Sum enkawl dan
- Rick Warren
- July 23, 2022
"Mi tinin ui chunga pe lovin, pek loh theih loh anga ngaia pe hek lovin, an thinlunga an tum ang zelin pe theuh rawh se; Pathian chuan hlim taka petu a ni a hmangaih ni." 2 Kor 9:7
Thilpek chungchangah hian Pathian hian eng nge kan pawisa ipah awm tih aiin, kan pekna thinlung hi a ngaihven zawk. A duh tak zawk chu i hausakna aiin i duhna tak tak zawk kha a ni.
Bible chuan 2 Korinth 8:7-ah, "Mi tinin ui chunga pe lovin, pek loh theih loh anga ngaia pe hek lovin, an thinlunga an tum ang zelin pe theuh rawh se; Pathian chuan hlim taka petu a ni a hmangaih ni" a ti a. He châng hian thilpek kan pek laia kan thinlung puthmang tur chi li a sawi a ni.
*1. Ngaihtuahna fîm nen pek.* A thawh thut a pek ching lo la. Thilpek chungchanga a rau ber chu i ngaihtuahna i sen a, i tawngtai a, i rilru i siam hi a ni. I thilpek kha Pathian chuan i nuna pawimawh leh awmze nei ni turin a duh a, chuvang chuan ruahman lawk thin tur a ni.
*2. Phur taka pek.* "Ka pek ngei ngei a ngai" tih zawngin ngaihtuah suh. Mi thilphal i nih avanga Pathianin i nuna thil ropui tak tak a tih tur hre chungin pek thin tur a ni.
*3. Mahni duh thu ngeia pek.* Miin pe ngei ngei tura an nawr luih che chuan, pe suh. Khatiang thilpek kha Pathianin mal a sawm dawn chuang lo. Mahse Pathianin pe turin a duh che nia i hriat chuan, chu chu mahni duh thu ngeiin phal taka pek hun chu a ni.
*4. Lawm taka pek.* Hlim takin pe la. Greek tawnga 'thilpek' tih thumal tobul hi 'hlimawm' tih thumal nen an tobul a inang tlat zuk nia! Pathian hian amah leh midangte thilpek nuam i tih hi a duh zawng a ni.
Pek tur a ni em emaw, engzat nge ka pek ang aw tih i ngaihtuah leh chuan, Pathian ngaih pawimawh ber chu i thinlung kha a ni tih hre reng la. Ngaihtuahna seng chungte, phûr takte, i duh thu ngei leh hlim taka i pek hian, chu tak chu Pathianin mal a sawm tur thilpek chu a ni tih i hre thei ngei ang!
Ngaihtuah zui atan...
Pathian chuan ngaihtuah chungte, phûr tak te, duhna nen hlim taka pe thin turin min duh a. I tan heng pali zinga mi hi eng hi nge har ber le? Eng nge awl ber ni bawk? A chhan eng nge?
Pek loh theih loh anga ngaia i awm changin eng tianga lo dawnsawn hi nge tha ber?
Tuna thilpek i pek dan leh thutlukna i siam thinte hmangin i thinlungah Pathianin engtin nge hna a thawh le?
(Lettu: Msa)

No comments:
Post a Comment