_Thilmak I Beisei Laiin_
- Rick Warren
- July 23, 2025
"A ni, thihna hlim kawr ruam zawh mah ila, thil ṭha lo reng reng ka hlau lo vang, nang ka hnenah i awm si a," Sam 23:4.
Thihna kotlanga mi an din laia natna endikna hnuhnung an han dawn hian-a bula mite chuan lo hnuh hnaih an tum ṭhin. An hmangaihte hun tawp a lo thlen hian puih dan tur an hre ṭhin lo. Thi mai turte hian anmahni hnaihtu mi tu emaw an mamawh ṭhin.
Kum engemawzat Pastor hna ka thawh chhungin, thi mai turte bulah vawi tam tak, tisa thil tak leh thlarau lam thil tak pawhin, anmahni puih dan ka lo zir chhuak tawh a. Anmahni hnemtu an mamawh a ni.
*I hlauh kha hmachhawn rawh*
Mi tam tak chuan thihna hi an hlau-chuvangin thi mai turte chu pumpelh an tum ṭhin. Thih i lo hlau ve pawh a ni maithei. Mitthite bulah vawi engemawzat ka lo awm ve tawh a, an pangngai viau hlawm. An taksa chu a lo muang tial tial a, a tawpah chuan a lo tâwp ta a, kan bula awm kha reiloteah chuan an awm ta lo a ni. Engmah hlauh tur a awm lo. Thil dik lo sawi i hlau a ni maithei. I sawi emaw sawi loh emaw kha a pawimawh lova. Thihna kotlanga dâk mekte hian an bula awm turin an mamawh che a ni.
*I taksa kha tûn atan hlan rawh.*
Thi mai turte hian hmuh theiha i awm kha an mamawh. I lo ṭawng ve kher pawh a ngai lo. Tu emaw bulah ṭhu la, an phal a nih chuan an kut kha vuan la. A nih loh pawhin lehkha chhiarsak la emaw, an awmna hmunah khan laptop inchhawpin i hna thawk rawh. Awm ve kha a tawk mai. An hnenah Pathian a awm a ni tih hriattir rawh, "A ni, thihna hlim kawr ruam zawh mah ila, thil ṭha lo reng reng ka hlau lo vang, nang ka hnenah i awm si a," Sam 23:4.
*Thiltihin ṭanpui rawh*
Tih tur ṭul apiang ti rawh. Chhuah a ngaih leh chhuak la, a hnung zutsak la, ei tur siamsak rawh. Tih tur ṭul i hre lo a nih pawhin, zawt mai rawh. Bible chuan, "Chak lote chu ṭanpui ula, mi zawng zawng lakah dawh thei takin awm rawh u," (I Thessalonika 5:14).
*Thinlung takin thlawp rawh*.
Thihna kotlanga ding mekte hi an inchhirin, an lungngai emaw, an hlau emaw a ni thei. Chu an ritphurh chu i phurhpui thei a ni. "In ritphurhte chu inchhawk tawn rawh u, chutichuan, Krista dan thu chu in zawm a ni ang," (Galatia 6:2). A tan i ṭawngṭai thei a, Bible i chhiarsak thei a, lehkhabu i chhiarsak thei a emaw, rimawi i tumsak thei a ni.
*Inhawng takin thu zawt rawh*.
Hun tawp hmang mekte hian an awm dan leh an thil tawnte sawi an chak ṭhin. A chang chuan i chhân theih loh tur thil an zawt ang che a, chhânna ṭha ber chu thu zawh let hi a ni thei. Tuin emaw, "Ka thi dawn em?" a tih chuan, "Thihna hi engtin nge i ngaih?" tiin i zâwt lêt thei. "Engvangin nge he thil hi ka chungah a lo thlen?" an tih chuan, "I chunga lo thleng hian eng angin nge a khawih che?" tiin i zawt dawn nia. Thufingte 20:5 chuan, "Remruatna chu mihring thinlungah tui thuk tak ang a ni a, nimahsela, hriat thiamna nei chuan a phawrh chhuak ang," a ti.
*Chhungkua pawhin mamawh an nei tih hre reng rawh*.
Thi mekte chhungkaw zing aṭangin ṭanpuina mamawh an awm thei-entirnan, eirawngbawl, in tihfai, muthilhsek emaw, inbualfai emaw. An thil zawh hreh mahse i zawha ṭha an tih deuh tur chu, "I puala vuina inkhawm hman dan turah duh dan i nei em?" emaw thurochhiah i siam em?" tih te hi. I ṭhian thi mai turte i ṭanpui theih dan tur chu an chhungte ṭanpui hi a ni.
*Isua lam hawitir rawh*
Thil pawimawh ber chu i ṭhian chuan chatuan hmun a lut dawn a Pathian tawk tura buatsaih a ṭul a ni. Chu chu Isuan thlaraua a tihdam chauhin a awm thei a ni. Davida tih ang hian ti turin i ṭhian chu fuih ve rawh.; "Thihna hruihrualte chuan mi zem a. Aw Lalpa, khawngaih takin ka nunna hi chhan him ang che," tiin (Sam 116:3-4).
Kristian nun hi mi dangte tana inpek zira Isua anga awm hi a ni. Chutianga tih dan mawi ber chu thi mai turte hnem hi a ni.
Ngaithtuah zui atan.
Hnem han tiha harsa i tih lai ber eng nge ni? Thi mai turte hriat i nei lo a nih pawhin engtin nge hetiang hian i tih ve ṭhin ang?
Thihna chungchangah hian eng ber nge i hlauh? Chu hlauhna chu engtin nge i hmachhawn ang?
Thlaraua tidam tur chein Pathian i pawm em? Kristian i ni tawhsa a ni maithei a, i thinlung chhung khawi lai berin emaw tihdam a mamawh em?
[ *Lettu: Marova Punte* ]
No comments:
Post a Comment