Sunday, July 27, 2025

CHI HLU TAK TUH DAN

_Tumruhna Danglam_

- Rick Warren 
- July 27, 2025
_"Leiin hnim te, thlai chi nei te, thei kûng, leia an mahni chi awm dan tur anga rah, a rah chhûnga a chi awmte chu chhuah rawh se."_ (Gen. 1:11)

Engkim hi a chi aṭanga inṭan a ni. Chu chu tuh rah seng kawnga rahbi hmasa ber a ni.

Hlawhtlinna zawng zawng pawh hi chi aṭanga inṭan a ni. Saddleback kohhran pawh hi mite Isua hnena hruai thlen duhna rilru kan putna chi aṭanga inṭan a ni. I nun ngei pawh kha chi aṭanga inṭan a ni. I nu leh pa an inneih a an awmdun hnuin i nu'n a pai che a, nun bul i ṭan a ni. He khawvel thil nung tinreng te hi chi aṭanga lo awm ṭan a ni ti ila kan sawi sual tam lovang.

Genesis 1:11-ah chuan Pathianin heti hian a ti, _"Leiin hnim te, thlai chi nei te, thei kûng, leia an mahni chi awm dan tur anga rah, a rah chhûnga a chi awmte chu chhuah rawh se."_

Chi kan hmuh theih ang chi hi chu leia tuh chi an ni. Mahse thil hlu engpawh mite hnena i pek chhuah kha chi an ni e kan ti thei bawk. Zilhna thu ṭha tak i chhakchhuah chuan chu chuan hlutna thuk tak a nei. I sum leh pai mite hnena i pek khan hlutna a nei. Midangte ṭanpui nan i tawnhriatte i hrilh chuan hlutna a nei. I hmangaihna i pek chhuah khan hlutna thuk tak a  nei.

I hun, sum, lawmpuina, ngaihsakna, finna, tha, engpawh ni rawhse chi aṭanga rawn inṭan a ni. I theihna hlu ber Patthian rama danglamna thlen tura i pek chhuahna turin hun ṭha tam tak i nei. Chung hun ṭha te chu nunna chi tuh nan i hmang thei ang.

I ṭawngkam chhuak te pawh kha mi rilrua chi tuhna a ni thei. An ṭhang lian a, rah an chhuah ṭhin. Chuvang chuan ṭawngkam i thlan fimkhur a ngai. I mi hmangaih ber - i fate, i kawppui i ṭhian te leh nitin i hmuh ṭhin te chungah i ṭawngkam chhuakin thiltihtheihna nasa tak a nei.

Midang nen in inlaichinnaah leh Pathianin ṭhian a pek cheho lakah eng chi nge i tuh? Hliam i tawrh laiin rinna chi tuh turin huaisenna zawng zawng hman a ngai. Rinna chi nge rin lohna chi i tuh? Ngilneihna chi nge i tuh hauikawm bawlna chi? Mite tiṭhang thei tur chi nge mite tichhe thei tur chi i tuh?

Hei hi hre reng rawh: i chi tuh apiang i seng ang. Chuvangin fimkhur la, rah ṭha chhuah ṭhin chu tuh turin uluk rawh.

Ngaihtuah zui atan.

I fate, chhungkua leh ṭhiante laka i chi tuh kha eng ang takin nge a lo ṭhan len ni a i hriat?

Kan hun hi eng ang tak hlu nge anih? Engtinnge hun kan pekna hian Pathian ram tan ropui taka rah a chhuah?

Engvangin nge Pathianin te tak te a chi tuha tam tak rah seng tura min duh ni a i rin?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...