Friday, July 29, 2022

CHHUNGKUA ṬHANGLIAN TURA AN INṬANPUI TAWN DAN

 Inlaichinna tha 

By Rick Warren

— July 29, 2022 




“Kei Lalpa leh zirtîrtu mahin in ke ka sil chuan, nangni pawh in ke in insilsak tûr a ni. In chunga ka tih anga in tih vena tûrin entawn tûr ka siamsak che u a ni e.” [Johana 13:14-15] 

Chhungkaw ropui chhinchhiahna pawimawh tak chu, thisena i zawmpui chhungkua an ni emaw, fa lak anga i zawm an ni emaw, kohhran khata lawi in ni emaw – chhungkaw zia chu in ṭhanlen theihna turin in inṭanpui tawn ṭhin. Mahse, chutiang chuan engtin nge i tih? 

Mite an ṭhanlen theihna tura puih dan kawng hnih leh, a tihhnufum dan kawng hnih ka han sawi teh ang. 

In intisawt tawn ṭhin hetiang hian: 

1. *Entirna hmangin*

Hetiang hian Isua khan a zirtirte chu a kawhhmuh ṭhin. Johana 13: 14-15 chuan hetiang hian a sawi, “Kei Lalpa leh zirtîrtu mahin in ke ka sil chuan, nangni pawh in ke in insilsak tûr a ni. In chunga ka tih anga in tih vena tûrin entawn tûr ka siamsak che u a ni e.” tiin. I fate khan thuhril/thusawi (sermon) ngaihthlak chu an ning fo ang. I nunah Isua hmel erawh an hmu reng duh ang. 

2. *Thil sawihona hmangin*

Mihring nunin a thil paltlang ṭhin khirhkhan pui puite chu, i fate nen in sawiho lo a nih chuan an ṭhanlen theihna hun ṭha i bawhpelhtir a ni. Vanduaithlak takin, nu leh pa tam takten an fate thil an sawipui ho chu, hun bi te, ei in thu te, zirlai te an ni a,  mihring nuna thil pawimawh tak chu an hmaih fo.  

Deteronomy 6: 7 ah chuan hetiang hian kan hmu, “ngun takin in fate zirtîr ang che u. In chhûnga in ṭhut lai te, kawnga in kal lai te, in mut dâwnah te, in thawh dâwnah te sawi sawi ang che u.” tiin. 

Hetiang hian an ṭhanlenna i dal thei: 

1. *Sawiselna hmangin*

Mite tihthinrim chu a sawt ngai lo. Anmahni sawisel pawh awmzia a awm tak tak lo. Midangte siam tha tur chuan anmahni dem leh sawisel chu a hlawk ngai lo. Eng vangin? A chhan chu mite i sawisel chuan, i thil duh aiin i thil duh loh zawk chu i thlir ngar ngar tihna a ni.  

Ephesi 6:4 chuan hetiang hian a sawi, “Tin, nangni pate u, in fate tithinur suh ula, Lalpa zirtîrnaah leh thununnaah enkawl zâwk rawh u.” 

2. *Khaikhinna hmangin*

Mitinte hian danglamna kan nei. Khawvelah nangmah ang mihring an awm miah lo. Chuvang tak chuan, midang nena mi tu emaw khaikhin chu engmah awmzia a awm ngai lo. Dik tak chuan, inlaichinnaah hian a hlauhawm zawk hial. Bible chuan hetiang hian a sawi, “Mi tinin mahni thiltih enfiah ṭheuh zâwk rawh se, mi dang nêna inteh lovin, mahni thawh tâwk tê têah lâwmna tûr in nei thei ang;" [Galatia 6:4] 

Bible pumpui hi, mite an chenho dan tur leh an in en dan chungchanga inkaihhruaina leh entirnain a khat a. Dik tak chuan Bible-ah hian “tawn” [one another] tih chu vawi 58 lai kan hmu – entirnan, inhmangaih tawn, induhsak tawn, in ṭawngṭaipui tawn, infuih tawn, inṭanpui tawn, thurawn inpe tawn leh inpui tawnin tihte a awm. 

Chu chu Pathianin min siam dan pawh a ni ve chiah. Thuthlung Thar lamah chuan hetiang hian min fuih bawk, “Chuvângin, inthlamuan tawnin, intichak tawn rawh u, in tih fo ṭhin ang hian.” [I Thessalonika 5: 11] 

Ngaihtuah zui atan. 

Vawiin emaw nimin lam emaw a i chhungte nena in thil sawiho kha han ngaihtuah let teh? Mihring nuna thil pawimawh tak chu in sawi chiah em? A nih loh chuan, engtin nge in intihsawtna lam thu in sawiho theih ang? 

Fa nei i nih chuan eng thil avangin nge i fa chu i zilhhau? Nungchang dik lo pu lovin i nitin nunah i fate entawn tur nun ṭha chu engtin nge i lantir? 

Mite khaikhin emaw sawisel emaw lovin engtin nge in chhungkua chu in intihsawt tawn theih ang? 

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...