Wednesday, December 29, 2021

I THILTUMTE UMZUI TURIN THILTIHTHEIHNA NEI ANG CHE

  Rick Warren

29 December, 2021



“Mihring rilruin a kawng a ruahman a, a ke pen erawh chu Lalpan a hruai ṭhin.” Thufingte 16:9

I duh dana nung turin ruahmanna i siam thei a, mahse Pathian chauhin danglamna thlen turin thiltihtheihna a pe thei che a ni. Engvangin nge? A chhan chu Pathianin thil pathum i thiltum hlawhtlin theihna tur leh i nun a inthlak danglam theihna turin a pe che a ni.

Pathian Thlarau a tichak tur chein

Nangman’a i tih theih loh danglamna thlen turin Pathian puihna i mamawh a ni. Nun inthlak danglamna hi mihring thiltihtheihnaah a innghat lo. Pathian thiltitheihnaah a innghat zawk a ni. Tumna satliahah a innghat lova. Rinnaah a inghat zawk a ni.

Zakaria 4:6 ah chuan, “Chakna ni lovin, thiltihtheihna ni hek lovin, ka thlarau zawkin le, sipaihote Lalpa chuan a ti.”

 Pathian Thu a kaihruai tur chein

Bible hi a neitu tan nun kaihhruaina a ni. I chhiar a, i zir a, i vawn a, i ngaihtuah tam poh leh, hlawhtlinna leh lawmna i nei dawn a ni. 

Josua kha Ram Tiam la tura mawhphurhna pek a nih khan – chu thil tum chu a damchhung awh tur a ni dawn a – Pathian chuan a be ta a: “He dan bu hian i ka chu chhuahsan hlek suh se; chumi thuziak chu i zawm tlat theih nan chhun leh zan i ngaihtuah zawk tur a ni; tichuan, i kawngte chu i lo titluang zel ang a, i lo hmuingil zel dawn nia.” Josua 1:8

Pathian mite ṭanpui tur chein

Nangmah chauhin i thiltumte chu i tihlawhtling thei dawn lo. I ngaihtuahna chu puitlin turin midang nena thawhhona i mamawh a ni. Thuhriltu 4:12 ah chuan, “Amah maia awm kha chu miin hneh thei mah sela, pahnih chuan an lo dodal zo dawn a ni; hrui thum hrual chu a chat lawk ngai lo ve.” Thuhriltu 4:12

Mipui nawlpui chuan an pui thei lo ang che, mahse pawl tlem deuh zawk chuan an pui thei che a ni. Chutiang pawl tlem deuh zawk chuan i damloh te, harsatna i tawh te leh chawlh hahdam i mamawh hun te thleng pawhin an hria a ni. I hlimin an hlimpui che a, kal zel tura fuihtu che an ni bawk a ni. Thiltum dik nei tur leh tihlawhtling turin chungho chu i mamawh dawn a ni.

Nangmah maiin i tum tihlawhtling tur leh i nun thlak danglam turin i bei ṭhin em? Mahni maia thiltih chu bansan la, Thlarau Thianghlim, Pathian Thu leh Pathian mite kuta innghah a hun tawh a ni.

Ngaihtuah zui atan

* Thlarau Thianghlim chu i nuna hnathawk tur leh thlak danglam turin i ring em? I nunah chuan rinna emaw rin lohna emaw a taka i tawn entir tur eng nge i neih?

* Pathian Thu finna leh kaihruaina chu nitina i nuna pawimawh ber te zingah engtin nge i seng luh theih ang?

* I nuna i thiltumte i umzuina kawngah hian eng ang mi nge i rin theih le?

[Lettu: Sangpuia]

Tuesday, December 28, 2021

I THILTUMTE PATHIANIN MAL A SAWM ANG EM?

 Rick Warren

28 December, 2021



“Chutichuan, in ei pawhin, in in pawhin, in tih apiangah pawh Pathian ropuina tur hlirin ti rawh u.” 1 Korinth 10:31

Thil tum neih chu a pawimawh a. Amaherawhchu i thil tum zawng zawng te kha Pathianin mal a sawm dawn tihna a ni kher lo.

A nih chuan an danglamna i hria em? Heng zawhnate hi inzawt rawh le.

Ka thiltum chuan Pathian a chawimawi em?

Eng ang thiltum chuan nge Pathian chawimawi? Eng thiltum pawh amah - i rin lehzualna, innghah lehzualna, hmangaih lehzualna, midang hmangaih lehzualna, ama rawngbawlna emaw midang rawngbawlsakna thlen thei thilte hi an ni. 

Bible chuan, “Chutichuan, in ei pawhin, in in pawhin, in tih apiangah pawh Pathian ropuina tur hlirin ti rawh u,” a ti. 1 Korinth 10:31. Nitina kan tih tur pawh hi Pathian chawimawina turin a tih theih a ni.

Bawlhlawh thian faiin Pathian i chawimawi thei. Thleng sil pawhin Pathian i chawimawi thei. Tisa thil kan tihna hmang pawh hian Pathian kan chawimawi thei a ni. “In tih apiang chu mihring tan ang ti lovin, Lalpa tan anga ti zawkin, chak takin ti rawh u; Lalpa Krista rawng in bawl a nih hi” Kolossa 3:23.

I nunin Lalpa chawimawina nun neise i tih chuan, Pathian ropuina tura i theihna sang ber hlan theihna tur thiltum nei ang che.

Ka thiltum chu hmangaihna aṭanga chhuak a ni em?

Duhamna, itsikna, sualna, hlauhna emaw chapona emaw aṭanga lo chhuak thiltum chu Pathianin mal a sawm dawn lo. Amaherawhchu hmangaihna - amah emaw midangte hnena lanchhuahtir duhna thiltumte chu Pathianin mal a sawm ṭhin. Hringnun chu hmangaih zirna hi a ni.

Engvangin nge hmangaihnaa innghat thiltum chu neih a ṭul? Hmangaihna tel lo thiltum i neih chuan, mihringte chu i ruahmanna ang lekah i ruat ang. Anni ho chu i chhungkaw zinga mi an ni emaw, ṭhian emaw thawhpui emaw pawh nise i ngaihsak lo vang. Pathian chuan, “Ni lo, i tisual a ni. Hna thawh zawh a ni ber lo. Inlaichinna zawk hi a ni. Hmangaih zir hi a ni.”

Bible chuan, “In tih apiang chu hmangaiha tih ni vek rawh se,” a ti. 1 Korinth 16:14. I nuna i thiltum pawimawh ber tur chu i chhungkua, i ṭhenawm leh hmangaih harsa em em te hmangaih hi a ni. Chutianga i tih chuan Pathian i ang zual ang. Pathian chu hmangaihna a ni si a.

Ngaihtuah zui atan

* Nakkum atan eng thiltum nge i neih dawn? Vawiina zawhna pahnih kan zawh khan awmzia a neih phah em?

* Nitina sekrek khawih hmang pawhin Pathian a chawimawi theih sia i rilru a danglam phah em?

* I thiltum khan engtiangin nge midang a nghawng tih i ngaihtuah ngai em? I ngaihtuah a nih chuan, i tumte chu engkawngah te nge a danglam? 

[Lettu: Sangpuia]

Wednesday, December 22, 2021

PATHIAN THU ÊNGAH CHUAN ṬHANG RAWH

 - Rick Warren

- 22 December, 2021



“Kei khawvel êntu ka ni; tu pawh mi zui chu thimah a leng tawp lo vang a, nunna êng a nei zawk ang,” Johana 8:12

Huan siamtu ka nih vena angin, i huanin êng a hmuh ṭhat poh leh thlai an ṭhang chak ang tih ka hrilh thei che a ni. Kum 30 chuang chu ka huan tih ên nan hian a bik taka siam êng ka hmang ṭhin a. Chu chuan thing leh thlaite ṭhat theihna turin êng a pechhuak a ni. Thlaiina êng mamawh tawk a hmuh lohna hmunah chuan i hmang ve thei a ni. Ka huan êng hmuh ṭhat lohna hmunah Redwood thing ka phuna, êng chu ka hmanga, chu chu an lo puitlinga anmahnia ni êng an hmuh theih hma chu an ring a ni. Tunah chuan chung ho chu 40 feet laia sang an ni tawh a ni.

Êng hi nunna chabi a ni a. Thlai zawng zawng hi photosynthesis avangin an ṭhanga, chu pawh chu êng rinchhanin a ni. Mihringten kan hmuh theih nan êng kan mamawha, kan taksain mumal taka hna a thawh theih nan kan mamawh bawk a ni. Êng tel lo chuan thiltihtheihna a awm lo. Êng tel lo chuan thil engmah an ṭhang thei lo. Êng tel lo chuan i nung thei lo.      

Taksa lama êng dik tak chu a hriat ang bawkin thlarau lama êng dik tak chu a hriat a ni. Khua a thiam chuan, ni a lang thei lo va, êng pawh i hmu thei lo. I nuna danglamna duhawm zawk a lo thlen theihna turin Isua êng i mamawh a ni.

Kawng hnihin danglamna tur i nei: Êng i hmuh hunah leh êng chu a lum a ni tih i hriat hunah. Kawng khat chu thil dang zawng aiin a tuar a nep daih a ni. Êng i hmuh veleh i inthlak danglam chuan, lum chu i hriat hunah chuan i inthlak kher a ṭul tawh lo ang.

I êng chu tih ên zel  dan i hre duh em? Pathian Thu hi a ni. Pathian Thu i inzirna chuan Pathian hriatna leh hmangaihnaah a ti ṭhanglian ang che.  

Ephesi 1:16-17 ah chuan, “Kan Lalpa Isua Krista Pathian, ropuina Pa chuan amah hriatna kawngah finna leh hriat chiantirna thlarau a pek theihna tur che uin, ka ṭawngṭainaahte chuan in hming lamin in chunga lawmthu hrilh ka bang lo” a ti. Pathian i hriat chuan, a êng chuan i thinlung a chhung khat ang. Chutichuan hmabak eng tak Pathianin a tiam che chu i hrethiam ang.

Bibleah hian, êng leh nunna hi a kalkawp tlat a: “Nunna tuikhur chu i hnenah a awm si a; I êngah chuan êng kan la hmu ang” Sam 36:9.

Nun hi tuarna tur ringawt a ni lo va, chen tur a duan a ni. Krismas chhung ringawta chen tur a ni lo va, dam chhunga chen tur a ni. Chumi ni tur erawh chuan Pathian ênga kan chên angai a ni.

Chuvang chuan Isuan heti hian a ti a ni, “Kei khawvel êntu ka ni; tu pawh mi zui chu thimah a leng tawp lo vang a, nunna êng a nei zawk ang.” Johana 8:12

Ngaihtuah zui atan

* Êng aṭanga lochhuak ‘lum’ chuan engtin nge i nun a tih danglam le? Thlarau lamah i ṭhanglian nge kawng dangah i ṭhang zawk?

* Pathianin i tana thutiam a neih chu engvangin nge i hriat a ṭul?

* Pathian ênga cheng tur chuan Pathian Thua chen a ṭul a ni. Chatlak lova Pathian Thu i inzir zel theihna turin i engnge thlak danglam ngai? 

[Lettu: Sangpuia]

Tuesday, December 21, 2021

BULṬAN THARNA KAWNG AWMCHHUN CHU

  - Rick Warren

- 21 December, 2021



“Hmanah khan thim in ni a, tunah erawh chuan Lalpaah chuan êng in lo nih tak hi; Lalpa lawm zawng eng nge ni tih fiahin, êng fate angin awm rawh u, êng rah chu ṭhatna leh, felna leh thutak zawng zawngah a lang si a.” Ephesi 5:8-10

Kum engemawzat kalta aṭang khan New York khawpui enkawltute chuan êng hmanga tuia natna hrik leh thildang awmte tihthianghlimna an siam chhuak a, chu tui chu mel 100 chuang lai an luantir a ni. Damdawi hmang lovin Ni zung chakna hmangin tui tihthianghlimna chu an siam chhuak a ni. Ni khatah tui gallon maktaduai tam tak Ni zung chakna hmang chuan an tithianghlim ṭhin a ni. 

Êng hi natna hrik thahna ṭha tak a ni a. A kap a, a tifai a, a tithianghlim a ni.

Chutiang chiah chuan Pathian êng chu nangmahah a thawk a ni. Ṭawngkam hriam te, ngaituahna sual leh thiltih ṭhalo te chuan i rilru leh thlarau leh a chang phei chuan i taksa thlengin a ti damlo ṭhin che a ni. Amaherawhchu Pathian hnena i sual te i puan chuan, Pathian ngaihdamna chuan a tlengfaiin, a bualfai che a, tithianghlim ṭhin che a ni. 

Bible chuan, “Thima awm siin, ‘Amah ka pawl,’ kan tih chuan dawt kan sawi a ni, thutak pawh chu kan zawm lo; amaherawhchu, amah chu êngah a awm angin keini pawh ênga awm kan nih chuan, kan inpawl tlang a, tin, a Fapa Isua thisenin kan sual zawng zawng min tlenfai sak ṭhin a ni,” 1 Johana 1:6-7

Tunlai hian mi tam tak chuan hun thim an paltlang mek a, a chhan chu inthiamlohna, zahna leh pawi tihna an neih mek vang a ni. Pawn lama an lan danah chuan hlawhtling tak angin an lang ang, amaherawhchu chhungrilah erawh chuan an thuruk chuan a ti rum ṭhin a ni.

Thinrimna te hi chu thai reh dan a awm em? Bulṭan tharna kawng te hi a awm em? Aw, awm teh reng e, Piantharna an tih hmang hian a ni. Chumi awmzia chu hnah thar neiha nasa zawka beih lam a ni lo va. Nun thar hlak neihna, i nun hlui engkim ngaihdamna chu a ni zawk. I engkim chu Krista eng chuan a chhun fai tawh a, pawi tih avanga thima awmna leh zahna chu lum boin a awm tawh ang. 

Ephesi 5:8-10 ah chuan thianghlimna famkim leh sual ngaihdamna leh piantharna chungchang min hrilh a, “Hmanah khan thim in ni a, tunah erawh chuan Lalpaah chuan êng in lo nih tak hi; Lalpa lawm zawng eng nge ni tih fiahin, êng fate angin awm rawh u, êng rah chu ṭhatna leh, felna leh thutak zawng zawngah a lang si a,” a ti. 

Inchhirna emaw, sual nia inhriatna emaw zahna ruk riau thenfai leh tihthianghlim ngai i nei em? Krista engah chuan rawn pho lang hmiah mai rawh le. Chutichuan, Khawvel Êntu, Isuaah beiseina neiin hmalam i pan thei ang.

Ngaihtuah zui atan

* Engtiangin nge Krismas hian kumtluana thup i tum i inchhirna emaw pawi i tihna emaw a lo pho chhuah mai ṭhin le?

* Ephesi 5:8-a êng fate anga awm dan tur a tih kha eng te nge?

* Engvangin nge mi tam takin a rukin inchhirna leh zahna an pai, chu chu i va hmachhawn dan a zirin engtin nge an danglam theih ang? 

[Lettu: Sangpuia]

Wednesday, December 15, 2021

I NUNGCHANG SIAMNA TURAH I SUM SENG RAWH, NUAM I TIH LAMAH NI LOVIN

  - Rick Warren

- 15 December, 2021



“Kan Lalpa leh Chhandamtu Isua Krista khawngaihna leh hriatnaah chuan lo ṭhanglian rawh u.” 2 Petera 3:18

Pathianin thlarauva ṭhangliana Isua Krista ang zel turin a duh che a. Chutiang lama i tih theih kawngkhat chu i sum leh pai te nangma mimal ṭhanzelna tura hman hi a ni.

Bible chuan, “Kan Lalpa leh Chhandamtu Isua Krista khawngaihna leh hriatnaah chuan lo ṭhanglian rawh u” min ti. 2 Petera 3:18

I sum chuan thlarau lamah i ṭhanna turin a pui thei che a. Thiamna peipung tur te, zirna sang zawk te, hruaitu ṭha zawk ni tur te, thusawi thiam zawk ni tur te, palai thiam zawk ni tur te leh a hma aia ṭha zawk ni turin i sum chuan a pui thei che a ni.

Hei hi thudik chu a ni, i car kawl kha vanramah i luhpui dawn lo. Chutiang zelin i in te, in inchhungkhur bungrua leh thawmhnaw te pawh vanramah i luhpui dawn lo.

Amaherawhchu i nungchang erawh chu i luhpui dawn a ni. Nuam i tihna lama sum sen chu a itawm zawk maithei e, amaherawhchu vanrama i luhpui tur i nungchang ṭhatna turin seng zawk rawh.

Kristian lehkhabu te i lei hian i ṭhanna turah a pui zel che a, chutianga i tih zel chuan Growth Fund (Ṭhanna Sum) ka tih maiah i sum i khawl zel tihna a ni. Inkhawmpui emaw retreat emaw lama i sum i sen apiangin Growth Fund-ah i sum i khawl zel tihna a ni. Pathian duhzawng class emaw seminar emaw a i sum i sen chuan, Pathian pawhin hlim takin pawisa hmanna ṭha tak a ni a ti che a ni.

Ka Bible lei hmasak ber kha ka theihnghilh thei lo. Rawlthar mai ka la ni a, heti hian ka ngaihtuaha, “Hei hi ka tana lehkhabu pawimawh ber a ni, chuvang chuan a ṭha ber ka zawng dawn” tiin. Tichuan keima zawn zawnin ka zawnga, a tawpah chuan Thompson Chain-Reference Bible ka hmu a. Heti hian ka ti leh a, “A chilhna leh a kawm ṭha tak ka zawng dawn” tiin. Chu Bible chu cheng 60 lai a ni a, thla hnih chhunga ka pawisa dawn zat chiah a ni. Thla hnih chhung chu thingpui in leh movie enna tur aia ka khawl a ni. Mahse ka inchhir lo, damchhunga ka hman tur Bible ka lei theih phah a ni.

Chu Bible chu ka la nei reng a. Ka neih rohlu ber zinga mi a ni, a chhan chu vawi engemaw zat ka chhiarchhuak tawh a ni. Ka rina, ka chhinchhiah nasa hle bawk a ni.

Bible chuan, “Chaw ni si lovah eng vangin nge tangka in sen? Puar leh fanna ni si lovah eng vangin nge tha in sen? Ka thu ngun takin ngaithla ula, thil ṭha chu ei rawh u, in nunna chu thil thauvah chuan hlim rawh se” Isaia 55:2 

Chaw dangral mai maiah emaw thlarau lam chawah emaw i sum chu i hmang thei a. Thlarau lam chaw, thlarau lama i ṭhan theihna tur lamah chuan i sum chu hman tum zawk ang che. 

Ngaihtuah zui atan

* I nungchang aiin nuam i tih zawng lam chu a pawimawh zawk a ni tih khawtlangin engtin nge hmin a tum che?

* Chaw dang ral mai mai ai chuan thlarau lam chaw chuan i thlarau engtin nge a tih tlai?

* I nungchang lam atana sum i khawl zawk theihna turin nuam i tih zawng eng te nge i bansan ngai le?

[Lettu: Sangpuia]

Tuesday, December 14, 2021

PATHIAN CHHUNGTE CHAWKPHUR TURIN PECHHUAK RAWH

 - Rick Warren

- 14 December, 2021



“Hmangaihna neiin inlainat tawn rawh u.” Rom 12:10

Pathianin amah hmangaih zir tur leh midangte nuna khawlkhawm turin min duh a ni. I sum chu Pathian hnena i pek chuan, amah chu i hnaih phah sawt dawn a ni. Chuvang chuan amah chu hmangaih tur leh a hmangaihna chu khawl zir turin a duh che a, chu tak chu “Mutual Fund (intanpui tawnna)” ka ti a ni.

Bible chuan, “Hmangaihna neiin inlainat tawn rawh u,” min ti a ni. Rom 12:10

Mutual Fund chu engtin nge i peipun ang? Sum tlem azawng hmanga pawlho chawhphur, inlaichinna siam leh hmangaihna lanchhuahtir turin min duh a ni. 

Pawlho chawkphur tur chuan engvangin nge i sum i pek ang? Bible chuan, “He chhawmdawlna rawngbawlna hian, mi thianghlimte tlakchhamnate chu a phuhruksak chauh pawh a ni si lo va, Pathian hnena lawmthu sawina tam taka changin a luang liam bawk a ni. He rawngbawlna hian a fiahna che u avangin, Krista Chanchin Ṭha lama in thurin in zawm avang leh, anmahni tan leh mi zawng zawng tana thawhlawma in thilphal avang hian, Pathian an tiropui ṭhin asin,” a ti. 2 Korinth 9:12-13

Pathian chhungkuaah chuan i sum chuan engtinnge inlaichinna ṭha a siam? Mi tuemaw pawisa i pek khan, chu nu emaw chu pa nen emaw chuan in inhnaih leh zual sawt ṭhin a ni. Sum hmanga ringtute hnena i khawlna chuan anmahni a hnaih a zualtir che a ni. Mi tuemaw dam lo chaw ei tur i pek apiang chuan Mutual Fund ah i peipung zel tihna a ni. Tleirawlho school anga an fehchhuahna tura sum an tuaknaa i sum i thawh ve khan Mutual Fund ah i khawl zel a ni. I ringtupui tuemaw lungawilo chawhlui i kilpui emaw an vuivainate i ngaihthlaksak khan, Mutual Fund ah i khawl leh tihna a ni.  

I sum hmang chuan hmangaihna i lanchhuahtir thei bawk. Kohhrana sawma pakhat i pek khan Pathian i hmangaihna i lantir tihna a ni. Chutiang zelin midangte pawh sum leh paiin i ṭanpui thei a ni. Chutianga i tih chu hmangaihna lantirna a ni a – vana sum khawlna ang a ni. Pathian chhungte hnena i sum i hmanchhuah apiangin Mutual Fund ah i sum i khawl zel tihna a ni.

I hriat reng tur chu – hmangaihna tel lo pawhin thilpek i pe thei mai ang, thilpek pe lo erawh chuan i hmangaih thei lo thung ang.

Ngaihtuah zui atan.

* Pathian chhungte aṭangin engtin nge thilpek hmangin i nunah an khawl? I nunah nghawng engnge a neih?

* Midangte chawkphur tura sum leh pai pek tur i neih loh pawhin Pathianin engnge ti tura a duh che?

* Hmangaihna tel lo Pathian hnena pek tur engnge awm nia i hriat?

[Lettu: Sangpuia]

Wednesday, December 8, 2021

PATHIANIN RAWNGBAWL TURIN A DUANG CHE

  - Rick Warren

- 8 December, 2021



“Thil ṭha ti atan Krista Isuaah chuan siama awmin, ama kutchhuak kan ni si; chu thil ṭha tih chu kan awmna turin Pathianin a buatsaih lawk a ni.” Ephesi 2:10

Pathianin a rawngbawl turin a duang che a ni.

Bible chuan, “Thil ṭha ti atan Krista Isuaah chuan siama awmin, ama kutchhuak kan ni si; chu thil ṭha tih chu kan awmna turin Pathianin a buatsaih lawk a ni,” a ti. Ephesi 2:10

I pian hma daih aṭang khan i nuna ti tura a duh che chu Pathianin a ruahman lawk tawh a ni. He leilunga hmun ruak hnawhkhat ringawt tur chuan Pathianin a dah lo che a ni. Chuvang chuan, Pathianin mi dang te ṭanpuina hmanga, a rawngbawl turin a duh che a ni.

Midang tumah hi nangmah ang an awm thei lo. Pathianin a duan dan chea a rawng i bawl loh chuan khawvel hi enkawl lohin a awm dawn tihna  a ni. 

“Thil ṭha tih” awmze dang chu “rawngbawl” hi a ni. I thiamna leh theihna te midang te ṭanpuina atana i hman apiangin rawng i bawlsak tihna a ni. Bible chuan, “Mi tinin thilpek in hmuh ang zelin Pathian khawngaihna tinreng enkawltu ṭhate angin, chung chuan rawng inbawl tawn ṭheuh rawh u,” a ti. 1 Petera 4:10

Thiamna bik i neihte chu nangma hlawkna tur a ni lo va. Pathianin thiamna a pekna chhan che chu midangte tanpuina tur a ni. Mi tumahin theihna zawng zawng an nei vek lo va, kan inmamawh tawn theihna turin khawvel zawng zawng hi Pathianin min thlunzawm vek a ni.

Vanrama i tih tur chu he leiah hian ti ṭan turin a duh che a. Vanramah chuan Pathian leh midang zawng zawng pawh i hmangaih dawn a, chu nun chu he leiah hian hmang ṭan nghal turin a duh che a ni.

Vanramah chuan thlarauvah i ṭhanglian anga, Pathian rawng i bawl bawk ang, chu nun chu he leiah pawh hian nei nghal turin a duh che a ni. He khawvelah hian Pathian rawngbawl ngawt dan a awm lo va, midang te rawng i bawlsak hian Pathian rawng i bawl tihna a ni. A nihna takah chuan, Pathian chuan mi i puih apiangin amah chu i pui angah i inngai tur a ni a ti.

Mi dang rawng i bawlsak hian Pathian rawng i bawl a ni.

Ngaihtuah zui atan

* Mi dang rawng i bawlsak theihna turin eng ang kawng te a danglam bikin nge Pathianin a duan che?

* I thiamna leh theihna te chu mi dangte rawngbawl sakna turin eng tin nge i hman?

* Mi dang rawng  i bawlsak hian engtin nge nangmahah nghawng a neih?

[Lettu: Sangpuia]

Tuesday, December 7, 2021

PATHIANIN I ṬHANLENNAAH A PUI CHE

 - Rick Warren

- 7 December, 2021



“A hriat lawka te chu ama Fapa ang taka awm turin a ruat lawk si a, a Fapa chu unau tam tak te zinga fa tir a lo nih theih nan.” Rom 8:29 

Pathian thil tum chu amah ang tura siam che  a ni a. A Fapa ang tura siam che a duh a ni. Kawng dangin han sawi ila, thlarauva ṭhanglian turin a duh che a ni.

Bible chuan, “A hriat lawka te chu ama Fapa ang taka awm turin a ruat lawk si a, a Fapa chu unau tam tak te zinga fa tir a lo nih theih nan,” a ti a ni. Rom 8:29 

Pastor ka nihna anga zawhna min zawh tam ber chu, “Hei hi ka chungah engvangin nge a thlen?” A chhan ka hrilh ang che: I ṭhanlen theihna tur a ni. 

A nihna takah chuan, i nuna thil thleng apiang te khan thlarauva ṭhanglian turin an pui che - ṭha, ṭha lo, sual, i thil chin ṭhin te leh midangin i chunga an thiltih te pawh a ni. Pathian hian sual a siam hran lo a. Amaherawh chu thil ṭha lo a lang pawhin thil ṭha zawk a lo thlentir thei a ni.

I nuna thil lo thleng te chuan nangmahah thil duhawm lo emaw duhawm zawk emaw a thlentir thei a. Lo hmachhawn dan tur chu i kutah a innghat a ni. “Lalpa, hei hi eng vangin nge ka chungah  a lo thlen?” tih ai chuan, “Lalpa, hemi aṭang hian engnge min zirtir i tum?” tiin dil zawk ang che.

Eng harsatna pawh hian chhan a nei vek a: thlarauva i ṭhanlen theihna tur leh Isua Krista i an zel theihna tur a ni.

Harsatna thlenna chhan kawng khat chu thlarauva i ṭhanlenna tur leh Isua i an theihna tur a nih chuan, Isua i an theihna tur chu engnge ni ang? Thlarau rah te kha ngaihtuah teh. Bible chuan, “Thlarau rah erawh chu hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insumtheihna te a ni,” a ti. Galatia 5:22-23. Heng ṭhatna hrang hrang te hi Pathianin nei chho zel turin a duh che a ni.

Engtin nge Pathianin chung ṭhatna te chu i neih theihna tur leh thlarauva i ṭhanlen theih nan hma a lak? Khing ṭhatna te khi i neih theihna turin a ni lo lamah Pathianin a hung ṭhin che a ni.

Hmangaihna nei lo te bulah hmangaihna i zir theih nan a dah che a. Lusunna karah lawmna a zirtir bawk che a. Buaina hrang hrang karah remna a zirtir bawk che a. I thil nghah mek chu kumkhuaa nghah ngai dawn anga lang karah pawh dawhtheihna a zirtir che a ni. 

Heng ṭhatna hrang hrang te hi i dam chhungin Pathianin a zirtir ang che a – i zir hun chhung pawh i damchhung a ni ang. Mahse hei hi ring rawh, eng thil pawh hmachhawn la, thlarauva i ṭhanlenna tur leh Krista i an zel theihna turin Pathianin a hmang zel ang.

Ngaihtuah zui atan

* Eng ang dinhmuna i din changin nge Krista ang zualin Pathianin a dah che?

* Kristian tam tak te thlarauva puitling lova an la awm rengna chhan hi eng nge nia i hriat?

* Thlarauva ṭhanlenna chuan i nunah engnge a ngaih pawimawh? I nuna chu thil i ngaih pawimawh thlak ngai chu engtin nge i thlak ang?

[Lettu: Sangpuia]

Wednesday, December 1, 2021

I NGAIHTUAHNA CHU THUDIKIN CHAWM RAWH

- Rick Warren

- 1 December, 2021



"Hriat thiamna thinlung neitu chuan hriatna a zawng a, mi a ka erawh chu dawtin a inhrai ṭhin." 1 Thufingte 15:14

Mi fing i nih duh chuan, i tih tur hmasa ber chu nitin Pathian Thuin inchawm ṭhin rawh.

“Lalpa chuan finna a pe ṭhin a, a ka aṭang chuan finna leh hriat thiamna a lo chhuak ṭhin a ni” Thufingte 2:6

Television i en aṭangin finna i chhar lo va. Internet aṭangin i chhar hek lo. Chanchinbu aṭang pawhin i chhar lo va. Finna chu Pathian aṭanga lo chhuak a ni.

Bible chuan, "Hriat thiamna thinlung neitu chuan hriatna a zawng a, mi â ka erawh chu dawtin a inhrai ṭhin," a ti. 1 Thufingte 15:14. Thudik emaw thu bawlhhlawh hmang pawhin i rilru chu i chawm thei a ni. I ngaihtuahnaa lut apiang chu pawn lama lo chhuak tur chu a ni – bawlhhlawh a luh chuan bawlhhlawh vek a lo chhuak ang. Chuvangin, mi fing i nih duh chuan, thudikin inchawm fo rawh. 

I ngaihtuahna chu thil pathumin i chawm thei: tûr, chaw hrisel lo leh chaw ṭha.

Tûr

Tûr chuan thil kalphung pangngai a ti buai a. I tan a ṭhalo a. Nangmah a tihniam che a ni. Zahmawh lam rawngkai en hi tur a ni a. Mi ṭhenkhat chuan, “En mah ila a pawi lo. Min tibuai tawh lo,” an ti. Chu chu harsatna a ni! Thil bawlhhlawh, thianghlimlo, sualna hrang hrang i ena, a tihbuai loh che chuan, nangmah zawk khan harsatna i nei a. Mi pangngai i ni tawh lo tihna a ni.

Mi fing chuan an ngaihtuahna an vawng tlata. Thil zawng zawng an ngaihtuahnaah an senglut duh lo va. Tur chu an paihchhuak zel ṭhin.

Chaw hrisel lo

Chaw hrisel lo chu a ṭhatna a awm lo va, a pawina em em a awm hran lo. Mahse taksa tan ṭangkaina a nei lo a ni. TV-a i thil en ṭhin tam zawk te kha sualna chu a awm lo va. Mahse an hrisel lo a ni. Chaw atana hrisel lem lo thil an ni. Chu thil chu i hmang ta tihna a nih chu. Amaherawhchu a buaithlakna chu, chung thil chu i hman chuan thudik lamah i tuihal tawh lo tihna a ni. Darkar li chhung TV i en chuan, i ngaihtuahna chu taksa leh rilru tan pawha ṭha tur ni lem si loin a khat vek dawn a ni. 

Chaw ṭha

Chaw ṭha chu taksa tana ṭangkai hi a ni a. Ṭhanlenna leh hriselna a ni. Thudik chu i rilru tan hriselna a ni a, chuvang chuan mi fing chuan thudik hmangin an ngaihtuahna te an chawm ṭhin. Chutichuan inlaichinnaah, i hun hmanah, i pawisa hmannaah, i sumdawnnaah, fate enkawlnaah, nupa karah leh kawng tinrengah i lo fin phah dawn a ni.

Thudika i rilru chawm tur chuan, Pathian Thu a pawimawh hmasa ber a ni. Nitina Bible chhiar leh zira i hun i hman chhoh zel chuan, i fing deuh deuh ang. 

 Ngaihtuah zui atan.

* Eng ang chaw hrisel lo nge i ngaihtuahnaah luh tir i phal ṭhin?

* Pathian Thu aia TV en leh Internet lama hun i hman nasat hian i ni hmanah engnge danglamna i hmuh?

* Vawiin hian thudik hmanga i ngaihtuahna chawm tura fianrial hun i ngaih pawimawh theihna turin engtin nge a takin ke i pen theih theih ang?

[Lettu: Sangpuia]

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...