Sum enkawl dan
- Rick Warren
- July 24, 2022
"Tin, ka Pathian chuan, Krista Isuaa a ropuina ngahzia ang zelin, in tlakchhamna tinreng pawh a phuhruksak ang che u." (Philippi 4:19)
Vawiin hian mi ropui tak niin, naktukah erawh mi laktlak loh ber i ni leh nghal thut thei bawk, ni khat thil thua mi hausa tawntaw, a tuk leh a leiba tam tak nei leh nghal thei ang chi kha. Eng anga tam thawk chhuakin leh eng anga tam pawh dah khawl mah la, kan sum dinhmun hi englai pawha danglam thei reng a ni.
Chuvang chuan i lungngai ṭhin a ni. Mahse engtin nge Bible hian sum avanga lungngaihna chungchang a sawi le?
*1. Thil âtthlâk tak a ni.* Matthaia 6:25-ah chuan heti hian kan hmu, "Chuvangin, ka hrilh a che u, 'Eng nge ka ei ang a, eng nge ka in ang aw?' tiin in nunna thu leh, 'Eng nge ka silhin ka fen ang aw?' tiin in taksa thu lungkham suh u. Ei tur aiin nunna a thupui zawk lo vem ni? Silhfen aiin taksa pawh a thupui zawk lo vem ni?" Hlauh zawng tam tak i la hmachhawn ang. Mahse sum lama tlakchhamna hian hneh che suh se. Hringnun hi thil lakkhawm vak vak lam a ni lo. Thil pawimawh tak tak te chauh ngaihtuah rawh.
*2. Thil pangngai a ni lo.* Isuan mipuite hnenah Pathian thilsiamten lungkham tur reng reng neih a ngaih loh thu a sawi: "Chungleng savate hi en rawh u; buh an tuh lo va, an at hek lo, buh inah an seng lut hek lo; nimahsela in Pa vana mi chuan a chawm si a. Nangni chu anni ai chuan nasa takin in hlu zawk lo vem ni"?(Mat. 6:26)
*3. Ṭhil ṭul a ni lo* (Mat. 6:30). Pathian leh kan hnena a thutiamte kan hriat fuh tawk loh avangin sum lamah hlauhthawnna tur a awm lo. I mamawh apiangah mawhphurhna a la zel a. Heti hian Isuan a ti, Matthew 6:28-30 "Ram tuktinpar thanzia hi tha takin ngaihtuah rawh u; hna an thawk lo, la pawh an kai hek lo; nimahsela ka hrilh a che u, ... Chutichuan, ram hnim, vawiin anga nung, a tuka thuka tuah leh mai tur mah Pathianin chuti kauva a chei chuan, aw nangni rin tlemte u, silhfen a pe zawk em em dawn lo che u em ni"?
I lungngaih khan Pathian chunga i rilru put dan a dik tawk lo a ni mai thei. Pathianin a ngaihsak dawn a ni a tihah khan mawhphurhna lak i tum tlat a ni thei. Philippi 4:19-ah chuan heti hian Paulan a sawi, "Tin, ka Pathian chuan Krista Isuaa a ropuina ngahzia ang zelin, in tlakchhamna tinreng pawh a phuhruksak ang che u."
I nuna thil thleng leh i sum neih zat Pathianin a hre vek. I dil hma reng pawhin i mamawh a hria. A chungah rinna i nghat thei ang.
Ngaihtuah zui atan.
A chang chuan he khawvelah hian pawisa hi a pawimawh ber niin a ngaih theih. Mahse i nunah khan sum ni lo eng nge pawimawh le?
Engtin nge Pathian chunga rinna nghah leh sum leh paia rinawmna i kal kawp tir?
Sum lama i lungngaih hunin Bible thu engte'n nge fuih thar ṭhin che?
[Lettu: Mapuia Fanai]

No comments:
Post a Comment