Friday, July 25, 2025

TUMRUHNA DANGLAM NEI TURA I MAMAWH THIL PAHNIH

_Tumruhna Danglam_

By Rick Warren
— July 25, 2025
“Chutichuan, in huaina kha hloh suh u, lâwmman ropui tak a nei dâwn a ni.” [Hebrai 10:35]

I khawvel thlirna hmang chuan mihring nun awmzia leh nihphung chu i hre thiam ṭhin. Ringtu i nih anga thil i thlir chuan i kiang vela khawsate zingah i ngaihdan ṭawmpui lem lotu an awm fo tih i hre thei ang. I pawm zawng chu mi zawng zawngin an pawm kher lo vang a – ṭhenkhat phei chuan an kalh hial ang che. 

Chutiang hunah chuan engtin nge huaisen takin i din ngheh theih ang? Thil pahnih i ti ang: 

Pakhatna, Pathian thu chu i huaisenna tur tih pawm rawh. Chu chauh chu thutak hnar a ni a! Nu huaisen pa huaisen ni thei tur chuan Lungpui danglam ve ngai lovah chuan innghat tlat ang che, mite lawm zawngah ni lovin. 

Hebrai 6: 18 chuan hetiang hian a sawi, “Sût leh mai mai loh chi hêng thil pahnih - thutiam leh mahni inchhâlna avâng hian, Pathian chu daw rual a ni lo ve. Chuvângin, keini, a hnêna tlânte hian him nân kan hmaa beiseina chu thlamuang takin kan chelh thei a ni,” tiin a sawi.

I nun chu thil pahnih eng emaw zawk zawkah i nghat dawn a ni: khawvel ngaihdan emaw Pathian ngaihdanah emaw chuan. Pathian Thua i nun i nghat a nih chuan mite ngaihdan chhut buaiin i hun i khawhral ngai lo vang. Mite lawm zawng ni lem lo thil tam tak ka sawi tawh. Eng vangin? A chhan chu mite duh loh ni aiin Pathian tihlâwm loh chu ka hlau zawk fe a ni.  

I thil rin chu i hre chiang lo a nih chuan, bul ṭanna atana duhthusam chu Bible chhiar a, nangmah ngeiin hmuh chhuah chu a ni. I lawina kohhran chu a Thu hmanga Pathian i hriatfiahna hmun pawimawh tak a ni thei ang. 

Pahnihna, Isua nen hun hmang rawh. Isua nena hun in hman tam ang zelin Pathian ngaihdan kalha ngaihdan awm hmachhawn tur chuan i huaisen deuh deuh ang. Isua nena hun i hman tam chuan chu chuan huaisenna a pe chein hun harsa ber laiah pawh a thutak ṭanin i ding thei ang. 

Chu chu Isua zuitu dik takte awm dan Bible-in min hrilh chu a ni: “Petera leh Johana huaizia chu an hmuhin, lehkha thiam lo leh mi mâwl mai an nih an hriatin, mak an ti hle a; Isua hnêna awm ṭhîn an ni tih an hre ta a.” [Tirhkohte 4: 13]

Pathian thutak tana huaisen taka din theihna chu chatuan daih a ni! Mite lawm loh zawng niin a awlsam lem lo, mahse Pathian Thu chu i innghahnaah hmangin Isua nen hun in hmang a nih chuan miten mak an tih khawpa huaisenin i intinghet thei ang. 

Vawiin hian he ṭawngṭaina thu hmang hian i ṭawngṭai thei ang: “Lalpa, mi tumruh tak nih ka duh e. Nangmah tihlâwm ka duh a, midang tihlâwm ka duh lo. Bible zirtirna behchhana nungin ka rinna huaisen taka tan chu ka duh. He thutlukna pahnih hi vawiin atan ka siam a ni: Pakhatna, i Thu chu ka nun hruaitu leh innghahna atan hmang ka duh e. Pahnihna, nitin ka hunte nangmah nena hman ka duh a. Nun hlim leh nghet taka awmin mite pawhin, “Saw mi saw chu Isua nen an leng dun a ni” an tih ang ngei kha nih ka duh e. Thutakaa ding ngheta hlauh nei lova i chakna rin ka duh bawk. Isua hmingin ka dil e. Amen.”

Ngaihtuah zui atan. 

Isua i hriat chian lehzual zel theihna atan eng nge i kalsan ngai? 

Engtik hunah nge mite ngaihdan chu Pathian ngaihdan aia i ngaih pawimawh zawk ṭhin? 

Miten, “Saw mi saw chu Isua nen an khawsa ngei a ni” an tih tur mihring chu engtiangin nge an awm? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...