Saturday, August 23, 2025

HARSATNA LAIMU CHHUI DAN

_I Khawthlir Dan Thlak_

- Rick Warren 
- August 23, 2025
_"Thil dang bera aiin i thinlung veng ṭha rawh, nunna lo chhuahna a ni si a."_ (Thufingte 4:23)

Huan neih nuam ti mi ka ni a, huan nei ṭhin chuan hnim ninawmzia kan hre ṭheuh awm e. Hnim paih fai ka duhin chemin emaw ka sam satliah mai ngai lo. A zung thlengin ka pawt chhuak ṭhin. A zung tel lova a kung chauh ka sah chhum chuan a rawn ṭhang duah ṭha leh ngei ngei dawn. 

Chutiang chiah chu khawvel harsatna te hi an ni. Miin harsatna sukiang turin nasa takin an bei ṭhin. Mahse harsatnain a hrin chhuah chauh an bei a, a bul ṭhut, a zung an pawih fai tel loh avangin a reh tak tak thei ṭhin lo.

He khawvela harsat bul ber, a zung hi tumahin an la thleng pha lo. Kawng ṭha leh zahawm takin bei ṭhin mahse a tawk zo ngai lo. Bible chuan heti hian a ti, _"Thinlung hi thil zawng zawng aiin Bumhmang ber, chhe lailet der ani a; Tuin nge hre thiam thei ang?"_ (Jer. 17:9)

Zirna hmangin beih han tum mahla harsatna bulṭhut tak tak i thleng zo chuang lovang. Zirna kawngah i thleng sang hle a ni thei, mahse chu chuan i nungchang a tidanglam hauh lo.

Sum leh paia hmasawnna hmangin han bei teh, chu pawh chuan a bulṭhut a thleng phak lo. Lo thleng phak ta se, khawvela mi hausa ber ber te hi harsatna nei lo an ni ang chu, mahse an ni hauh si lo.

Rilru lama beihna pawh hian a zung a thleng phak lo. Ni e, a ṭangkai alawm, miten nun thawvenna tlem an neih phah a, mahse hahna leh buaina ata zalen tur chauha siam kan ni lo. Chhan nei, tihtur neia siam kan ni.

Kan khawsakhona kawnga kan beihna pawh hian a lairil a thleng zo lo. Tunhma aṭang tawhin miten kan khawtlang nun siamṭhat tumin an lo bei tawh. Mahse kum zabi 21-naah ngei pawhin mi tlemte chauh an inthlak danglam a ni tih kan hmu.

Taksa enkawlna lam zir mi chuan harsatna zawng zawng hi damdawi emaw awmze neia enkawl emaw hian a tibo thei niin an ngai a, tunlai thiamna lama zir mite chuan thil thar siam chhuah thiamna hi chhandamna ang hialah an ngai bawk. An zavai mai hian hringnunah hmun pawimawh tak an chang. Mahse tumahin harsatna bulpui an thleng phak lo.

Danglamna tak tak leh daih rei tak thleng tur chuan thinlung aṭanga a inṭan a ngai. Chu chu Pathian hnathawh dan a ni - kan chhungril aṭanga kan pawn lam siam danglam hi.

Pathian hi mi, thleibik neite hmangaihna nun nei tur leh huatna nun neitute mi ngilnei a siamtu, mahni hmasial te midang ngaihsakna nun petu a ni. Eng dan mahin midangte hmangaih turin min zirtir ngai lovang. Pathian chauhin a thei. Danglamna chu Thlarau Thianghlim puihnain thinlung aṭanga inṭan a ni. Thufingte 4:23-ah heti hian kan hmu, _"Thil dang bera aiin i thinlung veng ṭha rawh, nunna lo chhuahna a ni si a."_ 

Harsatna bul hi kan thinlungin harsatna a neih a ni. Kan thinlunga danglamna a awm loh chuan rei tak daih danglamna a thleng lovang.

I thinlung engnge a an? Mite an harsatnaa i puih hmain i nunah Pathian hna i thawhtir hmasak a ngai. I thinlung kha Pathian nen an inzawm chauhin mite an harsatna zawng zawng bul ber hre tu, thinlung thlak theitu Isua i kawhhmuh thei ang.

Ngaihtuah zui atan.

Chanchin thar i ngaihthlak emaw i chhiar emaw khan ringtu i nihna angin engtinnge i dawnsawn?

Isuan i thinlung a tihdanglam thu i lan chhuahtir theih dan ṭha ber engnge?

Ringtu i nihna anga khawvela thil ṭha tih neih hi i mawhphurhna niin i hria em? Vawiin hian Pathianin khawiah nge bulṭan tura a duh che ni a i rin?

*Isua hnena i thinlung hlan tura i inpeih chuan heti hian ṭawngṭai rawh le:*
"Ka Pa vana mi, min hmangaih avang leh chatuana i hnena ka chen ve i phal avangin ka lawm e. Ka phu lo a ni. I lakah thil sual tiin ka duh dan angin ka nung a, i ngaihdam ka dil e. Ka tan Isua thi tura i rawn tirh avangin ka lawm e.

"Isu, vawiin hian ka Lal leh Chhandamtuah ka pawm a che. Rorelna lak ata min chhanhim avang leh Pathian hmaa pawmtlaka min siam avangin ka lawm e. Nun thara nunga chatuan nun min pek avangin ka lawm e. Eng dang zawng aiin min hmangaih avangin ka lawm e. Isu, i tan ka nun ka pe e, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...