Sum Enkawl Dan
- Rick Warren
- July 10, 2022
"Mahse kei zawng hausakna hi ka lawmna a ni lova, nang hmuh che leh nang nena kan inkar a ṭha a ni tih hriatna hi ka lawmna a ni si a. Vanram ka thlen hun chuan ka lungawi tawh ang, hmaichhana ka hmuh dawn che avangin." (Sam 17:15, TLB)
Nun hi engnge ka neih tih lam a ni lo. I thil neihte chunga rilru put hmang dik tak i neih kha a ni- chutiang a nih loh chuan i neih thilte khan i nun an luah khat hlauh ang. He leia i neih thilte khan chatuan an daih dawn lo tih i hriat a ṭul a ni.
Luka 12:15-ah chuan Isuan heti hian a sawi, "Tin, an hnenah, 'Fimkhur ula, awhna reng reng lakah chuan inveng rawh u; sum ngah hi mihring dam chhan a ni lo ve,' a ti a."
I hlutna kha i sum neih tam zawng aṭangin teh ngai suh. I hlutna kha i thil neih hlutzawng nen a inzawm niin ngai hek suh. Kan neih thilte hi hringnuna kan tana thil hlu ber an ni lo tih hria la. He khawvelah hian engmah i luhpui lova, engmah i chhuahpui hek lovang. Hringnun hi engnge kan neiha engnge kan hlawh chhuah tih lam a ni lo; midangte nen eng inlaichinna nge kan neih tih leh Pathian leh midangte hmangaih dan zir chungchang a ni zawk.
I nun kha he khawvel thilte ngaihtuahna tur a ni lo tih hriat reng theihna chu chatuan thilahte kan nun kan pek hi a ni. Engte nge chatuan daih tur chu tihah i rilru sawrbing la. He lei kan thil neihte hi chu rei lote atan chauh an ni a, chuvang chuan thil neih tam lamah i nun innghat suh se. Thil pahnih chauh chatuan daih tur an awm: Pathian thu leh mihringte.
Duh thlan tur i nei. He khawvel hi chuan hlimna nei tur te, hlawhtling tur te, mi pawimawh zawk ni turte, hlutna nasa zawk nei tur leh him zawk turin thil i neih tam a ngai a ni tiin a hrilh che a. Chuvang chuan duhthlanna i siam a ngai: Madison Avenue (mi hausate sumdawnna hmun lian) nge i Lalpa i ngaihthlak dawn? Mihringte nunphung nge Krista thu i ngaihchan dawn? He khawvel thu nge Pathian thu i ngaihthlak dawn? Pakhat zawk chuan i dam chhung zawng daih lungawi lohna a pe che anga; pakhat zawk chuan hlimna dik a pe ang che.
Sum leh pai tam tak neih tuma i beih hmain hei hi inzawt hmasa rawh, "Ka nun chhan ber engnge ni? Neih tam leh zual chauh em ni? Engnge ka ngaihtuah, engnge ka sawi, engah nge ka rilru ka pek? Eng atan nge ka nun?"
Han hawi vel la, sum leh pai chen tur tam tak nei i hmu nual ang. Mi larte leh sumdawnna lama mi hlawhtling tam tak i hmu ang. Heng mite bank account-ah chuan sum tam tak a haw lut pur pur reng a. Chen tur tam tak an nei, nei tam vak lote pawh an awm thei tho.
Nang engnge i nih le? Chen tur tam tak i nei mai thei, mahse nun chhan tur i nei em? Pathian nen inzawmna ṭha i nei em? He khawvel chuan i nei vek thei alawm tiin a bum che a. Thu dik tak zawk chu, thil zawng zawng i nei thei lo- chu aia pawimawh zawk chu, hlimna nei turin heng hi i neih vek a ngai lo tih hi. Hlim i thlan phawt chuan i hlim thei a ni.
Hlimna thurûk chu i thil neihahte ni lova tu ta nge i nih tih zawka himna leh lungawina i zawn hi a ni. Chu chu Kristaah i hmu ang.
Sam 17:15-ah chuan hei hi kan hmu, "Mahse kei zawng hausakna hi ka lawmna a ni lova, nang hmuh che leh nang nena kan inkar a ṭha a ni tih hriatna hi ka lawmna a ni si a. Vanram ka thlen hun chuan ka lungawi tawh ang, hmaichhana ka hmuh dawn che avangin." (TLB)
Ngaihtuah zui atan.
Pathian nen in len dunna nun tichak zawnga ke pen si lovin eng hmuh theih leh hmuh theih loh thilte nge neih tuma i tlan ṭhin le?
Hlawhtlinna emaw nihna sang zawk emaw neih tumin engtinnge midangte nen in inlaichinna i hralh ṭhin? Chung inlaichinna chu nei let/siamṭha leh turin vawiin hian engnge i tih ang?
"Engkim neih" ah hian i lungawi em? Engvangin?
[Lettu: Mapuia Fanai]

No comments:
Post a Comment