Friday, November 29, 2024

RINGTU ZAWNG ZAWNG RAWNGBAWLTU

_I Nun Kal zel Atana Pathian Hmathlir_

By Rick Warren
— November 29, 2024
“Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni.” [Ephesi 2: 10]

Pathianin khawvelah hian nangma tan chauha nung turin a dah lo che. Khawvel ṭha zawk siam turin a duh che!

Ephesi 2: 10 chuan hetiang hian min chah, “Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni,” tiin. 

Chu nun chu a sawina bik thumal a awm a: rawngbawlna [ministry] tih a ni. Ringtu zawng zawngte chu pastor kan ni vek lo va, mahse ringtu zawng zawngte chu rawngbawltu [minister] kan ni thung. Rawng i bawl a nih chuan i thiamna leh theihna te chu mihring nun hmasawnna atan i hmang chhuak ṭhin – pe chhuaktu niin, a dawngtu ngawr ngawr i ni lo. 

Bible chuan in hmangaih tawn turin min zirtir a. Inngaihsak tawn turin. Inṭawngṭaipui turin. Infuih tawn turin. Inṭanpui tawn turin. In dawmkang tawn turin. Thil dang tam tak a la awm ang. Chu rawngbawlna chu Pathian chhungkuain Pathian chhungkua tho rawng a bawlsakna chu a ni. Chu chu Pathianin a remruat dan a ni bawk. 

Midangte rawng bawlsak hmanga Pathian rawngbawl chu thil awlsam a ni lo. A chang chuan i hnual rawih ang. Tichuan chutianga i hnual rawih chang chuan engnge i tih chhunzawm ang. Thil pahnih hria ang che.

Pakhatna, i chatuan hmuna lawmman chhe thei lo i chan turte chu hre reng ang che. Bible chuan Pathian engtiang taka nasain nge in thawh tih a hria a, amah in hmangaihna chu ringtu dang in hmangaihna hmangin in lo tilang tawh ṭhin tiin a sawi [Hebrai 6: 10]. Chatuan hmunah chuan lawmman a lo pe ang che.

Pahnihna, Pathian chuan i nuna thil thleng zawng zawngte chu a hmang thei a ni. Engmah pawimawh lo Pathian rawngbawlna atan a awm tak tak lo. Engmah a thlawn lo. “Chuvângin, ka unau duh takte u, nghet takin, tihchêt rual lohvin, Lalpa hna ṭhahnemngai taka thawk fovin awm rawh u, in thawhrimna chu Lalpaah chuan a thlâwn ngai lo tih in hre si a.” [I Korinth 15: 58]   

Tu pawh niin khawi hmunah pawh lo awm tawh la, Isua zuitu i nih chuan rawngbawltu [minister] i ni e. Vawiin hun i hman mek lai khan midangte tanpuina hmanga Pathian rawng i bawl dan tur chu han dap teh. 

Ngaihtuah zui atan. 

Engtin nge mi tuin emaw rawng a lo bawlsak tawh che? I nunah engtin nge danglamna a thlen? 

Midangte ṭanpuina tur theihna [talent] Pathianin engnge a pek che? 
I nun khawi lai emaw tihdanglam ngai eng nge awm – i hun hman dan emaw rilru put hmangah chuan – midangte tana ṭangkai zawka che chhuak tur chuan engnge i tih ang? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...