Mapuia Fanai]

Sunday, May 21, 2023

THIL DIK TAKA VAWN ANIH NAN ENGNGE I MAMAWH LE?

 _Malsawmna Dawng Nun Rahbi_

- Rick Warren 

- May 21, 2023



_"Tleirawlin engtin nge a awm dan a tihthianghlim ang? I thu ang zela a awm dan veng thain."_ (Sam 119:9)


Khawvel hmun hrang hranga hnam tinte hian an lan dan leh kan hlimthla an ngai pawimawh khawp mai. Hmanhmawh takin an kal a, an kal pah mai mai a, an bum bawk ṭhin. An thutiam an hlen lo va. An nihna ni lo anga lan an tum bawk. Inlungrualna nun an nei lo, mi bum hmang an ni tiin kan sawi thei bawk ang.


Hmasang Greek nunphungah chuan lemchang thiamte hi bum hmang mi an ti ṭhin, a chhan chu an nihna ni miah lo anga an lan ṭhin avangin. Chutah chuan "bum hmang" tih ṭawngkam hi kan lo nei ta a ni.


Lehlama i awr a duma lehlama i awr a sen leh si chuan tunlaia bum hmang i ni tihna a ni ve mai. Takna nun i tlachham tih i lantir a ni. Mahse Pathian chuan mi tupawhin an thlir che anih pawhin a siam dan che anga i nun a duh a ni.


Anih chuan, Isua zuitu i nihna angin engtinnge lemchang nun tam tak karah nun tak i neih theih ang?


Kawng khat chiah a awm. Mite thlir dan leh pawm dan ni lovin Pathianin a en dan che i dah pawimawh zawk a ngai. Chutiang chauh chuan nun tak i nei thei ang.


Pathianin engtinnge a ngaih tih i thlir chuan thil dik i ti ang. Mahse mite ngaihdan ringawt i dah pawimawh chuan thil dik lo i ti fo ang.


Sam 119:9-ah chuan heti hian kan hmu, _"Tleirawlin engtin nge a awm dan a tihthianghlim ang? I thu ang zela a awm dan veng thain."_


Pathianin engnge a pawma engtinnge a ngaih che tih hriat theihna awm chhun chu Bible chhiar hi a ni. Pathian thuah i awm reng a ngai! I awm lo anih chuan dikna nun nun chhuahpui turin chakna leh theihna i nei lovang.


Nitin fianriala Pathian pawlna ka neih loh chuan, ni rei lote chauh pawh ka nei lo anih chuan keimah mai bakah midangin an hre thuai thei ang, a chhan chu ka tlakhniam telh telh avangin. A thu kaltlanga Pathian ka zawm loh chuan i hnenah Pathian thu sawifiah turin Thlarau nun lamah chakna ka nei lovang. Dikna nena nung thei turin chakna ka nei lovang.


Felna nena nung tur chuan thlarau thiltihtihtheihna a ngai, a chhan chu a lar lo zawk hi a dik zawk a nih fo avangin. Mahni mai chuan thil ṭha tih i tumna, thil dik tih tumna leh rilru dik pu turin lamah i chau ang. Chuvang chuan ralthuam famkima inthuam i ngai a ni.


Khawiah nge awm mahla dikna nun nei mi nih i duh em? I duh chuan nitin Pathian thu, Bible chhiara zir turin inpe rawh. Chutah tak chuan thlarau nuna i mamawh tak kha i hmu ang.


Ngaihtuah zui atan.


Engtinnge Pathian thu chhiar hian chakna min pek?


Engtinnge Bible chang vawn hlutzia i lo hriat tawh?


Thutlukna  dik, mahse a tam zawk rin dan lo zawk a thutlukna dik i siam theih nan Bible-a Pathian thutiamte engnge le?


[Lettu: Mapuia Fanai]

Saturday, May 20, 2023

ENGTIN NGE FELNA CHUAN MALSAWMNA A THLEN CHE

 _Malsawmna Dawng Nun Rahbi_

- Rick Warren

May 20, 2023



"Mifel chuan a felna milin a nung a. A awm loh hnu pawhin a fate chu malsawm an ni ang" Thufingte 20:7 (GW)


Bible chuan Isuan Matthaia 5:8-ah "Thinlunga thianghlimte chu an eng a thawl e" ti a a sawi angin thinlunga thianghlimna neite chu Pathianin mal a sawm thin tih a sawi.


Chuti a nih chuan i nun dik tak leh felna nen chuan eng malsawmna nge i beisei theih le? 


*Mahni inrintawkna malsawmna i dawng ang.*

Felna i neih chuan mi dangten a kianga an awm chakna ang mi i lo ni ang. A chhan chu tunge i nih leh khawi lam hawi nge i nih i inhria a ni.


Thufingte 10:9-ah chhuan, "Felna nen him takin mi a kal thin a. Mahse kawng tha lo zawhtu erawh chu hailan a la ni ang" a ti. 


Felna i neih loh chuan, vur thli a tleh chiam hnua vur chunga kal ang a ni. Thahrui i neih zawng zawngte chu i tluk lohna turin i hman a ngai a. Mahse felna i neih chuan, lei nghetah i ding ang hi a ni.


*Rochun tur tha tak i nei ang.*

I rochun theih tha ber chu i felna kha a ni. A chhan chu chhuan thar apiangah an inhlan dawn a ni. Thil dang i tih reng reng erawh chu an ral mai thin a. I boral hnu chuan i sum te chu i chhungten an insem vek mai ang a. I thawhrah chu mi dang ta a lo ni ang a. I lawmman dawn ve tawhte chu bawlhhlawh bawma paih a, bawlhhlawh halna hmuna paih daih a la ni ang. 


Mahse i nungchang erawh chuan i bula mite a ti danglam thei a, i thlahte thleng pawhin. Thil rochun ngelnghet tak a ni thei a ni.


Bible chuan Thufingte 20:7-ah chuan, "Mifel chuan a felna milin a nung a. A awm loh hnu pawhin a fate chu malsawm an ni ang" a ti.


*Chatuan lawmman malsawmna i la dawng ang.*

Matthaia 25:21-ah chuan, "A pu chuan a hnenah, ‘Bawi tha leh rinawm, i titha e; tlemte chungah i rinawm a, tam tak chungah ka awmtir ang che; i pu lawmnaah lut rawh" a ti.


Mi zawng zawngin min en lai, kan nuna hun ropui lai takin lawmman chu dawng turah kan inngai fova. Mahse felna dik tak tilangtu chu hun rei lo te te a ni thung. Tunkar chhunga mi dangte fuihna i sawi zawng zawngte kha chatuan atan lawmman pek a la ni ang a. Ngilneihna i lantir te khan lawmman a la nei ang. Thlemna i hnar apiangte avang khan chatuana lawmman pek ila ni ang.


Felna hian thil a ti thei hle a. Tun atan chauh ni lo, chatuan atan danglamna a thlen thin a ni. 


Ngaihtuah zui atan...


Felna i neih ngei a tul hun, mahse nei si lova i inhriat hun kha ngaihtuah let la. I rilru, thlarau leh taksa lamah engtin nge a nghawng che?


Felnna chuan chhuan tharah eng nge a thlen?


Mite hriat loh mahse Pathianin i felna tia chatuan atana a la tarlansak tur che eng thil nge awm?


(Lettu: Msa)

Friday, May 19, 2023

VANTLANG ZINGA I AWM DAN LEH A FALA I AWM DAN A IN ANG EM?

 Malsawmna Dawng Nun Rahbi

By Rick Warren

— May 19, 2023



“Thinlunga thianghlimte chu an eng a thâwl e; Pathian an la hmu dâwn si a.” [Matthaia 5:8]


I nun kha thil tlo tura remchhoh a ni em? A nih chuan, dik taka i nun kha i hman a ngai ang. 


Bible-a Matthaia 5:8 chuan, “Thinlunga thianghlimte chu an eng a thâwl e; Pathian an la hmu dâwn si a,” tiin a sawi. 


“Pathian hmu” tih awmzia chu Pathian chenchilhna leh nihna hriat a ni. Ringtu thinlung thianghlimte chuan Pathian thiltihtheihna an chang ṭhin. Pathian ngaihdamna an chang a ni. An nuna Pathian thil ruahman chu an hmufiah a. Pathian remna nunah chuan an nun an hmang a ni. 


Chutiang mi nih chu i duh ve em? Tun lai chu rilrua thianghlim tih thu hi kan sawi tam lo khawp mai, chu aiah chuan “nun tlang” tih thumal nena inhnaih tak kan sawi thung. 


“Nun tlang” tih awmzia chu nun famkim tihna a ni lo, a chhan chu famkim tihna a nih chuan tute mahin kan nei lo vang! Tichuan nun tlang tih awmzia chu eng nge ni ta ang? 


Nun tlang chu nun huapzo a ni. 

Mi tam tak chuan an nun chu chhang bial angin an ngai a, tichuan an nun bung hrang hrangte chu chhang bial chhunga pakhat angin an ngai. Ṭhenkhat chuan an nun chu hetiang deuh hian an ngaihtuah: 


“He phel khat hi ka eizawnna a ni a. Hei hi ka hna a ni a. Hei hi ka thlarau nun. Tichuan, hei hi kan chhungkaw nun a ni a. Hei hi mite nena kan inzawmna a ni thung. Hei hi ka thuruk a ni a – ka tih tur, hei hi ka thil chin dawklak, tu mahin min hriatpui a thiang lo.”


I nun peng hrang hrangte chu chutianga an awm chuan i nun chu a tlang lo tihna a ni. Nun tlang tih awmzia chu mi tin kianga i awm dan leh hmun hrang hranga i awm dan chu a inang lo a ni – i thusawiah, i thiltihah, i thil tumah – eng nun pawh i kaltlang mek a ni thei. 


Nun tlang chu thiltum bawrhbanna awm lo a ni. Tlang taka i nun i hmang a nih chuan thil dik tak i ti a, i tihchhan pawh a dik ang. Rilru bawlhlawh lo, rilru ding tak i pu a ni. I thiltih apiangah dawngdah lo leh tlang takin mitin bulah i khawsa a ni. I ṭawngṭai pawhin mi tute emaw hneh i tum vang ni lovin Pathian i biak theih nan hun i hmang a ni. 


Bible chuan hetiangin a sawi, “Lalpan rilru kawi a ten a,

Rilru ngîlte erawh chu a ngaina” tiin. [Thufingte 11:20 NLT] 


Keini chuan lan mawi kan thlakhlelh laiin Pathian chuan nun tlang a ngaina fo. Keini chu hmingṭhat kan duh a, Pathian erawhin nungchang a ngai pawimawh. Hmingṭhatna chu miten an hmuh dan che chu a ni; nun tlang chu i nihna dik tak kha a ni. I hmingṭhatna chu vantlang zinga I lan dan chu a ni ber a; nun tlang erawh chuan a fala Pathian nena in inlaichinna chu a ni daih. 


I nungchang leh nun dik aiin i pawn lam lan dan leh hmingṭhatnate chu i lo ngai pawimawh tawh thin em? Vawiin hian tlang taka nung turin thutlukna siam rawh. 


Ngaihtuah zui atan. 


I khawsakpui te - i hnathawhpui, i zirpui, i ṭhenawm, i chhungkaw mi leh sa te, i ṭhiante – chuan an sawi dan che a inang vek ang em? Engvangin nge? 


Tu emaw dik leh tlang taka nun hmangtu han ngaihtuah teh. Chu mi hnen aṭang chuan eng emaw zir chhuah tur eng nge i neih?  


Engtik hunah nge mi tam berte chuan hmingṭhatna chu nungchang aia an ngaihhlut a vawnhim an duh ṭhin? Engvang nge ni ang? 


[*Lettu:* Peka]

Thursday, May 18, 2023

KHAWNGAIHNA LANTIR TURA RUAHMANNA SIAM

 Malsawmna Dawng Nun Rahbi

By Rick Warren

— May 18, 2023



“Mi khawngaih thei takte chu an eng a thâwl e; Khawngaih an la hlawh dâwn si a.” [Matthaia 5:7]


Pathian chuan kan chungah khawngaihna a lantir thin, kan phu lo chung leh kan thawh chhuah a ni lo chung pawhin. Keimahni lama tih theih ve mai awm chhun chu dil a ni: “Lalpa, nang chu i ṭha a, ngaihdam i peih reng a, I hming lamtu chungah chuan ngil i nei êm êm a ni.” [Sam 86: 5]


Nimin lam fianrial thuzirah khan khawngaihna awmzia leh nihna chi sarih kan sawi tawh a. Vawiin chuan, chung thil pasarihte chu in nuna in lanchhuahtir dan kan zirho dawn a ni. 


Engtin nge khawngaihna i lantir ang? 


*Mi khirh takte bulah dawhthei rawh.* I thiante zingah khan tu nge chenpui harsa em em chu? Tun karah hian an chungah engtin nge dawhtheihna i lantir ang? 


*Nangmah tinatu che chu ṭanpui rawh.* I chenpuite zingah khan tuin nge natna nei? Tun karah hian chu mi chu engtin nge i ṭanpui theih ang? Tu emaw tal i ngaihtuah chhuah theih loh chuan i vei tawk lo tihna a ni ang. Hawi vel rawh!


*Mite chu hun ṭha dang siamsak rawh.* Engvangin nge a vawihnihna atan hun ṭha i pek ang? Tun karah hian chu mi hnenah chuan engtin nge zahngaihna leh lainatna i lantir ang? 


*Nangmah tinatu che chungah ṭhat chhuah rawh.* Hun liam tawha i natna chuan a la bawh buai che a ni thei ang. Ngaidamin chu i thil tawn chu a ṭha zawngin her rem rawh. Chu mi chu tu nge ni? Tun karah hian chu mi chu phone-in emaw hmaichhanah emaw i be thei ang em? 


*I pawisawitu chungah lainatna lantir rawh.* Tuin nge tina che? Ram hruaitu emaw, fiamthu thiam satliah emaw pawh ni se i ṭawngṭaisak thei. I ṭhian ngaihdan hrang nei niin i tana thil pawi social media-a sawitu a ni thei bawk ang. Tun karah hian engtin nge a chunga ṭhat chhuah turin i beih theih ang? 


*Mi ngainat awm lote chu zawm ang che.* Mite ngaihnat loh mihring i mitthla changin tu nge i rilruah lo lang hmasa ber? Anmahnia mal tlat ngar ngar leh puipunna hmunah pawh anmahni maia thu ṭhin tu nge ni? Tun karah hian chu mi chu zawm turin eng thil nge i tih ang? 


*Dan aiin inlaichinna ngaihlu rawh.* Tunkar lo awm turah hian ring lo mi tu emaw zanriah sawm tur an awm ang em? Pen chhuakin chu mi chu kohhrana tel turin i sawm thei ang em? Chu chu khawngaih rawngbawlna a ni. 


Vawiin nia zawhna i neih zawng zawng chhanna chu ngaihtuah rawh. Chu chu Pathian khawngaihna i lantirna tur a ni. Pathian chuan a khawngaihna a chantir che. Chu khawngaihna chu midang hnena i thlen rual chiah chuan a tharin i chang ve nghal ang. 


Ngaihtuah zui atan. 


Heng khawngaihna lan chhuahtir dan kawng sarihte hi awlsam taka nangmaha awm mai a awm em? 


Heng khawngaihna lanchhuahtir dan pasarihah hian eng nge harsa ber? Engvang nge nia i hriat? 


Engtin nge miten khawngaihna an hmuhtir che? I nunah chu chuan eng nge danglamna a siam? 


Pathianin chatuan daih turin a tlan che. 


Chatuan daih tura siam i ni, ani chuan a chatuan chhungte zinga tel ve turin a duh che. Tiamkamna pakhat erawh a awm: Pathian chu a khawngaihna leh ngaihdamna i dil hmasak zet a ngai. Tirhkohte 2: 21 chuan hetiangin a sawi, “Tichuan, Lalpa hming lam apiang chu chhandam an ni ang,” a ti a. 


Pathian hmangaihna chu chang a, a tana nun hlan tura i inpeih a nih chuan he ṭawngṭaina hi hlan ang che: 


“Lalpa duhtak, Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”


Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 


[*Lettu:* Peka]

Wednesday, May 17, 2023

KHAWNGAIHNA NIHPHUNG PASARIH

  Malsawmna Dawng Nun Rahbi

— Rick Warren 

— May 17, 2023


“Chung lam atanga finna lo chhuak erawh chu atirin a thianghlim phawt a, chumi hnuah chuan inrem a duh a, a nunnem a, a tihnuam a, khawngaihna leh rah thain a khat a, thlei bik a nei lova, a vervek lo a ni.” Jakoba 3:17

In inlaichinnaah danglamna neih i duh em? Khawngaihna thlentu nih tum ang che.

Hengte hi khawngaihna nihphung pasarih Pathiain zirtir a tum che leh nunchhuah tir a tum che chu a ni.

*1. Khawngaihna chu midang chunga dawhtheihna a ni.*

Engtin nge i fate lakah te, i kawppui lakah te, i thawhpuite leh i thiante chungah dawhtheihna i lantir ang? Pathian hnenah finna dil ang che. Bible-a Jakoba 3:17 chuan heti hian min hrilh, “Chung lam atanga finna lo chhuak erawh chu atirin a thianghlim phawt a, chumi hnuah chuan inrem a duh a, a nunnem a, a tihnuam a, khawngaihna leh rah thain a khat a, thlei bik a nei lova, a vervek lo a ni.” 

*2. Khawngaihna chu tanpui ngaite tanpui hi a ni.* 

Khawngaihna tello chuan nangmah i in hmangaih ang chiahin midang i hmangaih thei lovang. Thufingte 3:27 ah hei hi kan hmu, “A phute tan thatna ui suh, i kuta tih theihna a awm phawt si chuan.” Lawm taka khawngaih turin min phut bawk. (Rom 12:8)

*3. Khawngaihna chu midangte hun remchang pek lehna hi a ni.*

Miin kan rilru an tihnat chuan, phuba lak emaw dahbo daih emaw kan duh thin. Mahse Bible chuan, “Khakna te, thinurna te, tauhna te … bansanin awm rawh se … inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u” min ti. Ephesi 4:31-32.  

*4. Khawngaihna chu min tinatute chunga thil tha tih hi a ni.*

Khawngaihna chu mite an phutawk ni lovin, an mamawh pek hi a ni. Chu chu kan chunga Pathian min tihdan pawh a ni: “In hmelmate hmangaih ula, an thatna tur ti ula, puktir rawh u, beidawng hauh lovin … in Pain mi a khawngaih angin mi khawngaih ve rawh u.” Luka 6:35-36.

*5. Khawngaihna chu min hawtute chunga lainatna lantir hi a ni.*

Krista hnena midangte hruai ai chuan inhnialnaa chak zawk nihte hi i rilruah a awm zawk mai thei. Juda 1:22-23 ah chuan hetiangin kan hmu, “Thenkhat ringhlela awmte chu khawngaih rawh u; thenkhat mei ata la chhuak thuai ula, chhandam rawh u; thenkhat an tisa bawlhhlawh kaina silhfen lam pawh chu tenin, hlau chungin khawngaih rawh u.”

*6. Khawngaihna chu mi sualte chunga hmangaihna lantir hi a ni.*

Pharisai ten Isua kha engati nge chhiahkhawntute leh misualte hnenah chaw a ei an tih khan, Isuan, “Inthawina duh lovin khawngaihna ka duh e … mi fel takte lam tura lo kal ka ni lo va, misualte zawk lam tura lo kal ka ni asin,” a ti a. Matthaia 9:13 

*7. Khawngaihna chuan dan aiin inlaichinna a ngai pawimawh a ni.*

Rom 13:10 chuan, “Hmangaihnain vengte a tikhawlo ngai lo va; chuvangin hmangaihna hi dan zawh famkimna a ni,” a ti. Khawngaihna lantir i duh chuan, an dan zam aiin mihring ngai pawimzawh zawk rawh. An inkaihhruaina aiin an mamawh ngai pawimawh zawk rawh. Dan leh dun aiin inlaichinna ngai pawimawh zawk la. Dan aiin hmangaih thlang zawk rawh.

Khawngaihna chu lantir mai a harsa thin a. Chuvangin naktuk lamah khawngaihna lantir dan zirho kan tum dawn nia.

Ngaihtuah zui atan. 

* Engvangin nge Krista hnena midangte hruai ai chuan inhnialnaa chak zawk nih hi kan rilruah a awm zawk?

* Khawngaihna chuan dan aiin inlaichinna a ngai pawimawh zawk a nih chuan, i fate nena in chenhona ah eng nge thlak danglam ngai i neih? I thawhpuite leh politic lama ngaihdan dang deuh neite chungah engtin nge i awm ang?  

* Nangmah tinatute chungah engtin nge tunkar chhung hian khawngaihna i lantir ang? 

*I nunah Pathian khawngaihna dawng turin i inpeih em?*

Isua kha rorelsak tur chein a lokal lo va. Khawngaihna lantir tur chein a lo kal zawk, a chhan chu, “Mi chunga khawngaihna neilo chu khawngaihna tel lovin rorelsakin a awm ang; khawngaihna hi rorelna aiin a chungnung zawk a ni.” Jakoba 2:13. Rorelna ni chu a awm ang. Mahse Isua kha khawngaihna lantir turin a lokal a, amah nena lengduna hlimna leh thiltihtheihna amah atanga chhuak i neih theihna turin. 

Mahse thil pakhat a la awm: Pathian ngaihdamna leh khawngaihna dil ang che. Tirhkohte 2:21 ah chuan, “Tupawh Lalpa hming lam apiang chu an him ang” a ti a ni. 

Bul tan tura i inpeih a nih chuan, hetiang hian tawngtai rawh le:

“Lalpa duh tak, rinna thuk tak leh nangmaha awm reng rinna neih ka duh e. Misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”

Isua vuan tura i ṭawngṭai thei a nih chuan, khawngaihin Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Tuesday, May 16, 2023

KHAWNGAIHNA NGAH A ṬULNA CHHAN KAWNG LI

  _Malsawmna Dawng Nun Rahbi_

By Rick Warren 

— May 16, 2023


"Mi khawngaih thei takte chu an eng a thawl e; khawngaih an la hlawh dawn si a.” Matthaia 5:7

Isuan Matthaia 5:7 ah, “Mi khawngaih thei takte chu an eng a thawl e; khawngaih an la hlawh dawn si a” a ti.

Ṭawngkam danga sawi chuan, i pek chhuah ang zelin i dawng ṭhin a ni. Pathian khawngaihna dawn i duh anih chuan khawngaihna nei tura i inzir angai tihna a ni ang.

Midang chungah khawngaihna lantir turin engvangin nge Pathianin a phut che? Engvangin nge khawngaihna i ngah a ṭul?

*Pathianin khawngaihna i chungah a lantir avangin.* Ephesi 2:4-5 chuan, “Nimahsela Pathian chuan khawngaihna a ngahin a mi hmangaihna nasa tak avang khan, kan bawhchhiatnate avanga thi kan nih lai meuh pawhin Krista rualin min tinung ve a, khawngaihnaa chhandam in ni ta e,” a ti.

Pathianin khawngaihna a hnen aṭanga i dawn chu midangah chungah pawh lantir ve turin a duh che a ni.

*Khawngaihna lantir Pathian thilphut anih avangin.* Hringnun awmze tlangpui i hre duh em? Hetiang hi a ni: “Aw mihring, ṭha chu a entîr tawh che a ni; Lalpan a phût che chu eng nge ni? Dik taka tih leh khawngaihna ngainat leh i pathian nena thuhnuairawlh taka lendun a ni lo vem ni?” (Mika 6:8 ).

*Khawngaihna la mamawh zel tur i nih avangin.* Tun hun aṭanga vanram i kai dawn hun thlengin thil tamtak ila tisual dawn, chung hunah chuan Pathian khawngaihna ila mamawh zel dawn. Amaherawh chu, pek chhuah i harsat thil chu i dawng thei bik dawn silo a ni. Jakoba 2:13 chuan, “Mi chunga khawngaihna nei lo chu khawngaihna tel lovin rorelsakin a awm ang; khawngaihna hi rorelna aiin a chungnung zawk a ni” a ti.

*Khawngaihna lantirna chuan hlimna a thlen avangin.* Matthaia 5:7 kha en leh ila. Mi khawngaih thei mi chu an eng a thawl e a ti a. "Engthawl" tih hi "Hlim" tihna pawh a ni bawk a ni. Chuvangin khawngaihna i lantir nasat poh leh engthawlna leh hlimna i chhar belhchhah zel ang.

Khawngaihna lantir ṭan leh dawn belh zel i duh chuan, vawiin hian hetiangin ṭawngṭai rawh: 

“Kan Pa Vana mi, ka nuna sualna leh chaklohna ka hmuhin, khawngaihna ka chungah nasa takin i lantir tir ka hmua ka lawm a ni. Khawngaihna ngahmi ni ka duha, khawngaihna min pek ang zelin midang pawh pekchhuah ve ka duh a ni. A harsat lai ber pawhin khawngaihna ka lantir theihnan huaisenna min pe ang che. Ka khawngaihna te hi midang tan lo ni rawh se. Isua hmingin ka dil e. Amen.”

Ngaihtuah zui atan

* “Khawngaihna ngainat,” Mika 6:8 a kan hmuh hi engnge awmzia?

* A harsat viau lai pawha mi chunga khawngaihna i lantir hian Pathianin engtin nge mal a sawm che?

* Kar liamta khan mi chunga khawngaihna i lantir theihna hun remchang te kha han ngaihtuah teh. Han lantir chiah la chuan engtin nge i nunah chu chuan awmzia a neih ang?

*[Lettu: Sangpuia]*

Monday, May 15, 2023

PATHIAN CHÂKA RILṬÂMA AWM RENG DAN

 _Malsawmna Dawng Nun Rahbi_

- Rick Warren 

- May 15, 2023 



_"Nausen piang tharte angin thlarau lam hnute, engmah pawlh loh chu chak rawh u, chu miah chuan chhandamna tling khawpa in than len theih nan"_ (1 Petera 2:2)


Pathian châkin i rilṭâm em?


I damchhungin thlarau lam nuna Pathian châka rilṭamin a awm reng theih. Hengte hi thlarau lama ei châk nun neih reng dan kawng pangate an ni:


*1. Pathianin hmangaihna che kha inhrilh nawn fo rawh.*

Pathianin a hmangaihna che i hriatchian poh leh Pathian i hmangaihna a zual ang. Ephesi 3:18-19 ah chuan heti hian kan hmu, _"Mi thianghlim zawng zawng nen chuan a zauzia te, a seizia te, a sanzia te, a thukzia te hriat chian theihna leh, Krista hmangaihna hriat phak loh hriat theihna in nei thei ang."_


*2. Chaw dang ral mai mai um tawh suh.*

Thlarau mi, Pathian chauhin a luah khah theih hmun awl thinlunga neitu i ni. Chu hmun awl chu i  hlawhin emaw, nihnain emaw, hlawhtlinnain emaw, tumruhnain emaw, neih thilin emaw, thiltihtheihnain emaw, hmingṭhatnain emaw, Pathian ni lo thildang eng emawa hnawh khah i tum chuan a luah khat thei ngai lovang.


Thufingte 15:14-ah chuan, _"Hriathiamna thinlung neitu chuan hriatna a zawng a, mi â ka erawh chu dawtin a inhrai ṭhin."_ tih kan hmu.


*3. Pathian hriat hi tum berah nei rawh*

Hlimna hi Pathian hriatnain a hrin chhuah a ni. Matthaia 6:33-ah chuan Isuan heti hian a ti, _"A ram leh a felna chu zawng hmasa zawk rawh u, tichuan chung zawng zawng chu a pek belh chhah dawn che u nia"_ tiin.


*4. Nitin Pathian thu zir rawh.*

Bible hi kan thlarau chaw a ni. Kar khata vawi khat chauh chaw kan ei chuan kan taksa a hrisel thei lo ang. Chutiang chiah chuan nitin  Pathian thua i inchawm a ngai a ni.


_"Nausen piang tharte angin thlarau lam hnute, engmah pawlh loh chu chak rawh u, chu miah chuan chhandamna tling khawpa in than len theih nan"_ (1 Petera 2:2)


*5. I ringtupui ṭhian dangte kawm ṭhin rawh.*

Politics lam chauh ngaina mi i kawm chuan politics i tuipui em em ang. Infiamna ngaina mi i kawm chuan infiamnain i rilru a luah ang. Pathian hriatna ngai pawimawh mi i kawm chuan chu chu i ngainatzawng a ni ang.


Chuvang chuan khai ding theitu tur che i ringtupui i kawm a ṭul hle- a chhan chu midangte nena in titi apiang kha i châkzawng a nih dawn avangin. Thufingte 2:20-ah chuan hei hi kan hmu, _"Mi ṭha kawng chu zawh la, mi dik kalnaah chuan zui rawh."_ (NLT)


Ngaihtuah zui atan.


Pathian tana rilṭam tih hi engnge a awmzia le?


Nilengin engtinnge Pathian hmangaihna i inhrilh nawn fo theih ang?


I ṭhiante emaw, i nupui/pasal te emaw, i chhungte emaw bulah engnge i titi tam ber? Chung in titina chuan eng ang takin nge i thlarau nun a chawm?


[Lettu: Mapuia Fanai]

Sunday, May 14, 2023

PATHIAN LAKA MIFEL NIH THEIH DAN

 _Malsawmna Dawng Nun Rahbi_

- Rick Warren 

- May 14, 2023



_"'Kain Isua chu Lalpa a ni tih i tan a, Mitthi zing ata Pathianin a kai tho tih i thinlunga i rin chuan chhandamin i awm ang,” tih hi. Miten thinlungin an ring a, felna an hmu thin a; kain an tan a, chhandamna an hmu bawk thin a ni."_ (Rom 10: 9-10)


Rom 1:17-ah chuan, _"Chanchin ṭhain engtinnge Pathianin mite fela a siam tih a tarlang"_ (NCV) tih kan hmu.


Engtinnge Pathianin mifela a siam che? Isua kaltlangin. Hei hi a awmzia chu a ni:


*Mahniin felah i insiam thei lo.*

Vanram chu famkimna hmun a ni a. Sualna te, lungngaihna te, thil tenawm te leh dik lohnate a awm lo. Mahse hei hi kan harsatna chu a ni: mi zawng zawng hi famkim lo kan ni a, Pathianin vanramah misual tumah a luhtir dawn lo, vanram an tihbawlhhlawh dawn avangin.


Rom 3:20-ah chuan heti hian kan hmu, _"Chutichuan Dan thiltih avangin mi tumah a mithmuhin thiam changing an awm lo vang; Dan avangin sual hriat famkimna a lo awm a ni si a."_


Pathian dan zawm thei ni a inngaite chu chu dan hre lotute chauh an ni- a chhan chu Pathian dan chu a famkim a, mihring tumah famkim kan awm si lo. Keimahni maiin mifelah kan insiam thei lo, chuvangin kan sual ata kan chhuah theih nan leh amah nena inzawmna kan neih theih nan Pathianin ruahmanna a siam ta a ni.


*Mifela puan i nih theih nan kan sual tlan nan Pathianin Isua a rawn tir*


Mihring dan i bawhchhiat chuan mihring hremna i tawk ṭhin. Pathian dan i bawhchhiat chuan Pathian hremna i tawk ang, chu chu meidil a ni. Midang i hliam te, mahni i inhliam te leh Pathian ngei natna i thlente kha tu emawin a man a pek a ngai. Chuvang chuan Pathianin chu chhanchhuah hna thawk tur chuan Isua a rawn tir ta a ni, "A man pe turin ka Fapa, Isua ka tir ang a. Anin meidila i luh loh nan i ai a awh ang. Tichuan ka hnenah kumkhuain i awm thei ang" tiin.


Chanchin Ṭha hi engvanga Chanchin Ṭha nge a nih i hria em? Chanchin ṭha chuan thil sual i tih tawh zawng zawng leh i la tih turte kha Isua a man krawsah a pe vek tawh tiin min hrilh. Isua kaltlangin Pathianah felna i hmu thei. Chu chu Chanchin Ṭha chu a ni!


Bible chuan, _"Kan thil ṭha tihte avang ni lovin a khawngaihna avang zawkin Pathianin min chhandam a ni"_ tiin (Tita 3:5).


*Pathianin a tihsak che kha rinnaa i pawm a ngai*


Pathian hmaa mifel ni turin krawsa Isua thihna khan i sual man a pe a ni tih rinnaa i pawm a ngai. Bible chuan heti hian min hrilh, _"'Kain Isua chu Lalpa a ni tih i tan a, Mitthi zing ata Pathianin a kai tho tih i thinlunga i rin chuan chhandamin i awm ang,” tih hi. Miten thinlungin an ring a, felna an hmu thin a; kain an tan a, chhandamna an hmu bawk thin a ni."_ (Rom 10: 9-10)


Halleluiah! Eng ang mi pawh niin, engpawh lo ti tawhin, engtia rei pawh sual kawng zawh tawh mahila chhandam kan nei thei.


Vawiin hi thil tihfel hun a ni e. I thih hunah vanramah i kai dawn em tih i chian loh chuan heti hian ṭawngṭai rawh: "Lalpa, min siam avangin ka lawm e, ka nunah tum leh min siam chhan i neih avang leh, nangmah hre tura min duan avangin ka lawm e. Min chhandamna pawm emaw hnawl emaw thei tura duhthlan theihna min pek avangin ka lawm e. Vawiiah hian ka thiltihte vang ni lovin Isua min thawhsak zawk avangin min chhandam turin ka ngen a che. Ka hrethiam vek lova, mahse i Fapaah rinna nghah ka duh e. Lalpa, hriat chian leh zual che ka duh e. Hmangaih che zir ka duh a, ka nun zawngah hian felna avanga tuihal leh rilṭam ka duh e. I khawngaihna leh ngaihdamnaah rinna nghah ka duh. Ka nuna lal atan ka duh che. Amen"


Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.


Ngaihtuah zui atan.


Isua i nei tawh anih chuan engtikah nge, engtinnge chu chu a thlen han sawi la.


Engtinnge mahnia felna nun nei tura i lo beih tawh? Engnge a rah chhuak le?


Thil sual i lo tih tawh zawng zawngte Isuan a man a pe tawh tih hriatna hi engnge a awmzia le?


[Lettu: Mapuia Fanai]

Saturday, May 13, 2023

HLAWKTHLAK TAKA TAWNGTAI DÂN KAWNG LI TE

 Malsawmna Dawng Nun Rahbi

Rick Warren

May 13, 2023



"I chhiahhlawh Mosia hnêna, 'In bawhchhiat chuan hnam tin zingah ka titaitam ang che u a;

amaherawhchu ka lam in lo hawi leh a, ka thupêkte in pawma in zawm chuan in zinga mi, van tawp thleng pawha hnawhchhuah awm mah sela, chung ata pawh chu ka kai khâwm leh ang a, ka hming ka awmtirna tûra ka ruat hmunah chuan ka hruai leh ang,' tia thu i pek kha khawngaih takin hre reng ang che." Nehemia 1:8-9


I tawngtai hian, i ngaihtuahna chu Pathian lama herin a awm a, A ni chu i ngaihven thil dang zawng zawng aia ropui leh thiltithei zawk a ni tih a hriattir che a. Pathianin i tawngtaina a chhan hian i rinna chu a ti thuk zel a ni.


Vawiin hian Nehemia nun atangin tawngtaina hlawkthlak tak neih dan kawng li hrilh che ka duh:


1. *I thil dil chu Pathian mize mil zawng tak nihtir la.* Pathianin a chhang dawn che tih hresa angin tawngtai la. "Lalpa, i nihna avang reng hian ka tawngtaina i chhan hi ka beisei a. Pathian rinawm i ni a. Pathian ropui tak i ni a. Pathian hmangaihna ngah tak i ni a. Pathian duhawm tak i ni bawk a. He ka buaina hi i tifel thei em em ang!" tih ang zawng hian han tawngtai teh. 


2. *Sualna i hriatte inpuang la.* Chu chu Nehemia pawh khan a ti a ni. "Israela thlahte sualna, i chunga kan sualna thupha ka chawi chhûng hian i beng lo chhiin i mit lo meng la, i chhiahhlawh tawngtaina, i hnêna a chhun a zana i chhiahhlawh Israela thlahte ka ngensakna hi lo ngaithla teh ang che; kei leh ka pa chhûngte chu kan lo sual ta si a.

I chungah tha lo takin thil kan lo ti ta a, i chhiahhlawh Mosia hnêna i pêk, thupêkte, dan te, rorêlte chu kan lo zawm ta lo va" (Neh 1:6-7) a ti a nih kha. Nehemia sualna avang khan Israelte kha salah an tang miah lova. Khang a thlen lai khan a la piang hek lo. Sal an tanna hmuna piang a nih a rinawm mah. Mahse a mite sualnaah chuan a inchhiar tel a. "He buainaah hian ka tel ve a ni" a ti a ni.


3. *Pathian thutiamte chu hauh la.* Nehemia chuan, "I chhiahhlawh Mosia hnena i sawite kha hre reng ang che" (Neh 1:8) a ti a. Pathian hnenah "hre reng ang che" han tih mai chu i ngaihtuah thiam em? Nehemia khan Pathian kha Israel fate laka a thutiam a hriat nawntir leh a. Nehemia chu ti hian a tawngtai a, "Lalpa, Mosia kaltlangin kan rinawm loh chuan, kan ram hi kan hloh ang tih min vaukhan a. Mahse kan sim chuan, min pe let leh ang tih i tiam ve tho kha" tiin.


Pathian chu hrilh nawn a ngai em ni? Ngai nang! A nih si chuan i tawngtaiin Pathian thutiam chu engah nge i hauh leh kher ang? A chhan chu Pathian thutiamte kha i hriatrengna a pui che a ni.


4. *I thil dil kha chiang la.* I tawngtaina chhanna bik duh i neih chuan, dilna fiah tak siam la. I tawngtaina chu dilna tlanglawn tak a nih chuan, i tawngtai a chhang tih engtin nge i hriat ang?


I tawngtai khan Pathian thuneihnaah i tlu lut tihna a ni a, i nun engkimah a inrawlh vein i mamawh petu a ni tih i pawmpui a ni. Tin tawngtaina hian Pathian duhzawng milin a hruai che a, engtin nge emaw, engvanga chutianga i tawngtaina chhang nge a ni tih i hriatthiamna a pui che a ni.


Mahse hei hi ringhlel ngai suh: Pathianin i tawngtaina a chhang tih hi.


Ngaihtuah zui atan...


Pathian hnena dilna i thlen a la chhan loh engnge awm le?


Chumi atan chuan dil leh la, a chunga mite ang khian han zawm la. I tawngtaina engtiangin nge a lo danglam le?


Eng thutiam nge Pathian hnen ami i hauh tlat tur awm le?


(*Lettu:* Msa)

Friday, May 12, 2023

ENGTIK LAI PAWHIN PATHIAN A AWM, I AWM DAN CHU ENG PAWH NI SE

 Malsawmna Dawng Nun Rahbi

By Rick Warren

— May 12, 2023



“Ka nu pum ata saruakin ka lo piang a, Saruak vêkin ka kîr leh dâwn a nih hi. LALPA chuan a pe a, LALPA chuan a la leh ta a nih hi, LALPA hming chu fakin awm rawh se.” [Job 1: 21]


Rinna kawnga nausen i nih lai chuan Pathian chuan i rilru a thlamuan theihna tur chuan i ṭawngṭaina mawlmang ber ber pawh a chhang a, mahni hmasial taka ṭawngṭaina pawh amah a awm ngei a ni tih hriat chian nan a chhang ṭhin a. Mahse rinna kawnga i ṭhanlen ang zelin, chutianga innghahna chu a dah sawn ve hret hret bawk ṭhin. 


Khawi-kipa-awm Pathian nihna leh a inpuanchhuahna chu thil pahnih hrang hlak an ni. Pakhat chu thutak fir hlak a ni; a dang zawk chu mihringin a dawnsawn dana innghat a ni fo. Pathian chu khawi-kipa-awm tih chu thudik a ni; a awm reng a ni, a awm a ni tih i hriat fiah loh chang pawh chuan. A awm a ni tih i hriat loh chang pawh chuan amah chu a awm ngei a ni tih i ring thei ang. Mihring thinlung satliah aṭanga teh ngawt theih a ni mai lo. 


A ni chiah, Pathian chuan a awmzia hre turin a duh che, mahse amah i rin chu i hriatna satliah [feeling] ai chuan a ngai pawimawh daih. Rinna nung kan ni a, chu chu mita hmuh theih emaw phurna satliaha innghat an ni lo. 


I rinna fiaha a awm nasat lai ber chu a buai nuaih lai leh Pathian mitin a hmuh theih mai loh lai chu a ni fo. Chu chiah chu Joba nuna thil thleng chu a ni. Nikhat thil thuah engkim a chan vek a -  a chhungte, a eizawnna, a hriselna leh a thil neih dang zawng zawng. Tichuan, Thuthlung Hluia Joba lehkhabuah khan Pathian chuan engmah a sawi lo!


I nuna thil thleng chu i hriat thiam loh chang leh a ngawih tlat chang chuan engtin nge Pathian i fak ang? Hun harsa inbiak pawhna awm lohnaah chuan engtin nge mite i zawm ang? I mita mittui a luan lai chuan engtin nge Isua lam i en ang? Joba thil tih ang kha ti ve rawh: “Tichuan, Joba chu a tho va, a kawrfual a pawtthlêr a, a lu a ziat kawlh a, lei si-a bawkkhupin Pathian a bia a. Ka nu pum ata saruakin ka lo piang a, Saruak vêkin ka kîr leh dâwn a nih hi. LALPA chuan a pe a, LALPA chuan a la leh ta a nih hi, LALPA hming chu fakin awm rawh se.” [Job 1: 20-21]

 

I lungngaihna chiah chu Pathian hriattir rawh. I thinlung chu leihbua ang che. I thinlunga i pai zawng zawng chu bunruak la. Joba khan chutiang chiah chuan a ti a ni, “Chuvângin, insûmkâr lovin ka ṭawng ang a, Lungchhe takin ka sawi dâwn e,

Rilru na takin ka phun dâwn a ni.” [Joba 7: 11] 


Pathian a hla anga a lan lai chuan a rum chhuak a, “Ka vânglai ni-ah te Pathianin ka puan ina min pâwl laite khân.” [Joba 29: 4]


Vawiin hian Pathian awm leh awm loh chu i phurna [feeling] aṭang chuan i hre mai lo a nih pawhin a awm ngei a ni tih i ring tlat thei ang. Rinhlelhna, thinrimna, hlauhna, lusunna, buaina leh zawhnain i khat a ni thei? Pathian hnenah thlen vek rawh. I kiangah a awm a, i tan a awm a, harsatna leh buaina i neih zawng zawngte chu a su kiang thei vek a ni. 


Bible chuan hetiangin a sawi, “Chu chang a ni lo, keini Thlarau rah hmasa dawngtute ngei pawh hi, a fa-a min siam hun, kan taksa tlanna tûr chu, nghâkhlelin kan rûm a ni.” [Rom 8: 23] 


Ngaihtuah zui atan. 


Pathian awmpuina chang awma i inhriat loh hun lai kha han ngaihtuah teh. Engtiangin nge chutiang hunah chuan amah in inzawm theih? 


Pathian chuan engvangin nge i phurna aiin i rinna chu a ngaih pawimawh zawk? 


Hun harsa i paltlang laiin tu hnenah nge i thlen ṭhin? 


Pathian hnena i sawi awm tak an kianga sawi zawk i nei em? 


[*Lettu:* Peka]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...